Naruto - 5

 Then -5na

"Min rawn call an awm em ni? " a rawn ti a, ka chhan hmain a rukin ka thaw deuh vak. 

"Aw, Pu Hlua'n a be duh che a. A rawn call leh ang a ti" ka tih chuan ka beisei ai takin ka chhang mar tha. 

"Anih chu, I ril a tam tawh em? a ti leh a. " Tam vak lo, engmah pawh ka ei chak lo" tha tak bawkin ka ti leh a.

"Naktuk tiraw i incheck-up leh hun tur kha? Ka kalpui hman dawn lo che a. Ka nu nen kal mai ula pawi i ti em? " a ti leh duaha, 

"Kalpui ka ngai lo ang. Mahni mahni pawn a harsa lo" ka ti a, "inhnuaiah ka chhuk dawn asin" ka ti zuia. 

"Um, keipawh ka lo chhuk ang. Engmah ti suh aw. I inti sual palh ange" a ti leh hrama. 

Inhnuaia chhuk loin inchungah ka chho a, inchung berah hian thutkhawmna hmun thengthaw nuam tak a awm a. Inchung sang deuh veh vawhin an siama, bang awm loin railing erawh rinawm takin an siam chhuak vek thung. 

Thutthleng zau nuam tak awmah ka thu a, ngaihtuahna mumal lo leh buai deuh nuai ka nih avangin ka hma lam ka en ding ngar ngar a, Tu nge "X" Tih kha ni ta ang? Engvangin nge fa nei lo tura an tih ngawt? Anihna atanga tlak phah hialna tura tihsual liantham midang laka zep a nei ang maia msg rawn thawn tu-in a sawi phei kha chu ka hre thiam lo lehzuala, ka rai tirh phat atanga a lawm tak tak lo anga ka ngai thin kha a, dikna ka hmu ta niin ka hriaa, ka naute chan mai tura ka inngaihtuah zawng ringawt pawhin ka khur chhe nghal titih a ni ber. Melo-in Dpi chungchang a sawi kha ka ngaihtuah chhuak zui a, Dpi chhul lam harsatna neih thu kha ka vawikhat hriatna a ni a. Mahse, u Sangzela msg dawn nena ka ngaihtuah hian amaha zuangthla anih ka ring lo nghala, chutihrual chuan keipawh ka him lo tih ka inhre thiama. Tu lakah ber nge fimkhur ka ngaih erawh ka hre thiam rih lo. 

Mut naah u Sangzela'n ka dul a chul hauh hauh a, "ka rai hi i lawm nge lawm lo? " ka ti sepa. Ka dul a chul lai a tawp a, "kum 40 velah fa pakhatna tur ka nei dawn ania. Ka lawm loh i ring em? " A ti a. 

"Ka hre thiam chiah lo.. Achang hian i duh vak lo ni hian ka hre thin che" Pehhel deuh tak hian ka ti leh a. "Duh vak lo ni loin ka hlauthawng thin" zawi fiah tak si hian a ti a. "Ti nge i hlauhthawn a? " ka ti thuaia. Ka biangah a rawn chula.. " Ka chan ang che tih 

ka hlau" a ti supa. " Ka hre thiam alawm" ka ti ve ngawt nangin eng ber nge ka hriatthiam erawh ka hre lo. An vauna ka hre thiam nge ni a, Dpi ang khan ka boral ve thut a hlau tih ka hre thiam zawk ka hre lo. 

"I la muhil lo tiraw? " Kan ngawih deuh vang vang hnuah ka ti leh sepa. Tawng loin ka kawrchhungah a rawn zen a, "Thil ka zawt che anga, I duh loh chuan min chhan kher pawh angai lo a" ka ti leh a. A la tawng chuang lo a, mahse a kut che vel chuan a muhil lo tih min hriattir tho. 

"Dpi kha a boral khan a rai em? " Ka tih takah chuan a kut che a tawp nghal a. Vawikhat a nupui hmasa ka sawi chhuahna niin Light kan off vek tawh avangin ka zawhna vangin a hmel a danglam leh danglam loh ka hre thei lo. 

"Rai lo e.. Ti nge ani lam i sawi a? " awki danglam lo hian a ti a. "Ka hre chak mai mai mawle. Muhil tawh la, I chau thei si" ka ti ta daih. 

Ka harh chuan a lo tho leh daih tawha, nitin mai hian zing kar atangin amah hmuh duh an awm renga. A tihtur hi zing atangin a enlawka, engkim mai timing thlapa tih ngai niin, pakhat a a tlai chuan a lehpek a tlai nghal tihna a ni zel a, hun vawn dik tum chi a ni bawk nen amah hi a hah phah viau. 

"Dar engzatah nge Doctor i hmuh dawn? " Ka nuin min ti a. "Tlai lamah niang. Dawrah ka kal phawt anga" ka tih chuan, "ka kalpui dawn che mi?" a ti thuaia. "Ngai lo ang. Engmah that lohna ka nei chuang lo va. A harsa lo ang" ka ti ve vat. Min tilui loin thildang a sawi zawma. Ka ngaithla reng nain ka rilruah thildang a awm thei tak tak lo. U Sangzela msg rawn thawntu kha hriat ka duh ut ut a, a phone ka en leh anih loh chuan hriat ngaihna a awm dawn lo. Hun remchang ka zawn angai dawn animai. Ka nei thei hlauh anih chuan abak chu tihdan tur a awm zel. 

"Ti raw Arin? ' Melo-in a tih chuan ka hming a sawi hma khan eng nge an sawi hre miah loin Melo-i en chungin ka bu liam ve ngawt. 

" I rai tak siah chuan Mama hian a zin tir che ka ring rih lo a. Nu, kan pahnihin kal tho ila" a ti leh siam siama. 

"Kal tho pawh a pawi hleinem. I pa ka hrilh tawha, a rem tih loh pawh ka hre lo. Mahse, Tea khan November velah kal ru min tih kha" a ti a,an nufa-in an titi dun ta zela. Melo-i ka melh ru leh zauh thina, ka thil hriat kha ani hi hrilh duhna ka nei a. Mahse, a hlauhthawn vangin a u lo hrilh ta se msg ber lah ka delete daih si a, buai zualna mai mai anih ka hlau bawk. 

U Sangzela insiam laiin khuma thu chungin phone ka khawiha, a phone a kalsan hun ka chang ru reng a, mahse a kalsan tlat lo. A khat tawkin a phone a ri reng a, a hum deuh chawt a ni ber. 

"I kal dawnah min rawn hrilh la, Driver ka rawn tir dawn nia" a ti a. A necktie a awrh pah mawlh mawlha. 

"In entir satliah ringawt ania. Min ngaihtuah suh, mahni pawn a harsa lo" ka tih chuan min rawn en a. "A harsat vang ni loin i himna alawm ka ngaihtuah ni.. Min hnial thin lo teh" a ti deuh hmuk. "Ka hnial che pawh chu a ni chuang hleinem, mahni a kal pawh a him lohna a awm lo va.. Bakah" ka tih lai mekin min rawn tawng hnana. 

"Hmingsangzela nupui i ni ringawt lo ania. Tute emaw chuan an lo ngei viau maithei che a, minister nupui i ni tel ania" Khauh angreng tak hian a ti a. "Ka hria alawm, mahse Mizoram ania. Ka pasal minister hmingtha tak vang hian tuman min tihnat an tum phah lo vang. Hmun ralmuangah alawm kan chen. Eee, Rinpuia te inneih ni kha hun i insiam thei hram angem?" ka tih zawma. 

"Engtik nge kha? " thildang sawi zawm loin a ti tha ve maia. A hun ka hrilh chuan "hman ka lo tum dawn nia" a ti leh mai. 

Dawr atangin hma deuh takah ka u te in a kal turin ka chhuak leha, ka u hi a nau neih hun a hnaih tawh em avangin a chhuak tam lo viau tawha, a naupai a huat bakah bed rest ngai ten a awm ren rawn bawka, a naupai a retheihpui ngang mai. 

Kan titi teuha, Naute thil tur an lei vel min entir a, an harsa lo bawka engkim an nei tha vel vek. 

"U, thil ka hrilh che anga, mahse u Jimmy pawn a hriat ka duh lo ania" ka haw dawnin ka ti a. Ka kal chhan ber ni mah se sawi leh loh mai ka duh avangin ka sawi ta lawk lo a. Mahse, haw dawnah ka rilru ka thlak leh ta zawk. 

"Eng thil maw? " rilru nawm loh hmel tak hian a ti a."U Sangzela chungchang ania.. " Tiin msg chungchang leh ka delete thu ka hrilha, mak ti tak hian a mengphawk hra mai. 

"Ti nge i delete kher a? Amah entir la tha tur ania. Ani pawn a lo hre miah lo thei a" a ti thuaia. "Naupai lo turin kan inrem an ti thlap a, tinge a hriatpui loh ang? Ka rai tirh phat atang khan hlauthawn nei ang hian a awm a. Hlim viau anga lang siin a hlim lo bawk a. Awmdan tur ka hre lo. Ka ipik" beidawng tak hian ka ti a. Midangin rawn vau hrim hrim nise thuhran, amah nena inremsiamna nei thlap anga a rawn sawi khan min ti buai ber. 

'Thil lawi lo mai mai aniang. Engvangin nge ani nupui nei turin midang tan inremna a siam tehlul ang? " a ti leh ta tlat. Ka mangan viau laia u Sangzela lam a tang tlat mai chuan min ti lawm lo phat mai. 

"Eng nge ani pawh chu i tan viau a? Ka dinhmun him loh zia ngaihtuah la, keimah hi min ngaihtuah zawk ta che" ka ti ta hmak. Ka kut a rawn vuana, "Dawhthei lo viau thin suh. Nangmah ka ngaihtuah loh che ring mah ta che. U Sangzela mizia ka en hian tumah chutianga inbahhnawkpui a neih ka rin loh vang ania ka sawi. Amah ka tan hrim hrim lam a ni lo" min tlawn chungin a ti dam thlapa. 

"I nupui rai lo turin kan inrem, I career atan a pawi thei a chingfel rawh tih thlapin a rawn thawna. A hriatpui lo thei lo.. Amah nen sawi dun turin minti miah suh, amah ber ka ring lo" ka ti leh hmawk hmawka. 

"Ok… ka hre thiam che. Anih leh aman naupai lo turin a duh che em? " a ti leh sepa. "Ka hre lo" ka ti bung nghat. 

"I fimkhur viau angai dawn anih chu. Engpawhnise tawngtai zel ila, chuan ka nu pawn a veng reng ang che" a ti leh daiha. "Ka nu" ka ti ve sep. "Amah tak hmu thei lo mah ila ka bulah thlarauin min veng reng niin ka hriaa, ka thlamuang thin. Nang phei chu a duat sual, I puitlin loh lutuk vanga thih a hreh phahna leh a rilru zawng zawng luahtu i ni a. A veng dawn chiang lutuk che" a ti leh dap dapa. 

"Ka nu boral hma khan engtin nge ka pa-in nupui a nei leh dawn tih kha i hriat theih a? " hre chhuak thutin ka ti a. Min en loin inchung a en vang vanga. 

"Ka nu nen khan hrilh ve ngai loh che kan nei a. A chhan chu i thinrim nasa dawn tih kan hriat vang a ni pakhat a, thil ngaihtuah chiang lo a chet chiam i ching bawk nen khan ka nu khan a vengthawng thin che a. Anihna takah chuan ka nu kha tuarchhel viau lo se chuan nu leh pa kar loah kan seilian ang" lungngai aw tak hian a ti a. Mak ti tak hian ka en a. "Eng nge i sawi awmzia ber?" ka ti ha. "Ka pa ngaihzawng neih nasat zia i hre lo a, kan hrilh bawk lo che a. A officer pui te aia tawngkam thiam, inti lar thiam bawk ania. Mahse,a zin chang pawh khan hmeichhe hruai loin a zin ngai hleinem. Chuvangin a nei leh ngei dawn ka ti ngam anih kha. Mahse, a bialnu ka hriat ve kha nei loin Nu Sangi hi a nei ta erawh mak ka ti viaua" a ti leh duaha. Mak ka ti lutuk hi  a ni ringawt. High school ka kallai atanga hmun dang danga awm kual ka ni a,inchhungkhur ka ngaihven ve tak tak phak ngai lo, ka zirlai ka zawh hnua in a ka awm ngheh ve hnuah pawh ka pain ngaihzawng a nei tih ka hre chuang lo. Mahse, inchhung ka ngaihven loh zia ngaihtuah chuan thilmak a ni lo ve tho. 

"Tunah chuan nangpawn pasal i nei tawha, engmah ngaihtuah hah suh.A ngaihzawng thin pawh chu min zawt mah la ka hrilh dawn lo che. Ka pa pawhin nupui tha tak a nei a, fapa a neih theih hlauh phei chuan a lawmawm zawk. Inhrang atangin keiniin kan va ngaihsak tak tak thei tawh lo va, a khaw har lutuk pawh a lainatawm..Thil kal tawh chu kalliam tir ila, rilru tih nat thar leh pawh a tul lo" a tih leh chuan ka thinthawk tur min khap daih a tum tih ka hai lo. 

Rilru pik tunin ka inentirna tur ka pana, vei nei run a awm ai chuan a msg ka chhiar tih hrilha zawhfiah mai tha ka ti a,dawta min chhan rinna ka nei tho bawka. Eng nge ka tih tur ber ka hre thiam tak tak rih lo. 

"I nuam lo em ni? " Min tih chuan ka en thuaia. Chik tak hian min lo en reng. "Nuam e" ka ti a. A nui a, "I hmel leh i chhanna a inmil lo viau ania. Lo kal teh" a ti zuia. "Eng nge?" che chuang loin ka ti ringawt. Amah zawk a rawn tho a, ka bulah a rawn thu a. "Sawi la, eng nge dik lo awm? " a ti dam leh thlupa. Inhawng taka a awm takah chuan ka buaina hrilh mai a tha ka ti ta. 

"Nizan khan… eng lo ania. Ka awmdan mawi lo iti viau ang. Mahse, anihna takah chuan ka en duh tlata" ka ti bah deuh nuaia, tawng loin a mitmeiin sawi zawm zel turin min ti a. 

"I phone ka pick kha  msg a lo awm a. A lo thawnthu kha X tih ringawt ania. A rawn sawi dan chuan keimah nena inneihna tawp bakah rai hi ininremna a ni lo tih a rawn sawia. Chuan, I career a chhiat vek loh nan keimah hi min chingfel turin a rawn ti che… ka hlau dawn che nge pawh ka inhre tawh lo" ka ti tlang ta pawpa. Ka sawi tak law lawah chuan ka thawl deuh hawk thei bawka. Ka sawi chhung zawng khan a hmel a danglam leh danglam loh ka en renga, danglamna pakhatmah hmuh tur a awm lo va, dik tak chuan a danglam miah loh vang chuan a hriatsa sawi chhuak niin ka inhre nghala. Hlauhna hian min rawn tuam nghal hlup bawk.

"Msg chu ka va hmu lo ve" Danglamna nei miah lo hian a ti a. "Oooo, ka delete ka tih kha. Ka sawi lo em ni? " ka ti nghata. "Ok. I sawi lo aniang. Ka hre lo. Engpawhnise delete lo la tha tur ania. Chutiang msg ka dawnna tur ka hre lo va, chhui zui ngai tur a ni bawk a" ka rin loh takin a ti leh daiha. "I contact list-ah khan X tiin a insave kha" ka ti bung nghata. A awmdan hahdam lutuk chu ka ngei hlur tawh. 

"Chutiang ka hre lo.. " tih pahin a phone a rawn lek langa, a contact list ho a thai chho zela. Mak takin keipawn ka hmu miah lo. 

"Ka hmu sual lo chiang lutuk, I delete aniang" ka ti a. Ka mitah tak min en a, "Delete lo e, delete tur pawhin chutianga save ka nei lo. Chuan, msg i hmu kha ka ringhlel lo che. Mahse, I lo delete kher erawh a pawi ta nih hi" Dam thlup bawk hian a ti leh a. Tan chhan ka nei ta miah lo tih ka hre thiama, mahse lo delete lo pawh ni ila aman a delete tho ang. 

Rawn tawlhnaiin ka chalah a rawn fawpa, "I naupai hi duh lo ila chuan i rai loh nan invenna ka hmang ang, mahse ka hmang ngai lo tih i hria alawm. Chuan, engvang mahni ka fa aiin ka career ka ngai pawimawh lo ang tih hria la, min vau thei turin tu lakah mah engmah ka tisual lo bawk ania. Hahdam deuhin awm rawh" a ti leh a, min kuaha. Engmah ka sawi lo. 

Ka mu meng kara, u Sangzela a muhil tawh thung. Kan thilsawi kha ka ngaihtuah let a, a sawi awlsam thlup nain ka rilru a thawl phah eih lo.  Game khelh tumin phone ka khawiha, game a ka luh chuan Naruto lo online va chu ka hmu nghala, mahse thian han kawm vel moodah ka awm ngang lo. 

Keimahin ka TDM mai maia,chat a msg a rawn awm chuan ka hawng a. Naruto lo ni a. "I va mengrei ve a" a rawn ti a. "Nang pawh " tih ka thawn let a, "ka night a.. " a rawn ti leh thuaia. Ka ngaihtuah naah ani hi chhui tir ila tih a lo awm thut a. Mahse, chhuitir tur ber number ka hria azeng pawh a ni lo va, ani mihrang daih bula ka pasal nena kan inkar sawi ngawt a fuh lo viau tih ka hriaa, mipa rintlak tak a ni tih hre mah ila ho te-ah ka mualpho thei tlat. 

Rinpuia te inneih naa ka kal dawn leh dawn loh min rawn zawt leh a, ka tum thu ka hrilh a, "I perform hun tur ka nghakhlel viau ania" a rawn ti leh a, inkhelh pawh ngaihtuah zui loin thil ho mai mai sawiin kan inbe zui ta reng a. A tawp lamah phei chuan ka lo muthilhsan ta daih. 

"Ka rualin chhuak la" U Sangzela'n min ti a. "Aih, ka kawr lam kual ka ngai dawna. Eee, zanin hi kan hla sak tur vel en nawn zuai kan tum a. Chaw ei nghal an tia" ka sam tawn pahin ka ti a. 

"Ok.. A tha alawm. I fimkhur dawn nia, dawr vela eitur an zawrh ei mai mai lo la" a ti a. Ka naupai tirh atangin hei hi chu ka chhuah dawn apiangin min hrilh ziah a ni bera. Ngaiah ka nei tawh hial. 

A kal hnuah ka insiam zawm a, ka naupai thla hnih vel chauh ala ni bawka, thawmhnawah engmah buaina ka nei rih lo. 

"I chhuak dawn na nge? ' Melo-i ka hmuh veleh ka ti a.

 "Aw, vawiin chu ka thiante inneihna lamah ka kal dawna. I kal tawh dawn mi? " a  ti thuaia. 

"Um, Nu… tlaiah chaw ka ei chhuak dawn ania aw. Rinpuia te inneihna a kan hla sak tur kha uluk deuh hlekin vawiin chu zir ila an tia" Ka nu lo lut mek hnenah ka tih zawm zata. 

"Aw le, aw le.. Mama a lo kal ve dawn nge? " a tih chuan a kal dawn lo tih ka hrilh a. "Anih tak chu. Keini hi i pu te in lamah chaw kan ei phei dawn a, Mama leh Tea chauh chawei tur an awm anih mai chu a. Me-i lah inneihna lama kal a tum bawk si" a ti leh zung zung. "Haw hma deuh theih chuan haw hma ka tum anga" ka ti leh thuaia. "A hmanhmawhthlak hleihnem, in pa te chu buaipui tu tur an tam hi. Mikhual pawh a rawn nei leh maithei ania" a ti awlsam leh mai. Diktak chuan a bial chhung lam mikhual kan nei awl lo va, tukthuan phei hi chu kan chhungkua chauh a ei kan nei meuh lo. 

Dar 1 velah dawr ka chhuahsana, ka kawr thui tir ka va lama. Tlem siamthat ngai a awm avangin ka nghak a, ka haw pahin Melo-i dawrah ka kal kual a, ka tin ka khawih tir a. Amah Melo-i awm lo mah se a nau te hoin an khawih thei vek. 

Ka zawh hnuah ka pa te inah ka kal leh zuaia, u Chhari leh hmeichhe pakhat ka la hmuh ngai loh an lo awm a. U Chhari'n min hmuh chuan a lo ri chul a. Kan naupan deuh lai atanga kan hnen a awm tawh niin, ka nu kha u tak tak enin a en a. Ka nu awm loh hnuah pawh ka pa hian a la chelh ta zel a. Kan in kal chang pawha min lo chiauau tu ber a ni a, ka pain nupui a neih leh takah hian a la awm zel dawn nge ka hre tawh lo. 

"Tu nge a? " Nula lo awm ve kalsawn laiin ka ti sa sa a. 

"U Sangi nau fanu anih kha" a ti deuh nghat. "Khawi ami nge? A lo zin mai mai nge a awm ve dawn? " ka ti leh a. 

"A awm dawn tiin ka hria. Engmah hi ka hre ve vak lo" a ti leh maia. Pangngai taka sawi mah ni se kum tamtak lo inhre tawh kan ni bawka, lungawi lohna a nei tih ka hre thei tho. “Keipawh hi kumin bak chu awm ka tum tawh chiah lo. Ka nauin pasal a nei tawh bawk si a, in lamah ka pa-in enkawl a mamawh ve tawh a” a ti leh a. A nu hi a boral tawha,a u mipa hian nupui neiin an inah a pa te nen an khawsa a, a nau hian pasal ka neih hma lawk khan a nei ve bawka, a hma zawng pawhin a pa enkawl hranpa vak angai si lo va, chuti tehthuta haw a duh takah chuan chhan tha tawktak awm turah ka ngai.

“I awm loh chuan ka pa te an buai duh awm mang e” ka ti a. “Buai vak lo ang. An nupa mai annia, Thani kha a awm ve dawn tawha, nula dang pawh an awm bawka. An buai lo vang” a ti lehzel.

Kan hla zirna tur hmun ka thlen chuan an lo awm kim thap tawha, “ I chet muan sa nak laiin i han rai phei chu i va han muang dawn tak” Rinpuia’n min lo ti nghal hluk hluka.”I phunchiar sia maw..Min khak reng lo teh, Akimi nen inhan innei anga i hre mai ang, Arini lo chet ran zia hi i ti i ti mai ang” ka ti ve thung. Midang an lo nui hak haka. Ani nen hi chuan inhnial reng kan nih avangin midang hian  kan inkhak vel pawh hian thutakah an ngai lem lo.

Rinpuia'n hla thlan sa a nei a, kan han sa ho chhina. Rinai takin sak a nuama, hun rei tak lo zaiho tawh, inman tak tawh kan nih avangin rei pawh kan zir hmain mawi angreng takin kan sa chhuak thei a. Ka tel lo rei ve ta deuh bawka han tih ho leh dal dal chu nuam kan ti ngang mai. 

Chaw kan ei kham atanga rei vak loah min thlah haw a, ka kal dawn khan Driverin min hruai kual vek mah se chaw ei nghal tur ka nih avangin innghah tir reng chi a ni lo va, ka haw tir a. Ka haw duh hunah chuan tu emaw berin min thlah thei mai dawn tho a, min thlah tur an awm remchan loh pawhin taxi a tam tho bawk. 

"Kan la hrilh chiah lo chein ka hria, kan hmalak lehna turah hian Rempuia a tel ve dawna, nikum lam atang khan hming lang si lo a min thlawp tu langsar ni lawisi ania. Midang han rin luh viau hi kan duh lo viau nain kan Police Lal hi chu kan vai hian kan pawm thlap chu anih hi" Aruata'n a ti a. "A tha alawm, amah a rintlak bawka.. Eee, Lily nen an 

inthen tak tak em ni he pa hi? " ka tihzawm zata. 

"Inthen e… an luck dun lutuk a, an inmil lo nihmiang ka timai" Nui huk huk chungin a ti a. Ka mitthlaah Rempuia a lo langa, sang leh pian nalh thlarh mai, hang lam leh hmel pa hrak mai a ni a, a form a inhmeh zia ka la theihnghilh hauh lo. Mizo tlangval hmeltha thlang dawn se thlan zingah a tel kher lo maithei a, mahse mizo tlangval piannalh leh chhe lo thlang dawn se, a langsar ve viau thungin ka ring. Chutiang bawkin Lily pawh tlangval mai ni lo a hmeichhiatpui te pawhin an duh rawn a ni a. An inngaizawng kha inhmeh tak anni ringawt. 

"Lily hi chu a fel ngawt ang. Innei se ka lo tih nen, ka ui e" ka ti vang vanga. 

"Chhiat chu a chhe lo alawm. Mahse, chhe lo tihah hian a zo ve tlat a. Fel pawh a fel bawka. Chutihrual chuan kan Rempuia duhzawng chu hmeichhe nu leh lutuk lam aiin a huna pa deuh hrak thei ang chi a duh" Inti hre chiang fe hian a ti leh a. 

"I van lo hre ril vel em em ' ner khum chungin ka ti a. " Hre ril e, pasal lo nei hman thawt thawt lo la chuan in inngaizawng chiang ngawt ang" a ti leh kher a. "Ka va han awih lo tak" ka ti ve thung.

"Awih mai rawh, mahse pasal nei i ni tawha. Kan Sport minister lar zet hian nupui a nei fuh ti ila a tawk mai e. A nupui vanga heti khawpa lar thei a ni tih hi a inhre em ang chu" a ti leh zuah zuaha. "Nang hi eng nge i hriat a? I va han tawngthei em em. I inhnem viau em ni a? " Ka ti hlar mai. 

"Awihawm loh, sip hnih bak a ni lo" Rang fe hian a ti a. Awih lo lutukin ka lo tlak karh thung. 

Leng turin ka sawm a, a rawn lut kawi ve maia. U Sangzela'n chaw a lo ei fel deuh chiah a.Ka nu te leh Melo-i an lo la haw lo thung. U Sangzela leh Aruata an inbe nghal luam. Ka thiante ho tan hian han kawm viau tur chuan a upa tawh deuh a, anihna nen an landanah ringawt pawh an inpuitlin hleih viau bawk. Mahse, ka pasal anihna leh anni ka thiante an lo ni nen inhmuh chang hi chuan an titi ve hluai thin tho. 

"Ka kal mai dawn, kal kualna tur ka la nei si, ka tlai lutuk ang" Dinchhuah pahin a ti a. 

"Um, nia.. Chuti nih chuan kal rawh' ka ti a. Pawn lamah kan inzui chhuaka, " Zanin chu inkhel ila" Kal pahin a ti a. "Eng inkhelh maw? " U Sangzela'n a ti thuaia. "Pubg mai mai anih kha a sawi" ka lo ti thuaia. "Ka khel khat lutuk" Ka tihzawm leh zat. 

"Lutuk a che, nizanah pawh i online reng kha. Duo khan inding dun renga, start bawk si lo. Rempuia mi i dinpui kha? " a ti leh duaha. 

"Ni mai mai lo, ka lo mutthlu a, ka lo ding tlaivar anih kha" ka ti vata. U Sangzela'n pubg ka khel thin tih a hria em ka hre lo. Ka khelh hian a muthilh hnuah a ni tlangpui. 

"In tifai la" room a kan awm hnuah a ti a."um, intleuh zuai ka duh. Ka thlan ban chuap maiin ka hria " ka ti ve mai. Khumah thu mu chungin phone a khawiha, " I chau em? " ka ti leh hnuhnawha. "Aih" a ti liam puat. Hawi pawh a rawn hawichhuak lo.

Intifai turin bathroomah ka lut a, ka chhuah leh veleh "Naruto in a rawn call che" a lo ti nghala. Ka phone ka en chuan msg a lo awm vanga. "Lut ila" a rawn ti lek chu niin.. Ka nui nghal hak mai. 

"Tu nge a? " a rawn ti leh a. "Tu? " ka ti let ha. "Naruto" a ti leh ringawt. "Rempuia anih hi. Game-ah hian Naruto tiin a indaha, koh nan ka hmang laklawh a" ka ti a. "In inkhel dun thin animaw? " a ti leh a. "Um, midang kan khelhpui ngai vak lo. Kan thianho kan awm kim chuan kan khel ho mai zela. Kan khel ho thanga, a nuam bika" ka ti a. Ka pasal neih hnuah hian ka nuam tih zawng ber pakhat atangin ka inhnukdawk a, mi dang tanpuina kawngah pawh ke ka pen tlem sawt bawk. Diktak chuan pasal nei ka ni tawha, nula anga duh lam lama thle thei ka ni tawh lo. Ka pasal felin min hre thiam em em thin mah se, nupui dinhmun han luah takah chuan nuam ka tih thin kha nuam ka tih vang ngawta tih zel a lo rem lem lo va, mipa tan engmah han danglam viauna tur a awm loh laiin,hmeichhia hi chu damchhunga insiamrem tur kan ni emawni tihmai tur a ni. 

Rinpuia te inneih ni a lo thlenga, u Sangzela pawn hun a lo insiam ve thei ta ngei. Inkhawm naah pawh kan kal dun a, ka beisei loh lutukin kan nupaa thla min lakpui duh an lo awm nual maia. A then amah chauha lakpui duh an awm bawk. Rinpuia pa te party leh u Sangzela te party hi a inang lehzel a, inneih inkhawm zawh lamah phei chuan party lam mi leh sa kal ho nen an thu ho a, ka thiante nena zai tur kan nih avangin keipawh ka thiante bulah ka awm ve bawk. Ka rin loh takin Aruata leh Thomas-an an bialnu te an rawn hruai a, Aruata bialnu phei chu ka vawikhat hmuhna chauh a la ni. 

"Ka hmuh chak ka hmu ta alawm' kan thutnaa ka let leh chuan Rempuia'n a lo ti supa. " Kan zai tha em? " ka ti ve thung. 

"Tha lutuk, I hmuhnawm' Nui chungin a ti a. " Mipui hmaah ka ding khat deuh ta a ni ang, ka zam viau mai" ka ti hap. 

Join reception kan hman zawhah chaw ei na hun in a zawm nghala, zan lamah party pui tham tak a la awm leh dawna, kan band erawh kan perform tawh dawn lo thung.

"Rempui" U Sangzela'n a ti a. A hawina lam ka hawi vata, ka hnungah a lo ding reng chu niin. 

"Sir, I tha em? " Rempuia'n a ti thuaia. An inchibai leh riha, tun hi ka hriat laia an inhmuh na hmasa ber a ni a. Sawrkar hnathawk anih angin atan chuan u Sangzela hi a thiannu pasal a ni ringawt thei lo. 

"Kan nu hi chu i hriat kha.. In lo Inkawm thin tih ka lo hre lawk lo va' u Sangzela'n a ti leha. " Ani hi chu kan thianho chuan kan Boss ania lawm' nui chungin Rempuia'n a ti a. U Sangzela pawh amah ang lo takin a nui ve huk huka. An ding dun chu ka melh zauha. An San zawng a inchen vel viau. U Sangzela a ngo zawka, tlemin a thau deuh bawk. U Sangzela'n suit pawl tak a hak laiin Rempuia'n blazer uk leh kekawr off white lek lek a ha ve thunga. An thawmhnaw hak an inhmeh ve ve rualin Rempuia a langsar mah zawk. A hnain a zir bawka, a pian a fit thain a dik vel thlup mai. 

Zan lam party naa telpui loin dar 7 velah kan haw sana. Holliday a ni bawka, u Sangzela pawh a nileng ve thak theia. Holliday anih pawh hian inleng a neih loh leh a bialchhung khaw thenkhat tlawhna hunah a hman duh thin avangin hunawl a nei meuh thin lo. 

"Mama, Me-i a nuam lo riau maia. Damdawiinah kan tlan mai dawn em ni? " ka nuin in kan luh rual rualin a lo ti a. 

"Chutia law? Engtin nge a awm a? " keimah zawkin ka ti thuaia. A pum lam problem anih thu a sawia. Kan inbiak laiin Nana-in ka nu a rawn ko a. Hmanhmawh takin Me-i room kan pan nghal diala, a awm dawmin a lo bungbu titiha, a pum lam ka nuin a tih laiin pumna ai chuan thaw hah a ang mah zawk. Ka nuin engtin nge a awm a zawt a, chhang loin a awm ngaiin a awm a. "Mama, Damdawiin lamah i kal teh ang u" ka nuin a ti a. A awmdan ka en chuan keipawn damdawiin kal tha ka lo ti ve bawk. Mahse, u Sangzela'n "a zia leh mai ang" a ti deuh tlat pek. 

"Nu, ka thaw thei lo" Thei leh thei lo hian a rawn ti a. Kan kal dawn nge dawn lo tih lam a ni tawh lo. Hmanhmawh takin kan chhuak ta rum rum. 

Min lo admit a, ka nu-in a riahpui a, a natchhan erawh investigation an tih hma chuan an hre thei rih lo. 

"U Arin, thingpui i duh em? " Nana-in min hmuh veleh a lo ti vata. Nizan lamah kan phibuai deuh bawka, nidang ang lo takin u Sangzela a la tho lo ve tlat. Ka pa erawh chu Damdawiin lamah a lo kal daih tawh thung. 

"A lawmawm ngawt ang" ka ti a. Thingpui leh a hmeh tur min rawn chhawpsak pahin Me-i awmdan min zawt a. 

"Tiang hi chuan a awm zeuh zeuh alawm" a tih chuan ka en ha. 

"Asthma a nei tihna mi? Tumah hian an sawi ngai si lo va" ka ti a. Nana-i hi kum 21 vel bawr, ka nu chhungte thingtlang lam mi a ni a. Hlawh neia awm ni loin college kal lai a ni a, a kalna an tumsak vek a. Inchhungah a class kal loh ni leh zing karah chuan nula dang a pui ve thina, a changin Melo-in dawr lamah te a hruai ve thin bawka. An chawlh lai pawhin an khaw lamah a haw ngai meuh lo. 

"Asthma chiah pawh a ni lo maithei.. Ka hre chiang bik lo. Ka awm hnuah zana damdawiin kal an nei fo alawm. I lo awm hnuah chuan tun hi an kal vawikhatna niin ka hria" a ti leh mai. Kei aia awm hmasa zawk niin chhungkaw ho mizia pawh kei aiin a hre chiang zawka. Mahse, lo zawh vel chiam erawh ka tum zui lo. 

Room-a ka chhoh chuan u Sangzela a lo inphihfai mek a. "Damdawiin lam chanchin thar a awm em? " ka ti nghala. "Groupah khan an sawi loh chuan ka hre miah lo" a ti liam mai. 

"A awmdan kha asthma a ang ka ti deuh a, asthma a nei sa em? 'khum siam pahin ka ti leh a. 

'Neih sa pawh ka hre nang. A pum chhiat vang aniang" awlsam tak hian a ti leh mai. Nanai'n thawhah vanga damdawiin an kal fo thu a sawi laia, thawhah a neih a hriat loh thu a sawi leh si chu a dik lo deuh huin ka hria a, mahse engmah ka zawt zui ta chuang lo. 

Chawhnu lamah damdawiin atangin an rawn chhuaka, an rawn haw hnu lawkah u Sangzela te cousin, Rilru lam Doctor tha tak a rawn leng a, Me-i kan tura lo kal a lo ni a. Pa fel leh hlim thei tak a ni bawka, kei pawn ka hmuhtirh phat atanga ka lo nel tawh sa a ni a, damlo rawn tlawh e ti loin kan ri hlut mai. 

Ka inbual zawhin inchunga thut mai mai tumin ka chho a, ka nu leh Sangtei an lo awm a. Va pawh ve mai ka tum lai takin an thilsawi chuan ka beng a verh zak mai. Kawngkhar phenah ka ding nghal hmak. 

"Anxiety mai pawh a ni tawh lo, depression nen tun tum chu a bei deuh niin i u Hriata khan a sawia. I u-in huan lamah awm rih mai se a tia. Engtin nge maw kan tih dawn ni? " ka nuin a tih ri ka hre thei a. "A buaithlak e ka ti. A zia viau tawh emaw ka tia, ka lo lawm hman nen. Amah a inti na em? " Sangtei'n a ti ve thunga. 

"Na lo ve, damdawiin a min dah hnuah i u in a room a intihnat theihna ho a lo thiarchhuak vek a. Arini ber mai hi ka ngaihtuah" ka nuin a tih takah chuan ka inhumruha. 

"Keipawh chu tak chu ka lo ngaihtuah a, u Dpi ka hre chhuak nghal zawk a" zawi angreng takin Sangtei'n a tih chuan a awmzia hre chiah lo mah ila Melo-in rilru lam chian lohna a nei tih erawh ka hre thiam thung. 

"A buai zual hi chuan mihrang a ngaithei lo tlat zela. I u hian Arini a buaipui si, hetianga amah aia duat zawk kan nei anga a hriat hian a buai niin ka hre tlat tawh" Ka nu-in a tih leh chuan ka mengzau kawk mai. 

U Sangzela roomah a rawn luta, light a on nghal a. Min hmu thut chu a phu ve deuh in ka hria. 

"Ti nge i va awm thim ve? " a ti a. Chhang loin ka en reng. 

"I nuam lo mi? " Ngaihthat hmel vak lo hian a ti leh a, a rawn kal hnaia, ka chalah a rawn khawiha. 

"Nuam e.. Ka lo muthlu a, I chau em? " ka tih zawm a. Ka mutthluk loh zia leh dawt ka sawi chian zia chu a inang reng. 

"Chau lo e.. I tha tak tak maw? " a ti leh a. "Tha" ka ti rang vat Ka tho chhuak chu min en zui reng tih hre mah ila ka ngaipawimawh lem lo. Meloi natna a zep pui leh keimah vanga ka nu leh Sangtei an rilru a nawm loh laia normal taka a awm chuan min ti thinrim ve tlat. 

Karkhat vel zet chu room atangin Melo-i a rawn chhuak miah lo va. Ka nu-in a mutthat theih loh vanga chimbuai loh a that thu a sawi avangin ka nu bak a roomah kan lut lo. Ka lung a awi lo teh nain u Sangzela engmah ka hrilh lo va, ka awmdanah ka lungawi lohna ka tilang hek lo. AMC inthlan a hnaih chhoh tawh avangin a buai zual em em a. Chaw kan ei rual meuh lo va, a lo hawin ka lo muhil hman tawh thin bawk. 

Hna pawimawhah lang turin u Sangzela zing hma takah a chhuak tawha, a kal dawnah ka harh reng nain ka muhil der tlat. Hnaa a buai chu thuhran, a hmaa kan nupa kar boruak fel lo deuh awm ang khan kan awm leh tlat tawha. Inhauh leh inhnial chiam chiam awm lo mah se kan inpawh lo a ni tawp mai. A inlahrang deuh tlat zela, tha takin min be tho mah se dik lo awm ka hre thei tho. Ka rai tirha hlim leh phili ruai si kha tunah chuan in entir ka ngaih leh ngaih loh pawh min zawt ngai tawh lo va, eitur thlenga fimkhur tura min chah reng thin tu khan ka rai vangin eitur huat zawng ka nei em tih pawh a ngaihven lo, a hna chauh a ngaihven a, mi zinga hlim der chungin room chhungah erawh khawvel hran hlak a din leh tan mek bawk. 

Inhnuaiah ka chhuk thlaa, ka rin loh lutukin Melo-i a lo awm a, min hmuh veleh min lo be nghal chul mai. A hmel en pawhin a dam tha tawh tih a hriat maia, tlemin a cher deuh tih lohah chuan a damloh hma nen engmah danglamna a nei leh tawh lo. 

"I zia deuh tawh em? " ka ti ve thuai a. 

"Zia lutuk, tukin chu ka tho fuh tawpa. Mama zin tur pawh ka thlah hman thlap alawm" nui hak hak chungin a ti a. "A tihzia nasat chu. Ka mu nasa lutuka, a kal lai pawh ka hre lo reng reng " ka tih chuan a nui leh var var. 

Dawrah ka awm nileng a, zan lama bungraw rawn thleng a awm nual avangin ka enfel a, midang pathum lai hnathawk nei mah ila bungrua stock awm hi chi keimah ngeiin chinfel ka duh deuh ziah. 

Haw hun hma deuh atangin ka pum a na riai riai renga, ka Doctor ka biaa, appointment kan siam sa lo nain hmu turin min rawn ti a. Hmanhmawh angreng takin ka chhuaka, Rempuia nen kan intawk hlawl. 

"I haw tawh dawn mi? " zangkhai vuh hian a ti a. Uniform ha lo in kekawr bul leh T-shirt a ha a, Running shoe a bun bawk. 

"Aw, Doctor ka hmu dawna. Ka haw hma anih hi" ka ti tha ve mai. "Anih chu, inchung lam khi en kual zuai ka tum a" a ti leh a. Kan luah lai chung hi sak lai mek a la ni a, midang luahtir loin amah Rempuia hian Gym atan hman a tum bawk.

Ka Doctor hmuh tur clinic ka thlen chuan en lai mek a lo nei a. Ka inziah lawk si loh avangin midang awm loh hnu a luh mai ka tum a. Ka rin loh takin u Hriata ka hmu nawlh mai. 

"I in check-up a hun em ni? ' Ka bula rawn thut ve pahin a rawn ti a. " Aw, enge i tih ve? " ka ti thuai. An nu a kalpui a lo ni a. Ani hi rilru kam Doctor tha tak ni mah se ama pualin clinic ala nei lo va, Sawrkar hnuaiah a nghetin a thawk thung.

"Me-i chu a zia zel maw? 'a ti leh a. " Aw, zia zel e. Tukin phei chu a rawn tho chhuaka, dam lo pawh a ang tawh lo' nui chungin ka ti a. 

"A lawmawm nasat chu. Rilru lam harsatna tawk hi chuan duat hi an mamawh khawpa. A tha zel mai ang" tha takin a ti leh a. Tawng loin ka bu nghat ringawt. 

"Nangman buaina i nei em? " a ti leh thuta.

"Keiman maw? " Hrethiam lo angreng takin ka ti ha mai. 

"Um.. Ka sawi awmzia chu Melo-in a tibuai che em? " Zawi angreng tak hian a ti a. 

"Aih, tibuai lo ee" ka ti thuai. 

"A lawmawm nasat chu.. Ka zawh chhan tak zawk che chu Dpi kha a ngaithei tlat lo a. A tibuai nasa thina, Dpi kha a mangang thin khawp mai. A natna hi rilru lam anih avangin amah a pawimawh a, hneh pawh a tum bawk a, a dam hlen dawn anih hi ka lo ti hmana, mahse beisei loh taka a natna a rawn lan leh takah chuan ka ngaihtuah deuh mai mai che mawle..Amah hlauh tur a ni lo va, a natna vang tih hriatthiam saka, dimdawi taka enkawl a tul a' inthiam lo hmel tak hian a ti a. Min tibuai lo tih nui chungin sawi mah ila ka chhungrilah erawh nuam tih loh na a awm a. Ka nu leh Sangtei sawi ruk kha hre lo phei ila chuan nuam lo ti ringawt loin ka mangang viau ta ve ang. 

Ka luh a hun chuan min han check zung zunga, engmah hlauhthawn tur a awm lo tih min hrilh chuan ka thaw huai mai. 

Dar 9 velah u Sangzela a rawn thlenga, a inbual laiin ngaihtuah na thar ka nei thuta, a phone charge lai ka pan nghala. WhatsApp msg ka en nghal zung zunga, engmah msg tha lo ka hmu lo. Mahse, msg pangngai ka en leh chuan ka thaw kawk mai. Rang takin a number ka copy  hnuah a dah dan ngaiin ka dah leh thlapa. 

"He number neitu hi min lo chhuisak aw.. Mahse, a rukin" Tiin Rempuia ka thawn nghal hmak bawk. 

Note : Ni 2 deuhthaw power supply kan hmu mumal lo va, nizan khan ka ziahna khawl a thi vek maia. Chuvangin ka rawn dah thei ta lo anih kha.. Tin, sunday zan ka chawl thin a, ka la chawl zel dawn e.