Naruto - 1

 Ziaktu : Maengi Ralte

Ka sam hliah turin ka jumper  lukhum ka khum a, ka pawtchip leh tlat bawk. Guitar ka ak nawlha, ka kekawr ipteah phone leh purse ka thuna, darthlalanga ka inthlek leh zuai hnuah inhnuaiah ka chhuk nghala. Ka tum loh deuhin ka u a lo thu a, ka tlan thla ri dawt dawt thawmah a rawn hawi a. 

"I chhuak dawn mi? ' min lo ti nghala. " Dawn pek anih kha. I Putea ten chaw an lo ei dawn tih mawlh mawlh pawhin chhuah loh tum reng reng lo" Ka nu zawkin a lo ti hmuk hmuka. 

"Chaw rawn ei an tum hmain kan prog hi kan tifel vek tawha. Eng nge maw i sawi nawi sek ni a? " ka ti ve hlar mai. "Nanga prog ve teivet kha tangkaina a nei lo. Cheng tihtham thawkchhuak pawh ni si lo, ka ngai hlu lo ve" a ti leh tun tun a. Ka phone a rawn rik tak avangin ka chhang hman ta lo a. Min rawn be tu ka en nghala, ka u pawh be leh tawh chuang loin hmanhmawh takin pawnah ka chhuak nghala. Kan kawt zawlah ka u te Motor a lo awm a. An Driver in game a lo khel a, amah chauhin a lo tawng nasa mai. 

"I chhuak dawn mi? " Ka pa Kid rinawm, u Rama'n min lo ti a. A la thlan hluam zuia, kalhnai deuh ila chuan meizial rim a nam hum hum ka ring. 

"Dawn, Gate min lo hawnsak teh" ka ti nghala. Gate hawng turin a kal vuta. Ani hi ka pa kid ka ti ngawt nangin ka pa bodyguard animah zawka. Khawiah pawh an inzui a ni bera. Ka pa tan chuan ek pawh a ei duh ang tihtur khawpa rinawm leh a thuhnuaia kun hneh a ni a. Kan awmpuite leh Driver te lakah a inlek thei em em a,hlauh pawh an hlaua, kei erawh chuan ka mil thak lo va, min biak pawhin ka chhang lo fo mai. 

Ka Bike nena ka tlanchhuak fel chiah chu U Rama a au vaka, ka hawi let zawka, kan ui lian leh kawlh zet Hunter-an min lo um zui a lo ni a. Gate pawn a chhuah chuan mi pawi khawih deuh ziah ang a ni a. Ka pa lahin a tan em em bawk a, amah vang hian thenawmte nen pawh kan kar thu a chhe reng reng a. Ka nuin kahhlum mai a rawt chungin ka pain a phal teuh lo. 

Chak lutukin ka tlan a, bauh vak vak chungin min rawn um bawk. Ka tlanchak zual a, ka hmu thei ta lo thuai. Tlan lui loin ding ila chuan buaina vak a awm lo ang. Mahse,U Rama tihbuai duh vang hrim hrimin haw tura tih ka tum bau lo. Duh leh bo se, duh leh mi kut lo tuar nek pawh nise pawi ka ti eih lo. 

Ka kalna tur hmun ka thlen chuan ka thiante an lo thleng kim tawha, lut loin pawnah min lo la nghaka, "I va han tlai thei tak, darkar chanve talin hma ang u ka tih kha" Rinpuia'n min lo ti nghal hluk hluka. "Ka la tlai chhiat loh hi, amak thei. Phunchiar thin suh" Ka ti ve thunga. Kan inhnial than em avangin midang hi chuan engah an ngai tawh lo. 

Lalrinmawii ka ni a, "Arin" tiin min ko tlangpuia, hmeichhe nu hnep hnawp tihtur chai ka ni lo. Pa deuh theng thawng leh incheina pawh mipa thawmhnaw lam ngaina tak ka ni a. Unau hmeichhe pahnih zinga naupang zawk, chhungkaw chawk buaitu leh ka pa hausakna avanga hmingchhiat pumpelh fo, a sum rukchhuahsak hrat tak leh Music ngaina em em tu ka ni a. Music ka ngainat tluk zetin Bike ka lawm em em a, ka tlan chak thei viau reng bawka. Pianphung nu deuh hnap ni si a chhungril khawlhrawng tak, nu si pa si an tih ang chi ka ni a, anpui kawp erawh ka huat zawng ber a ni thung. 

Kan Band-ah hian hrui sin perhtu niin kan zaithiam puitu ka ni tel bawka. Kan vai hian phai lama lehkha kan zir laia intawng kan ni a. Kan indin lai pawhin phaia kan awm lai tho a ni bawk. Khawsak harsa lo tak chhungkua atanga seilian vek niin mahni tawka hawisang ve larh chi kan ni theuh. Mak takin kan zirlaiah pawh kan hnufum lo tlang viau a, college pawh tha takin kan zo vek bawk. 

Music lama kan inthurual ang bawkin midangte tanpuina kawngah kan inthurual lehzuala. Neitu bik awm loin midang tanpuina turin pawl pakhat kan dina. Mi kan tanpui nasa em em chungin kan hming kan tilang meuh lo thung. Kan zaina atanga kan hlawhchhuah reng reng a chanve kan la a, abak zawng midang tanpui nan kan hmang thin a. Kei hi chuan ka pa pawisa midang tanpui nan ka ru fo a, ani in hmansen loh a neih laia miharsa tanpui nana a pawisa lo ruksak hi thil pawiah ka ngai lo. Ani pawhin mi chanai a ei ru hnem tho ka ti ve tlat. Ka u in pasal a nei tawha, kei fanu nu hnap ni si a fapa ang maia khawsak chang nei, ruih haw zeuh zeuh ching leh inchhunga tangkaina nei miah lo hi ka nu hian min hau reng a, ka pa erawh chuan min tha en mai mai thung. Diktak chuan ka nu leh ka pa hi Thluaka pawisa lut natna vei ve ve an ni a. Kan naupanlai atangin ngaihsakna tak tak kan dawng ngai lo a. Kan mamawh apiang min pe ti ila an mahni leh an hun min pe tel lo tih mai chauh a ni. Ka pa hi Dept pakhata hotu lian niin ka nu lah contractor a ni bawk. 

Kei ang bawkin ka thiante hi eiru lian fapa te leh Politician langsar fa te an ni a. Kan zinga upa ber Thomas-a hi Doctor nupa kara piang niin, ani hi kan zingah chuan Vanram kaina chance nei tha ber a ni a. Mahse, zu a in ve leh zauh thina, vanramah zu in mi luh an rem ti anih ngawt loh chuan a kai hmel bik lutuk chuang lo. 

Kan zai hun a zo va, back stage lama kan luhkhawm veleh "Kan che chhe lo e.. A lawmawm hle mai" Thomas'n a ti a, kut kan beng dar dar mai. Zanin kan prog hi Charity concert a ni a. Hla hnih kan nei a, kan zai hun a zawh hnuah haw mai loin kan awm khawmuang ve a. Zaimi dang te nen kan awmkhawm a, kan ri laih laih renga, mahse nidang ang bawka kan band hmelma te an rawn thut ve takah khan kan thianhoin kan kal ta dial a, mi hriatpui lem loha iner tak kan ni a, kan band ang bawkin Hmeichhe pakhat an nei ve a. An hmeichhia hi an zaitu ber a ni bawk. 

Rinpuia'n ka noah rawn thlitbelh leh a tuma, ka lo hnar a, zu hi ka in ve fo tho nangin ka heh lem lo va, no 2 aia tam ka inngai meuh lo. Hetianga music ka luhchilh ve tak tak hnua ka hriatchhuah tak chu Music leh ruihhlo hi a Inkawp rem em em mai a lo ni a. Gospel hla sa, invawngfel tak tak awm mah se, zai mi leh musician tamtak hian ruihhlo kan duh tlangpui vek mai. 

"Naktuk kan kal chhuahna tur kha zingkarah tal kal teh ang u, ni a tawi tawh si, zan tlan a peihawm loh"  Aruata'n a ti a. "Lutuk che hian, I tho hma ngai lo bera, engtin nge kan zing chhuah anga? " ka ti hlaka. 

"Naktuk bik chu ka tho hma mai ang chu. Puia, Motor chu kan ring dawn ta che mi? " a ti zui leh zata.

"Min ring mai ru, bungraw phurh tur a awm nual sia, Two wheeler a kal chi pawh a ni lovang" Rinpuia'n a lo ti ve maia. Rinpuia pa hi Ex - Minister niin an upa ber dawt hi Contractor a ni bawka, amah Rinpuia hi an unau zinga naupang ber leh piangtlai bik, chhungkaw  blacksheep ve bawk a ni a. A nu hi Rinpuia pian hian raichehin a thi a, an upa ber hian pawm tleiin a tulpui thaka, a u duatsual ti ila a sual lo ang. 

"Ti daih ila, Arin, U Zuala chu nakum inthlanah chuan a in candidate ve dawn tak tak em ni?" Rinpuia'n min en chungin a ti a. "Tikhan ko ve ziah suh a, I over lutuk" Ka ti a, ka pa hi hetianga sawi hi a chinga, ka khak ziah a, a ngaipawimawh chuang lo. "Eng Party chu nge a zawm dawn tak a? A din chuan inveng lam bialah a ding ngei anga, a tlin ka ring tlat. I pa hi chu a pui riau"a ti leh zuah zuah. 

"Ka hriatpui ve lo e a" ka ti liam maia. "MLA emaw Minister zawk pawh han ni se, Politician fa te min ei lo tu hi ka ei lo let ve chak tawh" Chhana'n a lo ti ve nghuta. Ngei deuh hian ka melh ruma, a nui vur vur duh lek. Diktak chuan a sawi hi dawt a ni tlat lo. An pate Politician langsar tak anni a. Ka chhaihfiam nasa thina, ka pa pawh a pension nan thla khat bak a nei tawh lo a, tun atangin party hotu lawk tak tak an lo kal zut reng tawha, thuchiang la awm lo mah se hetianga politics lam a awn ve tan takah chuan keipawh politician fanu ka nihna kawng a inhawng zau ve ta viaua.  Tu Party ber nge a zawm dawn tih la sawi lo mah se lo leng thinte atangin a zawm tur awm chu a rinhriat theih ruak tawh a. Pa titi thiam leh mi rilru hruaikawi zawnga thusawi thiam tak anih tawh sa naklaiin, Politics lam a awn tak hnu phei hi chuan a nui hmel a mawi zual a, mitthi in kal pawh a peih zual ta a. Thudik pui pui, a zawm chuan bik miah si loh sawi foin sawrkar hnathawk huaisen tiin hriat a hlawh a, kan in leh kan thil neih dang pawh hi ka nu contract hnathawh vanga nei kan nih zawk zia a sawi fo a. Eiru ve ngai lo ang maia ei rukna do thiam tak leh sawisel huai tak a ni tlat bawk. Politics a khel dawn tih hre mah ila kei hi chuan khawi bialah nge ding turin an rawn biak tih leh engtin nge hma a lak zel dawn ka ngaihven lo va, ka duhtawk pawisa hman tur ka neih chuan ka lungawi tawk reng. 

Ka rin loh lutukin zing hma tawkah min rawn phone harha, ka chhungte bulah pawh engmah ka la sawi lo. Ka tho vata, ka inphihfai hnuah insiam sain inhnuaiah ka chhukthlaa, ka nu-in kan vai eisiamtu a lo hau nasa mai. "Min chhang ziah suh, I che fel lo thin lutuka. Hei i kan ut leh vek tawh hi, amak em mai" a lo ti meka. 

"Nu, ka chhuak dawn ania" ka ti nghala. A rawn hawia, " Awi, awi, I sam chu a va han tawi lulai em. Tan tawh suh ka tih che kha" ka sawi lam ngaihven loin a ti nghal chiam. 

"Ka chhuak dawn ka tih chu, tlaiah ka lo haw ang. Zanah pawh animaithei" ka ti leh a. "Khawiah nge i kal dawn? I tum tum hian thil lo tih tum thin suh, min bazarpui ang chu ka lo tia sin" lungawi lo tak hian  ti a. Kan awmpui nula senior bawr takin a rawn luta. "U, Nu Sangzuali'n chhunah vawk kan talh dawna, engzat nge in duh ang a ti" ka nu hnenah a rawn ti nghala. 

Min ngaihven zui dawn lo tih ka hre chiang bawka, pawn lamah ka tekchhuak nalh mai. 

Rei pawh ka din hmain an lo thleng a, kan kalna tur lam panin kan tlan nghala. Zan lam ka mu tha lo bawk nen Motorah ka muhil a, kan chaweina tur kan thlenin min kaitho a. Ka mut dan a rem chiah lo bawka ka ring a na ngang mai. 

Dar 11 rik hmain kan tum ram kan thlenga, an YMA hruaitu te nen kan inhmu a, chhungkaw hnih tanpuina kan pek tur te kan tlawha, pakhat zawk phei chu in sak sak kan tum a. An in hmun tur VC te leh YMA te nena tangkawpin min lo ngaihvensak dawna, a theih anga ranga hma la turin kan inbiaa. Kan han tlawh te chhungkaw pakhat zawk hi nupa, kum upa tak tawh, chawmtu nei lo anni a. Pakhat zawkte erawh chu pa ber natna khirh tak tuar mek niin fa naupang te te pahnih a nei a. A nupuiin  kumin kumtir lamah khan a lo tlanbosan a lo ni a. Mi huan thlam chep leh tlabal takah an chenga, a faten kan thilpek an hmuh a an lawmzia chu lainatawm tak anni. Hetianga midang lawm hmel ka hmuh apiang hian ka nuna ka lawmna leh min tihlim bertu niin ka hre thina, diktak chuan midang tanpuina sum ka hman tam zawk hi ka pa pawisa ka ruksak ni mah se, midang an lo hlim phah tho si avangin keimah ka inthiam veng veng zel tho. 

Khawthim hmain Aizawl kan lut leh hmana, inah min thlaha, ka inbual hnuah chawei nan ala hma avangin ka mu zal mai maia, ka lo muhil zui a. Ka harh leh chuan khua a lo thim chiang tawh viau. Inhnuaiah phak deuh chuapin ka chhuk thlaa, Common roomah ka pa leh pa upa lam pathum hi an lo inkawma, an hming ka hre lo nangin ka hmuh fo tawhte anni tih ka hria. Politics chungchang an sawi ngei ka ring bawk. 

"I lo awm reng a ni maw? I lo la haw lo emaw ka tia" Ka nuin min hmuh veleh a lo ti a. "Ka haw na a rei tawh lutuk' ka ti bul hmak. 

" I duh leh chaw kha lo ei la, keichu i pa kan nghak law law ange. Tunlai chu ka pum hi a nuam lo veng veng reng mai" a ti leh a. 

"In entir ta che, ti nge a? " Ka ti nghal vata. "Eng a ni lo vang, a nuam lo veng veng tihmai chauh ania, I sam kha tan belh tawh reng reng suh, hmeichhe awm hian awm rawh. Bike pawh hi khalh tawh lo la a tha ang" a ti zui leh daiha. "Hmeichhe awm a ka awm angai em ni? Hmeichhia ka nih reng hi. Kei lo pawh Hmeichhe Bike khalh an tam em maia" ka ti liam puata. 

"Ti nge maw i u nen hian in in an loh em em mai ni?" a ti leh ringawt. A sawi dik chiah a, ka u hi hmeichhe nihdan tur thlapa nung a ni a, pasal pawh kan chhungkaw milpui, amah ang bawka fel leh smart tak a nei a. Pasal a neih hma khan ka inchei duhdan te hi a sawisel fo a, ka room ka vawm hnawk rem rum thin pawh min sawisel nasa thin viau bawk. Sunday a ka inkhawm naah bak hmeichhe incheina lam hi ka uar lo ngang maia. Hunawl ka neih chuan Badminton ka khel thina, thiam tak ka ni lo a, thiam lo pawh ka ni chuang lo. Infiamna lam ka ngaina vek a, College ka kal lai pawhin Basketball leh Volleyball ka khel thin a, Basket ball bik phei chu Mizoram teamah ka tel ve nghe nghe bawk. Ka harhvang em em a,thian ka kawm nasa a, ka u erawh a mizia a zawi raih a, thian a kawm ve duah duah lo a, kohhran a bel em em bawk. Kei chu chawlhni chawhma ka inkhawm bak ka inkhawm ngai meuh lo a, thalai pawl velah pawh ka tel ngai lem lo. 

Chaw ka ei kham veleh ka room ka pan lehnghala, phone khawih chungin ka mu a, kan thianho group a ka lut chu ka beisei loh tak mai ka hmu a,Thomas-a ka call nghala, a pick veleh, "I ti tak tak em? " ka ti nghal thawr. 

"Ti tak tak e, min rawn call zo chiaha, ka rawn sawi nghal anih kha. Confirm vat ang u" Phur tak hian a rawn ti a. Ka phur lutuk awmngaihna hre lo ka za vek maiin ka hria. 

Khawvel huap pawha zaithiam langsar an lo kal dawna. An vanglai pel tawh mah se keini ang ramah chuan kan chanphak tawk an ni a, lo kal beiseina pawh kan neih phak loh laia an lo kal tur ka lawm chu thuhran, opening song sa tura min rawn sawm lehzel chu mumang a ang rum rum mai.Tlaivar deuhthawin kan titi zuia, kan phur satliah lo, kan phurthak hi  a ni tawp mai. 

Thla khat a liam leh meuh chuan kan thianhoin kan nghahhlelh ber hun a lo thleng ta a. Tlai dar 3ah kan thlenga, nidanga Concert kan lo chhim ve tawh thin nen chuan a dan a dang zar dawn tih hai rual a ni lo. Kan inpuahchah nghal char chara, khua a thim chuan mipui an khat hmur tawha, lo luh belh an la awm nguah nguah bawk. 

Chhana nen kan din dun laiin Police officer pakhat, palian leh pian dik lutuk mai hi a rawn kal pheia.Eng nge a rawn sawi ang aw ka lo tih laiin Chhana a rawn pan hnaia, "Hey, Bawiha.. Kan va inhmu lo thei ve" a rawn ti a. "Eheuu... A va mak tehhlawl ve. Tinge nizanah i rawn kal loh a? "Chhana'n a ti ve nghal chul a. 

" Ka hman ngang lo anih kha, Ka ni eng nge a an? " Zangkhai vuh hian a ti leh a. "A tha e, hun i neih veleh min rawn tlawh ang che" Chhana'n a ti leh a, kalsawn ka tum chu min ko a, "Ding teh, hei hi Rempuia anih hi. Bawiha, ani hi Arini, inkhelh naa thinchhe deuh thin kha" min ti zui a. 

"Ehe, I lo ni reng alaw? " Ka ti hluaia, vawi tamtak kan inkhel ho tawh thina, a taka kan inhmuhna hmasa ber a ni thung. Kan inchibai leh tlai khawhnu a, ka kut nghet takin a hum a, chiang taka min en chungin " Kan inhmu ve ta hlawl chu ania, tha deuhin in zai dawn nia" a ti a.  Nui chungin ka bu nghata.  Hei hi ka nuna mi pawimawh leh nasa taka ka tihbuai zui tur mipa, ataka ka tawnna hmasaber a ni tih reng reng ka hre lo. 

Kum a thara, ka pa pawhin kan lo rinlawk ang ngeiin Politics a luhchilh ve ta a, A dinna tur atan bial lian tak mai sawi rik ret ret a awm tawh avangin that a chhuah lehzuala, minister prog pawimawh hmanpuiin a zin chhuak ta deuh reng bawk. 

Ka nu erawh chu a pumna a sawi zing tial tiala, kei pawh duh ang anga teihawi ka harsat ve ta deuh. Ka u a awm tawh lova, ka pa a zin chhuak deuh reng bawk si nen ka nu dam mang lo chhuahsan fo chu nuam ka ti ta chiah lo va. Inah awm tam ta deuh mah ila Inchhung enkawl chu ka kutah ka la dah chuang lo va. U Chhari a awm a, a fel bakah a rintlaka, ka nu kut ke ber a ni bawk nen, inchhung hi chu a kutah ka dah fel hmak a ni ber. 

"Nu, ka chhuak dawn ania. Dar 11ah tan tur ania" ka ti a. " Rawn haw tlai suh, I pain thil pawimawh sawi tur ka nei atih kha. I u te nupa pawh an lo phei dawn" a ti a. "Ka awm ve angai kher ami? Chaw ei chhuah kan lo tum asin" ka ti nang nanga. 

"Ngai e, I awm angai. Lo haw hma la a tha a nimai" a ti leh a. Chhang loin dawhkana Apple zaisa awm ka hmawm zauha. Inchhungah hian ka hriat ve ngei ngei ngai tur sawikhawm chi a awm ngai mang lo va, ka duh dan dana hawi ve mai mai ka nih avangin chuti taka awm ve tura min duh chu mak ka ti viau. 

Nileng deuhthawin kan thianhoin kan chhuaka, ka hawin ka u te nupa an lo awm a, chaw an ei dawn a lo ni a. Ka pa a lo la haw lo thung.

"Khawiah nge i kal a? " Ka u-in min lo ti nghal thuaia. "School pakhat Teacher's day hmannah kan kala" ka ti tha ve mai. U Jimmy-an ka Bike thlek vang vang pah hian "I bike chu a fit hmel hle maia. I chei nalh bawk si, Tu nge i chei tira? " Min ti a. Ani pawh hi Bike lawm tak ve tho a ni a. An lo len laia ka awm chuan Bike lam ngawt kan sawi zel. Ka chei tirna dawr ka hrilha, a hriat zawng tak a lo ni a.Kan sawi zui luama. "In ninawm, khatiang ringawt sawi suh u. Chu ai chuan Pasal nei lam te sawipui rawh. A nula awm lo mah nin nak laia" Nin hmel takin a rawn ti a. 

"Pasal neih ka peih teuh lo mai, ka leng tar dawn" ka ti ve hmak. 

"I zak lo mai mai e a. Pasal neih loh te a tha ngai lo, ka damlai ngeiin nei la ka duh hial ania" ka nuin a lo ti ve a. Ka u in ka nu a en deuh reng chu ka hmu a. A pum lam a sawisel fo avangin that lohna a nei anih rinna ka nei thuta. "Ti nge chutiang i sawi a? Dam rei i tum lo mi? " ka ti nghal ngawt pek. 

"Kan tum leh tum loh vanga dam hun tur danglam thei pawh kan nih loh hi. Tiang vel mai mai hi ila nia, thil tak tak engmah i buaipui bawk si lo. Mang i ti ang" min ti leh a. 

"Nu, ka pa kawmngeih deuh hi Pu Thanga fapa kha tiraw? Nizan khan news-ah ka hmu a. A future a bright hmel ka tia. Annu kha a boral tawh em kha? " ka u in a ti a, thildang a rawn sawi ta chu ka lawm viau. Ka puitlin loh zia an sawi hian ka ning tlat zel. 

"Boral tawh e.. Vawiin hi a boral cham vawikhatna ania. Lung an phun nghala, Kal ka tum deuh nangin ka pum a nuam lo em a, I pa a kal ta anih kha" a ti a. Pu Thanga hi ka pa thian hnai tak niin a fapa a tih hi Politics lama naupang leh tawnhriat nei tha lutuk a ni a, tuna sawrkar term kal lai mekah hian Opposition MLA niin Mizo zingah MLA ni thei naupang ber a ni mek bawk. 

"A va lainatawm em em, a nupui kha a hmeltha bawk si, a thih chhan kha accident kha an ti maia. Amak ka la ti reng" Ka u in a ti leh a. 

"Niang chu, hmeltha leh fel tak pawh an boral thei tho a. Tunhnai phei chu a lo kal ngun a, a mizia hi a tha bawk si. A ngainatawm ania' ka nuin a ti a. "Te, lo kherh chiam la, a chhe vak bawk si lo va. A fuh dawn e' Ka uin a ti a. Ka ner nang nanga, "Ka duh lo e a. A hmelchhia pawh ka ti lo a, a serious ka ti" ka ti liam maia. U Jimmy-an "Nang i serious ve chuang lo va, a zia phian ang. A landanah hi chuan inthlan lehah pawh a tling dawn tih a chiang reng tawha. A chhe berah MLA nupui i ni dawn tihna ania. A zia viau ang chu" a ti zuia. Ka u leh ka nu an nui an nuia. "A sam hi tan tawh suh ka tia, min runluih aniang chu. Hei a tan leh muat tawh hi. Nula hmeltha pangngai tur hi Patil a ang zo vek zel" ka nuin a ti bak tak. "Patil berkher" Tih leh ka u in nuih a ruala, Keipawh ka nui ve hak hak mai. 

Ka nu te sawi mek hi kan chhungkaw thian hnai tak ni thin te fapa niin, keini aiin kum 5 velin a upa a, kan inah an rawn kal reng lo chungin chhungkaw hun pawimawhah chuan inkalsak tawn ngei ngei ang chi kha kan ni thung.Tun hnaiaha U Sangzela hi a lo leng ngun ta viau, achhan pawh ka pa nen politics lamah tum thuhmun an neih vang niin an duhzawng a inanga, kei erawh chuan ka be ve vak ngai loin ka kawm tur chiah ka dah ngai lo. 

Chawei hmain ka pa a lo haw a, thilpawimawh tak sawitur awm ti siin chawei naah pawh engmah pawimawh an sawi miah lo. Politics lam ringawt ka pa leh u Jimmy-an an sawia, a khat tawkin ka nuin a lo sawipui ve zeuh tih loh chu hmeichhe ho zawng kan ngawi ran mai. 

Chawei kham hnu a inchung lam ka pan tur chu ka nuin min ko dinga, "I pa lehkhabu dahnaah lo kal rawh" a ti a. Hnial buai loin a sawina lam ka pan nghal mai. Ka lut fel deuh chiah tihin ka nu leh ka u an rawn lut ve a, ka pa leh u Jimmy-a rawn luh ve hmain ka nu hnenah, " eng nge kan tih dawn a? " Tiin ka zawt a, "I la hre mai ang" ti bakin min chhang lo. 

Ka pa leh u Jimmy-a an rawn lut ve a, kawngkhar chhung lamah u Jimmy-an a kalh nghal thlap. Ka pain aw a thian hruk hruka, min rawn en a. "Mate, I pasal neih tur chanchang ania ka sawi dawn. Ngun deuhin lo ngaithla la" Pehhel map lo hian a ti a, mak ka ti lutuk chuan a fiamthu anih ka ring hial. Mahse, ka naupanlai atangin ka pa hian min fiam tak vak vak pawh ka hre ngai lo. Min hau em em ngai lo va, mizo pa tamtak ang tho niin pafa inkawmngeih leh inpawh tak kan ni ngai lo. 

"Pasal a? " ka ti ha mai. Ka nu ka en chuan min lo en lo va. Ka u lah chuti bawk. U Jimmy-a erawh chuan min buk khum nghat ringawt. 

"Sangzela hian neih che a duh khawp maia. Pasal i ngaihven lo viau tih ka hai lo a. Mahse, ka ngaihtuah vang vang hnuah ani hi nei la thain ka hria. Kan chhung hnai tak anih bakah a naupanlai atanga kan hriatchian a ni a. Mi fel leh thluak tha, nun tluang tak leh hma hun eng tak nei a ni bawka.Ngaihzawng i neih awm ka hre lo bawka, ani hi nei la ka duh khawp mai" a ti leh chu a sawi zo deuh awrh tihin, "Pasal neih ka la duh reng reng lo e a. Lo duh pawh ni ila keiman duhzawng ka nei ve ang chu" ka ti hmak. Ka chhanna avanga ka u thaw deuh huai ka hre nghal zat bawk. 

"Tun tut tutah kan ti hleinem, vawiinah lung an phun chauh kha. Ber thla lamah nise amah chuan a ti nghe nghe a. Ka sawi ang khan tumah ngaihzawng i neih pawh ka hre lo va, lo nei tehreng pawh ni la Sangzela aiin an tha lo tawp ang. Ani hian a nei duh che anih tak tak phawt chuan i nei tur a ni" Khauh tak hian ka pain a ti leha. Hetianga thupe taka a tawng tawh hi chuan zawm ngei ngei angai fo tih ka hai lo. Mahse, Tun tum kher hi chu zawm tumna pakhatmah ka nei lo. 

Chhungkaw thil pawimawha inhmukhawm ni ve siin ka pa hlir a tawng char chara, ka nu hian kan naupanlai atangin ka pa hi a hnial chiam ka hre ngai miah lo va, Tun tumah pawh a hnial eih lo. Ka pain U Sangzela ka neih a thatna tur leh a ruahman dan a sawi zui teuh a, ka hnial leh phat zel chungin engamah hmain a rilru a lo siam fel vek tawh tih ka hai miah lo. Chuti taka nei tura min nawr ta leh makpa atana a awh ngawih ngawih chhan tur ka ngaihtuah ngial pawhin ka hre chhuak thei lo. Ka rindan langsar berah chuan, party lama a tlaktlum nan a fanu hi min hralh a tum anih ka ring a, U Sangzela pawhin englaimahin min ngaihzawn ka hre ngai bik lo va, ani pawn Politics lama hlawkna nei turin min neih a duh nimaiah ka ngai bawk. Mahse, kei ang tangkaina nei tlem tak leh chhungpuinu atana itawmna pakhatmah nei lo hi atana min neih a hlawkna tur reng reng ka hre thiam lo. 

Mut pawh ka muhil thei lo a, ka pa khan a ti mai mai aniang te ka ti leh that that thina, a ti mai mai lo tih lah ka chiang ngang mai si. Hmanlai ang maia fanu te pasal han zawnsak chawt mai chu tun ang kum zabi sawmhnih hunah hi chuan thil awm lo lutuk hi a ni ringawt. Pa vengva leh fa te duhthlanna ngaipawimawh tak tura ka ngaihin hetiang mai maia ro a rel ta hi ka hrethiam lo bur a ni bera. Fapa, roluahtu tur a nei pawh a ni lo va. Kei lah nula upa pawh ka la ni bawk si lo, pasal nei tura min tur hmanhmawh tlat pawh kha mak ka ti a, ka hriat loh lamah U Sangzela nen ro chungchang thlengin an lo insawifel vek tawh a nih ka ring rum rum mai. Ani u Sangzela lah Politics a luhchilh hma khan Dan lam a lo zir a, tha takin a lo pass thlap tawh mai bawk nen, an pahnih thluak tangkawp anih chuan ka buai ve viau ang. Amah hrim hrim chu neih duh lohna ka nei pawh a ni lo va, ngaihzawng nghet pasal tur chi phei chu ka la nei ngai eih lo. Mahse innawrluih ang zawng hi chu ka duh loh dan ber a ni a,Ka nu hnenah tal sawi that leh ka tum tho tho mai. 

Zingah lu na burin ka harha, inhnuaia ka chhuk thlak chuan ka rin loh deuh hian u Sangzela a lo la thu kur zuia. Ka pain ka pasal tur anga a sawi vang kha nge nidang angin ka en liam ngawt thei ta tlat lo a. Ngei pawh ka ngei deuh hial mai. 

"Arin,vawiin chu i nu Doctor hnenah lo va kalpui ang che. Ka zinchhuah ngei ngei angaia" Chaw kan ei laiin ka pain a ti a."Chhari nen pawh kan kal thei alawm. Tu nge Driver i hruai ang? " ka nuin a lo ti ve a. Ka pain " Zuala bawk animai. Rama pawh ka hruai tel anga" a ti a. Tihtur ka nei anih pawhin cancel a ka nu Doctor hnena hruai ngei turin min ti nawn leh a. U Chhari'n a kalpui thei tih lo sawi mah se ka pain keimah ngei kal turin min ti bur maia. Nidangah hetiang hian min la tihluih ngai loh avangin tlem chuan mak ka ti deuh. 

Chawhma lamah ka thiante nen Bank lamah kan inhmu lawka, kan insakna tura tul vel kan buaipuia. Dar 2 velah ka haw a, ka nu a lo insiam peih tawha. A hmel atang ringawt pawhin a nuam lo em em tih hai rual a ni lo, Vawiin hian ka hmu tar zual a, nidangah ka lo chik lo mai mai zawk nge ni? 

Doctor kan nghah chhungin ka phone-ah offline game ka khel mai maia. Ka nu erawh chu a bula thu, kan veng nu nen an titi a. An inentir tur vel an sawi dun a, a hnuah inthlan lo awm tur chungchang leh ka pa khawi bialah nge a din dawn tih vel an sawi dun leha. Game khelh pahin an titi ka ngaithla paha. Ka rinai takin ka nuin Politics chungchang a lo hriaa. Chubakah, kohhran hmeichhe rawngbawlna thlengin an sawi kaia. Tun hnaiah ka nu hi inkhawm ve thin tih bakah chuan Sakhaw mi tak ni pawhin ka lo hre lo va. Mahse, an titi kalhhmangah chuan ka nu pawh Kohhran hmeichhe Komiti Member a lo ni reng tih ka hre ve chauh mai. 

Kan luh a hun chuan luhpui ka tuma, a duh tlat lo. Rei deuh tak a awm hnuah a rawn chhuaka, "Test tur min hrilh nual maia. Tunah a la tlai lo bawka tinghal ang" a ti vut vuta. 

Test tura min tih ang ang kan test nghal veka, mahse result a tuka lam leh tur chi a awm avangin avaia kan lam vek huna Doctor pan leh chauh a duha. Kan haw dawn lai takin ka thianten min rawn call a. "Dine out ang. Lawm tur kan nei" an rawn ti chuk chuka. Enge kan lawm dawn ka zawh lah chuan an la sawi duh der lo zui. Ka nu hnenah ka hrilh a, a phun nang nang nangin ka ngai pawimawh duh lo va, in a haw tawh loin ka thiante awmna lamah Taxi-in ka kal lui ta tho. 

An awmna ka thlen chuan kan thianho chauh ni loin midang pawh an lo awm ve a. Kan game khelhpui thin Rempuia pawh a lo awm ve vung a. Thianho awmkhawm tih takah an lo ri lung lung hlawm maia. Chhana'n min lo be nghal a, "eng nge kan lawm dawn? " ka ti a. Nui vur vur chungin Rempuia lamah a thle zauha. "Pu thar kan nei a, lawm angai" a ti a. Hre thiam chiah lo hian ka en ha maia. "Tak takin, Rempuia hi a kaisanga. Chu chu kan lawm anih hi" a ti leh zung zunga. "Ooo, chuti law? ' tih hluai pahin Rempuia ka pan hnaia.Ka lawmpui em em tih ka hrilha, kan vawi hnih inhmuhna chauh mah nise inkhel ho reng reng kan nih avangin kan innel nghal em em tho.

Chaw kan ei dawn chiah tihin u Chhari'n min rawn call a, ka nu a nawm loh zual deuh thu a rawn sawi. Ka lungphu a rang nghal viau maia. Chaw ei chakna pawh ka nei tawh lo. Phone hman chhuanlamin pawnah ka chhuak, Taxi ka chang a. Rei pawh ka din hmain a rawn tlan ta hlauh. Ka chuan fel hnuah kan thianho groupah ka nu nawm loh vangin ka haw tih ka sawi a. Ngaihtuahawm a ni lo tih ka sawi nghal bawk. 

Ka nu te roomah ka lut tlang nghal a, U Chhari a lo awma. "A muhil deuh chiaha, a pum hi na a ti riaua" a lo ti nghal thuaia. Thu loin ka nu mu lai ka en vang vanga. A lo muthilh theih vangin ka lawm ngang maia. Ka thlamuang deuh huai bawk. 

Chaw tlem ka ei a, ka ei laiin Rinpuia'n min rawn biaa."Kan rawn kal dawn em ni? " a rawn ti a. "Angai lo, a lo muhil a. A pum a lo na deuh a, chuvang ania ka haw" ka ti a. An la rik laih laih danah an la haw lo tih ka hre thiam mai bawk. 

Ka pa a lo haw dawn loh avangin ka nu te roomah riah ka tuma,ka u msg ka thawna, lo kal a tum nangin kal angai lo ang ka ti a, a rilru a nawm loh hmel viau. Ka nu bulah mu loin thutthlengah ka mu a, dar 11 velah a rawn harha,a pum a nawm loh thu a sawia, damdawiin kal mai ka duh laiin amah zawkin tul a ti si lo. Keilah a zei lo chi leh nu lo ve tak mai ka lo ni bawk si a, a buaithlak viau. 

Zing karah ka u a rawn kala, rin loh takin ka nu pawh a tho nuam phian maia. Rilru nuam lo teuha awm ka nih avangin zanah ka muhil mang lo va, zing lamah a zia tih ka hriat takah chuan khawvar hnuah ka muhil tha veleh ta chauha. Ka harh lehin dar 10 a lo ri tawha, ka u-in chaw a lo ei nghal a, ka nu nen pangpar khawiin an lo buai dun viau. 

Tlaiah ka nu result ka lama, Doctor hnenah ka kalpui nghala. Ka nu erawh ka u-in kal ve lo tura a tih avangin a lo kal ve lo a. Reivak lo ka nghah hnuah Doctor ka hmu a. Test result hrang hrang ka ken luh ho tawng mang loin a en kuala. Dawhkanah a dahthlaa. "I nu hi ka rin aiin a tha lo dawn tlat mai. Ka sawi dawt ngam lo nangin Cancer hi kan hlat dawn lo tlat maia. Biopsy ti phawt ila, a chiang ang. Naktukah intih theih chuan lo ti nghal teh u aw. I pa pawh ka lo bia ang" a ti a. A thilsawi chuan min thawng em em maia, awmdan tur pawh ka hre meuh lo. 

Ka bike dahna lamah ka phei a, kal pahin ka u ka biaa. Doctor nena kan inbiakna vel ka hrilh a, u zawk na na na chuan chiai miah loin min lo chhanga,aman a rawn buaipui ang tih sawiin, hlauthawng lo turin min rawn ti a. Tlem chuan ka thla a muang ta deuh. 

Kan test tawh chinah tha lo a awm loh thu ka nu ka hrilha. Test na atanga an thil hmuh belh hriatchian an duh avangin Biopsy ti ve hrim hrim turin min ti ka tih chuan, "Ka thin a cancer te pawh a ni ta ve ang. Ka thin zawn hi a sa vung vung zela, a na em em mai bawk si" awlsam angreng tak hian ka nu-in a ti a, "Awi, I ti ho em maia" U Chhari'n a lo ti vata. Engmah ka sawi ve lo. 

Biopsy result a lo chhuaka, Doctor lo rinlawk ang ngeiin a pumpui hnun a lo cancer a, bei tidawng zual turin a thin a lo thleng chho tawh reng mai bawka. Ka pain tih theih zawng zawng tih duh mah se Doctor berin "Hahdam takin inah awm rawhse" a ti mauh mai si. Ka u a puitling em em a, kei erawh ka nun a nguaia, ka nu thi mai tura ka dah chhin pawhin ka mittui a tla zel a ni ber. Inchhung ngaihsak lo leh fapa awm a awm mai mai ni mah ila, ka nu chu ka nu a ni a. Sum chauh duh leh min ngaihsak tawk lo ti thin mah ila nu chu nu a lo ni tho tho. 

Note : A hawrawp hi a inang lo deuh nuaia, ziahna khawl hran hran ka hman kual vang a ni a. Ka siamthiam leh tawh bawk si lo va. Min lo ngaidam hram teh u. . Chuan, ka YouTube channel min la subscibe lo te khan khawngaihin min lo subscribe sak ve zel dawn nia.