Zarzokimi-7

 Chapter - 7

"In ho em maia, chutianga mi lo teh ngawt loh tur. Ka nu pawh hi a' ka u in khauh deuh tak hian a tih tak hmukah chuan ka veng nghal hawk thei. " Kan ho lam a ni teuh lo mai. Kan fate chunga Thil thleng thei hi nu leh pa chuan kan dawn lawk vek zel tih hre ta che. Ho te min han tih mai mai chu le" ka nuin a ti leh hmawk hmawka. "Nia, thil thleng thei dawn vek hi chu nu leh pa tihfo dan ania. Chutihrualin a neitu tur berin a duh te chuan eng nge kan sawi buai mai mai ang. I lengtar mai ang tihte ngaihtuahnaah a awm laia lo duh tu che an awm chu a tha mai e" ka pain a ti dam thluama. Nichin lawka ka nu lam tang ang deuha tawng si kha tunah chuan ka lam tang angin a lang leh ta daih. Buaina bul ber nisi kha refree te pawh ka ang ta lek lek. 

"Thiana, eng nge maw i sawi le? " ka nuin lawm lo aw hian a ti a. "Kan inthuthnaih tehlul nen, ka sawi pawh i hrechiang na nge? I tar ve tan tawh anih hi maw" Fiamthu hian ka pain a ti a. "Fiamthu hun a ni em ni? Tun aia thutak zawk hun pawh a awm lo hial ang chu" a ti leh hmak hmaka. "Chuti anih chuan keipawh ka fiamthu lo ve. I fanuin inleng a hmu ve dawn anih hmela, lawm takin pawm rawh. Nupui pasal neih chu risk vek a ni" titak hmelpuin a ti charh charha. "Chutiang a ni lo… " a tih lai mekin, "a tawk e.. Sawi nawn fo hi ngai thin suhse. Kan fate hi mi fa aia tha bik an ni lo ania. Sawrkar hna te an thawk a nih pawhin hei hi chu an mahni tan vanneihna a ni. Tin, nupui pasal an nei fuh lo ta anih leh an mahni tuartur bawk a ni a, lo phili chung thin suh " ka pain tak khek khawka a tih chuan ka nu a chip hmaka, a thleng nen a tho nghal nal nal. 

Mut pawh ka muhil thei ta lo. Rinawma'n "I sawi tawh em? " a rawn tih pawhin " Aw" tih chauhin ka chhanga. Palai hmel hmu tur nisi, chhungkuaa boruak dik lo siam chhuaktu ni ta lawi si hi hrehawm tak a ni. Ka nu hi nu ri bawrh bawrh chi leh luhlul deuh mai  ni a. Mahse ka pa hian a thu tlang taka a kalpui thin avangin ka nu hian a nek lui ngai lo va. An ngaihdan inan loh chang pawhin ka nu hian a tilui thei ngai lo tih ka hria. Tunah pawh hian ka pain thutawp a sawi niin ka hria a, ka nu pawh lawm lo mah se engmah a ti thei dawn lo tih ka hmuh dan a ni. Chutichung chuan lawm lo ngawih ngawih an awm tih hriat reng chuan a hlim theih loh…

Rilru nuam lo deuh in school ka kala, zanriah ei khamah ka patea te nupa an lo kala, ka nu leh Nutei zawi te te a an titi chu ka melh zauh zauha,an sawi tur awm ka rin hriat vek. Rinawma Putea leh ka pa Thianpa Pa Sangzuala te an lo kal ta a. Thingpui ka lumsak bak chu inchung roomah ka tawm ta reng. Palai te nen an inbiakna ka hre phak veka, karthar thawhtan zanah leng leh turin an inchaha. Palai te haw hnuah Patea leh ka pa an titi a. Ka pa tawngdanah inneih loh chhan tur lam reng reng a awm lo. 

Ka nu nen tukzan tha reng reng kan nei thei tawh lo. A hma pawha min hauh nasat theih sa tehreng nen, tunah phei chuan ho te teah min khak char char a ni ta ringawt. Ka tih apiang a sawisela, engmah ka tifuh thei lo. Ka insuk zar dan te, ka thlengsil dan thlengin a sawisel fai vek. 

"Fuji hi i va han heh em em ve, bur khat kar pawh kan tla hleinem, ren ve ta che. Khatah khan chawhtawlh dah suh, vawi engzat nge ka hrilh tawh che. Tlawktlaw em em lutuk mai" a ti hmuar hmuara. Nidanga kan dahna ziah tho a ni. Ka dah ngai lohna lamah ka daha, ankasa tlak tur a dahchhuah sa then tumin ka thuthilha, " A par kha paih suh, I pi in a duh tih i hre reng alawm. Nidangah pawh kan telh ziah tih i hre lo mi? " a ti leh ta tun tun. 

"Ngahnge maw i hauh reng mai chu le? Awmngaihna pawh i ti hre lo anih kha.. Hmer hmuar che hian, I mak ten tun em mai" ka piin chokaa lo luh pahin a rawn ti a. "Hauh ngai lo se ka hau nang" ka nuin a lo ti hmuk. "Tul hlei loah i hau reng zawk anih hi. Puitling anni ve tawha, hauh reng tur pawh a ni lo. I hau chawlawl zo chu anih tawh ber hi. Mahni inrintawkna bo vek khawpin alawm maw i hauh zel le" ka piin lawm lo tak hian a ti a. "Pasal ka nei dawn e ti ngam si, inchhung cheta rintlak na reng reng nei lo. In anga nuam hian i mo naah i awm dawn lo tih lah a chiang" ka nuin min ti leh hlawk hlawka. 

"Eeee, I tawngdan a dik lo tawp mai. Mi chapo tawngin ania i tawng. Midang hmusit rawngkai in i tawnga, khawvelah hian engmah chapopui tur a awm lo teh ania. Rinawma i duh loh vang maia hetianga i tawng hi ka duh lo teh ania" ka piin a ti ta fawk fawk maia. Inhnial reng thin ni mah se hetianga ka pi tawng hi ka la hre ngai lo. "I fanu a nih loh vang anih kha. Nu tan chuan ngaihtuah hah loh chi a ni lo. Rinawma pa pawh tunhma zawng zawngah pa tha a sawi vek ania.A fapa pawh tunah fel ti luai luai mah ula khatiang ang kha a thleng lovang tih a hriat loh" Thinrim tak hian a ti a. "I fanu ania, ka tunu a ni ve bawk ania. Engahnge ka ngaihtuah loh bik ang? Thil thleng thei tih mai mai vanga tun atanga fa te rilru nuam lo va siam kha nu tihtur em ni? Mi a tawngin tawng tawh suh. I ngaihtuah dan kha thlak hmak rawh. A lo vanduai a, a pasal in a pa a lo chhun palh ta anih pawhin i fanu hi demin lo hau reng reng suh ang che. A tana ruat lawk animai. Rinawma lo pawh nei se pasal sun hma thei leh pasal tha lo tak pawh a nei lo vang tih i hre lo. I rilru thlak la, thil a dik zawngin thlir tawh rawh"a ti ta nek maia. Ka nu pawh a ngawi ta reng. 

Ka piin a khak tak hrep atang chuan ka nu pawhin thil engkima min khak a ching ta lo deuh a, mahse min sawisel lo tihna phei chu a ni chuang lo. Ka nu rilru tur lam ka dawnpui chang chuan a sawi kha awm tihna lai ka nei ve thin tho a. Hlauhthawn chang pawh ka nei. Chutihrualin Rinawma ngeiin a pa vanga an tawrh nasat zia leh a pa ngei pawh a huat zia a sawi fo a. Chuvangin a pa tih ang kha chu a tih ve ka ring lo. 

"Enteh, ka rin loh vang pawh ni loin ka nu hian hlauhthawn a nei a. Lalroma hian a pa a chhun a hlau a" Thangzeli hnenah ka ti ta ngawt. Mahni a pai mai mai chi mah ni se ka pai mai mai thei lo. 

"A awm ve tho alawm. Keipawh ni ila ka nuin a hlauhthawng ve awm e. Mahsee, an tuar nasa em maia. Lalroma hi chuan a tih ve duh ka ring lo. Tlangval lerh tak pawh a ni lo va" tiin min chhang a. Ka rilru ang tho a lo put ve avangin tlem chuan ka hahdam ta deuh. 

Hun a kala, palai te lo len leh dawn niah ka pain a ni tura kan duh te min zawta. Ka ngawi reng. An mahniin an sawi ho hnuah a hmaa ka lo sawi thawi tawh kha ka u in a la hria nge ni?? Nov thla tawp ni 30 a innei turin minti ta hlauh. Zanah palai te an lo kala. Patea te nupa mai ni tawh loin, ka ni te pahnih pawh an pasal te ve ve nen an rawn lenga. Palai an lo dawngsawnga, an palai te lah kan hriatchian sa leh ka pa thian pa ngawih ngawih a ni a. Inpawh takin an sawi ho a. Inneih ni atana kan duh an sawi pawhin an pawm thlap. Palai te lo kal hmasak zawk atang khan kan vengchhungah hria an lo awm fur tawha. School a ka thawhpuite pawn an hre vek tawh bawk. 

Fanu neihchhun ka ni a, ka nu pawhin a tirah duh lo teh mah se engkimah min buaipui leh ta vek tho. Kan neih ang tawka a tha thei ang ber zel a duh a, ka thil chhawm tur erawh chu ka pa in mizo tih dan phung pangngai bak a phal loh avangin engmah uchuak tak a awm lo va. Chutichung chuan vengchhungah erawh ka chhawm tur chung changah sawi hat kan kai ta tho. 

"An neihin a tlin bawka, an thilchhawm tur reng a turu e.. A mipa lam te engvak anni si lo va, an la buai mai thei a ni" tih te, "nei tih vanga Mizo kalphung pel lutuka thuamchhawm han kentir tum reng reng. An mi pangngai viau emaw ka tia, rinaiin an lo pangngai lo. Mi hausa hian hautak lo va inneihna hi kalpui se, mi vantlang te chuan kan copy sup sup mai ang chu" Tih ang te hi a ri nawk maia. Tap hi chu kan tahpui thei maia, mi tuarna pawh kan tawm thei mai. Lawmte lawmpui erawh hi chu a lo har viau dawn anih hi.. 

Kan inneih ni a lo thlenga, kohhran leh khawtlangin min lawmpui em em maia. Mi pawh an tam. Kan khuaa inneihna awm tawhah chuan a pui ber pawl niin an sawi ve hial mai. 

"I haw pahin iskut rawn lam haw la,tukinah ka lo teuh a. Bai atan te in duh lawm ni? " ka nuin a rawn ti a. Kan inneih atangin thla liam tawhin kumthar kan chuangkai tawh. "Tunah iskut a la awm amaw? " ka ti he haw a. "Awm ang chu, dil bula mi kha  a rah tlai thei khawpa. Rawn lam kawi rawh" a rawn ti leh mawlh mawlh. 

Rinawma nen kan school ban hun a inang nangin pawlsawm ho extra class lakpui ka ngaia. Min rawn lam lo mai turin msgin ka hrilh a. Dar 4 leh a chanve-ah kan banga, thlasik lai a lo ni bawk si nen khua a lang tlai ruih tawh. 

"Nu, khaw nge Iskut chu? " ka ti lang langa. " Choka dawhkanah ka dah kha" Vawkin atangin a rawn ti a. Dawhkana polythena liana infun chu a ni tih ka hre thiam. Ka va laa, ka pi room lam panin ka khai a. "Pi, ka lo kawi zuaia, ka kal lehnghal mai dawn" a rooma lut loin kawngka bul atangin ka ti a. "Oooo, ngah nge i kal leh mai ang? Thingpui te min lum ang chu mawle a. I lo kal khat tehlul nen" a lo ti thuai. "A tlai tawh lutuk a, han muangchan leh chi pawh a ni tawh lo alawm. Zan inkhawm a ni bawk si" ka ti leha. "Dar 5 pawh a la ri em hleinem. Engatinge i va bang tlai ve? Khawiah nge in pa? " a ti leh duah. "Pawlsawm ho Extra class ka neihpui a. Thingpui chu lumsa i nei tawh lo mi? " ka ti thuai thuai. Ka rilru a hmanhmawh tawh em em mai. Engtinmah min lo ti dawn miah lo tih chu ka hre renga. Mahse, ka inthlahrung lo chuang lo. 

"Nei e. I lum ka in khat em a kan ti mai mai mawle. Zuk haw rawh, nang zawng min chhun dawn anih hi. Tunlai mo te an inthlahrun tawh loh nen, thil tulah pawh i inthlahrung nghal em em mai sia" a ti leh charh charh. 

Hmanhmawh takin ka haw thlaa, mo han nih ve takah chuan rin ang ngawt a lo nih loh zia hi nitin a chianga. Hmeichhia hi kan lo felin kan lo chhel ka ti thar bawk. Rinawma nu a fel em em a, a nau pawh a fel, inhrechiang sa tak kan lo ni bawk nen, ka inthlahrung ang tih an hlau a. A u zawk nupui ka nih angin min zah der thiam nghal em em bawk. Engkim maiah ka thu an ngaipawimawh thiam niin ka hria. Mahse an fel em em pawhin inthlahrun a na tho tho a. School kan ban tlai ni te hian in a haw ka huphurh em em zel. Kan chhungkaw khawsak dan phung inang lo lutuk erawh hrehawm tihchang ka ngah lo thei lo. Insiamrem lah ka insiamrem nasa ve bawk. Rinawma ber hian hrehawm ka tih a hlau thina, kan in a lo lutchhuak tam leh kan khawsak dan hre chiangtu a ni a. Min vengthawng leh lutuk hi achang chuan ka ning lek lek thina. Min inti thlahrung tu a ni letling fo. Engpawhnise, mo vannei tak chu ka ni reng reng e. 

Kan beisei angin nau kan pai ta mai lo. Nupa han nih chuan fa neih hi kan thupui em em mai a lo ni a. Chutichunga kum chanve aliam hnuah pawh ka la rai ta lo hi hrehawm ka ti ru ve tan a. Rinawma hnenah inentir mai a tha a tih leh tih loh ka zawta, "a la rei hleinem, kum em pawh a la nih loh hi" a ti liam mai mai. "Nau i la pai na nge? I va pai har em em ve, nei vat vat ula, in hulhar leh hma a nimai" Min ti bawng bawng tawk an awm thina. Min fiamna ngam deuh lahin "in pain a siam thiam lo aniang? " ti tawk te an awm a. Nui mai mai thin mah ila chhungril hi chuan, "nangni aiin rai tawh ila kan ti zawk, in sawi peih lutuk. Sawi tur inhriat loh chuan min be lo mai ru" tih mai ka chak thin. 

Kumkhat kan inneih hnuah kan inentir  ta a. Min han check chuan kan that ve ve thu min lo hrilh a. Kan la pai rih lo mai mai anih a ring a. Ka thlamuang ve ta deuh. 

Kan inentir atanga thla tam liam hmain ka thlabi pangngai ka zawh lo va. Ka lawm hman viau laiin ka period leh ta thut mai. Mahse mak takin nidang ang a ni lo. Ka kawng leh taibawr a na em em maia, ka period na pangngai anga damdawi ei a reh leh mai tura ka ngaih laiin a na tual tuala, nikhua ka hre ta mang lo va. Damdawiinah hmanhmawh takin ka nu te Motorin ka u leh ka nu nen min hruaia. Rinawma leh Rinawma nu an kal ve bawk. Min lo check zung zunga. "Ka pi, nau i chhiat anih hi" an lo ti ta mai. Rinawma'n ka kutah nghet takin a chelha. Keilah a hmaa engmah hre lo mah ni ila nau ka lo chhiat reng tih ka hriat takah chuan ka ui lutuka, ka tap ka tap ta mai. 

"Piang lo ngaiin kan tap lo ve upa-in an tih thin kha. Nangmah hi han dam tha phawt mai la, Pathian zarah a dang in la nei mai ang. Lungngai lutuk duh mah ta che" min ti a. 

Zan khat damdawiin a kan riah hnuah harsatna dang vak a awm loh avangin min chhuahtir leh maia. Kan thian te leh chhungte an lo leng laih laiha. Midang awm laia hrehawm ti hmel lantir ka duh loh avangin pangngai takin ka lo kawm hlawma. An haw hnuah erawh ka nguaia, ka lungngaia. Ka intiharh peih ngang lo a ni ber. Rinawma'n min hnem a, tawngkama inhnem vak thiam lo chi a ni ve a. Mahse min kuaha, ka bula a awm reng na chuan nasa takin min hnem ka ti lo thei lo. 

Hun a kal zela, damlo nasa ka ni lo bawka school pawh ka kal zawm leh ta thuaia. Aizawl lama ka hmelhriat, hmeichhe doctor tha tak mai ka biaa. "Thla thum hnuah intry leh thei reng ania. Beidawng reng reng suh" Tiin min rawn hnem a. Mihring pawh la ni lo, thisen hlawm mai a ni chungin ka ngaihtuah nasat leh ka ui nasa ting hi animai.

"Chemi, zanin chu in nupa-in rawn lengchho teh u. Thil sawi ho tur a awm? " ka pain a rawn ti a. Rinawma hnenah ka sawi  a. "Keipawh min lo bia alawm. Chawei khamah kan chho dawn nia" a ti a. Rinawma nu hnenah ka sawi chuan a hriat fuh mai loh avangin ring angreng deuh hian ka hrilha. A ri hriatna a chiang vak tawh lo va. Inentir tura kan tih lahin a duh ngai lo. "I van hrilh ring ve a" Rinawma'n a rawn ti a. "Um, a hre fuh mai thei lo va. Chuvang mawle" Bai chawk paha ka tih chuan ka bai chawh lai en loin amah Rinawma ka en a. A mitmeng danglam deuh chu nidangah ka la hmu ngai lo. "Thil dik lo a awm em ni? " Keimah bawkin ka ti nghala. "Awm nang, chaw kan la ei dawn na nge? " a ti a. 'Bai hi a hmin chuan kan ei thei animai"amah pawh en tawh loin ka ti tha ve mai bawk. 

Zanriah ei khamah ka nu te inah kan chho a. Vengkhat a awm, inhlat lem lo tak kan ni chung hian ka kal tam lo. School kal dawn hian kal pelh ngei ngei ngai a ni chungin ka lut thlazen chuang lo. Ka nuin min lo be nghal sawk sawka. Rinawma pawh a tirah khan  duh lo viau mah se tunah chuan engmah khatiang boruak kha a awm tawh lo. 

Chaw an lo ei kham chauh avangin thleng ka sengpuia, ka sil sak bawka. Kei ka awm tawh lo va, ka u in nupui a la nei bawk si lo. Ka tangkai viau lo thin nangin ka awm loh takah chuan ka nu hi buai thei tak a ni. 

Ka ni fanu leh a Pasal, u Manghaka te an lo kal ve a. Kan han thutkhawm chuan ka u nupui tur be tura palai angai tih ka pain a sawi ta a. Makpa te pahnih a tir dawn a lo ni. A bialnu hi hindi teacher a ni thina. Mahse a vanduaia, sawrkar na changtu Party an inthlak takah khan ban an nei nuala. Chung zingah chuan a tel ve hlauh maia. Tunah hian sawrkar hna thawk loin an chhungkaw ta, wholesale dawr a nghak thina. Ka u nen hian reife chu an Inkawp ve tawh. 

"U Manghaka a tel ve hlauh chu a tihzia hle mai. I ni tu emaw zawk zawk pasal zui angaih ka lo hlau deuha" Kan nupaa room a kan awm laiin a ti a. 'Ngati nge i hlauha? An kum atam tawha, zui an nuam zawk daih ang chu" ka ti ve a. "Nuam zawk dawn tho a. Mahse, makpa theuh theuh kan in senior hleih dawn lutuka, a young zawk chu lal loh a na dawn em mai" nui huk huk chungin a ti a. Ka nui ve bawk. 

Ka mut hnu lawkah a rawn mu ve a. "Inkhel ka en dawn i ti maw ka tia" ka lo ti a. "Ka en leh peih lo. An khel rei dawn em mai. Zingah rora chhut leh angai dawn bawk sia, a peihawm loh" a ti a. Chhang loin ka ngawi deuh vang vanga. Min rawn kuaha, "Thla thum a tling daih tawh sia, naute lam hi kan ngaihtuah leh tan dawn mi? In entir te i duh em? " min ti a. "Duh pawh ka hre lo. A thuhrimah kan ngaihtuah avanga neih theih pawh a ni hleinem a' ka ti hlak hlaka. " Ni chuang lo mah se tan lak deuh te pawh kan ngai ve thei a" nui chungin a ti a. Ka nui ve a. "Loan lak hi tum chi a ni angem? " ka ti leh daih. Min kuahna a thlaha. 

"Engatan maw? " a ti deuh hu. 

"Insak nan hian.. A hmun a rem tho a, laih vak te angai dawn lo va. Bathroom kan siamthat dawn tho tho chuan in hi khawih law law ila, Tam lutuk lo chu kan la dawn mi? " ka ti a. Min en vang vang hnuah, "ngai lo mai rawh se. Tihian kan ti ve bek bek anga, kan la sa ve thei mai ang. Hmanhmawha sak theih pawh a ni lo va. Kawng an zauhna tur hi an teh an teh a, kumin te chuan sum pawh kan dawng ve tawh maithei a. Kan dawng ta anih pawhin kan inhmun ngaiah hian a sakna tur chan kan la nei em tih te en a la ngai ang chu" a ti dam thlapa. Ka rilru a kawi deuh thuta. 

"Nupa kan ni tawha, ka hlawh pawh ka ta bik a ni chuang lo va. Loan la in in pawh chu sa ila a pawi em ni? Min en hrang nge? " ka ti deuh hmaka. 

"Khaia, chutiang zawngin ka sawi hleinem. Ka nau leh ka nu te nena cheng kan la nih hi. I hlawh chanve aia tam inchhungah i pe luta, I mamawh tam tak nangman i chan atangin i intum bawka. Chu chu a tawk rih. Ka nau hian nupui nei se inpuiah hian kan awm dawn em pawh a hriat hleinem. I sum lo sen a tul lo. Engpawhnise nupa kan nih vangin engkim kan intawm tawh tih ngawt kha a ni lo va. I hlawh neih tam hi ka neihchhan che pawh a ni lo va, hlawh pawh nei lo la ka nei dawn tho che a. Sum hi chu sawi fo loh a tha ania" a ti leh a. Min rawn kuaha, a awmah ka hmai ka phum kaka, kan ngawi dun ta vang vang. 

Thla a vei leh ta nual mai, thal hun nuam lo tak liamin fur ruahtui tla, khawcheng ninawm tak pawh kan hmangliam leh ta a. Thla tin mai hian ka rai ring mah ila rai tur awmin ka la awm leh ta reng reng lo. Kan inentir apiang lahin kan that thu zel kan dawnga. Kan inneihna kum 2 lai anih takah chuan bei a dawng ta lek lek. Kan nupa pawh inneih hlim leh kum khatna ang reng kha kan ni thei tawh bik lo va. Ngaiah kan innei chho ve tan chu a ni ta ber. 

Ka nu te lam ka chhuna, ka thau duh viau mai lehnghal a.Ka thau vangin nau pai ka harsat aniang ka ti a, zing tin khawvar hma ten exer la turin ka chhuaka, thui tak tak ka tlana. Tunah chuan thau pawh ka thau ta lo. Ka u te nupa in an fa hmasaber tur an pai meka. Ka pi chak lo tak chungin a la dam ve tawk tawk a. Room a chhuahsan meuh tawh lo. Ka u nupui Maremruati hi sumdawng chhungkua tihtakah sumdawn a thiam em em maia. Tunah chuan kan dawr pawh wholesale dawr lian takah an let tawha. Ka pa la thu peih tho mah se Maremruati zawkin a enkawl ta mah mah zawk. Ka pa nen an rilru a inhmu em em maia, zaidam lo ve tak chi leh awki no lo tak mai a ni a. Ka nu leh ka pi in mo ang mai kha anni chho tan der tawha. Kan in lama len ti nuamtu ber a ni chho ta thuai. 

"Vawiin chu ka ngaihtuah mai maia. Kan khuaah hian hardware dawr a la awm mumal si lo va. Siam ka chak riaua" mut naah Rinawma'n a ti a. "A tha dawn mawni le? Mahni khua aia khaw thenawm thil zawrh tha anga ngaihna hi an nei hlawm sia" ka ti a. "Ni ve tho.. Mahse siam ila chuan a zia viau tho chu ka ring asin" a la ti ta zel. "Khawiah nge kan siam anga? In luah tur pawh a awm dawn em ni? " ka ti leh a. "Zawn ve angai ang chu. Pu Huthanga te in khi an sa zo tepa. Dawr tur an tiin ka hria, an mahni hi chuan siam an tum lo vang. Buaipui tur an awm lo. Nakukah i pa biaktir la" a ti leh a. Pu Huthanga insak mek hi kan khuaa veng laili laia awm niin, kan dawr nen a inhlat lo. 

"Siam dawn ta ila engtin nge sum lam te? " ka tih chuan min rawn en a. "Hmanah khan insak nan loan lak kha i sawi a. Insak hi chu kawnglai tur vangin kan la sa thei lo zel chu ania. Dawr siamna tur chu i la mai dawn mawni ka ti.. I lak duh loh leh kan ser huan kan hralh mai ang chu" a ti ta a. 

"Aaa, thil neihsa hralh a tha lo.. " ka ti thuai. "Anih chuan loan i la dawn mi? " nui chung hian a ti a. "Tul i tih chuan ka la mai ang chu. Mahse, a pung tam viau ang" nui chung hian ka ti a. Min rawn bawh deuh titiha. . "Zanin atangin ka rul nghal ang che" nui put put chung hian a ti a. .. 

School banah ka pa te dawrah ka kala, ka pa hnenah hardware dawr siam kan rilruk thu ka sawia. Pu Huthanga insak mek min biaksak tura ka tih chuan "amah Lalroma chuan bia se la, biaksak kher angai hleinem.. A thuhrimin inva hausa deuh ve a" nui huau huau chung hian a ti a. "Aaa, nangman min tihsak ang chu ka ti" ka tih chuan a nuih a za nasa mai. "Amah pawh hi a awm em mawni le? " Ti chungin a thlek dak daka. "Ee, saw a awm alawm. Ka va bia ange" a ti a. A chhuak ta vut. Maremruati nen kan lo titi a. Customer an awm reng nangin hnathawk chhawr pakhat an nei a. A buaipui hneh viau.. 

"I u lah hi a ngaih a sam sia, ka pa ang chiah hi.. A tawng duh lo si, han bia ila, a hre reng emaw tih laiin a lo hre lo va" a ti hlak hlaka. " A tihdan ziah alawm. Ka ngei thei lutuk" ka ti ve a. "A ngeiawm alawm, ka nu hian a vin leh nghek thina" nui chungin a ti a. "In pa chuan a ngaihtuahchhuak tha khawp mai. Hetiang khaw lian ve riang ruangah hardware dawr awm lo hi a awm lo riau.. A hlawk em em ang" ati zui leh a. " Nia, mahse loan lak te kan ngai anga. Loan lo te chuan engtin nge kan tih ang? Ka lak duh loh vang ni loin ka chak vak lo" ka ti a. . " Aaa, I ngaihtuah hah mai mai anih kha. In tluang ang. Duh leh Aizawla ka thiannu te ka lo zawhsak ang che u. Anni khu an liana, an bungraw lak dan te hre chiang ve phawt la" a ti leh mawlh mawlh. 

Zanah Rinawma hnenah ka pa leh pu Huthanga inbiakna ka hrilha. " Chuti chu a beiseiawm anih chu.. Loan chu buaipui a harsa angem? "a ti a. A phur bawk aniang a hmelah pawh alanga. " Ka u ka bia anga. Harsat pawh ka ring lo. An mahni Bank-ah tho tur ania" ka ti a. Maremruati nena kan thilsawi te pawh ka hrilh ve bawk. 

"Nang kher ka nei che hi chu ka vannei ngawt mai. Engkimah min support zela. Kei aiin rem i hriaa, hmelhriat i ngah bakah khawpuia awm thang tih takah thil han tihdan tur i hre zel bawk si" min kuah chungin a ti a. "Keipawh ka vannei lo bik hleinem. Nang aia ka nihna ang anga min pawmthiam an awm thei lo vang. Ka lawm daih zawk.Mahse, naute ber hi" zuai deuh tak hian a ti a. Ka khabeah a dawma, amah en thei turin min kuaidak a, " Fa hi ka awt ngei a, mahse fa lo vanga then che ka tum lo. Kan nei anih leh a lawmawm a, kan nei ta lo anih pawhin Pathian remruat animai. In ngaihtuah hah reng reng suh " nghet charh hian a ti a. Ka rilru no em em lai a lo ni nen, ka mittui a parawl teuh mai. 

"Nu-i, hmanhmawh ve la… " Pawn atanga Rinawma'n nin hmel taka min tih ri ka hriaa. "Ka lo kal" tiin ka chhang leta. Ka bag lak pahin hmanhmawh tak hian ka tlanchhuaka,kawngka ka kalh fel nghal sawk sawk.

"I va hmanhmawh lo angreng si ve" min lo ti nghala. "Hmanhmawh e.. Kal mai hi a har thin anih hi. Bawihte, a hmaah i chuang duh em? " ka tih zawm zat. "Duh lo' tih pahin a lu a thing nar nar. 

Kan inneih atangin kum 7 lai a liam ve reng tawh mai. Ka rilru a beidawn fe hnu, kan inneih atanga kum li naah ka beisei ngam tawh mang loh laiin Bawihtea hi ka pai ve hlawl maia. Tunah hian kum thumna a hmang ve mek a. Kan nun pawh a inthlakdanglam nasa ta.. Kan khaw high school a thawk tawh loin thla hmasa lawk khan District capital pakhatah min sawn a. Vawiin hian min sawnna hmuna awm turin kan kal mek a ni. Rinawma'n a duh ang ngeiin Hardware dawr a siama. A hlawhtling tihngam a ni tawh. Nikum hmasa lawkah kawng zauhna tur atana an ram an laksak hoin pawisa an dawnga. Kan awmna lai an nekchhiat tam em avangin hmun dangah inhmun kan lei a. Kan sa nghala, Rinawma nau mipa in nupui nei tawhin a nupui hi kan khaw bul lawk mi, a nu nen chauha khawsa annih avangin a nupui te in lamah a awm phei a. Rinawma nu te nen kan awm ho ta zel. Compensation an dawn hi an unauin zat leh zatin an insem thlapa. Pawisa vanga buaina an nei lo. Ka awmna tur lamah Rinawma'n min thlah angaia, thui tak han zinpui atan chuan ka nu erawh kal ve chi a ni lo va. Rinawma nau te bulah kan zinchhung chu a lo awm dawna, nizan lamah an rawn hruai tawh. Rinawma'n min awmpui a duh viau nangin eizawnna hranpa kalpui anih tawh avangin awm ve ngawt chi a ni lo va. Ka pa cousin te inhnuai luah tur ka ni a. Ka ngaihtuahawm lo ang tiin ka hnem ve bawk. 

Ni 3 min awmpui hnuah min hawsana, ka ni te chhungkuain Bawihtea an duh em em maia, a pa ngai lutuk mai anih avangin a pa tel lo a awm ka huphurha. Mahse, inchungten an ti vel peih bawka lunglen pawh a hre mang lo va. A pain a rawn biak pawhin a be rei peih thin lo. Karkhat vel kan awm hran hnuah ka niin tleirawl fel deuh mai lang kal tur min hmuhsaka, thla khat hnuah awmchilh turin kan inbe rema. Bawihtea ngainat zawng tak mai a lo ni hlauh maia. School ka kalsan pawhin ka ngaihtuah lutuk ta lo. 

"Sunday rawn hman phei ka duh viaua, mahse intlawh tawn prog kan nei sia, ka lo phei thei dawn lo va. Kar laklawhah ka lo phei mai dawn mawni? " Rinawma'n a rawn ti a. Kumin hi KTP ah a leader kum a ni a. YMA lamah leh Sport -ah a inhmang bawka, Dawr nen a buai ve thei viau. "Ooo, lo phei kher angai hleinem, Thlathar mai School chawlh a ni tawha. Kan lo haw tep tawh tho a" ka ti ve a. "In ngaihawm ve tawh a, min ngai lo viau mah u la" a rawn tih chuan ka nui a. "Kan ngai che alawm. Inngaih viau pawh hi a hrehawm mai mai a, kan ngai lo der che anih hi" ka ti leta. A nui huk huk. 

School kal hlanin Bawihtea leh kan nula an lo in awm a. School thil pawimawh ti a kan chhuah naah tum loh deuhin u Davida ka hmu hlawl mai. "Zari, ekhai.. Kan va inhmu khat em em ve. Eng nge helam lamah te" a ti nghal thuai thuaia. Tunhma ai khan a lo thau ve hret tawha, thau chhia chu a ni chuang lo va. A lang puitling lehzual ta. 

"Hetah min sawn alawm. Nang zawk pawh chu engtizia nge?" ka ti ve chul mai. "Thla hmasa khan min rawn sawn ve alawm. In nupain em ni in awm? " a ti leh a. Ka fapa nen kan awm thu leh Rinawma'n Hardware dawr a neih tawh thu vel ka hrilh a. "I fapa chu ka la rawn hmu ve ang. Quarter lamah te rawn leng la" a ti ve bawk. "Nia, la leng ang. I nupui fanau te nen em ni in awm? " ka tih chuan za vak lo hian a nui a. "Nupui ka la nei hleinem" a ti ta a.. Mak ka ti ngang mai. "Chuti law? Tinge? " ka'n ti ngawt peka. "Min duh ta si lo va, tihian ka awm ta vel mai mai" nui chung hian a ti leh maia. 

"Sir, kan hman tawh e aw" Nu upa lam pakhatin a rawn tih chuan "ka kal ange. Eee.. I number ngai em ni i la hman? " a ti leh riha. Ka bu nghat. Ka phone ka thlak hma kha chuan a number ka save reng thina, ka phone ka thlak hnuah a number a bo ta a. Kan inbe zui ngai ta lo bawk nen a number ka nei lo tih pawh ka ngaihtuah zui chuang tawh lo.. 

"In inhria law? " Tiin ka kalpui pain min zawt a. "Aw, hria e.. Kan khuaah a rawn awm thin alawm" ka ti a. "Anih tak chu. Kan thenawmpa hi supply a thawk ania. A sawi dan chuan nupui neih tuma an inbuatsaih laiin a hmeichhia zawk a boral a ni awm e. Officer smart leh nelawm bawk si a tia. A fak tak tak ania" a ti ta a. Ka hawi phawk ngang mai. 

In a ka haw hnuah Thangzeli ka biaa. U Davida nen kan inhmuh thu leh a nupui tur a thi tih te ka hrilh a, mak a lo ti ve nasa mai. "Aman a hrilh che em ni? " a rawn ti he haw a. " Hrilh lo ve. Kan thawhpuipa in a lo hriaa, kei lah pek chuan i nupui fanau te nen em ni in awm ka ti peka. Nui chungin nupui a la nei lo tih chu a sawi tho nangin ka hrehawm vek thei" ka ti mawlh mawlh. 

"Ka van khawngaih eee.. A fel tehlul nen, a van vanduai tak" a rawn ti ve bawk. KTP intlawhtawn naah a kal ve dawn leh dawn loh ka zawta, "kal ve dawn e.. Kumin bak chu ka KTP peih vak tawh lo maitheia, kal ve hram ka duh" a rawn ti a, "Nia, pasal tur tha deuh pawh i hmuchhuak nawlh maithei ania. Ka ten ti mai mai rual i ni tawh lo ania aw" fiamthu titak hian ka ti let ve a. "Pasal nei ho hi han awhawm deuh ula chuan ka nei ang mawle. In awhawm lo ve em a ni" fiamthu bawkin a rawn ti ve bawk. 

Zana Rinawma nen kan inbiakin u Davida nen kan inhmuh thu leh a vanduai dan te ka hrilh leh a. "A va khawngaihthlak ve mawle. Mahse, khaw khata in han awm ho leh tur chu ka duh lo deuh, ka awm ve mang bawk si lo" a rawn ti a. "I ho mai mai e a" ka ti deuh hmak. "Ho lem em ni? A duh theih em che kha" a rawn ti leh talha. " Thil ho mai mai hi sawi thin lo teh, I mu dawn tawh em ni? "ka ti ta daih. " Ka mu sa reng tawh zawka. Mahse, Game te ka la khel leh te te ang" a rawn ti a. " Khel nasa lutuk lo la, I mit khan a tuar thin si" Ka tih chuan nin hmel deuh tak hian, "ka khel nasa lo"a rawn ti deuh hmuk. Thil dang kan sawi leh hnuah kan in mangtha ta a.

U Davida ka hmuh thu ka hrilh kher kher kha pawi ka ti leh hnuhnawh a, a chhan pawh mi min hriatpui hauh loh Rinawma hian mizia tha lo lam a nei ve a. Chu chu uchuak taka thikthuchhia a nihna hi a ni. A fing em a, a inthup thei a, khati khawpa Inkawm nasa thin kha ni mah ila kan inneih hnuah chiah keipawn a thikthuchhiat dan rapthlak lutuk hi ka hre ve chauha. Kan thiante pawh thik loh mang a nei lo hial. Rinpuia leh Ruatmawia te pawh a thik duh zel a. Ama nau ngei ngei pawh "kei aiin i kawmngeih, I ngaihsak" Ti mai maiin nileng lenga min biak loh phah nana hman chang te pawh a nei hial zel. Amah hi Pa te chhe lo tak leh hmel pawh chhe lo tak a ni a. Mi kawm thiam chi a lo ni bawk nen KTP huangchhung angah pawh nula leh tlangvalte ngainat a hlawh em em a, kawm lah an kawmngeih. Thik duh chuan thik mai awl tak tur chi, nupui tana mit tikham lek lek thei pawh a awm fo va. Mahse, amah hi mihring friendly lutuk anih avangin thik tur zawngin ngaihtuahna ka hmang duh ngai lo. 

Thla thar kan chuangkaia, Second term exam kan zo va, karkhat zen zawn school chawlh kan neih avangin haw turin kan inbuatsaiha, ka nu a dam that loh avangin min rawn hruai tum vek tawh Rinawma'n a rawn thulha. Bawihtea hi min chhuna, Motor a rui nasa thei em em maia. Keilah rui bawk. Mi zinga zin ka huphurh ngang mai. Zanah damdawi ka ei lawka, Bawihtea pawh ka ei tir ve bawk. 

Vanneihthlak deuh maiin Bawihtea a damdawi ei a thawk tha a, a rui lo hlauh maia. Kei chu luak thei chiah si lo, a hrehawm tawk velin ka rui leh ta hram tho. Rinawma'n min ngaihtuah avangin min rawn call sek maia, min ngaihtuah vang a ni tih hre tho mah ila ka ning lek lek mai. 

In kan thlen chuan chaw pawh ei loin ka mu ta vang vang. Bawihtea a pain a buaipui theia, thildang ka ngaihtuah peih rih lo. 

"Ka nuin naktuk tlaiah kan chhungin chawei turin min sawma, a remchang em? Zan lamah tihtur innei em? " Tiin Rinawma ka zawta. Min chhan loh avangin ka va en a. A beng hnawh tutin Game a lo khela, ka tawng a hre hauh lo tih ka hre thiam nghal. 

A hmaah ka va din takah chuan min rawn en a, a earphone lehlam a lathla nghala. "Min bia mi? " a ti deuh hu a. "Bia e.. Ka nuin naktuk tlaiah kan chhungkuain chawei turin min sawma. Zan lam prog i nei em ka ti" ka ti nawn leh a. "Neih pawh ka hre lo, kan ei dawn nia" tih pahin a earphone a vuah lehnghala. Kalsawn loin ka en deuh renga, min rawn en leh pahin a mitmengin zawhna min zawta.. "Engmah a ni lo" tih pahin ka lu ka thinga. Ka kalsan ta a. Engmah a ni lo ti mah ila ka tawt up up tho. Kumin chho atangin Game khelh a chinga, atirah chuan a chintawk a hre viaua, mahse tun tum ka haw zet chu a lungawithlak ta lo. Kohhran leh khawtlanga inhmang tihtakah zan awl a nei mang lo va.Chhunah lah dawrah a awm nileng a, Zan awl a neih chhunah pawh a fapa nena han infiam emaw kei nena inkawmna hun pawh awm loin Game ringawt a buaipuia, kan mut hnu feah te a rawn mu a, achang phei chuan zan laia ka harh hian a lo la khel thin. "I khel lutuk deuh lo maw? "ka tih lah chuan a teu hlur zel a, " Chin tawk hre lo rual ka ni em ni? Hunawl ka neih bakin ka khel lo" a ti a. Inhauh buai ai chuan tiin ngawi zawkah ka tang leh nge nge zel. 

Zingah eirawng ka bawla, naktuk mai hi kan kal leh hun a ni tawha, tlai lamah ka nu te in a chawei tum kan ni bawk nen, tukthuan Rinawma nau te chhungkuain an rawn ei dawna. Nulat laia tlaw deuh si kha mahni ko a a tlak takah chuan eirawngbawl te pawh ka lo thiam ve chho maia, bai phei chu ka siam thiam ta viaua. Fak pawh ka hlawh ve ta fo mai. 

"Bawihte, phone ka lo hmang lawk dawn em ni?" Bawihtea hnenah ka ti a. Min rawn en haa, phone ka laksak chuan battery a lo ti low vek mai chu niin. Current a awm lo zui lehnghal bawk nen, mi call na khawp pawh a awm tawh lo. Ka nu buhfaitham khawnin a chhuak a, phone a keng daih bawk si.. Kan roomah ka va luta, Rinawma phone lukham bula a dah ka laa, a lock ka hawng chauh tihin a rawn harha. 

"Eng nge a? " a rawn ti a. "Bawihtea'n ka phone a lo khawih low vek a, Hriati biak lawk ka ngaia. Ka thil chah hi an rawn theihnghilh ka hlau deuha" Hriati number zawn pahin ka ti a. Ka rin loh deuh mai hian phone min rawn phihthlaksaka, "Ka thil download lai i tibuai vek lo maw?i hman dawn chuan min hrilh hmasa ta che, nizanah net a chhia a download a har tehreng nen" thinrim takin a ti ta hmuk hmuk mai. 

"Ooo, I download tih pawh ka lo hmu hleinem, lock ka hawn pawhin engmah a awm loh kha" ka ti ve hlara. "Chung te ngaihtuah la Zari i ni nang" a ti leh kher. Ka sa ve nghal phata, mahse ka tawng hmain miin an rawn call a. He deuh hlekin a phone screen ka hmu thei a, ka hmuh theih loh tur zawngin leksawn mah se a lo call tu chu “Miss C” tih a ni tih ka hmu hman. Rinawma'n khum atanga thawh pahin min biak laia a awki nena danglam tak hian "Hello " a ti a. Room atanga a kalchhuak chu ngaihdan ni lo em em in ka en zui ta reng mai. 

Ka din ren rawn hnuah ka chhuak phei ve a. Thutthlengah Bawihtea nen an lo thu duna, phone a biak hnenah "Ka download zo tepa, mahse ka phone an lo khawiha, a tir atangin tih leh angaia. Vawiin chuan ka zo hman ang. Ka zawh hma chu lo khel lo mai rawh" a lo ti mek. Ngawirengin chokaah ka phei a. Ka nu a lo haw zuia. Ka nu hmuha lungawi lo anga lan duh loin a phone hman ka lo dil a. Hriati ka biaa, ka thil chah a lo ken leh ken loh ka zawh chuan a lo ken thu a rawn sawi a. "Hei kan lo chhuak deuh chiaha, sunday school a awm lo bawka kan tia, in inkhawm kher loh pawhin a pawi lo ang kan ti ania. U Mama kha chu a inkhawm hman tho ang" a rawn ti mawlh mawlh. 

An rawn thlen chuan naupang pali an awm ta bawka, kan ri ta le lu mai. Ka thinrim la reh hauh lo mah se engmah ka tilang duh lo va. Anni hian min ti thinrim lo va, min ti thinrim tu chu Rinawma a ni a. Midang hrehawmna siam khawpa lo tum ka duh hauh lo. 

Midang awm lai anih loh chuan ka be ta reng reng lo va. A inkhawm bana a lo haw chuan Thangzeli leh Ruatmawia nen an rawn haw a. Kan titi khawm mam mam laia a khat tawka a phone a khawih chu ka hmuh hmaih hauh lo. Tun hma atanga phone khawih nuam ti em em chi a ni tih ka hai lo. Rinhlelhna pawh ka nei ngai lo. Vawiin pawh hian a thil download lai ka tihbuai vanga lungawi lo mai kha nise ka rilru a kal sualin ka ring lo. Ka inthiamlo hial zawk ang. Mahse, a hmeichhe biak dan kha ngaihzawng biakin a biaa, nidang ang mai maiin ka namnul thei ta hauh lo chu a nih hi..