Bibi - 19

 Chapter - 19

Rang zetin ka hawi let a, Saitluanga min kaih ang angin stepah ka zui thla ve nghala. Ka mitthlaah erawh Mki hmeltha tak, lang dam thlap kha a cham reng tho. 

"Eng nge ni leh ta? " Saitluanga'n a ti sup a. 

"Maw? " Mawl hmel deuhin ka ti ha ringawt. 

"I ngawi ta tlat a" a ti tha leh mai. 

"Kal pah chuan sawi tur a vang e" tih leh nuih ka ruala, ka nuihzat vang lam phei chu a ni lem lo. 

"I mak reuh si, achang leh confi lo em em, achang leh confi mah mah... " a ti a, a then zui suk bawk. 

"Mki... " ka ti hman a, mahse... 

"A lo kal dawn tih ka hre lawk lo.. " rang vut hian min tihkhalh a. Ka zawhna tur lo hre lawk ang hrima a tawng chuan sawi leh mai tur minti hre lo. 

"Chutiang lam pawh sawi ka tum lo e a" ka ti ta tho. 

"Tum lo mah la ngaihdan dik lo i neih ka duh lo a, ka sawifiah anih kha" a ti liam leh vut. A tawng danah chuan sawi zui a duh lo niin ka hriaa. Sawi zui ka tum bik lo. 

"Pi chuan tinge min hmuh duh ang le? I ni khan min hrilh bawk sia" ka ti ta zawk. 

"Ka hre lo le, amah kan hmuh hunah kan hre mai ang chu. Mahse, tunah chuan darkar 3 vel hun kan nei a. Inah kan phei anga, ka inbual anga, chumi hnuah Damdawiinah kan let leh dawn nia" a ti ta daih. 

"Pi ka hmu dawn emaw ka tia... " Angaihna hre lo zetin ka ti a. 

"Chawhnu lamah lo chuan kan hmu thei lo ang" a ti awlsam leh et. 

"Kan hmu nghal thei emaw ka tia... " Ka ti leh talh.

"Achang hi chuan dawt var sawi angai ve thin a" a ti duh lek. Sawi awlsam viau mah se keihi Damdawiin chhuahsan ve ngawt thei ka ni lo. 

"Ka kalsan ngawt thei lo ang. Pi Maduhi ngaihdan pawh a ni lo thei a, bakah ka bag khitah khan a awm daih alawm" Ka ti hap mai. 

"Ok... Maduhi chu theihnghilh rawh. I bag chu ka han la leh mai ang chu" a ti awlsam leh mai.

"Inah chuan eng nge ka tih ang? Hetah pi a awm bawk si" nuam ti lo zetin ka ti leh a. 

"Min kalpui ang. Bakah, ka awm loh chuan khilai room a lo inkhungkhawm kha nuam i tih ka ring lo" tih pahin a nui a, a sawi dik reng. Midang tel lo a Pi Maduhi leh Mki te nena awm ho chu ka duh lo. Nichina Mki'n Saitluanga nen kan inkai a hmuh hnuah lek phei kha chuan ka duh lo lehzual tawh. Mahse, eng nge Inah ka tih chuan ang? 

"Santi te an awm anga..Mak an lo ti viau thei a" Ka ti leh ta talh tho. "Awm lo ang, Angela-i schoolah a hruai ang" Ngaihsam zetin a ti leh mai. Sawi tur ber pawh hre chuang lo a ka ang leh ziau chu min rawn tawng khalh leh a. 

"Chhuanlam siam lo mai teh. Inbual vat ka duh ania. Tah hian lo awm la, bag chu ka han la ang" khauh angreng takin a ti nghut a. A hmelah chuan ka hnial deuh chu a ning niin ka hria a, Hnial luih talh a hun chiah lo bawk nen, ka "aw" ta zawk. 

Reivak loah a rawn chhukthla lehnghala, ka bag bakah thildang a rawn khaithla tel a. Ka lam pana a rawn kal phei chu chik zetin ka lo en reng a, Reipawh kan la inzui lo chung hian ka ring em em tih ka inhai miah lo a. Chhungkaw zahawm tak leh amah pawh hna zahawm tak chelh mek a ni a. Kei kher min ngaizawng hi ka hre thiam thei ngang lo. Mahse, ka duh em em tih ka inhre tawha, ka ngaihzawng lo neih ve tawh te nen chuan alaka ka rilru put dan hi tehkhin chi a ni lo. 

"Kal ila.. " a rawn ti a. Ka zui ve nghal vat a, ka bag min rawn pek chu ka la a, ka phone ka dah leh dah loh ka en nghala. Roomah khan ka theihnghilh ka hlau a, mahse Bagah ka lo dah hlauh. 

Motor dahna lamah kan inzui zel a. Seat ti awn hian hahdam angreng takin Driver a lo thu mu a. " I lo muhil em lo maw? " Saitluanga'n a ti chu rang lutuk hian a rawn hawi chhuak nghal zawk mai. 

A rawn tho vat a, seat a tihawn chu a siam tha nghala, a siam fel zo chu rawn chhuk a tum a, mahse Saitluanga'n " Lo chhuk duh suh. Ka nauten Scooty an rawn keng tho a, chu chuan kan haw zawk ang. Pawimawh a awm takin Motor chu hetah lo awm mai se. I duh leh lo mu hahdam vang vang mai rawh"  a ti ta zawk. 

Saitluanga'n thil ei na tur pawisa a pe chu Driver a zah ka hlauh avangin ka hmu lo der a, an scooty ber ka hre lo nangin two Wheeler ho an hun tlar putna lam ka pan phei a. Ka hnung lawkah min rawn zui ve nghal tho bawk. 

A thil khai a hmaah a daha, kan han inphur chu a hmaa damdawi lei tur kan chhuak dun kha ka hre chhuaka, khami tuma ka hah zia kha ka la theihnghilh thei lo. Tunah pawh amah hnaih lutuka chuan ka la hreh tho nangin tlem chuan ka inthlahdul ta deuh. 

"Awi, i lo kal maw? I van ngaihawm " Na-in min hmuh veleh a lo ti nghal chul a. Pi Damdawiin a luh hnu atangin Nai leh Santi, Angelai te ka hmu ta miah lo a. Na-i nen hi chuan thla hnih aia tam mah nitin inhmu leh Inkawm kan ni a, min lo ngai viau pawh a awm ve tho mai. 

Kan thil ken haw chu Saitluanga'n Na-i a pe a, "Hei hi suk tur ania" a ti nghal a. 

"A hmanhmawhthlak em? Eee, u Mam, chaw i ei tawh em? " a ti leh a. 

"Ka inbual phawt anga ka rawn ei ang. Insuk tur kha chu hmanhmawhthlak vak loh e" a ti dam thlup. 

"Ka lo su dawn nia. I buai awm si" Na-i hnenah ka ti a. A nui nghal var var mai.  Diktak chuan Mki leh Pi Maduhi bula awm ka peih loh vanga Inah hian zui ve ka nia, tihtur ka nei lem lo bawk nen, Na-i buai chung chunga insuk tir leh ka duh lo. 

Saitluanga inchung lama a chhoh hnuah insuk tur ka nuaitir ve nghal a. Ka nuaitir chhungin Na-i  duh lo chung inchung a tifai chu ka tihpui a. A titi siam siam a. A la naupan nen a che fel leh rintlak lutuk hi mak reuh tak a ni. 

"U Santi hian i lo kal lo chu nuam a ti berin ka hria" Na-in zawi angreng takin a ti a. Ka thleng hruk lai ka chawl dat nangin ka hruk zawm lehnghal maii. 

"Eng nge ka lo kal loh vanga nuam tihna tur chu? " Tha takin ka ti a. 

"A ngam lo ve che e" a ti liam puat. 

"Awi, iti mak e a. Ngam leh ngam loh tur lam pawh a awm hleinem" Nui chungin ka ti vat. 

"Awm ve eee... Duh tawkin Lala-i a control kual ve thei alawm.I lo kal chuan i chhan ve fo thin a, tunah ilo kal si lo a. Pi Lian zawk a awm bawk si lo a. Angela-i hi an vaw nasa thei lutuk. A luhlul ve tho a, mahse an vuak chhan tamtak hi chu a ho ka ti thei tawp. Pi Maduhi chauh pawhin a hau lo a, U Santi-in a hau nasa thei bawk si. Niminah pawh u Santi-in hmuhphiah kuang lam khan a vaw pawp pawpa" a ti zawi sap a. Ka thaw hak mai. Pi vangin ka phibuaia, Pi Maduhi'n na taka min tawngkhum bawk avang khan Angela-i hi ngaihven loh hram hram ka tum bawka. Mahse, a chanchin min hrilh hi chuan ka hnim nghal sawk zel tho mai. 

"Ti nge a vuak a? " ka ti a. 

"Pot a ti keh a"  a ti leh a. Saitluanga lo kal hnaih leh hnaih loh a en pah a. 

"Aa, thil a tihsual vang anih chu" ka ti ringawt. 

"Pawn ami saw ania. U Santi khan a keh kha tifai turin a tia. Angela-i khan a ti tha lo deuh aniang. Hmunphiah khan a mawngah a vaw pawp pawp a. Keichu naupang ala nia, vuak vak vak hi tha ka ti lo reng reng" a ti leh a. 

"Naupang pawh ni se a tul chuan hrem an ngai alawm. Awm pawh ni ila an hrem tho ang. Bakah an chhungkaw zing ami pawh ka ni lo a" Nui chungin ka ti a. 

"Um, ni ve tho. Eee, hmanniah Pi Maduhi khan phone a hmanga, a rel vak che asin" a ti leh ta cheu. Phawk angreng fe hian ka en a. "Min rel maw? " ka ti hap mai. 

"Um, Pi damdawiin an dah luh ni khan ania. Tu nge a biak chu ka hre lo a. Damdawiinah i kal tlang nghal kha a sawi nasa mai. I zak lo a tih zia te a sawi a. Pi Damdawiin atanga a chhuah veleh ban che a tum a" a ti leh sa sa. Sawi mai tur ka hre lo.. Khami zing khan min hau ngei a, mahse Saitluanga khan min rawn chhan ta kha ania. A lo la na hle chu a ni phawt ang. Huiizzzz, Mki khan a thil hmuh kha a hrilh ngei anga,  thingpui min thlit tir tur lah kha Saitluanga bawkin a hnial fithla leh thak bawk si a. Remchang a hmu anih vaih chuan ka chungah chet lak a hreh dawn lo tih achiang.. 

Thildang kan sawi zawm leh hmain Saitluanga chokaah a rawn lut a, "Chaw ei ka siam nghal dawn em? " Na-in a lo ti nghal vat a. Mahse "Angai lo ang. Awlsam deuhin ka lo ei mai ang" a ti teh tlat. Inti Lal viau pawh nise a awm na chen a awm lai hian intih lal viau hi a mizia a ni vak lo tih ka hre ve tawha. Amaha eitur a zawng ruk ruk chu mak pawh ka ti lo. 

Ka insuk ngaihven turin ka kalsan a, a lo in-spin mek a. Chhuak tawh loin insukna roomah ka awm a. He room hi Veranda tawp lam, inhnuai store room pan thlakna tur bula awm a ni a. Insukna room atan bik a hman a ni a, a zau bakah a fai tha thei em em a. Tukverh lian tha tak a awm bawk a, a nuam phian.

Washing machine nghengin ka ding a, ka hma zawna thawmhnaw ur ro na khawl lian tha zet in hung chu ngaihtuahna mumal pawh nei lo in ka melh vang vang a, Angela-i chungchang Na-i min hrilh bakah keima chungchang te, Saitluanga nen kan awmdan thlengin ka ngaihtuah kuala, midangin an hriat hun thleng kan inzui thei tak tak anih chuan Buaina ka pumpelh dawn lo tih ka hai lo. Eng emaw tal buaina hi chu ka hmachhawn ang tih hre sa mah ila buai tak tak ka inring ngai lem lo a. Mahse, tunah chuan thil tha lo tak ka hmachhawn ngei ngei dawn tih ka pawm thlap tawh zawk. An chhungte dang chu engpawhnise Pi Maduhi hian min hmusitna leh min huatna hi a pai mai mai dawn lo chiang a, a best friend bialpa nena inkawp kan la ni cheu bawk si nen, kan inkar a nuam zawk zawk lo viau anga, diktak chuan hmelma ka insiam chu a ni ta ber e. 

"Hello... "  Kawngka lam atangin Saitluanga'n a rawn ti a. Rang zetin ka hawi phei nghala, kawngka biang nghengin a lo ding reng tawh. 

"I va ngaihtuah muk awm veng veng ve" rawn luh pahin a ti leh a. Chhang loin ka nui ringawt. Thil awmdan fuh chiah lo hi sawipui tur nge sawipui loh tur ni ang tih ka ngaihtuah a, Pi Maduhi ka puh chhe lutuk angin alan ka hlau ve tho a. Bakah, chhungkaw zinga mi ka nih ve loh avangin Angela-i chungchang pawh ka sawi tur niin ka hre rih lo a. A hma khan ka sawi a, kawngro a su eih lo bawk a, ka sawi vanga ka hlawh chu Pi Maduhi tawngkam kha zet kha animai.

"I su zo tawh mi? " Khawl hawn pahin a ti a. 

"Aw, a zar theih tawh. Khawi, ka lo lachhuak ang" ka ti a. Ka sir a Balbawm awm ka la nghal a, mahse ka tih hmain amah zawkin a rawn lachhuaka. Ka balbawm kenah a rawn dah lut zui nghal mawlh mawlha. A dah zawhah washing Machine a khar lehnghal thlap bawk. A chet dan lah chu ti thang fe niawm takin a zei vei thlup lehnghal a. 

"Khawi ka lo keng ang" Tih pahin ka balbawm ken lai a rawn bana. 

"Ngai lo, a zang lutuk. A hrim hrimin insu thang deuh i ang" Ka ti a, ka nui nghal hak hak mai. 

"Kum eng emaw zat chu ka lo parawl ve tawh tih hria la. Bakah, Hostel naupang thin ka nia. Chuan, ka pi hi ngaihtuah la, mahni thawmhnaw suk leh nawh chu ka tih i ring lo em ni? " a ti duah. 

"Ka hre thiam lo. A duat em em si che u a" ka ti tha ve mai. Kawngkhar lam ka pan chu min rawn zui a. 

"Min duat a min hmangaih bawk a, kan puitlinna tur anih chuan engmah tih hreh a nei lo" Nui huk huk chungin a ti a. Pi ka mitthlaah a lo langa, Saitluanga sawi ang hian a ti dawn tih ka ring thlap. 

Inchungah insuk zar turin ka chho a, min rawn zui ve zel a. A roomah a kal dawn emaw ka tih laiin ka insuk zarna bulah a rawn kal ve ta zel. 

Inchung hungna nghengin a ding a, a phone a khawih pah mawlh mawlh a, a awmdan chu Na-in a rawn hmuh ka hlau thut. 

"I lo kal ve zel kher a" ka ti chhuak nghal a. Min rawn en a, "Eng maw i sawi? " a rawn ti a, ka chhan hma in a phone a khawih zawm lehnghal mai. 

"Na-i lo chho ve se mak a ti ang" ka ti leh ringawt. Min rawn en leh a, a phone a kekawr ipteah a thun a. "An la hre vek dawna, buaina tur a awm hleinem" a ti nghet churh. 

Chhan mai dan tur hre loin ka insuk zar lai ka zar zawm a. Hmeichhe lu zo veh vawh hi ka ngaisang thin a, an mahni ang nih pawh ka duh. Mahse, mahni inrintawkna ka tlachham leh tlat thin hi ka hre thiam lo. Ka chhungril a fahrah leh chhungte nei lo ka nihna hian min inkiltawih tir fo pawh hi ka duh lo a. Mahse, ka duh loh vangin a reh ngawt thei si lo. 

A lo kal hnai thawm pawh ka hriat hmain ka hnung lam atangin ka kawngah min rawn kuaha, ka darah a hmai a rawn phuma, ka ding khawng nghal lah mai. 

"Pawisak nei lo viau angin lang mah la i hlauthawng tih ka hria alawm. Min ring tawp mai rawh, a harsa anih pawhin min rin tum tlat la, i bulah ka awm reng dawna. I hmaah ka kal chang pawh a awm ang" a ti dam thlup. 

"In hnuaia thawk ka ni a, kan dinhmun a inthlau lutuk. Bakah, Pi Maduhi leh Mki an inkawmngeih em em a, an hmusit thei che a" ka ti sap. 

"Anni kha ka nei dawn lo a, ka neih tur chu ka thu thu ania. Bakah, ka sawi tawh kha. Mihring dinhmun ka tehdan hi sum leh nihnaah a ni ve lo. Mihring, ka anpui annih avang hian tu pawh an hlu. Chuan, I hlu lehzual " a ti leh sup. Hahdam takin ka ngheng a, a thawk zawngin ka beng a rawn lum ham ham a. Ka thlamuang em em a, hetiang taka thlamuanna hi ka nu thih hnuah ka neih leh na chu Saitluanga bulah chauh hian a ni a. Hei vang ngawt pawh hian ka tan Saitluanga hi chu a special lo thei lo. 

Damdawiin kan let lehin Nu Saipuii a lo thleng phei leh tawha. Pi Maduhi nen an lo awm a, an lo titi tui ngang mai.

"Mama, I pi ka hmu zo chauha, Bdi nen a hmu duh tawh lutuk che u nia. Zuk kal vat teh u" a lo ti nghal sawk sawk a. 

"Bdi berkher chu engatan nge a tih a? " Pi Maduhi'n a lo ti a. Nui sawng mah se a awki ngeiawm lutuk chu ka hriat hmaih lo. 

"Angai tawh aniang, an inawm nitin sia" Nui chungin Nu Saipuiin a ti leh a. Pi Maduhi awki ngeiawm zet kha hre awm pawhin a awm lo. 

"Nia, an inenkawl nasa ve a. Ka nu hian kan hnathawktu ziangah chuan angaina ta ber mai. A la rei loh nen" ati leh kher. 

"Hnathawktu ni loin Mo atan a it pawh a ni mahna, tiraw Ka ni" Ka beisei loh lutukin Saitluanga'n a ti a. A aw lah chu hriat a nuam lo ngang mai bawk. 

NOTE : You tube lamah ka story ziah tawhte, ziah mek te,la ziah turte hi Pathianin rem a tih chuan ka chhiar ve dawn ania. Mahse, mahni story ziah chhiar kha ka zak deuh ta🤣 vawiinah ka record chhin a, ka u arpa lian, nghal em em mai hi a lo khuang zel a😆😆 Tin, hmeltha em em te u, chhiar kher ka duh ti  pawh khan in rawn ngaithla hrim hrim tur a ni🤭