Naruto -3

 Then -3na

Kan inneih atangin thla thum a liam ve ta reng. Ka lawina chhungkua a hrehawm hauh lo va, mahse mo tan hi chuan insiamrem na tur a lo tam em em maia. Kei lah in lama khawsa duhdah thin tak mai ka lo ni chhap si. Inchhung chet leh thildang pawh ka tih ngai lo va titu awm mah se mizo chhungkua kan ni a, Mo awm mai mai ringawt nih hi thil theih a ni hauh lo. In chhung chet titurin tuman min phut lova,mahse ka tihtheih tawk chu ka tih ve angai tih ka hai bik lo. Chutih rualin kan in lamah khan engmah ka tih ngai loh avangin ka tlaw em em a, ka u ka be buai fo a, ka nuin inchhung khawsak ngaihven ve tura min ti chunga engmah ka ngaihven peih ngai lo kha ka inchhir em em tawh.

Inthlan a hnai tual tuala,ka pa pawh campaign-in a buai a,ka u te nupa mai bakah ka pa unaute leh ka nu chhungte nen lam an buai em em vek.Kei erawh chu U Sangzela zawk puiin ka buai ve thunga. A theih chin chinah a zinna hmunah ka zuia, achang leh ka nu nen kan chhuah tum a awm bawka. Melo-i leh Atea pawh an awm mai mai hman lo. U Sangzela pa hian vawi tamtak a sawi thina, “ Dawt hmanga chak ai chuan thudik tak vanga tlin loh a pawi lo. Sum phei chu sem reng reng suh u,mipui rilru a tha lo zawnga hruai kawina diktak a ni.I tlin leh tlin loh tur chu Pathian thu thu a ni a, Term khat chhung i bial mipuiten an hre tawh che a, anni bawk khan tha an tih che chuan an thlang leh ang che.I tling zo tawh lo anih chuan midang dem suh,nangmah i thawk tha tawk lo tihna animai” a ti hmak maia. A sawi dik ka ti takzet.

Inthlan dawn hnaih tak takah phei chuan kan nupa pawh kan inhmu ngai mang lo. Rinai takin Melo-i hian a tuipui a, englaimaha politics buaipui ngai lo ka ni bawka, a tulna vanga campaign ka nihna bak chu ka engah a kal teh vak lo. 

Chhuak turin ka insiam mawlh mawlha, vawiin hi kan band din cham anih angin dine out kan tuma. U Sangzela msg-in ka kalna tur ka hrilh a, kan Band chhuahsan tura min duhthu kha sawi mah se tun thlengin ka la chhuahsan lo va, ka chhuahsan loh chhan erawh chu ka thianten manager ang tala awm tura min duh vang a ni a. A hranpa taka mananger neih kan mamawh hauh lo nangin ka bang tawp tur an ngaingam ngang lo a, band-ah eng kawng emaw tala pawimawhna nei ve turin min pawhbeh dan an zawng a ni ber. Tha takin U Sangzela an rawn sawipuia, ani pawhin chuti taka min ui der chu a lo hnial duh bik lo va. Zaia chhuak ve fo tur ka ni lo bawk nen, manager nih mai chu pawi a ti lo. 

Kan dine out na hmun tur thleng Driver-in min thlaha, Rinpuia leh Chhana an lo thleng tawha, Thomas-a leh Aruata an rawn thleng rual deuhthaw bawka. Kan inhmukhawm khat ta bawk nen kan ri chel chul a. Tawng kan inchuh nawk nawk reng mai. 

"Za-rin, inpa chu a beiseiawm lehpek viau a ni maw? U Zuala lam enge boruak? " Rinpuia'n a ti a. 

"I ninawm, hlim lai laiin politics sawi suh" ka ti hlaka. Thomas-an min lo support nghal vat. 

"Eng nge maw ni le? Sawi hun lai tak anih hi. MLA emaw Minister nupui nimai tur tan Politics te lo sawi duh loh vel tur em ni? Intithei reng reng suh" Min ti deuh zeka. "I chhe zet zut em mai a. Miin an hria ange, keimahni chauha awm kan nih loh hi" ka ti leh hlaka. 

"Lo hria se a pawi hleinem, dawt pawh ka sawi chuang lo va" a ti leh talha. Chhan pawh ka chhang buai peih tawh lo. 

"Bawiha, saw Rempuia te" Chhana hnenah Aruata'n a ti deuh hluaia. A hawina lam ka va hawi ve a, Rempuia leh mizo model, prog lian tham tak tak Host thin tu zinga chhe lo ka tihber pawl rawn inzui chu ka va hmu ve nghala, an inngaizawng em ka lo hauh lo nangin an inhmeh zia chu pui tak a ni. 

Chhana a tho hluaia, a pan phei nghala. Keini hoin ka lo thlir thap thung. An inbiaa, kan awmna lam an rawn hawia, Rempuia'n ban a rawn vai zauha, nui chungin ka lo vai let ve a. "A bialnu a ni em? An va han inhmeh si ve" Aruata hnenah ka ti a. "Aniang ka ring. An inzui ka hmu zauh zauh mai" a ti a. Am awmna lam ka va hawi leha, a bialnu ni tura kan ngaih nu chu ka en a, a hmelthat mai bakah a pian a dik em em a, a nungchang a la tha tel lehzel bawk niin an sawi a. Mizo milar zinga haw tu nei lo ber pawl a ni hial ang tiin an sawi lehzel. Ka lo hmu ve zauh zauh tawh thina,kan band kan perform na prog a host zauh zauh tawh bawka, inhre tha leh inkawm thin ni lo mah ila a fel zia an sawi hi dawt anih ka ring lo. 

Chhana a rawn let phei a, Rinpuia'n " Lily nen sawn an inngaizawng em? " a lo ti teh ngawta. " An inzui ve ziaha, an inngaizawng turah ka ngai mai" Tha takin Chhana'n a ti a. Aruata leh Thomas-an chhe lo an tihzia an sawi zui a. Ka lo sawipui ve vat bawk. 

Dar 8 velah kan haw a, zu ka inhauh lo. Ka nu boral atang khan zu inchakna pakhatmah ka nei tawh lo. Aruata'n min thlaha. Favang hun nuam tak zo tawhin thlasik rim a nam tan tawha, zan lama kawngsira eitur an zawrhna ho an lun ngang mai. 

"Pasal neih chu a nuam meuh maw?" a ti a. "Nuam lutuk, nupui nei ve vat rawh, I inchhir lo ang" ka ti a. Za fe hian a nuia. " Nuam i ti bawk aniang, I inthlakdanglam hneh em mai. Tlangval atangin nula hmeltha takah i inlet thawk mai ania" Nui kur kur chungin a ti leh a. "I over sia e.. A hma pawh khan ka chhe lo reng alawm mawle. Pasal neih vanga chhe lo ta sawt ka ni lo" ka ti ve thung. 

"Nia, I chhe lo sa reng. I chhiat loh dan a inang lo tihna anih chu. Eee… thil ka hrilh ang che. Kan Rempuia hian a star thei teh mai che asin. Pasal i nei ta bawka, kan sawichhuahsak ang e" a ti leh a, mak ti angreng tak hian ka en a. "Tu nge kan Rempuia?" Ka ti he haw a. "A va mak, Police Lal bak Rempuia kan nei em ni? " a ti deuh hmuka. "Min star iti bawk sia, amak duh em alawm. Kan Inkawm ve chhung khan khatiang zawnga min en awm ka hre bawk si lo" ka ti leh a. A thaw deuh haka, "Nang te chuan i thiante zawng zawng hi thilnung satliahah min ngai vek alawm. Chuvangin tu nge lo vei ve deuh che pawh i hre nang. Ngaihven hek lo che" a ti leh a. "A hma te khan sawi ta che, Politician nupui nih ai chuan Police officer nupui nih ka duh tehreng nen" Nui chungin ka ti a. "I va han chhe zet zawt tak" Nui chung ve bawkin a ti a. Engpawh hi sawi ila, kan thianho zingah hi chuan kan thutak rei thei thin lo. 

Ka nu in min hmuh veleh min lo be nghal a, U Sangzela Motor ka hmuh loh avangin a la haw lo ni turah ka ngai a. Inthlak turin room lamah ka chho a. Step a ka chhuak chho chiah chuan kan room atanga Melo-i lo chhuak chiah ka va hmu a. Min rawn hmu ve nghal a, "I lo haw tawh maw? Zanin chu U Mama lu a nuam lo va. Damdawi ka lo pe chiaha" a ti nghal zung zunga. 

"A lo haw tawh maw? Motor ka hmu si lo va, a lo la haw lo emaw ka tia"  ka ti thuaia. 

"Haw tawh e, Motor a chiang lo va, siam turin kan dah a timaiin ka hria" a ti leh thuaia. Nula senior lam anih mai bakah nula awmchhun a ni a. Inchhung thil engkim a hre chiang em em a. Tu te mai pawh hian an ko buai nimai hian ka hre thin. A nuta te pahnih pawh hi a ngaihtuahin an duhzawng leh ngainat zawng a hriatsak bakah an tuina apiang phur takin a sawipui thei a. U Sangzela pawh hian a duat ngang mai. 

Room a ka luh chuan khumah U Sangzela a lo mu a. A chet loh avangin a muhil anih ka ring a, thawm dim takin ka inthlak a, ka inphihfai hnuah light ka off a, khumah ka lawn ve a. Amah si loin ka mu a, mahse ka rin loh takin a rawn tawlhhnaia, min rawn kuaha. 

"I lo haw na a rei tawh em? " a ti supa. "Aih, Melo-i khan i lu a na atia. Damdawi i em? " ka ti ve thuaia. Light on leh tumin ka tho dawna, mahse min kuah bet tlat.

"Na tawh lo, ka ril a ram" A ti zuai ruiha. "Chaw i la ei lo maw? I ei daih tawh emaw ka tia lawm. I tho peih em? Ka zuk la dawn nge? " ka ti a. Min chhang loin ka kawr chhungah a rawn zena. 

"Chaw lam pawh a ni lo. Nupui nei reng si hian nupui nei lo ang mai ka nia" a ti leh daiha. A sawi awmzia ka hriat takah chuan sawi leh mai tur ka hre lo. Campaign buaiin kan buaia, nupaa hunthawl kan nei khat em em a, a zin loh pawhin tlai tak takah a lo haw a. Ka lo nghak hram hram thin chungin ka lo muthilh tawh tum a tam zawk. 

Hun a kala, inthlanpui kan hmachhawn ta a, campaign laia kan buai leh hah em avangin U Sangzela'n kar khat lek cham turin zin a rawta, kan pahnihin nuam ka tih em em thin hmunah kan zin duna. Naupangchhia ang maia khawsak chang nei mah ila min nuih liam mai maia, result puan a la ni ve lo bawk nen, a rilru a la thawveng ve tak tak thei lo ang tih ka hriaa. Kei erawh chuan chuti takin ka vei lem lo. 

Kan haw tukah vote chhiar a ni a. Kan inah kan awm deuh luih luih a, ka pa te inah lamah pawh ka u in awm an thahnem thu a sawi ve bawk. U Sangzela mak ve deuh na chu vei awm pawhin a awm lo va. A awmdan angai reng, inleng ho nen an titi a.Rilru ipik awm pawhin a awm lo. 

Ka pa dinna bial an chhiar laiin kan ngaithla thapa, mi tam zawk lo rin ang ngeiin a tling ve ta hlauh. Bial dang pakhat an chhiar leh hnuah U Sangzela te dinna bial an chhiara,a tling tih an han puang chiah chu kan inkuah nawk nawka, Melo-i phei chu a sapatal hi a ni ringawt. U Sangzela leh ka pa an inbe nghala. Ka pa khan U Sangzela tlin leh tlin loh a hriat hma chuan a rawn be ngam lo a lo ni. 

U Sangzela pa-in lo leng ho zawng zawng tan zanriah ei tur a buatsaih tir a, thingpui sem-in Melo-i nen kan buai zak zaka, U Sanzela cousin te ho pawh an awm hlawma, kan vai maiin kan buai a ni ber. 

Zanriah eina vel kan tihfel vek hnuah inbual turin roomah ka chho a. Room ka lut deuh chiah tihin U Sangzela a rawn lut ve a, min rawn kuaha. "Ka lawm e aw"a ti supa. Angaihna hre lo tak hian ka en a. " Ti nge? Keiin engmah ka tihsak hleinem che" ka ti thuaia. Ka sam ka benga min zeh sak pahin ka bengah a fawp a. "I tih vek zawk alawm. I kalna apiangah mipui lawm i hlawh a, an ngaina bawk che a" Nghet charh hian a ti leh a. Ka tawng leh tur chu min rawn fawp ta vang vang. 

Kan inneih atangin kum a tling ve dawn ta hiala, mahse ka la rai ta miah lo. Kan unau hian naupai kan harsat ve ve a, ka u pawhin tunah hian a fa pakhatna tur a pai mek chauh. Ka pate party-in Sawrkarna fawng an vawn mai piah lamah u Sangzela bik phei chu nihna sang tak pek a ni a. A la naupangin a mizia leh awmdan engkim hi thalai tamtak lawm zawng a ni a. A hawina lam lamah thalai an thle dual dual a ni ber. Keima pual hna ka neih loh avangin nilenga ka duh dan dana in a awm awl tawp leh lenchhuah vel bak tihtur ka nei mang lo va. A khat tawkin a zin naah ka zui ve leh zauh thin bawk.Ka awmdan ka ning em em a, hlu lo riau ni a inhriat chang te ka nei ta  fo va. Ani lah hnaah a buai em avangin min ngaihsak viau hman tawh lo va. Fa nei bawk si lo nen ka nun a ruak ni ber hian ka hre thin. 

"I pain leng phei turin min rawn ti a, chawei turin kan phei dawn nia" U Sangzela'n a rawn ti a. Ka pa hian thil pawimawh sawi tur a neih chang hian kei ni loin U Sangzela zawk a be deuh zel. 

Ka phone ka dah chiah chu a rawn ri leh a, ka pick up thuaia. "Pi Arin, Pu Zuava ka nia" Tiin anihna a rawn sawi nghala. Ani hi U Sangzela bial chhunga an party mi pawimawh tak a ni a. Mahse, mak tak ka ngaina hauh lo. 

"Eng nge ni ta? " ka ngainat lohna tilang hauh loin ka ti a. 

"Pu hi ka be tlang thei tlat lo va. Biak ka mamawh angreng si a, min lo hrilhsak mai ta che" a rawn ti a. "Aw le, ka lo hrilh dawn nia" ka ti hman tawk tihin phone a tawp hmaka. Kan sawi tur kan zo tawh tho tiin call back pawh ka tum tawh chuang lo. 

U Sangzela lo haw laiin ka lo inbuala, ka inbual zo ka chhuah chuan balcony-ah phone hmang chungin a lo dinga. Ka inha zung zunga, kan inneih hnu a a mizia ka hriat thar tamtak zingah mi nghah hi a tihtheih loh zawng tak tih ka hre tawha, nghah ngai lo a awm hram hram ka tum thin. 

Phone a hmang zo a rawn lut a, a tarmit nawr chho pahin min rawn en a. "Rempuia nen in lo inkawm thin a ni maw? " a ti nghuta. "Tu Rempuia? Eee, kan Police lal kha maw? " Nui chungin ka ti a. 

"I eng maw anih a? " thluk nei mang lo hian a ti hmuk. A awmdan chu nidanga ka la hmuh ngai loh anih avangin mak ka ti viau bawk. 

"Ka engmah chu ni nang. Kan thianho chuan kan Police lal kan ti thina. Chutiang chuan ka sawi mai mai mawle. In inhmu em ni? " zang deuh vah hian ka ti a. Ka mizia ka thlak danglam viau tawh chungin hmeichhe zangkhai deuh vah ka nihna hi chu ka paih hleithei meuh lo. 

"Hmu e, vawiinah.. Pu Zauva nen in inbia em? " a tihzawm leh daiha. 

"Aw, bia e.. A be tlang thei lo che a, a biak duhna che a pawimawh avangin min lo hrilhsak rawh a rawn ti a. In inbe leh thei si em ni? " ka ti leh mawlh mawlha. 

"A duh pawh a sawi zawh hmain i off niin a  sawia. Mipui rawngbawltu,an thlan lal ka ni a, an tana ka pawimawhzia hria la, I mize thawleng deuh kha veng tha ang che. Ho te-ah mualpho ka duh lo ania"  a ti ta duaha. Vin chiam chiam lo mah se a tawngdan chuan min khei zak mai. 

"Ka off lo, ka lo sawi dawn nia ka ti hman tawka, amah zawkin a off anih kha" ka ti nghat. 

"I awki san miah suh" a ti deuh hmuka, tawng leh ka tum lai takin room kawngka an rawn kik a, chhan ka tum lo. Amah zawkin lut turin a ti a, Melo-i a rawn daka, " Mama, inleng i nei ania" a rawn ti a. Tawng loin u Sangzela'n a zui nghal a. An chhuah hnuah ka thu hnawka. A awmdan danglam thut mai kha ka hre thiam tlat lo. Ka sawi apiang kha min khak na tur a zawng nimaiin ka hria a. Chuti taka ka chunga lungawi lohna nei turin engmah tihsual ka neih pawh ka hre der si lo. 

A rawn chhoh leh tak mai loh avangin inhnuaiah ka chhuka, pa upa lam pahnih nen sitting room piah berah an lo thu a. Min hmuh veleh a tho a, min rawn pan phei a. 

"Lo va kal hmasa mai la, ka hman veleh ka rawn kal ve ang. Chawei tur pawn min lo nghak duh lo la" Dam thlup hian a ti a. Room chhunga a awmdan nen kha chuan inpersan tak a ni. 

Driver hnenah min thlah turin a ti nghal a, ka nu-in engmah a sawi loh danah kan kalna tur a lo hre lawk tawh tih ka hre thiam mai. 

Ka rin loh takin ka u te nupa an lo awm a. A rai tih alang tan tawha, rai a haw bawka, a cher ve kiam mai. 

"Khawnge in pa? " a lo ti thuaia. "Kal dawnah inleng a nei a, a hman veleh a lo kal ang. Tinge ka pa hian min koh a? " ka ti zuia. 

"Ka hre bik lo. Jimmy-a a lo biaa, chawei turin a lo ko a. Amah ber hi a lo la haw bawk si lo va" a ti a. Kawt zawl hual veltu pangpar chi hrang hrang awm ho chu ka thlir vang vanga. Ka nu-in a buaipui zia ka ngaihtuaha, ka lung a leng vawng vawng mai. 

"Ka nu awm loh hnuah hian in hi a chul thup ka ti" ka ngaihtuah ang tho ngaihtuah tih hriat tak hian ka u in a ti sapa. Tawng loin ka bu nghata. Ka hnuk a ulh tum a ni ber. 

Ka pa leh u Sangzela an lo thleng rual dawhthawa, chaw kan ei kham hnuah ka pa hnathawhna roomah kan lut ta diala. Ka u nen kan inmelha, angaihna kan hre lo ve ve. 

Ka pain aw a thian khurh khurha, "ka kohkhawm chhan che u chu rorel tur a awm vang a ni a. Fanu pahnih ka nei a, pasal tha tak an nei ve ve che u a. Kan nu a awm ve ta lo hi a hmun ruak a zau khawp mai. Hetianga mahni chauha awm hi hrehawm phei chu ka ti hauh lo va. Mahse, nupui neih leh lam hi ka hawi dawn emawni ka ti a' a tihfo dana pehhel lem lo takin a ti a. Ka thaw nghal hap maia. U Sangzela'n ka kut a rawn vuan vat. Kan awmdan chuan thil kaltawh min hriatchhuah tira, ka pasal neih tur chungchang a sawi hmasak ber khan hetiang deuh bawk hian a sawi a. Tunah chuan ka nu a awm ve tawh lo va, u Sangzela a awm ve ta thung.

"Ka nu hmunruak luahkhat tur tumah keichuan ka duh lo, mahse nupui neih i duh chuan ka dodal chuang lo che. I khua pawh a har ang. In hrang atan chuan inngaihsak a harsa tawh bawk si a" ka u-in muang fan raih hian a ti a. U Sangzela'n ka kut a rawn hmer na salha. Ka en thuaia, eng emaw tal sawi ve turin min duh tih ka hria. Kan kal hma khan ho mai maiah min khak a, room pawnah erawh chuan engmah thleng lo ang maiin a awm leh ta thung. 

"A tha alawm" ka ti teh ngawta. A fanu te pahnih kan tawng chhuah takah chuan kan pasal te ve ve-in an ngaihdan an sawi zui ve a. Anni pahnih pawhin an pawmpuia, pawmpui lo tur pawhin an tan thil tihawm a ni lo hrim hrim. 

"Nupui neih hmain lungphun fel ila ka duh a, lungphun zawh lamah nupui neih tur lam chu kan hawi thei ang chu. Fapa ka nei lo va, fapa min hrinsak thei tura la naupang ve deuh hlek an awm leh a tha mai ang chu" ka pain a ti leh a. Sawi ve tur reng reng ka hre tawh lo. 

Ka u-in ka pain nupui a nei leh ngei ngei dawn atih lai leh ka nu-in a sawi lai ka mitthlaah an lo lang zut zuta. A khua a har ang tih chu hre tho mah ila, ka rin aiin nupui neih leh a duh hma avangin ka nu ka natpui ni berin ka hria. 

Motorah ngawi rengin ka chuanga, u Sangzela pawn min be bik lo. Ka ipik churh maia, ka ipikna tizual turin kan pahnih a kan awm hnuah u Sangzela mizia a inthlak leh ta hmak bawk. 

A inbual zawhah min be miah loin a mu nghala, kei erawh muhil thei loin ka mu meng kar maia.Eng ber nge ngaihtuah tur pawh ka hre thiam lo. Ni khat chhungin thil inang lo tak, min tibuai em em tu ka tawng nimaiin ka hriaa,ka u nen whatsApp lamah kan inbiaa, u zawk na na na chuan thil a lo pawm thiam leh viau. 

Ka u nen kan inbiak zawh hnu, zan lai a pelhah pawh ka mut a chhuah ngang loh avangin hun rei tak ka lo tih tawh loh game khel turin ka lut ta ngawt. 

Ka friend list a awm thenkhat an lo la hring vat vat hlawma. Thomas-a leh Rempuia play lai minute a inan avangin an lut dun tih ka hre thiama. Pakhat a la awl tih hre mah ila ka khelh khat em avangin midang zinga khel ngam loin mahniin ka khela. Mahse, min rawn invite ta tho. Ka accept loh avangin Thomas-an min rawn call a, rang takin ka rejected a, a rawn call leh hmain keimah zawkin request ka thawn a. Rang tak hian a lo accepted a, ka luh rual rualin " Enge i lo luh duh loh vel a? I khelh ve chhunah chuan khelhpui che chakin kan fan kan fana, I inla hlu em ni? ' a lo ti nghal hmawk hmawka. U Sangzela tihharh ka hlauh avangin tawng loin msg-in ka chhang thung. 

Khawvar dawn hnaiah ka out sana, inbox msg lo awm chu ka chhuah hmain ka check leh te te a. Ka rin loh takin Rempuia a lo ni a.. "Hello" tih ringawt a rawn thawn chu niin, ka nui a. "Hi" ka ti let ve a. A rawn reply tawh lo. Aruata'n Rempuia'n min star thu a sawi kha ka hrechhuaka, kan inneih hma khan hria ila engtin nge ka awm ang tih ka ngaihtuah zauh a. Ka bula ka pasal mut reng laia mipa dang ka ngaihtuah naa lo lang chu ka inthiam lo nghal vat. 

Ka harh leh chuan tho mai loin ka mu vang vanga, khawvar hnu a muhil chauh ka ni a, ka phone-ah sana ka en a. Dar 10 a lo pel tawh. Rang takin ka tho nghala. Chu chen chen han mut ngawt mai chu zia lo ka ti viau. 

Ka inphihfai hnuah inhnuaiah ka chhuka, kan nula bak midang an lo awm lo. Min lo be nghal sawt sawta, midang ho kalna ka zawt a. "Mission veng pi a thi a, an kal vek" a tih chuan ka mengphawk vak mai. Mission veng pi hi u Sangzela pa nu a ni a. Kum 100 a hnaih tawha, mahse a la fing fel em em a, tar at pawh a la nei miah lo. Tun hnaiah a dam loh ka hre lo va. A boral thut mai chu mak ka ti a, min hrilh miah lo va an kal vek mai chu mak ka ti viau bawk. 

U Sangzela ka call a, a pick loh avangin Melo-i ka call leha, rei pawh a ring hmain a pick up nghal thuaia. "Aw, Arin.. I nuam deuh em ni? " a rawn ti nghal ngawta. "Maw? " ka ti ha. "Mama khan i nuam lo atia, mahse helamah kan kal vek lo thei si lo va" a rawn ti leh mawlh mawlha. Ka mut rei em avangin ka dam tha lo angin min lo sawi tih ka hre thiam nghala. 

"Mama i be duh mi?"a rawn ti leh zung zunga. " Aih, be duh chuang lo ve. Nana-i hian ka pi boral thu a lo sawi thut a, min thawng lutuka"ka ti niah niaha. 

"Nia, amak duh tawp. A mu an kaitho zo lo va" a rawn ti leh a. Chawei tura an lo haw phei dawn thu a rawn sawi leh mawlh mawlh. 

Kan inbiak zawhah ka u ka biaa, ka pi boral thu ka hrilh a, "Jimmy-a lo kal mai rawh se, keichu ka nuam lo em mai" a rawn ti a. Ka pa ka call leh a, mahse ani chuan a lo hre tawh thung. 

Ka pi boral hnuah karkhat chhung chu an in lamah kan phei nitina, u Sangzela erawh a buai em avangin a vui ni bak a kal hman tawh lo. 

Kan innei rei ve tial tiala, thil mak tih ka nei chho tam ve tual tual thung. Chhungkuaah buaina engmah kan nei lo, mahse ka nupa kar a fel hleithei tlat lo. Englai ber nge fel lo pawh chu ka hre chuang lo va, a hnaah a buai em avang hian a mizia a inthlak nasa niin ka hriaa, a chhan hriat si loha thinrim mai mai a chinga, thil tha taka sawi theih reng sawi mai lo va thinrim zawnga awm tlat chang a nei a. Kan room chhunga a mizia leh midang bula a mizia a inpersan em em a ni ber. Ka pa tan makpa tha nih a tling renga, fak loh dawn pawhin fak lohna tur a awm lo vang tih tur khawpin kan chhungte lakah a tha a. Mahse, kan nupa chauha kan awm erawh chuan a mizia a thlak leh hmak zel thung. Sex kan hmang khat em em a, nupa nisi a hetiang khawpa sex hmang khat hi an awm angem ka hre lo. Thil nihdan tur ve reng anih pawh ka ring lo rum rum thin. 

Ka nu lung kan phun a, kan phun zawh atanga thla khat lek a liam tihah ka pa nupui turin ka pa best friend, Pa Thansanga'n  ka pa te office a thawk ve thin nula senior a be fel a. Nula senior mah nise kum 45 vel a upa niin, nu te lam, ngo fai vang mai a ni a. Engtin nge ani angin ka pa kum 60 pel tawh a neih duh ka hre thiam lo. Ka u nen phur awm takin awm mah ila kan chhungrilah kan lungngai ve ve tih ka hai miah lo va. Ka pa tihvui kan duh loh vangin ka nu kan ngaihna kan thup hram hram a ni ber. 

"In pa hi chu a fel ve thlawt" ka u-in a ti a. Chhang loin kan piaha mikhual lo kal lo welcome mektu ka pasal chu ka va en a. Palian leh inkhaithli thlerh thlawrh, en ringawt pawha smart tih hriat tak a ni a. Politician ni awm lo khawpa pa nui tam lo leh tawngkam thiam lo a ni teh tlat erawh a mak viau. Mahse, amah tawp hi thalai ho duh chi a ni laklawh tlat tawh. 

"I va hlim loh hmel ve" ka kuta rawn vawn pahin ka u in a ti leh a. "Hlim e, tinge ka hlim loh ang? " ka ti vata, ka nui lui sang bawk. 

"Eng ni lo e. I ngui deuhin ka hriat vang che mawle. Enteh, ka nu kha la dam se pasal i nei angem le? " a ti leh daiha. "Neih ka ring lo" rang fe hian ka ti thuaia. 

"Keipawh ka ring chiah lo. Mahse, ka nu kha chu nu fing tihtakah i pasal tur a thlang sual lo asin. I awm dan ang khan la awm reng la chuan miin an hmu dik lo thei tak tak ang che" Nui deuh chungin a ti leh a. 

"Keichu keimah tak tak kha ka ngai" Insum hman lo in ka tichhuak phawng mai.

"I ho lutuk, tuna i nihna hi keichu i nihdan tur tak ka lo ti asin. I hmeltha a, I fing bawka. Pasal tha tak i neih bakah in inhmeh bawk si. I life hi mi tamtak tan chuan dream tham asin" a ti leh hapa. 

"Nih pawh chu a ni mahna. Mahse, ka awmdan hmasa anga duh dan dana awma, zalen tak leh tuma mitmei veng lo a awm leh kha keichuan ka chak ber. Tunah chuan hmingchhiat hlau reng rengin ka nunga, mi tlawn nana nuih der reng te hi ka ning. Ka ipik, eng emaw tal tih ka duh.Ti ringawt hi chuan tangkaina nei lo ang mai niin ka inhria, fa kan nei bawk si lo" ka ti ta duah. 

Min chhang loin min en vang vanga."Eng nge tih chak i neih a? Chung te chu tha deuhin inpa sawipui la.. I duh apiang i nei thei alawm. Ngaihtuah hah mah ta che' dam thlap hian a ti a. Ka inngaihtuah vang vanga, ka naupanlai atanga tun thlenga nuam ka tih ber chu midang tanpui a ni a. Music ka ngainatna erawh chu u Sangzela ka neih hnu hian up beh a ni a, tih zawm leh tumna ka nei tawh lo. Kan thianho a midang tanpuina kawnga ke kan pen ho naah pawh amah thlawp tura ka awm reng angaih avangin tun hma angin ka tel tam thei tawh lo va. Eng emaw changa kalchhuah zeuh zeuh chauh a ni tawh.

"Mi harsa zawk te tanpui a, mamawh tu apiang te hnena an mamawh pek ka duh ber. Mahse, chutiang tur chuan mo ka ni a, ka chhuak reng thei tawh lo. Engtin nge ka tih ang aw? " ka ti leh vang vanga. 

"Tihtur ka hre chhuak thut.. Nimin khan Jane-i thianten naupang mamawh siamchhuaktu company pakhat nen an indawr thu a sawi tak asin. Amah hian a buaipui hman lo va. Chu lam chu i buaipui duh em? Aizawlah branch thar hawn an duha, online hian kan chah nasa sia. A tih chi viau ka ring" Phur sarh hian a ti a. Dawr neih lam ka lo ngaihven ngai miah lo nangin a thilsawi chuan ka beng a verh zak maia, a sawi company lah chu company lar tak a ni bawk. 

"Nangni pahnih chu chaw ei in tum lo em ni? 'U Jimmy-an a rawn ti a." Ei dawn e, mikhual ho khan ei hmasa se kan ti deuh a' ka u in a lo ti thuaia. U Sangzela ka bulah a rawn thu ve a. "I ril a tam tawh em? " a ti nghala. Ka lu ka thinga, "U Sangzel, Tei hi ka lo hrilh zo deuh chiaha, nimin lam khan Jane-i thian ten Jane-i an rawn biaa. Naupang mamawh siamchhuaktu company annia. Jane-i hian a buaipui hman lo va, keilah ti vel luah hi ka ni bawk sia. Tei hian a tih theih chuan a that ka ring lutuka. Nau pianghlim atangin an nei kim vel veka. Aizawlah branch thar rawn hawn an duha" ka u-in a ti a. Engtin nge a chhan ang hre duhin u Sangzela ka melh kara, "aman a duh leh duh loh animai alawm" zangkhai vuh hian a ti a. 

"Eh, anih chuan a duh apiang a nei thei tihna ni maw? ' nui chungin u Jimmy-a zawkin a lo ti a. " Nia, hmeichhia hi an lo thu khawp. Ngam chi pawh an lo ni lo. Nangpawn i ngam miah loh kha" Nui huk huk chungin u Sangzela'n a ti ve maia. Ka nui ve tak nangin ka chhungrilah erawh ka nuih a za miah lo. Hetianga midang zinga min duatna hi kan room chhungah hmuh tur a awm ngai tlat loh avangin hlimpui chhan tur ka hre lo a ni ber. 

"Kan ram hruaitu meuh pawn nupui a ngam si loh chuan keini mi mai mai tan ngam chi a ni nang. Tak takin, in tih theih chuan a tha ngawt ang. Arini tan pawh nitin in a awm ai chuan a nuam zawk maitheia. Han be chiang ula,a tihchi ngei dawn em tihte pawh hriatchian hmasak a tha alawm. . Engpawhnise, chaw i va ei ve ang u. Ei tur tur chuan an ei zo tawhin ka hria" a tih zawm zat. 

Ka pa te in atanga kan hawin dar 10 a hnai thuak tawha, nilenga pheikhawk sang ka bun avangin ka ke a na a, Motor a ka chuan veleh ka phelh nghal a. Ka ke zungpui ka tuai hauh hauh bawk. 

U Sangzela a inbual hmasa a, ka inbual veleh a, ka inbual zawh chuan phone khawih chungin a lo mu a. 

"U Jimmy sawi kha eng nge i ngaihdan? " ka ti a. 

"Eng kha maw? " a ti bul deuh hmuk. A mizia a thlak leh hneh tawh viau tih ka hre thiam reng. 

"Company nena indawr chungchang kha.. " Tha takin ka ti a. 

"Ee, kha kha maw? I duh leh duh loh animai ka tih kha" Ngaihven tak takna nei miah lo hian a ti leh a. 

"Anih chuan naktukah Jane-i chu ka be chhin ang. A thian dangte a lo biaktir tawh zawk maitheia" Ka ti ve leh a. 

"Chutia i hmanhmawh chuan tunah khan bia la. A thuhrimin in a awm i lo ning viau tih ka hre hleinem" a ti leh daiha. 

"Ka nin viau thu ka sawi em ni? " Ka tum aia bung deuh nghat hian ka ti a. "I sawi aniang chu, Jimmy-an a sawi kha. Chhungkaw thil pawnlamah sawi ching miah suh, ka duh lo ania" a ti zui leh khera. Ka ngaihdan a pel ta phat mai. 

"Chutiang engmah ka sawi lo. Mi a ka ni lo" ka ti ve hmak. A rawn tho chu ka mitsirin hmu mah ila ka en duh lo. 

Ka hmaah tak a rawn dinga. Na zetin ka ban bul tawn tawnah a rawn vuana. En loh theih ni hek lo, a mitah tak ka en ran mai. 

"Mi a i ni loh vangin alawm kei hi min neih ni. Chuan, I pasal hi tu nge ka nih i hre chiang a. Engthilahmah min nawrlui reng reng suh ang che" a ti hmuk hmuka. 

"Ka nawrlui ngai miah lo che. I duhdan vek zawkin anih hi ka awm ni." Hlau duh bik loin ka ti ve salha. Min vawnna thin thlak ka tum a, mahse a hmer na zual sawta, min thing deuh nawk a. Min thlah pahin min nem pah deuha, ka pai nak mai. 

"Huaisen lutuk duh suh, I duh aia thui i kal hlauh ange" Kal sawn pahin a ti leh a. Zanin chu ka lo ipik na a kehchhia ka timai. A tawng apiang chhan loh ka tum lo. 

"Duh aia thui kal chang a awm ve ang chu. I bula awm a hahthlak em maia" ka ti leh hmak. A ding chuta, min rawn en a. "Eng maw i sawi? " a ti fan ruih. "I bula awm hahthlak ka ti, jail tang ka ang" ka ti nawn leh sak. 

"Chuti maw? A va ropui ve" Min tiel zet hian a ti a. Hawisawn duh loin ka en rana. 

"Ropui deuh asin, I inthlakdanglam nge tuna i mizia hi i nihna tak tak zawk lo ni ka hre lo. I boring si, nupa ve si nupa nun pawh kan hmang ngai mang lo va. Kan awmdan hi nupa pawh kan ang lo. Mi hmuh laia induat leh hlim der vel te hi ropui na anih chuan a ropui viau ang" ka ti leh sak saka. Nidangah pawh kan inhnial zeuh zeuh thin tawha, mahse zanin anga ka hlauh loh leh tawng hnem tum hi ala awm ngai lo. 

Engmah sawi loin min en vung vung a, ka en let ve ngar ngar bawk. Ka rin loh takin a nui suka, khum lam a pan zui ta daih. 

Ka mut ve hnuah ngawirengin min rawn kuaha, ka che duh lo, mahse a duh hmu turin a che a, insehruh chungin ka dawh tawp. Inhnial thinrim zawh chauh laia phur taka lo dawn sawn chu har tak a ni, engtinmah lo puih tumna ka nei lo va, ani pawn min dim lo salh salh viau bawk. 

A muthilh hnuah ka mut a chhuah ngang loh avangin ka phone ka khawih leh a, game khelh tumin ka lut a. Online zinga NARUTO tih lang kalh chuan ka mit a la nghal chata, request min rawn thawn pawh ka accept rang ngang mai bawk. 

Zing karah Jane-i ka biaa, vanneihthlak takin midang tumah a lo la sawipui lo hlauh maia. Kan han dawi dun vel hnuah a thiante number min rawn thawna. Chhun lama biak chauh ka tum thung.

Melo-i bulah ka thil tih tum ka hrilh a, min phurpui nghal hluai maia. U Sangzela bulah erawh engmah sawi zui ka tum tawh lo. Ka nu-in ka puala sum a dah ka hre ve kara,ka tum hi ka ti thei dawn anih chuan bul ka tan theihna tur a ni tih lah ka chiang bawka. Sum lamah chuan ka buai lo. 

Chhunah ka biaktur te ka be thei a, ka rin loh takin thil a lo harsa lo viau mai a. An mahni naktuk maia lo kal an tum thu a rawn sawi a. Ka phur nghal harh maia. Mahse, dawr atana luah tur building ka nei lo tih ka hre renga, chutak chu ka buaina a ni a. Lo zawn lawk a that ringin kan thianho groupah min zawnpui turin ka ti a, an lo ngaihven tur thu an rawn sawi liam liam mai. 

Ka u in entir ka kalpui a, in ka thlen veleh ka inbual nghala, ka inbual laiin ka thil lei ka u te Motorah ka theihnghilh tih ka hre chhuaka, ka u biak tumin ka inbual zawh veleh phone ka khawih nghala. Mahse, whatsApp msg lo awm chu ka en hmasa te te. 

"Hello.. Arin, Naruto ka nia" Tih zawng a lo ni a. A number save lo mah ila Naruto a rawn intih avangin tu nge anih ka hai hauh lo…