Bibi - 21

 Chapter -21

"Nute, Patea khan a zawng che a" Awki ngai rengin Nu Sangberi hnenah a ti leh a.

"Ee, chutia law? Ngatan nge maw mintih le? " a ti vata.

"Bd, ka thilsawi kha lo ngaihtuah chhin la aw. Mami kal hun hi thlathar mai a ni tawha, i rawn thawh duh chuan ka lawm ngawt ang" a ti zui leh bawrh bawrh a, minute reilote a kan boruak rit lutuk kha a kiang leh thut nimaiin ka hria.

Nu Sangberi a chhuaka, Saihminga leh Pi Maduhi pawh lungawi lo hmel zetin an inzui chhuak a, Remsangi nen kan thil tihlai kan tih zawm a. Saitluanga kan thil tihna bulah phone khawih pahin a ding ve run bawk.

"U Mam, zanin chu ka riak leh lo mai ang ka tia. Inkhawm banah Group inhmuhkhawm kan nei dawn a. Hruaitu ka ni ve bawk sia" Remsangi'n Saitluanga hnenah a ti a.

"A pawi lo.. Nidangah pawh hun ala awm ang chu. Duh leh naktukah pawh a tihtheih a' Saitluanga'n a ti a. Thil pawimawh tih tur an nei anih ka ring ve tawp.

" Nia, ka nu khan eng eng emaw chu ka tifel tawh a tia. Room luah tu tur an awm rih dawn chuang lo a. Engmah khawih danglam pawh angai dawn mi? " Remsangi'n a ti leh a. Pi bungrua vel chinfel an duh tih ka hre thiam chiah.

"Mam, tinge u Maduhi khan tiang khan a sawi  ve ngawt a? " Saitluanga hnenah a ti leh daih. Remsangi hi an Cousin hoah chuan a zia a dang hlak a, zep hni hne nei vak lo, tlang tak taka thilsawi chi a ni a. A bula awm a hahdam em em a, Saikima nen an mizia a inang deuh nangin Saikima ai chuan amah hi ala nelawm lehzual. An chhungkaw ho zingah pawh ngainat a hlawh bik tih ka hre tawha. A awm naah chuan an nui deuh hak hak zel.

"Maduhi sawi tih pawh ka hre hleinem" Saitluanga'n a ti a.

"Sawi e, a lo kala. A rawn sawi ti ila Bdi hi a rawn zawt a. A puh dawt chuang lo nangin a sawi dan kha a sawi thiam" a ti leh a, a nui zui hak bawk.

"Ngaihdan hi a inang lo thin a, sawi zui loh a tha ang" Saitluanga'n a ti nghut.

"U Mam, I thiante an lo kal a" Nai'n a rawn ti a. Ka en chuang lo nangin an inzui chhuak thawm ka hre tho.

"U Maduhi hi chu thil hi a sawithiam thei tawp a. Sual pawh ka ti chuang miah lo a. Mahse Au Tea nen hian nupa an ni bawka, an zia a inang tak tak ania" a ti leh a. Sawi ve mai tur ka hre lo. Chhungkua an nia,ka lo sawi ve palh chuan chhungkua na na na chu intan nachen a awm thin a, tum loh deuha an huat nih palh ka hlau. Bakah, Saitluanga khan sawi zui loh a tha a tia, lo sawi zui ka duh lo ve hranpa hrim hrim bawk.

"A sawi dan kha chuan nangmah vanga boral a ang asin. Mahse, chutiang a ni miah si lo a. Pi Sangberi pawh khan a awih hman tepin ka hria" a ti leh ta zel tho.

"Ka be hnuhnung ber a, lusunna rilru nen chuan min puh kha a awm ve viau tho a" ka ti hap ringawt. Chhan loh reng theih ni hek lo le.

"Ah, awm pawh ka ti lo e. Bakah, ka pi kha U Maduhi hian a sun vak ka ring lo" a ti leh nghauh.

"Diktak chuan ka pi nen khan an inmil miah lo a. A enkawltu inia, awm dun rei over lo mah ula hriat i ngah dawn tih ka hria alawm. Ka pi khan a ngaina em em che a, a hrilh ngei ngei ang che tih ka chiang lutuk. Thil hi kan sawi duh lo mai mai zawka, ka pi pawhin a riahpui a duh miah loh kha. I la hria em? " a ti leh duaha. Ka ngaihtuaha let a, Damdawiin a luh hlim khan riak tur an sawi tum khan a duh loh tak kha. Khami tum khan Remsangi leh nu Saipuii an awm tak e.

"Awmdun reng ta chu eng eng emaw chu min hrilh a, mahse chhungkaw thil ania. Ka lo sawi ve tur a awm lo a" ka ti a. Midang lo kal hnai an awm leh awm loh ka en pah a.

"Ka hre thiam che. Mahse, chhungkaw Member zingah kan lawm lut tep tawh che in ka hria" a ti a. A nui zui nghal hak haka.

"Aaa, Pi a awm tawh lo a.. "  ka ti ringawt.

"Api vang pawh a ni lo... U Mama hian a vil run che tih kan hai hleinem. A che vai film star vel si. Nichin pawh khan a rawn chhan vel chat che a" a ti leh a. A nui leh kawr kawr a, kei erawh  zah vangin ka hmai a sa hut hutin ka hre thung. Mahse, an hre vek anih chuan an hnuaia thawk ka ni chung hian min pawm thlap tihna mi? Nge an sawi duh lo mai mai zawk??

"Ka u dawn miah lo che ania aw" a la ti leh ta cheu.

'I ninawm e a" Tihngaihna hre loin ka ti ve ngawt thung.

Pi boral atangin thla a liam leh nual tawha, keipawh nu Sangberi te dawrah thla hnih ka kal hman tihin sawrkarah a nghet loin ka lut ta hlauh. Ka tlin theih ka rin tawh loh hnuah awlsam zetin hna ka hmu leh lawia. Kan veng sub centre-ah ka thawk thei hlauh bawka. A nghet ni lo mah se vannei tak chu ka ni tho tho. Saitluanga nen kan inkar a tha tluang zel a, eng emaw changa han inhnial ve phat tum chu nei mah ila nileng lenga inbiak loh nan kan hmang ngai lo. A lo leng ngun bawk a, kan inah pawh a tlangnel tawh a. Ka chhungte nen pawh an inpawh em em tawh bawk.

Vawiin hi Saitluanga thianpa fanu birthday a ni a. Landmark picnic spotah lawmna an nei dawna. An inneih naah Saitluanga hian a dinpui a. Vawiin an birthday lawm tur pawh Saitluanga chauh sawn loin min rawn sawm ve a. Pi thih khan kan inhmu ngun a, Saitluanga nen kan inzui ngawrh chho ta bawk nen, an nupa in ka kawmngeih ve ta viau.

"Dar engzatah nge in kal dawn? " Nutei'n chaw ei laiin min ti a.

"Hunserh kha dar 1 ania. Hna ka kal hmasa zuai ang ka tia" ka ti a.

"Dar 1 daih anih chuan Saia pawh hna a kal hmasa duh ang chu" Dawhkan thawhsan pahin a ti a.

"Ka nu tak hi chu aw, i ngaihtuah kim thei lutuk" Lawmi'n nui vak vak chungin a ti a.

"Ka ngaihtuah pawh a nih loh chu, ka rindan ka sawi mai mai anih kha" Nutei'n a ti hlur. An nufa hian inhua nimang si lo, an thusawi hi an inkalh peih em em a, hman atanga vawiin thlengin nilenga inhauh miah loh ni an neih chu tu emaw zawk zawk an zin changin animai. Mama, Patea leh kei hian ngaiah kan nei tawha. Kan hlimpui letling phian zel zawk.

Ka insiam laiin Lawmi ka roomah a rawn lut a, "Eng nge i hak dawn? " tih pahin khumah a let nghal tap tap.

"Ka thawmhnaw pangngai animai alawm. Eng nge ka hak vak ang?" ka ti a. A rawn inbengkang a.

"I vannei ve ngawt mai. Engpawh hi i inhmeh vek a, mawng chhing deuh lah hi ka duh ve ngawt mai. Ka nu mawngfual vang vek " ati zui a. Nutei leh ka nu kha hmel inang zet mai anni a. Ka nu kha hang tihtur ni loin a ngo lutuk lo a, a pian erawh a dik zawk . Nutei hi nu ngo paw vah mai a ni thung a. Lawmi nen hian kan nu te ve ve hi pianah leh vun rawngah kan chhun a, hmelah kan pa te lam kan chhun zawk ve ve.

"I vun rawng kha ka awt ve tho alawm le" ka ti ve thung.

"I hang chuang hleinem. Aaaa, Saitluanga ang hi ka duh ve" a ti leh chiam.

"Papuia ka hrilh mai tur nia aw" nui chungin ka ti a.

"I chhe lutuk a. Mahse, Saitluanga ang hi chuan min duh ve se ka then phal zan" a ti leh lawi.

"Ka pe mai dawn che mi? " Tih pahin ka nui a.

"Aman min duh ve chuang nang. Tak takin i vannei hi ka ti ve chiang e. Saia hi ka beisei phak bakin a lo fel a. Chhe bawk si lo, pian nalh bawk. Engtin nge i chhai tluk tlat le? " a ti leh zat zat a.

"Ka thiam alawm" ka ti liam puat.

"Ha, i zei loh zia ka hre ve em maia. Zei deuh nila chuan Remruata nen in innei daih tawh ang" a ti leh zawt zawt.
Remruata hi kan veng mi tho a ni a. KTP a kan inhman ho bakah  Naupang lamah hian pawl khatah kan awm dun a. Inkawmbik pawh awm lem lo a thalai pawl active member hi inkawm duah duah vek kan ni a. Remruata pawh hi chung zinga mi tho chu niin min nel em em a. Min ngaizawng han tih dawt ngam si loh hian min be peih em em a. Lawmi hian min chhaih fo nangin ka ngai thutak lem lo.

"A awm ang lo thei" ka ti nghat.

"Awm ve tho e a. Tak takin makpa atan ka nu hian Saitluanga hi a pawm bik sia, keilah Papuia vangin min hau renga, ka ning" beidawn hmel fein a ti leh hap.

"Lungngai mah suh che. A fel duak mai ang" ka ti a. Tunlai chu Nutei hian a sawisel ngun ve bawk em a, Lawmi tan pawh manganthlak tham chu a ni ve bawk atin ni.

"School chawlh hi a nuam viau a, mahse kam tu nei run ang hian ka awm a. A ninawm" a ti leh daih.

"Ka kal dawn. Hna tlem khawih zuai zuai a, lo haw leh mai ka duh dawn si" ka ti a.

Dar 11 leh a chanve velah Saitluanga'n min rawn call a, "i hman dawn tawh em? " a rawn ti dut dut.

"Ka haw tep a, i hman tawh mi? " ka ti ve nghal a.

"Um, hman tawh e. Ka rawn chhuak a ni deuh mai" a rawn ti leh a.

In ka thlenin a lo thleng tawh a.  T-shirt var leh Kekawrbul dum, a khup thleng lo deuh a haa. Nike running shoe a bun a. Inchei hran lo mah se alang nalh zuih tho.

"Mi an tam angem le? " Kan tlanchhuah hnuah ka ti a.

"Tam maithei. Kum khatna hi chu tu te pawh hian kan ngaihlu bik a" a ti tha ve mai.

"An naute a hmeltha ka ti tawpa. Tar lam fa hi an hmeltha duh an tia, a dik aniang" ka ti leh a.

"Anih chuan  ka tar tih na mi? Rinawma nen kan inrual reng ania" a ti hluk.

"Ah, tar lo lem lo ang" tih leh nuih ka ruala.

'I nghal sawt riau nang hi. Shock deuh i ngai" a ti leh hmuka, za zeta ka nui chu min rawn en a, a nui ve ta tho.

Picnic spot kan thlenga, an lo awm nuai nuai tawha, Sum lamah buaina an nei lo bawka an cheivel dan pawh duhthusam a ni tawp.
"Kan lawm ve hun tur ka ngaihtuah a, mipa nge hmeichhia ni ang? " ka beng bulah a rawn ti sup a. Lai zetin ka nui ringawt. Mahse, ka ngaihtuah naah Angela-i a lo lang zawka. Saitluanga,nui chunga a thiante nena inbe mek chu ka en a. Pa a ni a, hetianga nung tur hi a ni hlawl lo. Keiman eng emaw tal ka tih angai...

"Tuiah cheng ve ila.. I duh em? " ka ngaihtuahna hre lo tih hriat zet hian a rawn ti a.

"Aih, inbual leh a peihawm loh em mai. I duh leh va cheng la" ka ti a.

"No...I peih loh chuan ka peih bik lo" a ti sup.

"Saw lamah sawn thu ila" a ti a. Kan awmna piaha thutna ruak lam a kawk a. "Thla kan la ve dawn em? " ka chhan hmain a ti leh a.
"I duh te chuan.... " Ka ti sap. Diktak chuan Angela-i ka ngaihtuah chhuah atang khan ka mood a dik ta miah lo a. Pi in enkawl tura min chah kha ka hre nawn leh a. Ka nguai zual sauh mai.

Midang hmu phak tho siin kan pahnihin kan thu dun a, thlifim rawn thaw heuh heuh chuan min ti harh sawng sawng in ka hria a. Ka nguai lutuk pawh tlem chuan a zia leh ta deuh..

"I awmdan a dik lo. I nuam chiah lo mi? " Chik zeta min en chungin a ti a. Ka inthup viau emaw ka tih laiin ka mood dik lo a lo hre chat tho mai.

"Nuam e... " danglam awm lo thei ang berin ka ti a.

"I danglam thut ania" a ti leh ta tlat. A mitmeng fing zet chuan ka awmdan danglam a hmuh hmaih lo tih ka hriaa. Ka ngaihtuahna sawi chhuah mai a tha zawk. Bakah thil sawifel maitheih reng, lungawi chuang si lo a zep tun hi ka zia a ni vak lo hrim hrim.

"Naupang ho ka hmuh hian Lala-i ka hre chhuaka. Pi khan enkawl turin min duh a.. Engmah ka ti thei bawk si lo a" ka ti zuai raih. A thaw deuh huaia, a tum loh lam ka sawi anih hmel.

"Ka la hrilh ngai lo che a. Sawi a hun in ka hria" a ti supa. Min chhan dan tehdaih chuan min ti hlauthawng thuta. Pi vanga min kawp mai mai a ni tih a sawi ka hlau nghal tawp.

"Maduhi hian fa a nei thei a, fa nei thei lo hi Tea zawk hi ania. Lala-i a rawn pianga, a nu a mumal ta lo a. Ka piin a pawm a, Maduhi fa awt reng reng a lo awm khan ama fa ang maiin a buaipui bawka. Tea hian fa aneih theih loh vangin hrehawm a ti a, an nupa inzawmna a nghet tak tak lo niin a hre bawka. Kei lah hmundangah ka awm lai a ni bawk nen, an nupa hian fa atan an la a ni ber. Dan anga nu leh pa nihna neih an duh erawh ka remti lo a. Mahse, an theihtawp chhuahin an enkawla, an hmangaih bawka. An enkawl naah lo inrawlh tumna ka nei lo" a ti ta duah.

"Lala-i hi naupang danglam bik a ni a. Ka sawi tawh ang khan a nu ang maia luhlul leh a duhna lamah chuan thluak tha lutuk a ni a. Enkawl hi a hautak ania" a ti leh a. Sawi mai tur hre loin ka ngawi reng ringawt.

Ka kut a rawn vuana, "Min en teh" a ti sup. Thuawih takin a mitah tak ka en a.
"Kumthar tira innei turin Palai rawn tirh ka duh a. Kan dam anga, Pathian zarah fa kan nei thei anih chuan tha takin kan enkawl ang. Mahse, Lala-i hi chu ka ngaihsak duh loh vang ni loin Tea te nupa hi laksak tumna ka nei lo. Kha lehchen an fa atana pawmin hmangaih takin an lo enkawl tawha. Amah hian a puitlin hunah kan bula awm a duh anih chuan ka sawisel lo anga. Mahse, tunah  hi chuan an hnen atanga laksak ka tum lo" Dam thlup hian a ti a. Mahse, dam thlup siin thutawp a sawi tih erawh achiang kek kawk hle tho.

"Pi khan an enkawl dan a duh lo tihna em ni? Ti nge keimah enkawl tura min duh si" Insum thei loin ka tichhuak halh mai. A hmui a petsawi zauha.

"I hria alawm. Ka pi leh Maduhi hi an inmil ngai lo. Maduhi hi misual ni lo mah se mi famkim a ni bik lo a. Tlema thil ngaihkawih theih tura sawi mai hi a thiam a. Ka pi, nu sehhel ve tak khan a ngaithei tlat lo' a ti leh a. Dik hmel thlup angin lang mah se Lala-i enkawl tura a duh loh chhan niin ka hre thei chuang tlat lo.

"Chuvang ringawtin Lala-i enkawl turin min ti lo ang" ka ti leh talh.

"I ngaihtuah tih a hria a. Maduhi aiin i kuta dah a duh animai. Maduhi hi chuan a hrem ve fo a. Ka pi khan amah ni loin an han hrem vel kha a ngaithei lo" a ti leh mai. Sawipui awmzia a awm lo tih ka hre chiang ta viau.

"Ka pi min chah ka tihlawhtling thei dawn lo tihna ania" ka ti sap.

"Lungngai suh, kan cheng ho vek dawn a. Eng emaw chenah chuan i enkawl ve bawk ang chu" Min thlem niawm tak hian a ti a. Cheng ho eng ang mah ila Pi Maduhi zawngin min enkawl tir phal lo chiang khawp ang.

"Pi Maduhi hian min mil lo tih ka hria" ka ti hmak. Ka kut laksawn ka tum a mahse a hum nghet sauh thung.

"A mil lo che a, ka hria alawm. Mahse, min ring tawp mai rawh ka tih kha" a ti sup.

"A thiannu ber Mki bialpa i nia. Min lawm lo hi a awm ve reng" ka ti lui leh nghat.

"I bialpa ka ni na nge? " a ti sup.

"I ni leh nih loh chu i hre zawk ang chu" Lungawi lo deuhin ka ti hlak.

"Mki bialpa min ti sia"  tih pahin a nui a. Thinrim deuhin ka melh vak ringawt. Ka tawngsual a lo hre fuh lehpek chu niin.

"I thinrim hian i cute thei" ala ti ta cheu.

"I over anih mai chu a. Cute rual ka ni lo bawk e a" ka ti hlar mai. Ka mood chhiat nak laia min chhaih chu ka ngaithei lo. Ani lah chu a nuih a za zual sauh emaw tihmai tur hian insum tihhriat takin a nui put put a. Tum hmak chungin ka melh ve ngar ngar thung.

"Ok.. sorry" nuihza aw deuh hian a ti a.

"Eng nge sorry sawi angai ami? " ka ti leh hmak.

"Min ngei em a" nui chungin a ti a. Ka nui duh lo..

"Anih chuan ngeiawm tawh lo la animai" ka ti nghat.

"Yes Boss... " a ti sup a.Ka kut zungtang karah a kut zungtang a rawn rawlha. A lakanga, a fawp zauha. Ka ip chawiha, midang awm hnai an awm em tih ka enkual nghal vata, ka awmdan hrethiamin hriat nuam zetin a nui zui nghal hawk hawk thung.

A thianten an rawn koh avangin a kalsawn a, ka thutna piaha a thiante nena an ding chu ka en vang vanga. Hmeltha lo mah se a langsar viau zel hi mak tak a ni. Palian leh pian inkhaithli tha tak anih vang pawh animahna. Hmeichhe pian nalh hi an hmuhnawm em em a, chutiang bawkin Mipa pawh hi pian nalh chu an lo langsar tho tih Saitluanga-ah hian a chiang reng. Vawiin pawh nidang ang bawkin a thawmhnaw hak a inhmeh em em a, a vun hang deuh chu a kawr var hak chuan a tilangsar angreng viau thung. A hnar ngul sang tha angreng takte, a mithmul dum tha zet te,a nuih zawnga a ha var rual that lo lang bakah a sam meh dan zawng zawng nen a inhmeh vel vek. A zaidam loh zia hi Saikima hian vawi tam a sawi tawh a. Mahse, keimahah hian a thinchhiatna a lang ngai miah lo tih ka ngaihtuah a. Vawiin chauh ni lo pawh hi han thinrim phat chang leh han inhnial zauh tum hi kan nei ve tho a. Mahse, a thinrim ve duh ngai miah lo a. P8 mood swing ah phei chuan sual ve thei tak mai ka lo ni a. Achang leh ka rilru a na hma em em a, kan inbiak reng pawhin ka ngaia, achang leh ka hne em em a. Ka be peih lo a. Min biak loh deuhin ka ngai leh bawk si. Mahse, ka mood a inthlak danglam nasat viau pawh hian a thinrim duh ngai chuang lo. "I thinrim ngamna ka ni tihna ania" a ti fel then zel a. Kei pawhin a sawi dik tih ka hria. Ka pangchan ngamna ber anih vanga ama chunga ka mood chhia zawng zawng pawh burbun vek thin ka ni tih ka hai bik lo.

"B.. Hei hi Zonuna anih hi. I la hmu loin ka hria" Saitluanga'n a rawn ti a. A bula ding, amah ang rual vel tho, tawi sa nghet tlet tlawt chu ka en a. Ka nui lui nghal saka, a kut rawn pharchhuah chu ka vuana. A kut chum buang mai chuan min hmer na lam hret. Mahse, rei min vuan loin a thlah leh maia. Ka tum loh deuhin ka thaw hak mai.

"Thianho groupah i lar tehreng nen ka hmu thei har hle mai che" Nelawm taka nui chungin a ti a. Saitluanga leh Rinawma an nui dun hawk hawk thung. Pa nelawm tak tur niin ka hriaa, ka nel ru ve nghal tawp bawk.

Hunserh kan hmang zo a, chawei in a zui nghal a. An thilsiam a tui tehreng nen ka ei hleithei tlat lo.

Keimaha ka thut laiin Zonuna a rawn thu ve a, a titi suam suama. Dept pakhatah SDO a lo ni a. Chhimlam khaw lian angreng takah a thawk mek a, amah tak chu Aizawl khua a ni tihte a sawi luama. Fiamthu a duh bawka, ka nui ka nui mai.

"Ka en vang vang che hian kan Saitluanga hian a thlang sual lo chein ka ring khawp mai" a ti thut. A tarmit bial chhah  tak phen atangin chik angreng fein min en a. Chhan vak ngaihna hre loin ka nui lui hak ringawt.

"Nui suh, ka ti tak tak. Mki nen an inzui thin tih i hre chek anga. A fel lo pawh ka ti lo. Mahse, mipa hi chuan kan awmna zawng zawng nena hriat tuma min chhui rengtu hi kan ning thuai thuai maia" a ti leh a. A thilsawi chu ka beisei loh lam daih a ni.

"An han inthen lah kha kan hmelhriat zawng zawng zingah khan a rilru na a ti lang a" a ti leh a. A mizia tur anga ka lo rin nen a inpersan chiang ngang mai.

"Chuti  a ni maw? " Alangah erawh tha takin ka ti a.

"Niang chu.. Angela-i nu vanga a rilru buai lai khan a lo hnem ber tu ania. Mak deuh khan an inzui ve ta maia" a ti leh a. Mak ka ti ngang mai.

"Mak i va tih hmel ve.. Mki leh Maduhi hi Angela-i nu nen an pathum a inkawp chawt thin alawm annih" a ti leh a. Tuman chutiang min la hrilh ngai lo a, Saitluanga pawh hian vawikhatmah ala sawi ri ngai lo.

"Angela-i nu kha hmeichhe fel leh nun tha zet mai a ni a. Nikhat thilthuah a danglam thut a, a danglam chhan kha keimah chauhin ka hriaa. Saitluanga hi hrilh ka tum thina, mahse a boral thleng khan a phal ta lo a" ala ti ta deuh deuh.

Engmah ka hriat dan nen a inmil lo. Lala-i nu kha hmeichhe awmtha duh lo tih bakin ka hre ngai si lo...

NOTE : Ka mit a pheeee ruaiii mai😆 youTube lama dah tur ka in warm up pah bawk si, mahni tawkah hian ka va mahni lo thei tak🤭🤭

He thawnthu hi titawp deuh thut mai ila pawi inti em?