MINE- 17

 Chapter - 17

Ka beng kiu deuh mum mum avangin ka lu ka thing nawka, ka hma zawn tukverh bula ṭhu Lalpuii chu ka en a. Min en loin hnuai lam a bih a, a kut tin a sik niap niap bawk.

"Ka hre thiam lo' ka ti chhuak hap mai.

"In inṭhenna a rei tawh sia, engtin nge a thlen theih zawk?" kan ngawih dun tlawk tlawk hnuah ka ti leh a. Min rawn en zawka, a kun lehnghal a.

"Ka ṭhiannu Dingdingi te innei tur Party naah khan kan inhmu a.Bakah,amah hian min rawn be deuh reng hrim hrim a" a ti niah niah.

"Rempuii nen tlang hriat khawpin an inzuia,ala rawn be tho che maw?" ka ti deuh tawk. Eng Mipa nge maw lo ni ngai le?

"Be reng. Min rawn msg a, a chang leh min lo call a"

"Anih chuan bialnu a nei reng a, an inṭhen zuai laia inkawp ve mai inni tih pawh i hre reng a" ka ti leh a. Ka tum vang reng pawh ni loin ka awah ka ngaithiam lo tih alang thei.

"Chutiang a ni lo" rang zetin a ti hmak. 

"Eng nge chutiang ni lo chu? Lawk, chu lam chu sawi tawh lo ang. Tunah engtin nge tih i duh?" ka ti ta zawk. An lo inkawp ṭhin tawh dan sawi hian kawngro a su dawn tlat lo.

"Ka hre lo alawm" beidawn hmel zetin a ti hapa. A hmai a hup zui nghala.. 

Harsa ti angreng fein ka tho a. Ka pan pheia, plastic Chair ka pawt hnaia. Amah hmachhawn zawngin ka ṭhua, a taksa khur dar aṭang chuan a ṭap tih ka hre theia. A duhtawka a ṭah hma chuan eng mah lo sawi zawm ka tum tawh lem lo.

Reife a ṭah hnuah a thaw deuh huaia, a insut leh hrawiha. A mit a hru zui nghal chat chata.A rawn hawi chhuaka, mit sen ram chungin za miah loin a ṭhen lui saka.Mahse,a mittui rawn parawl nghal chuan nuih der a tumna a hlawhchham tir chiang ngang mai thung.

"Kar hmasa khan ka hrilh tawha. Tihdan ka lo ngaihtuah ang a tia. Mahse, a reh zui daiha. Biak ka tuma,min lo block daiha. A ṭhianpa ka biaa. Rempuii nen inneih an tuma,Palai an kal dawn tih min hrilh a" a ti duah. A sawi tawp lam phei chu a zawi lutuka,ka ṭhu hnai hrima,ka hre thei hram hram zawk.

"Nizanah an lo kal" ka ti mawl tawp. 

"Ka hria..Chuvang ania niminah khan ka rawn call che. Tibuai miah lo tur che ka nia. Mahse,ka buai vek a. Tu nge ka sawipui ang ka hre thiam lo a. Ka rilruah ilo langa, I pasal nau ania. I ni pasal fanu a ni bawka. I hnaih ber a. Eng emaw tal i tih theih ka beisei a"  a ti leh a. A aw khur deuh dar dar chuan a chhungril manganna a tilang ni berin ka hria.

"Eng nge ka tih theih ang? " ka ti chhuak halh mai. Beiseina siamsak turin idea chhete pawh ka nei eih si lo.

"Rempuii min lo biaksak la, ka rai tih hrilh tawp mai rawh" 

"Ni lo" rang lutukin ka ti vat.

"Khawngaihin... A hriat chuan hmeichhia ve bawk anih angin min lo hre thiam turah ka ngaia.Innei lo se pawh ka duh chuang lo" a ti leh a.

"Ka hre lo... "

"Ka titla mai dawn mawni le ka tia,Mahse ka ngam si lo. Ka fa ania,engpawh huama pai tlang ka tum. Ruattluanga hian min nei duh emaw duh lo emaw eng mah pawi tihna ka nei lo. Mahse, Rempuii hian hre ve hrim hrim se ka duh.A bialpa tenawm zia hi hria se ka duh" tumruh zetin a ti leh a. 

"Um,a dik alawm. Tihsual nei ve lo i fa kha engvangmahin haw tur i ni lo.Putea ten an hre tawh em?" Ka tih zawm leha.

"Aih, a hre tu chu Ruata leh kei leh nang a ni rih mai" a ti leh sap. Tun lawka hmeichhe tumruh tak kha ni loin hmeichhe derdep, puih ngai ngawih ngawih a ni leh tawh.

"Ruata hi ka lo be zawk dawn em ni?" ka ti leh a.Min rawn en a,a mitmeng ngui raih maiah chuan beidawnna alang thei a. 

"Ani chu biak awmzia a awm tawh lo. Rempuii zawk hian hre ve hrim hrim se ka duh"

Eng mah sawi loin ka bu ringawt. Pasal atana neih a tum mek Mipa, kha pa fa kha ka cousin-in a pai tih Rempuii hrilh tura ka inngaihtuah pawhin ka khur chhe lo chauh. Kan inneih hnuah ka ni fate avangin kan inbat fuh lo zauh zauh tawha. Inhuatna nei zui lo mah ila Remsanga'n ka thlavang a hauh nasat lutuk vang leh min duat lutuk vangin ka tana hriat nuam vak lo,inngaihbel theih zawnga tawng a nei fo a. Inpawh leh innel tak anga lang si hian kan inpawh tak tak lo a. Kei chauh ni loin,amah Rempuii pawh hian a hai bik lo. A u nupui ka nih vang leh keimah zawk hian ka tih hmasak lem loh avangin kan buai lo mai mai niin ka hre fo a. Tunah hetiang thil hi hrilh ta ila engtin nge a dawnsawn ang ka ngaihtuah thiam lo.Ruattluanga reng reng pawh Ngaihzawng nei chungin engvangin nge hmeichhe dang a mutpui?

"Lan..." Ka kutah a rawn vuana,ka phu zawk. Ka en vata,a mitmenga min beiseina lang chu chiang takin ka hmu theia. Ka beidawng ru ngawih ngawih thung.

"Biak ka lo tum dawn nia" alangah erawh ka ti a. Ka ṭawng leh hmain ka phone a rawn ri a, min rawn call tu ka en a. Remsanga a lo ni a. 

"Hello"

"Pawnah ka nghak che aw.I hman tawh em?" a rawn ti dam thlup.

"Aw,ka lo kal ang.Ka rei lovang"

"Ok.. hmanhmawh suh, mi biak tur ka nei tho a. Ka lo bia ang. Ka rawn lut lo law law mai ang" a ti leh a. 

Phone ka daha, Lalpuii ka en a. "I nu tal hrilh la ṭha ka van ti tak. A la lang dawn tho a. I hrilh ngam em? Ka hrilhsak zawk dawn che em ni?" Ka ti a..A lu a thing nak..

"Ok, I tihdan dan le .. I hrilh hreh anih chuan min rawn call mai dawn nia.Chuan, I in entir tawh em?" ka ti leh a. A lu a thing leh mai. 

"Kalpui i duh chuan ka kalpui thei che ania. Ka Doctor pan hi i pan ve mai anga" ka ti a. A bu leh ringawt.

Remsanga nen in lam pana kan tlan na kawng tluanin ka rilruah thil dang a leng lo. Min biakna pawh ka 'aw' liam vel mai maia. Thil ka ngaihtuah kual vak vaka. Ngaihtuahna mum erawh ka nei chuang lo.Remsanga ka en a,a mood a fuh viau tih ka hai lo. Thil thleng hi Rempuii ka hrilh hmain amah hi hrilh ta ila a tha angem? Rempuii a hrilh hunah keiman ka hrilh tih a hre dawn tho.A u ka lo hrilh khan a lawm lo viau theia. Thil kal tluang thei reng tur ka ti chhe ve vek thei..Huizzz,ka hah lutuk. In kan thlenga,Rempuii thawveng taka a tei vel ka hmuh rualin ka ni deuh nghulha. Thilsual ti ang maiin ka awm a nuam lo em em bawk.

"Eng nge a?" Khuma rawn lawn pahin Remsanga'n a ti a. A lam ka hawia, chik zetin min lo en reng.

"Eng maw?" Ngaihsam hmel zetin ka ti liam puat.

"I thil ngaihtuah kha mawle..."

"Chutiang eng mah a awm lo" ka ti vat.

"Ok...Mahse,chaw kan ei lai khan ei mang loin i hawlh kual vel mai maia. Tunah lah ngaihtuah miah loin TV i en leh a" a ti ta chat.

"Ka ril a ṭam lo alawm. Chuan, Tv te chu ngaihtuah run kher lo pawhin a en theih a" ka ti a. Ka nui lui hak hak bawk.

"Ngaihtuah run lam a ni lo. I rilru tibuaitu vang zawk khan Govinda lam zuai zuai pawh i en reng chu anih kha" a ti leh a. Tv ka melha,a sawi ang tak takin Govinda a lo nui var ṭhu. Vai Film en khat nak laia ani channa ber kher thlir tak reng chu mak tih loh ngaihna pawh a awm lo.

"Sawi la...." Amah bawkin a ti leh a. Muangchangin thawk ka laa. Chik lutukin min en reng tih ka hriat avangin a lam erawh ka hawi duh lo.

"Engtik nge Ruata palai te kha an lo kal leh dawn?" ka ti sap.

"Karleh tawp lamah.. Le, I rilru buaina chu sawi la" a ti leh a. 

"Lalpuii a raia. Ruattluanga fa a nih thu min hrilh" zawitein ka ti a. Ka sawi zawi leh lutuka,a hria em pawh ka hre lo. 

"Chuan?" a ti vawt ruih. Ka sawi zawi hle nangin a hre ngei e.

"Rempuii hian ala hre lo anih ka ringa. Engtin nge ka tih ang?" ka ti lawi rat mai. Mahse,ka sawi chhuah tak law lawah chuan ka thawl hawk thung.

"Ka lo be dawn nia. Ngaihtuah hah tawh lo teh. Nang leh i kawchhunga naute nghal deuh tan khan rilru hah a tha lo ania" nui chungin a ti a. A lam ka hawia, ṭhu mu chungin phone a lo en a. A hmelah chuan kan thusawi khan a khawih Danglam miah lo tih ka hre thiam nghal vek. 

"Buaina tham a ni iti ve lo em ni?" ka ti ta thlawt. A phone khumah a dahthlaa. A rawn tho a.

"Ni e, ni lutuk. Mahse,ka lo bia ang ka tih kha. Ka bia anga, an innei duh tho anih chuan an thu ania. Kan lo buaina tur a awm lo" a ti dam thlup. Lalpuii ka khawngaih zia leh Rempuii rilru tur dawn reng renga rilru hah nak laiin a la lap lutuk chu ka haw deuh lek lek. Mahse, eng mah ka sawi zui duh ta bik lo.

Ka harhin Remsanga inkhel turin a lo chhuak daih tawha. Tho mai loin ka mu deuh vang vanga. Vawiin lamah Rempuii a hrilh ngei anga. Eng tak thleng ang maw?

Inhnuai lamah ka chhukthlaa, Pari leh Thlungi inbe lawng lawng thawm ka hre theia. Midang erawh tumah ka hmu lo. Kitchenah ka lut pheia, min hmuh veleh thingpui ka duh leh duh loh min lo zawt nghal thuaia, ka duh lo tih ka hrilha. "Pi kha damlo a tlawh a,a lo haw har maithei a ti ania aw" Pari'n a ti a. Nizan khan kan chhungte damlo tlawh tur an awm tih an sawia. Tu nge annih phei chu ka hre ve lem lo.

Pawnah ka chhuaka, Zan lamah thli leh ruah a thawk na bawka kawtzawlah hnahthel an thal rem rum mai. A sir kil lam atangin Ruati'n a rawn phiat phei meka. Kawtzawl a zau si, phiahchhuah meuh chuan kawng a kham duh khawp ang.

Pen thawm ka hriat rualin ka hawi leta, Sangzuala a lo ni a. Remsanga ang bawkin ani pawh hi a ṭawng duh lem lo. Tlemin a zia zawk tihmai chauh a ni a. Inah a awm tam lo va,a awm chhunah pawh roomah a tawm deuh chawt ṭhin bawk nen, kan inbe tam lo viau.

"Mama a chhuak tawh mi?" a rawn ti a.

"Um, I khel dawn na nge?" ka ti let ve nghala.

"Tukin chu khel lo mai. Vawiin i kal chhuak dawn em?" Min ti leh a.

"Dawn pawh ka hre lo. Tinge?" ka ti ha.

"Um, vawiin atan chuan a ni chuang lo a. Thil dang daih, naktuk tlaiah ka ṭhiannu chawei turin ka rawn hruai haw dawn a. Nutei ka hrilh tawh tho a. I chawhmeh special deuh kha a ei chaka..I siam thei hram angem?" Ani leh ni lo ang takin a ti duah. Kan inneih tirh aṭangin hetiang taka thui hian min la be ngai lo. Hmeichhe chungchang phei chu a sawi ka hriat vawikhatna a ni a. Bialnu a neih awm pawh ka hre ngai lo. 

"Awi, A va zamawm duh awm si ve" nui chungin ka ti a. 

"Zamawm loh turah ngai ang. Shillong a awm laiin a ei ṭhin a. Mizo hian kan siam thiam tawk lo a tia. Mahse,I siam kha khasi Original nen a Danglam lo tih ka hrilha.Mahse, I rit tawh sia..I chet peih loh chuan ka tilui ngam lo che ania" inthlahrun hmel takin a ti leh mual mual.

Remsanga rawn haw veleh Sangzuala nen kan inbiakna ka hrilha, a nui ve huk huk a. "A leng tar dawn emaw tih laia chutia ani meuhin bialnu a rawn hruai tur chu a ropui chu" a ti awlsam mai

"Engtikah nge Rempuii chu i biak ang?" Ka ti sap. Nawr hmanhmawh ka duh miah lo nangin a la lap ngang mai si a, hrilh loh ka hlau a ni ber. Unau mah nise Mimal thil insawisel sak lo em em mai chi annih tlat avangin,tun ṭumah pawh hian a hre lo der ang tih ka hlau zek zek.

"Vawiinah ka lo bia ang. Ngaihtuah hah vak suh ka tih kha. Bakah,alan ang ngawt hi a ni lo ve theia" a ti mar ut.

"Eng maw ni lo thei?" Hre thiam lo zetin ka ti a. A thle buk..

"Hahdam teh, khatia i ngaihtuah reng chuan i depress leh vak dawn ania" a ti leh daih.

Kan nupain thil kan ei a. Nutei a lo la let lo a. Kan ei hmain amahin Sangzuala'n a ei a. Rempuii erawh ka la hmu lo hrim hrim. A tho hma ngai lem lo bawk a ala tho lo ni turah ka ngai mai. Bakah,zing lam hi chu thil kan ei rual vak lo a. Indawt deuh zung hian kan ei tlangpui zawk.

Nilengin rilru nuam lo runin ka awm a,Phone ri hlekah pawh thil dik lo awm turah ngaiin ka phu vak zela. Rempuii awmdan ka en chik em em a,Mahse eng mah Danglam a awm lo. A be tawh em tih Remsanga zawh nawn sek lah ka hreha, Lalpuii lahin ka hrilh leh hrilh loh a khat tawkin min rawn zawt a. Ka thawpik ngawih ngawih a ni ber. Tun hma zawnga inzawmna pawh nei lo kha ka pasal chhungte leh ka cousin teah inzawmna chhe zet zet a rawn awm sek mai hi amak zawk.Vai serial film te pawh a ang lek lek hian ka hre mai.

Room Kawngkhar kik thawmah ka phu deuh zawka. Mahse,Thlungi aw ka hriat rualin ka thaw huai. Kawngkhar a rawn hawnga,a rawn daka.

"I buai loh chuan piin lo chhuk lawk teh a ti" a rawn ti a, a kal lehnghal mai.

Inhnuaiah ka chhukthlaa. Living Roomah a awm emaw ka tia, Thlungi'n Roomah awm thu min hrilha. Tun ang huna room a awm chu a dam tha lo nge mawni?

Room Kawngkhar ka hawnga,ka rin loh deuhin Rempuii a lo awm ve a. Ka lut thawm hriain Nutei a rawn hawi nghal a,Rempuii erawh a ṭhut ngaiin a ṭhu a, ka lut thawm hria ang pawn a awm lo.

"Lo ṭhu teh" Nutei'n minti a. 

Thutthlengah ka ṭhu fel hman awrh tihin Nutei a rawn ṭawngchhuak leh a, ka en nghal vat.

"Mama hnenah i unaunu naupai kha ilo hrilh tih kan hriaa. Ka rin aiin kha nu kha a kal thui a" a ti dam dap. Lalpuii chanchin a sawi tih ka hriaa. Mahse,a sawi dan awmzia erawh ka man lo.

'Mama i hrilh kha pawi ka ti hran lo a. Mahse,Buaina tur a awm lo ania. Ruata fa a ni lo va. A peih chen chen lo puh mai mai se. Bakah, Palai lo kal hma atangin Mama pawhin a hre sa vek a. Buaina thamah kan ngai lo a ni deuh ber mai" a ti leh dap dapa. Kei erawh sawi tur hre loin ka thut ngaiin ka thu a, Nutei ka melh tlawk tlawk ringawt.

PS: Ka tlai hle a ni..Tin, naktuk Sunday anih hi aw🤭