Bibi - 27

 Chapter - 27

"Na-i hrilh che anih ka ring a. Nge i hmu tak tak zawk? " a ti leh a. A zawhna awmzia reng reng ka hre lo. Ka hmu tiin chiang takin ka hrilh mawlh mawlh si.

"Ka hmu ka tih kha.. Ti nge Na-i daih pawh chu i sawi a? " ka tum aia bung angreng takin ka ti a. Min ring lo viau tih ka hriatna chuan min tim thinrim tlat. Min chhan pawh tum lo niawm takin a hmui a pet a, ngaihtuah ding tak nei niawm tak hian a melh ngai a melh ta veng veng.

Angawih tak vang vangah chuan ka hrilh ta kher kher kha ka inchhir lehnghal titih der. Min  ring lo hmel bawk si..Ti nge Pi Maduhi hrilh lo hian Saitluanga zawk kha ka lo hrilh loh ni? . Mahse, Saitluanga hrilh ila eng nge awmzia awm ang? A nau a hau anga, a nau-in a lo pha anih phei chuan buaina mai mai a ni a. Dik lo takin a nupui bulah a insawi fihlim zawk hlauh thei a. Thilsual tihna hun ka siamsak zau mai mai thei tlat. Saitluanga pawh hian ngaihzawng lo nei ta se, a ngaihzawng neih lo hre tu ka thian hnai leh chhungte zingah an awm anih chuan min hrilh se ka duh ang tih ka chiang. Min hrilhtu lam kha ka huat ka ring lo. Min duhsak vangah ka ngai ang. Hre renga min hrilh lo anih erawh chuan an hria tih ka hriat hunah ka mihran hmak duh zawk hial ang.

Reife angawih hnuah a aw a thian khauh a. "Zep theih a ni ta lo anih hi tiraw? " a ti fan raih a. A sawi hre thiam loin ka melh ha ringawt.

"Zep loin min hrilh a, ka lawm lutuk ania. A hma pawhin Na-i hian a lo hmu tawha, min hrilh ngam loin a lo zep a. Mahse, a hnuah chuan min hrilh ta tho a. Chuvang ania Na-i hrilh che a ni em ka tih kher? Keimah hian man chhuah tum hian ka bei nasaa. Mahse, Tun thleng hian ka la man lo mai pawh niloin rinhlelh tur eih pawh ka la hmu lo a. Na-i pawh midang hrilh lo turin ka ti ta nghe nghe a. U Mama hi keiman ka hrilh tho a. Ani pawh hian rinhlelh tur a hmu lo ve tho a.. Mahse, nang meuhin i hmuh takah chuan dawt mai mai a ni lo tihna animai" a ti ta duah. Inringtawk tak anga lan a tum hle nangin a aw khur ka hriat hmaih hauh lo. Mahse, ka fak tho tho. Kei ni ila ka mualpho hial maitheia, hetianga fel at hian ka tawng theih ka ring lo hrim hrim.

"Sawi loh mai ka duh a, mahse nithei ngangin ka hre lo a" ka ti sap.

"A pawi lo... Min hrilh hi a dik alawm" a ti leh a.

"Engtia tih chi nge ka hre thiam lo a" ka ti leh ringawt.

"Ka inngaihtuah phawt ang. Hmahmawh rum rum ka duh lem lo va" a ti halh.

"Um... Nia, inthen nan emaw inhauh nan hmang ula ka ti lo ania aw. I hriat kha a dik ka tia, chuvanga hrilh chauh che ka nia" Min huatzui hlau takin ka ti a. Englaimahin min lawm ngai lo tih hre mah ila mo kan han nih dun hnu hian min endan a thlak ta vek a. Min hua leh hmusit angin alang ngai tawh lo a. A chhungril inthlak beiseina ka nei lo chungin langsar taka inhuatzui ka duh lo. Mifel tak ka ni bik lo va. Chumai bakah min support tu leh ka aiawh inhuam reng Saitluanga a awm lehnghal nen, kan tawpna a chhe dawn lutuk tih ka hre ve kar.

"Haw lo lutuk. Min hrilhtu ka huat daih chein awmzia a awm nang.. Engpawhnise,Ka pangpar hi kan phun zo law law ange. A tlai hmain" a tih zawm a. A tho zui nghala, lei a dah vum thar chu suahdur tereuhtein a chawk zui mawlh mawla. Ngaihthat lohna tur awmin ka hre lem lo bawka, Room lamah ka phei a. Room chhung ka lut chu khum mawnga thutthleng awmah ka thu nghal hnawk a. Ka hrilh vanga thawveng hawk tura ka inngai kha ka tisual tih ka hria, thawven ahnekin ka pik zual mahin ka hriaa. Mahse, min delh rit em em tu kha chu a awm ta lo.

Khum che deuh datah ka harh a, room chhung thim khup chu tho loin ka melh kuala, ka awmna ka hrechhuak mai thei lo..A thim bawk si nen ka awmna hmuh chian tumin ka khap sak saka. Mahse, Saitluana'n min rawn kuah paha" Ka tiharh che law? " a tih riah chuan kan roomah ka awm tih  ka hre zui leh mai.

"Zan a ni tawh mi? " ka ti a. Ka zi mar zui ar ar. Tlaia ka mu zal mai mai kha ka lo muhil tlang pek chu niin.

"La ni chiah lo ti ila dar 6 a pel tawh. Chawhma lam ni a lan that nen, tlai lamah khua a rawn duai thut a, vawt tak a ni" a ti sup.

"Chawhma lamah pawh ni kha a dul alawm" ka ti ve a.

"Um,a sa over lo khawp mai" tih pahin ka kawr a rawn zen zuia, a kut vawt lutukin ka dul a rawn sik rualin ka te that mai.

"I kut a vawt lutuk" Tih leh laksawn sak ka ruala. Mahse , a rawn dah lui leh tho.

"Tihian a lum vat mai ang" a ti duh lek.

"Mut hun pawh a ni rih lo. Midangin chawei an duh tawh ang" ka ti a. Thawh ka tuma, min rawn khan bet zui leh hmiah.

"Mu mai mai teh, midang tumah an awm lo. Kan nupa bak chawei tur kan awm lo" a ti awlsam leh mai. Ka rilruah hlauhthawnna a rawn lut nghal thut..

"Khawnge Lala-i te? " ka ti vat.

"Maduhi Pi a nuam vak lo a, an kal aniang. Chaw pawh an ei nghal maithei a. Maduhi pi hian Maduhi hi a number one ve a" a ti a. Ka thaw nghal huai mai. Ka thil hrilh avang khan ngaihtuah chiang loin a haw nghal rum rum mai ang tih ka hlau a. A ni lo tih ka hriat takah chuan ka thawveng nghal hawk.

Ka bra a rawn zen chho a, ka hnute a rawn khawiha. A awmdanah chuan ka ngaihtuah lem loh a ngaihtuah tih ka hre thei a. Kan inneih zan khan experience ka neih loh em avangin ka hlauthawng em em a. Ani pawh hian ka awmdan kha a hrethiam a, min pui nasa a. Nupa nun kan hman khan amah anga min hrethiam chu ni lo se hrehawm ka ti viau maithei. A hnu zelah pawh amah chauh inngaihtuah loin min ngaihtuah hmasa zawk zel a,hmeichhe vawt reih rawih chi ka lo ni bawk nen, a dawhthei lutuk hi amak zawk.

Kan nupain chaw kan ei a. Kan eikham hnu feah pawh an lo la haw ta chuang lo. Saitluanga hnenah chanchin an rawn sawi leh sawi loh ka zawt a. A lu a thing mai.

"Ka'n zawt ange. Anni hi an lo tha lo viau pawh a ni thei a" Tih pahin ka call zui nghala. A pick dawn lo emaw ka tih hnuah a pick ta hram.

"Hello, Bd.. " Awki dam thlap hian a rawn ti a.

"Eng nge in chanchin? In lo haw dawn tawh em te ka rawn tia" ka ti a.

"A zia viau e. Kan han thu leh deuh anga, kan rawn haw ang. Min lo ngaihtuah suh" a rawn ti zangkhai vah. Chanchin hriat nuam lo tak takin a deng a, a awmdan pangngai renga a awm thei tlat tho si lai hi ka fak lo thei lo.

"Aw le... Chanchin danglam deuh a awm chuan min lo hrilh la aw.. Ee, ka sawi theihnghilh tep. Naktuk hian ka Patea ten huantharah feh ang u an tia. In kal ve hman ang tiraw? " ka ti a, Saitluanga'n min rawn en nghal vuta. A hmelah chuan a ngaihdan a ni lem lo a ang.

"Awi, chutia law? A van chakawm tak. Mahse ka pi hi hetiang hi a ni sia" a rawn ti a.

"Ni ve tho mai... Anih chuan Lala-i kha hruai i remti em? " ka ti leh a. Engmah hi ka ngaihtuah lawk eih lo a. Kal ve turin sawm ka tum tih pawh Saitluanga hi ka hrilh lo hrim hrim.

"Akhai, a tibuai ang che. Ani hi chu a nawi em mai" a rawn ti dam leh duai.

"Tibuai lo ang... " Rang zetin ka ti vat. Ka chhang rang leh lutuk chu ka inthiam leh chiah lo.

"I inhuam tho chuan kal ve mah se a pawi lo. A pa hi ka lo sawipui dawn nia" a rawn ti tha ve mai bawka.

Phone ka dah a, Saitluanga ka va en a, min lo en reng. "Eng nge? " ka ti ringawt.

"Zawt tur zawk che niin ka inhria" a ti bung vut.

"Eng chu nge min zawh anga? " ka ti liam puat. Lala-i hruai ka tum kha a ngaihdan a ni lo tih ka hre reng nangin ka haider lui ve tlat.

"Eng nge Lala-i kha hruai a tulna? " a ti bung nghut.

"Awww, naupang ania. Picnic type a ni dawna. A kal ve chak ka ring" Ngaihsam awm deuhin ka ti leh mai.

"Tinge thil ho mai maiah i buai thin a? " a ti leh hmuk.

"Thil ho mai mai anih pawh ka hre lo e a. A kal ve chak ka ring animaia. Chuan.. " ka tihlaiin a ban a rawn vaia.

"Eng emaw palh thleng se buaina a chhuak dawn tih i hai lo. Chutichung chuan engtin nge Lala-i hruai tumna ila neih theih? Buaina zawng lo hian pumpelh tum rawh" a ti leh a. A tawng ring lem lo nangin nawrlui lo turin min duh tih ka hre thei tho. Bakah, a sawi kha a dik tih ka hai miah lo.

"Mahse.... " ka ti leh talh.

"B... Khawngaihin duhtawk teh. I hriatchian reng thilah inrawlh lo mai rawh" a ti leh sup. A hmelpa tak, tih har hmel takah chuan ning hmel alang thei reng bawk.

Inhau tihtur kan ni lo nangin kan boruak a nuam ta miah lo. Mut dawn thlengin ka be ta miah lo a. Ani pawhin min be bik chuang lo. Kan inbiak zawh atang khan a inkhel zui ta char chara, zan dangah chuan a khelhpuite a be vak ngai lo va. Mahse, zanin chu a be paha, a nui a nuia. Mu chungin ka insehruh ngar ngar thunga, dar 12 dawnah pawh ala mu ta lo. Ka tho sawk sawka, khum zawna light ka off hmaka. Ka mu lehnghal daih. Mahse, a rawn mut phah chuang lo.

Ka harhin khua a lo var tawha. Saitluanga a lo mu tawh lo. Nizan khan ka muthilh lai pawh ka hre lo a. Zinglam dar 2ah pawh khan Saitluanga ala inkhel tih ka hriaa. A lo mut lai ka hre lo hrim hrim, mu loin a inkhel tlaivar zawk nge pawh ka hre lo. A tho leh hma lutuk nge inhnuai Pi Room hluiah a riak zawk ni? Tho mai loin ka mut dan ngaiin ka mu a, thla pawh a liam hmaa pasal te nena han inbah fuh loh ngawt mai chu a fuh lo tih ka ngaihtuaha. Nidangah chuan ka thinrim a duh loa, amah hi a inphahhniam mai zela. Nizan kha chuan chutiang engmah a awm lo. Ka lungawi lo tih pawh a hre duh miah lo zawk.

Inhnuaiah ka chhukthlaa. Saitluanga awm leh awm loh ka en kuala, ka hmu lo.Choka ka luh hmain Tukverh atangin pawn lam ka va bih a, Motor a awm ve ve a, Bike erawh a awm lo thung.

Chokaah ka lut phei a, Na-i leh Santi chauh an lo awm a. Na-i'n thingpui ka duh leh duh loh min lo zawt nghal vat.

"Duh lo mai. Tui lum ka in duh a" ka ti a. Ka mu tha lo bawk nen ka lu a rit luk maia. Huan kal pawh ka huphurh zo vek.

Tuilum ka in laiin Pi Maduhi a rawn lut a. "Eng nge i pi chu a an zel? " ka lo ti vat.

"A tha leh tawh, ani hi chu hetiang hian a awm leh thut thina. Ee, Bawihtei khi nizan a khua a sik hluai maia. Kal ve lo mai rawhse kan tia" a ti nghal mawlh mawlh.

"Khaia, a va zia lo ve. Tunah a zia tawh em?" Phawk angreng takin ka ti a.

"Khawvar dawn lamah khan a rawn sik leh a. Tunah chuan a zia leh tawh. Vawiin lamah a sik leh chuan tlaiah entir ka duh a" a ti leh a.

"Anih tak chu mawle..Pathian zarah a dam leh mai ang chu a"  ka ti a.

"Ni e, a zia mai ang. Hruai ula ka tih nen, tunlai chu ka chhuahpui ngai lo lutuka, nuam a ti ve thin sia" Tih pahin fridge a hawnga, chawhmeh siam tur a enkual nghal niawm tak a ni.

"Eeee... Na-i pa hi nimin tlai khan thian nghal rawh ka ti che sia. Tinge i tih loh? Hei a duk khaw lo zo vek alawm" Lungawi lo tih hriat tak hian a ti a. Eisiam tur eng eng emaw a rawn phawrh teuh a. A enkuala, a chek tlak tlak mai.

"Thlai a to tehreng nen, hei a chhe leh nual hman anih hi. Thil inngaihsak tawk lo thin em mai.Santi,nangpawn en pui deuh thin teh. Na-i ringawt chuan a tlin lo" a ti leh dam leh duai.

Santi ka melh zawka, Pi Maduhi a lo melh ram rama, ei lo tih hriat tak hian lehlam hawiin a hmui a tipawrh zuia. A khawsak dan vel chu ka tei thei thak lo. Mahse, Pi Maduhi lo luh tirh atang khan a pasal nen an khawsa tehnawm hle a ni tih hre lo awm takin tuk dang ang bawkin a biaa, danglamna pakhatmah a awm lo. Santi hi a duat bik em avangin Santi pawh hian a hlau tehvak lo tih ka hre sa a. A pasal nen an inzawmna an nei tih a hma daihin an hrilh tawh chunga a lo la duat viau reng mai kha mak ka ti ta viau.Na-i sawi a awih loh vang pawh a ni thei a. Mahse, keimah zawkin ka hrilh hnuah pawh engatanmah angai lo tho nge ka sawi kha a awih bik chuang lo ka hre thiam nek lo e. Hau se, ban nghal se ka ti pawh a ni lo. Dik lo awm kha a zawtfiah turah ka ngai zawka, a zawtfiah nghal rum rum lo anih pawhin a biak tui loh tal ka ring a. Mahse, ka ringsual anih hmel viau.

Room ka tihfel laiin Saitluanga a rawn haw a, a inkhelh ka ring lo kha ka ring sual lo tih a thawmhnaw hak danah ka hre thei mai.
"I tho tawh maw? Rinawma nen Melthumah ram kan va en chhin a" a rawn ti a. A mood lah chu ala tha phian zui.

"I Nutei'n a lo call che em? " a ti leha.

"Call nang... " ka ti nghauh.

"Min rawn call a, dar 10 aia tlai loah chhuak ila a tia. I insiam tawh em? " a ti leh a.

"Siam lo.. " ka ti leh ringawt.

"I nuam lo mi? " a ti leh daih.

"Nuam e.. " ka ti leh mai.

Ka kalsawn tur chu ka hmaah tak a rawn dinga, hel mai ka tuma. Ka kalna turah a ding leh vat.

"Sawi la, Maduhi nen in inhau nge thildang? " a ti a.

"Chutiang a awm lo.. " ka ti bak hlak.

"Ok, nuam lo hmel deuh hian i awm a. I lu a na leh tawh mi? Nizan ka inkhel rei lutuk kha i muhil thei lo zawk em? " a ti leh duaha.

"Muhil thei e. Engmah nawm lohna ka nei lo" ka ti leh a. Ka thusawi awih loh hmel zetin min en a.

"Lala-i hruai ka remti lo kha i la thinrim tihna mi? " a ti mar ut.

"Rim nang... Kalsawn teh" ka tih zawma. Ka sawi hre lo ang maiin a din ngaiin a ding reng tho.

"I thinrimchhan sawi phawt rawh" a ti leh tlat. Engmah hre lo ang maia a awm chuan min ti thinrim zual thut.

"Kei chauh ka thinrim loh kha, nizanah pawh min be peih lo chu anih kha" ka ti ta hmak.

"Maw? " Mak tih hmel deuhin a ti hu.

"Hriat loh der angai hleinem, I thu anga ka tih loh vangin i lawm lo anih kha. Mahse, I thu thuin ka awm ringawt dawn lo" ka ti leh hmak.

"Ok.. Ok, ka thu a awmtir che ka tum hleinem. A tha lo ka tih chu ka sawi mai zel anga, mahse I zawm duh leh duh loh chu i thu thu ania. Nizan pawh kha ka thinrim lo. Rinawma leh Zothana khan min nghak renga, kan sawi zo tawh tho sia ka inkhel zui anih kha"  a ti duah. Ka ngaihtuah let a, Zothana khan a rawn call ngei tih chu ka hria.

"Ka thinrim emaw ilo ti tak tak em? " a ti leh a.

"I thinrim alawm" ka ti hlak. A nui zui hawka, min rawn pan hnaia ka tawlh hla ve thung. Mahse, ka tlawh hlat hmain min rawn man bet a, amah en thei tur in min kuai daka, hawi sawm ka tum chu min vuan nghet lutuka ka hawi sawn thei lo.

"Ka thinrim emaw ilo tia.. Zingah pawh i mood a chhe vek ta a.. A leh lutuk mai" a ti sup.

"I thinrim a min be duh lo emaw ka tia" Inringtawk lo zetin ka ti ve ringawt. A mitmeng tak ngeng ngawnga min en hi chuan ka ngaihtuahna chhungril thlengin a hmu tlang vek hian ka hre thina, ka inringtawk lo zo vek zel.

A kutzungpuiin ka biang a rawn tuaia, "Thil ka hrilh ang che. Mi tha famkim ka ni lo a, mahse i rilru tihnat ka tum ngai lo. Ngaihdan in an loh chang pawh ala awm ang. Chutiang hun pawh chu lo thleng se nileng zankhuaa thinrim khum che ka nei ngai lo vang. Zanah kan inbe lo anga, zingah tu emaw zawk lo boral palh ta ila damchhunga inchhirna tur ka insiam dawna. Chutiang chu ka thlen tir ngai lo vang " Thutak zet hian a ti a. A hmelah chuan a ti mai mai lo tih ka hre thei a. Min duatna chu a mitmengah alang chiang em em bawk. Nizan khan keimah ka lawm loh vangin amah pawh kha lawm lo ve tur ah ka lo dah ngawta, ka lo intihrehawm em em tih ka ngaihtuah leta, mawl inti ru em em in keimah ka inhau ru mawlh mawlh mai.

Nilengin huanah hun kan hmanga, kan hlim tlang bawka kan ri le lu mai. Saitluanga pawh a hna kaihhnawih lam a ni bawka, nuam a ti ve viauin ka hria a. Kan chhungte ho hian an ngaina a, tute mai pawh hi an hming hriat a tuma, a hre thei em em bawk a. A kawm nel vek vek mai.

In kan thlenin dar 8 a hnai thuak tawh. Nizan a inkhel rei a, chhunah huanah hun a hmang nileng leh bawk si nen a mutchhuah thu a sawi nuah nuaha. "I hlep anih kha.. " ka ti chu ngei zet hian min rawn melha, a thinrim tak tak lo tih ka hriaa, ka nui hak hak thung.

Motor a dah fel laiin inchhungah ka luhsan a, Ka lut chiah chu Saihminga'n amahin inkhel a lo en a, midang an awm lo.

"A nuam bawk em? " a ti lo ti nghal a.

"Um, nuam ve tho mai. Khawnge Lala-i te? An mu tawh mi? " ka ti ve a. Saitluanga lo luh hun nghakin ka thu ve nghal a.

"Mu lo e. Maduhi te in lamah an phei leha, chaw an ei nghala. Dawr lamah kan buai riaua, ka kal ve ta lo mai. An rawn thlah dawn a" a ti a. A inkhel en lai a en pah reng bawk.

"Anih chu mawle. A pi a nuam lo leh deuh em ni? "  ka ti leh a.

"Nuam tho e. An kal mai mai" Min en lo bawkin a ti liam leh puat.

Lala-i nuam vak lo a nu in a tih kha ka hre chhuak thut.." Lala-i chu a khua a sik leh em? "  ka ti nghala. Min rawn en zawka, Tv lam bawk a en leh a.

"Khawsik maw? ka va hre lo ve" a ti awlsam mai.

"Nizanah a khua a sik a tiin ka hriaa. Chhun lamah a zia chuan a that chu" ka ti leh a.

"Nizanah maw? Chutiang khawsik a neih pawh ka va hre lo ve. I hre sual aniang" a ti leh ta tlat. Mak tih hmel deuh hian min la en zui bawk...

NOTE : Ka va han chawl chak ber🥲 inkhawm banah hmanhmawh phelengin ka ziaka, lu na nen, mit chak lo nen, ava harsa ve. Ennawn chu KAHA SE hi a ni mai😆 Ziah sual a tam maitheia. Chutiang chu rawn sawisel loin nangmahni khan induhdanin lo siamrem mai ru😜

Tin, YouTube lamah ka channel hi subscribe theih reng a ni e aw😚 Maengi Ralte tiin search ula, ka lo lang mai ang😊