Bibi - 7

 Chapter -7

Buai nuaiin ka muhil a, ka muthilh chhunah pawh mang chhe rapthlak zet zet vangin ka muhil rei thei lo. Ka nuhrawn min tih hrehawmna, kum tamtak ka mangphan ngai tawh loh kha zanin zet chu ka mang zawm mawlh mawlh a ni ber. Khawvar hnaih lamah phei chuan maimizial hrehawm lutuk vangin ka muhil zui ngam tawh lo a. Bang nghengin ka thu tlaivar ta ringawt. 

"Ee, nang hi i dam lo em ni? " Chokaa eirawng ka lo bawl laiin Nutei zing thoin min rawn ti a. Tho tlai han tih em em tur ni thin lo mah ila tukin anga hma over-ah hi chuan ka tho khat ve em a, chutia min ti pawh chu awm tak a ni. 

"Dam e, ka tho hma ve mai mai. Thingpui ka siam nghal dawn che em? " ka ti a. 

"Siam rawh, ka in zawhah chawhmeh ka han lei lawk ang" a ti tha ve mai bawk a. 

Thingpui ka siamsak a, a tihfo danin a ar leh thlai te ho chanchin a sawi bawrh bawrh a. A thlai te ho tui an hak vanga an thih thu te a sawi a.Tiang lam hi nuam lo ka ti lem lo a, pangpar phei chu thawkkhat lai khan ka lo buaipui ve chiam tawha. Lei pawh ka lei nasa hmana.Mahse,tunah chuan ka buaipui hman tawh mang lo a. A hman deuh zawk Lawmi lah pangpar mawi ti miah lo ang chi kha a lo ni veleh bawk si. Thlai leh ran chauh buaipui thin Nutei hian a thlai leh ran bakah Pangpar pawh a buaipui ta vek. A thil sawi chu ka ngaithla liam vel mai maia, chhang hranpa loin ka thil tihlai ka tihzawm mawlh mawlh ringawt. Diktak chuan nizan ka mu tha lo lutuk khan ka lu a ti na fuk fuk a, ka mit a thip kham thum bawk. 

"I bawnghnute chhuan kha... A liam zo hman em? " thinrim deuhin a ti vaka. Rang zetin gas ka off a, mahse a liam hman teuh tho. A rawn kal hnaia, ka thil chhuan liam lam buaipui ta lo chuan hnai set sawtah min rawn en a.. "I tha tak tak maw? " a ti a. Ka dar ka ti sang zauh ringawt. A awmdan vel chu film chang te pawh kan ang hmel hi ka tia, ka nuih a tiza lek lek mai. 

"Tha hmel i pu lo tawp. Game i khel leh em ni? I mit chhiat tehreng nen, I lu a na leh mai tur asin" a ti ta hlur. Mize nuihzatthlak tak nei ngang hi ania. A ngaihdan ang ang hian a awki pawh a thlak kual nghal zung zung mai zel. 

"Khel nang... " ka ti liam puat. Ka thil chhuan liam lam tihfai tumin ka buaipui zui nghala. Lungawi lo deuha min melh reng chu ka melh zawk a, awmze nei lem loin ka nuih ringawt. 

"Ka chhuah laia i Patea a lo haw hman chuan damdawi kha lo pe ang che. A in tha peih reng reng lo maia" a ti leh a. Ka bu liam satliah leh mai. 

Eirawng ka bawl zawh veleh ka inbual sawk sawka. Ka inbual zawhah chaw tlem ka ei leh a.  Lawmi a kalchhuah dawn loh avangin a scooty ka ken sak a. Ka tlan chhuah hnu lawkah ruah hmi a rawn tla a, seat hnuaiah rain coat a dah ringin ka en a. A lo la awm lo zui.Pawi lo, thlen vat vat a, Angela-i school a kal em tih hriat vat ka duh. 

"Ruah a sur lo mi? Ee, i huh deuh tak alawm" Ka thlen in Pi Maduhi'n min lo ti nghal bawrh bawrh a. A mood a fuh hmel ngang mai. 

"Kawng chanve vel ka tlan atangin a rawn sur pek alawm. Rain coat ka lo keng bawk si lo a, ka ngei tak tak a ni'  ka ti ve a. Ka scarf in ka kawr huh deuh chu ka hru hul pah mawlh mawlh a, mahse ka hruk pahin Angela-i hmuh tumin ka hawikual paha, ka hmu lem hlei lo a. 

" Inti hul thuai thuai rawh. Tunlai chu hritlang khawsik a tam ania. Bawihtei pawh nimin atangin a hnap a rawn tui a, nizanah a khua a sik hluah maia. School pawh ka kaltir ta lo"  amah bawkin a rawn ti leh a. Ka ding khawng deuh lah mai. Niminah Angtei bulah  Bathtub a chesual angin a sawi tawha. Tunah khawsik a ti leh a. Eng nge maw a awmzia le? 

"Chuti law? A va zia lo ve. Tunah eng nge a an a? " ka ngaihtuah zia tilang lo turin ka insum hram hram a ni ber. 

"A khawsik a zia tawha. Mahse, a la mutui lutuk a. School a kal dawn lo bawka, mu nileng mai rawh se ka ti ta mai" nui chungin a ti a. Nu in a fa chungchang a sawi a, lo sawi ve chiam tur a awm lo bawka. "A khawsik a awm tawh loh chuan a lawmawm chu " tih bak sawi zui tur a awm lo. 

Pi inbual ni anih avangin ka bual a. Ka kal tirh lam kha chuan khawih hlek pawh a ngaithei lo a. Mahse, nitin inhmu ta chu ka bual pawh a duh zui ve ta mai bawka. Hna ka va zawm hma kha chuan a fanu Nu Saipuii leh a monu, Saikima nu hian an lo va bual thin a. Pi Maduhi a awm reng laia inhrang ami ten va bual kher chu a chenpuitu mo tan chuan huattheih tak tur ni mah se, Pi Maduhi a mil loh zia ka hriaa. Mak ka ti ve lem lo.Ani Pi Maduhi pawh hian huatah ala lem lo niawm tak a ni. A pi a ngaihsak em em a, mahse, Pi Roomah hian a lut mang mang lo a. Pi a biak lah hian Pi hian a hre lo der fo bawka. Tlin angreng hi ka ti zawk thin. 

Pi inbual ni hi chuan ka buai viau zel a. Che hleithei lo a ni chung hian inbual ni bawhpelh a duh ngai der lo zui a. Vawiin pawh khua a nuam lo nen inbual lo mai se ka duh a. Ka hrilh lah chuan a duh teuh si lo. "Tui lum on thuai thuai la, chaw hma lamah ka inbual anga. A pawina a awm lo" a ti bur mai. 

Hna chungchang kan inbiak hmasak ber khan Pi Maduhi khan a thluak lam a fel chiah lo ati a. Ka thawh tirh, Pi mizia ka man hma kha chuan a dik emaw ka ti hmana. Mahse, thla ka kal tlin dawn meuh chuan a hriatrengna fel lo a awm lo tih ka pawm thlap tawh. Thil a chik a, a hre rei em em a. A dilchhut em em bawk. A vin thut thut thinte, eng emaw changa a nguai leh viau thin te hi chu a mizia a ni ve mai. Nu sual ni pawhin ka hre lo, mahse thil a uluk lutuk hi chu ninawm chang a tam mai. Bed sheet chuar hlek angaithei lo a. Khum siam fel ringawt pawh a mood fuh loh ni chuan ka ti nawn ngun thin viau mai bawk. 

"I hahchhiau reng mai. Nang hi i hritlang dawn aniang. Damdawi ei thuai rawh" min ti a. A sawi dik, a khat tawkin ka hahchhiau a, Damdawi mum hnih ngawt ka ei tawh chungin ka lu na lah ziaawm lam a pan thei lo. 

"Ka damdawi bawmah khan nachhawkna a awm ang. Ei rawh, chuan vawiin chu i haw hma a tha ang. Haw la, mu hahdam rawh. I na vak palh ange" a ti leh charh charh a.

"Ka lu hi a rit ve deuh chu a ni. Vawiin ka lo kal tur lah ruah tlem ka rawn do hman bawk a" ka ti niah niaha. Ka hnar rawn za chu tihreh tumin ka nuai zui nawk nawka, mahse ka hahchhiau leh ta tho. 

Min tur sek avangin ka haw hma ta nge nge a. Angtei lo kal leh kal loh pawh ka hre ta miah lo. Angela-i pawh ka hmu lo nileng leh a. Pi Maduhi erawh Angela-i damloh vangin hna a kal lo tih ka hria a. Room lamah a awm ve deuh chawt aniang, ka kal tirh a ka hmuh bak ka hmu zui vak lo. Engtin nge Angela-i a awm hriat ka chak em em a, Na-i zawt mah ila engmah hriat belh tur a awm dawn lo tih ka chiang a. A hritlang khawsik ngei em tih chu Santi-in a hre ngei ngei dawna,mahse zawh chi a ni der si lo. Nizanah ka mut that loh phaha, hna kal vat vat ka duh kha ania. Mahse,  ka kal ta chenga, engmah thil dang pawh chu ka hriat belh leh der si lo. 

In ka thlen veleh ka mu nghal a, chawei tur pawhin ka tho chhuak peih ta lo. Ni 3 zet hritlang khawsik vangin ka mu hlawm ta reng. Nutei'n Pi Maduhi hnenah chawlh min va dilsaka. "A damchian var hunah lo kal rawhse. Helam chu ngaihtuah angai reng reng lo. Rilru nuam deuhin awm rawhse a ti  che a. A tawngkam a zangkhai haih maia. Mi fel tak a ni ngei ngei ang' a ti bawrh bawrha. Lawmi hnenah bak hian ka thawhna te chhungkaw chanchin hi ka sawi ngai lem lo a. Nutei nen pawh hian an vawikhat inbiakna a ni a. Nu tlang tih takah a fel a ring lehnghal thlap. Mahse, keipawh khan atir atangin fel hmel ka ti ve tho a. Ka ngainat vat pawh ka ring kha ania. Mahse, ka thawh tirh lai ang tho khan a hranpa takin kan inpawh tak viau na a la awm ta chuang lo a. A sualna sawi tur em em lah ka hre chuang hek lo. Tangkam huat theih si loh, eng emaw riaua mi han tih erawh a thiam zawng tak a ni a. Na han tih zui vang vang tura min tawngkhum tum pawh a awm zauh zauha. Mahse, han lak vung vak a, ban phah hial na tur chu a ni ngai lawi lo. 

Ka khawsik a awm loh hnuah ka khuh a reh fel ve mai thei lo a. Tb ka lo vei palh hlauin ka in test leh riha. Vanneihthlak takin ka lo Tb lo hlauh. Ka thawh harh peih loh chhung kha ni 3 chauh ni mah se rin aiin ka taksa a chau hman a. Dam lo zen zen ngai lo tih takah hritlang mai mai pawh hi ka tan chuan "mai mai" tih theih a ni thin lo. Hna pawh kar khat lai ka chawlhsan hnuah ka zawm leh ta chauh. 

"I lo kal thei tawh law? " Min hmuh veleh Nai'n a lo ti  vat a. 

"Um, hei vawiin atangin ka rawn kal leh thei dawn anih hi. In lo dam maw? " ka ti ve a. An that thu a sawi a, a tawng zawm mial mial a,mahse a thil tih engmah a thulh phah lo. 

"Pi-in angai tawp che asin. I lo kalna la rei loh nen nen, a sawi reng mai che a. A damdawi pek chungchangah mai mai pawh Bdi awm se a tha tur ania a ti ve ziaha" a ti leh nang nang a. Ka nui hak hak ringawt. 

Pi Roomah ka lut a, "Pi, ka lo kal a" ka ti lut a. Rang angreng fein a rawn hawi a. 

"Ah, nang elaw? I dam tawh em ni? " a ti nghal hliai mai. A khumah ka thu thlaa. 

"Dam tawh lutuk. I tha em nang zawk? ' ka ti ve nghal a. 

" Tha e, ka tha.. Mahse, I awm lo chu ka buai ve khawp mai. Nang chu thil i thiam zung zunga, kha nurse che muang zet kha chu ka duhzawng a ni lo khawp mai" thinrim hmel deuhin a ti a. Ka mengphawk nghal hra mai. 

"Duhawmi'n i awm loh chhung atan atia, hmeichhe pakhat a rawn kaltir a, a no nghial nghial khawp a. Phone a khawih reng ringawt maia. A kut lah chu a dam lo khawp mai si. Ni hnih a lo kal khan lo kal tawh suh ka tia. Mahse, Duhawmi khan a lo kal luihtir zel a. Mama ka zuk biaa, ban tir turin ka tia. Ani lah chuan Bdi awm loh chhung atan chauh alawm a ti deuh tlat a. Buaipui ka ngai ta reng mai bawk si a,  kan misualnu hian hrai te pawh min la hrai hlum duh mai ang. Hetiang reng renga nun chu nuam tihna pawh ka nei tawh lo" a ti zui leh chiam a. A sawi zo chu a hah bawk aniang a thaw hle hle mai. Nurse an lo la hman tih ka hre miah lo a. Ka rilruah Angtei a lo lang nghala, mahse pi sawi ang mizia kha pakhatmah a nei lo. Bakah, hna pangngai nei a ni a. Nileng leng chuan a kal bo thei lo hrim hrim. 

Tui ka intir a, ka intir zawh hnuah a hmai ka tihfai sak leh a. A eitur laksak turin ka kalsan a. Choka ka lut tur leh Saitluanga rawn chhuak tur kan intawk a,helamah a awm ka lo ring lo a. Kartawpah lo haw ziah mah se Thawhtan zing karah a kal lehnghal thin a. Vawiin pawh a chhuk daih tawh ka ring ania. 

"Ee, Bd.. I rawn kal peih tawh ni maw? " a ti hluai. 

"Um, vawiin chu hei ka rawn kal peih tan a. I chhuk dawn rih lo mi? " ka ti a. 

"Chhuk lovang. I dam chiang tawh tak tak maw? " a ti leh a. Min en chik leh lutuk a, ka zam deuh rum rum mai. 

"Dam tha chuan ka inhriaa. Ka na khat angrenga, hritlang pawh hi ka la vak zel maia" Nui chungin ka ti a. 

"Anih kha.. I hmelah pawh alang alawm. I la nawm vak loh phei chuan haw hma la, anih loh chuan ka pi hian angai angreng che a. A ching chau lutuk ang che" a ti duah. 

"Chau lo turah ngai ang. A ei tur kan siamsak lawk ange" ka ti a. A bu nghut a, ka luhna tur min kianin a tawlhsawn nghal a. Ka kal pelh paha a perfume rim rawn nam chuan ka hnar a verh zak maia. Perfume ngai na lo tihtakah ka ner nghal nak mai. 

Na-i a titi siam siama. Santi erawh chuan Angela-i schoolah a hruai tih a sawi a. 

"Engtik atangin nge Angela-i chu school a zawm leh a? A damlo rei em? " satliah hmel takin ka ti a. Ka damlo zui ta chiam khan Angela-i lam pawh min ngaihtuah tir hleithei ta lo kha ania. 

"Rei ve tho e. Vawiin atangin a kal tan chiaha" a ti a. 

"A hritlang bak kha natna dang a nei em? " ka ti leh a. 

"Nei lo aniang. Ka hre bik lo. Roomah a awm char chara, chaw pawh roomah alawm a ei thin. Apu Hminga pawh dawrah a kal mang lo. Inah a awm thin a, u Mama pawh zirtawp tlaiah khan a lo haw phah alawm" a ti duah. Saitluanga zawk hi a u a, a nau zawk hi a pu leh tlat lawia. 

"A va la na reuh tak. Damdawiinah an hruai mai lo anih chu le" a ti halh. 

"Ka hre bik lo e a" ngaihsam takin a ti leh mai. Nia, vawiin atangin school a kal leh thei tawh a.A dam tawh tihna animai. Ka lo hlauthawng ve vak kha thil tul lo tak pawh a ni ang. Keimah anga tih duhdah tuar anga ka ngai ve ngawt mai kha ka at vang mai mai aniang. 

Na-i lah hi kum 16 mi lek ala ni a, engmah hi han lak thutak leh rilru vei ren run a la nei lem lo a. Angela-i chungchang emaw kan thawhna chhungkua te chanchin pawh hi zawh thui viau tlak khawpin a vei lo a, a hre thui lo ve hrim hrim. A buaipui ber chu chhungkua leh Eizawnna lam ni loin Korean zaithiam leh film star ho hmelthat zia te, Khawthlang lam zaithiam Olivia Rodrigo hla thar " Drivers license" nalh zia tihte an la ni nawk mai. Ka dem lem lo,kei ngei pawh nasa taka Backstreet boys atchilh thintu kha ka ni tlat. Mahse, Na-i hi chu a kum phu loin a fel a, inchhung chetah phei chuan tha tak a ni. 

"E... I awm loh lai khan Pi Tezawki(Pi Maduhi a sawi dan) te chhung Nurse pakhat a lo kal thin a. Pi leh Angela-i kha a enkawl a. Ka ngei zia chu, min tih dan a ngeiawm thei tawp" a ti leh sa sa a. Ka beng a verh ta viau. Pi khan a sawi tho nangin Pi Maduhi chhungte tih a sawi lo a, Angela-i a enkawl tel tih pawh a sawi hek lo. Ka ngaihtuah naah Angtei a lo lang leh zawka. Ani chu a ni lo ang tih ka chiang ve tawp. 

"Pi khan min lo hrilh a" alangah erawh tha takin ka ti a. 

"Um, pi pawhin a ngaina lo. A vin nasa thin viau aniang. Pi Tezawki bulah khan a sawi a. Awi, ka hlauhthawn zia chu a. Chaw ei laiin Apu hnenah Pi Tezawki khan Bdi a lo kal loh rei chuan ani hi a nghetin la mai ila a tia. Mahse, apu khan inremna engkim inziak a, chutiang a theih loh atia. Pi Tezawki khan tihdan a awm ang a ti leh zel a. Mahse, Api khan a duh lo lutuk a. U Mama lo haw khan an ban nghal daih alawm. Awm dawn se chu keipawh ka chhuak daih duh mai thei " Lungawi lo fein a ti leh barh barh a. Sawi mai tur hre lo in ka thingpui chawh lai ka chawk kual ka chawk kual ringawt. Chawlh la satliah pawh ni lo, damlohna vanga chawl ka ni a. Ka kal loh chhung kha hlawh ka la dawn pawh a ni hek lo. Mahse, Min ban a lo duh ru nghal tihna ania. Ka thawhhlim a ngainat mai ka inrinna kha ka ring lo tial tial ta mai. 

Na-i'n nurse lo kal a ngei zia a sawi zui siam siama. Sawipui ve lem loin pi eitur ka siam pahin ka ngaithla a. Chuti taka han ngei mai chu tlem chuan mak ka ti ve deuh. 

"Ka thawmhnaw dahna bawm chung berah khian ka kawr lum a awm a. Min han lak teh a" Pi-in a ti a. 

A san deuh avangin Side table ka dawh a. Ka lawnkang a. A thawmhnaw inrem tlar put chu a duh ber zawtin ka kawk lawr dan dan a. A  hnung lamah an thleh hnan anih ringin a hmalama awm ho ka la chhuaka. Ka ke lehlamin Chhuar tlang ka rap a. Lehlam ka khai kang titih a. A kawr duh lah chu ka hmu ta lawk lo a, Ka ke a kham deuh tawh bawk nen Side table zuk rah ka tum a. Ka rap pial ta tlat. Ka rak thawt a, pi a te ve thawt bawk. Chhuat a tla sawp thla hnawk tura ka inngaih laiin tu emaw ka zuk delh a, ka kawngah a rawn kuah a, min kuah nghet ngang mai. A hmel hmu thei lo mah ila a perfume rim na zetah chuan Saitluanga a ni tih ka hre thei nghal a. Englaiin nge a lo luh hman ka hre lo.. 

"I him e" ka beng bulah  ti sup a. A tawng zawnga ka beng a rawn thawkkhum lum deuh chuan mak deuhin min fan raih raih mai. 

"Dahthla ta che Mama, a hlauh dawn tehreng nen. Khatiangin pawm kang reng mah ta che" Pi-in a rawn ti a. Zawi tein Saitluanga a nui hak a. Zak bawk si, tihngaihna hre bawk si loin ka nui ve tawp. 

Dar 5 rik dawnah Pi Maduhi'n min rawn call a. "Bd, vawiin ka nu birthday ania. Chaw kan ei nghal dawn a. U Mama hi zingah khan ka hrilh tawh tho a, ka pi zawk kha ka hrilh lo a. Tunah ka rawn call dawna, a tlang thei bawk si lo a. Lo hrilh mai ta che" min rawn ti a. Angela-i leh Santi pawh an awm tlang ve nghal tih a rawn sawi zawm mawlh mawlh a. " U Mama kha a awm tho in ka ring a. Lo haw San mai rawh aw. A pawi lo" a rawn ti leh a. 

Pi hnenah ka hrilh a.. "Nidang zawng zawngah pawh min hrilh ngai hleinem. Eng nge tunah rawn inlak fel vel a tulna ka hre lo. Mama rilru hmin tumna mai mai" a ti deuh nek a. Saitluanga lam a sawi daih chu mak ka ti nangin ka zawt lem lo. Vawiin chhun a ka che chhe lutuk kha ka la zak tluang zel hi a ni ringawt. 

Ka haw San a, ka haw hmain Saitluanga ka hmu tawh lo a. Pawi pawh ka ti lo, ka lai laklawh vek. 

Mu chungin phone ka khawih paha, Movie en tur ka zawn kual laiin Angtei'n min rawn call a. Call ka tum kha ania, ka lo theihnghilh leh hman pek. 

"Aw, Angte... " Hello han tih mawi vel pawh awm loin ka ti a. 

"Kan va inbe khat thin ve. I buai em? " a rawn ti ve thung.

"Buai lo e. Biak che ka lo tum lai tak ania. I lo kal tur ni i sawi kha i lo kal ta em? Khami ni kha ka buai lutuk a. A tuk atangin ka damlo zui leh a" ka ti a. 

"Kal e.. Awi, chu chu alawm biak che ka lo tum.. Ee, i dam tha tawh em tunah? I eng nge na? "

"Ka hritlang mawle. Ka la na khawpa. Mahse, vawiin atangin hna ka zawm leh thei tawh e" 

"A nih tak chu a.. Lo dam zel teh.... Enteh, ka inngaihtuah nasa tawp a. Mahse ka hrilh che hi tha in ka hria a. Kal tura min tih ni khan ka lo kal a. Awi... " a ti hapa. A chawl leh riha, kei erawh a sawi zawmna hre chakin thawk pawh ka thaw tha ngam lo. 

"An naute kha Bath-tub a chesual tisi khan a taksa kha a duk nasa lutuk a. A khawsik a sang bawk si. Khawih hlek khan hlauh nei tih hriat lutuk hian a phu zawk zawk zela. Awi, Bd.. a awmdan kha a dik thei lo. Kut a tuar niin ka hria" mangan naa khat hian a rawn ti a. Keipawh ka thaw a tawp dawn nimaiin ka inhre bawk. 

"Mahse, engmah ka sawi chuang lo a. Damdawi te ka pe a. Chuan, ka haw dawn khan home nurse in chhawr hi ka thiannu niin ka hria a. Nichin khan ka hmu thawi thuak a ka tia. U Maduhi khan i nawmsam loh vangin i haw tawh a tia. Ih e, zanah khan min lo call a. An naute kha a khawsik a san deuh avangin Damdawiin lamah an kal a,an awm rih dawn avangin ka kal nawn angai lo tih min rawn hrilh a" a rawn ti leh a.

Sawi tur tamtak ka hriaa. Mahse, eng nge sawi hmasak ber tur ka hre lo.. Ka hriat chian em em chu Angtei thil rawn sawi leh vawiin lama Angela-i chungchang ka hriat kha  a inmil lo vel vek. 

Note : Ka tlai deuh nangin zanin chu ziak thui ka inti ve lutuk😃