Naruto - 11

 Then - 11na

"I lo hre sa reng tawh mi? " a ti zuia, ka lu ka thing vata, 

“Engmah hriat sa ka nei lo,eng nge i sawi awmzia tak? Chutiang thilah engvangin nge a inrawlh anga?” pangngai tak hian ka ti a, ka msg dawn leh a thilsawi hi inmil em em mah se msg ka dawng tih hrilh ka tum rih chuang lo.

“Ka hriattirh pawhin ka awih lo lutuka,a inrawlh nachhan tur a awm lo hrim hrim bawka, mahse ka ngaihtuah hian thil thleng ve thei chu ania lawm” a ti leh a, “ I ti mak e a, thil thleng thei anihna pawh ka hre ve lo. A thurhimah tu nge hrilh che a?” ka ti leha, ka lipstick ho tul uk lovin ka lek kual seka, “Kan hriat loh lamah hian sawi neun neuh a awm tlat anih hmel a, min hrilhtu tak chu ka thian pakhat ania. Mahse engmah sawi chian pawh a awm lo va,bakah Mama hi chu a hmingthatna hi tihchhiatsak duh an awm renga, hetianga beihna a tawk hi amak chuang lo va” a ti leh zela, "Nia,a dik alawm. Bakah hetiang neuh neuh hi angai pawimawh vak lo, ngaihpawimawh zel chuan awmngaihna a awm lo ve bawka” ka tih chuan a bu nghata, “ A dik chiah..Tuangchhah angai ve alawm. Engmah a tih ring lo phawt ang, thuthar ka hriat leh chuan ka hrilh leh ang che. Mama chu lo sawipui chuang lo la..Hei hi maw i duh ber chu? Chah lehnghal tur anih hi,pahnihin ka rawn rul ang che” a tihzawm leh zat.

‘Khaia,chutiang em em angai lo,pakhat kha a tawk,i rulh loh pawhin a pawi lo bawka” ka ti leh thuaia,nui hak hak chungin a phone a khawiha, “ ka chah fel,a lo thleng har lo chek ang, karkhat vel chu aniang” a ti leh mai.

Chawei turin ka sawm nangin a duh lo va, “ ka nu hi a nuam thei lo lutuka, ka hman chuan inah awm tam ka duh.Matetei awm tho mah se ani hi chu tlemin nangmah nen chuan a danglam a” a tih chuan “Engtia danglam maw?” ka lo ti thuai. A bag a phone leh ka nu ta tur thil ka pek a thun hnuah min rawn en a, “ Mo te rel chu ka duh miah lo ta, mahse ani hi chu rel loh a har ve deta, nizanah pawh ka pain Arini te zawk lo awm hle hle se tha tur a ti ve khauh alawm” a tih chuan mak ka lo ti viau. Matetei ka hmuh apiangin inthlahrung hmel pu tak leh hnawksak lo taka khawsa chi a ni a, a hma pawh khan a rai no a huat chungchangah Meloi hian tawngkam a nei zauh tawh bawka, mahse mahni mopui te chungchang chhe zawng lo hriat tum viau kha ka duh lo va, ka haider a ni ber, tunah pawh hian zawh zui pawh ka duh chuang lo.

"A la awmtir ve em a, a inthlahrung ve ngawt ang. Kei kha chu inhre sa vek rawn mo ka nia. Mo khawsak pawh ka khawsa hran lo ve a. Kan inang lo ang" ka tih chuan a thle zauha. 

"Chutiang lam pawh a ni chiah lo. Mizia lam hi a pawimawh ve a. Aaaa, nang hi chu tuman mo en hian kan en lo che" a ti leh a. "Awihawm loh loh, min tihduhdah em kha" ka tih chuan kan nui duna, "Ka kal dawn. Ruah hi sur a tum leh hmel tlat. A sur hnem thei si, khua lah a vawt chuang em em bawk si lo' a ti nang nanga. " A sur har lo maithei a ni" ka lo ti ve bawk. 

Rin ang ngeiin a kal atanga minute 10 velah ruah a rawn sur tana, sur satliah pawh ni lo hian a buakin a baw tlawrh tlawrh a ni ber. Kan room Balcony a thu chungin ruah sur bawrh bawrh chu ka en renga, thli a thawt vak loh hi chuan Balcony a zau tha bawk nen a huh ngai lem lo. 

Ruah tla sung sung mai chuan eng emawti tak hian ka lung a ti leng a, ka nu ka ngaihtuaha, ka ngai vawng vawng maia, ka mize pangngaiah chuan lunglen hre mang lo ka ni thina, mahse ka nu ka sun atang hian ruahsur hian ka lunglen a kaitho ta fo thung.

Ka pa ka ngaihtuah kai takah chuan ka msg dawn bawk ka chhiar nawn leh a, ka ipik hluah hluah a ni ber. Engvangin nge ka pa tana a pawi theih na tur tih lai tak erawh ka hre thiam lo. Sawrkar hnathawk tha tak leh  eirukna do kawnga thawhhlawk tak anih avangin a lar a, pa fing tak anih bawk avangin midang thurualpui neih ai chuan mahni a engkim ti duh a ni tih ka hria a, chuvangin msg rawn thawntu hian eng nge atana pawi thei a lo neih ang ka hre lo. U Sangzela ka ngaihtuah veleh a, Champuii nen engtin chiah nge an awm dun ang ka hre lo  chungin min vau tu hian an pahnih awmdun lai a ngah tih a sawi chiang a,sawi lang chiah lo mah se awmdun satliah anni lo tih hai rual a ni lo. Kan nupa kar a chhiat tak tak kha chuan duhtawkin hmeichhe dang kawp se pawi ka ti ngai lo va. Mahse, tunhnai chhoah kan nupa kar a hlimawm em em a, hmeichhe dang a kawp ni awm taka han hriat ringawt pawhin a mi den dan a dang ta zak tih ka hai lo.Pathian zarah keima pual eizawnna ka nei a, ka lakluh pawh a chhe hek lo. Mahse, chutichung chuan pasal chu pasal a ni a, kawng tamtakah ka rinchhan tho tih ka inhai lo. Ka hmangaih em phei chu hre lo mah ila duh chu ka duh ve viau bawk tih ka inpawm a, ka pa lakah beisei tur ka nei lo bawk nen, amah hi ka inngahna a ni chho tial tiala. Kawng tamtakah Rempuia ring mah ila ani chu ka thian niin u Sangzela erawh ka pasal a ni a, an pahnih hi ka tana an pawimawhna a inang thei lo. 

U Sangzela thawm ka hriat rualin room chhung lam ka pana, bawm lian angreng tak mai hi a rawn pawm lut luk luk a, "Eng nge ni a? " ka tih chuan " I lo zia deuh em? " min rawn ti ve thung. "Um,ka tha reng, ka dam lo hleinem, eng nge kha kha? " ka tih leh chuan a nui a. "Rawn hawng la" a ti awlsam mai. 

Ka pan pheia, a pawn lam atang ngawt chuan eng nge anih ka hre thiam mai lo.. "Ka ta tur em ni? "ka ti leh riha, tawng lo in a bu nghuta, a kawrhak lai phelhtumin kawrkilh chung ber a phelh zui nghala.  Keipawn box hawn tumin ka bei ve nghal bawk. 

Guitar ka hmuh rualin phawk zet hian u Sangzela ka va en a. 

" Ti nge a? " ka ti ngawt pek. 

"Ka leisak che nih kha.. I duh ka ring a" Nui chunga a tih chuan tuna a nui hmel ang hi ka la hmu zen zen lo tih ka ngaihtuah daih. 

"Ka van lawm tak.. Tinge min leisak thut a? " phawrhchhuah pahin ka ti leha. "I zai chak ang ka ti.. I guitar hlui lah i hralh daih sia" a ti awlsam leh mai. "Aaa, pakhat a la awm tho alawm.. Mahse, ka lawm tak tak ania aw" ka ti leh mawlh mawlh mai. 

Phur takin ka enfel vel a, ka duhtawka ka en hnuah thla ka laksaka, guitar nen kan pahnihin u Sangzela'n thla min laksak ve bawk. 

U Sangzela inbual tura a luh hnuah thianho groupah ka post nghala, min lawmpuina thu an rawn thawn nghal sap sap bawk. 

Kan nula pakhatin min rawn koh chuan living room lamah ka phei thuaia, Buatsaiha leh tlangval pakhat an lo thu dun a, "Sir hi a awm em? " Buatsaiha'n a lo ti thuai. A inbual mek tih ka sawi chuan kan vengchhung chhiattawh thu a sawi nghal a, "An inchhak mual a tawlh a ni ber ang chu. Pu hian a hriat thuai loh chuan fel lo ka tia, mahse phone a pick up thei si lo va, a hmuna kal tum kan nia, kan rawn peng kawi lawk anih hi" a ti leh zung zunga. 

"A inbual zo tep ang, lo nghak law law ula,a pawi inti em? " ka tih chuan pawi an lo ti lo. Chhiattawk te in awmna lai vel te min hrilh leh zung zunga, kan in atanga a hlat deuh avang leh hmelhriat ka neih lohna lam a ni a, Sunday a inkhawm tura kan kal bak chu ka kal ngai miah lo. 

Room ka luh chuan a lo inbual zo tawha. Kawr ha lo in towel nen chauh a lo la awm a. Buatsaiha te lo kal thu leh an thilsawi ka hrilh chuan a phe nghal vut a ni ber. Hun tam a liam hmain chhiattawhna lamah an tlanchhuak zui chu a nimai. 

Kan veng chhiattawhna chuan reilote chhungin Mizoram pum a fan chhuak nghala, vanduaina tawk chhungkaw 5 awmin, ruang 3 an pawrh tawha, chin hriat loha bo an la awm nual avangin an zawng zela, vanduaithlak takin ruah sur lah ban tum lo in a tam tawlh tawlh a ni ber. U Sangzela pawh chawei tura a rawn haw zawk bak chu a awm ta renga, a bialchhung ni lo mah se a tihtheih zawng zawng a ti a ni ber. Ruah sur lah a han fel tak tak thei lo va, chu  chuan chet a ti harsa a, chhanchhuaktu pawl lam tan pawh duh anga chet theih a ni lo.

Ka phone a rawn nghawr dat chuan ka ban vata, WhatsApp msg lo awm chu ka hawng nghala. Ka beisei loh lutukin u Sangzela thlalak hlir a lo ni a. A awmna hmun leh a thawmhnaw hak atang chuan tun lawka lak a ni tih a chiang reng. Buatsaiha'n ka hmuh ve hrim hrim atan min rawn thawn anih ka ring deuh a, mahse ngaihtuahchhuah neiin nizana msg pangngai rawn thawntu kha a nih leh nih loh ka en tawn nghal thuaia, ka rin ang ngeiin a lo dik chat mai. Engvanga hetiang thlalak min rawn thawn ngawt nge ni ang tih ka ngaihtuah lai takin msg  a rawn thleng leh a. 

"Politician.. " tih ringawt a rawn thawna, a thlalak min rawn thawn ho ka en chian leh chuan a lak sakna a hla lo hle tih a lang theia, hlauhthawnna nei thutin u Sangzela ka phone nghala, a la pick thei lo zui. Ka call nawn leh chuan a rawn pick up a, "Hello.. " awki dam angreng taka a rawn tih chuan ka hahdam nghal huai thei. 

"I lo haw dawn tawh em? " ka ti ta ngawt. "Aih, hna hi a la laklawh si a. A theih chen chen kan awm ange. Min lo mutsan la, a tlai tawh ania" a rawn ti leh thuaia. 

Kan inbiak zawh hnu a msg check leh ka tum chu mak takin a lo delete leh vek. Tu nge anih hriat tumin ka call nghala, a ring reng nangin a pick -up duh der lo. Ka call nawn leh chuan a hmet busy a, msg pangngai a rawn thawn ta thung.

"I pasal chhui rawh ka tih kha, I pasal hian tual a that. A nupui pawh kha a thata, tunah Champuii a that leh bawka. A chhan chu amah tichhe thei tur thil an hriat vang anih kha. Chu thil chu eng nge anih hriat tum rawh, I him na tur anih chu" a rawn ti duaha. Call mah ila a pick leh dawn chuang lo tih hriaiin msg-in tu nge anih ka zawta. Min reply lo chiang viau. 

Ka call leh ngata, a lo switch off leh hman tawh. Ka tho a, phone pakhat zawk lachhuakin Rempuia ka call nghala. Balconyah dingin light eng in ruahsur sung sung a chhun fuh chu ka thlir pah a. 

"Hello, Miss.. I lo va call tlai ve, eng nge thleng? ' a rawn ti dam thlup. 

" Msg ka lo thawn che.. En phawt teh, eee… I night em? " ka ti leh rih a. 'Aih, night lo ve. Msg hi a lo thawn tu ngai bawk lo thawn che kha em ni? " a rawn tih zawm zat. 

"Aw, whatsapp-ah zanin a u Sangzela chhuahna thlalak vel min lo thawn teuha, thil awmzia zawh tuma ka call lahin a pick duh bawk si lo a. Minti mangang ve lek lek tawh" ka ti hap. 

"Vawiinah ka lo enkual vel a, rinai takin hriat a har a. Mahse, lo lungngai lo la, naktuk lamah chuan a fel mai ang" a rawn ti zang leh vuh. 

"Awm Dan tur pawh hi ka hre lo, pasalte ringhlel nih ngawt mai te hi a hrehawm ve lutuk a, ka ipik lutuk" ka ti leh halh. 

"Um, ka hre thiam che alawm. Hahdam lo tum phawt teh, in pa chu leimin na lamah a kal tihna mi? " a rawn tih zawma. 

"Aw, a lo haw pawh ka ring lo, ruang la hmuh loh an awm nual sia" ka tih chuan a thaw deuh huai a. 

"A ti tha hle mai. Chutihrual chuan Politician tih hian inpa chu a sawifiah ber mai' a rawn ti a. A tawngkam rawn hman chuan thil min hriatchhuah tir zawk mai.

" Eng maw i sawi? " ka ti sap. "Eng maw? Enge ka sawi a? " a ti deuh hu a. " U Sangzela kha engtin maw i sawi? "ka tih chuan, " A politician ka ti.. "nui chung hian a ti a. " Msg min lo thawntu khan tiang chiah chuan a rawn sawi" ka ti nghat. A thaw deuh huai chu ka hriaa, " Miss, min ringhlel tihna a ni em? " a ti sup."Ringhlel chiah lo, mahse msg kha min hriatchhuahtir" zep nei loin ka ti a. 

"Ka tana i pawimawh zia i hriat kha" tih bak engmah a sawi lo va. Rinhlelh tur anih lohna lam engmah a sawifiah hek lo. 

"Ka pawimawh em ni? " ka ti leh nghauha, "I inhriat aia nasa Khan i pawimawh. I pasal lakah chauh ni lo, mi zawng zawng lakah humhim che ka duh a, I Vantirhkoh ka ni ka tih khan ka ti mai mai lo ania. Naktukah ka lo en leh anga, ka hriat theih chin chin ka hrilh ang che" a tih dam leh thlup. 

"Um, ni e.. Kan inbe leh dawn nia, mangtha phawt" Thildang sawiloin ka ti ta zawk. 

Ka mu meng kar renga, ka ngaihtuahna lah a ngai leh ngaiah a kual sek a ni ber. Sana ka en chuan zing lam dar 1 a lo ri tawha, ka mut la chhuak lo mah se ka mit a thial urh tawh.  Tihber tur pawh hre chuang loin IG lamah ka lut kual vel mai maia. Champuii bawk ka en kuala, amah ber dam ta lo chu engmah update a awm lo. U Sangzela lan venna ho chu comment ka enkual diat diata, engmah han ngaihbel tur ka hmu lem lo. Hna thilah vawi tamtak an zin duna, engthil nge amah thah duh hialna tur thuruk chu ni ang tih ka ngaihtuaha, Dpi pawhin a hre bawka, a thih phah tak tak anih chuan engthil nge ni ang?? 

Ka tho chhuaka, u Sangzela laptop a bag atangin ka lachhuaka, a lock lo bawka enkual theih ang ang ka enkual nghal zung zung a, thlalak ho ka en chuan folder hrana a dah bik chu ka hawnga, ka rin loh takin Dpi thlalak deuh hlir a lo ni a. U Sangzela laptop leh phone hi ka khawihpui ngai lo tluk a ni. Dpi thlalak lo awm pawh hi a awm tih ka hre lawk lova,a nupui hlui thlalak ka hmuh vangin thinrimna pawh ka nei chuang lo. 

Engmah thil pawimawh ka hmuh tak loah chuan shut down mai ka tuma, mahse a mail lam ka check sak leh riha, tah pawh chuan engmah thil pawimawh danglam bik ka hmu chuang lo. 

Khawvar hnu lawkah u Sangzela a rawn haw a, chanchin ka lo zawh chuan ruang an la hmuh kim loh thu a sawia, a inbual zuai hnuah a rawn mu a. A chau bawk aniang, a mu fel deuh chauh emaw tihlaiin a hnar nghal der.

"Khawiah nge i awm? " Phone ka pick rualin Melo-in a rawn ti nghal a, a awah chuan hlauhthawnna a lang thei bawk. 

"Dawrah ka awm, eng nge ni ta? " ka ti thuai. "Chanchin kha i hre tawh em? " a rawn tih leh chuan engmah ka hriat loh thu ka sawia, a thaw hapa. "Champuii leh Mama thlalak an ti viral ania" a rawn tih chuan ka thaw hawk mai. "Eng thlalak ber nge a? " ka ti vat. "Ka rawn thawn ang che. Awi, hrehawm ka ti lutuk. Siam chawp a ang si lo" a rawn ti leh zung zung. 

Phone off chuang loin thlalak a rawn thawna, ka hmu chiah chu ka mengphawk vak maia, u Sangzela lang fiah lutuk lo mah se amah ngei a ni tih a chiang vek. Khumah an thu duna, thawmhnaw ha vek mah se khum a mahnu nupui ni lo han thutpui chu tutan pawh ngaihdan siam a harsa lo. 

"I hmu em? " a rawn tih chuan "aw" ti bakin ka chhang lo. "Mama i be dawn nge keiman ka be dawn?" a rawn ti ram leh hmaka, "ka lo bia ange" ka ti ringawt. 

A off deuh chiah tihin ka phone a rawn ri leh zata,ka u a ni a, a sawi tur ka hriat sa avangin ka rejected hmak. U Sangzela ka call nghala, rei pawh a ring hmain a pick up thuaia. "I buai em? " ka ti chu ka tum aiin ka aw a bung hret. 

"Buai viau, I rawn phone chhan ka hria. Inah kan inbe dawn nia. Ka dah phawt ang" a ti bung hmuk a, ka tawng leh hun pawh nghak loin a off nghal hmak bawk. 

Rempuia ka call dawn chiah tihin amah zawkin min rawn call a, " Miss, kan number duh kha vai pakhat hminga book ania, mahse amah vai ber Khan mizotawng a thiam loh bakah phone kha thla hmasa lama an ruksak a lo ni a. A phone a hmu let nangin a sim card zawk kha a hmu let lo tih vel a ni" a rawn ti nghal mawlh mawlha, min rawn biak laia a tower man fuh a sawi bawk. 

"Thlalak kha ilo hmu ve em? " a thil rawn sawi lam ngaihven loin ka ti hul hak. "Yes, hmu e.. A ti viral tu kha an chhui mek" zangkhai angreng tak hian a rawn ti a. "Chuti maw? " ka ti fan deuh raih ringawt. 

"Um, kan dept lama ka thian pakhat ka zawt alawm. An buaipui nghal thu a rawn sawi a" a tih leh chuan, " Keipawh ka hmu a, engtia awm chi nge pawh ka hre rih lo" ka ti sap. 

"A zia lo viau chu anih kha. Siamchawp mai anih loh hmel bawk a. Engpawhnise, a chingfel thuai mai ang. Sawrkar mi pawimawh ania, khatiang thil kha chu a tan harsatna lian lutuk a lo ni chek ang. Mahse, mipui sukthlek a danglam ve hret dawn chu anih kha" a rawn ti duah. 

In ka thlen hnu lawkah Melo-i a rawn thleng ve nghal a, nidang angin kan nula te pawh tumah a be lo. Kan pahnihin roomah kan awm dun a, sawi tur hre lo in phone kan en dun ngar mai. Fb-ah a hman apiangin group hran hranah an post chhawng zela, tawngkam duhtui lo tak tak an kat nuk mai bawka, ka phone lah a ri sek mai bawk nen min ti chau hluah hluah tawh. 

Ka uin a rawn call leh chuan peih lo tak hian ka pick up a, " Eng nge thil awmzia? " ka rin ang ngeiin a rawn ti a. " Ka hre bik lo" tih bak engmah sawi tur ka nei lo. U Sangzela dar 6 velah a lo haw a, ka pa leh nu Sangi an rawn kal tel ve bawk. 

"A post hmasa bertu kha an chhui meka,ani kha man phawt se a fel duak mai ang" U Sangzela'n a ti a. 

"Ni e, I hming thatna kal mek tihchhiat tum anih ngei ka ring. Tei pawn chu chu i hriat a tha ang" a tih chuan engmah ka sawi lo. Ka rilru tur dawn lek lo va u Sangzela tih hmingchhiat tumna anga min pawmtir a tum nghal tawp mai chu ka ngaihdan a ni lo bur.

An vaiin chaw an ei ve nghal a, pangngai taka khawsak ka tum teh nain ka pa ka huatna erawh nasa takin a zual a, engkim a u Sangzela a thlawp zia a tilang vel chu ka luak a tichhuak hluah hluah a ni ber. A fanu rilru tur dawn lek lo va a makpa ringawt mai a ngaihtuah chuan min ti tlawmngai ngawih ngawih a, u Sangzela ai pawhin thlalak viral kha a tuar zawk emaw tihmai tur a ni. 

Ka hmaiah night cream ka hnawih mek tihin a intifai zo bathroom atangin a rawn chhuaka. 

"Thlalak kha engtik a inlak nge ni reng reng a? " Hawi let chuang lo hian ka ti a. Darthlalang atangin eng nge a tih mek ka hmu thei vek. 

"Kan lak a ni lo" a ti hmuk. "Ooo, nia… I hre lo tak ang" ka ti ve nghat. 

"A ngeiawm zawnga khawsak lo tum miah suh" a ti bak hluka. "Chutianga ka khawsak pawh ka hre lo ve. Anihna takah chuan thinrim tur ka ni zawk" ka ti ve hmak. 

"Thinrim na chhan tur a awm lo. Engmah thilpawi kan ti lo" a ti leh hlur mai. 

"Thil pawi intih leh tih loh lam ai chuan engvangin nge khumah khan in thut dun tih lam zawk a ni. Thutna tur dang a tam awm tehreng nen.. " ka ti leh hmak hmaka. Nin hmel zet hian min rawn en a. 

"Thut angaia kan thu animai. Mi khei fek fek hian tawng lo teh, I pa pawn a hrilh chian viau che kha. Nupui tha i nihna lanchhuah hun tak a ni" a ti leh chiah chu ka thinin a tuar tawh lo. 

"Englaiah khan nge nupui tha ka nihna lan a tulna? Nanga bialnu nei thupmawi hi ka hna a ni lo ve" ka ti chang ta fak. Min rawn din hnaiha, " I pasal ka mualpho rualin i mualpho ve tih tal chu hre teh, kha thlalak en ringawt khan engmah a fiah lo. Ka mutpui ngei em tih leh kan inngaizawng em tih pawh a chiang chuang lo. I hriat tur chu min tihchhiat tumtu opposition party lam min beihna anih kha" awki ngai deuh pat hian a ti a. A tawngdanah chuan a thusawi chu pawm hmiah turin min ti tih hairual a ni lo va. A la confi em em zui bawk. 

Khumah a lawna, mu chungin phone a khawih zui nghala. A lo haw tirh phat atang khan a awmdan engkim ka rin loh Dan vek a ni tawp mai. Midang awmlai kha chuan engmah a sawi duh lo pawh a ni thei a, mahse ka bulah lehzel chuan pawi a tihzia sawiin thupha a chawi ve te ka lo ring a. A teuh ta lo nasa lutuk ringawt. Mahni insawithiamna leh politics huang chhunga inbeihna angah angai tlata, tha taka engmah sawipui theih lah a ni hek lo. 

"Ka lo hriat ruk dan chuan Champuii kha inawkhlum ni loin thah a ni a, a bul tumtu chu nangmah niin ka hre bawk a" zawi fiah angreng tak hian ka ti a. Min rawn en nghal vat. 

"Eng maw i sawi? " Thutchhuah pahin a ti a. Ka sawi ngai bawk ka sawi nawn veleh mai. 

"Tu nge chu chu sawi? " thinrim takin a ti thawt a. Ka ip deuh chawih nangin vau zam theih nih ka tum lo. 

"A sawitu lam ai chuan sawi theih a i awm zawk kha ngaipawimawh ta la" ka ti leh nghauh. 

"Ka ngaihpawimawh tur lam chu min hrilh duh suh, tu nge chutiang chu sawi ka hre duh" thinrim tak hian a ti leh hmuka. "I hriat duh chu engpawh i hre thei vek a, chhui chhuah tum mai rawh. Kei chuan sawi i kai hi mak ka tia, a, sawitu lam ka care lo" ka ti leh hmak hmaka. 

"Pasal te laka zep tur thil niin i hria emawni le? I mizia hi ka hne ngawt mai che" kha zet hian a ti a. "Kei aiin zep i ngah zawk fe tih chu nangmah khan i hre chiang khawp ang.. Chuan.. " ka tih lai mekin "tu nge sawi ta che.. Kutthawh a, sawi tir kher em ni i nghah a? " a ti khur khur. 

"Kutthawh.. Hmeichhe kutthlak hi intihtheihna chi a ni emawni le? " Hlau lo niawm tak hian ka ti duh lek. A rum nghuta.. "Melo-in min hrilh, mahse i hriat a duh lo viaua, va zawt kher duh suh. Mo sual nih ka chak lo ania" Tiel tak hian ka ti leh hmak hmak a. Engmah sawi loin phone a la a, Melo-i biak a tum anih ka ring nghal mai. 

Bathroomah ka lut a, a tul aia rei fe ka awm hnuah ka chhuak a, phone hmang chungin Balcony-ah a lo awm a. Melo-i nen an inbia anih ka ring mai. 

Ka mu nghala, mu chungin phone ka khawiha, ka thiante hoin engmah groupah an sawi lo va, mahse pvt msg min rawn thawn vek thung. 

Phone ka dah tur chiah chu Melo-i msg a rawn thlenga, notifications a lang chu ka pawtthlaa.. 

"Mama kha ilo hrilh ta tho alaw? " tih hi a lo ni a. "Aw, sawipui ta mai" tih zawngin ka chhang. 

Muhil thei loin ka let ka leta, u Sangzela erawh engmah thleng lo ang hmakin a mu hil bawrh bawrh thung. Thil ngai leh ngai ka ngaihtuah kual vak vak a, thawpik leh manganna nen ka hah ngawih ngawih a ni ber. Hmingchhiatna tawrh hrim hrim hi thil nuam lo anih tawh nak laia engmah sawipui hleihtheih loh a a awm hian minti thinrim a, ka pa lahin min vuipui a hnekin a tan em em bawk si. 

U Sangzela tawng riah ka harh a, phone-ah tu emaw be mekin a vin ngang mai. Ka thuchhuaka, chak tak taka kan room chhunga a vei kual chu ka en reng. " Tunah khan tifel nghal vek rawhse. Ni lo ve, a thiamthu sawi turin hun pek angai lo, thiamthu sawi tur a nei lo" a ti leh tun tun a. Thlalak lo post tu an man tawh anih ka ring ve tawp. 

"An man tawh mi? " Phone a dah veleh ka ti nghala. "Tu maw an man ang? " bak hlur hian a ti ve thung. "Tu nge man tur awm chuang a? Thlalak post darhtu bak kha" ka ti ve a, a mood a fuh loh zia ka hriat avangin tihthinrim belh loh hram ka duh a, mahse ka tum aiin ka aw ki a vin ta tho. 

"Lo buaipui duh suh, ka chingfel thei. Nizanah ka nu te inah misual a che a, Melo-i a khawih na deuh anih hmel a, misual lah chu ka pa hnathawk zinga pakhat a ni zui a" Thinrim takin a ti a, ka tum loh lam a sawi takah chuan hamhaih tak hian ka en a. 

"Engtin nge a khawih a? A na viau em? " ka ti nghal vat. 

"A hnek a, chemtein a vit bawk anih hmel. Mahse, a banah a vit a,damdawiinah chuan an admit lo" ka beisei aia tha mah zawk hian a ti a. 

"Engtin nge chutiang khawpa a chet ngam le? Tu ber nge? " ka tih leh chuan min chhan hmain a phone a rawn ri a. An inbiak danah chuan ka pa a ni tih ka hre thiam mai. 

Darkar khat a liam leh chuan ka pa te inah kan awm tawha, Sangtei te nupa leh ka pa leh nu Sangi an awm a, thenawm hnai tlem bakah khawtlang hruaitu an awm ve bawk. Melo-i common room thutthlengah a mu a,chau chhia leh na lutuk a ni lo bawka thil thlen dan a sawia, U Sangzela leh Atea an thin a rim em em tih an awm danah a lang theia, ka pain a bengdai hram hram a ni ber. 

In a kan let leh hnuah ka u in min rawn biaa, Melo-i chung chang a lo hre ve a lo ni a, ka hriat dan ka hrilh ve bawk. 

"Tukinah kan thianho groupah an rawn forward a, rapthlak ka lo ti lutuk a. I pa te bula cheng rei tawh nge an hnathawk thar zing a mi? " a rawn ti a, ka pa te hnen atang vela hre tura ka ngaih laiin ka rin loh lam atangin an lo hre daih mai. 

"Ka pa ten an rawn hrilh che emaw ka tia" ka tih chuan "aih, anni chuan hrilh nang. An hre ve tawh zawk em ni? " a ti he haw. An nupaa  ka pa te inah an lo kal ve thu ka sawi chuan "an va ti tha ve" a ti nghal zata, ka ner nghek thung. Misual chanchin min rawn zawh leh chuan ka mo lai pawha awm tawh leh mi tha tak anga kan ngaih anih thu ka sawi chuan mak a ti ngang mai. 

"In pa te thlalak lam kha amah i sawipui em? " Tim deuh niawm tak hian a rawn ti leh a. 

"Sawipui tur vak a awm lo. Ka vanduai a, ka nu ang maiin pasal ngaihzawng neih ching ka nei ve anih hi" ka ti hmak. Ka thilsawi vang ni ngei tur hian a thaw deuh hapa, " An inngaizawng tihna a ni kher nang. Chhan tha tak vanga midang awm lai renga thu dun pawh anni thei a, I ringchhe lutuk atin nih kha. Chutiang mizia pu thei hian ka hmu tlat lo" a rawn ti duaha. "U, engatinge ka pa nen hian kei aia u Sangzela in tan zel theih le? Ka hre thiam thei lo che u" thinrim rilru na bawk siin ka ti ta thlawt. 

"Khatiang zawnga i ngai tlat kha alawm i rilru dik lohna. I pasal kha keini zawk hian kan ringa, nangin i ring lo va, a sualna ngawt i hmu kha alawm mak chu. Mihring hian kan thatna lai theuh kan inhmuhsak loh chuan kan cheng ho thei nang" a rawn ti ta duah. 

"A thatna lai ka hmuhsak lo em ni? I chenpui loh chuan engmah sawi tawh suh, ka pa pawh lo hrilh rawh, keimah min tan thei ngang lo anih chuan engmah rawn sawi tawh lo law law rawhse. Min ti ipik lutuk" ka ti ve ta hmak. A tlak karh a, "I mak mang e aw. I rilru hi a kawi ka ti dawn nge i naupai rilru no hi a la reh lo zawk ni. Puitlin lam pan teh, u Sangzela tan pawh a hahthlak dawn em mai" a rawn ti leh ta zel. 

"I ngaih dan dan khan ngai teh, I pasal khan khumah, a bialnu ni a an sawi thla a lakpui ve hun ala awm anih chuan, i ngaihdan ang khan i la ngai em kan hria ang chu" Elsen tak hian ka ti a. A thaw hap  ri ka hre thei a. "Chutiang hun a lo thleng anih pawhin ka nu ang khan keichuan ka pa hi ka thlawp zel ang. A mualpho ka duh dawn lo. Ka sawi awmzia chu nang ang hi ka ni ve dawn lo" a rawn tih chuan a thinrim tih ka hria. "A tha, I ti ngei dawn nia. Chuan maw, la pasal hi vantlang hmaah ka thlawp lo ngai lo. Ka laizawn neihchhun i nih angin ka rilru natna ka share mai che anih hi. Kan nun hma lam a lo chhe thin viau anih pawhin nau pai mek chung hian ka pasal hi ka hek chhan tur a awm lo tih hria la, Vawikhat tal pawh ka pa nen hian ka lamah  tang ula ka lawm dawn nen, in thei ngang lo chu ania. Ka pa fa hi ka ni ve lo tak tak pawh chu a ni mahna' thinrim rilru na bawk siin ka ti leh hmiah. "Eng maw i sawi kha? " rawn ti mah se chhang tawh loin ka off ta hmak. Ka pasal chungchangah kher kher chuan ka u hi ka be leh tawh ngaiin ka ring lo. 

Mak takin u Sangzela mualphona chu Melo-i thil tawn chuan a hliahkhuh titih ta tlat. Mipui tamtak ngaihdan lo danglam hman mah se Melo-i vanduaina nena hmelbel in amah tihchhiat nana thangkam an awm angin thu a thang zui ta chiam bawk. 

"Ka lo phei dawn, naktukah inhmu ang" Rempuia'n a rawn ti a. U Sangzela hian Rempuia chungchang engmah a sawi ngai tawh lo va. Kawm tawh lo tur pawhin min ti ngai tawh lo. Ka WhatsApp msg ho a hmu thei anih chuan kan inbiakna pawh a hmu fo tur a ni. Mahse, kan inbe zen zen lo va, kan inbiak dan berah pawh "In dam maw? " tih vel mai mai bak a ni ngai lo va. Karkhatah Vawikhat pawh inbiak loh chang kan nei zui bawk. 

"Eng nge i rawn tih dawn a? " ka tih chuan, "Raipuar pakhat hian ka tanpuina a mamawh mek tih thu ka dawnga" Hriat nuam tak hian a  rawn ti a. Ka nui nghal hak mai. 

"A that chu, I lo chhuak tawh nge? " ka ti a. "Dar khat velah kan rawn chhuak ang.. Karkhat vel chu khalamah khan ka awm ang" a rawn ti leh a. Motor khalh chak vak vak lo turin ka hrilh ve bawk. 

Ka en ngai enin ka thu a, Chhungril tak atanga ka pawhtheih chu Rempuia bak hi an awm pawhin ka hre ta lo. Ka u leh ka pa lakah ka beidawng thak tawha, u Sangzela lah khatiang thil a thlen hnu atang khan thinrim reng ang mai a ni a. Hnaih that ngam a ni lo. A huatthu a chhe em em a, ka thilsawi huat tur awm pawha ka hriat loh thlengin huat tlat chang a nei a, a thlalak an post sak kha keima tih tir emaw tihmai turin a thinrimna ka chungah a lantir vek a ni ber. Kan awmdan chu kan inpawh loh lai ang mai kha a ni leh tan mek tih ka hria a, ka bulah nui hmel put a thiang lo emaw tihmai tur anih laiin amah hmu tura lo kal te leh a hna thilah chuan a ka zen ngam khawpin a zaidam leh lawi si. Awmdan thiam har ka ti em em a, inchhungah ka leng lo niin ka hre leh tan ta. 

Ka nutei ka call a, a hritlan deuh avangin office a kal lo tih a rawn sawi a, leng turin an in lam ka pan a. Eng ber nge va len ka tum chhan pawh ka hre chuang lo. 

"I va lang tha ve. Rai i inhmeh mang e aw" Hlim takin min lo ti a, midang tumah an lo awm lo. 

"In pa te unau chanchin danglam deuh mai kha ka lo hre ve a. Engtia thleng nge ni? " a tih chuan Melo-i vanduaina tawh dan vel ka hrilha, u Sangzela leh Champuii thalak erawh chu midang awm lai renga lak anih thu sawiin ka thup mawi ve thung.

"In pa hi chu a hming tha laklawh em a, beih pawh an bei nasa ang" a ti a. A hmelah chuan a sawi dan ang ni lo ngaihdan a nei niin ka hre ve thung. 

"Nia, bei nasa.. Mahse, mak deuh hian an Inkawp ve zawk a rinna ka nei leh tlat zel" ka tih chuan ka mitah tak min rawn en a. "Keipawh mawle. I sawi takah chuan ka ringhlel tlat tih kan sawi ange" a ti fan deuh raih. 

"Nute, thildang daih ka zawt dawn che. Diktakin min chhang la ka duh ania aw" Champuii lam sawi zawm loin ka ti a, tunah mai tak tak khan ka rilru ka siamfel a, thudik hriat duhnain ka khat tlat a ni ber. 

"Eng thil maw i hriat duh? "  a ti thuaia. Ka sawi hmain ka hrawk a min hnawhtu awm tlat chu ka thian leh te te. 

"Ka nu khan a hrilh che em ka hre lo va. Ka nu leh pa fa hi ka ni em ka hre duh" ka huaisenna zawng zawng sawmkhawmin ka ti tlang pawp maia. Vawt tih vang ni hauh loin ka khur deuh titih bawk. 

"Eng a? Eng maw i sawi a? " Mak ti hmel pu hian Nutei'n a ti nawk nawk. Ka sawi ngai ka sawi nawn leh a, a hma ai chuan sawi pawh ka sawi mar tha ta zawk. A lu a thing nawk nawka, "Engah nge i nih loh tehlul ang? I pa i chhun lutuk hi alawm i tet lai atanga i nu buaina.. I sawi mak em mai" a ti nghal mawlh mawlh. 

"Ka ni ve lo anga inngaihna ka nei fo tlat. Ka lo chhun viau em phei chu ka hre lo bawka" ka tih leh chuan ka kut a rawn vuana, "chutiangin lo ngai tawh reng reng suh. I nu nena kan inkawmngeih fal zia i hria a, chutiang thil awm se chuan ka hriatpui em em ang. I nu kha mi chak ania, mahse eng emaw chang chuan i pa ngaihzawng neih ruk kha a sawi ve thin tho ania. Chuvangin ka bulah a sawi lo anih chuan hlauhthawn tur a awm lo" min hnem tum tak hian a ti leh mial miala, ka bu nghat nghat tak nangin ka rilruah erawh chhanna dik tak ka hmu lo ni a inhriatna ka nei tlat tho. 

Ka nu te In lamah chaw ei phei tur kan nih avangin Nutei te in atangin ka nu te in lamah ka tlang phei nghala. Kan chhungte thenkhat an lo awm nuala, Melo-i nu leh a pahrawn pawh an lo awm ve bawk. 

Melo-i roomah ka lut a, min hmuh veleh min lo hau nghala, "Ti nge Mama kha i hrilh kher a? " a lo ti nghal hmak. 

"Ka tawngsual palha, sawi ngei ngei angai atin nih kha" ka ti ve tawp. Ka rin loh takin a nui a, "I van serious em em. I lo hrilh kha pawi ka ti hleinem, a mualpho pui zui leh bawk si nen, khanu vang khan ka warning fo va, min rawn zawhfiah pawh khan ka lo ti let nek alawm" nui chungin a ti ta daih. 

"I lo tihnek chuan a that chu, kei chuan engmah ka sawipui thei hleinem, a thinrim nghal vak zela" ka ti nghat, a ner nanga. 

"Eng nge chutianga a awm vel a? I tihsual pawh ni hlei lo. A lo kal hunah ka lo hau leh ang. Ka ngei tlat" a ti nang nang.

"Ka hauh ai han hau tak tak teh" nui chungin ka tih chuan min ner khuma" Kha ti vel kha i nia.Hauh ka sawi chuan i khawngaih leh a" a ti bai baia. Pawn lamah nui hmel pu mah ila chhungrilah erawh hlimna pakhatmah ka nei lo. 

USangzela chhuah hnuah dawr kal tur in ka insiama, dawr ka thlen chuan Rempuia a lo thu vung mai. 

"Hello…  kan va puar lian tawh ve" Nui chungin a lo ti nghala. Nidang aiin alang hang deuha, a cher deuh zawk bawka. Mahse, a thawmhnaw hakin a zir bawka, a chhe lo lehpek viau. 

"I va hma ve, khawnge i kal dawn? " ka ti ve thuai. "Ka rawn kal. Tak takin inchung khi an khawih tawh chin en ka duha, hetah ka rawn lut hmasa lawk anih hi. Min han enpui la, I peih em? " Zang khai vuh hian a ti a. Kan dawr nghaktu nula pahnih chuan an en danah chhe lo an ti viau tih ka man thiam mai. 

"Ku Fak, inchung lamah ka han chho ve lawk ang aw. Eee, Faki hi i hria tiraw? Kan inneih a ka best kha ania. Ka cousin a ni bawka" ka tih chuan an inhriat thu an sawi ve ve. 

An lo khawih nasa tawh viau mai a lo ni a. An siam mek tih hre tho mah ila ka chho ngai lem lo bawka, eng chen nge an khawih ka hre lo. 

"Thu ang.. " Tih pahin kan piah deuha chair awm lam chu a kawka. 

Kan inzui pheia, "tah hian thu zawk teh, pahnih inni tawh sia, hei hi chu a plastic a nem em mai" nui huk huk chung hian a ti a. Ngei zet hian ka melh ram ram a, engahmah ngai loin a dar a tisang uk duh lek thung.

"Eng maw ilo tih dawn? " ka ti a, "ka sawi tawh kha. Raipuar hmeltha deuh pakhat hian min mamawh a" Nui chungin a ti a, va ben ka tum chu ka kut a lo mana, hriat nuam tak hian a nui hawk hawk bawk. 

"Tak takin hna thil buaipui pahin karhnih chawlh ka la a, gym hi tun thlaa peih hman ka duh bawka. Chuan, nangmah hnaih che ka duh bawk" Thutak zet hian a ti a. Ka kut a vawn a la thlah chuang lo. 

"Ka ipik viau' ka ti tehngawt. 

" Ka hria, I mu tha lo tih pawh ka hmu thei che" Nghet churh hian a ti ve sup.

"Engmah kan sawi dun thei miah lo hian min ti buai a, thlalak chungchang ka zawh lah khan keima post tir emaw tihmai tur in a teuh hlur zela" ka ti sap. A bu nghuta, "a hrehawm ve dawn anih chu.. Mahse, I pasal boruak chhia chu a nau Melo-i khan a hliahkhuh sak hneh khawp kha" a ti a. "Nia" ka ti ve sap ringawt. 

"Buatsaiha i hria em? "  a ti leh thuta. "Tu Buatsaiha maw? Eee, aw… Hre leh si, tinge ani daih chu min zawha? In lo inhre ve mi?" ka ti duaha. Nui chung hian min en a. 

" Zawhna min zawt hnem lutuka, eng kha nge ka chhan hmasak ber ang? " a tih takah chuan ka nui  ve hak. 

Ka hma zawnah a thutna a rawn hung rema, ka kut pahnih a hum kawpa. 

"Miss, thil hi rin aiin a buarchuar dawn, inpa hian a politics khelhna kawngah hian a tlin zelna tur atan engmah tih hreh a nei lo tih a chiang tawh.Champuii nen khan mimal taka inzawmna an nei ngei bawk. Vanduaithlak takin a hriat loh tur thil a hre palh nge ni a sawisep an kai tih a hriat vanga that zawk erawh ka la hre lo. A mualpho theihna tur hi a duh lo tawpkhawk tih ka hre tawha, a hmangaih lo che chu ka ti hauh lo nangin timualpho ngat la chuan engmah tihhreh a nei lo vang tih ka chiang" Nghet churh hian a ti a, a sawi chhung zawng ka mitah tak min en run a. Tunah tak hi chuan ka hmaa thu mek hi ka thian ni loin Police officer zahawm tak leh a hna tlin em em tu a ni zawk. 

Harhchhuak thut ang mai hian ka thu mara, ka kut ka pawt dawka, min vuan lui tlat bik lo. 

"Ka ring dawn che em? " ka ti hul hak a. 

"Min ring la ka duh" a ti ve sup. 

"A tana mi pawimawh, engkim tihsak hreh lo tu pakhat chu Buatsaiha kha a ni a. Basketball kan khelhho thin avangin ka inhre tha viau. Mahse, Buatsaiha aia pawimawh, engkim tikualtu pakhat a la awm. Chu erawh ka la confirm theih loh avangin tu nge anih erawh chu ka sawi lo vang" Nghet cherh chawrh hian a ti leh a. Buatsaiha a sawi takah chuan Champuii boral hma zana u Sangzela phone ka lo pick sak kha ka hre chhuak nghal zawka. Tah khan a fel vek tawh tiin a rawn sawi nghal thawr kha ania. Badminton tournament an neih tur chungchang  emaw ka lo ti ve ngawt a, u Sangzela pawhin Tournament an neih tur chungchang angin a sawi bawka. Mahse, Champuii zawk an dahthat Dan tur a rawn sawina a ni ve thei tlat. 

Note : Zan hnih lai ka mit lama harsatna ka neih avangin ka chawla, phone han khawih vel pawh ka ngam loh vangin ka rawn sawi ta lo maia. Min hrethiam dawn n

nia....