Bibi - 9

 Chapter - 9

Ngawirengin a kut ka vawnna chu a en a. Rang zetin ka la sawn nghal vat mai. 

"Eng nge Angela-i chungchang hriat i neih ve a? " a ti vawt ruih. 

"Ka hre lo... Mahse, ka hria" awmze nei miah lo in ka ti bah nawk ringawt. Angtei hmuh dan bak kha eng mah han sawi chhawn tur ka hre lo a. Pi Maduhi'n a tiduhdah ti ngawt dawn ila a tihduhdah dan sawi tur ka mit ngeia ka hmuh a awm miah bawk si lo. Mahse, eng emaw tal chu ka sawi angai. 

"I hre lova mah se i hria" nuihza aw hian a ti nawn sup. 

"Aw... Ka mit ngeiin hmu lo mah ila ka hria.. A nun hi naupang dang nun dan nen a inang lo" Uar deuhin ka ti a. 

"Fa i nei tawh em? " 

"Maw? " a zawhna mak ti lutukin ka ti a. Ka melh reng bawk. 

"Fa i nei tawh em ka ti" tha tak-in a tinawn leh a.  Tawng loin ka lu ka thing ringawt. Ka beisei loh tak-in a nui leh suk a. 

"An sawi thin kha i lo hre ve em? Pasal la nei lo hian pasal enkawl an thiam ber a. Nupui la nei lo pawh hian nupui enkawl an thiam ber. Chutiang zelin fa la nei lo hian fa enkawl an thiam ber" a ti duah. Eng emaw sawi tumin ka ang ziaua, mahse a sawi awmzia ka hriat takah chuan ka chip ta hmak. He mihring hian Angela-i chungchang ka sawi kha a awih miah lo tih na ania. Fa la nei si loin tul loah an fanu enkawl dan ka lo sawi ve chu a nuih a za tihna a ni. 

"I hriat tur chu Angela-i hi naupang dang ang a ni lo a. A landan derdep tak phenah hian rilru lian deuh mai a nei reuh a. Chuvangin khauh taka enkawl ngai a ni ve tlat a. I hriatthiam dan tur chuan tun lawka a tawngkam hman ang kha naupang dang chuan an hmang lovang" mahni inrintawk hmel zetin a ti leh nghut. 

"Khatianga naupang a tawng anih chuan hrilhtu an awm a nimai" rang mangkhengin ka ti ve thung. A mitko hmul a ti sang zauh a. 

"A dik.. I lo kal tirh atang khan a ngaina riau che a.. Ni lo, chhuanlam atan hman che a duh a. Chuvangin a nuin a sawi thaih anih kha" a ti ta daih. Ka va han awih lo ber tak. 

"Chutiang a ni lo. Chhuanlam phei chu ani kum angah hian ngaihtuah nachang ala hre lo vang" Ka ti tawk mai. Angaihtuah dan mak lutuk chu ka haw hlur tawh bawk. 

"A la naupang a, mahse a chhungril hi i hrethiam lovang ka tih kha.Lehkhazir tura tih pawhin i bula kal a duh fo a. Engpawhnise tawngkam fimkhur turin a nu ka lo hrilh ang" a ti awlsam leh mai. 

"Ni lo... Chutiang a ni lo. Ama thiam loh a ni lo a,ka bula lo kal a lo duh anih pawhin chhuanlam a ni tihna a ni lo ang. Bakah, a thilsawi kha tawngkam fimkhur loh vang pawh a ni lo ang" ka ti leh vat. A thle deuh a, chik zetin min en a. Ka thil han sawi dan leh kan inbiak dan hrim hrimah chuan innel tak kan ang hle tih ka ngaihtuah chhuak thut a. Amah lahin tha takin min titi pui ve mai bawk si. Ka zak leh hnuhnawh a, mahse hetianga ka ti anih si loh chuan sawichhuahna hun ka nei lo kumkhua thei tlat. 

"Anih chuan kan enkawl dan a dik lo tih sawi i tumna a ni em? " awki pangngai thlup hian a ti leh a. A sawi danah chuan thinrimna leh ka sawi loh tur ka sawi anga alan loh avangin ka ngampa leh sawt mai. 

"Aih,chutiang sawi thei ka ni lo. Ka sawi tum zawk chu amah hi englaipawhin a ti dek reng a. Tihsual neih hlau ngawih ngawih ang mai ania. Chuan, Ka pi Birthday lawm zan khan a nu phone a tichhiaa. Nang pawn i hriat kha. A tuk atangin a dam lo a. Ka bulah khan hritlang khawsik tiin an sawia. Mahse, ka thiannu pakhat bulah chuan Pi Maduhi hian bath-tubah a lo inchiah rei lutuka, a chesual tiin a lo sawi a. Ka thiannu chu Nurse ania...Hruai chhuah ai chuan in lama tlawh turin Pi Maduhi khan a lo sawm a, a lo kal khan a... " ka sawi zawh hmain  Santi a rawn lang hlawl mai. Kawngka bulah a dinga,ka va melh a. Min la en duh der lo zui. Sawi zawm lehna chi ni tawh hek lo ka ding ngawi ta reng. Kan lo indin hnaih bawk si chu mak pawh a ti viau mahna. Ka sawi kha a rawn hre hman em pawh ka hre lo. Pawi nek lo e a. He nu hian min mil lo ang bawkin keipawh hian ka mil tak tak bik tawp lo e. 

"U Mam, u Mki a lo thleng chiaha" a rawn ti a. 

"Um, min lo nghak lawk rawhse. Ka rei lo ang" hawi pawh hawi let chuang loin a ti awlsam mai. 

Ngawirengin ka insuk dahkhawm la turin ka dahna lam ka pan phei a. Bal bawm ka chawi kanga,inhnuai lam pan tumin ka inher a.Mahse, Saitluanga ka hmaah tak a rawn ding nghal chut. Santi kha a zui thla ve nghal emaw tih nak laiin.. Ka thilsawi zawh hman loh kha sawi zo turin min ti dawn anih ka ring thut a. Ka lawm ru ngang mai. 

"Ka thiannu a lo kal chuan... " ka ti chhuak nghal a, mahse min rawn tawng hnan hmiah. 

"Angela-i i lo ngaihven tih ka hriaa. A lawmawm, angaina reuh viau bawk che a. Um..ka pi pawhin angaina em em bawk che a. Chuan, ka pawi i sawi lo viau bawka" a ti a. A sawi zawh rualin a nui suk a. Kei erawh ka beisei loh lam daih a rawn sawi avangin ka hnual rawih thung. Mahse, ka sawi zawm leh awm tho em mai. 

"Ka thiannu a lo kal chuan Angela-i kha a khua a lo sika.. " ka hmuiah a kut zungtang a rawn dah nghal zat a. Ka meng zau kawk ringawt. Sawi zawm tir min tum miah lo tih ka hre thiam ta. 

"A tawk e... Ka pi tha tak-in min enkawlsak a. A dang chu midangin an buaipui thei ania. I lo ngaituaha, lawm pawh ka lawm ka tih kha. Hahdam deuhin awm la, mamawh i neih chuan min hrilh zel rawh. Vawiin-ah helama ka awm nghehna tur thupek achhuak tawha. Ka awm tam ve tawh dawn tihna anih chu" a tihzawm leh daih. A kut a lasawn a, ka bal bawm ken lai min rawn laksak thut a, engmah sawi tawh loin inhnuai lam panna kawngkhar lamah a kal zui nghala. Chhuk ve nghal tumna pawh ka nei lo. Chet pawh che sawn loin kawngkhar lam ka melh tlawk tlawk ringawt. Tun lawka thil thleng kha a mak nei nuai lutuka, rilru fim pawh ka hmang hleithei lo. Ka hmui a rawn khawihna lah chu a laksawn hnuah pawh ka chhungril thlengin a hre vang vang lehnghal a. 

Minute 10 vel ka din ren rawn hnuah inhnuaiah ka chhuk thla a. Na-i chauh a lo awm a. Insuk a lo thlep fel mek a, Min hmuh veleh "I nuam deuh em? " a lo ti vat a. Ka hawi bo hu mai. 

"U Mama khan insuk seng sa hi a rawn keng thla a. I nuam vak lo a, inchungah i awm rih dawn a tia" a ti leh takah chuan ka hre thiam nghal kuar. Insuk a kenthlak vang khan ka dam tha lo angin a lo sawi tihna anih chu. Nia, a pi damlo enkawl tu ka ni a. Ka thil tih min pui tu nih kha a duh lo animai. Chu pawh a bialnu in a lo nghah reng lai lehnghal.

"Ka zia alawm. Chutianga nuam lo pawh ka ni hleinem" ka ti a. Ka thleh fel pui ve nghal a. A dan pangngaiin a titi siam siama. Ka ngaithla liam vel mai mai thung.

"Bd, naktuk zan chu rawn riak thei la ka ti mang e" piin ka haw tur insiam laiin a ti a. 

"Maw? I nuam lo deuh em ni? Nge midang an zin leh dawn? " ka ti a. 

"Mama helamah an rawn sawna. Naktukah intifel turin a chhuk dawn a. Duhawmi te nupa hi an kal ve dawnin ka hriaa. Lo haw lehnghal tum ang chuan an awm tho nangin an haw leh pawh ka ring lo a. Min rawn riahpui lawk mai la ka duh a" a ti siam siam a. Chawhma lam a chiau hiar hle a, a chhun mu a thawh leh hnuah erawh a zia a dang leh daih a. Engmah han sawi nawi pawh nei loin a ngawi leh mai mai tawh. 

"Ka chhungte ka lo bia anga. A tul chuan ka riak thei alawm" ka ti a. Naupang an thil duhzawng tak kan pe ang mai hian lawm tih hriat tak-in a nui nghal var var mai. 

Chawei laiin ka chhungte bulah ka sawia. "Riak turin in inbe hleinem maw.." Nutei'n a ti a. Mahse, Patea erawh chuan "Riak turin an ti ziah che pawh a ni lo a. Tulna vanga riah zawk zawk te chu i peih phawt chuan pawi tihna tur a awm hleinem" a ti ve thung a. Nutei pawn a sawi nawi zui lem lo. 

"Khawnge lehkhabu chu? " Ka room a rawn luh

 pahin Lawmi'n a rawn ti a. Ka lehkhbu dahna

 ka kawk a, a pan phei nghal a. 

"Ehe, hei hi ka duh" a ti nghal hluai. 

"Angai lo. I ti bo leh ang" ka ti ve thung.

"Bo awm lo e.. E, Saitluanga chu helamah an rawn sawn tihna mi? " a ti leh a. 

"Um" ka ti ringawt. 

"A that chu.. "

"Eng maw tha? " Angaihna hre loin ka ti ringawt. 

"Aizawl a awm tur mawle. Achang hi chuan i Pi Maduhi vang hian i ban mai ka lo ring thin che alawm" a ti leh daih. 

"Ah... Engtin minti pawh ni hlei lo" ka ti liam puat. 

"A hmain a tawngkhum tawh che kha" Rang zetin a ti a. 

"Awww,tawngkhum te chu tawngkhum e. Mahse, dawt pawh a sawi chuang lo a" ka ti ve a. Pi Maduhi ka tan vang lam pawh ni loin, a mize ngeiawm lutuk sawi zel chuan min ngaihtuah lutuk ka hlauh vang a ni mah zawk. 

"Engpawhnise, a tawngkhum nawn leh che emaw tawngkhum nawn lo che emaw, ngeiawm tak-in a tih leh tih loh che lam ni loin a mizia hi mi phakar awmdan niin ka hria. Chu chu ka ei lo" a ti leh duah. 

"A phakar kher nang" ka ti leh talh. 

"Aaaaa,engvanga han tan vei ngar ngar nge maw i nih le a? Midang bulah sawi duh lo mah la keichu i unaunu ka nih hi. Bakah, nu Biaksangi sawi dan atangin ka ei lo bur" a ti leh zat zat mai. 

"Nu Biaksangi a lo leng ami? "

"Leng nang...A pasal u fa mahni fa anga a enkawl thei erawh a fakawm. Mahse, hei pawh a pasal u bialnu kha ama thiannu anih vang mai mai pawh a ni thei" " a ti leh a..Engtin nge maw chung te a lo hriat leh hman tak ni?? Mahse, engmah sawi loin ka hmui ka pet a. Angela-i chungchang ka ngaihtuah paha. Lawmi hi hrilh ila tihdan a hre mai thei... 

"Thil ka hrilh ang che" ka ti deuh hluaia. Ka kaltirh atanga Angela-i awmdan ka hriat ang ang leh vawiin lama Saitluanga bula ka sawi dan thlengin ka hrilh fai ta vek. 

"Saitluanga chu ka rin aiin a fel" ka sawi zawhin a ti a. A thil lo ngaihtuah daih dan chu makti fein ka melh vak. 

"An chhungkaw chungchang a inrawlh lo turin a ti miah lo che a. Ti fawk che pawh nise a demawm miah loh ania" A ti leh a. Ka ngaihtuah let a, a sawi dik ka ti ve tho mai. Kan hnathawktu pakhat,rei pawh kan la chhawr loh hnen atangin kan chhungkaw chungchang  sawiselna hre ta ila ka duh kher lo ang. 

"Angela-i  chu uluk deuhin i ngaihven angai dawn anih chu.A lainatawm reuh bawk si. Mahse, fimkhur viau rawh. Hna i chan der thei ania" a ti leh a. 

"Hna chan ka hlau hleinem. Chu ai chuan keimah ang maia naupangin nun a hmang tur kha ka hlau zawk" ka ti hmak. 

"Hey, ka sawi tum i man lo. Fimkhur taka i ngaihven loh chuan naupang khawngaihthlak deuh i chhanchhuahna kawng tur a tawp daih thei ka tihna zawk" nui chungin a ti a. Ka kut ka elh nauh nauh a.

"Beiseina tlem ka neih ve-na Saitluanga lah a ngaihdan a mak sia. Ka beidawng mah zawk" ka ti hap mai. 

"Beidawng lo e. I hriat lai khan a ngaihdan tak a sawi lo thei ania... Aaa, ninawm.. In ingaizawng har si" a tih zawm leh daih. Ngei zetin ka en a, "Eng nge? " tih pahin a nui pawt pawt duh lek. 

Ka muhil mai thei lo. Ka phone ka khawih a, You-tubeah AGT ka en a, ka en laiin whatsApp msg a lo thleng a. Noti atangin ka en a, number ka save loh atangin a ni a. "Ka pi i riahpui theih dawn vangin ka lawm e aw" tih hi a lo ni a. Pi Maduhi number leh Pi number ka nei a. Pi Maduhi number chu a ni lo. Tu nge anih en tumin a msg ka open a. Amah ka en a, ka rin loh deuhin Saitluanga a lo ni teh tlat  !! 

Msg han reply mai dan tur ka hriat loh avangin ka reply ta lo. Phone ka daha, muthilh tumin ka mit ka chhing a. Ka mit ka chhin rualin ka ngaihtuah naah Angela-i leh Saitluanga an lo lang a. Vawiin a Angela-i tawngkam kha ka ngaihtuah chhuah leh zawng pawhin ka la tim ru ur ur thei. Naupang bula khatiang han zirtir kha a dik thei hlawl lo. Saitluanga sawi anga mize danglam bik nei pawh nise ka pawm dam thei lo. Saitluanga lah hi ka ngaihtuah dan ka duh lo.. Ka kal rei ang zelin an chhungkaw mimal tin mizia ka hrechiang ve hret hret a. Saitluanga mize tlang leh khauh hrek hrawk tak mai hian min hip tih ka inhai miah lo.A fa a hlamchhiahna hian min hip lutuk tur a dal mai zawk. Tun hnaiah min ngaihven mah mah niin ka hre bawka. Lawmi sawi ang khan an chhungkaw chungchang ka lo sawi kha min khak miah lo a. Ani ang mize induhtawk leh chhungkaw venhim thupui lutuk khan engvangin nge a huat miah loh? Tunah lah a pi ka riahpui dawn vangin lawmthu min lo hrilh leh a..Akhai, polite tak-in lawmthu a lo sawi animai. Chhunah pawh khan a ngaihdan ni lo kha sawifiah kher a duh lo tihna aniang.Thil danglam teh vak a ni lo. A mizia ka duhzawng anih vangin engkim hi ka ngaihbel mai mai zawk aniang.. Ka hmui ka khawiha, a kut zungtanga ka hmui a rawn khawihna kha ka feel nawn leh thei in ka inhre tlat pek.. Keihi tleirawl star nei ang maiin ka awm vel chu anih hi a..... Zahthlak zawk lutuk mai. 

Pi Te-in ka thlen in an lo chhuak vek tawha. Ka rin ang ngeiin Angela-i leh Santi an hruai a.Pi Maduhi hi Lecturer a ni a, zirna ngaipawimawh awm tak si hian Angela-i school chawlhtir mai mai a hreh tlat lo. 

"Bd, Mama khan a rawn bia che em? " Pi-in min ti a. 

"Aih... Aw, be leh si" a msg ka hmu tih ka hrechhuak leh lawi a. 

"A that chu. Nizanah ka phone atangin i number a lak nuap nuap kha. I unaupa nen an lo inhria a, ani kha a be tlang thei lo te a ti in ka hria" a ti leh a. Angaihna ka hre lo.. A msg-ah khan Rohmingsanga a sawi miah si lo. . 

"Ka zawt ang che ka ti thin a. Ka lo theihnghilh leh thin a, i nu boral hnuah i pa in nupui a nei leh em ni? " a ti a. Ka rin loh lam daih min zawh avangin ka hamhaih angreng viaua. Mahse, ka inngaihtuah fim lehnghal vat tho.

"Um, nei leh e' zangkhai thei ang berin ka ti a. Mahse, ka mitthlaah chuan ka nu-hrawn, sahdah hmuam pawng purh chunga min melh kuau thin tu a lo lang zawk tho.

" An bulah i awm lo hrim hrim em ni? " a ti leh a. 

"Kum 2 vel ka awm" ka ti leh ringawt. 

"Kan duhthlan ni lo mah se fahrah nun hi tuman kan duh lo thei ngawt si lo a. Kei nu tel lo a seilian ka nia. Ka tute pahnih hi nu leh pa tel lo an ni leh a. Tunah Angela-i a ni leh a. Kei chu fahrah nun ka paltlang rapthlak em a.Hman lai nu-hrawn chu an sual khawpa. Nang  chu tunlai mi i nia. Tunlaiah nu-hrawn an sual duh tawh lo a. Mahse, kan Angela-i hi chu a nuamsa lo tawp maia,a awmdan ka man thiam vek asin" a ti leh charh charh a. Ka thaw hak mai. Keimah ang bawk a fahrah nun temtu a lo ni ve a. Chu bakah nu-hrawn a hrawn hrehawm ve em em lehzel a lo nih chu. 

"Ka vannei vak bik lo.. " Tih pahin za miah lo in ka nui a. 

"Chuti a ni maw. Mi an finga, an sual duh tawh lo ka lo ti asin. Mahse e... Duhawmi ka huat em em chhan hi eng dang a ni lo. Lala-i a enkawl dan vang hi a ni ber a. Hmangaih hlek si lo hian Mama rilru hneh nan nu tha ber lem achang hi ka duh lo ber. Ka chet that theih lai chuan a enkawl ka phal lo a. Mahse, kum 1aia tam mah chu damloh nain min tlakbuaka, tunah phei chuan ka che thei ta si lo a... " a ti zuai raiha. A aw-ah chuan pawi a tihzia alang chiang em em bawk. 

"A enkawl tha ka lo ti asin" A rilru tih nawm nan ka ti a. 

"Eng eng emawah chuan enkawl tha ve ang. Mahse, a hmangaih lo hi a pawi ber" a ti leh hmiah. 

"Hmangaih lo tu tan chuan mi fa,tumah sawisel tu awm bawk si lo chu an that duh chhuanlam pahin nasa taka control a awl alawm. Kha khan naupang tha tura zirtir na a kawk lo" amah bawkin a ti leh a. Engvangin nge Saitluanga hian a pawm loh tih ka zawt hman thelha, mahse ka zawh hmain a rawn sawi zawm leh a. 

"Mama hi mi rilru khauh ania. Angela-i nu lah hmeichhe awm hle hle lo chi a lo ni lehzela. A fa hi a rawn dah tawpa, amah hi khawiah nge a thang bo pawh kan hriat zui loh laiin a ruang an chhar ta maia" ati leh a. Rapthlak ti lutukin ka ip chawih mai. A ruang an chhar dan vel a sawi zuia. Saitluanga Nu u fanu a lo ni a. An chhungkaw inzawmna kehchhiat dan te a sawi zui zel a. Ngaihnawm ti em em in ka ngaithla a, a hma aia nasa zawkin Angela-i ka lainat belh leh ta bawk.

Zanah Pi Room chhung a thutthlengah ka mu a.  Ka muhil tui lai eng emaw thawm avangin ka harh a, che lo in ka ngaithla a, pen ri niin ka hriaa.Mahse,ka ngaihthlak chian deuh chuan a reh leh ta daih lawi.. Na-i a tho anih ka ring a, ka tui a hal bawk nen ka tho a. Light engmah in On a awm lo a. Mahse, veranda light eng avangin a hmuh theih deuh tho. Choka lam ka pan pheia,.Mahse,ka mitsirin kawngkharpui inhawng chu ka va hmu a. Na-i a chhuak anih ka ring a, mahse Na-i room kawngkhar a rawn inhawng a, a rawn dak a. Eng nge a awmzia ni ta? Pathum chauh kan awm a, Nichina pen thawm leh kawngkhar hawngtu  hi tu nge? 

"Pawnah i chhuak ami? " ka ti nghal tawng. 

"Aih, pen thawm ka hriaa. Nangmah emaw ka tia" 

"Ka ni lo... " ka ti a. Ka sawi zawh rualin ka bul  a rawn thleng hman der. Room chhung eng lo angreng tak atang chuan a hmel chu a hmuh theih tho a, a hlau tih hai rual a ni lo. Inchung lam ka hawichho a, a thim vek. Misual lo lut hi a chhuak tawh a ni ngei ang. Pawn lamah chuan pen thawm a rawn awm leh a, inchhungah midang an tawm ru em tih lam ka ngaihtuah hman tawh lo. 

"Kawngka bul atang sawn ka va en anga.  Nangin Pi Maduhi biak lo tum la, midang lo kal tir tur in lo hrilh la" Na-i bulah ka ti se se a. 

"Ka kalsawn ngam tawh lo.. " a ti ta tlat. A aw a khur nasa em em zui a. 

Engtin nge ka tih ang tih ka ngaihtuah a, light on ta thut ila kan him lo zawk angem? Phone va la ila ka be thawm a hria angem? Pawn lam ka va en leh a, verandaa mi pakhat ding chu a hlinthla ka va hmu a. Ka hawikuala, kawngkar bula pangpar khawina an hun, hlum atanga siam sei zet mai chuan ka mit a la ta chat. Pi Maduhi'n pangpar khawi sa a paih a, a thar dah leh a tum a, ala dah hman loh avangin a ruak hlauh mai lehnghal.. 

Kawngkhar bulah ka dinga,pawn lam a awm chu ka va bih a, ka hmu pha lo. Dak chhuak thui deuh thei ila chu hmu thei tur ka nia. Lu va rawlhchhuah chuan min lo hmu ngei dawn si..Bang si thlapin ka ding ngil at a, Pangpar khawina chu a rek laiah nghet lutukin ka chelh bawka. Pen thawm lo hnai zel chu ka ngaithla kar a, inchhung rawn luh leh ngei a tum tih achiang. Hlau hman leh hlau thei pawh ka ni tawh lo, anih nih kan nih mai angai. Mahse, ka lungphu -in ngai a awh ve lo..A ri dut dut hian ka hre maia, Na-i pawhin a hre phak  hialin ka ring. 

Kawngkhar a rawn inhawng zau a, a rawn pen lut chiah chu ka theih tawp a nain a rem laiah ka hlap nghal pawp a, ka vuak pa lah chu a rum kawk  bawk. 

"Na-i, light on rawh " ka ti tuar a. Na-i'n a hmeh rik rualin a rawn eng nghal pup a. Mahse, ka piah deuha Saitluanga pum dawm chunga a lo ding ka hmuh takah chuan ka nghing deuh lawih mai. 

"Nang maw? " ka ti hul hak a. 

"Aw, keimah" a ti bung ve vut ringawt. 

Note : A changtupa leh changtunu hi an inngaizawng hleithei lo😝 manganthlak ka ti tawh tawp🙈