MINE

MINE

Ziaktu: Maengi Ralte

CHAPTER - 1

Muangchangin ka tlana,Office ban hun pangngaia haw ka nih avangin a hranpa takin hmanhmawh angai lem lo va. Ban hun pangngai aia tlaia ka haw erawh chuan kan Office awmna leh kan veng a inhlat deuh avangin ka hmanhmawh ṭhina,ka tlan chak viau zel thung.

Kan veng tawntirhah Motor che thei mang loin a lo Jam a. Kan veng chhung,kawngpui hrulah hian Motor zawrhna Company pakhat an awm avangin  kawngpui dung hi chu a jam nileng thawthang mai zela. A buaithlak viau nangin vengchhung mi leh a bul hnaia mite hi chuan ngaiah kan nei titih tawh zawk.

" Ebenezer Hospital..." ka Scooty a chet lawih leh rawn thu an awm tih leh Mipa aw ka hriat a inrual vek!!!

"Khawngaihin hmanhmawh theih dan ang ber kha animai" a ti leha. Ka hawihai hman titiha,Mahse ka hnunga rawn lawn ve ngawt hian Two wheeler taxi ka khalh emaw a ti a ni phawt ang.

"Ka pu,Taxi..."

"Kal phawt rawh,Motor lian inkarah khuan i leng mai ang" a ti bung leh vut. Huizzz, he khawvel chhe mekah hian mi mak tak tak hi an va han tam tak.Khawvel hi a chhe zo vek vek tawh zawk nge mawni???

Hnial chiam ai chuan tlan tawp ila, thlen tawpah duh leh Taxi ka khalh lo tih ngeiawm deuhin ka hrilh ang.Mai maia..

Ebenezer bulah ka dinga, a chhuk tih hriat takin a kang deuh awk thei. Ka phur ringawta,eng ang nge anih ka hre eih lo a,Mahse,jam vela han din khan a lo intlawh khalh zut zut zela, a rawn ṭhut khan a hniam deuh salh bawk si nen a pa te lem lo ang tih ka rinhriat ve tawp.

"Eng zat nge?" ka sira rawn ding chu ka chhoh en haw.Ka rin ang ngeiin a lian viau tak taka, ka chin fo danin a langthei chin zawng ka hmu kim lehnghal vek. Luhkhum hmathlawk,a dum a khum a. T-shirt var,nghawng bial a haa. Jeans kekawr pawl dal lam a ha bawka. A hmel a tha viau tihtur niin ka hre lo a,Mahse a hmelchhe lo a,hmeichhe tamtak chuan "Pa" an ti viauin ka ring.

"Ṭhiannu, ka hmanhmawh viaua..." a aw a dawhtheih lohna lang chhuak chu ka hriat hmaih lo. 

"Angai lo,Taxi pawh a ni lo va" ka ti ve nghat.

"I ni ka ti lo,Mahse ka mamawhna thleng min kalpuia, Pawisa pek che ka tum"

"Angai lo. Ka lawm" za miah loin ka nui pah a. Min chhan leh hmain ka start a,ka tlan nghal daih bawk.

In ka thlen veleh ka u fanu, hmeichhe naupang kum 3 miin min lo bawh nghal vata, ka bag a hai nghala. A duhzawng a hmuh veleh ei tumin a seh nghal chat chata, a kut lehlamin ka kekawr ipte tlang a vuan pah reng tho. 

"Vawiin chu i va tlai ve" ka u nupui, u Sini'n min ti a,min biak pahin eng emaw a rawt pah mawlh mawlh a. A hming ang lo takin nu lian leh sa tha lam a ni a,fiam nan tak kan hmang a,ani lah nui duh chi tih takah ring tak takin a nui a. Mi mo nei,hrehawm ti em emte nun hi chu ka hre thiam pha ve lo.

Ka nu leh pa hi Middle School zirtirtu ve ve an ni a, ka pa erawh nikumah Thisen cancerin a boral tawha. Kan unau hi pathum niin hmeichhe awmchhun leh milai ka ni a. Kan upa ber hi High Schoolah a thawka,a nupui a nei tawha, a nupui u Sini erawh PWDah UDC a ni thung. Fa pakhat an nei a,adang neih leh mai an beisei laiin U Sini hian chhul lamah harsatna a neih tak avangin thla rei vak lo liamtaah khan a chhul an paiha, fa neih belh leh beiseina a awm ta lo. Kei hi kum 29 ka hmang ṭan meka, Telecom company pakhatah hna ṭha pangngai tak chelhin ka awm ve meka. Kan hna hi a hahthlak em em a,hunawl a awm mang lo va.Mahse,nuam ka tihchi tak anih avangin hah viau mah ila hna dang pawh ka zawng lem lo. Ka nau Mipa hi social worker niin nuam a ti ve viau bawka. Pathian zarah midang kan mamawh lo va,ka pa a awm ve ta lo tihmai lohah chuan kan Chhungkaw nun a nuam em em bawk.

"Ka thil chah kha ilo hawn em ka tih chu?" U Sini'n a ti leha. 

"Awi,Scootyah ka theihnghilh.."

"Amak,haihawt mai sia" nui chungin a ti a. 

"Vawiin chu ka thil tawn a maksak em alawm"

"Ha,nidangah eng mah i theihnghilh ngai lo mi?"  Ngeiawm zeta ner chungin a ti leha. Za zetin ka nui a,Mahse ka rilruah nichin lawka ka mi phurh maksak zet pa kha a lo langa,ka nuihzatna a tawp hmak mai.

"Enteh, khilai lawk ka rawn thlen khian mi pakhat Scootyah a lo lawn tawpa, Ebenezer-ah ati ringawta,Taxi ka ni lo ka tia,a ngaipawimawh lo. A Palian mai bawk si..." Thil thlen dan ka sawi zui nghal mawlh mawlha,ka thusawi ngaihthlaknawm ti ve niawm fahranin Bawihtei'n ka khabe hnuai lawk aṭangin min melh ve kar bawk.

"A mamawh hle dawn anih chu, eng pawhise achangtupa tur nise" ka sawi zawh hnuah u Sini'n a tia,a nui zui kawr kawr..Ka Bialpa hnuhnung ber nen kan inṭhen aṭang khan Ngaihzawng neih leh hi ka ngaihven ta mang lo va, ka x vang khan ka na viau pawh chu a ni lo. Khatia ka single ta kha a lo nuam angreng phiana, ka hnaah ka buai bawk si nen single life nawmna ka pawh laklawha,Mipa hi Ngaihzawng tur ang zawng hian ka kawm ta lo tlata,ṭhian erawh ka nei zula. Pubg khelh hrat tak ka ni a,zan hunawla khel thlazen ka lo ni bawk nen,ka hna leh Pubg hi ka buaipui ta deuh ber.

"Min Ning viau lo la nimai,tihian ka nula hlen anga,ka inti thu bawk sia nga min la ning tak tak viau ang" ka ti liam puata.

"I duh chen chen nula la, Ruata nupui neih hunah kan indang daih dawn" a ti ve thung. 

"I thu lo sia e"

"Ka thu ber" 

"Nia,a nu a thu ber' Bawihtei a lo ti ve vata, kan in en a,za zetin kan nui dun nghal vak ringawt.

Ka inthlak hmain ka thil theihnghilh Bawihtei nen kan han laa,ani hi chu chhuak tur apiang ngen hi a ni ve a,chutihlaiin Office kal tur chu min ngen duh leh ṭhak lo..

Ka inthlak zawh hnuah u Sini thawmhnaw sengsa ka thlep fela,ka thleh mawlh mawlh laiin ka nu leh ka ni,ka pa te unau zinga upa ber an rawn inzui luta,ka ni-in pangpar vih nun tur leh pot a rawn keng lut a,ka nu huana a thil duh a la khawm leh tih ka hre thiam nghal mai.

Kan inbe luama,ka u chhuak a lo haw veleh ka ni thlah turin a kal lehnghala,a kal hnuah ka nu hnenah eng nge a rawn tih ka zawt nghal var.

"Pangpar kha a rawn cut a,bakah Pawisa an mamawh deuh a" a ti a. Ka ter nghal at.

"I pe leh ngawt ami?" ka ti nghal hmak.

"Pe rih nang,I u pawh eng mah ka la hrilh hmaa lo pek ngawt tur a ni nang mawle. Lo thinrim nghal hlur zel mai" lawm chiah lo awki hian min ti a. 

Nia,ka thinrim nghal tawp. Ka pa te unau dang hi chu ka ngaina veka. Mahse, ka ni hi chu ka ngaina tak tak thei lo. Sum a duh em em a,a fapa- te lah an suala,engvak thiam nei si loin an inti changkanga, thil eng kim a ṭha ber neih tumin an buaia, awh ngah hle siin an la thatchhe zuia. Ba an nei duah reng bawka. A fanu lah pasal nei tha hle hle loin mi pasal a ngaizawnga,hre lo a ngaizawng nise a ngaihdam theih deuha,Mahse hriatsa reng,an thenawm maia mi a ni zuia. Mahse,ka ni a chhun animai. Ka ni pawh hian kan pian ve hmain a hnathawhna hmuna an pu nen an inngaizawnga, mi nupa a ti ṭhen hmaka, Mahse rei dam loin an pa hian an fate ber an neih hnu lawkah a boralsan leh ta daiha. An pa pension ringin an khawsa ve ṭawk ṭawk a,naupanlai thil daih,an sawi chhawn leh hre ve chauh mah ni ila nikhua ka hriat hnuah pawh ka ni hi ka ngaina lo a, a mizia dang chu engpawhnise mi pasal chhuhsak anihna lai hi ka pawm tak tak thei tlat lo.

"Ka ni hi chu a buaithlak anih hi. Seni lahin mi pasal kher kher a ngaizawnga,hmelchhia pawh a ni lo a. Mi pasal lo pawh a hmuh dawn nen" u Sini'n a lo ti boh.

"Lalrema ba rulhna tur anih kha min rawn dil,a thianpa phone a lo leichhawng ve ngawta. A rulhna tur a nei leh mang si lo a" ka nuin a ti a. Nichina min khak deuha lungawi lo awki kha chu a awm leh tawh lo.

"Eng phone nge a? Kum 30 pel tawha mahni phone leina pawh la thawkchhuak lo" ka ti leh hlak.

"Ka hre bik lo e a. 25,000/- lai a ni lehnghala"

"Huizzzz... Amah inhralh mai tehse" za miahloin ka nui zui haka.U Sini a nui ve hak bawk.

"Eng mah an thawk rei peih bawk si lo a,an dawr han siam ve lah kha an pamṭul leh ta mai maia,a buaithlak khawp mai" ka nuin a ti leh a. Eng mah ka sawi zui tawh lo, sawi sawi mah ila an awmdan angai renga,sawisel an la haw khanglang zui bawk nen. Ka u hnenah ka niin a sawi ngei anga,an lo inpe fel leh vek tawh zawk maithei. Ka u hi mi nem lutuk, tumah hau ngai mang lo anih avang hian ka ni hian a hre chianga, ka nu remti lo chunga Pawisa pek lah angah tawh."An khawngaihthlak alawm" ati mai zela. Mi rilru tluang leh ṭha ngang hi ania, tihvak ngaihna a awm lo. Kei a hmeichhia ber hi thawm na leh ngawhngawl zet mai ka ni lawia, unau ze inang loah pawh hian kan inang lo chiang ber hian ka hre ṭhin.

"U Lan,I thil tur a lo thleng a " office ka thlen veleh security-in a lo ti lang lang. Ee,Lalnunpuii ka nia, min hretu tamzawk chuan "Lani" tiin min ko veka. Ka chhungte erawh chuan "Bawihpui" minti thung.

"Eng thil nge a?" tih pahin a thil min pek,lehkhakhawng bawma intuam,sei angreng tak chu ka en a. A rit vei nalh bawk si nen eng thil nge anih ang ka hre thiam eih lo. 

"Thil hlu deuh anih hmel khawp mai" nui chungin a lo ti ve a. 

"Tu rawn dah nge? Eng mah ka hming pawh a inziak lo va,a rawn thawntu a inziak bawk si lo" ka ti leh a.

"Delivery boy-in a rawn daha. Pi Lani ta tur a tia,chu zawng chu nimai"

"Ok,ka lawm " 

Kan room lam panin ka chhoh sana, kan awmna floor hi 2nd floor-ah a ni a, mi 20 vel ṭhut theihna a ni a. Mahse,a tlangpuiin mi 10 vel kan ṭhu thung. A tamzawk hi site lamah an kal chhuak thina, an lo kal pawhin an lo kal zawka,an chhuak leh mai ṭhin a. Telecom company lian leh ṭhangduang tak a ni a,thawktu pawh mizo leh hnam dang kan inzat nawk bawk.

Midang an lo thleng tawha, kan inbe luama. Nui bawk bawk chungin ka ṭhutna ka pana,ka ṭhutna lai hi tlemin midang ṭhutna aiin a zau deuha, a kil berah a ni bawka. Tukverh bul chiah a lo ni bawk nen a nuam takzet.

Room kawng bula Coffee ka lak ka in a,in pahin ka thil tur min pek ka hawng a, chunglam ka pawh hawn rualin rose par rim a rawn nam nghal hak mai. Mak ti zetin percel chhung ka zuk biha, rose par sen dang leh Sen duk inpawlh ka zuk hmu nghala. Mak ti deuhin ka melh reng.

"Lan..." Duatpuii aw ka hriat rualin ka hawi chhuak vata. Ani hi helaia ka thawhtirh phat atanga ka kawm niin,ṭhian tak takah kan innei zuia. Ka ngaina em em a,Ani pawhin min ngaina a. Thil tamtak min hriatpui a,keipawh chuti tho.

"Eng nge khatia min en a?" angaihna hre lo zetin a ti a.

"Engtinmah ka en bawk lo che e a" inthiam chiah loin ka nui zui a. Percel ka pawt hawng zui nghala,pangpar a hmuh ruala Duatpuii thaw hap ka hre zui nghal zat.

"Eheu, eng thil nge ni ta?" a ti nghal hluai mai.

"Ka hre bik lo. Khawi atanga lo kal nge pawh ka hre lo. Eee,hei card a awm" ka ti zui nghal a. Card lian vak lo awm chu ka lakang nghala,Duatpuii'n min rawn hnaihchilh ve ruak bawk.

"Ka lawm e" tih ringawt hi kutziak hraw angreng takin a lo inziak. A hnuaiah a rawn thawntu hming ZOREMSANGA tih a inziak kalh bawk.

Duatpuii ka en a, "Tu nge?" a ti a,ka lu ka thing ringawt. ZOREMSANGA tih hming pu hriat ka nei em tih ka ngaihtuaha,ka nei eih lo.

"I x kha..."

"No..ani chu Ruattluanga"

"Anih chuan tu nge niang? Customer i lo buaipui nasat bik anni angem?"

"Aih ,tunhnaiah chutiang buaipui ka nei lo"

"Anih chuan tu nge ni ta ang?"

"Ka hre bik lo..."

Angaihna hre lo em em in Rose par bawr leh card ka melh tawn a, hetiang thil min rawn thawn tu,ZOREMSANGA hi ka hriat ngai mi a ni tlat lo.

PS: Phone atangin ka ziaka,a Ziak hi a sin hret emawni aw ka tia.Mahse,han tih len dan ka thiam leh mang bawk si lo va.Chuan,hawrawp leng zat hi a tam lo khawp bawka. Ngaihdamna nen min lo chhiar mam sak zel mai ru aw🤗