Bibi -26

 Bibi - 26

"U Bd, i dam lo em ni? I awmdan avan mak ve" ka tawng mai si lo chu makti deuh hian Na-i'n min ti leh a. Ka cheque ken lai ka hre chhuak thut.

"Nuam e, ka hrawkah hian thil tang angin a awm a. Chuvang mai mai chu mawle. Nakinah mi Pakhat a lo kal anga, hei hi lo pe la" tih pahin ka envelope ken ka tilang a.

A rawn kal phei a, envelope ka pe a "Amah a lo insawi mai dawn em ni? " Tih pahin a lek kual vat vat mai.

"Aw, lo insawi ang.. " ka tihlai mekin Choka atangin Saihminga a rawn chhuaka, tul lo zetin ka pum a let nghal but a. Ka uak teuh ngang mai bawk.

"Chaweina turah i kal tlang nghal dawn maw ka tia? " Danglamna nei map lo hian min rawn ti a. Chhan loh ka chak ngei mai. Mahse, chhan loh ngawt chi a ni der si lo.

"Saitluanga thil pawimawh tih lawk ngai a awm a.. " ka sawi zawh hmain Doorbell a rawn ri a. Kawngkhar hnai bera awm ka ni bawka rang zetin Kawngkhar ka pan hnai a, ka hawng zui nghala. Kawngkhar bulah Ramfela a lo ding vang. Vawi tam kan Inah hian a lo kal tawha, Saitluanga nen an Inkawm ve nasa a. Sport lamah an tui dawn em em bawka. Cheque rawn lam tur pawh hi amah anih ka ring mai.

"Lo lut rawh" ka ti nghal var.

"Aih, lut lo ang. Pawnah sawn min nghaka. Saia khan i bulah Cheque lam turin min ti a.. " a ti a.

"Um, Na-i kutah ka lo dah hman chiaha. Lo nghal lawk aw. Ka rawn la ang" ka ti a. Ka hawi let a, ka bul maiah Na-i a lo ding hnai tawha, Saihminga erawh a lo kalsawn hman tawh.

Lawmthu min hrilh a, ka hnial deuh nangin kan inpe lai thla Na-i alak tir talh. "In pa a lo awm si lo va. Kan jersey leina tur zawng zawng a tum vek a. Kan lawm em a, vengchhung groupah te pawh kan tilang duh alawm" a ti a. "Kan pa zawkin alawm pe che u" ka tih pawhin  "In pa a awm si lo va, a ai i awh angai" a ti ve tlat.

Ramfela kal veleh Na-i hnenah ka kal veleh nghal dawn tih ka hrilh a, Saihminga ka hmuh peih lo tehreng nen ka kal hmain a rawn lang leh hman ta tho. Maduhi nen chhungrilah inmil lo em em kan ni a. Mahse khatiang zawnga a pasal a khawsa kha chu Maduhi lamah ka tang fel nghal hmak tih ka inhre nghal thei.

"Ramfela kha mi i nghaha? " a rawn ti nghal a.

"Aw.. Saitluanga'n kan veng football club ho jersey leina tur a pe a. A rawn lam anih kha" Pangngai thei ang berin ka ti a. Mahse pangngai taka lang tur chuan ka beihfe angai thung.

"Inkhel lian tham awm dawn apianga jersey lei thar ziah an ngai hi amak ania. Dawr hming pawh hian kan tihsak nasa tawh" a ti a. Ka bu ringawt.

"I kal lehnghal dawn mi?" min ti leh a. Nidangah kan inbiak tam loh thin nen vawiin ataka min be sek mai chu ka ngei zual hluah hluah. Chhan loh theih ni bawk si lo.

"Aw, kal dawn. Nangpawh dawr atangin i kal nghal dawn maw ka tia? " ka ti hram.

"Thil ka theihnghilh a. Ka kal leh dawn chiah" a ti a. A awmdanah leh hawiherah chuan a nupui bumin midang tenawm takin a khawsakpui tih a hriat eih loh. Khatiang khan an vawikhat awmna a ni lo tawp ang tih ka hre thiam maia. Mahse, engtin nge Maduhi hian a hriat loh theih? Mi fing lem lo pawh a ni si lo...

Ka scooty khalh pawh ka ngaihtuahna mumal lo vangin vawihnih ngawt ka tlu tep mai. Ngaihtuah loh ka tum pawhin ka thei hlawl lo.

In ka thlen veleh englaipawha min chik reng thin leh min hre chiang em em tu Nutei'n"I va nawm loh hmel ve" min lo tinghal chat mai.

"Nuam e.. Scooty ka khalh khat lutuka, ka confi lo lutuk a" Vei nei awm lo takin ka ti liam puat.

"Tlaw mai mai e a" Min ti hluk.

"Confi a har ve zia chu a" ka ti leh a. Min chhang tawh lem loin Archaw pe turin inchung lamah a chho a. Thlasik lai a ni bawka ni a tla hma a. Dar li leh achanve chauh a ni nangin khua a lang tlai ruih tawh tho.

Tihtur a awm lem lo bawka inchungah ka chho ve a. Nutei ar In tlar thap mai chu ka en kual dan dana. An len dan indawtin a dah thliah a, pasal ka neih hma khan a tul bikah lo hi chuan ka enpui ngai meuh lo a. Ar note alakna la rei lo deuh ni a ka hriat pawh an lo lian leh vek tawh. A thlai leh pangpar ho ar ekin a chawm bawka, an tha hluah hluah hlawm mai.

Nutei a titi mawlh mawlh a, ngaithla reng mah ila ka rilruah thil dang a lut tak tak thei chuang lo.
Saitluanga leh Lawmi an rawn chho ve a, Nutei'n Saitluanga hnenah ar leh thlai chungchang a lo sawipui chiama. Saitluanga hi helama thawk a ni bawka. An sawi dun thei viaua. Nutei Dragon fruit phun dan leh lei tha pek ngai zatte a hrilh luam bawk.

Kan kal tur Patea'n min rawn thlaha, "Ka u ten an huan pakhat min chansak teh an tia. Thlai awmsa a awm nual tawha. Inrinni hian ka zuk en dawn mawni ka tia. Thlam sak sa ania, chhungkaw picnic pahin zuk kal mai mai ila ka lo ti deuha. In lo kal ve hman angem? " Saitluanga hnenah a ti a.

"Hman awm tak.. Tihtur dang ruahman sa i nei em? " Min ti a. Ka neih loh thu ka hrilha, "anih chuan kan thei ang. Dar engzatah nge kal intih a? " a ti leh a. Kal hun tura atih leh kal tura a sawm ho a sawi dan dan.

"Kan nupa pual deuh a ni sia, Driver ka hawtir a" Kan tlanchhuah hnuah a ti a.

"Um.. a tha lawm, kan mimal thil leh lutuka chhawr chu nuam ka ti vak lo"  ka ti ve mai.

Rohminga-te in kan thlenin an chhung an lo kim thap tawha. Rohmingi nu hi Lawmi te koh danin "Ni" Tiin ka ko ve mai a. A fel em em a, apasal Pa Zaia lah pa tha tawpkhawk a ni a. An fate pawh an fel viau vek.

Rohminga leh Saitluanga inhre sa anni a. An titi bawrh bawrha, kan boruak a nuam viau. Dar 8 pelhah kan haw ta chauh.

"I nuam lo deuh em? " Kan haw kawngah min ti thut.

"Nuam e.. Ti nge? " ka ti a.

"I nuam lo hmel ka ti mai mai. Nichin atang tawh khan i nui lui hram hram nimaiin ka hriaa" a ti leh a. Ka rilru nawm lohna thup ka tum hlea, ka thup viau pawhin ka lo inhriaa, mahse min chik tu leh min hre chiang tu chuan ka awmdan a lo hre ru tho mai.

"Ka lu a na deuh a, chuvang chu aniang. Na  deuh han tihtur pawh chu a ni lo" ka rilru a lo lang hmasaber phat nan ka hmang hmiah.

"Um, aniang.. Tarmit i vuah tha peih lo thin a" a ti tha ve mai.

"A ninawm ve em a... " ka ti hap. Chanmari kawn kan tlanpel phei a. Kawngchhak remchang laiah zan lama eitur an zawrhna dawr a lo awm phei pat a, mi tam vak loin an lo bawr laih laih chu ka en a. Lawmi te nena zana titur nei lo zeta kan han ei ve ngawt tum ka hre chhuak nghal vang vang mai.

"I nuam lo hmel sia, I rai aniang ka lo tia" a ti leh a. Rang zetin ka en a.

"Eng maw? " ka ti ringawt. Ka hriat loh vanga zawt nawn phei chu ka ni lo.

"Ka rai aniang i tih ka ring a" a ti nawn leh a. A la nui zui.

"Rai lo... " ka ti tawi fel at a. Pawn lam ka hawi leh daih.

"Rai lo ang ka ring.. " a ti leh a.

"Karhnih leka rai tura lo inbeisei te chu a... " Ka ti hmak.

"Ok..... I rai lo" A ti nawn a, a la nui hawk hawk zui bawk. Ngei zetin ka melh ram rama, eng nge maw han nuihpui tur awm ni?

"Min melh hlum i tum tihna mi? " Rawn hawi miah loin a ti leh a. Ka melh rum viau tih engtin nge maw a hriat ni?

"Inmelh ringawtin tu nge thi ang? " ka ti bak hlar mai.

"Te si, den si... " a ti zawi supa. A nuih ala za tih a awah ka hre thei. Ka mood chhiat zia a hriaa, min chhaih nuam a la ti zui a. Ka thil hriat kha hre ve se engtin tak awm ang maw? Ka hrilh ang nge Maduhi ka sawipui hmasa ang? Reipawh ka awm hmaa khatiang ka hmu kha ka vanduai nge ka vannei zawk pawh ka hre lo. Saitluanga Motor khalh lai chu ka en vang vanga, kha thil tenawm lutuk kha hria se a nui lo chiang viau ang.

In kan thlenin Saihminga te an lo haw tawha. Pi Maduhi leh Santi chokaah an lo awm a. Cake ur na tur buaipuiin an lo inchhawp hnawk ngang mai. Santi ka hmuh rualin ka luak a tichhuak thut a. Mahse, ka luak ta em lo. Pi Maduhi'n rilru sual pu miah lo va a titipui bawrh bawrh chu ka khawngaih thut a. Mahse, mak deuhin ka rilruah thildang a lo lang zawk. Pi Maduhi hian hrereng chungin a haider a nimai angem? Ni lo.... Chutiang a ni thei lul lovang.

"Thingpui hang kan lo in dawn chiaha. In in ve duh em? Santi, siam kep rawh aw" Zangkhai takin a ti nghal a.

"Aih, keichu ka duh lo mai. Ka puar lutuk" ka ti a. Saitluanga zawk chu roomah a chho tlang daih tawh.

"Ka han inthlak ange. Tihpui i ngai em?" ka ti leha. Hetianga thil siam neuh neuh hi ka peih zawng a ni lo va. Mahse, eirawngbawl erawh nuam ka ti viau.

"Ngai lo e. Hei kan zo tep animai" Hmel hlim takin a ti dam leh thlap.

Roomah ka chho a, Saitluanga a lo inbual mek a. A vawt deuh vur nangin intleuh ve zawk ka duh a. Bathrobe ka haa, Saitluanga inbual nghah pahin Tv ka en a, Tv en khat tihtakah engmah ka en tui chuang lo.

"I inbual ve duh ka ringa, Tui lumna ka on ania" a rawn ti chhuaka. A sam a hru pah mawlh mawlha. Boxer chauh a haa, a pian nalh zia ka lo ngaihtuah leh hmanhmawh.

Tui lumah ka inchiaha, intleuh zawk tum siin nuam ka ti ta phiana. Ka inchiah ta vang vang.

"B.. I va rei ve? I muthlu em? " Kawngkhar rawn kik pahin a rawn ti a. Ka harh zawk mai. Ka lo muthlu hman sek chu niin..

"Ka zo tep... " Ka ti vat a. Min chhang tawh loin kawngkhar a rawn hawng a. A rawn daka, ka kalh emaw ka tia, ka lo kalh lo pek chu niin.

"In tleuh la... A vawt vur bawk sia, I hritlang ange. I hnar a ping leh vak dawn ania" a rawn ti nghal a.

"Um, intleuh dawn. Khar phawt teh" ka ti ve thung.

"A va han ho thei e aw.. Pasal bulah pawh zak tlat zel mai" Khar pahin a ti nuah nuah.

Ka intleuh fai nghal sawk sawka, ka lo inchiah rei deuh nen ka khur ta hlak hlak mai. Room ka  luta, Saitluanga a lo inkhel a, hunawl a neih hi chuan Pubg game a khel ve thin a. Mahse, a hna leh nunphung tibuai tur khawpin a khel ngai lo. Achang chuan a khel lai ka en ve thina, ka lo tang ve em em zel mai.

Make-up lawm lo tak mai ka ni nangin skin care routine erawh a theih phawt chuan pelh miah lo chi ka ni a. Ka hmai vun hi a sensitive em avangin miin tha an tih nazawng ka hmang thei lo a. Man to tak tak pawh ka ngeih chuang lo. Mom's co Product ho ka duh ber a. Regular takin ka hmang bawk.

Mu chungin Lawmi msg ka reply a. Papuia chungchang leh a rilru hahna a rawn sawi teuh. Saitluanga a rawn mu ve a. Light a off vek a, a thim ta thap. Light on chunga mut hi ka thiam lo a, hetianga thim thapa mut hi nuam ka ti ber. A dar hlai hlapah ka lu ka daha, a awmah ka kut ka daha, a lungphu nghawr dat dat ri ka ngaithlaa. Min mangtha paha ka sama a rawn fawp zui vang vang chuan min ti thlamuang ngawih ngawiha. Mahse, tlai lama ka thiltawnin min kap run erawh a reh thei chuang lo.

Saitluanga muthilh hnuah pawh ka muhil ve thei ta mai lo. Ngaihtuah loh ka tum pawhin ka ngaihtuah ngut nguta, Saitluanga ka hrilh ang nge Pi Maduhi zawk ka hrilh ang ka hre thiam lo a. Nge Saihminga ka khak zawk ang? Aaa, reilote chauh ka la awm ve a. Khak ngawt ila a ngaihdan a lo ni lo fe thei. Saitluanga hrilh ai chuan Pi Maduhi hrilh ila a fuh ang.

Ka harhin khua a lo var vek tawha, Parda inzar phui lo kar atangin ni zung a rawn inkap lut raih bawk. Ka inlet a, Saitluanga mutna a lo ruak a, tukdang ang bawkin inkhelin a kal anih ka ring mai.

Ka inphihfai hnuah Inhnuaiah ka chhukthlaa,  a hma lutuk tawh lo bawka Pi Maduhi te nufa pawh an lo tho tawh. Pi Maduhi tum deuh bur chu ka en zawka, ka thilsawipui tur kha han hrilh nan chuan hun tha a ni lo tawp tih ka hre thiam mai.

 
"Good Morning' Lala-i en pahin ka ti a.Min rawn melha, a duhtawk mai. Tho hlim mood a pe chhe thei viau tih ka hre ve tawha. A awmdan pawh mak ka ti lem lo.

" Angela, an biak che kha chhang ta che" Pi Maduhi'n a ti bak hlak. Mahse, min chhan tumna nei hmel a pu lo. A thilziah lai a ziah zawm leh mai.

"Be suh u tuman, hetiang naupang sual hi biak reng reng loh tur" Pi Maduhi bawkin a ti leh hlak hlaka. Nu-in a fa a hauh dan tur rengah ka ngaia, ka nui liam mai.

"A va mak e aw. Ziak uluk ta che" Tih leh ben a rual a, ka thingpui siam tum mek ka tawp chawt. Lala-i tap ri ngam si lo a tahchhuak hmel chu ka en a. Min rawn en ve a, a muttui a biangah a luangthla nghal a. Ka hawisawn vat.

"Midang en kual vel suh. Tuman an chhan dawn lo che, ka thu lo chuan tumah hian i chungchang an sawi ka rem ti lo. I hria em? Ziak tha lehnghal rawh, I ziah dik loh chuan chawei loin i kal ang?" a ti leh hlawih hlawih a.  Naupang hau satliah pawh a ang lo. Keimah zawk min vau nimaiin ka hria.

"Ziak vat rawh. Nizanah iti duh lo kual a. Thuawih loh chu a buaithlak asin. Na-i, khawiah nge Santi hi a awm? " a ti leha.

"Inchungah pangpar tui ka pe dawn a ti" Na-i'n a ti vat a.

"A va han pe rei em em ve. Han ko teh, Angela-i uniform kha a nawt em ka hre duh ania" Thupe aw zet hian a ti . Hmanhmawh fein Na-i inchung panna step lamah a kal nghala. Kei lah ka ding ngawi reng bawka.

"Santi pawh hi ka duat deuh a, mi fing lo tihtakah awmpui tih a inhre lo lek lek tawh. Tihtur ka sawi hun pawh nghak lo hian ama thu thu hian a che ve ngawt zel mai" A tizui leh hmawk hmawka. Tukin chu a mize lehlam hlir kan hmu dawn anih hmel. Hetiang hi chu hre zeuh zeuh turah ka inngai sa a. Mahse, Lala-i a hauh dan leh naupang bula tawngkam hman a fimkhur lem lo erawh mak ka ti tho.

Ngawirengin thingpui ka in zawma. Reivakloah Na-i leh Santi an rawn inzui luta. Santi hmel chu chik angreng takin ka en a, a vun a nung sar a. Hmeltha han tih vut tur ni lo mahse alangthar sara. A mize nu angreng tak hi mipa chuan an duh viau maithei. Tin, Pi Maduhi hi nu harhvang tak a ni chungin rinai hian a pasal hi midang kut hmangin a buaipui mah mah tih chang ka nei fo. Santi leh Saihminga lo inngaizawng vel ka ngaihtuah zawngin ka pum a let leh but a. Ka uak teuh ngang mai bawk.

"Lala-i form kha i nawt ta em? Nizanah ka hrilh che kha" Pi Maduhi'n a lo ti nghala.

"Aw, nawt tawh e" a ti vat. Kei aia Pi Maduhi hre chiang zawk ve ve anni bawka. A mood han danglam velah pawh awmdan tawk an thiam hmel khawp mai.

"A ziah zawh veleh chaw ei theih turin lo siam rawh. Zing karah chuan ngaihpawimawh zawk dang lo nei tawh suh. Na-i ringawt tan inchhung chet a hautak ka tih fo kha" a ti leh a. Tun tum chu a aw a dam ta deuh.

"Ka lo siamsak dawn em ni? Ka hman tho a" ka ti a.

"Angai lo, pawisa hlawha titur an awm reng laiin lo tel ve duh suh" a ti leh khera. Ka tek sawk mai. An hnuaia ka thawh laia min lo en dan hniam tur zia ka hre nawn leh a. Ka lo inhriat dan ai khan min lo la hmu hniam fe tih ka hre chiang ngang mai.

Thildang ka sawi leh hmain Saitluanga a rawn haw ta hlauh. Roomah ka zui chho a,  step a kan chhoh laiin Pi Maduhi'n Lala-i a vin that that ri ka hre thei a. Rilru thawven loh sa nen min ti ipik zual vekin ka hria.

"I inbual nghal dawn mi? " ka ti a.

"Um.. Bual nghal ang. Vawiin chu meeting vawi hnih ngawt ka nei dawn a" a ti a. Hna chungchang hi kan sawi dun khat angreng viau.

"I office-ah ve ve anih chuan a zia alawm" ka ti satliah.

"Um, tunlai chu Sawrkar chet fel loh zarah ka buai anih ber hi. Tun ang thlasikah hian thlai tiak tul lo pui pui ka sem e an ti mai maia. Tu nge thlasik laia thlai tiak sem ngai ni? " a ti nghut.

"Coffee in chawi animaw? I rawn hlim lo tlat" Nui chungin ka ti a.

"Chawi e... Ramfela nen kan tang duna,angaihna a awm lo. Style-ah hian a buai tawk em em maia" a ti hlur.

"Chak loh chang pawh a awm ang chu le" ka ti satliah leh mai.

"Inlak style vel vanga chak loh chu ninawm deuh ania" a ti leh a, mahse thinrim hmel a pu lo.

"Tukin chu Lala-i nu mood a fuh lo a, an inhau tukpum thei mai ang ka ring" ka ti leh a.

"Eng nge a tihsual leh taka? " Nin hmel deuh hian a ti a. A tihdan tehngawt chuan min dek zak mai.

"Tehngawt a... Engmah a tisual lo, a nu mood zawk a chhia. Ka sawi tur phei chu a awm lo a. Mahse, duh ai hian a tawngkam a uluk lo ka ti. Naupang hriat laia hman atana awm lo deuh deuh a hmang a" ka ti duah. A thaw deuh hawka.

"Lo inrawlh duh suh" a ti nghut.

"Ka inrawlh lo... Ka ngaihdan i bulah ka sawi" ka ti ve hmak.

"Ok.. Ok, i inrawlh loh chuan a tawk anih chu. An buai buaiin buai rawh se. A hau anih pawhin a tul animai" a ti leh duah.

"Ka hrethiam thei lo che" ka ti hul hak mai. Mahni fa, a hmuh lai renga an enkawl dan a namnul lutuk leh kut a sil hneh lutuk chuan minti thinrim hluah hluah.

"Eng nge hriatthiam loh tur awm? " A ti bung vut.

"Sawi mah ila i hrethiam lo vang" ka ti ve hmak. A inkhelhna thawmhnaw balbawma a dah lak tumin ka pan phei zui daih. Mahse, ka la tur chiah chu ka kawngah a rawn kuaha. Ka darah a hmaiin a rawn nawr a.

"Sorry.... Tih thinrim che ka tum lo ania" a ti nghal sup bawk.

A rawn chet dan tehthut chuan min ti hamhaiha, tawng leh mai dan tur hre loin ka din ngaiin ka ding ngawi tawp.

"An inenkawl danah mai pawh ni lo, Lala-i chungchang hrim hrimah inrawlh lo turin ka ngen duh che. Ka hrilh tawh che ang khan an nupa hian fa anga an enkawl a ni a. An rilru tihnatsak ka duh lo" amah bawkin a ti leh a.

"I hmangaih lo em ni? " ka ti chhuak halh mai. A  insangmar deuh talh talh chu ka hre thei a. Min kuahna a thlaha. Amah en thei turin min kuai her a.

"Tu nge mahni fa hmangaih lo ang? Harsa ti chung chung pawhin an thatna tur atan kan ngawih angai asin" a ti zuai ruih a. Amah nena inhmeh lo zetin a inringtawk lo hmel em em bawk.

Nupui ka nihna a rawn lang leh ta chat. Ka pan hnai hrata, ngawi rengin a kawngah ka kuaha, a awmah hmai ka phui zui nghal a. Ka thinrim ta lo ni loin, ka nawrlui mah mah niin ka hria a. A fanu a tihdanah ka hre thiam ta tihna pawh a ni chuang lo. Inhauh buai nana hman a duh lo ang bawkin keipawhin ka duh bik lo a ni zawk.

"Ka hmangaih che" a ti sup a. Ka samah a rawn fawp a, ka mit chhing chungin a lungphu dat dat ka ngaithla a. Ka pasal Saitluangpuia hi ka ta a ni a, a ta ka ni bawk.

Pi Maduhi nena inbiak falna hun neih tumin ka nghaka, hun a awm thei tlat lo. A mood chhe lutuk a zia leh vek tawh a. Inchhung boruak pawh a zia leh ta viau. A mood chhiat over lai pawh khan Saitluanga chuan engahmah a ngai lem lo. "Nangmah a khak che anih chuan dawh reng reng suh, anih lem loh chuan a biak loh che leh be lo ve mai rawh" a ti hmiah.

Mak takin Saihminga leh Santi te an khawsak phungah han rinhlelhna tur eih pawh an awm lo. An awmdan kha hmu lo ila chuan an inngaizawng tih midangin min hrilh se ka awih ka ring miah lo. An inthup theih dan em em hi mak tak a ni. An awmdan ka ngaihtuah let khan thil thleng palh a ni lo tih achiang em em bawk si...

Zirtawpni hna bang ka hawin inchung zawlah pangpar vel buaipuiin Pi Maduhi a lo awm a. Midang an awm ve em tih ka melh kual a, an awm lo hlauh. "Pi" Tiin ka ko fo thin kha ania. Tunah hian han Pi leh kha a dik thei tawh si lo. Mawlbiak ka chin phaha, a zia lo viau.

"I va lo haw hma ve" min hmuh veleh a lo ti a. 

"Nia, nang zawk pawh i va hma ve" ka ti ve a. Thir thutthleng awmah ka thu a, a pangpar lei thar niawm tak, pot tereuh te tein a hung tlar dal mai. 

"Vawiin chu class ka nei tlem a. Pangpar hi ka nuin min lo leisaka, pot lianah hian ka thlak ang chu ka tia. An nalh hmel hlawm khawp mai" a ti a. 

"Thil sawipui che ka duh a" Ka ngawih deuh ren rawn hnuah hreh zetin ka ti ta hram. Ka sawi huna a den nat dan tur ka ngaihtuaha, ka khur chhe lo chauh zui. 

"Eng chu? I serious bawk sia" Nui hawk hawk chungin a ti a. A hmel hlim tak chu ka en a, sawi leh lo mai tur nge tih ka ngaihtuah a. Mahse, tun bak hi hun a awm lo. Bakah, ka zep tlat hian sual ka vulh lian mai mai. 

"Hmanni chaw kan ei chhuak tur kha ka let leh a..." ka ti tana. Ka let leh chhan leh in ka thlen hnu ka sawi zawm zela. Ka kal leh turin Chokaa ka thil hmuh ka sawi thleng chu ka aw a lawi titih a. Ani lah a thil tihlai a tawp nghal hmak bawk. Ka sawi zawm zela, amah hrilh ka duh thu leh hun awm loh dante ka sawi a, ka sawi zo chu ka thaw huai mai. 

Muangchangin a dingmar a, ka thutnaah a rawn thu phei ve a. Engmah sawi lo a a awm chhung chu darkar tamtak chhung nimaiin ka hria. 

Min rawn en a, a mitmeng lian leh zahawm zet chu ka melh zawka, thil tisual tu zawk ang maiin ka en rei ngam lo. Ka khawngaih em em tawp mai. 

"Thil pakhat chiah ka zawt ang che" a ti dam thlap. A awmdan hahdam hmel lutuk chuan min ti hamhaih a. Engtin nge hahdam hmel taka a awm theih ka hre thiam lo. 

"Sawi la... " Nuam lo ka tihna thupin pangngai thei ang berin ka ti a. 

"Kan pa leh Santi awmdun lai i hmu tak tak nge Na-i'n a hrilh che" a ti vawt raih. 

Mak ti lutukin ka thu mar awka, a thilsawi ka hre sual emaw tiin ka melh reng ringawt... 

NOTE : In zarah ka mit a phe tha ruai ruai hle a ni😃 phone atang chuan a hawrawp a sin nasa mai sia, ka mang a ang tak tak tawh. 

Tin, Saiwanah lo va zawng tute kha ka hmangaih vek che u🤣