MINE - 13

 Chapter - 13

Bathroom Kawngkhar inhawng thawm ka hriat rualin muangchangin ka inher a, Remsanga rawn chhuak chu ka en a, min rawn en ve a. 

"Eng nge? Dik lo a awm mi?" 

"Ka hna ban ka duh lo tih i hria" ka sawi tum tak pawh sawi thei loin ka ti ban chap ringawt. 

"Eh, kha kha maw.. Ka la hrilhfiah hman lo che anih kha" awlsam zetin a ti liam puata. A rawn kal pheia,a lu a hru zui mawlh mawlh bawk. Ka thinrim zia leh a awmdan inpersan lutuk chuan min ti hamhaiha. Awmze nei miah loin ka nui chhuak hawk mai.

"Enge nuihzatthlak a?" a ti leh a. A aw ki zangkhai vuh leh ka nuih chhan inpersan lutuk chuan ka tah te lam lam a ti chhuak leh lawi!!!

"Banna ilo theh lut tihna mi?" ka ti chang fak. 

"Um"

"Engvangin? Tu thuin nge i tih a?" ka ti leh a. Insum hman loin ka au titih a. Rang zetin a rawn hawi vut.

"Ka la sawifiah hman lo ka ti khan ka hre sia" 

"Eng nge sawifiah tur? Min rawn miah loin ilo ti a" ka ti leh that.

A ban a phar hluaia, beidawn hmel zetin a dahthla leh a. A hmai a tuai leh puata, eng mah sawi loin min rawn pan pheia. Rang zetin thutthleng ka pan ve thung.

Ngil auhin thutthlengah ka thu thlaa, khum mawnga thutthlengah a thu ve thung. Ngawirengin a tawng hun ka nghaka,Mahse ka chhungril erawh thinrimna avangin a sahala, puakkeh tur ang maiin ka tawt up up bawk.

"Tukinah in Boss ka biaa, I hna i chawlh rih angai dawn tih ka hrilha. Eng chen nge tih min zawt a. Thla 3 vel angaih ka rin thu ka hrilha. Mahse, Company rulesah khan chutiang a rei chawlh kha a lo theih si loh a, bang mai la a tha in ka hria..."

"Ka bang lo ang" a sawi zawh hmain ka ti leh vak. 

"Shhh... Ka la sawi zo hleinem" a ti dam thluam. A tawngkam dam lutuk chuan ka hna ka chan vanga pawi tihna eng mah a neih loh zia a tilang niin ka hriaa. Ka haw hluah hluah.

"Eng nge sawi leh tur awm a? I lo tifel ve ringawta. Mahse,ka bang Chuang lo ang. Keiman ka be mai ang" ka ti chang fak. Ka tho a,ka phone khum bul cabinet a ka dah lak tumin ka pan pheia. Mahse,ka lakang chiah tihin min rawn pawhthlaksak daih.

Laksak tumin ka bana,Mahse a kekawr bul ipteah a thun nghal a. Thinrim tihngaihna hre loin ka rilru a lo lut hmasa ber angin ka che phata. A rum nghal nghuta,a hmai a khawiha. Thisen a rawn hnam nghal tiam tiama. Hmeichhe kawlhsen leh nghawhnghawl tak ka nihna kha nula ka nih hnu khan a reh emaw ka tia,a lo la reh hauh lo.

Ka ban nawn leh nghal zata,Mahse a thle zauha,ka ham fuh lo. A sama tham ka tum pawh a kalsawn  vangin ka tham fuh leh chuang lo.

Ka dinna piaha Nihliap sei chi inkhai chuan ka mit ala nghal chata,rang zetin ka pan phei a. Mahse,ka rilru hria niawm takin min thlen khalha,a la a,rang zetin Tukverhah a thehchhuak nghal daih. Chet lak leh dan tur ka ngaihtuaha, na taka sawisak ka duh a ni tawp mai.

"A tawk " chet ka lal leh hmain a ti nghet charh. A tawng dan mahni inringtawk leh thunei lutuk chuan mak deuhin min deng dawta. Chet lak leh ka tumna pawh che zui loin ka ding ngaiin ka ding mawl tawp. Ka hmaa Remsanga ding chu ka en a, thawklehkhatah ka thinrimna a reh thuta, hlauhnain min rawn tuam nghal hlupa ,ka lungphu a rang nghal vaka. Hlau lutukin ka tawlh hnung zui nghal rawk bawk.

A hmai a tuai a,a kut a en leh a. A hmel rum leh chang zetah chuan a thinrim tih ka hmu theia. Hlauhnain a hma aia nasa zawkin min rawn fan leha,ka tawlhhnung zawm leh zata. Mahse,ka tha a khur a, ka khup a sai hlak hlak bawk nen ka duh angin ka tawlh chak thei lo. Ka lungphu a inthum rawn tluk tluk a,a ring lutuk a, ani pawhin a hre pha ang tihtur khawpin a ring.

Eng emawin ka tawlh zel tur min lo danga,min dangtu ka zuk en a. Khum bula cabinet kan hun a lo ni a,a sirah ka tawlh phei a,ka hawi let nghala. Ka lam pana Remsanga lo kal ka hmu nghal a. Ka ip chawiha, ka kut ka humruh nghal vak bawk.

Ka chhungrila hlauhna awm tilang lo turin ka infuih ru mawlh mawlha, thil thleng tawh vangin inchhir lah ka duh hek lo. Ngil atin ka ding a, a rawn kal hnai zel chu khap miah loin a mitah tak ka en lui ngar ngar a. Mahse, ka tiril a khur a, tlu ngawt lo turin ka intichak lui ngar ngar bawk. Chak lo nih hi ka duh ngai lo a, tunah pawh hian hlau mah ila chak lo nih ai chuan thil thleng tur nghah tawpa theih ang anga beih let ka thlang zawk.

Min hnaih lutukin ka hmaah tak a rawn dinga, kan insan hleih bawka ka dak deuh ha mai. A hmelpa leh rum zet chu thlipui thawk tur ang maiin a dur khup a,A landan chu hlauhawm tih hian a sawifiah zo lo hial zawk ang. Mahse, awihawm loh lutukin a nui ta suk. A awmdan chuan min thawng lutuka ka ip chawih a,ka thaw nghal huai bawk. 

"I duhtawk thei tawh em?" a ti supa. A aw lah a la dam em em zui a. Tun minute khat pawh tling lo a min khawih nek duh hmel pu tu Remsanga kha chu bo hneh tak a ni tawh.

"Hahdam la,anih loh chuan I taksa tan khan a tha lo ania" amah bawkin a ti dam leh thlup. Chhang loin ka din ngaiin ka dinga, a awmdan inthlakdanglam thut chuan min ti hamhaih tlata. Insual peih at a awm laia a rawn Danglam ta daih khan min tibuaia,tih leh mai dan tur ka hre lo.

Ka ban rekah a rawn vuana, ka inlekkhawng nghal laha, thil sa deuh khawih ang maiin rang zetin a thlah ve nghal vut bawk.

"Ok...I duh loh chuan ka khawih lo ang che. Mahse,lo kal la, thu chungin hahdam zawkin kan sawi dun theia. Tunah i duh rih loh pawhin nakinah pawh kan sawi thei vek" nghet churhin a ti leh a. Eng emaw sawi tumin ka ang ziaua,Mahse ka chip lehnghal daih. Thinrim luih zel tum pawh ni ila a landanah hi chuan ka ti thinrim zo chuangin ka ring tawh lo. Chu ai chuan tha taka sawipui a hlawk zawk ang.

A tawng hun nghakin ngil auhin ka thu a, Dressing Table nghenga a ding chu ka melh ngar ngar bawk.

"I hna chawlhsan i duh lo a,ka hria. Kei pawhin chawlhtir loh che ka tiama.Mahse,nangpawhin i hriaa, private company a ni a. Nau neih chawlh rei tak tak lak a theih ve loh tihte pawh i contract-ah khan a chuang sa vek ang" a ti a. Ka che lo a,ka chhang let chuang miah lo nangin a sawi dik tih erawh ka hria. Mahse, nau pai chung pawhin thla eng emaw zat chu kal theih ka inbeisei tho. Ka ban ala tul dawn tih hre mah ila min rawn lo va thil a lo ti ngawt hi ka duh dan a ni lo bur.

"Ka hlauthawnga..." a ti supa. Sawi zawm loin a tawp leh daih. Ka thut dan ngaia thuin a sawi zawm hun ka nghaka. Eng nge a hlauhthawn pawh ka hre nek lo e.

Min rawn en a,a hmel induhtawk leh ngeng ngulh thinah khan mahni inrintawk lohna alang zawka. Mahse, a bo leh nghal  vat. Ka hmusual zawk pawh a ni mahna.

"Engvangmahin chan che ka duh lo" a ti leh a. 

"Hetianga fair lo taka i chet zel chuan min chan ala tul dawn tho" ka ti hmak.Ka duh aiin ka chhang rang lam mah a ni.

"Chutiang a thleng ngai lo ang" a ti hrawk. A mitah tak ka en a,a mitmeng thim khap leh dum fiah zet lawi si, fing tih hriat ngawih ngawih chuan ka ngaihtuahna chhungril ber pawh a hmu tlang thei ang tih mai tur a ni a. Mahse, ka mit ka la sawn duh bik lo.

"Puitling ka ni a. Mahni thu a duhthlang thei ka ni bawka. In nawrluihna hi ka duh lo" ka ti dam thlap. A ner nawka,a hmai a tuai leh pawk.

"Ka nawrlui lo che a. Ka nawrlui ngai bawk lovang che. Mahse,naute vang emaw ka invenlawk theih thilah chuan ka invenglawk zel dawn. Zingah khan Abby ka biaa. Che tam rih lo turin a duh che a. In check-up vat turin a duh bawk che a. Naktukah Doctor hmu turin ka be fel vek tawh bawka. I hnaah i buai lutuk vangin taksa lamah pawh harsatna a awm theia. Chuvangin kal zawm ka remti tawh lo' a ti leh duaha. Abby hi a cousin a ni a,hmeichhe lam Doctor lar thar leh mi duh rawn ni chho mek a ni bawk.

"U Mam, pi-in chawei turin a ko che u" room Kawngkhar rawn kik pahin Thlungi'n a rawn ti a. Ngaihdan ni vak lo niawm takin Remsanga  a thaw ve hawk thung.

Masala rim ka hriat rualin ka uak teuh ngang mai. Mahse,ka uak ta em lo hlauh. Zothana tih loh zawngin dawhkan an lo kil thap tawh.

"Eng nge i an?" Nutei'n min lo ti nghala. 

"Ka zia tawh lutuk" ka ti ve thuai nangin Dawhkana eitur inchhawp chuan min ti chau ru nghal ngawih ngawih thung. Masala rim ther lutuk leh Sawhthing par kan chuan ka kawchhung a luh ngut ngut nimaiin ka hria.

"Khawnge Zothana?" Remsanga'n a ti bung vut a. A kalna Nutei'n a sawi nghal thuai thuai a, "Naktuk atangin Officeah kal ve rawhse. A chhuk leh hma chu Nitin kal turin ka duh ania" khauh zetin Remsanga'n a ti leh hmuka. 

"Ni e,kal se a tha" Nutei'n a ti a. Mahse,a hmela eng emaw lang chu ka hmuh hmaih hauh lo. Midang erawh chuan an thil ei lai an ei zawm mawlh mawlh avangin Nutei hmel landan Danglam kha an hmu ve kherin ka ring lo.

Che loin ka mu meng kara, Remsanga erawh a thawk danah a muhil tawh tih ka hre theia. Tihharh ka duh loh avangin ka che ngam tawh lo. Sangzuala nen thil an sawi dun avangin ka mut hnu feah a rawn mu a. Kan inbe zui tawh lo hrim hrim.

Ka ngaihtuahnaah thil chi hrang hrang a lo lut a, banna a theh luh chhan a sawi kha kei leh naute venhin a duh vang a ti a. Dik pawh a dil mahna. Mahse,ka ngaihdan tal min zawt hmasa se tha tur ania. Tunah eng ang pawhin va thawh leh tum ila ka banna Company-ah dah luh vek a ni tawha. Kal nawn chi a ni lo tih ka hai bik lo. Banna thehluh, Company-in an pawmpui tawh an la nawn ngai lo tih lah kei aia hre chiang tur chuang an awm lo. Keimah ngeiin ka hna chan zinga pakhat a ni thin tlat.

Ka phone nghawr dar darah ka harha, meng loin ka ban a. Ka lakanga,min rawn call tu ka en a. Duatpuii a lo ni a. Ka pick hmain dar zat ka en a, ka thuchhuak nghal zawk. Dar 10 a pel va tawh..Rapthlak hian a!!!

"Eng nge thil awmzia hi?" Hello ka tih rualin a rawn ti nghal vak. Ka phone ka lasawna, che loin ka mit hup chungin ka mu zui vang vang.

Thawk ka la vaka,ka phone ka en leh ta chauh. A lo la dah em lo.

"Hello" dam thlapin ka ti nawn leh a.

"Enge a awmzia? Eng mah min hrilh lawk bawk si lo" a rawn ti leh a. Mahse,a hma ai chuan a aw a zia ta deuh.

"Awmzia vak a awm lo.I hriat ang zawng kha a nih dan animai" 

Ka sawi zawh rualin ka nui zui haka,Mahse nuihzatna pakhatmah a tel lo.

"I nuih ala za thei amaw??" a rawn ti leh vak.

"Nuih mai loh chu tihngaihna a awm lo alawm. Company rules i hriaa, raipuar chu tunge thawh luih tir talh ang?" Ka ti fan raih.

"Ka hria, Mahse rai vanga ban nghal kha chu over ve thlawt ka ti. Eng emaw chen chu ila thawk theia. Bakah,I thiannu ka ni ve em em a, I bang dawn tih pawh ka hre lo hi ka zak ve bawk aw" a rawn ti leh hmawk hmawka. Ka hre thiam takzet. Kum kha leh chen kan thawk duna,inneihnaah pawh ka dinpui a ni a. Hna bansan ka duh anih chuan ka hrilh hre ngei tur pawh a ni. Mahse,keipawhin ka bang dawn tih ka inhre bik miau si lo.

"I rilru tur ka hre thiam che alawm" tih lawm tum ru takin ka ti sap.

"Hre thiam nila min hrilh em em ang..Ka lawm lo, lawm lo tak ka ni" uar fein a rawn ti leh chiam a. Beidawng rilru lutukin ka thaw hak mai.

"Remsanga hian chawl turin min duha. Thutlukna siam mai ka harsat a,Mahse amah zawkin eng emaw palh a awm a hlaua.Kan hna chu i hriaa,kan chau em em zel a" ka ti leh a. Ka pasal laka ka thinrimzia leh midang laka hum ka tum tho si lai erawh thil inhmeh lo tawpkhawk a ni.

"A va han over tak,mi pawh an rai ve vek" a ti leh hlak hlaka.

"Nia" ka ti tawi tak ringawt.

"Hey, I thinrim ami? I bang thut khan minti lawm lo em a,chuvang anih kha. Inpa chu ka hre thiam lutuk. A upa tawh sia,hlauhthawn pawh a awm reng.Mahse, Mihring ngeng lutuk khan hlauhthawn te a lo nei ve theia" a nui zui kawr kawra. Za lo zetin ka nui ve ringawt bawk.

Tho chhuak mai loin ka mu leh riha, hna ka nei tawh lo tih ngaihtuah loh hram hram ka duha. Ka rilru ala inpeih ngang lo. Mahse,tihtheih a awm hlawl si lo. Haw mai ka duh rum rum a,inthen chhan atan chuan nitheiin ka hre leh lawi bawk si lo. Ka hna bansan lo turin theihtawpa beih let ka duha,Mahse engkim an lo pawm fel thlap tawha, tihngaihna a awm si lo.Ka rai hma mah mah tih ka ngaihtuah thuta. Mahse,ka inchhir lehnghal zat. Hetiang ngaihtuah a mahni fa lo piang tur hnawk titur ka ni lo. Fa neih duh ngawih ngawih nei thei si lo an tam lutuk.

Hreh angreng takin inhnuaiah ka chhukthlaa,a lo reh thiap mai. Ka mo tirh atangin tiang anga tlaiah ka la tho ngai lo a ka inthlahrung ru viau.

"Khawnge an awm a?" Thlungi hnenah ka ti a.

"An chhuak vek. U Mama khan in chunga chho lo tur leh  bengchheng siam miah lo turin min tia" a tihzawma. 

"Eng maw?" Hre thiam lo angreng zetin ka ti ha.

"Nizanah i muhil tha lo a tia. Tihharh che a duh lo" a ti liam leh puata. Ka thaw ru hak mai. Achang hian a ngeiawm em em thina,Mahse achang hi chuan pasal tha ber a ni leh lawi si..Mize pahnih hi tupawn kan nei vek nangin ani hi chu ka hre thiam lo lehzual.

Ka rin ai takin thil ka ei tha phiana. Ka ei zawh hnuah room lam ka pan a,kan nupa room hi chu keiman enkawl ka duh avangin tumah an lut ngai lo tluk a ni a. A zinna a thawmhnaw vel suk tumin ka enfela, room ka tifai pawh bawk.

Dar 1 a pel deuh chauh tihin Remsanga'n min rawn call a. "Ka lo haw dawn chiaha,I peih chuan lo insiam la" a rawn ti dam thlup. 

"Eng turin maw?" ka ti nghat.

"Doctor kan hmu ang. Dar 3 atangin a thu tan dawna.Hmanhmawh thlak over chu a ni lo" a rawn ti leh a. "Ka peih lo" ka ti dawn uk a. Mahse, inentir ngei ngei tho ka ngai dawna,lo hnial ai chuan Ok mai a tha zawk.

"A tha lawm" alangah erawh ka ti ban chat thung.

A rawn thlen veleh a inbuala,a thawmhnaw a thlak a. Ka lo insiam vek tawh bawk nen kan kal zui chu animai.

Kan thlen veleh midang lo nghaktu te khalhin kan lut thei nghal mai. Abby maw kan hmuh dawn ka tih laiin Hmeichhe lam doctor senior leh lar zet mai kan hmu a. An inbiak danah Remsanga nen an inhre tha tih alang reng.

"Ekhai, kan Tlangval senior thlung bet theitu chu ilo hmeltha em anih hi mawle" min lo ti a. Tihvak ngaihna hre loin ka nui ringawt.

Kum 55 vel bawk a ni a. Pa lian leh hmai tluak tha tak a ni bawk nen a lang zahawm viau. Kan inneih ni a a lo kal hman loh thu leh pawi a tih thu a sawi suam suama,a tawngkam chhuak dam duam maiah chuan a ngainatawm hmel takzet. 

Ka testna Thlalak ka en tir a, confirm leh kher ka duh em tih min zawta. Ngai ka ti lem lo nangin Remsanga zawkin a duh a. Ka test nawn leh a. Remsanga chevel phur leh zangkhai lutuk chu Doctor nuih a za a,a fiam deuh renga. Keipawh a der ni loin ka nui ka nui ve tho mai. Diktak chuan ka chhungrila lawm lohna ala bo hauh lo nangin engkimah hian  rinchhan tlak anih thin zia erawh ka hai thei tlat lo.

Kan tlanchhuah veleh ka kutah a rawn vuana,ka en vat. "I chau em?" Min en loin a ti nghal sup.

"Tlemin.." 

"Tlem loin tam deuh anih ka ring. Motor dahna rem lo,pan vak ngai thin hi a buaithlak"  a ti leh a. A sawi dik reng, kan inentirna bulah Motor dahna tur a awm tlat lo a. Mahse,thui lutuk tihtur erawh a ni lo.

In kan thlen veleh ka beisei loh lutuk ka hmu nghala, mak ti zetin ka chhungte leh Duatpuii lo thu chu ka en kuala. Angaihna ka hre lo.

"Naute thar lawmna kan nei dawna. Kan phur leh lutuka, kan lo ri le lu mai anih hi. I chau em?" Nutei'n a rawn ti nghal mawlh mawlha. Remsanga ka en a, eng mah min hrilh lawk miah si lo.. Ani lah chu ngaihsam hmel zetin a dar a tisang uk duh lek chauh.

Tum loh lutuk boruak lo thleng chuan ka mood a thlak hlawk mai. Thil ka ei thei vak lo nangin kan boruak nuam em em mai chuan min tihlima. Thildang mamawh nei pawhin ka inhre tawh lo.

PS: Ka tum loh dan hian ka awm nasa leh lutuka, a manganthlak anih hi.Ka inthlahrung ve em em ania. Mahse,ka chawl reia,kan chhiat tawk nen Thawnthu ziah mood a chen a har deuha. Zanin chapter chu ho inti viau in ka ring. Min ngaidam fo thina,min ngaidam leh mai teh u🤗