MAMA 1-15(Completed)

 Chapter - 1

“Vawiinah a lo let dawn si,engtin nge kan lo sawipui ang?” Hmeichhe awin a ti a.Ka pi,ka awmna nu tawngri a ni tih ka hria.Kalsawn leh mai loin ka dinna ngaiah ka ding renga,mi tawng lo ngaihthlak ruk hi mawlna chikhat a ni tih hre reng mah ila ka kalsawn thei lo.Ka dinna hmunah ka kein zung a kaih emaw tih mai turin ka ding tlat.A chhan lah ka hre hek lo. 

‘Tihdan vak a awm lo.A hriatsa reng kha kan sawi nawn leh dawn tihna mai a ni’ mipa awin a ti hluka,Pu aw a nita thung.Tu chungchang nge an sawi ka hre lo.

‘Chu pawh nise,harsa ve deuh asin? A lo dawngsawng thiam lo viau thei a ‘ Pi in a ti leh chuan‘A dawngsawng thiam loh leh a thu animai.Engmah thup mawi angai lo.A thuhrimin tunah a hre thar dawn chauh pawh a ni hleinem,engkim a hriaa,amah ngeiin a hnawtchhuak anih kha.Lo phili chuk zel lo teh’ Puin a ti leh hluk hluk.

Nurse ka zir zawh hlim te, inhlawhna tur ka zawn tan laiin anni hian Home Nurse tur an mamawh tih chanchinbuah an rawn chhuah a.Hlawh an rawn tarlan a tha lutuka,ka hmusual emaw ka ti hial.Ka va be pawp nghala.An hnathawktu pakhatin min lo dawngsawnga,atuka kal turin min rawn ti nghal maia.An in ka va kal hnuah hlawh an tihsan chhan ka hrethiam nghal a.An fanu,kum 22 mi,zeng enkawl tu tur atan an mamawh a lo ni a.Inah awmchilh an duh bawk.Chhungkaw Member Pali anni a.Mahse, an fapa erawh a awm ve lo thung.An pa ber hi kum 60 bawr vel niin annu pawh chutiang rual vel bawr tho chu a ni ve bawk. 

Ka thiannu ka sawipui chuan awmchilh ngai chu hnar mai turin min ti a.A sawi dik lo miah lo,hnathawhna te nen in awmchilh hi chu thilnuam a ni dawn lo tih ka hre ve tho. Ka pa ka rawn leh chuan ka duhthlan naah a daha.Ka ngaihtuah vang vang-in unau zinga upa ber ka ni a,harsa em em ni lo mah ila tuna hna hi ka thawh chuan Private Hospitala ka hna hmuh aiin hlawh a tha zawk dawna.Sawrkara luh lah a beiseiawm rih si lo.Hlawh ka neih vat chuan keimah ka intum theih mai bakah ka naute pahnih zirna pawh engemawchen ka pa ka chhawk thei ang. Ka awmchilh anih chuan ei leh in ka ngaihtuah angai dawn lo bawka. A hrehawm lutuk loh ringin ka rilru ka siamfela,ka lut ta nge nge.

Tunah chuan thlahnih an bulah ka khawsa ve ta,an chhungkaw chungchang hriatbelh ka la nei tam lo.Dawr lian pui pui pahnih neiin an nu ber hi Carring Contractor che thei zet a ni bawka.An dawr erawh pu in a enkawl vek.Awmpui,nu upa lam langa kal leh tleirawlkum 18 vel bawr,hnamdang awmchilh a awm bawka.Driver,lang kal 2 leh in a awmchilh 1 an nei a.Driver awmchilhtu ber hi Pi nen an inzui deuh bera,inchhung mamawhah an hmang a.Lang kalte erawh Dawr lamah Pu rualin an kal thung.Kei ka awm bawka,kei erawh chuan an fanu ka enkawl chawt bak chu inchhung chet ka tihpui ve meuh lo va, ka  chhuak ngai mang lo bawk.

Pi ber hi nu hmeltha leh invawng tak,Nu thinchhia leh thawmna, a duh naah chuan nu fel tak ni lawi si a ni a. Mahse, tawngkam duh chhe  zet a ni tih sawitel loh a uiawm..An awmpui,u Dini’n a anchhe lutuk leh a tawngkam na  thin lutuk vangin tu mah an awmrei peih lo tih a sawi zauh tawh.Mahse,nu rilru chhia a ni lo va,a ang ngaihpawimawh loh theih chuan thildangah hrawn a hrehawm lem loh a ti bawk.Ka la awmrei viau lo nangin a sawi hi ka pawm thlap.Pu ber erawh pa tawngtam lo leh nui khat tak mai a ni a.Pi ang hlawk hlawk pawh engahmah angai lo emaw tihmai turin a thlir vel mai mai niin ka hre thin. Hnamdang an awmpui hi ka awm ve hma thlaa lut chauh a ni a,tawng lamah harsatna a nei bawk nen Pi hian a vin nasa ta thin lutuka, a chiai lutuk luatah thil a tisual rem rum mai zela, ka lo awm hnaih lai anih chuan a tih ai ka tihsak fo mai. 

‘Tete…Enge i tih a?” ka hnung lam atanga hmeichhe awin a rawn tih rualin ka hawinghal zawka.  Mak tih hmel zeta min en chungin U Dini a lo ding renga,,puanchhia niawm tak a keng bawk.

‘Aaaa,eng lo ania.Pi ka be lawk dawn mawni ka tia,mahse angai leh lo a’ tiin ka  rilrua lo lang hmasa ber ka sawi ve ngawt.

‘Julie-in a ko che a..’ ka chhanna pawh ngaihven zui chuang lem loin a ti leh daih.

Julie room ka pan lai chuan ka thilhriat kha eng chungchang nge anih ang ka ngaihtuah a,ka hrethiam bau lo.An fapa a lo haw dawn nge ni ang? Min hrilh danin an fapa hi hman deuhah MCS a inziak tlinga,Serchhipah a awm mek an ti a.Mahse,nupui a neih awm ka hre si lo.An chhungkaw member pawh 4 an ti anih kha.Anih chuan nupui a nei lo tihna animai. Ka ngaihtuahna tul lo zet vangin ka lu ka thing a.Helaiah hian chhungkaw mi  ni loin an hnathawk ka ni a,an chhungkaw thil ka lo ngaihven tur a awm lo ve. 

‘Kha kha min lo laknghal teh’ ka luh rualin Julie-in min lo ti a. A kawhna lam ka en chuan  a thilduh ka hmu nghala. Ka pek chuan Nidang ang bawkin a tum hmak. Ka awmtirh atangin a nui hmel ka la hmu miah lo,a thinchhe em em a, a damdawi a ei duh lo fo bawk nen enkawl nuam tak a ni lo. 

‘Vawiinah ka u a lo haw dawna’ khum ka siam mawlh mawlh laiin a ti nghat. Pi leh Pu thilsawi ka ngaihtuahchhuak nghal zawk.

‘Anih chu mawle..A hlimawm ngawt ang’ nui chungin ka ti a. 

‘Engvangin maw a hlim awm ang?’ a ti deuh hmak. Ka melh zauha,a hmel tur zetah chuan lawm lohna a nei emaw tihmai tur a ni. 

‘I u a lo haw dawn vangin mawle,unaua awmkhawm chu thildang zawng zawng aiin a nuam zawk alawm’ tawngsual hlau takin ka ti a. 

‘Nia,hmanah chuan chutiang chu a ni thin’ a ti a. Chhungril atanga na lutuk tuar ang maiin a aw a khur titih.

‘I tha em?” ka ti vat.

‘Engvangin nge ka that anga? Ka landanah hian tha hmel ka pu em ni?” a ti vak chu ka  phu zawk.

‘Sorry…’ ka ti thuai, sana ka en a,Dar 9 a ri tep tawh.

‘I thil eitur ka va la ang,a lo hun reng tawh anih hi’ ka tih zawm leha.

‘Engmah ka ei duh lo,rawn la duh suh’ a ti ram hmak. A tihfo dan a ni a,a tawpah chuan a ei leh nge nge zel bawk.

‘A tha alawm’din mar pahin ka ti a.

‘Nidang angin min tihluih tum miah suh,ka ei duh lo ka tih chuan ka ei duh lo animai’ luhlul hmel zetin a ti leh hlar mai.Ka thle zauha.Hei pawh nidang nen danglamna a awm chuang lo tih ka rilruah a lo lut nghal zat thung.

Chokaah eitur la turin ka va luta,u Dini’n Jhanvi a lo hau mawlh mawlh.Engemaw tak a tisual leh chu a ni phawt ang.

‘Chaw hi kan ei dawn mi?” min rawn en pahin a ti a.

‘Julie ka va pe hmasa lawk ang,a pawi em?” Ka tih chuan‘Aih,pawi lo.Pi leh Pu an kal tawh tho a,hmanhmawhthlak engmah a awm lo.Bakah, Nau-i hian Pi pawi a sawi lehpeka,ka’n lo chingfel ange’ a ti hlak hlak.Ani pawh hi Pi nen an inhrawn rei tawh lutuka,an mizia a inhlat vak lo nge a pianpui zia ve reng zWk ni, a vin ve hler hlawr viau..

‘Ka sawi kha i hre na nge?”room a ka luh rual rualin min lo ti a.A vin ngang mai bawk. Engmah hre lo ang hmakin a eitur ka ken luh ho ka chhawp fela.A thil eitur kan chhawp thinna dawhkan nen a hmaah ka nawr pheia.Mahse, ka dah ka rualin a rawn beng baw nghal vek.Soup sa lutukin ka kut a rawn leih chuan ka tum loh tawpin ka rak thawt.

‘Tu nge ni a i inhriat a? ka ei duh lo ka ti a ni lawmni?” a ti tuar maia, Nidang nen a in ang ta lo.

‘Engemaw tal i ei loh chuan i Damdawi hi a chak hlawma,I pum lam tan a tha lo,bakah i thisen a ti chak lo ve theia’ ka theihtawpa pangngaiin ka ti a. A thil eitur baw nuaih mai chu ka en a,ka tawngkam dam mah se chhungrilah ka  thin a rim et et thung.

‘I zak lo mang e,I lo awmtirh atangin thu ber emaw i inti a, a teuh lo.Nang ang tho hian Nurse tha deuh deuh ka thehchhuak tawh.Vawiin tlaiah i chhuak ngei ngei ang’ a ti leh hlawih hlawih. Ka chapona a rawn chhuaka,‘Enkawl che hi ka chak lo,ka bang’ tihtumin ka ang hman zuaua.Mahse, hnung lama thawm a rawn awm takah chuan ka chip lehnghal hmak.

‘Ehe!! Enge thlenga?” U Dini’n a rawn ti chul.

‘U Din,ka pa a kal tawh em? He nu hi ka duh lo,ban rawhse’ a lo ti nghal hmawk hmawk. U Dini’n min rawn en a,a mit meiin zawhna min zawta,ka then lui sak ringawt.Tiang em em hian tu man min la hmusit ngai nek lo.Min ban hmain ka bang ngei ngei ang,hrep tak hian a..

Chokaah ka kut kang ka buaipuia, Jhanvi leh U Dini tihngaihna hre lo takin ka bulah an lo tei ve sek bawk. Ka naupanlai atangin kang ka haw em em a,bel sa a ka indeh palh pawn a durh ngei ngeia,reife a ser zui ziah bawk.

‘A tawng liam mai maiah ngai rawh,bakah Julie hi hetiang em em hian a danglam ta maia.A mak ka ti tawp thei lo’ a ti halh.Sawi ve tur hre loin ka bu liam satliah ringawt.Tun hmain eng mizia nge a neih pawh ka hre lo va.Ka hriat ve chinah chuan a thinchhe em em a,hlimni a nei lo tih zawng a nimai..

‘A dinhmun hi pawmthiam a harsa bawk a ni.Jhanvi,inchungah insuk han pho la,fimkhur ang che aw” a tihzawm zat. Ka kut chung lam sen tan mai chu ka en a,ka lung a awi ngang lo.

‘Piantirh atanga zeng chu nise tiang lutuk hi chuan a khirh lo ang.Mahse,nula tantir,hmeltha leh harhvang.Lar tak ni bawk tan chuan pawmthiam a harsat tur zia hi ka ngaihtuah fo mai,tawngkam chhe tak taka min ankhum tum pawh hian chu zawk chu ka inhnehtir hram hram zel’ reife kan ngawih hnuah a ti a. Ka bu nghat,hei hi chu Piin min hrilh tawh,ka thawhhlim khan an College ho intihhlimna hmunah a tlusual tiin a sawi anih kha..

‘Engtik atangin nge hetah i thawh tawh?” ka ti sapa.

‘An naupanlai ti ila,Hmingthana hi chu kum 15 a ni tawha,Julie hi kum 7 a ni thunga’ a ti a. Anih chuan tunah Julie kum 22 a ni tawha,a thawkrei thawkhat tawh.Engkim mai ama ta anga a lo en pawh a thiam awm viau e.

‘Anih chu…’ ka ti leh ringawt a.Sawi belh viau tur pawh ka hre chuang lo.Ka rilru a buaia,Pu in a rawn call hun ka nghak ang nge ka lo chhuak fel ang tih ka ngaihtuaha.Tunah ka chhuak anih chuan thla hmasa hlawh ka la la lo va,ka chan ngawt thei lo.Mahse, min ban tih min hrilh lai ngaihthlak erawh ka theih ka ring lawi si lo.

‘Julie hi chu naupang tihnuam leh hlim thei tak mai a ni thina,mahse Hmingthana erawh chu luhlul,ngeng bawk si a nithung,an mizia a inletling thawk animai. Hmingthana hi ngeng deuh thin mah se kei chuan ka ngaina ve ve,Hmingthana pawh a tawng duh lo tih animaia,a rilru a tha.A tawng duh loh hi chu a pa mizia a chhun vang a ni tel bawk a.Apa ang chiahin a thil phala,khawngaihna angah em em bawka’ a ti leh siam siam,a sawi zawnga a nui deuh sang chuan an chanchin sawi nuam a tihzia a ti lang thei hialin ka hria.

‘Pu-in engtikah nge a lo call ang le?” ka ti leh daih,ka kut ka chhem hauh hauha. 

‘Ngatinge a lo call anga?” maktih hmel zetin a ti hu.

‘Julie khan min banturin a pa a ti dawna’ka ti thuai. 

‘Awi,mawl lo teh,a ti dawn lo..Bakah pu chuan a ban dawn lo che tih ka hria.Eng lo ania,sawi leh kher lo la.Nang chiah hi thlahnih awm tling i awm aw’ a ti ta sa sa a.Midang awm leh awm loh enkualin a hawi vat vat bawk.Kei erawh rapthlak ti ru zetin ka chil ka lem thei hram.

‘Anih chuan Julie enkawltu engzat nge bang tawh ang?” ka ti hap..

’10 chuang fe,achang chuan keiman ka enkawl maia,I lo luh hma pawh khan pakhat chu nikhat lek a lo kala.A lo kal zawm lo,chung zawng zawng chhiartel chuan an vaiin 20 an tling zan zan’ a ti leh a. Ka hrawk ro lutuk tih zia awm tumin ka chil ka lem leha,ka tuarchhuak zo bik pawn ka ring lo ve.

‘Achang chuan a harsa ve lutuka’ ka tita thlawt.

‘Ka ring,kei pawh ka ning thut thina,mahse ka sawi tawh kha.A natna vang a ni a,ka dawhthei zel’ a ti leh a.Ka bu leh nghat ringawt. Hmingthana nupui neih leh neih loh zawh ka tum zuaua,mahse ka thulh leh ta zawk.Ka lo buaina tur thil a ni lo.

Ka Room ka pana,Khumah ka  ngaihtuahna  kawmin ka thu a,chhuahsan mai ka chak rualin ka chhuahsan anih chuan tiang khawpa enkawl harsa hi tu man an enkawl thei lo ang.Kei aia kum tlemte chauha naupang a ni a,nui ngai lo mah se a nun chhungril a khawhar tih ka hria..Thla hnih lek ka la enkawl hman chungin lainatna thuk tak ka lo nei hman der chu niin,hrep tak hian..Mi khawngaih ka ching hi ka sim thei lo.Buaina lah min thlen tam tawh.

‘Ka nu huanah hian hmelhriat loh thlamuang takin an muhil thei tih ka lo hre miah hleinem” ti a mipa tawng thawm ka hriat rualin rang lutukin ka hawichhuak vata.Ka thutna piah inchung hungna nghengin Mipa pakhat a lo ding reng maia.A thlalak ka hmuh tawh tlat avangin tu nge anih ka hre nghal a. A thlalak ai chuan a taka han hmuh takah chuan a lo chhe lo zawk fe mai..T-shirt pawl dal deuh a haa,Kekawrbul dum,a khup khuh lo a ha bawka,a chawn sei thlurh chu hmulin a khuh dapa. A san zawng tur ka ngaihtuaha,a dar pawh ka chen ka ring lo..

‘Eng lo..Nia’ a lo nui ka hmuh takah chuan sawizawm tur hre loin ka tita ngawt. A nui tih lemah a then suk ti ila a dik zawk ang.

‘A pawi lo turah ngai ang,ka nu hi a lo inthlak danglam tawh te pawh ti ta zawk  ila…’ tih pahin a dar a tisang zauh. .

‘Tete-i ka nia,Julie…’ ka sawi zawh hmain a ban a vai zauha. 

‘Ka hria e..Midang ang lo takin thla hnih i awm tling tawh’ a lo ti leh a. . Sawi leh tur hre loin ka bu nghat ringawt. U Dini sawi ang chiah khan a nelawm lo ang tih ka hmuh rualin ka hre theia,a hnuaia thawk ka ni lo hi ka lawm nghal tawp.Eng anga chhe lo leh rilru zau tak mipa pawh nise a landanah hi chuan  a bula thawh ka chak eih lo.

‘Ka zuk chhuk ange’ tih pahin ka tho tham thama.Min chhang loin a thle zauh ringawt.Ka kalpel chu min enzui em ka hre lo nangin ka hnung a za mar mar thei. 

MAMA- 2

Julie roomah ka luta,a damdawi ei a hun tawh avangin Damdawi ka keng nghal bawka.Ka lut thawm hriaiin a rawn hawi vat,khumah a lo awm diam tawh.Amahin a lawn thei lo va,tu emaw berin an dah kai a ni ngei ang. Damdawi ka pe chu thuawih takin a ei ve mai.No min pe leta,nidang ang bawkin a tum hmak. Chhuah mai tumin kawngkhar lam ka pana,mahse min rawn koh leh takah chuan ka ding leh chat,ka hawi let nghala. 

‘Mamawh i nei em ni?” ka ti a. A taksa chanve deuhthawh a chet theih loh avangin Chair a hmanga,awlsam taka kal kual vel theih nan in an tidanglam nasa tih u Dini khan a sawia,Roomah pawh a ban mai theih turin khum bulah a mamawh ho kan chhawp vek zel.  

‘Nichin kha….’ Zawi sepin a ti a.Ka then lui sak.‘A zia lo…’ a ti tawi leh tak.

‘Nia,a kang a..Engemawchen chu ka chawlh angai ang’ ka tilui salh a. Chawlh ka tum lawk miah lo, ka kut lehlam chauh a ni a,chutiang takin chet a ti buai hran lo.Mahse, han tih luih ve ka chak thut a ni ber. 

‘I chawlhin engtin nge ka awm anga?” rang angreng tak hian  a ti vata.A awah Manganna niawm tak a hriattel theiha.Lehlam hawiin ka then sak,a natna hi inhnehtir loin hma lam pan tura nawr kal angaia. Chumi tur atan chuan Dawh mai mai loin tihlet ve a tul tih ka man chiang ta viau bawk.

‘A rei lovang,u Dini pawh a awm a’ alangah erawh chuan ka ti zangkhai vah.

‘Ka duh lo,nang angin engmah thiamna a nei hleinem’ a ti leh hlar mai.

‘Ka hria alawm,mahse ka kut hi a zia deuh hun ka nghah angaia.Kang ka haw bawk si,naktukah chuan a durh vek ang’ ka ti leh a.Hei chu dawt a ni lo.

‘Anih chuan i chawlh chhung i haw dawn tihna mi?” a ti leh a.Ka bu nghat. Lungawi lo zeta a rum hak ri ka hre nghal zata.

‘Haw kher loin hetah awm mai la’bak deuh hlak hian a ti a. 

‘Ka hre lo,Pi leh Pu lo haw phawtse,ka bia ang’ ka ti a.

‘Angai lo,ka pa ka lo be mai ang.Haw lo mai rawh,Ka u a awm bawk si’ a ti leh a.A u a awm vanga haw lo turin min duh lai tak chu ka hrethiam chiah lo..

‘I u awm laia ka chawlh chu a tha zawk lo mi?” ka ti ha mai.

‘Aih,tha zawk lo’a tih chuan  min chhang rang lam mah.

‘Ka va hrethiam lo…’ ka tih lai mekin min rawn tawngkhalha,‘I hrethiam dawn lo,mahse khawngaihin awm rawh’ a ti halh.Khawngaih min dil hial anih chuan engthil nge nita ang? Ka awm vangin a thlamuang sawt dawn tihna anih hmel phawt chu ania. 

‘Ka lo ngaihtuah dawn nia’ hreh hmel takin ka tita nge nge.

Chokaah u Dini leh Jhanvi ka puia,u Dini hi dar 6 velah a haw tlangpuia,tlai lamah  chaw a ei ngai mang lo.Jhanvi a che thiam tawk si lo nen tunhnai chho chu  ka theih ang angin ka puia,ka best friend Azuali phei chuan a lo kal chang leh kan inbiak apiangin ‘Nurse ni loin,awmpui i ang” tiin min sawisel ta ziah. Mahse, engmah ti lo a awm ai chuan nuam ka ti zawka,sawi sek mah se ka ngaipawimawh lem lo.

‘Mama….’ Tichunga ka kekawr rawn pawt an awm chuan rang takin ka en thlaa.Ka beisei loh lutuk ka hmuh takah chuan ka thaw hak mai.Mipa naupang,kum 3 mi vel a ni a.A no nguaka,a sam an tan rualsak hmaka,a hmelthat ngang mai bawk. 

‘Keimah maw?” mawl hmel zetin ka ti ha ringawt.

‘Aw…hetah kal ang’ tichungin Kawngkhar lam a kawka,angaihna hre lo zetin a kawhna lam ka hawia.Enge tihtur ka hre lo.

‘Bawihpui, Ehe!! Hetah elaw i lo awm?” hmeichhe pakhatin rawn luh pahin a rawn ti a.Ka bula naupang ding a en a,a nui var var bawk.

‘Mama hian min kalpui dawna,hawh,kal ang..’tichungin  ka kutah a kut tereuhte,chum biangin a rawn vuana..Min pawh kal tumin min pawt nghala.Engemaw a hriat reuh ni??

Pi a rawn lut ve a,mipa naupang in ka kut a chelh ran mai chu a rawn hmu a,a mengphar deuh awk.‘Bawihpui,ekhai..A-ni chu i lo nel hman viau pek alaw?” a rawn ti nghal a. Tihngaihna hre loin ka then sak ringawt.

‘Api,Mama anih hi..A-ni a ni lo’ a ti leh reuha,atthlak zetin ka ip chawih pek.

‘Aw le,a tha alawm..Tete,ka tupa anih kha.Kan fapa fa’ Pi in a tih chuan  ka tum loh lutukin ka mengphar vak.Nupui a neih an sawi ngai lo va,fapa aneih phei chu sawi lo tak anni ringawt.Thil hlimawm lam ni siin engvanga sawi ngai miah lo nge maw annih le? An chhungkaw member lah 4 tiin min hrilh lehnghala!! he mipa naupang hi mihringah an chhiar lo zawk nge mawni?!!

‘Mama…’tichungin  min rawn pawt leha,ka zui ve ta ngawt. Hmeichhe pakhat awm ve khan min zui ve nghal vat bawk.

Living Roomah min kaipheia,inchungah min kaichho zela,eng tak chu tihtum ni maw? Room kil ber kawngka chu hawn tumin dingdihlip ak ak chungin a herha, min kailuta,kan lut thawm hriain khuma lo thu mu,Hmingthana a rawn hawi vat. A mit a tizima,a ngaihdan ni lo hmel zetin a ner nghal nawk bawk.

‘Apa..Mama hian kan thil hawn kha a la hmu  ve lo a’ Bawihpuia chuan a ti a.Min en loin a fapa a en a,a hmel nelawm lo leh tur zet kha a inthlak nghal vek.

‘Tunah chuan ni lo e..Api a lo haw tawh em?” a ti dam thlup.

‘Aw,khutah a awm..Khawiah nge i dah?” luhlul zetin mipa naupang chuan a ti leh a.‘Kimi,inhnuaiah lo zuk chhuk pui la..’ a tih chuan min en loin ka hnunga ding a en a.

Kimi a tih chuan inhnuaia chhukthlak puiah a thlema,a duh bau lo.Ka kut a vawn lah a thlah duh hek lo,mi a ang maiin ka din ngaiin ka dinga.An inthlem vel ka thlir mawl tawp.Engvangin nge ‘Mama’ min tih ngawt lah ka hre hek lo.

Khum atangin Hmingthana a rawn chhuka, a fapa bulah a thu hniama.A mitah tak a en chuan a duat hle tih a hmelah a lang thei hial.

‘Inhnuaiah chhuk ang aw,Api in engemaw a nei ang’ dam thlupin a ti a,a samah a tuaisak zauh bawk.

‘Anih chuan Mama hi a haw dawn tihna mi?” a ti leh ta a,ka hmui ka pet nghek.Muangchangin min rawn en a,a mitmeng fiah leh nelawm lo zetah chuan engmah a ngaihtuahna awm a lang lo.Mahse, a fapa a en lai nen kha chuan a mitmengah in anna pakhatmah a nei leh tawh lo.

 ‘Aih,hetah a awm ang’ nghet churhin a ti a,a nui bawk. 

‘Yes,anih chuan Serchhipah pawh a lo kal ve tawh anga tiraw?” a ti leh a,ka ip chawih thung.Mipa naupang kum 3 vel lek ni si duh aiin Mizo tawng a thiam a nih hmel. Mizo naupang zingah mizotawng thiam riau chi an awm a,chung zinga mi chu a ni ve ngei aniang chu. 

‘Ok,tunah chuan inhnuaiah Api bulah kan kal anga,Mama hi Serchhipah a kal ve dawn em kan zawt dawn nia.A tha em?” Nui chungin a ti a. A fapa lah chu lawm zetin a khek nghal raih bawk.Eng chu an hria nimaw?!

Thawklehkhatah inchhung boruak a danglam ta vek.Mipa naupang hlim thawm leh Pi au chelchul te,tlan dawt dawt thawmin In lian leh reh ruih thin kha a thlak ta vek. Zing lama lo hawtur an huphurh em em kha amah hi a ni lo emawni ka ti ta rum rum. Mak deuhin Ni hnih lai a liam hnuah pawh tu man Bawihpuia nu chanchin an la sawi lo hrim hrim.

‘Vawiin chu Living Room lamah thuchhuak ve la’ a Chair siamthat sak mawlh mawlh pahin ka ti a.Min chhang lo,nidangah chuan Verandaah te a thuchhuak ve thina,a bulah lehkhabu chhiar pahin ka thu ve a.Titi erawh kan titi ngai mang lo.Mahse,Hmingthana te lo haw atangin vawikhatmah Room ala chhuahsan leh ta miah lova.Khumah a awm deuh chawta,Tv a en loh leh a muhil a,Online Game a khelh thin pawh a khel peih lo.

‘Ka u awmnaah i chho ve dawn em ni?” reife angawih hnuah a ti hul hak.

‘Aih,teuh lo.Enge ka tih anga?” rang fahranin ka ti vat.

‘Ka hre lo, niminah khan u Dini khan i kal ve dawn a ti a’ a ti leh a.Ka thaw hak,U Dini tak hi chu a..Bawihpuia bum nana an hman kha a lo la thutak lehpek anih hmel.

‘Bawihpuia bumna anih kha..’ nui chunga ka tih chuan‘A that chu’ a ti leh nghauh.

A damdawi eitur ka pek chuan a nur nang.A sual a chhuah lehpek dawn anih hi ka lo ti hman,mahse ngawirengin a bana.A ei ta zawk.Ka thaw huai mai.Ka kut ,Soup vanga a kan hnu khan a mizia a thlak ta viau..A hma anga rak chiam chiam leh tul hlei lo va thinrim phut phut a chin thin pawh a zia awm ta viau bawk.Mahse, mak tih ruk ka nei.Hmingthana hi vawikhatmah a nau roomah a la lut miah lova,ka hmuh laia a lut anih erawh chuan ka hre lo.Julie lahin a u chanchin a sawi ngai hek lo, Bawihpuia lah a-ni Rooma lut lo turin an hrilh chamchi bawk!!! Pi khan Hmingthana lo haw dawn zingah khan tuemaw Uire chungchang kha a sawia,Hmingthana’n fa a nei tih ka hriat takah khan a nupui a uire anih ka ring ve ta ngawt.Hmingthana zawkin a fapa ala awmpui zui bawka..Mahse, engvangin nge thil hriatsa reng chu an sawi hreh ang? A lo haw tur pawh huphurh chiam na tur a awm miah si lo.

A chaweina vel ka tifai lai chuan ngaihtuah muk tak nei niawm takin chunglam melhin a mu a.A melh ngai a melh reng bawk.Tray ka chawia,thawm nei mang loin kawngkhar lam ka pana,zanah a mu tha lo thin tih ka hriaa.A muthilh theih chuan muhil se a tha.

Pi leh Pu an chhuaka,Pu Dawrah Bawihpuia a kal ve a.Hmingthana erawh a lo kal chhan,Meeting nei turin a chhuak tawh bawk.

‘Bawihpuia nu hi a boral tawh mi?” U Dini nen chauh kan awm laiin ka tita hlawl.Ka hriatchak nain a turin min tur ut ut a ni ber.Min chhang loin midang awm leh awm loh uluk fein a thlek kual hmasa te te.

‘Sawi duh lo mai rawh,ka hre chak satliah mai mai’ ka lo ti hmanhmawha. Ka hriat ve tur awm loh zia ka ngaihtuaha,ka inthlahrung leh hnuhnawh a ni ber.

‘Kumin kumtir khan a uire a…’ zawi tein a ti sep. Ka bu nghat ringawt,ka lo rinlawk sa anih avangin min thawng teh chiam lo.

‘A uire na pa chu Julie bialpa hlui hi a nia’ a ti leh chu ka kang deuh awk thei..Ka tui in lai ka haka,ka khuh nghal bawrh bawrh bawk. 

‘Ngatinge a? I tha em?” ka hnunga rawn chum dawt dawt pahin a ti a.Ka lu ka thing ringawt,ka khuh zui leh chiama,ka mittui a tla phung thei.

‘A van zia lo tak…’ ka tawngchhuah theih veleh ka ti a.Ka mit ka nuai chat chat.

‘Tui hak hi a na duh asin,kha nangpawh i sen vek alawm’ a ti a.Ka ring a ni,ka khuh nasa lulai lutuk..

‘Julie bialpa anih rualin Hmingthana thiantha tak mai a ni bawka’ a ti leh halh. Julie leh Hmingthana an inpawh miah loh chhan ka hre thiam deuh kuar.Mahse, Unau inhuatna chhan tur a niin ka hre lo.Misual an tawng a,bum anni tihna mai a ni.

‘A Uire hnuah tun hi Hmingthana lo haw hmasak ber a ni a,a uire anchhuah man lai khan hetah hian a nupui a awma.Lo haw a chak lo anih ka ringa.Bawihpuia hi Pi leh Puin awmpui mai an tum laiin Hmingthana’n a phal lo va.A luhlul sia e,an han dah ta nge nge a,Kimi hi an chhung hnai ania.Ani hian a tet lai atangin a awm thina,tunah pawh a awm zui ta zel anih hi’ a ti leh duah.Chhan tumin ka ang ziau,Jhanvi a rawn lang thuta,ka phu zawk.U Dini pawh a dang chuang lo.A phu ve zawk tho. 

‘Tu nge man chhuaka?” Jhanvi hriat loh turin ka ti sap.Engvanga hre chak zek zek nge ka nih ka inhrethiam bik lo.Hlawkna engmah ka nei pawh a ni si lo.Mahse, ka hre chak..Chu zawng chu..

‘Julie mawle..’ a tih chuan ka thaw hawk..Julie hmel ngui leh hlim ngai reng reng lo ka mitthlaah a lo langa,beisei lawk miah lohin mangchhia ang maiin natna in a mana,a rin em em a bialpain a u nupui a lo uire sak bawk…Khawngaihna a rawn luta,mak takin ka natpui ve vawng vawng thei.

Keimahin Verandaah ka thu a,ka ngaihtuahna ka kawma.Ka rilruah thildang a leng lo.Ka Phone a rik chuan  ka phu nghek,rang zetin ka kekawr ipte atangin ka lachhuaka.Min rawn calltu ka en a,ka pick-up  nghal thuai.

‘Aw,Azual..’ zangkhai zetin ka ti a.

‘Naktuk chu..Chawlh i nei thei dawn ta em?” a rawn ti lar lar.

‘Ka la dil lo a,mahse ka thei ang ka ring’ ka ti  a.Naktuk tlaiah kan thian ho,nurse ka zirpuite nen Dine out kan rawta.Ka la dil lo nangin an phal ka beisei ve ngawt.Ka chhuak zen zen lo bawka,thil harsa tur niin ka ring lem lo.

‘Um,tha lutuk..Ka rawn lam ang che’ a rawn ti leh a.

‘Nia,ka lo sawi leh ang’ ka ti leh a.Nimin kha chuan ka phur hle kha ania,tunah chuan phurna pakhatmah ka nei lo.Ka rilruah Julie khawngaihna bak engmah a awm lo.

Pu leh Pi an rawn haw ruala, Bawihpuia’n min rawn bawh nghal chang chang,ala rei lo teh chungin kei pawn ka ngaina ve tawh viau. Dawra a thil hmuh ho a sawi sar sara,a sawi zawngin a lu a thing leh na na thina,a sam dum hlarh chu a che siau siau bawk.

Chawei laiin tlaiah chhuah ka mamawh tih ka sawia,ka chhuah chhan tur erawh ho an tih ka hlauh avangin ka sawi tel lo.Ka beisei ang ngeiin min hnial lo. Midang an lo chhawr tawhte aiin ka awmrei tawh zawka,Julie in ka kut Soup a tihbuak a,a kan tlai khan ban ka duh an lo ringa.Mahse, ban chungchang engmah ka sawi ta lo a.Thil pakhat phut erawh ka nei thung. Ka thil phut ka sawi chuan Pi in min khap a tum nangin Pu in khauh zetin min pawm sak tih a sawia,Pi tan hnial chi a ni lo..A pawm emaw pawm lo emaw a Pasal thu anih avangin, nu thawmna em em a ni chungin a hnial ngam lo.

Pi in Bawihpuia mutpui a tuma,a duh der lo. Ka bulah a thu a, Tv hmuhnawm ti zetin a thlir dauh dauh bawk. 

‘Bawihpui,mu tawh ang le..A pa a lo haw tlai dawn sia,zanin chu ka bulah i riak anga’ Pi in a ti a.

‘Aih,Mama bulah ka riak ang,tiraw Mama?” ka ban a rawn vuana,a mitmeng lian leh pawisawi lo zetin min en kiau bawk.Chhan mai dantur ka hre lo. Kimi lah zingah an In lamah riak turin a haw phei bawk si….

‘Angai lo, Mama te chu A-ni bulah a riak dawn alawm’ Pi in a ti a. 

‘Anih chuan ka riak ve mai ang,ka bengchheng lo mai anga’ a ti leh ta cheu.

‘A pawi lo.I lo riak dawn nia..’ Pi tawng leh hmain ka tita ngawt. Pi in min rawn en a,a vawikhatnan inthlahrung hmel a pu ve tlat.

‘A muthilh hunah ka rawn la mai dawn nia’ a ti a.Ka bu nghat. Naupang ka enkawl thiam loh tehlul nen engvanga min han ngaina em em nge anih ka hre thiam lo..A nu nen kan hmel a in ang viau zawk nge mawni?

Ka harh zawka, ka  inlet dawna,mahse ka hnung lam atangin tu emawin min rawn kuaha,ka mal a khan bet tlat chu niin.Thawklehkhatah hlauhnain min rawn fana,ka khur nghal dar dar mai..

MAMA- 3

Che loin ka mut ngaiin ka mu a,ka mumang anih leh nih loh ka ngaihtuah leh te te a, a ni lo.Zantin room Kawngkhar ka kalh ziaha,Light pawh pakhat tal ka on ziah.Mahse, Bawihpuia muthilh hnuah Pi khan a rawn laa,ka kalh leh ta lo a ni ngei ang!! Light erawh ka On tih ka chiang,anih chuan ka bula mu ve ngawt hian a Off a ni ngei ang..Thla…Ka khur lehnghal dar dar,thla hi ka hmu pawh a ni lo.Mahse, rul nen ka hlauh dan a in ang reng.

Min kuahtu a che hruta,a chet hrut rualin ka tal nghal ngheka,a rum nghut thung.Thla a ni lo tawp,mihring a ni..Khum kil lamah ka let phei nghala,mahse ka chhuk hmain ka kawngah a rawn kuaha.Hneh zetin min hnuk let nghal dawrh. Te thawt pahin ka tal lehngheka.Min rawn bawhbet titiha.A mal in ka mal a kherh bet tlata.Zu rim a nam huam huam bawk.Tu nge ni ta ang? Puin zu a in ka hre ngai lo,bakah ani chu a ni thei lo.Anih chuan Hmingthana..

‘Tu nge i nih a? min thlah vat rawh’ ka ti  hrawk.Ka room hi chhunah pawh Light on loh chuan a thim deuh khup hrim hrima,tunah Light a in off bawk nen engmah hmuh theih lohin a thim phui vek..

‘Awm mai mai rawh’ a tih takah chuan ka rin ang ngeiin Hmigthana a ni!!

Talchhuah tumin ka bei leh phat chu ka kut a vawnna a nghet lutuk.Min rawn delh a,tlawm ka tum bau lo.Hlauhna zawng zawng thawklehkhatah a reh nghal duak.A banah ka seh nghal vak..A rum leh nghuta.Ka samah a rawn thama,min kuaidak nghal lawp.Ka hmaiah a rawn khawih zuia,ka inrin hmain ka hmui a rawn fawp ta chat.Ka hamhaih hlen nangin mah se rei a ni lo.Ka thle sawka,ka hmui a thip nghal zawk. Ka rin loh lutukin a inlahrang ta vut.

Rang lutukin khum atangin ka let thlaa.Light On tumin Switch ka dap a,ka On nghal vek..Khum tlangah a lu dawm chungin a lo thu fel vek hman tawh.Tukina a chhuah dawna a thawmhnaw hak bawk kha ala ha a.Pheikhawk erawh a bun lo. Ka zawi deuh thut avangin ka tluk mai loh nan bang ka nghenga,ka tha khur ala reh thei lo.Ka hmui ka khawiha,a thip nghal zak mai.

Zawi angreng taka “tihpalh” atih chuan Ka chhang lo,a tho a.Ka dingkhawng lehnghal lah,mahse min en miah loin a pheikhawk a laa.Kawngkhar lam apana,ka thlir reng. .Kawngkhar dimtein a rawn nem khara,chhuatah ka thu thla hnawk mai.Ka maimitchhing ta vang vang. 

Nula thianghlim ka ni tawh hauh lo,ka bialpa hmasa ber leh tih takzeta ka Hmangaih awmchhun hnenah ka thianghlimna ka pe daih tawh.Ka pasal ala nih ngei beiseina nen nun ka hmang thina,alaka inpek kha hrehawm ka ti ngai lo.Mahse,mihring duhthusam kha zankhat thil thuah a chhiaa,  Mithi a ni ta a,keimah chauha khawvel hmachhawn turin min kalsan ta zawk…Ngaihzawng dang chu ka nei leh ngei,mahse tumah hi tihtak takin ka kawp leh ta lo. Mipa kut ka vawn rualin ka mitthlaah Mala hmel a lo langa,Uire anga in ngaiin ka then leh nge nge zel..

Tun lawka thil thleng kha ka ngaihtuaha, ka  khur lehnghal dar dar mai.’Pakhat leh Pakhatah duh lo chung a intihluih theih loh’ tih hi an sawi thina,keipawn ka pawm dan a ni thin.Mahse, tun lawka thil thleng khan ka ngaihdan a thlak danglam a vek..Tum zui zel se ka tang zo dawn lo tih ka chiang lutuk. 

Khawvar dawnah ka muhil ta chauh..Ka alarm riin min tiharha, meng loin ka mut ngaiin ka mu a,nizan thil thleng ka ngaihtuahchhuak nghal zat.Hmingthana ka hmu hreh vek.Ka thiam loh a ni miah lo chungin ka hmu hreh ngawih ngawih tho.Nimin zinga an sawi danah khan Serchhipah lah a let tawh lo maithei zuia..A chetdan kha amak tih bak sawi ngaihna a awm lo,a lo thlenhlim atangin min be ngai mang loa,ka awm ve leh awm ve loh hria ang pawn a awm ngai lo.U Dini’n a nelawm lo a tih avangin nel luih tumna ka nei lo hrim hrim.Nizan khan engvanga khatianga che nge anih ang ka hre thiam lo hulhual…Hmeichhia a mamawh anih chuan kawp sen loh a hmu ang tih ka chiang reng si.  

‘Mama…’ Room kawngkhar bul atangin Bawihpuia awin a rawn ti a. Ka rum nghal hak mai,apa vangin huat loh hram ka duh.A rawn kik leha, ka hawn hma chuan a kik dawn tih ka hria.

Chokaah kan inzui pheia,u Dini a lo thleng tawha.Min lo be nghal sawk sawk.Pi leh Puin thingpui an lo in meka,Jhanvi-in ka intur a rawn dah ve nghal vat. Ka thu ve nangin ka bet hlawl lo.Hmingthana a rawn lut mai ang tih hlauhnain ka khata, ka hlauh a tul lo tiin ka inhau ru mawlh mawlh nangin awmzia a awm chuang lo.Pawi lo,a chhuah hma zawng chu Julie roomah ka tawm mai ang.Chaw pawh Julie Roomah ka inpek kep tir mai ang.

‘I hmui kha tinge a?” Julie-in min en vang vang pahin a tita chat.Nizana Hmingthana min sehna kha a ni tih ka hria.Vung nasa lutuk chu a ni lo nangin min enchik tu tan chuan hmuh hmaih chi a ni lo.

‘Rannungin a seha’ ngaihsam hmel zetin ka ti liam puat.

‘Berkhera…’ a ti nghat.Ka chhang zui lo..Achhan ka hre chiang lutuka,eng rannung mah a ni lek lo e.

Ka tum ang ngeiin ka hmu ta lo.Julie room atanga ka chhuahin a lo chhuak hman tawha.Nidang ang lo takin Julie a titi siam siama, eng eng emaw a sawi ve a.Ka awm atanga a vawikhatnan kan nui dun hawk hawk!!

Tlaia Julie damdawi eitur u Dini ka chah fel thlapa,chah lo pawh ni ila a eithin ho Julie-in a hre hrang vek.Ka chhuak dawn tih ka hrilh lawka,natna dangin a tlakbuak thut anih loh chuan ngaihtuah ngai a ni lo.Dar 3 velah ka chhuak ta daiha.Ka tum dan kha chuan dar li velah Azual-i ka call ang ka ti ania.Mahse, Hmingthana a lo let thut ang tih ka hlaua.Ka tum aia hmain ka chhuak ta zawk. Zanah Pi emaw Pu pawh ka call anga, chhuanlam dang siamin ka riakchhuak dawn tih ka hrilh mai ang.

Ka beisei ang he huin nuam pawh ka tita chuang lo.Thianho inhmukhawm kan ni a,hunreitak hmun khatah kan lo cheng ho bawka,tu mitmeimah ven angai lem lo.Mahse, ka ngaihtuahnaah Nizana Hmingthana chet dan kha a lo lang leh thina,a hmelpa leh ngainatawm lo zet ka hmu tel zui zat zel bawk. 

‘Hey,I nuam lo mi a?” ka bulah rawn thutthlak pahin Azual-in a rawn ti a. Ka hlauhthawn ruk erawh a thleng hauh lo.Ka hmui pem vanga zawhna chimawm zet zet min zawh ka ringa,mahse engmah a sawi ta lo.

‘Nuam e,ti nge?” Nui chungin ka ti a. 

‘I inngaihtuah muk hmel em a,chuvang mawle’ a ti liam leh puat. Aizawlah High School ka kala,Azuali hi ka kawm hmasak ber leh tun thlenga ka thian thaber a ni zui ta. An hausa over lo nangin an khawsa nuam tawk viau. A u hmeichhia nen an inthlau hle a,piang tawh lo tura ngaih piang leh anih avangin an duat em em bawk.A harhvanga,a bula awm a nuam takzet.Vei em em a nei pawn ka hre lo. School khatah kan kal dun zela,Nurse kan zir dun leh bawk. Tunah Private Hospitalah a inhlawh ve meka,inhlawh lo pawh nise sum lamah harsatna a nei chuang lo.

‘Zanin chu ka lo riak dawn mawni?” ka tih chuan min  rawn en vat.

‘I thei dawn mi? Pi Bengchheng-in a phal ka ring lo e a’ a ti a.A nui zui vak.

‘I sual thei em maia,khatia tih kher’ ti mah ila ka nui ve tho.

‘A bengchheng ve em alawm..Tak takin an phal dawn mi?” a ti leh a.

‘Ka la dil lo,mahse an phal ka ring’ ka ti awlsam leh mai.‘A that chu, Movie entur tha tawk ka nei alawm.Kan en dawn nia’ a ti leh maia,ka bu nghat.

Dar 7 velah Pu ka calla, chhungkaw lam thil chhuanlamah ka hmanga,a phal ve mai bawk.Dawt ka sawi teh ngawt chuan ka awm a ti nuam chiah lo.Mahse, chhan leh vang tha tawk awm si lo a riahchhuah ngawt lah dikin ka hre lawi si lo..Aaaa,dawtah pawh a pawi lo chi a ni mai.

Zingah Azuali duty kaltur rualin ka hawa, in kawta Hmingthana lo thu ka hmuh rualin ka awmdan a dik lo nghal ngawt peka,engmah tisual pawh ka ni si lo.

‘Tu nge saw pa saw?” Azual-in a ti sa sa.

‘An fapa..’ ka ti tawi tak. Azuali mipa duhzawng ka hria,Hmingthana pawh hi a duhzawng a ni dawn chiang sa.

‘A va han chhe lo si ve..Hna kan inthleng lawk dawn mi?” Tih pahin a nui zui kawr kawr bawk.

‘Kal teha,lerh lutuk..’ ka ti hlak thung.

‘Hmm,nangpawn chhia i ti lo tawp anih kha’ a ti leh talh.A va han nghal thin tak.

‘Tlaiah ka haw pahin ka lo leng ang’ a ti leh a,chhang loin ka ner khum vak ringawt. 

Gate a ka luh rualin Bawihpuia’n min rawn hmu a,a rawn tlana,min rawn au nghal chul mai. A ti hlim awm phian,hlu deuh sawtin ka inhre lehpek..Hmingthana lam hawi loh hram hram ka tum tlat thung.Bawihpuia nen kan inzui luta,Pi leh pu an lo awma. Nidang ang bawkin Pi in Jhanvi a lo vin leh hlawk hlawk tawh.

‘Vawiin chu ka naute huanah kan kal vek dawna.I lo kal ve duh em?” Pi in min ti a. Ka kal duh,mahse Julie kalsan ngawt a dik lo.Bakah Hmingthana a kal ve phei chuan…Ka lu ka thing nawk.

‘A chakawm viau nangin Julie ka lo awmpui zawk ang’ nui chungin ka ti a.

‘Ani pawh a kal ve se atha.Han thlem chhin teh,keini aiin i thu a awih zawk daih ania’ a ti leh a.Ka bu nghat.Bawihpuia’n min zui a tum chuan  nidang ang bawkin Piin a dang leh ta tlat.

Julie hnenah huan kal an tum thu leh Boruak dang dawn paha kal ve a duh leh duh loh ka zawta,a lu a thing mai. Nimina ka kalsan lai kha chuan a Mood a tha takzeta,tunah chuan a nui thin tih pawh awih harsa khawpin a hmel a nelawm lo leh tawh.

‘Anih chuan keipawh ka kal lo ang.Ka awmpui ang che’ ka ti a. Engmah a sawi lo. 

‘I chawei tur ka va la lawk ang’ ka ti leh pawh chu min  chhang chuang lo.

Pi hnenah a kal duh lo tih ka hrilh chuan‘Anih chuan Jhanvi lo awm se,nang chu lo kal ve rawh’ a ti thuaia.

‘Aaaa,ka lo awmpui zawk ang.Tukin chu a tho nuam vak lo a’ ka ti a. 

‘Chuti maw? A khua a sik em ni? Nge thildang?” a ti nghal vat.

‘Aih,a chau satliah deuh mai mai..Ka lo awmpui ang,kan ngaihtuah awm lo ang’ ka ti leh maia.Rilru nuam vak lo hmel a pu a,mahse engmah sawi loin a bu ta zawk.

Julie Roomah chaw ka ei ve a.Tih tham a ei lo.Ka tilui duh hek lo,engemaw tak vei a nei tih a chiang renga.Lo nawrluih chiam tul ka ti rih lo.Pi in an kal dawnah min rawn hrilha.Julie a be mawlh mawlha,mahse vawikhatmah a chhang lo.An kal chhuah hnuah Msg min rawn thawna,thil engemaw danglam a awm chuan amah be nghal vat turin min rawn chaha,Nurse mai ka ni chungin an chhungkaw zinga pakhat ang maiin min ring ve tawh tih an kalsan vek ngam danah alang thei reng,Keilah ka lawm ve tum hrang bawk. .

Julie thawmhnaw suktur leh ka thawmhnaw suktur ka su a..Thil dang tihtur tehvak a awm lo.

‘Nizanah khawnge i kala?” ka hnung lam atangin Hmingthana awin a rawn ti thuta,ka phu nasa lutuk,ka hawi nghal zawk a.Bathroom kawngkhar biang nghengin,kekawr ipte zen chungin a lo ding reng chu niin..A kal ve emaw ka ti asin le….

‘I kal ve emaw ka tia….’ ka ti chhuak hlawl..

‘I hmuh ang hian kal lo chu anih hi” a ti a.A dar a tichhing uk bawk.

 Pi khan a kal dawn leh dawn loh engmah a sawi lova.Keiman an kal vek turah ka lo dah ve tawp zawk a ni. Min la hmu ngai lo niawm takin min en a,ka mal zawnah a mit a fu ta chat.Julie nen chauh kan awm emaw ka tih avangin T-shirt ho lam zet leh Kekawrbul chhing fahran ka haa.Kawrhnuai ka hlip daih bawk.

‘Eng lo…Aaa,in kal vek emaw ka tih vang ania’tih pahin ka kut ka phar hliaia,a then suk ka hmuh rualin tihngaihna hre lo in ka dahthla leh hnak.

‘Ka zawhna kha?” Ka sawi a haider-in a ti leha. 

‘Eh….Ka chhungte inah..Ti nge?” Ka ti hap.

‘Min hlau anih ka ringa’ tih pahin a then suk.Ka ip deuh chawih peka.

‘Aih…Aw…’ ka ti bah nak mai.

‘Ka nau hi enge a dinhmun?” a ti leh daih.A thilsawi hian inzawmna engmah a nei hlawl lo.

‘A tha..’ ka ti hul hak. 

‘A kal leh theih hi a beiseiawm em?” A ti leh a.

‘Ka hre lo..’ ka ti tlang tawp.

‘Anih chuan engmah beiseina siamsak suh.Chuan,in ngainat tir lutuk lo bawk la ka duh’ a ti leh duah.A sawi awmzia ka hre lo.

‘I sawi tum ka man lo..’ka ti nghal a. 

‘Nurse i nihna baka inngainat tir tum a ngai lo ka tihna, engtik niah emaw i kalsan anga.Atan a harsa mai mai’ a ti leh a. Ka ngaihdan a pel deuh thuta. 

‘Enteh,I nau hi i hmangaih em?” ka ti phawng maia, ka insum hman lo.Reilote pawh awm ila,thian anga min ngaia,min ngaina anih chuan a lawmawm hle zawk ang chu.

‘Ka nunna tluk zetin le…’ a ti hmuka. 

‘Anih chuan reilote pawh hlim se a tha lo em ni?” Ka tih chuan  ka tum aiin ka aw a chang hret nangin pawi ka ti lo..Mahse, ka beisei loh lutukin a nui chhuak ta a..Ka mengphar awk thung.Enge nuihtur awm hrep ni?

‘Enge nuihzat tur awm a?!’ ka ti deuh hmaka. ‘Sorry..Ka duh ang tak chhanna ka hmuh vangin mawle..’ tih pahin a mit a siai zauh.A awmzia hre lo lutukin ka en reng ringawt.Min rawn pan hnaih chuan tawlh hnun nachang pawh ka hre lo..Ka bulah a rawn dinga,min en chhuk run a.Ka khabeah a rawn dawm chuan ka harhchhuak nghal zawk..Ka petek nghal dawrh a.Mahse, ka tawlh thui hmain ka kawngah a rawn dawma,amah si chetin min pawt bet nghal hmaka.A awmah ka nem nghek thung.

“Hey.Te miah suh,anih loh chuan Julie a che buai mai ang’ zawi angreng takin a ti a.A aw a dam thlup bawk.

‘Min thlah teh’ ka ti ram hmaka,.Ka eu tlat bawk.

‘Tehreng mai,mahse ka sawi zawh hunah’ a ti duh lek. 

‘Eng?” Ka ti hman chu min tawngkhalha. 

‘Nurse i ni a,I tihtur chin i hre chiang em em bawka.A tha,a lawmawm.Mahse, min thlem duh suh.Ka lo thlen tirh atangin ka mit lak i tum ngar ngar tih ka hria.Ka nau enkawltu nen inzawmna neih tumna ka nei lo ania’ a tita duah.Tawng ngaihna reng reng ka hre lo..Diktak chuan a sawi kha kan inhnaih bawka a chiang em em nangin ka hre sual emaw ka ti hial zawk.

‘I nihna tak ka hrilh che avangin a thawng deuh che mi?! Nge lemchan kha nuam i ti viau zawk?” a ti leh hluka,’min thlah thut takah chuan ka lo eu sa bawk nen ka pai nghal data. Rang takin ka dingmara, a mitah ka en a. 

‘Mi tenawm pa,hei vang hi anih hi i nupui….’tihthleng ka sawi a,  Sawi zawm loin ka ngawi leh daih,Sawi loh tawptur ka sawi tih a hmelah a lang veka.Thinrimna avanga a hmel dur khup chu to haw tur intham nen ka tehkhin ber..Hlau lutukin ka tawlhhnung nghal dawrh bawk..

MAMA- 4

‘Eng maw i sawia?” a ti hrawk.A au chiam lova,a aw pawh a ring lo.Mahse, chu chuan a tihlauhawm ting mai zawkin ka hria.Bang ka nghenga,ka khup a sai dar dar mai.

‘Sawi la,eng nge ka nupui chungchang i hriat ve chu?” a ti leh a.A kekawr ipte zenin a dinga,a hmel hlauhawm lutuk chu ka melh zawk nangin ka en rei ngam lo. Engvanga lo sawi chhuak kher kher nge maw ka nih hrep ni?

‘Aih,engmah ka hre lo…’ ka ti ta ngawt a.Hlau lo ang taka lan tumin ka dak deuh vah bawk.Mahse, ka aw  khur kha a hre ngei ang tih ka chiang. Min en renga,ka ngaihtuahna chhungril ber thlengin a hmu tlang vek nimaiin ka hria. Tawngkam na tak a chhakchhuah ka rin laiin ka  beisei loh lutukin a then ta suk..

‘Nidangah chuan i ka tereuhte kha i an hmain enge sawitur ngaihtuah hmasa tawh ang che.Chuan,ka sawi kha hre reng la.Inchhungah hian Nurse inih vanga awm i ni a.Min lem kual vel tum kha sim rawh’ a ti leh duaha. Engvangin nge ka lem kual anga angaih ve ngawt theih zawk ni? 

‘Chutiang ka ti miah lo…’ ka ti chang fak.

‘Aaaah,zak duh suh. Midang pawh an awm loh hi” tichungin  ngeiawm zetin a nuia.‘Ka zak lo.zahna tur ka nei lo hrim hrim’ ka ti ram leh hmak. 

“Um…Anih chuan lemchan nuam i ti viau tak anga.Hmanzan pawh khan i tan theih viau lawi kha tiraw?”  a ti leh a.A sawi danah chuan thil tenawm tak chanchin sawi a ang viau.

‘Aih…Chutiang…’ ka ti hman.Kan thilsawi lai ho tihhmel zetin a ban a vai zauha. 

‘I insuk kha vawiinah phoro hman i tum chuan i buaipui angai ang ka ring.Engpawhnise, I hnute  kha a nalh khawp mai’ a ti chiah chu rang lutukin ka awm ka hup vat.Engmah sawi tawh loin a chhuak zui ta daih..

A chhuah veleh ka thu thla hnawka.Ka ngaihtuahna buai nuaih nuaih tihfim ka tuma.Mahse, ka hlawhchham titih.Engvangin nge amah beisei tlat anga min ngaih ve ngawt ka hre lo.A lo thlen tirha inchung pangpar huana kan inbiak bak kha mumal  taka inkawmna pawh kan la nei leh lo.Chawei lai bakin kan thu ho ngai hek lo.A khat tawka min be zauh anih loh chuan keima thu phei chuan ka be hmasa ngai miah lo.Thawmhnaw lah pangngai tak ka haa,vawiin erawh midang an awm lo emaw ka tih vangin ka thawmhnaw hak a ho lam viau.Mahse, engtin nge amah beisei anga min ngaih ve ngawt? U Dini sawi dan kha chuan a nelawm lo ringawta,a chhungril erawh a tha a ti a.Ka pawm lo nghal bur..A chet dan engkim mai hi mi pangngai chet dantur a pel vek. 

Chhe lo chu ka ti ngei alawm.Ka hmuh dan dik takah phei chuan engtin nge a nupui hian a uire san theih tiin a nupui a ka lo ti hluah hluah a.A paliana,thau si loin a pian a tawk tih a thawmhnaw hak engkim a inhmeh vek danah alang theia.A hna  lah mi pangngai chung lam hna a ni bawka..Mahse, tunah chuan mak ka ti tawh lo, a nupui khan a  mize mak lutuk vangin hmun dangah hlimna a zawn san a ni ngei ang..

Ka chhuah hmain kawngka bul atangin ka bih dak daka.Eng thawm mah awm loin a reh thiap.Insuk ka chawi chhuaka,inchung sangah zar tumin ka chhoh pui nghala.Inchung kalna hi a Room awm lohna lam a ni hlauha.A tihzia phian.

Insuk ka zar laiin Motor Start thawm ka hriaa.Railling lamah ka tawlh pheia.Inhnuai lam ka zuk en chuan Hmingthana Car tlanchhuak mek ka zuk hmu a.Ka thawnghal huai..Julie a che thei si lo,ani nen chauha inkhata awm dun ka hreh zia ka sawifiah thiam lo zawk.Chutihrualin In a ni miaua,zaninah a lo haw lo anih pawhin naktukah a lo haw leh tho ang. Aizawlah an transfer tak tak anih phei chuan ka thawk zawm lo chiang viau ang.

‘Bang ta ila a pawi i ti angem?” Satliah thei ang berin Julie hnena ka tih chuan Phawk zetin min rawn en vat.

‘Ngatinge i ban ang?” a ti ro halha. 

‘Hna ka dila,ka hmu maitheia..’ ka ti leh ringawt.Engvanga dawt sawi thlazen nge ka nih pawh ka inhre tawh lo.

‘Aaaaa,I thu ania.Mahse, chutah chuan i hlawh a sang zawk dawn tihna mi?” a ti leh khauh.

‘Maithei..’ ka ti awlsam leh mai.

‘Anih chuan ka pa hnenah ka lo sawi ang.Chuta i hlawh let pe tur chein’ a ti leh chu ka  thensak.Hei pawh a u nen an in ang reng ka ti rilru a. Engkim hi suma chinfel an tum tlat hi an buaina a ni.Mihring thatna leh thatna inlawm tawn hi an hmuthiam ve lo reng reng.Mi in an lakah thil tha an ti anih chuan sum hmanga chinfel an tuma.Sum an pe anih chuan an tlak fel vekah an inngai zel. Hnathawktute nen chhungkua anga awm lo tura inkar daidanna siam lah an thiam em em bawk.

‘I u kha a kal ve lo va’ ka ngaihtuahna nena inrem lo zetin ka ti leh a.Pangngai taka sawi ka tum viau

‘Ngatinge? Thil dik lo thleng a awm em?” a ti thuaia.‘Aih,eng thil dik lo maw thleng ang?” ka ti leh hnuhawh.‘I chungah mawle,ka u te chu a mizia i hria ang chu’ a ti leh hmaka.Ka lu ka thinga, ka then sak thung. 

‘Hre chiah lo e.Mahse, nang angin a nem ve lo a ang’ ka ti hap. Chiang takin min rawn en a,a mitmeng lian kel kawl leh mi melh na zet chu a u mit nen a in ang takzet.A mithmul a sei a,a er nalh hle bawk.A vun erawh pawn nisa dawng lo rei tih hriat takin a dang lepa,amah a ngo bawk nen a sam dam hlap bawk si chuan a ti lang dang lehzual.Mahse, ani pawh hi a khaikhawmnaah chuan a Hmeltha ti ila a dik leh tho.

‘Bawihpuia a kal ve ang tiraw?” reife angawih hnuah a ti chhuak leh a.A aw a zawi viaua. ‘Um,kal ve e..Ngatinge?” ka ti a.Sofaah thatchhe zetin ka inkual ram mai.

‘Achang chuan ka ngai ve thina’ a ti sepa,chunglam a melh tlat.

“Ka hre thiam e’ ka ti ve ngawt.

‘Aih,I hre thiam teuh lo’ a ti hlar mai.

‘Nia,hre thiam chiah lo’ ka ti leh lawi.Ka tawng dan awmze nei lo lutuk chu ka nuih a zaa,ka nui zui hak bawk.

‘Enge nuihzat tur awm a?” Min melh ran chung hian a ti a. ‘Sorry..Ka thilsawi kha awmzia a nei lo lutuka’ tih pahin ka nui leh haka.Ka rin loh deuhin a then ve ta sak.

‘Ka hria alawm,min ngaihtuaha.Min hnem i duh bawka’ a ti leh ta khauh.A sawi dik.

‘Nizanah min rawn calla,mahse ka pick-up lo a ’ a ti leh chu tu nge sawi a tum ka hre lo.‘Ka bialpa hlui ania ka sawi..Tu emaw talin ka bialpa hlui leh ka u Nupui an lo inngizawng tih an hrilh tawh che em?” a ti leh a,Aih tih ka tum zeta,a tul leh lo.Ka bu ta nghat. 

‘A pawi ka ti.A na hle ang ka ring’ ka ti sapa..Min rawn en a,ka ti tak tak em tih hriat a tum niin ka hria.

‘Ka natna vang hian ka rilru a kawi zo veka,ka bula awm a nuam lo ang tih pawh ka ring.Mahse, min kalsan loin min hnem turin ani kha ka duha…A ti si lo.Engmah tangkaina nei lo ka ni chung hian Hmangaihna ka nei ve a.Ka rilru hi lo buai tel vek se a tha tur ania’ a ti leha.A insut nghal hraiha. Ka ni deuh nghulh thei.

Ka tho tham thama,ka pan pheia,Khumah ka lawn ve a.A kutah ka vawn sak chuan a tang lo.Chhuak em emin a tap ta hlawp hlawp zawka.Kum tamtak a lo khawlkhawm tawh mittui kha vawikhatah a sah nghal huk nimaiin ka hria.A samah ka chul saka,ka mittui tla ve tur khap kir tumin ka khap sak sak bawk.

‘Enge ka tihsuala hetiang hi ka chungah a thlen bik tih Pathian ka zawt thin,chhanna ka hmu si lo.Tunah chuan ka thiante pawn min rawn tlawh ngai tawh lo va. Ka mal ngawih ngawiha,thih ka chak thin.Mahse, ka kut ngeia ka nunna la turin ka huaisen tawk si lo..’ a ti leh tiau.

‘Ka awm a,I chhungte pawh an awma.Kan vaiin kan Hmangaih vek bawk che a.Mal angin inngai tawh miah suh.A pawimawh ber Pathian i lamah a tang tlat bawka’ ka ti a.Mi fel leh mi aia tha bik ka ni lo.Mahse, Nurse ka zirlai hian Khawvel thilah chauh chher hriam ka ni lo va.Pathian thuah pawh uluk taka zirtir ka ni a. Damlo te taksa damna mai bakah an chhungril manganna zawng zawng nena hnem leh puih hi ka hna nena inkawp tlat a ni. 

‘Ka u tan pawh hian a harsa ve ngawt ang’ a ti leh a.Ka kuahna atangin a inlahranga,a mit a nuai chat chat bawk.

‘Nia..Ka ring ‘ ka ti ve tawp. 

‘A nupui kha a lo insawithiam nasaa.Ka u hian min rawn zawtfiah leh kher bawka.Ka ngaithei ta bik lo va.Ka hmu duh tawh ngai lo vang tih ka hrilh hmiah.Engvangin nge dawt ka sawi ang? Ka hlim loh avangin mi chhiatna tur dawtin ka sawi ngawt dawn tihna a ni lo.A dik tiraw?” a ti leh a.Ka bu nghat.Ka awmtirh atangin a bula awm nuam tihtur a ni ngai lo.A nui ngai lova,a thinchhe em em bawka.Mahse, a mize tlang lutuk atang hian tul loah dawt a sawi mai mai lovang tih a chiang. 

‘Ka hmuh veleh hnawhchhuah pawh ngai loin an pahnihin an chhuaka,Bawihpuia hi chu ka kaltir thei lo.Nu uire nena a nun hman ka phal lo.Ka nuin ka u a han hrilh khan ka u pawn chhuakturin a rawn ti a.Mahse,ka u an lo han kalchilha.Ka bialpa hlui anih vangin ka puhchhia tiin an lo han sawia. Na ka tihber zawk chu kei aiin a nupui tenawm zet sawi a ring zawk kha ania.Ka u pawh hi ka haw hluah hluah. Mahse a pa ka huat vangin Bawihpuia hi ka haw tel emaw an ti tlata’ a ti leh a.Engvangin nge Julie roomah an luh ngai loh ka hrethiam ta vek. 

‘A tha leh vek ang.I u hi chuan a haw lo che tih ka hria ania’ ka ti ve ngawt.A lu a thinga.

‘Min hua alawm, a nupui kha a hmelthaa.An inneih hma pawn an inzui reia,a duh over bawka..Ka lamah ka nu leh ka pa an tan tlat avangin min hua a..’ a ti leh a,a insut leh hraih. An luhlul dun zia ka hre thiam ve ruaka.Siamthat leh mai mai harsat tur zia pawh ka hmu thiam nghal bawk.

‘A tha leh vek ang’ ka ti leh sap.

‘Pasal i neih hma chuan hetah hian i thawk reng thei angem?” ka kut rawn vawn pahin a ti a. Hmingthana min puhchhiat zia ka ngaihtuaha,Serchhipah a awm tawh dawn lo anih chuan in khatah kan cheng ho dawna.Ka tuar chhuah zawh ka ring lo.Mahse, Julie mitmeng ngui leh zuai raih chuan ‘Aih’ ti lo turin min thunun tlat.Hreh takin ka bu ta nge nge.

Tlaiah Azuali a rawn kal a,chawei ve nghal turin ka lo ti ve hmiah.Pi te lah zanah bak an lo haw dawn si lo,Hmingthana a lo la let lo nangin engtik hunah pawh lo let thei reng a ni a.Azuali a awm ve chuan a zia deuh mahna.Julie natna kan sawi duna.Phai lam Damdawiin tha ber berah an kala.Doctor thiam an tih zawng zawng an pan bawka.Mahse, tu man a ke a hmang leh thei ang tih an sawi lo vek.

‘Sir Rindika be chhin la,ani hi a tha tawp asin’ a ti thut.Sir Rindika hi Doctor tha chungchuang zet mai a ni a..Pathlawi a ni a.A kum a tam tawh hle nangin kawm a nuama,kan Bathch ho khan kan ngaina em em vek.

‘Enge ka sawipui anga?” ka ti sap.Julie room lam ka melh zauh bawk.

‘Ka hre chiah lo.Julie hi a kal leh thei maithei asin’ a tih veleh,‘Aih, ka ring lo’ ka ti hul hak.

‘Hey,khatianga awm kha i inhmeh lo aw..Nia,a thei ang tih hi i inhmeh zawk’ a ti leh hlak. Thil engpawh a eng zawnga thlir thin ka ni a,mahse he In a ka awm hnu hian engmah a eng zawngin ka thlir thiam ta meuh lo chu anih hi a.

‘Beiseina dik lo ka pe ang tih ka hlau alawm’ ka ti sap.

“Naaah,’ Beiseina chu thiltihin a zui ang chu.Abak chu chunglam kut a ni tawh..’ Hei hi ka bulah khan nangmah ngeiin i sawi ziah a..Ngatinge nangman i follow mai loh ang?” a ti leh a.Ka lu ka thing ringawt.Mi tana thu tha tak tak sawi hi a lo awlsam tih ka ngaihtuah a.Mahni kuta tla erawh a harsa talh zel lawi.

‘Ka lo ngaihtuah ang’ ka tita nge nge.

‘Khawiah nge a awm a?”  a ti leh saw saw.

‘Tu maw?” Tiin ka hre lo der tlat. 

‘Tukin ami kha? Khawnge?” a ti leh a.Ka thle zauh.A landanah a duhzawng tak pawh a lo ni thei.Mahse, a kawptur chi a ni hlawl lo. 

‘A chhuak’ ka ti hmak.

‘I va han uikawm tak,lo star ve mai mai pawh i ui nghal tung ringawta’ tih pahin min rawn nema.Ka ner khum nghek.

‘Ui lo tak ka ni ,Bakah ui tur pawn ka ta ni hawt lo chuana’ ka ti a.Ka thenkhum leh a. ‘Enteh,tak takin nupui a nei lo mi?” A tih leh chuan ‘Nei e’ ka ti leh maia. 

‘Aaaa,tinge tha ka tih ve apiang hian nupui an lo neih hman ziah le?” a ti bai bai,za zetin ka lo nui kar kar thung. A nupui nen an inthena,a nupui a thianpa leh a nau bialpa hlui lakah a uire tih hrilh kher ka tum lo.

Azuali kal hnu lawkah Pi leh pu an lo haw a.Sangha thahnem fe an rawn hawna.Bawihpui’an mutchhuak chung chungin an huan kal chanchin min hrilh a.A hnuah min nghengin a muthlu ta nge nge.Pi te khumah ka mut a,kal leh mai loin ka en vang vang.Hmeichhia in kan vahte kan hmangaih zia leh kan duat zia ka ngaihtuaha,kei ngei pawh hian ka cousin fapa ka atchilh nasa.Ka nau tak tak ten fa nei phei se chuan engtin chiah nge ka buaipui ang ka hre lo.Bawihpuia pawh hi Julie tan chuan en nin a har dawn lutuk.Mahse, a nu tihsual vangin a Ni bulah pawh an kaltir ngai lo va.A nu bula a khawsa lo pawh a lainatawm tawh nen a Ni lehzel hnen atang pawhin duatna a dawng lo.Lainatawm reuh lutuk..Apa lah hian a ngaihtuah nep hmel bawk si.

Julie nen kan inpawhna a danglam ta daih.A chhungril natna,midang a share ngai lo anih ka ring a.Thil eng eng emaw ka hriatpui takah chuan ka en dan adanglama,engpawh ti se hriatthiamna nen ka thlir lo thei tawh lo.Hmingthana erawh ka hmu mang lo.Ka hmuh chhunah pawh ka be ngai lo.Hmuh loh der kual vel erawh tul ka ti bau lo.Hlauhna chhantur ka nei tlat lo.Julie min ngen angin Roomah hlir chaw ka ei ve a.In khata khawsa ho siin Hmingthana ka hmuh tlem phaha,ka thawveng huai zawk. Min puh dan tuihnai lo zet vang khan ka haw hlura, a nupui vanga Julie natzia ka hriat takah phei kha chuan ka huatna a zual sauh bawk.

‘Thingpui i in duh em?” min hmuh veleh u Dini’n min lo ti a..Sana ka en chuan dar 7 a pel tawha.Nidangah chuan tun ang hunah hian an tho hman vek tawh zel.Zan lamah Julie a mut that loh vangin a roomah ka riak ve ta ngawt kha ania.

‘Khawnge an awm vek a?” thut pahin ka ti a.

‘Serchhipah an chho vek..Thingpui chu ?” a ti leh a,Ka bu nghat.Enge Serchhipah an tih dawn thut ka hre lo.Hmingthana Trasnfer chungchang engmah an sawi leh bawk si lo. Bakah, nizanah pawh an kal dawn tih an sawi pawh ka hre lo hrim hrim.

Thingpui min rawn pek pahin a rawn thu ve a. Enge an tih dawn zawh ka tum laiin aman a sawi ta zawk.Hmingthana Driver a lo borala.Transfer tur vel an buaipui a fel thawkhat tawh bawk nen bungraw thenkhat lak pahin an kal tih a sawia.Ka bu nghat mai. Mahse, hetah a awm ve dawn tih ka hriatna chuan min ti tang nghal teuh thung.Julie hnenah lah ka awmpui ang tih ka lo tiam tawha,sut leh mai mai ka tum bau si lo.

‘I Phone kha…’ min rawn khawih zauh pahin u Dini’n a ti a.Ka phu zawk,mak tih hmel zetin min lo en reng tawh.Hahthlak,ka lo inngaihtuah leh veng veng pek !!!

Ka Phone ka en chuan  Sir Rindika a lo ni a..Min lo call chhan ka hria,Nizanah ka calla,a pick-up lo a..Chuvang chu a ni ngei ang.

‘Hello…’zangkhai thei ang berin ka ti a.

‘Tete,nizanah i lo call alaw?” a rawn ti nghala,Ka thensak.

‘Aw.Thil pawimawhah biak che ka duha,hun i neih chuan?”ka ti ve thuaia. 

‘Tunah hian darkar khat vel chu ka free khawp mai.Engthil nge nita?” a rawn ti dam thluam.

‘A thui lutuka’tih pahin ka nui a.A nui ve huk huk.

‘Anih chuan kan inhmu khat bawka,Lunch ei ho ila..’ a rawn ti leh a.

‘Azuali pawh…’ ka chhan hmain amah bawkin a rawn ti leh a.Ka ngaihtuah hian,Phone a sawi ai chuan a zia zawk ngei ang.Mahse, Azuali ka biak phawt angai.

‘Azuali ka lo be phawt anga.Min treat dawn chuan ready nghal’tichungin ka nui hak hak.A fel em em a,kum 50 mi vel a ni a,a nupui nen fa an nei lo.Engvanga inthen nge annih erawh ka hre lo. Kan training laiin, Hospitala kan duty na atanga hria kan ni a.Tu te pawn pa angin kan en veka.Thian angin kan en tel bawka.Kan nel em em vek.

Azuali ka biaa.Sir Rindika nen kan in biakna ka hrilh chuan ka rin loh deuhin a lo phur phiana,hun a neih theih tur thu a rawn sawi nghal zat zat.

Julie roomah ka luh chuan a lo harh tawha.Tun hnaiah a bialpa hluiin msg a rawn thawn loh leh a rawn Call chamchi a,Block turin ka ti a.Mahse, a duh lo bur.A luhlul zia ka hmuhin tihluih chi niin ka hre lo.Mahse, a nun a tibuaia.Haw mah se a hmangaih tih a awmdan danglam nasat danah a lang thei.Chutichung chuan a lo callin a pick-up ngai lo va.A msg engmah a reply ngai hek lo.

Lunch eiturin ka chhuak dawn tih ka hrilha,a bu liam mai.A nu te awm loh thu ka hrilha,an kalna ka sawi zawm leh mawlh mawlh.Min chhang loin a phone a en a,a bu liam satliah ringawt.

Sir Rindika hnenah Julie chungchang ka sawia.Mahse, a rilru lam erawh engmah ka sawi lo.Kal leh turin chance a nei em tih ka zawta.A medical Report hnuhnung ber ka ken ka entir nghal bawka.Uluk fein a thlek lai chu Thaw dep depin ka lo nghak thung.  

‘Ka sawi maithei lo. a rem chuan en nawn leh ka duh mange’ dahthlak pahin a ti a,a tarmit a nawr chho zauh bawk.

‘Pu ka lo bia ang.Mahse, tul loah beiseina siamsak erawh ka duh lo a’ ka tih chuan a  bu nghut.

Pute an lo leta,Hmingthana erawh a lo la let ve lo.A transfer Order ala chhuak chiah lo tih an sawia.Mahse, kartharah chuan engkim a fel an rin thu Piin a sawi mawlh mawlh.

‘Julie hi ka hmelhriat Doctor pakhatin en that a duha’ ka tih chuan Pi in a thil ei lai chawl meuhin min rawn en a.Pu erawh chuan a eizawm mawlh mawlh.

‘Tu nge? Eng Doctor nge?” a ti dam duam.Ka sawi chuan a  bu nghut. A lo ralhriat a.Mahse, Julie enkawl tur erawh chuan an lo la be ngai lo.

‘A tana tha tur anih chuan i duh duh tirawh.Kan sawifel tawh kha’ a ti awlsam then.

“Pa-a,tul miah loah beiseina siamsak lo vang.A rilru kan ti na mai mai’ Piin a lo ti ve vat a. ‘Tul miah lo a ni chuang hleinem,tun hnaiah phei chuan amah pawh a enga,a nui hmel pawh hmuhtur a awm tana.Tetei-in tha atih ang chuan tirawhse.Sawi nawn lo vang’ a ti hmuk.Pi ang deuh zuau chu a ena,a chip leh nghal hmak. 

Julie hnenah a Doctor ka thlak tih ka hrilha, harsa lutuk loin Sir Rindika Clinicah ka hruai thei ta hlauh.Test ngai engkim kan test vek..Engmah beiseina siamsak rih loh ka duh avangin hope nei zawngin engmah ka sawi lo..Test satliah angin ka kalpui tawp.

‘I luhlul hle mai ‘ Room ka chhuahsan tur chiah Hmingthana awin min lo ti a.Ka phu nasa lutuk,ka ding nghal chawih bawk.

‘Min ti phu alawm mawle’ ka ti nghal hmaka. Ka hnathawhna te fapa mah ni se min hmuhdan mak lutuk vang khan  ka ngeia, midang an awm loh chuan polite taka biak ka tum lo. 

‘Ka hria,thla nei la chuan i thlawk thui ngawt ang’a ti hmuk.A lo haw tih ka hre lo hrim hrim.Kalsawn tumin ka pena,mahse ka hmaah tak a rawn ding chut. Pi leh Pu bakah Bawihpuia leh Kimi,Jhanvi te Pu unaupa nupui dam lo tlawhin an chhuak veka.Kei leh Julie nen chiah kan awm tih ka hre ru kar.

‘Kan in atang hian chhuak rawh.Bang rawh ka tihna anih chu’ a ti leh a.Ka thaw haka,Engvanga min haw em em nge maw anih chai le?!

‘Ka bang lo vang’ ka ti ve hmak.Ka dak deuh vah bawk.

‘Takzet?!’ a ti hmuk.

‘Aw, nang ni loin hetah hian Julie vanga awm ka ni.Min mamawh bawk’ ka ti leh hmaka. 

‘Julie vang nge min neih i tum vang?” A ti leh chu ka awih thei lo zawk.Engvangin nge neih ka tum tehlul ang? 

‘Khawvelah hian nang chiah hi thlantur pawh awm se ka thlang ngai lovang che. ka ti ve sak.Ka ner zui nak bawk. 

Ka pen leh chiah chu  min rawn hnaih ruaka. Ka kawngah a rawn kuaha,amah si chetin min pawt hnai nghal dawrh bawk.Ka tal phat nangin min kuah nghet lutuk ringawt.

‘Min nei khawp ang.A chiang em? I duh leh duh loh ka ngaipawimawh miah lo,min nei ang che’ a ti hmuk hmuka,tawng leh nachang hre loin ka ding khawng lah ringawt.

Chapter- 5

 Min thlah thut chu pai dawrh bawk. A kalsawn chu ka en reng a.Ka nung nge nung lo pawh ka hre rih lo.Ka mit ka chhinga, duhthawh lutukin boruak ka hip kawk kawk bawk.

‘Tete..’ Julie-in ka bul lawk atangin a rawn tih chuan Ka phu leh vak.

‘Aw..’ ka theihtawpa in Control chungin ka ti a.Ka hawi leta,mahse pangngai taka lan ka tumna ka hlawhchham. 

‘Ngatinge? Thlahrang i hmu mi?” mengphawk deuh hra hian a ti a. Ka lu ka thinga,nuih luih hram ka tum nangin Chu pawh ka hlawhchham lehpek.

‘Khawnge i thil lak chu?” a ti leh a. Beidawng zetin ka dar ka tichhing ak ringawt.Engmah ka la la lo. 

‘Tak takin,enge dik lo awm a?” a ti leh chu Ka chhan hmain ka hawikuala,tu mah an awm lo.Tun lawka thil thleng kha hriatsual palh a ni zawk emawni? Mahse, engkim kha athlenga,ka mumang pawh a ni lo a.Hmingthana khan min kuahbet ngei bawka..

‘Tete…’ a ti leh a.

‘Engmah dik lo a awm lo.Ka va la ang,Roomah lo va lut la’ pangngai thei ang berin ka ti thei ta hram.Min en deuh vang vanga, ka thusawi in a hneh lem lo anih ringin ka lo tang ru teuh thung.Mahse, a bu ta nghat.   

Tim daiin choka ka pan pheia.Ka thil laktur ka la sawk sawka,Julie Roomah ka let leh nghal vat.Ka thil ken khum bulah ka dah chu Chik zetin min en reng tih ka hriat avangin ka hmelah engmah ti lang lo turin ka fimkhur ngang mai bawk.

Khumah ka muttira, a damdawi eitur ka pe a.Puan ka sintir nghal vek.Sofa-ah ka mu ve nghala,hmanni deuh atangin zan mut a harsata, a rooma riak ve tura min ngen angin ka la riak ta reng.

‘Ka u a lo haw tiraw?” a rawn ti thut. Ka en vata.A mitmeng fing zetah chuan engkim a hria anih ka ring nghal ngawt pek.

‘A tawng ri ang deuh ka hriaa..’ a ti leha.Ka harh deuh zawka,engmah a hre lo tawp ang.

‘Aw..Haw aniang,a Motor a awm’ ngaihsam hmel zetin ka ti liam puat.

‘Ka nu khan helamah an transfer a ti a’ min zawt pawh ni loin a ti leh a.Ka bu nghat.‘Hrehawm i ti angem?” amah bawkin a tih leh chuan tawng loin ka dar ka ti sang zauh ringawt.

‘A bula awm a nuam lo maithei.A thinchhe lutuka,bakah a tawng duh lo bawka.Mahse,a chhungril chu a tha..Aaaa,kha ramhuai pitar a neih hma khan ka tihna anih chu’ a tih zawm leha,a huatzia a hriat theih hial mai.

‘Tunah pawh ala hmangaih reng ang che’ amah hnem tumin ka ti ve ngawt.A chhungril chhe lutuk leh tenawm lutuk hi tun hnai maia a neih a ni lul lo vang.Mahse, Julie hnena sawi kher tul ka ti lo.Eng ang pawn sawisel thin mah ila kan thisen zawmpui annih tlat avangin midangin an sawisel ve chuan chhungrilah na a awm thin tih ka hre kar.

‘Ka hre lo..A nupui tenawm lutuk vang khan min hua tih zawng ka hria’ a ti zawi raih.

‘Lungngai suh, a Hmangaih che tih ka chiang lutuk’ ka ti leh a.

‘Maithei..A nau neihchhun,a duat thin kha ka la ni reng tho alawm tiraw?” a ti  ve a.‘Adik,a nupui in engang pawn a rilru thlaksak tum mah se a thlaksak ka ring lo’ ka ti leh ngial. 

‘Enteh,ka u nen hian in inkawmngeih em?’ ka beisei loh lutuk min zawh takah chuan ka thaw hak.

‘Kawmngeih vak lo.Ti nge?”  nui lui chungin ka ti a. 

‘Ka hrethiam chiah lo.Ka u nen hian inzawmna nei ang maiin ka ngai tlat zel che.A chungchang kan sawi reng rengin i confi thei lutuk tlat.Bakah,a mizia engkim hi i man lutuk niin ka hmu bawk che.Ka sawi awmzia chu kum tamtak lo inhre tawh in ang ’ a tita duah.Tawng leh mai nachang hre loin ka awm a.Ka landan tur ka ngaihtuaha,ka mawl hmel ngawt ta ve ang.

‘Ni lo,ka hre lo..Chutiang engmah a awm lo.Ka rindan ka sawi anih ka ring’ mumal lo zetin ka ti buai nuaih mai. 

‘Um..Nia,I rindan pawh a ni maithei.Enteh,hmanah chuan ka thiante hi ka u hmu tur ringawtin an lo len phah thin a’  nui hak hak hian a ti a. . Ka ring,chhe mawlh hek lo.Ni lo,a pawn lam landan chauh.

‘Engtin nge i hmuh ve hrim hrim?” a ti leh chu Sawi mai dantur ka hriat loh vangin ka nui a. 

‘Sawi ve la…’ luhlul zetin a ti leh talh.Ka sawi hma chuan min tur ngat ngat dawn tih ka chiang,a u ang chiaha luhlul a ni tlat.

‘Um..A liana,a pian a nalh bawka.A hmel pawh a chhe lo.Chuan,a pa kan tih ang chi hi ania.Mahse,a sual hmel’ ka tih takah chuan a nui nghal hawk hawk mai. Tiang taka za hian a nuih ka la hre ngai lo.‘Ngatinge? Enge nuihzat tur awm a?” ka ti ha mai.

‘Engmah,ka nuih zawk chu..’sawi mai thei loin a nui leh rih.Tihngaihna hre lo zetin ka en thung.

‘I ngaihdan diktak i sawi ve ngei kha,chuan maw..Cool deuh raih, luhlul deuh anga i lanna phenah khan i chhungril chu a naupangchhia ve tho bawka.Ngatinge tiang khan i lan mai loh? I duhawm daih zawk sia’ a tita duah. Eng chu nge maw a sawi ni? Ka tawngduh lutuk loh vang hian hmelhriat siam chu ka harsat ngeia,mahse cool chu ka cool hlawl lo.

‘Ka u chuan i mizia vang hian a hnaih ngei ngei ang che’ a ti leh a.‘Ngati maw?” ka ti vat.

‘Amah a luhlul vang hian amah engamah a ngai lo tu hi a ngaithei lo.Hrethiam em?” a mit a siaia.A awmdan vel chu a u nen thuhmun chiah.Sawi dik inti zetin a dak deuh vah bawk. A hriatthin hmeichhe dang ten an um zui thin angin ka umzui ve lo a.Ka ngaihven lo bawka. A induhtawkna a lo chhia tihna a nih chiah chu.Hreptak hian a…

Ka mu meng kar mai,muthilh ka tumna lamah ka mit a kham thum tawh a.Mahse, muthilh a hnekin ka la harh tak tawlh tawlh thung.Ka Phone ka hmet enga,zing lam dar 3 a pel tawh.Ka thaw hak mai,ka tho tham thama.Fridge lam ka pana,ka hawn chuan ka lak tum ber tui a awm lo.Damdawi leh thil chi hrang hrang Fridge a dah ngai chi a tam vang nge ka hre lo.A Roomah hian Fridge lian vak lo a awma.Tangkai lah a tangkai ngang mai bawk.

Choka lam ka pan chuan thawm a reh duk.Light engmah a in on lo nangin pawn lam light vangin thimchhe lutuk loin a hmuh theih ruak thung.Fridge ka hawnga,Tui bottle ka lachhuaka.Ka in nghal khawlh khawlh.Ka in zawh veleh ka dah luta,Fridge ka khar rualin kawngkhar dimte a khar thawm niawm tak ka hre thut maia.Ka khawng nghal lah mai.Tun ang hunah tunge ni ang? A thawm dim danah RUKRUK tum a ni ngei ang. 

Ka dinna piaha Hmunphiah awm ka laa,dimtein Living Room lam ka pan them thema.Ka va bih chuan tu emaw choka lam pana rawn phei ka hmu a.Ka thaw a tawp deuh chawt,mahse rei a ni lo.Nghet zetin ka hmunphiah ken ka huma.A lo luh rualin na theihtawpa hlap tumin ka lekkang sa vek.

A rawn hnai zel chu ka en a.Rukru tlangnel tak chu a ni phawt ang. Thawm a dim hle nangin a chevelah timna a awm lo hmel tlat.Pawi lo,ka lo hlap anga,a harh kawk mai ang,tu emawin vuak tumin a chang tih rin ngaihna hre hek lo le.A rawn hnai zela,a rawn luh rualin ka theihtawpa nain ka hlap pawp.A rum nghut.Ka hlap lehtur chu ka hmunphiah hmawr lamah a rawn mana,min phih nghek.Ka tlan deuh dawrh nangin ka thlah duh chuang lo.

‘Engemaw i tih le?” a aw ka hriat rualin ka tawp chawt.Hmingthana aw a ni chiang lutuk.Mahse, ngatinge tun ang hunah a lo haw chauha?! Ni lo,ka hresual a ni ngei ang.Ka che leh phata, ka hmunphiah ken ka pawhlet hmain Light a eng ta uara,nelawmna tel miah loin min melh run mai. 

‘Mam-a,enge nita rum rum?” Pi awin a rawn ti a. Zah vangin ral theih chu nise ka ral nghal vek ang.Mahse, chutiang a ni der si lo..

‘Tete,nangpawh maw?!’ mak tih hmel takin a rawn ti leh a. Tawng ka tuma,ka tawng ri thei lo.Ka bu ta ngawt. Hmingthana ka melh zawka,min lo la melh run runa,rang lutukin ka hawisawn nghal vata. Khawi laiah tak nge ka vuak fuh pawh ka hre lo.

‘Ka lo haw hun hi a fuh vak lo aniang’ a ti bung nghut. Zantir lam khan ka hmu ngeia,zak map loin amah nei turin min ti vel bawka.Mahse, tunah a lo haw chiah angin a sawi leh lawia!!

‘I Motor thawm pawh ka hre miah lo.Tete,Mambawihi a tha lo em ni? ‘ a tih zawm zat.

‘Aw..Aih,tha e.tui in ka tuma.Thawm ka hriaa,chuan….Rukru emaw ka ti a.Tun ang hunah chuan rintur dang ka hre lo a’ ka ti bah nak mai.

‘Akhai!! Mam-a hi a thianpa nu a thi a.A kala,I hre lo tawp tak ang’ a ti a.Ka hmunphiah ken a en a.Ka thlah vat.

‘Rukru…Tha hle mai’ ngeiawm zetin Hmingthana’n a ti a.En pawh ka en ngam lo. 

‘A awm ve tho alawm.Tun ang hunah te chuan..’ Pi bawkin a ti leh aa. 

‘Khawiah nge i Motor? I lo hawn lo em ni? Thawm engmah ka hre lo” pi bawkin a ti leha.A ke a chhiat vangin a thianten an rawn thlah tih a sawia, tih leh tur hre loin ka ding zum zat ringawt. 

Ka mu meng kar mai,ka vuak kha a na thawkhat ang tih ka chiang. Ka hmai a sa up up a.Zahna leh pawi tihnain ka khat vek.Kut ka thlak miah loh pawn min huaa,ka tan a ngeiawm tawk em em laiin ka kut a tuar leh ta bawk nen a chimawm zual sawt dawn tih a chiang.Mahse,enge ka tih chuan ang?Thei ngat ila chuan khawvar hmain ka bungrua zawng zawng nen ka chhuak ang. Ni lo,enge ka theih loh chhan? Julie..Nia,Doctor kan thlak chiaha,tunah ka kalsan thei rih lo..

Ka Phone a nghawr data,ka en vat. Whatsapp msg a lo ni a.’I Kutthlak a na hle mai’ tih a lo ni a.A number ka save lo nangin tu nge anih ka hria.Ka number a nei tih ka hre lo.Ka Phone ka dahthlak rualin a rawn ri leh a.Amah bawk a ni ngei dawn tih hriain en  lo turin ka insum tlat. Min deusawhna thu bak engmah a ni dawn lo.

Ka harh rualin ka  thuchhuak vat.Julie mutna lam ka en a,min lo en reng tawh.

‘Morning..I mutui lutuka,ka ko harh zo lo che a.Ka vawm ta mai che nih kha’ a ti a.A nui var var bawk.Khaw en hnuah ka muhil ta chauh kha ania,ka lo mu nghet mah mah a ni ngei ang.

‘Ka mu nasa hle mai’ tih pahin ka tho a.Mahse, ka mut that loh zia ka hre ru kar.‘Ka damdawi ei a hun vang mai mai mawle..Ni lo se chuan mu reng mah la a pawi lo’ a ti leh a.LALPA le(h)..Dar 8 a ri tawh tihna..

Ka chhuk vata.A damdawi la turin Fridge ka pan nghal rawk rawk. Ka inthiam lo ru ngang mai bawk.Tuktin dar 8ah damdawi a ei ziaha,chu mi zawhah a inthiar nghal thina,mahse tukin chu zingah engmah ala ei lo.eng ka ti zo ta nge mawni?

‘Lo ei la..Thingpui ka va la ang’ ka tih chuan‘Ka in tawh lawm,Jhanvi’n min rawn pe a’ a ti awlsam leh mai. Ka inthiam lo lehpek.Ka hna ka tlin lo niin ka hre bawk.

‘A van zia lo tak..Thawh ka hai ngai mang lo asin le’ ka ti niah niaha. 

‘A ho em mai,I lo awm hnuah thawh i hai vawikhatna a ni ang chu.I chau anih kha..Chairah min dah la,ka inthiar lawk ang’ a ti leh mai. A sawi dik,ka awmtirh atangin tun bak hi hunbi lo angin ka la awm ngai lo. Mahse, chu chuan ka inthiam lohna a tireh chuang miah lo.

Nizan thil thleng kha ka ngaihtuah zawngin ka hmai a sa lehnghal hat hat thei.Engtin nge ka hmachhawn ngam ang? Ka biru kumkhua thei dawn bawk si lo.Thil hriatchhuah ka nei thuta.Ka Phone ka en chuan ka  rin ang ngeiin nizana msg rawn thleng leh kha amah tho a lo ni a.‘I pasal ka nih hunah chuan nupui zawkin min vuak ka duh dawn lo ania’tih hi a lo ni a, ka phone ka thehthla nghal daih.Hrep tak hian..Ka rin ang ngeiin min nuihsawh ta chiah.

‘Vawiin kha Doctor lo kal hun tur kha a ni em?” chaw kan ei laiin Puin a ti a.Room atanga chhuah ka huphurh tehreng nen ka chhuahin Hmingthana a lo awm lo hlauh mai.Chaw kan ei thlengin ka hmu ta lo va.Ka thawveng hawk. 

‘Aw,Sunday hi a free deuha.Tlaiah a lo kal ang’ ka ti thuai. .‘A that chu,Kan lo awm ve a tul em?’ Pu bawkin a ti leh a.

‘Ka hre lo le.Test result kha amah ngei lo kala sawi a duh tlata’ ka tih chuan ‘Um..Anih chuan lo awm ila a tha ang.I pi nen chhuah kan ngaia,mahse kan lo haw hman tho ang chu maw” a ti leh a.Ka bu nghat.Piin eng eng emaw a sawi zuia,zan lama thil thleng kha a sawi chhuah mai ka hlauh nen engmah a sawi ta lo.

Chawhnu dar 3 vel thlengin Hmingthana ka hmu ta lo.A thianpa nu thihna lamah a kal anih ka ring ve tawp.Lo haw tawh lo tawp mah se pawi ka ti hek lo. Ka ngaihtuahna a Atthlak mang e..An In a ni a,a lo haw dawn chiang lutuk.

‘Mamma,enteh..Hei hi A nu ania’ tih pahin ka hmaah Album a rawn lek hnaia.Ka en vat.Hmeichhe hmeltha lutuk ka zuk hmuh rualin engtin mawni ka awma.Ka awm a nuam lo nge pawh ka hre lo.A hmeltha takzet. Ka vawikhat hmuhna a ni a. Ka lo beisei ai pawn a la hmeltha zawk cheu.

‘A hmeltha e’ ka tichhuak sap.Min rawn en a,ka mal chungah a rawn lawn thata.

‘Ih maw..Apa chuan nangmah i hmeltha zawk a ti a..A ni Kimi pawn ’ a ti leh a.Ka ip chawih mai.Naupangin dawt an sawi ngai lo kan ti thina,anih chuan Hmingthana’n hmeltha min ti tihna..Ka awmdan a dik lo.  ‘Tak tak maw?” ka ti thei hram.

‘Aw, Apa in a sawi alawm’ ngaihsak lo tak hian a ti leh mai.

Album a keu zela,a titi liam bawka.Kum thum leh a chanve lek la nimahse a kum phu loin a kawm tlaka. A fing fel em em bawk.Thu a awih a,naupang fing lutuk an ngeiawm theih nen ani hi chu a ngeiawm leh lawi si lo.Kan inhriatna a la rei lo,mahse min ngaina em em a,keipawn tihtakzetin ka ngaina tawh tih ka inhria.Min hmuhtirh atangin ‘Mamma” tih bakin min ko duh hek lo.Ngaiah ka nei titih tawh hial.

A thil ken a thlauh tap chuan ka en vata,a lo muthlu daih chu niin..Ka pawm thaa, a thaw sak sak mai.Kimi a rawn kal a,Album tla a chhar chuan a ner nang mai.

‘Hei hi Bawihpuia lakchhuah alaw?” a ti a.Ka bu ringawt.

‘A nu a entir che mi?” Tih pahin a hawi zak zak mai.

‘Um.A hmelthat zia kha’ka ti halha, ka insum hman lo.‘Nia,a hmel chu a tha’ ngainep hmel zetin a ti a. ‘Kan dahbo daih ange,a lo la chhuak leh thina.Mam-a hian a hmuh ka hlau thin’ a ti leh chuan sawi ve tur hre loin ka ngawi reng. 

Dar li rik hmain Sir Rindika leh Pute an lo thleng rual titiha.Ka inhmelhriattira.Pu in a lo ralkhat hriat ang bawkin Sir Rindika pawn a lo ralkhat hriat ve a.An hmelhriat tutu emaw chanchin sawiin an ti ti dun hlut mai.

‘Thil pawimawh deuh mai a test resultah hian ka hmu a’ a ti charha. Ka lo thaw dep dep mai.Beisei a bo tih min hrilh turah ka ngai nghet hmiah.Phai lam Doctor tha an tih zawng zawng pawn an en tawha,Mizoram Doctor hian phai lam Doctor thiam ho beidawn hnuah eng a tih theih ka ring lo.

‘Beiseina chhete a awm niin alanga’ atih chuan ka  phu zawk.

“Tak tak maw?” Pi nen kan tirual thawt. 

‘Kal lehna chance hi 10% vel a awm.Mahse, amah a pawimawh dawn a ni” a ti leha.Ka lawm lutuka, ka hamhaih vek.

Pi hmela lawmna langchhuak chu ka en a,min rawn en ve a.Lungchhe deuh a ang.Sir Rindika’n amah engmah la hrilh lo turin min ti hlawma.A beisei ang a thleng ngei dawn em tih a hriat loha,a kal thei ta si lo anih chuan a beidawng lutuk ang tih a hlauhawm tih a sawi bawk. A sawitum kan hrethiam vek..

‘Ka kal ange’ Motora kawngkhar hawn pahin a ti a.Lut mai loin min rawn hnaih leha.‘Hman atang khan i lakah hian beiseina sang tak ka neia.Ka beisei ang ka hmu dawnin ka hria,I tha takzet.I Damlo enkawl hi a vannei thlawt ania’ a ti dam duam.Ani hnen atanga fakna dawn hi a namai lo. Ka lawm veng veng ti ila a dik ang.

‘Ka lawm e’ ka ti zangkhai vah.

‘Naktukah min rawn hmu la,atha em?” a ti leh a.Ka bu nghauh.

‘Ka kal ang..’ a ti leh a,Ka darah a rawn beng thak bawk.Ka ngai haw lem lo,pa leh thian en a ka en anih tlat avangin.

Ka Room kawngkhar inhawng thawmah ka hawichhuak vata. Ka beisei loh lutuk ka hmuh rualin ka tho nghal vat. Kawngkhar a khara,a locked nghal hmak.

‘Enge i duh?” ka ti nghal hmak.

‘He Roomah hian duhtur dang vak a awm pawh ka lo hre hleinem’ a tih chuan ka ner nawk.Julie test result vel vang khan ka hlim lutuka,Hmingthana lam ka lo mangnghilh hmak. 

‘Eng lo,nizan thil kha..’ka ti tan nghala. 

‘Nia,I vaw na thei khawp mai’ a ti leh maia. ‘Pawi ka ti..Ka rindan chuan…’ ka sawi laklawh laiin ‘Sawifiah chiam suh.Nizanah i sawi tawh kha’ a ti khera. . Ni dawn tak,enge sawifiah tur awm hrep ni a?

‘Anih chuan enge i duh?” ka tinawn leh a.‘Nangmah i nih loh chuan enge ni ang?”  Min en reng chungin a ti a. Thil a sawi tlang leh lutuk hi ka insiamrem hman thin lo. 

‘Min hrethiam la,inchhaih kualna hun ka nei lo.I hmuh ang hian ka lo inremfel vel meka’ ka ti nghat.Khuma ka thawmhnaw let deuh ram chu a melh zawka.

‘Kha putar kha tu nge?” a ti ta hmuk.Tu nge a sawi ka hre lo.

‘Tu putar maw?” ka ti hmaka. 

‘Nichina Romantic zeta i thlah kha’ a ti leh chu ngei lutukin, ‘Oh…’ ka ti halh ringawt.Sir Rindika a sawina a ni tih ka hria. Khawi lama romantic chu a!!! 

‘Ka thil duhlai a lo beisei ve kha ka lawm tehvak lo’ a ti leh chu ka melh nghek,engtin nge tiang em em hian a rilru a tenawm theih zawk ni? ‘A chhungril chu a tha’ an ti maw?! Teuh lo lutuk.A engmah hi a tha hrep lo ve.

‘Eng nge i duh?” ka ti ram hmak,A kekawr ipte zenin a dinga,min rawn en chuan a  hmel chang zetah angaihtuahna engmah a lang lo.

‘Vawi thum’ a ti sup.

‘Enga?!” ka ti ha mai.

‘Ka lo luh hnuah vawithum min zawhna” a ti duh ta lek. A va han ngeiawm ber tak.

‘Anih chuan sawi la, i nau tana thawk pawh ni ila hetianga i duh duha i chhaih kual tur ka ni lo ania” khauh farin ka ti a. 

‘I hre na nge?” Ka thilsawi dang zawng haiderin a ti a. 

‘Hre lo,hriat  kher pawh tul la ti lo.Mahse i kal duh loh tlat vangin i sawi a tha ang’ ka ti nghat nghata. .Ka beisei loh deuh hian‘Tehreng mai’ a ti leh mai. 

‘Anih chuan sawi la’ dawhtheihna tlachham ngawih ngawih hian ka ti a. 

‘A hmanhmawhthlak loh’a la ti ta. Ka tlin tawh lo,

‘Chhuak rawh’ka ti ta thlawt. Min rawn en a, 

‘Ka duh hunah ka kal mai ang.Hrilh nawn ka ngai lo ania’ a ti awlsam then.Min rawn pan hnai chiah chu ka  tawlh let hrat thung.Mahse, min rawn hnaih zel tho.Ka ngaihtuah chianga,engvang mahin tlanchhiat nachhan tur ka hre lo.Julie pawn a sawi kha.Ka induhtawk avangin a u in min ngaihven ang a tih kha.

Ka ding khawng ta laha,min rawn hnaih chu ngaipawimawh lo hmel zetin ka dak deuh vah bawk.Min si deuhthawin a rawn ding a.Min en chhuk run maia.Hlau lo niawm takin ka melh let ve ran  bawk.Kan in en ren rawn hnuah a nui ta suk.

‘Ka hlauh che i ring anih chuan i tisual ang’ mahni inringtawk zetin ka ti dam thlap.A thle zauha. .

‘Min hlau lo la ka duh zawk ang..Chuan…’ sawi zawm loin ka kawngah a rawn kuah thuta.Min pawthnai nghal rawk..Ka khabeah a rawn dawma,amah en thei turin min kuai daka.A kut zungpuiin ka hmui a rawn tuai zui takah chuan ka  hamhaih lutuk,chet nachang hre loin ka ding mawl tawp.

‘I hmelthat zia hi an hrilh tawh ngai che em?” Zawifiah takin a ti a. A ni tak tak.Bawihpuia khan a sawia,Apa in hmeltha min ti..Engemaw sawi tumin ka ang hman ziaua,mahse a rawn kun hniam thuta.A hmui lum ham hamin ka hmui a rawn si a.

MAMA- 6

Zei taka chet a lak takah chuan ka awmdan ka hre thiam lo.Ka khup a zawi huaia,chhan let emaw hnial zawk pawh engmah ka ti lo ve ve.Ka hmui hnuai lam a rawn liak chiah chu ka ip chawih.Hetiang hi a thleng tur a ni lo. Ka rilru a rawn fim rualin ka thle sawn nghal phata Ka nam nghal nghek bawk.A thaw hawk nangin min kuahna a thlah chuang lo.Ka khabeah bawk a rawn vuan leh chu hawisawn ka tuma, mahse avuan nghet lutuk. A mit thim raih chu ka en a,a sexy lutuk mah mah avangin ka en rei ngam lo..Engthil nge maw ka tih tak le?! Ka zam dam em em hi a mak zawk,hetiang hian ka la awm ngai hauh si.Ka khup a sai zui leh dar dar mai.

‘Ka rin ang chiah..’ a tih chuan enge sawi a tum ka hre lo,mahse a awkiah khan hmuhsitna emaw ngeiawm lam pawh engmah a awm lo ve ve.A damin hriat a nuam hle zawk.

‘Hey, ih. .,min thlah rawh..’ ka ti nawi nak mai.Pangngai taka tawngchhuah ka tum vei nen ka hlawhchham thak.

‘I duh tak tak em?” Tih pahin a kutzungpuiin ka hmui hnuai lam a rawn tuai leha.Ka tum loh lutukin ka thaw hak,a then nghal suk thung.

‘Cute lutuk mai..I inkhar khipna hi hawng tawh rawh,tu emaw tal an lo lut duh tih hria la’ a ti leh a. A sawi awmzia ka man lehpek lo.

‘Maw?” ka ti ha mai.Min chhang loin min pawt hnai leh salha.A Pian nalh tak thlawp zaihin min kuah bet zui nghal hmaka. A chet dan engkim mai hi a tir atang khan hnial zel tur ka ni tih ka inhria.Mahse, eng thil nge min mawlh tu ka hre lo.Hnial loin a thusawi ka ngaithlaa,a che zui zel pawh ka dang hek lo.

‘Tu emaw i thinlunga i lakluh vangin i thi dawn lo ania.Hawng la,a hmasaber nih ka duh bawk ania” a ti leh ta a. Ka khap fak fak ringawt. Tun tum chu engmah ngeiawm lam a awm lo.Mipain hmeichhia a biak dantur a ka lo dream thin ang chiah a ni a. Zaidam takin amah nena inzui turin min sawm a..Thil dik lo engmah a awm hek lo.

‘Aw nge Aih?” a ti leh chu ka  melh zawka,hriatthiam har taka min lo en reng ka hmuh rualin ka hawisawn leh vat.A khabe ruh kual lian leh nalh zet ka en ta zawk.Hmul engmah awm loin a fai veka,mahse hmul tona hnu a dum kual raih thung.

‘Ka…eng lo,Aih,kan inmil lo ang’ ka tita ngawt.

‘Ahh,kan tum chhin thei ang chu’a ti leh ta tlat. 

‘Min thlah phawt rawh’   Ka tih chuan ‘Min chhang phawt la…’ a ti ve thunga. 

‘Min thlah hunah ka chhang ang che’ ka ti ve tlat.Ka beisei loh takin min thlaha,min thlah tura ti si khan min kuahse ka la ti zawk nge pawh ka hre lo. Ka tawlhsawna,kan inhnaih lutuk chuan ka normal thei hlawl lo.

‘Le..’ a ti leh nghuta. Zaidam zawk hian reitak a tawng thiam lo niin ka hria. 

‘Kan inmil lo ang.Bakah,min ngai mawl em mai’ ka ti deuh hmak.Inti huai luiin a mitah tak ka en lui ran bawk.

‘Mawl a? I sawi tum ka man lo anih hmel’ a ti a. Ka then sak. 

‘ Hmeichhe dang anga i tawngkam tlemte vanga tlu ngawt tur hmuhin min hmu kha mawle..Atthlak lutuk’ ka ti dam thlap.A ner nawk thung.

‘Anih chuan hmeichhe dang ang bawk i ni tihna a ni mai em?” Tih pahin ngeiawm zetin a mit a siai zauha. Tun lawka ka awmdan nen khan hetianga tawngkhum hi chu ka inhmeh tawk chiah.

‘I ngaihdan le…’ ka ti hmak.A nui suka. 

‘I ni lo..Hre reng rawh,hmeichhe dang nen in in ang lo’ a ti ta a. .A awki  nghet churh chuan a ti tak tak anih rinna min pe ve ngawt bawk.Hahthlak hian a…

‘Kal tawh rawh’ ka theihtawpa pangngaiin ka ti a 

‘Aw nge Aih?” a ti leh cheu. . A kekawr ipte a zena,a hmelpa leh chang zetah chuan ka chhanna anghak reng tih a lang a

‘Aih…’ ka tih takah chuan rang vut hian ‘Aw tihnaah ka pawm e’ a ti a,ka melh vak.

‘Aih tih awmzia chu ‘Aih’ animai.’Aw’ a ni ngai lo” ka ti bak hlak. 

‘Chuvangin ‘Aw’ tihmai a awlsam ang”a la ti lehzel. 

‘Misual leh tenawm’ ka ti sapa,.Thildang sawi maitur ka hre hlawl lo.

‘Dik chiah misual leh tenawm ka ni.Mahse, I chhungril ka hria.Hmeichhe dang nen in in ang dawna i hriat vangin min hnial talh duh suh.I hmeltha tak leh i thusawi a inmil lo ania.Mahni leh mahni inbum tum hahthlak zia chu maw,tunah pawh khan i hah em kha ’ mahni inringtawk lutukin a ti duh lek.Chhan tumin ka ang ziaua,mahse ka chhan rei leh a chhuak har ting mai dawna.Awmzia a awm lo.Ka chip leh ta hmak.Ka ngaihtuahna hria ni awm takin a nui leh suka.Min rawn pan hnai lehnghal zat. Ka tawlh let hrata,khumin min lo dan takah chuan beidawng ru zetin ka ding khawng ta lah.Ka zamzia a hriat loh nan ka inkuangkuah fel than bawk.

‘Min khawih miah suh’ ka bul a rawn thlen rualin ka ti hlaka. 

‘Tehreng mai..Mahse, thil ka hrilh ang che. nangmah kha nangmah ni tawp rawh.Kha tak khan min hip zawk.Chuan,Mamma pawh ini bawka’tih pahin  a rawn kun hniam thuta.Ka inrin hmain ka biangah a rawn fawp a.A ding mar lehnghal daih.Ka thaw a tawp lo chauh a ni ber. . Kawngkhar lam pana a kal chu ka en zui a,ka duh lo tih ka hrilh dawn nge ka kaltir ang pawh ka hre chuang lo.Ka mang muih a ni ber.

Kawngkhar hawnna a vuan zet tawh nangin a rawn hawi leh thuta,ka mitah tak a rawn en a.’ Single angin lo inngai hlek suh. Misual deuh pakhat duhlai i ni tih hrereng la,anih loh chuan i sawi ang tak tak khan ka sual lutuk ania’a rawn ti leh a,  hnehtu inti hmel chu ka en tlawk tlawk ringawt.   

Che loin ka mu a.Chung lam ka en vang vang,dimtein ka hmui ka khawiha,ka awmdan a danglam lehnghal ringawt. .Ka maimitchhin rualin a  hmui lum thar thar leh hnawng deuh chap kha ka mitthlaah a lo langa, min fawhna kha a dimin a dam hle bawka..Ka thaw hak mai, min fawh laia ka awmdan leh ka taksa a danglamna thleng kha mipa leh hmeichhia an in kiss laia thleng thin reng nge a danglam? Thleng tur reng anih chuan engvangin nge ka tana pawimawh em em Mipa lakah khan khatiang kha ka neih ngai si loh?

Min fawh lai khan ka khup a zawia,ka taksaah chakna niawm tak in min fana,ka rinchhan lo thei lo hial anih kha..Naupan lai atanga ka nu lehkhabu M&B chhiar ruk hrat em em mai ka ni a,tah chuan a changtupa pa leh mi hipna ngah uchuak,khawih mai pawh ni lo,an melh zawng pawha danglamna thlen thei mipa sexy leh chhe lo anni deuh ziah.Mahse, Hmingthana hi chutiang a ni ve thei lo.A paliana,a hmeltha tih em em tur ni lo mah se a chhe miah lo thung.A ngo tehchiam lo bawk.Mi hipna a nei em ka hre lo nangin hmeichhia tawh phawt chuan tha an ti lo anih pawhin chhia an ti kher lo maithei.Azuali pawn vawikhat hmuh naah a Star nghal chata.A sawi tawp hleithei lo chu ania.Julie pawn a thiante a u vangin an lo leng thin a ti bawka..Mahse, ani chu mi zawng zawng zinga chungnung a ni lo a,thawnthu a mi a ni hek lo.

Ka awmdan kha…Mipa ka la tawn tam tawk loh vang pawh a ni mahna le..Anih si loh chuan Film-ah leh Thawnthu chauha thleng thei kha keimahah a takin a thleng tihna nge? Aaaa,ka awmdan engkim mai kha hmeichhe dang ang tho a nep leh zahpuiawm,khawih hleka tlu nghal thei ang chiah ka ni ve tho.Chu vang takin ani pawh khan min zuam anih kha..  

‘Ka lo call hman tep che a’ Julie room ka luh veleh Julie-in a lo ti a.

‘Kia? ‘ zangkhai thei ang berin ka ti a.

‘Ka thianuin min lo biaa.Ka Birthday hi min rawn hmanpui an lo duha,engtin nge ka chhan ang?” a ti a.Naktuk hi a birthday tih tukin khan a sawia,ka lo hre tawh pek lo.

‘A tha ngawt ang chu ‘ ka tih chuan A hmui a peta,rilru buai niawm takin a kut a hmet niap niap mai.

‘A tha tak tak ang maw?” Inringtawk lo hmel tak hian a ti a.Ka bu nghat.A hmelah chuan phurna niawm tak alang theia,ka awm hnuah a thiante tumah an lo la kal miah lo.Mahse,a natna hi a rei deuh tawha ngaihven reng theih a ni lo te pawh a ni ang.

‘Anih chuan ka pa min hrilhsak la’ a ti ta a. Phur zetin a thiante chanchin a sawi zui siam siama.Kei erawh chuan thildang ka lo ngaihtuah daih thung.Tunah chuan Hmingthana hetah a awm nghet tawh dawna,engchen nge Roomah a tawm ang ka hre lo. Eng ang pawn tumse in khata cheng annih tlat avangin inhmuh hun ala awm ngei ngei dawn.

‘Tete…’ min ko riah ka en vat.Zawhna nei niawm takin min lo en a,tihngaihna hre loin ka dar ka ti sang ak ringawt. 

‘Enge i ngaihtuaha? Ka sawi i hre lo reng reng’ a ti zui zat.

‘I u mawle’ ka ti tawi taka. A mengphar deuh awk thung.Ka ngaihtuahna ka zep buai peih hek lo.

‘Ka u maw? Berkhera..I star ve ta deuh nge?”tichungin a nui ta kar kar.Ka ner saka.

‘Thinrim lo la,hetah i u a cheng ve tawh dawna.Anih chuan engchen nge hetianga khawsak i tum?” ka tichhuak ta hlawl. A meng tal tap mai.

‘Ka hre lo.Hmundangah kan awm daih mai dawn mi?” a ti ta sap.Achang hi chuan a ngaihtuahna hi naupang nen a in ang ka ti fo mai.

‘Enteh,ka sawitur chu a ni lo a.Mahse, hmachhawn la.I u nen hian tul miah loah hmeichhe pakhat vangin in inhmelma ringawta’ ka ti ta a.A hmel landan a inthlak a,‘Min ring loin khanu kha a ring asin,engtin nge hmusual se min tih theih zawk?” a ti ta hlar mai.Ka hmuh tirha hmeichhe nelawm lo leh kawlh hmel zet kha a ni leh tawh.

‘Ook..Ka hre thiam che lawm.Ka sawi tum zawk chu i u hian a hmangaih che a,nangpawn i hmangaiha…’ ka tih lai chuan,‘A tawk,nang aiin ka hre chiang zawk.Bakah nangin i siamthat theih chi a ni lo’ a lo ti chang fak. A sawi dik,engvangin nge kei hian siamthat ka lo tum teivet ni?

‘Sorry…Naktuk chu’ vei zui miah lo ni awm takin ka tita zawk.

‘Ka peih lo, hetah an lo kal a tul hek lo’ a ti leh hmak. A thusawi pawmpui niawm takin ka bu nghat a.Mahse, tum dan ka nei lawk tho,nichin lawk khan a phur zia hmelah alang vek a.A thiante ka be pawp thei tho ang. 

Julie ka muttir fel vek hnuah Pu ka be ta chauh.Pi nen Tv an lo ena,Julie birthday hmanpui tura a thiante lo kal tur thu ka sawi chuan an lo phur phian mai.Chawei nghal se tha an tih thu an sawi nghal rum rum mai.An fanu hi a lo inkhar khip rei tawh lutuka,mi pangngai anga ka a pen tan hi an lawm tih hai rual a ni lo.Mahse, keimah hian buaina ka nei.A thiante ka biak dawn chuan  an number ka mamawh. Julie dil turin amah berin tul a ti miau si lo.A luhlul zia lah hai rual a ni hek lo.A muthilh hunah a phone ka en ang ka ti ve ngawt kha ania,a locked vek anga.En ngaihna a awm lo ang.Pi hnenah ka dil dawn zuaua,an mahni hre mah se an number a neih ka ring lo..Tih theih pakhat chiah ka nei….

Khumah ka thu a, Hmingthana number ka en vang vang ringawt.Nichin atangin biak ka tum tawh.Mahse,ka la be ta chuang lo fo. A lo nei kher lo theia,zingah Julie lungawi hun nghah mai a tha ang..Ni lo,a lungawi mai mai dawn lo..Ka ngaihtuahna a insual buai hle ringawt…Call chuan ka be thei lo ang.

‘Ka be lawk duh che a’ tih ka type a.Ka delete leh hmain rang lutukin ka send nghal vat. khumah ka phone ka thehthla nghal daih bawk. Reivak loah a rawn ri kauh,ka lakang leh vata.Ka rin ang ngeiin Hmingthana.

‘Roomah lo chho rawh’ ka chhiar zawh rualin ka thaw hak mai.Engvangin nge a roomah ka kal kher ang?

Ka call ta zawk,mahse a pick duh der lo.Ka call nawn leh pawhin a reject hmak.Ka rum hak mai,ngeiawm lutuk mai.Msg a rawn thleng leha. ‘Roomah aw’ a rawn ti leh a.Ka ner nghek.

‘Julie chungchang ania’ tih ka thawn let a.Mak takin a rawn call back nghal vut!!

‘Ngati nge?” ka pick-up rualin a rawn ti a.

‘A thian tu emaw tal number i nei em?” ka sawi zawh rualin a thaw hawk ri ka hre nghal a.A beisei loh lam ka zawt tih a chiang.

‘Tu ber nge i duh?” dam thlupin a rawn ti a.

‘Ka hre chiah lo’ ka ti leh tawp.

‘Ok,I duh chhan sawi la…’ a rawn ti leh chuan ka  sawi ve mai bawk.

‘Ka rawn thawn ang che,Zotei aniang.A best ania ’  a rawn tih chuan‘Ok..Ka lawm ngawt ang’ ka sawi zawh rualin ring vak loin a nui a.

‘I bialpa nau tan anih kha.Lawmthu sawi angai lo’ nui chunga a tih chuan,ngei lutukin ka phone ka off nghal hmak.Tiang em em a chimawm mai..A bialnu angin min en a tum tak tak nge ka ngaihven loh vangin min chhaih kual a tum zawk ka man hlawl lo..Mahse, Hmeltha min ti..Nia,hmeltha min ti.Ka then ta sak.Hahthlak hian a….

Vanneihthlak lutukin a number min rawn pek ngei chu Julie be tu a lo ni a.Keimah ka insawi hnuah phur takin min rawn be zawma.Zanriah chaw ei nghal tura an tih thu ka hrilh chuan hlim takin a nuia,Julie ang rual vel,mi hausa fanu ve tho a ni ngei ang.Julie-in a huphurh deuh vanga thulh leh mai a duh thu leh ama hriat loha be pawp ka ni tih ka hrilha.Surprise a that ka rin thu ka sawi bawka.A phur zawng tak a lo ni zel.

Zingah pawh Julie Mood fuh loh dan ala ngai ta reng.Ka rin lawk anih avangin mak ka ti chuang lo.Nidang ang bawkin ka haider leh hmiah.Tlawn ka tum lo va,tih lungawi emaw tih thinrim belh ka tum hek lo.A damdawi eitur ka pe a. A mood fuh loh changa atih thin danin a ei duh lo.Nawrlui duh loin khum bulah ka chhawp saka,ka chhuah hnuah a ei dawn tho tih ka hria. Ka awmtirh kha chuan ‘damdawi ei awmzia a awm lo’ tiin a tang kawh tlat thina,atan a tha tih sawiin ka nawrlui ve thunga.A ei loh thak thak tum lah a tam.Mahse, hun a kal zela,a mizia ka hrechiang tial tiala.A luhlul hle chungin naupanchhia riauna lai a nei tih ka man ta thuaia.Ka pek tirhin ei duh lo mah se a hnuah a ei leh ziah tho.Nia,a ei ngei ngei tur a ni.

Pi nen kan buai ta char chara.Kan bazara,kan haw veleh tlaia an eitur kan siam zui leha.U Dini awm tho mah se Jhanvi che buai lutuk an vin vak vak mai chu hahthlak ka ti a.Julie lah vanneihthlak takin khum atang pawn a chhuk duh lo.A thawhventhlak mah zawk..Nidang angin Chairah thu duh se chuan room a rawn chhuahsan anga, kan awmdanah engemaw tum kan nei tih a hre vek anga,a buaithlak mai mai zawk.

Room kawngkhar bulah ka dinga,ka hnungah Julie best Zotei a dinga,cake a keng ran mai.Hmeichhe dang pahnih leh mipa pahnih an ding tel ve bawk.An vaiin Julie thian tak takte anni a.Ka lo beisei lawk ang chiahin mi hlun tak tak chhungkua ami vek anni hlawma.Vei an nei lo tlang bawk nen an bula awm a hahdamthlak takzet.

Kawngkhar ka kik chuan lut turin min rawn au a.A awah a Mood ala inthlak danglam chuang lo tih ka hre thei mai.Mahse, a thiante a hmuh rualin a inthlakdanglam vek dawn tih ka chiang tho.Kawngkhar ka hawng chu min en lo.Chet pawh a che eih lo.Thawm nei mang loin an rawn luta,khum lam an pan hnaia.Kei erawh thla la mai thei turin ka phone nen ka lo inring ve thung.

‘Ju…Happy Birthday’ Zote-in a tih chuan Julie che phat leh a inkhuhna puan rawn hai hawng nghal chu nui chungin ka en a.Ka beisei lawk ang ngeiin a hmel a eng nghal vek.

An ri ta chel chul maia..Thla ka lo la mial mial thung.Cake an zaia,ka awm ve leh awm ve loh tu man an ngaihven lo.Pawi ka ti chuang lo,a hlim hian ama tan a tha tih ka chianga.Tiang hian hlim reng se chuan a ke hmang ngeiin a kal hial tawh maithei.

A thiante haw hnuah reife roomah kan inkawm leha,ka hriat hnuah a vawikhat nan a tawng tawp hleithei lo.Hei hi hmana a nih dan thin pawh anih ka ring thlap. Chau takin Julie room atangin ka chhuaka,nilenga ka chet velnaah ka sil thuma.Thlan vangin ka ban chuap bawk.Mahse, Julie hlim hmel ka hmuh khan risk ka lak sual lohzia ka hriaa.Ka hlim ve veng veng tho.

Choka atangin tui intur ka laa,thawm awm loin in chhung a reh thuap tawh.Light ka Off a,ka room lam pan tumin ka pen nghala,mahse tu emaw lo lut tur ka su a. Ka awi that..

‘Hey,keimah..’ Hmingthana awin a ti nghala.Ka tawng hun pawh nghak loin ka kawngah a rawn kuaha.

‘enge i tih a?” ka ti sap.Ka tawng ring ngam  lo,kan awmna leh Pi te Room a inhlat tlat lo.

“Ka kuah che…’tih pahin hriatnuam zetin a nuia. 

‘Min thlah teh.Ka ban chuap ania’ ka ti leh sap. 

‘Pawi lo,nilengin ka hmu lo che ania’ a ti leh mai.Nia,nilengin ka hmu miah lo.Nizan vel thil thleng vang khan hmuh ka huphurha,mahse zingah ka hmu lo a.Niilengin ka  buai zui leha,Ngaihtuah chiamna hun ka nei lo hlauh.

‘Min ngheng la,I chau lutuk pawh a zia maithei ania.I virbuai nileng dawn tih ka hria alawm’ a ti leha..A tawng danah deuhsawhna lam engmah a lang lo.Pasalin nupui a duat dantur nen a in ang angem tih ka ngaihtuah zauh peka.Tawng leh mai tur ka bo lehpek tawh.

Ka tukhumah a rawn vuana,dimtein min kuah hnai leha,a awmah ka hmai ka phum ta kak.A perfume rim, rimtui leh mipa hman tura siam bik ngawih ngawih chuan ka hnar a rawn verha,a lungphu nghawr dat dat ka hre thei bawka.A awmdan chuan min fana,Duatna ka dawn vangin ka chau zual ta riauin ka hre tlat pek …..

MAMA- 7

‘Ka lawm e aw ’ atih chuan engchen nge kan din ngaiin kan din hman pawh ka hre lo.Engvanga lawmthu sawi nge anih ka hre hek lo

‘Ngati maw?” ka ti deuh ha a. 

‘Julie i nuihtir nasat zia kha ka hmu a.Mahse, hetah hian awmpui i ni lo tih hre reng la ka duh’ a ti leh a. .‘Ahh…’ ka ti halh ringawt. Ka chhip samah a rawn fawp zauha.Tiang hian kan awm reng anih chuan tuemawin min rawn hmu palh thei tih hriaiin Inlakhran tumin ka che nghal phata.Min thlah ve mai bawk.Mak takin ruak deuh huaiin ka inhria nia,Pathlawi zuna uai a na an tih kha keimahah a lo thleng ve ta nge ni?!

‘Mangtha le’ ka ti sapa 

Kal tumin ka pen nghal a,mahse ka banrekah rawn vuan lehin min pawt hnai leh nghal zat. Ka enchho a.Pawn lam eng in fiah vak loin inchhung a rawn chhuna,a hmel ka hmu chiang thei lo. Ka inrin hmain a rawn kun hniama, ka hmuiah a rawn fawp nghal chat. Engtin nge ka awm dawn ka ngaihtuah thiam lo.Chhang loin ka din ngaiin ka ding a. Dim leh dam lutukin min rawn fawp zui leha,ka insum theihna a thlawkbo nghal duak.Ka chhang let ve ta nge nge.

Amah zawk a in lahrang ta hlauh.Ka zawi vek nimaiin ka hria. Ka biangah a kut zungpuiin dimtein a rawn tuaia.Ka ngheng titih.‘Kal tawh rawh le,anih loh chuan i roomah ka riah ve mai angai dawn ania’ a ti a,.Ring vak loin a nuia. 

Shower hnuaia dingin ka maimitchhinga, Hmingthana hmel a rawn lang nghal zat. Ka hmai a sa zui nghal hat hat bawk.Ka induhtawkna leh ka chapona zawng zawng kha engmah lo mai a ni zo ta vek mai. Ka inti paukhauh viaua,mahse tun lawka thilthleng khan ka hnial thei lo tih a ti lang chianga. Engthil nge maw ka tih tak le?! Hmeichhe lepchiah leh nep zet ang maia ka khawsak ngawt ni?? Ka hmui ka khawiha, min fawhna kha ka la feel veng veng thei. Engmah tihluihna a awm hek lo. Mala boral hnuah tumah khatiang khan ka la awmpui ngai lo..Ka bialpa ve te pawn min kiss an tum apiangin buaina ka nei ziah zawk.Mahse, Hmingthana hi a danglam tlat..Min kiss pawh kha pawi ka ti em ka hre tlat lo.

Ka inbual zawh hnuah ka sam ka chhemro leha.Ka mu ta chauh.Zan tir lam atangin ruah a tla a.Boruak lum lutuk tur a tizia deuha.A vawt lam lek lek zawk.Ka mut fel veleh ka phone ka en a.Azuali msg a lo awm vang.Naktuk chawlh ka lak theih leh theih loh min lo zawt a,ka hriat loh thu ka thawn let ve nghal a. A rawn reply lehnghal zat.

“Nei teh,Reiek an tih danglam hmain kal ang u’ a rawn ti leh chu ka ner nak mai. Hna hi a thawk ve tho a,mahse chawlh hi a nei ngun em em lawia.Eng hi nge maw a chhuanlam zawhzai bik ni? Ka mutchhuak bawk nen msg ai chuan call ila a that zawk ka ringa.Ka call nghal a.Vawikhat chauh a ring hman tihin a rawn pick-up vat.

‘Chawlh i nei thei lehpek em ni?” ka ti thawr.

‘Nei e..A Harsa lo’ thawveng zetin a ti ham ham.

‘I chhuanlam a thing leh awm em maia’ ka ti ve hlaka. ‘Aaaa,ka pu a thi ka ti mai’ nui chunga a tih chuan ka  nui ve nghal hak mai.He nu tak hi chu..A pu te chu hmanah a thi daih tawh.

‘Chawlh chu la ve teh.Ka cousin te pawh an kal ve dawna. Zirsanga pawh a kal dawn ania’ nui chung hian a rawn ti a. Zirsanga hi a Pa u fapa a ni a. Kan ni ve zuai tawha,mahse Mala vangin hmalam ka pan thei hlawl loa, ka then a. Thian tha tak kan ni zui ta thung.

‘I sawi tepter em maia’ ka ti nangin Zirsanga a kal ve dawn tih ka hriat takah chuan ka kal ve chak ta riau.Tunah chuan Police officer a ni tawha,amah a palian bawka a nalh thei zuai zuai ngang mai. A bialnu pawh ka hre tho bawk.

‘Zingah dil la,chhuanlam tur chu a harsa lo.I pu tithi ve tawp mai rawh’ a rawn ti leh a,a nui zui leh kar kar mai.‘Chutiang ngawtin a awlsam lo aw..’ ka tih chuan a tlak karh a.

‘Ka ring, kha Pathlawi chhe lo em em kha a ham Strict dawn lutuk.Mahse, enteh..A chhe lo ngar ngar lutuka,min control char char dawn mah se a bula awm ka duh tho ang’ a rawn ti leh zat zata. Ka mitthlaah Hmingthana hmel a rawn langa,kan in kiss tawha,a bialnu turin min sawm bawk tih hria se engtin tak ngai ang maw? Ka ngaihtuahna vangin ka hmui ka pet nghek bawk.

“Naktuk zingah chawlh chu ka lo dil chhin ang,dar engzatah nge chhuah intiha?” ka ngaihtuahna nena inmillo zetin ka ti a.‘Dar 10 velah niang.Nia,tum ve hram teh’ a rawn ti leh a.‘Um..Mangtha phawt aw,ka mut a chhuak lutuk’ ka tih chuan min rawn mangtha ve a,Phone ka off a, muthilh tumin ka maimitchhing nghal hmak.

Chokaa ka luh rualin Bawihpuia’n min rawn kuah nghal chang chang mai.Pi in laklawh zetin Pre- Schoolah a dah a.Ka thu chu nise inah ala awm mai mai ang.Naupang school kal hma leh lutuk hi buaina mai mai ka ti ve tlat. Mahse, ka thu loh zia lah a chiang mai bawk si..

‘Mama,vawiinah Schoolah lo kal ve la’ min en kiau chungin a ti a. A sam dum tha zet chu a tle sar bawk.‘Aaaa,kei chu ka hman lo alawm.A-ni nen inkal leh anga’ nuih tlawn chungin ka ti a. 

‘A-ni te chu a lo kal ziah alawm.vawiinah duh duh a hruai theiha’ a ti leh a. A chhang ken a hmet nawi nauh nauh bawk.

‘Nakinah aw..A tha em?” Ka tih laiin ‘Mama te chu a buai alawm..Keimah ka lo kal ang,tunah chuan insiam a hun e’ Piin a rawn tita hlauh.Ka thaw huai mai.Naupang luhlul leh a tihtawh chu ti tlat anih avangin kal turin min ngen lui chiam ang tih ka hlau a ni ber. 

‘Kal ang le” tih pahin Bawihpuia a kaia,min rawn en leha.‘Tete,Doctor kha engtik nge i hmuh leh ang?” min rawn ti a.Sir Rindika khan hmu turin min ti tak e.Ka theihnghilh hmin hmak,Julie Birthday lawmna vel vang khan ka buai lutuk atin ni..

‘Vawiinah ka lo bia ang..Nimin khan ka theihnghilh chiang lutuk’ inthlahrung fe hian ka ti a. ‘A pawi lo,nimin kha chu kan buai em atin nih kha..Vawiinah i hmuh theih chuan a tha alawm’ awlsam zetin a ti liam mai. 

‘Nia,ka’n bia ang.Chuan,ka hmuh zawhah ka thiannu nen inhmuh kan tuma,chaw ka ei nghal ka ring bawka.Ka lo haw har deuh maitheia.A pawi angem?” ka ti tlang nghala,’Pawi nang,kal rawh.Chhuah thawven ve pawh i mamawh alawm,I chhuak khat lutuk reng reng.Damdawi eitur vel kha chu amah Julie khan a hrevek a ni lawmni?’ a ti awlsam leh then.Ka bu nghata. Ka awmrei ve ta deuha,an fanu ka enkawl danah an beisei ang ka phak ve te pawh a ni ang,ka duh ka tih hi an dal meuh lo.

Sir Rindika ka calla,dar 10 a kal turin min ti a.Azuali ka call lehnghala.Ka tihtur neih ka hrilha,ka rei dawn loh chuan min nghak thei a ti a. Henu tak hi chu a,a tihtawh chu ti tlat zel a ni bawka, min nghah talh atum pawh mak ka ti chuang lo.

Ka inbuala, ka inbual zawh veleh ka kalchhuahna tura ka thawmhnaw haktur ka enfel lehnghala. Julie thilei tir turin choka lam ka pan leha,Sana ka en paha. Hmingthana lo haw ala hun lo..Ka kalna tur ka hrilh ang nge hrilh lo ang tih ka ngaihtuahnaah a lo lut zawka, hrilh ka duhna leh ka induhtawkna a inzat reng. Inngaizawng kan ni tak tak em pawh ka la hre chiang loa,ani pawn a kalna tur zawng zawng min hrilh bik chuang loa,bialnu fel tak ang maia lo inreport deuh thlap chu tlawmah ka la deuh tlat.

Julie thilei tur ka pek pahin Doctor ka hmu dawn tih leh ka thiante nen tihtur kan nei tih ka hrilha,a bu nghat nghata,hlim takin nimin lam thil thleng a sawi siam siam a.A hmel eng sar mai chuan a hlimzia a tilang a.A inkharkhipna a hawn zau poh leh a ke a hman theih ka rinna a lian ting mai bawk.

Thil kan ei laiin Hmingthana a lo hawa,a thawm ka hriat rualin ka tang nghal teuh ringawt.Hahthlak!! Vanneihthlak takin chokaah  a rawn lut ta lo hlauh thung.Ka chhuah thlengin ka hmu  zui ta miah lo.Mi inngaizawng anga inngaihsak tura ka beisei anih chuan ka beisei sual ang tih ka hria.Hreptak hian…Kan inngaizawng nge min chhaihkual pawh ka hriatchian nek loh hi maw!!!

‘A nu leh pa bulah khan ka sawi chipchiar lutuk duh lo anih kha,mahse beiseina chu ka nei tak taka,amah a pawimawh dawna,hlim se.Tum se,amah ngeiin a thei tih hria se a tha chak ber ang.Mahse,beiseina thlawn kan siamsak ve palh theih avangin a kal ngei ngei dawn tih erawh sawi tul ka ti lo.A kal leh kal loh chu Pathian thu thu  a ni a,ama zarah Beiseina sang tak ka nei tlat.A damdawi ei lai hi lo eizawm zel sela,hma a sawn dan min hrilh zel la,keipawn atam thei ang ber rawn tlawh ka tum ang’ tiin Sir Rindika’n min hrilha,ani meuhin beisei tur awm atih chuan a beiseiawm tihna animai.Doctor Frank tak a ni a,tul miah lo thilah Damlo leh an chhungte tana beiseina siamsak a duh ngai lo a,chuvang takin hrechiang lo tu chuan an sawisel fo thin reng bawk.Mahse, kei chuan ka hrechianga,he line-ah kher kher hi chuan Mizo zingah ani aia rin zawk ka nei hek lo.

Sir Rindika ka hmuh zawh veleh Azuali’n min rawn lama,Midang min lo nghahna kan thlenin dar 11 leh a chanve a pel tawh.Mahse, kan kalna tur a hla lo a.Tlaiah chaweina tur an lo tifel lawk vek tawh bawka.Engmah han hmanhmawh em em atulna a awm lem lo.

‘Hey,Tete..Kan tha nge tha lo?” nui vur vur chungin Zirsanga’n min hmuh veleh a rawn ti a.A la chhe lo ta reng.

‘Tha e..Nang zawk?” a kut rawn pharchhuah vawn pahin ka ti a.Chik zetin min en a.A nui leh a.

‘Yes, tha alawm.Zuali,vawiin chu Tetei hi ka rualin aw..’ Azuali en pahin a ti a.A bialnu zawngin ka hawikual ve thung.

‘Ama thu thu kha nimai’ awlsam zetin ani lah chuan a lo ti a.Mipa pakhat,sang tha zet nen an inbe mawlh mawlha,min hnungchhawn avangin tu nge anih ka hre lo.‘Hmanlai angaihawm alawm..Tiraw?” a nui huk huka a tih chuan ka nui ve hak mai.

‘Achangtu nu a thinrim palh chuan aw…’ ka ti hlaka.‘Ho lutuka,a lo kal ve chuang hleinem’ awlsam zetin a ti a. ‘Bakah,thiante an thik zel chuan tha nang’ chhan tuma ka an ziau laiin amah bawkin a ti leha.Engmah sawi loin ka bu ta zawk.Hmingthana leh a nupui hlui inphur ve ta se tih ka ngaihtuah hmanhmawh,ka ngaihtuah zawng pawn ka awm a nuam lo nghal ringawt bawk.

A hmun kan thlen veleh hmun remchang laiah Motor leh Bike an hung a.Ke in tlanglam kan panchho a. Hahthlak si,hlimawm si a ni ber. Boruak thar dawn ka mamawh zia ka  inhriatchhuah phah uar uar a ni ber..

Tlangchhip kan thlen chhoh veleh a thenin thla an laa, a thenin eitur an ken an ei mawlh mawlh bawk.Tlang sir lung phek hlai tha takah Azuali nen  kan thu duna,thlanglam ruam lang ut mai ka thlir thla vang vanga,ka rap deuh thuta,ka tawlh let a.Ka mu ta zawk.

‘Tu nge saw pa saw?” tih pahin kan kal hmaa a  biakpa lamah ka thle zauh.Ka thlekna lam a hawi pheia,a sam chhawlleng thliin a chem len dar dar chu a bengah a zepa.

‘Sangkima… Ni lo, Sangzuala zawk. Amuana te Coach tiin ka hria,ka chiang bik lo ’ a ti a. Amuana hi a Cousin tho a ni a. Basketball a khel nasa em em a. Mizo zingah chuan a lar ve viau mai. Inpawh tak kan ni lo a. Mahse, inhmuh nikhua chuan kan inbe ve ziah thung.

‘Anih chu mawle,I cousin te zinga mi niin ka hre bawk si loa,ka zawt mai mai che’ ka ti leha.Ni sa vawl vawl inhliah tumin ka mit chungah ka ban ka daha.Ka mit ka chhinga,ka mitthlaah Hmingthana a rawn lang nghal zat.

‘Ka lo thu ve…’ tih thawmah ka phu zawka.Rang fein tu nge anih en tumin ka mit hliahna ka lasawna,ni eng hliah zawnga ding anih vangin a hmel a thim a.Mahse,a dressah tu nge anih ka hria.Sangzuala kha…

‘Thu la…’ tih pahin ka thuchhuaka,a rawn thu sawp thla ve a.Kum 35 vel bawr anih ka ring ve ngawt.A pianphung vel chuan mak takin Hmingthana min hriatchhuah tir lehpek ta tlat.Aaaaa,engvang in nge Palian deuh leh piannalh tak,puitling tawh bawksi ka hmuh hian Hmingthana ka ngaihtuah zel ka hrethiam bau lo.

 Eng eng emaw sawiin Azuali nen an titi a,a khat tawka ka zawm ve zauh bak chu an titi ka ngaithla a.Midang an rawn thu veleha,an ri lelu mai.Hmingthana nen an in ang lo tih reilote chhungin ka hrechiang hman viaua.engvanga han compare ve ngawt nge maw ka nih hrep le a???

‘I Phone…’ min rawn nghawk zauh pahin Azuali’n a rawn ti a.Ka ipte atangin ka lachhuaka,min rawn call tu ka en a.Ka thaw hak mai.Ka pick-up hmain a tawp a.Vawi li lai min lo call tawh chu niin..Ka hre eih lo.

‘Kan kal thei em ? Midang an chhuak tawh hlawm a’ Zirsanga’n a rawn ti a. Ka bu nghat,ka ipteah ka phone ka thun a,mahse ka rilruah Julie a rawn lang zawk mai.Ka Phone ka phawrh leha,call back tumin a number ka tin hman tawh..Ni lo,Julie vang nise Pi emaw Pu zawkin min lo be ngei ngei ang.

‘I tha em?” ka hmai bula a kut hmehrik khauh pahin Zirsanga’n a rawn ti leha.

‘Aw…aih,eee..Tha…’ mawl hmel zetin ka ti buh nak maia. ‘Nawk nawk che chuan…’ nui chungin a ti a,ka then ve sak ringawt.

Kan chaweina hmun kan chhuahsan fel meuh chuan dar 8 a pel tawh. Ka haw har dawn tih leh chaw ka ei nghal dawn tih ka sawi lawk avangin nuam lo erawh ka ti chuang lo. Pawna kan din khawm laiin  Azuali an rawn calla,an Cousin pasal accident thu an rawn hrilha, ka Boruak nuam tak a inthlak nghal hlawk.

‘Thlah kher ka ngai lo ania,Taxi atam lutuk…’ Azuali hnenah ka ti a. A hmui a peta,a rilru a buai tih ka hria.A rilru tihnawm nan ka nui lui leh sak. A thaw hak thung.

‘Damdawiinah i lo kal tlang ve chuan kan awmdan tur kan hre si lo a,kan tlai viau maitheia…’ a ti niah niaha. 

‘Aaaa,min ngaihtuah suh.Taxi ka la mai ang ka tih chu,lo kal ve tur zawk ka nia..Mahse…’ ka tih lai chuan,‘Ngai lo,ngai lo…I thlen har lutuk chuan a buaithlak mai mai’ a ti leha.

‘Ka lo thlah ang,inah haw lawk ka ngai tho a’ rawn titu chu Ka en vat.Sangzuala a lo ni a,nelawm takin a nui var var mai.

‘Aih…Ngai lo, I buai phah mai mai’ rang zetin ka ti vat.

‘I kalna tur kha ka kal tlang dawn tho.Buaina tur a awm lo’ a ti awlsam leh mai,hnial leh ka tum lai takin remchang an lo ti hlawm vek chu niin..

Sangzuala tlan liam hnuah Gate bulah ka ding deuh vang vanga,Sana ka en a.Dar 8  leh a chanve a ri tawh.Gate ka nem hawnga,kawtah Motor a lo awm kim thapa.Bike a awm bawka.Hmingthana a kalchhuak lo a ni ngei ang. 

Pi leh Pu an lo awma,kan inbe luama.Julie Doctor nena kan inbiakna vel reilote kan sawi ho hnuah Julie room lam ka pana,ka thawhhlim atangin mut hmaa a awmdan engkim check vek hi ka ti ziaha,ngaiah ka nei tawh.Mu chungin Tv a lo en a.Nimin lam ang bawkin a hmel a la eng sar tho mai.

Ka Room kawngkhar inkhar thawm niawm tak ka hriat rualin ka thil tih lai ka tawp chawt.Thawm ngaithlain ka ding deuh vang vanga.Engmah thawm a awm zui lo,mahse ka ngaih a tha chuang miah lo..Ka intleuh sawk sawka,Bathrobe ka haa,ka sam ka tuam bawk.Dimtein Bathroom kawngkhar ka nem hawnga,ka room chhung ka en chuan tumah ka hmu lo.Ka thaw huai mai,kawngkhar ri ka hriat kha chu ka bengchhe ri a ni ngei ang.

Ka Bathrobe ka phelh rualin ka hnung lamah thawm a awm ve nghal zat,rang lutukin ka hawi let nghal zawka. Dressing Table nghenga Hmingthana lo ding ka hmuh takah chuan ka thaw a tawp lo chauh.Bathroom kawngkhar bul atanga ka en khan Dressing table hi Bathroom kawngkhar hnung lamin a hliah chiaha,chuvangin ka hmu lo a ni ngei ang..

Chapter- 8

Chet mai nachang hre loin ka din ngaiin ka ding a.Mahse, rei erawh a  ni lo.Rang lutukin ka Bathrobe ka laa,hmanhmawh nak alaiin ka zen fuh hleithei der lo zui.Ka hakfel veleh nghet takin ka suiha,ka inkuangkuah zui nghal than bawk.

‘Ka la hmu dawn tho a,zah viau a tul pawh ka lo ti lo a’ a tih chuan a awah nuihzatna lam engmah a lang lo.

‘Enge i duha?” ka theihtawpa pangngaiin ka ti a.A hmui a petsawi zauha

‘Zawhna common lutuk’ a ti zuia. .

‘eng maw common?” a awmzia hre loin ka ti a. ‘Min hmuh apiang hian enge ka duh min zawt ziah tih i hria em?” a tih leh chuan ka  inkuangkuah nghet salh ringawt.

‘Khawiah nge i phone?” amah bawkin a ti leh nghut.A rawn kal pheia,tul miah loin ka tawlhlet hrat.

‘I Phone…’ ka hmaa rawn din pahin a ti leha,a kut a rawn dawh bawk.A awmdan engmah ka hrethiam lo.

‘Ngatinge tunah i lo kala? Midangin an hmuh che chuan…” ka sawi zawh rualin nin hmel zetin a ner a. ‘Zawhna hi zawhna bawk hian chhang ziah lo teh.Khawnge i Phone ?” a ti leh nghut.‘Ka hre lo,khumah anih loh chuan ka Bag-ah aniang..Ngatinge tunah i lo kal?” ka tinawn leh a.

Min chhang loin min kalpela,khum lam a pana,ka Phone a zawng  tih ka hrethiam.‘Ka sawi chu,midangin an hmu che em?”kawngkhar lam en zauh pahin ka ti leha.A la inkalh lo zui,tupawh an lo kal thut thei.Mahse, va kalh ta ila rilru dang pu angin min ngai ang tih ka hlau.

‘Min hmuh chuan enge?” ngaihsam hmel zetin a ti a.

‘An hre palh theia…’ ka ti hul hak. ‘Hre rawhse,buaina ka nei lo’ ka sawi zawh hmain a ti leh hmuk.Ka Phone a lakanga,enge tih a tum ka la hrethiam chuang lo.Min rawn pan phei leha,a chevel ka en ringawt. 

‘Hawng teh…’ a tih chuan a lock hawng turin minti tih ka hria,mahse ka che lo.‘Kal phawt rawh,naktukah kan inbe dawn nia.A tlai tawh em mai,mut ka duha’ a sawi haiderin ka ti ve thung.

‘Hawng rawh,anih loh chuan ka riak ve hreh miah lo ania’ a ti leh a.Ka ip chawih pek.

‘Enge mw i duh chiah le?” beidawng zetin ka ti halh mai.

‘Nangmah,mahse tunah chuan phone hi ka check duh.Engvangin nge ka call i pick-up loh ka hre duha,min lo call lo tih chhuanlam i hmang dawn em tih hriat nan ka call na che i delete em ka en duh’ a tita duah. Ka beisei loh lam a sawi takah chuan ka thaw leh halh mai.

‘Ka lo hre lo a.Bakah ka kalna tur Pi hnenah ka sawia’ thiamchan tum ranin ka ti a. ‘Ok..A tha,mahse ka nu i hrilh vang khan keimah min hrilh tihna a ni chuang lo a.Chuan,ka lo call che tih i hmuh chuan i rawn call back thei bawka’ a ti leh zela.

‘Enge hmanhmawhthlak awm?”ka ti a. “Hmanhmawhthlak maw?” a ti a.Ka chhan hmain a che thuta,ka kawngah a rawn kuaha. ‘Enge i tih a?’ Tichungin talchhuah tumin ka che a.Mahse, awmzia a awm lo.

‘I bialpa dangte ang ka ni dawn lo ania aw. Ka bialnu hian enge a tih thin ka hre duha.A kalna ka hre duh vek bawk’thupe aw hian a ti a. 

‘Ni lo…’ka ti ringawt. 

‘Oh,ni e..Vawiin kha chu i hriat loh vangah ka ngai ang.Chuan, tinawn tawh suh ang che’ nghet churhin a ti leha.Sawi maitur ka hre lo. Ka khabeah a rawn dawma,amah en thei turin min kuaidaka.A mitah tak ka en lui ngar mai.

‘Mipa dang melh duhna i lo nei anih chuan i bansan dawn nia.Chuan, tuman ka thilneih min tawmpui ka duh lo’ a ti leh a.Min ngen lo a,thupek a ni zawk tih a awkiah a chiang ngang mai bawk. Ka rilruah a nupui chungchang zawk a sawina a ni em tih a rawn lut zawka,mahse zawhna siam turin ka huaisen nain a tlin ngang lo.

‘Kal tawh rawh…’ ka ti ta zawk. 

‘Ka la kal ang chu..’ a ti liam mai.

‘Aih, tunah…Mi…’ ka sawi zawh hmain ka hmui a rawn khar ta hmak..

Muhil thei loin ka let tawn seka.Ka delhna lam apiang a kham vel vek tawh bawk. Ka maimitchhin rualin ka mitthlaah Hmingthana a rawn lang nghal zat zela,engtiang chiaha inzawmna thuk nge kan neih ka hre lo nangin a landanah kha chuan ti mai mai hmel a pu tlat lo. Tukin khan ka kalna tur hrilh kha tul ka ti lo kha ania,mahse ka beisei miah lohin a lo ngaipawimawh si..Ka thaw haka, Mala nen kan inkawp dan kha a hahdam thina, inhauh pawh kan nei ngai meuh lo kha ania.Mahse Hmingthana nena kan awmdan hi chu chutiang a ni ve lo. A bulah ka inthlahdul thei lo a, a bialnu ka ni tih a tilang a,a sawi chung pawhin kan inkawp tak tak em tih ka la hrechiang chuang lo fo bawk.

Ka Phone riah ka harh zawka.Rang lutukin ka thuchhuaka.Ka Phone ka ban nghal vat.Ka pick-up hmain darzat ka en a.Dar 7..Aaaa,Alarm ri pawn min tiharh lo chu ania.Nimin lama tlanga kan lawnna velah khan ka lo chau ve hle a ni ngei ang.

Ka pa a lo ni a,kan thenawm Pitar boral thu min rawn hrilha, thisen inzawmna nei miah lo a kan naupan lai atanga kan pi anga kan neih ve tawp a ni a.A mit leh beng a tha vak tawh lo chungin ka haw hi chuan min hai ngai miah lo. A natna a rei tawh a,a boral ta ka ui na aiin hahchawl se ka tihna avangin ka lawmpui mah zawk. Chhungkaw lam thil eng eng emaw kan sawi nual bawka.Ka Pa nen  hian kan inkawmngeih em em a,ka unaute zawng zawngin ‘ka  nu’ an tih lai pawhin kei hi chuan ‘ ka pa’ ti zawk tlat chi ka ni bawk.

‘Tete….’ Pi awin a rawn tih rualin ka phu zawk.Ka thil ken ka thlauh lo chauh bawk. 

‘Aw….’ Pangngai thei ang berin ka ti a. Ka thil ken fridgeah ka dah fel te te.

‘Biak lawk  che ka duh’ a ti leh a. Ka va en chu a hmel a dik lo.

‘Aw…’ ka ti leh ringawt.

‘Libraryah min rawn zui ta che’ a ti leh a. Julie chungchangah dik lo a awm nge ni ang? Mahse tun lawkah khan Julie room atangin ka chhuaka,engmah dik lo a awm lo. A hlim viau zawk anih kha.

Libraryah ka zui luta, ka hawikual vel a,room lian lo tak a ni a.Banga Lehkhabu dahna chhuarah Lehkhabu chhah pui pui a khat thuta,Dawhkan lian lo tak bakah Computer leh Printer a awm bawk. Inleng a neih  changin hetah hian a kawm thin tih ka hria.Library a ni nangin Pi Office a ni mah zawk. ‘Thu rawh…’ a ti a. Dawhkan bula chair lamah a thle zauh. A khawsak vel dan chuan ka awm a tinuam lo ve ngawt.

‘Julie enkawlna velah hian kan pa sawi ang khan tha i tih ang apiang ti la,sawiselna tur kan nei lo a’ a ti dam thlap. Eng nge sawi zel a tum ka la man chuang aih lo..

‘Mam-a hi enge i ngaihdan?” a ti leh thut..Ka hawichhuaka,a mitmeng fing leh melh na zetah chuan ka rilru hriat a tum tih ka hria.Engtizawnga chhan tur nge ka hre lo,nizan kha chuan Hmingthana khan tu pawn hria se pawi a tih loh thu a sawi ngeia.A nu hian a lo hre tawh nge ni ang? Zawhna hlir..

‘Engtizawngin?” ka tih chuan a mitko a tisang ak a.

‘Julie nen an boruak hi mawle..Harsatna a siamsak che em?” A tih chuan  ka thaw huai mai.‘Aih,siamsak lo…’ rang vatin ka ti a. 

💜🖤❤️

‘Anih chuan an unau awmdan hi kan sawi kher ngai loin i hriat ka ringa’ a ti ban charh.Nu induhtawk tak a ni a.A fate chungchang midang hnena sawi a duh loh tur zia ka hria. Midang tihah pawh kei,an fanu enkawltu,Nurse satliah ve mai bulah phei chuan a harsa lehzual ang.Mahse, a sawi tlat lawi!!

‘Tun aia boruak tha zawk hi nei se chuan Julie tan pawh hian a nawm zawk ka ringa. A Hero thin a ni a.Mahse, tunah chuan Hmelma ang maiin a en a.Mam-a lah a luhlul luat avangin Julie han tlawn kual vel a tum bau bawk si lo’ amah bawkin a ti leh duah..

‘Enge titura min duh?” ka rilru a lo lang hmasaber ka sawi tawp.Mahse, ka sawi zawh rualin mawl ka inti lehnghal zat thung.Nu leh pa pawn an siamthat theih loh kha keiin ka lo siamthat thu a awm lo..Mawl lutuk. Inngaihtuah fim hmasa lova ka rilrua lang apiang sawi ka ching hi ka sim ngei ngei a ngai..

‘Julie hian a u hi a huat loh ka duh’ ka beisei loh zetin a ti leh a. Mawl min ti hmel hmuh ka inrin laiin chutiang engmah a hmelah a lang lo!

‘Mahse..Keiin Julie rilru ka thlak theih ka ring lo..’ ka ti thuai. 

‘Tunah chuan a harsa maithei,mahse nang chuan hmana a mizia kha tunah tlem tlem i neih tir leh tawha’ tichungin a nui a..Keimaha rinna anghah vanga lawmtur ka nih laiin ka lawm em pawh ka hre chuang lo.

‘ Ka hre lo…Ka thei lo ang’ ka ti hul hak. 

‘I thei ang…’ nui chung bawka a tih leh chuan  Awmze nei loin ka nui ve ta ngawt.

‘I hlawh hi  Up ka duh bawka’ a ti leha. Ka en vata. 

‘Kan pa nen kan remtihna ve ve ania’ a ti a.Tuna ka hlawh pawh hi tha tawk tak a ni.Mahse, Julie ka enkawl tirh lam kha chuan sum tam tak pawn a man zo lo tih ka ngaihtuah fo thung.

‘Angai lo…’ ka ti ringawt. ‘Lawmthusawinaah ngai mai rawh.Kan ti dawn tho ’ a ti leh a. A awki ring thak maiah chuan tun lawka nu damthlap kha chu a bo hneh leh hle tawh tih ka hria. Ka bu ta nge nge.

‘Leh lawk..’ kawngkhar hawnna ka vuan hman tawh tihin a rawn ti leha.Ka hawilet thuaia. 

‘Aw,enge ni?” ka ti a. A aw a thian te te.

‘Nizan khan Mam-a i Room atanga a lo chhuak ka hmu a, enge a rawn tih ka zawt dawn lo che.Mahse,Mam-a hian nupui neih leh aduh anih chuan ka duhzawng a neih ka ring..I hrethiam em?” Nghet cherh chawrh hian a ti a, ka hrawk a ro nghal vekin ka hria.. Za miah loin a then leh saka,harsa ti lutukin ka nui lui ve thei hram bawk. Min vau miah lo nangin Warning min pe lawk tih mi a nileng lo tan chuan haitheih a ni lo.

Ka awm a nuam lo nileng ta thak. Zingah khan inkhel tura a chhuah hmain msg in min rawn wisha, a lo haw laiin Julie roomah ka awm thung.A thawm ka hrereng nangin ka chhuak duh lo,tihtur ka zawng luia,a lo lut dawn miah lo tih ka chiang bawk,a hna kal hnuah ka chhuak ta chauh.

Pi khan a ti mai mai dawn lo tih ka hming ka hriatchian tluk zetin ka hrechiang. Hmingthana pawn a nu tihluih emaw a nu tihthinrim nan hman ai chuan kan inkar a titawp leh maiin ka ring bawk. Nia,tawp tehse..Hetianga inzawmna lo neih hi hlimna tur ni pawn ka hre lo. Kan naupan laiin kan thenawm nula Aizawlah mi inah inhlawhin a awma.A rawn rai hawa,a pa asawi duh lo a.Mahse, a hnuah a awmna pa fa a ni tih kan hre leh ta veka. Khatiang ang mai mai kha nih ve ka duh lo.A dinhmun kha ka hmutsita,ka sawisel ni loin mi hausa ho infiamna hmanrua nih ka duh lo bur. Aman titawp lo mahse keiman ka titawp tho ang. 

‘Min hel nilengin ka hria’ ka hnung lam atangin Hmingthana awin a rawn ti thuta. Ka khawng nghal lah mai. 

‘Chutia mi?” pangngai takin ka ti a. Ka thiltihlai ka tihzawm leh nghala. Ka hawilet chuang lo.

‘Ka hmuhdan ania.Ni lo itih chuan a ni lo animai’ ka bul hnai te atangin a rawn ti leha,a rawn kal hnaih lai ka hre lo. Chhang loin ka tih ngaiin ka ti zela. A hmel enturin ka huaisen tawk lo tih ka chiang.

Ka rin loh lutukin ka kawngah a rawn kuaha,ka nghawngah a rawn fawp thawi thuak bawk. Ka ip chawiha,ka thaw a chham lo chauh bawk.

‘Eng  i tih a?” ka ti chhuak nghal halh mai.‘Nilenga ka tihchak ka ti mek…a tih chuan ka rilruah Pi a lo lang nghal zawk.

‘Min thlah teh’ tih pahin a kut laksawn sak tumin ka zuk vuana,mahse hneh takin a rawn man bet hmiah. Talchhuah ka tum chu thaw hawk chungin ka beisei loh takin min thlah ve ta mai bawk.

‘Enge dik lo awm?” a ti ta nghut.Dawhkan lam a pana,Dawhkana Grape awm a laa,a hmawm nghala. Dawhkan nghengin a dinga,a kut zungtang sei thlurh chuan Dawhkan tlang a tlir dat dat bawk.

‘Khatiang kha titawhsuh’ ka tichang fak.Pi leh pu bakah Bawihpuia leh Kimi hmundangah chaw an eichhuaka.Hmingthana pawh hi a kal ve ka ring a. Mahse, tunah a lo haw anih chuan a kal ve lo tihna nimai.Motor thawm pawh ka hre miah lo..

‘Ka tihtawh loh chhan tur sawi la…’ ngaipawimawh lo hmel  zetin a ti sup.

‘Engmah chhan a awm lo.Ti tawh lo la animai’ ka ti ram hmaka,ka inkuangkuah nghal than. chik zetin min en a.

‘A chang hi chuan hriatthiam i har’ a tih veleh,‘Min hriatthiam tum duh suh’ ka lo ti a. 

‘Oh..Ka tum mek chu ania’ a ti leh mai.Beidawng ru zetin ka thaw hak mai..Engtin nge a nu in min Warning tih ka sawi ang? Sawi pawh ni ila a awih lo maithei,bakah an nufa inkarah tlakzeh ka duh miah lo bawk.

Min rawn pan hnai mek chu ka en a,pi leh pu awm lo mah se engmah thlentir ka duh lo bur.Jhanvi pawn min lo hmu palh thei..Min hmu anih chuan naktukah U Dini’n a hrenghal vek ang.Ani in a hria anih chuan Pi beng a thleng nghal dawn tih pawh tuma min hrilh ngai loin ka hria.

‘Min rawn hnaih lo teh’ ka ti tawk mai, 

‘Maw?”  Mak ti hmel pu hian a ti a. 

‘Lo kal hnai tawh suh’ ka ti leh hrawk. 

‘Min dan tum chhin la…’ a ti duh lek..

‘Kan inkar hi titawp ang’ 

Ka sawi zawh rualin a rawn thleng chu a ni der.Ka inrin hmain min rawn bana,min pawt hnai nghal rawka. Ka tal nghal laih thung.

‘Tawp tih tawngkam hi ka hua…’ a ti chhuak nghala. ‘Mahse, tawp angai…’ tal laih laih pahin ka ti a. 

‘Awm mai mai teh,naupang ang mai’ a tih chuan engmah sawi loin ka tal leh nghek.Min thlah loin min kuah nghet sauha. 

‘Nilengin ka ngaihtuah che a,nangin tisuh min lo ti a..Tawp tih velah i lo buaia ’ a ti sup..Ka maimitchhinga,a tawngkam leh a chet danah ka tlu anih chuan nakin lawkah ka na dawn..

‘Midangin  min hmu ang,min thlah teh..’ ka ti nghala. 

‘Hey, ka hne aw,min hmu vek se a pawina a awm lo ka tih kha.Nge an lo haw hunah ka lo hrilh law law dawn?” a ti deuh hmuka  Ka chhip samah a rawn fawpa,ka tal laih laih ngaipawimawh lo in min kuah nghet zual sauh bawk. 

Chapter- 9

Ka mu meng kar mai,Hmingthana awmdan leh  Pi awmdan a inkalh nghal chu ania,alandanah kha chuan Hmingthana khan kan inkar tihtawp a tum lo tih a hriattheih bawka..eng chu nge maw ka tih ang le? Tawp turin ka duh em tih ka ngaihtuaha, duh lo..Min kuaha,min duatna a tihlan apiangin keimah hi kim ngawih ngawih niin ka inhre tlat zel a..Ka him hliah hliah niin ka inhre tel ziah bawk.

Ka phoneah msg a rawn luta,ka en vat. Whatsapp msg a lo ni a.

‘Tetei i ni tiraw?” tih zawng.Min rawn thawntu ka en chuan ka hre ngai lo. Ka contact list ami a ni lo.Dp engmah a dah lo. ‘Sangzuala ka nia, Reiek kan kalni khan kan inhmuh tawh kha’ msg a rawn thleng leha. Sangzuala,Um…Min drop tu kha.

‘Aw, eng nge ni ta?” tih ka thawn leta.‘Kawm che ka duha’ a rawn ti deuh tawpa.‘Min kawm la…’ ka ti let a. Min rawn reply leh dawn emaw ka tih laiin a rawn call ta zawk.

‘Naktukah hmuh che ka duha, i hman angem?” ka pick-up veleh a rawn ti thawr.Ani pawh hi engmah han thluaithlum vak chi a nih hmel bik loh.

‘Eng chungchangah?” ka ti chu ka aw a no tehchiam lo. Reiek kal kha kan inhmuh hmasak ber na a ni a.Engvanga inhmuhpuia min sawm ngam ngawt nge anih ka hre lo.Ka ngaihdan a ni vak lo bawk.

‘Mimal thil..Hei,nula leh tlangval inhmuh ang hi’ nui chunga a tih chuan ka ner nak thung. Ka rin aiin a zak lo dawn a ang.

‘Aw,anih chu..Hun ka neih ka ring lo’ ka ti deuh hmaka .

‘Hey,ka fiam che anih kha..Min lo ngei ngawt ange’ zangkhai zetin a rawn ti leh lawia. Eng chu a duh chu nimaw?

‘Julie chungchang kha..’ a rawn tih chuan  mak ti zetin ka chil ka lem a..

‘Julie maw?” ka ti fan deuh raih..

‘Um, kan inhmuh hunah ka sawifiah thei ang chu’ dam angreng tak hian a rawn ti a. ‘Mahse…’ka ti chu ‘Nakinah le,hun i neih veleh aw..Chuan,I number neih ka tum nasa, i awih lo zawk ang’ ati a,a nui leh huk huk.

Julie chungchang engvangin nge a lo ngaihven? Enge sawitur a neih ang? Ka hrethiam lo vel vek.

‘Enge?” hello pawh ti lo in Phone a pick up  veleh a rawn ti a.

‘I la mu lo em?”ka ti ve bawk. ‘Mu a,hil lo..’ a nui ar ar mai.

‘Thil ka lo zawt dawn che’ka ti leh tawpa

‘Sangzuala’n i number min dil,ka pe..Chu chu min zawt dawn anih chuan chu zawng chu’ a rawn ti leh zat zat. He nu zet hi chu a…

‘He pa hi tu nge anih?” ka ti hul hak. 

‘Sangzuala…’ a rawn ti zang vaha. 

‘I va han ngeiawm tak,khawilam mi nge ka tihna nih chu?’ ka ti hlak hlaka. 

‘Ka hriatchin chu ka cousin te coach…Hahdam rawh,in la inhrechiang dawn lutuk’ a rawn ti leh a. Ka va han ngei zit zet tak.

‘Anih chu a…Ka dah’ ka ti hmak.

‘Hey, I va serious ve..Tak takin ka hre tam bik lo alawm.Amah a in enkawl thei hle tih zawng ka hria’ atih chuan a thutak ta deuh. 

‘Anih tak chu…Mangtha phawt’ ka ti a.A rawn tawng leh hmain ka off nghal daih. Tlem tal ka sawtpui ka rin tehreng nen,tangkai lo leh lutuk..Zirsanga ka rilruah a lo langa,zawh mai ka duh thut thuta,mahse ka tlawmngai leh thut. Ka hmuh hunah ka hre mai ang chu. Lo buai chiam a tul lo.

Julie damdawi kan thlaksak atangin kar a liam leh tawha. A birthday kan lawm atang khan a mizia a thlak danglam nasa a,a thiante nen pawh an in be pawp tam leh tana.An rawn kal zauh zauh reng bawk,Lehkhabu a chhiar nasa zualin a taksa hriselna lam pawn hma a sawn hret hret zela, chhunah pawn nisaah kan innawr chhuak nitin a..A hmel tum bur thin kha a bo takah chuan a lang tha lehzual ta sawt bawk.  

‘Mama..’ min rawn kuah pahin Bawihpuia’n a rawn ti a. Kimi’n a bag a rawn kensak thung. Julie ka melh zawka,engmah sawi loin min rawn en a.Enge angaihtuah ang ka hrethiam lo.

‘I va lo haw hma ve,School lam enge a an?” ka ti a.A samah ka chul saka. 

‘Toys thar a awm teuh asin,naktukah lo kal tawh rawh aw’ a ti a. An Toys thar ho an infiampui dan phur takin a sawi zui siam siam a,kan ngaithla em tih en niawm takin ka mitah tak a en ran bawk.

‘Bawihpui, in Schoolah chuan naktukah Mama nen kan lo kal ve ang aw,I phal em?” Julie-in a rawn ti a. Ka beisei loh lam a ni.Amah a ziawm deuh hnu hian Bawihpuia pawh a ngaithei ta viaua,chhawnchhaih chiam emaw han biak lumlam vak erawh a nei chuang lo. A hma kha chuan Bawihpuia School ban hmain Roomah kan let hman ziah kha ania.Mahse, zawi zawiin ka palzam luia,ani pawn a sawisel bik lo. Hmingthana nen pawh an inhmu ta zauh zauh..Biak erawh an inbe ngai chuang lo. 

‘Yayyy…In lo kal tak tak ang maw?” Phur sarh hian a ti a. A biang taitek mai chu ka en a. Hetiang fapa duhawm lutuk neitu hian engtin nge a uire san theih ka hrethiam lo..Hmangaih hi a phu bik ngawih ngawih asin le.

‘Bawihpuia hi a hmeltha tiraw?” a room kan let hnuah Julie-in a ti a. Ka bu nghat.

‘A nu ka ngaihtuah apiang hian huatna in ka khat thin,mahse a fapa hian engmah tihsual pawh a nei si lo a…’a tih chuan  min bia pawh a ang lo.Chunglam a en vang vang a.

‘Enteh,ka u nen hian innei daih ula…’ a ti leh thut. 

‘Nupui neih leh a duh ka ring chiah lo’ pangngai thei ang berin ka ti a.Ka then lui saka. 

‘Ngati maw? Kei chu ka ring lo.Bakah misual pakhat vanga a nun pum tihchhiat kher angai lo a’ a ti leh sap. 

‘Ka risk mai mai anih kha, ngaihtuah suh.Mipa ania,a in enkawl zo lutuk tlat tih  i hria alawm.Kha,ei la..’ tih pahin a damdawi ka pe a. 

‘Zanin chu kan rualin chaw ei la..’ka ti satliaha. Mahse, satliah taka sawi kha a landan mai zawk, engtin nge min chhan ang ka hre lawk thei titih a. Min vin nek lo anih chuan a tha animai.

‘Ka duh lo…’a ti chu ka rindan chiah.Mahse,thinrim rawl a awm lo.

‘Ok..Ok..I nu leh pa han surprise vel ka chak mai mai a’ nui chunga ka tih chuan Min chhang lo,ngaihtuah muk tak nei niawm takin a en ngai a en leh veng veng tawh.

‘Te, ka kal leh theih i ring em?” room chhuahsan ka tum lai takin a rawn ti leh thuta. Ka ding chawta,ka hawilet vat.. 

‘Maw?” ka ti ha..

‘Ka kal leh theih i ring tak tak em? Hmanni khan ka tum chuan ka theih i rin kha’ a ti leha.Ka chil ka lem te te. A thawi deuhin vawihnih ka sawipui tawha,mahse ka nawrlui lo..‘Ka beisei..Chuan,ka ringngam bawk che’ inti thutak em em hian a ti a. 

‘Ka mu rei tawh a, ka ke pawh hian chakna engmah a nei tawh lo..A tet tawh zia hi i hmu tiraw?” a ti leh halh.

‘Aih, hmu miah lo…’ ka ti zang vah. 

‘Maw? I hmu ngai lo maw?!”  mak ti hmel zetin a ti a.

‘Ka hmu a,mahse ka hmu lo..Achhan chu i that lehna dal theitu engmah ka hmu duh lo,ka hmuh kan mai zel’ inringtawk takin ka ti leh a.

‘Mahse….’ A ti chu‘Hahdam phawt la…Tum chuan kawng a awm alawm,chuan maw…I chak zawh poh leh nangmah tina tu tan khan a hrehawm ting mai ang. Ka sawi awmzia i hria tiraw?”nui deuh chungin ka ti a. 

‘Aih,tuman min tina hleinem’ a ti fan raih. ‘Ka hria…Mahse, hetianga i awm avanga lawm an awm angem? An awm anih chuan i chak poh leh an na ang..Sawi vak vak a,midang tihnat let tum ai chuan hlawhtlinna hian midang a tina zawk’ ka tih chuan a bu ta nghat. 

‘A dik…Tu nge ka nih an en angai anih chu’a ti a 

‘Kan try ang..’ka ti ve a 

‘Um,kan try ang’ a rawn tih chuan  kan nui dun ta hawk hawk..

Hmingthana hmun dangah chaw a ei chhuaka, msgin min rawn hrilh tho nangin Pi in min hrilh laiin hresa angin ka awm duh lo.In khatah kan cheng duna,kan awmdan hi engemaw zawng tak chuan a hlimawm letling phian in ka hre thin. Pi in  vawikhatmah a sawi nawn leh tawh lo. A fapa nen inkawp tur hmuhin min hmu lo ang tih achiang.Khami zan khan Room atanga achhuak a hmuh vangin min Warning mai zawk niin ka hre ta ber.

‘Hello, Tete..’ Sir Rindika’n a rawn ti dut dut.

‘I free em?” tlangnel takin ka ti a. Vana Arsi pe ut mai chu ka thlir dauh dauh bawk. 

‘Free lai tak..Julie chungchang em ni?” a rawn ti a.

‘Um..Enteh,a hlimawm lutuk.A ke hi hman theih a tum a’ ka phur zia ka awah a lang thei.

‘Wow..A va ropui ve..Aman a tum phawt chuan a kal em em ang’ phur hmel zetin a rawn ti ve a.

‘Mahse, kal thei lo ta se..Amah hian a tuar phah viau angem ka ti a’ zuai raih hian ka ti leh a. 

‘ Kha chu ngaihtuah lawk duh suh.Aman tumna a neih phawt chuan a kal ta lo anih pawhin amah kha achak tawk tawh dawna,ngaihtuahawm a ni lo ang. Kal a tumna ngawt pawh kha mi nazawng tum mai mai chi a ni lo’ a rawn tita duah.

Kan inbiak zawh hnuah chhuk mai loin inchungah ka ding deuh vang vanga.Inchung zawl hi a chanve hmawk Pi Green House a ni a.A chanve dang erawh chu an tisang deuha,inleng kawmna tura siam a ni thung. Bang a nei lo va,chung a nei thung. Curtain Simple si,nalh tak an zar veka..Inleng neih loh lai chuan an tawn fel vek zel thung.Thut mutna nuam em em pahnih a awm bakah Thutna then thei a awm a..Dawhkan bial nalh fahran  a awm bawk. Inchung sang lai taka awm a ni bawka,Aizawl khawpui chhung a lang chiang em em a,hahdam nana hmun thlanawm tak hi a ni ringawt. Ka awmtirh lam khan ka kal meuh lo va,an mimal deuh bik tura ka ngaih vang a ni a.Mahse, tunah chuan ka kal ngun ta viau thung. Ka hmuhtirh phat atangin hmanlai Lal In a ang awm hlein ka hre thin.

‘Tul miah lo thilah beiseina nei lo la ka ti hle mai’ 

Tawngri ka hriat rualin ka hawilet vat..Hmingthana a lo ding reng tawha.A kamiz ban a thlep chhinga, a kilhna chung lam pahnih a phelh bawk.A kekawr thui nalh zet chuan a phuar deuha,a pian nalh zia haider theih a ni lehpek lo..Mizo zingah Palian leh nalh tak tak an tam tawha,taksa hriselna lam an ngaipawimawh nasa zual tawh bawk..Chung zingah chuan Hmingthana hi a Ber chu a ni lo,mahse piannalh sawi chuan sawi hmaih chi a ni lo ang.

‘I lo kal lai ka hre lo a…’ ka ti sap. Min rawn pan pheia,a kekeawr ipte a zen tut bawk.

‘Ka sawi kha i hria em? Thil awmze nei loah beiseina insiamsak suh u’ ka bula rawn din pahin a ti leha. A hmel hriatthiam har tak chu ka en a.Julie chungchang a sawi tih ka hria.

‘Awmze nei lo a  ni lo ang..’dam dapin ka ti a. 

‘Aih,awmzia a awm lo ang,Chuan thilmak thletir i tumna hian a tihnat che ka duh lo’ a ti leh a.A aw nghet churhah chuan min ngaihtuah tak tak a ang.

‘Mahse…’ ka tih chiah chu ka hmuiah a kutzungtangin a rawn ti si a. Ka ngawi nghal hmak..Ka kawngah a rawn kuaha,amah si chetin min pawt hnaia. Kan inhnaih bawka,a taksa lumna ka feel vang vang thei.Nidang ang bawkin him hliah hliah niin ka inhre leh ta chiah bawk.

‘Naktukah ka zin dawna’ a ti a.. Hawichhuak chuang loin a awmah ka hmai ka phuma,achang hi chuan ka awmdan hi Thawnthu ang mai niin ka hre thin. Ka khabeah a rawn dawma,min kuaidaka..A kutzungpuiin ka hmui hnuai lam a rawn tuai dun dun bawk. Ka thaw tha ngam lo,tunah tak hi chuan midang min hmuh hlauhna lam engmah a lang lo. Hun fal kan nei khata,ka lo ngai hman em em tih zawng ka hria.

‘Ka lo zuk chhuk ang…’ ka ti sap..Kalsan ka duh vang ni loin tihtur ni a ka hriat ka timai zawk.

‘Um..’ ti mah se min thlah chuang lo.

‘Min thlah la…’ ka tih chuan‘Tehreng mai…’ a ti a,.Mahse, min thlah chuang lo..A rawn kun hniama,enge tih a tum ka hria..A hmui chuan ka hmui a rawn si a,zei zetin a rawn nawr kau nghal a..Ka khup a zawi huaia,ka nghenga,a nghawngah ka uai titih..

Ka mu fel chiah tihin Sangzuala’n min rawn call a.Hun ka nei dawn tawh em tih min rawn zawta,ka lo hre leh tawh pek lo..‘Naktuk hi ka chhuak dawna, reivak lo chu ka free ang ka ring’ ka tita nge nge. 

Ka thawhin Hmingthana te an lo chhuak fel hman tawha. U Dini leh Pi sawi hmangin dar 5 velah an chhuak tih ka hria..A chhuah dawnah engmah a sawi lo chuan min ti lunghnura,ka titau ti ila a dik ber ang. A hranpaa min hrilh kher ngai lo pawhin Phoneah a  sawi thei reng si..

‘I hun ka la hek nasa dawn hle mai che” min hmuh veleh Sangzuala’n a lo ti a.Nelawm takin a nui bawk.

‘A pawimawh hmel sia,ka ngaidam mai ang che’ nui chungin ka ti ve a.Eng ang mizia leh eng anga khawsa thin nge anih ka hriat hma hauhin ka ngainat zawng a ni nghal der tih ka inhria. Tihlan kher erawh tul ka ti lo.

‘Ok…Anih chuan eng nge i ei duh ang?” A ti zuia. ‘I duh duh chah la..Ka eithei vek’ ka ti ve thuai. 

Eitur a chaha, kei erawh chuan engthil nge a sawi ang tih ka lo ngaihtuah ve thung.Julie bulah khan a hriat leh hriat loh ka zawt lek lek thina,mahse achhan ka hriat si loh hian min dal tlata,ka zawt lo leh thin. Julie thiante hming ka hre nual tawha,mahse he Sangzuala hi an sawi ri ngai miah lo. Bakah,thian ni tur chuan an kum a inthlau lutuk..

‘I tha em?” Tih pahin ka hmai bulah a kut a rawn vaia,ka phu zawk..

‘Oh…Sorry…’ inthiam lo zetin ka ti sap.

‘Sawi la…’ ka ti a.Zahzelah tui ka ban nghal zat.

‘Julie enge a an?” Zawi angreng tak hian a ti a. ‘Julie…Aw.,a tha..’ ka ti ban ve chat. 

‘A lawmawm anih chu,lo tha zel se..’ a ti leh chu ka en rana. 

‘Enteh, Julie tan enge i nih ka hre lo a..’ ka tita nge nge.Pehhel deuh taka inkawm hi ka ning riau.

‘A thawng lutuk em lo ang che chu maw?” a ti a..A aw a zawi hle bawk.

‘Sawi teh…’ ka ti ringawt. 

‘Julie Bialpa leh a u Nupui an lo inkawp tih an sawi i hre tawh ngai em?” a tih chuan Ka bu nghat, mahse ka thluak a vir zawk…

‘Nang hi….’ Ka tum aiin ka aw a ring hret..Ka insum hman hlawl lo..

‘Aw, keimah hi…Amah kha ka ni” fan reih rawh hian a ti ta. 

Chapter-10

Engchen nge che loin ka thut ka hre lo.Ka hmaa thu ka en tlawk tlawk. Ramhuai hmu ta ila hei ai hian min Shock angem ka hre lo hial !!!

‘Tete, mak i tihdan tur ka hriaa..Mahse…’ a sawi laklawh laiin ka ban ka vai kual thuak ringawt.A tawp ve hmiah.

‘Enge sawi i tum ka hre lo. Engpawh sawi tum la min hrilh duh suh’ ka theihtawpa pangngaiin ka ti chang fak. Keia lo thinrim ve chiamna tur thil a ni lo maithei.Mahse, Julie nat zia leh Hmingthana tuar nat tur zia ka ngaihtuaha,ka tena.Ka tan hmelma tluk hial a ni nghal tawp mai. Ka ngainat tur chi emaw ka lo ti kha chu ka hriatchian loh vang mai mai a lo ni.

‘Ka hria alawm,engtin nge i dawnsawn dawn pawh ka hre lawka’ a ti ban chat. 

‘I hria anih chuan engvangin nge min hmuh i duh si?” Tichungin ka melh nghek.

‘Nia, mahse ka tihsual ka siamthat theih ka beiseia’ beidawn hmel zetin a ti hapa.

‘Siamthat maw? Aih, an nat tur angin an na vek tawha.Tunah chuan damlam an pan tawh zawk.Engmah tharthawh lehtur a awm tawh lo’ ka ti leh hmawk hmawk.

Ka awmdan chuan a thawng viau anih pawhin pawi ka ti chuang lo.Julie enkawltu nurse ve mai ka ni a. An unau vanga hetianga midang lo be ve chiam tur ka ni lo. Mak ka ti anih pawhin tihlan kher a tul hek lo.. Mahse, ka thei lawi si lo…

‘Julie lakah leh Hmingthana laka pawi ka khawih hi siamthat theih a ni tawh lo ang.Mahse, min ngaithlaksak theih chuan….?”  A ti leh a.A aw dam dap maiah chuan ngenna alang chiang em em bawk.

‘Ka ngaihthlak vangin enge danglam chuang ang?” ka ti hlak. Ka bag ka bana,ka awmdanah kal ka tum tih a hrethiam a ni ngei ang.Rang zetin ka kutah a rawn vuan chawt.

‘Enge a?” Nelawm lo tal hian ka ti a. 

‘Khawngaihin…..’ a ti ve thung. 

A mitah tak ka ena,min en ve bawk..Natna…ni e,natna chiang takin ka hmu.Ngaithla ila enge pawi ang? Julie sawi nen a in ang em tihte pawh hre ta zawk ila…Reilote chhungin he Mihring  vang hian ka rilru ka thlakkual sek chu a ni ber.

‘A tha alawm’ ka tita nge nge. Ka kut a vawnna ka en chuan Hrethiam tih hriat takin a thlah vat. A thutna hnunglam a ngheng chawrha,a thaw huai bawk.

‘Julie hmuhdan kha a dik tawk lo…’angawih vang vang hnuah a rawn tichhuak a . Phawk zetin ka en vat.

‘Eng maw i sawi ?!” ka ti tawk.

‘Ka sawi tum chu Julie hmuhdan kha a dik tawk lo..’a ti nawn leh a 

‘Ni lo..Dawt tel loin sawi zawk rawh.Ka bulah dawtsawi mahla hlawkna a awm lo’ ka lo ti leh hmiah. 

‘Adik,eng hlawkna mah a awm lo.Chuvang takin dawtsawi ka tum lo..’ tawng leh tuma ka ang ziau tawh chu a kutin ngawi turin min vai zauh.Ka chip lehnghal hmiah. Nie,a sawiduh chu sawi phawt rawhse.

‘Ka tihsual lianber chu Ruatpuii mitmei hmu reng chunga ka haider kha a ni a..E,Ruatpuii chu Hmingthana nupui kha,I hriat chu ka ring tho nangin..’ a tih chuan ka bu nghat. 

‘Ka thianpa nupui a ni a,inneihnaah pawh Best ka ni bawka.Diktak chuan Hmingthana nen hian inngaizawng rei deuh angin an langa,mahse an inkawp tak chu a rei lo.Thian anni thin zawka.A rai avangin Hmingthana hian mawhphurhna alaa,a nei mai zawka. chutichung chuan Pasal nihna a hlenchhuak vek. Julie nen kan inkawp tih kha an hre veka. Atir lam chuan Hmingthana hian a pawm lo hulhual,a best ka nih mai piah lamah unau ang maia khawsa leh inhrechiang kan  ni a.Ka chhaih kual mai mai a hlaua, ka thutak zia a hmuh takah kha chuan min dodal ta lo,an inah lah Hmingthana nena kan inkawm vang mai pawh ni loin Julie vangin ka kal awl lo bawka. Chuan,Ruatpuii leh Hmingthana chanchin engkim hrechiangtu ka ni a,ka sawi awmzia chu Hmingthana min share chin bakah Ruatpuii zawkin min hrilh nasa,ngainat pawh min ngaina.Hmingthana hi chu midang nunah a buai lo ang bawkin a nun pawh midang a share mai mai lo’ a ti leh duah. Engmah sawi loin ka bu leh nghauh ringawt.

Ka mitthlaah Hmingthana a lo langa, a duh vak loh lakah pawh puitling taka mawhphurhna hlenchhuak nih kha a inhmeh hluah hluah.Mahse, atthlak zetin ka thawveng deuh huai a,a nupui kha ka lo er ru reng zawk nge pawh ka hre lo.

‘Hmingthana Serchhip a awm hnu khan a khawhar lunglenna kha min kawm tam bawk si nen a ni lo zawngin a herkual ti ila a dik maithei. Beisei awm deuh tak hian a awm ta zauh zauha, ka ngaihbel mai mai emaw keimah lam ka dik lo a ni ang tiin ka haider lui tlata. Julie enkawl kha a zawng zawngin ka thei lo nangin ka theih chin chu tih vek ka tuma,neih ngei ngei pawh ka duh bawk….’ atih zawm leha, sawi zawh rualin ka thaw hawk..Hun kal tawhah a cheng tih hriat takin a hmaa glass no awm chu a en  vang vanga,ama khawvel siamchawpah a cheng tih achiang reng bawk.

‘Ngatinge hetiang hi min hrilha, kan la inhrechiang si lo’ ka ti leh hnuhnawh..

‘Nang aia Julie hnaih leh chuangtu tumah an awm lo tih ka hria..’a ti fan ruih.‘Eng a” mak ti zetin ka ti deuh ha..Ka beisei loh zawnga min chhan vang pawh a ni mahna. 

‘Ka duh hretur chuan ka theihna zawng zawng pawh ka hmang ve bawk ang chu..’tih pahin  za miah lo in a then suk.

Kan eitur chah an rawh daha, ka melh zawk,ei chakna pakhatmah ka nei lo..Ka thuhriat kha ka bengah a ri nawn tlut tluta,hriatzawm zel chakna in ka khat tlat a niber.

Ei loh aiah tlem ka ei a.Ani pawh keimah ang tho. Waiterin Plate a rawn la a..Kan la thu rih dawna,Cabin kan mamawh tih a hrilha. A thilsawi lehtur atan hmun fal a mamawh anih ka ringa,sawisel ka tum lo.Sawisel ahnekin ka ngaithla zawm chak et et. A tawpna tur ka hre chak. Waiter a kalsawna,reiloteah a rawn let leha.Cabin awl a awm tih a rawn sawi chuan  Sangzuala’n min rawn en a. Ka bu ringawt.

Sana ka en a.Dar 2 a hnai tawh. 

‘Ka sawi zo tep,ka chelh rei tawh lo ang che” ka rilru hria niawm takin a ti a. Ka thensak ringawt. A aw a thian a, a sawi tan dantur ngaihtuah niawm takin angawi deuh vang vang. Hun kal tawh a chhuikir pawh a nimahna le.

‘Ruatpuii  i hmuh tawh chuan i hria anga.Hmeichhe hmeltha leh lu zo tak, che zei thlarh mai a ni a.Bakah Julie pawn laizawn aneih loh avangin angaina em em bawk.A mitmei hmu zauh zauh mah ila ka ngaihbel mai mai nia ka hriatthin avangin Hmingthana pawh engmah ka hrilh ta lo.Bakah,hrilh dawn pawh ni ila engtia sawitur nge ka hrechiah lo hrim hrim. Sawi ta pawh ni ila a awih kher in ka ring lo a,a fiahna turin engmah pektur ka nei hek lo.A msg lah han huat em em tur engmah a awm ngai si lo. Ka palzam luia,ka duh ber chu Julie buaipui anih avangin an in kal loh phah nan hman pawh ka tum chuang lo’ a ti a. A ngawi leh rih, kei erawh chuan a sawi lehtur ka nghak tawp.

‘ Kha thil thlenni khan Julie leh Ruatpuii nen kan pathumin kan awma,Julie roomah thingpui a rawn kenga.Kan inho a.Kan inzawh hnuah room a a thildahthat tur a san vangin dahpuiah min sawma.Ka kal ve mai bawka..An room leh Julie room inkarah khan Room awl pakhat a awma.Ka zui pheia, ka awmdan a dik lo..Ka zauthau ka ti dawn nge ni. A chevel khan a kawrlum hak a phelha,a hnuaiah khan kawrpan lutuk mai a lo haa.A hnute alang tlang vek..Tihpalh nge tihluih ka hre lo.A inpala,min rawn bawh rawk maia.. Ka in control thei tawh lo..’ a sawi tawp lam a zawi lutuk, tenna niawm tak erawh ka hriat hmaih chuang lo..

‘Sawi duh tawh suh..’ ka inrin hmain ka tichhuak hlawl ringawt. Engvanga min hrilh duh tlat nge anih ka hre hek lo.Engkim mai hi a mak velvek a ni ber. 

‘Chetsual chu kan chesual lo. Mahse, Khuma kan lo awm lai kha Julie khan min rawn hmu a..Sawi leh tur a awm lo.Ka rilru a fim lo chung khan Julie hmel ka en ngam lo. Engmah sawi loin ka chhuahsana,pawn ka thlen hnuah Ruatpuii khan min lo zui ve tih ka hre ta chauha. Engkim kha a thleng nghal vut vuta…’ a kuna,ahmai a hup zui nghal daih bawk. Engtia han tihtur nge ka hrethiam lo..Julie khan an chesual lai ka hmu a ti em ka hre tawh lo? Ka rilru a mang vek..An sawi dan a in ang em pawh ka hre mai thei lo..Mahse, mak takin ka hmaa thu mek, Pa lian leh inringtawk tak hian thudik a sawi ang tih ka thinlung hian a ring tlat!!

‘Julie neih let leh hi ka tan chuan thil theih loh tih ka hria. Hmingthana nena thian nih leh pawh ka ngaihtuah ngam chuang lo.Mahse, min pui rawh. Thudik hi hre tal se ka hahdam thei ang.Nupui neih emaw hmeichhe dang melh hrim hrim hi chakna ka nei lo.I duh phawt chuan min chhui thei ang.Julie aia mamawh ka nei lo’ kan ngawih tlawk tlawk hnuah a rawn tichhuak leha.  Chapona a awm lo,tlawm aw leh mangang aw a ni.

Sawi tur ka hre lo,engmah ka tihtheih ka ring lo.Mahse,ka  chhungril hian pui turin min duh.Zahzelah tui ka ban ta ngawt.

‘Khawngaihin..Abak engmah ka duh lo,zantin Julie mangphan chungin ka mu a..Kan naute pawh’ a ti chiah chu  ka tui in lai ka hak a,ka khuh zui nghal bawrh bawrh mai.A rawn tho a,ka hnungah a rawn chum a. Ka khuh tawp hleithei lo,ka mittui a tla a. Ka hrawk a thip za em em zui nen, ka khuh reh mai thei lo.

‘A zia lo hle mai’ ka tawngchhuah theih veleh ka ti a. Ka awm ka chum leh dat data,ka khuh leh rih bawk.

‘Ka thiamloh anih kha..Julie nen in inpawh em avangin engkim hre turah ka ngai che a’ a ti a. Ka lu ka thing ringawt,ka mit ka nuaia,ka khuh zui leh kharh kharh.

‘Julie accident hma ni khan a rai tih min hrilha, Hmingthana hmachhawn ka hreh rualin kan inkawp tih apawm vek tawha,ka lawmna kha a sang lutuk.Mahse, a accident khan Naute chu kan chan ta a…’ a ti zuai raih. Vawiin hian thilmak pui pui in min thawng dawt dawta,amal mal pawh khan lungphuchawla thihpui tham vek niin ka hre mai.

‘Hmingthana min huatchhan hi a nupui vang lam ai chuan a nau ka kalsan vang zawk ania..A induhtawkna a chhe bawka,chu chu a tuar thei lo.Diktak chuan a nupui pawh khan midang a beisei chhan ni a ka hriat chu Hmingthana’n a hmangaih tlat lo va.Pasal nihna kha hlenchhuak vek mah se nupaah chuan Hmangaihna a pawimawhber miau a’ a ti leh a..Mak ka ti lutuka, sawi tur reng reng ka hre lo.

Chapter - 11

‘Vawikhat tal ka hmuh theih nan leh abulah ka insawifiah theih nan min pui rawh’ thinlung kehchhe ri kha ka bengah hian a ring lutuk. 

‘Tete…’ lukhamin min rawn deng zui nghal dawt. Nasa lutukin ka phu nghek bawk. Julie khum lam ka hawiphei chu nur nangin min lo en reng chu niin.

‘Min ko mi?” mawl hmel zetin ka ti hu.

‘Aw,enge dik lo awm a? I nuam lo zawk nge?” a ti a.‘Aih,ka tha..thildang ka lo ngaihtuah alawm..Sorry lutuk’ thuphachawi aw deuh daiin ka ti a. Min en vang vanga,a thensak.

‘Ok, ka u zin vangin i lungngai aniang’ a ti ta thut. 

‘Maw? Aih,teuh lo…Ngatinge ka lo lungngaih ve ngawt ang?” ka sawi zawh rualin a nui ta vak vak, angaihna hre lo lutukin ka melh reng ringawt.

‘I va han pha nasa em em ve..Ok,ok..a ni lo ang’ a mit nuai chawt chawt chungin a ti a. Ka ngaihtuah leta,ka pha nasa leh lutuk kha ka inpuang tihna tluk lek a ni tih ka hrethiam ta chauh..Chhaw lutuk,keimah leh keimah ka inhau ru mawlh mawlha,awmzia a awm tawh der si lo.

‘Nichin khan tah hian phone i kalsana’ tih pahin a mutna bul a beng thak..

‘Nia,ka hria alawm..’ ka tih chuan”tuemaw thinchhe zetin a lo call tih i hre miah lo va’tih pahin thutak tum zetin a hmel a siama. Ka lungphu a rang nghal zaih zaih mai.

‘Tu maw lo call?” pangngai thei ang berin ka ti hap. Ka phone en nghal ka duhna in min tur ut ut..

‘Ih,sual deuh mai..A thinchhe lutuk,a induhtawk bawka,a chapo bawk..Tiang chuan ka thianten an sawi thin.Mahse, an star tho’ ngeiawm zetin a hmui a tipawrh a. A sawi tum ka hria..

Ka phone ka phawrh ta nge nge. Min rawn call tu ka en a,Hmingthana ngei a lo ni.Vawiin khan ka titau deuh roha,chumai bakah Sangzuala nen kan inbiakna vang khan ka rilru a buai lutuka,engmah tha deuhin ka ngaihtuah thei lo bawk.

‘Khatiang khawpa rawn thinrim tur kha chuan thui tak in kal tawh ngei anga’ Julie bawkin a rawn ti leha. Ka en ngam lo.

‘Ju….’ka ti sep. ‘I sawifiah dawn tihna mi?” Nuam ti em em hian a ti a. Mahse,

‘Sangzuala…’ ka ti chiah chu‘tu maw” ati chiam. A hmel buai leh dang lawp lawpah chuan a hming ringawt pawn thuk lutukin amahah effect ala nei tih hai theih a ni lo.

‘Amah kha..Eng lo..’ka ti leh chiah chu‘Sawi suh,sawi miah suh’ a ti leh tuar. Ka chip nghal hmak. Ka hmuh tirh ang chiah khan Hmeichhe hlim ngai lo diktak a ni leh der tawh tih ka hria.

Ka tho a,ka pan pheia. Eng ang pawn thinrim dawnse ka sawi tho ang. Sangzuala hnenah khan tihtheih ka nei lo maithei chungin engemaw tal tih ka tiam ve ngawt anih kha..Nia,ka ti ang. Tiang khawpa hmangaihtu khan a sawi ang ni lo khan a lo tisual ngei anih pawhin vawikhat tal ngaihdam a phu ve tlat.Khumah ka thu  thlaa,ani erawh chuan min melh hlum a tum emawni tih mai turin min melh ngawt ngawt thung.

‘Min ngaidam rawh,diktak chuan kha thil thlen dan kha ka hre duha’  ka ti sap. Ka rin ang ngeiin chhanna a awm lo.

‘Amah khan min rawn zawngchhuaka, hmanniah min rawn biaa.Min hmuh a duha,ka theih loh thuin ka lo chhanga,I chungchang anih thu chauh a sawia. Tu nge anih ka hre lawk lo.Mahse, min hmuh theih hun a nghak ngat ngata,vawiin khan a pawimawh anih ringin ka va hmu a…’ ka ti leh duah.Min chhang chuang lo.

‘Thil thlen dan min hrilha, ih..Diktak chuan i hmuhdan nen a inmil em ka hre lo a. Mahse, tunah chuan ka zawt lo che a, I inpeih hunhunah min hrilh theih chuan ka lawm ngawt ang’ ka ti leh a.A che dat.

‘Chhuak rawh…’ nelawmna pakhatmah tel loin a tichang fak.

‘Ok..I lung ka tiawi lo nasa tih ka hria,nuam ka ti lo…Mahse, engemaw tal sawi angai si a..”

‘Kal rawh,ka hmu duh lo che..Chhuak rawh’ a ti leh that.

‘A mamawh ber chu nangmah tih asawia.Mipa ka hmuh tawh zawng zawng zinga khawngaihtlhlak ber niin ka hria’ ka ti leh hram..A inlukhup zui nghal hmiah.

Room ka thlen hnuah Hmingthana ka call ta chauh.A pick-up lo. Chunglam enin ka mu a.Julie rilru tur ka hrethiam lo.Naktuk zingah chuan min ban tawh maithei bawk. Min ban lo anih pawhin Hmeichhe sual ber khawsakin a khawsa zui dawn tih ka chiang. Kal tir tuma ka beihna a thlawn dawn niin ka hriaa. Sangzuala nen kan lo inhmu pawi ka ti vawng vawng,mahse ka mitthlaah Sangzuala hmel a lo langa. Dawtsawi hmel a pu lo,tanpui angai ngawih ngawih zawk tih ka thinlung hian a pawm nghet hmiah. Midang chungchang avangin ka hna ka chan anih chuan ka Pa,ka laka beiseina sang tak neitu tan chuan a lawmawm zawk zawk hauh lo ang.

Ka Phone nghawr dar darah ka harha,ka inlet thak.Ka phone ka en chuan Hmingthana a lo ni a, ka harh chiang nghal kawk.

‘Good Morning…Ka tiharh che em?” a rawn ti zangkhai vuh.

‘Aw,mahse a pawi lo..’tih pahin sana ka en a.Dar nga leh a chanve.

‘Kan lo haw dawna,dar 10 velah kan lo chhuak ang..’a rawn ti leh dut dut. 

‘Um..’ka ti sap. 

‘Um ringawt maw?” Tichungin a nui hawk hawka..Ka hmai a sa nghal hat hat thung.

‘Zaninah ka thiante nen Dinner kan eichhuak dawna,lo in ready la…’a rawn tih chuan ka hriat loh vang pawh ni loin ‘Maw?” Ka ti a. ‘I hre lo tak tak nge i hre lo der?” a ti ta chat. 

‘Ih…Ni lo,ka kal thei lo ang’ ka ti bah nak mai.

‘I kal dawn…’ phone a off zui nghal hmak..Ka phone ka melh nghek ringawt.Pi ka ngaihtuah naah a lo lang nghal zat. Ka rap zawk e a. Eng buaina nge maw min thlen a tum hrep ni??

Ka inphihfai hnuah choka lam ka pana,Jhanvi chauh a lo awma.A lo zai rat rat.

‘Jhanvi…’  ka ti chu a phu zawk. Ka nui hak mai..

Thingpui ka in laiin pi leh pu an rawn lut ve a. Bawihpuia leh Kimi ka hmu lo thung.

‘Tete, kan Driver pakhat a boral hlauh maia’ Pi in a rawn ti mawlh mawlh.

‘Tu ber? ‘ ka ti vat. A sawizui mawlh mawlha, In lamah a lo kal ve ngai loh thu leh Motor lian khalhtu a lo ni a. Bungraw phur tur Motor lian an nei tih ka lo hre miah lo chu niin.Atthlak..Pi hi Caring contractor anih chuan Motor chu kawl deh duah awm reng ania..In lamah an lo kal ngai loh avangin ka lo hre lo mai mai anih hmela.Ka thilhriatna ber u Dini’n  enghmah a sawi miau lo atin ni.

‘Kan riah ngei ngei a tul dawna’ a ti leh a.  

‘Mam-a hi a lo haw dawna, mahse zanah bak an lo thlen ka ring lo a. I kutah engkim a awm dawn ania aw’ a ti leh mawlh mawlh.Hmingthana khan a nu leh pa an zinchhuak dawn tih a lo hre lawk a ni ngei ang. Vel tak hian a..

Pi te kal hnuah Julie eitur kengin Julie roomah ka luta, nizan lam thilthleng lo ang hmiahin zangkhai takin tuk dang ang bawkin ka be mawlh mawlha. Mahse, vawikhatmah ka luhtirh atangin min la chhang lo.Ka beisei lo bawka,mak ka ti chuang lo.

‘Min mamawh tak tak em?”  a rawn ti thut. Ka chhuak tur ka ding chawt. Ka hawileta,a hmai dang lap maiah chuan nizan a mu tha lo tih alang reng. Ka pan phei leha,khumah ka thu a. 

‘Aw.. I rilru ka hre lo a,ka tuar ve loh vangin ka feel tak tak thei lo bawka.Mahse, khatiang khawpa vawikhat tal chance pek leh ngai mihring kha ka la hmu ngai lo’ inringtawk lutukin ka ti a. Ka then sak bawk.

‘Ka ngaidam thei lo…’ a ti hap. 

‘Ka hrethiam alawm’ ka ti thuai. 

‘Anih si chuan tinge amah i khawngaih si?” a ti ta khauh.

‘A hmelah khan nang ang bawka na tuar hmel alang alawm’ tawngsual hlau takin ka ti a. 

‘Ni lo,nuam a ti zawk ang. Ka chanchhe lai min nuihsawh turin min chhaihkual a tum anih kha’ a ti hmak.

‘Chutiang chuan keipawn ka ngaia,mahse a tap asin’  ka ti ta nge nge. 

‘Khatiang mipa tenawm kha chu a duh hun hunah a tap der thei ang chu’ a ti leh hlar mai.. Ten hmel zetin a ner nak bawk.

‘Maithei,mahse alangah ni loin a thinlung ania tap zawk. Thinrim lo la maw, pui tura min ngen lai khan a natna ka feel pui thei asin’ ka ti leh a.

‘Ka chunga a tihte kha ka ngaihtuah let pawh hian ka la rap asin..Engtin nge ka ngaihdam theih ang? Ka chapona hian a tlin hlawl lo’ a ti leh chiam.

‘A harsa ngawt ang..Mahse, vawikhat tal hmuh chiah ania ka dilsak’ luhlul zetin ka ti leh a.

‘Ni lo..Hmuh nachhan tur ka nei lo’rang lutukin a ti a. 

‘I hmangaih em a,I ngaidam thei lo anih kha’ ka ti ve hmiah. ‘Ka huatna asang zawk’a ti leh hmak.

‘Mi engahmah kan ngaih tawh loh hi kan haw ngai lo. Mahse, I tan ala pawimawh lutuka’ ka ti lehzela. 

‘Ni lo,teuh lo…Ka hre lo’ a ti nawi nak mai.

 Nizan kha chuan hna atangin ka ban ka lo ring ania,mahse ka rindan letling thawk in a thleng ta thung.A rilru a buai nasa tih ka hria. Ni e,Hmangaihna hi achak lutuka,hmeichhe hmangaihna ngat phei chu kehsawm vek khawpa tina tu pawh ngaidam thei khawpin a chak tlat.Julie pawh hian a haw em em chungin a Hmangaihna up beh beh tang tang hi a thi tak tak thei lo tih ka hmuthiama,a huatna khan thui tak hruai mahse na a ti lai thlir tur khawp chuan he Hmangaihna hian a thei lo.

Nileng deuhthawin Julie roomah kan inkhunga,a  nguai em em a.Engmah tihzai a rel lo,a tawng lo va. Angaihtuahna a kawm veng veng a, Sangzuala ang bawk khan hmanlai hunah a let leh tih ka hmu thei. Thil thlen dan engmah a sawi lo va,zawh nawn ka tum bik lo. A inpeih hunah ala sawi mai ang chu.

‘Hey….’ Ka kawnga rawn kuah pahin ka beng bulah a rawn ti a. Tu nge anih en kher ka mamawh lo.

‘Enge i lo tiha?” a ti leh a. Ka chhan hmain amah en thei turin min kuai hera.Hnial tumna ka nei lo. Nimina thil thleng leh vawiina Julie boruak vel nen ka chau hluah hluah. Mahse, Hmingthana ka hmuh hma khan ka chau tih ka lo hre miah lo thung.

‘In lo thlenna a rei tawh em?” ka ti a..  Pangchan ka chak ngawih ngawih.

‘Lo thleng chiah..’ tih pahin Ka sam  ka bengah a rawn zepa,min pawt hnaia. Min kuah bet zui leh hmiah. Min duatna chuan atthlak zetin ka tah a tichhuak tlat pek.Ka maimitchhinga, ka hriat loh karin amahah hian ka lo innghat nasa hman hle a lo ni.. A awmah ka hmai ka phuma,Sangzuala thilsawi ka bengah a lo ri nawn nghal zat.

‘A nupui kha a hmangaih lo,a rai vangin a neia.Mahse, pasal tihtur zawng zawng tha takin a hlenchhuak vek’ a ti anih kha..

‘A  nupui vanga min hua ni loin,a farnu ka kalsan vang zawkin min hua’ a tih kha..Sangzuala a huat zia ka ngaihtuah a,kan inhmu a,a farnu hmuhtir ka tum tih a hriat hunah engtin tak ngai ang maw? Ka ngaihtuah duh lo law law…

Chapter- 11

‘Ka inbual zuai anga,lo insiam la…’ a ti a.. Ka biangah a kutzungpuiin a tuai hauh hauh bawk.

‘Kal loh ka duh..’  ka ti nghal hap. 

‘Khaia,ka thiante pawh i hmelhriat ve ang chu’ a ti nghet churh. Ka khap sak sak mai,ka hrehna leh kal ka duhna a inzat reng. Mahse, nakinah Piin a hre ngei dawna,engtin nge a tih ang ka hre lawk veka.Nek luih ka chak miah lo.

‘Mahse… Aaaa,I hrethiam chuang lo ang” ka ti halh.

‘Enge i hlauh ber?” ka tum loh lutuk min zawh takah chuan ka ip chawih thei. Ka melh zawka,a mitmeng fing leh ril ruih chuan ka ngaihtuahna zawng zawng a hmu tlang vek niin ka hriaa.Ka en rei ngam lo. 

‘Tumah…Oh,engmah’ ka ti nawi nak. A then suk.Amah en thei turin min kuai daka,ka en ta nge nge.

‘Tuman an tihnat che ka phal dawn lo.Hlauh ilo nei anih pawhin ka awmchhung chuan tumah i hlauh a tul lo’ a ti leh a.A aw ki nghet takah chuan a tihtak zia a hriattheih.Mahse, midang ni loin a nu a ni tlat. A hriat loh vangin asawi mai mai zawk tih ka chiang.

‘Min ring rawh’ tawng tuma ka ang ziau tawh chu ka hmui, a kutzungtanga rawn tihsik pahin a ti leh a. Ka bu ta nghauh.

Min kuahna a thlaha, a kalsawna,kei erawh ka dinna ngaiah ka dinga. A kalsawn chu ka en vang vang. A dar hlai hlap leh a kawng fek rat te,a bawp sei zeta a pen pawk pawkte chu atak ni loin Thawnthu a achangtupa nimai awm a ni. Maimitchhing chungin ka mumang anih leh nih loh ka ngaihtuaha, ka menchhuah rualin mumang a ni lo tih ka hmu a.Mahse, mumang nise ka ti em pawh ka hrechuang miah lo. 

Ka thawmhnaw dahna ka hawnga, engmah haktur chi ka nei lo. Thawmhnaw ka nei tha lo pawh ni loin enge hak chi ang ka hrethiam lo hrim hrim zawk. Minute 20 a liam leh hnuah pawh insiam loin ka la hawi mai mai.

Ka Room kawngkhar inhawng ri ka hriat rualin ka hawilet vat. Hmingthana lo lut mek chu ka en a.Chhuak turin ala insiam bik lo. Jogger pant a haa.T-shirt nghawngbial ,a dum nen. Slipper a bun bawk.

‘Ila insiam na nge?” rawn phei pahin a ti a. ‘Um..’ ka ti ringawt. 

Khumah a thu a, Min en loin khumbula kan chhungkaw thlalak ka tar a en vung vung.

‘Kan kal lo mai dawn mi?” a ti thut. 

‘Maw? Ngatinge?” Ka ti vat. 

‘Zawhna ngah thei reuh lutuk’ a ti hluk. Ka hmui ka pet vak ringawt.

‘Ka sawi tum zawk chu…Eng lo’

‘Sawifiah chiam duh lo mai rawh. A buaithlak’ a mit a siai zauh. A hmelah nui hmel a lang thei bawk.

‘I kal hreh em a,chuvangin kan kal lo mai dawn mi ka ti. Mahse, kal i duh chuan kan kal thei renga’tha takin a ti a. 

‘Aih,duh lo’ ka ti chu ka chhang rang lam mah a ni e.

‘Ok…Mahse, min chhuahpui ang’ thupe aw in a ti a 

‘Maw?” Ka ti ha. 

‘Maw tih hi i inhmeh ania aw’tih pahin a then leh suk. Ka nui ve ta ngawt. Ka hriatreng pawh hi ka zahzelah ‘ maw’ tih ka ching lutuka,a sawi dik lo lem lo.

‘Ka chhuak thei lo.Pi leh Pu an awm si lo a’ ka tih chuan awlsam takin,

‘Kimi a awm. Ngaihtuah suh’ a ti a. 

‘Mahse….’ Ka ti chiah chu ‘Inhnial hi nuam i ti ve ngawt mai’ a ti hluk. A rawn tho a.Min rawn pan hnaia,ka tang lehnghal teuh mai. Ka bulah a rawn dinga. 

‘Kan pahnihin kan chhuak ang.Khawiah emaw ka hruai ang che,diktak chuan kan pahniha hunthawl neih ka duh’ khauh furin a ti a. Ka chhang lo.

Darkar  chanve aliam leh chuan hmun nuam leh reh raihah kan awm tawh. Motor atangin achhuka,chhuk ve loin atihtur ka nghak mawl tawp. Ka thutna lamah a rawn kal kuala,kawngkhar a rawn hawnga,thuawih hmel fahranin ka chhuk ve mai bawk.

Motor awmna chhak lamah min kai chho a.Thui vak lo kan kal hnuah a ding ta chut.Engmah sawi loin kan hmalama Aizawl khawpui pe ut mai chu kan thlira, a thui vak lo nangin ka hah hman titih.Duhthawh zetin boruak ka hip vang vang.Thli thawin ka sam a rawn chhem leng nghal dar dar mai. Enge angaihtuah ang ka hrethiam lo.Mahse, hmun reh raih leh boruak thiang nuam zet chuan min tiharh sawng sawng thung.

Min rawn en a,thla ral lam hekbui  tawh mah se thimchhia a ni lo. Zahzelah ka thu ta ngawt, ka hnungah a rawn thu thla ve a. Hnunglam atangin min rawn kuaha,amah ngheng turin min pawt hnaia.A darah ka lu ka nghata,ka nghawng a rawn thawk khum zawnga lum ham ham chuan mak takin min fana,ka mit ka chhing nghal hmiah.A hmui lum ham hamin ka beng hnuai a rawn si a,ka ip nghal chawih. Ka daka,ka mit ka chhinga, zei taka ka bengkawm a fawhna chuan min fana,ka la hriat ngai loh nawmna mak takin min fan nghal raih raih bawk.

 Dimtein ka kawr a rawn zena, ka mur nghal ar ar mai. Hnial tur ka ni tih ka inhria,mahse a kut zungtang  sei thlurh chuan ka taksa khawih kual vel se ka duhna chuan a tur in min tur tlat. Ka bra a rawn zena,a kut lawngin ka hnute a khawih a. Ka tum loh lutukin ka mar nghal awk. Ka kekawr kawng  rawn zen tumin ka kekawr kawng suihna a pawt phelha. A zen tur chiah rang lutukin ka man bet nghal chat.Lungawi lo tih hriat zetin a rum hawk. 

Ka rilru a fim tial tiala,chakna avanga ka ngaihtuahna nu but mai a kiang tial tial a. Zahna zawkin min fan ve ta thung. Ka thu mara, ka dingchhuak zui nghal a . A rawng ding ve a,a hmel ka en ngam lo.Kan kal tirh ai khan ka hmufiah thei ta deuh bawk.

‘Tete…’a ti chiah chu,

‘Kal tawh ang’ pangngai thei ang berin ka ti a. Min chhanna pawh nghak loin ka pen zui chu a ni der. Mahse, ka banrekah a rawn vuan chat. Ka dingnghal chawt bawk.

‘Kal ang’ hawi let chuang loin ka ti leh nghat. Hmeichhe lepchiah lutuk tia ka lo ngaih thin te ang dinhmun a ka din ve takah chuan zahna bak engmah ka ngaihtuah thei lo. 

Engmah sawi loin a rawn kal hnaia,ka hmaah a rawn dinga, ka en ngam lo. Ka beisei loh lutukin a thu hniam a,angaihna hre loin ka en tawp. 

‘Enge i tih a?!!” ka ti lawi rat mai.

‘Min nei la…’ aw ki hniam tak hian a ti a. 

‘Oh….’ ka ti ringawt. Maimitchhing. chungin enge thleng mek hi rilru fim taka ka ngaihtuah angai. Inneih maw? A rang lutuk. Bakah ,mutdun ka duh loh vang bak a ni lo ang.

‘Tunah ka ti lo.I inpeih hun ka nghak thei…’ ka kut a rawn vuan a. Ka mengchhuaka,a hmai thim deuh mak chu ka en a. Ka khur dar dar mai.

‘Inneihna hi fiamthu a ni lo ania’ ka ti chhuak thei hram.

‘Ka hria,chuvang takin fiamthu ka thawh lo’ a ti leh sup.

‘Min mutpui theih loh vangin hetiang i tih kher angai lo’ ka ti nghat. Ka ngaihdan diktak a ni bawk.

‘Sex maw,hrep tak hian…’ a ti hluk. Mahse, a tho chuang lo..’

‘Ka thiam loh anih kha,ka awmdan vang khan thupha ka chawi e’ ka ti leh a.

‘I ngaihdan siam nangmah bawkin i nemnghet ziah tihna ami?” a ti leh daih. A thinrim ka rin laiin thinrimna awm engmah a awah a lang lo. Tihngaihna hre loin ka ding ren rawn.

‘Eng lo…Diktak chuan,tho phawt rawh’ awmze nei miah loin ka tita ngawt.

‘Aw nge aih?” luhlul lutukin a ti nghut. Chhanna ka pek hma chuan a tho dawn lo tih ka chiang lutuk. Enge a hriat tak thut ni?

‘Aaaa.ka hre lo’ka ti halh mai. 

‘Aw nge aih…’ a ti leh a 

‘Hmingthan…’ ka ti leh hap ringawt. 

‘Aw tihna a ni em?” a ti leh a. A va han luhlul ber tak. Sex vang emaw engvang pawh chu nise a awmdan hian keimahah danglamna a thlen tho tho.

‘Ih, eng lo.  . Aw, ,aniang.Ka hre lo’ ka ti leh nawk nawk.A rawn tho chhuaka,alamah min pawt hnaia,a awmah ka lu a nembeta,min kuah bet nghal hlu hlu mai. Tisa chakna lam engmah a awm lo. Ka tang teuh reng chu ka inthlahdul a.Ka mit ka chhing leha,a lungphu nghawr dat dat chu ka ngaithlaa..Ka tel ve niin ka hria.Ni e..Ka tel ve maithei asin. Tunah engvang pawh nise nei turin min sawm miaua…

‘Ka tur hmanhmawh dawn lo che.Mahse, ka nghak reng che tih i hriat ka duh’ a ti leh a.Ka chhan hmain ka chhip samah a rawn fawp zui nghal vang vang.Nichin lawka a awmdan ang kha ni loin min dimin a dam hle bawk.Tim daiin a kawngah ka kuah ta nge nge,a pian nalh leh inkhaithli thlarh mai nen kan inzawmta emaw tihtur khawpin kan inhnaiha,a taksa lumna in min ur ham ham bawk. Mahse, thildang engmah a awm miah lo..Ka thlamuang ngawih ngawih tihmai loh chu!!

‘A rang mah mah lo maw?” ka huaisenna zawng zawng sawmkhawmin ka ti sep.

‘Aih…Thla hnih aiin a tam tawh’ a tih chuan ‘Thla hnih’ ka ti nawn ve sap. 

‘Inhriat rei hi inneih hlenna a nichuang lo’ a ti a.. Ka rilruah anupui nen an inneih dan chungchang Sangzuala sawi kha a lo lang zawk.

Min kuahna atangin inlakhran tumin ka che a,min thlah ve mai. Ka inhera, kan hmalama Aizawl khawpui pe tuar lam bawk ka thlir leha. Inneih maw? Engtin nge anih theih tehlul ang? Pi in a hriat hunah chuan ka nasa lo khawp ang le.

Kan tawngrual thawta, ka nui haka.Ani pawh a nui ve  bawk.

‘Sawi hmasa la…’ a ti a.

 Ka sam thliin a chhem len dar dar chu ka bengah min zehsaka,dimtein ka biangah a tuai zui hauh hauh mai. Zanin chu engmah a dik lo ka tidawn nge a dik vel vek zawk ka hre lo.A lo thlen tirh atang khan a chetdan engkim kha Mipain a hmangaih tak laka a tihdan tur vek a ni tawp mai. Min Hmangaih dawn hauh si lo,duh erawh kan induh tih ka chiang. Nia,ka duh..Nei tura min sawmna hun leh hmun te,a chetdan engkim mai khan min la fan raih raih bawk. Mipa Romantic leh ti hlem hluam hi ka ngaina ngai lo. Tawngkam duh tlawr deuh phei chu ka ten zawng tak.. Mahse, tun lawka Hmingthana chet dan kha chu mumang ang maia min fan rawih rawih thei a ni tlat lawi.Mipa diktak tihtur tiin min nawrlui hauh lo bawk.

‘Enge dik lo awm a?” a ti leh thawmah ka ngaihtuahna atangin ka harh zawk .Ka melh chho a,min lo en run ka hmuh rualin a mita en loin ka mit ka lasawn vat.

‘Kan inneih theih ka ring lo….’ Ka sawi zawh rualin a thaw nghal hawk mai.

‘Tu nge awm?’ a ti hmuk.

‘Tu? Eng maw i sawi?” Ka ti a. 

‘Mipa nge Hmeichhia?” a ti leha,a sawi awmzia ka man lo.

‘I sawi awmzia ka man lo’ ka ti thuai 

‘Kan inneih theih loh chhan tur mawle..Mipa vang nge ka nu vang?” ka ngaihtuah mek a rawn sawi dik takah chuan ka chil ka lem a. A sak talh mai.

‘Min pawm ngai lo ang’ ka tichhuak sep. Ka sawi zawi lutuka,inhnaih viau mah ila a hre phak em pawh ka hre lo.

‘A neitu tur chu keimah…’ khauh zetin a ti hmuk.

‘Mahse…’ ka ti chu min tawngkhalha, “keiman  ka lo bia ang. Bakah,ka duh ka neihna hi tuman min dal ngai lo’ a ti leha.

‘I nu ania…’ ka ti hram. 

‘Ka hria,ka nu anih vang ngawtin a duh ang angin ka awm dawn tihna a ni lo..’ thutak em emin a ti a. 

‘A rilru tihnat pawi i ti lo tihna maw?” ka ti nghat.

‘Ka tina ngai lo ang,min ring rawh. Khavang khan buaina dang engmah thleng suh se,ka chingfel mai ang.A tha em?” a ti leh a. Hnial a sawt chuang lo tih hriaiin ka bu ta ngawt. Mahse, ka chunga thleng tur ka ngaihtuah zawng pawn ka khur lo chauh.

Ka mu meng renga, zanin thil thleng a mal te tein ka ngaihtuah leta,a mak tihbak tawpna ka siam thei lo. Inneih kha a duh tak tak angin ka thinlung hian zu han pawm thlap theia!!

Pi leh pu an lo hawnga,keimahah hian ka hriatthiam si lohin ka thlamuang hlawl lo. A khat tawkin Sangzuala nen kan inbe deuh renga, Julie dinhmun ahriat duh vang a ni tih ka hriaa. Tha takin ka be mai zel. Julie nen kan la sawidun leh ta miah lo a.Amah a inpeih hma loh chuan nawrluih ka tum lo sa hrim hrim.

‘Nu,zaninah Tetei hi ka hruaichhuak dawn asin’  chaw kan ei laiin Hmingthana’n a ti a. Ka chawei lai ka tawp nghal hmak. Ka hawichhuak ngam eih lo bawk.

‘Khawiah maw?” awki pangngai takin Piin a ti a. Ka chaw ka ena,ei chakna ka nei tawh lo.

‘Anthony te naute ka tlawh dawna. Min pui turin ka duha’ danglamna awm map loin a ti leh a. Tu nge Anthony pawh ka hre si lo.

‘A tha alawm,ama thu thu nimai.Ni lawmni Tete?’ Piin ka hming hmerha min zawh takah chuan hawichhuah loh theih a ni lo. Hmingthana ka ngei zia chu pui tak a ni ringawt.Chhuanlam tur dang a hre ngang lo zawk nge mawni? Min hrilh lawk bawk si lo. Pi ka en a,ka chhanna nghakin a mitmeng lian leh melh na zetin min lo melh reng tawh.

‘Eee,aw..Min mamawh chuan ka kal thei ang’ ka ti chu ka beisei aiin ka aw a pangngai.

‘Um,Anthony te naute hi an buaipui rei tawh mang e’ a ti a. Ngaihthat lohna engmah a nei lo nge a tilang lo ka hre lo. Pu pawh tukdang ang lo takin a tawng ve luam. An sawi dan hmangin Anthony chu Hmingthana Cousin anih hmela. An  chhungkua pawh an inpawh tha thawkhat aniang,an chanchin an hre em mai. Midang chanchin an sawi chiam ka hriat khat tehreng nen tukin chu an naute chanchin leh an chhungkaw chungchang an sawi ve teuh.

‘Chhuanlam siam dawn pawn min hrilh hmasa la,ka bo hu a..A nuam lo’ ka ti nghat. A nuia, Ka hnung lam atangin min rawn kuaha,ka darah a khabe a rawn nghata. Ka bengkawm a fawp zauh bawk.

‘Chhuanlam emaw chhuanlam lo pawh nise ka bulah i awm dawn tihna ania.A tha vek lo mi?”a ti zuia. 

‘Ka hre lo,mahse ka mawl hmel em asin a’ ka ti leh hlak. Kan dinna lai hi Pi green house bulah a ni a.Midang tan hmuh mai theih a ni lo. Pu a kal tawha,Pi a chhuak tawh bawka. Kimi leh Bawihpuia Schoolah an kal tawh bawk.U Dini leh Jhanvi  chawhmeh lei turin an chhuak bawk nen tumah han hlauh tur an awm lo. 

‘Hrilh lawk che ila i buai tho ang. I hmeltha zetah hian dawt i sawi chuan a lang vek zel’ a ti a. Zawitein a nui zui leh a. A sawi dik lutuk chu ka then ve sak. 

‘Mahse…’ ka ngaihtuahna nen inmil lo zetin luhlul chhuahin ka ti lui leh talh.

‘Aaah,inhnial nuam ti viau zel suh..MAMA hi ka ngai ve bawk a.Inneih a duh har si’ nui chungin a ti a. Ka biang a sa nghal hat hat mai. Ka hmel hmu thei zawnga a ding lo ka lawm zia chu puitak a ni ringawt.

‘Te, nizanah min lo call a..’ a room ka tihfai laiin zawitein Julie-in a ti sep. Mahse, ka bengah chuan ring tak a ni tho. Sangzuala kha Julie be rih lo tur khan ka ti sia, a insumzo lo a ni ngei ang.

‘Chuan..?” zangkhai vah in ka ti a.

‘Ka pick-up lo,mahse msg a rawn thawn leha’a ti ta zel. 

‘Um…’ ka ti ringawt. ka chhungril erawh a sahal titih.

‘Min hmuh a duha…’ a ti leh sep.

‘Maw?” Ka ti chiam,ka tum aiin ka aw a ring. Min rawn en vata. A hmel ngui leh dang bai mai chu ka en a. A Birthday kan lawm hnua a hlim hmel nen kha chuan a danglam leh vek tawh. Sangzuala chanchin ka hrilh hnu phei kha chuan a nguai em em a,phurna engmah a nei lo emaw tihmai tur hian a zuai raih reng. Kal tura beiseina ka neih pawh a bo leh zo tawh. Achang chuan ka hna ber ka fail niin ka hre thina,hrehawm ka tih ruk vang vang ni a tam ngiang mai bawk.

‘Ka ngaihtuaha,vawikhat tal a tawp nan a thusawi chu ngaithla ila a that ka ringa..’ a tih chuan mahni inringtawk lo aw a hriattheih.

‘I tihdan dan le…Tha i tih phawt chuan vawikhat hmuh leh chu kei chuan ka thlawp che’ ka ti a. 

‘Min puih ka ngaia’a ti ta halh. 

‘Um…’ ka tih chuan ka dinhmun derthawn zia ka hrechiang  zual sauh thung. 

Nilengin ka rilru a mumal lo,achang leh Julie puih ka duha,achang leh engkim Hmingthana hrilh hmasak ka duha. Mahse, ka hrilh ngam ngai dawn lo tih erawh ka chhungril hian a hrechiang lutuk. Vawikhat inhmuh chauh tur a ni a,a hre lo kumkhua thei tho. A hre lo anih chuan a tha animai.Mahse, a hria anih vaih chuan ka chan ngei ngei ang.

‘Dik lo a awm em?” ka kut rawn  hum pahin Hmingthana’n a rawn ti a. Ka phu zawk. Ka melh zauha,min en loin hmalam a en a. A motor khalh lai bak ngaituah nei hmel a pu lo.

‘Aih, awm lo e’ ka ti a. Pawn kan tlanpelh lam ka thlir dauh dauh.

‘I landan leh i sawidan a in ang lo ania’ a ti leh a. 

‘Dik lo a awm lo’ka ti rang vat. 

‘Ok..’ a ti nghut. Ka kut a vawnna a thlaha,tumah mah kan tawng zawm lo. 

Anthony a tihte in kan thlen hnuah chhuahna turin dawt a sawi lo tih ka hre ta chauh. An Nurse a chawlh lai a lo ni a. Midang an hmu mai bawk si lo nen zan lamah an lo buai deuh thin a lo ni a. Tukin khan chhuanlam siamah ka lo ngaia,amah lah kha a nui mai maia..Ka zak deuh rum rum mai.

‘I phone hi…’ ka kut ka sil laiin Hmingthana’n a rawn ti a. Ka hawileta. A lo lekkang vu.

‘Tu nge?” ka kut hruk mawlh mawlh pahin ka ti a. A en vut.

Hriatthiam har zetin min rawn en a. A hmel chang leh rum ul mai chu ka en a.Angaihna ka hre lo.

‘Tu nge?” ka ti leh a.

‘Sangzuala…’a tih takah chuan Ka lungphu a chawl lo chauh….

Chapter- 12

Ka che mai lo,min rawn pan hnaia. Ka kutah phone a rawn hmehbel a. Ka beisei loh lutukin a then suk.  Ka Phone ri a tawpa,ka thaw hawk.

‘Ngatinge? I dang vek a..’ a ti a.

‘Ka pum a chiang lo lutuka’ pangngai takin ka ti a. Ka nui lui sak.

‘Call back mai rawh…’ a ti leh a.

‘A pawimawh chuan a lo call leh mai ang’ ka ti a. Ka kekawr ipteah ka thun nghal daih.Ka zamzia a hriat loh nan ka inkuangkuah zui than.

‘Tete, hei thingpui lo inrawh’ Anthony-a nupuiin a rawn ti a. 

‘Aw…Angai lo asin’ ka ti a.Hmingthana ka en leha. Thingpui an dahna lamah a thle zauh. Thinrimna emaw thildang pawh angaihtuahna awm engmah a lang lo. A lang dam thlupa.Nichina a hmel thutak lutuk kha ka hmusual zawk nge pawh ka hre tawh lo. 

Anthony-a te nupa bula awm a nuam tak zet. An naute hi lung lam tha lo anih bakah a thisen pawh Cancer na chance a awm bawka. Mahse, an hmelah lungngai hmel hmuhtur awm loin hlim takin an nupain an titi bawrh bawrha,an puitling ka ti takzet.  An tan chuan Julie nurse ka ni maia.Abak a awm lo.Tha takin min biaa. Lawmthu an sawi mawlh mawlh bawk.

‘Nene-i khan ka bialnu i nih leh nih loh min zawta” kan tlanchhuah hnuah a ti a. Rang zetin ka en vat. 

‘Naaa…’ ka ti halh ringawt. Abak sawitur ka hre lo.

‘I nih thu ka sawi’a ti leh chu‘Ni lo..’ rang lutukin ka ti vat.

‘Ngati maw?” awlsam zetin a ti liam puat.

‘Tuman an hriat rih loh ka duh’ka ti nghata. 

‘Oh..Sorry,ka lo sawi vek tawha’ pawi tihna tak tak nei si lo hian a ti a. 

‘Min zawt hmasa tur inia sin’ ka ti leh hlak.Ka tum reng vang ni loin ka awah demna ri a hriat tel theih.

Motor a tihdin takah chuan angaihna hre lo zetin ka en a.  In kan la thleng der bawk si lo.

‘Ngatinge i din?” Ka ti he haw. 

‘Engtin nge ka nuin a tih che?” ka zawhna a haider hian a ti a. 

‘I nu maw?” mawl hmel zetin ka ti a. A thle zauh. 

‘Zawhna ka zawt che a…’ nin hmel zetin a ti hmuk. 

‘Aih, engtinmah min ti lo’ka ti ta vat. 

‘Anih chuan engvanga hlau em em nge i nih si a?” a ti vawt ruih. Engtin nge ka chhan ang ka hre lo..

‘Ka hlau hleinem…’ nui chungin ti mah ila a nui ve der lo.

‘Sawi rawh…’ thupe aw zetin a ti hmuk. Ka nui tawp nghal hmak.

‘Engmah a awm lo..diktak chuan ka hnathawhna te fapa inia,bakah i nihna leh ka nihna pawh a inmil lo hrim hrima’ ka tita duah.

‘Chu zawng chu maw?” a ti vawt leh ruih. Ka aw ka thian a,anihna tak hrilh ka duhna leh duh lohna a inchen reng.

‘Aih, aw…Chu zawng chu’ ka ti sap.

‘Ok…Kan thlen veleh ka nei duh che tih ka hrilh ang. Enge thleng kan hmu anga,engthil nge i lo hlauh viau tihte pawh’ a ti a. Ka lungphu a rang nghal dawt dawt.

‘Ni lo,chutiang tisuh…’ tih pahin a banah ka va vuana.

‘Ni lo chu enge?” a ti a. 

‘Ka…ka .Englo,ka la inpeih lo’ka ti buai nak.

‘Takzet?” a awih lo tawp tih a awah ka hrethei.Mahse, a pawi lo. Ka tan tlang angai.

‘Aw..Ka la inpeih lo. Pi leh pu hmachhawn ka tihna..Hun ka mamawh “ka ti ruai mai. 

‘Ok…Mahse, ka nghak rei dawn lo ka tih kha’ min en vung vung hnuah a tita hram. 

Ka mut hnuah Sangzuala ka call back ta chauh. Ka rin ang ngeiin Julie nen an inbia tih min hrilh a lo tum a ni a. Ka ngei deuh hlur. Hmingthana khan min man ta se engtin nge ni ang? Anthony-a leh Nene-i kha an titi zawm zat avangin min lo call tu lam kha kan ngaihven ta miah lo a.Vawikhatmah Hmingthana hnen atangin Sangzuala leh a nupui hlui chanchin ka la hre lo.Ka phone a en lai khan min ringhlel angem ka hre lo.Mahse, Sangzuala nen kan inkawm a ring lo tawp ang.

Julie-in a rilru a siam fel hleithei lo. Hmuh a duhna leh duh lohna a inchen viau a ni phawt ang. Vawiinah hmuh a duha,mahse a tukah chuan a duh leh tawh lo. A dinhmun ka ngaihtuaha,ngaihtuahna mumal a pu thei lo hi ka dem lem lo. A induhtawkna hian a dal a,a hmuh hunah a ngaihdam mai a hlau te pawh a ni ang. Mahse, kei erawh chuan an inhmangaih ve ve tih ka lo pawm fel diam tawha.Sangzuala’n a hmangaihna aia nasa mahin Julie hian a hmangaih niin ka hre bawk.

‘Enteh…Din tum chhin la..’ tih pahin ka kuah tho a.

‘Tunah hian maw?” a ti ha.

‘Um..Tum chhin ringawt la..’ka tih chuan ‘Aih, ka ngam lo..Bakah ka ke hi a zawi vek alawm’a ti nang nang.

‘Ok..A pawi lo..I la kal em em ang’ ka ti leh a. 

‘Ka chak deuh thin ka ni thei ngai lo tur hi ka rilru a na thin’ ka thutfel tir hnuah a ti zuai raih.

‘Ka hriat ve chi a ni em?”zang vahin ka ti a. 

‘Um…Pasal ka neih hunah chuan Kawrfual var ka ha ang ka lo ti thin. Mahse,engtikahmah Pasal ka nei dawn lo a.Kawrfual lah ka ha dawn bawk lo va’ a ti leh a. 

‘Mahse, a pawi lo…Theihnghilh rawh,tleirawl lai duhthusam mai mai anih kha’ ka chhan hmain a ti leha,Mahse, a mit a nuai zauh danah a tah a chhuak tih ka hria.

‘Ka lo kuah ang che aw’ ka tita ngawt.

‘Ti nge?’a ti ha a. 

‘Ka hre lo,mahse inkuah ila a that ka ring’ ka tih chuan  Min chhang lo,ka thu hniama. Ka kuaha,ka darah a lu a rawn nghata.A khur zui ta dar dar. Ka mittui tla tur dan kir tumin ka khap sak sak thung.

‘A nupui neih hre lo in thi ila ka ti thin.Nupui a nei tih ka hriat hunah chuan ka tuar zo dawn si lo a. Ka haw lutuka,mahse ka hmangaih tho si’ a insut zui leh ta hlap hlap. Ka biang a rawn lum thla pap.

‘Kan bei anga. I ke ngeiin i kal anga. Kawrfual var pawh i duhthusam thlapa thui i ha ang’  ka ti a. 

Engmah sawi zui loin a tah ban thlengin ka kuaha. Ka tap ri ve lo nangin ka mittui a tla nasa ngang mai thung. 

Ka Room ka luh rualin ka phu nghek..Khumah Hmingthana a lo thua,ka lut thawm hriain  alo hawi a. 

‘Nang maw? Ngatinge tunah ilo kal a?” ka ti a. Midang an awm hnai em ka hre si lo.Ka mangang titih.

‘Ka be duh che mawle’ a ti awlsam mai.

‘Pawnah pawh min be theia…’ka ti hlaka. 

‘Duhtawk teh,ka nu a awm lo’ khauh zetin a ti hmuk.

‘Oh…’ ka ti sap ringawt. Mahse, ka thawveng hawk tho. Hahthlak hian a,in khatah kan chenga. Kan inngaizawng bawk si.Pi hriat hlauhna nen,engkim hi a hahthlak vel vek. 

Ka kalpheia,Dressing table hmaa Plastic chairah ka thu a.Ka timdai mai,achang hi chuan inngaizawng hi kan ang lo leh tlat thin. Diktak chuan Hmingthana mood inthlak thut thut thin hian ka pawh tur angin min pawhtir thei lo.

‘Beiseina awmze nei lo siamsak lo la ka duh’ a ti bul hmuk.. A sawi tum ka man mai lo.

‘Julie ania ka tih’ amah bawkin a ti leh a.

‘Aaaa,beiseina neih chu a thiang alawm’ luhlul chhuahin ka ti nghauh.

‘Luhlul viau suh. Doctor kan hmuh phak chin ,a tha zawng zawng ka tihna anih chu.Chung ho pawn an beisei loh laiin nangin engmah beisei lo la ka duh’ a ti leh a.

‘I nau hi i haw tak tak em?”ka ti ta daih. 

‘Hua maw? Atthlak lutuk’ a ti hluka. 

‘Anih si chuan amah pawn beiseina a neih laiin engvangin nge a ni lo zawngin i ngaihtuah luih tlat si.Support tur i ni asin’ ka ti leh a. Hriatthiam har zetin min rawn en a. A mitmeng nalh leh ril zetah chuan nidanga kala hmuh ngai loh natna niawm tak ka hmu thei.Mahse, a rei lo.

‘Engtikahmah inneih kawrfual hain a ding dawn lo’ a ti leh a..

‘Maw?” ka ti halh. Nichina kan sawi kha a lo hria tihna a ni angem? Mahse Julie rooma luh chu sawi loh a room lam hnaihah pawh a kal ngai lo.

‘Julie beiseina hi ke a kal leh lam ni loin kha mihring tenawm,ramsa zawk kha a ni.I hrethiam pha lo ang’ a ti a.. A aw chang zetah chuan huatna leh tenna ri a hriat theih. Ka lo ip chawih thung.

‘Tu? ‘ ka tichhuak sap. Hrereng mah ila ka hria tih tihlan ka duh lo. A thin ka tirim zual ting a ni mai.

‘I hre duh tak tak em?” A tih chuan khakna in a khat tih a mitthim raih maiah chuan alang theia. Tawngkaa chhang loin ka bu nghat.

‘Ka thian leh ka unaupa angin ka en thin,mahse ka nupui nen inzawmna an lo neia..An lo inzawm kha pawi ka ti lo ni loin keiin ka huat zawk chu Julie a tina hi a ni.Atir atangin  tina lo turin a intiama.Mahse, a mamawh laiin a kalsana’ a sehchilh rawp rawp mai. Sangzuala khan a sawidik chiah. A nupui vang ni loin Julie vangin a lo haw tak tak. A huatzia lah chu rapthlak khawp a ni a.Reh mai mai chi a lo ni lo.

‘A pawi ka ti’ sawitur dang ka hre hlawl lo.

‘Ka  that lo hi a vannei lutuk..’ a ti leh a. A kuna,a hmai a hup zui nghal vang vang.

Ka tho tham tham,ka pan hnaia. A sirah ka thu a. Tim daiin ka kuah a. Min hnial lo. Mipa ah pawh pa leh induhtawk lutuk nimahse hnemtu chu a mamawh ve a.Mihring anih tlat vangin  a na natpuitu pawh a mamawh ve tho. Hnem tumin ahnungah ka chul hauh hauh bawk.

‘Tunah chuan a tha vek tawh alawm’ ka ti sep. 

‘Um, diktak chuan Julie ka hmuh hian hrehawm ka ti thin. Keimah vang niin ka hre fo va. Ruatpuii kha khawngaih loin lo nei lo zawk ila..Khatiang thil tenawm pawh kha a hmachhawn lo tur ania. Ka venghim zo lo chu engpawhnise ka tina tel hi ka inngaidam thei lo’ a ti leh a. A darah ka lu ka nghata. Engmah sawi loin ka kuah nghet salh ringawt. 

‘Ka nau,ka neihchhun a ni a…’ a ti leh a.

‘Hey,a tawk tawh. I thiamloh a ni lo. Midang in an tisuala,nangmah mawh inphurhtir suh’ ka ti a.

‘Ka hria.Mahse, Julie ka hmuh apiangin ka na thina’ a ti leh a.

‘A hmangaih lutuk che..’ka ti a. 

‘Lehlamah ka nupui,lehlamah ka best.. A tuar nasa ber chu Julie..’ a ti leha. Ka hriatthin mipa,ngeng leh luhlul,na ve ngai lo ang maia khawsa  thin kha ni loin tuna ka bula awm mek hi chu puih ngai leh hriatthiam mamawh em em tu Mipa a ni. 

Kan mu duna,a kawngah ka kuaha..Engmah kan sawi lo. Sawi teuh kan mamawh hek lo. Ka harh leh in a lo awm tawh lo.Sana ka en chuan Dar 6 a lo pel tawh.Zankhua in kan muduna, kalturin ka ti lo a,kal a tum bik hek lo.Mahse sex lam hawiin kan khawsa lo. Ngaihtuah pawh kan ngaihtuah lo.

‘Tete, ka lo kal ve a tul lo tak tak ang maw?” Piin a ti a. Ka bu nghat. Julie nen Doctor kan hmu dawna, anihna takah chuan Doctor kan hmuh zawh hnuah Sangzuala kan hmu dawn bawk. Nidangah chuan Julie kan hruaichhuah reng rengin Pi emaw pu an kal ve ziaha.Vawiin erawh chu amah Julie pawn a ngai lo tiin a tang kawh tlat.

‘A tha alawm. Zaua’n a thlah che u anga’ a ti leh a.

‘Nu,angai lo..Taxi in kan kal mai ang. Kan rei dawn em pawh a hriat si loh a’ Julie-in a lo ti a. Hmingthana erawh ngawi rengin chaw a ei mawlh mawlh. Julie-in kan ruala Dawhkan a kil hmasak ber tumin Pi mittui a tlaa. Hmingthana erawh engmah sawi loin a thut ngaiin a thu khawng luh ringawt. 

‘Ka u khan kan kalna tur a hre lo ang tiraw?” kan chhuah hnuah a ti a.

‘Hre lo ang’ ka ti vat. Julie-in harsa takin duhthlanna a siama,thildang zawng zawng palzam luiin Julie duhna tihhlawhtlin nan ka kalpui a. Tuman an hriat loh ka beisei takzet. Ka tawngtai hial bawk.

Sir Rindika kan hmu a,a hmasawnna a hmuhin a lawm ve ngang mai. Julie hian awihawm loh khawpin hma a sawn miaua. Kan hmuh zawh hnuah Sangzuala min lo nghahna lamah kan kal tlang nghala.Julie-in ka kut a chelh tlat.

In kan thlenin dar 3 a pel tawh. Pi a lo awma,ka kalna chanchin min zawt sawk sawk. Julie erawh anguai raiha. Kan haw kawngah pawh vawikhat bak a tawng lo hrim hrim.Biak chiam tul ka ti lo a, an inbiakna zawh tul ka ti hek lo.

Sangzuala kan hmuh atangin kar a liama,engmah Julie-in ala sawi ta chuang lo.Mahse, that tumin a bei nasa zuala. A hmanhmawh lu mah in ka hre leh lawi.An inhmu tawh lo nangin an inbe chhunzawm tih Sangzuala zawkin min hrilha,Julie tawngkam na leh ngeiawm tak tak dawng mah se a hmuh theih vangin a lawm tih a sawia. A msg pawh a vaiin chhang lo mah se a reply a.Call pawh a pick ta zeuh zeuh tih hlim zetin min hrilha.Ka lawm ve tumhrang bawk.

Julie damdawi leiin ka chhuaka,ka mimal pawimawh ka tih hnuah haw mai ka tum laiin Sangzuala’n min rawn call a. Inhmuh a duh a lo ni a. Hnial ka tum zeta,mahse a pawimawh atih avangin ka hmu ta zawk.

Ka room kawngkhar ri dawtah ka hawichhuak vat. Hmingthana a lo ding reng tawh,a hmel tur ngun mai chu ka en a. Hlauhna in min tham nghal ar ar mai.Hetiang khawpa a thinrim hmel hi ka la hmu ngai lo.

‘Engthil nge i tih?” nelawmna pakhatmah tel loin a ti vawt ruih.

‘Inbual ka lo tum meka.Enge nita?” ka hlauhna tilang lo thei ang berin ka ti a.

‘Tunah ka ti lo..Hei hi enge?” a ti leh a.A rawn kal pheia,ka hmaah a phone a rawn lek hnaia. Ka en a. Enge anih ka hmuh rualin ka towel ken ka thlauh tawp.

‘Ni lo…’ ka tichhuak thei hram.

‘Ka rilru zawng zawng hre vek chung leh eng buaina nge min thlensak hre chungin engtin nge amah hi i lo hmuh theih zawka?” a ti leh a. A aw a ring lo,mahse a hlauhawm lutuk,ka ip chawiha.Ka khup a sai nghal dar dar mai.

‘Hmingthan..Eng lo,I ngaih ang kha a ni lo..’ ka aw khur dar dar chuan thilsual ka ti tih a finfiah vek zawk hial ang.

‘Tu nge i nih chiah le?” a ti tuar..Ka phu nghek bawk. 

Chapter- 13

‘Hmingthan….’ Ka ti sep. Ka aw a zawi lutuka,a hrephak em ka hre lo.

‘Tu nge inih? Kha mi tenawmpa tana thawk kha maw?” a ti leh a. A aw aring ta lo.

‘I ngaih ang kha a ni lo…’ ka ti thei hram. Thil tenawm tak hmu ang maiin min en a. A ner zui leh nawk.

‘Ka ngaih ang a ni lo maw? Ok, pawisa engzat nge i duh?” ka beisei loh lam a ni a sawi.

‘Ni lo…Chutiang a ni lo..’ka ti leh tawk. 

‘Engzat nge i duh?” a ti leh thawt. Ka tawlh let deuh dawrh bawk. A hmelpa zetah chuan dawhtheihna tlachham ngawih ngawih tih a lang reng.

‘Aih….’ Ka ti chu ka  aw a khur nasa lutuk.

‘Kan mamawh lo che,I theih anga rangin chhuak ang che’ chang zetin a ti leh a. 

Ka khup sai dar dar kha tunah chuan a zawi huaia, engemaw tal ka rinchhan loh chuan ka tlu dawn tih ka hria. Ka tawlh leta. Khumah ka thu hnawk. Min rawn pan hnai chu ngam leh ngam loin ka en a. A hmel tur leh chang lutukah chuan tualthah pawh pawisak  lohna alang chiang em em bawk. 

‘Ka,englo ka sawifiah thei ang’ ka ti lawi rat. In control ka tum hle chungin ka hlawhchham chiang ngang mai thung.

‘Sawifiah maw? Aih,engmah ka ngaithla duh lo’ a ti hmuk. A aw vin lo mah se nekluih loh a fuh zawk tih ka hre tho.

‘Hmingthan,khawngaihin…’ tim daiin ka ti leh a. A rum hawk.

‘Ka mitah hian en rawh’ a ti nghuta. Ngam leh ngam loin ka en a. 

‘Ka sawi nawn leh ang. Kan mamawh lo che,bang ang che. Anih loh chuan enge ka tih dawn i en ngam lo ang’ a sawi zawh rualin ka ban tawn tawnah a rawn mana, Min phih tho lawp. Dimna tel miah loin min thing zui nawk bawk.Ka insum hman lo,ka rak thawt a.  Min thlah thuta.,ka thusawp thla hnawk.Engmah sawi loin a inher vuta. Kawngkhar lam apan zui nghal a. A hawnga, na lutukin a rawn nem khar thuai. Ka phu leh zawka. Khawvel hi thawm engmah awm loin a reh ta duka,nunna nei awmchhun chu keimah chauh nimaiin ka inhre hial. 

Ka phone riah ka harh zawka,ka muhil miah lo thung. Engchen nge chhuatah ka thut ka hre lo. Ka phone ka bana, min rawn calltu ka en chuan Julie a lo ni a. Sana ka en vata. A damdawi ei a lo hun reng tawh. Anih chuan ka thurei thawkhat bawk tih achiang.

‘Aw…’Hello ti loin ka ti sap.

‘Te, I chhuak em ni?” zangkhai leh ka mood nena inmil eih loin a rawn ti lang lang.

‘Aih,ka inbual dawn chiaha. Mahse, ka lo kal hmasa ang’ ka ti a. 

‘Hey, enge dik lo awm a?” a rawn tita chat. Ka in control ve viau nangin a lo man thei tho mai.

‘Eng dik lo maw?’ ka nui lui haka. Harsa tak a ni..

‘Ka hre lo..Lo kal la’a rawn ti leh mak.  Ka phone ka off rualin ka thaw hak. Engtin nge Hmingthana khan chet a lak tak ang? Pi leh pu in min petchhuak mai angem? hna neih loh aiin amah ka chan ang tih ka hlauhna a lian zawk. A natna ka siamsak vangin ka na tel ve ta tho.Ka lu ka thing nawka. Ka sawifiahna angaithla duh lo a,enge ka tih chuan ang? Ni lo,sawifiah dawn pawh ni ila Julie tan buaina ka thlen ang. Chu pawh ka thei chuang lo. Eng kawng ber nge ka zawh dawn ka hre lo..

‘I van nawm loh hmel em em’ Julie-in min lo ti a.Ka nui mai.Mahse, a mitmeng fing zet chuan ka chevel chik zetin a en zui reng tih ka hria. Hmingthana nen kan inkawp tih hi kan sawi nawn leh chuang miah lo nangin a hria tih ka hria. ‘Ka u vang em ni?” a ti ta chat. .

‘Aih…Ka lu hi a na ve deuha’ ngaihsam hmel fein ka ti a. 

‘Um..Damdawi ei la. Bakah ka tibuai thei bawk che sia,I chau lutuk te pawh aniang’ a ti a. Ka then lui leh sak.

‘Min ngaihtuah mah ta che. Hma i sawn hian ka hlim a. Ka inbual zawh veleh damdawi ka ei anga. Ka zia mai ang’ ka ti a. Lungthlu chiah lo niawm takin a chal a tichuar tap.

Hmingthana chungchang a sawizawm leh hlauin thildang ka sawi ta vat. Ka rilruah erawh thildang a leng lo. Azuali ka biak angai. Hna ka mamawh thuai dawn. Min thehchhuah hun ka nghak anih chuan ka a let tawp ang. Hmingthana’n Sangzuala a huatzia ka hre satliah lo a,ka mit ngeiin ka hmu a.Ka bengin ka hre bawka. Tu nge kan inhmu lai thlalak kha lo thawn ka hre lo. Tunah chuan a pawimawh ber a ni hek lo. Kan pahnih chungchang pawh sawi zawm loh a fuh zawk ang. A thinrim a reh mai mai dawn lo tih ka chiang. Ka dem miah lo,kei ni ila min phiarru ang hialah ka ngai ang. Mahse, min duatna leh min duhna hi engtin nge ka theihnghilh theih tak ang? Midang vangin ka natna tur ka insiam saka. Ka chhe ta vek chu anih ber hi…

Shower hnuaiah ka dinga. Ka ngaihtuahna tihfim ka tuma,ka thei lo. Hmingthana ka hriatthiam rual rualin ka rilruah Julie a lo lang ve nghal zat zela. Ka awm lo anih chuan engtin nge ka tel loin Sangzuala nen an inhmuh zui zel tak ang?  enge ka tih ang ka hre hlawl  lo. Khuarkhurum mawng nei loah ka tla ni berin ka hria. Julie-in min ban duh lo eng ang mah se Hmingthana thu tuman an hnial ka ring lo. Bang turin min ti a,ka bang lo anih pawhin min thehchhuak dawn tho tih achiang.

‘Hmeli…Min va han be lo thei ve’ Phone a pick veleh zangkhai lutukin a rawn ti ham ham. Ka mood nen a inmil lo lutuk chu ka then nawk. 

‘Ka buai alawm. Nang paw’n min be chuang lo a’ ka ti let a.

‘Hm,kan Pathlawi chheloa zunah chuan kan uai na ta viau aniang ka lo tia’ a nui kawr kawr. Ka nuih a za eih lo. Ka tah a chhuak ut ut zawk. Ka thiantha ber a ni chungin Hmingthana nen kan chungchang hi vawikhatmah ka la hrilh lo. Kan inzui rei ka ring lo a, infiamna hmanrua ka niin ka hre tlat bawka. Nei tura min sawm pawh khan ka mumang emaw ka la ti cheua, Engmah ka la sawi ta chuang lo fo.

‘Hna ka mamawh lutuk,in hospitalah khan kalna tur a awm angem?” Ka ti ta hlawl. 

‘Maw? Ti nge?” ring fahranin a rawn ti chiam. Ka mit ka chhing sawk.

‘Nakinah ka hrilhfiah ang che. Tunah chuan min zawt lo zawk rawh’ ka ti hmaka. 

‘Ok..Ok,naktukah ka lo kal ang’ thutak zawkin a rawn ti leh a. Ka mood awmdan a hrechiang em em a.A uang viau thin nangin ngeiawm khawpin min nawrlui ngai lo. 

‘Aih, ka lo hmu zawk ang che’ ka ti a. A thaw hak ri ka hrethei.

‘Hey…Nangmah i tha em?” A tih  chuan min ngaihtuah tih ka hria. Ka mittui a hnai nghal kuar. Mahse, tah ka duh miah lo. Mittui hian engmah a chingfel dawn tlat lo.

‘Tha e..Hna chu aw.Khatah kher lo pawh a rem na hmun hmunah a ni mai’ ka ti a.

‘Um..Mahse,a awm ngei ang tih ka tiam ngam lo che a’ a rawn ti a. Ka hrethiam.Mi ai kaltur emaw Part time tur pawn duh duh hunah thawh mai tur a awm tlat lo.

Khawvar dawn lamah ka muhil ta chauh. Ka alarm riin min tiharha. Ka mit a kham urha, ka lu a na ngut ngut bawk. Ka awm a nuam hlawl lo.

Chokaa ka luh rualin Bawihpuia’n min rawn bawh nghal chang chang. Ka bulah a thua, a titi liama,mipa naupang ngainatawm lutuk hi engchen nge ka la hmuh ang ka hre lo. A pa hian min nawrchhuah tumin a bei ngei dawn si.

‘Bawiha,kal ang le…’ Hmingthana awin a rawn ti a. Hawilet lo turin ka insum hram hram. Khawiah nge an kal dawn ka hre hek lo.

‘MAMA, lo kal ve rawh’ ka kutah a rawn vuana.a mitmeng buang thak,pawisawi lo ngawih ngawihin min en kiau. Ka aw ka thian kharha.

‘A-ni ka buaipui angaia. Nakinah ka lo kal ang aw’ ka ti a. Ka nui lui sak. Ngaihdan ni lo ve niawm takin a chal a tichuar a. A ner deuh nang bawk.

‘Pa,MAMA hi kal ve se la…’ Apa lam a hawia. Ka en lo thei ta lo. Jeans a haa. Military Bootah a tlang lam a thuna,ramvah naa hak chi Jacket a ha bawk.

‘Aih, vawiin chu ni lo e.. Kal ang le’ dam thlupin a ti a. Min en loin a fapa a en a. A hmel alang dam thluam bawk.

‘Bawihpui,kal ang u le…Eee, Tete..I nu Ngaihi te Dil sahna lamah kan kal dawna. Julie a kal ve duh si lo a,ka hrilh ta lo che anih kha.Julie tel lo chuan i kal duh ka ring chuang lo a’ Pi in  rawn luh pahin a rawn ti mawlh mawlh. A tawngdanah engmah danglam a awm lo. Hmingthana’n engmah ala sawi lo a ni ngei ang. Engtikah tak sawi ang maw? Ka bu nghat ringawt. Bawihpuia ka en a.

 ‘Kal rawh le..Sangha min lo hawn dawn nia’ ka ti a. A samah ka tuaisak zauh. 

U Dini leh Jhanvi an hruai ve bawk nen in a reh tlawk tlawk. Julie eitur ka pek hnuah ka ei ve ta chauh. Ka ei chak hlawl lo. Mahse, damdawi ei ka ngaih avangin tlem chu ka ei a. Ka lu na tluk tluk nen ka engtihmah a nuam lo. Ka ngaituahna lah a fim hek lo. Thil thleng tur nghah ngawt ngawt harsa ka tih rualin enge ka tih ang ka hrechuang hek lo. Azuali’n hna a hmu anih ngawt loh chuan ka chhuak ngawt thei lo tih lah ka chiang.

Ka Phone ka lakanga,min rawn call tu ka hmuh rualin ka thaw hak. Ka pick ang nge Pick lo ang tih ka ngaihtuaha,amah vanga buaina tawk ka nih tlat avangin ka ngei nge ka be chak lo pawh ka hre lo. A tawpa, ka thaw deuh huai. Mahse, Door bell a ri ve chiah.

Gate bula Sangzuala lo ding reng chu mak ti zetin ka melh nghek. A nui vur vura.

‘Nang maw?” ka ti halh. CcTV a awm vek si..

‘Aw, keimah…Ka lo lut thei angem?” zangkhai fein a ti a. Chhang loin ka hawikual leh rih.

‘Julie-in midang an awm lo a ti a. Reilote rawn hmuh lawk tum ka nia. Ka awm rei lo ang’ amah bawkin a ti leh a. Ni dawn tak,Julie-in ko lo se a  lo kal lo tawp ang.

Reilote awm tum siin a awm nileng ta thak. Ka hlauthawng zek zek thung. An lo haw mai ang tih ka hlaua. Hmingthana’n min man chhuah tawh miau avangin keima remruatah bawk angai leh dawn tih ka chiang.

‘Ka lo ngaihtuaha,Julie hian kal leh hi a inbeiseia. Mahse,I puihna a mamawh dawna’ Sangzuala’n a ti a. Ka bu ringawt. Hmangaihna hi chu amak teh e. Tha leh chuang tur awm lo khawpin an inhua kha ania. Tunah chuan a rinchhan fel leh der tawh chu ania. 

‘Exercise lakpui tur hi nei ta se ka lo tia. Ka thiante ka lo bia anga. Mahse, nangman Julie nu leh pa bulah min sawisak la’ a ti leh a.

‘Um..Nia,ka lo sawi dawn nia’ ka ti a.Min en deuh vang vang.

‘Buaina i nei em?” a tih chuan ka lu ka thing vat.

‘Ok,Julie khan Hmingthana nen in inhau anih aringa’ nuam ti lo hmel deuhin a ti a. 

‘Aih, hau lo…’ ka ti thuai. 

‘Um,a tha lawm. I hmelah kha chuan dik vak lo a awm a anga ‘a ti leh talh.

‘Ka lu a nuam lo a.Chuvang anih hi’ ka ti a.

‘Ekhai,damdawi ei la..Dam teh,Julie chakna inih hi.I na thiang lo ania’ a ti hlut. “Lutuk bawka’ ka ti hlak.

‘Ania lawm..Chuan maw,hman ang kha chu nise Hmingthana hian a neih ngei ngei nan che ka bei nasa khawp ang. In inhmeh ania’ nui chungin a ti a. . Kan inkawp tih Julie hnen atangin a hre vek tawh tih achiang. 

‘Ka lawm e ka ti mai dawn mi?” ka ti ngial. 

‘Julie chuan a u in a atchilh che a ti a’ a ti leh talh. Ka tum loh deuhin ka thaw hak mai. Kan inthen tawh,chupawh nangmahni vangin tihkhum nghek ka chak. Mahse, ka ngaihtuahna nen inmil lo zetin ka then lui ta sak zawk.

Chapter - 14

Zan dar 8 velah an lo hawa. Hmingthana’n Bawihpuia a rawn pawm luta,a tal hah ngang aniang,a harh miah lo. Ka mit latu zawk erawh chu thildang daih a ni thung. Hmeichhe pakhat,keimah rual vel tur a rawn haw tel ve a. Hmingthana hnungah a rawn kala,Hmingthana Bag a rawn ak tel bawk. Motor chuang pawr fap chung pawhin a hmelthatna a  bo chuang lo. Kekawrbul a haa. Running shoe a buna. T-shirt lian lam deuh a ha bawk. A pian lah a nalh ngang mai.

‘Lungleia ka thiannu fanu anih hi..Athani,reivak lo chu hetah a awm ve dawna’ Pi in a ti a. Ka chibaia. Nui var var chungin min en a. Pi in tu nge ka nih a lo sawi ve bawk. A best,inneihnaa a thian atana a hman fanu a lo ni a. Lunglei khua niin Delhiah a awm thina,Julie nen pawh inkamngeih tak anih thu a sawi zui leh mawlh mawlh.

Ka mut hnu lawkah ka phoneah Msg a rawn luta,

‘Thehchhuah kher i phut anih chuan ka chak zawng tak a ni ang’ Hmingthana’n a rawn ti a. 

Ka phone ka thehthlaa…ka khur zui nghal dar dar. Ani nena infiamna neih hi ka duh lo bur. Mahse, engtin nge ka tih ang??

‘Chawlh lawk ka ngai dawna’ pangngai thei ang berin Julie hnenah ka ti a. Min rawn en tih ka hria. En ve duh loin ka thiltihlai ka en lui tlata. 

‘Ngatinge? Chhungkaw lam a ni em? Nge ka u?” zawhna vek..

‘Chhungkua ania..’  ka ti thuai

‘He nu hi ka duh miah lo…’ a ti leh hlak. A sawi awmzia ka hre lo.

‘Tu maw?” ka ti deuh ha..

‘Athani hi mawle..’a ti hlara

‘Oh…Ti nge?” ka ti thuai.Pi khan an inkawmngeih a ti sia!!!

‘Ka duh lo a ni tawp mai. Buaina a thlen dawn che anih chuan ka chhuahtir mai ang’ a ti leh a. Ka bo tulh tulh thung.

‘Aih, engmah buaina ka nei lo..’nui chungin ka ti a. 

‘Ok..A tha alawm,mahse ka u lakah mawi lo deuha chet a tum chuan min hrilh ngei ngei ang che’ a ti leh a. Ka ip chawih. Nizan khan ka hriatthiam chiah si lohin keimahah nuam lo kha a awma.  Tunah chuan ka man ta deuh kuar. Hmingthana nen inzawmna an lo nei a ni ngei ang.

Pi hnenah Julie tana Physiotherapy lam lak athat ka rin thu ka hrilha. Sangzuala beisei ang ngeiin  min hnial lo. Tha ka tih ang apiang ti turin ka kutah an dah vek tih min hrilha. Ka zawng nghala, in a rawn kalchilh tur,thiam leh tha tak ka hmu thuai. Pawisa erawh sen fe angai dawn thung. Pi leh pu erawh chuan pawi an ti eih lo. ‘Atana tha tur anih chuan engpawh ti rawh’ tih a ni tawp mai. 

Azuali’n min rawn biaa. Hna ala hmu ta lo. Ka theih ang angin ka zawngkual ve bawka. Mahse, kal maina tur a awm tlat lo. Hmingthana ka hmu ngai mang lo a, ka hmuh ve chhunah pawh min be ngai lo. Ka awm ve tih hre lo ang hmiahin a awm thina. Na ka tih vawng vawng tum lah a tam. 

‘Nu,Nurse kha ka hmu a.Naktukah a rawn zawm thei dawn ania” chaw kan ei laiin Hmingthana’n a ti a. Phawk zetin ka hawichhuak vat.

‘A that chu. Tete,I awm loh chhunga Julie lo buaipui tur Mama hian a zawnga. I kal hmain a tul zawng zawng i hrilhfiah anga’ Pi in a ti a. Ka bu ringawt. 

‘A thawk char char thei ang.Nurse satliah a ni lo.A thiam viau ania ’ Hmingthana bawkin a ti leh nghut. Min mamawh loh zia tihlan a tum tih ka hria. Nia, let leh ka tum tawh bik hleinem. Mahse, vawikhat tal sawifiah erawh ka duh fan. Angaithla emaw ngaithla lo emaw ka sawifiah ngei ngei ang.

Inchungah ka thu a, Ni tla tur in ka thutna ep lam a chhun en ruih chu ka thlira, engmah ka ngaihtuah lo. Ka ruak vek ti ila a dik ber ang.Ka hriat zawng chu  Hmingthana tan hmelma ka ni a. Min duatna leh min neih a duhna te kha chu mumang ang lek a ni tawh. Julie tana ti ka ni a. Hetiang khawpa huat hlawh tur hi chu ka ni lo mahna le.

‘Fimkhur ta che’ a ti that. Hamhaih lutukin ka ding khawng laha,Athani kawr var thianghlim zeta ka thil tihbuak chu mangang zetin ka melh reng ringawt.

‘Awhaw,I tihbuak elaw?” Pu in a rawn ti a. ‘Aw…Aw,ka tihpalh lutuk..’ ka ti lawi rat mai. Ka bing deuh mum mum a ni ber.

‘A pawi lo.Keipawh ka kalna ka en lo a’ zangkhai takin a ti a. A kawr hma a kutin a thai pharh pharh a. A nui var var. Ka inthiam lo zual sauh thung.

‘In kal dawn tawh emaw tia. Han inthlak leh lawk mai rawh’ Pi in a rawn ti ve a. Khawiah nge an kal dawn ka hre lo. Hmingthana nen an inzui chhuak zantin deuhthaw a,hriat tum loh law law finthlak ka ti zawk..

‘Enge a?” Hmingthana’n nelawm lo zetin a rawn ti a.  Ka en vat,min en loin Athani zawk a en a. A hmel chang zetah chuan enge a ngaihtuah ang ka hre lo. 

‘Hei…Tete-i nen kan insu palha…’ tichungin a melh chho a. An awmdan chuan min tina zawk.Eng ber nge ka natpui erawh ka hre lo.

‘I fimkhur thei deuh lo tihna mi?” min rawn en chungin a ti a. Ka hamhaih lutuka,tawng mai nachang ka hre lo.

‘Aaaa,keimah zawkin ka va su palha…’ Athani’n a ti a. Piin a lo sawi ve chul bawk. 

‘Ka nu,duhtawk teh. Ka hmu reng a,Athani thiam loh a nih loh kha. Bakah,mi i chhawr hian chhungkaw member angin en thin suh ka tih kha’ a ti lehzel maia.  Tu nge a sawichhan zawh kher ka mamawh lo,hetiang khawpa hmuhsitna hi ka lo beisei hek lo.Awmngaihna hlawl ka hre lo. Ka dinna chhuat lo inhawng thut se,tla pil vang vang ila ka duhber.

Chapter-14 (Last Chapter)

‘Mam-a…Enge maw i sawi le?” Piin a ti a. A awah mak tihna a lang theia,mahse ka tan chuan mak an ti emaw ti lo emaw engmah danglam a awm lo. Ka nihna chiang taka hriattir ka ni a. Abak engmah a awm lo.

‘Chhungkua leh i hnathawk te thliar hrang rawh ka ti’ a ti leh nghut.

‘Eng…’ piin a ti hman. 

‘Nurse a awm tawha, naktuka ka chawltur hi ka lo let tawh lo ang’ ka ti dam thlap.

Engvanga sawichhuak thut nge ka nih ka inhre lo. Mak lutukin ka sawichhuah rualin keimah ka inringtawk ta tlat. Ka nihna min hriatchhuah tira,mawl taka amah ka lo duhna leh min duh ve ni a ka hriatna kha thudik engmah fiah tum loin a chhuchata. Min riina chhete mah a nei hek lo. Ka nihna chu an hnuaia mi,an hnathawk tura chhawr ka ni. Ka thiamthu sawina hun pek ka ni lo a,pek pawh ni tehreng ila,ka sawifiahna turah duhdan a lo neihsa tlat avangin thiam ka chang dawn chuang hek lo.Ni e, duh duh hunah ka bang thei.Ka dik loh pawh ni hlei lo , ka chungchangah engvangin nge a duh duh a sawi ngawt ang. An tana tha tur zawk ka ngaihtuah avanga na taka tawngkhum turin ka nu leh pa in min enkawl selian lo.Ka bula ding ho ka en kuala,an hmel landan a in ang lo hlawm ngang mai. Engpawh ngaihtuah rawhse,ka ngaipawimawh lo.

‘Tete, nang pawh chu engthil nge maw  i sawi le?” Pi bawkin a ti leh a.

‘Min hrethiam rawh. Chawlh ka duh tawha’ ka theihtawpa  khauhin ka ti a. Julie min mamawhna phei chu ngaihtuah loh hram hram ka tum tlat. Anih loh chuan ka nem leh ngei ngei anga,ka kal thei lo ang. Keimah ka inti hlu lo ting mai dawn si..

‘Julie hi…I awm loh chuan engtin nge niang?” a ti leh a. Ka lu ka thing ringawt.

‘Lawm lohna enge i neih chu ka hre lo a..’ Pu in a rawn ti ve a. Induhtawk em em chhungkua anni a. Ka bang duh min ngen luih thu a awm lo.

‘Kal rawh. Kan lawm ngawt ang’ Hmingthana’n a rawn tih chuan ka mit ka chhing sawk.

‘Mam-a..’ Pu awah warning a awm. 

‘Athan,lo han inthlak rawh’ Thupe aw lutukin Hmingthana’n a ti leh a. Athani a bu nghata,min rawn melh zauh. Ka nui lui sak. Engvanga nui lui kher nge ka nih erawh ka hre lo.

‘I sawi ho lawk ang u. Hetiang ringawt a ni ngai lo’ Athani kalsawn hnuah Piin a ti a. Ka che lo. Ka luhlulna bo hmain kal ka duh.‘Nu,a kal a tha’ Hmingthana tehfo bawk chu a.‘Engemaw tha le?” a ti hlar mai.

‘Hre rih lo la ka duh zawk. Pa,inbe lawk ang’ ati leh hmuk.

Engkim a thleng thuta,abuai nuai nuaia. A tawp leh thuta,a felta duak. Ka thinlung erawh Rinna tel lo leh hmuhsitna nena nghaisak anih miau avangin ngaiawh leh tur chuan HUN ka la mamawha,ka kalsan tak kha ngai mah ila ngaih loh ka tum lui tlat bawk.Nuih harsa ti em em chungin ka nui luia,a za tak tak tan ta bawk.

Ka Phone nghawr dar darah ka harha. Che loin ka mu deuh vang vang. A tawp mai em ang chu. Ka beisei ang ngeiin a tawpa,ka thaw huai. Mahse, ka muhil leh dawn tihin a rawn ri leh.Hreptak hian a…

Ka Phone ka bana,peih lo zetin ka en a. Min rawn calltu ka hmuh rualin ka then sak.

‘Yes,Boss…’ 

‘Morning…’ a aw zangkhai lutuk ka hriat rualin ka nui leha. Ka zi mar ar ar bawk.

‘Dar engzat nge i hria em?” ka ti a. 

‘Dar 8..Chuan,dar 11ah ka rawn lam ang che’ a tih chuan 

‘Dar 8 maw?’ Tichungin ka nui a. 

‘Yes.. Ka sana hi a dik lo anih chuan thuhran ni se’ thutak zawkin a rawn ti leha.Ni lo,ka let thawka,ka mutna bula Sana awm ka en a.Ka thuchhuak nghal hlawl. Kan vengah mithi kan neia,nizanah ka kal ve a. Dar 12 pelh hretah kan haw a. Ka muhil nghal deuh maia. Rei ka la mu pawn ka hre si lo.

Vawiin hi Zirsanga te inneih ni a ni a. Inkhawm ngei ngei ka tuma,hna lamah pawh chawlh ka dil reng bawka.Mahse, ka lo mu bo vek lo chauh chu ania.Ka nauin eirawng a lo bawl fel vek tawh.Ka inbual hmasaa.Sangzuala lo thlenin ka lo inpeih fel hman tawh.Inchei hi ka harsat lem lo a,Make-up ka lah ka hmang tam ngai hek lo. Ka sam chhah zet lah alaiah ka then phawka,hrehawm lo tawka marin ka tawn fel thak. Hetianga ka tawn hian ka lang puitling in ka inhre thin.

‘Wow..Ka hai dawn che lawm’ nui vur vur chungin a ti a. Ka lei ka chhuah khum zauh ringawt. 

‘Eee,vawiin chu a lo kal ve dawna,haider tawh hlek suh’ a ti leh a. .‘A fel tih chu ka hria alawm.Mahse, ka inringtawk lo’ ka tih liam mai.

‘Ka nawrlui che ni lo se,tunah chuan hmalam pan hi a hun ve tawh ania’ a ti leh a.

Hmingthana te In ka chhuahsan atangin thla 4 lai a liam ve tawh. Ka nau nen in kan luah duna, vanneihthlak takin Azuali thawhna Hospitalah thawhna tur ka hmu ve ta hlauh.Nghet lo mah ila pawi ka ti chuang lo. Buai em emin nitin ka thawka, Hmingthana ngaihtuahna hun ka nei lo,mahse hunawl ka neih veleh amah bawk..

Sangzuala nen erawh beisei phak bakin thian kan nihna hi a nghet ta zawk. Hmingthana mitmei veng leh hlauthawng miah lo a han kawm takah phei chuan kawm a lo nuam em em tih ka hrechiang lehzuala. Kan kum a inthlau deuh bawk nen Nau tak tak enin min en a. Min duat bawka. Ka chhuahsan hi amah vang niin a hre bawka. Julie nen pawh kan la inbe pawp ta zela.Ka chhuahsan zanah nasa takin a rawn tapa. Tun thlengin ka theih ang angin ka la pui ta zel.Mahse, ka duh loh em em chungin tu pawn Hmingthana dem zawnga an sawi erawh ka la duh lo ta fan!!! 

Ka tah muthilh zan tamzia lah ka hreseng hek lo. Mahse, ka luhlulna hian ‘a tawk’  a tih miau avangin ka natna hi ka mittui bakin min hriatpui lo. A chanchin ngaihven ka duh lo bawka ka hre lo thei mai. Hmuh lah ka hmu ngai hek lo. 

‘Hey…’ ka dara rawn khawih zauh pahin a rawn ti a.Ka phu deuh zawk.

‘Kal ila…’ zahzelah ka ti sap.

‘Um..Mahse, I tha em?” min ngaihtuah hmel fein a ti leh rih.

‘Tha e…Ti nge?” ka ti let a. 

‘Ok,a tha lawm…Chuan,Archie chu aw’ a ti leh a. Ka ner khum nak ringawt.

Archie hi kan thawhna Hospitala Doctor rawn awm thar a ni a. Phai lamah a thawk thina, Pa lian lutuk tihtur a ni lo a. Mizo mipaah chuan a tawk pawl tak chu a ni tho. A smart bakah a bula awm a nuama. Kan innel ta thuai. Kan innel viau hnuah Sangzuala Cousin a ni tih ka hre hnuhnawh leha. Ka hnaih zual sawt,mahse thian nihna bak duh a neih takah chuan keimaha Hmingthana sulhnu,ka kalsan tan ni a ka lo hriat kha a kaitho leh ta chiah. Vawi tamtak Sangzuala’n min sawipui a,engkim kalsana hmalam pan turin min ti thina. Ka nui mai zel. Ka damchhungin Hmingthana sulhnu kha keimah atangin paichhuah a ni ngai dawn lo.Mahse, hahdam takin ka la paltlang ang tih ka beiseia. Chu hun chu ka nghak a ni zawk.

‘Eheu!!! ‘ min hmuh veleh Azual’in a ti hluaia. Ka nuiha,a thaw hak.

‘Enge a?” ka ti a. A bula Archie lo ding chu ka en a. Engmah sawi loin uluk zetin min lo en thung.

‘I nalh…Tiraw Boss’ Archie hnenah a tih chuan Archie a bu nghut.

‘Chhe vel e a.Mahse, ka lawm aw’ ka ti zang vah. 

Azuali te chhungkua an hung bakah hmeichhe lam an lo hung veleh zel bawk nen mi an tam ngang mai. Inneih boruak lah a nuamin a fuh vel vek.Oh,ni lo…Hmingthana leh Athani lo lan ve hma zawng tihna zawk.

‘Tete…I ni em?” hmeichhe awin a rawn ti a. Min rawn betu lam ka en vat. Mahse, ka beisei loh lutuka Athani leh Hmingthana lo ding dun ka hmuh takah chuan ka khawng nghal lah mai. An in ka chhuahsan hnuah ka hmuh leh vawikhatna a ni a. Engmah danglam ala awm lo.A pian nalh tak chu a suit thim lam hak chuan khuhbo zo loin a tilang sar zawk. A hmel nelawm lo leh a mitmeng vawt ruih pawh ala ngai vek. Mahse…Enge ka hlauh ang? Dik lo taka thilti pawh ka ni hleinem.

‘Aw…I tha maw?” Tichungin ka dak deuh vaha,ka awah pawh ka inringtawk tih achiang.

Um,tha..I tha zawk maw?” a ti ve a. 

Sangzuala a melh zauha. Tu nge anih a hria ang tih ka hria. Ka chhuah hnu khan engtin nge Hmingthana hian a nu leh pa bulah a sawi zui ka hre lo. Tu man min rawn ngaihven zui lo a,min be hek lo.Kan inzawmna kha a tawp nghal vek. Sual lo mah se an induhtawk zia ka hria. Min rawn biaka, min ngen kha chu beisei pawh ka beisei eih lo. Mi hausa dangte ang bawkin mihring hlutna hi sumah an teh ve dawn miaua.Mahse, an hriat hauh loh chu Julie nena kan inzawmna a thuka,chhutchah mai mai rual a ni lo. Ani chuan a u ang lo takin atan enge ka tih a hre tlat.

‘Tha lawm…He lamah ila awm reng nge?” ka ngaihtuahna nena inmil lo zetin zangkhai fe in ka ti leha.

‘Aih, inneih na hmang tur hian ka lo phei. Mo hi ka second cousin ania’a ti a. 

‘Oh…’ ka ti halh ringawt.

‘Kan kal dawn mi?” ka hnunga rawn vawn pahin Sangzuala’n a rawn ti a. A chetdan chu ka hrethiam chiah lo.Mahse, pawi ka ti lo. Hmingthana hmel vawt leh chang zet chu ka en a. Ka nui sang.

‘Bawihpuia enge a an?” ka ti lui leh salh.

‘A tha….’ Nelawmna tel miah loin a ti hmuk.

‘A lawmawm..Kan kal phawt dawn,anih phawt u’ pawisak nei lo  thei ang bera lang chungin ka ti leh a. Athani a bu nghat. Hmingthana erawh ka rin ang ngeiin engmah a sawi lo.

Motora ka thut veleh ka thaw nghal hawk. Ka palzam hle emaw ka tih laiin ka chhungril erawh ka bum thei lo. Ka insehruh nasa lutuka, an awm lohna hmun ka thlen rualin ka chau hnawk thei.

‘Min thah achak hmel hle mai’ Sangzuala’n a ti a. Ka mit ka chhing nghal daih. A farnu vangin hetiang khawpa thui hi a kala.Mahse,a farnu zawkin a hnaih leh daih tawh si.

‘A lo duh hle mai che’ a ti leh a. Ka mengchhuaka,ka en a. 

‘Eng maw i sawi?” ka ti sap.

‘Hmingthana kha mawle..A duh che’ a ti leh a. A nui var var.

‘Ni lo, min duh lo.Inngaihzawnna satliah mai mai bak a ni lo. Rei pawh anih loh kha” ka ti mar at.

‘Chutiang chuan keipawn ka ngaia. Thinrim lo la,Julie-in a sawi pawh khan a play che anih ka ringa.Diktak chuan hmeichhe laka a khawsak dan ka chiang ve a.Mahse, vawiinah khan ka duh ka hmu’ a tita duah.

‘Enge i hmuh a?”ka ti lui khera. 

‘Natna…’a ti fel thak. 

‘Ah….Kei chu na e..Ka la kalsan fel thei lo anih hi.Mahse….’ ka sawi zawh hmain a ban vaiin min titawp a. 

‘Nang chauh ni loin amah pawh kha a na’a ti leh hmiaha.

‘Teuh lo…’ ka ti tawk.A nui a.

‘Mipa ka nih hi,ka mipatpui rillru chu ka hre thei zawk ang chu. Bakah,mihring induhtawk lutuk nimahse kei aia hrechiang an awm pawhin an tam lo khawp ang’ a ti leh duah.Sawi leh maitur ka hre lo.

‘Ka kutah dah tawp rawh’ a ti leh a.

‘Engmah tisuh..’ ka ti thuai. 

‘I hmangaih em?” ka zawhna hai derin a ti a. Ka thaw leh halh. Vawi tamtak ka inzawt tawh,achhanna pawh ka hria. Mahse, tunah enge atangkaina tur ni ang?

‘Aw nge Aih?” a ti leh a. Tihngaihna hre loin ka lu ka thing ringawt.

‘Ok,ka hria..Min chhang duh lo mai rawh’ nghal zetin a nui a. Ka nuih a za ve miah lo.Mualpho taka ka duh tih pholan nawn leha,zahna hlawhchhuak leh tur chuan ka ngam tawh lo.

‘Engmah ti suh.Ka mamawh lo’ka ti nghata.‘Ngawi la,lo thlir tawp rawh’ a ti leh a. ‘A huat chhan che i hriaa’ ka ti leh talh.

‘Ka mamawh lo ka tih kha,hmalam ka pan meka.Chuan,Archie pawh ka tan a tha itih kha..A ni lo mi?” ka ti nghat. A thle zauha. 

‘Vawiina Hmingthana ka hmuh hma chuan ni e,tunah chuan ni lo’ awlsam zetin a ti duh lek. Hnial a sawt dawn chuang lo tawp.

Door bell riah ka harha. Ka che mai lo,nizan mithi inah ka mengrei ve deuh bakah inneihn naah kan nileng leh bawk si nen, In ka thlen veleh ka mu nghal daih. Door bell a ri nawn leh a,Ka nau anih ringin ka tho a,mahse kawngka bula lo ding ka hmuh takah chuan ka thaw hak. Ka beisei lo nasa lutuk. Engtin nge kan In a hriat ka hre lo,ngaihtuah ngaihna pawh ka hre lo.Engmah sawi loin pawh khar leh mai ka tuma, a ke in a rawn dala. Hneh zetin a pawt hawng zaua,ka inrin hmain a rawn lut fel hman der.

‘Chhuak rawh’ ka ti ram hmak. 

‘Ahh, inleng te lawm nan chuan a va mawi chiah lo ve’ ngaipawimawh lo lutukin a ti duh lek. A kal pheia,tlangnel zetin thutthlengah a thu a. A bawp sei zet a khawkherh nghal hmiah.

‘Khawngaihin chhuak rawh’ ka ti leh a. Ka aw chang fak chu hre lo niawm takin inchhung a thlek kual dun dun ringawt.

‘Khawiah nge a awm?” a ti nghut. 

‘Tu maw?” ka ti hmak.Ka dinna atangin kalsawn loin ka en a. A neitu lo zawk ang maiin ka ding zum zat ringawt.

‘Tu nge ni ang? I Bialpa tenawm zet kha a riak ve thin ang chu ka tia’ atih chuan a  awah tenna a lang chiang ngang mai bawk. A tawngkam ngeiawm lutuk chuan min deng sawka.

‘Enteh,nang nen hian sawi duntur kan nei miah lo a. I kal a tha ang. Anih loh chuan min tibuai tiin thenawmte ka koh mai a tul dawn ania’ ka ti leh hmak. Ka beisei aiin ka inrintawk hmel zawk.

‘I danglam ta hle mai. A enkawl tha bawk che aniang’ angawih vung vung hnuah a ti ta a. 

‘I duh duha i tihkuala,mahni dikna pawh sawi thei lo khawpa dawihzep kha chu ka ni tawh lo’ ka ti ve fak.

‘Ani kha kei aiin enge a that zawk na?” a ti leh hmuk. Ka beisei loh lam hlir a sawia. Inrinlawkna hun ka nei hlawl lo. Mahse, engvang mah in ani hian min chhaih buai hauh lo ang.

‘Ka bialpa nena kan chanchin min zawt turin ka engmah i ni lo’ka ti khauh far mai. 

‘Nang  ni loin ani khan ka nau nun a tichhe miaua’ a ti leh a. A aw pa zetah chuan huatna alang chiang lutuk.Mahse….mahse,engvangin nge kei nen inzawmna nei anga min sawi ngawt theih? Julie nena ka inhmuhtir kha chu ka tidik lo ngei. Chu pawh Julie nena an hlim dun nan a ni.

‘Enteh,I nau emaw nang emaw ka tan pawimawhna in nei lo.In hna ka thawk tawh lo’ ka ti leh a. 

‘Nia,thawk tawh lo. Hnathawh ai chuan ani khan a chawm thei lutuk ang che. Hmei nge nupui title zawk ka pek ang che?” a ti leh a. A tawngkam tin mai chuan min deng sawk sawk a ni ber. Mahse, a tawngkam vang mai maia ka nih lohnaah hawibuai ka duh lo.

‘I hre duh lo ang. Bakah i bula sawi a tulna ka hre miah lo.Min chawm emaw chawm lo emaw ilo buaina tur a ni lo ’ ka ti a. Ka bialpa anih loh thu sawi ka tum bau lo. A duh duhin ngaise engmah buaina ka nei hek lo.Min chhang loin a dinga, min rawn pan pheia,ka tawm deuh chawih thung. Mahse,hlau miah lo anga langin ka ding khawng lah. 

‘Ka nau duhkhawp loin ka nupui,tunah nang…A zei viau chu a ni phawt a” a ti leh a. Min chhuk en runa. Light hliah zawnga ding anih avangin a hmel erawh langchiang loin a thim deuh mak thung.

‘Tehreng mai…Khumah phei chuan.. ‘ ngeiawm lutukin ka nui hak. Mahse, a chet takah chuan ka nui lai ka tawp nghal chawt. Na zetin ka ban rekah a rawn hmera.Ka ruh hmeh tliah a tum niberin ka hria.

‘A na ania’ ka ti halh. A thlah dul chuang eih lo. A kut phelhsak tumin ka kut lehlamin ka zuk vuana, mahse bangah min nawr bet hmiah.

‘Na i hre ve thei amaw?” a ti tuar. 

‘Mipa i mamawh anih chuan ka tanpui thei reng che a, ani ai kha chuan i duhkhawp pawh ka pe thei zawk ang che’ a ti leh a.Sawitur hlawl ka hre lo.Ka rilru alang hmasa ber angin ka che thut,a hmai a ri thlawrha.Ka kut a thip zui nghal vang vang. 

‘Min beng maw?” a tih chuan a awah awih lohna alang thei.

‘Aw, kha aia naa ben kha i phu..Nang hian dam pawh i phu lo’ ka ti leh a. Ka lo thup tang tang thin,ka natna piahlama ka huatna awm kha a puakkeh a ni ber.

‘Min thlah rawh’ ka ti that.  Ka rin loh deuhin  min thlah ve mai.

‘Chhuak rawh’ ka ti leha,ka aw a dam ta thlap.

Che loin ka mu a. Tun lawka thilthleng kha fim takin ngaihtuah ka duha,mahse ka thei hlawl lo. Engvangin nge khatiang tawngkam tenawm tak tak kha min hman khum ka hrethiam lo. Misual leh tenawm em em angin min treat tlata. Julie natna siamthat tuma ka beihna kha Sangzuala a lo huat miau avangin atan chuan thil fair lo tak pawh a ni ang. Mahse, khalam kha a sawi si lo. Ka tahpui thin kha keimah ka dik loh vang leh amah engmah ka hrilh loh vang niin ka lo hre thin,mahse midang tana thil tha chu ka titho si….Amah bum angah min ngaia,keipawn ka dem lo.A huatzia hrereng chungin ka kal tlangpui miaua. ..

‘Inchhungah em em chuan i Tarmit dum kha phelh teh,inhmeh viau mah la’ ka ti hlak. A lo thlen tirh atangin bun miau hek le.

‘Ngai lo…Tihian a dangdai alawm’ a ti a. A nui huk huk.

‘I chhe em maia..’  ka ti leh hmak. Nizan thilthleng vel vang khan ka mood ala dik thei lo. Mut lah ka muhil mang hek lo.

‘I mood lah chu a…’ a ti a. Ka thle ha a.Ka chau hluah hluah.

‘Phelh rawh’rum fe hian ka ti a. 

‘Yess ‘ tih pahin Muangchangin a la thlaa. Mahse, a mit vei lam duk chur ka hmuh rualin ka thaw kawk. 

‘Ti nge a?” ka ti nghal hluai. A nui ruh ruha. 

‘Kan insuala…’ ati ta lek. 

‘Enga?! Insual rual ini emawni le?” ka ti hlur mai.

‘Tak takin ka ngam loh ka tawnga’a ti leh zela. Mit duk chur chungin a mood lah a tha em em mai si.

‘A van zia lo tak..Tu nge a? an khawih rawn zawk che nge?” ka ti a.

‘Teh nang, chutiang tih ngai khawpa dawihzep a ni lo’ a ti leh lawi. A awmzia hlawl ka hre lo.

‘Nizan chu hun reitak ka biak tawh loh ka thianpa nen kan inbiaa. Abialnu nen an inhaua,a bialnu in ka mutpui angin a lo insawia..’  amah bawkin a ti leh a.

Ka thawk a sak nghal vek.

‘Hmingthana maw?!!” ka ti chhuak thei hram.

‘Ahhhh,engtin nge amah i rin nghal chat theiha?” a ti a. Chik zetin min en a. A hmelah erawh Hmingthana ka sawi vanga mak tihna engmah a awm lo.Sawi maitur hre loin ka ban ka vai kual thuak.

‘Ka…Eng lo,nizanah alo kala….A pawi ka ti lutuk’ mumal nei lo zetin ka ti nawk nawk. A then naka..

‘ Min that dawn emaw ka tia,mahse ka duh ka hre ta tho a.Duk deuh chur mah ila ka lawm tho’ a ti leh a. Ka tawng dawna, sawi maitur ka hre lo. Ka lu ka thing ta ngawt.

‘A lo kal tihna mi?” reife kan ngawih hnuah ka tichhuak sap.

‘Aw. Lo kal e,min rawn call a. Engmah kan sawi hmain min hnek deuh chawrh mai. A kutthlak a na si,College kan kal laiin Boxing a khel thin a. A lo la hnek na thei khawp mai,ka thal chiang kher e’ a ti a. A nui huk huk. A thinrim miah lo chu mak ti zetin ka en a, engtin nge ala nuih theih ka hre lo.

‘I mit duk chur ka en khan Nuihzatthlak a awm pawh ka hre lo’ ka ti nghauh.

‘Ka thaw huaia,min hnek khan ka ba ka tlak alawm’ a ti leh mai. Ka hrethiam lo tual tual.‘Engmah ka hrethiam lo. A tuartu chu nangmah zawk inia….’ka ti leh hlak hlaka. 

‘Dik chiah.Mahse, kei aiin nang leh ani khan intuar nasa zawk maithei. Induh tawn em em siin in luhlul tlata’ a ti leh a. Sawi tur hre loin ka thaw hak.

‘Natna chhan tur a nei lo…’fan fein ka ti a. 

‘Ka ring chiah lo.A nupui nen uire anga min ngaih khan min hawisan hmiaha. Kut min thlak tumin min rawn pan lo’a tih chuan ‘Mahse…Julie…’ka lo ti a. 

‘Ok..Amah nen sawi dun ula ka ti’a ti vat 

‘Aih…’ luhlul zetin ka ti nghat mai. 

‘Luhlul suh..Engkim i hriat hunah chuan i dem dawn hauh lo ania’ thutak zawkin a ti leha. Ka lu ka thing nak mai. 

‘Engmah hriat ka duh lo.Ka nun atangin ka paichhuak fel tawh.Hmuh leh tumna ka nei lo’ka ti a. 

‘Vawikhat chiah…’ a la ti fan. 

‘Khawngaihin…Engtin nge ka fight i hria alawm. Ani nena inzawmna neih leh ka duh tawh lo’ nghet charhin ka ti a. Engemaw sawi tumin a ang zuaua,Mahse, ka thutak tih a hria a ni ngei ang. Engmah sawi loin a chip leh ta zawk.

‘U,ka kal ania.’ Ka room kawngkaa rawn dah zawk pahin ka nauin a rawn ti a.

‘Aw,inthlen chin lo sawi la..E,pawisa kha’ ka ti let a.

‘Ka ac ah lo transfer mai rawh. Hmanchawp tur chu a awm tho’ a rawn ti leh lawng lawng. 

Kolkattah an Dept ho an zin dawna. Karkhat vel thang tur anni a. Ka nau a ni na vang vangin ka chhuang thin.Lehkha a thiam thei em em a. Kei ang lo takin kohhran leh khawtlangah a inhmang a. Kan awmna vengah pawh hian kei aiin hretu leh hmelhriat angah zawk. Ka eizawnna vang anih rualin kei hi chuan ka peih lo ve hranpa hrim hrim. A inhmang peih te hi an fakawm ka ti thina,an hman vang leh tihtur neih loh vang ti a an sawi hi chu ka nau awmdan ka en atang pawhin ka pawm lo hulhual thung.

‘Hey…I va hma ve.I thlenna rei tawh em?” Azual’in min hmuh veleh a rawn ti chul. A bag adaha. Inthlak tumin a uniform aphawrh sat sat.

‘Rei tehchiam nang. Ka inthlak fel deuh chiah.I lo riak dawn ta em?” ka ti a. ‘Aih..Riak leh lo mai ang, Ka pa a chiang lo lutuk a. Ka nu ka ngaihtuah. Lo riak zawk la’ a ti a. 

‘Naaa,riak lo mai ang. Engtin nge i pa chu?”ka ti thuai. 

‘A sugar leh Bp a sang lam Ve ve. Mahse, tukin chuan a zia…Eeee,ka hmu a’ a tih zawm zat. Midang awm leh awm loh a thlek kual nghal a. 

‘Tu maw?” ka phone en chungin ka ti a. Tu nge a sawi ka hria,mahse ka hre lo der tlat.

‘Hmm,tu nge ni vak ang? Hmingthana bak’ a ti hlak.

‘Naaa,a ho thei e. Kei pawn ka hmu ve fo alawm’ ngaihsam hmel zetin ka ti liam leh puat.

‘Nang hi…I khawngaih ve em em lo mi?” a ti hlak. A awah lungawi lohna niawm tak a hriattheih bawk.

‘Engvangin nge ka khawngaih anga? Khawngaih a mamawh hleinem’ ka ti hmak. A thaw haka.

‘I va han luhlul nging ngeng tak. Hetiang khawp hian a tlawm tawh ania’a ti leh a. 

‘A tlawm pawh ka lo hre hleinem’ka tihsan mai. 

‘Biak che a tuma,hmuh che pawh a tum ngeia.Lo hnartu inia. Mipa induhtawk ve tak tan chuan a tumna ringawt pawh kha tlawmna a ni chiang alawm’ tan fein a ti leh a. Ka melh vak.

‘Enteh..a tihdik lohah thupha chawi a tum satliah mai a ni. Inchhira tlawm tak tak nise hei ai hian a tum nasa ang. Tuna a awmdan hi en la,tlawm a ni dawn em ni?Hmeichhe thar a tawng leh tawh hial ta ve ang’ ka tita duah. 

‘Nang hi…I chiang em?” mak tih hmel zetin a ti a. Midang daih ka ni emaw tihmai turin min en bawk.

‘Enge? Dik lohna ka nei em ni?” ka ti ve thung.

‘I mak ta e..I luhlul zia hi engtin nge a hma khan ka lo hriat loh zawk ni?’a ti halh.

‘Mi tupawh hian tawk tihchin kan nei veka. Atawk ka ti ve anih hi.Bakah,min rin lohna kha engmahin a siamtha tawh lo ang’ ka ti leh a. A hmui a peta.

‘Ka khawngaih hle mai..’a ti leh daih. 

‘Maw? Enteh,Nang hi ka thian nge i nih ani thian zawk kha?” ka ti hlak. Min rawn en a,a ner nak.

‘I hrereng. Mahse, ka khawngaih alawm’ nuam lo ti hmel deuhin a che seka.  

‘Chhete tal khan min ring ni se chuan hetiang hi a thleng nang.Ka tuarchhuak tawh,let leh tumna ka nei lo’ ka ti dam thlap. Ni e, pawnlam landanah leh ka tumna hi chuan ka tuarchhuak tawh mahna... Mahse, anihna takah chuan zantin a status check leh Ig lamah engemaw tal a dah takin ti a en erawh ka bansan thei lo. Hei erawh midang hriat a tulna a awm lo a. Nakinah chuan ka la bansan mai ang.

Kan in alo kal atang khan thla a liam leh fe tawh.Sangzuala khan amah nena sawidun turin min ti kha ania,mahse Biak tumna ka nei lo a. Hmuh tumna lah ka nei hek lo. Engmah sawidun tur kan nei lo tih zawng ka hria. Sangzuala leh Julie-in hmu turin min ngen nawn leh ve ve tawha.Mahse, ka lo hnar fithla hmak. Azuali pawn engkim a hreta nge nge. Mahse mak takin ani pawh Hmingthana tan zawngin a tawng ta zauh zauh. Min biak a tum dan a nep lutuk, vawikhat a rawn calla, ka reject hmak.A rawn call nawn ta lo. Chutichung chuan tlawm an ti a. Keimah zawk min la dem a. A awmdan kha tlawmna a ni lo. Ka hrehawmna tireh tur chuan ka hmaah thingthi hial se ka duh ang.Chu pawh ala tawk zo lo maithei.A tawngkam na lutuk ringawt pawh kha chauhpui tham a ni tlat.

Inzaina rooma kan duty hi chuan nileng takmeuh meuh kan buai thina, ka chau thei takzet.Mahse, ka hna hi nuam ka ti em maia.Pawi ka ti phal lo. In ka thlenin dar 7 a pel tawh. Chau zetin ka thu hnawka. Ka mit ka chhinga,mutchhuakin min zem chiai chiai. Ni lo,ka intihfai phawt angai..Ka inthing harha. Pawn lama ruahsur thawm chu tuilum nghah pahin ka ngaithla a. Kan thenawmte inchung anan rik tliar tliar chuan ka lung a ti leng tlat pek. November thla chanve kan la thleng lo deuha,khua a vawt ta viau.Chuta karah khua a duaia.Vawiin phei chu ruah a tla nileng thak.

Ka mut hnu lawkah Julie-in min rawn call a. ‘I muhil tawh em?” zangkhai zetin a rawn ti a.‘ Muhil lo chiah chiah,enge nita?” ka tih chuan‘Naktukah inhmu ila,ka in check-up dawna’a rawn ti a. 

‘Awi, ka va hman hmel lo.Tunlai kan duty kan buai over a’ka ti hap mai. 

‘Naa,ka hmuh chak tehreng che nen.Anih leh next week tal kha chu pha miah suh aw’ a rawn ti leh a. 

‘Eng? Aw,ni tak’ ka ti leh a. Ka theihnghilh titih. Karleh hi a Birthday a ni leh der tawha. Chawei chhuah an rawt tak e. Reilote chauh emaw tihchhungin kumthar kan chuangkaia, ni lah a liam zung zung mai si.

‘I pha thei lo ania’ a rawn ti leh lang lang.

‘Um..Nia,zan lam ania.Ka lo tum ang.Enge i an zel?” Ka ti ve a. 

‘Ka tha.Chuan maw,ka lawm’ a rawn ti leh a.Julie tana ka beihna zawng zawng kha la hlawhtling vek rih lo mah se nitin hma a sawn hret hret zela. Tlangnel takin Sangzuala pawh an inah a kal leh thei tawha,Julie hmasawn zelna kawngah a tanpui nasa em em bawk. Hmingthana nen an in ang emaw ka lo tih thin kha ka hresual chiang hle tih ka hre tawha. A tawngduha,a nui peih em em bawk.Hmingthana erawh a tawngtam hran lo a,a luhlul mai bakah a chapo tel niin ka hre bawk. Engpawhnise ka hnathawhna hmasa berah chuan ka hlawhtling ka inti lo thei lo. Mahse, ka nun hian ngai a awh zo tak tak tawh lo va.Mipa dang kawp leh emaw hnimhnaih chakna ka nei lo. Ka inkharkhip tlata.Pasal nei awmin ka awm a ni deuh ber. Archie pawn Hmingthana nen kan inkawp tawh thin tih a hria.Mahse, min kawm loh phah chuang lo. Kan Hospitalah phei chuan kan inngaizawng angin an ngai vek. Nuam lo ka ti thina,amah Archie berin pawi a ti lo a. Kan ni awm vel ta mai mai. Anihna takah chuan thian bak inzawmna engmah kan nei lo.

‘Te,I la awm em?” a rawn ti leha, Ka ngaihtuahna atangin ka harh zawk.

‘Aw,Awm e..Bawihpuia enge a an?” Ka ti thuai. 

‘Zanin chu an riakchhuaka…’a tih chuan‘Um..A dam chuan a lawmawm’k ti sap. 

‘I ngai thin em?”a rawn ti ta khauh. 

‘Aw…’tiin  diktakin ka chhang mai.

‘Ani pawh hian angai che a, a sawi thin che a’ a rawn ti a. Ka awih chiah lo,naupang a ni a. Reitak thil vei veng veng rual ala ni lo. Mahse, sawichhuah kher tul ka ti lo.

Hospital ka thlenin Azuali a lo thleng tawh miala. Kei aiin a kal hmasa ngai meuh lo.Ka thawm hraiin a rawn hawi vat.A nui var vara

‘Congrats…..’ a ti nghal bawk. 

‘Enge a?” angaihna hre lo zetin ka ti ve thung.

‘Tunah chuan kan inhmu zing thei tawh dawn lo a. Mahse, ka lawmpui che’nui chung bawkin a ti leh a. 

‘Maw? Awi,ka tling tihna mi?” ka ti chul mai. 

‘Um…Mahse, I mak ve e. I hna zawk ania,I ngaihven lo si’ a ti a.  A sawi dik,Hospital changkang zet an hawng thar dawna. Hlawh a tha tawka,an Damdawiin lah a changkangin Doctor an nei tha bawk si.  Ka tlin inbeisei vak lo chungin ka dil ve ta tho.Diltu lah an tam. Mahse, Vanneihthlak lutukin ka tling ve ta hlauh chu ania.

‘Kan lawm ang…’ Archie-an nui var var chungin a ti a. Ka nui ve hawk hawk. 

‘Tehreng mai,in duhna hmun lo thlang ru’ ka ti let ve a. Azuali’n hmun nuam deuh tur a sawi kual zat zat. 

‘Lo tifel mai rawh. Kal duh bikna lai pawh ka nei lo’ ka tih chuan a bu nghat. 

Thlathar atanga ka zawm angaih dawn avangin ka thawh mekna hmuna kan Sister hnenah ka hrilha.Ani pawn min lawmpui thu sawiin a phul hlut.Nula senior a ni a. Mi tamtakin a Strict lutuk vangin an ngaina lo a,kei erawh chuan ka ngaina tlat. A thil duh uluk em em leh amah adik vang te,a in vawn that bawk vanga engkim Strict taka kalpui thei anih tlat avangin ka ngaisang bawk.

Dar 7 pelh hretah kan chaweina tur hmun kan thlenga. Sangzuala a lo kal ve bawk. Kan titi bawrh bawrha,midang kan ngai meuh lo. Kan haw dawnin dar 8 leh achanve a pel tawh.Archie-an min drop dawna. Sangzuala leh Azuali erawh chu a hran ve vein an haw tawh thung.

‘MAMA’  aw ka hriat rual deuh thawin ka kutah a rawn vuana. Ka phu zawk,ka melh chhuk vata. Bawihpuia’n min lo en kiau. An in ka chhuahsan hnuah ka hmuh leh na hmasaber a ni a. A mitmeng pawisawi lo leh nalh zetin min en a. A sam chhah zet erawh chu a hmaa an meh dan thlakin an lo met kawnga. Alang mipa naupang zual ta sawt.

‘Bawihpui…’ ka ti halh. Tu nen nge an lo kal hmuh tumin ka hawi kuala.Kan dinna piaha Hmingthana leh hmeichhe pakhat min hnungchhawn zawnga ding ka va hmu nghal a. Ka ip deuh chawih. Helaiah hian hmuh ka beisei lo nasa lutuk.

‘Tu nge?” Archie-an a rawn ti a.

‘Julie..’ ka ti hman.‘Oh,Hmingthana fapa kha maw? A lo va lian tawh ve’ amah bawkin a ti a. Bawihpuia en in ngainatawm takin a nui a.Ka thu hniama. Bawihpuia kut ka vawn saka. 

‘I dam em?” ka ti sap.

‘Aw…Khawiah nge i awm daiha?” a ti a. Pawisawi lo zetin a thle deuh a. 

‘Ka zin lawka.Enge hetah in tih a?”ka ti a .‘Apa te nen chaw kan ei a. Engtikah nge ilo haw ang?” a ti leha.Chhan mai dantur ka hre lo.

‘Bawipui,MAMA kha a lo haw tawh dawn hleinem.Chuan,Kal a hun e” Hmingthana aw in a rawn ti a.Ka hnungah a ding tih ka hria. Mak takin ka hnung a mur deuh ar ar thei!!!

‘Mahse, Apa..Ka MAMA  ania.A awm lo rei tawha’ a tih chuan ka maimitchhinga,Ni lo,ni lul lo ka ti rilru mawlh mawlh.

‘Kal tawh rawh le,kan inhmu leh vat dawn nia’ tihbak sawitur dang ka hre lo. Ka dingchhuaka,muangchangin ka inhera. A kekawr ipte zein a lo ding ngil ut mai. Ka hmuh hnuhnun ber nen a danglam ta thung. A inzuah buka,a sam pawh a buk lam hret. A mitmeng erawh ahma ang tho khan nelawm lo zetin a vawh ngaiin ala vawt ruih tho. Abula ding chu ka en a. Tu nge anih ka hria. Bawipuia nu a ni .A takah ka vawikhat hmuhna a ni a. Ka beisei aiin ala hmeltha zawk cheu. A haw hle an tia.Mahse, tunah chuan inzawmkhawm leh an tum pawh a nimahna le. Ka tum loh tawpin ka na zawk thei.

‘I tha maw?” ka theihtawpa pangngaiin ka ti a. Ka nui lui sak.

‘Um,tha..’ a ti tawi tuka. 

‘Tu nge?”Bawihpuia nuin a ti a. Ka ip deuh chawih.

‘Ruatpui..’Archie-an a ti a. 

‘Eheu…Archie,kan va inhmu khat ve’ a ti ve nghala. Ka thaw huai mai.Tu nge ka nih a hrilh dantur kha ka hre peih lo.Ni lo,ka hre ngam lo. An inbe zawm mawlh mawlh. Kei leh Hmingthana erawh kan ngawi reng.Ka kutah Bawihpuia’n a chelh tlat thung.

‘Kan kal dawn mi?” Archie-an a ti a. Kan boruak tang lutuk a hai hauh lo ang tih ka hria. Hmingthana te nen an inhre sa veka, Mahse, an inngaina lo tih ka hria. Engtin nge ka hmaa ding mek hian keimahah danglamna athlen tih pawh ahrechiang lutuk tlat. Ka bu nghat. Bawihpuia lam ka en leha,ka nui lui sang.

‘Bawihpui,kan inhmu leh vat dawn nia aw. Tunah chuan ka kal angaia’ ka ti a. A luah ka tuai sak zauh,Lunghnur hmel zetin a hmui a pet fana. Ka kut a vawnna dimtein ka lak thlak saka.Ka ban ka vai zauh. Ka inhera,ka mittui tla tur duh loin ka khap sak sak bawk.

Archie-an ka hnungah a rawn dawma. Ka mamawh tih chiang takin a hria.Mahse, ka pen tan chiah tihin ka malah Bawihpuian a rawn kuah ta chat. 

‘Ka kal ve duh…’ a ti chiah chu ka kawchhung a nghawr a ni ber. Chet mai nachang hre loin ka ding khawng lah.

‘Lo kal rawh le..’tih pahin Hmingthana’n rawn kaihsawn a tuma. Mahse, a ban tereuhte in min kuah bet tlat.

‘Aih,Apa..MAMA bulah ka kal ve duh.Ka ngai tawh’ a tap zui nghal chu a ni mai. Hmingthana ka en a. A inpet ruh tlat. Ruatpuii ka en leha, mak tihna nen min lo en reng.Hmingthana zawk a  thu hniama.

‘Kal ang le,MAMA hian tihtur aneia’ a ti dam thluam. Engtia awmtur nge ka hre lo. Hetiang chuan ka kalsan thei dawn lo tih ka chiang. Mahse, enge ka tih chuan ang?? A nu leh pa bulah ni lo se chuan ka hruai mai tur…

‘MAMA…I lo haw ang tiraw?”ati leh tiaua. ‘Aw, ka lo haw ang’ ka ti hmiah,engvanga sawi nge ka nih ka hre lo.Hmingthana leh Ruatpuii hmel ka en duh lo law law.

A kut a rawn lekchhuaka,kan awmho laia kan tih thin danin a kut zungpui a rawn tipira,ka kut zungpuiin ka zuk tisi ve a. Nakin chu nakin nimai rawhse. Tunah chuan Bawihpuia hi tap lo a kalsan ka duh ber.

In kan thlen thlengin vawikhatmah ka tawng lo. Ka mood awmdan engkim a hrethiam bawka Archie pawn min biak luih a tum lo.Ka thawmhnaw pawh thlak loin ka mut ngaiin ka mu a. Ka mit ka chhin rualin Bawihpuia hmel ka mitthlaah a lo lang nghal zela. A nu ka ni lo a,engvanga hetiang khawpa vei nge ka nih ka inhre bik lo.

Ka phoneah msg a rawn luta,ka en lawk peih lo. A rawn luh nawn leh takah chuan peih lo zetin ka bana,mahse min rawn betu ka hmuh rualin ka thuchhuak nghal zawk.

‘Zanin vang khan thupha ka chawi e’ Hmingthana’n a rawn ti a. Engtia chhan tur nge ka hre lo.Ni lo,chhan dantur chu ka hria,Chhang tur ka ni em ka hre lo zawk.

‘A ho lutuk’tiin  ka reply ta nge nge.

‘A sawi ngun lutuk che a’ a rawn ti leha.

‘Min la theihnghilh mai ang.Tunah chuan abulah a nu leh pa in awm kha’ ka ti a. A seen a,Mahse, a rawn reply ta lo. Engvanga a nupui kha sawi tel kher nge ka nih hrep ni a!!!!!

Ka muhil ta miah lo.Khawvar veleh ka tho a. Ka inbuala.Eirawng ka bawl nghala,ka lu na leh mit kham thum tihreh nan damdawi ka ei bawk. 

Toilet ka luh rualin lehlam rooma hmeichhe pahnih inbe sar sar thawm ka hriaa. Ka then sak.Kan thawhpuite zingah meizuk ruk ching an awm a. Tuna mi pawh hi tuemaw ber anni ngei ang. Ka kut sil tumin Tap ka bana,mahse an thilsawi chuan ka beng a verh zak mai.

‘Enteh,Tetei kha a tling an ti a’ pakhatin a ti a. 

‘Nia, vawiin khan Sisterin a sawi alawm. Ka awt khawp mai’ kan thawhpui zinga pakhat, Terini a ni tih a awah ka hria. 

‘Thiam vang pawh ni hlei lo.A ho em mai’ pakhat zawkin a ti leha, ka sa phat. A awah lah tu nge anih ka man mai thei lo zui.Engvanga tianga min han puh ngawt ngam nge maw anih hrep ni??

‘A thiam vang ni lo se a tling nang. Lawmpui hle hle la anih chu a’ Terini  bawkin a ti leh a. 

‘Nia,nimai.Mahse, Tetei hi irin a ang lo ang. Ahma chuan mi inah damlo a enkawl thina.Mahse, a enkawl unaupa nen chuan an inkawp thina. Pathlawi chhe lo uchuak ania.Chu pa bawk chuan alawm tuna a hna pawh hi sawipui..’ a ti leh zat zat, ka hmui ka pet fan fan thung. 

‘Awi, ava mak awm ve. Fel ka lo tia sin’a ti a. 

‘Fel ang.Ama tana hlawkna turin mipa chhe lo tak lakah a lo kar full zeuh zeuh pawh aniang.Bakah,mipa zawk chu hmu ve la chuan i ip rei vak bik lo ang…’a ti leh zel. 

Rapthlak ti lutukin ka khur hlawk hlawk. Engtin nge mi hian thildik leh dik lo pawh hre si lo a huai taka an sawi mai ngam thin le??!!

‘Ka hmu duh che’ Phone a pick-up veleh ka ti nghal pawp.

‘Ok..khawiah nge i awm?” min hnial eih lo hian a rawn ti a. 

‘Inah…’ ka ti tawi tak. 

‘Ka lo kal nghal”a tih chuan Chhang loin ka off nghal hmak. Ka chungchangah engmah a lo inrawlh ve ka duh lo bur. Chiang takin hrilh ka duh bawk.

‘Thu rawh ‘ka ti nghauh. A thu ve mai bawk. Amah ep zawnga thutthleng awmah ka thu a. A hmelpa zetah chuan enge angaihtuah ka hrethiam lo. Chik zetin ka chevel min en reng tih ka hriaa.Mahse, zam ka tum lo.

‘A tawpa tawpah chuan min be ta alawm.Sawi la….’ A ti a. A bawp sei zet a thluang a.Hahdam hmel zetin hnunglam a ngheng bawk. Ka aw ka thian khauha. 

‘Ka hna thar hi i hria em ka hre lo a…’ ka ti tana. 

‘I tel vena anih chuan engpawh ka hria..’ a ti awlsam mai. 

‘Ka thiamna hmanga tlin ka duh ber’ka ti chang fak. 

‘Chuan…?” a ti duh lek. 

‘Ka chungchangah lo inrawlh ve suh. Ka mamawh lo che’ ka ti hmak. A mitko a ti sang uk a. A hmelah engmah danglam ala awm chuang lo.

‘Anih chuan min vau tihna mi?”a ti a. 

‘I duh duhin ngai mai rawh. Ka chungchangah lo inrawlh miah lo la ka duh a ni tawp mai’ka ti hlar mai. 

‘Anih chuan a harsa deuh dawn anih chu’ a ti a. A tho zui nghal a. Kawngkhar lam apan nghal vut bawk. A awmdan chu ka beisei lo lutuka,chet mai nachang ka hre lo.

‘Engvangin nge hetiang hian itih a?” ka tih chuan ka tum aiin ka aw a ring lam hret. A ding chuta, a rawn hawi leta, a hmelah chuan engemaw danglam zawk a awma.Mahse, a reh lehnghal vat.

‘I laka ka tihsual ka siamthat theih nan..’ nghet churhin a ti sup. Ka thaw hak mai.

‘Ka ngaipawimawh lo’ka ti khauh far.

‘Keiin ka ngaipawimawh alawm.Min ngaidam turin ka beisei lo che a. Mahse, ka tihsak theih zawng zawng tihsak che erawh ka tum’ a ti leh a. A ti mai mai lo tih ahmel thutak zetah chuan alang thei vek.

‘Hetiang hian tisuh..’ka ti tawk mai. 

‘Oh,ti dawn e..”a ti leh maia. 

‘Ka ngaidam che angah ngai mai rawh. Ka ngaipawimawh tawh lo,ka nun hluia ka thil tawn tamtak zinga pakhat ve mai i ni a. Lo la thutak duhsuh,thil thleng pangngai ve mai anih kha’ ngeiawm zetin ka ti salh.

‘Ngaipawimawh zawk la ka duh’a la ti ta. 

‘Khawngaihin..Kal tawh rawh” ka tih chuan Ka sawi hre lo ang maiin min rawn pan pheia..Tawlh let lo turin ka insum tang tang thung. Ka inchhungah zawk lehnghal hian tlanchhiat chhan tur ka nei lo. Ka hmaah tak a rawn dinga,min enchhuk runa. Hlau miah lo ang maiin a mitah tak ka en ve ngar bawk.

‘Ka sawi duh zawng zawng ka sawi anga,ka kal ang’ a ti sup.

‘Engmah sawi duntur kan nei lo.Bakah,I sawi engmah ngaihthlak ka duh lo’ ka ti hlak.

‘Insawifiah ka tum lo. Ka tihsual tak kha ka siamtha thei lo tih ka hriaa. Mahse, I nunah erawh ka inrawlh reng tawh dawn. Ka ba ka tlak fel hma loh chuan…’ nghet leh dam thlupin a ti leha. Min rawn bana,rang lutukin ka per sawn nawlh.Mahse, min rawn man hman ta tho.Ka tal nghal laih laih chu min pawt bet ta hmiah.Ka darah a hmai a rawn phuma. A thaw lum ham ham chuan min fan nghal raih raih mai. Che loin ka din ngaiin ka ding a. Ka kawngah a kuah thung. Hmana ka thlamuanna ang chiah khan min fana,ka famkim ngawih ngawih niin ka hre leh ta chiah.

‘Engzata tam pawh nise min ngaihdamna tur anih phawt chuan ka ti vek ang..’ a tih chuan. Ka harh deuh hawk. Ka tlawm leh lo chauh alawm le.

‘Min thlah rawh’ tih pahin ka nam a.

‘Ka mamawh che, min ngaihdam rawh’zawi angreng tak hian a ti a. 

‘Ka ngaidam daih tawh che..Min thlah rawh’ ka ti leh vat.  Min thlah chuan ka ruak nghal huai. Kalsawn chuang loin min en a. Ka la hmuh ngai reng reng loh natna a hmelah chiang takin ka hmu thei!!

‘Anih chuan bul kan tan leh thei angem?” A ti ta a,a awah ngenna a hriat theih.

‘Ni lo,tunah chuan a theih tawh loh’ ka ti dam thlap. ‘Enge ka tih la ngai ang?”beidawn hmel tak hian a ti a. 

‘Engmah..I tel loin awm ka zira,ka zir thiam tawh’ harsa ti ru ngawih ngawih hian ka ti a. 

‘Mahse….I tel lo a awm hi ka thiam ve thei lo.Bawihpuia pawn’ a tih chuan ka chhungrila amah ka duhna thi tawh emaw ka tih kha a lo la thi eih lo.Nia,duh satliah loin ka Hmangaih miau atin ni..

‘Khawngaih kal tawh rawh’ ka tita zawka. Tlawm taka min ngen tura ka duh chuan min ngen ta ngei.Mahse, ka thei lo. Min hmangaih tlat si hian min tina vawng vawnga,amah hnial turin chakna min pe lawi si.

A rum hawka, ka khur nasa lutuk thup tumin ka inkuangkuaha, hawisawn lo turin ka infuih mawlh mawlh bawk.Engemaw sawi tum niawm takin a ang zuaua,mahse a chip leh hmiah.Beidawn hmel zetin a ban a phar hluaia,a dahthla leh hnawk. A inhera. Kawngkhar lam a pana.Kawngkhar dimtein a rawn nem khara. Chhuatah ka thusawp thla hnawk. Ka biang a rawn lum thla papa. Ka insut zui ta hlawp hlawp mai. 

Ni aliama,kar aliama thla pawh a vei ta hial. Hmingthana ka hmu leh ngai ta lo.A chanchin hriat loh hram hram ka duh avangin Julie pawh ka pumpelh hram hrama.Sangzuala lah chuti bawk.

Ka phone nghawr dat dat chu ka en chuan  Sangzuala a lo ni a. Ka pick-up dawn nge dawn lo ka ngaihtuaha,ka pumpelh nasat luat avangin ka hmuh lohna pawh thla a tling tep tawh.Ka inngaihtuah chhungin a tawpa,a rawn tinawn leha. Pawimawh a awm a ni ngei ang.

‘Hello..’ ka ti zangkhai vah.

‘Hmuh che ka va duh.Hun inei angem?” a rawn ti nghala. 

‘Engtikah?” Ka ti ve mai. 

‘Tunah hian mawle..’a rawn tih takah chuan ‘Naa,hun ka va nei lo tak..Hnaah ka buai meka’ ka ti a. Diktak chuan off Day anih vangin ka buai hauh lo.Mamawh ho la khawmin KV mart-ah ka kal mek zawk.

‘Takzet…’ a rawn ti leh khera. 

‘Um..’ ka ti ve leh mai. 

‘Anih chuan tuna  i thil lei mek kha Damlo te tan i leisak tihna mi?” nuihza aw deuhin a rawn ti a. Ka hawikual vat. Ka hnung lawkah a lo ding reng chu niin.Tihngaihna hre lo lutukin ka nui ta hak.

Restaurantah kan inzui luta. Nidang ang bawkin a tawng bawrh bawrha.Eitur a chah hnuah Thil chi hrang hrang a sawia,Hmingthana chanchin a sawi mai ka lo hlau zek zeuk thung.‘Min haw ta mai emaw kan lo tia’ nui huk huk chungin a ti a. 

‘Naaa,engvang chuan maw?” ka ti hlak.

‘Ka hre chiah lo..Eng lo,Hmingthana nen in inhmu tih ka lo hriaa.Julie hnen atangin’ zawi deuhin a ti a. Ka hlauh ang ngeiin ka ti rilru ve thung.

‘Thla aliam tawh ang’ka ti a, ka zep vel peih ta lo.

‘Um,nia..Khata tang khan a mizia a thlak veka. Zu a in nasa viaua…’ a ti leh a. Ka khap sak sak mai.

‘Tete,engkim insawi dun ang tih chu ka ring thoa. Mahse, I ngaidam thei lo hi ka hrethiam chiah lo.Ka buaina ni lo mah se ka sawi a tul tlata’ a ti a. Nuam ti lo hmel a pu bawk.

‘Nangmah nen inkawp angin min ngaia,min ring lo bawka.Bakah,hetiang lam kan sawi dun lo..’ ka tih chuan ‘Maw? Ngatinge?’ mak a ti lutuk chuan min ti hamhaih zo vek.

‘A dang asawi miah lo maw?” a ti leha.Ka lu ka thing ringawt.

‘Amak hle mai..Kan pahnih chungchang kha atan chuan rinhlelhawm ania lawm. Kei pawh ni ila ka ringhlel ve tho ang.Kan inhmuh khan kan thla an lo laa, chu lah chu kan inkuah lai kher kher ala nizuia. A ruk veka inhmu kan ni lehzela. Chu bakah,in a ka lo kal hmasakber tum khan tuma awm loh lai a lo ni leh bawka. Min rinhlelh tawh avangin engkim a lo ngaihbel vek tawha’ a tih chuan ka thaw hak. Thlalak min entirah kha chuan inhmatawna kan thu dun lai chauh kha  a ni si. Hetiang thleng thleng chu tu tih nge nita ang? Hmingthana lahin engmah a sawi si lo.Ngaihdam min dil ringawt kha ania.

‘I chhuahsan khan Julie vang bawk turah ka lo ngaia,thil hriatsual anei leh ah ka ngai bawka.Mahse, Julie vang ni loin nangmah vanga na leh thinrim alo nia,diktak chuan a hmangaih che...’ a sawi zawm mawlh mawlha,mahse engmah ka bengah a lut tawh lo.Ni lo,a luta,a chhuak tlang lehnghal zel zawk.

‘I tha em?” Tih pahin  ka hmai bulah a kut a rawn vaia.

‘Aw,aih….Eng lo..’ ka tawng bah nawk nawk mai.

‘Ka drop ang che’ zaidam takin a ti leha.Ka bu nghat.

Kan tlanchhuah hnuah inbe mang loin kan chuang dun mawp mawpa.Ka ngaihtuahna buai nuai nuai tihfim tumin pawnlam ka thlir vang vanga.Mahse, engmah ka ngaituah thei lo.Sangzuala Phone a ri a. ‘Julie nih hi’ min hrilh pawh ni loin a ti satliah.

‘Hello…Julie’ atih zawm zat. Julie tawng angaithlaa. Kei erawh chuan Hmingthana bak ka ngaihtuah lo. 

‘Maw? Khawiah? Ana viau em?” Sangzuala’n a ti a. Mak lutukin hlauhthawnnain min rawn tuam nghal hlup. Ka lungphu arang nghal dawt dawt mai.

‘Ka lo kal ang. Ka bulah Tetei pawh a awm.Ka rawn hruai nghal ang’ a tih zawm leha. A phone a off a,min rawn en a. A hmelah chuan thil lawmawm lam a ni lo tih achiang reng. 

‘Tete,kan kal angai. Hmingthana a accident…’ a ti chiah chu ‘Maw?” ka ti vak mai. 

‘Damdawiinah kan kal dawn nia,an thleng tep ang.Hahdam rawh’ a ti a. Engtia Accident nge ala hriatchian bik loh thu a sawi zawm mawlh mawlh. Kei erawh ka chawmawlh vek maiin ka hria. 

A ke ruh a tliaka,a kawchhungah thi put a awm bawk. Hmanhmawh takin an zai nghal rum ruma,Nurse ka nih hnuah hetiang khawp hian ka la zam chhe ngai lo.Karkhat lai Damdawiinah a awm tawha,ka thawhna hmun a ni bawka ka kal nitin mai. Mi in engtin nge min sawi ka ngaihtuah loa,ka ngaipawimawh hek lo.Ka duhber chu amah enkawl a ni tawp mai. Pi leh pu pawn min be bawrh bawrha,ka kal chuan min  lo lawm em em ziah zawk. Vawi tamtak ka awm vanga an thlamuan thu min hilh tawha.Ka ringhlel hauh lo bawk.Zanin pawh Piin ka riah theih leh theih loh min zawta,hnial loin ka ‘aw’ nghal hmiah.

‘Tete,hmana ka hrilh che kha ila hrereng em?” Piin a ti a. Ka lu ka thing ringawt. Engber nge sawi chhuah leh atum ka hre lo. Khum lam ka hawiphei lehnghala. Hmingthana muhil hmel chu ka en a. A lang cher deuh kuama,akhabe hmul a to siar siar bawk.  

‘Ka fapa hian nupui a nei leh dawn anih chuan ka duhzawng a nei tawh ang ka tih kha’  a tih chuan ka bu nghat,kha kher kha chu ka la hrechiang lutuk tlat.

‘Ka duhzawng inih thu hrilhtur che hian ka nghak rei khawp mai.Mama’n kan kaltir che athat thu a sawi khan ka pawm lo va,mahse nangma tan kan hnena thawh zel kha hmasawnna a awm lo tiin atang tlat sia.I hria alawm,a luhlul zia chu.A nu ni mah ila ka hnial thei lo fo ania.Min zah lo tihna erawh a ni lo a’ a tita duah. Ka melh reng maia,Ka mawl hmel ngawt ta ve ang.

‘Mak i va ti awm ve..Julie i enkawl dan leh Bawihpuia i Hmangaihna te khan min hneh lutuk tlat’ ati leh a. 

‘Ka ban chhan kha engmah a sawi lo maw?” ka ti thei hram.

‘Sawi e. I tana hna tha zawk a awm thu leh i kal a that thu asawi alawm. A dik lo em ni?” a ti deuh ha..Engmah sawi loin ka lu ka thing ringawt.Sangzuala nen min rinhlelh vang a ni chungin a nu leh pa lakah chuan anihna sawi loin ka mawi lohna tur a lo la thup ta fan chu ania.

Khum che datah ka hawichhuak vat. Hmingthana thawh tum mek chu ka hmu nghala,ka tho vat.

‘Che suh..Mamawh i neih chuan sawi la…’ ka ti sap. Min hre ngai lo niawm takin min melh run run ringawt.

‘I zia deuh em?” ka ti leh chu‘Kei hi ka thi nge ka dam?” A ti a. ka beisei loh lutuk a sawi takah chuan ka ip deuh chawih.A damdawi a sang thina,a rilru lamah harsatna a nei deuh anih ka ring rum rum.

‘I dam..I zia tawh lutuk.Mu la,mamawh i neih chuan ka lo laksak ang che’ ka ti leh a. Ka nui lui sak bawk.

‘Ka mumang a ni zawk em?” a ti leh fo.

‘Aih..’ ka ti thuai. 

‘Anih chuan ngatinge ka bulah i awm? Ka bula awm i duh loh kha’ a ti leh chuka  nghing lawih thei.

‘Ka awm reng tawh dawn alawm..Mu la’ ka ti a,ka zak buai peih lo. Ka kalsan tawh dawn lo miaua.

‘Tui min lo pe,khawngaihin’ a ti leh daih. Khum bula tui ka bana.Ka pe a,a innghal khawlh khawlh. A mu thla leha,puan ka sin that tira. Kalsawn tumin ka inhera,mahse ka banrekah a rawn vuan ta chat. Rang zetin ka en a.

‘Kal suh,ka bulah lo mu rawh’ a tih chuan Inngaihtuah ka mamawh lo. Khumah ka lawn a,ka inthawlh ve ta kak. A kawngah ka kuaha,Min rawn kuah ve nghala,a lungphu ri dat dat ka hre leh ta..

‘Min ngaidam tak tak em?” a muhil tawh emaw ka tih laiin a ti a.Insiam rem tumin ka che a, mahse min kuah nghet sauh thung.

‘Hmanah khan ka ngaidam daih tawh che’ ka ti sepa. 

‘Um,ka hmangaih che tih i hria em?” a ti leh a. Ka mittui a hnai nghal kuar. Sangzuala khan min hrilh tawh mah se ama sawi ngei hriat chu adan adang daih.

‘Um…Keipawn ka hmangaih che’ ka ti ve a. 

‘Mi a nu..Anih si chuan kha lehchen kha min hrem angai em ni?” a ti nghut. Ka inbengkanga.

‘Kan a dun ve ve alawm…Ani em?” Nui chunga ka tih chuan a then ve suk. Ka kun hniama,a hmui chhah tapah ka zuk si de de. Kan nunah thil tamtak kan tisual ve ve a. Mahse, tun dinhmun kan thlen nan hian kan tihsual hmasak kha alo ngai a ni tih ka pawm thlap tawh.

‘MAMA…Tah hian ka nau a awm tak tak em?” ka dul puar ve ak tawh khawih pahin Bawihpuia’n a ti a. Ka bu nghat. A samah ka tuaia,a ha hmai bal seu langin a nui seng bawk.

‘Anih chuan engtikah nge a  lo chhuah ang? Apa-in nakumah a ti a…’ a ti leh a.

‘Um,nakumah..’ ka ti ve a.

‘Ih,keima MAMA chauh ila ni tho ang tiraw?” a ti leh reuha. ‘Tehreng mai. I nau tan pawh ka ni ve tho anga, In intawm anga’ ka ti a. Ngaihtuah muk tak nei ang maiin a nur deuh nang. A chal tichuar vei tap bawk. A pa ang maia mi hipna ngah leh luhlul ala ni ngei ang. Ka hmangaih ngawih ngawih bawk.

Ka Phone riah ka harha,ka tho mai dawna,ka ban khamin Bawihpuia a lo muhil a. Tih harh hlauin dimtein ka che a.Ka phone ka bana,min rawn calltu ka en chuan ka  then sak.Naktukah a lo haw dawna,nitam pawh a la zin lo.Mahse, ka ngai hman em em tho.

‘Hello..’ Bawihpuia tihharh hlau tak hian ka ti sapa. 

‘Hey. .MAMA.Enge itih a?’  a rawn ti a,a aw pa leh dam thlup  hi ka hre ning thei lo.

‘Kan mu a…In buai lo mi??’ka ti let ve a. An buai loh thu a rawn sawi a. 

‘Ok,naktuk dar engzatah nge in lo chhuah dawn tak?” ka ti leh a. Min chhang loin Phone a off ta daih. Angaihna hre loin ka phone ka en a.Ka melh vak ringawt.

Khum a che data,ka hnung lam atangin ka kawngah a rawn kuaha.Ka bekah a rawn fawp zuia.

‘Tunah….MAMA….’ Nui chungin a ti a. 

Ka hlimna hi a tehna awm se chuan a chungber aia chung a kawk ngei ang…

A tawp ta