Zarzokimi -4

 Chapter - 4

"Lalroeng, I va han mawl tak, ka thur vek ania" Thinrim em emin ka ti a. A tlak nat leh nat loh pawh ngaihven loin khawhma zar ka nawrsawn nawk nawka, khawhma behin min vuak na vangin ka ban chep chuap mai. "Eng nge a? Ro-a, I tla em ni?" Thangzeli'n a rawn ti lawng lawnga. " A zar a rap tliak alawm, a tliak awl tur ka hria a tia, a hre khawp aniang. Sawi pawh a sawi zawh hmain a zar nen lei an rawn thleng rual" ka lo ti chiama, Roenga rawn tho chhuak chu ka melh ram rama, "Zarzokim, min kaihthawh te tum ta che. Nangmah vanga tla ka nih hi aw. I vir lutuk vang anih hi" a ti bui buia. "Fimkhur turin ka ti ka ti che a, I confi zawt zawt bawka, I confi sual anih kha" ka ti let ve hlar mai. 

Khawhma bawr tha deuh deuh Rinpuia'n a rawn la a, kan inzui phei chu Ruatmawia'n min lo nuih thu maia. Ka nuih a za ve deuh tho nangin ka tum lui tlat. Ka Sam leh ka thawmhnaw an ban chuap a, inthlakna tur keng tho mah ila ka inthlak nghal anih chuan nakinah hak tur ka nei dawn bawk si lo a, lui thlen thlak vata, intih fai thuai thuai ka ngai a ni mai. 

Lui lam kan pan leh ta dam dama, kan naupanlaia kan kal thinna niin kawng hi englai mahin a tha ngai lo va, bawng kawng tum ang lek a ni ber. Feh kawng leh lui kalna kawng lun tak ni ve si hi a tha hleithei lo va, a chho ulh bawk si nen, haw lamah phei chuan hahthlak thei tak a ni. 

Lui kan thleng thla chu hmeichhe pahnih kan ri ta chul a, ka thinrim deuh pawh ka hre zui tawh lo.

"Zawngek li atangin tan chho ang u, thosilen in kan hrut anga. Len pangngai deng ringawt chuan engtham kan man lo vang' Roenga'n a ti zuah zuaha. " Len pawh kan deng ang chu. Den loh te chuan ritsakin ka ak ve bawka, a awmzia dawn lo em mai. Thangzel, khawimaw chi kha ka lo liak, Roenga'n thihchilh deuhthaw khawpa a lawh a ni bawka, kawthalo law law tur in ei teh ang" Ruatmawia'n a ti zui bawrh bawrh. 

Lui sir leilet ko a kalkawng lian lo tak leh bel tak si-ah kan inzui dam dama, "He thlam hi chu Ro-a tan malsawmna thlam ania" Rinpuia'n a ti zeuha, "engatinge? " ka lo ti vat. 

"Ek-a, ngawi mai mai rawh' Roenga'n a ti ngal ngala, chutia a tih chiah chuan ka hre chak ve sawt. 

" He thlam hi awm lo se Ro-an nupui a nei nang. He thlamah hian hna tlin takin a thawka, an puar mai a ni" a ti ta chu Thangzeli a nui nghal kar kara, "Pu Ri-a khan a tuka a zuk feh khan leilet thlam a lo awn vek atih tak kha" Rinawma'n a lo ti ve zauh a. 

"In va ninawm mai mai e aw. Lalrom, cheng 5 thir hlut vanglai taka hmeichhe fight vanga tibo i nih ve tho kha. Min kap ve reng reng suh" a ti hluk hluka. Thil kaltawh sawiin kan nui ta tlawrh tlawrh. 

"Ro-a hi chu tluk rual a ni lo, a hmeichhe fight dan reng a pui mai. Han bawhthlu pawp ila, an ban an lo vai ve chuan an ban bulah han chum pawp pawp mai ila an zal mai. An ke an lo la lek ve leh zel anih pawhin an malah han hmet nghek mai ila, an zal lo thei lo tih  kha a thupui ania. Tunang laiah te chuan tuman hmeichhia an fight tuk tuk tawh ngai lo lehnghala. Ro-a tan chuan a lo piang hma hi vanneihna a ni ringawt" Thangzeli'n a lo ti ve leh a. 

"Tun ang thlenga nula, Zarzokimi te hi chu khang hunlai pawh khan fight tu hmu zo reng reng lo ania. Hmelchhiat pawh hi tha deuh ania" Roenga'n a ti kher a. "Tha min ti em maia, kan tleirawl lai pawh khan mitmei hmuh che ila chuan min ngaizawng tih i thup zo lovang" ka ti ve nghal zata. 

"Ka ngaizawng lo ve chiang che e.. Eee, Zarek.. Hman atanga ngaizawng ngar ngar tu che ka hria ania. I single chiah bawka, ni ula a tha ang" Thutak fu hian a ti a. 

"Awi, a chhe awm" Ruatmawia'n a lo ti peka."Lalrom-a hi tha i tih leh tih loh animai" a ti leh zuah zuah. 

"Eng nge Lalrom-a daih daih, an inang tihna mi? " Thangzeli'n a ti chu Roenga bawkin, "amah pawh kha a lo ni reng thei a" a ti leh a. 

"Ngawi mai mai teh,Kan nula senior hi hman ang khan a a tawh lo ania, thil a ngaihtuah vak vak zel lehnghal nen Primary School vel atangin angaihtuah let leh anga, kan luikal boruak chhe vek khawpin a inngaihtuah muk mai ang" Rinawma'n a ti ve a. 

"In va han over tak" ka ti hlak hlaka. "Ania lawm, kha.. Fimkhur ta che" Tih leh ka tlu tur min rawn vawn a ruala. Kalkawng a te bawk si, ka rap pial leh thin a. Ramhna thawk ngai lo leh kal tam lo tih takah ka zei lo. "Khet khut che hian, nang hi chu khawpui mi nei tur i ni. Mahse, kan khawmi pawh nei la sawrkar zemzen i nia. Ram hna i thawk dawn lo a, a zia tho" a ti leh zuah zuah. 

Leilet kan pelh thlak hnuah lui kan daikai a, tui a tam lutuk lo bawka, khup pawh a thleng lo. Achang leh tiaupho chungah kan kala, achang leh tui kan daia. Minute 10 vel kan kal hnuah zawngek li kan thleng thla a. Tiaupho zau laiah kan innghata. 

"Zotei awm se chu li mawnga tui huai kan mantir tak tak tawh tur ania" Ruatmawia'n a tih chuan ka lo nui kar kara. 

"Lo nui suh nang kha, Zawngek li thuk zawng kan sawitir leh mai tur che ania" a ti leh a. Kan nui ham ham mai. 

Mipa hoin a inchhawkin thosilen an hrut a, hmeichhe pahnihin chengkawl kan khawrh ve a, rei zawng peih lo in a van em avangin lung chunga thuin kan lo ti ti ta mai mai. 

"Hmeichhe pahnih khan sangha rawn hnawt thla rawh u. Kei niin kan rawn hrut chho anga" Rinpuia'n a tih chuan "Ka thiam awm lo" ka ti thuaia. "Tuiah khan lut la,in pahnih khan tihian inti ang.. " Tichungin tihdan tur zaizirin min hrilh a. Thangzeli nen tuiah kan lut a, rul hlau em em tih takah rul ka rah hlauin ka ke hnuai a za vek thei. 

Thangzeli nen kan han ti ve lauh lauha, kan zei lo ngang mai bawk nen kan nuih a za zel bawk si.. "Chhuak rawh u, sangha in um bo zo vek zawk ang. In va han hmantlak loh tak, chhuak rawh u" Roenga'n a ti ta tun tun. 

"Kan thiam lo ang kan tih reng kha. I chhe ten tun em maia" Thangzeli'n a ti let ve hlak hlaka. Lung a chhar takah chuan min rawn vawm fuh hlauin kan tlanchhe chhuak ta rawk rawk. 

Sadawt li kan thlen chhoh meuh chuan kan man ve ta nuala. Hmeichhe pahnihin mipa ho ipte pui leh keimahni ipte kan ak a, sangha bawm keiin ka khai tel bawk. Sadawt li bula tiaupho zau laiah kan chawla, 

"Hetah hian chaw fak mai ang u. Chawfak zawhah chuan haw a ni tawh mai dawna. A hmanhmawhthlak loh, duh leh thui vak lo chu Lalrom-a nen kan hrut  chho leh anga, Hmeichhe pahnih hawn khawp chu a awm mai ang. Roa,sangha chhumna tur vel kha lo buaipui mai la" Ruatmawia'n a ti a, Ruatmawia hi kan naupanlai atang tawha lui lama kuthmui tak a ni a, a hlawhchham ngai lo tih hial a ni bawk. Vawiin pawh ani zarah kan man nual mai. 

Roenga'n mau lian leh changkhat deuh tak pahnih a va laa, sangha chhum tur a buaipui a, "Ooo, chakawk ka la ang ka tia, ka theihnghilh daih mai. Zari, kawrte kamah khian a awm nual, han la lawk mai teh" Min tih chuan Sadawt li rawn fintu kawrte, Sadawt li hmingput chhan chu ka pan thuaia. Thui pawh ka kal hmain ka han hmu a, ka rin aia a lo tam avangin ka la ta teuh. 

"Khai, chakawk leh katchat pawh a hrehrang lehpek lo" ka chhuk thla min lo hmuh veleh a lo ti lung lunga. Chakawk laka ka lak thenkhat chu chakawk ang tak, nisi lo a lo ni a. "A va inang em em" ka ti nang nang. " Heng te chu ar awpna turah kan hman thin kha… aaaa, nang chu i pi leh pu te khan engkim an tihsak hneh lutuk che a, I hre chiang lo tak ang" a ti leh mawlh mawlh.

Ruatmawia te an rawn chhuk a, an thut hahdam hnuah chawei kan siama. Mau bura sangha leh chakawk kan chhum pawlh zawng zawng a laiah an bun a, a tui erawh bur dangah an daha. Sangha, kutzungtang tiat seng sawng leh kaikuang an let sen phang mai chu ei a chakawm hliah hliah. 

Muangmarin kan haw ta hnak hnaka, kal lama kan kalna lo lam, motor luh theihna tura kawng an laihah kan haw ta thunga. Kawng a zal zawk nangin a kual em avangin ke a kal te hi chu kan kal zen zen ngai lo. Kawngsir velah tumbu a lo tam maia, mipa hoin an khawrh paha, "Lo ngawi mai mai teh, I hmuh ve ho kha tumbu tui lo ber chi anih kha, a vui hmuam anih loh pawhin lairawk tal lak tum laia, changthir vel lo kawh lo kawh ve mai" Roenga'n min ti hluk hluk. Kan naupanlai atang tawhin Roenga hi chu kan vaia boss deuh tawp a ni thina,an chhungkaw khawsak ziaawm vang lam ai chuan amah hian leadership a nei tha a, min control tum run si lo hi athu kan ngaichang thap zel a. Tihian min khak min khak mah se tuman kan ngainat loh phah ngai lo.

Dar 4 velah in ka thlenga, ka nu a lo buai em em maia, thut hahdam hmasak pawh awm loin eirawng ka bawl nghal sawk sawk.

"Eee, ka rin ai chuan i va rawn hawn tha ve. Chhum ang che aw, a tui hang a tui dawn ania" Ka sangha hawn khawih dan dan chungin ka piin a ti a. "Ruatmawia a tel ve chuan a hlawhchham theih loh alawm, hmeichhe pahnih min pe hnem deuh lehnghala, khawhma i ei duh em? Ka lo hawn asin" ka ti nghal zung zunga. 

"A thur awm em mai,chawei khamah duh leh tlem ka ei ang. Aaa, lairawk tumbu te i lo hawn tel a ni maw?? Khawi maw i nu vawkchaw chhum naah ka va thukphum teh ang" a ti leh barh barha. 

"Eng maw thukphum tur?' Kawngka hnung lam atanga lo luh pahin ka nuin a rawn ti nghal lawng lawng.Ka piin a lo sawi nawn leh a, " Nakinah nimai" Ka nuin a ti a, mahse ka pi ngaihdan a ni lo. "Keiman ka va rawh ange. A har hleinem" a ti a. Tumbu a lachhuaka, "ka ti mai ang ka tih chu mawle, lo dah rawh. I va tlu leh tur ania. Thil tih hi lo tum ve talh thin suh" ka nuin a ti leh hlak hlaka. "Nakin nakin i tia, I tei i tei anga, I hre leh lovang. I haihawt tehreng nen" Ka piin a ti leh hlak hlaka. Ka nu lahin a hnial leta, "awi, in ninawm em mai. Keiman ka va ti ang" tih pahin ka la a, vawkchaw chhumna lam ka pana. Ka pi leh ka nu inhnial zui chu ka hre thei a, thinrima inhnial ni si lo hian an awmdun chuan an inhnial lo thei thin lo. 

Ka u volleyball beng zo lo hawin "Laroma pa a boral an tia, I hrechiang em? " Tiin min rawn zawta. "Hre nang, tu nge sawi a? " ka lo ti he haw a. "Ruatzela kha an rawn ko a. Tun lawk khan Aizawl lamah a boral an tia" a ti leh zung zung a. Rinawma pa hi sazu meidawh a ni a, kan khuaah tho veng hranah awmin fa pawh pahnih an nei a. An fate hi mipa ve ve niin an nungchang a tha lo va, insualbuai naah chuan an tel ngei ngei tihtheih a ni a. Rinawma te unau hian tlawhpawh lem lo mah se pa te na na na chu a boral meuh chuan a tuar ve viau tho chu ka ring. 

"Chemi, I phone a ri ania" ka nuin a rawn tih chuan hmanhmawhtakin sitting room lamah ka tlanpheia. "Aw, Thiani' ka ti nghala. 

" I lo hre tawh em? Rinawma pa a boral ania" Thangzeli'n a rawn ti nghal a. "Hei ka u in a lo sawi meka, eng na nge? ' ka ti let ve thuai. " Khawsikpui an tiin ka hria. Hmanhmawh vak loin zanah kal ila, Lalrom-a pawh ka la be lo. Sawi tur a vang dawn lutuka" a rawn ti leh mawlh mawlha. "Ni chiah, enteh.. A nu a tap angem le? " zawi deuh takin ka ti a. Ka nuin ka tawng a lo hre phak chu niin, "I va han a em aw" ngaihdan ni lo hmelpu chungin min rawn ti a. "Tap ve awm e, a la tuar na ve tho ang.. Ka dah dawn, chaw kan ei dawn a" a rawn ti leh zat zat. 

Phone ka off veleh ka nuin min rawn hau zui leh a, "khatiang mai mai zawh angai em ni? Nula pui si, I at viau reng mai le?? " a ti hlawih hlawiha. "Oooo, amah Lalroma pawh a ni chuang hleinem, Thangzeli bulah daih ania, a ho em maia" ka ti ve tlat.

Zan lamah kan thianhoin kan kala, dar 12 rik hma deuhin ruang a rawn thlenga. Rinawma ruang bula kun chal chunga a thu chu khawngaih em em in ka en reng a. A pa a mamawh thin zia leh a huat zia a sawi lai te ka ngaihtuah kir a, "kei chu ngaihzawng kawp pawh ka duh lo. Nupui phei chu ka damchhungin ka thlak ka ring lo. Ka pa vanga kan tawrhna rapthlak zia ka hrechiang em a, engtikahmah nupui ka nei anih chuan then ka tum lo" a ti thin a. Hman atanga vawiin thleng hian mize nghet tak nei a ni bawka, a pa hi a nau Ruatzela chuan tlawh fo mah se Rinawma hi chuan a tlawh ngai lo va, a pa fa te pawh a unau angin a sawi ngai lo. A pa a huat zia hi sawifo lo mah se kan thianho chuan kan hriatpui vek a,dem lah kan dem hek lo. 

Rinawma pa boral atangin kar a liam leh tawha, Rinawma te pawn nunphung pangngai an zawh veleh tan a, rinai takin a pa boralnain a khawih naa, a hma lawka ka rilru na min hnemtu kha tunah chuan hnem let ngai a ni ve ta thung. Tun hma zawng aiin kan inbe tama, kawm lah kan inkawmngeih zual em em mai. Ka theih ang angin KTP ah ka inhmanga, kum laklawhah sande sikul zirtirtu atan min ruat bawk a, Reubena vanga ka natna pawh la reh vek lo mah se thla 3 vel a liam takah chuan ka zia ve ta a. School leh kohhran nuam ka ti lehzual a, khawpui lama lo awmbo reng ta chu hruaitu ten thil tamtakah min rawn ve fo bawk nen, kan kohhran thalai pawl pawh ka ta ve ta hliah hliah mai. 

Supply office a an officer khan min rawn biak fo bakah a rawn leng zeuh zeuha. Tha taka ka biak bak chu thui tak kalpui ka tum lem lo. Hmelchhe lo tak leh pianphungah pawh zahpuiawm lo tak ni mah se a mizia leh Reuben-a mizia inang tihchang ka nei a. Ngaihzawn atan chuan ka duh lo bur. Lo leng fo ta chu miin kan inngaizawng angin an sawi thin tih ka hre tho a, engmah inngaihzawnna a awm lo bawka mi sawi mai mai chu thutak hla takah ka ngai peih lo. 

"Enteh, u Davida nen hian in ingaizawng lo tak tak em? " Thangzeli'n min ti a. "Ngaizawng nang, a lo leng ve mai mai ka tih ka tih kha. Min ring lo mi? " ka ti nang nanga. "Ring tho e. Mi hian an sawi peih sia, hmanni phei chuan nu Zuii'n ka hrechiang lutuk, an inngaizawng a ti tlat che u a. Chuvangin ka zawt mai mai che" a ti leh a. "Nu Zuii sawi anih chuan awih angai em ni? " ka ti ve hlar mai. "Ni ve tho,Pa Luaia phei chuan han ko ila, a eih pawhin amah tak hmuh loh chuan a awihawm loh e a tia lawm" a tih leh chuan kan nui ta vak vak. 

"Nang hi chu Lalrom-a nen in inhmeh ber ka ti" Thutak zawk hian a ti leh riha. "Tehngawt a che" ka ti tak nangin ka rilruah thian mai piahlam ang turin a vawikhat nan a lo lang zauh maia. Hman atanga vawiin thleng hian hetiang zawng hian ka la ngaihtuah ngai miah si lo va, mak ka ti viau. 

'Lalro-an a sawi ni atang khan ka lo chik ve char chara, a ngaihtuah dan che hi thian bak a ang ka ti tlat asin. Atirah chuan ka ngaihbel mai mai aniang ka tia, mahse a rei zela, I rawn KTP ve tak tak atang phei hi chuan ngaihzawng en hian a en che tih ka chiang tawh lutuk. Thian inkawm satliah lo lutuk kan nih vang hian a thup ve nasa chuan ka ringa. Bakah, chhungkaw khawsakah in inhlat em a, I chhungte hian an rem ti dawn lo sa a" a ti leh mial miala. 

"Awi, I ngaihbel mai mai anih kha a. Thian ang bak hian ka en lo a, ani pawn nangmah nen min en dan a danglam teuh lo em mai. Duh duh huna bialpa te vanga rilru nat laia ka tahkhum hian thian ang bakin min en teuh lo mai" ka ti leh a. 

"Aaa, ka hre thiam tawh bik lo e a. Hunin ala hril mai ang.. Mawii leh Ruatmawia pawh an inneih daih tho hi, in innei anih pawhin amak chuang teuh lo mai" nui chung hian a ti leh a. Kan in bul kan thlen tak avangin ka sawizui  lo va. Zan inkhawm kal dawna min lo nghak tur in ka tih chuan a bu nghat nghat a, an in lam panin a chhuk thlaa, inchhung ka luh hma in ka ni te nupa kawngpuia lo kal ka hmu a, an kalna tur ka zawh chuan kan in a chawei tura lo kal anni tih ka niin a sawi a. Zingah engmah an sawi lawk lo nge ka thawh tlai avangin ka thawh hmain an sawi zawk pawh ka hre lo. 

Kan inzui lut a, ka nu in bawkbawn bai tur a lo zai meka, ka pa erawh chuan sa kan tumin a lo buatsaih mek thunga. 

"Ui sual zarah arpui tuilai kan ei phah dawn ania, a pawi tui dawn mang e" Ka ni Pasal, Pa Rokima'n nui huau huau chunga a tih chuan kan ui a che leh tih ka hre maia. "In vahte ui duat alawm, han sawisel ila a pa lah hian a tan tlat lehnghala, ka thu chu nise hman hmanah kan talh tawh ang. Mi ar em a la seh lo hi kan vannei teh ania" ka nuin a ti hlawk hlawka. 

"Eee, chutin timah ta che. Ani hian seh zel lo se chu i arpui tuilai sa kan ei phak nang. I pasal fanaute hian kan eichak ru hle tih a hriat avangin Roger-an min talhsak anih hi" ka pain a tihsan mai maia.Nidangah pawh ka nu a an hlawk hlawk pawhin ka pa hian fiamthu hlirin a chhang thina, a thinrim rei thei thin lo. 

Zan inkhawm banah reivak lo hla kan zira, kan zir zawhah kan inah inkhel en tumin tlangval thenkhat in min zui haw a. Inkhel hi ka tan zawngte khel anih lem loh chuan ka en peih lutuk lo va, question siam tur ka nei bawk nen room lama inkhung ka duh rilru a. Mahse, min zui haw ve bawk si nen, rilru bet vak lo in ka thu ve ta reng. 

An haw hnuah Rinawma'n msg min rawn thawna, "zanin kha i nawm loh hmel riau ka tia. Buaina i nei deuh nge? " a rawn ti a. "Nei nang, tinge? " Tiin ka zawt leta. "Ka hre bik chiah chuang lova, I awm a nawm loh hmel em a ka ti mawle" a rawn ti leh maia. Tlang takin naupang exam na tur question siam ka ngaih thu leh inleng mutsan ka hreh bawk si rilru nuam lo ka ni tih ka hrilh ta a. "Anih tak chu, tunah khan siam i tum nge? " a rawn ti leh a. "Aw, tlem tal ka siam loh chuan… " ka ti let ve a. "Tha deuh khan siam la, mangtha le" a rawn ti leh chu ka mangtha ve nghal thuaia. 

Class 9 zirlai bu ka keu a, ka en ka en hnuah ka dah ta ngawt. Mak deuh maiin Rinawma'n ka ngaihtuahna a luah tlat reng maia, Thangzeli thil sawi engah Rinawma nen kan inkawmdan te ka ngaihtuah kai zela. Min ngaihsak mai bakah min hauh deuh tlat ni a hriatna ka nei ve ta a. Naupanlai atanga inkawm khawm vek mah ni ila Rinawma anga engkim ka hrilh ngam an awm miah lo va, tun thleng hian Rinpuia pawh la tlangval ve bawk tho mah se kan inkawmngeih uchuak lo va, ka ngaihzawng chung chang phei chu ka sawipui ngai mang mang lo tih te ka ngaihtuah kai ta zel mai. 

Rinawma nen hi chuan hriat pawh kan inhrechiang lehzual bika, zanin a ka rilru nuam chiah lo a lo hre chat thei te kha mak ka tih bakah ka hlimpui ta deuh riau maia. U Davida lo len changa a lo len ve pawha phone khawih deuh reng thin a nihna te, u Davida lo len loh tuma amah a lo len chuan phone a khawih ngai mang lo tihte thlengin ka ngaihtuah chhuak ta zel a. Keimah hian ngaihzawn enah ka lo en lo em thina, min endan ka lo hre lo niin ka hre ta.. 

Nitin hun angai reng in kan hmangchho ve zela. Rinawma awmdan ka ngaibel nasa tial tiala, ka rilru puthmang pawh a danglam chho ta tlat. Mahse, engmah Thangzeli pawh ka hrilh leh chuang lova, ka awmdan ngai rengin ka awm a, Rinawma pawh nidang ang thoin ka biak dan leh kawm dan a ngai reng tho. 

Favang boruak nuam tak a liama, thlasik kan thleng leh tan ta, school lam thil pawimawh ti turin kan headmaster-in Aizawlah min tir thlaa, school thil vel buaipuiin ni 2 hun ka hmanga, ni khat erawh chu keima mimal thil vel buaipui nan ka hmanga, ka thianten Aizawlah ka awm tih hriain chawiei khawm an rawt vat mai. Ka haw hma zanah kan thian pakhat, amah inluaha awm inah chaw kan eikhawma. Kan inhmu khat bawk a, sawi tur kan ngah em em maia. BA leh MA ka zir chhunga ka kawmngeih ve ber, Saii nen chawei kham hnuah kan titi duna, ka hlauh ang ngeiin Reubena chanchin a sawichhuak ta chat. 

"Min rawn biaa, hrehawm a tihzia vel kha a rawn sawia. Ka ngei lutuk khan ka lo be tha peih lo tawp. Hrilh pawh ka hrilh duh lo che nih kha, ani hrehawm tihna khan engmah a siamtha dawn pawh ni hlei lo" a ti nghat nghata. 

"Nia, engmah a siamtha dawn lo. Tunah chuan ka zia tawh lutuka, theihnghilh ngawt chu har mah se ka hre reng bik lo ania. Tuarsual chang a awm tih mai loh chu" nui chunga ka tih chuan a nui ve a. “Period dawn mood, mahni inkhawngaihna rau lo thawh changin a hrehawm ang"a ti ve a. Kan nui dun nasa mai. 

Ka ngaihtuah chhuah khat tawh vei nen, kan han sawichhuah leh takah chuan thil tul loin min tibuai leh ta tlat. Ngaihtuah loh hram hram tumin kan chawei khawmnaa kan thlalak Facebook-ah ka post a. An mahni ho ka tag diat diat a. Rinawma'n fb-ah msg min rawn thawn a, ka haw hun tur vel min rawn zawta, kan inbe zui ta reng. 

"Enteh, u Davida hi ka chhang ve tawh mai dawn mawni ka tia. A mizia hi tha i tihzawng a ni em?  " Tiin msgin zan khat chu ka zawt a. 

"Ka hre ve nang, a fel khawp lawm ni" Tih zawngin min rawn chhanga. "Hetia hmuh theih chinah hi chuan fel ve tho e. Mipa bawk hian mipa mizia inhre thei a, I hmu fo tho sia ka zawt che nih chu" ka ti leh a. 

"Zu a in ve thin tih lohah chuan a fel in ka ring. A thuhrimin ngaihzawng neih leh i inhuam tawh em ni?" a rawn ti leh a. Reuben-a ngaihtuah reng awmzia a awm loh zia thuife ka type a, "A dik alawm. Hmalam i pan theih chuan a lawmawm a" a rawn ti leh a. 

"Nia, u Davida hi ka khawngaih ve deuh tawh a, ka chhang ve mai dawn mawni te tia" ka ti nawn leha. "Zu in mi i duh em ni? " a rawn ti leh a. Kan chhungkaw zingah zu in kan awm ngai loh avangin zu in bula chen a hahthlak nge a hrehawm chuang lo tih lam engmah ka hre lo va. U Davida te ang zu in hi chu mi hriatah pawh in lo, chu pawh kartawpa inzeuh ang chi a ni a. A pawi lemin ka ring lo. 

"A zu in dan a ziaawm hmel ka tia, kei phei chuan a ruih pawh ka la hre lo. Ka kum a tlem vak tawh si lo a, ka pi lah hian a damlaia pasal nei turin min duh bawk si a" tiin ka chhang a. 

"A tha alawm, I ngaihdan apiang ka pawmpui che. Mahse, ka ngai ngawt ang che" a rawn ti leh a. Reply mai lo in a msg ka chhiar nawn ka chhiar nawna, min ngaihtur thu a rawn ziah tel chu thian inngaihna lam angin ka ngai leh thei ta tlat lo. 

"Min ngaih viau pawh khan pasal ka neih tho angai ve a. Nakinah inah mo te kan la nei anga, hnawksak ka la ni thuai mai dawn. A thuhrimin, u Davida pawh ka pasal tur tihna a ni chuang nang" Tiin Reife ka inngaihtuah hnuah ka thawna.

"I sawi dik e, nula senior nge nge" a rawn tih chuan ka nui a. "Nangpawh nupui neih ngaihtuah thuai rawh, I nau i dip mai mai ania. Mipa tan pawh fa neih har a tha lo kan tih kha" ka va ti veleha. 

"Min nei duh la chuan ka inpeih reng, min duh dawn lo ropui mai sia tiraw? " ka rin loh tak mai hian a rawn ti ta.. Ka lungphu a rang nghal dawt dawt mai. 

"Innei thut mai ila, KTP member ho an hawihai ngawt ang. Kan chhungte pawh" Tih ka thawn let ta ngawt. 

"Chung mai mai te chu a ho e. Hman atangin nangma bulah bak inbunruah na tur hi ka nei tak tak ngai lo va, hmun danga awm ni lo va, pasal nei tur anga ngaih tuah che pawh a har hle mai" a rawn ti leh zel. 

"Hey, ek-a.. Chutiang zawngin ngaihtuah suh, nupui te ila nei anga, min hrechang lo zawk ang" ka ti let a. "Pasal i neih hma chu ka nei lo vang. Ka sawi kha hre reng la, min neih duh hlauh chuan ka inpeih ania" a rawn ti leh a. 

"I over si, ka muhil dawn. Mangtha phawt" tiin ka chhang ta daih. Kan inbiak dan nidang a ang lo va, ka lo ngaibel zel tawh mai si nen, a buaithlak viau. 

Kan khaw lam pana kan haw kan tluang lo viau maia. Kan chuanna sumo ke vawi hnih ngawt a puncture a, chhunlai dar 12 vela kan chhuah hian sumo-in tlai dar li velah te khua kan lut hman thina. Sumo hi chu mihrang hrang chuang kan nih avangin mimal motor te anga tlanpui vawk vawk chi a ni lo va. Passenger te zai ngaia tlan angai thin. Two wheeler chuan kan khua leh Aizawl inkar tlanchhung darkar 2 zen zawn bak a ni meuh lo thung.

"Miss Zari chu i ning tawh awm mang e aw" Nu pakhat hian min ti a. 

"Ning lo ve, vawiin chu motor ka rui lo lehnghala, a hrehawm lo" ka ti let ve thuaia. "Ka khalh thiam em a, i rui lo anih kha. Achhuana motorah chuan chuang la i rui leh vak ang" Driver-in a tih chuan kan nui dar dara. Aizawl leh kan khaw Inkara zin veivak tam pawl tak kan nih ve bakah, kan Motor veka kal sen anih loh avangin sumo-ah ka chuang nasaa, ka motor ruih hrat hi Driver ho chuan an hre lar viau reng a ni. 

"Pasal nei tawh rawh, tunlai mi ho hi senior te hi in pawisa lo nasa si a, a tha lo. Fa tal neih tur ania" a ti leh bawrh bawrha. 

"Neih tur ka hmu lo anih hi" ti a ka chhan let chuan " Awihloh tur tur anih chu. Kan khaw tlangval ho hian phu loh enin an en che aniang chu" a ti zui leh bawrh bawrha, "an a ngawt alawm, hetiang nula fel leh khawsak tha, mahni inchawmzo te hi ngaihzawn kan huphurh luatah ngaizawng nei loin an awm fo duh tihte an hre lo aniang. Ka tlangval lai chu nise ka ngaizawng em em ang che. Mahse, nang hi chu khuaa awm ngai lo tih takah khawpui lamah tha deuh i hung ang" Sumo Driver-in a tih chuan pakhatin, "Nia.. Khawpui lamah ui deuh chungin kan la thlahliam ka ring. I awm achin chu school naupang zingah lah i lar hle mai si a" a lo ti ve a. Fakna hi chu dawn a nuam bawk a, "Awi, chutiang a ni lo" ka ti tak nangin ka hlim viau mai. 

Zan dar 7 velah khua kan lut a, kan khua hi khawdung sei angreng tak mai a ni a, Aizawl lam hnaih loh ber vengah kan la awmzui a, thlasik lai lo ni chho tawh nen, in ka luh fel meuh chuan a lang tlai raih tawh. 

Ka pi a lo mu hman tawh nangin a rawn tho leha, a pawnfen tur ka hawnsak ka pe a. "A va mawi em aw' a ti deuh reng maia. " Pawnfen ngai i feng renga, a thar ka rawn leisak che anih kha" ka ti a. "A thar diai pa 3 lai ka la nei alawm. I lei duh kher khera, mahse i lei mawi em mai" lawm takin a ti a. "A thar nei lo ang maiin a hlui hlir i fenga, engtika fenah nge maw i tih ni? ' ka nuin a lo ti ve bawka. 

" A thar apiang fen zel te chu a uiawm alawm mawle" ka piin a ti leh mai. 

Chawei hmain ka inbual a, kan chhuah hmain inbual tho mah ila zin hi chuan thlen veleh inbual loh chu hrehawm ka ti thin. Chaw ka ei a, ka eikhamah roomah ka chho nghala. Kan motor chuang kan tawt mai bakah Driver bul chiahah ka thu a, ka va nek lutuk hlauin bawp khawkherin ka thu nasa a. In thlen hnu a ka awm hahdam takah chuan ka kawng a na hle tih ka hrechhuak ta chauh.

Zinga ka nuin min rawn kaihthawh chuan dar 7 leh a chanve a lo ri tawha, school kal ka ngaih nghal dawn avangin peih lo takin ka tho a. Inhnuai lama chhuk pahin ka phone ka check a, Rinawma msg leh u Davida msg a lo awm ve ve a. U Davida rawn sawi hmangah ka mut hnuah a lo kal anih hmela. Ka mu kha ka muthilh nghal mai avangin a lo kal tih reng reng ka hre lo. Rinawma erawh chuan kan thlen hun min rawn zawt ve thung. 

"Ka kawng a na tlat a. Bawpkhawkherh deuh hlirin ka rawn chuang chho a" ka tih chuan ka piin "I herh aniang.. Artui kha hip teh" a lo ti nghala. "Ka ten e a. A thang awm em mai" ka ti hlar. "Chuti anih leh artui leh bawnghnute kha chawk pawlh rawk rawk la, I hnar hup khan in teh" a la ti hram a. "A thang dawn tho alawm mawle. Damdawi ka lei mai ang, Nu… inherh damdawi kan nei em? " ka ti zui nghala. Ka pa hi kan naupanlaiin inherhpui vangin a bawksawp reng tawha. Khata tang khan ho te teah a inherh zel tawh maia. Chuvangin damdawi kan kawl reng thin in ka hria. 

"Kan room a damdawi bawmah khan va en rawh, a awm ang" Veranda atangin a rawn ti let lang langa. 

"Mizo damdawi tha tak a awm reng laia vai damdawi bawk tih zel mai. Vai hi inngaisang nufa teh e. Vai aieng, vai thingpuife ti bawk" ka piin a ti ta hlaih hlaih. 

"Vai damdawi pawh a tha tho alawm, a thawkchak zawk lehnghala" Kal pahin ka ti a. Ka nu te room a damdawi bawm ka va hai chuan ka duh a lo awm ngei. Chokaa ka va phei leh pawh chuan a lo la phun a. 

"Tunhma kha lehchenah vai reng reng kan mamawh ngai hleinem, tunlai mi chu inthatchhia a, in eikhawp pawh in thawkchhuak thei lo anih a" a lo ta ti ta. 

"Oooo, I dam loh pawhin vai damdawi siam vekin anih kha an enkawl che, vai kan mamawh em vang ni loin an thilsiam chhuah pawh hman a tul chang a awm ve thin alawm. Hmanlai te chuan kekawrte pawh in ha duh lo va, keini te chuan kekawrte hak loh pawh kan duh tawh hleinem" ka ti a. 

"Kekawrte hak te chu zahmawh inti thawpik mai mai" a ti vei hmaka, ka nui ta vak vak. 

Chawei laiin ka nuin "I inherh em ni? Ngahnge inherh damdawi i ei ngawt a? " min ti a. "Ka inherh aniang, niminah Aizawl atangin bawpkhawkherh deuh hlirin ka lo chuang a, nizan khan a na lutuk" ka ti liam mai. Tunah pawh a la na tho nangin nizan ang em kha chu a ni tawh lo. Ka damdawi ei khan min chhawk tawh pawh a ni thei tho. 

"Thangbawnga hi chu a duham khawpa, a hnawh leh teuh pek che u aniang chu" a ti hmarh hmarh. "A hmaah pali kan chuang alawm. Mahse, pakhat kha naupang ania. U Thanga ka nek vak zel kha hrehawm ka tia, gear a thlak khan ka mal a sik tel zel angai bawk si. Ka bawp ka khawkherh char char tawpa" ka ti veleh a. " Thangbawnga tih dan fo alawm. A fel bawk si a, a motor a chuan kan duh tlang bawk si atin ni. Ka hmuh hunah ka la hau tho ang, midang hrehawm ti khawpa leng leh leng lo va hnawh vak zel mai" a ti leh mawlh mawlha. 

"Hauh kher angai lo em mai" ka u in a lo ti hmuk. 

"I nu hi chu mi hauh a ching laklawh a, mi kawng kal mai mai pawh a hau hram zela. Tuman hlauh pawh an hlauh loh che hi. Ngaiah an nei che a" ka piin a lo ti ve bawka. Ka nu lah chuan awlsam te hian " Ka chhun zo tawh che anih hi" a ti duh leka. Ka pi ngaihdan ni lo a insawithiam zui nasa maia. Tuman chhan enah pawh kan en tawh lo. 

Thil ken tur ka neih nual avangin ka u in a office kal hmain schoolah min thlah a. Ka pa tiffin a pe pah bawka. School kawta naupang lo awm ho ka ko a, ka thil ken office lamah ka thiar luh tira, Ball te ka hawn tel avangin an phur ngang mai. 

November thla kan hmang zo va, December thla kan han chuangkai chu khua a vawt ta var mai. Pawlsawm exam tur ho tlai tin extra class kalpui an ngaih tawh avang leh result tha nei tura kan duh em avangin kan tang nasaa. Naupang mai ni lo zirtirtute pawh hah tak kan ni. Achang phei chuan kan zirlai naupang te zanah an in lamah tlawh chang te kan nei a. Kohhran lamah hla zir ngai leh inkhawm pangngai nen, buai ve thei tak ka ni. Ka awl zan chuan u Davida a lo leng zantina, inngaihzawnna tak phei chu kan la nei ta lo va. Min han bem viau pawhin ka pehhel zel a ni ber. Chutichung chuan a lo len loh phah chuang lo va. A nihna leh a mizia te, Aizawl lama an chhungkaw dinhmun tha tak te ngaihtuah chuan kei Thingtlang nula, high school zirtirtu ve mai hetiang taka min nghak peih hi mak zawk tak a ni. Thingtlang khawlian pawl tak ni mah ila khawpui tluk lohna tamtak a awm lo thei lo va. Kan khawsak phung te changkang ve em em tawh mah se mi nawlpui nun phung erawh khawpui nen a inang thei lo. Khawpui lam aia kan khaw tihdan tha zawk tamtak awm ve mah se a tha lo zawk pawh a ve tho bawka. Khawpui kan phak loh na lian ber zinga pakhat chu mi chanchin sawi hi niin ka hria. Keipawh hi ka fimkhur ve hle chungin u Davida nen kan han inhnimhnai ta hi ka rin aiin an sawi duh daih mai a lo ni a. Keimah pawn ka hriat loh tam tak lo hre tawk an awm leh thina. Chesual ang lek leka min han sawi duh tawk pawh an awm leh zeuh thin. Khin thamah ka ngaih loh em avangin a sawitute han zawh leh vel erawh ka tum ngai lo. 

Rinawma nen pawh kan Inkawm dan a la ngai reng a, u Davida chung chang erawh chu ka sawipui leh tawh lo. Amah pawn min zawt bawk lo va. Midang ang thoin kan inngaizawng taah angai ve a ni mahna le. 

Zan khat kan inkhawm bang, hla zir tura kohhran Hall a kan lut khawm chu ka mit la zak tu thil ka tawng ta tlat. Rinawma leh Teseni inhnaih taka phone en dun chunga lo thu te chu anni a. Teseni hi kan khaw bul lawk, electric dept ho hmunpui a thawktu, thla kalta maia an rawn transfer a ni a. Kan khua leh electric Dept ho awmna hi ke in minute 20 kal vel lek a ni a. A quarter luah tur ala fel theih loh avangin kan venga an chhungte bulah a cheng riha. Nula te lam, ngo fai var leh nui duh tak, mize zangkhai tak nei a ni a. Tlangval hoin an rim nasain an tilar viau mai. Rinawma pawh hi a leng ve zeuh zeuh thin tho a, mimal taka an inkawmbik leh bik loh ka hre lo va. Tuman an sawi ka hre lo bawk nen zawh pawh ka zawt ngai hran lo. 

Thangzeli nen contralto ho thutna thin tlarah a kil lamah kan thu duna, hla zir kan la tan loh avangin kan titi nuai nuai hlawma. A rukin Rinawma te ka va en leh zeuh thina, anni lah chu tumah ngaihsak lo hian phone hnai taka bih dun chungin an inbe paha. Ka mit a kham ngawih ngawih a ni ber. 

"Lalroma te saw an inngaizawng ve ngei ami a? " Insum thei ngang loin Thangzeli hnenah ka ti sa sa a. An thutna lam va en zawk pah hian, "aniang.. Tunlai chu an sawi sep sepa" a ti awlsam et. "Chuti law? Engmah ka hre ve lo reng reng. Hepa hi ngaihzawng neih a ngaihsak lo sia, lo duh hlauh se a tha ngawt ang" nui chung hian ka ti vei ngiala. Ka chhungrilah erawh nui lo tak ka ni. 

"Nia, Teseni hi a landan maiah chuan a fel hmel reuh ka tia. Han inhrechiang deuh se, inngaizawng daih se a tha tak ang" a ti ve maia. Kei anga rilru ni lo pui sawi a ni ve lo tih ka hria. 

Hlazir chhung zawngin ka awm a nuam thei ta reng reng lo maia. Kan ban pawhin nidang angin Rinawma'n min rawn ngaihven ta hek lo. 

"I rawn leng dawn em? " kal pahin ka ti hrama. "Aih, Teseni hi a inluah tur va enpui lawk angai a, ka va kalpui ange" a ti a. "Eee.. Aw le" Nui chungin ka ti thei hram. 

Ka mut hnuah phone khawihin ka meng renga, u Davida nen msgin kan inbiaa, a khat tawkin Rinawma hnen atangin msg ka dawng em tih ka en leh thina. Noti-ah a lang dawn tih hre reng mah ila a lan loh palh hlauh niawm takin ka va en sek maia. Ani lah chu zantin min rawn be thin kha a reh ta hmak mai si. U Davida ka be tui ngang lo va, ka mangtha ta ngawt. Mu chungin ka inngaihtuaha, tunhnai chhoah Rinawma hian min be tlem hle tih kan msg ka en chuan ka hre theia. Inbiak hi ngaiah ka lo nei hle tawh tih pawh zanin a a reh tak hmakah hian ka hre thiam ta chiah. Ka hriatchian tak em em bawk chu Thangzeli nena kan rin angin min lo en lo va. Thian kan nihna a ngaihlu hle tih zawng hi a ni. Thil thleng eng eng emaw kha chu kan ngaihbel vel mai mai tih lah a chiang ta a. Chuti ni lo se sawi hreh tur a awmin ka hre lo va. Engmah a sawi loh chhan chu min ngaizawng lo tihna mai a ni..Tul lo deuh maiin keilah chu ngaihzawng a nei tih ka hriat rualin ka talbuai chu a ni deuh der mai si. . In control ka ngai nasa dawn khawp e. 

Christmas a hnai chho tial tiala, KTP lam pawhin hla kan zir ngawrh chho ve zela. Rinawma leh Teseni pawh an inzui nasa tawh bawka. An inngaizawng niin sawi a awm ta zela. Teseni quarter luah tur siamthat angaih nasat avangin kumthar lamah chauh a fel thei dawn niin Thangzeli'n a sawi a. Nula theuh theuh leh kohhran lama tiho fo ta chu Teseni nen pawh kan inbe chhe lo va. Rinawma thiante kan lo ni bawk nen, Inkawm ho dal dal tum pawh a awm ta fo. Mahse,Thian inkawmngeih tihtur em chu kan ni lo. Rinawma nen an inngaizawng anga ka hriattirh ang em kha chuan ka buai tawh lo va, ka rilru puthmang ka tilang lo thei ve viau zel chuan kan inhriaa. College kan kal laia kan thian pakhat tawngkam erawh ka hrechhuak ngun ta khawp thung. 

"Mipa leh hmeichhia hi chu best friend anih theih loh. Tu emaw zawk zawk hian an ngaizawng tlangpuia, an tilang lo mai mai zel. Chutiang anih em loh pawhin pakhat zawk zawk hmelchhiat viau angai" a ti thina. Rinawma mai bakah Roenga te, Rinpuia leh Ruatmawia thlengin inngaihzawnna tel miah lo va inkawm thin kan nih avangin "mipa leh hmeichhia best friend anih theih " Tiin ka tang huai thei em em thina. Tunah chuan ka tanna kha a dik chiah lo tih ka man chho chiang ta hle chu anih hi maw. 

Christmas ni karkhat vel chauhin a dang tawha, school kan chawl tawha, zan lam hlazir kan awl zan anih avangin hahdam takin inah ka awm a. Rinpuia leh Rinawma an rawn leng bawk. 

Thingpui kenga sitting room ka luh lai mekin, "Lalrom, Teseni hi hetah Christmas a hmang dawn em ni? " Rinpuia'n a ti a. 

"Ka hre nang" Rinawma'n a tih chuan Rinpuia'n a melh khai khaia. "Engemaw i zep khanglan le? Ka chuhpui lo vang che. A tet tet nen" a ti a. "Ka zep hleinem, ka hre lo tak tak" phone khawih pah hian a ti leh maia. "I hre awm em maia. Thianho zinga han zep kher lai hi ka ei lo best" ka lo ti ve a. 

"In va han ninawm e aw. Ka bialnu pawh a ni lo va, enge ani chung chang hre vek tura min ngaih a? " Nui deuh chung hian a ti leh a. "Ek-a, I inla vel tihna mi a? Nitin zantin in inhel a, ka rilru tak phei chuan Biak-in hawnga inneih intlin lo vang tih vel asin ka lo ngaihtuah ni?" Rinpuia'n a ti leh bui buia, kei ka lo nui kar kara. Rinawma'n chhan a tum lai takin kawngkhar an rawn kika, "A changtupa a lo thleng aniang a" Rinawma'n a ti zauha. "I chhe lutuk" ka ti hlak. 

Rin ang ngeiin u Davida a lo ni a, thingpui kan lo in mek avangin a duh leh duh loh ka zawta. "Haw tir lehnghal che u a tum a ni maw? " Rinpuia'n a lo ti zut zuta. U Davida hi a lo leng ngun a, anni lah an lo leng ngun ve tho bawk nen, an innel ve viau a. Football leh volleyball tui tak an lo ni hlawm bawk nen an titi a rual viau zel. Zan dang ang lo takin Rinawma pawn phone khawih loin an titi a zawm ve a. An vaiin dar 10 velah an haw rual ta dial. 

Ka hmai ka phih hnuah ka mu a, mut dawna hmai phih leh ha nawh hi ngaiah ka nei tlat tawh. 

Ka muhil dawn tep tihin msg ka dawnga, u Davida anih ka rin laiin Rinawma zawk a lo ni a. Rang takin ka hawnga. 

"Teseni nen kan inngaizawng lo tak tak ania" tih ringawt a rawn thawna. Ka thaw halh mai. Eng chu nge maw a hriat ni? Nidangah pawh thianho a kan awm chuan kan chhaih fiam bawrh bawrh zela. A insawifiah chiam ngai miah si lo… 

"A va buaithlak, inngaizawng ta che u" tih ringawt ka thawn let a. 

"Min duh lo va, keipawn ka duh lo. Thian inkawm bakin kan inkawm lo" a rawn ti leh thuai. Ka chhungrilah awih loh na leh hlimna a inawmpawlh ve ve. 

"In ngaizawng aniang kan tia, kan lo phur ve em em asin" Tiin ka chhanga, diktak chuan tawngsual palh ka hlauh em avangin vawi tamtak ka type tha hman. 

"In phur sual anih chu.. Engtikah nge Aizawl kha i kal dawn a? " a rawn ti leh a. "Naktuk tuk lehah ka tuma. Ni 23 velah ka pa nen kan lo haw rual ang. Ka pa a rawn lang lawk dawn a" ka ti deuh duaha. 

"Sumo in kal mai la, motor i ruih nasat theih nen Davida motora kal kher angai hleinem" a rawn ti leha. Zanin khan u Davida Christmas hmang tura a haw dawn thu leh a haw ruala ka chhuk ve dawn thu vel kha kan sawi a. Kha kha a rawn sawi zui ta chat. 

"Sumo ticket ka chang lo" ka ti leh maia. A reh ta vang vanga.Keipawh ka muhil zui ta a. Zinga ka harh a phone ka en chuan nizan lama a msg rawn thawn, ka en tak loh lo awm vang chu tho chuang loin ka en a. 

"Davida bulah awm reng suh, ka ning ania. Ka thik tihte pawh hre tel nghe nghe teh" tih a lo inziak kalh maia. 

Au vak chungin ka thuchhuaka, khum atangin ka zuangthlaa, siliper pawh bun loin inhnuaiah ka tlan thla a. Ka nu lo meng rum viau pawh chu ka ngaipawimawh lo.