Naruto -2

 Then -2na

Ka nu damlo kan enkawl atangin thla a tling lek lek tawha,nitin a tlahniam tial tiala, ka pain nurse a ruai tho chungin ka awm ve chawta. Chhuah ngaih chang pawhin pawimawh takah lo chuan ka chhuak mang lo. Ka pa erawh politics lamah a kal laklawh tawha, inthlan kum a lo ni bawk nen a chhuak deuh reng tho. Ka u a lo kal awl lo va,kan nufa thumin roomah kan inkhung nileng fo va, kan naupanlai chanchin sawiin kan titi hlut chang a awm a.Eng emaw chang chuan kan rilru theuh kawma ngawirenga awm nilen deuh thak thak tum kan nei bawka. Ka nu mood a zirin kan unau mood pawh a inthlak ve zel nimaiin ka hria. Kan nufa thuma kan inpawhna a thuk phah em em maia. Mihring ngaihah chuan hun tam nei tur anih tawh loh avangin, a duh ang anga awm ka duh a. Chhuah ka ngaih changa kal lo tura mintih chuan ka kal lo ve mai zela. Ka nu a damloh zui tak vangin ka pain pasal neih lam a sawi zui lo erawh ka thawven phah viau. 

"Te-i, ka damlai ngeiin pasal nei la ka duh. I pa lo haw veleh ka lo sawipui anga. Hahdam taka kalsan che ka duh tlat" ka nuin kan pahniha kan awm laiin a ti a. Ka phone ka dah thlaa, " I dam reng dawn alawm a. Chutiang sawi angai lo" ka ti hmak. 

"Naupangchhia pawh i ni tawh lo va, ka dinhmun hi haider reng reng suh. I u aia nasa taka ka ngaihtuahna luahtu i ni a, pasal nei lo va ka boralsan che chuan ka thlarau a chawl thei lo vang. I pa pawhin nupui te a nei leh duh thei a. Mipa chu khawhar ngaithei lo deuh annia" a ti zui leh duaha.

"A nei duh awm lo em maia. A thu hrimin min ngaihtuah ka ngai hleinem, ka puitling ve zel dawn a" ka ti teh ngawta. Thutawp sawi ang maia a awm chuan min ti hlauthawng a. Ka pum a nuam lo nghal teuh mai. 

"Tawng mai mai thin suh, ka ngaihtuah che ka tih chuan ka ngaihtuah che animai. Rei tak pawh ka dampui tawh dawn lo che a. Sangzela'n neih che a la duh phawt chuan nei ngei ngei ang che. Ani tluka makpa tha tur an awm chuang lo" a ti leh charh charha. A cancer tih kan hriat hma khan pasal ka neih duh loh thu hrilha, ka pa bula min sawipui tur khan ka beisei ania. Tunah amah zawkin min nawr ta a, chu pawh a damlai ngei a duh lehzela. A rilru tihnatsak ka duh loh chuan ka neih ngei ngei angai dawn a. Mahse, pasal neih ka la duh teuh si lo. 

Ka pa zin lo haw tukah ka u te nupa leh ka patea te nupa an lo lenga, U Sangzela a lo kal bawka. Ka rin loh takin ka nu te rooma kan awm laiin inneih chungchang an sawi chhuak ta thut maia. Ka pain bul a tana, ka nuin a damlai ngeia pasal nei tura min duhthu sawiin U Sangzela a rawn nghala. Ka rin loh takin ani lah chuan englaipawha palai rawn tirh a hnial loh thu a sawi mauh maia. Inngaihzawn awm si lo, a fal a vawikhat pawh la awm dun ngai lo kan ni a. Ka pasal a ni ngawt mai tur ka ngaihtuaha, mumang a ang dawn khawpin ka hriaa. Engvanga min nei duh em em nge anih ka hre thiam hlawl lo. 

Ka room a ka awm laiin ka u a rawn lut a, ka hmai phuhlip enkawl dan tur a sawi barh barha, kan unau hi kan vannei a. Kan vun a mam viaua. Mahse, tun hnaiah ka hmai a rawn phuhlip chiam maia. Skin care ngaipawimawh tak a ni bawka, kei aiin a vei zawk. 

"Pasal neih lam kha eng nge i ngaihdan ni reng reng a? " ka hmai a thil min hnawihsak laiin a ti a. "Ngaihdan ka nei lo" ka ti hmaka, "I awmdan ka en hian pasal neih i chak loh tur zia ka hre thiam alawm. Mahse, ka nu hian a thih hreh phah lutuk che a, ka bulah phei chuan a sawi ngun tawha. Kei chu nei mai la ka ti. Ka nu hi hahdam deuhin awm se, nuam deuhin kal tawhse ka duh" a ti dam leh thlapa. "Pasal ka neih hi tinge maw a duh em em le? " ka ti fan raiha. "Fanu pahnih chauh min nei a, keiin pasal ka nei tawha. Ka nu hi awm lo ta se nang hian pasal i neih ka ring miah lo. I hmalam hun tur a ngaihtuah vang tih hria la, pasal neih chak lo chung pawhin a duhdan ngaipawimawh hram thei la ka duh, a ni telin a dinhmun a tha lo tial tial mai si" a ti leh dap dapa. 

"Ka pa nen kan awm mai ang chu, keiin pasal ka neih veleh zel phei chuan engtin nge niang? Ka pa enkawltu an awm nang" ka ti ve thung. A ngawi deuh vang vanga, "thil ka hrilh ang che. Mahse, sawi chhuak reng reng lo turin intiam phawt rawh, anih loh chuan ka sawi lo vang" thutak deuh mai hian a ti a. 

"Sawichhuah i hlauh chuan min hrilh lo mai rawh, ka sawi palh ang" ka ti awlsam et a. A ner deuh nanga, " A pawimawh alawm. Ka sawi anga, sawichhuah i chak viau pawhin ka nu vang talin i ka chip ang che" Thupe deuh tak hian min ti leh a. Chhungkaw thil vel kan sawi dun ve fo nain hetiang hian kan thutak tehchiam ngai lova. Eng emaw changa u Chhari kan nin thu kan sawi pawhin kan thutak tehchiam ngai lo. 

"Pasal nei ka tura ka nuin a duh chhan che a awm a. A damlai ngeiin mipa rintlak tak kuta dah che a duh a. I hlim tih hre chunga kal a duh tihna ania. Chutiang tur chuan U Sangzela hi a tha em em a, ani hi i neih chuan i mize thutak lo deuh pawh hi a siam tha thei ang che" Thupuifun tak hian a ti leh a. "Ninawm, thil ngai leh ngai hlir i sawia, ngaihzawn miah loh neih chu peihawm loh deuh asin" ka ti hlar mai. A thle baka, "Dawhtheih hi zir i ngai ania. Sawi pawh ka la sawi zo lo va, I lo thinrim ringawt a. Ka pa i chhun leh lutuk" tiin min khak a, thinrim taka min khak a ni lo thung.

"Nangin neih i duh loh chhan chu i ngaihzawn hmasak loh vang ania. U Sangzela pawn a ngaizawng hmasa lo che a. Mahse, a duhzawng i ni aniang, a nei duh viau si che a. Mak deuh ania. I vannei tih hre tawp mai rawh. Mipa tha leh fel, future bright bawk si ania. Pathlawi ni mah se fa a la nei chuang lo va. Buaina a awm lo. Chuan, ka nu-in nei tura a duh em em chhan che chu ka pa hian nupui a nei leh ngei ngei dawn tih a hriaa. Inchhungah i inthlahrun a hlaua, a hahdam thei lo" a ti leh duaha. 

"Tinge maw ka pa pawh chu nupui nei leh tura in rin tlat le? " Hrethiam lo takin ka ti a. A thle deuh baka, "chutak chu alawm pawimawh. A nei leh dawn ka tih chuan a nei leh dawn animai. A bak chu ka sawi rih lo vang. Ka nu hian hun tam a nei tawh lo va, ka nu boral hunah ka sawi dik zia ila hre mai ang" inringtawk takin a ti lehzel maia. "Nupui a nei anih pawhin a fanu ka nia, ka hrehawm dawn tihna a ni chuang hleinem. Thil la thleng thei tih vel vang mai maia pasal neih ka duh lo" ka ti leh hmak hmaka. Beidawn hmel tak hian a thaw hapa, " I rilru tur ka hre thiam che alawm. Nawrluih che ka duh lo va, mahse ka nu vang talin ka nu la thawh kan peih hram hram lai hian nei la chu ka duh. U Sangzela i duh ngang lo anih pawhin midang tal nei rawh. Mahse, mifel leh innghahna  tlak,ka nu pawhin a thlamuanpui ni se a tha ang. I nei duh lo anih ngat chuan thil la thleng tur hi a thlen hunah chuan pawi ila ti ang" a ti leh a. 

"Ti nge pawi ka tih ang? Pasal nei loin ka lengtar dawn tihna pawh a ni hleinem" ka ti leh vata. "Nia, neih pawh ila nei ang chu. Mahse, ka nuin a telpui tawh lo vang che" a ti ve khauh maia. Ka nu tlakhniam chak zia ka hai lo va, a sawi dik tih pawh ka hria. Mahse, ka luhlul ka chhuah a, "Ti nge u Sangzela hi tha intih em em chhan? Mipa dang aia danglamna a neih ka hre bawk si lo" ka ti leh talha. "Ka sawi tawh kha, a fel mai bakah a puitling tawha, hmalam hun eng tak a nei bawka. Ka pa sawrkar hnathawk pension ve mai a ni a, tunah politics a khel anga, a khelh fuh leh a zia. Nuamsa viau mah la hna engmah i thawk lo va, in thianho prog vel hi chu eizawnna a tling lo. Chuvangin U Sangzela hi i neih phawt chuan i ngaihtuahawm dawn lo" A ti thuaia, dik pawh a dik mahna. Nu leh pa zara khawsa nuam ve mai ka ni tlat. Mahse, chutia midang zara khawsa nuam tura intih ngawt leh nep taka min sawi chu ka duh bau lo. 

"Pasal te zara inlak len ka duh lo ve a. A ho em mai. Upa tak pawh ka la ni lo va, keimah ka la inenkawl thei dawn alawm" ka ti bung nghata. Min chhan hmain an pa a rawn lut ve a, ka nu damdawi lak ngai vel an sawi zawm ta daih. 

Tlaivar deuhthawin ka inngaihtuaha,pasal neih ka hreh dan a namai lo. Ka nu ka ngaihtuah chuan neih ka duha, keimah lam ka inngaihtuaha, neih ka duh lo thung. Engvanga u Sangzela pawn min lo nei duh ngawt nge anih ka hre thiam eih lo va. Inhmuh chang pawha inbe ziah lo leh inkawmngeih ngai reng reng lo kan ni a. Min neih a lo duh ngawt mai hi a mak ka ti deuh riau maia. Ani kher lo pasal nei dawn ta ila ka nuin a pawm tho angem tihte ka ngaihtuaha, mahse midang neih tur mai ka hria pawh chu a ni der si lo. Ka bialpa hlui te ka ngaihtuah let zung zunga, nupui nei tawh te pawh an awm a. La tlangval awm mah se inneihpuia sawm ngawt chi anni tawh lo. Ka pain a hmaa a sawi khan ipik viau mah ila ka nu natna vangin sawi zui lo va a reh leh mai ka ringa, ka lo thawveng viau hmana. Mahse, ka nu berin a natna hmanga min han nawr takah chuan chet lakdan a vang ta ngang maia. Ka thiante ho han rawn ve ngial mah ila an hawi bo vel mai mai dawn tih ka hai der si lo. Engpawhnise, amah U Sangzela pawh vawikhat tal biak ka duh ve hrim hrima,kan inah lo kal fo mah se min ngaihzawn ka hre ngai lo va, min neih a duh tehngawt chhan hriat ka duh tlat. 

Vanneihthlak lutukin amah zawkin min rawn be ta hlauha, tlaiah a rawn kala, kan pahnihin inchung zawlah kan thu dun a, inkawmngai lo mah ila inhre tha sa kan ni a. Mahse, kan pahnih a kan han thut fal tak ranah chuan sawi tur ka van ve ngang maia. Ama tawng hun ka nghak deuh tawp. 

"Inneih chungchang kan sawi khan i hmelah i hreh tih ka hria a. I nu dinhmun en hian puitling taka inngaihtuah i ngai a. Mahse, ka nawrlui lo che ania. Chhungkhat kan ni a, mipa dang neih duh i lo nei anih phei chuan zep reng reng suh, tlang takin min hrilh la, I pa ka lo sawipui dawn nia" Tha takin a ti a, a titi kalhmang a puitlingin kei ang hmeichhe khawsa duhdah ve tak leh ngaihtuah thui lo tak nen chuan kan titi dan atang pawhin kan inmil lo sa ngawih ngawih nimai hian ka hriaa. Mahse, puitling taka thil angaihtuahna chuan mak takin min hneh riau thung.

"Hreh chu hreh ve e.. Mahse, nangmah i nih vang a ni lo ania. Pasal neih hrim hrim ka hreh" ka ti ringawta. Min en deuh vang vanga. "Hman deuh khan i pa bulah neih che ka duh tih ka lo hrilh tawha. Mak i ti viauin ka ring a" a ti leh a. "Aw, mak ka ti. Chhungkhat kan nih bakah kan inngaizawng bawk si lo va" tlang takin ka ti ve maia. 

"A dik alawm. Inngaizawng bawk si lo khatia han sawi ngawt kha amak duh viau ang. Ngei pawh min ngei hial ka ringa, hmeichhe tamtak ang maia min ten tel deuh pawh ka ring tho. Mahse, neih che ka duh tlat a. I naupan lai atangin ka hria che a. I u nen inmizia a hrang hlak tih pawh ka hria. Hmeichhe awm pawha awm vak lo i ni a. Mahse, mi tha leh hawizau, nungchang zangkhai tak leh hmangaihna nei mi i ni a. I mizia hian min hip em em a, nupui tha tak leh ram hruai hna ka thawhna kawngah hian kawppui tha ber tur i ni tih hi ka ngaihdan a ni a. Rem i tih chuan neih che ka duh takzet' A ti leh charh charha. A confi bakah a duh a hre chiang hmel em em a, A sawi tum a thluaithlum hluak lo va, a inti zei tehchiam hek lo. 

"Nupui type ka niin i hria em? Keichu ka nih ka inring lo" ka ti chhuak thuta. Nui chungin min en a, "Hmeichhia i nih phawt chuan nupui chi i ni tihna ania' a ti awlsam et. 

Thil eng eng emaw kan sawi zui nuala, ka harsatna sawi zawng zawng hnial theih miah lohin min chhang thla zar zara, ka tanchhan apiang a phet zel a ni ber. Diktak chuan ka nu vangin pasal neih ngei ngei ka ngai dawn tih ka inhai lo va, midang neih mai tur ka hre bawk si lo nen hian thiam takin min nawrchep  vek ka timai. 

"Ka nau mah ni ila ka chhuang che. I inchhir miah lo vang" Ka u-in ka thutlukna a hriat veleh hlim takin a ti a. Ka pasal tur tu nge an hre chiang a, chhungkaw tha tak leh belhfakawm takah ka lawi dawn anih hmel a, ka mize chhe tak avangin ka nu-in thih a hreha, mahse tunah chuan a duh zawng ngei pasal atan neih ka tum ta bawka, thlamuang takin a chawl thei tawh ang chu. 

Ka nu hnenah ka hrilh leh a, a hmel a hlimna langchhuak chu ka hmuh rualin ka hnuk a ulh a, pasal neih ka hrehna aiin ka nu hlimna pawimawh zia ka hre chhuak chiang ve ta viau bawk. En ringawt pawhin rei a daih dawn lo tih a chiang reng tawha, fanu tha tak ni ngai lo mah ila a nat zual chinah chuan kan inawm nasa a, kum 27 chhung kan chendun laia kan inpawh na aiin thla 1 vel lek kalta a kan inpawhna hi a thuk zawk mahin ka hre hial. 

Engkim mai a thleng ta vut vut a. Ka nu dinhmun enin muangchan chi ni hek lo le, palai an rawn tira, ka nu leh pa te nen atir phat atanga an sawisa anih avangin zan khatah an sawi rem nghal vek a. Keini lam pawh kan inbuatsaih nghal char chara, ka thianten mak an ti em em chungin ka tana awmreng annih zia atakin an lantir a, an buaipui tur chin ang ang chu an buaipui ti ila a sual lovang. Ka ni te ho mai bakah ka nu laizawn te an tangkai em em a, ka nu leh pa lama ka cousin te ho pawh an tangkai viau vek. Thian hmeichhe kawm bik nei lo ka nih avangin ka Pa u fanu ka best atan ka u ten an ti a. Ka pawmpui maia. Hreh tak chunga pasal nei tur mah ni ila a tulna-in min nan takah chuan phur awm takin keipawh ka phe kual ve reng a, hmeichhe incheina lam ngaina lo em em ka ni chungin inneih kawr erawh ka duh uluk tawpkhawk thung. Lawi kawr leh thil tul dang ka u-in a buaipui vek a. Ka thilchhawm tur ka ni leh ka nu u in an buaipui thunga. Ka pa thu ka awih ve tum a ni bawka, ka pain engmah ui a nei lo. U Sangzela nen pawh kan inbe tam tial tiala,a puitlin bakah ka duhdan engkim min zahsak em em a,ka nu nat zual chang pawhin a hriat chuan a lo kal nghal vat zela, min ngaihsak bakah amah a lo puitling bawk nen thla pawh a liam hmain zawi zawiin ka ring chho a, kawm pawh kan inkawmngeih ta viau. Mahse kei aia kum 5 vel chauha upa emaw ka tih kha kei aiin kum 10 aia tamin a lo upa tih ka hre ve chiaha. Kan naupan laia kan in vela an rawn kal thin lai khan a nau nen kan inkawm thina,a nau kha kei aiin kum 2-in a upa a,chuvangin ani pawh hi kan inthlau vak lo turah ka lo ngai ve ngawt a,mahse a nau nen an lo inthlau nasa mai a lo ni a. Anihna zawng zawng nen lo puilting khap tur chu a lo ni.

Kan inneih ni tur karkhat chauhin a dang tawh a, man hlanni a thawmhnaw hak tur Faki nen kan va lama, in ka thleng deuh chiah tihin Chhana'n min rawn call a, “Zanin-ah hun lo insiam ang che,i nulatna kan sun dawn” rawn ti a. “I over lutuk,chutianga sun chi pawh a ni lo” ka lo tih khum hlara, ka tawngkam vin angreng tak ngaipawimawh lo zeta nui kur kur chungin ka kalna tur hmun min rawn hrilha.”I Boss thar tur chu lo hruai miah suh ang che,zanin chu a tawp nan kan par ang. Chuan, Akimi’n eng eng emaw a buatsaih sak che” a rawn ti leh zung zunga,Akimi hi Rinpuia bialnu nghet niin kan thianho zingah a tal tam ve viaua,ka thian mipa te bialnu ka ngainat ber a ni ve bawk.Mahse,thingtlang lama a post tak avangin kan inhmu khata,a hranpa taka inkawm kan ni lo bawk nen a lo haw tih pawh ka lo hre lo. 

Ka u hnenah zanah ka chhuak dawn tih ka hrilha, ka nu enkawl bakah kan inneihna thil vel buaipui tur a tam em avangin ka u leh u Jimmy-a hi tunkar chho chu kan in lamah an rawn awm deuh chawt a, ka pa lah lang leh riakin a zin chhuak zut mai bawk nen, U Jimmy-a mawhphurhna a sang zual em em maia. Mipa ka hriat tawh zawng zawnga zaidam lawrlak a ni bawka, kan pawtphar hneh hle chungin a phunnawi ngai lo va, hlim lo leh hmel hmuh hrehawmin a awm ngai hek lo. 

"Khawiah maw i kal dawn? " a kutsil pahin ka u-in min ti a, "min sun dawn" Ka ti liam puata. "Enga?  I a deuh emawni le? " Min melh khai khai chungin a ti a. "Ka nulatna min sunpui dawn" ka ti leh maia. "U Sangzela a kal ve dawn em? " a ti khauha. Ka lu ka thinga, ka kawrhak tur thlangin ka thawmhnaw ho ka keu kual dan dana, ka u lam ka va hawi leh chuan min lo la melh ta reng. "Eng nge min melh reng a? " nui deuh chungin ka ti a. "Rawn rui miah suh ang che" a ti fan raih. "I va han sawi ho tak" ka ti nghata. A ner nanga, "ka sawi ho miah lo.. U Sangzela vang pawh ni loin zu in tawh lo hrim hrim la ka duh che. Hmeichhia lehnghalin zu i in teivet a, ka duh lo lutuk" a ti leh hmak hmaka. Ka nungchang holam lutuk vangin min khak fo thina, ka zu in vanga min hauh erawh tun bak hi ka la hre ngai lo. 

"Hmeichhia nih vanga an zu in hmuh mak vak hi ho ka tihzawng tak a ni. Mipa pawhin an in a, hmeichhia pawhin kan in thei ve tho" ka ti deuh nghata. Min hnial tum niawm tak hian a ang ziaua, mahse kei min hnial hi chu a sawt lo tih a hre chhuak leh a ni phawt ang, a thaw deuh huaia. A lu a thing zui ta nar nar. 

Ka kal hmain ka nu te roomah ka lut a, a lo muhil a a muhil hmel ka thlir deuh vang vang hnuah ka chhuak a, achang hi chuan a damchhuah leh mai rinna ka nei thut thina, mahse nitin a tlahniam tial tiala, a na a chhuak zing tawlh tawlh bawka. A thatchhuah leh beiseina tunah chuan ka nei ta meuh lo va. A thu awiha U Sangzela nei tura thu tlukna ka siam pawh hrehawm tihna ka nei mang tawh lo. 

Bike ka khalhchhuaka, ka thiante lo awmna tur panin ka tlana, pasal ka neih hunah chuan ka nun zalenna hi a tam zawk a bo dawn tih ka hai bik lo va, hetianga Bike chak tak taka khalh hi Politician thangduang tak nupui tih tur pawh a nih ka ring hek lo. Chuvangin vawiin chu chak taka tlan ka chak a, ka chak ang ngeiin ka tlan chak viau reng bawk. 

An lo awmna ka thlen chuan ka rin loh tak mai thil an lo buatsaih a, mahse ka incheina pa angreng tak nen chuan a inhmeh tehchiam lo. Akimi'n min rawn kuaha, "Pasal tha tak i nei tur hi ka lawmpui rual che-in ka ui che. I thiante hi i tel lo hian an inkawm khawm rei pawhin ka ring lo" nui chungin a ti a. "Pasal a neih hnuah pawh kan la kawm lui zel dawn, anih loh chuan kan pawt then leh duh mai ang' Thomas-an a lo ti bul bula. Ani hi tawngtam lo em em si a mihring ka ngainat tawpkhawk a ni a.Ani pawh hian min duat bakah min dawhthei a, kan thianho zingah pawh min hre thiam ber tu a ni fo. 

Rempuia a lo kal ve hlawl maia. Ani hi kan thianho zinga rinluh theih la ni chiah lo mah se mipa ho-in an kawmngeih em em a, Chhana cousin a lo ni bawk nen keipawhin ka en hrang tehvak lo. A hna in a zir bawka a smart em em a, mi hneh theihna riau a nei bawk nen awmkhawm naah reng reng amah hi kan ngaichang deuh thap reng nimai hian ka hria a. Pa tawngtam leh ri bawrh bawrh chi a ni lo va, mahse a mawi tawka titi tur hre tak, midang thusawi engpawh uluk taka ngaithla chi a ni a. A bula awm a hahdamthlak viau, mahse mak angreng takin a dip a na phian lawia, palian pangngai tak anih vang leh a hna vang anih ka ring deuh ngawt bawk. 

Ka thil in vangin ka luak a chhuak deuh a, ka intam miah lo chungin ka in khat vangah ka ngai deuh mai. Chaw ei hmain a kil lamah keimahin ka thu a. Thomas-a a rawn thu phei ve a. Thil eng eng emaw sawiin a titi luama. Ka luak chhuak deuh nen ka ngaihven tehvak lo. 

"Thil ka zawt dawn che" Thutak deuh thut hian a ti a. "Eng thil maw? ' Ka ti a. Min en deuh vang vang hnuah a rawn kun hnai deuha. " I pasal nei tur hi mak ka la ti, I pa hian a tilui che a ni lo maw? ' a ti su su a. A zawhna vangin ka inlekkhawng deuh lah mai. "Teuh lo mai, keima duhthlanna ka tih kha" zangkhai thei ang berin ka ti thuaia. A ner deuh naka, "Mak ka ti, tlangval hmuha kan hmuh lai che a pasal i nei thut tur hi a awihawm loh zawk. I pasal tur lah i mize mil loh ber tur a ni bawk si" a ti leh nang nanga. "Ka hrilh che u kha. U Sangzela hi chu kan chhungkaw thian ni sa ania. Kan lo inkawp ve takah chuan ka nuin a damlai ngeia innei turin min duh alawm.Ka pa vang lam a ni lo" ka ti a, ka nuih sanga. Tawng tawh loin min en chungin a bu nghut a, a rilru hmin ka tum viau nangin a hmin zan pawhin ka hre lo. 

Pasal ka nei dawn tih an hriat khan mak an ti em em veka, engvanga nei dawn thut nge ka nih min zawt hlawm a. Kan inngaihzawn ve tak tak thu hrilhin an awih lo chung chungin awihawm takin ka sawi tlat a. Ka nu damlohna vangin ka chhuak khat bawk nen kan inngaizawn an ring lo ngawt ngam lova. Phur angreng taka ka pasal neihna turah ka chet vel tak zel avangin tuman min ringhlel zui lem lo niin ka hriaa. Mahse, Thomas-a hian min lo ringhlel ru reng a lo nih si chuan midang ho pawh hi ka bum chuang kher lo thei. Ka thiantha tak takte vek ni mah se nu leh pa sawirem sak nei ka ni tih an hriat ka duh bik thak lo. 

Dar 12 rik dawnah in ka thlenga, an lo reh thiap tawha. Ka pa a awm loh avangin ka nu te roomah riah ka tum a. Ka room lama ka inthlak fel hnuah ka nu te room lam thawmdim takin ka pan a. Nurse kan ruai tho nangin room hranah a mu thina. Room a ka luh chuan ka rin loh takin ka nu a lo la meng a.Nurse pawh a lo la thu a. Ka lut thawm hriain min rawn en ve ve a. "Eng nge i an a? " Ka ti thuaia. Ka rim a hriat ka hlau viau. Zawi angreng takin a that thu a sawia. Mawitei mu turin ka ti ve bawka. "Hetah pawh ka riak thei tho asin" a ti nangin keimah ka awm tho bawka tul ka ti hran lo. 

"Tei, pasal neih chu ila hreh reng em? " ka nuin min ti a. "Hreh tawh vak lo" ka ti a. Diktak chuan ka inngaihtuah fuh loh chang chuan ka hreh tha leh thin a, thulh leh mai duh rum rum chang ka la nei fo. 

"I nei anga, mipa rinchhan tur neih nawm zia i hre mai ang. Mahse, nupa nun te hi chu hlimawm leh hlimawm lo kan tawng dawn tih hriat tur a ni a. Kan inhau fo a, mak takin kan inngeih leh maia. Tin, pasal te mai bakah an chhungte tumah hi rel tur anni lo. Ngaihdan ni lo chu tlang taka sawi te zir tur ania" a ti leh dap dapa. A tawng rei hian a hah thina, tawng tawh lo mai se ka duh avangin a sawi apiang ka lo "aw" zung zung mai. 

Man hlanni a lo thleng a, ka nu hmundanga kal thei anih loh avangin ka pain kan in a man hlanna hman mai a rawta, mahse kalkhawm ten an chim lutuk chuan a chauh kan hlau a, hmundanga tihtur-in ruahmanna an siam leh ta zawka.Hmeichhe lam tan chuan man hlanni hi kan theihtawpa kan chhungte kan hraipuar theih hun a ni bawka. Keini pawh ka pain a ti hautak ngang mai. Tluang takin hun kan hmang zo a, mahse zan lamah ka nu a zual ta thut maia, ka pa thianpa, ka nu enkawltu Doctor ka pain a be nghala. Damdawiin lama indah mai a tha angem tiin a zawta, a hma ang bawk khan tul a lo ti lo. Amah a rawn thleng phei thuaia, nachhawkna sang tak leh chak lutukin an jection hnuah a talbuai a zia a. Mahse, mumal a nei ta meuh lo. U Sangzela tu nge lo hrilh ka hre lo va. Dar 10 velah a rawn thleng pheia. Min hnem tumin ka kut a vuan chawta,man inhlan tawh kan ni bawka, midang mitmei a veng lem lo va, keipawn pawi ka ti hek lo. Inngaihzawn lawkna nei hauh lo mah ila inneihna tur thilah kan inbe hnema, naupangchhe fiam ang maia min fiam chang a nei fo bawk a. Ka pangchang ve ruk chang pawh a awm ta zeuh zeuh. Ka u in "Hmeichhia hi chuan min duat tu leh min hre thiam tu hi kan mamawh bera.Nupa nun te kan hman hnuah phei chuan zawi zawiin kan hmangaih chho thei mai. Nangpawn i la hmangaih em em ang" Min tih kha ka hre chhuak thina. Thla khat vel leka U Sangzela ka rin hman zia ka ngaihtuah hian ka u hian a sawi sual ka ring lo nghal pang mai.. 

Thlaphang taka kan awm laiin vanneihthlak takin inneih ni thlen hmain a rawn harh leh ta deuha. Mahse, han che chhuak chi a ni tawh lo. Ka rilru a mang em em maia, engmah a hre mumal tawh lo nen inneih leh loh mai te ka duha, mahse chutiang ngawta tih chi a ni der si lo. Rilru pangkhing hu chungin inneihni lo thleng tur ka nghaka. Ka thawmhnaw kentur ka u leh ka Nutei bakah ka best tur Faki'n  min siampuia. Ka nu te room lamah ka nu unaute bakah ka ni te pahnih an awm thunga. Inneihna hmang tur ni mah ila kan boruak a rit em em a, kan chhungkaw zingah ka nu duhdana a damlai ngeia pasal nei tur ka ni tih hre lo an awm lo va. Chuvangin tuman "I nu a tha lo si a, thulh mai ta che" ti an awm lo. Mahse, U Sangzela hi chhungte sawiremna a nei tur ka ni tih erawh kan chhungkua leh ka u te nupa bak chu amah U Sangzela chauhin kan hre thung.

Inneih ni a lo thlenga, beisei phak loh tawpin ka nu a rawn harh tha ta tlat maia. Min cheitu turin min chei tan dawn mek tihin ka laizawn pakhatin min rawn ko a. Rang takin ka nu bulah ka phei nghal thuaia, meng fim kak chungin min lo en renga. A kut cher thiak, ruh hlang vunin a tuam nimai awm khawpa cher chu ka chelhsaka. A theih tawpa nain min hmer let a. Zawi sep hian, "midang chhuah tir rawh" a ti a. A duh ang ngeiin midang awm ve ho ka chhuahtir a, "Naute, i hun ropui chu ka hmu ta ngei alawm tiraw.. Tunah chuan ka chungah engpawh thleng se tuar dan thiam ang che. Ka hahdam ka tih kha" a ti thiam tiaka, "Nu, min dampui reng dawn alawm. I tel loin kan awm thei lo tih i hriat kha" ka ti a. Min en vang vanga. Thawk a la halha, "nang chu i luhlul em em a. Hrem pawh ka hrem fo che a. Mahse, ka hmangaih em em che ania. Ka hlimna ber i ni a. Ka ngaihsak ngai lo che emaw i tih lai pawh khan ka ngaihsak reng che a, I awmdan apiang ka pawm che a. I pawn lamah luhlul mah la i nem a, hmangaihna i ngah zia ka hai lo che. Tunah chuan Pasal nei i ni tawh dawn a, kei ang khan sum chauh buaipui loin i chhungkua chauh vei ber ang che,inthenna hi ka support ngai lo tih hria la, a hrehawm chang pawhin i pasal then duhna nei miah suh, zu in tawh lo la, kohhran belin chhungkua hi Pathian kutah nghah a tul tih hre reng ang che.. " a ti leh a, hah takin a thaw halh halha. "Nu" Tihbak ka sawi thei lo. Ka muttui a tla a, ka nu pawh a mittui a tla ve bawk. 

Min chei zawh vek hnuah ka nu pawh a theih ang angin an chei ve a. Kan chhungkuain ka nu mut naah thla kan la a, ka pa pawh a inti pachang hleithei lo. 

Inneih inkhawm hun chhung zawngin ka rilru a kal ding em em a. Ka mumang nimai te hian ka hre leh thina, engmah lah chu ka mumang a ni der bawk si lo. Mi lo kal an thahnem em em maia, amah U Sangzela lah mi vantlang chunglam niin chhungkaw hung tak an ni a. Keini lam lah chhungkaw hung tak kan lo ni bawk nen, ram hruaihna a chelhna kawnga a sangawi zawnpui te mai bakah Minister rual an ther fur a, mi challang pui pui an awm thep thup ti ila a dik ber ang. Ani hi nei lo ta ila hetianga inneihna mi hlut em em hi ka tawngin ka ring lo va. Mihring lam taka thlir chuan mizo inneih naah chuan hei bak bak tihmai tur a ni. Mahse, inneih ropui hi nupa min zawm nghettu a ni lo va. Chhungkaw tha dinna kawnga thil tangkai a ni hek lo. Engpawhnise, mihring lam atang chuan a ropui thlawt e. 

Hmeichhe nu hnep hnawp leh nungchang mawi tak ni lo mah ila ka pasal ka pek theih hlu ber pe turin ka invawng ve tlata. Hetianga ngaihzawn em em loh ni lo, ka duhthlanna ngeia ka neih phei chu nise a hlimawm zual ngawtin ka ring. Mahse, U Sangzela pawh hian a phu tho tho e. 

Kum lama upa zawk leh experience lo nei tawh a ni bawka, kawng engkimah min dawm thiam em em a, ka vawikhatna tur a ni tih a hriat phei chuan min dim lehzuala. Nupa nun hlimawm tak min hmanpui a, ka beisei aia tha zawk mah niin ka hre hial. 

Ka nu dinhmun leh kumtawp maia inthlanpui hmachhawn tur kan nih avangin nupaa hun thawl nei tura zinchhuah pawh kan ti lo va. U Sangzela'n kan inneih hma khan tha taka min sawipui thlap niin keipawhin a ngaihdan ka pawmpui ve bawk. 

Kan inneih atanga ni hnih liam hnu, zan lai vel atangin ka nu a zual leh a, ka u nen thlaphang takin kan vil chawta, pasal nei hlin hlawt mah ni ila kan in lamah ka awm chawta. U Sangzela pawh a awm ve chawt bawk. A chhungte pawhin min hre thiam em em a, chhungkhat ang maia lo awm thin kan ni bawka, anni lam pawh ka nu tlawhin an lo kal awl lo bawk. 

A zual ni atanga harhchhuah awm ta miah loin karkhat a tlin niah min kalsan ta nge nge a. Ka duh vang ni hauh loin ka tap thei der lo.Ka u lah a tap hleithei bawk lo va. Kan unauin ka nu kalsan duh loin kan thutpui tlawk tlawka, ka chhungril a mang mupa, nasa takin a dam loh chhung khan a boral hun atan tiin ka inbuatsaih lawka, mahse Nu nei lo han nih zet chu a lo rapthlak em em maia. Thihna-ah hi chuan inbuatsaih lawk chi a lo ni hauh lo. Ka nuin pasal nei tura min lo duh ngawih ngawihna kha a boral chiah tihin ka hre thiam nghal der. U Sangzela chungah ka innghat pumhlum tawp maia, nghenchhan tur pasal lo neih hlut zia ka hre chiang nghal ngawih ngawih a ni ber. Pasal lo la nei hman lo ila chuan ka nu ka sunna hi ka sun satliah dawn lo tih hre chiang ber tu chu keimah tho ka ni. 

Mu chungin ka nu thlalak hrang hrang ka en kuala, ka tap ri lo, mahse ka mittui a luang zung zunga. Thil kal tawh tamtak ka ngaihtuah let a, engkim maiin ka tah an tichhuak vek. 

"I muhil thei na nge? " Tih pahin min rawn kuaha. Ka nghawng hnung lamah a rawn fawpa, tap ri lo va kha lehchen chhingril lo tap kha duatna ka dawn rualin ka tapchhuak nghal hawk hawk mai. 

Nghet takin min kuaha, ka tah chhung zawng chu engmah a sawi tawh lo. Ka harh leh chuan khua a lo var tawha,pasal harhvang tak nei ka ni bawka,a lo tho daih tawha. Tho mai loin ka mut ngaiin ka mu vang vanga. Zan lama thil thleng ka ngaihtuah neuh neuha. Nakin chu ka hre lo nangin tunah rih chuan pasal tha tak leh innghahna tlak ka nei tih ka hria. 

Ka inphihfai hnuah room atangin ka chhuaka, Melody-in min hmuh veleh min lo be sawk sawka. Ani hi Sangzela cousin niin, a tet lai atanga u Sangzela te bula awm a ni a. Kei aiin kum 5 velin a upa a, a zangkhaiin a bula awm a nuam a. Kan naupanlai khan kan Inkawm ve vak ngai lo thung. Ka kawm ve thin kha Sangtei a ni a, pasal a nei tawha, fa pawh pahnih an nei tawh bawk. 

Thingpui in pahin kan nula chawhmeh then lai ka thenpui ve a. An chhungkua hi a nu leh pa bakah u Sangzela leh a nau tlangval,kei aia nau hret an ni a, Melody-i  nen an panga zawng hi chhungkaw member pangngai chu anni a. Mahse, U Sangzela pa hi Contractor niin Driver leh hnathawktu hrang hrang inhnuai floorah an dah khawm tawpa. Rawn cheng ve chawt ni lo mah se inchhung a reh lo viau. 

"Arin, I phei leh dawn em ni? " U Sangzela nuin min rawn ti a. "Aw, vawiin hi karkhatna a ni sia. Ka phei ang chu ka lo tia" Tha takin ka ti a. "A tha alawm. Kei pawh phei ve ka duh a, I pa hi chu a hman dawn lo va. Mama pawh hi a hman angem? " a ti leh zung zunga, nu fel leh zangkhai tak, thau lian luah mai a ni a. A ngo bawk nen alang zahawm viau.

"Keipawh ka lo phei ve ang. Mahse, chawhnu lamah lo chuan ka hman dawn lo thunga. Nu, dawrah chuan i lo kal angem? " Meloi'n a tih zawm zata. Melo-i hian Nail Studio changtlung tak a nei a. An neihin a tlin bawka, a inti lar thiam em em a. Mizo milar tamtak hian an pan nasain, pasal nei tur pawhin an pan nasa em em a. Keipawh kha min cheisak thlap. 

"Kal dawn e, kan kalrual mai ang chu. Atea pawh khan a ke tin lut kha a sawi tak asin,lo kal ve nghal nghe nghe se tha tur ania" Ka nuin a ti a. 

Chaw kan ei dawnin u Sangzela zing chhuak a lo la haw lo va, lo nghah tur nge eisan tur  ka hre thiam chiah lo. Ka nu kha chuan ka pa kha a nghak deuh ziah thina. Lo nghah kha thil nih dan tur anih zawk ringin ka nghak a, mahse an ei tan dawn chauh tihin a lo haw ta hlauh. 

"Vawiin chu tihtur pawimawh ka nei a, tlaiah chauh ka lo phei hman dawna" Insiam mawlh mawlh pahin a ti a. "A pawi lo, Ka nu leh Melo-i pawh lo phei ve an tuma. Mahse, anni pawh chawhnu lamah tho ania. Keipawh hi chhuah lawkna tur ka nei a" ka ti a. A necktie awrh tur keng chungin min rawn en a. "Khawiah nge i kal dawn? ' tha takin a ti a. " Kan thianho a in kan sak tur vel kha buaipui lawk angaia" ka tih chuan a bu nghuta. 

" A tha alawm.. Mahse, thil sawi duh ka nei a.. A theih chuan in band hi chhuahsan la ka duh, inah tihtur a awm lam a ni lo va. Politician nupui i ni a, inthlan na lamah hian ka rilru ka pek angai nasa tana, min thlawp tura i awm fo angai dawn tih i hria anga. Zai tura Prog neia i lo chhuah fo a rem lo vang" Nghet cherh chawrh hian a ti a. A sawi danah huat tur awm miah lo mah se ka beisei loh lutuk sawi anih avangin chhan mai dan tur pawh ka hre lo. 

Min rawn pan hnaia, ka ban bul-ah a rawn vuana. Chiang takin min en a. "I lung tihawi loh nana sawi ka ni lo. I nundan sawisel ka tum vang pawh a ni lo. Min ringngamin min nei a, chuvangin pasal tha ber nih ka tum ania. Mahse, ka duh ka sawi hi chu min zahsak ve angai dawna. Bike pawh hi khalh fo tawh lo la ka duh ang" a ti leh a. Tawng loin ka bu nghata, hmeichhe huaisar leh thawmna ve tak ni mah ila min nawr dan a thiam em avangin pawngpaw thinrim chiam a rem tlat lo. 

A rawn kun hniama, ka maimitchhing nghal vata, min rawn fawp zuia, a kawngah ka kuah ve bawk. 

Note: Spelling mistakes a awm nual maithei e😊