ANNEM - 30

Chapter- 30

Vawiina ka thiltih zawng zawng kha a lo hre leh vek!!! Ka hauisenna zawng zawng sawmkhawmin thawk ka la vang vanga. Sangkima inpetruh fun mai chu ka en a. A hmelpa leh ngeng ngulh maiah chuan chiang takin thinrimna alanga,tihthinrim belh a fuh lo tih achiang reng.

‘Ka lo tisual anih chuan pawi ka ti.Mahse, hriat ka duh tlata; ka zawt ngam ngang lo che a’ ka beisei aiin ka aw a pangngaia,a dam thlap mai.

‘Hriat tum duh suh’ a ti leh thawt,ka phu leh zawka. Mahse, ka hlauhna inhneh tir lo turin ka incontrol leh vat.

‘Ok..A tha alawm,ni e..Hriat ka tum tawh lovang’ za miah loin ka nui lui saka.Engtin nge ka nuih ngawt theih ka hre bik lo.

‘I pa leh nang….’ Sawi zawm loin a ngawi leh daih,a lu a thing zui nawka..A hmai a tuai leh pawk bawk.Kei erawh ka insangmar nghal vak thung.

‘Ka pa….Ka lo ngaihtuaha,min neihchhan hi hriat ka duh’ ka aw a khur hrep pawh chu a.

‘Ka neihchhan che maw?” a ti nghut,ka mitah tak a rawn en a, hawisawn duh loin ka en let ve ngar bawk.

‘Aw…’

‘I hre reng emaw tia” ngeiawm zetin a hmui a petsawi zauh. Ka vawt nghal rawih rawih thei.

‘Ka hre thin emaw ka tia, a lo dik chiah lo deuh niin ka hria’ ka ti dam leh thlap.

‘Dik lo ni a ihria anih chuan hriat tumin zawng mai rawh’ chang zetin a ti leh hmuk.A tho a, kawngkhar lam a pana..

‘Ka nu tlawh ka duha’ ka sawi zawh rualin a ding nghal chut.A rawn inhera,a mitmeng hlauhawm lutuk ka hmuh takah chuan ka ip nghal chawih mai.

‘Nu i nei lo’ a tawngkam chuan min deng dawta, rapthlak ti lutukin ka melh a. Ngeiawm zetin a thle buk.

‘Sangkim…’ ka ti sep..Ka tawng zawm hleithei lo.

‘Pawm rawh, keibak hi chhungte i nei lo.Chuvangin min tithinrim lo khan nupui thuawih tak nih tum mai rawh.Fel taka i awm chuan hremna pawh a nep deuh maithei ania’ a ti leh duaha,a tawngkam tin maiah chuan hmuhsitna alang chiang em em bawk.

‘Eng hremna? Aih,engmah ka hrethiam lo’ harsa zetin ka ti thei hram.

‘I nu nen mihrang inni tawha, tunah chuan kei hi i pasal…Aw, nia, pasal..tah hian awmreng la, I him mai ang.Mahse, ka duh dan ang thlapin’ a sawi awmzia pakhatmah ka hre lo.

‘Tinge? Ka hrethiam lo tak tak ania’ ka ti sap.

‘Oh,I fing viau emaw ka tia. Ka neihchhan che i hriat kha’ ka vawt rawih rawiha, muangchangin ka lum leh tial tiala, ka sahal chhuak nghal vek.

‘I nupui kha ka pa kuta thi a ni lo….’ Tha taka sawi loin ka au nghek.

Mitpkhapkar lekah ka bul a rawn thleng fel hman der.Na zetin ka ban tawn tawnah a vuana,a mitmeng dum fiah lutuk chu a fiah lehzual ta sawta. Mahse, a alh a ni hrim mai.Hlau lutukin ka tawm chawiha, ka awm a nuam lo nghal vek.

‘Sawi nawn tawh suh ka tih che kha..I hria em? Sawi nawn tawh suh’ min thing nghal nawk.Min thlah rualin ka thaw hawka, mak takin ka hlauhna a kiam nghal duak.

Ka bula thinrim tih hriat ngawih ngawiha a ding run chu ka melh chho a, mihring ka rin awmchhun hi Ramhuai sual,phuba lakna tura lemchang a lo ni reng chu ania..Min neihchhan chiang takin ka hre tawha. A sawi ang ngeiin ka nu pawh mihrang a ni tawha,Malsawma khan ka nuin engkim a hre tawh ti mah se ka pawh ngam rih dawn lo tih ka chiang vek.Thil thleng a tam lutuk tawh tlat. Hmm,ka chawh zia ngaihtuah ngam a ni rih lo..Mahse, enge damchhan tur ka neih? Ani tihduhdahna tuar tur ngawt hian dam a tulna a awm hlawl love.Na takin min siama, tunah hian a natzia ka la ngaihtuah tak tak lo zawk maithei.A thinrim zualna turin ka tawng anga, min thah leh min that animai ang chu.

‘Ka sawi nawn leh anih chuan naute min thahsak ang nge keimah chawpin” ka awki a hniam sat. A hmel chu vuaksawk ang maiin a danglam nghal dawrha,mahse a incontrol leh vat.

‘Enge i rin?” a ti vawt ruih.

‘Amber-i kha chu ala vannei zawkin ka ring. Ani chu a nunna tal i zuahsaka’ ka nui zui hak mai.Engvanga nui fo nge ka nih lah ka inhre der lo. Chawmawlh lutuk hian amahin nuihza hi a lo kal ve tawp zawk nge ni??

Eng emaw sawi tumin a ang zuaua, mahse a chip leh nghal hmuk. A kut a phe zawka, ka mit ka chhing nghal vat; min beng dawn emaw ka tih laiin Dressing table darthlalang a keh ri nghal chhuai.Ka mengchhuak nghal vata, Dressing table ka en a. Ka rin ang ngeiin Darthlalang lai tak a keh vek.Sangkima ka en leha, a kut thi hnuang mai chu ka hmu nghal chat.

‘I kut kha….’ Tih leh ban ka ruala.

‘Min khawih tum miah suh’a aw a ring lo,mahse tihluih loh a him zawk tih ka hrethiam tho.

Kawngkhar lam a pan nghala,a chhuak a; na lutukin a rawn nem khar bur.Ka phu leh vaka,a pen thawm a reh rualin thawm awm loin a reh zui nghal vawng vawnga.Ka biang a rawn lum thla papa,ka mittui a tla tih ka hria..

Chhuata Sangkima thisen far chu mittui nen ka en a, ka hmu phe vek..Ka mit ka chhinga, tun lawka thil thleng kha mangchhia niin harhchhuak thut ila ka ti ngawih ngawih.Mahse, ka men chhuah rualin thisen far leh Darthlalang keh nuai mai ka hmu lehnghala, engmah mangchhia ni loin atak ngei tih achiang reng.

Khur dar dar chungin khum lam ka pana,ka thu thla hnawk.Mangannna,beidawnna..Ka sahal up upa,ka puakkeh mai dawnin ka hria.Ka taksa insangmar nasa lutuk chu thawklehkhatah ka inthlahdul thuta, ka zawi hnawka,saisir in ka mu a, ka tap chhuak nghal hawk mai.

Nuam lo intham teuh teuh kha tunah chuan a puakkeh ta ti ila adik ber ang. Reilote chhungin Sangkima nen kan inkar a khi chat hmawk nimaiin ka hriaa. Zanah room khatah mu mah ila khumah erawh kan mu dun lo. Ka men chhung chu room dangah a awm a, ka mut hnuah a lo lut tlangpui. Midang hriat laia min bia anih loh chuan min be ngai lo tawp tihtheih a ni a. Midang an awm bawk si lo nen in lian zetah hian ka khua a har vawng vawng a niber.

Hreh the mah ila Malsawma ka be pawp ta nge nge. Ka nu chanchin hriat ka duh miaua. Ka nu be turin ka huaisen tawk bawk si lova, ani biak mai loh chu tihngaihna a awm lo.’Biopsy result ala chhuak lova, achhuah veleh ka lo hrilh dawn che nia. I theih chuan rawn hmu la ka duh khawp mai’ a rawn ti a.Mahse, ka kal ta lo.

‘Pi te an lo thleng’ Motor thawm a hriat veleh kan nulain a ti a, a tho nghal that. Ka tho ve nghala, pawn lam ka pan ve vat.

‘I lo tha maw? thil te i ei tha em?” ka nuin min ti nghal mawlh mawlh.Ka that thu ka hrilha,an kalna nawm leh nawm loh ka zawt let ve a. Nuam an tih zia thu min hrilh laih laih.

‘Engtizia nge i kut chu?” ka nuin Sangkima hnenah a ti a. Ka insangmar nghal teuh.

‘Ka accident…A na lo’ a ti nghut.Ka melh zawka, a mitdum fiah zetin min lo melh reng chu niin.Rang zetin ka hawisawn lehnghal vat.

‘Eng Accident maw? khawimaw ka lo en teh ang’ a ti leh a.

‘Darthlalangin a at..Tunah chuan a tha vek tawh’Sangkima’n a ti leh a. Min melh reng tih ka hriaa, ka en ngam tawh lo.

Ka ngaihtuah naah Sangkima thiltih hi an hriatpui rinna a lo lut thut. A nu leh pain an ring tih a sawi lawk vek a, a thiltih pawh an hrechiang thin tih a sawi bawk tak kha..Mahse,a nupui kha an pawm lo..Anih chuan a nupui thihna vanga phuba la anih chuan a nu leh pain an hriatpui loh a rinawm zawk.

‘Mama…’ min si cheta rawn din pahin Naunaua’n a rawn ti a,ka en chho vat.

‘Um….’ Nui chungin ka ti a.

‘Ih…Khawngaih takin Cookies min siamsak la,niminah ka ei zo veka’ inthahrung hmel a pu.

‘Tehreng,mahse zanah ti ila.A pawi em?”

‘Pawi lo,Api..Mama chuan Yes a ti leh tak tak ania..’ intithei zetin a pi hnenah a tinghala.Hrethiam lo zetin ka hawi ha mai.

‘Ok…I chak anih chu.Mahse, I nu kha dim la,anih loh chuan a chau viau maithei ania’ hlim takin ka nuin a ti a. Ka siamsak peih leh peih loh turah an lo inchawi tih ka hrethiam mai. Ka nu hmel damthlap leh zahawm bawk si chu ka en a, a mo atana min pawm danah hian dik lo awmin ka hre thei lo. Mahse, a fapa lemchan thiam hi a hrin anih tlat avangin ani pawh hi lemchan thiam tak a ni lo ang tih a sawi theih bik chuang loh.Huiham…Midang awm loh lai khan hrehawm ka tie m em a, mahse tunah an lo hawa.Sangkima nen kan boruak tha lo tawpkhawk hi midang laka thup angai tawh dawna,ahma ai khan a hahthlak zawk fe dawnin ka hre leh ta lawi.

Naunaua nen Cookies kan siam duna, min vil deuh chawt. Sangkima a chhuak lo ve tehmial bawk.

‘Minute engzat nge la ngai ang?” Oven bula ding ran chungin Naunaua’n a ti a.

‘Han enchhin teh,Minute 10 vel a ni em?” tih pahin ka kawhhmuha..’Um,minute 10 chiah chiah’ a ti nghal var.

Kan siam zawh veleh dah pawh dah dai hman loin a ei nghal tiam tiama..A thil ngainat em em siamsak hi nuam ka ti ve takzet tawh. A pa nupui ka ni tih a hriaa, atir lam chuan min mawlbiaka..Mahse, hun a kal hreta..’Mama’ tiin min ko ta thung. Min koh hmasak ber tum chuan ka lai deuh hu a, atthlak zetin Amber-i kha a ko ve angem tih ka ngaihtuah hmasaber bawk.

Ka inbuala,ka inbual zo deuh chiah tihin Zari a lo luta…Compound khatah kan seiliana,in pawh insi lo chauh kan ni.Mahse, khang kum zawng zawng ai khan kan modun hnu thla tlemte hian kan inpawh zawk.

‘In kalna chu a nuam tak tak maw?” lotion inhnawih mawlh mawlh pahin ka ti a.

‘Nuam lutuk,kal ve la chu nuam iti ngawt ang’ a ti a.Khumah a thu a, a hawi kuala,a ke a then lauh lauh bawk.

‘Nidangah kal leh dawn chuan ka kalve tawh ang’ ka ti ve a.

‘Nia, kal ve tawh ngei ngei rawh.Eee, ka nu nen kan inbiaa..I nu hi a damtha vak lo a ti a’ awlsam taka sawi tum angin lang mah se a awah nuam a ti lo tih ka hrethiam.

‘Um….Ka lo hria a’ ka ti nghauh.

‘Maw? tu nge hrilh che a?”

‘Mala…Hmanniah Rasky te inah chaw kan eikhawma. Kan inhmu thuta’ ka ti tha ve mai.

‘Aw, anih chu…Enteh..Mala hi chu fel ka la ti reng..I awm loh hnu pawh hian Nu Mami hi ala buaipui char char asin’

‘Nia…A fel alawm’ ka ti tawi leh tak.

‘U Mama chungchang an sawi kha a ni tak tak angem?”

‘Enteh…Sawi loh ka duh zawk’

‘Sorry….ka lo hriat dan leh tuna u Sangkima awmdan hi a inmil lo ve em lawm’

‘Khawngaihin….’ Ka ti leh hmak.

Eng emaw sawi tumin a ang ziaua.Mahse, Room kawngkhar rawn inhawng thawmah kan hawi rual nghal thawt.

Tea a rawn luta,’ Nuanaua  a luak vak maia…Damdawiinah kan kal pui dawn’

‘Maw?” kan ti rual thawt. A sawi nawn leha, engmah sawi loin kan tlanchhuak nghal rawk rawk mai.

Ka nu leh Sangkima nau te pahnih,Mami leh Tea’n an kalpui a.Awm nuam lo em emin kan nghak thap. Darkar khat aliam tawh…

‘U Anun, Mama be chhin la’ Tetei’n min ti a. A sawi zo deuh chiah tihin ka phone a rawn ri ve chiah.Rang zetin ka en a, Sangkima..

‘Hello…’ ka ti sap.

‘Lo insiam rawh’ a rawn ti mawl tawp. A aw chang zet chu hriat a nuam fahran lo.

‘Maw?”

‘Lo insiam rawh,Damdawiinah  ilo kal angai. Hriata’n a rawn hruai dawn che’ a rawn ti bung leh vut. Engmah han inzawh lehna hun pawh awm loin a off nghal daih zui bawk.

‘Ka u ami? Enge a sawia?” Tetei’n a ti vat.

‘Engmah a sawi lo.Hriata’n min rawn hruai dawna,kal ve ka ngaia’ ka ti hap.

Reivak loah Hriata a lo thlenga, kan tlanchhuak zui chu a nimai.

Casualty kawtah an lo thu thap. Ka nuin min hmuh veleh min rawn pan vat.’ A lam sek mai che a, lut nghal mai rawh’ min lo ti a. Ka lut nghal rawk rawk mai.

Naunaua kutah ka vuana, a khat tawkin a luak deuh reng bawk. A muthilh meuh chuan zanlai a ni der tawh.

‘Pawn lamah te va hawi harh la..A muhil thei anih chuan azia tan tihna anih kha’ Bsa’n min ti a. Hnial loin pawn lam ka pan, kawtah Sangkima a lo thua. Midang ka hmu lo.

A thutna bulah ka thu thlaa,min rawn en vut.

‘A muhil a’ ka ti sap.

‘A that chu’ a ti nghut.

‘Khawnge midang?”

‘An haw tawh’ a ti tawi leh tuk.

‘Achhan enge an sawi? Bsa ka zawt ang ka tia, mahse ka la zawt lova’ ka ti leh niah niah.

‘Thil eisual vang…Oh,a thil eiahthil inhal a tel’

‘Maw?” mak ti zetin ka ti ha.

‘Hriat loh der angai lo ania. Diktak chuan i Cookies bak kha  engmah a ei lo’ ka mar nghal awt mai.

‘Engpawhnise thil pawi a thleng ta lo hlauh erawh pawi ka tihpui che’ amah bawkin a ti vawt leh ruih. A thilsawi chu ka awih thei lo zawk. Engvangin nge kei hian chutiang thil tenawm lutuk chu ka tih tehlul ang? Ka inseh ruha, min ringchhe eltiang mahse ka tih anih loh avangin hlauhna chhan tur ka nei lo.

‘Chutiang ka ti ngai lovang’ ka ti chang fak.

‘Buaina hi nang leh keima inkar a ni a.Ka fapa ni loin.Chuvangin ani hi chu hnuk lut tel suh’ a ti leh cheu. Ka thaw halha, ahranpa takin tuna a thilsawi khan min thawng tawh lo.

‘Nia..Adik;mahse I fapa hi ka ngainaa..Achhan pawh phut let nei lo leh rilru verther tel miah loa min ngainatu a ni tlat’ ka ti ve salh.

‘Ka fapa hian angaina che anih pawhin a nu nih tum suh.I ni ngai lovang’ ka vawt nghal raih raih mai.

‘Ka lawm e…Min ngaina tih min pawmpuia.Anu nih erawh ka tum lova. Mahse, I ngaihdan ang lo tak khan Naunaua tan chuan nuhrawn tha ber ka nih ka ring ve thung’ ka ti dam thlap.Ka tho a, Naunaua awmna lam ka pan nghal a. Ani nena thut duna, thu dengkhawng tak tak hmanga inhnial vel hian sawtna a nei hrep lo ve.

Zan khat Damdawiinah kan riaka, abak chu awmzui angai lo hlauh. In kan awm hnuah a pi nen an inawm chawta, lo hnaih tum ve sek tul ka ti lem lo.

Bathroom atanga ka chhuak chiah tihin ka Phone ri a tawp lam ka hre hmana, ka hmai hru mawlh mawlh pahin ka pan pheia. Ka Phone ka lakanga, min rawn calltu ka en a. Malsawma..Sangkima insiam mawlh mawlh ka melh zauha,mahse ka awm ve leh awm ve loh ngaipawimawh hmel a pu lo.

‘Vawiin chhuah ka tum a’ ka ti nghat.

‘Khawiah?” a ti ve mai.

‘Ka nu tlawh ka duha, bakah ka incheck-up a hun bawka’

‘Lunch ei tura ka rawn let hunah kan chhuak rual thei ang’

‘Aih,kalpui ka ngai lo’

‘A tha anih chu’ a ti lehnghut. Khumah ka thu a, min hnungchhawn zawnga ading chu ka en a. A piannalh zet bakah a sammeh dan pawh a inhmeh dan ala ngai reng. Kan inhauh chiam zan atang khan thla a liam leh tep tawha,Khata tang khan vawikhatmah kan la insi leh lo.Midang awm lai anih loh phei chuan kan inbe lo tluk a ni a. Kan awmdan avangin hrehawm ka ti em pawh ka hre tawh lo. Beiseina ka nei chau hle a, ka puma thanglian mek hi chu awm lo se dam luih hram hram ka tum peih tawh lo ang tih ka chiang.

Sangkima chhuah hnuah muangchangin ka insiama,inchei pawh phurna ka nei lo.Mahse, ka inchei deuh loh phei chuan ka mu tha lo nen ka lang fe lutuk tih ka hria.

‘I kal tawh dawn em ni?” min hmuh veleh ka nuin min lo ti vat.

‘Aw, chhuah hma deuh ka duha’ pangngai takin ka ti a.

‘U Anun,kalpui ingai lo tak tak maw? ka lo kal ve thei reng ania’ Tete-in a ti lar lar.

‘Aih, ngai love. Tih kual tur ka nei lehnghala..’

‘Ruah hi a sur thut thut zela, tlai lutuk loah lo let hman la a tha ang.Hminga, hei Anuni hi a incheck-up dawna,I hruai dawn nia’ ka nuin a ti leh zung zung.

Doctor ka hmuh zawh hnuah Hminga hnenah lenkual a duh leh duh loh ka zawta,’ ka thianpa tlawh chu ka duh khawp maia. Naktukah a haw dawna, ka chhungte thil tur thawn ka duha’ phur zetin a ti ve mai.

‘A that hlauh chu. Thil ka lei duha, zawn deuh angai dawn sia, Min zui zel emaw min nghah char char chuan i nin ka hlau deuha.Ka hman hunah ka lo call mai ang che’ ka ti a. Phur zetin a bu nghat nghat.

Kan Gate bulah ka dinga, thawk ka la vang vang. Ka chhuahsan hnu atanga ka let lehna hmasaber tur a ni a. A landanah engmah danglam ala awm lo. Luh ka chakna leh ka huphurhna a inzat reng. Engtin nge min lo dawnsawn ang ka hre lo..Mahse, Malsawma a awm tih ka hriaa..Ka huphurh dan tlem chuan a zia.

‘Aaaa, ilo kal maw?” Mite-in min hmuh veleh min lo ti vat. Lala-in min rawn zuan nghal chung chung bawk. Mite-i mitmeng pawisawi lo em emah chuan min huatna hmuh ka inbeisei laiin chutiang reng reng a awm lo.

‘Aw….ka lo kal lawk’ ka ti halh.

‘I van lang thu ve..Rai chu a nuam lo viau a ni maw?” a nui a. Ka chhan hmain inchhung atanga ka pi lo chhuak mek ka va hmu a. Min rawn en zawka,a hawisawn lehnghal mai.Ka chungah eng rilru nge a put ka hre lova, mahse min bia anih loh chuan ka be hmasa ngam chuang lo.

In lam ka pana, khur dar dar chungin Door bell ka hmeta, an rawn hawn hun nghakin ka ding khwng lah. Ka khu erawh a sai ru dar dar mai.

‘Nang maw?” min hmuh rualin phawk zetin ka nuin a ti hmak. A hmel nelawm lo leh a mitmeng thip zet ka hmuh rualin Malsawma thilsawi kha ka ringhlel lehnghal a. Engkim hre vek tawh,luhlul vanga min be lo mai mai chu a ang miah lo.Ka kal kher kher chu ka inchhiar ru nghal titih.

‘Anun..Kan va inhmu khat ve’ ka nu hnungah Malsawma a rawn dinga, ka nu nena kan boruak tang lutuk a rawn ti danglam nghal hlawk mai.

‘Nia…I dam em?” ka ti let sap. Kan inhmu khat ngeia, mahse Phone erawh chuan ka nu chungchang sawiin kan inbe zauh zauh tho.

‘Aww..Dam alawm,lo luh i tum lo mi?” zangkhai takin a ti leh a. Chhang loin ka nu ka melha, ngawirengin ka luhna turin a tawlhsawna. Inchhung lam hawiin a thle zauh.

Dingi’n min hmu thut chu a hawi phawk ngang mai. Kan inruk zan khan ka Room kha lock theihnghilh angin a lantira, Zari hnen atanga ka hriat leh danin ka nu hnen atangin tawngkam chhe tinreng a dawng a, kut erawh a tuar lo hlauh. Min puih nasat zia leh tuna kan nupa inkar boruak hi hria se chuan min pui kha a inchhir ve vawng vawngin ka ring. Mahse, a hunlai khan chutiang lam ngaihtuah nachang ka hre lova. Ngaihtuah chu sawi loh,Sangkima aia rin zawk ka nei lo hial anih kha..Mahse, tunah erawh ka tihsual man hmuin talchhuah ngaihna awm loin kawng laiah ka dinga. Pan lam tur lah ka hre hek lo. Chawh ka inti phal lo,ka inkhawngaih tum erawh a tam lutuk tlat.

‘Ka nu kha ala pangngai reng maiin ka hria..’ Malsawma hnenah ka ti a.

‘I hria alawm,nu luhlul tak anih zia te chu.Mahse, lungngai suh.Inah pawh sawi nawi miah loin a luhtir che a, chuti anih chuan ala inkhengkhawng satliah mai mai tih hria la..A fanu neihchhun i nia.Tlawm nih a hrehna hi chu ala zia tial tial mai ang’ a ti duah. A sawi dik tih ka hria..Khatiang khawpa thinrima a lo chet tawhna kha ama dik loh vang tih pawh hria se tlawm anga lan erawh a hreh dawn lutuk ringawt. Engpawhnise kan inhmu a, kan thu ho a. Kan titi leh ta chu ania. Hma chu ka sawn ta tho tho.

Sangkima lo haw laiin ka nawm mang loh avangin khumah ka lo thu mu a, ka tai ana riai riai renga, min pawt deuh tlat bawk.

‘Enge Doctor chuan a lo sawia?” satliah takin a ti bung vut.Min ngaihsak vang ni loin a mawiah min zawt mai tih ka hai lo.

‘Ka tha…Oh, kan tha…Naute ka tihna’ ka ti bah nak mai.

A thawmhnaw a hlipa, ka phone ka en nghal daih.

‘A that chu..’ a ti leh nghut.

Inbual turin Bathroomah a luta, a lut fel deuh chiah tihin ka pum a rawn na nghal vak. Inring hman loin ka rak thawta, ka lu a rawn hai a,ka mit a vai nghal chum chum bawk.

Ka chesawn dawna, ka tai ana lutuka,ka ner nghal nawk..Harsa zetin ka let sawn thei hram,mahse ka mal kar rawn hnawng nghal  ka hriaa…Zun ka cheh nge ni? Thei leh thei loin ka zuk dapa…Ka kut ka en leha, Thisen..

‘Sangkim…’ ka theihtawpa ringin ka aua.Mahse, ka aw a ring chuang lo..

‘Sangkim…’ ka tinawn leha, ka mit a phe zuala, ka thil hmuh a tawi nghal tuk bawk.

Muangchangin ka mengchhuaka, a var pup ringawt. Ka awmna ka hre mai lo,ka mit ka chhing leha, ka ngaihtuahnaah thil thleng a rawn lang nghal zut zut. Ka meng leh kawka, ka pum ka khawih nghal vat.

‘Hey….I tha em?’ Sangkima aw ka hriat rualin amah pawh ka hmu nghal zat.

‘Naute…..’ ka ti tham tiak thung.

‘Nakinah kan sawi dawn nia.Tunah chuan hahdam phawt rawh’ a awpa zetin a ti dam leh thluam.

‘Aih, ka hre duh..’ ka ti leh tlat.A mitah tak ka en a,a thaw hawk thung.

‘Kan chana..Mahse, nangmah i thaa..Chu chu a pawimawh zawk’ thei leh thei loin ka thle sawna. Ka mittui a rawn tlaa..Tunah chuan kan inzawmna neihchhun ka chan ta.

‘Shh…Tap suh. I chau zual ang’ a ti leh sup. Ka mit ka chhinga, ka mittui a tla zung zunga. Tah erawh ka tap chhuak lo.Khum a che data,

‘Ka rawn hmuh lai che khan ilo thidanga. Kan tlai hreta, inbual kher lo ila chuan ka chhanhim tur ania’ a ti leha.

Nihnih chhung chu mi a ang maiin ka ngawi reng ringawt. Sawi tur hlawl ka hre lova, ka chawmawlh a ni ber. Sangkima a awm ve chawta, mahse biak chakna ka nei lo hrim hrim. Ka nauchhiat ngawt dan kha vawi tamtak ka ngaihtuaha, ka la awih thei lo.Doctor ngeiin ka that vek thu min hrilha, Darkar 24 pawh a liam hmain ka chan fel leh ringawt lawi.Amber-i sawi ang khan Sangkima’n min laksak a ni angem? ni lo…Inah a awm lo hrim hrima, Doctor nen an inthurual ti dawn ila Damdawi ka ei lai bak min pek belh si lo…

Damdawiin awmreng ngai chi ka ni lem lo bawka, ni hnih ka awm hnuah kan chhuak a. Chet harsat ka ni lo chungin ka nuin ka chet vel a phal lo bur.’ Indim tluk a awm lo’ a ti tlat.

Khumah ka thu mu a, Zari leh Sangkima Roomah an awma, ka nu erawh insuk tur nen achhuak leh tawh..‘Hna hmanhmawhthlak a awma, chhuah ngei ngei ka ngaia..Mahse, lo let vat ka tum anga’ Sangkima’n a ti a. Ka bu liam satliah ringawt.A rawn kal hnaia,a rawn kun hniama,ka inrin hmain ka samah a rawn fawp zauh. Ka kut ka humruh a,Zari awm ve lo se chuan ka thle sawn chiang khawp ang. Zari hi ka unuaunu mah nise ahmuh laia kan nupa boruak tha lo tihlan erawh ka tum lo bur.

‘Te,I rilru ana tih ka hriaa..Ka dem miah lo che.Mahse, u Sangkima hi tlem talin ngaihtuah ve la,ani pawh hian na a ti ve lutuk ania. A fa a ni ve tho a’ Zari’n a ti hap.

‘Na a tih tak tak i ring em?” insum hman loin ka tichhuak a. Ka sawi zawh ruala Zari mengphawk hra maiah chuan ka thilsawi atthlak zia ka ngaihtuah chhuak leh chauh.Mahse, ka sawi zo vek tawha. Awmzia a awm tawh lo.

‘Enge sawi i tum? Na atih loh i ring maw?!’ a awah pawh mak a tihzia alang thei.

‘Aih…Ka rilru a buai lutuka,engmah ka ngaihtuah thei lo’ ka ti halh. A rawn tawlh hnaia, ka kut a rawn vuana. Venflon an vuahna lai a chul a.

‘I vanneih zia hi i rilru a fim deuh hunah chuan i hre thei mai ang. Nau i chhiat zan khan a che buai rapthlak lutuk. Ka nuin khatiang khan a awm vawikhatna a ti a.Chuan,an buaipui fel hnu che,I harh hma si hian i kut vuan chung khan a mittui a lo tlaa.Kan pain mittui a nei tih pawh kan hre lo atia.Mak a ti lutuk..’ a tita duah.

‘I pasalin a hmangaihna che a tihlan ang khan ka pasal hian a tih ve dawn chuan nau chhiat ve pawi ka ti miah lo ang’ nui chungin a ti leh a.

Sawi ve tur hre loin ka melh reng ringawt.

NOTE - CHAPTER THAR ZIAH BELHNA HUN KA NEI TA NGANG LO. HAN AWL NGAWT ERAWH IN ZAHAWM THIN SI A,HMAN CHANGIN KA TYPE ZAWK ZAWK A NI BER. TUN HNAIA RUAH LEH THLI THAWK NA DEUH KHAN HNA LAMAH BUAINA MIN SIAM  HNEM PHAH RIAU MAIA.HRIATTHIAMNA SANG TAK KA RAWN DIL LEH E.THUI TAK KAN KUAL TAWH LO ANGA, ACHANGTUPA TI THI ILA KAN DUH TAWK MAI DAWN NIA🤭🤭