Bibi - 6

Chapter - 6

Pi a nawr chhuak chu ka en a. Saikima ka en leh a, angaihna hre lo hmel zetin a dar a tisang uk a. Vawi lehkhatah kan nui chhuak dun leh hawk hawk mai.

Room atangin kan inzui chhuak a. Kan chhuah pahin ka chal nat leh nat loh min zawt leh a. A na lo tih hrilh pahin ka zawt let ve a. "Ka mittui a tla tep" a tih chuan kan nui dun lehnghal a. Mak takin Saikima hi ka hmuh hmasak ber a min rawn biak dan atang kha an chhungkaw ho zingah a danglam bik niin ka hre nghal a, tumai pawh hi a ngaihlu thiam a, vawiin a thil thleng vel atang phei kha chuan rei tak ka lo hriat tawh  ang maiin chhungril atangin ka pawh sarh thei tlat.

Pi a hlim em em a, a Tu leh fa te hoin an hual a, an hmangaiha, an ngaihsak em em vek mai bawk. Ka hriattirh atangin vawiin anga a hlim hmel hi ka la hmu ngai lo. Mahse, a khat tawkin min ko reng a, thildang ka tih pawhin ka ti rei hman lo. An chhungkaw ho pawhin chuti taka min ko ngun chu min mikhual en lo zui ve mai a. Min be bawrh bawrh a, abik takin Saitluanga te Ni neihchhun Pi Saipuii phei chu fel ka tiin ka nel nghal sarh mai.

Chaw an ei tan a, a nawlpuiin chaw an ei zawh hnuah kei leh Na-i leh Santi-in kan ei ve ta chauh. Kan eikham fel chuan a then an haw tawha, a then erawh an la titi tui viau bawka. Ei tur bang awm zawng zawng lak vek tur anih avangin ka buaipui a. Kan sengfel pui leh vek hnuah choka lam kan tifai lehnghal a. Pi leh a fanu an Inkawm tui bawka, chawei kham lam chu engkim ka tihpui hman ve ta vek.

Choka tukverh bulah pawn lam hawiin ka dinga, kan vir buai chhung a rei lo nangin thlanin min bual nasa hman lutuka, ka ban chuap a, a nuam lo viau.

"Tui ka duh a" ka kawr tlang a rawn pawh pahin Angela-in a rawn ti a.A lo kal thawm ka  hre miah lo. Angela-i chu ka zuk en a, Vawiin chu naupang dang an awm ve nual bawka, A nuin a control na a thlahdul ve deuh aniang, an in um kawi nasa a, amah ang lo takin a harh ve viau. Tunah pawh  a kawr hma a bal niau a, a sam tawn a phelh deuh phang a, a biang a tai hlar mai bawk.

Tui bottle awm teuh zinga pakhat ka laa, ka hawn sak a. Ka pek veleh rang deuh in a laa. A in nghal khawlh khawlh mai.

"Angela-i a lo kal em? " Santi-in a rawn ti a.

"Kal e, hei tui a in mek" ka ti let vat.

"Khawiah nge i nu phone i dah? " Santi-in Angela-i hnenah a ti a. Angela-i hawi buai nghal nak mai chu ka hmuh hmaih lo.

"Inchungah khan kan khawiha, ih.. Ih, midang khan an la aniang" a ti nawi kual ta chiah reng a. Khirh leh khauh taka enkawl nimahse naupang ngang a ni a. Naupang dang ang bawkin a thil dahna a hre thlip thlep bik lo tihna animai.

"Lo kal rawh, han zawng ang" Santi-in a ti hmaka. Mahse, rang zetin ka hmung lamah Angela-i a biru ta tlat.

Santi-in rawn pawhchhuah a tum a, Angela-i lah tan taktein a tanga, ka malah a in vuan tang ve tlat a. Santi-in thapui thawha a rawn pawt leh chu ka awn lawih a, vawn mai tur awm bawk si lo nen ka tlu teuh ngang mai.

Ka ding mar a, Santi mitah tak ka en a. Angela-i a rawn ban leh chu a kut ka lo vaikian sak nghal hmak. Pi Maduhi a awm loh chuan Angela-i enkawl zawng zawng hi Santi kut a awm tawp a ni a. Pi Maduhi a khirh ang chiah hian Santi pawh hi a inla khirh ve tho a. Em em tihchang ngah mah ila ka buaina tur anih loh avangin engmah ka sawi ngai lo. Vawiin erawh a uchuak ka ti ve tlat a. A hruai lui dawn lo hi a ni tawp mai.

"Kal san rawh, nakinah ka lo han zawnpui ang" ka ti dam thlap.

"Pi-in min zawn tir alawm. Mi biak a duh a" a ti a. Ka lo dan tak tlatah chuan min nek lui ngam tawh loin a din ngaiin a dinga, Angela-i a melh ram ram ringawt.

"Inchungah ka dah aniang a tih kha. Ka lo call anga, inchung chu lo han en la" ka ti leh a. Kum fe a awm hnu a pi enkawltu satliah ve maiin tihtur ka hrilh chu a la na tih a hmelah a lang vek. Pi Maduhi phei chuan a ring em em a, Na-i pawhin a hlau reng a. Inchhung khawsakna thilah pawh an dah lal em em a. Na-i hi thil a zirtir peih viau chungin an dah lal leh lutuk a, Na-i ni ila ka nin fe chang a tam ang tih ka chiang. Mahse kei nen hi chuan kan in upat hleih em a, damlo enkawltu leh mi thar zawk pawh ni mah ila min ti tak tak ngam dawn lo tih ka hre ru ve kar tho.

Lungawi lo zetin a in her a, a kalsawn chu ka en zui reng a. A kal liam hnuah ka mal vuana hlau leh ti deka Angela-i ding al chu ka zuk en a, a zat vang ni miah loin ka nui var var bawk.

"Lo kal rawh le. I nu phone chu han zawng ila" ka ti a. Ka mal a vawnna ka phelh saka, a kut cher leh tereuhte chu ka vawn saka. Ani erawh a kimki chaih chaih thung.

Inchung chhohna step kan lawnchho deuh chiah tihin Pi Maduhi leh Santi an rawn inzui thlaa, Pi Maduhi hmela thinrimna lang chu ka hmu chiang ngang mai. Mahse, keimahni min en loin kan hnung lam a en a, a hmel landan pawh a thlak lehnghal vek. Ka hawi leta, kan hnung maiah Saitluanga leh Mki an lo ding dun a, engvanga a thinrim hmel kha reh nghal nge anih ka man thiam nghal mai.

Saitluanga te chu an kal chho duh anih ringin step sirah ka tawlh phei a. Angela-i pawh ka kut vuanin min si chetin a ding ve ran mai. A nu lo kal chu pan tumna nei hmel pawh a pu lem lo.

"I hmu em? " Mki'n Pi Maduhi en chungin a ti a.
"Hmu e.. Mahse, kan nula hian tuiah a lo thlak anih hmel a" tih pahin a phone a rawn lekchhuak a. Mak lutukin nui hmel a pu zui lehnghal !!

"Awi, a va zia lo ve" Mki bawkin a ti leh hluai a. Mahse, Pi Maduhi ala nui ta sang tho.

"Fa neih man anih hi.. A thar neihna animai. Ee, Bd, Bawihi kha Santi hian lo tifai tawhse" a rawn tihzawm a. A thinrim miah lo chuan minti hrilhhai tlat.

Ngawirengin Santi-in a rawn kai a, Angela-i han tawi deuh mah se rei a tawi khawtlai ngam chuang lo. Pi-in min rawn au ve chiah bawk nen ka kalsawn nghal a. Ka rilru erawh Angela-i lamah a awm daih a. Pi Maduhi thinrim reng reng lo kha lawmawm lam anih vei nen ka rilru a nuam thei lawi lo.

Pi roomah ka nawr lut a, chawhnu lam zawng midang zingah a awm ve char char a. A kal thei lo tihmai loh chu a hranpain na a nei lo bawka. Vawiin a Tu leh fate an rawn kal tha bawk nen, nuam a tih zia a sawi sar sar reng mai.

Dar 9 rik hmain pi te Driver Puia nen kan haw a. Puia hian nitin hna lo kal nan Bike a rawn keng thin a, kan veng thenawm lawka awm anni bawka, kan haw rual theih tum chuan kan haw rual mai zela. Kal lam erawh zing karah a kal thin avangin a rualin ka kal ngai lo thung.

Ka roomah Lawmi'n min rawn zui lut nghala, kan birthday lawm chungchang min zawt nghal a, kei lah hi thil sawi chhawng thiam lo chi hi ka ni bawk nen, a duhkhawp a hre lo aniang, a tlak karh karh mai.

"Saikima chu tu nge a? " a ti teh daih.

"Pi fapa fa"

"A chhe lo em? " a ti leh a.

"Ka hre nang, chutiang zawngin ka lo en hleinem"

"Eng zawnga en vak nge ngai a? I hmuh danah khan a chhe lo em? " Mawl min tih hmel em emin a ti leh a.

"Ka hre lo e a. Palian pangngai, pian nalh ve deuh animai" ka ti liam leh puat.

"Chu ti deuh tawp lo deuh chu anih ka ring. Zanin chu a hming i sawi ngun em mai" a ti leh daih. Intih fin kual vel hi chu a chin than ngang ania, eng emaw tal hmehbel tur a lo zawng leh char char tih hriat reng reng. Kei lah chuan ka thilsawi lai khan a hming ka sawi ngun tih pawh ka inhre der si lo. Inti fing em emin a sawi zui leh teuh a, ka ngaithla liam vel mai maia, bakah ka rilruah Angela-i a awm reng a. Engmah dik lo a awm lo tiin ka inhrilh ngiala, awm zia a awm lo. Ka mumangah pawh ka hmu zui ta zel.

Pi te in ka thlen in Na-i leh Santi chauh an lo awm a. Sana ka en a, Angela-i te Schoolah Santi hian hruai tur ania.. Eh, vawiin sawrkar chawlh a ni tak e. Chuvangin an la mu hlawm a ni zawk ang.

Pi Roomah ka lut a, a lo harh tawha, ka tung thoa. A hmai ka tihfai sak hnuah a eitur la turin ka kalsana, nimin lam a hlim bawka, a mood a la fuh tluang ta zel a. A chauh deuh viau ka rin nen, ka thawveng huai mai.

Dar 10 rik dawnah Pi Maduhi a rawn tho a, Saihminga erawh ka kal hma in a lo chhuak leh tawha. Saitluanga ka la hmu ta miah lo thung. A la tho lo ve tho pawh a ni mahna..

"Bd, ka be lawk duh che ania" Choka rawn luh pahin a rawn ti a. Dinning roomah a lut tlang phei a. Ka zui ve nghal vata, nizan lam ang bawk khan a chhan ka hriat si loh hlauhthawnna hian min rawn fana, ka thawpik nghal churh mai.

"Thu rawh" a ti a. A aw a dam thlap nangin thupek a ni tih hai rual a ni lo.

Amah ep lamah ka thu a, Na-i leh Santi in ei tur an rawh dah saka. "I ei tawh mi? Ei ve la" Pi Maduhi'n min ti a. Ka ei tawh thu in ka chhang vat.

Midang kal chhuah a nghaka, an chhuah fel veleh Choka leh Dinning room inkara puan zar chhah zet chu awm a pawt parh a. Thil tha lam sawi tur kan ni lo tih ka man thiam nghal ruak mai.

"Ka pi min enkawl saknaah ka lawm a, hetiang khawpa enkawl tha tu hi midang kan hmuh pawh ka ring tawh lo. Amah pawhin a ngaina tawh em em che tih ka hria.Kan inremna pawh hi a tawp hunah a thar zela ziah ka duh.Mahse, ka sawi duh chu Angela-i chungchang hi ania. Ka fanu a ni a, atana tha ber tur ka duh tih i hria ang. Nu leh pa te chuan chu chu kan duh dan vek a ni a. Chuvangin a nem zawnga lo thlem vel hi ka phal dawn lo. Duat a tul chuan keimah ngeiin ka duat mai ang. Tin, Santi hi ka awm loh lai pawha enkawl thei tura ka lak a ni a. Ka thu a awih ang bawka Santi thu a awih hi ka duh a. Nangmah hian enkawl thei la chu ka duh lutuk. Mahse nang chu ka pi enkawltu i ni a. I tan pawh a rem teh teuh lo a. Rilru dam takin ka pi chauh hi buaipui la ka duh ania" A ti ta dap dap. A awki han san chang emaw hniam chang pawh awm loin a mar pat hi a ni tawp. A sawi danah lah chuan huat theih tur a awm miah lo a, mahse a tawngkam chhuak tin mai chuan min khei zawk zawka. Tha taka min hrilh angin lang mah se min vau tih pawh ka hai chuang hek lo. Nizana Santi laka Angela-i ka chhan kha tunah a chhan letna ka hmu nghal tihna ania. Santi a che muang lem lo e.

"I hrethiam tiraw? " a ti leh a. Engmah sawi loin ka bu nghat ringawt. Sawi dawn pawh ni ila "aw" tih bak sawi tur ka hre chuang lo hrim hrim.

A thil ei tur a ei zui takah chuan a sawi zo tih ka hriaa. Ka tho tham thama, "Pi ka va en lawk ange. A damdawi ei a hun a" ka ti a.
"Um, va en rawh. Eee, hlawh kha vawiin lamah ka rawn thun dawn nia" ati leh a. Ka bu leh nghat ringawt.

Pi roomah ka lut a. Bible a lo chhiar mek a, a kum tam tawh ang ai hian Tarmit nen chuan lehkha a la chhiar thei phian a. Chhiar lah a chhiar peih zek bawk.

'I va nawm loh hmel ve" ka lut min hmuh chuan min lo ti a. A tarmit chhanah chuan chik zetin min en a.

"Nuam e... Ti nge? Ka hmel a dik lo mi? " Ka chhungril nguai lutuk thup nan zangkhai takin ka ti a.

"Dik vak lo. Paper ang maiin i var pap maia" a ti ve mai.

"Tunlai chu ka pum a nuam lo leh deuh thin a,

chuvang aniang" ka ti ta ngawt. Min chhan leh
hmain a phone a rawn ri a. Ka pan phei a, khum sir ami chu ka laa. A rawn call tu ka en a, Saitluanga a lo ni a.
"Tu nge ni? ' a lo ti ve vat.

'Saitluanga oh u Mama anih hi" ka ti bah nak mai. Ka pick sak a, amah ka pe zui nghal a..
A thawmhnaw suk tur vel ka en pahin an inbia chu ka ngaithla paha, tukin zingah a hnathawhna lamah a lo zuk chhuk leh tawh tih ka hre thei a. Nimin a ka zawh khan kartharah law law kha a ti sia. Tum dan mumal pawh a nei meuh lo chu anih ber hi a.. Huizzzz, eng nge maw ani tum dan chu keiin ka lo buaipui tur awm ni a?

Nilengin Angela-i ka hmu ta miah lo a. Pi Maduhi phone lei tura a chhuah pawhin a hruai lo a. A lo let leh hnuah pawh ka hmu hek lo. Santi ka zawt mai dawn mawni ka ti a, mahse ka zawt tih Pi Maduhi a hrilh lehnghal vek dawn tih ka chiang a. Zawh loh mai a finthlak zawk. Nimin lama thil ho tham te thlengah a thlavang an hauhsak nghal a, intithei hian ka ring lutuk.

Ka haw veleh ka inbual sawk sawka. Ka inbual zawhin ka phone ka khawih nghal a. Miss call a lo awm a, a number ka save loh avangin tu nge anih ka hre lo. Vawi thum lai min lo call hmana, ka rilruah Pi a lo lang vat. Ka call back a, a ring ral ral lai chuan ka lungphu a ri ve dup dup thung.

'Hello" Hmeichhe aw tliang ral hian a rawn ti a. Ka hriat hnu a ang a, mahse tu nge anih ka hre fuh chuang lo.

"Miss call a lo awm a. Tu nge ka biak ? "

"Angtei ka nia. Min hria em? " a rawn ti leh a. A insawi takah chuan mi ai kala ka inhlawh laia ka thawhpui, nurse la upa bik lo tak kha a ni tih ka hre nghal mai. Pi chungchang a ni lo tih ka hriat takah chuan ka thaw huai mai bawk a.

"Tehhlawl a. Ka phone ka tichhiaa, back up ka la tho chungin number a bo ta nuala. I number hi a bo tel alawm. A reng rengah i dam tha em?" ka ti ve nghal chul mai.  A dam that thu a rawn sawi ve a, kan inbe khat bawk nen kan ri ta hlut.

"Vawiinah ka sam ka khawihtir a. Kan kawmthlang nula U Mki leh a thiannu an lo kal ve bawka. A thiannu khan a pi enkawltu home nurse an neih thu vel a sawia. Bdi a tih khan i ni angem aw ka lo tia. Zawh phei chu ka zawt ta lem lo a" a rawn ti leh bawrh bawrh a. Mki tih chu khawiah emaw ka hre tawh tih ka hria... Nia, nimina lo kal ve Saitluanga bialnu kha Mki an ti tak e.

"A kalpuinu hmel awmdan vel han sawi la, mi inah chuan dam lo ka enkawl ngei maia. Ka lo ni maithei asin" ka ti a. Nui har har pahin a rawn sawi a. Pi Maduhi ngei anih hmel.

"Anih tak leh a tha nimai. Naktukah ka lo kal dawn alawm. Kan inhmu anga" a rawn ti leh a.

"Khawiah maw i kal dawn? " Ka ti deuh hu.

"Aww, i thawhnaah khan mawle. A fanu nizan khan bath tubah a chesual atia. In lamah tlawh turin min sawm a"  a ti leh a.

"Maw? A fanu a chesual maw? " ka au vak teuh lutuk.

"Um, a sawi dan ania. A pi enkawltu kha Health worker ania. Thiam chu a thiam lutuk a, mahse nurse pangngai ni reilote home visit ti thei a duh a. U Mki khan ka lo awm remchang sia min sawi hmuh nghal a" hlim takin a rawn ti leh bawrh bawrh a. Kei erawh ka ni deuh chhu a, Angela-i a chesual a tih lai khan ka chhungril  a luh ngut ngut mai.

"Engtin nge maw a chetsual le? Vawiin nilengin an inah ka awm a, tuman an sawi si lo a. Kan sawi a inang lo a ni lo maw? " Pangngai thei ang berin ka ti a.

"Ka hre chiang bik lo e... Birthday lawm na velah ka buai laiin room chhungah a lo lut a, bath tubah a lo inchiah a, bath tub a lian deuh bawk sia tui a lo hak nual hman a ti a" a ti leh a... Kei erawh ka khawng vek lo chauh. Pi Maduhi te roomah a tulna vangin vawi khat ka lut tawha. An bathroom chhungah pawh ka lut a, Angela-i tlak na tham khawpa Bath tub lian a awm lo.

Khumah ngawi rengin ka thu a. Engvanga chiai em em nge ka nih ka hre lo. Mahse, ka chhungril hian hlauhthawn a nei a. Chu pawh keima tan ni lo, Angela-i tan a ni bawk.


Note : Ka tar ta deuh a ni, thawnthu ziah hi harsa ka ti lehzual tawh🙊 ka ziak buai nuai zel hian ka hre tawh mai. Love lam ziak turin ka luangliam lo ve nasa bawk sir😃😆

Chuan, naktuk zan hi ka chawl maithei aw.