PURPLE HEART - 3

Chapter- 3

Dawhkan hnuaia ka kut ka humruh tlat chu B-in a rawn vuan a, ka melh vat. ‘Hahdam rawh’ hmui phunin a ti sap.Harsa ti ru chung chungin ka nui lui a, diktak chuan kha lehchen kha hmuh mai hlauin ka khawsaa.Mahse, Thla li dawn ka awm hnuah pawh ka hmuh tak miah loah chuan ka hmuh mai hlauhthawnna pawh a bo zo leh hman tawha.Ka tum loh em emin zaninah ka hmu ta hlawl. Ka rilru atanga dahbo viau tawh anga ka inngai leh hahdam zawka ka hmachhawn theih ka lo inring kha ka ngaisual der tih ka inhrechiang nghal vek bawk.

‘Khapa kha ka hriat hnu ava ang ve’ Lawmsanga’n a ti a. An thilsawi ngaipawimawh lo anga lan tum hram hram chungin tui Bottle ka bana.Ka herh hawng nghal rak rak.

‘Zachary- a anih kha. Virgin Killer’ ka tuiin ka haka, ka khuh zui nghal bawrh bawrh mai.

 ‘I tha em?” tih pahin ka hnungah B-in a rawn chum dat data, chhang mai thei loin ka khuh zui leh rih.Mittlui parawl khawpa ka khuh hnuah a zia ta hram.

‘Kum a upat tawh hi chuan tui mai mai pawh hi lem a harsa talh zel ania’ Lawmsanga bawkin nui huau huau chungin a ti a. Za miah loin ka nui ve hak; a thilsawi vanga hak ka ni tih hria se chuan mak tiin a mengphar nasa awm mang e.

‘Ka la sawi zo lo,Evelyn-i kha Terin-i nen an lo inhre tha tih ka hre ta bawka.Naktuk lam chu Terini dawrah va leng teh ang. Police Officer nghal zet khan a lo chuan chul hnep tawh anih pawhin pawi ka ti lo’ a ti zui leh duah.

‘Min tlawh duh pawh ni lo,ka inleng vanga lo kal tum chu ka lo Welcome tehchiam dawn lo che ania.A ni em thiannu?” B-i ka en paha.

‘Dik chiah mai’ a lo ti ve hlak.

‘Oooo,nangni te chuan min duh lo tih achiang sa veka.Evelyn-i kha chu min duh lo rau rauah pawh hmelhriat ka chak alawm’ a ti liam leh puat.

‘Zachary kawp hnu kawp chu intih theihna tham a lo ni ve maitheia..Nula lar leh tha deuh chu tumah a kal kan hleinem’ Rinzuala’n a lo ti ve chuar chuar. A chanchin ka hriat loh vang vang hnua ka hriat leh hmasakber hi ka thil beisei loh lam a ni tlat.

‘Khapa kha ka hria alawm.Bialnu nghet a neih thin kha’ Dini’n a lo ti ve boh. Ka chhungrila zawhna awm a rawn zawh takah chuan an chhanna hre chakin ka lo thaw tha ngam lo.

‘Nei thin lo aniang.Kum hei lehchen chhung hian nula hmeltha leh langsar ho khawihchhiat bak hna a nei hleinem’ Rinzuala’n a ti leh vut. Inring hman loin ka thaw hak mai.

‘A ninawm tawh e..Mi chanchin sawi zui chiam mai.Kan thian hnai pawh ni hlei lo’ ka awmdan hrethiam takin B-in a ti hmak. B-in a khak takah chuan thildangah an pakaia, kan titi kalphung a danglam ta hlawk. Ka titi ve luama, zawhna eng eng emaw kan inzawh tawn bakah kan School kal lai chanchin kan sawi a. Ka nui leh ta dar dar. Mahse, ka chhungrilah erawh Zorema bak kha a awm thei lo va. Na nei si loin ka awm a nuam lo ru veng venga, hahdam taka awm turin ka infuih ve teh nangin ka hlawhchham chiang bal.

‘Mi tenawmpa kha a lo lang khera, kan mood a tichhe veka,nawm pawh a nuam zui mai mai lo; Hreptak hian…’ B-in thinrim deuhin a ti hlak hlak.Ngaihtuahna mumal nei lo zetin ka bu liam satliah ringawt thung. Mahse, nizan khan ka  tlaivar ta deuh thaka. Ngaihtuah loh ka tum pawn ka thei lo.’Engvangin nge Hmingsangi kha a neih mai loh? Tu pawh kawp se Hmingsangi bak a hmangaih chuang lo va, mi rilru a tina tam mai mai dawn tihna ania..Engvangin nge hmeichhe tamtak nun tihchhiat kher a tum? Infiamna hmanrua ang leka angaihte zingah Infiamna anga ngai lo tamtak an awm ang.Chung zingah chuan kei ngei pawh ka ni ve tih ka pha lo..Kan inkawp lai khan Mipa nihdan tur zawng zawnga ka lo suangtuah kha a ni fai vek a. Sex lam hawi phei chu min nawrlui ngai lo hrim hrim..Khatiang khawpa insum thei si khan engvangin nge tunah a mamawh viau? Keimah kha a it zawng ka nih loh vangin a lo insum thei mai mai zawk a ni angem? ’ awmze nei lo zawhna ka inzawt a, chhanna phei chu a awm lo lehzual.

‘Hey…Khawnge maw ilo chen veng veng le?” ka hmai bulah a kut a rawn hmet ri khapa,ka phu zawka.Mawl hmel zetin ka en vat bawk.

‘Eng..Enge?” ka ti bah nak mai.

‘I nuam lo deuh niin ka hria. Lo kal tur la awm tho mah se vawiin chu Cancel tawh mai la a thain ka hria’ min ngaihtuah hmel takin a ti a.

‘Aih,nuam e..Nizan chu Bawihtei a mu tha duh lo lutuka’ chhuanlam siam tur ka rilrua lo lang hmasaber ka sawi ta ngawt.

‘Takzet? Bawihtei nge mu thei lo a nu?’ inti fing zetin ka mitah tak a melha. Ka ngaihtuahna hriat a tum tih ka hai lo. Naupanlai atanga inkawm kan ni a, kan inhrechiang tawn ve ve a. Dawt inhrilh mai mai chi kan ni lo.Mahse, tun tum chu a rilru nawm lohna tur engmah siamsak ka duh tawh lo.Chuvangin a rilru nawm nan tal dawt ka sawi a tul.

‘Hahdam teh..’ ka ti nghauh.

‘Naa,nang kha hahdam zawk tur i nih kha.Keiin buaina ka nei lo aw’ min ngei hmel zetin a ti hlak.

‘Keipawh buaina ka nei hleinem’ ka ti leh nghat.

‘A tha anih mai chu.Mahse, I thusawi kha i hmel nen inmil deuh se chuan ka hahdam ang’ a ti leh hmiah. Ka bum leh zo dawn lo tih ka chiang mai.

‘Aaaa,ninawm..’

‘Nia,ninawm..’ nghal zetin a meng kual a.Ngei lutukin ka ner khum ve thung.

‘Thil ei ang.Ka ril atam’ ka tho a. Ka zi mar nghal ar ar.

‘Nia, eee…Saw laia Dawr tharah khan va kal ila’ phur fein a ti a. A rawn tho ve nghala.

Thil ei turin kan  inzui chhuaka, nidangah hi chuan chhuak kher loin kan Order tlangpuia. Achangin in atangin ka pai zauh zauh bawka.Mahse, vawiin chu ka awm a nuam lova, Dawr chhunga inkhung ngawt ngawt loin Boruak thar dawng ila ka harh hawk ka ring.

Kan dawr atanga piah deuhah fast food Restaurant lian vak lo,felfai leh changkat zet lawi si a awm thara. B-i nen kan inzui luta, thutna awl lam kan pana. Waiter inchei nalh thlap hian min lo chiau au nghal vat.Kan eiduh kan chaha; kan nghah chhungin thil ho mai mai sawiin kan ti ti a. Pawn lama Motor tlan dul dul chu ka thlir pah vang vang.

Kan eizawh hnuah thu khawmuang loin kan chhuaka, muangchangin Dawr lam kan pan pheia. Khaw awmdan duai ruih mai chuan ka Mood chhe lutuk min hriatpui emaw tihmai tur a ni.

‘Enteh, Soso-i nen a inhmeh dawn lutuk’ a ti hluai. A kawhna lam ka en a, Sazuk lem lian nalh zet mai hi a lo ni a. Ka mitthlaah Soso-i nen an inpawm tur a lo lang nghal zat.Nia,a sam kit chiat leh buang thang bawk si nen a inhmeh dawn lutuk ringawt.Aman ka zawta, ka rin aiin a tlawm. Khulama kan  awm lai khan Toys angah em em thina, mahse Aizawla awmhlen kan tum takah khan kan bungrua ka zuk chingfel a. Toys zawng zawng nena haw kha a buaithlak a,amah lah a lian ve tial tial bawk nen,a duh zual bik pathum tih loh chu kan Buildinga awmve chhungkaw hnih te ka pe ta vek.

Kan dawr kan luh rualin Evelyn-i tawngri ka hre nghal a, ka ni nghal nghulh pek. Huizz,ava han hahthlak si tak.Nizana an awm danah khan inngaizawng an ang a.Diktak chuan khatianga an inzui ka hmuh takah kha chuan Evelyn-i chawpin ka hmu tui lo zo vek tawh dawn tih ka hria.

‘I lo thlenna arei tawh em?” ka ngaihtuahna thup chungin pangngai takin ka ti a.

‘Aih ,ka lo thleng deuh chiah’ a ti ve vat. Nidang ang bawkin alang thar sara, a hmeltha tak leh a vun nung sar te,a pian nalh thlap mai te chu ka en a.A vannei chungchuang ka ti lo thei lo. Pian nalh tak hi an hmeltha tel duh lo viaua, hmeltha tak pawh an pian a nalh vek chuang lo emaw tihmai tur a ni thina. Mahse, Evelyn hi chuan a nei kawp vek.

Nidang ang bawkin a mithmul kan khawih hmasa bera, a hnuah a tin kan chei leha. A lo kal reng rengin keima khawih kher a duh thina.Customer dang,ka khawih kher duh ni lem lo ho chu  zirlai te ka khawihtir tan tawh thung.Mahse, tihsual palh a awm ka hlaua,ka mualpho theihna anih avangin Zirlai te khawihtir mah ila ka enpui veka, ka kalsan ngai miah lo thung.

Miss India leh a chhehvel chungchang a sawi siam siama, Customer dang kan neih loh lai tak a ni bawka,ngaihnawm titakin kan ngaithla thap.A chetchhiatna nuihzatthlak tak tak a sawia. Kan nui ho leh dar dar thin bawk. Ka lo huphurh ai tak chuan keipawh ka zia ta viau.Mahse, ka rilru kil khatah Zorema nen khan enge annih ka hrechak veng veng tho.

‘Kal mai i tum ami?” kan zawh hnuah ka ti a.

‘Min lo lam dawna,naaa…Ruah a sur leh tawh’ a ti zui nang nang. Tukverhah ka daka, ruah a sur sung sunga, baw tlawrh tlawrh a ni lo nangin Two wheeler tan chuan a ngeiawm khawp ang.

‘A sur dan angeiawm tawp’ ka ti ve sap.Ka bulah a rawn ding ve a, kan dinna hnuai kawngpuia Motor tlan dul dul chu kan thlir thla dun vauh vauh.Nitin mai hian tihian Motor tam em em an inhnawh khat mup mup renga, kan kawngpui neih ve lah a te si. Chuta karah kawngpui hnaih tak takah insa duhtawk an la kat nuk zui.

‘Aaaa, khu a lo thleng chiah anih khu’ phur zetin a ti hliai. A kawhna lam ka zuk enthlaa..Ka lungphu a rang nghal dawt dawt mai. Rawn hawichhuak miah lo mah se tunge anih ka hrechiang lutuk tlat.

‘Ruah atla tam bawk si.Lo chho ve lawk mai tehse’ ka rilru hre lo em emin a ti leh a. A phone a khawiha,a call zui chu a ni der.

Ka kalsawna, ka hnaih ber thutthlengah ka thu thla hnak.Evelyn-in lo chho ve rih tura a tih ri chu ka ngaithla ru kara. Lo chho duh lo se ka lo ti ru ve ngawih ngawih thung.

Reivak loah penri a rawn awm a. Ka insangmar nasa zual sauh.Mahse, ngaihsak lo awm takin ka Phone ka phawrha, Bawihtei biak tumin ka nu ka call nghal zat.

‘Nu…Bawihtei ka lo bia’ ka tih rualin kan nau pakhatin lut tura a sawm thawm ka hre ve nghal zat.Mahse, ngaihven anga lan ka tum lo.

‘Mommy…’ Bawihtei awin a rawn ti a. Ka nui nghal sak.Kan awmna hmunah khan Mizo kawm tur an awm hnai lova. Thian a kawm lo tihtheih a ni.Amah awmtu khan Hindi-in a biaa, keiin Mizo tawng leh Englishin ka be thunga. Naupang Special tak a lo ni bawk nen a thiam kawp vel vek.Mahse, Hindi erawh a hrereng angem ka hre lo.Ka hmang thei mumal meuh si lo.

‘Enge i tiha? Api iti buai em?” dam thlapin ka ti a.

‘Aih, ka tibuai lo. Api nen huanah kan kal dawna’ a rawn ti a. Inchung zawlah ka nuin thlai a nei teuha. Tlai tin an kal dun ziaha,nuam a ti thei ngang mai bawk.

‘Ok..Api thlai kha engmah tihchhiat miah loh tur ania.Chuan,tlan kual miah loh tur a ni bawk tiraw?” duat takin ka ti leh a.

‘Awle..’ thuawih takin a rawn ti leh thliam. Hmeichhe naupang nem leh thuawih tak a ni a, mahse achang chuan mipa naupang emaw tihmai tura khawsak aching ve a. Kar kalta khan ka nu ar note pathum lai tuiah a lo chiah hluma. Hrem ka tuma,mahse ka nuin a khawngaih tlat.Tun atangin zilh leh hrem chungchangah ka nu nen kan intai nghal chu a ni ber.

Phone ka daha, ka hawichhuah rualin mi pathumin min lo en thap. An hmel landan in ang lo lutuk chu ka en kuala, ka then sak ringawt.

‘Ka u anih hi…U,nizanah kan hmuh tawh kha.U Terini ania..Azarah hian nalh takin ka lang thina’ a nui a. Atthlak em emin ka lo thawl hawk!!!

‘I tha maw?” nelawmna tel eih loin min ti hmuk. Min endan leh a cheziaah chuan kan lo inhre tawh thin tih pakhatmahin alang lo.

‘Tha alawm,nang zawk?”  dam thlapin ka ti let ve a. Tawngkaa min chhang loin a bu nghuta.B-i hmel buai lutuk chu ka mitsirin ka hmu ru kara;mahse ka en duh miah lo thung.

‘Kal nghal ila..Min nghak a’ Evelyn-i hnenah a ti a.

‘Ruah ala sur hi..Kan huh vek dawn asin’ Evelyn-in a ti hlak.

‘Nia, la thu ula.A sur rei nang. Puipui,intur lo laksak ta che’ kan nula pakhat hnenah ka ti a.

‘Eve,angai bawk ami? ‘ tih pahin Evelyn-i ka en a. Ka awmdan cool leh zangkhai tlat lawi si chu keimah ber pawn ka inhrethiam lo!!!

‘Pawi miah lo..’ a nui a. A mit min siai khum nghal zauh bawk.

‘White Malt pakhat leh Plain tea aw’ Puipuii hnenah ka ti a. Ka sawi zawh rualin ka inchhir nghal zat thung. Phawk zeta Evelyn-in min en chu tihngaihna hre loin ka nuih ta ngawt. Diktak chuan Zorema hian Plain tea bak a inngai lova. Chu chu engvanga zawt buai eih lova han sawi ngawt nge ka nih ka inhre thiam lo. Mawl ka inti lutuk ringawt. Zorema lam ka hawi a,ka rin loh lutukin min lo melh reng chu niin.Rang lutukin ka mit ka la lehnghal vata, mahse a then nawk ka hmu hman tho. Hmmppp….He pa hian min hre lo ni loin min hre duh lo tih ka chiang lutuk ringawt.

‘Ka va han haw ber tak..Min hria ang pawn a awm duh miah lo.Chapo leh lutuk mai’ B-in thinrim zetin a ti hmak. Kei erawh ka insehruh nasa lutuk kha an kal meuh chuan ka chau hnawk thei a. Tawng loin inchung lam ka melh vang vanga. Mahse, ka ngaihtuah naah thil a lo lang zawk.Ka thu mara,B-i thinrim zeta thu tum vuau chu ka en a.

‘I lo ngaihtuah em? ‘ ka ti sap.

‘Eng maw?” a ti hlar mai.

‘Evelyn-i kha Zorema nau a lo ni daih kha. A hma khan chutiang engmah ka hre miah si lova’ ka ti halh.A mengphar deuh ak mai.

‘Ni chiah.Ka lo ngaihtuah miah lova, amah ka ngei lutuk vang khan ka  mood a uih over a’ a ti leh hlaih hlaih.

 ‘Unau pahnih kha annia..A cousin a ni angem?” ka ti leh hap.

‘Maithei…Lawk…Angie kan zawt anga, afiah vek ang’ a ti leh nghal zata. ‘A ho em mai,zawt duh suh’ ka ti a. Ngaipawimawh lo zetin a phone a khawih nghal mawlh mawlh.

Inchung lam bawk ka melh leha, nizan khan Mipa ho khan achanchin an sawi hmangah hmeichhe chi hrang hrang kawp lawr duah a ni a. Evelyn-i ngei pawh kha a hmeichhe kawp zinga mi angin an chhuah titih bawka.Mahse, awihawm loh lutukin a u a lo ni daiha..Ka hmui ka peta, achanchin dang ka hre lo.Mahse, thil pakhat erawh chiang takin ka hria. Atthlak lutukin ka thawveng.Ni e,Evelyn-i bialpa a ni lo tih ka hriat khan ka thawveng nghal hawk..Buaithlak hian a…..B-in Angie a be mawlh mawlh chu hre mah ila enge an sawi ka hre zui chuang miah lo.

‘Enteh..’ ka bulah a rawn thu a, ka melh ringawt.

‘Zach-a Patea fanu anih chu. Phai lamah an awm nasaa, a pa a boral hnuah helamah a lo haw chauh ati a. Chuan,anu hi a che ho zui deuha.Zachary te bulah a awm nghet tawh a ti ’ a ti a. Ka thle bak ringawt.

‘Hetah Eve-i a tlangnel si,a u mi tenawm kha a lo lan ve fo loh beisei phawt ang’ a ti zui leh hmak.Ka chhang lo..

‘I tha tiraw?” min ngaihtuah niawm takin a ti leh a.

‘That lohna tur a awm dawn em ni?”tih pahin ka thu mar nghala.

‘Um…Mahse…’

‘Ka tha.Kum a liam teuh tawha.Chuan,min hrechiang a ni lawmni?” inringtawk zetin ka ti a.

‘Hrechiang..Chuvang tak chuan ka ngaihtuah che’ a ti khauh.

‘Hahdam rawh..Hei hi ei la,I Mood pawh a tha sawt ang’ ka ti a. Ka bula Elaichi bawm awm ka pe a. Min ner khum nghek thung.

Ka mu meng kara, ka bula Soso-i muhil mek chu a chal ka deka, a lo dai diak tawh. Ka hawin a khua a lo sika, phili chi tih takah ka mangang nghal ngawt pek.Mahse, amah a harh thaa, tlemin a chiau hiar deuh tih loh chu danglam vak a awm loh avangin Damdawiin lama kalpui rum rum ngai a ni lo thung.

Ka rin loh deuhin Soso-i a nuam lo zui ta zel.’ Vawiinah entir la a tha ang.A reh leh mai dawn emaw ka tia; rinaiin a la na reuh riau mai’ ka nuin a ti a.

‘Nia, nizanah pawh vawihnih lai a khawsik a awm leh a. Chaw a ei tha peih bawk si lo’ ka ti a. Zawi zeta a mu chu ka en vang vang.

‘Entir la,a zia leh mai ang.A hrim hrimin nangmah hi i damlo tel a ni hrim mai zela,a buaithlak thuah hnih em thin mai’ min zilh titihin a ti a. Ka pawm thlap..Soso-i a damloh tawh chuan ka mangang lutuk hi ka damlo tel ve zel hi a ni ringawt.Ka muhil thei lova, thil ka ei tui lo nghal vek zel a; thil tul lo pui pui ka ngaihtuah vak vaka, ka ngaihtuahna vanga mittui tlak tum lah ka ngah.

Tlaiah inentir turin ka kalpuia. Naupang dang lo awm ve nuai nuai mai chu hmuhnawm ti hmel takin a thlir dauh dauha. Han teivel tumna pawh nei loin ka mal chungah a thu kak. Awm ve dangten an en duh lutuk chu huat theih ni lo mah se ka thinrim  deuh tun tho.Anihna takah chuan Mizo naupang hi a ang lo chiang lutuka, en bik hlawh tur hi chu a ni ve hranpa hrim hrim.Hei vang chiah hian Aizawla awmpui ka duh lo thin reng kha ania.

Doctor thutna kawngkhar a rawn inhawnga, Receptionist,nula te leh ngo ving vengin lut leh tur hming a lam lauh lauh bawk.’ Bawihi,engzatna nge lut tawh’ mipa aw hian a tih ri ka hriaa. Ka en satliah.Pa tawk pangngai tak a ni a, mipa naupang  chum biang mai a kaia, a bulah a nupui niawm tak nau paw chungin a ding a,min hnungchhawn zawnga ding anih avangin a hmel ka hmu thei lo.

‘Mommy, tui ka duh’ Soso-in a ti a, a tal nghal sat sat. Bag atangin ama hman thin tui Bottle ka phawrha, ka hawnsaka, tui hal tih hriat takin a fawp nghal dawk dawk.

‘Ka lo thu ve aw’ hmeichhe awin a rawn ti a. Ka hawichhuak nghal vat. Mahse, ka tum loh lutuka Hmingsangi ka hmuh takah chuan ka hamhaih vek. Tun lawka lut tawh zat rawn zawt tu,a nupui nia ka rin kha a ni tih a Dressah ka hrethei.

‘Ka lo thu ve thei em?” a ti nawn leh a. Muhil miah si loin ka harhchhuak nghal zawk.

‘Oh..Aww, lo thu rawh’ ka ti nawi nak. Ka tawlhphei nghal zat bawk. A rawn thu thla ve a, kan hma chiaha thutna awlah a kalpui leh mipa naupang an thu thung.

‘Enge in entir dawn?” min rawn be leha. A aw tliang ral mai chu a dam hle bawk.

‘Hritlang khawsik ania..Nangni zawk?” pangngai thei ang berin ka ti let ve a. Diktak chuan keiin hre mah ila ani chuan min hriat ka ring lem lo.

‘Hritlang khawsik bawk mawle. An unau hian an inkai peka’ nui sang chungin a ti a. Tawngkaa chhang tawh loin ka bu nghat ringawt. Inbe zui loin kan thut ngaiin kan thu a, mahse ka ngaihtuahna abuai vek thung.

An inbiak danah a pasal tih a hriat theiha,an fa upa zawk  chu Soso-i nen an inrual vel hmel,a nau zawk erawh kum khat pawh la tling lo tur a ni thung. Ka awmbo atang khan kum li aliam tawha, anih si chuan ka awm loh hnu lawkah pasal a nei tihna ania. Kan inthen chhan kha ka ngaihuah leta, a dik thei lo. Hmingsangi hian pasal a nei a,an fa te en hian an inneih hun tur awm a rin hriat theih vek..Enge a awmzia ni ta? B-i hian engmah a hre lo tihna nge ni ang?

Tlang hrileng a lo kai a lo ni a. Thil hlauhawm anih loh thu min hrilha,ka thawveng huai. A khawsik tan hun te min zawta, ka hrilha. ‘Ni 2 vel bak chu a zia awm ka ring. Natna dang kaipalh hlauhthawn thuah inkhung tam thei ula.Chuan,ui in vulh chuan hnaih lo bawk se la’ a ti a. Ui kan vulh hauh lo,mahse kan inhnuai te uite hi Bawihtei’n a duh em avangin a lo kal reng reng a. A fai that bakah khawlaiah achhuak ngai lova. Ngaihthat loh nan ka lo hmang ngai miah lo.

Doctor sawi ang tak takin ni 2 aliama, a tha chhuak chu a ni mai. A damkawr chiau hiar lutuk a reha, School kal ngawt a sawi ta thung.

‘In lo buai thin em?” thut thlak pahin ka ti a.

‘Aih,buai over lo e. Mahse, nangmah duh kher kher an awm thina.Chu chuan tlem chuan min tibuaia’ B-in a ti a.

‘Rin aiin a na reuha,kalsan mai a huphurhawm ve em atin ni.Dawr khar lah i duh mang si lo va’ ka ti sap.

‘Ho lutuk,I ngaihtuah viau ka hlaua.Chuvang ania nangmah duh kher ho kha chu i awm hun nghak tura ka lo tih. Hei,Latei hian a thiam tawh bawka. Tumah lungawi loin an chhuak teuh lo mai’ hlim zetin a ti siam siam.Latei hi zirlai zing ami a ni a. Class kan tan phat atangin mi bik a ni tih ka hrethei nghala. Amahah beiseina pawh ka nei sang renga.Mahse, zirlai zinga tihbik neih hi ka thil hlauh ber anih avangin amah ka beiseina ka tilang ngai lo.

‘A lawmawm hlauh chu..Thla hmasa hi kan close thei ang tiraw?” ka ti leh a. Pawisa chevel hi sumdawnna dang anga lian tham hluai ni lo mah se thlatin felfai taka closing neih ka duh tlat thin avangin kan closed thlap thlap zel a. Sum chevel atangin kan hlawkna leh tan kan ngaihna lai chenin hriat a awlsam em em bik tlat bawk.

‘Um,thei e..Mahse, nakinah en ila..Vawiin chu thawk te han la phawt teh’ nui chungin a ti a. Min ngaihtuah tih ka hria.

‘Nia,a tha reng..Enteh’ ka ti a,Latei lo kal chu ka en a. Thil min rawn zawta, ka chhan hnuah a kalsawn leh a.

‘Sawi la..’ a phone en chungin a ti a.

‘Bawihtei ka entir khan Hmingsangi ka hmu a’ ka sawi zawh rualin phawk zetin a rawn hawi chhuaka.

‘Maw? chuan engtin nge?” a ti vat.

‘Pasal a neia. Fa pawh pahnih an neia. A upa zawk chu kum 3 vel tho ania’

‘Chuan…’ a ti leh cheu.

‘Pasal a nei tih i hre hrim hrim em?” ka ti nghauh.

‘Ih..eng lo..Diktak chuan…’ a ngawi leh riha. Zawimuangin ka thu mara, ka bula thu mek B-i hi ka hrechianga. Hetianga a awm hi chuan zep liantak a nei a lo ni thin.Mahse, enge a zep ang?

‘Phaia i chhuk hnu khan Zachary-a a lo kala,a be duh che a.I awmna hriat a duha,bakah insawifiahna hun i pek theih a beisei a.Ka biaksak che a duh a….” che loin ka melh reng ringawt.

‘I number nei mah se i pick duh aring lova…Chuan, tihnat che a duh lo tih a sawia’ a ti leh a. Ka la che chuang lo.

PS : Ka regular lo si tiin sei deuh taka dah zel ka tum a,Mahse, hei vawiin chu hritlang tur intham,hrawk thip leh luakchhuak nen ka ni bur maia. Ka lo sawilawk tawh si avangin ka ziah peih ang ang ka rawn dah lut mai e.Naktuk zan lam pawh a awm dawn leh dawn loh kan sawi tha leh dawn nia.

CHUAN ,KA POST DAWN HIAN KA HMAI KA TUAM AW😷😷