Bibi - 23

 Chapter - 23

Eng chu nge maw a hriat le? A vawikhat hmuhna pawh a ni lo va, a lo len laiin an lo leng fo tawh bawka. Min fiam dan lah angai reng bawk. 

"Kan innel tihte chu i hre reng alawm mawle" tiin ka reply a. 

"Ka hriaa, ka duh lo reng alawm mawle" ka reply dan copy niawm tak hian rang zetin a rawn ti a. Tun ataka han duh loh chhan tur ka ngaihtuah ngial pawhin ka hre lo. 

"Muhil mai teh" ka ti ta ngawt. Ka rin ang ngeiin a seen a, min reply lo. 

Zingah Nutei'n min rawn kaitho a, "Tho rawh, Pu  Zika a boral ania" a rawn ti a. Pu Zika hi kan inpiah lawka awm a ni a. Kum 100 a tling tep tawh chungin Tarmit tel loin lehkha ala chhiar thei vek. A tute ho nen hian inkawmngeih tih tur ni lo mah ila kan inhre tha thawkhat viau. 

Thawhphan pawh nei lem loin ka tho nghal a, ka inphihfai laiin Lawmi a rawn tho ve a. Nutei'n Mama a kaitho leh mek a. Mama hi kaihthawh har angreng tak a ni a. Nutei a rawn phun phei hmawk hmawka. Lawmi nena kan awm chu min rawn en a. 

"Ti ve thuai thuai ula, va kal ve vat teh u. I Pa a phei tawha. Bibi inchhung singsak vel angai ang. Nang va kal la, Mai'n eirawng lo bawl se.Kei ka che tha peih si lo. Mama pawh chu eng nge a mut reng le? " a ti leh mawlh mawlh. 

"Eng nge maw i phili vak zel le? " Lawmi'n a ti hlak. 

"Ka phili chung pawhin in la muang ania. I nau phei chu thawh pawh a la thawh loh saw. Tikhan mi lo ti reng reng suh" Nutei'n a ti hlur mai. A ni lahtaka. Eng emaw deuh a awm hian a phili nasa thin lutuka, min tibuai zo vek zel a. A thawpikthlak lamah a kal a, Patea pawh hian a khak fo. Mahse, a sim thei chuang lo. 

Mithi In ka thleng phei a, thenawm hnai zual an lo awm laih laih a. YMA hruaitu thenkhat an lo awm bawka. Amah Pu Zika lah nat lawkna nei lo, thawhah thut damdawiin an panpui,boral zui ta mai a ni a. Nizanah an chhunghnai tak, Saitualah a borala. Tukinah vui nang hman turin puitling lam an kal hlawma, puitling awm chhun ber lahin Pu Zika Damdawiinah a lo hruai bawk si. Ro han rel tur pawh an awm lo. A biaktlak ber pawh tleirawl kum 16 vel animaia. Rorel dan tur hre loin an lo hawi deuh mai mai a ni ber. 

"I Phone i keng lo mi? " In a ka haw veleh Lawmi'n min lo ti a. 

"Keng nang, ka charge daih. Ti nge? " ka ti a. 

"Saitluanga'n min rawn call a. Call i pick thei lo a tia. I kalna tur i hrilh lo mi? " a ti leh a. "Hrilh hman pawhin kan awm loh kha, khati khawpa kan phili tawh chuan angaihna a awm nang" Nutei hriat hlau deuh takin ka ti sap. Za zet hian a nui nghal kar kar mai 

Chaw ei laiin Patea'n Pu Zika a Tu leh fa ten an enkawl that zia a sawi charh charh a. "Kan upa anga, min enkawl tha peih mang lo mo kan nei anga. Kan fanute lah hian min ngaihsak duh mang lo ang tih hlauhawm tak a ni" a ti zui a. Ka ngaihtuahnaah pi a lo lang nghal zawk a. A Tu leh fate zawng zawngin an hmangaih vek nimai khan ka hria a. A mil loh ber Pi Maduhi pawh khan theihtawp a chhuah ve thoa. Ani pawh kha vannei tak a ni. 

"Aaaa, tar enkawl hi a namai lo viau ania aw. Tha taka enkawl emaw an intih lai hian tar hi chu an buaithlak ve a. Mi sawi kai loh hi har tak tur ania" Nutei'n a ti a. Chutiang zawnga ngaihtuah chuan a dik leh thlap tho. Pi ngeiah pawh khan achiang a. Thingpui in hunah Pi Maduhi khan pe mah se a induh lo fo a. Ka siam kher a phut fo a. Siamsak duh lo pawh nise a awm viau. A bual pawh a duh lo lehzel a, in hrang atangin bual tur an lo kal a. Khangte kha mualphothlak tak a nihna lai a awm ve a. Hre chiang lo tan chuan a bual duh lo emaw tihmai tur a ni ve tlat. 

"Sangthani pawh a sual loh vei nen kan sawisel reng tho hi. Ka nu pawh hi awmpui ila tha taka enkawl pawh ni ila min sawisel lo bik teuh lo" a ti leh a. Patea nu pawh hi an inpui luahtu ten an enkawl dan an sawisel ve reng tho. 

Chaweina vel kan tihfel vek hnuah Saitluanga

ka be ta chauh. Vawi hnih min lo call bakah msg a lo awm bawk. 

Min rawn wishna bakah "Serchhipah ka kal dawn" tih a lo thawn a. A lo thawn hun ka en a, dar sarih vel bawr a ni a. Hna thil a zin tur nise nizan lamah hriat lawk awm tak ania. Mahse, engmah a sawi lawk bawk si lo. Nge a hre renga min hrilh lo mai mai zawk ni? Nizan kha awmze nei loin a lungawi lo ve ngawt kha ania. Aaa, vawiin inrinni ania, hna thil chu a ni thei lo. 

Ka call a, a pick lo. A buai anih ringin ka call nawn duh lo a. Kan thenawmah mithi an awm thu leh thingpui lum tura ka kal dawn thu ka hrilh a. Signal a nei tha lo nge msg pawh a tlang mai thei lo. 

Lawmi nen kan kal dun a, nula dang an lo awm ve nual bawka. Rinai takin kal kan tha phian. Mihring kan buai tial tiala, nula pawh hnathawka nitin chhuak kan pung tual tuala, eng emaw changa thingpui sem tur inhmuh zawh loh lek lek tum a awm ta zauh zauh mai. 

Dar thum velah kan haw a. Thenawm hnai tihtakah midang haw ruala haw ve ngawt theih pawh a ni lo. 

Phone ka en a, Saitluanga msg a lo awm a. Ka msg min rawn reply na "ok" Tih zawng. A tawi tha tek tawk khawp mai. 

"Enteh... " Tih hluai pahin Lawmi'n min rawn thut hnaih nghal a. A phone chu ka en theih turin a rawn lek hnai nghal zat bawk. 

"Eng nge a? " tih pahin ka en a. 

"Mki... Saitluanga te nen an zin anih hi... A hrilh che em? " a ti a. Mki thlalak post a kawk a, engmah sawi loin ka thai phei a. Saitluanga leh Rinawma an ding dun a. Mki leh Maduhi an awm bawka, Caption ka en a. "Kan chhiattawhna min tawiawm tute " Tiin  a daha, Location pawh Serchhip a inti a. An pathumin a mention diat diat bawk. 

"Hei vang hi mi zingah khan a rawn call che ? " a ti leh a. Saitluanga nena kan inkar tamtak hretu a ni a. Mahse, tunah tak hi chuan thudik aiin dawt hrilh ka duh. Ka unaunu mah nise ka induhtawk ve tlat. 

"Hrilh e... " ka ti zangkhai vah. 

"I mak ve ngawt mai. Keichu ni ila ka ngaihdan a ni lo ngawt ang. Lo la intawiawm vel kha" A ti hmak. "Keipawh chutiang chu ka ngaihdan" Tih ka chaka, mahse ka ti lo. 

"Thian tamtak an intawm alawm. Bakah, Pi Maduhi pawh a tel a, Rinawma pawh" Ngaihsam hmel zetin ka ti leh mai. 

"Huizz, khang takte kha alawm ka duh loh. Thikthu chhe lo lutuk hi a tha lo ania. I thik ngam lo emaw a timai ang" a ti leh hlak hlak. 

"Thik buai peih lo. Nidangah an inzui ziah pawh a ni hleinem" ka ti liam leh puat. 

"Ni ve tho. Mahse, keichu ka duh lo bur. Ka kick duh mai ang" a ti leh hmak a. 

"I den thei si" Nui chungin ka ti a. Mahse, chhungrilah erawh ka nuih a za eih lo. 

"Den thak hi a tha" Tih pahin a intisek a. Ka nui leh ringawt. 

Min rawn be ta miah lo a. An haw lehnghal em tih pawh ka hre ta lo hrim hrim. Min biak loh chuan biak ka tum lo bur. Zingah khan call kha pick ta ila min hrilh maithei. Mahse, ka pick loh pawhin msg a lo dah thei vek a. Ka hmuh huna ngaihdan mak pui pui ka neih a ring lo emawni? Nge a kalchhan ka hriatchhuah a ring lo zawk?Diktak chuan kan Inkawp hnuah hian han thiktur, ngaihbel luih tur takngial pawh a awm ngai lo a. Vawiin bak hi an inzui pawh ka hmu leh lo. Mahse, ka hmuh vawikhatna hian min ti thinrim tawk viau tho. 

Sundayah pawh zing min rawn wish bak min rawn be zawm ta miah lo a. Ka be duh bik der lo. Zan inkhawm banah Remruata te ho kan Inah inkhel en in an thu teuha, inkhel en e ti loin an titi paha, tlangval rual Inkawm khawm nisi hian vengchhung thil thleng mak tak tak, mi nazawng hriat ni si lo hi an la hre thei em em zui. Patea khawhar in kal a rawn haw a, khawhar In hi zan hnihna nu leh pa zan atan kan hmang thin a. Enchhin nan tiin kumkhat chauh hman turin an ti a, mahse a tihchi viau aniang, kan veng hian hetianga khawhar in lenpui dan hi kan hmang zui ta zel. 

"Remruat, Thingpui in in tawh em? Thingpui hang ka inchak ngei mai" Patea'n a ti a. 

Kan in a tlangval rual thu hung thin hi Nutei leh Patea hian nin viau awm tak, an ngaithei  angreng viau tlat. 

"In nang, kan inchak a. Mahse an lum peih lo" a ti vat. Ngei zet hian ka va melh rum a. Engahmah ngailoin a nui mai mai. 

Thingpui ka lum laiin Door bell a rawn ri a, lut turin Lawmi'n a ko lang langa, Kawngkhar rawn inhawng chu tu nge lo lut hriat tumin ka va thlek zawka. Ka beisei loh lutukin Saitluanga  rawn lut mek ka va hmu thut. Rang zetin ka in her a, ka thingpui siam lai chauh ngaihven niawm takin ka awm zui hmiah. 

"B, hei Saia a lo kal" Lawmi'n a rawn ti lawng lawnga, ngei zetin ka ner ru nak mai. 

Ka inher a, Sitting room lamah emaw a thut ka tih laiin Dinning Table kilin a lo thu a. Min lo en run chu niin... 

"Thingpui i duh ve em? " Ka ti teh ngawt. 

"Duh lo mai ang. Ka lawm" Tha tak chuan a ti ve mai. 

Lawmi a rawn phei a. "Khawi ka lo pe hlawm ang. Lo thu rawh" a rawn ti a. Sitting room leh choka hi inzawm reng chu a ni nangin a hrana han thut chu nuam ka ti vak lo a. Kan inleng thang ho zingah Saitluanga hi ka bialpa tih hre lo an awm lem lo nangin lo thut hran chu nuam ka ti vak chuang lo. 

"Inkhel i en duh em? Sitting room lamah thu phei ila" be hreh ru zetin ka ti a. 

"Duh lem lo e" a ti leh tlat. 

Amah ep zawngin ka thu a. Han sawi leh mai tur ka haihchham tlat a. "U Bd, u Remruata hian engtikah nge in inneih dawn tirawh min ti ania" Kan inleng zinga naupang fal leh tlema mi pha zat lo Zarpuia chuan a rawn ti a. A sawi zawh rualin an nui thum nghal hak a, Zarpuia lah chuan min rawn en zuk zuk pah hian " Eng nge innuih leh si a? Zawt rawh min ti reng si" a ti nung nung a. Saitluanga ka en a, min rawn en ve chiaha. Ka hawisawn nghal daih. 

"Kum thar tirah kan tum ve chu ania" ka beisei loh zetin a ti dam thlup. Rang zetin Saitluanga ka en leh a. A thilsawi khan amahah danglamna a thlen eih lo  niawm tak hian a awmdan a ngai reng. 

Saitluanga chhan dan confi zet chuan kei ang thoin midang pawh a ti hamhaih ve aniang. Reilote chhung chu a reh thap a. Mahse, Lawmi a rawn harhchhuak leh hmasa ta ber. 

"Ve ngawt ngawt a.. Ka pa hian a phal lo mai tur asin" a rawn ti a. A nui zui vak vaka, kan boruak han danglam thut kha a reh nghal hawk. 

"A phalna turin ka rawn interview tha viau ang" Saitluanga'n fiamthu hian a ti let a. An nui leh ta dar dar. Kan pahniha kan tum lawk dan ni tho mah se midang bula a sawi chhuah tak thutah  khan minti hamhaih vek lo thei lo a. Bakah, Tun hnai ni hnih hi kan boruak a fuh lo a. Rilruah inneih lam a lang leh tawh lo hrim hrim zawk. Midang nen fiamthu a an han inchhan zui leh takah chuan ka thaw huai huai mai. 

"U Sai, khalam chu lungngai suh. Ka nu archaw hi rawn pek chhawk zeuh zeuh la, Maruti 800  siam dan han thiam em em bawk la a fel nghal vek animai" Mama'n nui hak hak chungin a rawn ti a. Mama hi tawng tam lo tak, nghal ru zet si a ni a. Saitluanga nen hian an in upat hleih viau chungin an inkawmngeih viau tho.

Midangin eng eng emaw an rawn sawi zui nak naka, Lawmi an fiam paha, kan boruak a nuam ta phian. 

"In riak ta nge in lo haw? " Midang hriat loh turin ka ti sap. 

"Riak lo... " a ti tawi tuk. Kan inleng dangte nen an infiam laia a mood tha zet kha vawmbo ang hmak a ni leh tawh. An zinna lam ka zawt ta kher kher kha ka inchhir nghal zat bawk. 

"Lo haw tawh lo ila i duh ka ring" a ti leh nghut. Ka chhan hmain midang ka en a, tumah min rawn ngaihven an awm lo. 

"I kalpui te khan an zir em a. Riah i duh ang chu ka ti" ka ti ve ta nghat. 

"An zir viau pawh ka lo hre hleinem" Ngaipawimawh lo hmel zet hian a ti leh a. A kutzungtang sei thlurh chuan dawhkana kurtai chhawpna bawm kan dah a tuai vir pah a. 

"Zir chu anih kha.. In thlalak pawh hmuh a nuam" Ka ti a, ka awki ngeiawm lutuk chu ka tum lawk pawh a ni lo. 

"Thlalak maw? " a ti sup. A hre lo tak tak nge a hre lo der ka hre lo a. Mahse, ka hmu lo turah angai niin ka hriaa, ka sa nghal zak mai. 

"Eng thlalak nge i sawi a? " a ti leh a. Chik zetin min en a. 

"I hriat loh chuan a tawk anih chu" ka ti hmak. Midang awm hnai lo se chuan ka au khum vak duh hial ang. 

"Sawi la, I sawi loh chuan ka hre thei nang" a ti leh sup. 

"Ka sawi peih lo.. " Tih leh thawh ka ruala, mahse rang zetin ka ban rekah a rawn man. Min pawt zui a, midangin min rawn hmuh hman hlauin ka thu nghal vat. 

"Thlah rawh" ka ti chang faka. Ka beisei loh takin a thlah ve mai bawk. 

A tho hluaia, phawk zetin ka en a. Lawmi no sil tur kengin a rawn phei ve chiah a. 

"I haw dawn mi? Teh hluai che chuan... " a rawn ti a. 

"Um, ka thianpa tlawh kawi lawk ka ngaia" Zangkhai vuh hian a ti a. Awihawm loh khawpin a mood a tha leh ta nghal. 

"Anih chu mawle.Anih chuan mangtha le. Ee, I interview tur kha hrereng la aw" a ti fiam a. Saitluanga'n nui chungin a chhang let a, Lawmi a nui bawk bawk mai. 

Pawnah ka zui chhuak duh lo tep a. Mahse, ni thei ngangin ka hre lo a. Ka zui chhuak a, mahse Gate thleng bak ka kal lo. 

"Rinawma te inah ka kal kawi zuai dawn a" a ti a. Gate bulah a ding a. 

"Um.. " ka ti ringawt. . 

"Ka thlen hunah ka lo hrilh ang che" a ti leh a. Tawng loin ka bu leh ringawt. Zanin a mood inthlakdanglam thut thut khan ka awm a tinuam lo. Tunah pawh awihawm loh khawpin a mood a tha leh ta daih. 

Ka mut dan ngaiin ka mu ngil at a. Ka awmah ka kut ka daha,ka lungphu nghawr dat dat ka hre thei a. Ka mit ka chhin vang vang hnuah ka mengchhuaka, ka phone ka bana. Ka phone locked ka hawn veleh Saitluanga msg a lo tlar lehnghal thapa. Ka chhiar nawn leh ta nge nge. 

A haw atanga minute tam pawh a liam hmain msg hian "Mki kha i thik tiraw?" a rawn ti a. 

"Eng nge a awmzia? " ka ti ringawt.

"Kan zin ho vang khan i thinrim tak tak em? " a rawn ti leh a. 

"In zin ho tih ka sawi em ni? " ka ti ve tlat. 

"Thlalak kha... Mki post i hmu tih ka hria" a rawn ti leh a. Ka thaw nghal hak mai. Nichin khan engmah hre lo ang maiin a awm vel a. 

"I hre lo maw ka tia.. " ka ti a. 

"Kha vang khan i thinrim tak tak em? " a rawn ti leh a. A hriat duh ka sawi hma chu min zawt dawn tih ka chiang. 

"Aw... " tih zawng ka thawn let.. 

Rang zetin a rawn reply a, Emoji nui lai hlir a rawn thawn. Min chhaih kual vel dan ngei lutukin ka phone ka melh vak ringawt. 

"I thik tihna... Thikthu pawh nei lo emaw inih ka tia.. " a rawn ti leh a. Ala rawn nui ta cheu. 

"Ka thik peih lo... " ka ti let ve vat. 

"Te si, sual si, in control thei si.. Kum thar ka nghak peih leh lo. Naktuk zanah Palai ka rawn tir dawn. Min hnial hlek suh" A rawn ti leh a. 

"Angai bawk lo... " Tih ka thawn let nghala. Mahse, a offline zui nghal daih a. Ka call a, a la cut daih zui.. 

Ka chhiar zawh rualin awmze nei lo zetin ka nui chhuak hak mai. Ka thik vanga a lawm lutuk kha ka ngaihtuah let a, mipa danglam tak hi chu a va han ni chiang tak..Ka pi vang ni loin min neih a duh ngei tih ka hai tawh lo a. Mahse, min Hmangaih angem? Ka inngaihtuaha..Hmangaihna hi eng nge a awmzia chiah ka hre bik lo. Mahse, Saitluanga ka duhna ang em em hian tu mipa mah ka la duh ngai lo. Min tinui a, min ti tap a. Min tihlim leh theitu pawh amah hi a ni a. Hei hi Hmangaihna anih chuan ka Hmangaih tihnatihna animai.... 

NOTE : Long story ka ziah hian ka ziah laiin ka inchhir ziah. Ziah laklawh han zuzi san hi a nuam lo theihtawp animai. Regular lo em em pawh ni ila zawm tho tho ka duh ziaha. Hman loh ni a tam si😫

Chuan, inngaizawng hleuh hleuh ang type hi ka ziak thiam thlawt lo. Nula upa nih chuan romantic vel viau a har em mai🤣