PURPLE HEART - 2

Chapter- 2

‘Mommy, ka zun a chhuak’ ka thu tur ka kekawrah a rawn pawta. Ka melh thla vat, a bawp tereuhte, khal ve talh lawi si chu a khawkherh ve tat bawk.

‘Ok..Ka va zuntir lawk ang’ B-i hnenah ka ti a, a bu nghata. Duat tihhriat takin Soso-i a en a. A nui var var.

Staff polite hmel zet hnenah Toilet awmna ka zawta, zangkhai leh hriat nuam takin min hrilh nghal var. Ka nuih saka, Mizo pawh kan lo ziaawm ta ngei mai tih ka ngaihtuaha.Rei over la ni lo mah se kum li chhung khan thil a lo inthlakdanglam nasa hman takzet. Abik takin Customer Care chungchangah kan harhthar nasa lehzual niin ka hria.

Kan eitur chah kan nghah chhungin thil chi hrang hrang B-i nen kan sawi duna, tlemin kan kum a lo tam ve ta bawka, ahma anga vei nei lo kha kan ni tawh bik lo.

‘Let leh chu i tum tak tak em?” Soso-i melh zauh pahin a ti a.

‘Ka hrethiam rih lo. Ka nu chuan let a remti chiah lo tih a sawia’ ka ti a. A bu nghauh.

‘Ka duhdan chu a pawimawh miah lo nangin let tawh lo la ka ti.I nu hi a kum a tam ve tawha, bakah i u hian nupui a ngaihsak mang bawk si lova’ a ti leh duah.

‘Nia,a dik reng..Nei mai la tha tur ania’ ka nui zui hak haka,min ngei hmel zetin min ner khum nak thung. Kan tleirawl laiin ka u a star nasa thei lutuk ringawt.Sawi a hlau em em lawia.Ka u hian nau ang maiin a en ve bawk nen ka sawisak duh ngai lem bik lo.

‘ Aizawlah hian dawr hawng la a tha ngawt ang. I thiam ang hi Mizo zingah thil la awm zen zen lo ania.A hit ka ring lutuk’ a ti leh siam siama. Nia, adik ve reng. Ka thil zir hi Beautician huang chhunga khung theih chiah loh,inhnaih angreng tak si; Permanent Makeup Artist tih a ni deuh kher bika. Mizo zingah chuan zir hmasa ber ka ni lo anga, mahse a hmasa pawl ka ni tih erawh ka hria. Aizawlah hetianglam dawr ala awm lo.

‘Khulamah ka thian pakhat nen hawn kan rilruk deuha,mahse ka ngaihtuahna ala buai rih lutuk. Hetah hian enge a an dawn ka hre thiam lo a. Lash extension tih vel hi ala mikhual em mai’ ka ti a; a thaw hak.

‘Mikhual tho e, mahse a hmasaber ini dawn tihna nimaia. Make-up ngawr ngawr a ni dawn lova.Thil lar hluai tur a ni chiang lutuk. Zirna i hawn theih nghal phei chuan a tha lehzual anga.Zirlai i nei ngah dawn tih ka hre sa vek.Zawlnei ni lo mah ila ka sawi lawk ngam.Chuan,pawimawh chu intih lar nan Social media hman thiam atul lutuk.Page engmah i nei lo chung hian khu lama i buaipui ho hian an tilar tan tawh che ania.Chuvangin Page siam angai  ania ’ a ti leh duah. Engvanga Social Media lam khawih miah lo nge ka nih a hriaa, min nawr na ngam dawn lo tih ka hria.

‘Min enkawlsak peih dawn chuan ka lo ngaihtuah ang’ ka nui a.

‘Eh…Peih dawn chiang sa.Pic hlui neih i nei em? Tunah kan siam nghal chung chung te’ng’ phur sarhin a ti a.

‘Rum rum zel che hian..Nakinah kan ti dawn nia’ ka ti a. Kan eitur an rawn chhawp zuia, riltam zetin kan ei zui ta mawlh mawlh.

Soso-i pawm chungin B-i Scooty lachhuak tur ka lo nghaka, a mut achhuak bawk nen ka darah a bei tlan a. Kan awm thinna boruak nen a danglam bawk si hi a taksa hian ala dawngsawng thiam chiah lo niin ka hre ta ber..

‘Terin…I ni em?” mipa aw hian a rawn ti a, ka hmuh theih turin ka hmaah a rawn ding zui nghala. Ka rin loh leh beisei loh zetin Romala a lo ni reng.Ka hmuh hnunhnun ber lai ai khan a lo thau ta deuha,alang upa ve ta deuh bawk.

‘Ehe!! Ni chiang e.I dam maw?” ka ti nghal vat.

‘Um,dam alawm.Kan va inhmu khat vang vang vele’ a ti leh a. Mahse,min en loin ka nau pawm zawk a en daih.

‘Nia,inhmu khat ngawt mai.Enge i tih a?” ka ti leh a.

‘Dawrah ka awma, Damdawi ka rawn lei zawk mawle..I fanu ami? Ava hmeltha ve’ a ti leh a.

‘Aw, ka fanu anih hi..Chuan, iti lawmawm; Mahse, nu mit atang chuan fate hi an tha ber tak tak ania’ ka nui a. A nui ve huk huk. Diktak chuan Soso-i hi thlahpawlh a ni a, a nu vai niin a pa Australian a ni thunga. A nu leh pa thatna lai ve ve a la fuha,a hmel tha takzet.Mahse, mak takin ka hmui leh a hmui awmdan a inanga,a khabe zum lam pawh keimah nen a inang viau.Ka fanu a ni lo tih hre lo tan chuan alandanah midang hrin a ni tih awih mai mai chi a ni lo.

B-in horn a rawn hmet ri a, ka hawiphei vat.

‘Kan kalsan dawn che,anih phawt aw’ ka ti a. A bu nghata,B-i lamah ban a vai nghal zauh bawk. Zorema nen kan inzui lai khan B-i nen an inhre tha ve hman viau.

Kan inkarah Soso-i kan thuttira, a mut a chhuak ngang aniang,a muthlu lak lak mai.Inah min Dropa, reilote a thu khawmuanga, tlai chaw ei turin ka sawm nangin min hnial thung.A haw tur ka thlaha, Scootyah a thu kaia,mahse tlan loin min rawn en a.

’Romala kha, Soso-i a hmuh khan engtin nge a awm?” nuam ti chiah lo hmel a pu.

‘Ka fanu anih leh nih loh min zawta, anih thu ka hrilha.Chu zawng chu’ awlsam takin ka ti liam puat.

‘Mak atih ka ring deuha, I bo vang vanga; fanu i rawn nei haw tawpa.Chu pawh pa tel lo lehnghal’ a hmui a pet zauh.

‘Mi ngaihdan tur zawng zawng hresa vek ka ni tih ihria alawm..A ni lo ami?” ka ti sap.A thaw nghal halh..

‘Nia, ka hria e…Anih ka kal’ tih leh Scooty start a ruala.

‘Kal rawh.Ruah a tla tan der ania’ ka ti ve vata.

A tlanliam hnuah inchhungah ka luta, Roomah ka lut tlanga. Khuma mangchhe zeta Soso-i mu chu ka en vang vang.A sirah ka mu thla ve a, a sam kir chiatin a hmai a hliah deuh chu ka hui kian saka.Mutui tih hriat takin a thaw ri sek seka, ka Hmangaih ngawih ngawih.

‘Ka ti tla anih loh chuan ka chhungten min that duh mai ang’ tap lek lek chungin ka class kalpui Arti-in a ti a. Vai hnamtha niin a ngo a,nu lian leh hmel pawh chhe lo tak a ni bawk. Mahse, a nu leh pa Sakhua la lungrun em em mai anni a, a rai tih an hriat chuan a him dawn lo tawp tih keipawhin ka hrethiam.

‘Chutiang ngawt a ni thei lovang’ ka ti hap ringawt. Engtia han tihtur nge ka hrethiam bik lo nangin titla lo se ka duh ve tawp.

‘Ka dinhmun i hrethiam lo anih kha.Sebastian-a be thei ila chuan a zia a.Mahse, a haw atangin thla a liam tawha.Biak pawh theihin a awm lo alawm.Tih tlak ka duh bik lova;mahse, dam khawchhuah ka duh’ a ti leh a. A mittui a tling pam mai.

‘Tihdan ngaihtuah ang.Hmanhmawh lo la, reilote tal nghak leh rawh’ ka ti leh tawp. Class ka kal tirh phat atangin kan inkawmngeih nghala,chhungkaw khawsak harsa lo tak niin an sakhua erawh la vawng tak anni thung. Sakhua an lak vung zia ka ngaihtuahin engtin nge kan zirlai ang hi an zirtir phal zawk ka ti ru hial. Kan inkawm hnu rei loteah Sebastian-a min hmelhriattira, cher sang lam,tlem kul lek lek niin a mitmu a pawl rama, a hmelchhe lem lo; keini aia tlema upa hret tur a ni a. Engtia intawng nge annih ka hre bik lo.

Sebastian-a an ramah a nu Damlohna vangin a hawa,a haw hnu lawk atangin a be pawp thei lova.A mangan tawh sa nak laiin a rai tih a hrechhuak zui leh bawk.A chhungte hmun hranah awm mah se an hriat mai a hlaua,a rilru hah nen a tla nghal rawk rawk a ni ber.

A mangan zia ka hriatthiampuia, ka bulah engkim a sawi bawk si nen ka lo manganpui ve takzet. A lan hma ngeia tihtlak a duha, Sebastian-a nghak thei niin a inhre tawh hek lo. Thlem chitin renga ka thlem pawhin pai tlang a tum lo bur. Tihtlak a tum hma zanin mu miah loin ka inngaihtuah tlaivar ta thaka. Mahse, ka rilru ka siamfel thung.Zingah ka nu ka biaa, engkim ka hrilha,a hrinchhuah hunah ka fa atana lak ka duh tih ka hrilha, a ngawi vang vang..’ Bawihte,risk asang mang e tiraw.Mahse, nunna chungchang a ni a,ngaihthah mai chi a ni si lo. I u ka lo sawipui anga, ani thu ni tehse.Mahse, I hriat reng tur chu mualpho i huam angai.Miin an duh duh an sawi thina,chu chu engpawh nise; pa tel lova fa pawm rapthlak zia keimah ngeiin ka tawng tawha.Theih loh chu ni lo mah se a rapthlak ania.Nakinah amah inhriatchhuah hun ala nei emaw apa ala hre duh anih chuan chhanna i neih angai dawn ania..Chung zawng zawng chu ngaihtuah lawk vek ang che..I inhuama,I u in rem a tih bawk chuan kei chuan i duhthlanna ka zah sak che a,ka hnial lo vang che.Mahse, nula i ni a, pasal ila nei duh dawna’ a rawn ti nghet charh.

‘Nu ,ka neih ka ring lo…’ ka ti tawl. Ka nu hi ka hrilh hauh lo nangin Zorema vang khan ka kehchhia tih a hrethiam thung.Beidawn hmel zetin a thaw halh ri ka hretheia.

‘Awle, mi fa ni loin ka fanu ini a..Ka hrechiang che,keipawn ka lo paltlang tawh kha i tum tlat chuan i thei ang..I u ka lo bia ang’  a rawn ti nawn leha.Ni e,ka nu hian kei leh ka u hi Pa tel loin min enkawl seliana,ani aia hrechiang tur an awm lo. Mahse, ka nu hi nu chak a ni a, keipawh ka nu fa ka ni a. Naute ka la anga, Nu ka ni anga. Chu chu ka khawvel a ni tawh ang.

Ka beisei ang ngeiin ka u pawhin hnialna a nei lo. Hmanhmawh takin Arti ka be nghala, ka remruatna ka hrilha..Min hnial dawn zeta, mahse a fa han paih ngawt kha a lo ngam bik lo a.Duhthlan tur dang a neih takah chuan lawm takin ka remruatna a pawm ve ta zawk.A chhungte hnenah class kalna a hlat thu sawiin ka inluah a rawn insawn adila,min lo ralkhat hriat ve tawh avangin an lo remti ve mai. Class thulh loin kan kal duna, dul nei chi a lo nih ve avangin a rai tih hriat mai mai theih a ni lo. Kan zirlai hi thla ruk course anih avangin a dul len tak tak hmain kan zo fel hman veka. A nu leh pa bulah hna thawh nghal a duh thu hrilhin kan chengdun zui zela. Kan zirtirtu duhsakna dawngin hna kan hmu zui nghala, mahse  ani erawh thla 2 bak a thawk lo thung.

Naute a pianga, Birth certificateah keima hming vek kan daha, tihfel ngai zawng zawng kan tifel vek bawk. Nakina thu leh awm thei engmah ka duh lova, ani pawhin a duh hek lo.Arti-in thla hnih a awmpui hnuah min chhuahsana, a lo let leh tawh lo..Keimaha naute ka enkawl zet chu ka zei lo em em a, hmeichhiaah mah nu lo chi ka lo ni vei nen,Zan mutthat theih loh lah ka nghah. Mahse, hriat loh karin hun a liam zung zunga, tunah chuan kum 3 lai a ni ve ta reng. Ka hlimna ber a ni a, amah vang hian nun ka thlahlel a, ka neihchhun ngawih ngawih a ni.

Ka nu lo sawilawk tawh mualphona erawh ka paltlang zo lo teuh kher thung. Ka chhuk tirh phat atangin Mizo awmho nen kan inpawhna a thaa, ka cousin a lo awm ve bawk avangin hmelhriat mi pangngai tak tak ka nei nghal nuk. Mahse, Arti nena thuruk kan intawm takah chuan Mizo zingah ka tel tawh ngai lova,tul tawpah lo chuan ka chhuak ngai hek lo. Mahse, naute awm ta ngawt kha thup sen ni hek lo le…Ka Cousin te ngei ngei pawh min sawi  nasa ber ber anni a.Archuk tui lo hial khawpin min chhuaha, Aizawl lamah an hre ve nghal thuai bawk.Mahse, kawng engkimah ka nuin min fuiha, nu chak anih zia a lo lang leh a. B-in min fuih nasat mai bakah thlakhat lai mai min awmpui turin a rawn chhuka,ka chakna hnar te anni..Tunah erawh tuman an sawi peih ta lo. Bakah,engpawh lo sawi tehreng se ka fanu, Sophie Remsangi tan chuan ka la tuarbelh zel thei tih ka chiang tawh lutuk tlat.

‘Helamah awm ngheh tum la ka duh khawp mai..Inngaihtuah chiang la’ ka u in chaw kan ei laiin a ti a.Huanah hna tam lai a ni a, mahse kan haw hnuah hian kartawp chawlh hmang turin a lo haw ve ta ziah.Soso-in angaina em em a, a lo haw chuan an inawm chawt a ni ber.

‘Ka hrethiam chiah lo.Rilru mumal pawh ka la nei thiam lo’ ka ti ve vat.

‘Hmanhmawhthlak tut tut phei chu a ni lova. I rilru lo siamfel la, helamah i awm dawn chuan Nuntea te insak lai an peih tepa.Hauh ran angai ang’ ka u bawkin a ti leh charh.

‘Khawilaiah nge an saka?”  ka ti a, an sakna lai a sawia. Helamah dawr hawn ka tum anih chuan Location tha ber lai tur a ni tih ka hrethiam nghal mai.

‘Chhuk leh ngei ngei ngaihna chhan tur thil a awm em ka hre lova’ thawh pahin ka nuin a ti a.

‘Aih, awm  lo…Ka thian pakhat nena dawr inhawn tawm kan tum deuh bak kha engmah plan ka nei hran lo’ rang fein ka ti leh vat.

‘Anih chuan ngaihtuah fel hma angai anih chu. Anih loh chuan Nuntea te in pawh chu an lo hauh fel hman mai ang’ a ti leh mawlh mawlh.

‘An be nasa tawh zawka. Nizanah a sawia, I luah duh takin tih thuah min lo nghak turin ka ti a. A rang lama hrilh an ngai ang’ ka u in a lo ti ve thuai.

Soso-i muthilh hnuah muhil ve mai thei loin ka let ka leta, chhuk leh ka chak hran lo tih ka inhria. Engmah chhuk ngei ngei ngai khawpa min phuartu a awm hek lo. Ka nu a kum a tam ve tana,awmpui nei tho mah ila fa te nen a in ang tak tak thei lo ang tih pawh ka ngaihtuah thiam ve.A pension hun a hla tawh lova, a pension hunah phei chuan Inah a awm nitin anga, a khua a har ngei ngei dawn.Ka u in nupui neih angaihsak bawk si lo.Ka thaw hak,khulam ai chuan helamah hian mamawh ka ni tih haider luih tlat chi pawh a ni lo. Mahse….Ka lu ka thing nak.Kum hei leh chen liam hnu pawh hian Mizoram ka thlen rualin ka ngaihtuahna luahtu chu ala ngai ta cheu a. Ka awm nghet anih chuan inhmuh hun ala awm ngei ngei dawna, kan inhmu lo anih vek pawhin Aizawl a zim em maia,a chanchin hriat hun ka nei lo thei lo vang.Huizzz, engvang tehlulin nge ka la hriat renga, ka ngaihtuahna ala luah cheu ni? Chuti fakaua amaha bet nghet turin keimahah sulhnu a nei pawh a ni si lo..Atan chuan a hmeichhe kawp thin zinga pakhat mai ka ni anga,a nunna thil danglam thleng ang a ni ve dawn miah lo. Ka kut ka humruha, ka thei ang. Amah vanga hnungtawlh leh tlanchhia ka ni tih pawh hre lo tu chu engvangin nge ka tlansan luih ngar ngar ang? Awmze nei lo thil a ni ka buaina hi…..

Ka rilru ka siamfela, engkim mai a kal tluang ta purh mai. Ka lo inkhawl ve nial hmana,mahse tam erawh a ni lo. Vanneihthlak takin ka nu in engkim min tihsak veka, ka inkhawl ve ang ang pawh engmah hman heu angai ta lo. ‘Ka fate duhzawng tihsak theih hi alawm ka duh ber. Mahse, puitlin lam pan lova min rin reng intum chuan ka duhzawng a ni lo tawp ania’ a ti hmiah.Dawr siamrem chhung atan thlakhat lai hun kan hmanga, mahse duhthusama intih larna hun kan nei ta hlauh zawk. Bungrua ka mamawh tur ka chah nghal a, nei kim nghal vek thei lo mah ila mamawh zualpui chu ka nei thei vek thung. Dawr hawng satliah loin zir theihna turin ka buatsaiha;zirlai tam tak erawh ka la nghal thei dawn lova. Vawikhatah mi 3 tan ka hawng phawt anga. Fee a tlawm lem loh avangin zirlai hmuh ka huphurh ru viau lawi ; mahse ka rin loh tawpin mi 10 laiin dilna an rawn siam nghal der..Ka rin aiin ka buai dawn tih ka hriaa, min puitu tur awm thei se tih ka ngaihtuaha.B-i hnenah Beautician pangngai,dawr hawng remchang rih lo,inzir belh duh a hriat leh hriat loh ka zawta, mahse vanneihthlak deuhin amah zawkin  inzir paha min puih a lo chak viau chu niin..Ka thaw huai mai…

Soso-i dawrah hruai chi anih loh avangin awmtu tur lak mai kan tum deuh that thata, mahse Day care tha zet mai B-in min kawhhmuh ta hlauh. An kalpui dan engkim ka zirchiang veka, zing dar 9ah an rawn lam anga, tlai dar 4ah an rawn thlah leh thung ang. Lunch atana an pek eitur te ka en veka.An pek aia tha chu Aizawlah chuan thlan tur a awm in ka ring lo. A neitunu,nu Smart leh biak nuam tak chuan min hip nghal chata,engkim mai ka duh zawng tak a ni a,fees a to fer fawr viau nangin ka ngaipawimawh duh lem lo.Soso-i hi naupang danglam bik a ni a, a landan maiah pawh Mizo a ni lo tih a chianga. Naupang mai ni lo,Zirtirtu thlenga mi danglam bik anga an treat lohna tur ka duh ber.

‘Vawiin atangin School i tan ve tawh dawna, fel takin awm tur aw’ a sam phiarsak pahin ka ti a.

‘I lo kal ve dawn em?” a ti khauh.

‘Aih, Nutei fel deuh deuh an lo awm anga.Chuan,I thian turte pawh an awm ang’ ka nui a.A sam ka phiar zo a, min en turin ka kuai hera.A biang taitek leh a sam buang thang te,a mitmeng pawl ram mai te chu a inhmeh ngawih ngawih. A vun rawng hi apa lamah kal fai vek loin a nu achhun tel deuha, sap ho vun rawng ni hluai ang hi a ni lova, a nalh ngang mai.

‘Mommy,I awm loh chuan tap ta ila engtin nge ni ang?api leh apu pawh an awm lo anga. Nanny pawh” a ti a,ka mitah tak min en kiau bawk. Ka a thusawi chuan ka kawchhung a fan nghal rawih rawih thei. Soso-i  a pian khan ka thil zir lai ka zo fel vek tawha, hna ka thawk tawh zawka, mahse naute enkawl angaih tak avangin hna ka bansana, ka nuin sum min rawn thawn ringin engmah thawk loin amah ka buaipui chawt kha ania. Mahse, thla li atlin hnu lawkah ka thawh thinna ten min rawn sawm leha, hlawh a tha a, thawk lova awm ngawt lah ka thei si lova. Nau awmtu ka la a. Ka khawsak ka tisang lem lo bawka thla tin tlem azawng ka khawl ve thei bawk. A tet lai atangin nitin kalchhuah san kha Soso-i tan pawh thil thar a ni lem lo. Mahse, vawiin chu amah zawk kalchhuak tur a ni a. A rilru a nuam lo ve a, sawichhuak thiam si loin a hlauthawng ve tih ka hrethiam.

‘Um…Nia, awm dawn lo.Mahse, ka naute hi a lian ve tawha,school a kal ve thei tawh dawn a.Chuan,tah loh kan zir tel anga..A tha em?” ka ngaihtuahna vakvel dahboin ka ti a. A biangah ka tuaia. Ka thilsawi ngaihtuah niawm takin a hmui a pet a, a tihfo dan a ni a. Hei kher hi chu anu ni loin keimah min chhun tlat!!

‘Yes or No?” a hnarah ka hmeta..

‘Oooo,Mommy..Yess ‘ a nui zui nghal ar ar a. A nui ri ngaihthlak nawm lutuk hi engtikahmah ka hre hne thei hian ka ring lo.

Motor lan theih chhung ka thlira, ka ruak nghal huaiin ka hria; ka mittui parawl teuh chu miin min hmuh hlauin ka khap hul sawk sawk bawk. Kan thenawm khawveng te hian ka chanchin an sawi dan a mawi lem lo. ‘Phaiah reilote a zuk awma, sap vakvai fa a zuk pai ringawta.A lo hawa,a zak miah lo lehnghal’ an ti a. Ka fa atana ka lak dawn khan hei hi chu ka tuar tur a ni tih ka hriat avangin lo sawi sawm sarih mah se ka ngaipawimawh lo..Ka nu leh ka u lakah ka inthlahrunga, mahse anni pahnih lah chuan an ngai ho khawp. Diktak chuan an thilsawi hi ka beng hriata sawi anni ngai lova. Ka hnung lama min sawi annih avangin ka hre loah ka ngai lui mai zel. Ka hriat an duh chuan ka hmalamah,ka hmaichhanah ngei an sawi mai tur niin ka hre ve tlat.

‘A kal ve ta lauh lauh maw?” B-in rawn thut thlak hnak pahin a ti a. Ka thle bak ringawt. Ka ngaihtuah naah a awm renga, an Miss te hnen atangin call ka dawn mai ka inring ru reng bawk nen ka hahdam hleithei lo.

‘I van nawm loh hmel tak’ ati leh a.

‘Nuam e, Bawihtei ka ngaihtuaha, hrehawm atih ka hlaua’ ka ti a, ka then lui sak.

‘Naaah,ngaihtuah lo teh. I fanu khan a nu achhun tih achiang reng a,a inenkawl zo viau ang’ a ti zangkhai vah.

‘Mahni inenkawl tur chuan ala nau em alawm’ ka ti leh halh.

‘Nia, mahse mi pawn ani aia naupang zawk annih laiin Day careah an dah fo alawm.Bakah, nang phei chuan nitin i chhuahsan thin a..Ngaihtuah….’ a sawi lak lawh laiin Customer tur an lo luta, a sawi zo hman ta lo.

Zirlai zinga pakhatin a lo be vat a, Appointment neisa an lo ni a. Online a Appointment siam theiha kan dah hi hna a ti awlsam viau mai.Kan awmna lamah an rawn inzui pheia, hmeichhe hmeltha leh changkang zet mai a lo ni a. A pian lah chu hmuhnawm thamin a nalha,mizo hlang anih ka ring lo deuh ngawt pek.

‘Evelyn-i anih saw’ B-in ka hriat tham lek turin a ti sep. Angaihna hre loin ka lu ka thing naka, diktak chuan tu nge anih ka hre lo hrim hrim.

‘I hre lehpek lo’ a ti hlaka. Kan inleng nu a rawn thleng chawpchilh nghal animai.

‘Lo thu rawh’ nui chungin ka ti a. Ka ep chiaha thutthlengah a thu thlaa, a pian analh mai bakah a vun a nung sarha,a mitmeng lian leh vap ham mai chuan a ti hmeltha lehzual.

‘Enge kan khawih tur le? Lawk aw, enge i in duh ang?” ka ti leh a.

‘Ka mithmul hi ania..Awi, traffic jamah ka rawn tang chiam peka’ a ti a. A aw tliang ral mai chu ngaihthlak a nuam viau bawk.

‘A tawt thin ngawt mai..Khua hi a lum deuh bawk sia, Juice lam em ni ang?” ka ti leh a.

‘Engmah angai lo.Ka lawm lutuk..Zanah Prog ka neia, ka hmanhmawh deuh zawka’ a ti dam leh thlap.

‘A takah i hmeltha lehzual e’ B-in phur sarhin a ti a. Ka lo mengphar awk ringawt. Tu nge anih ka hre si lo,engtia han dawnsawn tur nge ka hre eih lo.

‘I ti lawmawm lutuk..U Terin,aaa…Ka u mai ang che aw’ nui chungin a ti leh riha.

‘Aw,u rual lawih ka nia lawm..’ ka nui ve hak hak mai.

A mithmul ka siamrem saka, ka vuah belh sak bawk.A tawng siam siama,anihna a sawi chiah lo nangin Model anih ka ring ve tawp. Social Media lam ka hnuchhawn rei luat avangin Mizo zingah tu nge lara lar lo pawh ka hre mumal lova.Tunah Aizawlah eizawnna bul ka tan leh ta si a; B-i lo sawi lawk tawh ang ngeiin thil thar tih takah an rawn bawh nghal huk maia. Engkim mai a rate a tlawm loh vei nen pawisa chu ui lo tak anni ringawt. Mizoin milar kan neih ve ho an lo kal nasa a, kei lahin ka lo hre fuh lo leh thina,a pawi tih vang vang chang ka nei a.Mahse, B-i a awm hlauha,mulapho loin ka chhuak hram hram chu a ni ber.

‘I thlalak hi kan Pageah kan dahchhuak dawn asin.A rem angem?” kan tih zawh hnuah B-in a ti a.

‘Awi, lutuk ringawt..Ka landan a danglam chiam lova, a natural tho bawk si..Aaa, ka lawm’ hlim zetin a ti hliai.

‘I Photo kan dahchhuak tel dawn si a, 50% discount kan pe ang che aw’ ka ti a. Hlim zetin a khek leh raih..

‘Ka rawn kal ngun dawn lutuk hi ka inngei tawp’ a nui zui leh ar ar mai.

Ka rin ang ngeiin Model a lo ni a, kumin a Miss India thlanna neih turah Mizoram ai a awh dawn bawk a. Model anih mai piah lamah tawng a thiam nuala,a thluak a tha em em bawk tih a sawia. India rama awm kan nih tlat avangin ngaisang lo hle mah ila Hindi hman theih a pawimawh zia kan sawi zuia. Evelyn-i kha chuan hindi duhtawkin a hmang theia, ngaihtuahawm anih loh zia uar fein a sawi a..’Amah kha Mizoramah a awm tlem lutuka,bakah an khawsa thei a.Lehkha a thiama, Model nih tum lem lo tak a ni a.Mahse, a Cousin Designerin a thawmhnaw tih lar nan a hman duh avangin a Modelah a hmanga, a lar ta hluaia..A class reuh sia,ka duh ania’ a ti leh siam siam.

Soso-in an school chanchin min hrilha, nikhatna chauh a ni nangin nuam a ti viau tlat. Thian kawm ngai lo anih avangin ka ngaihtuaha,midang zinga awmdan a thiam loh ka hlau tel bawka. Mahse, ka hlauhthawn ang a thleng lo tih a awmdanah ka hrethiama. Ka thawl deuh huai mai.

Soso-i muthilh hnuah ka inngaihtuaha, tlanchhe nun hi ka kalsan angai tih ka hrethiam.Kan page hi B-in enkawl zo em em mah se a neitu ka ni a, ka hriat ve a tul mai piah lamah thian pawh ka siam belh angaia,hmelhriat ka neih a tul.

IG ka install a,kan Pageah ka luta,ka beisei phakbakin Followers an lo tam. Ka enkual dan dana, Evelyn-i pawh ka hmu a. Ka stalk zui nghala,a photo nalh tak tak a lo awm teuh maia, mahse B-i khan a sawi dik tih ka hria. A takah a tha fe zawk tlat.

Hun a kal ve bek bek zela, malsawmna ka dawnga, nitin min dawrtu an chatlak lo tih theih a ni a. Zirlai te pawn thla thum lai an kal ve takah chuan an thiam ve hlawm tawh viaua.Mahse, customer te hi keiman a theih chin chu ka khawih vek thung. Nitin hna ngaireng nimahse thian thar leh hmelhriat thar ka chhar zela,ka hlauhthawn ruk,Zorema nen inhmuh emaw achanchin hriat mai ka hlauhna kha engmah a thleng ta hek lo. Nun hi a ruak ngawt lova, awmze nei a ni a, a hlimawm tih pawh ka man thiam leh tan ta mek.

‘U Terin…’ min ko ri ka hriat veleh ka hawichhuak nghal vata. Evelyn-i a lo ding reng tawh.

‘Ehe! Nang maw? I dam maw?” ka ti hliai. Miss India tih velah a inthehthil avangin kan hmu lo vang vanga. Vanduaithlak takin top 10 a paltlang zo ta lo hlauha, pawi ka lo tihpui ve em em bawk.

‘Um,dam alawm..’ zangkhai takin a ti leh a. Kan high school kalpui thin,ka classmate te nen re-union neiin Hotel Floriaah kan dine out a.Evelyn-i lo lan hnua Mipa ho phur zual ta sawt hmel chu ka hmuh hmaih lo.

‘I lo haw tih pawh ka hre lova. Min lo tlawh dawn em?” nui chungin ka ti a.

‘Um,dawn chiang.Ka mamawh rapthlak che’ a nui ar ar a; ka nui ve var var. Mahse, a hnunga rawn ding ka hmuh rualin ka nui tawp nghal chawt.Min rawn en ve chiah bawk.Mahse, min hre awm pawha awm loin a hawisawna, Evelyn-i a en a.

‘Kal ila…’ a aw pa zetin a ti nghal a. Inveng hman loin ka mit ka chhing sawk ringawt.

‘Kan kal phawt ang aw. Naktukah emaw ka lo tlawh ang che’ nelawm taka nui chungin a ti leh a. Tawngkaa chhang loin ka bu nghata, harsa ti lutukin ka nui lui thei hram bawk.

An kalsawn chu duh lo teh mah ila ka en lo thei lo. Zorema banah a kuaha, insi chetin an kal duna. Zorema min en danah khan min hre hmel a pu lo.Ni e, atan chuan reilote a lo kawp tawh hmeichhe pakhat ve mai ka ni a. Hriatreng tlak ka ni lul lo ve.

PS: A khat zeuh zeuh em maia, feel veng veng a harsa ngawt ang,Ka thiam loh a ni.Chuan,naktuk zan pawh hi ka dah dawn leh dawn loh Comment lamah in lo ngaichang leh dawn nia aw u..A thei khan min han click sak leh liam liam ula,tin ka YouTube channel lam pawh la subscribe lo tan subscribe theih reng a ni bawk e💜💜