Naruto - 6

 Then - 6na

"I u in nau a vei a, damdawiin lam an pan mek aw" Nu Sangi'n a rawn ti a. An kalna tur damdawiin ka hre sa tho chungin ka zawt a, a rawn sawi pahin ka pa nen damdawiin lam an pan mek thu a sawi tel leh bawk. Ka u-in ka pa ngaihzawng neih ruk char char thu min hrilh atang khan ka pa lakah hian ka hel rilru tana, mahse nu Sangi erawh a bialnu nghet kha ni loin sawi rem chawpa a neih mai a ni bawka, huatna ka nei zui lem lo. Min tihluak lo chungin a theih ang anga nu nih tlin a tum ve tih ka hai lo va. Biak pawh kan inbe chhe lem lo. Mahse, in a chenpuitu ber u Chhari'n a mil mang lo tih ka hriat tawh avangin eng emaw dik lo deuh chu a awm tih ka manthiam tho. Kei niin ral atangin fel ti mah ila inchenchilh hi chuan a dan a dang viau zel tlat. 

"Ka u in nau a vei an rawn tia, kal ka duh a" U Sangzela lo lut chiah hnenah ka lo ti a. Ka pheikhawk bun tur ka la chhuak a. 

"Ka lo kal ve ang" a ti bung deuh hmuka. "Ngai chuang hleinem, mipa tan tih tur a awm lo vang" ka ti awlsam mai. 

"Mahni a teichhuah hi nuam ti viau lo teh" Ka rin loh takin a ti ta daih. Ka hawi let a, a awki-ah fiamthu a ni lo tih hre reng mah ila a fiamthu hmel a lan leh lan loh ka en talha, fiamthu hmel a lang lo chiang viau. 

"Nuam ka tih viau pawh ka hre hleinem, mahni nupui te nau vei pawh ni lo chu tihtur a vang ang ka ti mai alawm. Eng nge maw i ngaihkawih tlat le? " ka ti hlaka. 

"I sawi thui mang e" a ti bul leh hmuka. "Sawi thui lam anih loh chu, I rilru amak em alawm" lungawi lo takin ka ti ve thung. "Rilru mak lam a ni lo, mahni a chhuah a, teihawi vel nuam iti ka timai alawm" a la ti lehzel. 

"Dawrah leh inentir tur bakin ka chhuak em ni? Chhuak dun ziah tur pawhin i inthlang tur buaina bak enge i ngaihven a? " ka ti leh hmak hmaka. "Ka inthlang tur bik ni loin AMC inthlan ania" Ngeiawm angreng tak hian a tih chuan ka ngawi mai thei bik lo. 

"I ta bik emaw ka lo tia sin" ka ti ve salha."Ram siamtha tur hian mimal kan pawimawh ber, chutihrual chuan mimal aiin pawl a kan insiam hian kan chak zawk bawka" a ti leh a. A sawi dik reng, mahse ka ngei laklawh tawh. 

"Pu Modia ang hian nupui nei loin awm law law la tha tur ania. Ram i vei aia nasa zawka vei tur nupui i nei hi a pawi a ni. Ram aiin i vei chuang der si lo" ka ti ve leh ta duah. 

"I tawng thei em mai. Mi pawh an rai vek, tuman keh thei dawma dawm an phut lo" Awki sang chuang miah lo hian a ti leh a. Min ti thinrim zual ta. 

"Kehthei dawm in min dawm em ni? Keh thei chu sawi loh bur chhia ang velin anih hi min enkawl. IG vela ka thlalak post ringawt thin lo hian min duat tak tak ta che. Nupui lehzel politics lama lan mawi nan hman i tum anih hi" ka ti ta nek. Pasal ka neih tak avanga ka lo nem beh luih tlat thin, Chhungrila mize kawlh inphum a kaitho a ni ber. 

"Engtin maw i tih a? " Min rawn pan hnai chungin a ti a. A hre lo tak tak pawh ni loin ka tawngkam a la na tih ka hria. 

"Ka sawi nawn peih lo. Ka chhuak dawn" ka ti nghat. Bag ka la chhuak tur ka banrekah a rawn man a. Na lutuk hian a hmet a, ka 'awi-ah" thawt mai. 

"I nulat lai ang mai maia khawsa ila tum hi bansan ang che. Pasal nei tawh i nia, chu pawh mi mai mai nupui i ni lo" thinrim sehchilh rawp rawp hian a ti a. Ka kut a hmerna em em bawk. Mahse, ka thinrim a kal tluang laklawh a, pawisak ka nei tawh bik lo. 

"Mi mai mai ni la ka duh fe che. A thuhrimah Minister i nihna hi i chhuang em ni? Ka ngaisang lo che" ka ti leh hmiah.  Ka kut a hmerna phelhsak ka tuma, hmeh tliah a tum emawni tihmai tur hian a hmer na ngang mai.

"Minister i ngaisang lo anih pawhin i pa chuan a ngaisang ania. Nih loh hlau tak a ni" a ti leh daih. Ka ban a hmerna a lasawn a, ka tuai nghal nauh nauha, ka vun hi a ngo bakah ho mai maiah ka duk awlsam em em a, tunah pawh khan min hmer na bawka ka banrek a sen tut thei. 

"Ka pa sawi tel suh, ani kan sawi lo" Ka ti bak leh taka. "I sawi lo va keiin ka sawi. I tawngthei zit zet si, I nasa lutuk" a ti leh hmuk hmuka. Chhan let dan tur ka ngaihtuah laiin ka phone a rawn ri a. Ka en chuan nu Sangi bawk a lo ni a. Pick loin ka bagah ka nawr lut a. U Sangzela chhan leh lam pawh ka rilruah a awm ta chiah lo. Mahse chhungrilah ka thin a rim tet tet a, han insualpui ngawt dawn ila insual em turin chet a la si lo, dressing table a thil inrem tlar dul chu hnawlthlak rum rum ka duh ut ut, inhnuai lamah midang an awm reng a, tihchi a ni leh bawk si lo, pawhfan awm se na deuh deuhin pawt fan pawp pawp ila a nuam berin ka ring ta. 

Ka kalchhuak tur ka pa-in min lo biaa. Ka rin loh takin gate bulah motor a lo dinga, u Sangzela driver seat-ah a lo thu a. A chhuahna tur zawh ka tum lo. Driver dang koh tumin inhnuaiah ka chhukthlaa, Hminga lo chho tur nen kan intawka, "Damdawiinah min va dah lawk mai teh a"  ka ti nghala. "Pu khan inchhuak dun dawn a ti sia. A kal ve leh dawn si lo mi? " a ti hu. Hmun danga kal tur ni loin min lo nghak lek anih kha a. Han duh loh vel lah a tihchi der si lo. 

Damdawiin kan panna kawng tluanin vawikhatmah kan inbe lo. Mahse, damdawiin kan thlen hnuah erawh a tihdan ngai te tein makpa tha ber a ni leh hmak tawh thung.

Chawhma lama vei tan kha chawhnu lam dar 3ah a nei ta a. Fapa a nei a, u Jimmy-a hlim lutuk a ang phuang thei.

"I mak e, phili chuk lo khan keimah te hi min ngaihtuah ve la" ka u in a tih chuan kan nui dar dar mai. 

"Tei nge keimah zawk riak ang?" Nu Sangi'n a tih chuan u Jimmy-a nuin, "keimah hi ka riak ang chu ka tia. Mama hian riah a tum bawka. Tei hi chu a rai no nen, riak lo mai se. An pa in a phal lo ang" Fiamthu titak deuh si hian a lo ti a. "Ka riak thei tho alawm" U Sangzela pawh rawn lem loin ka ti thuai. "Duh leh naktuk zan lamah rawn riak zawk la. Zanin chu ka lo riak ange" u Jimmy-a nuin a tih leh chuan hnial tlat pawh ka tum chuang lo.

"Tei chu riak lo ang, a zei dawn lo em mai. Ka nu a awm chuan a tawk" Ka u in a rawn ti ve bawk. Duhthlang dawn se chuan ka riahpui a duh ka ringa, mahse mi inthlahrung chi tih takah keimahni lamin buaipui viau a duh dawn lo tih ka hre thiam vek tho. 

Dar 5 velah kan haw sana, midang zinga nelawm em em si kha a ka an thui pinsak emaw tihmai tur a ni leh tawha. Keipawn biak tumna ka nei chuang lo. 

Ka nuin chanchin min lo zawt thuaia, u Sangzela erawh roomah a chho tlang a. Chho ve lawk loin inhnuai lamah ka thu lui deuh renga. A rawn chhuk leh mai dawn emaw ka tih laiin a rawn chhuk ta mai lo. 

"Mama pawh chu a lo chhuk leh mai dawn emaw ka tia. I pa-in a be duh asin mawle" Ka nuin a tih takah chuan, " Ka han chho ange. Ka rawn chhuk tir dawn nia" ka ti a. "Nia, lo chhuk lawk teh se" a ti leh a. 

Room a ka luh chuan phone a lo hmang meka, mi pawimawh bik a biak changa a tawngdan zangkhai tak a hman avangin a biak lai mek a pawimawh tih ka hre thiam mai. Ka lut thawm chu hreawm pawha awm loin a awmdan ngai rengin a awm a. Ka inthlak fel hnuah pawh a la biak reng avangin "ka pa-in a be duh che ania" ka ti a, chhan pawh min chhan hmain ka chhuahsan leh daih. 

"A lo chhuk dawn em? " Ka nuin a lo ti nghal a. "Phone a hmang meka, hrilh chu ka hrilh a" ka ti liam mai. Chokaah ka lut pheia, eirawng bawlin an lo buai laih laiha, zanriah hi kan ei hma lutuk ngai loh avangin tun ang huna eirawng an la bawl pawh a mak lem lo. 

Choka atanga ka chhuah leh chuan ka pa leh u Sangzela an lo thuduna, "Khawih zawm dawn chuan tihngai a awm nual ang. Kum khat zen zawn kan khawih tawh si lo va. Karthar lamah ka lo va en ange. Floor khat chauh em ni kan khawih rih mai ang" ka pain a lo ti mek a. 

"Ni rih phawt rawh se, kan insawn theih veleh kan insawn phei anga" U Sangzela'n a tih chuan a in lamah insawn a tum hnai tih ka hre thiam maia. Dpi nen an inneih lai khan an nupa in tur an sa a, mahse an sak laklawh laiin Dpi a boral tak avang khan an sak zawm ta lo vang vanga. Tunah khawih zawm leh a tum tih ka hre thiam. 

Ka pa nen bungraw mamawh tur vel an sawi zawm laiin roomah ka chho a, fapa upa zawk niin Atea hian nupui neih a tum hnai ve a. Keini chu mizo mi nawlpui ngaih danah chhuak tur zawk kan ni a. Mahse, inrawn derna pawh awm thin lo lai hian min ti tlawmngai thin. 

Melo-i kan roomah a rawn lut a, "khawnge Jacket chu? " a rawn ti lut lang langa. 

"Ka closet-ah khan a awm ang. Lo en mai rawh" ka ti a. Balbawma thawmhnaw awm ka lachhuak a, ka check pah a. 

"Ka ha tawk chiah anih hi. I duhthu a sam loh chuan ka lo lei chhawng ang" a ti a. Nalh inti fe hian a inthlek a. "I birthday a hnai tawh tho a, kha kha ka present mai ang che. I duhzawng anih tho chuan.. " ka tih chuan lawm tak hian a nuia. "Duh lutuk ringawt. Tiang hi ka duh chi ania" a ti leh thuai. 

"Engtikah nge insawn phei chu intih a? " a ti leha. "Khawiah maw? " ka ti ha. 

"Oooo, in thar lamah bak khawiah nge ni ang? Khawih theih ang ang khawiha insawn phei intum a ni lawm ni? " a ti leh a. 

"Engmah ka hre ve hleinem. Khawih zawm a tum tih pawh ka hre lo' Ka ti nghat. " Chuti maw? Ka nu khan a sawi vek sia. Naaaa, Mama hi chu a buaithlak tlat zela. Tawngduh loh leh lutuk pawh hi a ni ber lo" a ti ta hlak hlak. 

"A duh naah chuan a tawngteuh tho alawm. Politics chungchang nise a ngawi mai mai awm lo em mai" ka ti leh hlara. 

"Ni chiah mai. Politics hi a atchilh anih ber hi a. U Dpi pawh kha a phun nasa thin alawm" a ti lehzela. U Hriata thil min hrilh ka ngaihtuah chhuak zawk maia, mahse atthlak deuha sawi ngawt ka tum lo. 

"Enteh, I u hi chu ka ngei thin alawm. Mi bula rel phei chu ka duh miah lo a, ka chhungte bulah phei chuan rel duh lo tak ka ni. Achhan chu ka pasal anih angin nakin lawkah ka lungawi leh mai anga, ka chhungte chuan an ngei char char dawn thunga. Chuvangin ka rel duh lo. Mahse, vawiin chu i bulah ka ang dawn. Nang chuan i u ania, sawisel mah la kei ai mahin i hmangaih zawk a, I haw zui dawn lo' Ka ti hmasa duah. 

"Aaa, nangpawh hi ka nu ang tho tur i ni. Ka nu pawn ka pa hi a rel vaka, sawisel chuan a tan lehzel" Nui hak hak pahin a ti a. Ka nui ve hak.. 

"Tak takin sawi la, sawi fo nuam ka ti lo nain, u Dpi pawh kha a phun val zel ka tih chu" a ti leh a. 

"Um… phun loh a har ve alawm. Achang phei hi chuan ka pasal pawh hi a ang thin lo. A luhlul em em a, thu a duh bawk si. Min biak mang loh ni te hi a ngah ania. Thil han hrilh ila a hre reng emaw ka tih hi a lo hre miah lo a' Ka ti hlak hlaka. 

" Enge chutianga a awm vel a? Hawsan daih chhin teh ka ti.. Zan khat pawh amahin a riak tluan thei awm tawp si lo" Min thinrimpui tak hian a ti a. " Aaa, chutia hawsan lam pawh a ni chuang lo' Ka tih lai mekin a lo nui a. "Khatiang kha i nia. Hawsan sawi hlek pawn khatiang lam a ni lo i ti nghal a" Nui vak vak chungin a ti a. 

"Enteh, Dpi nen khan kan mizia a inang awm lo ka tia. Dpi nau pawh hi a hmeichhia tawpa, an nu ka timai. Keilah pa ve theng thawng chi ka lo ni sia. Achang hi chuan u Sangzela pawh hi ka khawngaih thut zel'  ka ti leh a. Hetianga zawi muanga Dpi nen an inkar hriat hi ka tum dan a ni tlat. 

"Um, nia.. An unau hi an hmeichhia tawp.Fel pawh an fel, mahse maw.. An mizia a mak lutuk.. An fel dan an phakar ka ti dawn nge ni.. Ka sawi thiam chiah lo" ka ti ta chat. 

"Chuti law? " Ngaihven awm lo tak hian ka ti leh zela. "Fel leh fing phakar animai. Hei tunah nang nen chuan kan inkawm bawrh bawrh a, I lungawi lohna pawh i sawi mai a. U Dpi pawh khan a sawi tho nangin hetianga keima bula sawi ni lo hian langsar takin a phun thin ka timai. Ka pa em chuan a hre lo maithei. Bakah, keimah tawp hi min mil lo lutuk alawm. A fing em a, a tilang lo mai mai" a ti leh duaha. Ka duh ka hmu tan dawn niin ka hria a, mahse ngaihven nih ka duh lo va, tihtawp hun a ni tih ka hai lo. 

"Awi, I u in a hriat chuan min ngei ngawt ang. Ani chanchin daih lo sawi chu a" Inthiam lo tak tak miah lo hian ka ti a. "Ngei awm lo che e. Kan sawi khat em mai.. Thawmhnaw kha i su dawn mi? ' a tihzawm zata. 

" Um, kan thuai zuai ang. Duh leh chawei kham lamah ka tleuh anga" ka ti a. " Thil ka hrilh che anga, thinrim miah suh.. Hman atanga ka hriat dan che khan pa ve deuh theng thawng tak mai kha i nia. Mama nen in han inngaizawng phei kha chu mak kan lo ti tawpa. Mahse, in han innei a. I mizia i thlak ta vek sia. I inhmeh lo tawp, Mama lah i enkawl zo mai si" nui chungin a ti siam siama. Naupanlai atanga min hre tu a ni bawka, mak a ti hi ka dem lo. 

"A chang chuan khatiang a awm leh kha ka chak thin alawm. Bike chak deuh deuhin khalh ila, thiante ho nen hla zirin ri leh bur bur ila ka ti thin. Mahse, minister nupui te ka ni ve em em a, khatiang khan han ti vaih ila chuan i u hi an bei nasa dawn lutuk ta ni" nui chungin ka ti ve a. "Mizo hian politics hi kan man lo alawm. Mimal inbeih vak kan chinga, dawt lah thutak sawiin kan sawi hreh bawk si lo. Politician annih chuan dawtsawi hmang leh eiruk hreh lo angah kan ngai tawp zela. Kan ngaihdan hi a fuh lo ngawt mai" a ti nang nanga. 

"Nia, mahse mi dik hi an vang ta em a ni" ka tih chuan, "Mama hi chu dik ka ti ve thlawt, ka u a ni nangin ka ngaisang" a ti a. A awmdanah chuan a ngaisang takzet tih hai rual a ni lo. 

Ni a liam leh hnuah pawh engmah min la sawipui ta chuang lo fo va. Hre deuh nual tawh mah ila zawhfiah ka tum bik chuang eih lo. Atea nupui neih ni tur an tifel tawha. Inbuatsaihna kal mek tawh mah se u Sangzela in lam an sak zawm pawh an khawih zui zel tho. Minister pawh lo ni lo tehreng se u Sangzela hi eizawnaa buai tur a ni lo hrim hrim a. Ka pa hna hi a kutah a awm zui dawn tih ka hai lo. 

Dawr a ka awm laiin Chhana'n min rawn call a. "Chhingchhip lama kan thiltihtur kha Dine out pahin sawi zawm ila" a rawn ti a. 

"Engtikah? " Ka tih chuan "Zanin animai lawm.. " Awlsam tak hian a rawn ti leh maia. "Hey, Ek-a.. Mi nupui ka nih ve tawh hi aw. Chutia sawi lawk hlei lo va duh hun hun a chawei chhuak thei ka ni ngawt lo' ka ti hlak. " Ninawm. Nge maw pasal i lo neih thawt thawt ni? " Lungawi lo aw hian a ti hmuka. "I a si, lo rel ula, inrel ang ang kha groupah lo post tawp mai ru" ka ti a. "Nimai, thurualpui i harsa sawt lutuk hi ka ning tlat che. Puidula pawh hi a buaithlak lutuk, kan nu a dam lo a ti reng mai" Nui kur kur chungin a ti leha. Ka nui ve hak a, Akimi hi hmeichhe fel tak a ni a, Rinpuia mize no tak leh duat phut em em mai pawh hi a tihdan tawk a thiam a, inti pa fu si hian an nuin a control hneh viau lawi. 

"Rempuia an transfer kha i hre tawh em? ' a rawn ti leh thuta. "Maw? Khawiah nge a awm dawn? " mak ti tak hian ka ti nghal hluai. 

"Lawngtlaiah vang vang… thla tharah a kal dawn a, kal hmain Dine out ang u aw.. " a rawn ti leh zung zunga. "Khai aw, a va hla tehdawrh ve' ka ti vang vanga.

 " Nia hla khawp mai. Mahse, a tehna azir animai. Lunglei atang chuan a hla vak lo" nui kur kur chungin a ti leh a, ka nui ve hak hak. "In pa lo sawipui ve hrim hrim la, sawrkar hnathawk hi chu sawn kual tur chu ni mah se a peih lo ve taih taih lutuk a" a rawn ti leh a. "Um, mahse tihfel vek tawh anih chuan kawngro a su viau lo ang" ka ti ve a. "Nia, lo sawipui ve hrim hrim kha nimai e" a rawn ti leh hram.

Dar 7 velah u Sangzela a lo haw a, "Rempuia an transfer tih vawiinah Chhana'n min hrilh a" A inthlak laiin ka ti a. "Rempuia lo pawh an transfer nual kha" a ti deuh hmuk. "Midang ka hre lo. Amah bik chu vawiinah min hrilh a, eng emaw tih theih ilo neih takin an tia" ka lungawi lohna thup hram hramin ka ti leh a. 

"Engmah ka ti thei lo. Sawrkar hnathawk ania, transfer theih anih angin an transfer animaia. Buai chung na tur a awm lo" a ti leh duaha. "I sawi thui peih e a" ka ti hmak.

"Ka sawi thui peih lam a ni lo. Thil nihdan ka sawi mai alawm mawle. Enge i huatpui a? Ani aia buaipui tur pawimawh a tam lutuk" a ti leh hmuk hmuka. Ngei em em hian min hnungchhawn zawnga a ding chu ka melha, vawm pawp mai ka chak. 

"Ka huatpui lo ve' ka ti nghat. 

" I huatpui loh leh a tha anih chu. A thuhrimah i thiante hi ka ngaipawimawh teh vak lo ania. Nu leh pa zara thaw lian ve em em hlawm ringawt mai" a tikual leh ta daih. 

"Eng nge ka thiante pawh chu i hmer tel kher le? I chawm pawh anni lo. Thildang pawimawh anni aia  buaipui tur i ngah tehreng nen,an chungchang i sawi peih zawk" ka ti ve salh. 

"Ka buaipui reng reng lo. An mahni ang leka i khawsa hi ka duh lo zawk. I insiamtha viau dawn emaw ka tia, I insiamtha thei mang tlat lo hi ka hne ania" a ti leh hmuka. Ka ter ta at mai. 

"I hmusit anih kha. Hmusit duh suh, nang aia let tam takin an tha zawk. Mi tanpuia an buai ang zat hi i nihna ropui tak nen hian a chanve pawh ila ti phak lo. Nang, nihna lo anga lan tum " Ka ti ta nek. Thil tha taka sawi laia a kawi zawng zawnga a ngai mai chu ka thin a thawk lo thei lo. 

"Kei aia tha maw annih a? Enge nih lohna anga lan ka tumna han sawi bawk la" a ti vawt ruiha, min rawn pan a. Ka hmaah tak a rawn dinga, ka thiam emaw thiam lo emaw ngawih a hun hle tih ka hria. Mahse, chhungril atangin min tur ut ut a, ka tawng loh chuan ka a mai dawn in ka hre bawk. 

"I bulah chuan a derin kan nung. Chu chu i pha thei lo vang. Anni bulah chuan nihna ang angin lanmawi tum loin hahdam takin ka nung thei" ka ti chhuak piap mai.  Hlau lo niawm takin a mitah tak ka en ran a. Ka beisei loh takin a nui a. 

"I pa hian a lo sawi dik anih hi. I bula awm chu naupang inkhualtelem ang mai kan ni. Engpawhnise, in an siam zawh veleh kan insawn phei ang. Ka bula chen hahthlak tiviau mah la i chen reng angai tho a, a chhan chu i pa bula let tir leh tur che chuan ka sual lutuk bik tlat lo" a tih zawm leh daiha. 

"I khawngaihna ka mamawh lo. Inthen i duh phawt chuan inthen ka ngam reng' Ka ti leh piapa. Min rawn hnaih rawka. 

" Mi a ang maiin te vak vak kher suh, duh leh in danga kan insawn hunah ila te vak vak dawn nia. Chuan, thil ka hrilh ang che. Inthen kher hi chu cho duh suh. I pa sawn lawm takin a lo pawm dawn lo che. Nang ai chuan a nupui saw a thlang zawk. Nupui a neih leh duh vanga nang hi pasal nei thuai tura duh che a ni bawk ania. Chuan, I dula thanglian mek kha keipawn ka duh ve bawk a. Nangmah ka duh leh duh loh lam che chu sawi ka tum lo" Lainatna tel miah loin a ti leh duaha, a vawikhat nan a hmelah chuan misual tenawm tak, a duh hmuhna tura engpawh tithei hmel ka hmu thei bawk. 

Tawngka-in ka chhang let thei lo. Ka phone ken laiin a chalah ka chhu chawrh a, rum nghut chungin a tawlhlet a, mahse min rawn hnaihchilh lehnghalin min rawn reka, ka malah na lutukin a hmet a,a piai zui leh ngheka, ka zal nghal rawih rawih thei. 

"Vawikhatmah kut min thlak nawn leh tawh suh ang che. Mipa ni loin hmeichhia i nih kha hre reng la, I nu leh pa-in an en mai mai ang che khan ka en ve mai mai dawn lo che ania' thinrim tak hian a ti a. Ka tho chhuak tur chu min rawn nam bet leh chawrha, thutthleng bana thing awm lai ka tauha, ka lu a hai nghal chhak thei. 

Che loin ka mut ngaiin ka mu a, min khawih zui inring tak hian ka bulah a ding run a. Kut ka thawh ngawt mai kha a dik lo tih ka hria, mahse min tih let ka ring lo ve ngawt kha ania. Chutiang a ni ta reng reng si lo. Ani hi tunah chuan a rawng dik tak a lo lang ta tih ka hai lo va, min duh vanga min nei a ni lo tih ka chhungril hian a pawm hmiah tawha. Kan inkar tihthat tumna ka nei ta hauh lo. 

"Naute chauh i duh bawka, naute hi i chang dawn nge dawn lo kan la hria ang chu" tho chuang loin ka ti ta sap. A khup dawmin a rawn kun a, hnai takah min rawn en a. 

"Nau tihtlak i tum anih chuan i dam chhuak lo chiang khawp ang. Tihtur ka hrilh ang che. Ngun takin lo ngaithla rawh. Nupui i nihna tha takin hlen chhuak la, kei pawhin pasal ka nihna ka hlen zel dawn. Ka fa hi tha takin hring la, abak chu ilakah duh ka nei lo. Chuan, Dpi chanchin lo ngaihven tawh suh. I tan chuan ani kha chu Angel ang vela chungnung anih kha, tehkhin phei chu lo intehkhin duh reng reng suh " Tim map lo hian a ti leh hmuk hmuka. Ka pasal a ni chung hian min hmangaih angem tiin ka lo inzawt ru fo tawh thina. Kei pawh hian ka hmangaih em tiin ka inzawt fo. Mahse, min hmangaih lo  tih tunah chuan ka chiang ta a, ka laka a awmdan mak em em pawh kha a lo mak hauh lo a lo ni. 

"Inthen pawh ngaihtuah suh ka tih che kha. I pa inah sawn i tan hmun a awm lo. I duh phawt chuan i fiah thei ang. Chuan, , I thih leh dam chungchangah ka vau mai mai lo che ania. Ka career tihchhiat tuma atthlak taka chet pawh tum suh. He dinhmun hi harsa taka ka hlawhchhuah anih hi, chuvangin ka chan dawn lo tih hria a, ngawi hle hle mai rawh" Awki dam thluam hian a ti leh a. Rapthlak ti em em in ka melh reng ringawt. 

Kawngka an rawn kik a, Nanai'n chawei an peih tih a rawn sawi a. U Sangzela kawngkhar lam panin a kala, ka thu chhuak ve nghala. Mahse, a rawn let leh a. "Ka sawi hmaih tep, inchhunga cheng ho hian rinhlelh tur pakhat pawh an hmu tur a ni lo. Pawnlam mi phei chuan sawi tur zeuh pawh an nei thiang lo ania" a rawn ti leh hram. 

Inhnuaia ka chhuk chuan a thenin chaw an lo ei tan tawha, ka thutna thinah ka thu a. Ka thutfel hnuah u Sangzela a rawn thu ve chauh. Kei aiin a chhuk hmasa a, khawiah nge a kal kawi ka hre lo. 

"Mama, I chal kha ti nge a? " Ka nuin a ti nghal chat. Ngaihven miah lo niawm tak hian chaw ka ei a. 

"Tuemaw hian closet a hawng thut a, ka intauh anih hi" nuihza aw hian a ti a. Dawt sawi lo ang maia a confi chuan min ti ip zawk thei. "Khai aw, a tilui a ni ngei ngei ang" Melo-in nui chungin a rawn ti thuaia. Hawichhuak loin chaw ka ei ngaiin ka ei a. Mahse, ka malah na zeta min rawn tham takah chuan ka hawichhuak vata, "Ama fimkhur loh hi alawm" Melo-i en zawk pahin ka ti nghal zat. 

"Ka ring alawm, thawm nei mang loin a kal du du anga, nang lahin i hawng pawp mai dawn si" Nui kar kar chungin a ti leh zat zata. "Ei mai mai rawh, I ninawm" U Sangzela'n a ti nghuta. A awmdan vel chu ka ten mai pawh a ni lo, ka rap a ni tawp mai. 

Zanah vengchhung GSA lam hruaitu te an rawn leng a, tih ve tur ka nei lo bawka room lamah ka inkhung sana, ka ipik lutuk awm ngaihna hre lo balcony-ah te ka dingchhuak a, ka thawven phah chuang eih lo. Thil chi hrang hrang ka ngaihtuah kuala, achangin ka nu ka ngaihtuah a, achang leh ka pa ka ngaihtuah bawk. U Sangzela mizia hi an hre lo tih a chiang reng. Hria se min neih tir dawn hauh lo tih ka chiang. A tawngkamah khan min duh vanga min nei anih loh zia leh fa neihna atan maia min nei tih a chiang reng a, inhmuhsitna tawpkhawkah ka ngaia. Chutihrualin ka hmangaih ngai dawn lo tih ka inhre chiang ta viau. Ka u ka ngaihtuah a, ani talking bia ila ka zia deuh ringin ka call nghal a. U Jimmy-a zawkin a rawn pick a, "naute hnute a pe lawka. Ka rawn call back tir ang che aw" a rawn ti a. "Hnute pek vang maiin enge a biak theih loh vel a? " ka tih chuan a nui kur kura. "Muthilh a tuma, tihharh kan hlau ve alawm. A muthilh loh chuan kan in-awi tlaivar leh mai ang"  a ti a. Ka nui ve hak hak mai. 

Phone ka dah rualin a rawn ri lehnghal zata. Thomas-a a lo ni a. 

"I hman em? Jump ila" a rawn ti nghal tawng. "Hman tho a, mahse ka van peih lo" ka tih chuan " A ho. Kan nghak che " tih leh dah a rual nghal hmak. 

Game a ka luh fel hnuah ka inphihfai san leh riha, mu tura insiampeih tlapin khumah rem fe hian ka thu a. Kei leh Thomas-a leh Aruata kan khel a. Pakhat la awl mah se tumah kan khelhpui peih lo. Ka phur loh ang aiin kan han khelh takah chuan ka tangin nuam ka ti ta phian maia. U Sangzela lo luh hnuah pawh ngaihven chuang loin ka game khelh lam chauh ka ngaihven a, a intihfai hnuah light a off nghal hmaka. Ka pawisa chuang eih lo. 

Dar 11 velah Rempuia a rawn lut ve a. "Eheu, zanin chu Boss kan chang ve tlat maia" a rawn ti nghala. U Sangzela a la muhil lo bawka ka tawng dan ngai rengin ka la tawng a. Rempuia pawh fiamthuin ka chhang let nghal zat. 

"Lawngtlai lamah maw an thawn phei dawn che? " ka ti a. "Ni chiang e" a rawn ti zang vuha. "Nupui zawng turin an duh che aniang" Ka tih chuan Thomas-a a nui huk huka. "Ni chiah mai, rawn nei haw ngei ang che. Eeee, Za-rini ang hi a ni lawmni i duh kha? Lawngtlaiah chuan an lo awm ngei ngei ang" a ti zut zuta. "I chhe zet zut e a" ka ti hmak. Rempuia'n thildang a rawn sawi hnan nghal thuaia, ani pawh hian min dem bel fo hi a duh bik lo tih ka hai lo. 

U Sangzela muthilh hnuah pawh ka la khel ta zela. Tawng erawh ka tawng tawh lo thung. Sana ka en chuan zing lam dar 2 a lo ri der tawha. Min hre chiangtu vek ni mah se chu chen chen inkhelh ngawt chu pasal nei lai tan thil tih chi ber a ni lo tih ka hre thiam ve kar. Kan khelh lai kan zawh ve leh ka out nghala. Group lamah ka mutchhuah tawh thu ka va sawi nghal zat bawk. 

"I tha em? " tih msg a rawn lut nghala. Min rawn thawntu ka en vang vang. 

"Tha e" Tih ringawt ka thawn let a, "Good… ka sawi loh tur pawh a ni mai thei. Mahse, I tha chiah lo niin ka hria che" a rawn ti leh a. Diktak chuan kan nupa kar a that loh apiangin inkhelh lamah ka tuan thina, tlaivar dawn dawna inkhelh chang pawh ka nei fo. Mahse, kan nupa kar a that lai chuan inkhelh lam ka ngaihtuah vak ngai lo. Ni e, tawngkamin sawi lo mah ila min chiktu tan chuan ka tha lo tih hriatthiamna tham a ni tawh reng a ni. 

"Ka tha reng" ka ti leh ringawt. "Ok.. I that chuan a lawmawm. Mahse, min share i duh chuan englaipawhin ka awm ania aw" a rawn ti leh a. Emoji inthlahrung hmel deuh a rawn dah tel bawk. 

Ka mu meng kara, Rempuia phone number ka chhutir kha ka ngaihtuah a, u Sangzela P. A number lek a lo ni a. Ka rinhlelh chhan kha a ho angreng viau a, mahse ani kha ni turah ka lo ngai miah lo. A hmaa X rawn inti kha chu a P. A kha a ni lo tih ka chiang a, mahse x tih kha ka hmu nawn tawh tlat lo. Phone number ka chhuitir khan ka hriatduh chhan min zawt miah lo va. Midang hriat ka duh lo tih vawikhat ka sawi bak ka sawi nawn hek lo. Mahse, khata tang khan kan inpawh na erawh a thuk zual tih ka hai hauh lo. Thianah pawh thian tak tak enin ka en ve tawha, eng thuruk pawh him takin min vawnsak ang tih ka ring nghal thlap bawk. 

Bath tub-ah hahdam takin ka inchiaha, ka mal duk lai ka tuai nauh nauh bawk. A hmeh vak bakah a piai zui leh kha a nia, duk hma chi ni bawk nen a duk chiang viau. Kha thil thlen atang khan vawiin hi ni 2 na a ni tawha. Kan chhungte zingah engmah danglam awm loin kan khawsa ve mawp mawpa. Mahse, room chhungah erawh chuan kan inbe ngai eih lo. A awm awmin a awm a, Kei pawh ka duh dan danin ka awm mai bawk. Boruak siamthat tuma tlawm taka khawsak ka tum lo va, ani lahin min biak tlawn te chu hnai lo tak a ni. 

Ka inbual zawhah hmanhmawh lo takin ka insiama, ka chhuah meuh chuan dar 11 a kawk va tawh. Ka naupai thla 3 a ni ve tawha. Mahse, keimah a scooter han khalh ka la duh loh avangin Driver ka inhruai tir a. U Sangzela hian hruai bik a nei a, ka pa pawhin chuti bawk. Atea leh Melo-i hi chu an mahniin an inkhalhchhuak mai thin a. Ka nu leh kei hi chuan in a mamawh apianga koh tura awm hi kan hruai kual mai zel thung.

Dawrah ka indah tira, ka nu nen an bazar dawn avangin ka tir haw lehnghala. Kei erawh dawrah rei awm loin ka u te inah ka phei ta daih. 

"I va nawm loh hmel ve" min en vang vang chungin a ti a. 

"Nuam tho, nuam vak lo" ka ti hap. Ka nau pawm min rawn laksaka, khumah a va mut te te a, ka bulah a rawn thu leh a. Ngaihtha vak lo hmel pu hian min en a. 

"Sawi la, in nupa kar nge chhungkaw lam? " a ti dam thlap. 

"Chutiang engmah a awm lo' ka ti tak nangin min hre chiangtu ka u ka bum lo tih ka hre tho.

" Kan nupa kar hi a fel lo" Ka ti leh ta tho. "I duh phawt chuan min hrilh thei alawm" a ti dam diaia. 

"Inthen ka duh" Ka ngawih deuh reng hnuah ka tichhuak hlawl. Mengphawk deuh vak chungin min en a. "Inthen maw? Ni lo ve. Nupa te chu kan inhau fo alawm, chutiang a inthen hi awlsam a ni lo. Tunah phei chuan nau i pai lehnghala, chutiang tur a ni lo. Rilru puitling pu rawh" Min tih lungawi tum tak hian a ti thuai thuai mai. 

"Inthen awlsam loh zia te chu ka hre ve reng. Mahse, ka hne tawh. Kan nupa hian kan inmil thlawt lo" ka ti leh hmawk hmawka. Ka kutah a rawn vuana. "Ka hre thiam che alawm. Mahse, nupa chu kan cheng dun rei tial tiala, mizia kan inzir tawna, kan inhrethiam thin. Lo inhau pawh ni ila kan inngaidam leh mai zel ania. Chuvangin nangpawn hriatthiam tum la, u Sangzela pawn a dawh nasa em em chein ka ring. I mizia tamtak siamtha tawh mah la, I danglam nghal vek thei lo a, ani lah mi satliah a lo ni bawk si lo va. A in adjust nasa khawp ang" a tih leh chuan ka thin a rim ta phat. 

"Eng nge mi satliah lo tih chu a pawimawhna? Minister nih mai mai chu eng nge ni vak a? Ka ngaipawimawh lo reng reng. Mi ngaihsan deuh neiha nun nuam si lo hman ai chuan miin engahmah an ngaih loh bula hahdam deuha keimah nih ka duh zawk. Ka thiante a ngaithei si lo, engtin pawh awm ila min sawisel bawk. Kan nupa karah hi chuan hmangaihna tihvel hian kawng ro a su hlawl lo" ka ti ta piap mai. Ka u bulah hian u Sangzela vangin lo vui fo tawh mah ila hetiang tak hian kan nupa chungchang ka la sawi ngai lo 

" Engmah hi a awmzia ka hre lo. Mahse , inthen chu ti lo hram rawh " Mangang tak hian a ti a. Ka tihtawh lama kalna tak ka ni tih a hre chiang a, a hlauthawng hi a awm reng. 

"A awmzia hriat loh tur a awm lo. Ka nu leh ka pa vangin ka ngaihzawn loh pasalah ka nei a. Ani pawn min ngaizawng lo va, a fuh tak tak thei lo anih hi. A thuhrimah engatinge inthen chu min hlauhpui vaka? Ka hlimna i duh lo em ni? " Lungawi lo em em in ka ti a. Min chhang loin min en renga, reife min en hnuah a thaw haka. 

"Inthen hi ka support lo..chu chu a chhan animai. Abak a awm lo" ani leh ni lo ang taka khauh far hian a ti a. "Mahse, I hre thiam… " ka tih lai mekin, " I ipik anih kha. Kan unau hi chu kan nu leh pa te min enkawl dan dik tawk lo vangin kan chapo a. Pasal kan neih chiah hian mipa zawk chu an lo thu em em si a, kan insiamrem thei lo atin ni. Nupa hlim taka awm tur chuan tlawm zawk awm angai fo ania" Khauh tak leh thupe aw bawk hian a ti leh a. Thinrim teh mah ila ka duhna lam min duhpui turin a rilru a sawhsawn dawn chuang lo tih ka chianga, sawi zui ka duhna pawh a bo nghal duak mai. 

In ka thlenin khua a thim titih tawha. Ka beisei loh takin u Sangzela pawh a lo haw tawha. An vaiin living room pakhatah thuin an lo titi laih laih mai. 

"Arin, lo thu phei la.. Ka birthday lawm dan tur kan sawi ania" Melo-in a lo ti nghal a. Phurna pakhatmah nei loin ka pheia, Melo-i bulah ka thu a. "Mama hian huan lama lawm a lo rawt a, kan vaiin kartawp chawlh zuk hmang ila, ka thiante tlem ka sawm anga" phur takin Melo-in a ti leh a. 

"Pitar birthday lawm turin chuti taka tih angai em ni? Inah bati te chhemhlum mai mai la" Atea'n a ti a, ka nu nuih a za ngang mai. 

An sawi ho nak nak hnuah kartawp a zan khat lek huana riah luh an ti a. Mahse, ka nu leh ka pa erawhin kal ve an tum lo thung.

Ka mut dawnah inhnuaiah tui ka zuk la leh a, u Sangzela erawh chu veng pakhatah an party candidate campaign pui turin a chhuaka,a lo la haw lo. A kalna tur pawh min hrilh ni loin chawei laia a sawi ka hriat ve mai a ni bawk. Chawei kham hnu a a insiam lai pawhin roomah ka awm ve reng a, mahse kan inbe lo ve ve. 

Ka mutui lai ka harh hlawl a, min tiharhtu pawh eng dang a ni lo. Ka tai na lutuk vang a ni. Ka thuchhuaktur pawh ka taina-in min pawh tlat avangin ka thuchhuak mai thei lo. Ka tal velah u Sangzela a rawn harha,light a on nghal a. 

"Eng nge i tal vak vak a? " a rawn ti a. Chhan pawh ka chhang buai peih lo. Harsa ti takin ka inbengkanga, ka mawng lam huh deuh dup chu ka hre theia, ka zuk khawiha.. "Ehe… ti nge a? " a ti nghal hmuk. 

"Ka thi a put" Zawitein ka ti a. Khum atanga ka chhuk tur chu min rawn pui thuaia. "Damdawiinah kal ang. I awmdan a dik lo. Midang kan ko ange" a ti nghal zung zunga. 

Ka nu nen an rawn chho leh thuaia, ka duh lo teh nain min pawmthlaa, zan lai laiah ka ri ta rum rum mai. 

Damdawiin kan thlen chuan min lo en nghal sawk sawka, nau ka chhiat tih an sawi chiah chu lehlam hawiin ka inleta, ka muttui a tla zung zung mai. U Sangzela nen inmil lo em em in keimah min duh loin ka fa chauh pawh duh mah se a paitu ka ni a, chuti maia ka chhiat leh si chu na ka ti lo thei lo. 

Ka kutah u Sangzela'n a vuana, ka chalah a rawn fawpa. 

"Tap duh mah ta che. Pathian zarah a dang kan la nei leh mai dawn alawm" a ti dam thlupa. Mahse, a awmdan chu min hnem tak tak tum ni loin midang hmuha mawi zawng a ni tih ka hai lo. Eng nge thleng leh dawn ka rin hriat ruak thei a. Thih daih ka chak em em bawk. 

Zan hnih damdawiinah ka riaka, mi an tha em em a, min tlawh tur an lo kal deuh zuta, nu Sangi'n min awmpui chawt bawk. Kan chhuah dawn niah "In lamah rawn riakphei se pawi i ti em? " U Sangzela hnenah nu Sangi'n a ti a. Thiam takin u Sangzela'n a hnial thla leh thei mai. 

In a kan awm hnuah ka thiante an lo lang tak taka, kan roomah kan ri hlut a. Nau chhiat ka nihna bak engmah na dang ka nei lo a, mahse ka rilru a hnual bakah mangchhia nen ka talbuai em em thung. Muthilh ka hlau a, ka meng tlaivar deuhthaw a ni ber. 

"I rawn mu dawn lo em ni? ' ka ti a, kan inlengte an haw hnuah pawh thutthlengah a la thu ta reng. 

"Engtin nge i tih theih? " Ka zawhna min chhang loin a ti a. "Eng maw ka tih? " Hre thiam chiah lo hian ka ti a. Damdawiinah khan min buaipui em em a, mawi a zawn vang tih hre mah ila tlem chuan kan inkar pawh a zia deuh. 

"Tumah an awm lo, lemchan hun a tawp tawh ania' a ti leh a. A awki a ngeiawm ngang mai. 

"Lemchan lam pawh a ni lo. I zawhna ka hre thiam lo" tha takin ka ti leh a. A thaw deuh huaia.

"Naute ka duh zia leh ka tana a pawimawhna i hria a, tihpalh anga lang tura i che vel kha a hmuhnawm viau rualin a pawi zia i hre thiam pha lo vang" Thluk nei mang lo hian a ti a. A thilsawi chu mak ti em em hian ka ngaithlaa, min rawn pan phei pawh chu tawng nachang hre loin ka melh reng. 

Khumah a rawn thingthi a, ka nghawngah a rawn rek thuta, na tak chuan min rek lo. 

"I nghawng sang nalh veh vawh tak mai hi, tunah hian thuai tliak hmawk lo turin ka insum nasa viau a ni" Huatnaa khat hian a ti leh a, hlauhna avangin ka khur hlawk hlawk mai. 

Note : Nizan lamah damlohna avangin ka dah thei lo va, engmah ka rawn sawi bawk si lo va. Ka thiam loh a ni e🙊 typing mistake a awm leh nual ang aw...