Bibi - 18

 Chapter - 18

"Ka nem mah mah em tih ka ngaihtuah a, ka thinrim viau a, mahse khatia a sawifiah kha chuan mak deuh hian ka awih leh thlap a" Lawmi, ka titi uluk taka ngaithla tu hnenah chuan ka ti a. Ka sawi zawh rualin a ner nghal nak mai. 

'Nem mah mah lam pawh anih loh chu a. A insawfiah a, chu pawh dawt sawi mam tum a ni lo a. Maduhi ker kawr khan a neih tur hming nen lam sawi se chu thuhran ania. Chutiang a sawi lo hrim hrim i tia. Inlak luhlul vel vanga a sawifiahna lo pawm loh vel kha tul ka ti ve miah lo. Inhauh chang a awm hian a hlimawm ve thina, mahse buai reng chu a ninawm duh ania" Duhthawh zetin ati nghal bawrh bawrh. 

"A sawi dan velah khan a hlim bawk sia, rinhlelh loh a har zia chu a" ka ti nghat. 

"Ka hre thiam alawm. Kei ni ila Papuia hi ka lip nghal duh mai thei" nui kar kar pah hian a ti a. 

"I lip lo ange a. Aia naupang ngaizawng ve si i ngam lo nasa sia e" ka ti ve vat. 

"Mipa hi ngam an har zia mai chu a. Kan control viau emaw pawh hi ti ila an duhloh zawnga tihluih ngar ngar chu a lo nuam miah lo a. Hreh deuh hian an thu awihchin kan nei leh nge nge zel" a ti leh zat zat. Chhang loin ka thiltih lai ka tihzawm a,dawr a ka thawh laia ka thawhpui nuthlawi pakhat thusawi ka hre chhuak zawk. "Nuthlawi leh nula senior kan nih vang hian tlema hmel puak deuh leh naupang fe zawk nen han inzui hian kan bum emaw hi an ti ngawt a. A then phei chuan sex hian kan pawtbet angah an ngaia, sum pe anga min ngai tawk lah bo lo. A teuh hian a hnai lo, lo ti tawk chu awm pawh nise a tam zawk hian kan ti lo chiang bal. An naupan vanga kan duh loh, kan hnar fe hnuah pawh rawn inbarh lut lui tlat zawk hi an tam ania" a ti a. A sawi lai khan ka "aw" liam vel mai mai nangin thil nihdan tak a ni tih hi ka pawm ta viau. 

"Hey... Ka nu hian enge Papuia hi a duh loh tlat chhan ni ang? Ka ning tlat" a ti leh a. 

"Ka hre bik lo. Mahse, midangah khan a sawisel ngai miah lo che a. Chutiang zawng chuan ngaihtuah la" 

"Ka ngaihtuah alawm. A that lohna pakhatmah ka hre lo. A naupang tihmai ania" a ti leh hap.

"A naupan zawk vangin a duh lo pawh a ni mahna"  a rilru tihnat hlau takin ka ti a. 

" Mahni aia upa pasal nei zawng zawng hian za-ah za in an nei fuh tise chuan aia naupang neih ka pawm lo ve ang. Mahse, chutiang mai maia induh loh, a mizia a tha lo tih pawh nisi lo chu ka pawm ve lo" a ti leh nghat nghat. 

"Um, i duhdan khan kal tawp mai la. Mahse, nu leh pa thuawih kha a tha ber ang" ka ti hap ringawt. 

"Tha ber mah se ka duh min duhpui thei lo hi a fair bik lo" a ti leh hmak. Tihvak ngaihna ka hre si lo, hmel ngui zeta a thu chu ka en vang vang ringawt. 

Phone riah ka harh a, Saitluanga a lo ni a. Thil thleng a awm anih ringin ka thuchhuak nghal vat. 

"Hello.. " lungphu rang zaih zaih chungin ka ti a. 

"Morning..ka rawn tiharh che ni maw? " awki pangngai hian a rawn ti a. 

"Um, Pi a tha lo em ni? " ka ti vat. 

"Tha lo ti ila a rawn hniam thut a, mahse hei a normal leh tawh e. Tihtheih vak chu a awm lo nangin vawiin chu lo kal la" a rawn ti a. 

"Aw, ka lo kal dawn nia. Amah kha a normal leh tawh tak tak em? " ringhlel deuh hian ka ti leh a. 

"Normal ti ila, a zia leh tawh e. Hlauthawng suh' a rawn ti dam leh thlup. 

" Min rawn call hma bawk sia, ka hlauthawng a"  ka ti leh a. 

"Hma maw? " Nuihza aw deuh hian a rawn ti a. 

"Hma lo mi? " ka ti hu. 

"Tho hma vak lo tan chuan hma ang" a ti a, a nui zui leh a. 

Ka phone a dar zat ka zuk hmu chu ka thaw hak mai. Dar 9 a lo ri lo chauh tawh chu niin.. Engtin nge Nutei pawhin min kaihthawh loh zawk? 

"Ti nge min kaihthawh loh a? " Chaw an ei lai ka  va ti ngawt. 

"I Nutei a piangthar a, a kaitho lo che aniang" Patea'n a lo ti awlsam et. 

"Kei min kaitho hma ve thung alawm" Lawmi'n a ti ve hlur thung. 

"Inphihfai la, rawn ei ve nghal rawh. I kal dawn phei chuan a hma tawh lo ania" Nutei ber chuan min ti ang lawia. 

"Hma si lo chu min kaitho lo anih kha. Ti nge i la kal loh a? " Lawmi hnenah ka ti zui a. 

"Vawiin chu training turin ka kal dawna. Hmanhmawhthlak lutuk a ni lo. Kan kal rual dawn nia" a ti a. 

"I kalna tur lam anih chuan a tha viau tak ang. Mahse inbual te ka la duh asin"  Thleng lak pahin ka ti a. 

"Chaweina ka tihfel chhungin i zo vek hman ang" a ti awlsam leh mai. 

"Scooty pakhat khi keng la, a chhe leh tawh em ni? "Patea'n a ti a. 

" Chhe lutuk, a ke a mam bawk si. Keng duh suh" Mama zawkin a lo ti vat. 

"A upa ve tawh atin ni. Siamthat ngai a awm chuan siam tir la, karthar lamah Bibi ta tur scooty hi lak angai ang. Scooty hlui ber khi chu awm ve mai mai se.Eng Scooty nge duh deuh bik te i nei em? " Ka beisei loh em em in Patea bawkin a ti leh a. 

"Aaa, angai lo" ka ti vat. 

"Ngai ve bawk e. Mama lahin Pakhat hi a tlan lohniah a keng ve duh reng a. Inah kan mamawh  bawk si a, duh leh loan in kan la anga. I rul ve bek bek anga" a ti leh charh charh a. 

"Nia, a tha ngawt tak ang. Mahni puala neih hi a tha hrim hrim" Lawmi'n a lo ti ve a. Nutei leh Mama pawh an phul nghal hlut a, Mama'n hmeichhe tana khalh nuam deuh tur ni a a hriat a sawi zui a. Chhungrila lawm na avangin engmah ka sawi thei lawk lo.. 

"Hna te chu i thawk reng lo maithei a. I thawk leh ta rih lo anih pawhin scooty pakhat rulhna tur em zawng kan nei ve mai ang. I unaute pawhin an nei a. I puala neih hi a tul ve reng renga. " Patea'n a ti leh a. Ka chhungte, ka scooty lei tur a an han titi zui nak nak chu hnukulh teuhin ka ngaithla a. Lawmi leh Mama chu ka en a, an hmel hlim takah chuan min huphurh loh zia a chiang em em bawk. 

Ka kal dawnin Nutei ka zawng a, inchungah Patea nen pipe an lo siam dun a, ka chungchang an lo sawi mek ka han hre fuh a, 

" Kartharah ka GP a chhuak dawna, tah chuan leisak ila ka ti a, Loan pawh kha a tul lo mai thei a. Amah a inthlahrun loh nan a duh leh rul se ka ti a " Patea'n a lo ti mek. 

"Nia, a theih ang angin rul se. Amah pawh a inthlahrung lo anga. Fa tak tak ni ve lo ngang hi ania, fahrah chu khawiah pawh inthlahrun rukna an nei an ti chawk a. U Thanga ka ngaihtuah chhuah apiang hian engtin nge maw hetiangbla a fanu a thlahthlam theih ka ti thina, mak ka ti tawp thei lo" Nutei'n a ti leh a. Ka dinna hmunah ka lo insehruh a, a sawi hi ka nunah a thleng dik tih ka chiang a. Inah a ni emaw khawi hmunah pawh mal ngawih ngawih ni a inhriatna hian min chenchilh a, ka hlim viau lai pawhin fahrah ka nihna hi ka theihnghilh thei tak tak lo. 

"Fahrahte iti mai maia. Kan fa anih hi, engahnge Fahrah anih ang" Patea'n a ti hmuk. Nutei'n " Keini hian fa ang tak takin en mah ila an chhungril hliam hi a rukin an pai alawm" ati veleh a. Patea tawng leh hmain Lawmi a rawn au lawng lawng a, ka awmna a rawn thleng chawpchilh ve nghal a. "Khawnge ka nu chu? I hmu lo mi? " a rawn ti nghal a. "Phone ka hmang leh lawka, ka la thleng chho lo" ka ti ve ngawt..

Lawmi ka phur a, a titi barh barh chu ka ngaithla reng nangin ka rilruah erawh thildang a awm daih thunga. Nutei leh Patea inbiakna kha ka ngaihtuah let a, ka tan hi chuan an nupa hian Vantirhkoh anni ngawt lo, ka lei Pathian te anni a, anni aia hlu khawvelah hian ka tan chuan an awm thei tawh lo. Ka pa, mahni fanu aia hmeichhe dang thlangtu kha chu ka tan chuan hringtu a ni ve satliah tawpa. Kei aia thlan zawk a neih atang khan PA hlutna leh ngaihsanna kha keimah atangin a chanfel ve nghal tih ani pawhin a inhria ang. 

"Tlai lam chu i haw chin tur a hriat loh ang a? " Damdawiin kawt kan thlenin a ti a. 

"Um, hriat loh ang. Ka riah pawh angai maithei bawka" ka ti a. 

"Chanchin lo sawi leh hma la. Anih loh chuan ka nu a ang leh vak mai ang"

"Chanchin sawi nachang hre ngai reng reng lo, laktlak loh thei lutuk mai"

Kan in en a, engmah sawi zawm tawh loin kan nui dun vak ringawt. 

"Bd, i lo thleng thei maw?" Nu Saipuiin min lo ti nghal sawk sawk a. Saitluanga erawh ka hmu lo. Nu Saipuii ka en a, a mit sen ram danah a mu tha lo tih a hriattheih a, mahse a hmelah erawh nidang ang bawkin hlim hmel alang reng tho. An chhungkua hi ka hriattirh atanga ka fakna pakhat chu an nuna thilthleng hian a tibuai ve thei lo emaw tih tur khawpin an in control thei vek. 

"Aw, ka rawn tlai tawp a. In chau em? Pi eng nge a an? " ka ti ve nghal a. 

"I tlai hleinem, tih vak theih a awm lo a. Hmanhmawh angai lo reng reng. I lo kal kher angai lo ka tia. Mahse, ka nuin a hmu duh tlat mai che a" Inthiam chiah lo niawm tak hian a ti a. 

"Min hmu duh maw? " Angaihna hre lo fe hian ka ti ringawt.

"Aw, nizan khan biak an phala, ka va lut a. Ko tur che in min lo ti a. I awm lo tih ka hrilh a, mahse Mama hnenah tukin khan a lo sawi leh che a. Ka nu hian a lo ngai che anih hi. Aaa, keini pawhin kan ngai che. I awm loh chuan thla a phang riau zel mai ania" a ti leh duaha. Min fak derna tawngkam a ni tih hre tho mah ila a hmel thutak zet chuan a sawi mai mai lo tih a ti chiang em em tho. 

"Engatan nge min tih ang le? Min hau chak tawh aniang a"  Nui chungin ka ti a. "Ahaa, a ni tak ang. In inhau nileng thin hian ka ring alawm. Ee, Mama ilo let maw? Hei Bdi a lo thleng tawh a" Saitluanga lo lut mek hnenah chuan a ti nghal zat. Nimin tlaia a thawmhnaw hak kha ala ha a. Nu Saipuii ang em chuan alang pawr lo nangin a mu tha hmel bik vak chuang lo. 

"I va hma ve.. " Min rawn ti a. Ka bula thutna awlah a rawn thu thla ve a, tul lo zetin ka thu mar nghal auh mai. 

"Maduhi te nupa an lo kal dawn chuan Bdi nen pathum an awm dawn a. Ka va inbual anga, muang marin ka rawn let leh ang ka lo tia. Nang hna i chawl dawn ta em ni? " a ti leh zung zung. 

"Aw, chawl ang. I haw duh chuan Driver khu a hman reng ania" Zangkhai vuhin a ti a. 

"A that nasat chu. Nangpawh mu hahdam la, nizan i mu miah bawk si lo a" Ngaihtuah tih hriat tak hian Saitluanga hnenah a ti leh a. 

"Midang lo thleng phawt se" a ti awlsam mai. 

"Eng chen nge hetiang hian kan awm dawn a hriat si loh a, kan awm hahdam theih dan dana awm hahdam a tul ania. Zan lam hi chu kei awm reng mai ka duh a. Chhun lam erawh reilote te chu haw mah ila a pawi lo a. Eee, i pi kha a hmuh theih chuan Bdi a lo thlen tawh hi aw" a ti leh mawlh mawlh. 

Nu Saipuii haw tur Motor thleng a zuk thlaha, kawngkhar inhawng thawm ka hriat veleh ka hawi let a, Saitluanga a lo let emaw ka tih laiin Pi Maduhi zawk a lo ni a, a hnungah Mki'n a rawn zui ve bawka. Achhan ka hriat si lohin ka ngui ru nghal rawih mai. 

"I va thleng hma awm ve" awki pangngai hian Pi Maduhi'n min rawn ti a. Saitluanga nupui nei tur min hrilh hnuah ka vawikhat hmuh lehna a ni a, Mki lahin a rawn zui lehnghala. Ka rilruah Saitluanga rinhlelhna a rawn awm nghal zawk mai. 

"Ka thlenna ala rei lo.. Nangni zawk in va lo kal hma ve" ka ti ve a. Ka ngaihtuahna ka hmela tilang lo tur in ka insum nasa viau. 

"Nia, u Mama leh ka ni kha an rawn haw hma duh ka ringa" a ti a. Mki nen an inbe zui a, an inbiak laiin Saitluanga leh Saihminga an rawn inzui lut a. Saitluanga ka melh zawka, Mki lo kal tur a hre lawk angem tih ka ngaihtuaha, a hriat lawk ka ring thut a, ka na nghal zawk ringawt.

"Thingpui kan lo keng a, in ang u. Bd, lo thli la, kan duh vek ang ka ring" Pi Maduhi'n ati nghal a. 

"Ka in lo mai ang. Bdi hi ka piin a hmu duh a, kal ila... " tih pahin min rawn en a. 

"Aw.. Thingpui kan thli lawk ang" ka ti a.

"Lo inthlit mai rawh se. Hmuh theih lai a rei lo em mai" a ti nghut. Awmdan tur hre loin Pi Maduhi ka en a, a meng tal tap chu ka va hmu a, a lawm lo tih achiang. Mahse, a hmelah erawh nui hmel alang tho. Saitluanga ka en leh a, kawngkhar lamah a thle zauh a, kal turin min ti tih ka hai lo. 

Pawn ka chhuah rualin ka thaw hawk mai. Kan boruak nuam lo lutuk kha rei lote chauh mah nise hahthlak tak a ni. 

"Confi lo thei si" Ka beng bulah a rawn ti thut a. Ka phu zawk mai. Min rawn zui ve nghal tih ka hre tho nangin khatianga a rawn tih kha ka ring lo hrim hrim. 

"Min tiphu alawm mawle" ka ti hlak. 

"I phu chu anih kha" a ti duh lek. Ngei zetin ka melh a, a la nui put put zui a. Mki leh Pi Maduhi vanga ka confi lo chu nuam a lo ti viau anih hmel.. 

"A nuihzatthlak loh em mai a" ka ti leh nghauha. Step lam panin ka phei a. Min hnaih zetin a rawn kal ve nghala, step a ka chhuk thla tur chiah chu ka kut a rawn vuana. "Hey, mi an vei reng hi" tih leh ka kut laksawn ka ruala, mahse rang zetin a rawn man lehnghala, ka kut zungtang karah a kut a rawn rawlh a. Nghet lutukin a hum zui hmak. 

"Kal rawh le, khatianga mangan hmel deuha I awm chuan min hmu tu ten ka kidnap che emaw an ti palh hlauh ange" a ti a. A awah chuan min chhaih tih ka hai lo. 

Midang an awm hnaih leh hnaih loh ka en a, tumah an awm hnai lo hlauh. Pi Cabin lam ka va hawi phei leh zawka, ka rin loh lutukin kawngka bulah Mki a lo ding a, inkuangkuah atin min lo en reng chu niin... 

NOTE : A VA HMELCHHIAT THEIH NGAR NGAR VE🤣🤣  Ka theihnghilh deuh hman a🤭 ka chhiar nawn leh vek a, zanin hian ka rawn tichhin dek dek. Ka chawlh chhan chu harsatna harsa deuh ka tawk ka tih kha aw...Dik tak chuan nula senior harsatna chu a harsa bik ka tih kha😝 Tin, nangni reader te chauh lo pawh hian karkalta khan ka hmel hi chhia a lo ti khawp a🤪 mahse, miin hmelchhia min tih hian hmelchhia minti tu te hi han en ila, vantlangin hmeltha an tih bik miah loh leh abik takin keimahni aia hmeltha lo leh sexy lutuk bik lo an nih chuan lak nat reng reng loh tur 🤣😆 Ka lawm e😝