Naruto - 12

 Then -12na

"Eng emaw hriatchhuah ka nei" kan ngawih dun vang vang hnuah a ka ti chhuak hlawl. 

"Min hrilh chi a ni em? " a ti ve thuai a,Buatsaiha nen an inbiak dan ka hriat ka hrilh chuan a hmelah engmah mak tihna a lang lo. 

"Ka ring dik chho viau dawn anih hmel. Mahse, lawk… Thil pakhat ka hre duh, dik takin min chhang turin ka duh bawk che a" tih pahin a rawn kun hnaia, ka duh aiin min hnaih mah mah avangin ka thu ta auh. 

"Engkim hi hrechhuak ta vek ila, I pasal tan a pawi viau dawn. Chu chu thleng turin i duh tak tak em?" a tih chuan a hma ang bawk khan thian ni loin police officer a ni ka hmuh leh tak ni. 

"Ka hre lo… 'ka ti sap. A then suka, ka khabeah a rawn khawih zauha. " Ka hre thiam che. Engpawh ka hria anih chuan i thu hmu hmasa loin chet ka la lo vang. Ka tiam che"  Nghet cherh cherh hian a ti a, a sawi ang ngei hian a ti dawn tih ka ring nghal hmiah bawk. 

Dawrah kan inzui thla leh a, ani erawh rei awm tawh loin an hmunpui lamah kal duhna a nei tih a sawia. Kan pahnih chauha kan awm laia a hmel thutak leh ngeng tak kha midang zingah chuan hmuhtur a awm lo. Engmah thleng lo ang maiin a awm hmak thei. 

"Te, Angti hian Rempuia kha a lo star nasa bawn viau ania. Story a achangtupa a ang a ti anih chu" Nui chungin Faki'n a ti a, hre thiam lo tak hian ka en a. " Oooo, tunhnaiah hian mizo youtuber hoin story an channelah an chhiar thin a, bakah Facebook lamah tamtak chhiar tur a awm bawka. Chung zinga achangtupa chu a ang a tihna anih chu" a ti leh zat zata, a sawi awmzia ka hriat takah chuan ka nui hak haka, Angti lah chuan Rempuia piannalh zia leh chhe lo a tihzia ngawt a lo sawi ve bawk. A chanchin kan sawi zui tak chiamah chuan a bialnu ve lek lek hmeichhe chanchin kha ka zawt miah lo tih ka hre chhuak leh hnuhnawha, an inngaizawng ta em tih te pawh ka hre duh ve a, kan inbiak leh hmasak bera zawh atan ka khek ta ran mai. 

Faki nen mission veng lama kan dawr tlawh turin kan chhuaka, midang an awm loh takah chuan Faki'n u Sangzela leh Champuii thalak viral chungchang min zawt a, ka ngaihdan hriat a duh a ni ber. Ka nutei bula ka sawi ang bawk khan midang awm laia an lak anih thu ka sawi leh maia. Ani pawh chuan tih hmingchhiat an tumna angah angaia, u Sangzela mize chhungril hre lo tu ve tho anih avangin engmah vuivaina thlen ka tum hran lo. Ka u leh ka pa pawhin min thlawp lohna khawvelah hian ka cousin, ka pasal fel ti em em tu hnen atanga thlawpna hi chu beisei chi a ni lo ve. 

In ka thlen hnu lawkah u Sangzela a rawn thleng ve a. Room a rawn luh phat atangin a mood a tha lo tih ka hmuthiam nghal a, thil ho te pawh sawi ila kan inhau zui nghal dawn tih ka chiang reng. 

"Rempuia engtikah nge a lo phei? " a hmel nena inhmeh lo khawpa aw ki pangngai hian a ti a. "Niminah a ti, vawiinah dawrah chuan min rawn tlawh zuaia, I hmu duh mi? " ka ti tha ve mai. 

"Duh lo, amah ang deuh ka hmu a, ka zawt mai mai che" a tih leh chuan tlemin a mood a zia deuh niin ka hria a. "Chanchinthar a awm zel em?" ka ti zui zat. " Eng thilah maw? " a kawr phelh pahin a ti a. 

"Thlalak lo post darh vel chungchang kha, chuan Melo-i thilsawi kha engtia bawhzui nge i tum? " ka ti ta duah. 

"An man fel daih tawh, tuman hre lo se ka duh vangin kan thup rih mai mai. Melo-i thil sawi kha chu ka care vak lo. Duh duh chuan lo sawi se, intihhmingchhiat tumna anih avangin engmah sawifiah ka tum lo" a ti a. Intihhmingchhiat tumna mai mai anih loh rinna lian tak ka nei a, Naruto lah khan ka rinhlelhna a dik dawn tih min hmufiah tir tan mek bawka. Mahse, amah berin hetianga angai thei anih chuan ka ngaihdan lo sawichhuah sek ka tum lo. 

"Chu pa chuan khawi atangin nge thlalak kha a neih a? " ka ti leh ta hram. 

"Ka hre bik lo. An man tawha, police lamin an dawpchhuak mai ang. Tlangval hawklak satliah, smart phone hum ve ringawt, mahni smart si lo anih hmel" a ti deuh neka, a tawngkam a duhtui tawh lo nak laiin a sawi danah chuan a hmusit tih hairual a ni lo. 

"A tang rei dawn em? ' ka tih leh chuan nin hmel zet hian min rawn en a. ' Chulam chu ngaihven suh"a ti deuh hmuk. "Ka ngaihtuah em em pawh chu a ni lo, ka hre duh ve satliah mai ania" ka ti thuai. Min chhang tawh loin Bathroomah a lut a, ka rilruah Rempuia thilsawi kha a lo lang leh a, Tu nge amah engkim tihsak huamtu chu ni ta ang? A P. A pu  Hlua ti dawn ila ka ring si lo. A thiante kan in a rawn chuangkai ho lah hriat loh ka nei tawh lo va, a thu hnuaia han kun tlat tur chi ka hre bau lo. 

"Arin, I lo kal a ni maw? I lo thlenna a rei tawh em? " ka nu in min hmuh ve leh a rawn ti chul a. "Rei lo ve, ka thil tur Melo-i hnenah ka rawn lam zuai dawn a. I kawng na eng nge a an zel? " ka ti ve nghal sawk sawk. Melo-i a rawn chhuak ve a, ka lipstick tur a rawn ken bakah thildang a khai tel a, "hei hi ka leisak tel che a. I hak duh zawng a ni em pawh ka hre lo. Chapal hi chu i vung palh takin ka tia" tih pahin a kut na lo lama a thil khai chu min pe a. Raipuar hak chi kawrfual leh chapal, adjust mai theih chi a lo ni a. 

"Ti nge i lei duh kher a? Mahse ka van lawm tak" hlim takin ka ti a. "A tha ve alawm. Naute a lo pian hunah ka lalber dawn tihna animai" Nui hak hak pahin a ti awlsam et. 

Melo-i nen inchung zawla thutnaah kan thu duna, zing lamah ruah sur chiam mah se tunah chuan khua a thiang leh em em tawh thung.

"Ka muhil tha thei lo hi ka buai ber, ka phu zawk zawk zela, hei ber hian min ti manganga" a ti niah niah. "A ni dawn lutuk, khapa kha mak ka la ti reng, kha leh chen kan chengho tawha, mifel tak hmuhin ka lo hmu ve a"ka ti ve a. " Um, fel chu a fel ve alawm. Retheihna hian a nih loh tur lam anih tir ve aniang. Thil ruk a tum lai tak man ka nia, min hmuh tak thutah khan a hamhaih lutukin kut min thlak ni berin ka hria" a ti leh siam siama. "Nizan chu ka rin loh deuhin Dpi nau te ho an rawn leng nawlha" a tihzawm zat. 

" Chuti law? An va fel ve a. An rawn tlawh che mi? " ka tih chuan a bu nghat. " An fel ve viau hlawm alawm, an mize ni dem dem lutuk hi an bula awm a hahthlak deuh thin tih lohah chuan an fel vek. Dpi tak kha a rilru kawi nghet nei kha a buaithlak a' a ti a. " Hmeichhia hi chuan kawi nghet kan nei vek mai hian ka hria, period dawn mood swing phei hi chu buaithlak tak a ni" nui chunga ka tih chuan a nui ve hak a. "Dik chiah, huatthu a chhe duh si, min hrethiam deuhtu tan lo chuan a buaithlak ve thin ang. Mama chu a mood a zia deuh tawh em? " a tih zawm a. " Tlem chuan zia deuh tawh e. An thlalak an post pawh a buai nak laiin buaina i tawk zui leh khan a ti buai zual ve a" ka tih chuan a hmui a seha. " Tunlai chu kan chhungkua kan lar laih laih reng anih ber hi a. Mahse, mizo hi chu ri hluai, engmah hre rei lem lo kan nia. Hei kar a liam leh chuan tuman an sawi leh peih tawh loh hi" a ti a. "Dik chiah, kan han ri hluaia, engmah kan buaipui zui peih tak tak lo bawka" ka lo ti ve bawk. 

"Champuii vel kha Mama hian a buaipui zui em? Buaipui tih lemah ka thilsawi khan a ti danglam em? " a tih leh chuan ka lu ka thing naka. " A ngai serious lo lutuk, lo sawi ve mai mai rawh se a ti" ka ti nghat. A thaw deuh hapa, " Thil hi a ngai awlsam thei ka ti e. Mahse, keipawh atir lamah khan a tih ka ring thut thut nangin khatianga an thlalak a lar tak vakah kha chuan miin an bei mai mai niin ka hre leh ta tlata. Politics huangchhunga lut te hi chu Facebook velah party worker mawl pui pui hoin dawt leh thutak chawmpawlh hian an bei tawh mai thin sia. A buaithlak anih hi a' a ti duah. 

"Ka thu chu nise tun bak hi chu a in candidate tawh lo ang. Mahse, ka thu lo ve e" nui chungin ka ti a, 'Awi, I thu teh alawm a. I duh loh dana thiltih hlau reng reng hian a buai si. I inla ngam lo vel mai mai"nui chungin a ti ve thung."Ngam te chu sawi lo teh a, nula pa deuh theng thawng thin kha ka nu hnap tawh hi" ka tih leh chuan a nui hak haka. "A dik ve tho. Sawi tul lo mah se ka sawi leh hram ang. Dpi nen chuan indanglam ve thlawt, inbula awm a innawm hleih em mai" thutak zet hian a ti a. 'Hman zan chu i u laptop ka khawih a, Dpi thlalak a lo dahthat ho ka hmu a, a hmeltha ngawt mai. A uiawm ka ti bawk si" ka tih chuan phawk deuh hra hian min en a. "A la dahtha maw? A va han tul lo" a ti ram deuh hmak. 

"A tul lohna pawh a awm chuang hleinem, a dahtha kha a tihtur pawh a ni zawka" ka ti leh chu a ner naka. "Nupui dang a nei tawha, lo dahthat vel kha ho ka ti ve tlat. Mahse, engmah hi i haw ve tak tak ngai lo va. Hei vang hi ania i bula awm a hahdamthlak chhan chu. Dpi bulah kha chuan inveng ranin kan awm thin, amak lutuk" a ti lehzela. A sawi duh dan hi ka rin loh lam zel a ni fo ta maia, a mil lohna hi hmeichhe pahnih buaina mai mai niin ka hre ta tlat lo.

🖤🐸

"Enteh, thil pakhat ka sawi anga, mahse i u chu hrilh lo la ka duh che ania" zawi angreng tak hian ka ti a.Tawng loin  bu nghat ringawt. 

"Tunlai chu thilmak deuh deuh hi a thleng leh thina, Dpi thihna chungchangah sawi neuh neuh a awm tlat asin. I u thiamloh ang deuh dawn dawna richhuak a awm a" ka tih chuan phawk tak hian a meng a. "Tu nge chutiang sawi a? " a ti bung vat mai. 

"Chu lam chu sawi pawh ka duh lo. A accident ngei tih hi ka hriat dan anih laia hetiang thleng thlenga an sawi hi chu mak ka ti ve lutuka, bakah I u hi chu a mizia hi.. Aaaa, sawi lo zawk ang" ka ti ta daih. 

"Engtin nge a awm thin a? " A ti thuaia, a mitmengah chuan hriat duh a nei tih ka hmu thiam a, u Sangzela khawsak dan mak pui pui sawichhuah duhna leh sawi mah ila a awih ka rin lohna a inzat reng. 

"A thin chhe ve lutuk" ka ti ta ngawt. A thaw deuh huaia, "Awi, I lakah a che nawi ve emaw ka tia lawm" Hahdam huai hmel pu chung hian a ti a. "A che nawi tih lai tak kha eng nge a awmzia? " ka ti ta khauh. Min chhang mai loin a khap sak saka. 

"Dpi khan vawikhat chu min hrilh a, kut a thlak thin niin  a sawia, a taksa duk vel pawh min hmuhtir vek. Mahse, Mama ka zawh khan a pha nasa lutuka, amah Dpi lam rilru chiang lo khan a lo inti na chawp lek kha a lo nia. Chuan, Dpi a buai chhoh zui takah khan Mama hian a dawhthei tawpa, mahse a nasat tak chinah khan Mama hian vawikhat chu bengdaih a tumna lamah a thin a thawka, a thing deuh nek maia. Kan hlaungthawng lutuka"  a ti ta duah. 

"I nau chhiat bawr vel khan i buai ve hman deuh tih kan hriaa, mahse Mama hian a thup hneh em che a. I mizia a lo nu em em bawk si lo nen, Mama lah thinchhe bawk si, in buai ka lo hlau thin a" a tih zawm leha. Ka thaw hawk mai. U Sangzela mizia diktak ka sawi hman lo ka lawmzia chu pui tak a ni. A titi dan atang ringawt pawhin a u hi thilpawi ti turah angai lo tih a chiang reng mai. 

"Dpi kha rilru lam buai na nei lo niin a sawi chu a dik ve thut maithei asin' Ka ti fan deuh raiha. " Aih, a buai alawm.Mama lam a ni lo, kum 2 dawn in awm dun tawha, nangpawn Mama mizia chu i hria ang chu. Mi kutthlak chi a ni lo. Mahse, mi luhlul ania. A duh tawh chu neih ngei ngei tum ang hi" a ti leh ta tlat. 

Ka tawng leh hmain ka phone a rawn ri a, "Hello.. " ka ti nghal zat. "Miss keimah ka nia" Rempuia aw hian a rawn ti a. "Yes, eng nge ni ta? " zang deuh vah hian ka ti leh mai. 

"Dawrah ka lo nghak ang che. A pawimawh ania aw"  a rawn ti dam thlup. Sana ka en zauh a,"Ok, lo awm rawh. Ka nu te inah ka kal hmasa a, ka rawn thleng har tawh lo vang' zangkhai tak bawk hian ka ti leh a. Melo-in tu nge ka biak mek a hriat ka duh lo. 

"Tu nge a? " phone ka dah rualin a lo ti nghal chata. "Thomas-a, Rempuia a lo pheia, dawrah min rawn tlawh an tum aniang" ka ti zui zata. Kan inbiak lai khan kan inbia tih a hriat ka duh hauh lo nangin Thomasa nena sawi kawp erawh pawi ka ti lem lo. 

Driverin min hmuh ve leh ka thil ken ho min lo laksak nghal sawk sawka, ani hi kan Driver thar niin ala naupan bakah a smart thlap reuha, a viak a tha bawk nen kei lah ka fit lo tual tual a, ani hi ka hruai chawt a ni ber. 

Dawr ka thlen chuan Rempuia Bike a lo awm tawha, mahse dawrah awm loin inchung lamah zawk a lo awm avangin dawr ka thleng tawh tih hrilh turin ka call a, "Inchungah ilo chho peih em?" a rawn ti dut dut. Faki hnenah inchungah ka chho lawk dawn tih ka hrilh a, "Rempuia a lo kal zuaia, a la awm em ni? " a lo tih chuan ka bu nghat. 

"Helamah ka awm" ka lut min hmuh veleh a rawn ti a. A lo awmna lamah ka phei nghala, T-shirt var a hak chuan a tilang hang zual deuh nangin a inhmeh leh viau tho.

"Hetah hian lo thu rawh, a rinawm deuh ania" a tih chuan " I ninawm ve ziah, chuti takin ka rit lo" ka ti nghata, "Thu mai mai teha" nui put put chungin a ti duh lek. 

Ka thutna bulah a dinga, counter tura dawhkan an siam kual deuh pap chu a bawh titih a. 

"Ti nge Thomasa phone khan min lo call a? " ka tih chuan a thle zauha. "Minister saap hi a fimkhur tih ka hria a, ka number a rawn call che a him lo thei tih thu mai mai mawle" a ti sup."Ni ve tho, eng nge i sawi tur chu? " ka ti leh a. Dawhkan tlang a kik kauh kauha, "Melo-i eng nge a an? " a ti teh daih. 

"A zia tawh lutuk, mahse a la chhuak peih lo deuh a. Eng nge i sawi tur chu sawi la, kan inkhung dun reng chuan i hnathawktu ho sawn min sawi sep sep mai ang. Mi lar pasalah ka neih hi hre ta che' nui chungin ka ti a. A then suka, " Mi lar pasal i neih chhan chu a nupui hian i ti lar alawm. I hre na nge? " Nghal zet hian a ti a. 'I chhe lutuk" ka ti hlar mai. "Ka ti tak tak alawm. I lar tih hre ta che.. " a ti leh talha, ka melh vaka, a nui huk huk mai. 

"Melo-i vittu kha in hnena cheng rei tawh a ni tiraw? a tih chuan ka bu nghat a, " Niminah ka va hmu a, thilmak deuh mai ka va hriat chu Melo-in khapa kha a talawhtir anih hmel riau a. Vawiinah va hmuh leh ka tum laiin ka hmu thei ta mai lo va. Melo-i hi i tana mi tha niin ka hre lo. A lakah fimkhur ang che" Zawi fiah tak hian a ti a. A thilsawi ka hre sual emaw tiin ka melh reng. 

"Eng nge a tih ber chu ka hre mai thei lo va. Mahse, I tan a him lo ni a ka hriatna hi chu ka hresual kher lo maithei. A lakah fimkhur turin ka duh che" inringtawk tak hian a ti leh a. 

"Ni lo, chutiang a ni thei lo vang. Mize langtlang tak chi ania. Bakah, kan inmil a, ani kher chu ka laka sual turin ka ring lo" ka ti nghat. Ka kut a rawn vuana, "Dpi i kha chuan mihring rilru chhe ber a ti thin a" a tih chuan "An inmil lo em alawm. Dpi pawn a mil lo va, Melo-i pawn a mil bik lo va. Mahse, ka tan chuan a tha lutuk. U Sangzela laka ka thinrim pawhin ka lamah a tang ziah" ka ti leh tlat. 

"Miss, I tan a tha leh tha lo tumah an hriat hran rih loh hi. Tu lakah pawh fimkhur phawt rawh. Melo-i pawh i tan a lo tha anih takzet chuan a lawmawm animai. Mahse, I unaunu ni loin, I pasal farnu a ni tih hre reng rawh" a ti dam thlup. Ka bu nghata, hei kher hi chu ka chiang ve tawkin ka hria. A u a tan zia leh a hmuh that zia thlengin a hre chiang ber tu ka ni hial ang. 

"Champuii boral khan post mortem a ni miah lo va. Chuan, a ruang en diktu zinga pakhat khan a nghawngah rehna hnu niawm tak a hmu bawka. Mahse, chung zawng zawng chu tuman an sawichhuak miah lo. Thil tamtak hian i pasal a kawk a, pakhat pawimawh ka tih ber chu an inzawmna rawn langchhuak mek thup tumna a ni thei a, pakhat dang leh chu i pa nena sawrkar sum an tih chingpenna lian lutuk, an lo thup tlat a hre chhuak palh a, an dah tha a ni thei bawk" a ti leh duaha. 

"Ka pa maw? ' ka ti hap mai. 

" Aw, I pa… Diktaka ka sawi i duh em? " a ti supa. Ka mitah tak min en a. Tawng loin ka bu nghat. 

"I pa leh i pasal duhtak hian i pain sawrkar hna a thawh lai khan thil liantham tak an lo ti dun tawha, mifing tak ve ve annih avangin an mualpho lo va, hriatchhuah pawh a ni lo. I pa sawrkar hnathawk huaisen tak leh dikna duh anga miin an hriat laiin i pasal pawh politician langsar leh thangduang, dikna ngaina leh huaisen tak angin a lar bawk. An thiltihdun chu i nu khan a hriatpui em ka hre lo va, Dpi erawh kha chuan a hriaa, a thih phah ta chiah reng bawk" a ti ta chat chat. 

"Eng nge an tih dun chu? "  kan ngawih dun vang vang hnuah ka ti sap. 

"Sawrkar sum chingpen kam ka sawi dawn lo,..Mizoramah hian hausa thut thut an tam a, hausa thut anga lang si lo, damchhung daih pawisa nei an awm ve bawka. Damchhung daih nei zingah chuan i pa leh i pasal hi a chung ber dinhmun luahtu anni hial mai thei. A awmziaah chuan hausa thut kan tih te chungah hian an awm tihna a ni a, an sum neih vanga awm ni loin mizorama hausa thut thut ho zawng zawng control tu te annih hi" Nghet cherh chawrh hian a ti a. A thilsawi chu a rinthu sawi ni loin, a hriatchian tak sawi a ni tih hai rual a ni lo. 

"Engtin nge chutiang anih theih ang?" ka tih chuan a hmel a danglam zawka. Mahse, a incontrol leh nghal vat. 

"Sum a awm chuan khawvelah hian theih loh a awm ngai lo. Nunna a lei thei lo tih mai chauh a ni. Sum hi hlimna siamtu ber a ni lo ti mah ila sum tel lo chuan tumah an hlim tak tak chuang lo. . Chuan, I pa te hian Mizoramah hian hma an la dawn lo tih kha chiang phawt mai la, he lai hi chu a kal kawng pakhat ang chauh a ni. An kal tlanga, an kawng thianfai tur tamtak an awm bawka" a ti leh a. Ka zawhna neih apiang min chhang thla nghal zar zar ni maiin ka hriaa. Hun rei tak atang tawha ka pa leh u Sangzela'n eng thil emaw inzawmna an nei ni a ka lo rin thin chu tunah a chhanna ka hmu ta a, ka lo beisei loh lam daih a ni thung.

"Hetiang zawng zawng hi i hre lo der tlang thei emaw a mize mak tak hi i sawi mualphosak anih loh chuan i him zel turah ka ngai che a. Mahse, kei hi chuan Dpi thihnaa thil thleng diktak hriatchhuah ka tum zel dawna, a dikna chanvo hi chang ngei se ka duh tlat. I pasal i thlawp duh anih pawhin ka huat phah dawn lo che a. Chutihrualin nangmah bikah chuan venzui che i ngai lo niin ka hriaa, ka inthiarfihlim ang" Inringtawk tih hriat ngawih ngawih hian a ti a. Ka lo thaw hawk thung. A sawi ang ngei hian ka ngawi reng anih chuan ka him anga, mahse ka pasal mize tenawm tak leh ka pa nena an inzawmna zahpuiawm tak te hi ka zep pui anih chuan an mahni nen ang khat reng kan ni dawn. Dpi leh Champuii thihna chungchangah pawh hriatchhuah tum lo va ka awm mai mai anih chuan hmeichhe pahnih nunna laksak tu nen kan inang reng tihna a ni bawk anga, midangin nunna an la chan belh leh cheu thei bawk. 

"Engmah ka hre thiam rih lo.. Ka buai nuai maiin ka hria' Ka tih chuan a bu nghuta, " I rilru tur ka hre thiam alawm. Kan inhmu zen zen tawh lo maithei a, ka sawi duh zawng zawng ka sawi a, thil chi hrang hrang in i deng che a, rilru a mumal lo duh khawp ang' Min hrethiam takin a ti ve a.

"Engatinge kan inhmuh loh anga? " ka ti nghat. "I himna ka duh ber ka tih fo kha" a ti mar ut.  " Min hmuh loh chuan min venghim thei dawn em ni? " ka ti ve thung. 

"Lo kal teh" tih pahin ka ban rekah a rawn vuana. Tukverh bulah min kai pheia. 

"Khulaia tlangval hawi mai mai khu i hmu em? " tih pahin kan awmna ep chiah, kawng lehlam dawr sira mipa pakhat ding chu a kawk a. Ka bu nghat. 

"Tunah hian i dawrah awm loin ka gym tur siam fel mekah kan awmdun tih i pasal hrilh tu anih khu. Hetiang khawpa enthlak i nih chhan hi keimah vang a ni a, hlatsan che ila i him animai" a tih chuan ka ip deuh chawih a. "Min enthla tih engtin nge i hriat? " ka ti ban chat. 

"Police officer ka nih hi.. Mahni invendan leh ka tana mi pawimawh te venhim dan tur chu ka hre ve bawk ang chu. Mahse, I pasal hi a che chhe miah lo" nui chung hian a ti a. 

"Engvang chuan maw? " Ka ti zuai raih. 

"A nupui hi mi namai a ni lo tih a hria che a. A veng che hi a tihtur diktak a ti alawm" Thutak zet hian a ti nghut. "A ringhlel che ni loin, I himna tur vangin alawm a enzui zel che. Mahse, ka hmuh loh vang ngawt chein ka thlah vang vang dawn che tihna a ni lo. I him lo tih ka hriat vaih chuan i pasal hi ka chhuah lo vang. Ka chan dawn lo che" a ti bung vut.

"Naruto…vantirhkoh i nih kha" ka ti sap ringawt. "Ka hria e" tih pahin ka darah a rawn kuaha, ka bek leh a bek a rawn ti si vang vang. 

In ka thlen veleh ka inbual nghala, Bath-tubah hahdam takin ka inchiaha, Rempuia thil min hrilh zawng zawng kha ka ngaihtuah let a, ka pa ka huatna a zual sauh a ni ber. U Sangzela'n min neih a duh tih a sawi hmasak ber a mak ka tihzia kha ka ngaihtuah let a, an sual inthup pui tawn turin kei hi min lo pawt kual vel mai mai chu ania. Ka pa hian mihring anga min en loin bungrua ang lekin min lo en tihna a nia. Na ka tihzia sawi mai hian a fiah zo lo. 

Ka inbual zo ka chhuak chiah tihin roomah a rawn lut ve a, biak chakna ka nei lo chungin tha takin "I lo haw chiah mi? " ka ti ta hram tho. 

Min chhang loin a bag khumah a thehthla a, ka hmaah tak a rawn ding zui zat. 

"Khawiah nge i kal? " bak hluk hian min ti a. " Ka nu te inah leh dawrah ka kala, ti nge? " Insum hram hram chungin ka ti a. 

"Dawrah nge dawr chungah? " a tih leh chuan "Dawrah, Rempuia a lo kal a, a thilsiam tir vel chu ka han enpui ve" ka ti nghat. Kalsawn tumin a sir lamah ka hel a, mahse ka banrekah tak a rawn man a. " I thianpa hian eng nge a buaipui ka la hrechhuak lo va, mahse lo hmu nawn tawh suh ang che" a ti bung hmuk. Ka ter nghal at nangin Rempuia thil min hrilh ka hrechhuaka, ka chip leh ta hmak. 

"Ti thinrim lo la, hriat duh i neih chu ti lungawi reng chungin chhui zawk ang che" tiin min chah thlapa, kha kha ka theih chen chenah vawn reng ka duh. 

Hun a kal ve bek beka, u Sangzela ti thinrim lo thei ang ber turin ka awm zui zela, mahse ani erawh chu a hmingchhiat zeuhna khan nasa takin a nghawng zui zel a ni ber. Thil ho te teah thinrim chiam a chinga, pawn lama a thinrimna inchhungah a rawn hawn a, keimahah hian a tuan zel ni berin ka hre tawh a. Mahse,hetiang taka a sual hi mak ka ti tawh lo, ka pa ngeiin min bungraw hralh tawp angin u Sangzela pawh hian midang te anga min treat loin,a bungraw pakhat,a thinrim hrikthlakna hmanrua atana a hman mai ka ni ve tih hi ka inpawmdan a ni a. A tawngkam ngeiawm tak tak te hre nitin mah ila ka tuar hram hram a, chhang let lo turin ka insum nasat angai thin ngang mai bawk. Melo-i ka tana a that loh a rin thu Rempuia min hrilh kha atirah awih duh lo mah ila rinhlelhna neih tlat chang ka nei ve ta. Mahse,a thawi pawhin alakah ka inveng tih a hriat ka duh loh avangin ka biak dan angai pata, a tawngsual erawh ka chang reng thung. 

Sangzela chhuak turin a lo insiam meka. Ka tho thawm hriain min rawn en a. 

"Insiam rawh, ka nu teinah kan kal angai" bung hmuk hian a ti nghala. 

"Ti nge? Eng nge thleng a? " ka ti nghal thuaia, a awmdanah chuan thil lawmawm lam a thleng lo ang tih a rin thiam theih mai. 

"Kal pahin ka sawi ang" a ti bung vut. 

A man Motor a khalha, a tlanmuang lem lo viau bawk nen tang mar auh chungin ka thu a, "Melo-i a tha vak lo anih hmel" tih zawng a sawia, a bak a sawi zawm lo.A sawi dan leh a mood atang chuan tha lo satliah ni loin a serious hmel viaua, damdawiin lamah kan kal ka rin laiin ka pa te inah kan kal lawi bawk si a, ka hre thiam chiah lo va, engmah phei chu ka zawt chuang lo.

U Sangzela'n Melo-i room a pana, kei erawh chu living roomah ka awm ve thung. 

Ka nu a rawn chhuaka, " I lo lut ve dawn maw ka tia" a rawn ti nghala. 

"In awm vek ka ring sia, kan ti ipik lutuk ang ka ti deuh" ka ti ve mai. "Ni ve tho mai tiraw.. Na-i, thingpui min lo siam teh aw. I la in ngam lo ta zel em ni? ' min ti zui nghal zat. Ka bu nghata, " Engtin nge tunah a awm a? " ka ti a,"A muhil mai ang. An Jection a" a tih chuan an nula pakhat thil tifai mektu chu a awm hnai deuh bawk nen zawi te hian a tawng a. 

"A muthilh theih chuan a that chu. Khawnge Matetei? " ka tih chuan "an in lamah chaw ei turin an phei anih kha" a ti awlsam leh mai. Keini Melo-i vangin zing zingah hmanhmawhin kan phei a, anni an in lamah chaw ei turin an phei leh lawi a. Thil dik lo engmah sawi tur hre si loin a dik lo vel hu maiin ka hria. 

Thingpui no chawiin ka nu Melo-i roomah a lut phei leha,va lut ve ngawt mah ila tih tur awm chuanga ka rin loh vangin luh phei tumna pawh ka nei lem lo. 

Inchung lamah ka chho a, kan in lamah pangpar dah ve ka rilruk avangin inchunga ka nu pangpar ho lo han en ka duh a. Pangpar ngaina eih lo, miin an khawi pawh a mawi leh mawi loh ngaihtuah peih ngai mang lo ka ni a, mahse mahni pual in kan neih ve atang leh nu ber dinhmun ka luah ve takah hi chuan pangpar te pawh rilruah an lang ve tan ta.

Nana-in pangpar tui a lo pe meka, "Nimin deuh chiah ruah a sur lo va, an vuai deuh tlat asin" a lo ti siam siam. 

Ka nu pangpar ho chu ka thlek kual dan dana, uluk taka enkawl anni bawka an hrisel tih a hriat ngang mai. 

"U Me-i chu eng nge a an a? " Ka bula rawn din hnaih pah hian a rawn ti a. Ka dinna bul hnai ami ho tui a pe paha. 

"A roomah ka lut ve lo va, a tha deuh anih ka ring" ka ti a. Min rawn en chuang lo hian a bu nghata. Vawilehkhatah ka ngaihtuahna a vir zawk a ni ber. Ani hi chhungkaw member tak tak ni ve lo mah se thil tamtak hre chiang tu a ni a. Ani hnen atang hian thil hriatchhuah tur ka neih ka ring ta tlat. 

"A hma ang bawk Khan em ni a awm leh a? Engmah pawh ka la zawt hlawm lo va" titi pangngai ang maia awlsam hian ka ti a. 

"Um, aniang ka ring. Ka hre chiang bik lo. Bakah, nizanah u Matetei nen an inhnial buai deuh bawka.. " zawi te hian a ti a. "Chuti law? Engtilah nge an inhnial a? " ka ti thuai. Midang an awm hnaih leh hnaih loh en niawm tak hian a thlek kual leh zak zaka. 

"Ui mawle, an ui te ve ve an insuala. Chuan, u Me-i ui kha a beng hmawr a thler a, zanah khan an va thuitir nghala. U Matetei ten tukinah ui chu an inah an va dah dawna, an kal mekin ka hria" a ti leh duah. Matetei hian an inneih khan ui a rawn chhawm lut a, Me-i hian pomeranian ui, thinchhe angreng tak a nei ve bawk. 

"A va zia lo ve mawle.. " ka tih chuan a bu nghat nghata. "A buaithlak ve alawm. Pasal te inah lehzel ui a lo chhawm a, a duat bawk si, u Me-in a ui a duat ve tho bawk si" a ti leh niah niah. 

"A tha lo hmel viau sia, tinge Damdawiinah an kal loh a? " kan haw kawngah ka ti a. 

"Tul an ti lo tih na nimai. Buaipui duh suh" bung deuh tak hian a ti a. 

"Ka buaipui pawh a ni hleinem, in hlauthawng tho sia, inah Doctor an awm pawh a ni lo va, kal mai a tha lo mi ka timai ania" ka ti a, tawngkam ngeiawm hman ka chak lutuk chu ka sa vek thei hialin ka hria. 

"Tu nge Doctor an awm lo ti a? " a ti leh chu ka lei ka veng hman tawh lo. 

"Tuman an ti lo" ka ti chang ta fak mai. 

"Anih chuan i duh duh sawi mah ta che" a ti leh hlur a. "Ka duh duh ka sawi emawni le? I ngaikawi anih kha" ka ti ve zel. "Thil sawi ve hun a awm ania. Ka hrilh che anih loh chuan chhungkaw thilah inrawlh suh, inhrang chang tawh kan nih hi" a ti leh hmuk hmuka. Ka chhang leh anih chuan ka tawngkam a chhe dawn lutuk tih ka hriat avangin ka ngawi ta hmiah. 

Chaw kan ei kham veleh a insiam sawk sawka, hna kal turin a chhuaka, kei erawh a chhuah hnuah ka insiam ve ta chauh. 

"Arin, kan va inhmu khat ve" minti tu chu nui chungin ka en a. "Ni chiah mai. I dam em? " ka ti ve thuai. 

"Dam alawm. Midang an dam maw? " a tih chuan ka nuia. "Kan tha e.. I hriat duh tak erawh chu tukinah a nuam chiah lo va, mahse ngaihtuahawm chu a ni lo" Nui chung bawkin ka ti leh a. Za lo deuh hian a nui ve a, "ka hre duh em pawh ka hre chiah lo" a ti ban chat "midang nghah i nei em? " a ti leh a, ka lu ka thinga. "Anih chuan i dawhkan ka tawm ve dawn che" tih pahin min ep zawnga chair awm a pawtchhuak zui nghal zat. 

"Kan makpa i ni dawn emaw tih laiin i ni leh duh mang si lo va" Eitur order tuma Menu a en laiin ka ti fiam leh zauha. 

"Khai aw, min duh lo zawk anih kha. I chah fel tawh mi? " menu rawn lek zauh pah hian a ti a. Ka chahfel tawh tih ka sawi chuan waiter koin a order a pe a. Waiter kalsawn hnuah chuan min rawn en chungin ka nau neih hun tur min zawta. "Thla li tling lo hret ka la nei" Ka ti ve thuai 

"Anih chu, in pa a phur tawh awm vut vut mang e" a tih leh chuan "phur ve bawk e a" ka ti ve maia, ka chhungrilah erawh chuan thildang daih a awm thung.

"Tunlai chu in boruak a chhe chho viau tihte ka lo hre ve a, a zia lo ka lo ti angreng khawpa. Melo-i lah kha misual kut a lo tuar bawk si, a zia lo khawp mai" Pawi ti tak tak tihhriat tak hian a ti leh a. 

"Vanduaina hi a lo thlen chuan a thleng dawt zut zela. Mahse, nunna em kan chan lo va, a zia lutuk. Eng nge in hna lam te? Tunah khawnge i kala? " ka tih zawm duaha, a tir lama zawh awm tak kan inbiak nual hnuah ka zawt ta chauh. 

"Kan buai ve nak nak viau zela, tluan chu kan tluang e. Kohhran thalai in special prog kan neih turah refreshment committee lamin order kan siama. A remchang em a thil ka rawn ei kawi zuai mawle. Nang zawk eng nge i tih? " a ti ve bawk. Bank ka dawr tih ka hrilh a, eitur nghah pahin thil dang dang sawiin kan titi a. Melo-i nen an inngaihzawn lai khan inah a rawn chuangkai tam em em a. Biak pawh kan inbe ve fo bawka. Mahse, khatiang hun laia naupangchhe chet deuh tlat thin kha tunah hi chuan a danglam ta daih maia, hun a la liam tam lutuk loh nen mak ka ti ru viau. 

"Melo-i a dam tha lo iti mi? " thutak angreng tak hian a ti a. "Um, a thaw hah a chhuak deuh a" ka tih chuan nuihza hmel pu deuh hian min en a. "Chuti law? A va zia lo ve' tha tak chuan a ti ta tho. " Nia, zia lo. Upat lamah chuan hriselna te a pan a" Fiamthu hian ka ti a. "Pasal neih duh hek lo" a ti deuh nghut. 

"Duh pawh ni se a hmu lo alawm. I duh mang bawk si lo va' ka ti ve thunga. Hetianga pasal farnu te bialpa hlui han titipui chiam hi a tul lo tih ka hai miah lo va, mahse nel taka titipui ka duh tlat. 

" Eitur pawh chu an va siam rei angreng tak, ka hmanhmawh asin le" Ti chungin sana ka en a. "Nia, an siam rei angreng. . Ka sawi tur a ni em chu ka hre lo va, mahse Me-i hi chuan pasal a nei lovang. A piangthar thut anih loh chuan.. " a ti a. "Ngati ngawt maw? " ka ti liam puat. 

"Kan inzui rei zia i hriaa,mahse inneih sawi hlek chuan inthen a cho nghal zela. Ka nawr tak tak chinah phei chuan kan tawp fel hmak mai ania. Inah a nuamsa em bawka, a awm ve tho mai" ka beisei loh takin a ti a. Melo-i ve thung kha chuan Rinzuala'n inneih angam loh vanga inthen angin a insawi ve thung. 

"Chuti law? A va zia lo ve aw" ka ti teh ngawt. Min chhan hmain kan eitur min rawn pe a. Ka order hmasa zawk deuh nangin min rawn pe rual ta tho. 

Melo-i chungchang engmah kan sawi zawm ta lo. Ka chhuah dawnah Driver in min thlaha, Bank a min dah hnuah Mission veng lama thil dah phei turin ka tir a, kei erawh taxi a haw mai tum ka ni a. Mahse, Rinzuala nen kan inhmuh takah chuan dawr awmna lamah a tlan dawn tho avangin min thlah nghal ta hlauh. 

Dar 5 rik hma deuhin in ka thlenga,Rempuia msg ka hmuh avangin inthlak pawh inthlak loin phone pakhat zawk atangin Rempuia ka call a, rei pawh a ring hmain a pick up nghal vat. 

"Eng thil nge? " ka ti nghal tawng a. "Hey, ka dam tha em tihte min zawt dawn na nge? " a rawn ti dut dut. Karkhat aia tam mah kan inbe tawh lo va, a thilsawi chu sawi awm tak pawh a ni. 

"I dam em? " ka tih chuan a nui huk huk mai. 

"Ka tha.. Eng nge in pa a an? " a rawn ti a. A that thu ka sawi thuaia, kan nupa kar fuh lo chho leh ta viau erawh sawi ka tum lem lo. 

"Eng nge min hrilh tur chu? " ka ti leha. "I msg dawn thin zawng zawng rawn thawntu che kha ka hre tawh" a ti chiah chu a sawi zawh hma hmain "tu nge? " ka lo ti vat. 

"Amah kha, misual pa.. Melo-i vittu kha" a ti chu ka mengphar nghek ringawt. 

"Tu maw? Ni lo, eng nge a awmzia? " ka ti bak nawk nawk mai. 

"A awmzia chu khapa kha Melo-i uite anih vang mawle. Jail a tan chhan pawh engdang mah ni loin Melo-i plan bawk anih kha.. I hre thiam em? " Inringtawk tak hian a rawn ti ta zel. 

"Ni lo, chutiang a ni thei lo vang" ka ti leh hap ringawt. Melo-i mangang zia leh a hlauhthawn zia ka hmu ve veka, ama tihtir ni tur chuan ka ring thei lo. 

"Ni thei a, a ni chu anih hi. Tunah pawh jail atanga lakchhuah tumin a buaipui mek alawm" a ti leh ta zel. 

"Lo inngaihtuah hah lutuk lo la, I tan a tha lo tih ka sawi kha fiahna ka rawn pe mai che anih kha, nau pai tan rilru hah a tha lo tih hre reng la,I lo fimkhur zual dawn nia, ka dah phawt ang" Min ngaihtuah tih hriat tak hian a ti dam thlup mai. 

Rempuia nen kan inbiak atanga ni thum liam hnuah thil thleng mak tak a awm leh ta.. 

"Melo-i vit tu kha Jail-ah a inawkhlum" U Sangzela'n room a ka awm laiin a rawn ti a. "In awkhlum tak tak nge mi kur a tuar? " Insum hman loin ka lo ti ve thung. 

"Eng nge sawi i tum? " bung fe hian a ti a. 

"A inawkhlum tak tak nge miin an that ka ti mawle" Amah pawh en chuang lo hian ka ti a. A rawn kal hnai thawm chu hre reng mah ila ka hawi let lo. 

Ka hnungah a rawn dinga. 

"Eng nge nang hian thil hriat i neih? " Thinrim insum niawm tak hian a ti a. Ka hawi leta, "Eng thil hriat maw? " ka ti awlsam et. 

"Min chhaih kual tum suh aw. I sawi duh sawi mai rawh" a ti leh hrawka. " Sawi duh pawh ka nei chuang hleinem. A thih takah chuan a va lawmawm ve ka timai dawn em ni? " Nui deuh chungin ka ti a. 

Engmah sawi lo in a kalsawna, a thawmhnaw dahna a hawng a, a closet chhunga safe awm a hawng leh a. Ka rin loh lutuka pistol te fel at mai a rawn phawrh takah chuan ka ding khawng nghal awt mai. 

A rawn kal phei a, tawlhsawn nachang pawh hre loin ka din ngaiin ka ding a. Ka dinna bul dressing table chunga pistol a dah takah chuan ka thawchhuak nghal kawk mai.