Naruto -15(last)

 Then - 15na(Last) 

Naruto -15(Last) 

Ka phone riah ka harh zawka, rang taka ka phone ka en chuan ka u a lo ni a. 

"I tho tawh em? Ka pa hi a bp a sang thei lo va, damdawiinah lo kal rawh" a rawn ti nghal tawng. Thawhphan pawh nei eih loin ka tho nghal a. U Sangzela a lo la mu ve teh tlata, ka thawmah a rawn harh a. 

"Eng nge a? " a tih chuan "ka pa a hniam lehzual a, damdawiinah ka kal dawn" ka ti hmak.Bawihpuia pawm chungin ka kut lehlamin a hnute hnek tur ka keng a, u Sangzela pawh be leh tawh chuang loin inhnuaiah ka chhukthlaa, u Chhari thingpui lo in mek chuan min hmuh ve leh a rawn dingchhuak vat. 

Thil awmzia ka hrilh zung zung a, Bawihpuia min laksaka, u Sangzela thawh hunah Bawihpuia mamawh vel lo han la khawm mai turin ka ti a. A hnute hnek tur ka ken chu min laksaka, a sat leh sat loh en nan a kut hnung lamah a fartir nghal zat bawk. 

Damdawiin ka thlen chuan ka u leh nu Sangi bakah kan chhungte dang an lo awm nual tawha. Tihtheih nei chuang si loin kan thu thap mai. Ka u nen inbe mang loin kan thu duna, kan ngaihtuahna erawh a inhlat lo viauin ka ring. 

"ICU lamah han chho ru, I Pa Thianga'n a hmu duh che u" ka niin a tih chuan ka u nen rang takin ICU lam kan pan chho nghal a. Kan thlen chhoh veleh ka Pa Thianga'n nu Sangi leh ka u nen kan pathumin min kal hranpuia. 

"Engmah hi han zep tur a awm tawh chuang lo va. Doctor te hi an beidawng a, tunah hian khawl hmanga chelh mai anni tawha. A mar an hmu lo leh thin bawka.A awm an han nem hi chuan a lungphu pawh a awm maia.Mahse, minute khat vel bak a ni lo. Hetiang a chelh reng hi nge tha a kal tir mai in duh zawk le? " a ti dap dapa. Bang nghengin ka dinga, ka khur hlawk hlawk a ni ber. 

"Kei aiin a fate hian thutawp siam se a tha. An tih dan dan animai e" Nu Sangi'n lungchhe aw hian a ti a. Ka u nen engmah kan sawi lawk thei lo. 

Thil engkim a thleng ta vut vut a, ka pa kuang chhunga mu chu ka en reng a. Ka lama tang ngai lo leh min hmangaih lo tu ni a ka hriat thin, ama hlawkna tur atana pasal min neih luihtir tu a ni a, ka haw em em thin bawk. Mahse, thihna zet zawng a na a lo ni. Tawrh than leh tawrh tam vanga tawrh dan thiam theih pawh a ni lo. Nu leh pa kan nei ta lo tih bak engmah ka ngaihtuah thei lo. 

Ka nu leh Melo-in Bawihpuia an chang chawta, ka bial vel mai mai a ni ber. Tap thei ila tlem chuan ka thawl deuhin ka ringa, ka tap thei lo leh mittui tla thei tlat lo chuan min ti ipik zual a, ka awm a tawt tlat nimai hian ka hria. 

Ka pa ruang thlak ni atangin ni thum a liam leh tawha, nitin ka la phei ziaha, u Sangzela erawh chu hna lamah a buai avangin nimin atangin hna a kal tawh thunga. Tlaiah erawh chaw rawn ei tura rawn kal leh a tum thu a sawia, ka bu liam vel mai mai. Ka pa damloh lai  leh a boral thlengin a che tha thawkhata, fak pawh a hlawh reng bawka. Mahse, an fakna leh a thiltih ten ka chhungril a thleng pha ve tawh lo va. Ka hriat zawng chu ka then dawn tih zawng a nimai. 

Chaw kan ei kham fel a, an seng deuh vek tawh tihin Diktea leh a thianpa room atangin an rawn chhuka. 

"U Zau, chaw kan lo ei ve ang" a rawn ti phar phar. A mitmeng leh a awmdanah chuan ruih a nei tih hai rual a ni lo. 

"Eng nge in tih a? " ka lo ti a, min en lo hian "thil pawimawh kan ti" a ti hmuka. Chawei tura Zaui'n a han koh khan Game an khel laklawh tih a rawn sawia. Chuvang taka zawt lui ngat ka ni reng bawk. 

"Game in khel mai mai anih kha. Midangin kan ei laiin ei ve mai thin tur. Inleng awm bawk nen a buaithlak duh asin" keimah nena inhmeh lo khawpa dam hian ka ti a. 

"Hei kan ei dawn reng alawm. A ruala ei vek theih pawh a ni lo" chaltlai angreng tak hian min ti leh a. Meizial a pak khu luai luai zui. 

"Inchhungah mei kan zu ngai lo asin, u Rama  takngial pawn a zu ngai lo" ka ti ta fak. Min chhang loin a meizial zuk lai a fawp kawk kawka, a khu a tichhuak ham hama. Ka u dinning room a rawn lut chiah chuan "a va khu nasa luai luai ve. Dikte, nangmah em ni mei zu? Inchhungah chuan zuk loh tur asin" a rawn ti ve nghal bawrh bawrh. 

"A hma pawn ka zu ziah alawm mawle. Tuman min sawisel ngai lo. Pa Lura damlai pawn a sawisel lo" Thiamchan tum ran hian a ti a. "A sawisel lo che anih pawhin kan zu ngai lo" ka u in a ti chang ta fak. Zaui'n chawei a siamsak meka. 

"Bawiha, chhuak ang. Kan inah kan va ei mai dawn nia" tih leh chhuah a ruala. A thianpa hrilhhai taka awm chuan min rawn en a, a hmel a pha dai mai. 

Ri deuh bur kan hriat chuan ka u nen hmanhmawh takin kan tlanchhuaka, ka u Scooty lo tlu chu Diktea thianpain tun a lo tum meka. "Eng nge maw i tlawh thluk kher le? " U Rama'n Diktea en chungin a ti a. Ka dawkchhuak zawk mai. 

"I tlawh thlu amaw? " hmai thal he haw hian ka ti nghala. Min chhang loin bike a start a, off pahin a chahbi ka phawisak nghal hmak. 

"Engvangin nge i tlawh thluk a?" ka ti nawn leh a, ka mize diktak a lo langa, insual dawn pawh ni ila ka hlau eih lo. "engvangin nge chahbi kha i laka? " Min ti ve thung."Pe rawh. Haw rawh se" U Sangzela'n a rawn ti ve a. 

"Aih, a awmdan hi ka ngaithei tawh lo. Engvangin nge ka u scooty hi a tlawhthluk ngawt ka hre duh" thinrim takin ka lo ti leh hmiah. Ka u a rawn ding hnaia, "pe phawt rawh. Inleng kan nei bawk si, a zahthlak em mai"Zawi angreng takin a ti a. Nu Sangi'n Diktea a lo hau mawlh mawlh. 

" Arin, khawi keiman chahbi ka lo kawl ang. Rama khan inah va dah phei lawk mai rawh se. A buaithlak thin em mai" a ti hlawk hlawka. Hreh ru tak chungin chahbi ka pe a. Ka u nen kan kalsawn a, mahse thui pawh kan kal hmain thil keh ri avangin kan hawi lehnghala. Ka nu pot duhber, hlum bel lian nalh tak, chhuang taka Gate bula rubber kung mawi tak a khawina thin lo keh vek chu ka va hmu a, ka u in "awi, ka nu pot a keh" a tih ri chuan min fan rawih rawih thei. 

Ka tlan nghal thut a, Diktea ding kawi chhar chu a dulah na lutukin ka va su chawrh maia. A lo inring lo bawk aniang hnung lamah a tlu nghal a, a tlu tawh chu na takin ka tlawh zui a, mahse ka duh ang pawha ka chet hmain min rawn man bet a, aw rawl chhuah loin ka theih tawpin ka tal vak vaka. Min chelh hneh em avangin ka talchhuak zo lo. 

Diktea an kaitho lai chu huatna nen ka melh tlawk tlawka, ka u min kuah chungin a tapa. Kan unau tana ka nu pot hlut zia hi midang ten min hriatthiampui phak lo ang. A sulhnu an tibo zo deuh vek tawha. Ka nu ro hlu neih ve ang ang pawh hmuh tur a awm tawh mang lo. Chutihlaia a thil hlut ngawih ngawih, tihpalh pawh ni lo, sual vang liau liaua a tichhe ngawt mai chu ka ngaithiam thei lo va. Ka ngaidam kher pawhin ka inring tawh lo. 

Bawihpuia ka mut fel hnuah ka inbuala, ka inbual lai pawhin ka thil ngaihtuah vangin ka chawl leh vang vang thina, Diktea nena kan buaina kha ka ngaihtuah zawng ringawt pawhin ka thinrim thar leh zel a ni ber. Nu Sangi'n a tirah hau ve bawk mah se ka sutthluk pawp hnuah kha chuan tawng a tum ta reng reng lo. Pa Thianga leh ka ni Diktea lakah an lungawi loh em vang khan a tawng ngam lo pawh a ni mahna. "Ka vahnu hi tuman hau suh u, hauh ka phal dawn lo. Nu an nei loh hnuah pa an nei lo leha, an nu an hriatrengna tihchhiatluihsak anihna kha a natpui animai. Tawngkam khat pawhin khak suh u" ka ni, ka pa chhang chiahin a ti hmak hmaka. A lungawi loh zia hai rual a ni lo va, mi a ber lo tan chuan ka chet dan vanga min khak ngam chi a ni lo, mi a an awm lo bawka, tuman min khak hek lo. 

"I chet dan kha a puitling zia lo hle a ni" U Sangzela'n ban angreng tak hian a ti a. Ka chhang lo. 

"Nutling puiin drug addict pakhat i insualpui ania, I indah hniam hle rualin keipawh min dah hniam hle chu anih kha" a ti zui leh hmuk hmuka. Ka chetdan kha a puitling zia lo tih ka hai hauh lo chungin min hrethiam ber tur anih laia min sawisel zui chu ka ngaithei thak lo. 

"Ka dah hniam phahna tur che  a awm lo" tih zawng ka sawi. 

"Rilru fim taka thil ngaihtuah ching tawh ang che. Miin mi rilru kim lo nupuiah ka nei tih an hriat ka duh lo ania. Mawl taka i chet na khan ka hmalam hun a tichhe vek thei tih hre reng rawh" a ti leh duaha. Ka rilru tur dawn lek lo va a hma hun a lo vei chu ka thinrim satilah lo. A tenin ka ten a ni zawk. 

"Mi rilru kim lo nupui atana i nei hi i tifuh zawk hle ka lo tia sin. Rilru kim pangngai chu nei la i uire na leh i tualthahna avangin jail bang i zut tawh hial ang chu" ka ti ve ta sak. 

"Eng maw i sawi a? " a ti thawt. "I beng a ngawng lo. Ka sawi awmzia i hria. I kawp mek nu pawh ka hria, ka pa ral tura a lo kal ni pawh khan hun chu nei ula, ka pa inchhungah sawn sual rawng in bawl hman hial ang chu" ka ti leh fak fak a. ' Ka pa boral hlimchhawn chauh la ni mah se ka pa a awm tawh lo bawka ka then thei tawh che. Ka pa nena insual rawngbawl dun keiin ka lo tawrh chhan tur a awm lo" ka ti lehzela. Insum ka tum eih tawh lo. Ka rilru a beidawnga, ka awmdan engkim mai ka hne tawha, hlauh ka nei hek lo. 

"I sawi awmzia ka hre miah lo" ro hulh hian a ti a. 

"Ka then dawn che" ka ti leh bawl ringawt. Tawng tuma a ang zuau hman tihin Melo-in kawngkhar kik leh rawn luh a rawn rual nghal zat. 

"Bawihpuia a muhil em ni? " a rawn ti nghal lawng lawng. 

"A muhil mek, tiharh suh" ka chhan loh avangin u Sangzela'n a ti a. Melo-i pawh be chuang miah loin bathroom-ah ka luhsan hmak bawk. 

Ka chhuah leh chuan an lo awm lo ve ve a. Chhari a lo awm a, "inleng an awm nual ania aw. Duh leh Bawihpuia hi ka lo veng anga. Zuk kawm ve  la. Nangmah rawn kalchhan anni hlawm si" a lo ti sawk sawk. 

Inleng te haw hnuah roomah ka chho thuaia. Melo-i a riak nghal dawna, min bia anih loh chuan biak ka tum chuang lo.Ka tawngkam atang khan thil tamtak hriat ka nei tih u Sangzela'n a hai dawn lo tih ka hriaa. Inthen ka hlau lo va, ks tum zawk tih pawh a hre chiang tawh bawk ang. Ani ang misual leh mahni hmasial hian kan inthen ruala a hmeichhe kawp ruk thin te miin an hriat a hlau em em dawna. A mualpho ai chuan min dahthat a hreh dawn hauh lo. Chuvang takin a chhe ber thleng tura ka inbuatsaih a tul tih pawh ka hai hek lo. 

Ka pa officeah kan thu thapa, ka u te nupa leh nu Sangi bakah ka pa thianpa, ukil tha tak ni bawk awm vein u Sangzela leh kei kan awm a. Ka pa thianpa-in envelope A4 size a rawn phawrhchhuah chuan a hmaa ka pa safe thuhruk chhung a mi kha a ni tih a charna sen atangin ka lo hre nghal chat mai. 

Ka pa thurochhiah a chhiarchhuaka, a sem fel thlep thlawp viau mai. A fate kan nih angin chan nei nual mah ila nu Sangi chan a tam ber lo thei lo. Sawibuai tumna ka nei lo va, sawi buai chhan tur pawh awmin ka hre hek lo. 

Christmas a hnai tial tiala, u Sangzela nena kan nupa kar pawhin that lam pan loin inhauh buai pawh kan nei nawn tawh lo. Ka theih ang angin ka inbuatsaih ru renga,mi zingah mei nei deuh taka khak fek fek ka ching chho tial tial a, a huatzawng taka awm nuam ka ti ta viau mai bawk. Chutihrual chuan ka fimkhur em em a, ka chungah thil thleng a awm palh thei tih hriain ka inveng reng a. Engtikah emaw chuan ka inven zawh loh hun a thleng dawn tho tih hriain ka inbuatsaih sa thlap bawk. 

Ka muhil ka harh rualin Bawihpuia lam hawi turin ka inlet nghala, mahse Bawihpuia a lo awm hauh lo. Sana ka en chuan dar 8 a lo kawk va tawha. U Chhari'n ka harh hmain a rawn la anih ka ring a. Ka lu rit bur vang in Tho chhuak mai lo in ka mut ngaiin ka mu ren rawna. Ar khuang ka hriat thut chuan mak ti tak hian ka tho chhuak a. Mahse, ar khuang ri aia mak zawk a lo la awm ta cheu. 

Ka awmna room chu kan nupa room a ni lo va, ka pa te in lama ka room pawh ni loin u Sangzela pa te in a kan nupa room pawh kha a ni chuang lo. 

A awm danah chuan luah hawh theih tura siam a ang. 

Rang takin khum atangin chhuk ka tuma, mahse ka taksa zawi lutuk chuan duh angin min chet tir thei lo, kawngkhar ka pan phei chhat chhata, hawn ka tum chuan pawn lamah a lo inkalh tlat chu niin. Khum lamah ka let phei leha, ka phone ka zawng nghal a, chu pawh ka hmu chuang lo cheu. 

Tukverh pakhat lek awm chu harsa takin ka pan phei leha, thei leh thei lo hian ka hawnga, pawn lam ka hmuh takah chuan ka thaw hak mai. Thing an lo ding khup maia, mihring hmel reng reng hmuh tur a awm loin in dang pawh ka hmu hek lo. 

Kawngkhar lam ka va pan leha, hawn tumin ka sawi a, au chungin ka chum bawka. Mahse, thawm awm loin a reh tlawk tlawk maia. Tukverh lah Bar awmkhauh pui pui hi an tung khat thut bawk nen chhuah tumna chi a ni lo. 

Khumah beidawng takin ka thu a,nizan lama thil thleng ka ngaihtuah let a, Christmas ni tak anih avangin ka pa teinah kan phei a, kan chhungte dang nen kan ri laih laih renga. Zanriah kan ei hnuah dar 8 velah kan haw a, kan nula pahnih te haw lai niin u Chhari erawh chuan Christmas min hmanpui thung. Mut hmain u Sangzela'n phone call a dawnga, a pawimawh thu sawiin a chhuaka, ka mut a chhuah em avangin Bawihpuia muthilh veleh ka mu ve nghal mai kha a ni a. Engtin nge helaiah daih hian ka lo awm theih ka hre thiam lo.

Motor thawm ka hriat chuan ka tho a, tukverh lamah ka pheia, mahse tukverh hi inhnung lama awm anih avangin Motor ka hmu thei lo. Motor kawngkhar inkhar ri dawt thawm ka hriaa, rei loteah ka awmna room kawngkhar bulah pen thawm a rawn awm a. Kawngkhar lam pan peih tawh loin khum lamah ka bawkvak titih a. Ka taksa a nat bakah a zawi a, chet vel a harsa em em a ni tawp mai. 

U Sangzela a rawn lut a, kawngkhar chhung lamah a kalh nghala, a hmel awmdanah chuan ka lo bei let dawn lo tih a hre chiang hle tih a lang reng. Ka taksa hi zawi tlat lo se chuan a lo luh rual khan tlanchhuah tumin ka lo bei ngei ngei dawn a. Mahse, chutiang ti turin ka thei tlat si lo. 

"I harh thei maw? " Hlim hmel zet hian a rawn ti a. A thil khai ho dawhkanah a daha. "Eng nge i tih leh tak? " kha zet hian ka ti hmak. A nui huk huka, 

"I taksa a la na em? " a ti leh daih a. A awmdan zangkhai tak chu amah ka hriattirh atanga ka vawikhat hmuhna a ni. 

"Helaia min khung beh hian i tan enge tangkaina a neih a? I sual tih thup nan min thah i tum ve ta zawk nge? " A sawi chhang loin ka ti ve leha. 

"I u in biak che a duh a, mahse i dinhmun that loh vangin nangmaha awm i duhthu ka lo hrilh a" A thil rawn ken phawrhchhuah pahin a ti a. "That lohna ka nei lo" ka ti nghek. 

"Oo, nia.. Dpi pawh khan a thih hma khan i tih ang chiah hian  a ti ve thin alawm. Mahse, a tawpah chuan inchung atangin a zuangthla ta daiha' pawi sak nei lo em em hian a ti a. A la nui zui bawk. 

" Mi tenawm leh rapthlak pa" aw khur chung hian ka ti a. Min rawn hnaih thuta, pistolin ka lu a rawn chuktuaha, ka ip chawih maia. Mahse, hlau anga lan erawh ka tum lo. 

"Midang aiin ka tenawm bik lo ania. Hlawhtlin ka duh a, chutiang tur chuan ke ka pen ve mai zawk anih hi. Min tihchhiat tum reng reng suh" ati khur khur. 

"Tual that lo hian i hlawhtling thei" Hlau chung chungin ka ti leh hrama. A mitmeng atang chuan min kap hreh dawn lo tih hmu vek mah ila ka inti huai lui tlat a ni ber. 

"Engmah i hre lo. Hlawhtling tura ka beihna hi a nasa lutuk. Chuvangin tuma tihchhiat ka phal dawn lo" a ti leh thawta. A tho a, thutthlengah a va thu ta daih. 

"Bawihpuia engtin nge a awm? " Ka tih chuan, 

"Ngaihtuah suh, ka enkawl thei" a ti duh lek "Nu a mamawh ania" ka tih leh chuan a nuia. "Ka thu thu a i awm dawn anih chuan i enkawl zui ang. Mahse, min tihchhiat i tum zel anih chuan i thi ang. Depression nasa tak i neih vangin i inawkhlum ang" a ti a. A ti ngei ngei duh dawn tih lah ka hai lo. 

"Engvangin nge hetiang hian i tih a? Mi tu emaw talin i thiltihsual hi an la hre chhuak dawn tih i hre lo em ni?" thinrim tak hian ka ti leh nghek. 

"Sum a awm chuan tih theih loh a awm lo.Min mantu tur zawng zawng nena lei hi thil harsa pawh a ni lo" a tih chuan a awah chapona a lang chiang viau. 

"Min nei lo la tha tur. Kei chu khawvela sum zawng zawng pawhin min lei dawn der si lo. Min nei a, min hmangaih chuang bawk si lo. Min nei lo ni la ka chhui zui dawn miah si lo che a. I mize tenawm tak pawh ka hre chhuak dawn bawk si lo" ka ti ta duah. 

"Engkimah a ber nih ka duha, chutiang tur chuan ka bei thin bawka. Nang hian engatan mah min ngai ngai lo tih ka hria. I pa kha a thil lo tihsual tawh hmangin ka nawra, I nu lahin a thih hmaa pasal nei turin a duh bawk che a" nuam ti zet hian a ti a.

"Min hmangaih ni la chuan ka hmangaih ngei ang che" Ka ti ta ngawt. A ner nawka. 

"Hmangaihna tih vel hi chu mi chak lo te tan mai mai a ni. Mi hlawhtling nih ka duha, ka ni ta reng bawka. He ka nihna hi ka duh ber leh ka nun chhan a nimai. Fapa min neihsak erawh i ti tha e" fiah kek kawk hian a ti hmiah. "Hmeltha leh lu zo veh vawh, inti pa miah si lo chunga pa deuh thang, midang tanpuina kawnga thawhhlawk tak leh mizo te ngainat em em zai lamah pawh lar mek i ni a. I bike khalh chak leh khalh thiam em vanga mipa mai ni lo, hmeichhe tamtak star rawn i la ni lehzel bawk.Ka neih che chuan ka hmalam hun a eng lehzual dawn tih ka hai lo. I mize harhvang tak khan min hip a, min ti phur a, mahse inneih hnuah erawh thin tirim tu mai a lo ni leh a" a ti leh zuah zuah. 

"I kawng daltu apiang i that zel dawn anih chuan engzat nge i la thah ngai dawn? " ka ti ram hmak. "Zawhna i ngah em mai. Tunah chuan thil ei rawh" a ti bul hmuk. 

"Tur i telh leh telh loh pawh hriat loh chu ka ei duh i ring emawni le? " huatnaa khat hian ka ti ve hmiah. 

"Thil i ngai kawi mai mai anih kha, thu awih aia thih i thlang anih chuan mawihnai deuh pawhin ila thi ang chu" a ti awlsam et. A awmdan engkim mai chu rapthlak ka ti em em mai. 

"Mi thah hi nuam i ti em ni? I kawng dal apiang i that mai chu a nia. I va han tenawm tak" ka ti ta ngawt. 

"Chulamah chuan lo buai suh, Hetiang hi chu Politician zingah an tam lutuk, tuman kan kawng daltu kan duh lo. Politics hi i hre thiam phak ve lovang" a ti hmuk. 

"Melo-i vangin Lala a thi a, nangmah vangin Dpi leh Champuii an thi bawka. Unau rapthlak tak inni" ka ti ta thlawt. A nui leh huk huka. 

"Melo-in engmaw a tih? " a ti nghala. "Lala khan a hmangaih asin, atan engkim a huama. Jail tan thlengin a huam vek. Mahse, a thi ta tho si" ka ti hrawka. A thle zauha. 

"Lala kha a tawngtam vanga thi anih kha. Melo-i vang a ni lo. Melo-in vanga thi chu i naupai zawk kha" a ti chiah chu min deng dawt thei. 

"Ka fa anih ve tho avangin pawi ka tia, Bawihpuia thahsak leh che a tum pawh khan ka vau dai ta anih kha" Pawi tihna tak tak nei miah lo ang mai hian a ti a. Ka beng ka hup ta ngawt. 

Khum a chet dat rualin ka hawichhuaka, khumah a lo thu ve a lo ni a. "Vawiin chu zawhna leh chhanna hun kan hmang a ni ngawt alawm le. Tak takin, Melo-i nen hian kan han nulat tlangval chhoh khan inzawmna atthlak tak kan lo nei dun tawha. A fa a chan atang phei kha chuan amah hi a buai zuala. Dpi a rai tih a hriat rual rualin chet a la nghal a, Champuii pawh a thik a, nangmah a tan vang che a thinrim ni loin ama tan zel a thik. Vawi tamtak ka vau a, fimkhur turin ka chah bawka" A tih chuan thilsual tenawm tak sawi pawh a ang chuang lo. 

Min rawn ban chiah chu ka eu awrha, a nui a. " Hmeichhe dang ka khawih na kuta khawih che i duh lo tihna mi? Ka msg dawn i chhiar tih ka hriaa, kha nu kha chu zankhat atana ka kawp mai anih kha. Pawmlai nei anih avangin ka mualpho lo vang. Hlauthawng suh' kalsawn pahin a ti a. Ka melh tlawk tlawk a ni ber. Misual leh maksak tak pasalah ka nei emaw ka tih laiin Setana fapa upa ber zawk bulah a ni ka lo chen ni.. 

"Ka kalsan phawt ang che. Helai atang hian tuman an chhanchhuak dawn lo che ania. I chhungte zawng zawng ka lamtang anni tih pawh i hriat kha. Diktea nen in insual atang phei kha chuan i chhungten rilru lama chiang lo ini tih hi an hmuh Dan che a ni tawha. I lam an tan beisei miah suh. I natna hi chhuanlamin hetah hian ka khung hlum thak thei che. I duhtak Naruto pawhin engmah a ti thei lo vang. Min chhui vel tur chuan a te em mai" a ti leh hmiah hmiah mai. 

"Ee, leh lawk. I thil lakkhawm ho, keimah min man tirna tur vel kha khawiah nge i dah? I Naurto kha i pe em? " a ti leh riha. Ka chhang lo chiang viau. 

A rawn kal hnaia, ka lo indang nangin ka taksa zawi nen ka dang zo tak tak chuang lo. 

Ka malah na lutukin a thama, "I pe nge pe lo? " tih pahin a rawn kun hnaia, a rawn kun hnai chiah chu a hnarah tak ka lo tauh bur thung.

A rum nghuta, a kut a phe vuaia, khumah ka let thla hnawk mai.Min rawn khawih zui chiah chu thei leh thei loin ka hmai ka hupa, ka malah a chum pawp pawp a, ka samah thamin min phih tho a, ka hmai ka hup tlat chungin ka kut chhana min hnek zui leh chawrh a, te chhuak lo turin ka insum tang tang a ni ber. 

Ka harh leh chuan khua a lo thim tan tawha. Thawh mai ka tum chu ka taksa na lutuk vangin ka techhuak thawt mai. 

Thil thleng ka hrechhuak nghal a, min hnek chawrh chawrh lai khan nikhua ka hre zui ta lo kha a ni a. A kal lai pawh ka hre tawh lo. 

Thei leh thei loin ka tho a, darthlalanga ka inen chu ka phu zawk mai. Ka hmai a vung nasa lutuka, keimah pawh ka inhre lo lek lek chu a ni. Ka theih ang angin ka hmai ka tifaia, ka taksa chau lutuk vangin khumah ka mu leh ta hle hle. 

Ka mut vang vang hnuah ka ril tamin min tiharh leh a, u Sangzela eitur rawn ken ka ei nghal bawrh bawrha, thlasik lai a ni bawk nen a eitur rawn ken chu a dai satliah tawh lo. A vawhin a vawt vek, mahse ka ril a tam ngang a, ka pawisa zo tawh lo. 

Taksa na leh rilru na nen ka let tlaivar thaka, ka khua a sik zui leh bawk. Mu mal nei mang lo in ni ka hmang liama,helaia ka awm atangin vawiin hi ni thumna a ni tawha. Vawikhatmah a rawn kal nawn leh tawh lo va. Eitur a rawn ken kha a hlui tawh tih lam ngaihtuah duh loin ka ei lui zela. Mahse, vawiin chu min daih tawh lo. Nihnih tal tap khawsik vangin ka buaia. Vawiin erawh tlemin ka tho harha, ka hmai vung ber bur pawh a zia ve ta hret. Tui intur hranpa a awm loh avangin bathroom tap ami ka in mai zela. A thianghlim em tih lam ka ngaihtuah tawh lo. 

Ka muhil lai min tiharh tu awm ang maiin ka harh thuta, hnai taka u Sangzela'n min lo en ka hmuh chuan ka phu nasa lutuka, ka te khum nghal nghek. Ka tawlhsawn nghal dawrha, ani pawh a kalsawn ve bawk. 

"Ka duh aiin i hmai vung ala reh fel lo" thildang sawi loin a ti a. A veikual vel chu en chungin "Bawihpuia tu nge enkawl? " ka ti ve thung.

"Lo buaipui duh suh ka tih che kha. Ka enkawl thei" a ti bung vut.

Dawhkan lam a kawka,"Thil ei rawh. Chuan, I inti fai nghal dawn nia. I rimchhe lutuk " a ti zui a. Ka riltam teh mah se ka che eih lo. 

"Aw le, I duh leh ei la, I duh loh leh ei lo la buaina ka nei lo. Ka hriat duh chu i thil neih ho khawnge i dah tih leh tu nge i pek tih zawng animai. I sawi hma leh i zalen hma anga, I sawi duh loh chuan helaia ral raih hi animai" Pehhel si se lo hian a ti leh hmuk hmuk. 

"Hrilh che ai chuan rawp ral raih ka thlang" ka ti vawt raih. 

"Chuti maw? I chhungte tuman i awmdan hi an hre lo ka tih kha. Zorempuia lahin a hre lo bawk. I thianpa ve em em hi reilote chhungin a hna atangin ban a ni dawn zui bawka. I thian te dang lahin an ngaihven miah bawk lo che. Keimah bak hi beisei tur i nei lo" Hmusit aw hian min ti a. 

"Pathian a awm" ka lo ti ve thung.

"Ooo,a va ropui ve. Mangan tawpah chuan Pathian hming i lam ve alawm. Mahse e, Pathian hian nang ang hi chu a humhim duh lovang che. I hlu lo lutuk"  Hnehsawh taka tiin a nui lui nghek. 

"Nang tualthattu misual mah hei leh chen chance a  pek che chuan engah nge kei min hum loh ang? " ka ti ve hmiah.

"Khanglang che hian. Ka zawhna che chhang mai rawh" a ti leh thawta. "I duh leh min that rawh, tunkar a ral chuan eng nge thleng i hre mai ang. Karkhat chhung min biak theih loh hun a thleng anih chuan chet la turin ka hrilh lawk vek.Tu nge anih chu ka sawi dawn lo" ka ti ve ta hmak. Ka awki lah a ngeiawm ngang mai bawk. 

A vei vel chu tawpin min rawn pan hnai rawka, ka tawlh let ve bawk nangin ka samah a rawn thama. Ka taksa la chak lo teh mah se ka theih ang angin ka sual let ve fat fat a, ka Sam a tham na bawk nen min kuai dak a, ka hmaiah a beng thuai maia, arsi ka hmu nghal chum chum. Mahse, inthing harh luiin a bengah tak ka man fuh ve ta a. Na thei ang ber turin ka herh a, rum nghut chungin ka kut laksawn a tum a, chutia a kut lehlam a laksawn takah chuan a kapah tak ka tlawh nghek maia, a let nghal hlawl mai bawk. 

A let reng tawh chu ka tlawh leh chawrha, kawngkhar lam panin ka tlan a, mahse ka hawn hmain ka malah hnung lam atangin a rawn hnek a, ka tlan deuh dawrha, min rawn hnek leh tur chu tlawh ka tum ve thung. Ka ke ah a rawn mana, min hnuk thlu zuia, min man nghet thei bik hek lo le, ka ke lehlamin ka tlawh leh ngheka, mahse min thlah duh tlat lo. Kan inchai na lamah chuan a pistol pai a thlauha, pistol chhar tumin ka bawk sawn nghala, mahse ka chhar hmain na zetin ka ke a elha, ka let hlawl mai. A rawn bawk hnai ve leh chiah tihin ka tha tawpa tangin pistol ka bawh leh rawka, ka chhar ta hlauh. Mahse, min rawn chhuhsak tumin ka ban a rawn herha, ks man nghet hman si lo, ka thlauha, ka thlauh rualin a la vata,ka luah tak a rawn chuktuaha, a hmelah chuan a tawp ka thleng ta tih ka hria. Ka maimitchhinga, ka fapa hmel ka mitthlaah a lo langa. 

Silai a hmet chu a ri khauh a, mahse a puak tlat lo. A hmet nawn leh tur chiah chu ka let sawn hreta, ka samah a tham avangin thui chu ka let sawn thei lo. Min kah tum tawh loin biangah tak a rawn chhu a, ka lo thleksawn hman deuh avangin a tum angin min chhu fuh hman lo, mahse ka hit chhuai tho. Min rawn chhut nawn leh a tum chiah chu "Aw Lalpa, min pui rawh" ti chungin ka tal leh ngheka, a silai ken lai a thlauha, ka chhar khalh ta hlauh. Vawikhatmah silai la kap chhin ngai lo ni mah ila ngaihtuah buai ka ngai lo. A puak thei lo leh angem tih lam pawh ka ngaihtuah hman hek lo. 

Min rawn bawh chiah chu ka hmet nghal a,vanneihthlak lutukin a puak thuai mai. 

A letsawn tur chu ka kap nawn leh a, a che tawh lo va, keipawh che tur ka awm tawh bik lo. 

"Tei, Mate.. " ka u awin a ti ri chu hla tak ami ang mai hian ka hriaa, ka hmai bula Naruto rawn kun hnai pawh chu ka hmu phe ruaia, ka chau lutukin ka hmusual niin ka ring. 

Thla hnih hnuah chuan… 

Wheelchair a U Sangzela thu kun lup mai chu ka en vang vanga, muangchanga thoin ka pan phei a, a lu ka kuai daka, a chilthli ka hrukfai sak nghal bawk. 

"Inthen chu i duh lo takzet maw? " min titu ka u lam ka hawia. 

"Duh lo ka tih tawh kha. Kan inneih thutiamah a nuamah pawh a hrehawmah pawh tiin ka tiama, chutah chuan ka ding nghet ang" Inringtawk takin ka ti a. 

"Aw le, ka ring tawk che alawm. Ka nu ang maia chak i ni a, I tithei ang" a ti dam thlap. 

Min en loin u Sangzela a en vang vanga. "Misual vannei ber i ni" a ti sapa. A awah chuan a huat zia hai rual a ni lo. 

"U, a vannei hleinem. A awmdan hi en la, thi si lo dam si lo, engmah tithei bawk si lo… a sual man a pek hi dan hi a namai lo ania" ka ti ve thung. 

"Dik chiah.. Pathian hian kan sual a ngaihdam rualin kan vai hian kan tihsual man erawh kan pek angai.. Keipawn ka rin loh che avang leh ka unau ka lama ka tan loh vanga aman ka pek hi a tam teh ania" a ti sap sap. 

"Chutiang sawi suh, ka neihchhun i nih hi" Tih pahin ka kuaha. 

"Eheu… Neihchhunah khan kan tel ve na nge? " Rempuia aw hian a rawn ti a. A awmna lam ka hawi phei thuaia, Bawihpuia pawm chungin a rawn kal phei a, a hmel hmuh a nuam ngang mai. 

"Nangni pawh neihchhun zingah khan in tel.. Awm lo la engtin nge niang? Kei aiin Tei tan hian i tha zawk" ka u in a ti thuaia. Rempuia a nuia, "Chutiang sawi suh. Putea tha ber nih erawh chu ka phu tih hrereng ila" a ti zang vuh. 

Ka u in a kuaha. "Ka unaupa tha ber Naruto.. I nupui neih niah decoration leh Ruai zawng zawng ka tum vek ang ka tih kha.. Jimmy-an palai tirh hun tur ka hre duh a ti bawka" ka u in a tih chuan ka lo nui a. 

U Sangzela tihchhiatna tur ka neih zawng zawng ka u ka entira, kan room a camera ka thuhruk atangin ka chunga a khawsak dan zawng zawng a hmu vek bawk. Min ring rawh tih angai tawh lo, min ring mai ni loin phuba lak duhnain a khat a, mahse Rempuia'n min khap dai tlat thung.

Ka u leh Rempuia hnenah an thuruk ka hriat thu ka sawi vangin Melo-i nen thil tih an nei dawn tiin ka hrilha, ni khat min biak theih loh chuan u Sangzela chhui zui nghal turin ka ti bawk. U Sangzela'n in a min dah ni khan ka u bulah depression ka neih vanga midang ka hmuh duh loh thu a lo sawi ngeia.A hnara ka tauhsakna pawh a lo hmuhtir thlap. Mahse, ka u in min khawihna lamah ka sual let tih a hre thiam veka. Rempuia'n a chhui zui nghala. Mahse, Ka bo zanah tak Melo-i damdawi overdose vanga a thih thut avangin ni hnih lai a chhuak lo va, ni thum niah a motor a tracking device a dah ruk atangin ka awmnaa a rawn kal an zui a. An zui tih a hriat an duh loh avangin an rawn tlai ta hret reng bawk. 

"Sport minister zahawm tak, Pu Sangzela leh a nupui misualin an bei hlauh maia. Pu Sangzela hi a darah leh a kawngah an kapa, a nupui Pi Lalrinmawii erawh chu an kap ve lo hlauh thung. Mahse, hliam na tak a tuar ve bawk. An mahni beitu te hi zawn mek an ni a. An man thuai beisei a ni bawk" 

Ka chhiar zawh rualin ka thaw hak mai. Hetiang ruahmanna hi Rempuia siam vek a ni a. U Sangzela tihsual tamtak te kan hailang anih chuan keipawn amah ka kah avangin hremna ka pumpelh dawn lo va. Mahni invenna ni mah se dan lakah ka him zo dawn bik lo tih chiang takin a hriaa, chiai miah lo in engkim a ruahman fel veka,amah lah Police officer tha ber pawl a lo ni bawk nen, tuman an ringhlel lo. . A intiam ang ngeiin ka vantirhkoh a ni a, a tihtur a hlenchhuak tha em em bawk. 

Tlai ni tla tur in kan balcony a chhun sen phut mai chu nalh ti takin ka en a.Pathian hnenah ka nunna min zuahsak avang leh midang nunna ka laksak loh vangin lawmthu sawiin ka tawngtai a. U Sangzela lam ka va hawi leh a. Ka hmangaih ngai dawn lo tih hre reng mah ila nupui ka nihna hlenchhuah tumin ke ka pen a. 

"Ka nu pawh Khan a damchhungin ka pa thupmawiin nupui nihna a hlenchhuaka, nangpawn ka nu ang khan i ti ve dawn ta anih hi" Ka u in min tih lai ka hre chhuak vawng vawng mai. 

Ka pan phei a, a hmaah tak ka va thingthi a, 

"Mi lar nih i duh thin a, I duh ang ngeiin Mizoram mai pawh ni lo, hmun tinah i chanchin an sawi luai luaia, I nupui tana i inpekna an fak che asin. Ka Naruto i tih thin ngei khan a thup mawi che a, Jail pawh i tang hek lo. 

Engpawhnise, tunah chuan keipawh nangmah ang tho niin i sual zia hre rengin ka thup angai ta si a. Politician i sawi thin mi tenawm tak tak te zinga Politician tenawm ber nupui, sual zep ruk chingah min siam ta anih hi" A mita en chungin ka ti a… 

A TAWP TA