ANNEM- 29

Chapter- 29

‘Enge a?” Sangkima ka hmaah tak a rawn dinga, ka phu nghek. Ka melh zawka, a hmelpa zetah chuan zawhna alang. Ka inthup viau emaw ka tih laiin ka hmelah a lo lang tih ka hrethiam mai.

‘Engmaw?” ka ti nghauh. Ka kalsawna, ka thawmhnaw ken ho Balbawma ka vawm lut a.

‘Dik lo awm kha mawle’’ ka hnung mai atangin a rawn ti leh a. Ka hawileta, ka hnungah a lo ding a. A kekawr bul ipte a zen tut bawk.

‘Dik lo a awm pawh ka hre nang’ ka ti leh puat. Kalpelh mai ka tuma, mahse ka hmaah tak a rawn ding chut.

‘I lo haw tirh atang khan i hmel a dik lo.Ka biak che pawh min chhang mumal lo bawka’ a ti mar ut.

‘Ka chaua,chuvang anih kha’ ka thle baka,a din lohna lamah hel mai ka tum a. Mahse, ka banrekah a rawn vuan ta chat.

‘Min enteh’ a ti nghal nghut. Hnial buai loin ka en a, kan insan hleih avangin ka dak deuh ha bawk.

‘Vawiina ka chhuahpui loh vang che kha anih chuan ka tihpalh..Ka nu nen innih tho bakah min sawm si lova’

‘Ha…Khatiang mai mai.Kalna apianga zui zel ngai khawpin ka no lo’ ka nui lui hak. A ner deuh nawka,a hmui hnuai lam a petsawi nghal zauh bawk.

‘Anih chuan sawi la…’

‘Enge ka sawi anga? Ka chau ka tih kha’ ka ti leh nghauh.

‘Ok,I sawi duh loh chuan atha alawm.Inchhuahna lamah thil dik lo a awm anih hmela, ka nu ka zawt mai ang chu’ luhlul zetin a ti nghut.A kalsawn nghal daih bawk.

‘Engmah a awm lo ania…’ Kawngkhar a thleng tep tihin ka ti chhuak halh. Ka nu thleng thlenga tihbuai tul ka ti lo. Bakah,engmah sawi tur a hre lo ang.

‘Ka hre thei mai ang’ a ti bung vuta, Kawgkhar hawnna a vuan nghal a. Mahse, a hawn hmain kawngkhar an rawn kik ta hlauh; Ka lo thaw huai mai.

‘Aw…’Sangkima’n a ti nghuta, kawngkhar a hawng nghala, kei erawh khuma Sangkima thawmhnaw ka thlehfel sa dahthat tumin ka la ve nghal thung.

‘Apa…’ Naunaua aw ka hre nghal zat.

‘Um,lo lut la…’

A rawn lut thawm ka hria,ka hawipheia, thutthlengah a lo thu tawh. Min rawn en a, ka nuih sak..A ha tihrualna langin a nui ve var var bawk.Ka awmtirh kha chuan min be vak ngai lova, keipawhin ka be lutuk lo. Tunah erawh ka ngaina tawh viau..A mizia a nem em em a, a inthlahrung bawk. Chhungkaw atchilh rawn a ni chungin naupang sual lo ber a ni tlat lawi.

‘Naktuk kha dar engzatah nge kan kal ang?” a ti a. Apa en loin keimah zawk min en a.Naktuk hian an vaiin huanah riak turin an kal dawna, karkhat lai awm an tum bawka. Kal ve ka chak a, mahse Sangkima Pump thar turah a buaia, Tea te an kal ve dawn bawk si nen,Dawr lam ngaihven pah angaia,huan atanga nitin hna kal tur chuan angaihna a awm lo.. A tel lova kal a phal der lo.

‘Dar engzatah nge i duh?” nui chungin ka ti a, a thle bak. Thisen hi a chak em em rualin inenkawlna a pawimawh zia Sangkima leh a fapaah hian ka hmu thei. A mizia hi nem tak ni mah se a chezia hi apa nen in anna tamtak an nei miaua.

‘Ka hre lo..Api ka la zawt leh lova..Ih,Kal hmain Cookies kha min siamsak hman angem? ka pai duha ‘ a ti leh a. Ka bu nghat.

‘Hey, Boy…I nu hi a damtha lo teh ania aw’ Sangkima’n a ti sup.

‘Tak tak maw? anih chuan siam lo mai rawh’ nidang ang bawkin inthlahrung hmel a pu a.

‘A ti mai mai anih kha, ka nuam reng.Zanah ka roll sa anga, zingah inkal hmain kan ur zuai anga..A rei hleinem,bakah nangpawn min pui leh anga’ ka ti duah.

‘Nia, Hand Blender kha chu ka hmang thiam ve tawh reng..Pa, ka phone sir a keha,Bobo-an min sutthlak saka’ a pa hnenah a ti leh a.

‘A chhiat vek hunah kan lei law law anga..Anih loh chuan Bobo-a i chhaih leh anga, a chhe leh thuai ang’ Sangkima’n a ti dam thlup.

‘Nia…’ atih lai mekin Tetei a rawn daka.

‘Hey, ipi –in enge titura a tih che?” Naunaua hnenah a rawn ti nghal thawr.

‘Nitak…Pa, api –in a be duh  che a.Ka theihnghilh daih’ a zuangtho nghala, kawngkhar lam a pana. A niin a man beta, a samah a tu aia..A nui nghal hak hak mai.Min rawn en a,’ Mama,engtikah nge kan siam tan ang?” a rawn ti leh a.

‘Ka lo kal animai..Reilote min lo ngak la’ ka tia, ka nui lui var var bawk.

Sangkima’n min rawn pan pheia…Ka thil tihlai tihzawm tumin ka inhersan nghal daih. Mahse, ka hnung atangin ka kawngah a rawn kuaha..’ Nui der loin nui tak tak la, achhan hriat bawk si loh chuan nuam ka ti lo ania’ a ti sup.Ka kawr khuh phak loh chin ka nghawng leh dar inzawmna laiah a hmui lum thar tharin a fawp nghal vang vang.

‘Ka tha alawm…Zuk kal la,ka nuin a nghah che kha’ tih pahin ka nghenga..’Ok,ka lo let leh vat ang.Chumi hunah chuan i hahdam vek nan ka rawn che ang’ a nui a. Ka nui ve hak mai.

An chhuah hnuah khumah ka thu thla hnawka, ka bengah Amber-i thilsawi kha a lo ri nawn leha..’A nupui naupai lai thihnaah khan i pain mawh a phur’ ka beng ka hup a, mahse a chiang ting mai thung.

A nupui chungchang kha Bsa khan hria an awm lo tiin min hrilha, mahse Amber-i khan a hria tih alanga.Chumai bakah nau a pai tih thlengina hria.Bsa khan nau apai tih a sawi lo.Amah Sangkima pawh khan ka pa enkawl lai a ni tih chu a sawi ngeia. Nau apai tih a sawi lo..Ka thaw leh halh; ka nunah hian Sangkima aia rin tur chuang an awm lo maithei. Ka u thihna chungchangah pawh a tel ve lo tih a sawia, engmah fiahna tel lo pawhin ka ring thlapa..Mahse, Amber-i thilsawi kha a tak tak lo nita se….Ka Phoneah Msg tone a ri kauha..Ka en vat..

‘Ka sawi kha hrereng rawh,kei anga Naute kha a thahsak loh nan che i kalsan angai’ number ka hriat ngai loh atangin a ni a.Mahse, tunge anih ka hria.Beidawng zetin ka thaw hak mai.Engvanga min rawn be sek nge anih ang? Reitak a lo zui tawh kha midang pasal a nita hi na a ti ngei anga, chuvang chuan khi min siamsak a tum a ni angem? Mahse, engvangin nge a naupai kha an thahsak angin a sawi tlat? Huizz,engmah ka hrethiam hlawl lo.

Ka mu meng kara. Sangkima lo lut thawm ka hriat veleh ka mit ka chhing nghal vat thung.Min tihhrah hlau niawm takin zawitein a teikuala…Rei vak loah khum a che data, Light a off a, a rawn mu a..Min rawn kuaha, ka insangmar nghal teuh thung.Reiloteah a muhil tih a thawk danah ka hre theia..Min kuahna Dimtein ka dahsawn saka, khum sir lamah ka tawlhpheia..Amah si loin ka mu ta zawk.

Ka Phone ka hmet enga, a muhil hmel chu ka en a..Sawisel tur awm lo khawpa tha a ni bik lo. Mahse, ka tan chuan ani lo hi an awm thei lo tih ka chiang…Ka ngaihtuah leta, thil thleng zawng zawngah hian chiang taka lang chu min duha, min mamawh bawka. Mahse, vawikhatmah min Hmangaih tih ala sawi lo. Amber-i leh naute chungchang kan sawi tum khan ‘ ka fa anih vangin ka mawhphurhna hlen turin ka mi hmangaih ka kalsan angaia’ tiin a sawi ngeia. Mahse, min lo hmangaih reng em? Bakah, ka u thihna leh Becky te buaina zawng zawng atanga thil hi intan ni loin ka pa atang zawk khan a lo intan daih tawh a ni mai angem?

Mu thei loin ka let ka leta, khawvar dawn hnaihah ka lo muhil ve ta hram.Luhai deuh burin ka harh a, Sana ka en a. Darkar 1 vel bak ka la muhil lo.Mahse, dar 7ah ka nu te an chhuak dawna, An kal hmain Naunaua Cookies tur ur sak ka tiam avangin ka tih hman ngei ngei angai.

Ka inphihfai thuak thuaka, inhnuai lamah ka chhuk thlaa. Inchhung a lo la reh thuap.Inchung lamah hian keini nupa chauh kan awma, mahse Sangkima Office leh Library inkawp,room zau tha hek hawk tak mai a awma. Game khelhna hmun room pakhat a awm tel bawk.

Cookies siam tur Fridge a ka dahsa ka lachhuaka, ka cut chhungin Oven ka tisa lawk bawka. An lo thawh ve meuh chuan ken mai theih turin ka pack fel vek hman.

‘I va tho hma awm ve..’ ka nuin min rawn ti hlut. Midang an rawn tho ve phak phaka, zan lamah an insiam lawk vek bawka. Dar 7 a rik meuh chuan an chhuak fel ta diak.Kan in lian zetah hian  kan nupa leh nula pakhat bakah Cook chauh  kan awma,a reh ta ruih mai.

Sangkima chhuah hnuah tihtur hre loin Balcony-ah ka awma. Ka thlanglama khawpui pe uar chu ka thlir dauh dauh.Nizan ka mu tlem bawk nen mutchhuakin min rawn zem chiai chiai bawk.

Ka Phone riin min tiharha, peih lo zetin ka en a..Lawmi.

‘Aw,enge?” hello pawh ti loin ka ti a.

‘I muhil law?” zangkhai takin a rawn ti.

‘Muhil ila ka chhang nang che..’ ka ti hlaka…Ka tawngkam bung angreng tak chu ngaipawimawh lo zetin a nui kar kar duh lek.

‘Lo len ka tuma, mahse ka hman leh lova…Naktuk kha aw’ a rawn ti a.

‘Eng maw?”

‘Hmm,van Over tak..Naktuk hi Rasky Birthday a ni tih i hre lo mi?” a rawn ti leh zat zat.

‘Nge ka over na?ka hre lo a ni ve maia…”

‘I mak…Group te kha en ve la,nizan atangin kan sawi char chara’ thutak zawkin a ti a.

‘Aaaa, nimin kan bazar ka chau over alawm..Phone pawh ka en lo.Ka lo en ang,mahse chhuah hi ka theih pawh ka ring lo.Ka chhungte tumah an awm lova’ ka ti duah.

‘Naaa,anih chuan Inah khan kan lo kal diak mai zawk dawn mi?”

‘Lo kal ula’

‘Tak takin chi loh..Rasky khan plan a lo nei ve thlap sia. Bakah,tunhnai te hi ka nuam lo ve deuh thina, Rca hian Motor chuan vak te a phal lo a’

‘Um,a dik alawm..’

‘Eng maw dik?’

‘Ka hre chuang nang…’ za zetin kan nui dun hawk hawk.

‘Ka dah dawn,Group chu lo en la aw..’

Group ka en a,msg a lo awm teuh.Lawmi sawi ang ngeiin Rasky-in plan a lo neia. Mahse, kan thianho leh kan kawppui te bak a huam lo.Chhun lam chu engmah Prog a awm lova,tlai lama chawei a ni a. Kan inhmuh khat vanga inhmuhkhawmna chance atan hman a tum tih a sawi bawk.Zan lam Curfew hun dar 7 ni loin dar 8ah karkhat lek atan an sawn a.Chumi hmaa let leh hman turin a ti a. A remchang phian ang.Mahse,Sangkima sawipui ka ngai.

Tihtur ka hre lo,mu leh dawn ila ka peih tawh bawk si lo.Libraryah ka lut phei ta ngawt. Lehkhabu inremtlar thut chu ka keu kual dan dana, atam tehreng nen ka chhiar duh chi ka hmu lo. Ka let leha, Roomah ka luta, Sangkima thil dahkhawm ho ka en a, Album ka lachhuaka..Khum lam ka panpuia, ka keua..Sangkima naupanlai thlalak leh a tleirawl lai vel a ni a. An unau thlalak pawh a awm nual.

Pakhat en tumin ka la kang leha, thil eng emaw a tla zauh. Ka chhar vata, lehkha zawr angreng fe hi a ni a. Ka pawtpharha,Doctor lehkha a ni a..Tu inentirna nge hriat tumin ka en a. LALTLANKIMI..kum 23’ ka thu mara, Doctor lehkhaa Damdawi inziaka kutziak chu ka hmuh hnu a ni,Clinic ka en a..Ka pa Clinic hming a lo inziak kalh.

Khur deuh dar dar chungin thildang ala awm em tih ka enkuala, engmah a awm tawh lo.Tih leh mai tur hre loin ka thu deuh vang vanga, ngaihtuah chhuah ka neih rualin ka che nghal phat.

Ruatsaka ka calla, ka thil duh ka hrilha. Minute tam pawh a ral hmain min rawn thawn nghal mai.

Thaw dep dep chungin ka call a pick hun ka nghaka,a pick dawn lo emaw ka tih hnuah a pick ta hram.

‘Hello’ hmeichhe aw tliang ralin a rawn ti a.

‘U Mp, Anuni ka nia. I buai em?” zangkhai thei ang berin ka ti a. Ani hi ka pa damlaia Clinic a thawk thin a ni a. Sangkima nupui a enkawl lai vel bawr pawh hian a thawk tawh tih ka hria. Nula senior niin a rintlak em em a,Ka pa Boral hnuah pawh Doctor tha tak pakhat bulah athawk zui leh tih ka hriaa. Mahse,kan inbe pawp zui lem lo.

‘Aw,Dam alawm..Tehhlawl che chuan,I dam zawk em?” phur fahranin a rawn ti a.

‘Um,dam alawm..Tunlai hnaah inbuai em?”

‘Buai lem lo e,enge nita?”

‘Ka hmu duh deuh che a. Naktuk lamah ka rawn hmu thei che angem?”

‘Thei e…Mahse, eng thilah nge?”

‘Thil pawimawh ti deuh tawp rih mai ang. Naktukah chuan khawiah nge ka lo hmuh ang che?” ka ti leha, kan inhmuhna hmun tur leh a thlen hun tur arawn sawia. Thildang kan sawi leh luam bawk.

‘Hey, mut duhnu…’ rawn mut ve pahin ka kawngah min rawn kuaha…Room light  a lo in on vek tawh. Tlaiah khan eng eng maw ngaihtuah chungin ka let kual vel mai maia,ka lo muhil leh daih chu niin.

‘I lo hawna a rei tawh em?” tih pahin ka zi mar ar ar.

‘Rei nang..Ka inbual zo chiah..Muhil leh ang’ a ti sup. Ka kawr hak a rawn zena, ka kawrhnuai a nawr kaua,a kut zungtang sei thlurhin ka hnute a rawn khawiha, a hmur a chephrual nghal zat.

‘Muhil rawh…’ ka ti sap.A kut ka manbehsaka..

‘Aih,ka ril a tam..’ tehdaiha.

‘Anih chuan thil ei la…Thil eizawh veleh i muhil anga’ ka ti leh sap.

‘Chaw lam pawh a ni lo…’ a sawi awmzia ka hria..Min rawn hnaiha,a mitpatna inpeih at chu ka hre thei nghal zat bawk.

‘Kan ti thei em?’ a ti leh sup.A inbengkanga, ka bengkawmah a fawp kual nghal dun duna. Ka taksa awmdan danglam tan chu ka hrethei.Mahse,nidang angin phurna ka nei lo.

‘I duh chuan….’ Ka tita tho. Ka pasal a ni a, ka mood dik lo leh ka rilru buai vang maiin ka hnar ngawt anih chuan a fair miah lo.Min nawrlui ngai lo va, tha taka min zawt a ni lehnghal.

‘I duh lo a, keiman ka duh chuan tihna a ni em? Sorry…’ a let thlaa.A tho zui nghal daih bawk.Ka thuchhuaka, ani erawh Sofaah a thu thlaa, Tv a on zui nghala. Tun lawka thil thleng kha vei awm pawhin a awm lo.

‘Naktuk hi Rasky birthday ania. Tlaiah chawei turin min sawma’ ka ti a.

‘A tha alawm’ min en loin a ti liam puat.

‘Anih chuan i chhuah rualin ka chhuak anga, Present tur vel ka en ang ka lo tia..Tlai lamah chuan i hman ang tiraw?” ka ti leh a.

‘Ka lo tum ang’ a ti liam leh vut.

Thil kan ei zawh hnuah hnathawh tur a nei tih a sawia, Mutsan mai turin min ti bawk. Mak takin chhun lamah ka mut nasat nen ka lu leh lukham a insik rualin ka muhil chu a ni lehnghal mai.A lo mut lai pawh ka hre eih lo.

Ka sawi lawk ang ngeiin Sangkima chhuah rualin ka chhuaka, nidang ang lo takin keimaha ka teivel tur min sawisel miah lo. Ka kal duhna hmunah min dropa, a tlan liam veleh u Mpi ka be ve thung. Kan inhmuhna hmun tur ka pana,ka thlenin a lo thu fel vang tawh.

Kan inchibaia, chanchin kan inzawt hmasa luam. Pasal ka nei tawh tih a lo hriaa,ka pasal pawh a lo ralkhat hriat tih a sawia. Ka nu nen kan chungchang a hria angem tih ka ngaihtuah zauh pek.

‘Eng thil nge han sawi la…’ a ti dam thlap.

‘Eng lo,han zawh dan tur che ka bo deuha..Hei hi en phawt la’ tih pahin ka lehkha ken ka pe a. A laa,a thlek deuh vang vang.

‘Tu ber nge ka hre mai tawh lova, mahse ahming vel hi chu ka ziah anih hi’ a ti a.

‘Ka pa enkawl zinga mi ania..Engtin nge ka chhui let theih ang?”

‘Ka hre lo le,ipa lehkha pawimawh ho kha chu in lamah khan inla phei veka. Amahah hian eng ber nge hriat i duh?” a ti leh a.

‘Nau a pai niin ka hria,naute an paihsak na lamah a thi niawm tak a ni’  ka ti sap. A mengphar deuh awka,mahse a insiam tha lehnghal vat.

‘Lawk…ka hre maithei.Mahse, kei aiin khatihlaia ipa Assistant thin khan a hrechiang ang’

‘Engtin nge ka biak pawh ang?”

‘A number ka la nei alawm..Kan la inhmu fo bawka.Lawk aw, biak kan tum chhin ang’ a ti a, ka bu nghat.

‘A lo kal dawn, Damdawiinah a awma, a duty zo chiah a ti a’ phone dah pahin a ti a. Lawm zetin ka thaw nghal halh mai.

Reipawh kan nghak hman lo, a rawn thleng nghal chu animai. Kan inchibai te te a,kan rik hlut hnuah ka hmuh duhchhan ka sawia, a mengphawk nghal hra mai.

‘Enteh,thil kal tawh ania.Ipa pawh a awm tawh lova, engmah hi sawichhuah ka duh tawh lo a’ thutak zetin a ti hap. U Mpi pawhin pawmpui takin a lo bu ve nghat nghat bawk.

‘Ka hrethiam alawm..Mahse, a pawimawh tlata’ nawrlui lutuk ngam loin ka ti ve thung. Tui a in a, inngaihtuah muk tak hmel a pu bawk.

‘Thil pawi thei tamtak a awma..Diktak chuan Mpi nen hian nuam kan ti lo.Sawichhuah nawn leh pawh hi kan chak vak lo’ a ngawi leh rih. Engmah sawi loin a sawi leh tur ka nghak tawp.

‘I Pa kha Doctor tha leh lar tak a ni a, hmeichhe lam thilah chuan pan a hlawh em em bawka. Mahse, thil pawimawh tak pakhat a awma. I hre thawi maithei e..Nau titla tur hian an pan nasat ber a ni’

Ka hresual emaw ka ti hial..Nau tihtlak hi dan kalh anih zia chu kei aiin ka pa khan a hrechiang ang.

‘Enteh,min hrethiam la..I sawi kha ka hre sual pawh a nimaitheia’ za miah loin ka nui a.

‘Aih, hresual lo..vawi tamtak kan tihtlaksak tlat.A then chu an duhthlanna anih laiin a then chu nawrluihna a ni a..I pa kha chuan tu pawh a pan tu chu a lo hnar ngai lo.A haua,mahse a ti tho zel. Keimah hi engkim buatsaih thintu ka ni a, ka hrechiang ber.Mahse….hei hi chu tunbak  sawi nawn leh ka duh tawh lovang.Min hrethiam tiraw?” a ti leh duah. A hmelah chuan hlauhthawnna chiang takin alang theia. Kei erawh ka hamhaih lutuka sawi mai tur ka hre miah lo.

Sangkima nupui inentirna lehkha u Mpi’n a pe a, a thlek vang vang..Min rawn en a,‘I pa bula ka thawh lai khan enkawl kan ngah lutuka,ka hre vek seng lo.Mahse, hei hi chu case danglam bik anih avangin chiang takin ka la hre thei. I pa kha an rawn pana, mahse titla duh anni lo. Tha takin kan enkawla,mahse nikhat kha a lo kala,tihtlak a duh tih a rawn sawia..I pa khan a pasal a lo kal tel ve loh avangin a pasal biak a duha..Mahse, a nawr nasa lutuka.Naute kha thla thum vel a ni tawha. Mahse, ipa khan a titla duh lova. A hnua ka hriat leh chu ama thuin a lo ti tlaa. Amah kha a thi zui ve ta bawka’ a ti leh duah.

Ngaihtuahna bing mum mumin ka kalchhuaka, ka bengah U Mpi thilsawi leh Saii thilsawi kha a ri nawn tluk tluka, ka lu a puakkeh mai dawnin ka hria. Ka pa kha Doctor tha tak anih mai bakah nau titla thin a lo ni reng…Mahse, Sangkima nupui erawh a khawih lo…

‘Kawng en la…’ mi ka sut dawt rualin mipa awin a ti a. Ka en vat, Malsawma nen kan inhmachhawn ta ran mai. Sangkima nen kan inruk hnuah khan vawikhatmah ka hmu nawn leh ta lo va, biak pawh kan inbe ngai hek lo.Mahse, ka nu erawh thlahthlam loin ala buaipui zui zel tih ka hria.

‘Sorry…’ ka ti nghat,ka kalpel nghal hmak.

‘Anun,inbe lawk ang’ ka hmaah tak a rawn ding leh a. Ka melh hrawk..

‘Sawi dun tur kan nei lo..’ ka tichang fak.

‘Ok…Mahse, inu chungchang ti ila..Sawi dun tur kan neiin ka ring’ a ti leh a. Ka inlekkhawng nghal lah mai.

‘Pawimawh a awm anih chuan midangin min hrilh ang,nang ni loin’ alangah erawh ka ti leh hmak.

‘Ni love, kei aia hrechiang an awm lo.A rei lovang, minute tlemte animai’ a ti leh a.  Ka ngaihtuaha, thildang ni loin ka nu chanchin a ni a, kan inzawmna titawp tu ni mah se ka nu a nihna ala bo lo.

‘A tha alawm’ ka ti ta nghauh.

‘Helamah hian Motor ka daha,pawn lam hi chu a langsar em mai’ a ti a.Ka pawm zawng tak a ni.Engtin tin emaw Sangkima’n min lo hmufuh se thilpawi tak a thleng palh thei tlat.

A car bulah kan ding duna, thu chunga inbe turin min sawm nangin ka hnial thung.‘A rei ta hle maia’ a ti a. A nui zui hak.

‘I sawi tur chu’ ka ti nghat thung.

Ok,nia..Min hua tih ka hria.Ka chet dan kha a fair lo tih pawh ka hriaa,ka dem miah lo che.Oh,Sorry…chulam chu ka sawi tum a ni lo’ a ti leh vut. Tawng loin ka en mawl tawp thung.

‘I nu hi rawn bia la ka duha ; Diktak chuan i pasal hi engahmah a inhnahmawih lo tih kan hre tawha.Thil lo kal thui lutuk tawh vang khan biak leh che a inthlahrun niin ka hria. Chuan,tunah hian a pum lam a fel lo viaua..Cancer a ni em kan la hre mai thei lova.Ka hrilh che tih a hriat chuan a lawm lo viau ang’ a ti dap dap. A thilsawi chu ka beisei loh lam a ni..Ka hrawk a ro nghal halh mai.

‘Engtikin nge a in check-up a?” ka ti dam thlap.

‘Nimin khan a kal leha,naktukah Biopsy an ti leh anga..’

‘Anih tak chu..Chanchin min hrilha,ka lawm.Anih phawt le’ ka tih zawm zat.

Dawr remchangah Rasky present tur ka leia, peng kawi tawh loin Rasky tein ka pana. Ka rin loh deuhin an lo awm thap tawh.Kan inhmu khat bawka kan ri nghal chul mai.

‘Khawnge inpa chu?” Lawmi’n a ti lawng lawng.

‘Ala buai deuh maitheia, ka’n call ang’ ka ti a. Ka Phone ka phawrha,ka call nghala.Vawihnih a ring hman tihin a hmet busy nghal daih.Msg a rawn thleng nghal zat.’ Sorry,hnaah hian Problem ka nei tlat mai..I haw duh hunah lo sawi la, Driver ka rawn tir ang’ ka thaw nghal halh mai.

A lo kal hman dawn lo tih ka sawia, an E dial.Mahse, thian inhmukhawm tih takah kan nui zui leh mai. Ka chhungril buai lutuk tilang lo turin ka inthup hram hrama,ka nuih derna lamah ka biang a kham thum tawh bawk..Ka thil hriat in ang lo nuai mai khan ka rilru mai ni lo,ka taksa thlengin min ti chau hluah hluah.

‘Driver chu ko lo mai rawh,kan thlah ang che’ Rasky-in a ti a. Sangkima msgin ka hrilha,a en lo..Ka call lek leka, mahse ala buai viau takin tiin ka thulh leh ta zawk.

Inah ka thiante reilote an thu khawmuanga, mahse Curfew hmaa let leh an duh avangin an haw ta thuai. An kal hnuah ka inbuala, tui vawtin ka taksa a phuh huh rualin ka chhungril sahal huam huam pawh a dai sawng sawngin ka hria..

Room kawngkhar ri dawtah ka hawi nghal vat. Sangkima a rawn luta, a bag thutthlengah a vawmthla hnawka. Min rawn pan pheia,zu rimin ka hnar a verh nghal zak mai.Mahse, a hmelah rui hmel a lang lo thung.

‘Msg kha i en si lova,ka lo call tep che a;Mahse, I buai ka ringa, ka lo call ta lo mai che’ pangngai takin ka ti a.Mahse, hetiang hian ka la hmu ngai lova,mak erawh ka ti.

‘Buai,buai lutuk…Vawiin chu a nuam bawk em?” a ti bul hmuk.Khum lam a pan pheia, hnung zawngin a letthla hnawk.

‘Nuam a ni ve mai..I inbual phawt dawn nge thil i ei hmasa ang?” pangngai tak bawkin ka ti leh a. A rawn thuchhuaka, ka mitah tak a rawn en a. A mitmu dum fiah lutuk chuan chhungril a hmu tlang thei hialin ka ring.

‘Ka ril atam lo..Chuan,thil ka hrilh duh che’

‘Sawi la…’

‘Min chhui zui lo la a tha ang. Kimkimi chungchang phei chu vawikhatmah hriat lo tum ve tawh suh’ a ti tuar.Ka phu nasa lutuka ka samkhuih ken lai ka thlauh daih bawk.

NOTE: KA BLOG HI TLEMIN A BUAI DEUHA,STORY HLUI CHHIAR THEIH LOH PAWH A AWM NUAL TIH KA HRIAA.VAWIIN PAWH KA BUAIPUI VIAU MAIA.STORY KA DAH LO THELH CHU A NI E.TIN,CLICK PAWH MIN LO ULUK SAK ULA,NET NEI CHHE DEUH TAN CHUAN CLICK LUIH ANGAI MIAH LO ANIA AW.INCHHIAR KHAN KA LAWM TAWK KA TIH FO KHA💜💙💚💛