Bibi -22

Chapter - 22

"Mak i ti hmel hle mai a. Ka sawi loh tur ka sawi niin ka hria" nuam lo ti hmel deuhin a ti a. Mak ka tihzia thup ka tum viau nangin ka hmelah a lo langchhuak tho anih hmel. 

"Aih, chutiang lam pawh a ni lo" Nui chungin ka ti vata, a nui ve tho nangin a rilru a nuam lo hmel viau tho. 

"Vawiin chu nuam iti chiah loin ka hria" Kan haw kawngah Saitluanga'n min ti a. 

"Nuam e... Ti nge? " ka tum aia zangkhai mah zawkin ka ti a. 

"Ka hre lo le. Dik lo a awmin ka hria. Tu emaw ber khan thil tul lo an hrilh zawk che nge? " a ti leh a. 

"Ah, teuh lo mai" ka ti leh vat. Ka rilruah erawh chuan zawhna a awm run renga. Lala-i nu leh Pi Maduhi te lo inkawm thin kha thil dik lo nimiah lo mah se ka awm a ti nuam lo deuh tlat. Zonuna sawi danah lah khan hmeichhe fel tak, thil eng emaw vanga danglam ta thut angin a sawi a. Tu te pawhin khawsa ho leh fawr kual mai mai thin angin min hrilh vek laia khatiang zawnga ka hria kha mak ka ti lo thei lo. 

Kan kawtah Motor a ti dinga, " Ka lo lut lo mai ang. Mu hahdam la tha in ka hria. I hmel a dik tlat lo" a ti nghal sup. 

"Nia  pawi chuang lo.. I thlen hunah min lo hrilh la" ka ti tha ve mai. 

Chhuk tumin kawngkhar hawnna ka vuana, mahse ka banah a rawn man a, min pawt let a, ka inrin hmain ka chalah a rawn fawp zauha. A thu ngil zui leh mai. 

"I va ho tak, mi an lo kal mai tur asin" Ka ti a. 

"Ho e, lo kal pawh nise thil pawi ka ti hleinem" a ti duh lek.

Lawmi'n inleng a lo nei a. Papuia lo len apianga a tih thin danin Nutei pawh a lo thu tum leh buaua. Ka haw pawh min lo um e lem lo. 

"A haw tlang nghal ami? " Lawmi zawkin a lo ti a.

"Um, tihtur a nei a" ka ti teh ngawt. 

"Ka chau reuh tawpa. Ka mu nghal dawn ania aw" ka ti leha. 

"Chuti taka chau chu i hmang nuam bawk aniang maw..Naupang birthday-ah ilo enjoy ber te hi aniang ka ti. Thla te ila chuai chuai em? " Nui hak hak chungin a ti a. 

"La teuh mai. Nakinah i en dawn nia. Bakah, an mahni lam khan IG velah an post ka ring. An chei nalh khawp mai" ka ti ringawt. Tu tu nge kal tih vel a hre chak dawn tih ka hre sa a. Ka mood lo fu chiah lo nen Papuia lo leng hlauh chu ka lawm ru ngang mai. Lo leng lo se chuan reife Lawmi'n min thutchilh leh dawn chiang sa. 

Ka mu meng kar a, Saitluanga'n a thlen thu msg a min rawn hrilh pawh ka hmu reng nangin ka open peih lo. Ama chunga thinrim pawh ka ni chuang lo a. Ka thinrim nge ka nguai satliah pawh ka hre lo a. Thinrim chhan tur pawh a awm lo hrim hrim a. Mahse, ani emaw midang pawh nise tumah ka be chak rih lo ve tawp. 

Ka harh chu thlanin min lo bual nasa mai. Khua a lo var vek tawha. Rang zetin ka thuchhuaka, ka kekawrbul hak lai ka pawt hlim a, ka mal a sernung ka awm chu ka en nghala. Ka thaw huai mai. Bang nghengin ka thu a, ka mal a sernung  awm chu dim tein ka khawiha. Ka nuhrawn-in tihpalh niawm taka chemte a min vihna a ni a. Min vit palh angin mi zawng zawngin hre mah se min vit palh lo a, a tilui tih kei leh amah khan kan hre chiang ber. Ka pa lah khan ka fimkhur loh vanga a chem ken lai va bawh angah min la ngai zui a. Ka ngaihtuahna avangin ka tiril a khur a, kum tamtak liam tawh mah se ka mumangah erawh hmuh chang ka la nei fo a. Ka mumanga ka hmuh lah hian a hun lai a thleng ang chiah khan ka mangang em em  thin a, harhchhuah tum hian ka buai a, ka mumang tiin keimah leh keimah ka inhrilh mawlh mawlh thin nangin ka harh veleh ka en nghal vat zela. Ka mumang a lo ni ngei tih ka hriat hnuah ka hahdam thei chauh zel. Kha thil kha thleng lo ta se Nutei te bulah hian ka awm lo anga, puitling hman loin ka thi tawh hial maithei. 

Lu na bur chungin choka lamah ka phei a, Nutei chauh alo awm a. Damdawi bur ka hawng a, Saridon ka lachhuaka, ka hmawm nghal a. Hetianga ka awm hi chuan nachhawkna ei lo chuan ka lu na a reh mai mai dawn lo tih ka hre chiang tawk viau tawh.

"I lu a na lehpek tawh em ni? Ngah nge  damdawi i hmawm ngawt thin? Thingpui in hmasa ta che. Kaw ruak hian damdawi hmawm ngawt zel suh" a ti nghal hluk hluka. Chhan enah ka en lem lo. 

"Ka kawng ka herh deuh emawni,tukin chu archaw min han peksak mai teh" a ti leh a. Thingpui min rawn thlit a. Tuktin hian a tho apiang thingpui min pek hi tih thanah a nei a. Kan vai mai hian a zin emaw zing karah a chhuak anih loh chuan thingpui min siamsak turah kan inngai tawp tawh. 

Dawhkan kilin ka thu a, ka thingpui inchhawp chu in chakna nei lo lutuk hian ka en a. Ka ka a da duak mai hian ka hria. 

"Eirawngbawl ka zo hman a, a zia viau e. I duh leh Ma-i va kaitho la, I nawm vak loh chuan aman han pe rawhse. A mu reng zel mai a, a tha lo" a ti leh a. 

"Ka han pe mai ang. A la hma tho a, Duh leh la mu se" ka ti a, kaihthawh tumna pawh ka nei chuang lo. 

"A hma tawh lo. A hrim hrimah tukin chang lo pawh a mu rei ziah a. Tlemin a insiamthat deuh angai. A bialpa lah sawti saw ania, pasal lak tlak loh zet a nei anih phei chuan an nasa lo dun khawp ang' a ti zui ta chiam. Engvanga Papuia chu han hmer tel hram nge anih pawh ka hre lo. 

" Ante, tinge Papuia hi i duh loh em em a? " amah pawh en chuang loin ka ti a. 

"Ka duh lo satliah hleinem. An chhungkaw ho zia ka hre chianga. Tawngkam nem duai, rilru kha zet mai annia. Sawtiang chhungkua nena inzawmna neih ka duh teuh lo. A nu phei saw chu a lam lai saw vanram a kai teuh lai ber aniang chu" a ti leh ta nek. Mahse, an mizia a sawi erawh a dikna chen a awm tih ka hre ve tho. 

Patea a rawn lut a, a dam that phawt chuan zingtin exer lain a kalchhuak thin a. Tukin pawh  a tihfo thin angin Chhangban kan a rawn khai haw leh ngei. 

"Eng nge maw i sawi buan buan thin le? " a rawn ti lut a. Ani hi chu mipa ngang a ni a, kan ngaihzawng tih vel mai maiah hian a inrawlh ngai lo. 

"Kan Lawmzuali hi mawle aw. Pasal tawraw lo zet a nei anih chuan a nasa lo khawp ang. Zing tho thei der bawk si lo" Nutei'n a ti zui leh hlawk hlawk. 

"Buan buan thin a, puitling annia. An nei fuh lo anih leh an thu alawm. Ang chiam teh suh. Mi te reu reuin an hria ange" Patea'n a ti awlsam et. 

"I heti tlat zel a. Hai ve thin rawh, an zia i hre lo pawh a ni lo. Papuia tak phei chu a sual pawh ka ti lo. Mahse, a nu saw Ma-i lul hian a hrawn thei lo ang. Fapa mal, a nu thu zawm vek tur anihna saw ka duh lo" a ti leh a. Papuia mizia ka ngaihtuah a, Nutei sawi ang hi anihna lai tur a awm ve tlat. Nun tha tak, mi ti zawk zawk lo leh mi pawisaw lo tak mai a ni a. Mahse, a nu inchhunga a lal zia chu vengchhung hriat a ni pha ve tlat. 

"Akhai... Mama pawh hi khatiang khan miin an sawi mai tur ania. A reng rengah kan fanute hi pasal nei lo a awm reng turin kan duh anih loh chuan an hmuh ve chhun sawisel sak suh. An luck loh em hi" Duhdah angreng takin a ti awlsam leh then. 

"Pasal hi ka nei mai dawn mawni? " Ngaihtuah chiang mang hlei loin ka ti chhuak thut. 

"Nei la, a pawi hleinem" Nutei'n a ti awlsam et.

"Min va han ui lo" ka ti nghat. 

"Ui e, ngah nge kan ui loh ang che? Mahse pasal neih tur i hmuh chuan nei la ka duh. Kan dampui reng dawn lo che a. Mama hian nupui tha lo tak pawh a nei thei a. Nupui fel tak pawh neise inthlahrun hun in nei ang. Nakinah hrehawm inla ti mai ang" a ti leh duah. He thu hi chu vawitam a sawi tawh thin a, Lawmi nen hian kan  nui liam mai mai zel a. Patea hian pasal nei tura innawr ang chi hi a duh lo bur a. Inchhung nuam kan ti ve tawkah angai mai zela. Mahse, Nutei hi chuan pasal nei ngei turin min duh a. A sawi fo mai. Patea hian a sawi ngai loh vangin lengtlang turin min duh tihna phei chu a ni lo. 

Inchungah ka chho a, archaw ka pek zawhah chhuk mai lo in ka ding deuh vang vanga. Kan kawmthlang lam a vengthlang panna kawng lang raih chu ka thlir thla a. Kan naupanlaia kan infiamna thin kawng ka mitthlaah a lo lang nghal zat. Ka nu damlai kha ka naupanlai huna ka ngaih ve awmchhun a ni a. Ka pain nupui thar a neih atanga kum hnih chhung kha chu ka damchhunga hun hrehawm ber, theihnghilh ka duh em em a ni thung. Ka nu boral hnu a innei an ni a. Ka pa kha pathlawi fa nei tawh a ni tih a hre sa reng a. Mahse, kei naupang pawisawi lo kha engvanga min haw em em nge anih tun thleng hian ka la ngaihtuah chhuak zo lo. An inneih tirh atangin nu angin ka lo pawm ve thlapa, ka nu hmunruak a rawn hnawhkhat a, ka pa nen chauh kan awm tawh lo anga,inchhung pawh a nuam ang ti a ka lo ngaihtuah vena kha thla khat a liam meuh kha chuan awmze nei lo suangtuahna a ni tih ka hre thiam nghal ta mai reng kha ania. A pasal fa kha min pawm thei lo anih chuan pathlawi fa nei tawh kha nei lo ngam mai tur anih laiin ka pa erawh a duh hlum lo chauh si... Lala-i ka mitthlaah a lo langa. Ka insehruh nghal teuh mai.Saitluanga nen kan tum anga kan innei thei anih phawt chuan, ka fa anga enkawl rem lo mah se nu hrawn tha ber nih ka tum tho tho ang. Ka nu hrawn-in min enkawl tura ka duh dan ang zawng zawng kha Lala-i enkawl nan ka hmang dawn khawp. 

Nuam lo burin hna ka kala, naupang naupai leh naupang vaccine pekni a ni a. Nawm loh nak a laiin inthlahdulna hun ka nei lo nileng ta thak. 

Zanah Saitluanga a rawn leng a, a lang tha lehpek ngang mai. Nizan atang khan ka be mumal ta miah lo a. Tukin pawh min rawn wishna ka reply bak chu hna ka kal dawnah ka hrilha, ka buai dawn tih ka hrilh tel nghala. Chhun a thil ka ei leh ei loh min zawhna pawh ka chhang ta miah lo. 

"Mama, i u tarmit i rawn hawn ta lo em ni? " Nutei'n Mama hnenah a ti a. Mama'n room atangin "Hawn kha, B.. I hmu lo mi? " Min rawn ti a. 

"I hmu lo em ni? Ngah nge I vuah loh lehpek a? Zing atangin ka lu a na i tih kha" Mama ka chhan let hmain Nutei'n a lo ti leh hmanhmawh. 

"Ka vuah peih rih lo. A power up vang nge ka luak a tichhuak" ka ti ve zat. 

'Kha.... " Lawmi'n phone min rawn pe a. Ka phone emaw tiin mak ti fein ka bana. Mahse, ama phone zawk a lo ni a. "Eng nge? " ka ti ringawt. 

"Remruata.. I phone i pick lo a ti" a ti a. Ka phone roomah ka charge daih tak e. 

"Eng nge? " Hello pawh ti loin ka ti tawng. 

"Nge i pick duh loh vel a, kan lo leng dawn" thawveng zetin a rawn ti a. 

"Lo leng su, in ninawm" ka nui zui a. 

"Achangtupa a lo kal animaw? Ka rawn shock dawn" Tih leh nuih a ruala. 

"I ngam lo ang. Tak takin lo kal ru, rawn bengchheng vak vak lo ula" ka ti leh a. Amah chauhin a lo kal dawn lo tih ka hre sa a. Ka rin ang ngeiin an rawn kal ta duah. 

"Thingpui ka lum dawn. In duh vek em? " Lawmi'n a ti lang lang a. 

Remruata lah pek chuan uang fe hian " I lum aiin Bibi lum kan duh zawk" a ti let a. Lawmi'n a rawn vin let chu engahmah a ngai lem hlei lo a. Kan vengah hian "Bd" tiin min ko deuh vek a, Bibi min ti an awm tho bawka. Mahse, "Bibi" Tih hi chu kan chhungkua leh thian hnai bik te min koh dan a ni mah zawk. 

Saitluanga a tawng mang lo a, thingpui in zawh hnu lawkah a haw ta vut. In a thlen hun tawh awmah pawh engmah a rawn sawi lo a. Ka mut dawnah msg ka thawn a. A seen nghala, mahse ka zawhna chhang loin " Thawveng zet kha tu nge? " a rawn ti daih. A msg awmzia ka ngaihtuaha, ka hre thiam mai lo. 

"Tu maw? " tih ka thawn let a. 

"Zanin i inleng vei nei lo zet kha"

Remruata a sawina a ni tih ka hre thiam chiah. 

"Remruata kha maw? Ti nge a? ' ka ti leh a. 

" A va ngam che ve"

Ka chhiar pahin ka thawnghal hak mai.. 

NOTE : INRINNI HI CHU KA INDAIH LO VE NGANG ZEL MAI. ZAN INKHAWM NGEI NGEI A LO NGAIA. NILENGIN KA LO BUAI VE THIN BAWK SI NEN.. HEI INKHAWM BANAH ZING LAM EITUR SIAM PAHIN KA TYPE ZAWK ZAWKA, DAH LOH AIAH KA RAWN DAH HRAM HRAM. NGAIHNAWM VIAU LO ANG. A TAWI BAWKA.. "A VA TAWI VE" IN RAWN TIH TALH LOH KA BEISEI🤣 AWL TAWP AIA DAH KA NI TIH KHA HRE HRAM ULA, NGAIHNAWM TUR LAM PAWH KA NGAIHTUAH HMAN TAWH LO.. 

En pawh ka en nawn lo... Tin, nangmahni vangin ka thil kan a ut😤