Bibi - 10

Chapter - 10

"A na em? " tihngaihna hre lo mangang bawk siin ka ti leh ringawt.

" Na tura vuak a ni bawka, na ve e" a ti leh hmuk. Kan inchhang tawk bawk si chuan ka nuih a ti za thut a. Mahse, nuih hun a ni lo leh lutuk.

"Awiii, U Mama chu misual amaw kan ti che alawm. Nangmah i ni tih kan hre si lo a, U Bdi'n a vawhlum lo che chu a va tha tak" Na-i lah chuan a la rawn ti tak deuh deuh.

"Ka vawhlum zo awm lo em maia' rang zetin ka ti a. Saitluanga ka melh zak zaka, ka rin loh deuhin a hmelah chuan nuihza insum hmel ang deuh hi ka hmu a. Mahse, ka en rei ngam lo em a, ka hmu sual pawh a ni maithei.

" Misual chu ka lo ni leh lo anih hi.. Mu ula" Tha deuh in a ti a. Min vin nek ka rin laia a thinrim lutuk lo chu ka lawm ru ngang mai.

Ka muhil thei tawh lo hrim hrim. Keimah chauh pawh ni ila ka zak ngar ngar hi a ni tawp. Mahse, a thiam lo ve tho alawm. Riak tura kal ania, ngah nge a lo haw leh si tehreng. Sawi pawh sawi lo lehnghal ania. Misual tak tak lo nise keini hmeichhe pathum lek te chu min tingmit dial ang chu.. Mahse, ka zak tho tho..

Ka phone ka hmet eng a, ka mengphawk vak ringawt. Saitluanga miss call vawi 10 lai a lo awm a. Ka phone lah vibrate off  vekin ka lo silent daih chu niin... Huizzz, kawngkhar hawng turin min lo call tih lah a lo call hun enin a chiang reng mai bawk. Ka zah tawh sa nak alaiin ka zak zual leh hi a ni ringawt.

Msg lo awm ka en leh a, Saitluanga msg a lo la awm tel ta cheu. Ka open nghal a.. "I vaw na thei hle a ni" tihte mai hi ala ni zui a. Eng emaw tal ka sawi angai..

"I lo haw tih ka hre bawk si lo a. Misual emaw kan ti tak tak che a. A zia lo tawp" tih ka thawn let a, a en nghal ka rin loh nen a la seen nghal zui.

Typing a intih lai chuan lungphu rang em em in ka nghak a, ka thaw tha ngam mang lo.
"Call i pick duh lo anih kha"
Ka chhiar zo a, tlem chuan ka thawveng deuh. Call kha zat ka pick loh hnuah ka la hlap zui a, ban vang vang na tham thil ka tisual tih ka inhre chiang ve em.

"Ka phone ka lo silent a. Ka tihpalh tak tak"
"Ka pi khan a hriat chuan a hau ngei ngei ang che" a rawn ti leh daih.
"Nangman min ban dawn lo mi? " ka ti ve thung.
"Ka lo inngaihtuah ang. Min vawhlum teuh bawk si" a rawn ti leh a.

"Vuak chu ka vawhlum teuh lo mai che. Mahse, misual lo ni ta la vuak thluk pawp che chu ka tum a. Pawi ka ti lutuk, min ban pawhin ka sawisel thei lo ang" ka ti deuh duah.
"Muhil rawh, naktukah kan sawifel dawn nia" tih a rawn thawn leh a, a offline zui nghal a. 

Che miah lo in ka mu a, ka chet dan atthlak em em kha ka ngaihtuah let nasat poh leh ka inthiam ve tial tial thung. Ka vuak tur kha Saitluanga a ni tih hre sa ila ka vaw dawn lo. Mahse, misual lo ni tak tak se chet dan tur diktak a ni a. Ka pi leh a in ka venhim tumna a ni a, tuman min dem thei lo. Saitluanga hian a hrethiam duh lo a min ban a tum tlat anih chuan ka bang chiang khawp ang. Khawngaih ka dil a beisei anih phei chuan NAHI hi a ni ringawt.

Ka insehruh nasat tehreng nen zing a Saitluanga nen kan inhmu chu ka zak lehnghal tho. Pi nen Room a kan awm laiin a rawn lut a. Melh pawh ka melh tha ngam lo. Pi-in a lo haw chhan a lo zawt nghal chul a.
"Nizan khan Rozama pa a boral thut a. Ka rawn zan tlan a" a ti a.
"Ekhai, eng na nge? Tunah ilo thleng chauh em ni? " a ti leh a.
"Stroke ania. Amah kha Bp sang nei sa ania. Nizanah ka lo thleng a, zanah kha chuan ka kal ta lo law law a. Vuina lamah ka kal anga, tlaiah ka chhuk leh mai ang" a ti duah.  A thian hnai tak anih ka ring ve tawp.

"Driver i rawn hruai lehpek na nge? " Pi-in a ti a.

"Hruai lo. Mahni hian a awlsam zawk, thil pack fel tur a awm bawk a. Lo pawh pen kha hna a sawt lo" a ti awlsam mai.

"I heti ziah mai. Mahni hian tlan mai mai zel suh..Anih leh Nizanah maw ilo thlen a? I motor thawm pawh ka hre hleinem. Bd, nang i hria em? " min ti a. Min zawt kher chu ka ngei ru ngang mai.

"Aih hre lo e"  Ka ti a, Saitluanga ka va en a, lehlam hawiin a lo la nui put put zui. Nizan khan min ban dawn leh dawn loh a lo inngaihtuah ang kha a tia. A awmdanah chuan min ban dawn lo a ang.

"Bd-i hian min vaw nek ania" a pi hnenah a ti a. Ka va melh vata, min en loin a pi a lo en a.

"Enga? Tu maw vua che? " a ti vak.

"Bdi mawle... Amah hi zawt la, pot sei deuh kawngkhar bul ami khan min vua alawm"  a ti leh a. Hepa hi ka va han ngei zet zut tak. Ngam ila chuan "sawi tawh suh" ka ti vak duh ang. Mahse, ka ngam der si lo.

"Bd, a sawi dik em? " Pi-in khauh zetin a ti a.

"Aw.... Mahse, a lo haw tih ka hre lo a. Misual emaw ka tia" Mahni thiam inchan tum ranin ka ti vat.

"Ngah nge misual te anih anga? Nang tereuh hi eng nge maw i hriat le? " min ti a.

"A lo haw tih ka hre lo alawm"

"Pi, Bd-i hian a venghim zo dawn lutuk che. A vuak nat theih zia mai chu a" a lo ti leh nghut. A tawng duh lo viau zel khan ka hre sia, ti nge maw a ngeiawm em em mai le???

"In ho mai mai em mai. Nang pawh i lo haw dawn te chuan rawn sawi tur alawm. Riak tura kal na na na a. Khawi laiah nge a vuak che a? ' a tihzawm a.

" Tu emaw ka call a, a pick thei lo a. Kawngkhar hnung lam atangin ka lut a" a ti leh a.

"Tu maw i phone a? "

"Nai-i aniang... " ngeiawm zetin a nui a. "Tak takin Pi Chesualliani ka call" a ti leh a. Pi hawibo hmel chu ka en a, ka thinrim bawk, ka nuihza deuh bawk si nen ka insangmar teuh ringawt.

"Chutiang hming pawh ka hre lo e a. In in vaw silawng lo chu a tha anih mai chu " a ti leh a. Ka lakah thinrim lutuk anga a awm lo chu ka lo thaw huai huai mai. Pi-in a damdawi ka chah leh chah loh min zawt zuia, Pi Maduhi hnenah niminah ka hrilh tawh thu leh an lo la dah lo tih ka hrilh a. Diktak chuan vawiin tlai ei tur pawh a nei tawh lo a. Ani tar tawh, thil engkim duhtui em em lawi si hian a nghei vaih chuan a ang leh nasa dawn lutuk tih ka hria. Mahse, aman min tir pawh nise lo va lak tumna ka nei eih tawh lo.

Saitluanga nen mitthi chanchin sawiin an titi zui a. A thil eina vel silfai tur kengin choka lamah ka phei a. Ka sil laiin Na-i a lo lut a, "Api hnenah i hrilh em? " a rawn ti nghal a.
"Aman a lo hrilh alawm. Nichinah a lo lut a" ka ti nghat.
"U Mama'n maw? Awi, keichu ka nuih a za. Nizan a current ka on chiah a  U Mama hmel ka hmu kha, i vaw ri pawp bawk sia" a ti a, a nui zui nghal kar kar a. Keipawn ka ngaihtuah let a, ka nuih a za ve tho. Ka nui ve nghala, kan pahnihin mittui tla phungin kan nui dun ta vak.

'U Mama kha a thinrim miah lo a, mak ka ti e" a mit nuai chawt chawt pahin a ti a.

"Nia, keipawh min ban ka ring a" ka ti tha ve mai. Kan kum a inthlau tehnang hian ka kawmngeih ve viau tlat.

"Ban kher chu ka ring lo. A star deuh chein ka hria" a ti leh a.

"Ka va awih lo tak" ka ti ve thung.

"A tan thei che e.. Hmanni a Pi Tezawki'n Nurse pangngai lak a sawi pawhin maw u Mama hian angai lo a ti tlat asin" a ti leh a. Ka mengphawk nghal hra mai.

"Chuti chuan pi-in a sawi maw? An pa bulah ami? " ka ti a. A hma khan a pasal bulah a sawi tih min hrilh tawha, chu chu a sawisual anih ka ring deuh a.

"Aih, u Mama nen thingpui an inlaiin a sawi alawm. Apu pawh a awm tho a, apu pawh khan 'Bd-i hi ka pi hian a ngainaa. Hetiang hi a tha ber' a ti ve a" a ti leh zat zat. Engmah sawi loin ka hmui ka pet nauh nauh a, Kum chanve atana inremna siam kan ni a. Chu pawh chu kum chanve hnuah kan duh chuan kan ziahzawm leh anga. Ka duh phawt chuan ka thawh chhungin hna dang tha zawk ka zawng thei ang tiin zau taka ziaka dah thlap kan ni a. Thla khat erh awrh ka kal chauha, min ban a tum thu vawi hnih lai ka hre ta maia. Eng nge maw keimahah hian buaina a neih le? Angela-i ka ngaihtuah tih a hriat vang hian min duh lo tih na a ni zawk angem? Ka hnaah lah ka theihtawp ka chhuaha, sawiselbo ka ni lo chungin sawiselna em em tur ka awm ka hre si lo. Ka hna mai piah lamah inchhung chet thlengin ka pui vek zawk si. Mimal takin min hua ti dawn ila min be tha em em reng lawia!!!

"Bd... " Saitluanga'n ka bul mai atangin a rawn ti thut a. Ka phu nghek zui..

"Aw" Mawl hmel zetin ka ti hu.

"I va han phu nasa ve" a ti nghut a, ka nui ringawt.

"Ka pi Damdawi lak ngai a awm em? Nichin khan a sawi tlatin ka hria" amah bawkin a ti leh a.

"Aw, awm e. Adang ngai a awm leh awm loh ka va en nawn leh lawk ang" Ka ti a, ka tho nghal a. Pi hian Damdawi a ei nasa a, a tlangpuiin thla khat ei zel hian kan la a. Tun ami hi kan lak hnuhnun ber khan kan la tel lo.

"Lo enfel la, ka rualin i kal dawn nia" a ti leh a.

"Khawiah maw ka kal ang? " ka ti leh ha mai.

'Damdawi la tur chuan aniang chu. Nge mitthi in-ah min kalpui zel duh zawk em? " nui chungin a ti a. Nizan atang khan a nghal em em ringawt mai.

"Kal duh lo... " ka ti hmak.

"Ok, a tha alawm.. Damdawi chu lo enfel la, nangman i lak mai loh chuan vawiin chu rawn dah tur an awm lo a" tha takin a ti a. "Aw" Ka ti hman tep a, mahse Pi Maduhi'n damdawi ka lo lak vanga min tawngkhum dan kha ka ngaihtuahna leha, Saitluanga nena kal pawh ni ila min khei leh fek fek lo ang tih a sawi theih loh. Khatiang tawngkam hriat nuam lo kha hriat leh ka duh tawh hek lo.

"Pi Maduhi kha ka hrilh tawh tho sia" ka ti nghal a.

"Ka hria alawm. Amah khan min rawn biaa, chuvang ania nangman i lak mai loh chuan ka tih zawk. Ka rawn haw hma ka ring lo a,Damdawi a hmuh har chuan ka pi in a zawt ngun lutuk palh ang che. Tlai lam eitur a nei tawh lo lehnghal a" a ti ta duah.

"Um,.. Nia.. Mahse... " awmze nei lo zetin ka ti bah nak mai.

"Eng nge? Harsatna i nei em? " a ti leh a.

"Nei chiah lo e. Na-i chauh a awm a, kalsan ka hreh a.. " ka rilru a lo lang hmasa ber ka sawi nghal pawp. Mahse, a nui ta suk.

" Ngaihtuah suh, a rei dawn lo a. Damdawi list min pe la, Sai'n a lo siamfel sa anga. I la tawp anga, taxi-in i haw leh mai anga. A rei lo ang" a ti dam thlup. Hnial dan tur a vang ngang mai si a, ka bu ta nge nge. Pi Maduhi tawngkam huatthlala em em dawn leh palh ka hlau tihmai kha hetia han ngaihtuah hi chuan thil sawi har niin alang miah lo a. Ani phei hi chuan kha thil thlen lai kha a hre ve reng bawka. Mahse, amak khawp mai. Ngaihtuahna ni lo, a taka han tawn hi chuan,an chhungkaw zinga mi hming hmerha a tha lo zawnga sawi mai a lo harsa duh viau tlat.

Motorin emaw kan kal dawn ka tih laiin Bike zawk a pan a, a Bike lah chu Bullet niin a hnung seat dalna a thlawn daih zui a.

Kan tlan chhung zawng ka tang tluan parh. Bike chuang ve siin ke a kal aiin ka hah mah zawkin ka hria. Va hnaih lutuk ka duh lo a, hnung lamah ka tlak ka hlau lawi bawk si. Ka insehruh kawng tluan hi a ni ringawt mai.

Damdawi dawr kawtah a dinga, a tlan lehnghal mai dawn emaw ka tih laiin Traffice police lo awm hnenah chuan din lawk a rem leh rem loh a zawt a, a lo phalsak ve mai.

Dawrah kan inzui lut a, ka kal hmasak a lo awm kha a lo awm leh a. A hma ang bawk khan min lo be leh sawt sawt a, mahse Pi Maduhi sawi kha ka hrechhuak lehnghal vek a. Ka hmu tui hlawl lo.

Damdawi kan lak tur a tam lo bawka, kan lak chhung a rei lo. Saitluanga nen an inbe luama, Aizawl a awm fel veleh Family picnic neih a ngen a. Saitluanga'n "lo book la, mahse hla lutuk lo se" a ti a. Lawm zetin a khek nghal raih mai.

Kawng chhak lam kan pan chho tur chu ka inrin hmain ka banrekah a rawn vuana, min kai a. Ka hamhaih buai chhungin kan thleng fel der. Two Wheeler Taxi min pharsak a, ka kalna tur a hrilh a, Fare a pe nghal vek a. Min biak dan engkim maiah chuan min care deuh hi a ang em em bawk a. Ka awmdan engkim mai chu Mumang a ang mah zawk.

Kan tlanchhuah hnuah Taxi Driver chuan min biaa. A sawi ka hriat mai theih loh vangin ka zawt nawn leh a.
"Pu Saia nupui ilo ni reng a. Nupui a nei tawh tih pawh ka lo hre lo va. Tun hma deuh khan karkhat lek an motor ka khalhsak a. Ka awm rei lem lo bawka min hre chiang hman ve lo viauin ka ring" a ti lawng lawng.

"Nupui a la nei hleinem" ka ti vat.

"Khaia, a nupui emaw ka ti che alawm mawle" Inthiam chiah lo hian a ti a.

"Ni lo.e.. " ka ti leh ringawt. Engtin nge maw a nupui anga min han hmuh theih zawk ni?

In ka thlen hnu lawkah Saitluanga msg a rawn thlenga, "i thleng tluang em? " tih a rawn thawn a. "Aw" tih ringawt ka thawn let a, a awmdan danglam deuh thut leh min ngaihtuah viau hi lawmawm lamah a kal miah lo. A mak mai bakah a rapthlak mah mah zawkin ka hria. Ka vuak khan a pum lamah vaw loin a luah ka vaw fuh anga, a rilru lam a chiang lo deuh zawk nge mawni dawn le??

Zan hnih Pi teinah ka riak a, ni thumna tlai lamah an vaiin an rawn hawa.Bungrua eng eng emaw an rawn phur a. Mahse, Quarter zuk luah a ni bawka. Bungraw lian tham em em rawn hawn an nei lem lo. Saitluanga kha mithi vui zawh hnu tlai lamah a chhuk veleh nghal a. Dar 9 velah a thlenga, min rawn call dut dut a
"Ka pi kha a muthilh tawh ka ringa,zingah ka thleng tluang tih lo hrilh mai la" a rawn ti a. Min biak danah chuan nula leh tlangval inngaizawng, zin chanchin inhrilh kan ni lo tih ka hai lo. Mahse, ka ngaihbel laklawh tlat tawha. Ka hah zo vek tho.

"Zanin chu inah hahdam deuhin i muhil thei tawh ang chu" Pi-in min ti a.
"Aa, tah pawh hahdam deuhin ka mu alawm" ka ti ve thung.
"A ni tho maithei a. Mahse, mahni in tluk hi chu a awm thei lo ania" a ti leh a. Ka pawm thlap. Ka riah zan hmasa zawk kha zan tir lamah ka mutui viaua, abak chu ka muhil tha lem lo viau.

"Angela-i ka hmu chak riaua, min va koh sak ta che' a ti leh a. Ka ip deuh zawk mai. Zinna lamah an hruai ve daih bakah Saitluanga boruak velah ka buai tawk lutuka, Angela-i lam pawh ka lo ngaihven mang reng reng lo tih ka inhrechhuak chiah. Saitluanga ni loin kei hi anih hi a chu ni a... Ka thil vei em em pawh ka ngaihtuah miah lo thei ania!!

Sitting Roomah an lo thu a, Mki a lo awm ve bawka. A lo thlen lai ka hre miah lo. Pi Maduhi hnenah pi-in Angela-i min koh tir tih ka sawia. A hmel danglam zawk chu a rei lo teh nangin ka hmu hman tho.

"Santi nen inchungah an awm aniang. Han ko mai rawh" a langah erawh chuan a ti a. Mki leh Saitluanga thu dun chu melh loh hram hram ka duh ber.

Inchungah ka chho a, Pi Maduhi te room kawngka bulah kan intawka. Min hmuh veleh Angela-i a tawlh let nghal hrat mai. Kei erawh ka chhungril a na ve zawk thung.

"Santi, Angela-i hi Pi-in a hmu duh a" ka ti a.
"Pi Maduhi'n a phal ami? " a ti hmak. Ka va han pen chak tak.

"Ka pi-in a hmu duh a, Maduhi phalna lak angai em ni? " Ka hnung mai atangin Saitluanga aw hian nelawmna tel map loin a rawn ti a. Ka inher nghal vata. Kekawr ipte zen chungin a lo ding a, min en loin Santi a en a. Santi ka va en veleh a, hlauh vangin a hmel chapo zet kha a lo danglam vek..

Mi hi chawh tih ka duh ngai miah lo ania. Tun dinhmunah hi chuan ani kher kher hi chu CHAWH ka ti.....

Note : Nula senior Romantic lo em em tan hi chuan Inngaizawng chanchin ziah hi a lo har ber anih hi😆😆😆😆 An Inngaizawng hleithei lo, nawr luih deuh nawk nawk mai ka duh tawh 😝😝

Chuan, FB leh blog lama comment hi ka chhiar vek zel ania aw. Lo sawi hot char char ru😆