Zarzokimi-5

 Chapter - 5

Slipper ka bun lo tih ngaihtuah chhuak thutin inchungah ka tlanchho leh riha, ka phone ka ak nghal bawka.Ka msg dawn kha hlimpui viau mah ila reply erawh ka tum rih chuang lo. 

"I tho a emawni le? Eng nge i au vak a? I awmdan lah rilru kim lo ang mai, eng nge i vir chui chui renga" min lo ti deuh khu khu a. "Ka tho a ngai tawh mai mai lo, thawh ka hai vang mai maiin ka au anih kha, zingah tihtur ka nei a" awlsam takin ka ti liam maia. 

"Thawh hma hi tum ve ta reng che. In sikul chawlh ka ngahhlelh tehreng nen, I mu reng zel mai. Vawkchaw pek ngai nen, eirawngbawl ngai bawk nen, min awl te hi tum ve rawh. Chaw ka chhum tawha, chawhmeh kha lo siam ang che. Vawk chaw pek a hun lutuk tawh" a ti leh duaha. "A la tlai vak loh hi, chaw ber a hmin tawha, Chemi antam kha tlak teh aw. Tum tel la" ka piin a lo ti ve charh charha.

Thingpui inchhawp chungin antam tlak tur fridge atangin ka lachhuaka, a hnah pawh awm mang lo leh kuang sei pui pui mai a ni a. Kan naupanlai ka hre chhuak vang vang mai. 

"Kuang 5 vel lek lek khan tumtel ta che. Engatinge maw engmah hi i zei reng reng loh mai le? " Ka nuin min la rawn ti ta. Ka thiltih engmah hi a mit a tlung zo ngang thin lo. "Ka ti dawn reng alawm mawle" ka ti let hlara. "Pasal nei rual zet tawh si hi inchhung khawsak engmah i ngaihven lo maia, a tha lo. Pasal eng mi nge i neih dawn pawh i hre lo va. Mizo kan nih chhung chuan sawrkar hnathawk pawh ni eng ang mah la inchhung chet i thiam ve a tul zel ang. Hmeichhe tan hun a danglam ve mai mai ngai lo ania" a ti leh hmuar hmuara. A tho fuh lo ngang nge ni? An na tur ngawt a zawng maia, ka thawhhlima ka mood tha lutuk pawh a hau bo zo lek lek tawh. 

"Awmpui te i la mai ang chu tiraw. Tunlai mi te chuan hlawh neia awmpui lak pawh inching hlawm tawh alawm, mi tih loh dan pawh a ni hleinem" ka piin min tan deuh tak hian a lo ti a. Ka nu a ling zual phat. 

"Ka nu, naupang anih lai atang tawhin i tan zela, hei i tan rah chu alang reng tawh anih hi. Tun ang hunah lehzel chuan lo tan tawh suh. Lehkhathiam ringawt hi engmah a ni lo.A tlawktlaw lutuk hi zahthlak khawp anih hi' a ti leh ta tun tun maia. 

" I ngai tlaw mai mai anih kha, mizingah te zawng a nep bik lo vang. Fa te chu hmuh puitlin har deuh annia. Tun thlengin ka la hmu puitling vak hleinem che" ka piin a tihsan mai maia. Titau sawk sawk chungin ka nuin vawkin lam a pana, "Pi, ka nu hi i ngei thin em? A chhang zuah zuah zel mai che si" ka ti bal bala. 

"Ngei chuang lo ve. I nu hi chu ka hrin ang mai hian ka ngaia, a lo mo tirh hian kum 16 lo liam a ni nang. Engkim takmeuh ka zirtira, Aizawl nula a lo ni vei nen, engmah reng reng a thiam lo. I ni te pahnih hi a ti thinrim reng mai zel ania" nui hek hek chungin a ti a. "Tlaw min han ti vela, ani pawh engmah anih bik loh tawp chu" ka ti leh nang nang. "Inzir mi ania. Thil a thiam chak lutuk, a pawimawh berah chuan a rilru a tha hi ania. I ni te pawn han thinrim khum thin mah se an ngai ber tho. Rilru kawi nei lo te chu mi hian an ngaina zel mai alawm. Kei leh i pu pawh kha min hmangaih teh ania" a ti leh mial miala. An inhauh nasat theih tehreng nen ka rin angin ka pi in ka nu lakah rilru dang a lo pu lo chu mak ka ti em em mai. 

Chawei kham hnu lawkah Thangzeli huan kal tur a rawn lut hlawla,ka msg dawn hrilh ka lo chak zek zek lai a ni bawk nen, phone a hrilh ngai lo va a lo kal chu ka lawm ngang mai. 

A kal tur verandaah ka zui chhuaka, "enteh.. Thil hrilh tur che ka nei" ka ti chu min en ha a. "Nizanah Lalroma nen kan inbiaa, Teseni nen an inngaizawng miah lo atia. Mak ka ti tawp" ka ti leh nghal thuaia. 

"Chuti maw? A van mak em em.. An awmdanah inngaizawng an ang hle sia" a ti vei ngial nangin ka thilsawi chu a hriat hnu anih rinna ka nei tlat. A hmelah mak tihna tak tak a awm tlat lo. 

"Nang hi i hre sa chiang lutuk" ka ti nghala. "Hre sa bawk lo e a. An inngaizawng angin ka lo ngai char char zawk.. Nih leh tinge chu chu a lo hrilh kher che a? " a ti leh a. "Nizanah Rinpuia'n a chhaiha, a tang na lutuka. An haw hnuah a lo insawifiah leh tawp. A chhan pawh ka hre bik lo" ka ti leh maia."An inngaizawng lo tih i hriat vangin i hlim viau a ni maw? " a ti ta khauh maia. 'I a mi? Eng nge ka lo hlim ve ngawt ang? Mahse mak tih deuh ka nei a. Naktuk hi u Davida ruala Aizawl ka chhuk hun tur kha ania. Chu chu a rawn sawisel a, ka thik tih angreng  te a sawi nuaia" ka ti leh chu a nuia. 

"A lo sawi ve ngam ta nge nge anih chu.. " a ti duh ta lek. 

"Eng nge a awmzia? " ka ti he haw a. 'Oooo, Lalroma hian angaizawng che ka tih char char thin kha. A ngaizawng tak tak che alawm. Teseni hi i thik atan a kawmngeih vel mai mai zawk anih hi. Teseni pawh hian an khaw lamah ngaihzawng nghet a nei reng. Lalroma'n i thik atan a kawmngeih vel tih hi chu a hre lo maithei a " a ti ta zat zat. 

"In va han chhe tak, in lo tangrual vel a ni maw? " ka ti deuh hmaka. Thinrim tak takna erawh ka nei lo. 

"Tangrual chiah chuang nang. Lalroma hi ka khawngaih em a, in lo inkawmngeih lutuk bawk si leh nangman i ngaizawng lo lutuk hi a sawi ngam loh phaha. U Davida pawh hi a thik thei tawp alawm. Teseni a kawm lui viau chungin i thik duh bawk si lo va" a ti leh sawr sawr a. 

'In va han over tak e aw" ka ti leh ringawt. "Over vang pawh ni lo. A rilru i hre lo mai mai anih zawk kha. U Davida nen in inngaizawng chuang si lo va, duh ve mai la.. Tlem tal chuan i duh ve tho kha' a ti zui leh a. 

" Ka duh pawh ka hre lo ve a. Mahse, tlem chuan rilru a buai ve" ka ti ta ngawt. "I rilru a buai ve tho chuan i duh tihna ni mai.. Khawi maw a msg chu ka lo en chhin? " a ti leha. Ka phone min pawhthlak saka, Nizana kan inbiakna chauh en ta loin a dang en a tuma. Ka laksak vat. 

"A viau suh, nangmah pawh kan lo rel nek maithei che ania" Ka tih chuan min ner khum a. "Min rel awm lo. Ka hre chiang ve che u em maia. Ka kal dawn, ka haw tlai lutuk chuan ka nuin min lo hau ang" a ti nghal mawlh mawlha. "Sertawk tui deuh kha lo hawn la, kan ta hi chu a kha reuh lutuka" ka ti ve a. 

"Um, ka lo hawn ang. Eee… Lalroma kha engtin maw tal reply ve la. Ka khawngaih ania" a ti leh hrama. "Ooo, chutia i khawngaih te chuan nihpui ta mai la" Nui chungin ka ti a. " Min duh hleinem, nangmah alawm a duh che le. Mawl mawl suh. Keipawn ka duh lo, kan la inchhung lehnghal a" a ti leh hlak hlak. 

Zingkar atanga vawi tamtak a msg ka chhiar nawn hnu, chawhnu lamah ka reply ta hrama. "Enge ilo thik vel a? Ka thianpa ve tho anih hi" tih zawng ka thawn leta. Ka thawn letna tur pawh hi type tha ngun tak ka ni. 

Ka nu nen ka pi te thil ka kensak tur buaipuiin kan buai zui ta a. Phone lah ka charge daih bawk avangin min lo reply leh reply loh pawh ka hre ta lo. 

Kawmthlang lam huanah bal leh pangbal kan cho a, antam leh buldawk tih vel kan la tel teuha. Ka nu te unah hi colony deuha awm annih avangin thil kensak dawn chuan ken hnem angai thin viau reng a. "Mi motora kal tur ka ni sia, ken tam lutuk a inthlahrunawm " ka tih pawhin a ngai pawimawh duh der lo. 

In kan thlen veleh phone ka check nghal a. Ka beisei ka hmuh loh avangin ka nguai deuh rawih thei. Zotei nu a lo kala, Zotei te ta tur behlawi rep leh dawlrep min rawn thawn a. Kumtin Christmas emaw kumthar, khawi maw zawk zawk an rawn hmang chho ziaha, kumin erawh chu an fapa an zai na ala rei loh avangin an rawn hmang chho thei dawn lo. U Lawma hi inla pa ve tak anih avangin an lo zin chang pawhin Zotei te inah a riak duh ngai lo va. Ka hau fo nangin awmzia awm lo. Ka pa lah hian a lo fuih anga, "Keipawh ka lo kal hian ka Nutei te inah hlir ania ka riah thin. Pu te in a riah ka duh reng reng lo. Chhungte ka nei ve reng" a ti vel thina. U Lawma hian a la fuh em em mai. 

A tuk maia zin tur ka nih avangin ka inkhawm lo va, inkhawm ban hlazir naah pawh ka kal chuang lo. U Davida a rawn lenga, ka thil ken tur ka nuin rambo polythene pa 3 ngawt mai khat veka a dah chu kawk pahin, "Vida.. Midang chuang ve tur an awm dawn em? Ka nu te thil tur ka lo siam nual maia" a tih chuan u Davida'n "Pu Hmuaka a chuang ve dawna, abak chu chuang lovang. Kha zawng kha em ni? " a ti let ve thuaia. "Aw, ni e. Chemi lah chu a inthlahrunga, mi motora kal tur ka nih hi a ti reng maia" a ti leh zung zunga. "Bungrua vak ka nei dawn hleinem. Pu Hmuaka pawh engmah ken tur nei lo niin a insawia. Kan tawt lo vang" a ti leh maia. "A that chu, tlangval senior hi chu in awlsam khawpa. Nula senior ve thung hi chu an harsa em em maia" a ti leh khera. Chuti khera a tawng chu ka ngei ngang maia. Ka u chu awm se a melhrum leh viau ang. 

Dar 10 rik hmain u Davida a haw a,ka mu ve nghal thuaia, rei tak cham tur ka nih loh avangin thawmhnaw pawh ken chiam angai lo va. Haw lamah lah kan motora haw tur kan ni lehzel bawk a. Tukthuan ei khama chhuak tur kan nih avangin insiam lawk pawh tul ka ti lo.

Ka muthilh theih tak lawk loh avangin phone ka khawih leh a. Lalroma'n a rawn reply ta reng reng lo. Nidangah pawh inbe reng kan nih avangin ka reh ve hmak chuan dikin ka hre lo va. "Hla i zir em? " tih va ka thawna. Reiloteah "aw" Tih ringawtin a rawn reply a. 

"I mood a van uih hmel em em? Teseni nen in inhau em ni? " ka va ti leh a. Minute 5 vel lai hnuah "I ninawm teivet. Min duh ngang loh chuan sawi chiang la, Teseni chu ka lo bem dawn nia" a rawn ti ta a. Ka chhaih hmasa ngawt veia, chhan letna tur ka vai chu a ni deuh der. 

"I uang peih sia e" Ka ti let ta ringawt. 

"Davida rual chuan maw i kal hram dawna? " a rawn ti leh daiha. "Um, kal ngei ngei ka ngaia. Sumo ho an full vek tawh bawk sia" ka ti let ve mai. "A tha lawm, tluang deuh khan kal ru. Mangtha phawt. Zingah thawh hma ka ngaia" a rawn ti leh a. Ka mangtha let ve nghal thuai.

Zing dar 8 pelh hretah kan khua kan chhuahsana, hmanhmawh vak lo in kan tlana, Pu Hmuaka hi kohhran upa anih mai bakah pa titi thiam tak niin a bula awm a nuam em em maia. Kan khaw pa lar tak a ni nghe nghe. Motor ruih lohna damdawi ka ei avangin kawng chanve vel kan tlan chuan ka mut a chhuak em em a, ka muthilh lai pawh ka hre zui lo. Ka harh leh chuan Muallungthu-ah kan lo ding a. 

"I harh thei maw? Tah hian chawl zuai ila kan lo tia. I rui em? " U Davida'n a lo ti thuaia. "Aih, rui lo e.. Ka mutui tawp" ka ti ve nghala. "Nula chuanpui ve si, min muthilhsan daiha, pa leh pa ringawt chu nuih viau a har khawp mai" Pa Hmuaka'n a lo ti ve bawka. 

Darkar chanve vel kan chawlh hnuah kan tlan leh ta a. Politics chungchang an sawi chu ngaihnawm ti deuh mai hian ka ngaithla dauh dauh. 

"Zari, engtikah maw i haw ang? " Tiin Pa Hmuaka'n min zawt a. "Ni 23ah aniang.. Ka pa ka lo nghak dawna" ka tih veleh, "in pafa chauhin em ni in haw dawn? " a ti thuai. "Aniang. Midang a sawi tel pawh ka hre lo" ka ti leha. "Anih chuan kei hi ka awmdan tur a chiang lo riau maia. In ruala haw tum ila a tha ang a. I pa hian bungrua a phur haw leh vak duh angem aw? " a ti zui vang vanga. 

"Ka hre lo le. Duh leh amah bia la, a number i nei em? " ka ti nghala. "Nei e a. Kan khua angah te chuan i pa number te chu chhungtinin kan kawl alawm" Nui huau huau chung hian a ti a. A fiamthu anih rualin a sawi awmzia ka hre tho thung. Kum 10 vel lai kalta atang khan ka pa hian kan dawr hmingin calendar a siamtir thina. A duh apiang tana lak theih turin dawr kawtah a daha, Calendar te pawh lei ngai anih thin avangin ka pa-in hetianga a tih takah chuan in tinah an tar ta fer fur maia. Sum sen a hautak deuh nangin ka pa hian a hlimpui em avangin a tihtir kum atanga kumin thlengin ala ti zawm a. Nakum calendar pawh a sem leh teuh tawha. A la sem mek zel bawk. 

Ni 23 zing karah ka pa leh ka u an rawn chhuka, ka pa thianpa ral tur anni a. An va ral hnuah thing tanna current hmang chi lei turin an kal leh a. Tlai dar 4 velah kan chhuak thei ta chauh. Pa Hmuaka pawh kan rualin a rawn haw ve ta ngei a. Ka pa nen a hnungah an thu dun a, kan khaw tana hmasawnna tur an sawi kawngtluan. Aizawlah zan 3 ka riaka, ka haw hma zanin u Davida leh a thianpa an rawn lenga. Mi biangbiak thiam tak a ni bawka, a haw hnuah ka nu u nupuiin a fak deuh chiam. "Officer ve meuh si a inla lo ka ti. Makpa atan ka it nghal tawp" Tiin min chhaih zuia. Kei ve chuan ngaihzawn chu sawi loh, ka rilruah Rinawma bak a awm meuh lo zawk. 

Urlawk zan a lo thleng ta a. Inkhawm ban veleh ka haw nghala. Vawiin ang hi dawra kan buai ber ni a ni ziaha. Ka pa phei chu a lo la haw lo va. Ka nu pawh a inkhawm hman lo. 

"I pa chu ka rin aiin a rei daih mai. Asi-i pawn a ning chen chen tawh ang. Urlawk zan te ania,chawlh hahdam te pawh a mamawh ve em em ang. Dawr te chu a hawn chhung zawng thil lei duh an awm reng dawn" Ka nuin a ti hlaih hlaiha. Naupang lawm kan kawl hnem thei a, khawpui lam dawrte tluk lo mah se kan khuaah chuan a hlun ve pawl a nih bakah ka pa hian mi duhzawng a hre em em a. Naupang dawhthlak atana tha tak tak, man tam si lo te a kawl thin avangin urlawk zan hi chuan a inkhar hma thei ngai lo va. Keipawn nilengin ka han awmpui ve bawk. 

"Mama, I pa chu han ngaihven teh. A vawt ropui bawk si" Ka u hnenah a ti leh a. Chhun lamah inchhung engmah ka tihfai hman loh avangin zanah ka tifai a. Chhuat ka nawh laiin Rinawma leh Ruatmawia an rawn lut a. A hnuah Rinpuia a lo thleng veleha, a lo thlen hnu reiloteah Roenga'n a rawn biaa. An chhuak leh ta dial. 

Thangzeli'n min rawn phone a. 

"Roenga te inah chho ila, annu-in ar min pe dawn anih chu" a rawn ti lang langa. "Awi, ka van chhuak peih lo tak. Ka pa a lo haw deuh chiah bawk sia. Chawei te siamsak ala ngai dawn" ka lo ti a. 

"Chhuak peih lo ti ve ziah suh. Ka rawn sawm ang che. A hmanhmawhthlak lo lutuk. Roenga nupui meuhin ar min pek phal te chuan kan ei ngei tur a ni" a rawn ti leh zat zat. 

Ka pa chaw paina vel ka silfaia, Thangzeli bulah kha chuan ka pa chaw la ei loh thu kha ka chhuanlam vel mai mai a ni zawk. A inbual hnuah rei meng loin a mu ta thuaia. Englaimaha meng rei ngai lo leh tho tlai ngai reng reng lo a ni a. Inkhel a en dawn emaw komiti na tur a nei te anih loh chuan a mengrei ngai lo. 

Thangzeli leh Duati an rawn kala, Duati hi Thangzeli nen inkawmngeih tak anni a. Kei ai mahin kawm pawh an Inkawm nasa tawh zawk. Keini aia nau hret a ni a. Roenga nupui Msi nu leh Duati nu hi phir anni nghe nghe. Nula harvang leh lu zo veh vawh tak mai, kohhran leh khawtlanga mi langsar tak a ni bawk. 

Ka nu hnenah Roenga te inah ar kan kang dawn tih ka sawi chuan, "in peih mai mai e a. Khawvawh vawh nen, mu lum daih ula a nuam zawk ang" a ti maia. Thangzeli'n fiamthuin a chhanga. Naupanlai atanga inhre thang kan ni bawka, ka nu phun ang vel hi chu engahmah an ngai tawh lo. 

Roenga te hi kan in atanga hla lutuk loah an awm a. An in lam panin kan inzui chho ta tham thama. Ka ni tupa, thau lian leh a buang mai hi a thiante nen kan tawka. "Ni, khawnge inkal dawn a? " Min hmuh veleh a ti a. "Ar kan kang dawn" ka tih veleh a nui kur kura. "Nula senior ho in ar an kang ve ngei dawn ni maw? Pawisa min lo pe" a ti zui zat. 

Roenga te in kan thlen chuan ar an lo talh fel der tawha. Rinawma leh Rinpuia'n an lo buaipuia. Roenga zu nam deuh tawh a lo tawng lung lunga, an nu a tum hman thung.

"Zarzokimi khan vai style in kang rawhse. Thildang chu a thiam vak lo nangin arsa kan chu a thiam ve lutuk ania" a ti zut zuta. 

"Khaia, ei tur ringawtin alawm min sawm a. Nangman kang rawh" ki leta. "I zak lo em maia. Kan thianhoah i naupang ber tih hre reng la. U te sawi an hnial ngai lo. Lalduat, Thingpui nang lum la. I u Msi hi zanin chu han awl tak tak teh u" a ti leh lawng lawng. Msi'n melh ram ram chungin "I va han ninawm tak, I tawng ring si, zawi deuh pawn sawi la an hre phak vek. Nau i tiharh zo ang' a ti hlak hlak mai. 

" Ka lo tihpui ang che. Inchhungah ai chuan pawnah meilum ai pahin kan kang dawn nia" Rinawma'n a ti a. Arsa chansa ka silfai tawh kengin a chhuak zuia. Bawlhlo kengin ka zui ve ta vat. 

Midang pawh meilum ai tumin an rawn chhuak ve hlawma. Rinawma'n guiter a perha,amah hi tunah kan Bialah zaipawl conductor a ni meka, Duati hi member a ni bawka. Meilum kilin kan zai dal dala, Duati a lo zai thei bawk nen, ka zaithiam ve ta emaw tihmai awl tak a ni. Ka kal peih loh ngaihtuah chuan nuam chu ka ti ta viau lawi. 

Dar 11 velah haw ka rawt a, tuman min ngaihsak lo. Chhun lamah ka chau bawk nen mut vang vang ka chaka. Haw an la phal loh tlat avangin rilru bet vak lo hian ka awm veleh ta ren rawna. Dar 12 rik hmain Rinawma'n haw a rawt veleha. "In ninawm tehsek lutuk. Nakum Christmas kan hmang thleng leh zo angem pawh kan hriat loh hi. Am deuhin hmang ang u" an ti deuh tlat a. Grape wine no an dawm fara. Kei erawh chuan fel viau vang pawh ni loin ruihtheihthil lam hi ka ngaina lo em a. Ka in ve lo. Rinawma'n a in ve em ka hre lo va. Roenga tih loh chu kohhrana inhmang tak vek annih avangin grape wine an han in mai chu mak ka ti deuha. Duati pawh an conductor awm laiin a in mai a. Rinawma pawn a in ve tho anga a zah bik lo pawh a ni ve thei tho. "Hetiang te chu a ho lutuk, ruih pawh a ruih theih hleinem. Miin KTP zu ti vekin alawm an sawi" Thangzeli'n a ti lang langa. 

" A ruih theih deuh aniang, I awki a sang em mai" ka tih chuan mipa ho nuih a za ngang mai. 

"Zari,haw ila.. A hla lo viau nangin ka lo phur thla ang che" Rinawma'n a ti a. "In haw talh dawn maw? In va timak deuh ve" Rinpuia'n a ti a. "Nilengin dawrah ka awm a. Inkhawm ban veleh in ka tifai leh a, ka chau ve lutuk. Ka haw mai ang" ka ti a. " I chau hma thei si, haw phawt mai teh.Ruaitheh hunah sathau i ru anga, zanah chow kan kang dawn nia" a ti leh a. Kan naupanlaia ka tih dan a ni a. "Nangman ru rawh, chow ka lo tum ang" ka ti let ve a. 

Rinawma bikeah ka chuangthlaa. Kan in bul kawngah a ding a, ka mangtha chu ka rin loh deuhin a rawn chhuk ve a. "I haw dawn lo mi? Ka mu duh ka tih kha ka ti tak tak ania aw" nui deuh chung hian ka ti a. 

"Ka rei dawn lo, I mu nghal dawn nia" a ti ringawt. Gate ka hawnga. Min rawn zui luta, gate ka khar zo chiah chu ka banrekah a rawn vuana. Gate bul lawka Saron buk tak bulah min pawtthlaa. Tang loin ka zui ve hmiah. Gate atanga lang thei lo lam, saron buk phenah min dinpuia. Tawng miah loin min rawn fawp a. Ka hamhaih lutuk avangin chhan pawh ka chhang lo va, nemsawn pawh ka tum chuang lo. 

A awm nghengin min pawm bet zui vang vanga. Kan tawng reng reng lo nangin kan rilru erawh kan inhriatsak ve vein ka ring. Kan inngaizawng em tih pawh a hrana inzawh leh kan ngai tawh in ka ring lo. 

Chau inti leh muthilh vang vang chak kha ka muhil thei ta reng reng lo va. Rinawma nen msgin reitak kan inbe zuia. Mihring a te la ngai reng mah ila kan inkar boruak vangin ka lai deuh hu a, ani pawh a ni ve thoin ka ring. 

Ka nuin min rawn kaihthawh chuan dar 8 a lo ri tawha. Mit thip leh phakchualin ka tho a. Vawt ti taka inkuah khawr hlan chungin inhnuaiah ka chhuk a. Ka piin amahin sikri a lo ai a. 

"Vawkchaw ka pe dawn ania. Satui kha lo siam la. I pain kha deuh a duh lo tih kha i theihnghilh leh ange" Ka nuin a ti a. Chhang loin sikri bulah ka thu hnaia. "I kut kha hem lum rawh. Kumin chu khua a vawt na leh lutuka, ka ruh na lai te hi a na zual emawni.. Nizan pawh ka mutui lo. Zanin chu min rawn riahpui la a tha ang" a ti a. 

"Aizawla i pi khan rizai current hmanga tihlum theih kha a nei a. I pu Mama leisak niin ka hria. I pi tan hian lei ve ila a tha ang" Ka nuin a ti a. "Lei lei angai lo. Current nena mut te chu min man reu reu ang. Tuilum ip awmse a tawk" ka piin a ti vat. 

"Current nen i mu dawn hleinem maw.. I rizai kha kan tilum dawn kan tia lawm. Hlauh te hi i ngah lutuk" Ka nuin ti mah se ka piin a duh teuh lo. Lei pawh lei a hma hawtin an inhnialpui nghal chu a ni der. 

"Kan naupanlai chuan khum hnuaiah meiling hi dar belin kan daha, meiling tam vak pawh angai lo. Lung chungah kan hunga,chu chuan min ur lum thin a" Ka piin a ti a. "Khangte kha alawm hlauhawm. Khum phah atan dap inhmang ngei anga. A ther te kha meiin man se chuan inkang vek dawn tihna ania" ka nuin a lo ti leh hlawk hlawka. "A man kai lo va, hei leh chen kan dam tawh hi. Current a tih lumna tih ai chuan a him zawk" ka piin a ti tan tan. 

"In va han ninawm tak e aw. Tinge in inhnial reng mai le? Ngaiah innei anih hi, em em a che u" ka ti hlak hlaka. An inpuh tawn ve ve chu ka kalsawn san ta daih. 

 Chawei kham veleh thleng ka seng fel sawk sawka. Inkhawm hun an sawn tlai nangin kan hma phah chuang reng reng lo. Kan chawei hun kan ti tlai ve zel tho si a, chuvang te pawh aniang. 

Nidang zawng aia ulukin ka inchei a, vawi tamtak ka mit hnawih pawh ka ti tha tawha. Nidanga vawikhat hnawih duhtawk mai thin kha ka confi thei ta thak lo. 

"Chemi, I va han hmanhmawh lo em em ve. Minute 10 pawh a awm tlin tawh loh hi. Insiam rei leh lutuk mai.Zaipawla tel tur pawh ni la thutna ruak rei lutuk te hi midang inti buai asin' tiin ka nuin min rawn au a. Ka inkhawm bag lak pahin " Ka lo kal" ka ti let a. " Kawngka rawn kalh la, Gate pawh kalh ang che. Rukru an tam em hi" a rawn ti leh a. Hmanhmawh takin inhnuaiah ka chhuk a, ka nu-in ka pi a kaichhuaka, a hnuhnung berah ka kala, kawngkhar leh gate ka kalh sawk sawka. Hmanhmawh takin Biakin lam ka pan thlaa. Ka tlai viau tawh ka rin laiin vengchhak nu ho ka hnunga an rawn kal thla dam dam ka han hmu chu ka thawveng huai mai. Tlai viau pawh hian tlaipui neih hi chu a thlamuanthlak ve tlat zel. 

Biakin tual ka thlengthla chu Rinawma leh rawlthar pakhat lo dingdun ka zuk hmu a, ka lai leh ta ngawih ngawih pek. Rinawma'n min rawn pan thuaia. Nidang a min biak dan ang bawka nui chungin, "I va han tlai thei e aw. Nula senior tak hi chu a" min lo tifiam a. A bula rawlthar lo ding chu pawlsawm zirlai a ni a. An miss ka nih vang nge, en pawh min en tha ngam meuh lo. Biakinah ka luhsana, Thangzeli bula thutna awlah ka thu a, ka tawngtai zo hman awrh tihin min rawn kheuha. "Eng nge a? " ner khum chung hian ka ti se se. 

"Engmah i sawi dawn lo mi? " a tih chuan ka lungphu a rang nghal vaka. "Eng nge ka sawi anga? " ka ti let vat. Engamah hmain Rinawma ka ngei nghal hlur. Tawngthei leh lutuk mai, eng nge a lo sawi hmanhmawh tihte ka ngaihtuah thleng nghal vek. 

"Awi, I ninawm. I la hre lo tak tak tihna mi? " a ti leh saw saw a. "Eng nge ka hriat anga? Khawnge Lalduati? " Tih pahin ka hawi kuala. "A usher mi? " ka hmuh mai loh vangin ka ti leh a. "Nizan khan Lalrinpuia nen an lo inru nge pawh ka hre tawh bik lo. Lawk, nakinah kan sawi dawn nia. I hre turah ka ngai che sin" a ti leh sa sa a. 

Inkhawm ban veleh thingpui in turin kan intlara, thingpui kan lak zawhah mi awm loh deuhna kan pana. Chhangban hi ka ngaina lo viau nangin a ti Christmas ka tia, ka la ve ziah tho. 

"Engtin maw Rinpuia te chu? " ka ti nghala. "Tukinah Duati nu kan inah a lo kala, Duati a haw miah lo a rawn tia. Keilah chuan mak ka lo ti nasa mai bawk si. Kan haw rual veka, Rinpuia khan a thlah a, kan awm ho lai atang khan an awmdan kha nidang a ang lo deuh ka tia. An inngaihzawn ngai awm pawh ka hre si lo. Duati ka phone a, a la duh miah lo va. Rinpuia ka call leh a, a hmet busy loh leh a la duh lo va an inru anih ka ring ve tawpa. An pahniha biak theih loh vel kha a dik lo alawm. Lalroma sawn a hria ang, Lalroomm.. " a ti nghal zat. Rinawma awmna lam ka va en zawka, a suit hak rawng thim lam chu nidangah pawh a ha ka hmu fo tawh nangin a inhmeh ka ti thar a. Palian tak ni lo mah se a te chhe lo bawk a, a inhmeh zuih mai hian ka hria. 

Ka bulah a rawn ding a, "chhang i ei ve ngei dawn law? " ka chhang ken en pahin a ti a. "Christmas hi chuan ei ve hram zel a tha alawm. Ngaina lo mah ila ei ve talh ka duh" ka ti ve a. A awmdanah kei anga lai hmel a pu ve reng reng lo. 

"Lalrom, Rinpuia te hi.. " Thangzeli'n a ti nghala. "Eng nge anni chu? " Ani lah chuan awlsam deuh tak hian a tihsan maia. 

"An inru aniang. Engmah i hre lo mi? Nge i hre lo der?" a ti zui zata. "Engmah chutiang ka hre lo" a ti leh chu ka awih thak lo. 

"Daw lo mai teh, I hre chiang tih kan hre vek alawm. Khawiah nge an tlan dun a? " ka ti ve nghala. "A va mak e aw. Engmah ka hre lo ka tih chu" a ti leh ta tlat. A la thutak em em zuia. A mitmeng atang chuan hriat nei mah se kan zawtchhuak zo dawn lo tih ka hre thiam a. "Duati nen kan chhuak dun bawk sia, a nu in min rawn ankhum hrep ania. Zep chi a ni lo" a ti leh hlak hlak chung pawhin a hriat loh thuin a tang tluan ta parh. Roenga'n thlala tura min rawn koh zui takah chuan kan thingpui inna no kan dah sawk sawka. Kan thianho awm ang ang thla la turin Biakin chhungah kan lut a. U Ringi te chhungkaw thla la zo chiah chu Roenga'n a ko a. "Lalring, lo tel ve rawh. Naupanlaia kan Boss ve em em i nih thin kha" a va ti peka. An pa nen an nui nasa ngang mai. "In mawi em mai, kei chhangchhenu leh cher chhe bawk si hi Zari leh Thangzeli bula ka din phei chuan  ka langchhe fal dawn lutuk" a ti deuh tlat nangin kan pawt lui ta tho. 

Chawhnu inkhawm leh hmain kan inah kan chho a, Thangzeli pawh a lo leng chho ve bawka. Thingpui ka lum leh a, wai wai kan chhum a. Ka u thiante an awm ve bawk. Midang an awm ve zel avangin Rinawma nen engmah ngaibel turin kan awmdan kan ti danglam lo va, Thangzeli hnenah pawh engmah ka hrilh rih lo. 

"I phone kha msg a awm aniang, a de zeuh zeuh mai" Thingpui inna ka sengfel zo chu Rinawma'n min lo ti a. Ka en nghal thuaia, "Tlaiah hmarvengah min kalpui la" Tih hi amah chuan a lo thawna. Ka va melh zeuh chuan min en loin Thangzeli nen an lo titi muk viau. "Tikhan min sawm tawp mai la, a ruk ang zawnga kan kal chuan Thangzeli'n mak a ti ang" tih ka thawn let a. 

"Zari, tlaiah hmarvengah min va kalpui teh a. I hman angem? " a ti ta nghal a. "Eng nge kan tih anga? " ka ti ve thuai.Thangzeli pawn a lo zawt ve bawka. "Ka thianpa a lo haw a, thil min lo hawn aniang. Chuan, I pu te inah kal nghal angai bawka. I putea biak ka ngai a, I pu hi kan headmaster hlui kha a ni bawk nen tun thleng hian ka la zah riau" a ti duaha.

"Eirawngbawl hmana kan let leh dawn te chuan pawi hleinem" ka ti ve mai. Reivaklo kan thut ho leh hnuah chawhnu inkhawm turin kan kal ta dam dama. Tuman Rinpuia leh Duati chungchang kan sawi zui ta rih lo va. Roenga leh Ruatmawia awm danah khan Rinpuia awm loh vanga mak ti hmel an pu miah lo lehnghala. Roenga phei kha chuan thla kan lak dawn khan  "Rinpuia chu a hmang nuam bawk aniang. Inkhawm a thulh thak mai ania" a ti vel mai mai. Anihna takah chuan KTP komiti member a ni a. Hman nawm vanga inkhawm thulh lo ber tur zinga mi a ni a. A thiante hi a hrechiang bertu kan ni chunga mak an ti lo kha amak zawk. 

Chawhnu inkhawm ban veleh inthlak pawh inthlak loin hmarveng lamah kan phei nghal a. Kan pahnih chauha kan han inphur chu nidangah pawh inphur fo mah ila ka hnaih tha leh ngam tawh lo. Tang tungin ka chuanga, ke a kal pawh ni si lo ka hah em em mai. 

Hmarveng tawp kan thlen chuan" Khawnge kan kal dawn a? " ka ti a. "Reivak lo kan leng mai mai ang chu ka ti" a ti ta lek. "I thianpa a lo haw i ti bawk sia, eng nge a awmzia? " ka ti he haw a. Min chhang loin thui vak lo a tlan leh a. Paihte tuikhur kan tih mai thin piaha kawng sir zau laiah a ding ta a. Bike atangin ka chhuk vata, kan dinna thlang lama Japan hlo par vul chuk chu mawi ti deuh mai hian ka zuk en hnaia. Naupanlai min ti ngai vawng vawng. "Zar, Japanhlo a kuhmum tan ania. Tlangsam pawh an kuhmum tawh. Christmas a hnai tawh viau tihna ania. Ni engzat nge la awm ang le? " ti a Zotei'n min zawh lai te ka mittlaah a lo lang iar iar a. 

"Ni 50 vel a la awm mai thei a ni.Japan hlo leh tlangsam an par tak tak hun hi Christmas chu animai dawn a" Tiin inti fing em em in ka chhang let a. "Ni chiah, ruaitheih ni-ah mipa ho kal hmain sa an talh naah kal ila, a phing lak khalh ang aw. Min pettir veleh duh lo vanga, a buaithlak" a ti kha ania. Ruaitheh tukah khua pawh a varchian hmain ruaithehna turah khur hlawk hlawkin Bawng an talh hun kha kan nghaka, Pa Thangchuanga'n a phing min pe ta ngeia. Lawm taka kan haw pui kha in kan thlen pui hnu lawkah u Hminga'n min laksak ta daih a. Kan thohma thlawn a ni leh ta mai mai. 

Bike nghenga Rinawma ding chu ka pan pheia. A bulah ka din veleh ka kut a lo vuana, a hum nghal chat. "Miin min hmu ange" amah pawh en ngam mang lo hian ka ti a. "Min hmu pawh nise a ho e. Kan inkawmngeih tih an hre veka, mak an ti teuh lo mai" a ti duh lek. 

"Thangzeli i hrilh tawh em? " a ti leh chu ka lu ka thinga. "Tinge? Hrilh ve tur che alawm" a ti leh a. "Ngai rih lo. Tuman hre lo se ka duh rih zawk" ka ti ta tlat. "A tha lawm, Roenga hi chu a fing em a, rei kan bum theih pawh ka ring lo" a ti a. Ka ngaihdan chiah a ni ve a. "Zep kher pawh keichuan tul ka ti lo va. Ka duhdan phei chuan inneih thuai mai ka duh. Kan inhrechiang sa a, inhriatchian lehzual kan ngai lo. Kan kum lah a tam ve tawh tho bawk nen, inneih thuai mai tha ka ti" a ti leh duaha. 

"Aaaa, ala hma em mai. Kan inngaizawng tak tak em tihte pawh nghak ang" ka tih veleh za deuh mai hian a nui a. "Eng nge chutiang nghah ngaia? I timak thei" a ti nung nung. 

"Oooo, kan induh tak tak lo mai thei a. Thil thleng palh te a lo nih chuan buaithlak deuh tur ania. Nizan khan i grape wine in kha i rui pawh a ni thei" ka ti leh chu a hma aia za zawk mah hian a nui a. 

"Engatinge maw i at viau reng mai le. Khatiang grape wine mai mai rui chiam turah te min ngai ania. Nangmah hian tawngkam thlum deuha han inbem vel i duh lo tih ka chiang em a. Tikhan risk ka la nih kha" a ti ta a. "Hmmm, min risk kher angai mi? Tenawm em maia" ka ti hlaka. "I va han hahthlak tak" Nui chung hian a ti a. Hnai takah kan inen a. Ka lungphu dut dut chu a hriat theih hial ka ringa. Kawngpui kam maia ding kan ni bawk nen, ka hawisawn ta thuai. 

Minute 20 vel kan awm hnuah kan leta, ka rin loh deuhin Sailam vengah kan chho a. Rinpuia ni te in kawta kan din chuan zawhna nei tak hian Rinawma ka melha, a nui ta ngawt. "Sawi ve mai ta che" ka ti bung nghata. " Mipa ka nih hi" tih zawng bak a sawi lo. 

Inchhunga kan luh chuan Rinpuia leh a-ni an lo thu duna, Duati'n chhang ban a lo at mek thung."Awi, Zar.. " nui chung hian a ti ringawt maia. "A lo mak thei hle maia" fiamthu hian ka ti leta. "Ek-i, rak reng reng suh. Keipawn ka hriat zawng zawng ka sawi bik lo aw" Rinpuia'n a rawn ti a, ka va en chuan Rinawma a lo melh vei zuk zuka. Inkawm ho zingah pawh inkawmbik anni bawka, hriat a nei pawh mak ka ti lo va. Mahse, pawi chu ka ti ru tho. 

Rinpuia leh Rinawma'n eng eng emaw an sawi dun laiin Duati nen kan lo titi ve a. 

"Awi, hrehawm ka ti tawpa. Ka zak bawk si, tunah pawh hian Biak-in hawng kan la tlin reng" a ti a. "Chuti maw? Inti miah na nge? " ka ti peka. "I ninawm, hrethiam ve mai ta che a… " a ti hlara. 

"Engatinge in inruk ve ngawt reng reng a? In ngaizawng tih pawh kan hre lo reng reng sia" ka ti leh a. "Inngaizawng lo chu ni chiah lo e. Min try na a rei ve tawha, ka chhang lo nain in ingaizawng ang chuan kan inbe tho thin alawm. Kan ti lang lo mai maia…aaaa, Amah zek zuk saw ka ngei. Bike a min phur kha kan in lama kal lo in a tlan daiha, ka zuangthla ngam bawk si lo. Far hmuna buk teah khan min hruai daiha, haw ka rawt pawh khan a phal lo zela. Khua a var ta ringawt alawm. Awi, miin min sawi nasa em?" Rilru hah hmel tak hian a ti hapa. "Sawi pawh ka hre rih lo. An hre hlawm pawhin ka la ring lo. Keini pawn engmah kan hre bik lo va, Mipa ho lahin an zep tlata. Kan rinhlelh chhan pawh zingah Thangzeli te inah i nu-in a va zawng che a, chuta tang chuan kan ringhlel ve chiah che u alawm" ka ti sa sa a. 

"Ka nu lah hi zah a hre leh dawn bawk si lo, a va hau leh ringawt lo mi? Awi, ka ning. Saw pa hre hru saw ka ngei" a ti leh ta ngawt. 

"Ngei pawh ni la awmzia awm tawh chuang hleinem. Palai te kal se la, thil a fel duak mai ang. Mi sawi tih vel mai mai chu ngaipawimawh duh suh" Tiin ka hnema. "Kohhrana inhmang ve ve, hetia han awm ngawt chu hrehawm deuh ania" a ti leh a. "Thangzeli hrilh hrim hrim teh a. A mangang ropui si" ka tih chuan buk nghat pah hian, " Ka phone pawh saw pa sawn a kawl daih alawm. Nangman lo hrilh leh zawk si mai la" Zuai deuh tak hian a ti a. Nula harhvang leh lu zo veh vawh kha a zuai ve raih mai. 

Kan haw pahin Rinawma ka haua."Thangzeli a mangan tehlul nen, inti mipa leh lutuk hi engmah a ni lo" te ka ti deuh chiama, Inngaihzawn boruak tang at ni lo, hauh ngai tihvelah chuan ka lai bik hauh lo. Ani lah chu hauh hre lo ang hmiahin a tlan ngaiin a tlan miah miah. 

Inah lo lut ve tawh lo in a haw tlanga. Rinpuia pa te be tur in a kal dawn anih ka ring rilru nangin ka zawt vel peih lo. A sawi leh duh dawn chuangin ka hre lo hrim hrim. 

"I va rei ve, eirawngbawl a hun tawh lutuk ania. Ka zaikhawm ve duh tehreng nen, I pi kalsan daih chi bawk si loh" Ka nu in min lo tinghal hmuar hmuara. "Darkar khat vel chiah alawm kan kal, dar 3 leh a chanve chauh ala ri a. Chawhmeh siam vak pawh a ngai lo a. I ninawm chingcheng em mai a" ka ti let ve hlak hlaka. Nu te hi chu fa te hian pa ai chuan kan chhang let ngam tlangpui zawk vek. 

"Ni a rei lo si, I tlai buai tur ania. Tui ka lum vek tawha, inthlak la, chaw chhuang nghal ang che. Ka vawk palian lah a ke a kar na deuh nge ni? A khai vu reng maia" inzawm lo deuh mai hian a ti zui leh bawrh bawrha. 

"Vawkpa lian kha a ni lawmni vengchhak ho lei tur kha? " ka piin a lo tih chuan, "Ni e.. Talh mai tur mah nise a lainatawm alawm. Tlaiah nge maw an lo lak dawn naktukah zawk le? " a ti leha. Christmas ni tak hi inrinni a ni a, chawlhni a ruaitheh thu awm hek suh, chawlh chhung a rei deuh kum animai. 

Ka inthlak zo ka chhuk chu ka u a rawn haw ve chiaha, "Chem, Rinpuia leh Duati an inru law? " a rawn ti nghala. "Tu nge sawia? " a zawhna chhang lo in ka ti a. "An sawi sup sup. Aw nge aih? An inruk chu ka ring tho a, hmeichhia leh zawhte te chu ruk thiang innia" Min fiam pah hian a ti leh a. Ka nu vawkchaw pekna baltin khaiin kawngkhar hnunglam atangin a rawn lut a, ka u thusawi hre chiang uk si lo hian, "Nia,Tunlai chu rukru an tam ngawt tak mai. Tanky bula serthum pawh Pa Khama te ri lam zawng chu a bo fai vek tawh" a rawn ti ve ngawt. 

Ka u in rum deuh mai hian a en a. 

"Chutiang rukru kan sawi lo. I duh duh lah hi i sawizawm tawp zel mai" a ti zui bul bula. "In sawi lo em ni? Ruk thiang te inti khan ka hre sia" Nui chung hian a ti ta mai mai. 

"Ka nu hi chu mi rel ching phei chu ni la buaina i tawk zing tawh ngawt ang. I tawng duh lutuk a, mi thu haw lam leh kal lam te ngaihven ve thin rawh ka tih kha" Hau ni chiah si lo hian a ti a. "Mi ka rel peih reng reng lo" Kal pah hian a ti duh lek. "I rel loh pawhin tawngduh lutuk hi chuan mi pawi kan sawi hma an tih thin kha. Mo kan neih hunah phei chuan huat tur awma i hriat loh, I sawi liam mai mai kha mihrang deuh chuan an la na thuai thuai mai ang" a ti leh a. "Eh… mo neih te i sawi? Inneih in tum em ni? ' rawn hawi let pah hian kawngka bul atangin a rawn ti a. Ka u in a chhang peih tawh lo. 

Zanriah kan ei laiin Rinpuia te inruk thu ka sawi ta a. " Duati nu chu a va sa dawn ve. Mahse, Rinpuia'n a nei duh chu lawm viau tur anni" ka u in a ti a. "A nu hi a nulat lai chuan buanchak vak lo kha an ti mai thina.Duati hian a chhun emaw ka hre law.. Mipa tawh phawt chuan an kuaithal zel thei e an ti thin a. A hur reuh nge ni? Pasal a neih hnuah pawh ui re deuh te khan ka hria. Mi thenkhat hi chuan chhul tha mi hi an nei a" ka piin a lo tih chuan ka pa in "ka nu thin hi chu a" a ti deuh hluk. Ka nu nen kan inmelha, ka nu a nui chhuak nghal a. Ka pa pawh a nui ve leh mai bawk. 

Christmas hlim takin kan hmang zo va, kumthar pawh dam tlang takin kan chuangkai hlawm, Rinawma nen pawh hun remchang kan hmuh chuan kan inhnaih thei viau zela. Mipat hmeichhiatna lam hawi erawh chuan khawlo zawngin kan awm ngai lo. Kan zep theih mai bakah tunhma atanga inkawm em em thin kan nih avangin tuman rinhlelh enah min en lo va. Kan inngaizawng tih pawh kan thian thenkhat te bak hria an la awm lo vang. 

U Davida'n min rawn be reng renga. Inngaizawng kan ni lo bawka, nidang ang bawkin tha takin ka chhang reng tho. Rinawma hian amah nen kan Inngaihzawn chian takah chuan thik awm pawhin a awm ngai tawh lo. 

Vawiin hi Kumthar lawmna ruai theh tuk chiah a ni a. Tuman hnathawh zai kan la rel lo. Kan thianhoin Ruatmawia te inah chaw eikhawm kan tum a, Rinpuia leh Duati tih loh chu kan awm kim thap tawh. Palai Vawikhat an tir tawha, kumthar lama leng leh turin an inthlaha. A rem mai turah kan ngai a, kan Phur tlang viau. Thangzeli nen Mawii eirawngbawl kan puia, mipa hoin card an deng a..

"Naktukah Pu Hnuna ten an chawimawi maithei an tia. Zanin kan zai tui dan a zir animai. Zaikhawm vek ang u" Roenga'n a ti a.

"Nia, zaikhawm ang u. Kan hlim tlan tehreng nen Kohhran hian nawn tur ania. Kan upa te hi chu ka ngei tlat zel" Ruatmawia'n a ti bal bala. 

"Tehngawt a che. Ruaitheh te chu a hautak alawm. Biakin sa lai kan ni bawk si. Chutin upa te dem ngawt suh' ka ti ve a. " Zarzokimi pa hian chawimawi awm tak ania. In hausak tehreng nen, in uikawm lutuk" Roenga'n min tih chuan ka melh ram rama. 

"In hausa fe zawk. I pa pension pawh in la teuh tih kan hre vek aw. I pa chawimawi tir hle hle rawh. Keini te chuan nikumah kan chawimawi kha" ka ti nghat nghat a. 

"Rinpuia hi han phone ve teh u. A tlang thei lo reng reng" Thangzeli'n a tih chuan phone ka lachhuaka, Rinpuia ka phone nghal a. A la thei tlat lo. " A la thei bik lo. Duati nen an lo kal rual dawn niang. Duati zawk kha phone mai la' Ka tih chuan "nia, an lo kal rual dawn aniang. An inngai ve mai si" nui chung hian a ti a. Duati a phone zuia, mahse Duati pawn a la thei bik chuang lo. 

"An bung laklawh aniang chu. Phone sek suh u. An lo thleng ve mai ang" Roenga'n a ti lung lung. 

Chawei hun dawnah pawh an lo lang thei ta lo fo a. Rinawma'n a phone a, kan phone chhang miah si lo kha Rinawma phone chu a lo la a.. Pawnah Rinawma a chhuak ta daih. Minute 10 vel zet hnuah a lo lut leh a. 

"Mihrang kan awm lo bawka, a richhuak lo turah ka ngaih avangin thil ka sawi dawn ania. Rinpuia te hi an inru nawn leh a, Aizawl an pan mek anih chu. Ro-a Msi pawn hre rih lo thei se" Roenga en chungin a ti a. 

"Um, hre lovang. Kan Mihringa chu ruk nawn leh a tul chu a ni chek ang maw? " a ti zui vang vang. 

Chawei kham hnu feah ka haw a. Ka nu leh ka pa an zaikhawm duh avangin zaikhawm ve loin ka pi ka awmpuia. Rinawma a lo leng a, ka pi a mut tawh avangin kan inthuthnaih viau.. 

Ka nu te zaikhawm lo haw chuan kan rin ang ngeiin Pu Hnuna'n a chawimawi dawn tih an rawn sawia. "Kan awm zawn rei tawh lutuka, ka ning lek lek tawh mai" ka pain a ti charh charh. Thingpui an in zawhah an mu ta a. An mut hnu rei vakloah Rinawma a haw a, pawn thleng ka thlaha. Saron phenah Duhthawh deuh mai hian kan infawp vang vang. 

Zing ka tho chu ka nu a lo tum bur maia. Ka pi nen an inhau anih loh vek chuan a tho fuh lo anih ka ring mai. Thingpui ka siama, dawhkan kilin ka thu a. Hmarcha hnah bai tura a then chu thenpui pawh tum lo hian ka en a. 

"Zarzokim, Rinawma nen in inngaizawng animaw? " a ti deuh tawl maia. Ka thingpui inlai ka hak teuh ngang mai. 

"Mi hriat tam hma leh i ngaihzawn ngheh hmain thlah vat ang che. I pa phei chu a sa dawn teh ania. Keipawn ka duh lo hrim hrim. A pa a chhun dawn tih a mizia atang hian ka hre nghal vek"a ti zui ta hmuk hmuk.