Zarzokimi-6

 Chapter - 6

"Eng nge a pa a chhun kher ang?" thildang sawi lo in ka ti ve hmaka. Kan inngaihzawn leh ngaihzawn loh lam chu ka sawifiah lo va. Kan awmdan a danglam loh nen engtin nge a hriat le chu ka ti rilru rauh rauh"Eeee, in lo inngaizawng ngei a ni maw? Ka hmusual che u aniang tih nak laia" thinrim hmai sen vek khawp hian a ti a. Ka chhang tawh lo. Nizana Rinawma haw tur ka thlah kha min hmu anih ka ring nghala. Nu tawngduh leh nui bawk bawk thin, thinrim pawh thinrim rei ngai mang lo ni a ka hriat thin kha a thinrim tak tak ka lo la hmu ngai reng reng lo tih ka hre thiam ta. 

Ka pi a rawn tho ve a, "in va ngawi teh hmuk ve. Chemi, thingpui ni lo, tui lum pep pep min lo pe teh aw, ka kam kan thuah hmasa teh ang" a ti charh charha,ka thawh hmain ka nu a tho a, "ka thil then lai kha lo thian zawm la, satuiah bai ang che" min en lo hian a ti a. Ka la bai ngai reng reng lo nangin ka tawng lo. 

Ka piin thildang ka tih chhungin a lo thiana, "Satui kha chhuang lum la, thlai hnah leh sa awm ang ang kha ila chhuak anga, sa kha i hmehsawm hnuah thlak la, an hnah hlui kha chu i paih dawn nia'ka piin a ti a. A sawi angin ka ti vek nangin a hmin hnu a ka hawp chhin chuan a tui ka ti vak lo. 

Tukthuan ei khamah ka nu leh ka pa vawk in satha leh vawkchaw chhumin an buaia, ka u Office kal tur in a chhuak bawk. Kumthar hlim te mah nise office an hawn tawh avangin a chawl ve ngawt thei tawh lo va. Ruai a theh hman pawh a ring lo. Ka nu nena kan boruak rit ru tlat hi kei leh ka nu bakin hre hmel an pu lo va. Mahse kan naupanlai atanga kan thil tihsual leh pawikhawih apiang ka pa hnena zep ngai lo anih avangin reiloteah ka pa chuan a hre thuai dawn tih chu ka hre tho mai. 

Ruaitheh naah fatu tur ka nih avangin chawei khamah ka chhuaka, pa ho zingah fatu tur chu an chhuak vek tawha, hmeichhe ho erawh tukthuan ei khamah kan kal ve thung. Kan thianho fatu a tel te tihtur kan neih loh veleh kan thukhawm a, nidang ang bawkin Roenga titi kan ngaithlaa, a tih dan ngai te tein min kap a, kan nui kan nui hlawm. Nui nui mah ila ka rilru a nuam thei lo va, rilru tak tak ni loin ka nui a ni deuh ber mai. 

Ruaithehna te kan senghawi vek hnuah kan haw thei ta chauh. Khua a thim thut thut tawh. Ka u in chaw a lo ei meka. Ka nuin zing lama a thinrimna hre tawh lo ang maiin ka chawnawi hawn a lo buaipui nghal zung zung. 

"Chaw nawi te i rawn hawn ve ngawt ni? La tur an awm lo em ni? ' a kut sil pahin a ti a. "Vawk nei chuan kan hawn vek. An mahni Pu Hnuna ten vawk an nei tawh chuang lo va. Fatu hoin kan insem" tiin tha takin ka chhang ve bawk. 

Ka inbuala, ka inbual zawh hnu lawkah Thangzeli leh Rinawma an lo luta, zaikhawm turin min rawn sawma. Ka chhan hmain " Zanin chu ka awm a nuam lo em mai,a pi awmpui ngai nen. Zaikhawm lo mai rawh se" ka nuin a lo ti a. "Zaikhawm lo ve mai ila, tah hian leng zawk ang. Zar, Tengtere lawh sa innei em? " Thangzeli'n a ti thuai. "Nei ang, ka pa khan zingah a lo tlatin ka hria" ka ti ve mai. Choka lamah a va phei a, a va hai kual rawk rawk hnuah tengtere a rawn hum chhuak ta tan tana. 'I ei dawn tho tho chuan han deng la,sunhlu nen khan denpawlh rawh. Fridge sirah khan kho te ah ka dah kha, keipawn ka ei duh alawm" ka nuin a lo ti leh a. Thangzeli nen tengtere den tur kan ziah fai laiin Rinawma an rawn call a. " Teseni a in luah turah a inthiar phei dawn a, ka va pui ve lawk ange. Min hrilh lawk reng sia, ka lo manghilh daih mai" a ti a. "Awiii, Lerha.. A unaute pawn pui ve mai sela" Thangzeli'n a ti hlak hlaka. "An pui dawn tho alawm. Vawiinah an khua atangin bungraw kengin an lo kal niawm tak ania. Tengtere pawh chu ka ei ve chak viau nangin ka ei lo mai ang" a ti leh thuai thuaia. " Pui du du ringawt loin kherhthluk te tum ta che. I zei lo em mai" ka rin loh takin ka nuin a lo ti ve bawk. 

Tengtere den kan ei zawh hnu lawkah ka nu leh ka pi an mu a. Thangzeli nen sikri ai pahin Tv kan en duna, Naupanlai, hmuhnawm en tur a van em em hun lai khan TV hi ka lawm thei ve em em a, tunah erawh chuan ka en ngai ta meuh lo. Lehkhazir tlut tlut bak tuina dang nei mang lo khawpa lehkhazir nasa ka ni ve  a. Tv enna hun a awm ngai mang lo khan minti ngaina lo zo te pawh aniang. 

"Prison of break hi chu a hmuhnawm ve chiang e" tv lam en reng chung hian Thangzeli'n a ti a. Hei kher hi chu a lar em avangin Tv en tam lo mah ila ka hre ve tlat. "Prison of break maw?" ka ti a. "Um, Michael-a hi chuan min duh se lum hlumah ka hlawh ngam ang. Thih loh palh tak hlauhin" a ti leh ham hama. "Prison break te ti ve la, Prison of break tih kher" nui chung a ka tih chuan "awi.. Chuti chuan ka ti ve ziah" Nui vak vak chung hian a ti ta mai mai. 

"Lalroma kha a lo let leh ngem le? Haw mai ka duh" A ti leh a. "Let tawh awm lo e.. " ka tih chuan min rawn en a. "Hey, ka hre vek ania aw" a ti vei saw saw a. 

"Nang lo pawn an hre tho alawm mawle" pha buai vel loin ka ti ve hmiah. A nui pawt pawta, "thil hi amak ve thei e..Mawii leh Ruatmawia inngaizawng te kha mak ka tih zia mai chu a. Nangni chu anni ang em kha chuan inbuai lo turah ngai ila" a ti leh zat zat a. "A hriat miah loh aw.. " ka tih chuan phawk deuh mai hian a meng a. "Ti nge? I nu nge i pa? " a ti se se. "Nakinah kan sawi dawn nia.. Engmah amah chu lo hrilh suh aw. Buaina ka nei anga a hriat ka duh lo ania" ka tih chuan a bu nghat nghat mai. 

Hun a kal bek beka, keini pawn school kan lut leh tawha, January thla pawh a chanve aia tam mah kan hmang leh tawh. Rinawma nen pawh buaina em em nei loin kan inzui chho ve ta zel a, mak deuh maiin ka nuin engmah a sawi leh tawh miah lo va. Kan chhungkaw member dang phei chuan an la sawichhuak lo hrim hrim. Kan landanah hian thian kawma kan inkawmlai angreng tho kha kan nih vang pawh hian min ringhlel lem lo a ni maithei. Hunpui boruak, mi zawng zawng kan thawven halh hun lai kha liamin, mitin mahni hnaah theuh kan buai leh tawha. U Davida pawh a rawn let leh tawha, a lo len leh zauh zauh hnuah Rinawmna nen kan awmdan a manthiam a ni chek ang. Kan inngaihzawn leh ngaihzawn loh min zawt ta a, keipawhin pha buai lo in tlang takin ka hrilh ve mai bawk. Rinawma nen kan hnaah ve ve kan buai chhoh mawp mawp avangin a hranpa taka inawm heuh heuhna hun kan nei lo va. Zanah nise Thalai conference a hnaih tawh avangin Bial leh Branch in hla kan zir deuh reng tawha. Ani Bial zaipawl conductor leh Branch a conductur ni kawp bawk chu buai zak zak tak a ni. Pawlsawm exam hun a hnaih tawh em avangin theihtawp kan chhuah takmeuha. Zirtirtu ho kan thutkhawmnaa kan rel angin karthar Thawhtan zan a riah luh hman turin study camp kan nei tan dawna. Zirtirtute a inchhawkin kan riak lut thin dawn a ni. 

"I u in a thlah lawk mai ang che. Chaw ei vat vat la, I u lo haw veleh a kal nghal thei turin lo inpeih rawh. I che muang lutuk hi tu nge maw i chhun ni? " ka nuin min ti hlawk hlawka. "Ka inbual vek tawha, engmah insiam leh chuan ka ngai tawh lo. Chaw pawh inrualin ka ei ve mai ang chu. Dar 6 leh a chanve daih alawm luh hun kan tih, hmanhmawh chuk angai lo" ka sam khuih pahin ka ti a. Kan han sawikhawm nak nak hnuah nula awmchhun riak hmasaber turin min ti a. Midang hi chu nupui/pasal nei tawh vek anni a. Chhangchhe berh lutuk erawh an awm tawh lo. 

Ka u lo haw veleh chaw kan ei a, chawei khamah school lam kan pan ta a. Thlasik vanglai tak anih bakah kan school hi tlangchhip a awm a ni a. Chhunah pawh a vawh theih em avangin zanah a vawt dawn tih chu chiang sa a ni a. Mutbu pawh ka keng tlem lo. 

Office-ah hmeichhe ho zawng nen kan riak a, mipa ho erawh chu Office bul chiaha bungraw dahna atana kan hman thin store roomah kan riahtir ve thung. Dar 11 thleng ka zirpui hnuah ka muttira. Riahna sawn hleka muthilh harsat zel ka nih avangin ka muhil thei lo. Rinawma nen msg-in reife chu kan inbiaa, kan in mangtha hnuah pawh ka la meng ta kar. 

Pawl sawm kan nih ve laia study camp kan neih tum te ka ngaihtuah chhuaka, ka lung a leng em em mai. 

"Thiam hmasa sa mut hma" an tih kha chuan mu hmasaber ka ni deuh ziah thina. Zingah erawh chuan zan lama hma taka ka mut theih chhan ka note thiamsa kha engmah ka hre leh tawh ngai mang lo. Tumkhat phei chu kan sir pakhat a rui sual tlat maia. Zan lai laiah zun a cheh ta dur dur mai kha ania. Naupang tan chuan zah viau har tak tur kha kan zah em em reng tho. Zawngtah mu pum awm chhoh tan hun a ni a, kan thiannu pakhat khan a lo ei nasa deuh aniang. Zinga lehkha kan zir laiin a inthiara, class room a rawn lut leh kha zawngtah ei ek uih rim hi a rawn nam rum rum maia. Hriata'n "I va han che tawp tak" ti a a nam chhuah nawk nawk lai te kha lung ti lengtu a ni ta vek mai. Mipa ho zingah inti mipa lutuk lo chi hi a awm ve a. Hmeichhe zinga mut ve ngawt thu awm hek lo le. Mipa ho zingah a riaka, eng emaw changa mipa thenkhat nghal fal deuh in a mipatna en sak tum chang an nei thin a. An thawm a na thei em em mai, zan dar 12 dawn thleng thlenga muhil thei lo, nui dir ngar ngar tawk hmeichhe zingah lah kan awm zan tin a, zing a kaihthawh theih mang loh, zirtirtuten tui vawta hmai an phihsak nawk nawk tawk pawh an awm deuh reng zela. Lehkhazir tak kha chu nuam viau lo mah se study camp boruak kha chu nuam tak a ni. Khawthlang lam boy band ho lar vanglai tak a ni a, pawlsawm kan nih lai vel hian Weslife an lar em em mai. Kan free deuh chang hian kawtah meilum ai chungin kan zai dal dal thina. Kima'n guiter a chan tawh chuan kan zaipui hleithei meuh thin lo. Westlife member zinga mi pakhat zaidan anga zai a tum thin vang a ni a. A hmel awmdan zawng zawng an siksawi kual a, a hmel landan a ngaihpawimawh luatah a key dika a tira kan sak pawh a key a thlak sek zel thin a, Hriata bawk hian.. "Kima, I zai pangngai khan zai mai mai teh, I hmel a sawi vek zel ania" a ti thina. Kan nui ham ham zela, Kima lah chuan a sim duh chuang reng reng lo. 

Ka alarm arik veleh ka tho thuaia. Darkar hnih lo liam ka muhil lo. Hmeichhe ho ka kaithawh hnuah mipa ho ka kaitho leh a. Hun hmandan tur zawng zawng bangah kan tar vek avangin eng nge an tih leh dawn hrilh an ngai lo. Karkhat ka riah hnuah midang an riak ve ta a. Mahni inchhung luma han mut vang vang chu thla a muangin a hahdamthlak em em mai. 

Hun a kal zela, pawlsawm exam a lo hun a, kan zir fuh bawka, naupang pawhin nuam an ti ngang mai. Kan beisei ang ngeiin result pawh kan nei tha ta reng bawk. Zirlai ni lo, zirtirtu ni chunga matric result ka nghah hmasakber a ni bawka. Ka helhhawlh nasa em em maia. Pakhat a vanduaia, a supplement hlauh tih loh chu distinction leh first an ni ve fur maia. Kan khuaa High School a awm hnua result that ber tum a ni ta hial. 

Rinawma nen kan inkawmdanah thian ang maiin lang rengah kan inngaih laiin kan inngaihzawnna  zep sen a ni ta lo aniang. Kan vengchhungah mai ni lo, kan khuaa kan hmelhriat dang dang te pawn an hre ta veka. Ka chhungten engmah sawi lo mah se an hriat loh ka ring lo va. Ka nuin a duh lohna thu a sawi leh ta reng reng lo hi amak ta ber zawk awm e. Rinpuia leh Duati pawh vawi 4 ngawt an inruk nawn hnuah an innei ve ta nge nge a. Duati nu-in a fanu a lo chhuang ve em maia, chuvanga rem thei ngang lo anni a. Mahse, nau an pai tak hialah chuan rem lo thei dinhmunah an ding ta lo aniang. An innei ve ta hram.

Nitin hun angai deuh rengin kan hmanga. Ka pi kum dang aiin a hriselna a tlahniama. A khat tawkin damdawiin kan thleng ta deuh reng. "Chemi, pasal neih lam te hi ngaihtuah teh, ka damlaiin nei ngei la ka duh ania" min ti thina. Rinawma pawhin a sawi fo tawh bawka. Mahse, keimah ber hian harsa ka la ti rih tlata, pasal neih ka la zuam lo nge kan in chhuahsan hlen ka hreh zawk pawh ka hre lo. 

"Nov velah ni se la, chutiang tur chuan inruahman ang" a ti thina. Aw pawh ka ti lo va, aih pawh ka ti ngai chuang lo. 

Kan khaw bul maia ka thiannu pakhat, a nu a sun hlauh maia. A ruang awmniah tak tihtur thulh theih miah loh ka neih avangin ka kal thei lo va. Chawlhni lo thleng hmasaberah Rinawma nen chawhnu inkhawm thulhin kan va lengpheia. Inleng an lo neih nak nak zingah chuan reitak ka hmuh tawh loh Reuben-a ka hmu hlawl maia. Ani pawn min hmu ve bawka. Han inbiak duh loh ngawt chi ni hek lo, tha takin min biakna ka chhanga. Rik hluai erawh har tak a ni. 

Kan haw kawngah Rinawma mizia a dang ta tlat. "I nuam lo mi? I va ngawi ve" ka tih lahin " Nuam e, sawitur a vang alawm" a ti duh lek a. Nidanga kan Infiama, kan titi dun thin ang kha  ni lo kawngtluan. 

"Vawiin khan ka ngaihtuah a, Reubena khan sawn thlak lo se chu in innei tawh ngei awm sia. Tinge ka sawm che hian min hnial zel a? Kan chhungkaw dinhmun vang hi a ni thei em? " tih msg zanah min rawn thawn ta hlawl. Ka thinrim viau dawn laiin amah lam atanga ngaihtuah chuan thil awm ang thei tak tur a ni tih ka hre thiam leh ta thuai mai. "Chutiang lam a ni lo" tih ringawt ka thawn let a. "Anih chuan tinge min hnial zel chhan ni a? Kan la inngaizawng rei lo va, inhrechiang phawt ang tidawn ila kan inhrechiang sa a. Enge harsatna i neih? " a rawn ti lehzel. 

"Pasal neih hi nula senior nih ve tawh chuan a lo huphurhawm duh em anih hi" ka ti leh ringawt. "Nikuma huphurh lo khan tinge tunah i huphurh a? A mihring te vang zawk aniang" a la rawn ti ta. Reubena hming sawi lang fak duh si lo, hriatthiam theih deuh si a a rawn sawi chuan minti thinrim thut a, "ninawm, inthen ang" tih ka type nghal a. Mahse, ka thawn hmain ka inngaihtuah fim hman  leh ta hlauh.. 

"Zep loah chuan nu leh pain min chawm char chara, hna neih veleha pasal neih hi ka inthlahrunga" tih ka thawn ta zawka. A reh deuh vang vang hnuah.. " ka hre thiam che alawm. Reubena te kha chuan sum an ngah sa em a, I hlawh pawh thehluh i ngai lo maithei a. I duh phawt chuan i nu leh pa pawh ila pe vek thei ang ka ring. Keini chu kan hausa ve lova, I hlawh kan thehluh tir vek che pawh a tul mahna.. I rilru ka hre thiam e" a rawn ti ta a. Ka sawi na rilru ni lo lutuk a min rawn puh takah chuan ka tawt up up a, ka sa zawk zawk a ni ber. Mipa tamtak, thil ho mai mai sawi peih takte chuan hetiang hian lo sawise a awm lo chuang lo vanga. Rinawma, mipa-ah pawh mipa ve taka ka ngaih, rilru zau leh kawi nei lo ber pawl ni a ka lo hriat thinin hetiang zawnga rilru kheuhbeuh deuh a pu ta hi mak tih loh rual a ni lo. Ka chhang zel anih chuan duh loh loh kan sawi dawn niin ka hriaa. A lo reply har deuh vanga ka muhil tawh anga angaih beiseiin ka reply duh ta lo. 

Lu na burin ka tho a, ka nu mood fuh lo a lo teu hlur lehnghal. Ka pi nen an  damdawiin kal leh kal loh chungchangah an lo inhniala. Ka ni Tei zing karah ka pi tlawhin a lo kala, ka nu leh ka pi inhnial laiin a lo thu ngawi ran mai. 

"U Sawm, ka nu hi hrilhfiah teh, heti ringawt te chuan a tha lo. Sawi ila min hnial zela, miin enkawl tha duh lo te min ti ang. Tar enkawl hi chu a buaithlak em mai" a ti buan buana. 

"Nizanah ka khua a sik ka ti ringawt alawm mawle. Khumbet a na pawh ka ni em ni? Damdawi min eitir ngun lutuk te hi ka damlo zo tawh anih hi" ka piin a ti ve hlak hlak bawk. "Ka nu, vawiinah va inentir ula, Daktawr tha deuh mai a awm thar lehnghala, I dam var zawk dawn alawm" Nitei'n thlem pah deuh hian a ti a. Ka piin a hnial zel, Nizan lama Rinawmna nen kan intai hlekna khan rilru nuam lo deuh maiin min siam ve bawk nen, an pathuma an inhnial vel chu ka hne ngawih ngawih. Ka nu lah chak tak takin a vei a, maian hih laklawh lai kalsanin Alu vel tur a phawrhchhuaka. A vin hlur mai bawk si, khua a var chauh e ti loin kan chokaah hian khua a var mawlh lo chu a ni e. 

Dan pangngai angin school ka kala, nidang ang lo takin zingkara ka wishna min rawn chhan let bak Rinawma nen kan inbe ta reng reng lo. Ka thinrim em vang lam pawh ni loin ka be lo ve tawpa. Ani lahin min be hek lo. Inbe lo va awm thiam mang lo inbiak loh thut chu hrehawm tihviau awm tak, lawm vak lohna neih chuan a lo hrehawm tehvak tlat lo. Thil tamtak ka ngaihtuah a, Rinawma mize mak takah bawk ka tawp zel lawi. Ka thawhna school hi kan in atangin kein minute 10 kal pawh a ni mang lo va. Thil ken tur rit tham deuh a awm anih loh chuan ke hlirin ka kal thina. School banah dawrah inchhung mamawh thenkhat la turin ka kal a, ka bawr lutuk lo bawka kein ka haw thla a. Kal pahin Zotei ka phone a. Chhangchhenu tih takah a buai thei em em maia, thil tul bik loah chuan kan inbe mang mang lo. 

"Enteh, Lalroma hi tunhma khan rilru tet riau a nei thin em? " ka ti deuh phawng. "Awi, chungte chu i hre ber ang chu. In inkawm nasa ber zawk a" a rawn ti a. "Um, nia.. Rilru zau deuh leh thunawi nei lo deuh ni hian ka hriaa. Mahse, hetia kan inngaihzawn tak hnu hian khatiang mipa anga ka lo ngai kha ka hre sual emawni ka ti" ka ti duah. A thaw deuh halha, "hre sual lo vang. Keipawn mipa mize diktak ang kha a zia niin ka hria. In inngaihzawn vang khan thikthu te a awm ve anga, thil a serious hma bawk dawna. Ho te te chu a haw hma tawh mai thei" a rawn ti leh mawlh mawlha. Chutiang zawnga ngaihtuah chu ka tum nasa viau tawh nangin nizana a msg atang kha chuan kheuhbeuh deuh angin ka ngai laklawh tlat tawh. 

Nimin lam leh nizana thilthleng ka hrilh zui ta mawlh mawlha. Ka msg a rawn reply dan te pawh zep nei miah loin ka sawi fai ta vek. 

"Rilru nawm loh nan chuan hmang chuang lo la, Lalroma pa kha ka pa te chuan a palen ang aiin a rilru a te ru tlat an ti thin asin. YMA velah khan an inhmang ho nasa thin bawka, vantlang hriat lem loh mizia, rilru kawi deuh pawh kha a lo nei ve aniang. Mahseeee, tupawh hian kawi nghet chu kan nei vek alawm. A pa a chhun loh zia te chu kan hriatchian em hi. Reubena a thik vang mai mai leh inneih i lo duh rih chiah lo nen a rilru a kalsual laklawh ve anih ka ring" a rawn ti ta dap dapa. A tu amah min tan zawk chuang loin thulai la takin a rawn tawnga. Hei tak hi Zotei ngainatawm em em na chu a ni. 

Zanah a rawn len ka rin laiin a lo leng ta chuang lo va. Min rawn be chuang hek lo. Min be lo na na na chu tiin ngawih ka chuh ve tlata. Ngawih chuh tlat e ti loin msg awm leh awm loh erawh ka en ka en tho. 

Ni 3 lai kan inbiak loh hnuah zanah a rawn leng ta hlawl. Ka school kal tur hian a school kal tur ka hmu thina, vengkhat a awm kan ni bawk nen inhmuh loh tak tak chu a theih chuang lo a ni ber. Midang dang lo leng an awm ve bawk nen nidanga a mize ngai nena danglamna nei lem loin a awm a. Min biak dan pawh angai reng. Awm hnufual bik loin midang ho haw rualin a haw veleh mai.

"Tlawm zawk kan awm loh chuan a fel thei dawn si lo va. Ka tihsual ka hre lo nangin min ngaidam teh" tih hi a tuk zing ka thawhin msg a lo awm vanga. Lawm tur nge lawm loh tur ka hre thiam lo. Ka tihsual ka hre lo a ti kher chuan min khei zak rualin, kan inkar siamthat tuma hma a rawn lak na erawh ka hlimpui viau tho. 

"I tihsual i hriat loh chuan ngaihdam dil angai em ni? " Tih zawngin ka chhang leta. School kal tura ka chhuah dawnah min rawn reply a.. "Tisual inti lo mah ila nangman tisual min lo ti theia. Ngaihdam dil mai kha a tha, I luhlul em em zia pawh ka hre chiang ve bawk che a. Inthen ka duh lo va, puitling taka inngaihzawn zel ka duh bawka. Chuvangin ka biak hmasak che angai alawm" a rawn ti deuh duah. Nilengin hunawl apiangah msgin kan inbe zui ta char chara. A sawi tam berah chuan min then a duh lo tih a ni a. Kan chhungkaw khawsak phung inthlau deuh vanga ngaihtuahna dik lo nei niin a insawi bawk. Rinawma mak ve em em na chu hman atanga vawiin thlengin chapo thil ni lo se, kan dinhmun a inthlau chho ve em em a, chutichung chuan kan inngaihzawn hnuah an harsat zawk avanga inhmuh hniamna leh min phu lo anga inngaihna hi a neih ka hre ngai lo. Chapo ni si lo va mahni induhtawk tak mai a ni ve a. Hei tak hi a miziaa ka duh em em thin pawh a ni reng bawk. 

Kan inbe zela, thinrimna tur zawnga ka tawngkam a mawi vak loh pawhin tha takin min rawn chhang zel a. A thin a rim ve duh reng reng lo. Chuti na na na chu duh ve tho tu tan chuan inkhenkhawng reng thu awm hek suh, duhsa tu tan duh lehzualna a thleng a ni ta hrim zawka. Nidang zawng aiin min care a, zing lama la lungawi vak lo si, ka ngai ngawih ngawih ta maia. Zana inneih chung chang a rawn sawi leh pawhin hnialna ka nei tawh lo. A duh anga September vela palai tirha, November a inneih pawh ka lo pawm em em tawh. "I u hian neih a tum hnai em tihte lo hrechiang la, anih loh chuan kumkhata lut leh chhuak hi mizo upa te duhloh ania. Tihluih chi a ni dawn lo" a rawn tih chuan hriatchian ka tum tur thu ka sawi leh hmiah. 

Ka u titi pui tumin hun remchang ka chang ta ran mai. An hnaah an buai theih em avangin zanriah kan eirual hleithei lo va. Zingah lah a tho hma vak ngai bawk si lo, kei school kal duh hmanhmawh taka insiam a, chhuak mai thin ka lo ni bawk si. Hun remchang a awm lo thei viau maia. Unau pahnih chauh mah ni ila mipa leh hmeichhia hi chu inkawm viau a lo har a, ngaihzawng chung chang phei chu kan ngaihzawng te kan inhriatsak tihmai bak chu kan inhrilh ngai lem lo. 

Inrinni a lo thlenga, ka u te an chawl ve a.  Bank ho hi chu thla khata inrinni vawi 2 na leh vawi 4 na an chawl thin. Abak chu inrinni pawh chawlh an nei chuang lo. 

In a kan awm ni a ni bawka tiin ka nu mithi ral pahin dawrah a awm ve dawna. Ka u in dil a sangha chaw pek bak tihtur a nei lo. 

Chawei khamah ka nu a han thlaha, a lo let leh thuaia. Dilah a zuk kala, darkar hnih zen zawn a thang hnuah a rawn haw a, sangha lian ve pangngai tak pahnih a rawn hawn a. Ka piin engtin nge a man a lo zawt chul. "Dil sangha hi chu an fing khawpa, len a man mai te hi an hara. Dilsah tih lemloah chuan duh ang pawh an man theih loh" a ti charh charh. "Pi, sangha thluak ei tam chu an fing kha i ti ve ziaha, exam dawn te khan min pe vak vaka. Chemi hi tun thlengin ala fing em em chuang lo lai hi mak ka ti. Sangha thluak ei nazawng an fing lo aniang tiraw? Kei hi chu ka fing viau tho a" ka u in a ti a. "Eee, in fin phah em hi. Tunah pawh kamding alawm innih. Ei lo ula maubul sipai bak inni nang. Mawng poh turh turhin thlawhlaiah hlo thloin in bung anga. Tui pai lum purh khawpin tlakdeng lama inthawh phei chuan niin a em lum vung vung ang che u. Mahse, sangha thluak in ei thaa, tunah chuan kamding lian deuh innih mai hi" uar deuh mai hian ka piin a ti a. Ka u in "kamding an fing vek tihna ni chuang hleinem. I tunu pawh a la fin loh bet bet em hi" a ti leh talh. Melh ram ram chungin, "Ka fing ve bawk e a" ka ti nghata. "Ee, nia.. I fing leh si. I fing bawka i best friend Rinawma alawm i neih chut dawn ni" Tlansawn pahin a ti a. Hmunphiahin vuak ka tum ve bawk. 

"Kuminah pasal ka nei dawn ania aw. Nupui neih i tum chuan sawn i ngai" Tiin inchunga a chho tur ka au zuia. Muk taka titipui tum kha hun remchang a awm takah chuan ka sawichhuak nghal hmiah.Step tawp atangin a rawn daka, "I neih chuan nakumah ka nei ang. I awm loh hun alawm ka chan" a rawn ti leh a. 'Ka fiamthu lo ania"ka ti vin hlar. "Ka fiamthu bik hleinem, ka nu leh ka pi inhau mah tihtawh nak laia, nangmah ka nuin a hau tel lehzel phei che hi chu nupui neih ngam chi a ni hleinem" a rawn ti awlsam leh et. "Anih ahnu, November-ah ka nei dawn' Ka ti let vaka, nui chungin a room lam a pana, min chhang tawh lo. 

In ka tihfai hnuah ka pi thingpui ka pe a. " Chemi, Rinawma nen hian in ingaizawng tak tak em ni? " a ti ve tehmial a. "Um.. A tha angem? " ka ti ve ringawt. "Ka hre ve nang.. Mi tha tak tur chu anih ka ring a. Chutihrualin a pa hi a chhun angem maw le? ' a ti charh a. " Pi, hmanah ka nu pawn tiang hian a ti tawha. Engatinge a chhun kher in rin a? " Lungawi lo tak hian ka ti a. "Aaa, tupawn nu leh pa chu chhunna lai kan nei veka. A chhe lai tak han chhun fuh te pawh a hlauhawm alawm. Engpawhnise, kei ang pitar mai mai chuan tunlai thil engmah pawh ka hriat ve tak tak tawh loh hi. Ka men lai ngeia pasal i neih chuan tupawh nei la ka duhtawk mai e" a ti leh barh barh. 

Harsatna em em awm loin sept thla kan chuangkaia, Rinawma'n palai rawn tirh a tum ta tak tak. Hrehna em em pawh ka nei tawh bik lo. Chutihrualin ka nu hian engmah sawi ngai tawh lo mah se Rinawma hi a duh lo tih erawh ka chiang viau tawha. Hei tak hian min ti tim leh thina. Engmah pawh ka la sawi ngam lo va. Zanin erawh ka sawi ngei angai tawh. Naktuk zana lo len tum anni tawh tlat. 

"Pa, naktuk zanah Rinawma ten palai lo tirh an tum a" Chaw ei laiin ka ti deuh tawng. "Eng a? Palai a? " ka nu zawkin a lo ti a. "Lo leng se la nimai lawm" ka pain a ti ve thunga. 

"Thiana, Rinawma berkher chu ka duh lo asin. A pa mizia kan hre chiang a, khatiang mi fapa kha ka fanu neih atan ka duh lo ania" Ka nuin thinrim insum aw hian a ti a. 

"Nia, a pa chu a chhun mai ang tih hlauhawm tak chu ania lawm.. " Ka rin loh tak hian ka pain a ti ve ta… .