ANNEM- 28

Chapter- 28

‘Min ngaihtuah suh…Ka tha ania.Ka lo let lehnghal ang ka tih kha’ Sangkima’n a ti leh sup. Ka hnaih ber thutthlengah min thut tira, a nu lam a pana..Ka chhaw muah muaha, ka beng a kiu chum chumin ka hre lawi.

‘Nu,ka zui phawt ang. Min ngaihtuah suh,Tea…Hruaizela call nghal la, tunah ka mamawh tih hrilh la’ a ti nghal zung zung. A awmdanah chuan thil thlengin a thawng lem lo tih achiang vek. Mahse, kei erawh min thawnga, ka nu thinrim zia ka hre tho chungin tiang thil hi chu a thlen tir ka lo ring lo.

Sangkima te inzui chhuak chu ka thlir mawl tawp. Motor thawm ka hriat rualin ka beng ka hup nghal vat.

Dimtein ka samah tu emawin a rawn khawiha, ka en vat. Sangkima nu a lo ni a, a hmeltha leh zahawm takah chuan angaihtuahna engmah alang chhuak lo. A mitah tak pawh ka en ngam lo,keimah vangin a fapa an mana,vawikhat mai ni loin vawihnih..A hmasa zawk erawh a hria angem ka hre lo.Engpawhnise tu nu mah hian an fapa,thiam lohna nei si lo man tirtu chu an ngaizam mai maiin ka ring lo.

‘I rilru tihah suh,a lo let leh mai ang’ ka beisei loh zetin a ti dam thlapa.Nelawm takin a nui bawk.

‘Lo kal rawh le,thil ei la..’ amah bawkin a ti leh a. Thil eitur ka ngaihtuah zawngin ka luak a chhuak nghal hlui thei.

Dinning Room lian leh nalh zetah min hruai luta, min rawn kotu tleirawl kha a lo awm a. Dawhkanah eitur a lo chhawp chhuak mek.Amah aia upa zawk tur pakhat a awma, hnamdang tih hriat tak Mipa,kum 40 bawr vel tur a lo awm bawk.

Sangkima nu nen chauh thil kan ei a, Apa kha chu Sangkima nau nen an inzui chhuak ve nghal tih ka hria; mahse,a farnu te pahnih leh a fapa ka la hmu miah lo. Sangkima nu khawsa ziaah chuan afapa an man vanga thinrimna emaw ka laka lungawi lohna lam reng reng alang lo. A dam thlap renga, a hmel a nelawm sarh reng bawk.

Thil ei chakna pakhatmah ka nei lo,mahse a mawiah tlem tal ka ei angai tih ka hriaa,ka eilui hram hram a ni ber.

Thil kan eizawh hnu lawkah Motor thawm ka hriaa,ka hawi phawk nghal hra mai. Motor kawngkhar inkhar ri dawt ka hre leha, Kawngkharah Sangkima a lo luh mai beiseiin ka melh reng bawk. Mahse, kawngkhar a rawn inhawn rualin Mipa naupang ria thel thawl a rawn tek lut nalh.A hnungah Sangkima nau hmeichhe pahnih an rawn inzui lut ve nghal bawk.

‘Nu..Oh…’ an teber hmeichhiain min hmuh takah chuan a ti halha. Lai angreng fein a nui nghal var var.

‘In lo thleng maw? kut insil em? ‘ Sangkima nuin a ti a.

‘Sil,mahse Naunaua kha chuan a sil lo’ amah bawkin a ti leh a. Sangkima fapa ner nang chu ka en a.

‘Sil lutuk,bakah Sanitizer pawh ka hmang tha vek. Pi,khawnge apa?” a ti tham chhal. En ringawt pawhin a derthawn hmel ngawih ngawih.

‘Hna pawimawhah a chhuaka, I pu leh Uncle nen..Tunah chuan i thawmhnaw thlak la, thil ei turin lo let lehnghal tur aw’ nui var var chungin a ti a, a tupa samah a tuai sak pah zauh.

‘Mami,hei hi Anuni anih hi..Chuan,Bawihi..ka fanu te pahnih annia. A upa zawk hi Rosangpuii,Mami tiin kan kova, a nau hi Rodinpuii ania. Tete-i.Ka fapa pakhat zawk chu zingah i hmuh tawh kha, Rohlua ania..Tea tiin kan ko bawka ’ zangkhai takin a ti a. Ka hming a sawia, tunge ka nih erawh a sawi lo. Ka hmel landan mak zet vangin mak an lo ti deuh anih pawhin engmah an hmelah alang lo.

Hmel hlim takin min rawn chibaia, tu nge annih leh an hming nen lam ka hriatsa vek anni tih hria se engtin tak ngai ang maw? Sangkima hian kan inhmelma thin tih a hrilh angem? engkim an hre vek tih kha a sawi ngeia, mahse kan pahnih chungchang bak enge a hrilh ang ka hre der lo.

‘Ka inbual anga, thil ei zawhah chhuah leh lawk ka ngaia’ a upa zawk,sam uk kharh leh hmel zahawm takin a nu hnenah a ti a, a miteng dum fiah zet chu a nu leh a u ang bawkin afin hmel takzet.

‘A that chu. Mamawh ka nei nuala, rawn lei nghal la.List ka lo siam ang’ a ti let ve a. Living room veilama inhnuai panna Step a pan pheia. Inhnuaiah an room a awm anih hmel.

‘Bawihi, tihtur tehvak a awm lo a.. I duh chuan Room lamah han hahchawl rawh’ min rawn en chungin a ti a.

‘Aih, ka tha alawm’ ka ti sap. Diktak chuan ka awmdan a lai laklawh vel hu a, Rooma tawmreng niin ka hre lova,hetah pawh nuam ka ti chuang lo.Inru ang chu kan ni ve maia,mahse thil thlendan buarchuar lutuk vangin ka thawpik vek.

 ‘Ok,I thu thu le..Tihtur vak a awm ka ring lova, I nin ka hlau deuh mawle. I duh leh pawn lamah te va teikual vel la..’ a ti leh a. Ka bu nghat.

‘Ka lo kalpui ang che..Ui hmelchhe deuh kan neia, mi bauh a hrat’ rawn zuan thawh tharh pahin Tete-in a ti vat.

‘Thil ei hmasa la mawle’ a nuin atia.

‘Aih, kan chhuahnaah ka ei a. Lunch hunah law lawah ka ei mai ang..’ a ti awlsam et.A sam kir chiat chu a chet zawngin aphe dar dar bawk.

Pawnah ka inzui chhuaka, nizan kan thlen hun kha zanrei tawh anih avangin enkual chiamna hun kha a awm lo a. Khaw enga han hmuh takah chuan ka lo dream thin In ka hmu a ni hawt mai. Tetei sawi lawk ang ngeiin Bull dog hmelchhe lutuk tak mai an lo neia, hmelhriat ngai loh min hmuh veleh a bauh nghal vak,ka phu nasa ngang mai bawk. Mahse, Tetei’n a hau that thata. Min rawn hnaih lo hlauh.

‘Kan khung bet lawk ang aw, awmngaihna a hre lo leh dawn tlat’ nui seng chungin a ti a. Ka bu nghat, minute tlemte liamta maiah kan inhmu a, mahse a mize nu dem leh dam dap mai chu ka ngaina nghal titih tlat.

Tetei kalsawn laiin ka lo hawikual vel mai maia. Gate lianpui bulah Duty pakhat a thu ka va hmu a,nizana Gate rawn hawngtu kha chu a ni lo tih ka hre thei. In lam ka hawileta,Veranda lian leh zau tha hemhawm tak an neia,an in hi kawtzawl atangin a kang deta,verandaa chho turin Step lian tha tak tak pali zawh chhoh angai.. An kawtzawlah Checker tile kan tih ang chi kha an phah chhuah veka, a sir zai zaiah phul a awm kual a. Phul sira bang hungna hrulah  Pangpar dahna fel fai thlapa siam a awm kual chhuak veka.Pangpar chi hrang hrang mumal takin a inrem tlar put bawk.Thlang lam depah Motor pali a inhunga, Bullet bike leh Scooty a awm tel bawk.Kawt zawla thinghnah tla deuh nuaih chu nu valai tak pakhatin a lo phiatkhawm mawlh mawlh bawk.

‘Lo kal la, inhnung lam ka entir ang che’ zangkhai takin a ti a. Inhnung lamah kan chhuak pheia,step tlemte kan zawh thlaa, lungphah vek kawng tawite zawhin in kan hel hreta, Thir gate a lo awm a, a hawng rak rak.

‘Helai hmun hi kan Compoundah chuan ka ngaina ber’ a ti nghal halh. Swimming Pool lo awm ka hmu nghala,a sirah thut mutna chi a inhung tlar thap. Nihliap lian pui pui pahnih inparh sain a lo awm bawk. Pawn lam atanga hmuh mai mai theih loh turin bang sang takin an hung chhuak veka, chumai bakah Ashoka Tree a khat mawi tawkin a ding khap; hei hi chu kawtzawl lamah pawh khan a intlar phei vek.An Compound hualin an dah anih ka ring ve tawp.

‘A nawm hmel hle mai’ ka ti sap.

‘Um,nia nuam ve lutuk..Kum 18 ka tlin kumin Mama’n min siamsaka’ a ti leh siam siam.

Inchung lam ka thlir chho a, Sangkima Room awmna zawn vel kha a hriattheih mai. Balcony awmna lai kha a rawn dawkchhuak bik a, a hnuaiah Swimming Pool a awma.Inhnunglam atanga Swimming Pool panna niawm tak Kawngkhar a awm leh bawk. Kan in ka mitthlaah ka nu lama ka Cousin, Matty pasal Abela te in a lo lang zawka. An insak dan kalhmang a in ang lek lek.Mahse, Sangkima te in hi a lian zawka, bakah a Building sak dan leh inchhung pawh a tunlai zawk.Mahse, an compound cheibawl dan a in ang thuak.

Veranda lamah kan inzui phei leha, uluk takin Gate a khar leh thlap.Kawtah a nu leh a u an lo ding duna, an lo inbe mawlh mawlh.

Roomah ka thu a, sana ka en a. Dar 11 a ri tawh. An hruai atang khan darkar a liam teuh tawh. Ka awm a nuam lo ngawih ngawiha, ka luakchhuak vangin ka buaia, ka luak tak tak thei bawk si lo nen ka uak chau vek nimaiin ka hria. Sangkima nu leh a naute an nelawm em em chungin ka tan chuan vawikhat ka hmuhna ve mai anni a. Zankhat chauh ka la awma, an tan chuan mikhual ang chauh ka la ni ang tih ka hria. Awmdan tur ber ka hre lova, nuam ka ti lo ngawih ngawih animai. Ka ngaihtuahnaah Sangkima bak a leng mang lo.

Luakchhuak bawkin min rawn hnawh leh a, hmanhmawh lutukin Bathroomah ka tlan luta, ahma ang bawkin luak tak tak thei si loin ka chauh hnep thleng ka uak leh chiam.Bathroom chhunga Darthlalangah ka in en a, ka mittui tlakna vangin ka mit a sen rama, ka hmai belkang bakah ka mut that loh vangin ka mit hnuai a val kual raiha, ala duk zui bawk. Ka landan nalh lo leh lutuk chu lungawi lo zetin ka rum hak..

Bathroom atanga ka chhuak chiah tihin Room kawngkhar a rawn inhawng ve chiaha. Ka beisei loh lutukin Sangkima a rawn lut nghala. Ka ding chawt mai.

‘Sangkim…’ ka ti halh ringawt.

‘Um,ka lo haw leh vat ang ka tih kha’ a ti dam thlup. Harhchhuak thut ang maiin ka che nghal phat,ka pan phei ; ani pawh a rawn pen ve pawk pawk tho. Zah pawh sawi thei loin a nghawngah ka kuah chawt. Min pawm kang nghal nawlha, tlak hlauin a kawngah ka kherhbet a, a darah ka hmai ka phum nghal zat.

‘A tha vek e..Hlauthawng miah suh’ a ti sup.. Ka hnungah a chul zui nghal hauh hauh bawk.

L shape sofa awmah kan thu duna, ka kut a hum vang vang.‘Pawi ka ti’ ka ti sep. Diktak chuan ka inthlahrung ru ngawih ngawih Dawt hmanga mantir tu ka nu a ni tlata.Inthlahrung lo thei ka ni lo..

‘Theihnghilh rawh..thil i ei em?” a tih zawm daih.

‘Um…ei e,Engtin nge tih zui tur?” ka ti ve sap.

‘A fel vek…Engmah tihzui tur a awm lo’ a ti nghut. Hrethiam chiah loin ka en a.

‘I nuin FIR kha a pawtkir leha’ ka ngaihtuahna hria niawm takin a ti leh sup. Mak ti zetin ka mengphawk nghal vak..A thiltih tawh lama rilru thlak mai mai ngai lo a ni tih ka hrechianga, engvangin nge FIR a thehluh tawh a lakkir leh ngawt le?

‘Um…I thinrim em? ‘ ka ngaihtuahna ni lo lam ka sawi chhuak thung.

‘Engvangin maw?” a ti dam thlup.

‘Kei leh ka nu vangin man i tawka’ nuam ti lo zetin ka ti hap.

‘Aah, atihtur a tiah ka ngai mai. Thinrimna tur a awm lo..Bakah,ka inbuatsaih lawk vek ka tih kha. Mahse, a pawtkir leh thut erawh tlem chuan mak ka ti deuha. Pawtkir lo pawh nise ka lo inbuatsaih lawk avangin harsatna liantham thleng tur erawh a awm lo ’ a ti leh duah.

‘Police ho khan engmah an sawi lo tihna mi?”

‘Sawi lo…A lakir leh duh tihzawng an sawi. Chuti anih chuan atha animaia,han zawh chiam pawh tul ka ti lem lo’

‘Um…Thil i ei em?”

‘Ei lo..Ka ril atam lo.Inbuala, muthilh ka duh’ tehdaiha.

‘I nawm loh hmel riau mai’ ka tawng hmain amah bawkin a ti leh nghut. ‘Ka uak nasa lutuka…’ ka ti zuai raih.

‘Khawngaihthlak reuh lutuk..Vawiinah Doctor a hman dawn lova, ka thian hnai tak anih avangin tilui ila chuan min hnial lovang. Mahse, an hun a tawt tih ka hriaa..Naktukah kan inentir mai dawn nia, tlaiah Bsa alo kal anga. Chumi hma chu inbual ila muhil vang vang vang ang.A tha em?” a ti leh sup.Tawngkaa chhang loin ka bu nghata; Ka sam chhawlleng ka bengah a rawn zepa, a mitmu dum fiah zetin min en a, a hmelah leh a awah min duatna chiang takin alang thei bawk.

Sangkima te inah thla hnih ka awm tling der tawh. Ka nuin inrukbona tiin FIR hial thehlut mah se Palai an va kal ta tho. Ka rin lawk ang ngeiin ka nuin a fanu ka nih tawh loh thu leh ka awmdanah engmah sawi tumna a nei lo tih a lo sawia. Ka pu leh Patea pawhin engmah sawitur an neih loh thu an lo sawi ve bawk.Ka beisei lawk ang chiah anih avangin mak ka ti lo.

‘I nuin engmah sawi duh lo mah se lungngai miah suh. I pazawn tur ka nuin a be vek tawha, anni hnenah man kan hlan anga, tunah inneih inkhawm engmah buatsaih theih a ni lo bawka . Pastor kan be tawha, inah hian kan innei ang’ Sangkima’n a ti leh hmiah. A sawi ang ngeiin karkhat pawh tling loah kan innei fel hman vek. Sangkima thiante leh chhungte bakah ka thiante Pathum an lo tela, ka man min dawnsaktu chhungkua an lo tel bawk.Inneih inkhawm mak leh dangdai tak kan hmanga..Ka lo dream thin inneihna ni lo mah se pawi tihna ka nei eih lo. Ka bula dinga,ka kut chelhtu Sangkima hi ka ringa, ka lungawi a ni tawp mai.

‘Tunah chuan tuman an lahrang thei tawh lovang che. Ka nupui ini tawha, I pasal ka ni bawka’ a ti supa. Dim leh duat takin min fawp zui nghal vang vang bawk.

Ka rai tirh lama ka huat lutuk kha a reha, ka tifuh lo lutuk anih loh chuan luakchhuak pawh ka nei ta meuh lo. Atir lam kha chuan ka thil ei ka pai thei lova, ka chauh lutuk loh nan Drip kan khai deuh seka, Sangkima nu leh a farnu te ka lakah an fel em em a. Min buaipui nasa takzet.Mahse, min buaipui nasat leh ka inthlahrung ting mai thung. Atthlak em em in keimah ang hian Amber-i kha an buaipui angem tih ka ngaihtuah fo..Ani pawh kha Sangkima fa pai ve tho a ni miaua..Mahse, ka awm ve tak hnu hian tuman Amber-i hming an lam rik ka la hre lo. Amber-i chhuah hnu lawkah kei ka lut ve a, chhungkaw buaina tam tak nen ka ni chungin min pawm thlap thei; Chhungkaw mak tak zawng anni ve chiang.Ka hriatchian hma atanga a hmel ka ngei ngawih ngawih Sangkima nau pawh han chenho takah chuan a lo sual lem lo tih ka hre chho ve zela, nitin inhmu kan ni bawka ka ngei pawh ka hre ta lo. Sangkima pa erawh pa tawngtam lo leh tawngkam bung tak mai a ni a. Tualthlah pawh hreh lo anga ka lo ngaih thin kha a ni a,chhungril tak atangin ka la nel hleithei lo thung.  

Inchhung enkawl kawngah Sangkima nuin thuneihna a kengkawh tha hle tih rei ka awm hma khan ka hrethiam nghal vek. Nu nelawm tak angin lang mah se thil duh uluk leh Strict tak mai a ni a. A sam a tawn fel thlap renga, a hmaiah Make-up lam chi hrim hrim hmuhtur a awm ngai miah lo.Eitur hunbi a ei bakah a ruala dawhkan kil angai mawimawh em em a, mahse inchhungah thuneihna sang tak nei chung siin an sumdawnna lamah a inrawlh miah lo thung. ‘Mipa hoin an ti a, ka ring tawk.Mami hian School a enkawla,ani pawh ka ring tawk. Lo telve a tul lem lo’ a ti hmiah…’ Inrawlh suh’ tih min hrilh lo,mahse sumdawnna lam sawive lo turin min duh tih ka manthiam..

A fate pali hi hrinhran anni tih awih harsa khawpin a enkawl a.An unaua nu leh pa an zahna lah haider theih loh khawpin achiang.Mahse, midang zawng zawng aiin Sangkima’n thu a nei zawk hle a, a nu leh pa pawhin engkimah a zai an ngai tih ka hrethiam nghal vat bawk. An fate mimal nun an zahsaka, tul tawpah lo chuan an sawisel miah lo niin ka hmu thung. An vaiin Roomah an tawm nasaa.An thiante lo kal pawh Roomah an hruai lut mai zel bawk.

Khuma thu mu chungin Sangkima insiam ka thlir dauh dauha. A T-shirt hak leh a kekawr tlema amah phuar deuhtu chu a inhmeh vel vek. A pian nalh zet chu khuhbo zo loin a tilangsar mah zawk bawk.

‘Pump hi vawiin chu tlemin kan buai deuh maitheia,mahse tlai lam chu ka hman tho ang..’ a phone khawih mawlh mawlh pahin a ti a.Tul lo zetin Malsawma ka hrechhuak zawk. Pump hi a lo chhuhsak tehreng em tih ka ngaihtuah chhuak zeuh zeuha, mahse tun thlengin ka la zawt ta lo.

‘I buai viau chuan keimahin ka kal thei reng ania aw’

‘Buai mah ila in entir tura reilote hun insiam thei lo khawp chuan hna a pawimawh lo..’

‘Aaa, ka inthlahrung ve a’

Min rawn en a, a mitmeng vawt ruih leh a hmelpa zetah chuan thil eng emaw alang zawk.Mahse, a rei lo..

‘Nangmaha kal tir tur khawp chein ka inthlahdah lo tih i hriat kha’ a ti nghut. A sawi tum ka hria…

‘Enteh….’ Ka ti hman chauh tihin a ban vaiin min titawp lehnghal hmiah.

‘Sawi zui lovang..I kal dawn lo..Achiang em?” hnial chi loh khawpa khauhin a ti nghut.

‘Ok…A tha alawm’ ka tita sap.

Khum a rawn pan pheia, a rawn thu thlaa. Ka biangah a rawn dawma.’ Ka tiam che, I nu hi ka tina ngai lovang. Min nawr nasa hle anih pawhin nangmah vangin ka tilet ve lo vang.Mahse, nang hi chu ka thlahfal thei lo che.Min nawrlui lo la ka duh’ ati nawn leh a. Ka bu nghauh ringawt.

A rawn kun hniama,a hmui chhah tap leh lum ham hamin min rawn fawpa,ka chhanglet ve vat.A lei a rawn rawlh luta, zei zetin ka hmui hnuai lam a peta..Ka thaw halh mai..Ka kawrhak chhanah ka hnute a rawn thama…Ka dang vata,ka thlesawn nghal daih bawk. A phun nghal hluk thung.

‘Kal tawh rawh..Tea’n a nghak leh ang che’ ka ti sap..

‘Ninawm…’ a ti hluk a,ka nui nghal hak thung.

‘Nui lo maiteh..A rei tawh ania aw’ a ti nghut.

‘Sorry…keimah vang a ni lo tih i hria alawm’ a bekah ka fawp zauh.

‘Ok…Mahse, thil pakhat,I rai leh dawn anih pawhin kum 10 vel tal kan naute hi a ni phawt ang.Anih loh chuan chawbel bulah ka tamchhawl char char ringawta’ za zetin ka nui leh nghal hak..

Sangkima kal hnuah tho mai loin ka mu leh riha, awmpui pathum leh Cook hran an awma, engmah tihve tur a awm ngai lo. Kan room leh kan thawmhnaw erawh keiman ka buaipui veka. Midang sukturin ka pe ngai lo tawp.Room pawh ka damthat hnuah keiman ka tifel vek zel.

Sangkima thilsawi kha ka ngaihtuah nauh nauha, a sawi dik lo miah lo.Mahse, ka nu a ni a. Kan inkarah nu leh fa inlaichinna awm tawh lo mah se min tihnat tuma min umzui ka ring lo ve tawp.Mahse, Sangkima a hlauthawnga, ka himna tura ti anih avangin a phal loh dan anga awm ka tum lo. Ka awm loh hnuah engtin tin emaw ka nu chanchin ka hre ve zela. Restaurant ka Nutei hnenah a hralha,Damdawi dawr lamah a insawrbing tih ka hria. Restaurant kha ka pual anih avangin ka ui ru vawng vawnga, mahse thuneihna ka nei tawh der si lo.

Tlaiah ka incheck-up hun pangngai anih avangin Doctor kan hmu a. That lohna ka nei lem lo..Ka inentir apiangin Sangkima a telve ziaha, achangin a nu a tel ve bawk.

‘I lo chhuak dawn tawh em?” Kawngkhar bul atangin Sangkima’n a rawn ti dut dut.

‘Aih, enge?”

‘Engmah,hmanhmawh suh’ a ti leh lawi. Muangchangin ka inbuala, ka inbual zawhah Darthlalang lianpui, taksa lan vek theihna awmah ka in en a, ka tai puar ve ak tawh chu ka Chula..Thla thum lai a ni ve tawh.

‘Inhnuaiah chhuk lawk ila…Thil entir duh che ka nei’ a lo ti nghal vut.

‘Enge a?” ka ti satliah.

‘Chhuk phawt ila i hre mai ang’ a ti awlsam leh mai.

Kan inzui thlaa,Living Rooma min hnungchhawn zawnga hmeichhe thu chu a sam awmdanah kan chhungkaw zing ami a ni lo tih ka hria..Sangkima nau leh a nu leh pa an awm ve bawk.

‘Kan lo kal e’ phur fahranin Sangkima’n a ti a. Engvanga phur viau nge anih ka hre lo.Thutna awl lam ka pana, mahse min hnungchhawn zawnga hmeichhe thu chu a hmel ka hmuh rualin ka ding nghal chawt.

‘Zari…’ ka tichhuak nghal sap.

‘Surprise…’ ka kawngah Sangkima’n a rawn kuah a. Mahse, Zari hmel pha dai mai lo chu engmah ka ngaihven lo.

‘Ka fapa te hian Thangkima thlahte an lo duh ber anih dawn hi’ ka pain a ti boh..Phat rual lohin an rawn inru ve tih ka hrethiam nghal a..Lawm tur nge lungngaih tur ka hre lo.Lo dawnsawn dan tur pawh ka hre hek lo. Ka ngawng vek ti ila a dik ang.

Thil a kal ta vut vut. Kei ang lo takin Zari lakah chuan thil a thleng ta thung. Patea leh ka pu an hel hle chungin Nutei leh Ka piin an nawr rawn vangin Zari man pawh an dawng ta thlap.Zing karah an inkutsuiha, Nutei te unau ho an lo kala, abak tumah kan chhungte lam lo kal an awm lo. Vantlang tan chuan chhungkaw induh lo tawn lutuk innei kan nih vang a ni a. Abak a awm lo..Bakah,tuman rei an sawi zui peih dawn lo.Kan chhungkua leh Sangkima te chhungkua inzawm viau tura beisei chi erawh a ni chuang lo. Engpawhnise Zari a lo awm ve tak atangin ka mal ta lo sawtin ka hriaa. Ka lawm tawk.

‘Saw lamah sawn ka va kal lawk ang. Lo en kual la aw’ Ka nu(Sangkima nu hi ka nu tiin ka ziak tawh ang aw) in a ti a.

‘Um…Ka lo en ang’ ka ti ve mai. Eitur zawrhna lamah a phei a, kei erawh Tetei thil min chah zawngin ka hmaa chhuar ka enkual lehnghal dan dan.

‘Anun…’ hmeichhe awin min rawn ti a, Ka en nghal vat. Ka rin loh lutukin Amber-i nen kan inhmachhawn ta ran mai.

‘Sorry…ka lo kal thawm i hria maw ka tia’ inthiam lo niawm takin a ti leh a. Ka hamhaih lutuk a reh chawpchilh ve nghal mai.

‘Aw…Hre chiah lo’ ka ti zangkhai vah.

‘Enteh, thil pakhat hrilh che ka duha’ min rawn hnaih a..Mawl hmel deuhin ka en ringawt.

‘Sangkima hi kalsan vat rawh.I naute a laksak hma chein..Anih loh chuan i him dawn lo ania.. A nupui naupai lai thihnaah khan ipa-in mawh a phura, chuvangin nang hi a nei che a..Ka kal angai, mahse hrereng rawh’

A sawi zawh rualin kan dinna bul chhuar sirah a tawlh lut nghal zauha. Ka nu lo thleng ve chawpchilh nghal ka hmuh rualin Amber-i hmanhmawh chhan ka hrethiam nghala.Mahse, a thilsawi khan min thawng lutuka, Amber-i kha a lo kal tak tak nge helaiah hian ding chungin ka muhil a,mumang ka nei zawk ni? Chu erawh thil theih loh hulhual a ni.

Note: KA MOOD LO RAP..ENGTIN NGE A KAL KUAL LEH DAWN PAWH KA HRETHIAM TAWH BIK LO E A😝😝