Bibi - 25

 Chapter- 25

Insukna roomah ka awm a, ka insuk spin mek ka nghaka. Khua a vawt ve deuh tawh bawk nen ka inkuah khawr hlan mai.

Kan inneih atangin kar hnih a liam veleh  der tawh. Hnathawka ka kal thinna hmunah mo niin ka let leh ta chu ania. Tun thleng hian ka la awm thiam vak lo. Ka lai deuh hu reng mai hian ka hria a. Saitluanga te chhungkaw ho min lo dawnsawn dan ka ngaihtuah let a, kha aia tha zawk kha chuan tumah an dawngsawng chuangin ka ring lo. An chhungkaw mi niturin min pawm thlap niberin ka hriaa. Nu Saipuii leh Nu Sangberi phei chuan min fanu chei nghal chawt a ni ber. Saitluanga te In bikah hi chuan Na-i'n min lo lawm em em a. Santi erawh chuan min be tha ngam meuh lo emaw tihmai tur a ni thung. Kan inmil ngai lo ve em a, atan a nuam lo ve khawp ang. Mo ka nih tak vanga han inlek viau tuman erawh ka nei lem lo. Pi Maduhi pawhin min biak dam ki a danglam ta deuh a, rei ka la mo loh bakah hrawn tur nu leh pa awm lo anni a.In chhung boruak nuam lo leh mo nih hrehawmna engmah ka la hre hran lo.

Kan inneihni ka ngaihtuah let vang vanga, ka pa leh Patea teho inthlahrung duka an lo kal ve kha haw hle mahila ka khawngaih leh tho. Ka nuhrawn phei chu a damlo an ti nangin a lo kal ngam ka ring lo sa ve tawpa. A lo kal ta lo ngei bawk a. Chhungkaw tha tak, hna tha tak nei, mihring pianphungah pawh zahpuiawm lo em em pasal atana ka nei hi a mumangah pawh a hmu phak lo ang. Keipawn ka hmu phak ngai bik lo a, mahse ka nuhrawn phei chuan a suangtuah phak lo lehzual ang. Saitluangate chhungkaw lam an hung bakah a hnathawhna lam leh thianten an rawn tawiawm tha em em a. Nu leh pa nei lo anni tih pawh lang lo khawpin an lang zahawm. Keipawh Patea te chhungkaw lamin an fanu pasal nei ang tak takin min thlaha, mawihnai takin ka lawi ve bawka. Engkim mai hi Pathian vang tih ka hre chianga, ka nu ka ngai em em nangin mittui tihtlak ka tum lo. Mahse, Nutei zawk a mittui a tla sek khan minti ipik churh tho.

Spin sa a zo a, ka lachhuaka,suk tur dang ka dah lut leh a. Ka set zawhah Inchhunga ka phone dah la turin ka lut a, ka lut chiah  chu chokaah thil a tla keh chhuai ka hre nghal a "Awi, henu tak hi chu aw" Pi Maduhi'n a ti zui tuar chu hre zui zat bawk. Phawk zetin chokaah ka va daka,Dawhkan bulah Lala-i a lo ding zum renga, Pi Maduhi'n tur mangkhengin a lo dinchilh mek bawk.

"Fimkhur turin vawi engzat nge ka hrilh tawh che? Hrem i ngai anih hi" a ti leh hlawk hlawka.

Na-i lam a hawia, "ka awm loh lai a ni emaw ni lo emaw henu hian vawiin leh naktuk nilengin thingpui leh bawnghnute a in lovang. Lo pe lui suh ang che u" thupe aw takin a ti zui leh hmaka. Kawngka bula ka ding chu min rawn en a.. "No a tikeh leh tawh. Ka'n hrem ange" a ti a. A aw a dam leh thlap tawh. Mahse, ka rilruah thildang daih a awm ve thung. Ka mo hnuah leh hman atang khan Lala-i hian thil a tihchhiat ka hre ngai mang tlat lo.

"Naupang ngang ania... "alangah erawh chuan ka ti a, sawi pawh ka sawi zawh hmain min rawn tawngkhalh lehnghal zat.

"Naupang anih lai atang hian fimkhur azir ve angai" Khauh zetin a ti leh hmiah.

Santi hnenah no keh darh nuai mai chu tifai turin a ti a. Lala-i hnenah room a kal turin a ti a. Rang zetin a tlan nghal vat bawk.

Ka insuk pho tur kengin inchungah ka chho a, thlasik nichhuak chuan inchung zawl alo chhun eng iar a. Far kung a maimawmril zamte chu Niin a chhun zawngin an tle sep sep a. Christmas a hnai tawh bawk nen ngaih bik nei loin lung a leng vawng vawng mai.

Insuk ka zar zo a, Roomah ka lut a. Saitluanga a lo la tho lo a, niminah langin hna thilah an zin a. Nizan dar 11 velah an lo thleng a. Nidangah chuan zing hi a tho tlai ngai lo hle a, tukin erawh a chau ve deuh aniang. Tihharh hlauin thawm nei mangloin ka lut a, mahse ka lut thawm hria niawm takin a inleta, a rawn harh ta tho.

"Morning... " Mutchhuak aw zet hian a rawn ti nghal sup.

"Morning.. Tihharh che ka hlauh nen" Inthlahrung angreng fein ka ti a.

"Minti harh hleinem, ka harh sa tawha. Ka la tho peih lo mai mai" a ti leh a. "Lo mu leh la" a ti leh a.

"Ka sam a huh, mu thei ka ni lo" ka ti liam puat. Tukverh ka pan phei a, parda chhah tha zet inzar dulh mai chu ka pawtsawna. Mahse, ka hawn hmain ka hnunglam atangin ka kawngah a rawn kuaha, a lo kal thawm ka hre si lo va ka phu deuh zawk mai.

"Hawng suh, a vawt" a ti nghal supa. A sawi zawh rualin ka benghnuaiah a rawn fawp a. Inring hman loin ka thaw nghal hak mai. Ka kawr a rawn zen chho zui leh a, ka ngheng nghal titih..

"U Bd.. " Kawngkhar rawn kik pahin Na-i'n a rawn ti a. Saitluanga a phun nghal hluk. Ka nui ve hak thung..Na-i ka chhanglet nghal a. Saitluanga min kuahna phelhsak panin kalsawn ka tuma,mahse min rawn min rawn pawt bet leh rih..

"Kawr ha la, vawt i tih kha"  nui chungin ka ti a.

"Ka peih lo e a" a ti nghut. A awmdan chu mipa naupang titau a ang lutuka, kawngkhar lama kal pahin ka nui hak hak mai.

"I phone hi.. An be duh che a" a lo ti nghala. Ka phone a lo lek va va bawk. Inhnuaiah ka kalsan tih ka hre leh chiah.

"Eh, ka kalsan tih ka hre leh tawh lo reng reng" Nui chungin ka ti a. A kalsawn veleh roomah ka lut a, Saitluanga boxer nena khuma a thu mu chu zaizirin tho turin ka ti a. Ngaipawimawh lo zetin a awm ngaiin a awm reng.

Min rawn call tu ka en a. Remruata a lo ni a, zingkarah lehnghal eng chu nge maw a duh ve tehmial ni?

"Eng nge? I va tho hma ve a" Nel takin ka tinghal a.

"Mo thar hi ka rinaiin a tho hma a" a rawn ti ve nghal zat.

"I chhe lutuk, eng nge min lo call chhan? "  ka ti leh a.

"Msg i en thei lo a.. I zirlaibu kha i submit em? ' A rawn ti teh daih.

" Submit nang... Kum a tawp tep tawh tho sia ka lo tia" ka ti a.

"Good, Inah i kalsan ang tiraw? Ka zirlaibu ka tibo hmin thak. Exam inbuatsaihna tur ka siamsa pawh a bo tel veka. Midang hriat hmain hmanhmawh tawka siam that leh ka ngai" a rawn tinghal mawlh mawlha. A hmel ka mitthlaah a lo lang nghala, thil han bo han zawn chuk chuk hi chu a va han inhmeh tawh tak.

"I va han inhmeh thei tak.. Lawmi ka lo hrilh anga, I lam mai dawn nia" nui hak hak chungin ka ti a. A tih thin dan ngai te tein a rawn insawifiah leh chiam.

Phone ka dah hnuah Saitluanga ka en a, tukverh hawn dawna  vawt tisi boxer nen ala awm ta reng.

"Vawi iti maw tia? Tho la, anih loh pawhin mu tha law law la" ka ti nghat.

"Ka peih lo... " a ti tawi tuk ringawt.

"Hmmm... Vawt iti lo tawp anih chu a. Chaw ei a hun dawn sia, ka zuk chhuk ang" ka ti a. Tho turin tilui mah ila a tho duh dawn lo tih ka hre reng.

"Lo mu teh... " a ti hluk.

"Amak e... Mut leh hun pawh a ni si lo a" beidawng zetin ka ti hap mai.

"Ka ngai che alawm" a ti zawi sup. A hmelpa zetah chuan a ti tak tak tih alang reng.

Khumah ka lawn a, ka mu fel chiah tihin blanket a pawtchho a, min rawn kuah nghal a, a taksa lumna chu kan inkuah hnai bawka ka feel vang vang thei a. A bulah hi chuan nun hi a famkim thlap hian ka hre thin.

"Inneih zan ka ngaihtuaha, I hlauh zia kha" Nuihza aw deuh hian a ti a.

"Engmah ka hlau lo e a" ka ti ve nghat.

"Inneih kha duh lo la ka ru tho ang che" a ti leh daih.

"Min va han ru awm lo tak" Mahni inringtawk lutukin ka ti ve hmiah.

"Min neih loh pawi ti hek lo che" a ti nghut.

"Chutiang lam pawh a ni lo. Kha lehchen nula pangngai lo ni ve ngar ngar tawh, senior hnua han inruk lehvel kha ka duh lo bur. Naupang ho inruk tir loh tur tiin ka zirtir nasa ve thin ropui si, ka zak dawn em mai" ka ti a. Ka sawi zawh rualin a nui a, "Eng nge nuihzatthlak?" ka ti hlar mai.

"Engmah..."  a ti sup a. Ka kekawr kawng suihna a rawn pawtphelh zui nghal zat bawk...

"U Bd, tlai chaw in eichhuak dawn tiraw? " Na-i'n  ka hna kal tur min lo ti a..

"Aw, ei chhuak dawn e. Ti nge? " ka ti a, ka phone ka ah leh ah loh ka bag ka hai pah rak rak bawk.

"Ka zawt mai mai che mawle. Pi te pawh hian kan eichhuak dawn an ti a" a ti leh a. Pi Maduhi hi ahma atangin "pi" Tiin a lo ko tawha, kei hi chu min u maia. Ka duhzawk hrim hrim bawka, pawi ka ti lo.

"Ee, chuti law?? A sawi lai ka lo hre lo a.. " ka ti a, Saitluanga Motor horn ri ka hre zui nghal a. "U Mama'n a nghak che ni maw? " Hrethiam takin a ti a. Kan nui dun hak hak mai.

Seat hnungah kan thu duna, phone-in mi a be pah mawlh mawlha. Kan inneih hma khan hna hi a nghet lo a ni bawk nen thawk zawm lo ila pawi ka ti em tih min zawta. A theih chen chen thawh ka duh tih ka hrilha, hna nei lo a pasal han neih ngawt mai kha fa ka la nei lo bawka ka ngam tlat lo a. Ka rilru diktak ka hrilha, ani pawhin min tilui lem lo va. Mahse, fa kan nei dawn anih chuan bansan tura min duh thu a sawi ve tho.

"Office ban hun pangngaiah em ni kan kal ang?" a chhuk hmain a ti a..

"Animai ang chu ka ti. Duh leh kan Inah ka lo awm anga. Min rawn lam pah mai ula, a pawi em? Nge keimahin ka lo va kal dawn? " ka ti a.

"Inah eng nge haw leh kher ngai? Theihnghilh i nei em ni? "a ti hu.

" Nei nang, In tihah saw tah.... " Ka sawi zawh hmain a hmelah chuan sawifiah ngai loin ka sawi tum a hre sa tih ka hre thei a. Kan In ka ti kha min zawt lui mai mai tih ka hre thiam.

"Ok, I tih dan dan le.. Fimkhur deuh khan kal ula" a ti dam thlup.

Kan thawhpui pakhatin a hna chanpual a lo tifel lo va, amah lah chu chawlh ala daih zui bawk si. U Masangi ngaihdan ni lo a phun a phun a. Kei a nghet lo a thawk leh junior ber bawk si tan chuan lo sawi ve tul loin ka hriaa. Ngawirengin ka thiltih lai ka tihzawm mawlh mawlh ringawt.

Dar 1 dawnah thil kan ei thei ta chauh. Nileng lenga kal thin kan ni lo nangin vawiin chu kan buai a, naktuka submit tur a ni bawk si nen,kan bang hma hmel lo viau mai.

Ka thutna ep zawngin u Masangi a rawn thu ve a, chhang ei tur a keng a, amah hi nu thau lam, ngo lutuk lo a ni a. A vir buai deuh bawk nen thlasik lai mah nise a thlan mawm hluam tho.

"Hetiang ringawt chu ka tlin dawn lo. Pasal i nei tur pawh ka huphurh chhan ber ania. I pasalin thawh zui a remti lo mai ang tihte ka lo ngaihtuah a. Vawiinte hi awm lo la engtin nge maw ka thawh ang ni? Damlohna hi chu sawisel ngam a ni lo va. Mahse, ani damlo hi chu zu vang zel ania. Hetiang chu sawrkar pawh hian chhawr lek loh tur asin" a ti  hmawk hmawk. A la lungawi thei ngang lo.

"Engtik thleng nge chawlh a laka? " ka ti a. Engmah han sawipui loh ngawt chu dikin ka hre lo a. Mahse, sawisel lam zawnga tawng loh hram ka duh.

"Tunkar hi atia. A dam miau si loh chuan karthar pawh ala chawl dawn tihna animai" a ti hmuk.

"Anih chu mawle.. A zia lo thin em mai, a fate an la te ve si" ka ti leh a.

"A chhur khawp mawle... Ee, maduhi nena han mo dun ral ral mai chu eng nge a an hmel? " a ti leh daih.

"A fel khawp mai. A hma atanga lo inhre sa kan ni bawka, a zia reng" ka ti tha ve mai.

"A duh naah chuan a fel khawp ang. Mahse, a duh lohna lamah pawh a sual thiam ang"  A ti leh a. "I hre dik chiah" ka ti rilru a. Mahse, " Tu pawh hi duhnaah chuan kan fel a, duh lohnaah chuan kan sual vek nimai hian ka hria" alangah chuan ka ti thung.

"Ni chiah mai... Awi, tidaih ila, Honeymoon hmangin in zin ka lo ring lutuka. Tunlaiah chuan mizo zingah pawh a thei fa chuan an hmang vek tawh sia" a ti leh a.

"Saitluanga hian chawlh a nei lo lutuka" ka ti tha ve mai. Kan inneih dawnah khan zin ka duh leh duh loh min zawta, ka duhna hmun min zawt bawka. Mahse, amah zawkin chawlh kha a nei thei lo leh ta thut a. Remchanga la zinah tiin kan sawi zui leh ta miah lo.

"Rinai hian Officer ho hi chawlh an harsat thin ka ti. Keini hi a lo nuam ber mai. Sawrkar hnathawk theuh theuhah chuan lal lo mah ila kan zalen ber mai" nui hak hak chungin a ti a.

"Inpa hian hmelhriat a ngah dawn nen a nghetin luh tum la" amah bawkin a ti leh a. Ka nui ringawt..

Dar thum leh achanve velah kan haw thei ta hram. In ka thlenin Nutei leh Lawmi an lo awm a, kan ri nghal hlut mai. Kan inneih hnuah ka vawihnih kalna a ni a. Ka hna bang hi Saitluanga'n a Driver min rawn lam tir deuh ziah avangin heta penkawi fo hi nuam ka ti lo thina, pen pawh ka pengkawi ngai lo. Lam ka ngai lo ka tih lahin engahmah angai der bawk si lo.

"Eng nge min rawn tlawh khat em em a? " Lawmi'n a ti bai bai mai.

"Awi, khat tihtur pawhin karhnih vel chiah ka la awm lo a. Tun hi ka vawihnih lo kalna a ni tawh ania. Ka lo kal zing zawk alawm le" Thiamchan tum ran hian ka ti ve vat.

"Helamah tho hna i kala, rawn luh kawi fo theih ania. Mahse a pawi lo. Mahni In lam kal tam chu neuh neuh atam duh an tih kha" Nutei'n a lo ti ve vat a.

"Ni e... Aaa, Pasal nei lo chuan inhrethiam lovang" Chhaih thinrim tumin ka ti a. Ka tum ang ngeiin Lawmi a tum nghal hmak mai.

"I phone kha.... " Mood uih zetin a ti hmaka. Ka bula ka phone dah chu ka ban vata, Saitluanga'n min lo call a lo ni a. Kan titi vel avangin phone lam ka lo ngaihven lo..

"Hello... " zangkhai takin ka ti a.

"Khawiah nge i awm? " A rawn ti sup.

"Inah... Nutei te" ka ti leh vata, Lawmi lo ner nawng nawng chu ka en a, ka nuih a za ngang mai.

"Ok... Dar 4-ah hian hna pawimawh ka la nei a, ban hun dawn mah nise a laklawh riau maia. Inah khan kan veng Football club hruaitu pakhat alo kal dawn a. Ka sponsor-na tur pawisa pek an ngaia. Transfer mai ka tuma, Mahse cheque an duh deuh tlat a. Sign sa ka daha. I lo va haw leh lawk hman mai em? A zat tur ka rawn hrilh che anga. Ilo fill up mai anga. Driver ka rawn lamtir ang che" a rawn ti duah.

"Hman e. Driver tirh angai lo ang. Hetah scooty hman tur atam alawm" ka ti a. Min hnial deuh nangin ka tang ve tlat.

Gate-ah tlan lut loin kan Gate sirah Scooty ka hung a, Motor a awm loh ve ve avangin Saihmingate pawh an chaweina turah an kal tawh a ni tih ka hre thiam mai.

Kawngkhar lo inhawng saah ka lut a, thawm awm loin a reh thap a. Na-i leh Santi an awm turah ka ngai a, inchungah emaw room lamah an awm anih ka ring mai. Kan room ka pan chho a, ka rin ang ngeiin Nai'n insuk a lo seng mek a. Earphone a vuaha, ka thawm pawh a hre lo.

Ka thil lak tur ka la a, inhnuaiah ka chhuk lehnghala. Na-i kuta  dah mai tum ka ni a. Inchungah khan ka hmu tawh loa, choka lamah a awm ringin ka pan pheia. Mahse, ka thil hmuh vangin ka penlai ka tawp chawt mai.

Saihminga leh Santi lo infawp ngawng ngawng chu rapthlak ti lutukin ka en a.Ka hmusual emaw ka ti hial. Mahse, infawh mai lo thildang tihtum anga an lan takah chuan min hmuh ka hlau thut a, rang zetin ka tawlhlet a, Kawngkhar lam ka pan phei nghala,ka lungphu rang lutuk leh ka khup khur hlawk hlawk vangin ka kal chak thei lo.

"U Bd, I lo let leh alaw? " Na-i'n min rawn tih ri ka hriaa. Ka ding chawta, ka hawi let a. Nuih ka tum a, ka hlawhchham...

"I lo haw tih ka hre miah lo a. I kal lehnghal dawn mi?" Tih pahin Choka lam pan a tum a, Inring hmang loin "Na-i" ka ka ti vaka. A ding chawta, ka au ring deuh bawk si nen mak a ti hmel ngang mai.

"Eng nge? " Mak ti tih hriat tak hian a ti a. Tawng loin thawk ka la leh te te. Diktak chuan Chokaa ka va hmuh kha hmu ve lo se ka duh tlat...An thil lo tih mek kha thupsak ka tum a ni lo. Ka rap lutuka, keimah zawk hian Na-i'n a hmuh ve ka hlau tlat zawk...

NOTE : Zanin chu ka thil ziahna hian min phatsan tlat.  Keypad a ka type hnu feah te hawrawp a rawn lang a, ka ziah tum loh loh a inziak thul. Edit pawh ka edit ngam lo.... 

Tin, Inneih lai vel kha ka ziak ta lo mai aw. Duh aiin a fan thui dawn tlat a. Phone atang chuan chapter khat a thui thei si lo va, duh aiin chapter a tam dawn riau a. 

Clickte kha phal zel a ni a. Tin, ka zaithiam star SAIWANAH in hre lo kha ka la na tlat. Nakinah a thlalak ka rawn dah tel ang😝