Naruto -4

 Then -4na

"Eng nge ni ta? ' tiin ka reply nghala, a rawn chhan let hun nghak loin ka u ka call a, ka thil lei an Motorah ka theihnghilh tih ka hrilh a, " Ka rawn dah tir dawn nge i rawn lam tir ang? " a rawn ti a. Rawn dahtir ai chuan tirh mai tur an awm reng tho a, ka lamtir dawn tiin ka chhang a. 

Kan inbiak zawhah msg ka check lehnghal zata, Naruto msg a lo awm leh tawha. 

'Dawr luah tur i zawng em? " a rawn ti a. Kan thianho zinga tu emaw berin an hrilh tih ka hre thiam nghal mai. 

Msg reply tawh loin ka call a, msg min rawn thawnna ala rei loh nen a pick up thei der lo. Phone dahin thawmhnaw ka ha a, inhnuaiah ka u te in a tirh tur an awm leh awm loh ka zuk en a. Nidang ang chu nise u Sangzela ka hrilh anga,a lo haw pahin a rawn lam thei reng. Mahse,ka be peih rih thlawt lo. 

Ka tirh fel hnuah roomah ka chho leh a, ka phone a lo eng va va a. Ka en thuaia, min lo call back a lo ni a. Ka call nghal vata, rei pawh a ring hmain a pick up vat. 

"Hello… " Mipa aw lian thum lam hian a rawn ti dut a. 

"Dawr luah tur i hria tihna mi? " Ka ti nghal tawng. "Aw, hre mai thei. Engtik atan nge i mamawh? " a rawn ti leha. Ka la sawichian theih loh thu ka sawi chuan ani pawh chuan a hriat chu tun thla chhunga sak zawh an beisei thu a rawn sawi ve nghal zata. "I duh chuan naktukah ka enpui thei che" a rawn ti zuia. Ka yes rang ngang mai. 

Ka nu hnenah ka thil buaipui ka hrilh chuan tha a lo ti viau mai. "I peih phawt chuan eng emaw tal chu buaipui la a tha. Mama lah a buai si, I tan pawh lo awm ve tlawk tlawk hi a ninawm dawn lutuk" a lo ti fel thliam mai. 

U Sangzela lo haw laiin roomah ka lo awm a, a rawn lut tih hre mah ila ka ngaihven chuang lo. 

"Jane-i chu i bia em? " Ka rin loh takin a ti a. "Aw.. " tih bakin ka chhang lo. Keima pual liau liau niturin ka duh a. Ka tithei dawn anih pawhin ani tanpuina hi dil ka tum eih lo. 

"I biak fel theih hmel em? " ala ti lehzela. "Ka la hre lo" chhan loh tawp aiah ka ti leh nghat. 

"Eng nge a? Min va han be peih lo ve? " a tih leh chuan ka va en a, chik tak hian min lo en reng. 

"Biak peih loh pawh a awm lo" ka ti a, ka tho nghal a. Mahse, kalchhuah ka tum chu ka hmaah tak a rawn dinga. "Khawnge kal i tum? " a ti nghut. 

"Inhnuaiah" Tih pahin kalpelh mai ka tum a. Mahse, ka karna tur dal takin a ding leh a. "Naktukah Lungleiah ka kal dawna, I kal ve angai' a ti deuh hmuka. 

" Engthilah maw? " ka ti nghata, "Minister prog ania, I lo kal ve ang" Thupe angreng tak hian a ti a. A sawi zawh rual deuhthawin " Ka hman lo" ka ti hmak. 

"I hman leh hman loh ka hre lo, I kal angai ka tih chuan i kal angai" kal sawn pahin a ti a. 

"Tihtur ka lo nei ve thei tih i hre lo em ni?" lungawi lo aw hian ka ti a. "Hria e, mahse i pasal hian ram tan hna ka thawka, nupui chuan min thlawp mai tur a ni" a ti leh hmiah. Ka ngaihdan a ni leh ta thak lo. 

"I duhthu renga politics khel alawm i nih. Keiin ka khel ve lo, mipui pawn kei min thlang lo" ka ti hmaka. 

"Nupui chuan pasal a thlawp tur a ni tih i nu khan a lo hrilh ngai lo che aniang maw? ' a ti vawt ruiha. Ka nu hmusit zawng a a tawng leh lek phei chuan min ti thinrim zual a. 

" Ka nu min zirtir thin chu thudikah huai taka tang turin a ni a. Pasal te thu a kawi a ngila zawm turin min hrilh ngai lo" a mitah tak en chungin ka ti a. Ka mize nu hnip hnep lo tak thin, pasal ka neih tak avanga up beha awm kha nimin atang khan kaihthawhin a awm leh tan mek tih ka hai lo. 

"Chutiang a lo hrilh che chuan a lawmawm anih chu. Dar 6 ah kan chhuak dawna, zan khat riak tur kan ni a, ka thawmhnaw pawh lo siam la, I thawmhnaw pawh" ka thinrimna engahmah ngai lo tak hian a ti leha. 

"Ka kal hman lo" ka ti leh hmaka. A tawng leh hmain room atangin ka chhuak nghal nal nal bawk.

Chawei dawn thlengin Roomah ka chho leh tawh lo va. Anihna takah chuan ka pasal hi ka thlawp anga, a kalsual palh tur pawh ka veng tur a ni tih ka hria. Mahse, tuna kan awm mek dan ang hi chuan phur taka thlawp theih a ni lo. Engkim lan mawi duhna leh politics nena inzawm a ni zel hi ka hne hluah hluaha. Hrui tel loin min thlung beta, keimah hi keimah ka ni ta lo emaw tihmai tur niin ka inhre bawka. Miin kan nupa pawnlam landan an hmu a, an lo awt anih chuan an demawm loh. Nupa inhmeh leh incare tak, inthlawp tha em em ang mai kan ni a. Pawnlam landanah chuan kan awhawm thlawt ang. Mahse, chhungril nget, inzawmna nghet lo hi a ni telin a zual nimaiin ka hria.

Chaw kan ei laiin u Sangzela'n a zin dawn thu sawiin keipawh min hruai tel tur thu a sawia. Room chhunga awm ni loin chhungkuaa awm kan ni a, hnial ka duh lo. Chutihrual chuan ka hman emaw hman lo emaw ka kal ngei ngei dawn tih achiang viau a. Tihngaihna a awm lo. 

Chawei kham veleh roomah ka chho nghal nalha, Naruto call ka tum zet hnuah msg ka thawn leh ta zawka. Zan khat riaka ka zin chhuah dawn thu ka hrilh a, "Ok, I lo haw hunah nimai lawm. Hmanhmawh suh" a rawn ti awlsam et. 

Ka u ka be leha, ka awmdan ipik lutuk hrilh ka chak zek zek, ka nu a awm loh hnu atang hian ka u hi nu ang maiin ka en a. Puih ka ngaihna apiangah min pui a, thil ka thiam loh thlengin min zirtir bawk. Mahse, tun thleng hian kan nupa kar leh ka ipik rukna engmah ka la hrilh ngai lo. Ka pain nupui a nei tawha, eng ang mizia nge a nupuiin a neih dawn hre lo mah ila ka seilenna inchhungah ka duh ang anga ka va khawsak leh a rem tawh dawn lo tih ka hria a, khawiahmah hian ka him lo ni ta berin ka inhre bawk. 

Midang bulah kan zin dawn tih a sawi vek tawh avangin kal duh loh awmzia a awm tawh lo. Phur lo em emin ka insiama, midang bula kan awm rual rualin a dera nun angai leh anga, thil hote a mualpho hi keipawn ka duh bik hauh si lo. 

Zankhuain insi miah loin kan mu a, min be lo va, keipawn ka be hek lo. Game ka khel tlaivar thaka, ka tum dan tak chuan Motora muthilh ka tum a, midangin min be sek lo anga, lemchan vel angai lo bawk anga, a hahdamthlak zawk ang. 

"I muhil miah na nge? " Min en vung vungin chungin a ti a. Chhang loin ka tote bag khaiin kawngkhar lam ka pana. Mahse, ka ban rekah a rawn vuana. "I tihtur i hria a, fimkhur ang che" Khauh fur hian a ti a. Min thlah rualin ngawirengin ka chhuaka, ka hnungah min rawn zui ve nghal tih ka hria. 

Driver-in min hmuh veleh ka bag min lo laksak a tuma, mahse ka mamawh nghal tur ka dah avangin hnung lama dah angai lo ka ti a. U Sangzela bag pahnih rawn khai a laksak thuaia, Motor hnung lamah a dah fel a, min zuitu tur Police leh Sawrkar mi pawimawh dang pawh kan gate pawnah an lo ding thap tawh bawka. Lemchan hun a intan tih ka hai lo. 

Kan tlanchhuak deuh chauh tihin earpod vuahin ka maimitchhing nghala. Aizawl khawpui chhung kan tlan pelh hnu lawkah ka muhil zui nghal mai. 

"A nuam vak lo chungin min zui a duh thin sia. A muhil deuh char char anih hi" U Sangzela'n a tihri ka hriaa. Harh reng mah ila ka meng duh rih lo. Motor a ding tih ka hre theia. Chaw ei turin kan chawl anih ka ring mai. 

"Bawihi, I tho peih em? " ka dara rawn khawih chungin a rawn ti a. A kut paihsak sawk ka chak viau nangin ka insum angai tih ka hre kur tho. 

Harh hlawl niawm takin ka thu ngila, u Sangzela ka en a. "Kan chawl dawn em ni? " ka ti nghal sap. 

"Aw, helaiah hian chaw eitur min lo siamsaka. Thil pawimawh tih nghal tur kan nei bawka" tih pahin a tihtur list min entir tumin Tablet a rawn dah hnaia. Ka thlek zawk nangin engmah hmu tak tak chuang loin ka hawisawn leh maia, kan motor-ah Police officer pakhat a thut ve avangin kan nupa kar thup a tul tih ka hriaa, kan lemchanna tual hi a zau hian ka hre thin.

“I duh leh lo awm hahdam rih la, kan hna thil kan tih zawhah ka rawn ko leh zawk ang che,rei lutuk a ni lo vang’ a ti leh a. “ A pawi hleinem,ka lo mu rih mai ang” ka ti a, ka chal a rawn khawiha, “ i khawsik chu a awm loin ka hria, lo hahdam rawh’ a ti a, pawnlam ka va en chuan midangin an lo nghak thap tawh tih ka va hmu a, “ kal tawh rawh,an nghak che ania” ka ti leh sap. “Ok,kal dawn e..Eng emaw tal ei tur i duh em?” a ti leh riha, ka lu ka thing a. MIdang hmuha lanmawi tumna thil chuan minti chau zual ngawih ngawih a, kal thuai thuai se,keimah chauha awm ka duh. 

A chhuk fel hnuah keimah chauhin ka awm dawn emaw ka tih laiin hmeichhe pakhat hi Motorah a rawn daka, “ Ma’am, Duhi ka ni a. Lo awmpui tur chein min ti a” tih pahin a badge min rawn entir a, Doctor a lo ni a. Ka dam lo tak tak miah lo tih a hre reng a, mahse a tihtur awm chu pakhatmah hmaih a tum lo tih ka hrethiam mai. Kan awmdan hi nupa dang awmdan a ni angem tih ka ngaihtuaha, anih ka ring lo. Keini pawh nu leh pa sawiremnaa innei mah ni ila induh lo tawp kan ni bik lo va, kan inneih tirh phat atangin min duat bakah mipa diktak leh pasal tha ber ka nei niin ka inhriaa, mahse kum a tlin dawn meuh chuan nupa kara thleng ve tur reng pawh kha lemchanna hmanga tih zel angai ta hi  a mak a, ka hre thiam hek lo. Engkim hi a tul vanga ti ni loin a tihtur reng anih vang leh min ngaihsak vanga ti ni se nupui tha ber nih hi keipawhin ka tum ang tih ka chianga,ka hmangaih em tih pawh hi ka inzawt nawn fo lovang. Mahse, invau leh eng emaw hleka che chhe lo tura inhrilh reng ringawt chuan phurna a awm lo va, rilru a hel tial tial zawk chu anih hi.

“Ma’am” a rawn tih leh chuan Doctor la ding reng chu ka hre chhuak zawka. “ Oh…Sorry, lo lut rawh..” inthiam lo lutukin ka ti nghal vat mai.

A rawn thu lut nghala, ka khua a sik leh sik loh bakah ka pum lam engtin nge a awm min zawt nghal zung zunga. “ Ka tha vek e, nizan ka mu tha lo lutuka, chuvang anih hi” ka ti thuaia. Damdawi pakhat hi min pe a, “ hei hi khawngaihin ei rawh, i chau zualpui chu a reh anga. Zinkawng hrehawm lutuka i hmang tur a chhawk zangkhai ang che” polite takin a ti leh a. A damdawi chu ka hmuh theih turin a rawn lek langa, Damdawi hlauhawm a ni lo tih ka hriatchian hnuah ka ei ta chauh.

Darkar chanve vel a liam leh hnuah U Sangzela a rawn let a, Doctor erawh a chhuk vat thung. Ka that leh that loh min rawn zawt nghala, ka zia thu leh damdawi min pek ka ei tih ka hrilha, Doctor hnenah chuan lawmthu a hrilha, Doctor leh midang awm ve te chuan min endan atang ngawt pawhin kan nupa chu min awt tih ka hmu thiam veka, ahmaa a sawi tawh ang bawk khan nuam lo chung pawha ka zui thu a sawi leha, a sawi danah lah chuan min chhuan hmelin min duat hmel em em zui bawk.

Chawei turin kan kala, kan chawei tur min lo buatsaih sak ho chuan ka ril a ti tam nghal rawih rawih thei. Lehkha ka zir lai atanga phaia awm nasa tak leh inchhungah pawh vai eisiam tu kan neih avanga mizo chawhmeh siam dana siam ei tam lo tak mai ka ni a, mahse chutichung chuan mizo chawhmeh ka ngaina em em a, abik takin bai leh Bawngsa,anthur nena chhum tawp ka ngaina zuala, ka nu damlai khan sunday apiangin Bawngsa chhum kan hmeh tel ngei ngei zela,kan eisiamtu kha hindu anih avangin Sundayah chuan Bawngsa kan ei duh thin si a, ka nu-in chawlh a pek phah thin. U Sangzela te inah hi chuan ka pa hriselna avangin kan ei ngai meuh lo thunga,chawhmeh engkim mai mizo duhdana siam engmah an ngaina lo fai vek bawk.

Kan eikham hnu a Motor lam pana kan kal laiin “Arin, Bawihi…’ min rawnti an awm avangin ka hawi let thuaia. Nu pakhat, kum 60 vel bawr niin ka hmuh rual rualin hlim takin ka pan phei nghala. Min rawn kuaha, “ Hetah in rawn chawl dawn tih ka hriaa, in chawei chhung khan ka lo nghak char char che a” a ti a. Kuah let ve pahin an dam that leh that loh ka zawt nghal chula, hlim takin min chhanga, “ U Sangzel, Hei hi Pi Thanpuii anih hi” U Sangzela hnenah ka ti nghala.Pi Thanpuii nen an inchibaia, “ Awwww, pasal i va nei tha lehzel tak em.I fel bawka pasal tha tak neih hi i phu reng a ni. Ka pu,In nu leh Pathian vanga tun thlenga la dam hi ka nia, i nupui hi kan chhungkaw  tan chuan angel ania, lo duat em em rawh aw” hlim takin a ti a, kan kalna tur la hlat vanga kan hmanhmawh thu ka hrilh chuan a thil rawn khai chu min pe a, “ hei hi i puan tura ka fanu-in a tahsak che anih hi aw..Amah a zin lai tak ania, i lo kal ve dawn em ka hre si lo va, zingah khan Rinpuia ka biaa, i lo kal ve atih avangin hmanhmawh deuhin ka lo chho alawm” a ti leh mawlh mawlha. A thil khai min pek chu ka hawnga, Puanchei a lo ni a, “Awi aw, hralh zawk te che u…Engmah min pek angai hleinem” inthlahrung takin ka ti a. “Nitin kan hralh ve reng tawh alawm. Hei chu i pual liau liaua uluk lehzual kan tah ania” hlim tak bawkin a ti a, a habal seu mai langin a nui a. 

Motor chuang chungin pawn lam ka thlir vang vanga, thil tha tlemte ka tih ve vanga hlimna ka dawn let nasat tawh zia ngaihtuahin rilru hahdam takin ka thu a. Pi Thanpuii nen kan intawn dan te ka hrechhuak iar iara, an khuaah chhungkaw pakhat tanpui tura kan kal tumin Bazar kan tlawha, Bazar luhna tur step sir kil khatah kurtai tlem leh thlai hnah tlemte a lo thutpuia, ka mit a lak tlat avangin midangin thil an lei laiin ka lo thutchilha, mahse hemi tum hian engmah ka zawtchhuak thei lo. Mizo nu diktak a ni a, midang bula an chhungkaw harsatna share chiam a,tanpuina dawn beiseina rilru dik lo a nei lo. Kan haw hnuah ka rilru a nawm theih thlawt loh avangin an khuaa ka hriat ve chhun,an YMA hruaitu ka zawt rawiha, min lo ngaihvensak hnuah a chanchin ka hre chiang ta a. A fanu hrisel lo tak leh a tunu a lo enkawla, amah pawh TB natna vei niin,a pasal lah zu heh tak mai a lo ni a. Mi tanpuina dawng ve thin bawk mah se intanpui reng sen a ni lo va, kum 60 hnaih tawh tak leh hrisel lo tak anih avangin inhlawhna te zawng ve thin mah se a hmu hleithei lo.Ka hmuh ni khan an thenawmnu in kurtai tlem zawrhtur a lo pe a, an huana a thlai neih ve ang ang nen bazarah khan a lo thutpui ve a lo ni a. An chanchin ka hriat rualin ka chhungril a luh ngut nguta, ka pawisa lo khawl ve ang angin ka tanpuia, a fanu inzaina tur ka ngaihtuahsaka, a hnuah kan thianhoin a fanu tan puan tahna khawl kan leisak leha, a pasal a boral tawh bawka,tunah chuan Pathian zarah ngaihtuahawm anni tawh lo.

U Sangzela phone a rik sek avangin ka muhil leh thei ta lova, kan kalpelh khaw thenkhatah kan chawl leh thina, an khawtlangin infiamna lama mamawh an neih an lo thlen zela, a thenah chuan chhuk ve bawk mah ila Motora ka lo awm chang a awm tho bawk.

Thim dawnah Lunglei kan lut ta chauha, zing kara chhuak kan ni a, chawl zel lo ila chuan dar khat vel bawra thleng mai tur kan ni a, mahse kan tlan sawt ngang lo. 

“Inbual la, chawei hmain keichu inleng ka nei leh rih dawna” Room a kan awm hnuah a ti a. “Inbual hmasa rawh, keichu ka hmanhmawh lo” tha takin ka ti ve maia.”inbual rual ila” a ti leha, “Aih” ka ti rang vat mai. A nui a, “ i la thinrim char char tihna mi a?” a ti a, ka inher chiah chu ka hnunglam atangin ka kawngah a rawn kuaha, a awmdan inthlak thut chu ka hre thiam chiah lo. Kawng tluan khan min duat na a tilang chamchi a, midang hmuha mawi a zawn vang nimaiin ka ngaia, ka hlim phah lo. Mahse, kan pahniha kan awm hnuah pawh a mizia a la ngai ta reng hian mak mintih tir a ni ber mai.

“Thinrim lo” ka ti deuh nghauha, min kuahna thlahin amah en thei turin min pawt hera, ka khabeah a rawn dawma. “ A chang hi chuan ka nawrlui nasa mah mah che tih ka hria a, pawi ka ti .Mahse, i awm ve hian ka kim thin a. I tel ve tawh naah chuan engkim hi a dik thlap thin bawka, chuvangin ka mamawh zual che a, ka nawrlui leh thin che a, i thin tihrim tum hrim hrim ka ni lo tih min hriat sak la, min ngaidam dawn nia” dam thlup hian a ti a. Min endan zawng zawng nen chuan kan inneih tirh lam ang mai kha niin ka hriaa, hetianga nawrluih vang ni lo a min duhna tak tak nei anga a awm hi ka hmuh lohna chin pawh ka hre tawh lo.

Ka chalah a rawn fawpa, ka thle sawn vata,min rawn fawh leh a tum chu, “ ka hmai a bal” ka tih takah chuan a nui hawk maia. Min pawm kang nawlha, a kawngah ka kherhbet nghala, ka lo nih fo tawh thin angin nupa inzawmna mak danglam bik tak avangin hun reilote chhungin ka lungawilohna lam reng reng ka hre chang leh tawh lo.

Kan zin dun atangin thla a liam leh tawha, kan nupa kar boruak a zia ta hawk maia. Mahse, fel lo riau awm a hriat chang erawh ka la nei fo tho. U Sangzela mizia a inthlak a, kan inneih tirh lam ang bawk khan min ngaihven leh tawh a, tihluihna tel miah lo in keipawhin nupui tha nih tumin nitin ke ka pen ve zel a. Ka hriatchhuah tak chu, kan nupa hlim leh hlim loh chu amah u Sangzela ah hian a innghat thui em em a, mood fuh lo leh hlim lo reng, mi zing chauha nui thei leh min duat thin anih kha chuan kan hlim thei lo a, mahse mi zingah chauh ni lo, nupa kan nih anga kan pahnih chauh a kan awm pawha min mamawhna a tihlan tam ang zelin kan inkar a tha tih hi a ni.

Ka dawr tur pawh beisei phakbakin a kal tluanga, khawpui chhung hmun lun lai takah dawr luah tur ka hmu a, u Sangzela ka phut miah lo chungin a hman ang angin min enpuia, mipa zawk na na na chuan hisab a lo nei thain dawr chhung siam fel mekah pawh thil a duh uluk em em a, engkim a tha ber min neih tir a tum a, mahse company lam nena kan indawr naah erawh chuan engmah min buaipui sak lo thung.

"Awi, a van nuam dawn tak.." Dawr chhung enkual chungin Faki'n a ti a. 

"Nia, beisei ai takin a zia ve dawn hmel a. I pa eng nge a an?" ka ti ve a. 

"A zia lutuk, engtin nge hnathawk tur i lak dawn? Nangmah chauha tihchi a ni dawn si lo va" a ti leh a. 

"Hawn hma karkhat velah chanchibu-ah ka chhuah tir mai ang chu ka tia. U Sangzela khan ka lo ngaihtuah mai ang a tia" ka ti a. "Mi vannei hi chu i va han ni tak' nui chungin a lo ti vat. 

" Hmmm, eng nge ka vanneihna? " Ner khum chungin ka ti a. 

"Pasal tha tawk, chhe lo bawk, thalai mipa thlengin an duh rawn i nei a. A la duat em em zui che a. I vannei ve thlawt, in inneih dawna mak kan tihzia kha a" nui chungin a ti leh barh barh a. 

"Ani aia tha zawk hi ila nei ang. Chutiang tur chuan mal ka sawm ang che" Chhaih fiam paha ka tih chuan a nui ar ar a. 

"Ka ti tak tak alawm, I vannei thlawt. Tlangval ang maia awm thin kha i danglam tawh bawk si. Mahse, nang hi chu i intih tlangval vel lai pawh khan kan thlah hoah chuan i chhe lo ber tho.. Eeee, enteh, Lunglei in zin tuma Doctor Duty kha ka thiannu ania. In nupa tawp hian a star che u a. A sawi nasa mai che u" a ti leh siam siama. Lunglei kan zin tuma Doctor fel tak, Damdawi min pe tu kha a sawi hi a ni tih ka hre thiam maia. Ka hmuh nawn leh awm ka hre tawh rih lo. 

"Engtin nge a sawi a? " ka ti a. " U Sangzela'n a duat zia che leh a ngaihtuah zia che a sawi nasaa. Chuan, I dam lo a awmpui che tih a sawia. I polite tih vel leh Pitar harsa ve tihhriat ngawih ngawih i kuah thu te a sawi teuha. Pitar nena in chungchang kha chu keipawn ka lo hmu ve ngeia" a ti leh duaha. 

"Aaa, amah a fel avangin ka fel ve angin min ngai mai mai anih chu. Mifel chuan midang te tlin lohna aiin tlinna an hmu zel alawm" Nui chungin ka ti a. "Nia, a fel lutuk. Mahse e, in nupa hi chu mizo zingah hi chuan in awhawm thlawt alawm. Ka unaunu mah ni la ka chhuang che" a ti leh zela. "Hey, miin an hria ange. A zahthlak" ka ti hlaka. A nui pawt pawt duh lek. 

Tlai lamah Chhana leh Aruata'n min rawn tlawha, Rinpuia ten inneih an tum hnai tih an sawi chuan ka lo phur nghal harh mai. Palai vawi khat an kal tawh thu leh kal nawn leh hun pawh naktuk zan anih thu an sawi bawka. An inneih ni-ah keimah tela perform an duh thu an sawi chuan ka nui ringawt. 

Ka nu in tu neih a chak tawh zia a sawi thawi zauh zauh tana, kan inneih atangin kum a tlin lohna kar khat vel chauh a ni tawha. Keipawhin rai ve ka chak ru em em tawh. Kan nupa hian kan inentir fo va, mahse kan that ve ve thu bak an sawi ngai lo va. U Sangzela hian min hnem a, kan la nei ve mai ang a ti thina. Mahse, achang hi chuan phai lama kala, naupai dan zawn mai te ka duh thin. 

Kan inneih cham a lo thleng a, mahse hna tul avangin phai lamah min zin sana. Chhana'n a birthday puala kan thianhoin dine out a rawt a. A birthday hi kar kaltaah khan thleng tawh mah se Aruata a zin avangin kan kim hun atan a ti a. Niminah Aruata a lo haw tak avangin zaninah chhuah an rawta, kan inneih cham tih an hre tho nain u Sangzela a zin avangin a rawt theih phah ta hlauh a ni ber. 

"Hey, Naruto… " ka tih chuan a rawn hawi thuaia. Min rawn en chungin a nui suka, a bula thutna awlah ka thu ve nghala. 

"Khawnge Lily? " ka ti a. 

"Tu nge Lily? " zawi angreng tak hian a ti a. "I over e a" tih pahin lei ka chhuahkhum zauh.A nui leh a, "Nia.. Ka over a, ani pawh a over a. A awmziaah chuan engkim a over tawh tihna anih chu" a ti deuh duaha. Ka hre thiam lo dawn a, mahse a sawi awmzia tak ka man lehnghal thuai mai.

"A va pawi ve" ka ti thuaia. 

"Pawi a, pawi lo bawk ang chu" a ti awlsam leh mai. "Hey, Bawiha.. Ka rin loh deuha ka hmuh che chu le. Tunlai inbuai em? " Thomas-an a rawn ti lung lunga. "Buai lo ti ila Police tan buai loh tak tak a awm lo an tia lawm" nui chungin a ti a. "Naru…" ka tih lai mekin, " Naru maw? Za-rin, inkhelh loh lai chuan Rempui ti ve mai la" Thomas-an a lo ti hmanhmawh a. 

"Ka ti dawn reng alawm, I chhe zet zut lutuk' ka ti hlaka. U Sangzela nena kan boruak a that loh zual lai khan Rempuia nen hian zan reiah kan inkhel dun fo thina, kawm pawh kan inkawmngeih phah zuala, ka  dawr luah tur building lah an mahni in a lo ni lehzel bawk. Mahse, kan nupa kar a tha chho a, dawr tur siamfel leh thildang dang vangin ka buai chho nitin ve ta a, zan lamah pawh ka inkhel leh ngai tawh rih lo. 

Dar 9 pelh hretah in ka thleng a, ka phone a thih avangin ka charge nghala, ka intleuh leh zuai hnuah ka mu a, ka phone ka on chuan msg a rawn lut nghal tak tak mai. 

U Sangzela ka call a,"Ka la buai lawka, ka rawn call ang che" a rawn tih chuan ka off nghal vat. Zana ka kalna tur ka hrilh lawk vek avangin a thinrim phah ka ring lem lo. 

Min rawn call in ka lo muhil hman tawha, zingah min lo call tih pawh ka hre chauh bawk. 

Melo-i nen thingpui kan in dun a, "Mama te chu engtik nge lo haw an tum taka? " a ti a. "Naktukah… " ka ti thuaia. A mitmeng dul deuh raih chu chokaa a lo luh tirh atang khan ka hmuh hmaih hauh lo. 

"I nuam lo em? " ka ti leh a. A insut zauha. "Nuam vak lo. Ka lu a na deuh reng mai' a ti zuai raiha. Nula, kum 30 pel tawh, ngaihzawng nghet taka kawp nei a ni a. A bialpa hi amah aia a naupan zawk deuh avangin a control hneh em em a. Fiamthu titakin " Keini ang nula senior tan duh duha kan tihkual ngam loh tur neih awmzia a awm lo" a ti deuh tlat zel. Ka mo ve hnu hian kan inpawh em em a, mo ka nih vanga ka inthlahrun na tur ang chi te hi min lo hmuhpui thiam thuai thina, min duhsak em em a, keipawn ka theih ang angin ka duhsak ve bawk. 

"Vawiin chu chhuak lo in ka mu nileng mai dawn zawk nge mawni? " a ti leh nang nanga. Ka nu a rawn lut ve a, " Ti nge mut nilen i sawi a? I nuam lo viau em ni? " a rawn ti ve bawk. 

"Ka lu a na" a ti nghata. Ka nu hian a tet te atanga fa pawma a pawm a ni bawka, a fa hrin ngei Sangtei ai pawh hian an in nufa mah zawkin ka hre thin. 

"Chawlh mai rawh, I chau tawngkhawng aniang chu. I u hi lo haw se hmeichhe ho zawng hi zin khawthawng ila a tha ang. Arini pawh tunlai chu i buai zual a, hahdam i mamawh ang" a tih leh chuan "Nia, zin ang u. Mahse kei chu hla deuha zin aiin Tawang vela zin mai mai ka chak" Melo-in a ti thuaia. "Ve bawk che hian.. A hma pawhin Darjeeling kal i tia, nuam i tih tawp loh kha" Ka nuin a ti hlak hlak a. Melo-in a nuam tih loh chhan sawiin a lo insawifiah ve vat thung. 

U Sangzela a rawn haw a, a rawn haw tukah ka nuin hmeichhe hoin zin kan chak thu a sawia. Melo-in Tawang a kal a chak thu a sawi  chuan Atea'n "tunah chuan a nuam lo vang. November velah in kal dawn Nia.. Chuan, I pasal neih hmaa i zin hnuhnun ber pawh a ni maithei ania" tiin a fiama. 

"Min ning viau suh aw, pasal nei loin ka lengtar mai ang" Melo-in a tih chuan ka pa a nui huk huk a. Ka nuin pasal neih loh that loh zia a sawi zui teuh bawk. 

Dawr hawn hun tura kan tih ni a lo thlenga, engkim ruahmanna felfai takin u Sangzela'n a kalpui vek a. Min hawnsaktu tur pawh duh min thlan tir thlap bawk. Mahse, hun rei tak awh tur ni loin ribbon chehchah na leh hunserh tawite hman mai tur a ni a. Hawn tan ni anih angin bungrua zawng zawngah 10% discount pek vek a ni a. Bungrua awm tha nghal se ka duh avangin pawisa invest pawh a tlem lo viaua. Mahse, sum lamah chuan buaina vak ka nei lo bawka, pawi ka ti chuang lo. 

"An va han over tak e aw.. Politics hi chu a va han tenawm tak' Nu Sangi'n a ti hlaka. 

" Eng nge a? " Ka u in a ti thuaia. Nu Sangi hi ka pa nupui a ni a, ka nu han tih em atan chuan kan a la nau deuh bawk nen, "Nu Sang" tiin ka u nen kan ko ve ve. 

"An thil ziah duh dan hi mawle. 

Tei dawr thar hi Sangzela beih nan an hmang daih a, politics lam hawia kaihher chi pawh ni in ka hre lo" a ti leh a. A phone ka u in a ensaka. Ngawirengin a chhiar zawhah min rawn pe a. An thil post ka chhiar chuan ka nui nghal hak maia. Mahse, comment ho ka enkual leh chuan awih tawk an awm teuh tih ka hmu a, ka nui tawp nghal hmak bawk. 

"Lo sawi vel ve mai mai tehse, mizo hi chuan politics hi kan khel dik lo laklawh tawha, mipui pawh hian politician chu dawtsawi hrat tak turah alawm kan ngaih" ka ti hlaka. U Sangzela hian social media lam khawih a remti lo viaua. IG lamah erawh a active ve deuha. Mahse, hna leh mimal nun erawh a thliar hrang thiam viau. 'Mi zawng zawng ka ti lawm thei dawn lo va, hnathawk tha ka intih laiin thawk tha lo minti an awm reng dawn. Chuvangin Facebook velah phei hi chuan active suh, rilru natna tur i hmu teuh anga, insawifiah pawh tum ila kan buai tual tual ang' a ti thina, a sawi dik tih ka hria. Mahse, kan inneih hma atang tawhin IG ka khawih nasa em em a, Facebook lam chu ka khawih zeuh zeuh chauh. 

U Sangzela thiante naute birthday lawm naa kal turin ka insiam meka, mahse ka khua a sik ser ser renga, zingah pawh ka thil ei a tui lo viau bawka. Dawrah pawh kal loin u Sangzela chhuah hnuah ka mu leh ta daiha, ka zia leh mai ringin amah pawh ka nuam lo tih ka hrilh lem lo. 

'I va nawm loh hmel ve" ka nuin min lo ti ta chat. 

"Ka khua a sik deuh a. Mahse, tunah chuan ka zia" ka ti a. Nana-i ser vel lai chu ei chak takin ka en dauh dauha. 

"Nana ka ei ve duh aw" Ka ti nghal a. Tunthla chu ka p8 tur intham nidang zawng aiin a nasa a, theithur pawh ei tak ka ni. 

"I khua a sik chuan ei lo la, I nuam lo zual ange" ka nu in a lo ti thuaia. "Aaa, nuam lo zual lo vang. Nizana ka inbual tlai vang kha anih ka ring a" Ka ti vata. Ka hmaa ser a rawn chhawp chuan ka ei dawn reng chungin ka chil a tiput ngawih ngawih thei. 

Driver-in min rawn lama, kal pahin kawngsira thei den an zawrh ka lei leh hram a, acid nen ka pawlha, ka ei zo leh vek bawk. Mahse, a hmun kan thlen hnuah ka awm a nuam lo zuala, an eitur siam phei chuan ka luak a tichhuak lutuka, mumalin engmah ka ei lo. 

Zanah pawh ka khua a sik chiah lo nangin ka awm a nuam lo em em a, ka thei tur ei nasat vangin ka pum lam a dik lo zui bawk nen, nuam lo tak hi a ni ringawt. 

"Acid ei tawh suh, a naupanchhiatthlak thin em mai. Chuan, dawrah pawh kal lo mai rawh.Tlai lamah i la nawm loh chuan inentir ila a tha ang' a chhuah dawnah u Sangzela'n min ti a. 

Chawhma lam zawng chu khum ka thawhsan lo. Na em em ka nei lo chungin ka zawia, ka luakchhuak deuh hlui vangin ka uak ka uak a, min ti chau zo vek tawha. Ka ngaihtuah neuh neuh hian nidanga ka p8 tur intham nen a danglam deuh viau tih ka hriaa, ka thil ngaihtuah avangin ka tho nghal thuaia. Drawer ka haia. Ka duh ka hmuh chuan toilet ka pan nghala. Kut khur deuh dar dar chungin ka test na tur ka keng a. Diktak chuan kan inneih tirh lam khan ka intest peih viaua, tunah chuan ka beidawng titih tawha, test pawh ka intest tha peih tawh lo. 

Mit lehlam chhing chungin ka en a, line hnih lo sen kalh ka hmuh rualin ka meng nghal kawk mai. Hmanhmawh takin testn-na dang ka va la leh a, ka test nawn leh a. Line hnih bawk a sen leh kalh maia. Keimah chauhin bathroom chhungah ka lam kuala, ka tah nuih hawk hawk bawk. 

Khumah test kit ka dah ve ve a, thla ka la a. U Sangzela lo haw hun a sawi atan pawh ka khek hman tawh lo. A thlalak ka thawn a, a seen nghal mai lo a. Minute 3 vel ka nghah hnuah a seen a, a out leh nghala. Min rawn call nghal zat bawk. 

"Tak tak a ni em? " Lawi deuh rut hian a rawn ti a. 

"Aw, tak tak" Tah nuih chungin ka ti a. "Ka lo haw nghal ang. Khum kha lo thawhsan miah suh, chuan tumah lo hrilh lo bawk la" Thupe aw hian a rawn ti a. Chhan pawh ka chhan let hmain a off nghal daih bawk. 

Ka rai tih an hre zet chu kan chhungkuain an phu suau a ni ber. Mahse, mak takin u Sangzela ka rin angin a hlim tlat lo. Midang chuan a lawm em em tih bakin an sawi ka ring lo va. Mahse, kei chu a nupui ka ni a, ka pasal-ah dik lo a awm anih chuan a ruka hriatna mak tak ka nei tlat thin. Roomah amah a awm loh chuan midang luhtir lo turin min chah renga. Ka thil eitur aman a ei hmasa fo bawk. Ni khatah vawi tamtak ka that leh that loh min rawn zawt thina, a hlauthawng leh lutuk chuan ka awm a tinuam lo letling a, a nupui hmasa khan fa a nei hman lo tih ka hria a, a rai laia boral ni se chuan a hlauhthawnna ka hre thiam anga, mahse tuman a nupui hmasa kha a rai thu an sawi ka hre si lo. 

"Dp-i kha a boral khan a rai lo tiraw? " Melo-i hnenah ka ti a. 

"Rai pawh ka hre lo.. Ti nge? " a ti he haw a. 

"Eng ni lo e, I u hi a hlauthawng leh lutuka, chuvang mawle' ka ti a. " Kum upat lama fa nei tur ania, a helhhawlh bakah a hlauthawng ve bawk ang chu. Bakah, u Dpi kha chuan thildang buaina a nei alawm" thutak fe hian a ti a. 

"Maw? Eng buaina nge? A sawi chi em? " Hre chak ru zet hian ka ti a. Diktak chuan u Sangzela nupui hmasa Dpi hi an sawichhuak ngai zen zen lo. 

"Chhungkaw zinga mi i nia,i hriat chi loh a awm hleinem. Mahse, sawichhuah hi kan duh lo a. Bakah, ka hrilh che tih hi midangin an hriat pawh ka duh chuang lo ania. Eng lo alawm. U Dpi kha Mama past life-ah a buai a ni ber mai. Mama hian tun hmaain bialnu nghet a lo nei ve reng tawh thina. Ani kha a thik ni berin ka hriaa. A vanduai em a, chhul lam problem  a nei chho leh nen khan a khawngaihthlak tawp" Zawi sap hian a ti a. Mak ti takin ka en a, tuman chhul lam problem a neih an sawi ka la hre ngai lo. 

"A boral zan pawh khan tuman a tlak dan kan hmu lo a, a buai zual lai anih avang khan a zuangthla anih kan ring ber a" a ti lehzela. Mak ka tih tawh sa nak laiin mak ti lutukin ka meng zau kawk kawk a ni ber. 

U Sangzela inbual laiin a phone a rawn ri a, a pawimawh ringin pick sak tumin ka pan hnaia, ka rin ang ngeiin a P.S a lo ni a, ka pick up thuaia. A inbual tih ka hrilha, rawn call nawn leh a tum thu zangkhai vah hian a sawi ve bawk. 

Phone ka dah leh tur chuan msg lo awm ka hmu a, a rawn thawntu chu "x" Tih ringawt anih avangin mak ka ti deuha, a atthlak viau tih hre mah ila a phone lock ka hawnga. 

"I nupui a rai tur a ni lo tiin kan inrem veka, mahse a rai tak siah chuan tihdan i ngaihtuah thuai angai ang. Anih loh chuan i career a chhe hneh hle anga, I nihna atang hian mualpho taka paihthlak i ni dawn bawk tih i hriat kha' tih hi a lo inziak kalh maia. Rapthlak ti lutukin ka chhiar nawn leh a, mahse bathroom kawngkhar inhawng ri ka hriat takah chuan rang takin ka delete nghal hmak mai. 

Note : Nizan atanga power supply kan hmuh loh avangin YouTube lamah chapter 5 ka post thei rih lo tih min lo hriatsak dawn nia..