Naruto -8

 Then -8na

"I la duh em? " tih pahin ka hmaiah a rawn nawr leh vaka, "i sual lutuk" ka ti khur hlak hlak. Za miah lo hian a nui a, ka mal na laiah a hmet zui leh chu ka mar nghal awt maia, insum hman loin ka rak thawt bawk. Ka chalah a rawn fawp a. 

"I hmeltha, I thinrim phei hi chuan i hmeltha lehzual" a ti zuia. A hnara tauh chawrh tumin ka che thut a, mahse ka tum dan hre lawk ang mai hian a inlahrang nghal vat thung. 

A kalsawn hnuah che miah loin ka mu a, ka mal na tawlh tawlh chu ka tiche ngam lawk lo. Ka dul a hnekna pawh a na tho bawk. 

Ka phone ri ka hriat rualin ka inbengkanga, u Sangzela'n ka phone a keng ka va hmu nghal a, min rawn en pahin a pick up nghal zat. Melhhlum tum niawm tak hian ka melh ngar ngar a, min en ve ngur bawk. 

A biak danah chuan ka u nen an inbia tih ka hre thei a, then deuh nak chungin ka tho a, ka phone va laksak ka tum a. Mahse, a lu chung lamah ka ban phak loh tur in a lekkang ta daih. 

"Min pe rawh, ka phone anih kha" ka ti bung nghata, "I phone a ni lo ka ti hleinem, mahse zanin hian tumah i be dawn hauh lo" a ti hmuk. Min pek a tum lo tih ka hre thiam nghal a, che thutin kawngkhar lam ka pana, mahse min thlen khalh leh ta tho. Tawng miah loin khum lam a kawk a, mahse ka kaldawn duh bik lo. Diktak chuan kut han thawh leh tumna ka nei tawh lo va, ka rilru hian hlau miah lo mah se mipa tha chu ka hneh ngang lo tih ka hre chiang tawk tawha. Tihdan dang ka zawn angai animai.

"Ka then dawn che" ka ti vawt raih. Ngeiawm em em hian a mengphar kuala. "Min then ang maw? Inthen ka duh teuh lo" Tih pahin a nui a. 

"I duh leh duh loh ka ngaipawimawh lo. Hmeichhe kutthlak ching i nih zia te hi ka la phochhuak vek ang che. I chawh dawn" ka tih leh chuan a danglam a, mahse a la nui sung tho. "Min then te chuan ka ngai dawn che asin, min ngaidam mai la" a ti leh chu a awah chuan min hmusit tih a lang reng. 

"Mi tenawm, nupui kutthlak ching, I nep lutuk. Hetiang hian ram hruai that i tum vel chu ania, I hruai tha lul lo vang" Hmusit tawpkhawk hian ka ti leh a. A ner nawka, nui hmel a pu tawh lo chiang viau. 

Min rawn hnaih rualin ka tawlhhnung nghal a, "Ram hruai hna ka thawh naah hian tuman min dal thei lovang.Kei aia tha hi tumah an awm bawk lo va. Mi tamtak min ngaisangtu an awm lai hian nang hian min lo dodal vel ang maw? A teuh lo lutuk. Chuan, min then pawh kha tum duh suh. I pa hian ka then ang che tih a hlau zek zek ania. A chhan chu maw, a awmpui peih lo che. Chu pawh engdangvangmah a ni lo. A fa i ni reng reng hleinem" a ti leh hmiah hmiaha, a sawi tawp ber chu ka hre sual emaw ka ti a. 

"Eng maw i sawi? Tu fa maw ka nih loh? " ka ti bung vat mai. 

"Kha chu ka sawi lo angah ngai rawh" a tih chuan a aw-ah a sawi loh tur a sawi niin ka hria. Kalsawn a tum chu a hmaah tak ka va ding nghal a, "Tu fa maw ka nih ve loh? " ka ti leh vak. "Au vak suh, ka beng a ngawng lo" a ti bak tuka. "Tu fa maw ka nih ve loh? " ka ti nawn leh, "I pa va zawt mai rawh" a ti hmuka. Min hel tumin ka sir lamah a pen a, mahse a hmaah tak ka ding leh thuai. "Ka zawt lo chiang ngawt ang. Nang ang mihring dawtsawi hrat thusawi hi engahmah ka ngai lo" ka tihkhum leh sak saka. "A lawmawm nasat chu. I pa pawhin hei kher hi chu sawichhuah a duh lo viaua. Chutia nang berin i awih loh phei chuan a lawmawm deuh deuh animai" hnehtu inti fahran hian a ti leh a. "Mi sual leh tenawm tak i ni. Nangni ang ho hi chu in awmna tur a hrana siamsak inngai" ka ti leh hmak hmak a. Diktak chuan tharumah ka hneh si lo, hetianga tawngkam na tak taka ka tawngkhum bak hi tihtheih ka neih loh avangin tawngkamchhia ka hriat ang ang hman khum tumin ka inngaihtuah pah reng bawk. 

"I duh duh chu sawi phawt mai teh, miin nau an hrin zawh hian eng emaw natna an vei zui thina. Nangpawh hian nau i ti tla a, chuvangin mi nau nei thinte tihdan hriain rilru lam natna i vei ve anih ber hi" min tihkhum ve hmiah hmiah mai.A tawngkam chhe lutuk chuan min deng na ngang mai. A hmaia chum pawp tumin ka kut ka vai a, mahse a lo man chat. 

"Kut min thlak thin suh ka tih che kha. Kut min thlak apiangin a let i dawng zel tih pawh i hria, I na lutuk palh ang' thupe aw hian a ti a. A sawi dik tih ka hai lo. 

" Intifai la, mu nghal ang che. Naktuk-ah phone chu ka pe let ang che. Mahse, naktuk atang chuan rilru buai i nih ni a intan dawn a, chutiang tur chuan inbuatsaih ang che" nuam tih hmel em em hian a ti leh a, ka bekah a rawn fawp zuia. Rang tak hian ka thle sawn a. 

"Dpi ang mai khan chhul tha lo angin miin min sawi ve dawn tihna a ni maw? Anih chuan engtikah nge inchung zawl atangin kan kawmthlang kawrah khuan min paihthlak ve ang? " ka ti ta fak fak. 

"Mu tawh rawh" ka thusawi min chhang lo leh ngaipawimawh miah lo hian a ti a. Tawng leh ka tum chu ka hmui a rawn hup a, "mu rawh" zawi te hian a ti leh a. A tawng zawi em em mah se a mitmeng chuan min ti vawt rawih rawih theia, tuna min en dan ang hian vawikhatmah min la en ngai lo. 

Ka muhil lo chiang viau. Mahse, ka chet hlek apiangin u Sangzela a rawn che ve nghal zela. A muthilh laia chhuah pawh tum tehreng ila room a kalh hmaka, chahbi a lukham hnuaiah a dah daih bawk. 

Ka inngaihtuah nasa em em a, ka mal lah sik hlek pawhin a na a, tihfuh palh ka hlau ngang mai. Kan inhauh dan leh kan tawngkam te ka ngaihtuah let a, ka pa fa ni ve lo ang maia min sawi kha ka hre thiam lo. Englaimahin ka pa fa ka ni ve lo tih hi tuman an sawi ngai lo. Chumai bakah ka pa mizia ka chhun zia hi kan chhungte leh min hre chiangtu te sawi tam ber a ni zawk. Hmelah chuan ka u nen kan inang lo viaua, mahse mi pawh unau nih vangin an inang vek bik chuang lo va, ngaihthat loh phahna tur a ni chuang lo. Ka pa fa ka ni ve lo ngei em tih fiah tumna phei chu nei lo tak ka ni,achhan chu ka ni tih ka chiang lutuk..Mahse, mahse a awm tlat.. A tawngkam dang ka ngaihtuah let nasat em em dang chu "naktuk atangin rilru buai i nih ni a intan dawn" a tih kha a ni a. A duh naah chuan engkim a tithei tih ka hai tawh lo va, ka chunga a khasak tum dan pawh hi a ti tlang ngei bawkin ka ringa. Engtia awm tur nge ka hre thiam thlawt lo. Rempuia leh ka u tu emaw zawk zawk biak thuai thuai ka duha, mahse ka phone min laksak daih si. 

Khawvar hnuah ka lo chhing seka, tawng thawmah ka harh lehnghala. Ka rin loh takin kan roomah ka u te nupa leh u Sangzela an lo thu thap mai. 

Ka harh tih a hriat veleh ka u khumah a rawn thu a, ka luah a rawn chula, "I tha em? " min ngaihtuah tih hriat tak hian a lo ti nghala. "Tha, enge tunah ilo tih a? " ka ti a, ka thuchhuak tur chu min rawn puih a tuma."Eng nge a? " a kut lo vaisawn sak pahin ka ti hmak. 

"Bawihi, pawn lamah kan lo va awm ang aw. Min mamawh chuan min rawn ko la" U Jimmy-an ka u hnenah a rawn ti a, u Sangzela a rawn kal hnaia, ka chhip samah a rawn fawpa, rang mangkhengin ka tawlhsawn ve thung. "Good Morning.. I u nen khan lo inkawm ula, thingpui ka rawn dah tir dawn nia" dam thluam hian a ti a. A hmaia ham vak lo turin ka insum nasat angai viau. 

An chhuah fel hnuah inphihfai tura thawh ka tuma, ka mal na lai ka tifuha, ka then nghal nak mai.

"Khawnge i kal dawn? " ka u-in min ti a. "Ka hmai ka phih dawn. Eng nge tun ang hunah te in lo kal a? " bak deuh hlak hian ka ti leh a. "Ka rawn tlawh che. Eng nge i an hriat ka duh a" dam thlap hian a ti leh a. 

"Eng nge ka an vak ang? Mihring animai alawm" ka ti leh hmaka. Za lo tak hian a nuia. 

"Va inphihfai phawt teh" a ti a. 

Ka inphihfai zawh chuan thingpui an rawn dah lut tawha, naute tel lo va an nupa a zing kara an lo leng chu mak ka la ti reng. Thil pawimawhah u Sangzela an be duh anih rinna ka nei thut a. 

"U Sangzela rawn hmuh in tum em ni? " ka ti chhuak nghala. Min chhang loin min en vang vanga. A thaw deuh halha. 

"Ni lo ve. Nangmah ka ngaihtuah che a, ka rawn kal" a ti ban ta chat. Phawk deuh hra hian ka en a. Nizana thil thleng kha a hria anih rinna ka nei nghala. "Nizan chungchang hriat i nei em ni? " ka ti nghal zat. Tawng loin a bu nghat a, ka rilruah u Sangzela'n thil dik lo a hrilh rinna a rawn awm nghal thuaia, mahse tunah ka bulah  awm mek a, thil thlen dan diktak hrilhna hun ka nei tih ka hriaa, u Sangzela'n eng thu hmang pawhin lo va ko chhuak se ka lawm tho tho. 

Kawngka chhung lamah ka va kalha, ka let leh chuan ka u hmel ti deuh dai chu ka hmuh hmaih hauh lo va. Ka damthat loh thu a hrilh vanga hlauthawng anih ka ring ve ngawt bawk.

Ka kekawr ka hlip thlaa, ka mal duk chur mai chu ka hmuhtir a, "ka pa makpa duh tak thil tih anih hi" kha zetin ka ti nghal hmak. Ka kekawr ka ha tha leh a, ka dul ka hlim langa, ka dul erawh a duk nep deuh. "Hei pawh hi en la" ka ti zui leh nghat. 

"Kan nupa kar a fel loh zia leh inthen ka duh zia ka sawi khan i awih lo va, tunah chuan i awih tawh em ang chu. I hmu chiang ta bawk alawm" ka ti leh hmak hmaka. Engmah sawi loin min melh tlawk tlawk. 

"U, hetianga ka awm reng chuan ka la thi thuai dawn. Ka ruang inhmuh hunah chuan ka pa nen hian innui lo chiang khawp ang. Aaa, ka pa chu a nui maithei. In a ka haw leh a hlau em mai" ka ti zui leh salh salha, thinrim em em in ka vei kual sek bawk. 

"Lo thu phawt teh" a ti dam diaia. "Ka thu peih lo, ka thaw a pik" ka ti leh hmak. Beidawn hmel tak hian a thaw deuh huaia. 

"Eng nge thleng ka hria alawm. I nau chhiatna hian ka rin aiin a khawih na che a.. Post-partum depression i nei niin ka hria. I inhrethiam lo pawh a ni maitheia.. " a ti chiah chu ka tek chhawk thei. 

"Chutiang ka ni lo, chutiang natna nei tur pawhin nau ka hring lo, thisen hlawm mai anih kha ka la chhiat, ka hre ve vek" ka ti nghek. "Lo thu phawt teh ka tih chu" khauh deuh zawk hian a ti leh a. Kawng dawm meuhin a mitah tak ka en a. 

"Depression ka nei reng reng lo ve. Eng ngaihin nge min ngaih a? Mi a ka ni em ni? " lungawi lo lutuk hian ka ti leh hmak. "I a ka ti reng reng lo, nau kan neih zawh chiah hian hetiang natna hi hmeichhe tamtak chuan kan nei a, enkawl that loh phei chuan mi ang lo nih hlen mai theihna khawpa serious ania. In pa hian a lo hre thiam har deuh che a" a ti leh zel chu ka thinin a tuar tawh lo. Na zet hian ka per dawta, ka u a tho nghal zawk thung.

"Chutiang natna pakhatmah ka nei lo ka tih chu. Postpartum te chu nau hrin zawh hnu a neih chi ania, ka hre ve bawk ka tih tawh kha. Chiang takin min khawihna tih i hmu chungin engtin nge ani lamah sawn i tan theih zawk a? Dawt ka hrilh ngai che em ni? Ka hrilh che anih pawhin thil lian tham a ni ngai lo vang. Ka pasal tura min duhsakpui ngei hian asin kut min thlaka, ka taksa lang lo lai a duk cher chur fo thin. Nau ka pai hma atanga kan inkar buaina hi intan tawh anih hi" ka ti leh piap piap a, kan room hi pawnlama thawm ri chhuak lo tura uluk taka duan vek a ni a. Thawm ring uchuak chu a ri chhuak tho maithei a, mahse au deuh chiam chiam mah ila a rikchhuah ka ring lo. 

"Aw le, aw le.. Ka ring che alawm. Tunah chuan rawn thu phawt la, engtin nge kan tih zel dawn kan ngaihtuah dawn nia" Min tlawn ti tih hian a ti zung zung. 

Hreh takin ka thu a, ka lo khawlkhawm tawh zawng zawng, kan inneih tirh phat atanga min khak dan leh min sawisel nasat zia te ka sawi chhuak ta pawp pawp. Kan sex life thlengin ka sawi tlang vek. "Hetianga a mizia i hmuh ang hi a ni lo lutuk, Dpi pawh kha ama thah bak hi a ni lo vang. Chutiang bawkin naute pawh kha min tihtlaksakah ka ngai" tiin a tawp ka khara, ka sawi chhung zawngin a hmel landan a inthlak sek a ni ber. 

"Kan lo ngaisual nasa dawn hle anih ber chu.. "a ti fan raiha. 

" Misual hlawm anih ber hi. Ka pa nen hian eng emaw thilah an intiamrual niin ka hria. Ka pa pawh hian a hlau a, ani pawh hian ka pa a hlau " ka ti leh hmak hmaka. "Khaia, chutianga ka pain thurualpui nachhan tur a nei lo vang" a lo ti vata. 

"A neih loh chuan tinge kan inthen te hi a hlauh em em si a? " Lungawi lo em em hian ka ti a. "A va mak tak em aw. Tinge i hriat thiam theih loh ni? Nupui a nei tawha, a nupui hi keini aiin a thlang zawk" a ti deuh hmaka. 

"Ka pa fa i ni lo ve tho em ni? " ka ti thut chu a no ken lai a thlauh bawl maia, chhuatah a zuk insawhkeh nghal vek bawk. A awmdan chuan hlauthawnna min siamsak nghala, ka tiril a khur nghal dar dar mai. 

"Tu nge chutiang chu hrilh che? " Aw khur dat dat hian a ti a. "Tuman.. Ka sawi mai mai anih kha" ka ti liam vata. "Tu nge ka pa fa i ni lo tih sawi? " a ti leh hmaka. "Chutiang ka sawi em ni? " ka ti ta tlat. "Tei… " a ti leh hapa. "Chutiang ka sawi loh kha, nangpawh ka pa fa i ni lo ve tho em? Ka ti ringawt che a" ka la ti ta fan. 

"I ni lo ve tho em i tih chuan ve tho khan nangmah a kawk tih hre rawh. Vawikhatmah khatiang lam kha sawi nawn leh tawh ngai suh ang che" Thupe aw tak hian a ti zuia. " Anih chuan ka ni nge ni lo? " ka ti leh talh. A thaw haka. 

"Lalrinmawi, Zothanglura fanu naupang zawk leh a duatsual i ni a, I chhun lutuk hi anih hi kan buaina" a ti chat chat. 

"Engpawhnise kan haw phawt ang, naute kan lo hruai si lo. Tlaiah Doctor hmu turin ka rawn lam ang che. Hahdam deuhin lo awm la, I thinrimna i thunun hram hram anga, chuan i thiante hi thlah turin ka duh che ania" a ti leh duaha.

"Eng Doctor nge kan hmuh ngawt ang? " ka ti hmaka. "I thiltawn zawng zawng hi a nasa lutuka, Rilru lam Doctor hmuh na tham alawm. Mangchhia nen i buaia, chung pawh chu Doctor kan hmuh angai" Inringtawk tak hian a ti a. A naupanlai atanga mize confi tak leh smart tak a neih kha a lo la ngai reng. 

"Ka mangchhia te chu a reh ve tan tawh a, ka buai vak tawh lo" ka ti nghata. "A la reh fel chuan loh kha. Va hmu phawt ila a tha ber'  a ti leha. 

"Ka a lo ania. Depression pawh ka nei lo" ka ti leh ringawt. 

"Um,I a lo. Ka hria e" a ti zang deuh vaha, 

"I thiante chu aw… I tan an tha rih lo. Ka awm renga, keimah hi min kawm thei reng ania" a ti leh chuan"Ka thiante ka tana an that lohna ka hre lo ve" ka ti ve thung. "I mamawh rih lo ka tihna anih kha. Tumah an sual lo va, mahse an mizia a puitling lo va, an bulah chuan nangpawn chin loh loh i ching thin. Chu bakah in pa pawh hian a ngaithei vak lo, pasal te ngaitheih loh zawng hi chu tih loh mai a him thin ania. Ka thu awih hram mai teh" a ti leh charh charh. 

Ka u te haw hnuah kan nulain no keh a rawn thian faia, chaw ei an peih tawh avangin kan ei zuia,engtham mah ka ei lo. 

Room a ka va luh leh chuan a lo insiam meka. "I phone ka dah hi aw" Tha tak hian a lo ti a. A tawng chu ngaihven awm pawhin ka awm lo. 

Ka thutna bulah a rawn ding pheia. "I u nen tlaiah Doctor inhmu dawna, lo insiam ang che. Chuan, I u bulah khan engpawh sawi mah la a awih rih dawn lo. I pa lek phei chu be duh suh" a ti nghut nghut.Nizana thil thleng zawng zawng vang khan tunah hian haw vang vang tawh tur chu ka ni. Mahse, ka pa fa ka nih loh thu min hrilh mai bakah ka u awmdan avang khan ka pa inchhung va dai ka chak tlat lo. Chumai bakah mi tenawmpa hian min tlankhalh hneh lutuk. Ka u pawh khan min khawihna duk a hmu reng chungin a ring lo chu anih kha. Min hnial buai a duh loh vanga ka awmdan ang anga min awmtir a ni tih pawh ka hai lo. 

Ka u nen Doctor kan va hmu ta ngeia. Ka mut that theih loh thu leh mangchhia ka neih nasat thin thu ka sawia. Mahse, tun hnaiah a reh tih ka sawi tel bawk. Damdawi ei tur min chawha, harsatna ka neih phawt chuan a ma mimal number a be mai turin min ti bawk. A felin biak a nuam em em a, a tawngkam a dam thlap bawk. Mahse, pawnlam landan hian mi a bum nasat theih zia hre chiang bertu ka ni a. Rilru lam Doctor tha leh ngainatawm tak pawh ni mah se ka ring zo rih tlat lo. Ka buaina hi mangchhia tih vel ai chuan ka pasal mize maksak lutuk vang a ni zawk tih te phei chu hrilh enah ka en rih lo hrim hrim. 

Ka inbual zawh chuan u Sangzela a lo haw tawha. " Doctor chu in va hmu thei em? " a lo ti nghala. "Aw" Tih bakin ka chhang lo. "Tukin khan ka hrilh theihnghilh che a. I whatsApp msg kha ka phone-ah a rawn lut ve vek ania" a ti leh a. "Mi tenawm" ka ti sap ringawt. 

Ka sawi zawi hle chungin a hre thei tho tih a nuih danah ka hre thei a. "I pa nen vawiin khan kan inbia a, I pa chuan mahni intih nat i chin tan dawn chuan enkawlna tha zawk dawng tura inah khung tawp che a duh" a ti zui leh a. "Ka inti na lo. Nangmah zawkin kut min thlak"Ka lo ti hmiah. " Oooo, ni chiah e. Mahse, I pa chuan mak deuhin nangmah leh nangmah i inti na niin a hre tlat a. I u pawh kha hrilhfiah i tum viau chungin ani pawh khan nangmah leh nangmah i inti na niin a hre ve tlat bawk che a. Ni lo, engmah ka sawi miah lo ania" ngeiawm em em hian a ti leh zuah zuaha. Hetiang em em hian a tawngthei tih pawh hi ka lo la hre ngai lo. 

"I va han tenawm tak" ka ti ta thlawt.Engahmah min ngai lo zet hian a nui a. "Nizana ka sawi tamtak zingah khan ka ngaihpawimawh ber chu Rempuia chungchang kha. Ani hi hlat ang che, kei ai mahin i tan a tha lo zawk ang" Chiang fek fawk hian a ti a. 

"Ka thian kawm tur min thlan sak suh" ka ti hmiah. "I kawm loh a him ang" a ti leh chu ka thinin a tuar leh ta lo. 

"Nang aia ka thlan zawk i hlau anih kha" ka ti ve salh. Ka sawi zo hman tawk tihah ka bul a rawn thleng phei nghal ruaka. 

"Han sawi leh teh" a ti thawt. A mitah tak ka en a. " Nang aia ka thlan zawk i hlau anih kha" ka ti ve leh hmiah. A che thuta, ka nghawngah a rawn reka, "mipa dang vanga min kalsan duhna rilru i pu anih chuan i thi ang. I hria em? " a ti hrawk. Min thlah lehnghala, "He mihring hi i tan a tha lo ka tih chuan awih mai rawh. Nang aiin tu nge anih ka hre chiang zawk" a ti leh hmuk hmuka. 

"I hrechiang reng ang chu. Dpi cousin ni miau hek" ka ti nghat. "Eng maw i sawi? " a ti supa. "I beng a ngawng loh kha" ka ti leh hmiah thung.

"Nia, ngawng miah lo. Mahse, I sawi kha a dik lo nge ka hre sual. Dpi leh Zorempuia an in cousin iti em ni? " a ti nghut a. "Ka ti ngei chu ania lawm. Chuvang a ni lawmni i hriatchian em em? " ka ti ve zela. Za miah lo hian a then suka. 

"A cousin chu ni lul lo ve. A bialpa anih kha" a ti vawt ruih.

"A ni lo" ka ti deuh vaka. "Min en teh, engatinge mihring hian mize pahnih kan nei tih i hriatthiam theih loh? I bula ka awmdan leh midang bula ka awmdan danglam zia hre reng chungin engtin nge ani kha ilo rin theih a? Ka P. A phone number i chhuitir te kha ka hre lo emaw i ti ange? Ka hre vek asin. A bialnu hlui thihna avanga ka laka phuba lak tum anih hi. I duh phawt chuan chhanna ka pe ang che" a ti leh nghut nghut. 

Ka phone min laksak thuta, whatsappah a lut a, Naruto ti a ka save chu msg a va thawna. Reilote hnuah a rawn reply a. Ka hmuh turin a rawn keng hnaia. 

"Phaia kan awm laiin atthlak deuhin inzawmna kan lo nei ve zuai alawm. Engtin nge i hriat? " tih inziak kalh chu ka chhiar a, "Zuai ni loin buaina tamtak min siamsak a, nau hial an lo ti tla dun a" ka beng bulah u Sangzela'n a rawn ti leh a. Nizan atanga thil thleng zawng zawng hian min ti chau zo tawha, ka maimitchhinga, ka khup zawi deuh thut leh ka ni deuh huih bak chu engmah ka hre zui tawh lo. 

Ka harh leh chuan khumah ka lo mu a, ka lu a rit luk mai. Ka tho chhuaka, kawngkhar lam ka pana, ka hawng tur chiah chu Faki a rawn lut a, "ehe, I lo harh tawh maw? I zia deuh em? " a ti nghal vat. 

"Ka tha, ka tui a hal lutuk a, eng nge i rawn tih a? " ka ti sap. 

"Zanin chu u Sangzela a buai dawn sia,i nuam bawk si lo nen ka rawn awmpui che anih hi" Zangkhai tak hian a ti a."lo awm rawh, tui chu ka va la ang" a ti leh zung zung. 

"Khawnge a kal a? " Ka tih chuan a kalna a sawi nghal a, prog duan lawk sa vek a ni chungin engmah ka hre ve chuang lo. 

Roomah kan awm duna, a titi siam siam renga. Amah hi keimah ang deuh tho niin a nu lutuk vak bik lo va. Mahse, kei anga mipa ang deuha khawsa chi kha chu a ni ve chiah lo.

"Ka inthiar lawk dawn, in pa pawh chu ka rin aiin a rei" Tih pahin a tho a. Ka phone-ah offline game a khel paha. 

"Khawnge i phone? Ka lo hmang lawk ang" ka tih chuan min pe ve mai. "Ka keng lut dawn ania aw" tih pahin ka phone a lekkang zauha, ka bu nghat. 

Toilet a a luh fel veleh Balcony-ah ka chhuaka, tukverh ka pawt khar nghal hmak. 

"Hello.. " Rempuia aw hian a rawn ti zang vuh. 

"Naru… keimah ka nia" ka ti sapa. "Ka cousin number atangin ka rawn bia che. Ka phone a min lo biak hunah kan nupa chungchang zawhna engmah rawn siam suh, Hi, hello tih leh game vel chungchang mai mai chauh lo sawi rawh. I hre thiam em? " ka ti leh zung zung. 

"Za-rin, I tha miah lo tiraw?" a rawn ti chat. 

"Tunah chuan ka tha… " ka ti vat. "Ok, a lawmawm. Anih leh tinge tlaiah khan khatiang min rawn zawha? " a ti leh supa. " Ka hre duh mai mai mawle. Ka dah phawt' ka ti leh thuai thuai mai. Diktak chuan u Sangzela khan Dpi nen nau hial lo ti tla dun tawh angin sawi mah se ani aiin Rempuia hi kawng engkimah ka ring zawk tho tho. Mi zawng zawngin mize pahnih kan nei vek tih pawh a sawi hmain ka hre daih tawh a, aniin a sawi thiam em vang khan ka rin loh phah chuang lo. 

Faki rawn chhuah chuan a phone ka lo pe a. "Kha, I coins ka hmang zo vek. Kha level tak kha ka zo thei lo" tih pahin ka phone min pe let a, a phone a khawih zawm nghal zata. 

"Enteh, zanin a inpa thusawi hi a viral lehnghal anih hi" Tih pahin ka hmai bulah phone a rawn lek hnaia. A thusawi lai minute 3 vel lek niin a sawi tha ngang maia, mahse ka luak a tichhuak hlui thei. 

"In pa hi chu aw.. CM atan hian ka awt thlawt. A pa mai sia, ram hi han hruai tak tak se chuan kan va han bawn dawn tak" a ti leh lek phei chu ka uak teuh ngang mai. Thusawi thiam, tih tawh lamah chuan mi chak leh thluak tha, chhungrila ramhuai pai, chu pawh ramhuai sual ber chi pai a ni a. Mi tamzawk hi a lamtang niin amah hian chu chu a hai lo. Lo inthen in a mize dik lo leh tenawm tak hi sawi vek pawh ni ila tuman an awih ka ring lo hial. 

Kar a liama, ka nawm hleihtheih loh avangin chhuah pawh ka chhuak meuh lo. Dawr lam pawh Faki kutah ka dah rih tawpa, a niin hna a neih loh lai a lo ni hlauh bawk. 

Zan ka mu tha lo chho leh a, zing ka harh phat atangin ka harh lo em em thin bawk. Zan hi chhun ang maiin ka hmanga, chhunah ka muhil nasa zawk mah. Engmah ka ti tha peih lo a, ka zawi ngawih ngawih a ni ber. U Sangzela nen kan inhau nawn leh ta miah lo va, mi a leh rilru lama chiang lo ang pawhin min treat zui chuang lo. Mak takin min control emaw min veng run ang pawhin a awmzui chuang miah lo va. Kei lahin kan In lama haw tumna pawh ka nei zui bik chuang lo. Va haw tehreng pawh ni ila mi a leh rilru kim lo ang maiin min lo enkawl anga, helai ai mah hian ka hrehawm dawn tih ka hriat vang a ni pakhat bawk. Ka awm awmin ka awm tawp maia. Ka dam tha lo tih erawh keipawh hian ka inpawm ve tana, mahse rilru lam ni loin taksa lam dam lohna a ni zawk thung.Min control tum awmin awm lo mah se min enthla reng tih ka hai loh avangin Rempuia emaw ka thiante dang pawh tumah ka be hmasa ngai lo va. Ka u bulah pawh engmah ka sawi tawh lo. Min rin lohna khan min tina tawk a, ka pa ang em chuan haw lo mah ila ka be chak thlawt lo a ni ber. A chang chuan ka pa fa ka ni ve lo anga u Sangzela sawi kha ka hre chhuak fo va, hriatchian law law duh chang ka nei a. Mahse,ka lo ni lo mai ang tih hlauhna avangin engmah tih loh ka thlang leh zel. U Sangzela lakah engtin emaw taka chet lak dan tur ka zawng ve renga. Mahse, chet lak mai dan tur ka hre tlat lo. Han insualin kut hial pawh thawh ve thin mah ila a chhe ber thlenga kal tur hi chuan ka thisen hian a ngam thin lo. 

"U Arin, I thil chah a lo thleng a" kan nula-in a rawn ti a. Engmah ka chah ka hre hauh lo. "Ka thil chah maw? " ka ti ha. "Aw, hei hi ania" Tih pahin ka hmaah a rawn daha. Ka lakkan chuan Percel lian vak lo niin a rit nalh mai. 

Roomah ka keng lut a, balcony-ah ka chhuahpui leh a, kan room chhungah camera a dah ru em ka hriat loh vang a ni pakhat. Camera pawh lo dah se a cover phak lohna tura ka rinah ka thu a, ka hawn chuan ka rin loh tak maiin phone a lo ni a. Phone ka lakchhuah chuan a hnuaiah lehkha inthlep a lo awm a. Ka pawtpharha, "I phone tur aw.. Sim card pawh ka vuah sa vek ania. I hmuh hunah min lo bia la" tih hi a lo inziak kalha. Min rawn thawnthu inziak miah lo mah se rindan ka nei tho. 

"Naru" nui chungin ka ti sap. 

"Hello… " Nidang ang bawka hriat nuam tak hian a rawn ti dam thlupa. "Ti nge hetiang i rawn tih duh a? " ka ti ve sap. 

"I that leh that loh ka hre duh alawm. I vantirhkoh ka nih kha" Nui chungin a rawn ti a. 

"Ka mamawh pawhin ka hre chiah lo" ka tih chuan a thaw deuh huai ri ka hria a. 

"Hey, I mamawh tih ka hria alawm. I reh vang vang thin hi a reh lo zawk ania" a rawn ti dam thlup. 

"Ka reh loh chuan a that chu" Nui chungin ka ti a. "Ka sawi awmzia i hria" Nui huk chungin a rawn ti a. 

"Enge i an? I tha tak tak em? " a rawn ti leh nghala. 

"Um, tunlai chu buaina a awm lo. Mahse, keimah hi ka harh lo lutuk thin, damdawi ka ei vang hi nge ni ka ti hiala" ka ti a. Ka mutna damdawi min chawh ka ei mek thu ka sawi zui mawlh mawlh. 

"Ei tawh lo chhin la, I lo ngeih lo pawh a ni maithei ania. I dam that kha a pawimawh ber" a rawn ti a  

"Um, nia.. Ka ei lo chhin ang. Vawiin lam inbuai em? " ka ti leh a, an buai vak loh thu a rawn sawi a. 

"Naru… ka hriat chak deuh ka zawt dawn che ania" ka ti leh thut a. "Min zawt la" a rawn ti ve mai. Thawk ka la deuh vang vanga. 

"Keimah hi min buaipui tak tak nge Dpi vang? " ka ti ban chat. 

"Dik taka chhan che i duh em?" Dam thlup hian a rawn ti a. "Ka duh ang ka ring" ka ti ve sap. 

"In pahnih tan a ni ve ve. Dpi khan a dikna chanvo hmu se ka duha, nangin zalenna hmu la ka duh bawk" Nghet charh hian a rawn ti a. 

"Um, anih leh Dpi khan i fa a pai em? " ka ti leh chu a nui huk."khai aw, ni lul lo ve. Naupan at vanga inzawmna nei ang lek alawm kan nih" a rawn ti zuia. "Ka hriat dan a dik lo anih dawn chu. Mahse, dawt pawh min hrilh la engmah ka tan  tangkai chuang lo va" ka ti leh nghata. 

"Dawt ka hrilh lo che. A thurihimin vantirhkoh dawt sawi ching i hre ngai em ni? " a rawn ti chu kan nui dun a. 

"Ka dah phawt ang aw. Nakinah kan inbe leh dawn nia" ka ti a, "ok… tunah chuan ka hahdam ta deuh alawm. Engpawh thleng se min hrilh vek zel dawn nia. I pasal hi tihmualpho tum ka ni lo ania aw. Chuan, kut i tuar fo dawn tih pawh ka hria a, chutiang hunah pawh chuan zep miah suh ang che. Dpi ang bawk khan na i neih pawhin nangmah leh nangmah inti na angin i chhuak zel dawn a. Tumah ring suh, I pa leh i u pawh hian an hmu fiah thiam lo vang. Keipawn ka hmufiah mai bik lo ania" a rawn ti leh duah. 

Phone ka switch off a, u Sangzela hmuh theih loh tur in ka thukru fel nghal hmak bawk. 

Tlaiah ka beisei loh takin ka nu leh Melo-i an rawn lang hlawla, "I dam lo tih pawh ka lo hre miah lo va, Mama lah hi engmah a sawi lo thin bawk si a" Ka nuin a ti a. "ka tha tawh alawm. Tlemin ka la chak lo mai mai a" ka ti ve thuai. "I cher reuh tawp, rinai takin i na anih dawn hi. Chaw te i ei tha em?" min en reng chungin a ti a. "Ka ei hleithei lo, mut ka harsat deuh bawka" ka ti leh mai. Melo-i a titi siam siama. Zanriah ei ve nghal tur a ka tih chuan min hnial lem lo. 

U Sangzela a buai dan ala ngai renga, a zin chhuak awl lo bawk. Kan nupa nunin hma a sawn meuh lo. Kan inbe tlem em em a, mahse ka pa te nena kan awm ho lai ang tho khan mikhual kan nei thei em em a. Zing atangin amah hmu duh-in an nghak thup a, midang hmuhah chuan a hma ang bawk khan nupa tha lem kan chang zawm zel. Mahse, keimah ka dam that loh em avangin roomah ka inkhung tama, mi pawimawh bik tak annih loh chuan ka thutpui rih meuh lo. 

Thla a liama, sex kan hman hnuhnun ber atang khan ka la period miah lo a, ka damdawi ei nasat vangah ka puh deuh ngawt nangin ni hnih vel chu ka awmdan a danglam chho tawha, ka rai hmasak zawk tum nen khan inang ka ti a. Testna tur ka kawl tho avangin u Sangzela chhuah hnuah ka test a. 

Line hnih sen kalh mai chu ka melh reng. U Sangzela ka hrilh ang nge hrilh lo ang tih ka ngaihtuaha, ka rai hmasak zawk pawhin an vau a, tun thleng hian ka chhiat chhanah khan u Sangzela hi ka la ringhlel ta renga. Tunah hian ka rai tih hre ta se min tihtlaksak leh mai ka hlau a, amah haw em em mah ila ka fa erawh pai puitlin ngei ka duh ve tawh. 

Thla a ral leh hnuah pawh engmah ka la sawichhuak chuang lo. Ka muthilhna damdawi min chawh kha ka thlah hmak tawha, ka thlah hnu atangin ka nun nguai lutuk pawh a reh chho tial tiala, tunah chuan dawr lamah pawh ka kal ve leh ta zeuh zeuh. Mahse, karkhatah vawi hnih te ka tlawh a. Nitin Rempuia nen kan inbe ziaha, u Sangzela inthlahdul angin lang mah se ka fimkhur em em reng tho. 

Thla hnih lai anih takah chuan in check up loh reng dik a ka hriat loh avangin, u Sangzela zin lai chuhin ka hmelhriat tha tak, hmeichhe Doctor ka pan a. Vanneihthlak takin engmah dik lohna ka lo nei lo. Kan hlauhthawn zia te ka sawi luama, nau ka pai tih pawh mi hriat kan la duh lo tih thlengin awihawm takin ka sawi bawk. Mahse, a zin a lo haw hunah chuan tha taka hrilh tho ka tum a, ka hrilh loh rei lutuk chuan buaina dang ka tawh palh ka hlau a, tunah hi chuan ka fa himna ka ngaipawimawh ber. 

Kar tawpah a rawn haw a, a inbual laiin a zin bag ka lo enfel saka, a thawmhnaw suk tur a pack ho bal bawma dah turin a pack na atangin ka phawrh a. Ka beisei loh lutukin a kekawr ipte-ah CD bawm ka chhar ta nawlh mai. 

"Eng nge tah khan i din renga? " a rawn tih chuan ka phu zawka. Chhang loin ka inher a, tawng miah loin ka thil ken ka tilang a. Diktak chuan ka pasal hi hmangaih miah lo mah ila hmeichhe dang laka uire turah ka lo dah chhin ngai loh tlat avangin min deng na viau tho. 

"Eng nge a? " tih pahin a rawn  kal hnaia. 

"I kekawr ipte-ah ka hmu" ka ti hul hak. "Eee, kha thil kha maw. Pipe tawn nana kan hman anih kha. Hminga'n a lo ak hlauha" a ti awlsam et. A thilsawi chuan minti thinrim mai pawh a ni lo, sawi ngaihna hre lo hian ka nui chhuak nghal hak.

"Mi a ka ni lo ania" ka ti zuia. 

"I a ka ti che em ni? " a ti bung vuta. 

"Min ti lo mah la i sawi awih tura min ngai khan min ngaihdan a lantir vek" ka ti ve hmaka. 

"Ka sawi dik tlat a, I awih leh awih loh chu i thu alawm" ngaipawimawh lo tak hian a ti leh a. 

"Ni e, ka thu" ka ti bul hmak. 

"A that chu, a thuhrimah i awmdan hi ngaihtuah la, khawih pawh chakawm loh khawpa phurna nei lo alawm i nih. Mipa ka nia, mamawh ka nei ve bawka, ka nupuiin ka mamawh min pek duh loh chuan midanga ka zawn mai angai tihna ania. Mahse, ka zawng lo hlauh" a tih chuan, hmeichhe dang mutpui pawh ni se ka thiam loh a ni tih sawi a tum tih ka hai hauh lo. 

Ten takin chhuatah ka paiha, ka rap hruala. Ka va en chuan min lo melh reng. A mitah tak ka en a. 

"Sex i mamawh vanga midang i mutpui anih chuan ka thiam loh a ni lo. Nupa a kan insiam hnuah hian midang laka in uire san turin eng chhuanlam mah a tha tawk zo lo. Kan nupa kar fel loh zia hi ka hai lo va, mipa hrisel pangngai tak ni si a min mamawh ngai miah lo te hi mak ka lo ti thin a.. Hmeichhe dangah i duh i lo hmu thin tih ka lo hre lo atin ni" ka ti dam thlap. Ka awki dam thlap mai chu keipawhin mak ka ti viau. 

Tawng a tum lai takin ka ban ka phar hluaia. 

"I duh duh mutpui la pawi ka ti lo. Min hmangaih lo va, keipawn ka hmangaih lo che. Mahse, ka nau pai mek hi chu tha takin ka hring tawh dawn. Min tihtlaksak tum tawh suh ang che" ka ti leh a. Cho takin a mitah ka en ran bawk.