MINE -4,

 Chapter - 4

Dimtein ka sam tawi mat mai a kut lehlamin a rawn khawiha. Engtia awm tur nge hre loin thuawih takin ka awmdan ngaiin ka awm mawl ve tawp thung.

"Ti nge? Kei kher?" at hmel zetin ka tichhuak thut. A thle deuha, ka biangah a kutzungpuiin a rawn tuaia..

"Nangmah i nih avangin ka duh che.A bak a awm lo" a ti sup. A aw nghet cherh chawrh lutuk chuan min hneh lo thei lo.

"Mahse, kei eng mah..."

Ka sawi zawh hmain a rawn kun hniama, sawi zawm leh pawh tum tawh loin ka mit ka chhing ve nghal hmak. A hmui lum leh hnawng deuh chapin ka hmui a rawn sik rualin ka inlekkhawng lehzuala. Thiam leh dam taka min fawh zuina chuan min ti zangkhai nghal huih bawk.

Pawna ka nu tawng thawm a rawn awm rualin kan inthen nghal phawk. Eng chen nge ngawi renga inkuah chunga kan thut ka hre lo. Mahse,rei tak erawh a nih ka ring lo thung. 

Dawhkana thingpui thlit sa chu ka zuk melha. Remsanga ka en leha, thutthleng hnung lam nghengin,uluk lutukin min lo melh reng. 

'In la, a dai tawh ngawt ang" ka zahna thup turin chhungrilah ka bei nasa viau. Dik tak chuan nula naupang lem tawh lo tan pawh ngaihzawng han neih thar leh chu a zamawm ve rum rum tho.

"Min en reng lo teh a" keimah bawkin ka ti leh hlak. A then suka, a thu mara,Dawhkana no a ban nghala. A dai tawh ngang aniang a thawkkhat nghal pawp. 

"E, Zoa-a chu ilo leng a ni maw?" Ka nuin a rawn hmuh veleh a ti nghala. An hriat tan dan kha "Zoa" tih a ni tlata. 

"Aw, I dam maw?"  zangkhai zetin a ti a. 

"Dam e, I nutei chu eng nge a an tak?" a ti veleh a. 

An that tawh thu leh naktuk lamah an lo haw dawn tih a sawia. Lo kal nghal a duh thute a sawi luama. Mipa tawng duh tak a ni lo tih ka hre ve tawha. Mahse,kan pahniha kan awm dun laia a mizia leh midang bula a awmdan hi a dang daih. Mi ti huam si lo hian a nelawm ka timai. Mahse,Office a kan meeting lai erawh kha chuan nelawm tho si,nek luih theih miah loh leh sumdawnna kawngah chuan pa tawhkhirh em em a ni ang tih alang thei vek thung.

"Miin min nghaka, ka kal mai dawn mawni?" Min rawn en a,ka lo melh reng si nen kan mit a intawng chiah.Rang lutukin ka hawisawn nghala. Mahse,ka hawisawn hmain a nuihza hmel ka hmu hman tho. Atthlak zetin ka biang a sa ham ham a. Hmu thei ila chuan a sen nasa lutuk tih ka hmu nghalin ka ring.

"A fel roh ngawt hian ka hria" a kal hnuah ka nuin a ti a. Ka chhang lo.

"I u khan nu leh pa an nei tawh lo atia. An naupan deuh laiin an boralsan a ti maia. A nutei te nufa nena khawsa,khawsak tha tak mai anni atia" a ti leh a. 

"Kan hna lama kan Pu tho anih kha. Kan office a thu ve chu a ni lo va" ka ti a. An khawsak harsat loh zia ka hre daih tawha. Mahse,Nu leh pa an nei tawh lo tih erawh ka hriat vawi khatna a ni tlat. A hma pawh khan engvangin nge a nu leh pa an lo kal ngai loh le ka lo ti mai maia, amah a lo kal tho avangin an ring aniang kha ka ti leh kha ania. Engtin nge nu leh pa tel loin hetiang khawpa an hlawhtlin le ka ti ru vang vang mai.

"Khawia in pu maw? Awi,I tui herh kha a liam pur pur kha" ka bula rawn din hnaih pahin a rawn ti chiama. Ka no sil laklawh lai ngaihtuah lek loin thildang ka lo ngaihtuah veng pek..

"Thil dang ka ngaihtuah lawm a' inthiam chiah loin ka ti a.

"Awih loh loh tur anih chu. Khatia tih kha i ching em em ringawt mai. Ngaihtuah tam ber ang ziazang hian" kalsawn pahin a ti leh hluk hluk.

"Ka ngaihtuah tam alawm" ka nui a.

"Tawng tawng lo khan sil zo thuai rawh. I din reng chuan i ke na iti leh tur ania" a ti ve thung. A sawi dik ve reng. Ka tha viau tawh angin lang mah se ka mal ruh tliak lai leh ka banrek hi hman reng tur chuan ala tlak tlat lo.

Ka mu meng kar a,Remsanga min rawn mangthana msg chu vawi tam ka chhiar nawn tawha. Ka mut lah a chhuak der lo zui. Vawiin a thil thlen dan kha ka ngaihtuah let vang vanga, ka easy hmel hian ka inhre leh hnuhnawha. Vawikhat bem naa han yes nghal tawp kha a zahthlak em tih mai mai ka ngaihtuaha. Mahse,khatiang lo khan engtia chhan tur nge pawh chu ka hre chuang der bawk si lo.

A hmel pa zet ka mitthlaah a lo lang a, a mitmu dum lai dum chiang zet,mitmeng fiah zet a ni a. A hnar erawh mizopa a ni tih alang ve a. Mahse,a nalh angreng viau lawi. A hmui chhah lam lek lek leh a khabe ruh kual lian lam,nghet tlet tlawt tak mai te kha.... A vaia a inremkhawm khan a invuah fuh em em a, tuman hmeltha tiin an sawi chiam ka ring lo. Mahse, Mipa pawhin "Pa" an tih tur chi a ni thung. A hmelpa leh luhlul hmel angreng tak nena inhmeh zet Mizia ala nei cheu zui bawka..Eng vangin nge kei,nula hmeltha pawh ni lo, nu hnep hnawp lo ve tak, thinchhia leh thawmna bawk , nu lian vak bawk si lo hi min han duh tlat mai ni??? Hizzz, ngaihtuah chiam angai lo.. Keimah ka nih vangin min duh tih a sawia, a tawk.....

Remsanga nen thla kan inzui tling titih tawha. Office lamah pawh ka bialpa a ni tih hria an awm sup tawh. Ka chhungte nen pawh an innel ve viau tawha. Mahni chanchin sawi ngai lem lo tak,zawh chin bak chu a hna  leh chhungkaw chanchin pawh sawi mai mai lo a ni a. Keipawhin min hrilh chin bak a hranpa taka zawh chiam ka tum ngai lo. "Nu leh pa tel lo ang hiala seilian kan ni a, harsatna hi ka tan chuan malsawmna a ni a,hnathawh nuam ka ti a. Ka duh zawng chu nei ngei ngei turin ka bei thina,ka nei thei ta ngang lo anih pawhin theihtawp ka chhuah avangin na ka ti ngai lo' tiin a sawia. Ka ring nghal hmiah. U Sini'n fel a ti a, a lo kal zing lutuk nangin Bawihtei lahin nel namen loin a nel tlat bawk. Duatpuii lah mahni Bialpa ang maiin a phur em em a,atir phat atanga thil tam zawk min hriatpuitu a ni a. Remsanga nen pawh an innel viau tawh mai. 

Officeah a lo kal zauh zauha,Mahse  hnathawh lai chuan a lo kal anih pawhin kan hna thil vang a ni zel. Lunch time-ah erawh chuan min rawn call ngei ngei thung. Msg type neuh neuh taima lo tak mai a ni a. Call erawh a hmang nasa em em lawi. Hna a thawk nasa a, a zin deuh reng bawk a, chhun lam chu sawi loh zanah pawh a lo leng zen zen hman lo va. Mahse a theih phawt chuan hunawl a insiam a, reilote tal pawh min rawn call ngei ngei thina. Kan inzuina ala rei loh ngaihtuahin kan inpawh dan em em hi amak ka ti ru hial zel.

"Naktuk tlaiah chaw ei chhuak turin lo inring la..I hman angem?" Remsanga'n a rawn ti a.

'Eng chaw ei nge?"  satliah angreng takin ka puat. Ka hna khawih lai ka khawih zawm pah mawlh mawlh tho bawk.

'Ka nutei Birthday ania..Chhungte sawm vak loin,ka nutei thian hnai zualte nen lawm sak ila kan tia"

"Awi,zahthlak duh awm ve" ka ti hap mai. A chhungte hi ka Accident hlima an lo kal ve sap sap bak kha tumah hmuh nawn leh ka nei lem lo va. A nau Mipa, Sangzuala nen erawh hna thilah vawi 3 vel chu phoneah kan inbe ve tawh thung.

"Zahthlak loh e. Tlemte kan ni dawna. Bakah,ka chhungte mumal taka hmelhriat an hun ve tawha" a ti sup. Ka hmui ka pet a, a nau te 2 ka hmu tawh tho nangin diktak chuan ka zam nghal ringawt. 

"Ka lo tum anga. Hna hi kan buai viau dawn em ka hre lo a" alangah erawh ka ti ta tho.

"Ok, Inbuai viau loh beisei ila..Anih loh chuan in Boss ka rawn biak angai tihna animai" ring vak loin a nui zui a. Ka ner  chiam thung.

"Chutiang ngai lo rawhse"  ka ti nghauh.

"Yes,ngai lo tehse. Ka ti hreh dawn miah si lo a" a nui leh a. Tihngaihna hre loin ka nui ve hak mai. Ni e,a ti duh tak tak ngei ang. Hun tam a liam hma hian a duh zawng apiang nei turin a bei nasa tih ka hre chiang tawh tlat.

Zing Eirawngbawl laiin U Sini hnenah Remsanga'n chaw ei turin min sawm tih ka hrilh a. Ka huphurh ve deuh thu ka sawi niah niah..

"Awi, huphurh suh. Keichu ni ila ka intithei ngawt ang" a nui a.

"A Nutei fapa kha, kan buai nasa sia, amah chu awm lo mah se a Nutei hian min lo lawm lo ve viau thei a" ngui angreng takin ka ti a.

"Um, Mahse, chutiang a ni lo ang.A nutei rilru lamah dik lo awmse Zoa'n a hruai duh lo ang che.Chutianga mi a a ni dawn lo" a ti leh tlat.

"Ni ve tho a,Mahse zahthlak ve duh dawn riaua. Duatpuii tal awmse tha tur ania. Ani sawm tel chi a ni bawk si lo" ka ti leh a. 

"A ho lutuk.Naupangchhia pawh i ni tawh lo a. Enteh, ala rei miah lo nangin in inneih ka ring tlat asin. Amak lutuk,ka ring ve tawp" rawn thuhtthlak pahin a ti a. Bawkbawn bai tur a chan zui mawlh mawlh.

"Engvang ngawt chuan maw? Chutiang sawi tur chuan ala hma em mai. A zahthlak zawk" ka ti leh hlak.

"Ha...Zakzum deuh ang mai hian i tawng ve ngei zela...Tak takin Remsanga hi a Mature em maia, ngaizawng mai mai nei tur chuan a hun tawh lo alawm.Nang pawh ini tho bawka.Awi, Mahse ka ngai ngawt ang che" a ti leh duah.

"Va han over tak..." Ngei zetin ka melh a, nghal lutukin a nui thaw thung.

Nidang zawng zawng aia ulukin ka inchei a.Top var leh kekawr dum,Boot cut ka haa,ka top hak ka bilh lut a. H&M, 2inch leka sang ka bun leha. Ka sam erawh han khawih danglam vak dan ala awm thei lo.

"Wow, I va nalh si ve' Duatpui'n min hmuh veleh a lo ti hluai.

"Chhiat loh zeuh zeuh angai tlat" nui chungin ka ti a. Ka thutna lam ka pan phei nghala, ka hnungah min rawn zui tih a pen  thawm atangin ka hre thei.

"Ka rilru a hah tawp" a ti hap..Ka dawhkan tlang nghenga a ding chu ka en a. Rilru hah hmel pawh chu a pu chuang pawhin ka hre lo.

"Eng chu?" ka ti liam puat. Hna thawh tumin khawl ka on paha.

"Nimin khan pakhat ka tisuala.Ka thlen veleh ka siamthaa, ka pek che kha ila send lo tiraw?" midang hriat hlau hmel takin a ti a.

"Send lo, ka check phawt loh chuan ka send vak ngai lo a...Thinrim lo la,ka rin loh vang che a ni lo ania aw" inthiam chiah loin ka tih zawma..Zep loah chuan hna hi a thiam lo pawh a ni lo va,Mahse careless angreng tak mai a nih avangin hna hi a tisual leh thina. Check hmasa loin Boss hnenah ka pe ngai lo. 

"Awi,ka va han lawm tak. I check angem aw ka tia.. Ka van lawm tak" hlim zetin a ti a. 

"Mifel tak thian i nei tih hre phawt teh" 

"Bleh..chhe ve. I fel lo chiang sia e.." a nui a. Thawveng zetin a dawhkan lam a pan pheia. Huatna tel loin ka en a,achang hi chuan a mize thawveng lutuk hi ka zo lo lek lek zela. Mahse, ani aia Thian nih tling hi an vang viauin ka ring thin.

Nilengin ka rilruah Tlaia ka kalna tur ka ngaihtuaha. Ka huphurhna leh kal ka chakna a in zat deuh reng. Lunch Breakah  Duatpuii nen kan Office atanga hla vak lo, Mart pakhatah Present tur kan va leia. Ka la hmu lo va,a mizia tur leh a duhzawng eng mah ka hre bawk si lo a. Lei tur avang duh ngang mai. Kan enkual fe hnuah, shawl pakhat, deh nuam leh zangkhai tak kan la ta hram.

Office ban hun hma hretin Remsanga'n min rawn lama. Kan inngaizawng tih hre fur tawh mah se Office a min rawn lam Vawikhatna a ni thung.

"Ka kal dawn tih an hria em?" Kan tlan chhuah veleh ka ti a.

"Yes...Hria e" a ti zangkhai vuh.

"Dik lo a awm em? " ka ti leh a.

"Eng?" a ti tawi tuk. Diktak chuan a lo thlen phat atang khan dik lo awmin ka hre tlata. Eng nge anih erawh ka hre lo.

"Ka hre lo..I mood a chhia ka ti dawn nge?"

"Eng mah chutiang a awm lo" a ti leh nghut. A tawngkam nem lo leh bung vut hi chu a mizia ve a ni tih ka hriaa. Ngaiah ka nei titih tawh.

"Ka hre bik lo,Mahse dik lo awm ang hian ka feel tlata" ka ti leh talh.

"Chutiang a awm lo.."

Chhan tumin ka ang ziaua,Mahse a hmel a Ning hmel niawm tak ka hmuh takah chuan ka chip leh nghal hmak. Eng mah sawi tawh loin pawn lam kan tlanpelh mek  en-in ka thu ta zawk.

Aizawl khawpui pawn,tlak lam veng lian leh reh raih mai kan thlenga. A lun lai deuh,Bazar lian lote awmna atangin dinglamah kan tlan chho a. Thui fe kan tlan chhoh hnuah In a lo khat ta deuh pharha. In awm reng reng chu lian leh nalh pui pui a ni a. Mi Hausa ho awmkhawmna a ni tih hai rual a ni lo. Tlang chung zawl niawm tak kan thlenga, building nalh zet zet 4 a lo intlar pheia. A tawp ber,Gate lian zet,inhawng sa lo awmah kan tlan lut a. An In kan thleng tih ka hre thiam.

"Kan thleng e" a ti supa. Ka thut dan ngaia thuin kan hma zawn chiaha Building nalh zet ding chu ka en a. A building design simple leh dangdai nalh zet bakah an rawng thlan inchawih mawi lutuk chuan mim hip nghal ngawih ngawih mai.

Motor atangin ka chhuaka, uluk fein kan luhna tur building chu ka thlir leha. Chhawng khata sak niin, an Compound chin chu Bang sang leh rinawm hmel takin a hual chhuak veka. Ka hawi leta, Gate lian tha zet a awm a. An compound ka hmuh theih chinah a khat mawi tawkin Ashoka tree a intlar veka. An kawtzawl pawh uluk takin Paper block an phahchhuak vek bawk. 

"In lo thleng thei maw?" Nu valai tak, zahawm zet hian min hmuh veleh a lo ti vat. 

"Um, thleng thei e. Nute,hei hi Lani ania" tih pahin ka lamah a rawn thle zauha. 

"I hming kan hriat ngun nen ka hmu har bik lutuk che a..Tunah chuan ka hmu ta che alawm" nelawm taka nui chungin a ti a. Min Chibai tura a kut rawn pharchhuah chu ka vuan vat.

"I dam tha zel em?" Chhungrila ka zam rukna chu ka aw dam thlap chuan a hliah hneh phian mai.

"Ka tha tawh lutuk..Nang eng nge i an? Ka lo kal ve thei ta si lo a" a ti leh a.

"Ka tha tawh e" ka ti vat.

"Lo thu hahdam rawh.Eitur eng eng emaw an siama. Ka va enpui ange" a ti a. A kalsawn chu ka en zui a, min su tu kha a fapa ania. An buai phah hrep avang khan a rilru takin min lawm lo viau maithei tih ka ngaihtuaha. Ka thiam loh ni miah lo mah se nuam ka ti lo. Min sutu ber kha chu phaiah lehkhazir turin an dah tih ka hre saa. Amah awm lo mah se ka ti duk tho mai.

Dar 7 velah chaw kan ei a. Remsanga Nutei thiante 2 an lo kala. A bak Mihrang chu keimah chauh ka nimai. An vaiin biak an nuam em em veka, keipawh ka beisei ai tak chuan nuam ka ti ta phian.

Dar 9 pelh hnuah min thlah haw ta chauh. Kan kal tur a Nutei leh a nau hmeichhia-in min thlah liama.  An unau 3, niin an te ber Rosy pawh ka rual pha lo.

Kan kawtah kan ding a, "I lo lut dawn em?" ka ti a.

"Aih,lut lo mai ang. A tlai laklawh tawh em mai" a ti nghut.

"Ok, pawi Chuang lo" 

Kawngkhar hawnna ka dap nghal rak raka. Ka Hawn hmain ka ban rekah a rawn vuana,amah si chetin min pawt hnai nghal zat.

"Hey,mi an lo kal ange" ka ti a. Mi an lo kal hlauin ka hawi kual nghal vat.

"Ho em mai.." a ti bung vut. Ka chhip samah a rawn fawp zui nghal vang vanga. Kan inhnaih bawka,a lungphu nghawr dat dat ka hre thei a, mak takin kan inhnaih lehzual sawtin ka hriaa. Ka thluamuang ngawih ngawih bawk.

"Kal tawh rawh le. Anih loh chuan ka phur let leh duh mai ang che" a nui zui nghal hawk bawk.

Ka chhungten ka kalna vel min lo zawt luama, a tlangpui ka hrilha. A nutei hming ka sawi rualin ka nu-in a rawn ngaihven nghal hra mai.

"Zoa nu hi Siammawii tih a ni em le?" a ti a. Ka thle bak. "Ni e..." Kal pahin ka ti liam puat. Aizawl mi,hmanlai mi deuh ho hi chu an lo inhre leh tham zela. Ka nu pawh hian a hre leh pek aniang.

Ka thawmhnaw ka hlipa,ka inbual zuaia,ka inbual zawh hnuah ka phone ka en a.Number ka save loh atangin msg pangngai a lo awm teh mial. Ka open a..

" I ni khan mi pasal a chhuhsaka, kha pa nupui kha rilru nain a thi a. Tu nge i hria em? Remsanga nu hi mawle...."

Khur hlawk hlawkin khumah phone ka thehthlaa... Ka chhaw deuh hu a, ka lungphu, phu rang lutuk chu  a puak darh vek mai ang tih hlauhawm tak a ni...

PS: No Edit hi a ni tawp mai. Dah loh leh ka hreh tawh sia, dar 6 vel atang khan ka type chawp a...a fuh lo vel viau maithei ania.Min ngaidam leh mai ru aw,in fel kha🤗