Bibi - 24

Chapter - 24

Nutei nen eirawng kan bawl dun a, a ar leh thlai chanchin sawiin a tawng bawrh bawrh a, ka sawipui ve zauh zauh nangin ka ngaihtuahna erawh hmundangah a awm daih. Saitluanga palai rawn tirh tur kha sawi chi a ni em ka hre lo.A sawi dan kha fianthu nge thutak hriat a har si. Mahse, engmah ka sawi lo anga, a rawn tir leh thut si anih chuan a zia lo viau ang.. Huizzz, zing thlengin ka msg a la deliver thei lo a. Min tihmangan hi chu a va han thiam tak.

"Ngatinge ti khan i tih a? " Tur zeta min en pahin a ti hluk a. Ka behlawi bai tur then lai ka zuk en a. A hnah zawng ka lo paih zel a, a kuang zawk ka lo dahtha zel chu niin..

"Awi.. " Tih pahin ka nui zui nghal vak vaka, "Nikhua lo leh lutuk" a ti nangin ani pawh a nui ve tho.

"I bakkilh ka lo hawh, helai ka sam hi a tla zel a. Kilh beh angai, ka bakkilh ka hmu zo lo" Thleng ka sil laiin Lawmi'n a ti a. Ani hi chu a kal hma zawk fe a, keichu vengchhung a lo ni bawk nen ka hmanhmawh vak ngai lo a. Dar 9:30ah ka thlen hman chuan ka duhtawk mai zel.

"Bawm dumah khan lo hai rawh, a awm nual ang' ka ti a. Reivakloah " Eng bawmah? Ka hmu lo" a rawn ti leh a. Ka rindan chiah, kan tleirawl lai atang tawhin thil zawn hmuh hi a thiam lo nge mawni? A hmu hleithei loa, a zawnna hnuah hian awlsam takin ka hmu leh ziah.

Roomah ka va phei a, ka tlereuh bawm a lo hai nasa mai. "Bawm dumah ka tih kha" Tih pahin Dressing table sira bawm dum ka laa. "Bawm dumah iti ringawt a. Ka zawnna pawh kha bawm dum tho alawm" a ti awlsam et.

Bakkilh ka lachhuaka, ka pe a. Lawmi hi hrilh a that ka ring thut.

"Lawk... " A kal tur chu ka ti a.

"Eng nge?" Tih pahin min rawn en a. A sam chhawlleng kir deuh bik chu a kilh pah chawt chawt bawk.

"Ih, nizan khan Saitluanga khan palai rawn tirh a tum thu a sawi a. Fiamthu a ang ka ti bawk sia, engmah pawh ka sawi ta lo a" ka ti sap.

"Palai maw? Chutiang fiamthu a sawi chi pawh a ni mi? A hrim hrimin nizan khan kum thar a ti ve sia" ati ha mai.

"Ka hre bik nang. Kan tum dan chuan kum tawpa lo len a, January thla tawp lama inneih kha kan tia. Mahse, nizan a haw hnu kha chuan kum thar ka nghak peih leh lo a tia" ka ti leh niah niah.

"A pi boral kum a ni sia. Hetiang hi Mizo upa hian an duh lo thin viau a.. Aaa, a hmanhmawh ve tawh nimai. Engmah han nghah lehchuan tur pawh innei tawh lo a" a ti awlsam et.

"Chawei lai khan ka sawi tep a. Mahse, lo kal tir lo ta se ka zak dawn lutuk" ka ti hul hak.

"Dik ve reng. Zawtfiah leh la, tlaiah pawh a sawi theih alawm" a ti leh a. Tawng tawh loin ka bu nghat.

"I thleng sil pawh chu ava han laklawh ve" Nutei'n a rawn ti a. "Awi, ninawm... Va phei teh. A te leh chiam hma sawn" Nin hmel zetin Lawmi'n a ti hlak.

Hna kal dawnah msg ka thawna, a seen lo. Chaw a ei emaw a insiam mek anih ka ring ve ngawt. Hna ka thlen hnu lawkah min rawn call a, biak duh em em siin ka lai leh deuh hu pek.

"Vawiin chu ka buai nileng hmel a. Ka hman ve leh ka rawn bia ang che" a rawn ti dut dut.

"Um.. Eng lo, thil kha... " ka ti hman a, mahse ka sawi thui hmain min rawn tawngkhalh leh a.

"Ka dah ang aw.. Hei inleng ka nei dawn a" a rawn ti a. A hmanhmawh hmel bawk si nen ka be lui duh ta bik lo.

Tum loh deuhin Angtei nen kan inhmu hlawl mai. Kan vengah an thiante Damlo tlawhin an rawn kala. Chumi pah chuan sub-centre an rawn tlawha. Kan inbe ta lo vang vang nen khan ka thawk tih pawh a lo hre lo a. Kan han inhmu chu kan ri nghal hlut mai.

"In lo inhria animaw? Khawvel hi chu a zim mang e" U Masangi'n a ti a. U Masangi hi kan thawhpuiah chuan a senior ber a ni a. Angtei Ni fanu a lo ni a. Chuvanga helai pawh rawn tlawh kawi an lo ni.

"Kan thawk ho zuai tawh lawm. Awi, ka phone ka thlak a. Number ho hi ka save vek emaw ka tia. Phone tharah khan backup theih chu ka back up vek a.Mahse, number a bo ta teuh a. I number pawh ka nei ta lo a" a ti mawlh mawlh.

"I pi kha a boral tihte ka lo hria a. An dam hlawm em? Lala-i kha a damtha ta zel em" a ti leh a.

"An dam ang ka ring, an chanchin dang chu ka hre miah lo. Ka tlawhpawh zui ta lo a" ka ti a. Lala-i chanchin ka sawi hian awlsam tak leh vei lo awm tak hian sawi mah ila ka hrawkah hian hnawhtu awm ang mai hian tawng ka harsat ru tlat zel.

"Anih tak chu mawle. Eng emaw chang hi chuan ka la hre chhuak fo mai. A damloh dan kha amak ve em a. Thil dik lo awm khan ka hre tlat a, mahse kar aliam kha chuan ka ngaihtuah zui ta lo a.Damdawiin kan kalpui a ti tho bawk a. Bakah nangmah khan i ngaihven tih ka hriaa, engmah an chanchin i rawn sawi zui tak loah kha chuan ka lo ngaihdan a dik lo aniang ka ti leh a.Mahse,a nu kha ka ngaina miah lo. A nui sanga, a dam dup chung khan ka nel lo hi a ni tawp. Maduhi a ni em kha? " a ti leh duah.

"Um ni e, Maduhi anih kha. Amah kha a strict tawpa, college lama naupang enkawl thang ania. A fa enkawl dan a khauh khawp mai. Bakah, Hnathawktu satliah tan a fanu chungchang lo sawi ve tur a vang em a " Nui chungin ka ti a. Ka nuihzat vanga nui phei chu ka ni lem lo.

"Bd, I thawhna hmasate em ni? " U Masangi'n a lo ti ve a, ka bu nghat..

"Maduhi intih chu collegeah a thawk iti mi? A pasal Saia tih lam a ni em? " A ti leh a.

"Um, ni e. Saihminga" ka ti a, a thawhna college ka sawi nghal a.

"Ee,anih chu. Fa a lo nei tawh a ni maw. Pasal a nei tih chu ka hriaa, High school kan kal laiin kan junior thin alawm. Kan teber nen hian class khat anni thin a, Amah kha mak deuh hian a lar riau bawk nen ka hre zui ve viau a. Kan school thiltihna velah khan a langsar thei khawpa. Khanglaia kal zingah khan hre lo pawh an awm lo ang. A thiante pahnih Muansangi leh Mki kha amah aiin an hmeltha a, Muansangi phei chu lehkhathiam zet mai ania. An pathum khan an lar thin khawp mai" a ti ta mawlh mawlh..

"Mki chu kan kawmthlanga mi saw a ni em? " Angtei'n a lo ti vat.

"Ni e, i u Mama te nen an in classmates thin alawm. A hmelthat nen rinaiin a nula rei a" a ti leh a.

"Awi mak e..Han sawi han sawi chuan kan lo hre pawh leh thum zel maia, Khawvel hi a lo zau lo tak tak anih hi a" Angtei'n nui hak hak chungin a ti a..

" Aizawl hi a lo zim a ni e" ka ti hul hak a. Ka rilruah erawh Muansangi atih kha Lala-i nu a ni angem tih zawhna a ri tluk tluk a. Han zawh tawp chi niin ka hre si lo. Lala-i nu chungchang hi sawi fo mah se tuman a hming min la hrilh ngai lo a. Zawhna chang ka hre ngai bik bawk hek lo.

"Thingpui in ang u. Kan lum chawp thin a, mahse vawiin chu KFC ka'n chah ange. Khuallian kan nei si che u" U Masangi'n a ti a. KFC a order zui nghal a, midang zawng chu eng eng emaw sawiin kan ri zui leh hlut.

U Masangi a rawn lut a, kan bulah a rawn thu veleh a.

"Zomato awm hi a tha tak tak ania. An rawn thleng har lo ang. Duh leh thingpui chu eitur lo thlen hunah kan lum chawp anga" a rawn ti a.

"Ka lo lum ang.." ka ti vat.

"Bd, a hmanhmawhthlak loh..Thildang lo thlen hunah animai. Ee, nichin khan ka la sawi zo lo. Maduhi thiannu ka tih Muansangi chu in hre mai thei. Hman deuh khan a ruang an chhar a, hmeichhe fel leh smart zet tura ka ngaih kha a lo ni zui chiah lo aniang.A boral khan chanchin eng eng emaw kha an sawia. A first cousin fa a pai te an ti ta mai maia" a rawn ti leh a. Inring hman loin ka tui in lai ka hak a. Ka khuh zui nghal vak vak bawk.

"A na em? Tui hak hi a na duh ania aw" Tih pahin ka hnungah Angtei'n a rawn chul a. Dimtein a beng zui leh dat dat a. Tawng pawh tawng thei loin ka khuh leh nghek nghek.

"Nang hi ilo cancer ange aw? Cancer hian thil helh leh hak an ching anti ania" U Masangi'n min ti a. Ka khuhna lama ka mittui tla hruk pahin ka nui a, midang an nui hawk hawk bawk.

Eitur a lo thlenga, thingpui ka lum nghal a. Kan titi bawrh bawrh a, Muansangi chanchin erawh tuman kan sawizawm tawh lo. Kan sawi zawm loh vangin ka rilru a kap loh phah eih lo a. Thil lianpui min kamtu awm ang mai hian min kam run a, ka buaina tur ni lo mah se ka hahdam thei lo. A mizia inthlakchhan kha hriatchhuah ka chak em em a ni tawp mai.

Ka thutna ep chiahah Lawmi a rawn thu
a, hmarcha mal tur ka inchhawp a rawn
mal ve nghala.

"I be ta em?" Midang hriat hlau hmel tak hian a ti sa sa.

"Aih, vawiin chu a buai a. Inbiakna hun a awm lo" ka ti sap.

"Hmmmmm, pa dangdai tihtakah amah a rawn inpalai dawn aniang" a ti a. A nui  zui kawr kawra, engmah sawi loin ka ner khum nak ringawt.

"Hey, I boring leh tawh. Ninawm em maia" a ti leh hmaka.

"Min hre boring mai mai anih kha a" ka ti ve thung. A tihfo danin chik fahranin min en a. A inti fing kual leh dawn tih ka hre mai.

"Eng nge i vei leh tak? " a ti ta chiah.

"I va han intifing vel tak. Engmah ka vei lo" ka ti tlat.

Lawmi hi Muansangi chungchang ka la hrilh ngai lo. Rinawma te naute birthday kan kal tuma Zothana thilsawi pawh kha engmah ka hrilh ta chuang lo. Ka unaunu a ni a, ka mualphona tur hi englaimahin a ti dawn miah lo tih hre reng mah ila thil zawng zawng hrilh hi fuh chiahin ka hre tlat lo zel a. Inngaihzawnna chungchang phei hi chu mahnia hriat mai tha zawk a awm tih hi ka ngaihdan a ni thin hrim hrim. Muansangi chungchang pawh hi a hriat vanga fel duak tur a ni lo bawka, hrilh loh mai ka thlang leh ta tho.

"Ka intifing pawh a ni lo,ka fing ve hrim hrim alawm" nui pawt pawt chungin a ti a. Ka ner khum nak ringawt.

Chawei hmain ka inbuala, ka inbual zo room ka lut fel deuh chiah tihin Saitluanga'n min rawn call a. Pick loin ka en deuh vang vang a, ka rilrua zawhna awm teuh hi zawt ila ka thawl hawk angem tihte ka ngaihtuah leh rih a. Mahse, palai chungchang ka rilruah a rawn lang leh thut a. A tawp hman ang tih hlauin rangmangkhengin ka pick up leh ta lawi.

"I va buai awm ve? " a rawn ti dam thlup.

"Ka inbual zo chiaha" ka ti tha ve mai.

"Um, hnar i neih chhiat nen tlai lam inbual hi i hrat mah mah " a ti nghut.

"Ka hnar a chhe kher lo e a" ka ti hlaka, za fe hian a nui hawk hawk thung.Naupanlai atanga sinus nei ka ni a. Nasa phei chu a ni ngai lo a, mahse kum hnih kalta vel atang khan a nasa ve ta deuh a. Khaw awmdanin a zir loh phei chuan ka phui tha thei ngang maia, Saitluanga pawh hian min hriatpui mai bakah a ngaimawh phian bawk.

"A neitunu ang vela te fel at ania. A chhe lutuk lo lehsi" nuihza insum aw hian a rawn ti leh a. Ngei zetin ka thaw hak ringawt. Ka lian viau lo nangin nu te lutuk ka ni miah loa. Mahse, Saitluanga tan hi chuan ka lian lo ve em a. Min fiam nan a hman ziah avangin min fiam leh tih ka hre thiam thoa.Mahse,ka ngei tho tho.

"Eng nge i tih a? " a rawn ti leh sup.

"Ka inbual zo chiah ka tih kha" ka ti hlar mai.

"Ah, thinchhe si.. Tunah khan alawm ka tih, i ngawi vang vanga. Thildang tih pah i nei anih ka ring a' thinrim chuang lo hian a rawn ti tha leh mai. A thinchhiat zia hi a cousinte ngeiin min hrilh a, mahse ka chungah hian thinchhiat viau tum ala nei miah lo hi mak tak a ni.

"I haw tawh mi? " ka ti a.

"Haw tawh e. Nizana ka sawi kha ila hria em? " a rawn tihzawm a.

"Eng ber kha? " Vei lo niawm takin ka ti liam puat a. Ring vak loin ka zai zui daih bawk.

"I zaithiam sia" a ti sup.

"Ka hria alawm" Confi zetin ka ti let ve zat.

"I nghal sawt hle a ni. Shock phaka awmtir vat vat i ngai. Min hlau lo sawt lutuk mai" a ti nung nung a. A tawngdan chu amah nen a inhmeh ngang mai bawk.

"Palai ka rawn tir dawn ka tih kha, i chhungte ilo hrilh em? " amah bawkin a rawn ti leh a.

"Hrilh nang, fiamthu nge thutak pawh ka hre hleinem" ka ti nghauha, a thaw hak ri ka hre zui zat bawk.

"Lalbiakdik, Tu nge khatiang fiamthu nan hmang ngai a? " a rawn ti a, thinrim erawh a ang lo.

"Nangmah animai ang chu.. Tak takin i sawi zui si lo a, ka hrilh lo " ka ti leh a.

"Um, a pawi lo. Hrilh lo law law mai teh, kan sawi tha dawn nia" Tha takin a ti ve ta zawk.

"Um, khavang kha ania ka hrilh duh loh. I lo kaltir chung chung dawn lo tih ka hria alawm" ka ti nghat. Palai lo kal tura ka duh ngawih ngawih vang pawh niloin ka lungawi lo deuh tlat.

"I va han lakawi peih tak.. I inkhawm dawn em? " a rawn ti leh a.

"Dawn... Banah khawhar inah ka kal nghal ang" ka ti nghauha. Ka awah titau aw a hriat theiha. Pawi pawh ka ti chuang lo.

"Ok, anih chuan lo len loh zan tur anih chu. Ka Jump zuai dawn, chaw ei tui aw" a rawn ti a. Ka titau aw kha a hre reng awm sia, angaipawimawh duh eih lo. Chhan pawh chhang duh loin ka off ta daih.

Lawmi nen kan inkhawma, inkhawm banah khawhar Inah kan kal leh a. A tawp zan a ni bawka, tlemin kan rei deuha. Ban hnuah hmun kan phiat fel leh a, kan haw ta chauh. A tlai tawh vei nen thingpui rawn intum hoin min zui haw leh hram tho.

Inleng ho haw thlengin Patea a meng ve a. Zan dangah chuan a mu hma thei viau. Tihtur a nei anih loh chuan a mu hmaa, a tho hma leh tlangpui bawk.

"Bibi, Saitluanga a lo kala" Patea'n a ti a. Ka hawi phawk ngang mai. Lo len loh zan kha a ti ve sia. Eng nge a rawn tih le??

"Maw? Eng nge a rawn tih a?" Ka ti ha mai.

"A hrilh lo che a ti reng a.. Inneih chungchang min rawn sawipui a"  a ti a. Ka khawng nghal lah mai.

"Maw?! " ka ti hu.

"Amah leh amah a rawn inpalai anih kha" Mama'n a lo ti zauh a. Lawmi a nui hak a, mahse Patea'n Mama a khak zui nghal avangin Lawmi pawh a nui zui ngam lo.

"A puitling khawp mai. Inneih induh hun leh in lo tum dan min hrilh a, engtikah nge palai a rawn kaltir ang tihte, kumin a inneih mai a duh thute a rawn sawia. Khatianga min rawn zawt hmasa kha ka lo beisei ngai loh a ni a. Engamah hmain ka lawm hle phawt mai" a ti leh dap dapa. Sawi ve tur hre loin ka din ngaiin ka ding a, ka hrawk a ro hulh mai hian ka hriaa. Ka awmdan chu ka zah vang nge a chetdanin min barakhaih lutuk vang zawk pawh ka hre lo.

"Palai lo kal hun kha chu inpahnih tih hun hun kha animaia. Hmanlai atangin ruahman lawk  anih loh chuan ruangchhuah kumah inneihna buatsaih hi tihngai a ni mang lo a. Chu chu ka hrilh a, khatiang lam kha chu a ngaipawimawh hmel lo viaua. Lo bia la, lo sawi dun ula. Keichu ka inhawng reng" a ti leh charh charh a. Chhungkaw inpawh em em kan ni tho chungin Patea'n hmaichhana a sawi dap dap mai chu ka lai rum rum tho mai.

"U Thanga kan be dawn lo em ni? " Nutei'n a ti a. Ka phu deuh zawk mai. Ka pa hian ka pasal neihna turah ro a rel ve ka phal lo.

"Hrilh angai lo" Patea tawng hun pawh nghak zo loin ka ti hmiah. Ka thilsawi vanga ka chhungte pali-in min en thap chu tim map lo hian ka en let a. He thilah hi chuan tuman min nawr lui dawn lo.

"Aw le. I duh loh chuan ka hrilh lo ang. Mahse, inneih kan tithlu anih chuan Pa anih angin hriat hi a chanvo a ni a. Chu erawh min hnial thei lo ang" Min thlem titih hian Patea'n a ti dam diai a. Lo kal lo se ka duh cheu avangin ka hnial leh tep a, mahse Nutei'n mitmeia min rawn khap takah chuan engmah ka sawi ta lo.

Mut veleh Saitluanga ka bia ang ka ti a. Mahse, amah zawkin min rawn call hmasa a..

"Eng nge? " ka ti ringawt.

"Eng nge ka tihsual leh tak? " a ti sup.

"I lo kal dawn tih sawi ta che. Lo len loh zan iti vel a" Ka ti bung nghat.

"Ka hrilh che chuan i duh lo anga, chutianga tih chu a over thlak tihvel kha reitawk sermon ka ngaithla leh dawn a. Chuan, i duh loh tlat chuan ka ti lo leh mai thei bawk a" Ani leh ni lo ang takin a rawn ti duah.

"I tawngthei anih mai chu a" Tihngaihna hre loin ka ti ringawt. A thilsawi kha a sawi dik tih ka hre ve kar. Min hrilh lawk se chuan a sawi ang khan ka ti ngei ngei dawn.

"Bialpa tawngthei lo i duh tihna mi? " Awlsam zetin a ti duh lek.Eng anga nasa pawn tih thinrim tum ila a thinrim duh dawn chuang lo tih ka hre reng.

"Tinge nangmah ilo palai a? " Ka ti nghat. Lungawi anga awm lehnghal ngawt chu ka duh bau lo.

"Ka palai lo. I Patea ka rawn be hmasa anih kha" a ti fel leh et.

"Palai ka rawn tir dawn ti ve si" ka ti leh talh.

"Nizan kha chuan tirh ngei pawh ka tum alawm. Mahse, vawiinah Palai tur pakhat zin ngai a awm thut a. I Patea rawn biak hmasakna hun ka nei ta hlauh anih kha" Tha takin a rawn ti a. A sawifiah chiang thei lutuka, zawh belh tur pawh a awm lo.

"A tha alawm"  ka ti ta nge nge.

"Um, nawr hmanhmawh che ka duh lo a. Mahse, ka chan ang che tih ka hlau ve tho a" mahni inringtawk lo hmel zet hian a ti sup.

"Min chan i hlau maw? " ka ti sep.

"Um.. I danglam bikna hi min hmuhpuitu an awm ka hlau" a ti leh sup a. A aw dam leh titak lutuk chuan ka tah a tichhuak zawk.

Thla a liam a, November thla kan chuankai meuh chuan inneihni tur ruatfel a ni tawha. Kan chhungkua leh Saitluanga te chhungkua pawh inneih inbuatsaihna a kal mek a. Mak takin Pi Maduhi pawhin min rawn be fo a, inneih inbuatsaihna lam min rawn sawipui fo mai. A thiannu bialpa hlui leh an hnuaia thawk thin ka nihna kha angaisang lo viau emaw ka tia. Mahse, engmah awm lo ang maiin min be bawrh bawrh thei tlat. Diktak chuan he a mizia tak hi amah min ngainat tir thei miah lotu a ni thung.

Lala-i ka hmu zauh zauha, ahma ai khan a lo ngawichawi lehzual ta zawka. Biak loh phei chuan midang hrim hrim biak nachang a hre lo emaw tihmai tur a ni. Ka hmuh apiang hian a nu chungchang ka ngaihtuah zui chiam zel a. Saitluanga ka zawt mai dawn emawni ka ti that that zela. Mahse, amah hian a sawi ngai lo a. Tu pawh hian nunhlui kan nei vek a, ani pawhin nunhlui a nei a, fa hial a nei tihna  a ni ve maia. Hun kal tawh lo inzawh chiam kha dikin ka hre thei lo a. Ka zawt lo leh nge nge thin.

Ka kuta zungbun simple tak, nalh zet si chu ka en a, ka hriattheih tirh atangin inhualna zungbun ka bun ka lo ring ngai lo. Mahse, ka bun ta tlat chu ania. Ka piaha ding Saitluanga chu ka va en a. Collar T-shirt var, a taksa phuar deuh lek lek a ha a. Cotton kekawr uk duk lam, thui nalh zet a hakah a bilh lut a. Loafers dum a bun bawk. A kut lehlamin phone a kenga, a bula ding mek  Rinawma thusawi chu uluk zetin a ngaithlaa. A landan engkim mai chu sawisel tur ka hre eih lo. Mahse, ka pasal la nimai tur a ni tih erawh rin harsa ka la ti fo a, mumang nuam tak atangin ka harhchhuak thut anga, amah Saitluanga chawp hian an bo leh vek si ang tih ka hlau thin.

Ka en reng tih hria niawm takin a rawn hawi a, min rawn en a, a ban rawn vai zauh pahin a nui suk bawk.

NOTE : JUMP tih khi hre thiam lo in awm palh takin, PUBG game hi JUMP tiin an sawi mai thin a. Tiang khian ka ziak mai a ni e. Thalai chuan kan hre furin ka ring nangin tlema kum upa lam tan ka rawn sawifiah ve hrim hrim aw.🤗

Tin, Thil pakhat ho angreng deuh.. Tunlai zaithiam lar mek "Saiwanah" hi ka tleirawl lai chu nise ka atchilh nasa khawp ang😝😝 in hmelhriat anih chuan lo hrilh teh u😆🤣😆😆