Bibi - 28

 Chapter - 28

Saitluanga a rawn luta, "Chho ila, I inbual har chuan i hnar a ping nasa zual ang" a rawn ti nghala. Kan thilsawi mek kha a rawn hre hman em ka hre lo. Hria pawh nise a ngaipawimawh zui kher lo maithei. 

Roomah ka zui chho a, Bathroomah a lut tlang nghal a. "Tui lumna ka on nghal a, kan inbual rual mai dawn nia. Inbual zawh chuan muthilh nghal i chak ka ring. Rinaiin i chau ang" Ka ngaihtuahna hre lo lutukin a ti a. A thawmhnaw a hlip zui nghal mawlh mawlha, keipawh ka pheikhawk ka hlip ve a. Ka riluah erawh thildang daih a awm thung.

"Enteh... Thil ka sawi anga min hau lo la" ka ti chhuak thut. Mak tih hmel deuh hian min rawn en a. 

"Sawi la... " tha tak chuan a ti ve mai bawk. 

"Tukinah Lala-i kha a nu-in nizanah a khua a sik hluaha, vawiin lamah a sik leh chuan entir ka duh a tia. Chuan, tunah khan U Tea kha vawiin lamah a khua a sik leh em tih ka zawta, nizanah khawsik a neih ka hre lo a tia, I hre sual aniang min ti tlata"  ka ti a. 

"Tea chuan a hre lo aniang chu" Kal sawn pahin a ti awlsam et. 

"Aaa, hriat loh tur a awm lo. Room khatah an mu a. Khawsik nasa, mu mang lo anih chuan a hre awm em mai" Ka ti leh tlat. Towel ven that mawlh mawlh pah hian a rawn hawi a. 

"Anih chuan huana hruai kha a phal lo anih dawn chu" a ti leh mai.

"Um... Aniang"  ka ti fan raih mai. Ka ngaihtuah leta, Saitluanga sawi hi a dik thei tlat. Mahse, mak ka ti ve thlawt.. 

"Natna hmang khera dawt han sawi pawh chu a va han nutling zia lo tak" ka ti chhuak leh a, ka ngaihtuahna ka sawi chhuak lo thei lo. Mahse, Saitluanga ka va en chu phone a lo en daih. Ka thilsawi kha a ngaihven zui lo hrim hrim tih alang reng. 

A phone a charge zui a, a rawn kal phei a. "Tui a lum tawh ang. Sa deuh pawh angai lo a, ka'n en ang.. Eee... Eng nge i sawi tur chu? " a rawn ti a. 

"Ka sawi tawh kha.. "ka ti nghat. 

" I sawi maw? " Angaihna hre lo hmel zet hian a ti a. A dar a tisang uk bawk. 

"Sawi tawh" ka ti leh hlak. 

"Min hau suh kha iti bawk sia...I sawi lai ka hre miah lo a, sawi nawn leh lawk mai la" a ti leh a. Bathroom a lut mai loin kawngkhar bulah a ding a. 

"Lala-i kha.. Ka sawi chuan i lawm lo zel alawm" ka ti a. A hmui a tisawi zauh. 

"Lawm lo hran lo e. Sawi lo tura ka duh chhan che chu i hria alawm" tha takin a ti a. Bathroom chhungah a lut zui nghala,  che loin ka thut ngaiin ka thu ren rawna. Pi Maduhi sawi nge dik ang Saihminga sawi tih ka ngaihtuaha, mak ka ti tawp thei lo. Hruai a remti lo anih pawhin natna kha chhuanlam kher angaih loh tehreng nen.. 

Saitluanga muthilh hnuah muhil thei loin ka mu meng kar a, thil chi hrang hrang ka ngaihtuah kuala, ka muhil thei lo..Ka phone ka hmet enga, dar 12 a lo ri tawha. Kan tlai chawhmeh kha Nutei leh Mama'n chi an lo in al thuah peka, a al tha leh lutuka, zanin chu ka tui a hal seka. Mut hma pawhin ka in nual tawha. Roomah hian filter, Current hmang kan dah tho nangin dar 10 vela current awm lo kha ala awm leh ta loa. Inhnuai lam filter erawh Inverter an fit avangin a hman theih thung.

Dimtein a ban ka dahsawn sak them them a, a inlet a, a harh dawn emaw ka ti hmana. Mahse, a muhil zui leh ta hlauh. Inhnuaiah ka chhukthlaa, khum han thawhsan chuan vawt tha var var tak a ni. Ka phone Flash light on in inhnuai lamah ka chhuk thlaa, ka inkuah khawr hlan a, Choka ka pan phei a,light pawh on chuang loin tui ka thli nghala,  tui ti fahranin ka inkhawlh khawlh mai. 

Current a rawn awm tih hriat tak hian choka thim mup kha engin a rawn chhun nghal raiha. Tukverh ka pan pheia, kan in piaha hight mast eng pup chu ka va hmu a, veranda leh kawtzawl pawh a eng pap mai. Kalsawn leh mai loin kan inkawt vel chu hmuhnawm ti zetin ka thlir a, compound hi Concrete bang sang tha zetin an hung pup a. A khat mawi tawkin light mum lian pui pui a inchhi thluaha, pangpar buk nalh tak tak awm chu a chhun tle set set a. Hetiang tak hian a lang nalh tih ka lo hre ngai miah lo. 

Kawngkapui inhawng thawm ka hre thut a, ka phu zawk mai. Lo lut an awm tih ka hre thei a, Chhuatphah tile chang zet chunga dim taka kal ri ka hre nghala. Tu nge tun ang hunah lo lut ang? Pawn lam thlirin ka ding renga, tumah Gate rawn paltlang ka hmu loa. Motor nise a awm ve ve a, Scooty leh Bike a awm bawk si. 

Inngaihtuah chiam hun a awm lo. Tu nge anih en tumin dim takin ka pan pheia, mi pakhat dim taka kal tham tham ka va hmu a, pawn lam eng avangin alang deuh ruau ruaua.A pian hmangah chuan Pi Maduhi a ni lo tih ka hria. A hmel ka hmu thei lo nangin hmeichhia niin ka hria a. Na-i leh Santi hi an intiat tawk viaua, mahse Santi hi a ria zawk a. A sam a sei zawk bawka. Shawl lianpuiin a lu atangin a inkhuh a, inkhuh hlun lo se chuan a thawmhnaw atangin tu nge anih ka hre thei ang. A rawn kal phei zel a, Chokaah a rawn lut dawn emaw ka tih laiin Choka leh pi Room inkara Corridor chhete awm lam a pan ta zawka. Helaiah hian Bathroom pakhat a awma, Na-i leh Santi Room a awm bawk. A hmel ka hmu thei chiah lo nangin Santi niin ka hria a, Eng nge maw zan lai laiah a tih  ang tih ka ngaihtuaha. Mahse, ngaihtuah rei angai lo. Kawngkhar dim fahranin a rawn inhawng leha, Midang pakhat a rawn inzep luta, current a awm tawh bakah thimah ka awm rei ta deuh bawk nen atir lam ai khan ka hmu fiah tawh zawka. Lo lut hnuhnung zawk chu a pian hmangah Saihminga a ni tih ka hre nghal a, thawm nei lo lutuka kawngkhar a kalh leh an room pana a kal chu ka melh reng. 

Khumah ka inthawlha, Saitluanga'n min rawn kuaha. "I muhil thei lo mi? " Mutchhuak aw zet hian a ti sup.

"Muhil thei e.. Tui ka in a" ka ti a. A darah ka lu ka nghata. Muhil lehnghal se ka tih avangin ka che zui lo. Reiloteah a muhil zui lehnghal tih a thawk danah ka hre thei a. Ka ngaihtuahna tawt up up theihnghilha muthilh ve ka duha. Mahse, ka hlawhchham... Pi Maduhi hnena ka hrilh khan ka hrilh tur tak hrilhin ka inhriaa, mahse an nun danah engmah danglamna nei loin an la awm a. Hmalak dan vak a hre bik lo nge pawh ka hre lo. An awmdan ka en hian ka sawi kha ka inchhir a, midang nuna inrawlh tam lutukah ka inngaia, ni tam la liam lo mah se ka sawi loh tur sawiah ka inngai nghet hmiah tawh... Nun harsat zia ka ngaihtuaha, thil tha tia inhriat pawhin buaina a inbarh lek ka lo ni zawk leh maithei bawk si... 

Ka harhin khua a lo var tawha, tho loin ka phone ka en a, dar 6 a lo pel hret tawha. Mahse, thlasik lai ngang a ni a. A la hma viau tho nangin thawh tumin ka inlet a, mahse ka thawhchhuah hmain Saitluanga'n min rawn kuah." A la hma em mai, mu rih rawh" a rawn ti a. Zing tho hma thang tihtakah ani pawh hi a harh hma thei viaua. Pa harhvang tak a ni hrim hrim bawka. Mahse, Sunday zing hi chu harh mah se a tho hma ngai lem lo. 

"I muhil em? " kan ngawih vang vang hnuah ka tisep. 

"Aih... Ti nge? " Meng loin a ti sup.

"Hrilh duh che ka neia. Mahse, hrilh tur che ka ni em ka hre lo... " ka ti nawi nak ringawt. Pi Maduhi khan Saitluanga'n a hriatpui tih kha a sawia. Hrilh pawh ni ila a pawi lem lo turah ka ngaia. Mahse, han sawi dan tur ka bangbo leh ta tlat. 

"Zingkarah thawnthu kan ngaithla dawn tihna mi? " tih leh nuih a ruala. Za lo zetin ka nui ve hak tho. 

Ka bekah ka indo kanga, Saitluanga zangthal zawnga mu chu ka en a,meng lo mah se a muhil lo tih ka hriaa. Ka taksa puanin a khuh loh chin chu a vawt nghal var mai. 

"Thawnthu lam pawh a ni lo.. Ih, Eng lo ania... U Tea leh Santi awmdan hi dik lo ka tia. Ka inrawlhna tur a ni em chu ka hre lo va" ka ti sap. 

"Eng nge anni pahnih chu? " Meng chuang loin a ti awlsam mai. A ngaipawimawh lo leh lutuk chu makti leh ngei bawk siin ka thaw hak mai. 

"An inngaizawng tih hi mawle" ka ti nghata, ka tum aiin ka aw a vin lek lek bawk. 

A rawn mengchhuaka, a rawn inlet a, " Eng maw? " Thluk nei lo zetin a ti mar ut mai. 

"An inngaizawng ka ti. Nangpawhin i hriat kha" ka ti leh a. Ka mu zangthal zui nghal a. 

"Chutiang ka hre miah lo.. Tu nge chutiang sawi a? " a ti leh a. A aw chu ngaihno a bei lo viau. 

"Ka hmu... " Ka ti tawi tak. A thaw hawk ri ka hre thei a, ka inlet a, zangthalin a lo mu leh tawha. Che loin inchung lam a melh vung vung bawk. 

"Rohminga te In a chaw kan ei dawn tlai khan ania. I cheque ka va lak khan Santi nen chokaah an lo awm dun a... " ka ti a, sawi zawm loin ka ngawi leh rih a. 

"Chuan.. " Ka sawi zawm hun nghakin a ti nghut. A awmdanah lah chuan la hre ngai lo a ang em em mai bawk. 

Ka hmuh dan ka hrilh a, Pi Maduhi ka hrilh tih ka sawi tel bawka. Min rawn en a, "Khami tlai khan Tea te pawh kha chawei chhuak tur kha annia. Khatiang tlai tawhah eng nge inah chuan a lo la tih reng reng a? In inbia em? " a ti a. Min ring lo niin ka hriaa,ka sa nghal phat mai. 

"Bia e. Thil ka theihnghilh ati. Min ring lo niin ka hriaa, mahse Pi Maduhi khan i hre sa vek a ti che a" ka ti hmak. 

"Hre sa ila mak ka ti dawn em ni? " a ti vawt ruih. 

"Pi Maduhi sawi dan chuan a hmain Na-i hian a lo hrilh aniang. Aman man chhuah a tuma, mahse rinhlelh tur eih pawh ka hmu lo a ti a. Ka hrilh ve leh takah kha chuan a dik a rin thu a sawia. A hma a Na-i'n a hrilh hian nangpawhin i hriatpui a ti a. Chuan, nimin zingah khan danglamna awm miah loin Pi Maduhi khan Santi a be leh thei maia. Mak ka ti lutuk,hau se emaw ban se ka ti lo. Engmah thleng lo anga alang thei kha mak ka ti" ka ti leh hmiah hmiah. Zep di de tul ka ti tawh lo. 

"Man chhuahna chance a zawng pawh a nimahna" a ti tawi tuk. 

"Aniang..Mahse,a in control thei mah mah em aw ka ti " ka ti ve nghauh. 

"I hmu leh anih chuan thla ila dawn nia. An lo pha ve thei a" a ti leh daih. 

"Nizanah pawh inhnuaiah tui ka zuk in a, ka lo let leh lai i hriat kha, a tlai tawh lutuk. Pawn atangin Santi a rawn lut a, a hnungah U Tea bawk hian a rawn zui a. Khatiang dar 12 dawnah, thawm dim em emin an rawn inzui luta. An awm khaw lo ka ti lo. Mahse a hun ka ngaihtuah khan a mak" ka ti leh a. Ka sawi tak pawp pawpah chuan ka thawl hawk mai. 

"Biak angai anih chu" a ti bung vut.

"Engtin nge i biak ang? " Ka ti hap. 

"Ngaihtuah suh, ka lo be mai ang" a ti leh mai. A awmdanah chuan a awih leh awih loh pawh a hriat loh a, sawi zui a duh lem lo tih erawh ka hria. .Bakah, a nau hi a duat em em a, nu leh pa tel loa seilian dun annih bakah pahnih chauh anni a.An inngai em em a, kan han chenho takah phei hi chuan Saihminga hi puitling lo tak, a u zara mawi ve hram hram a ni tih ka hai tawh lo. 

"Maduhi hi Pi tawh suh" a ti leh hmuk. Za lo zetin ka then sak ringawt. 

Chawhnu lamah Saitluanga a chhuaka, an Bathmate pakhat ral tur an nei a. Midang kan awm kim thung. Zing atang khan ka mitmei ru deuh renga, nidang ang thoin Pi Maduhi'n Santi a be leh bawrh bawrha. Saihminga lo thawh hnuah pawh engmah Santi leh Pi Maduhi-ah danglam a awm chuang lo. Chutiang bawkin Saitluanga pawh danglamna a awm lo. 

Ka phoneah offline Game, Blossom blast saga ka khel a, khel chhuak thei loin ka tang tlata, ka live a zawhna a ni a. Game mai mai mah nise ka rilru ka seng nasa ngiang mai. 

Uluk fein ka khela,mahse ka khel chhuak zo leh ta chuang lo. Thinrim deuhin ka hawi chhuaka, inchung kawngka a Angela-i rawn chhuak chiah ka va hmu a. Ka lo au vat. A rawn kal phei hnak hnaka, hmeichhe naupang ria sang lam a ni a. Thil a ei tha duh vak lo chungin a kum rualpui zingah chuan a sang pawl anih ka ring tho. 

"Eng nge ilo tih dawn a? " ka ti a. Ka bula thu turin ka hui a, a rawn thu ve mai. 

"Anu a awm lo a mi? " a ti a. 

"Awm lo.. Inhnuaiah a awm lo em ni? " ka ti leha. A lu a thing mat mat. 

"A chhuak lawk aniang. A lo let leh mai ang, I pa a awm em? " ka ti leh a. 

"Aw, a mu a" a ti leh mai. Biak hi achang chuan min chhang tha duh lo a, achang lem chuan a tawng duh em em a, naupang ngawichawi leh ti dek chi a ni chung hian harh em em tum pawh a nei ve tho. 

Tih tlangnel tumin ka bia ka bia, min chhang ve zel a. A thut rei ve tak deuh hnuah phei chuan ka phone a la ta chat. 

Game khel ngai vak lo ka nih avangin a duhzawng a zawnga. Tunlai naupang dang ang bawkin Play Store luhna chang a hriaa. A duh a zawng hmu nghal mai. A la chhiar thiam dawn lo tih ka hriaa, mahse a lem atangin a duhzawng a hre nghal mai anih hmel. 

"Hei hi download i phal em? " tih pahin ka hmuh turin a rawn lek kanga. Ka zuk en a, Roblox game a lo ni a. Ka phal tih entir nan ka bu nghat. A kut zungtang tereuhtein a khawih kual zet zeta, khawih tur lah a hre reuh em em bawk si, a download zo a. Tihdan tur ka hrilh paha, min ngheng dar dar chungin a khel a. A game awmzia ka hre ve lem lo nangin nuam ti em emin ka enpui ve a. Minute 10 vel a khelh hnuah a ning ta aniang. YouTube lamah a lut a, a khawih a khawih hnuah a search a. Mahse, spelling ala thiam lem lo bawka, a tifuh thei lo. 

"Eng nge i en duh a? " ka ti a. 

"Nastya leh Stacy" a ti a. Ka type a, ka search nghala. Hmeichhe naupang hmai tung ringret, sam buang theng mai a lo lang nghal a. 

Phur fahranin a thu thaa, thut nawm a tum ve bawk nen min ngheng nasa ting mai. Hmuhnawm ti deuh in a en a, ka en ve a. Puitling tan chuan ho angreng tak a ni a. Mahse, naupang tan chuan a hmuhnawm khawp ang. En pahin min hrilhfiaha, a tawng siam siama. A khat tawkin a nui leh hak thin bawk. 

"A nu a lang ve ngai lo em ni? " ka ti a. A pa atih bak chu lang ve an awm lo vanga zawt ka ni a. "Ngai lo aniang, ka hmu ngai miah lo" a ti a. A tawngkam hi puitling zinga awm tihtakah a puitling leh khap zel. 

"A-ma, nu hrawn hi eng nge? " a ti thut. An hnena ka thawh lai khan min u thina, Saitluanga nen kan inneih hnuah erawh "A-ma" Tiin min ko a, Saitluanga hi "Apa Mama" tiin a ko thung. A zawhna mak zet chu chhan mai dan tur ka hre lo a. Ani lah chuan ngaihven zui hmel pawh a pu chuang lo. 

"Lala, nu hrawn tih chu khawi atanga i hriat nge? " Zaidam thei ang berin ka ti a, hrilhfiah tumna ka nei lo. Santi hnen atanga hria anih vaih chuan ka chhuah dawn lo tiin ka insehruh nghal hle bawk. 

"Anu sawi...Ka sual apiangin a sawi ziah" a ti awlsam leh mai. Kei erawh ka khawng vek lo chauh. Ka nu-hrawn in sahdah hmuam pawng purh chunga "Nang hi chu tuman an hmangaih lo che. Tihpalh thilthu a lo piang palh ini" min tih thin ka hre chhuaka. Lala-i hnenah Pi Maduhi hian khatiang kha a sawi ve loh hram ka beisei takzet. Sawi ve thin tur anga ka ngaihtuah zawng ringawt pawhin ka awm a nuam lo nghal vek thei. 

Kawngkhar inhawng ri ka hriaa, ka hawiphei vat a. Santi a lo ni a. 

"Hetah ilo awm alaw? I kalna sawi loin i lo bo daiha" Lala-i a rawn ti nghal a. Lala-i lah chuan a uksak der lo. 

"Nilum ai pahin Game kan lo khel alawm tiraw" Keimah zawkin nui chungin ka ti a. Ka nuihzat vanga nui erawh ka ni lo. 

"Lo kal rawh, I nu-in a zawng che ania" a ti leh a. 

"Anu a lo haw tawh maw? " a ti ve vat. 

"Haw turin khawiahmah a kal hleinem a" a ti a. A tawngdanah engmah ngeiawm lam awm lo mah se ka ngei tawk a tling tho. 

"A nu a rawn zawnga, a hmu lo anih hi. A kalchhuak emaw ka lo timai asin" ka ti ve kher. 

Angela-i ka en a, "Le, Bawihte.. I nuin a zawng che a, inhnuaiah zuk chhuk a hun anih chu" ka ti a. Min hnial loin ka phone min pe a. A tho nghal tharh bawk. 

Saitluanga te chaw an ei nghal a.Ka lu a nat deuh avangin chawei kham veleh roomah ka awm a. Damdawi ka ei hnuah muthilh tumin ka mit ka chhing vang vanga. Mahse, ka mut a chhuak hlawl lo. Ngaihtuah loh tur tur ka ngaihtuah a, tul hlei loah ka inti hah vak vak a ni ber. 

Dar 10 velah Saitluanga a lo haw a, thianho inhmukhawm anni bawka, a mood ala rawn dik zui zel anih hmel. A inthlak a, a intihfai hnuah khumah a rawn lawn ve nghala. An mitthi ralna chungchang a sawi mawlh mawlh. 

Ka phone a rawn ri a, Nutei a lo ni a. "Aw' Hello pawh ti lem loin ka ti a. 

" In pa a awm em? " a rawn ti daih. 

"Um, awm e. Ti nge a?" ka tia, a rawn call tlai bawk nen ka rilru a nuam lo.

"Thil ka zawt lawk dawn mawle, phone kha pe teh" Awlsam zet hian a rawn ti a. Saitluanga phone ka pe a, a hmui phunin tu nge anih min zawta, chhang loin phone ka kawk ringawt. 

An inbiak danah thlai leh leitha chungchang a rawn zawt tih ka hre theia. Ka thawveng nghal huai mai. Mahse, an makpa a ni a, thil an rawn zawt hi a pawi lo tih hre tho mah ila, kan inneihna la rei lo nen ka inthlahrung ru deuh tho mai. 

A dah hnuah ka phone min pe let loin a khawih zui nghala. 

"Eng nge Remruata hian a rawn biak ve ziah che a? " a ti hluk. 

"Biak ziah pawh ka hre lo e a" ka ti ve thung. Phone incheck sak tih vel hi chu kan tih ngai loh tak mai a ni a. Kei phei chuan miin an rawn call pawhin ka pick sak tha duh lo. 

"Roblox game i khel amaw? " Nuiza aw hian a ti a. 

"Lala-i download anih kha" ka ti a. A mit a tizima, "Lala-i maw? " a ti nawn sup. 

"Um, tlaiah khan pawnah sawn nilum ka aia, a nu a rawn zawnga. A awm ve ta renga" ka ti leh a. 

"Um.. " a ti ringawt. 

"Enteh, Amak lutuk.  Kan titi mai mai lai khan Nu hrawn awmzia min zawt thut a. A awmzia pawh hrilh lem loin khawi atanga a hriat nge ka zawt a.Anu in a thinrim apiangin a sawi a ti maia, mak ka ti angreng lutuk" ka ti duah. 

"A tul lo hle mai" a ti chang rut. 

"Eng ber chu maw? " ka ti a. 

"A thil zawh che chu mawle. Dawt a sawi lehpek reuh emawni? " a ti leh vuta. Ka ling ve ta phat mai. Ka thu chhuaka, Saitluanga mitah tak ka en a. 

"I ngaihtuah dan amak ka ti. Naupang kum 5 mi lek hian tinge dawt maksak lutuk a sawi anga? A nu mizia tha lo tih vanga naupang pawisawi lo lehzel puhchhiat hi ka pawm lo" ka ti hmak. Ka tum aiin ka aw a ring lam hret bawk. 

Ngawirengin khum atangin a chhuka, meizial a phawrha, a zu zui nghala. Ka sinus vangin englaimahin roomah meizial ala zu ngai lo. Tukverh bulah a phei a, a dinga, nelawmna tel miah lo hian min rawn en a. A hmelpa leh ngeng zetah chuan angaihtuahna lang lo mah se kan inhau dawn tih erawh ka chiang. A pawi ka ti lo, tum hi Lala-i nu chungchang ka sawichhuah hmasak ber tum a ni a. Sawi tur tur sawi vek ka duh. 

A ngawih vang vang hnuah "Eng nge a nu chanchin hriat i neih? " a ti vawt ruih. Chhan mai dan tur hre loin ka awm ngaiin ka awm a. Diktak chuan sawi tan dan tur ka hre lo a nimah zawk. 

Ka ngawi reng chu ngaithei lo niawm tak hian a ner nawka. "Sawi ta che, eng nge hriat i neih ve chu? " A ti nawn leh thawta, a vin lutuk chu ka rin loh lam anih avangin ka phu nghek bawk. 

NOTE : Tawp tawh se ka ti😂 ka ziak thiam lo zual lutuk hi ka ning😝