MINE- 14

 Chapter-14

"Lani inah a awm theih tawh dawn chuan keihi huan lamah ka va riak dawn emawni ka ti" zing chaw kan ei laiin Nutei'n a ti a. 

"A awm ang. Mahse,eng mah ti a chet buai ka remti lo" Remsanga'n a ti nghuta. Ka lo inthlahrung ru ve nghal em em thung.

"Chet buaina tur a awm hleinem. Pari leh Thlungi an awma. Ruati vawiinah a rawn haw dawn bawka. An tihtur enpui animai alawm" awki pangngai thlapin Nutei'n a ti a. A awmdanah eng mah lawm lohna alang lem lo niin ka hriaa. Ka inthlahrung ru lutuk pawh a zia leh ta deuh. Mo nih zet chu a ruk hian a hahthlak vawng vawng teh e. Pasal ten min duat lohin a hrehawma,min duatna an tihlan nasat leh inthlahrunawm bawk....

"Tikhan midang titawh lo teh, a nuam duh lo ania' kan pahniha rooma kan awm hnuah ka ti a. 

"Eng chu?" a ti liam puat. 

"Che thei lo pawh ka ni lo a. Bakah,indim leh lutuk pawh a tha ber lo. Fit ve deuh tura chet a pawi lo" ka ti leh a. A towel hman zawh chiah zar tumin ka lakanga.

"Eh,kha kha maw.. A ho em mai, I mamawh chu midang hrilh la,timai rawhse. Taksa fit tur chuan thildang tihtur a tam.I duh leh Treadmill ah pawh i peih ang angin lo tlan la" a ti awlsam leh mai.

"Chutiang ringawt a ni lo" ka ti leh hlak.

"Thuawih hi zir teh" a ti bung vut.

"I hre thiam lo anih kha.. "

"Yes,hre thiam lo. Chuvangin buaina a awm lo. A tha em?" a ti awlsam leh mai. 

Tawng tumin ka ang ziaua,Mahse ka chip leh daih. Eng mah sawi tawh loin balconyah ka chhuak a,Towel ka zar a.Let leh mai loin ka ding deuh vang vanga. Inhnung lam a Kuhva rah kung sang zet awm chuan kan Balcony a rawn thleng chho titha. Thliin a chhem zawngin a hnah a che siau siaua, a hnah kara chawngzawng awm nak nak chu hmuhnawm ti zetin ka thlir dauh dauha. An zalen bik lutuk chu ka awt ru vang vang mai.

"Ka kal ania" ka bul mai atangin Remsanga'n a rawn ti a. Ka la phu nghek zui. Ka hawi let a, chik zetin min lo en reng chu niin.

"Um,kal la.. Ka thil chah che kha aw" ka ti sap.

"Ok..Mahse,dik lo a awm em?" A ti leh vut.

"Aih "

"Ka kal lo mai dawn mi?" a ti leh a. Rang zetin ka lu ka thing vat.

A rawn chhuak ve a,ka bulah a rawn dinga. Uluk lutukin min en leh vung vung a, ka pasal mah nise hetianga min en hian ka zam ru ziah.

Ka banrekah a rawn vuana,engmah sawi loin inchhungah min kai lut a, room chhung kan luh veleh min pawt hnaia,min kuah bet nghal hlu hlu bawk. Ka samah a rawn fawp zui nghal dun duna. A awmdan chuan minti no zuala,ka lung a chhe deuh tlat. Mahse,awmze nei lo a tah erawh ka tum lo bur.

"Kal lo tura min duh chuan ka kal lo mai ang. Nangmah chauha kalsan che ka duh lo" zawi fiah zetin a ti chhuak sup. 

"Kal rawh... Kal turin ka duh che" ka ti sep. Inlakhran tumin ka che a,min dang lo.

"I nu te Inah i riak phei duh em?" a ti leh nghuta. Ka beisei loh lam a sawi avangin inring hmain ka thaw deuh hak mai.

"I duh chuan ka dah phei nghal ang che..Mahse.." sawi zo loin a tawp daiha, a lu a thing zui nawk.

"Mahse..." Ka ti nawn ve sap ringawt.

"I awm loh chuan ka ngai ang che" 

A aw a ring hran lo nangin a fiah lehpek. "Mahse,a pawi lo. Nuam i tihna hmuna i ka duh ber " amah bawkin a ti leh a. A kalsawn zui nghal a. Khuma a laptop leh power Bank dah a bagah a thun zui nghal mawlh mawlh.

"Ka riak lo mai ang. Nutei a awm dawn bawk si lo a" ka ti a. Thutthleng ka pana,ka thu thla nghal hnak.

"I kal duh chuan tu nge awm leh awm lo ngaihtuah suh"

"I hriat ve reng kha. Hna ka kal tawh dawn loha,Inah ka awm theih dawn vangin Farmah ka riak dawn a tih kha" ka ti hmak.

"Um,ka hria... " a ti tawi tuk. A rawn kal pheia. Ka rin loh deuhin a rawn thu hniam thlaa,ka khupah a vuana.

"Min en teh,thil ka hrilh dawn che" thupe aw lutukin a ti mar ut. Thuawih takin a mitah tak ka en ve mai bawk.

"Sawi la...."

"Ka nupui i ni a. He Inah hian ka Nutei emaw ka nau te vang pawhin i mood hi a inthlak ka duh lo. Mi tamtak anga mahni pawha mood hran nei thei lo khawpa nun chep i nih ka duh hek lo. Tih tur leh tih loh tur chu i thu thu a nimai. I pasal ka nih angin hriat hmasak erawh ka duh fo vang. A chiang em?" A ti duah. A tawngdan nghet cherh chawrh chuan a rintlak tur zia leh a ti mai mai lo tih a tichiang vek. Mahse,ka beisei loh lam a sawi avangin sawi ve tur hre loin ka thut ngaiin ka thu mar auh ringawt.

A tho a,ka biang tawn tawnah a rawn vuana. A hmui lum ham hamin ka chal a rawn si a. Ka mit ka chhing ve nghal hmak.

Remsanga kal hnuah room a awm peih loin Verandaah ka thu mu a, kawt Kuala pangpar par vul chuk te, Ashoka tree thli in a chhem chet siau siau chu hahdam takin ka thlir a,achang hi chuan nun hi a hlimawm thina. Kan inneih hnuah hian Remsanga nen inkhak ve rap rap thin mah ila a pumpuiah chuan Mipa tha leh inngahna tlak a ni takzet. 

Ka hna ka chan vanga kan intihbuai hnuah, kan naute avangin kan inkar khi kan siam thaa. Keipawhin ka pasalin ka tana tha turin a ti ang tiin pawm thiam hram hram ka tum ve bawka. Ngawirengin ka mizia a lo zir a. Ka pangngai tan a,pawm thiam ka tum tih a hriat hnuah tha takin hna chungchang min sawipui leh ta chata. 

'I hna vanga i natzia ka hriaa. Ka rawn hmasa lo che pawh ka tisual tih ka pawm thlap. Mahse,min nawrlui lo va,mi zingah mualphoin min siam lo a. Ka lawm a,I incontrol theihna kha ka chhuang bawk che... Ka hrilh duh che chu,In a awm hrehawm iti anih chuan nitin i duhna apiangah kal mai rawh. Ka hruai vek hman lo che anih pawhin Driver an awm reng a. An hruai kual ang che. Hnathawka i chhuah ai chuan i nuam tihna lam apiang i pan kha Pawi ka ti lo zawk. In a awm tlawk tlawk i ning anih pawhin ka mamawh che a. Ka hna zingah pakhat hi i khawih thei. Ka officeah emaw roomah pawh i khawih thei vek ang. Bakah, he hna hi i hminga awm a ni hrim hrim bawka. I duhdan danin i tih a thiang ania"

Keima pualin a lo dah tih ka hre miah loa. Hna ka bansan vanga a dahchawp emaw ka ti a.Mahse,a lo ni lo. Kan inneih atanga thla khat na chamah a lo dah fel diam tawh zawk. Keichauh ni loin Rempuii leh Sangzuala tan eizawnna,an hmingin a dahsak veka. An Chhungkaw hming ang vekin kal mah se a Neitu bik erawh an lo awm fel thlap vek tawh. Zothana pawh tunah a inzir veleh tan meka. A kuta thil dah ngam a nih hnuah chuan a buaipui leh vek dawn tih ka hai lo. Kei a nupui pawhin ka beisei ngai hauh lo chungin Mall-ah a chanve neitu nihna ka nei a. An sumdawnna neih ang angah fel takin sem thlap mah se a tam zawk Neitu leh khaikhawm tu chu Remsanga vek a ni tho.

Ka ngaihtuahna khawvela ka lo chen veng veng laiin ka phone a rawn ri a. Ka ken sa avangin min rawn call tu en tumin ka lek kanga. Ka contact list ami a ni lo.

"Hello" ka taksa zawk zet nena inhmeh lo lutukin ka ti zang vah.

"Lani, khawiah nge i awm?" Ka cousin Lalrema awin a rawn ti thum dut. 

"Inah ka awm. Eng nge ni ta?" tha takin ka ti a. Kan inbe khat teh nangin ka be chak hran lo viau.

"Lo chhuak lawk mai teh.Hei buaina tlem ka nei a" Mangan hmel zetin a rawn ti leh a. Buaina siam bak thiam a nei miau lo va,mak pawh ka ti lo.

"Khawiah nge i awm a?" Ka tum aiin ka aw a chang.

"Gateah hian...In Gate bula duty hian min luhtir duh miah lo a" a rawn ti leh a. Ka thu mar deuh awk mai. Ka thutna atangin Security thutna in te alang thei a

Mahse,pawn lam erawh Gate phui tha zet vangin ka hmu thei lo.

Ka phone ka off a, Gate lam ka pan pheia. Ka thlen phei dawnah pawn lam a Lalrema tawng lawng lawng ka hre theia.Eng chu rawn tih tum ni maw? He Inah hian lawm a hlawh dawn miah lo tih lah a hre Chiang ber tur a ni lehnghal.

"Ka lo chhuak lawk ang" Duty hnenah ka ti a. Ka kal phei thawm a lo hre lo a ni ngei ang. A phu nasa em mai.

"Rawn biak che ka lo tum meka. Pawna ding hian i u anih thu a sawia. A rui deuh bawk sia,risk ka la ngam lo a" inthiam chiah lo niawm takin a nuia. 

"Ka lo bia ange. Ka cousin anih kha..Lo luhtir mai rawh" ka ti a. A hmela inthlahrunna lo lang chu ka hmuh hmaih lo.

"Sorry..Ka lo hre lo a" a ti nghal vat.

"A pawi lo. A lo la kal ve ngai lo alawm..Gate hi min hawnsak lawk theih chuan..." Ka ti leh a. 

"Oh" tih pahin rang zetin a inher a, gate hawnna a hmet nghal zat. 

A inhawn rual deuhthawin Lalrema a rawn tek lut a, tur angreng fein Security a melha. Intithei em em hian a dak deuh ar bawk.

" Lan, helaia thu hi thlak teh u. A hna a tlin lo em mai" a ti nghal ngawt pek. Ka va han ei lo thin tak. Ka unaupa chu a ni ve bawk si...

"Eng nge ni a?" A thusawi haiderin ka ti nghat.

"Lut ila,inchhungah sawi zawk ang" a Neitu zawk ang maiin a ti a. A khawsak dan vel avangin ka nui nghal hak mai. Ka biak danah pawh leng lut turin ka duh lo tih a hre thiam lo em mawni??

Inchhunga lut loin Verandaah ka thut pui a. Rempuii a lo haw thut ang tih ka hlau ru zek zek mai. A rawn hmuh vaih chuan a duh duhin ngaihdan a siam leh anga, buaina a chhuak leh ngei ngei dawn.

"Eng buaina nge ni a?" Kan thut fel hnuah ka ti a. 

"Saw Laia duty saw mawle Buaina chu..Ka rawn lut tur kha a phal lo khanglang a" a ti awlsam then.

Pari'n thingpui kan duh leh duh loh min rawn zawta, Lalrema'n a duh thu rang fahranin a lo sawi nghala. A mize hniam leh thawveng lutuk hi hman atanga tun thleng hian ngaiah ka la nei thei hlawl lo. 

"Buaina han tih tur pawh a nih loh chu a" ka ti hlak.

"Lo luh duh Laia a phal lo kha buaina a tling alawm.. Tak takin ka lo kal chhan chu thil ka dil duh che a. Phone a sawi chi niin ka hre chiah lo a." Thutak fein a ti a. Engtak min dil ang maw tih ka ngaihtuah daih.

"Eng chum?" Alangah erawh ka ti tawi tak.

"Pawisa min lo puktir teh. Ka hna lah kan pu sual lutuk vangin ka bansan leh tawha. Ka thianpa nen sumdawnna bul tan kan lo tum ve laklawh sia. A chanve tal ka pek ve angaia. Ka khawlsain a daih lo. Sumdawnna hi hloh ka duh bawk si lo a, mamawh tak ka ni"  thupui fun em em,timna nei map loin a ti a. Eng emaw tal min dil ka ring lawk avangin mak han tih na ka nei eih lo.

"Pawisa ka nei lo..." Ka ti bawl. Ka pe tawp phal anih loh chuan ani kher hi chu engmah pek ka tum lo.

"Ka va han awih lo. Tam deuh pawh ka duh lo a. Singnga atanga nuai khat inkhar animai" a ti leh a. Ka thle bak...

"Ka nei lo... Tunah phei chuan hna ka nei tawh lo a. Engtin nge chutiang ka neih ang?" ka ti ve tlat.

"I neih kher angai hleinem. I pasalin hman sen loh a nei a' 

"A teuh lo..Ani nen sawi zawm miah suh" insum hman loin ka ti chang fak.

"Kal tawh la a thain ka hria" tih leh thawh ka rual nghala.

"Lan, I u hian puih ka ngai anih hi. Nangman min pui duh lo anih pawhin inpa ka dil mai ang" ala ti ta cheu.

"I upa tawh,insiamthat te tum ve em em teh. I nu pawh iti mangang tam lutuk tawh" ka ti chang leh fak.

A rawn dingchhuak ve a, "Puitlin tum in alawm tunah bul ka tan. Ka nu lahin engmah min pek tur a nei bawk si lo" a ti leh a. 

"Kal phawt rawh. Hna hmuh a harsat nak laiin i bansan zel a. Hetiang tur a ni lo" ka ti leh nghat.

Gate a rawn inhawnga, rang zetin ka hawi phei a. Rempuii Car rawn tlan lut ka hmuh rualin ka lungphu a rang nghal dawt dawt a.Tihsual nei lo mah ila helaia ka ni fate ka pasal chhungten an hmu tur hi ka duh ngai lo. Mahse,tunah chuan duhthlan tur a awm lo. Anih ang anga hmachhawn tawp animai.

Driver thutna lam a rawn inhawnga, Rempuii a lo chhuak dawn emaw ka tih laiin ka beisei loh lutukin Ruattluanga ka hmu ta zawk..Rempuii a rawn chhuaka ve nghala. A hmel hlim zetah chuan a mood a fuh thawkhat tih alang reng.

"Eng nge i an a?" Zangkhai vahin min rawn ti nghal a. Ka that thu ka sawi ve vat.

"Hei ka thianpa anih hi. Ruattluanga..Chuan,Ruat heihi ka u nupui Lani" a ti leh zung zunga. Ka sira Lalrema lo ding ve reng chu hmu awm leh ngaipawimawh awmin a awm eih lo.

Ruattluanga ka en a. Rempuii nen eng thian nge annih ka hre lo. Hmanni khan kan cousin pakhat Bialpa angin a lo kal a,an lo inthen leh hman zawk nge ni ang? Nge Rempuii thian satliah zawk?

"I tha maw?' nui chungin ka ti a.

"Um,tha alawm.." a ti ve a. Hmanni khan min hre awmin a awm lo a. Tunah erawh min en danah min hre sa tih alang ve ta thung.

"Lut ila..." Rempui-in a ti a. An inzui lut chu ka melh zawka. Lalrema ka en nghala.

"Kal tawh rawh. Rempuii khan a lawm lo viau thei che ania" ka ti sap.

"Melh pawh min melh duh thak lo mawle.. Pa pakhat fa theuh theuh si" a ti zawi ruih. Tlem chuan ka khawngaih ve deuh. Mi pasal pawm lai laka lo piang nih kha a duhthlan a ni bik dawn der si lo.

Lalrema kal hnuah pawnah ka la ding deuh vang vanga. Ka khua a sik  ru deuh ser ser bawk nen muthilh ka chak.

Inchhungah hreh ru angreng takin ka lut a. Living Roomah Ruattluanga amahin a lo thu a. Ka lut thawm hriain a lo hawi vat. 

"Khawnge Rempuii?" sawi mai tur hre loin ka ti a.

"A insiam meka" a ti a. 

"Inchhuak leh dawn ami?"

Min chhan hmain Rempuii a rawn lut a, a thawmhnaw hak lai ha tawh loin track suit a haa. Ram kalnaa bun chi Boot a bun bawk.

"Lan, Ruata te dil an sah dawna.. Zaninah thian dangte nen riah luh kan tuma. Mama hi phone a pick thei lo a. Msg chu ka dah tho a. Lo hrilh nawn leh hrim hrim la" a rawn ti nghal mawlh mawlh. Ka mitthlaah Ruattluanga te dil lian leh zau tha zet a lo lang a. Kan inzui lai khan vawikhat kan kal a. Riah erawh kan riak lo.

"Um, ka lo hrilh dawn nia" alangah erawh ka ti a. Ruattluanga ka melh zawka. Min en loin a phone a lo khawiha. Kan inthen chhan kha hmeichhe dang vang emaw Mipa dang vang ni loin intha then tawp kha kan nia. Amah ka hmuh leh pawh hian danglamna tehvak ka nei lo. Mahse,Rempuii nen erawh inngaizawng lo se ka ti ru ve tawp.

Roomah ka chho a,khumah ka inthawlh nghal kak.. Ka nau pai hi thla 2 vel chauh ala ni a. Haw lutuk tihtur ka ni lo nangin thil ei a hara,ka luak chhuak a reh hleithei lo a. Khawsik ru ser ser hi a khat tawkin a awm reng bawk.

Ka muhil hman trep tihin Duatpuii'n min rawn call a,pick loh ka tum zet nangin pawimawh a awm takin ka pick leh ta zawk.

"Um" hello pawh ti loin ka ti a.

"I tha em?" A rawn ti zang vah.

"Um, tha... Buai hun lai laia enge min rawm biak tehhlawl a?" 

"Nia..Awi,thil hrilh tur che ka nei a.Aaa,hrilh tur che nge hrilh loh tur che pawh ka hre thiam chiah lo e a" a rawn ti deuh nuai. 

"Eng thil nge a? Han sawi la" 

"Vawiinah inpa leh Becky an lo kala. Becky kha i post ruak hnawhkhah nan an lo la a. Ka hre ve chiaha" a rawn ti zuai raih. 

"Eh,chuti law?" Ka ti halh mai. Ka awm loh hnuah midang la loin Duatpuii'n leh Rajesh-an ka hna an kawp a. Hnam dang bawk an dah dawn emaw an tih laia Becky lo lut ta daih chu amak an ti aniang. Bakah, Duatpuii emaw Rajesha zawk pawh dah ngheh mai awm tak ania.

"Nia, midang an rawn dah dawn maw ka tia. Mahse,inpa best friend ania. A tihpui aniang ka tia.Chuan, ka ei lo tawp. Inpa kut a vuan reng ringawt mai" a rawn ti leh hmawk hmawka. 

"Eng maw?' ka ti ringawt. Ka hriat loh vanga zawt nawn pawh ka ni Chuang lo.

"Thiante tih vanga a bana a kuah thlazen kha I thiannu ka nih angin ka ei lo" a rawn ti leh hmak. 

Nia, keipawhin ka ei miah lo. Thil ho tak anga lang pawh nise mi zinga lo inkaih vel chiam chu thil mawi a ni lo.

PS: A van ngaihnawm loh tak inti,ka hre vek 😆