Jonathan - 1

 Then - 1

Then -1na

Ka alarm riin min tiharha, hriat loh dera muthilh leh mai ka chak viau rualin “I bp sang hi control tura damdawi ei i duh loh tlat chuan i chhiatpui thuai dawn a nia.Kum 30 i tling tawha, ei mah la a pawi lo zawk” tia Doctor-in min hrilh kha ka hriatchian em avangin mu lui thei ngawt ka ni lo. Kum 3 zen zawn chu ka lo control tawha, ka Bp pawh a normal zui ta nia hriaiin ka thlamuang viau reng a. Mahse, nimina ka in check-up naah khan ka Bp a lo sang leh vu tawh mai chu niin..” engtin nge luhai lova i lo thlen theih le? “ Doctor-in min ti he haw anih kha. 

Peih lo fe a tho chhuakin ka inphihfaia, kumthar hlim, january thla chanve vel kan hmang chho meka, Dec lama a vawh vak loh rulh let nan ti niawm takin khawvawh dan lah chu a satliah lo nasa mangkheng mai. Khur deuh hlak hlak chungin in atangin ka chhuaka, kawngpui bul chiaha awm tih takah step ka chhuak thla chu kawngpui ka thleng thla a ni nghal mai. Kawngpui dung a reh ruih maia, dar 6 vel chauh ala ni bawka, khawvawt lutuk bawk nen, a reh duk mai. Tukdanga Motor lian a tam thin nen tukin chu hmuh tur pawh an awm lo.

Muangchangin kawngpui dung ka zawh thlaa, ka tlan dawn zet nain thui pawh ka tlan hmain ka hah bakah ka khup ruh a na ta tlat. Muang lutuk loin ka kalthla ta zawka, khawvawt vin tuk mai-ah hian kal lum a huphurhawm lam chu a ni. Ka cousin ten inkhel tura min sawmna hnawla kawngpui dunga tlan ka thlang hi tifuh lo ka inti nghal pang mai. Naktuk zing chu ka inkhel chiang khawp ang ti rilru nauh nauh chungin ka kal thla zela. Kan veng kalpelin kan veng leh veng thenawm inrinna lai ka thleng thlaa,in awm lohna lai ka thlen chuan mipa rual khat hi vawt tih hmel takin an lo dingkhawm laiha,ka hmelhriat te ni hauh lo mah se tute nge annih ka hria. Kei chang lo helai hnaia cheng te leh helai kawngpui paltlang tute pawhin an hre vek…DRUGS ADDICT ho anni a,helai hmun hi an damdawi inhlanchhawnna hmun a ni tih pawh kan hre vek.

Ka hming chu Lalremsangi a ni a, ‘Tête” tiin min ko daih thung. Tunah hian kum 30 na ka hmang ve meka,August thlaah kum 31 ka tling ang. Unau zinga naupang ber dawt leh hmeichhe awmchhun ka ni a, mipa pali zinga hmeichhe piang awmchhun tihtakah ka mizia a nu lo viau. Kan upa ber leh a dawt te hian nupui nei tawhin in hrang an chang ve tawha. Min chhangtu hi chu YMA tlur mai,hmehbel chawt loh chuan nupui a nei lovang tihtur chi kha a ni thung. Chhungkaw khawsak vantlang tak ni vein ka pa hi P&E -ah SDO niin kumin kum tawpah a pension dawna,ka nu erawh inchhung enkawl tawp chi a ni thung. A nulat lai chuan hna a nei ve a,ka pa nen an inneih hnuah inchhung enkawl a duh avangin a bansan a ni. Kan upa ber hi Contractor niin a dawt erawh MZU lamah a thawka, ka u chiah hi mining-ah hna tha ve tawktak chelhin a awm a. Kei hi Advocate ka ni ve ran,kan naupang ber erawh chu nikum synod inkhawmpuiah khan Pro Pastor atan lak ni vein Thingtlang lamah a awm ve thung.

Ka pa hi kan naupanlai chuan JE a ni thina, kan unau hi kan vanneia,kan vaiin lehkhazir mi tak vek kan ni ve a. Mahse kan upa ber hi college a kal lai atangin MZP lamah a inhmang ta mah maha,B.A a zo hram tih loh chu MZP velah a thamral ta thung. Vanneihthlak takin tunah chuan contractor che thei pangngai tak a ni chho ve ta hlauh mai. Kan naupanlai hian kan harsa ve thei em em maia,ka pa lah a nghetin a thawk lawk bawk si lo,tun hnu a ka hriat leh dan hian ka pa hian kan lehkhazir nan sum a puk nasa viau thin a lo ni a. Fiamthu titakin kan thianten “Têtei te chu JE rethei chi innia,i pa hian a ziak bo ve thiam lo aniang” an ti fiam thin. Ka pa hi a hun hmasa lamah chuan zu te in ve thin bawk mah se kan naupang ber pian hnu lawk atangin kohhran a bel chho a, camping vela piangthar pawh ni chuang loin amahin a piangthar tawp a ni ber. Hun reitak sawrkar-ah hna nghet thawk lova a awm hnuah a nghetin lak a ni ve ta hlauh maia. Ka nu hian fiamthuin “ i u te pathum hi chu thik reng reng suh u, kan retheih ber laia piang leh naupanlai hun hmang annia, bawnghnute an inchak ngawih ngawih rengte hi nuihzat suh u,nang leh i nau hi chuan in u te anga hrehawm intuar ve lo” a ti thin. Hetiang hian ka nuin sawi mah se keipawh hian kan retheih lai ka hre lo bik chuang lo. Mawza tlang rul tawh chhunga elastic thun a, a hnuai pawp kaw huau bun hian middle school ka kaltluan ve thak tho. Ka pu te inhnuai luahin chep takin kan khawsa ve thina, tunah erawh chuan keimahni in-ah ngei chengin kawngpui an mai a awm a ni a, in ropui tak ni lo mah se keini tan chuan ropui tih loh rual a ni lo. Hausa thur thur ni lo mah ila kan mamawh tawk aia tam fe kan nei ve tawha, ruihhlo vanga chhungkaw buaina kan nei ngai lo bawk nen, tumah kan awt bik lo.

Mel khat vel lai ka kal takah chuan ka lo fit lo ngang aniang chu, ka malpui a thip thak sup sup a ni ber tawh. Ka tleirawl lai atanga thiam bik pawh nei chuang lova infiamna chi hrang hrang ti ve thei dum ang kha ka ni a. Han larpui tham khawpa thiam erawh ka nei chuang miah lo. College ka kal hnuah erawh lehkhazir lamah ka insawrbing tak em avangin infiamna lam ka tita meuh lo va.Kan veng in hall thar kan neih hnua Badminton khelhna tur a awm hnuah badminton ka khel ve zeuh zeuh a ni ta chauh.. Kum naupangte-in bp sang ka nei chho a, ka nu te chhungkaw zingah BP sang hi a mikhual lo va, an unau zawng zawngin he natna hi an kawla, keini an fate zingah pawh kum 30 tlin hma atanga BP sang nei kan awm fur tawh. Kan thau em em pawh a ni chuang lo, thisen atanga kan kai chhawn anih ka ring ber. “Sang lutuk a ni hran lo va, i kum a la tlem bawka, exercise te lain control tum ang” tiin Doctorin min hrilha, khata tang khan ka hman phawt chuan tuktin exer lain ka chhuak ta ziah. Ka bp pawh a normal ta thuai. Kumkalta chho atangin hna lama ka buai ve thin em avang leh kohhran lamah ka buaina tawk ka lo hmu bawk si a, kum khat tal tap chu exer ka la tawh lo. Ka p8 mumal loh vanga ka inentir na-ah ka bp a lo sang leh vu tawh tih kan hre chhuaka, ka kum lah a lo tlem ta vak lo bawk nen Doctorin Damdawi ei turin min ti ta tlat. Mahse ka nel tak Doctor a lo ni kher si a, ka control ang ka la ti leh hram chu a nia.

Hah thaw hlawp hlawpin in ka thleng thei hram. Taxi -ah ka chuang haw teuh ngang mai. Kum 4 kaltaa ka accident na,ka khup ruh khi hi dam vek tawh mah se tihfuh loh chang chuan a na vung vung thina. Tukin pawh ka lo fit lo nasa mai si, thui angreng tak ka kal takah khan a na ta viau maia. Ka let leh lam erawh chhoh kal a nih avangin ka kal lui thei a ni chauh maia. Tum viau lo ila chuan Taxi-ah ka chuang haw chiang viau ang.

“Tebawih, i hmanhmawh chuan i u rualin kal la, i scooty a chiang lo iti lehnghal em ni?” ka pain chawei laiin a ti a. Ka chhan hmain ka u-in “ ka nghak hman lo, a muang thei lutuk” a lo ti hmuk. “Min nghah pawh tumla i ruala kal ka tum lo hrim hrim” ka ti let ve nghal zat. Min chhangtu chiah nen hian naupanlai atangin kan inmil ngai lo. Kan inkhak reng a, insual lah kan insual nasa thei. Ho mai maiah kan inhnial buaia, inhnial leh inhau reng e ti loin kan unauah chuan kan inngai ber thung.

“I muang thei em alawm, khawiah pawh kal dawn la nghah ngai reng i nia, insiam that hi tum ve rawh” ka nuin min lo ti ve hlak hlak. “ ka muan vanga ka tihtur tih loh ka neih pawh ka hre lo ve” ka tihsan a. Fanu neihchhun si hi ka nu hian min enkawl liak liak lo khawp mai. Ka nu aiin ka pain min dimdawi zawka, ka nu hian ka pa bulah min hek min hek thin mah se awmzia tehvak a awm lo. Ka pa hian a ngaithla veka, ka nu duh anga min hauh zui erawh a nei ngai chuang lo.

“Tlangval awm hian i awm a, nizan pawh dar engzatah nge i lo haw ka hre hleinem, dar 9 hmain rawn haw ziah tawh rawh. Em em che hian” ka nuin a ti leh a. “Chu, fapa pa 5 i lo nei reng elaw?” ka pain a lo tih chuan ka nu a tum nghal hmak. “Nang lah hi a, i fanu hi i chhuang emawni? A fel lo nasa teh ania” a ti zui nghat nghat.

“Felna lai a inang hleinem, mi fa te pawh i duhthusam anni bik nang” ka pain a tihsan leh mai mai. 

Kan naupan deuh laiin vawikhat chu ka u nen kan buainaah kut thlak hmasa tu ka nih avangin ka pain na takin min vuaa, abak chu vawikhatmah kut min thlak nawn leh lo. Pa Zaidam dup mai, a thinrim thei lo aniang tihmai tur a ni a. Ka nu pawh hi nu thinchhia tihtur a ni chuang lo. Hmeichhia zawk leh inchhung enkawl zawng zawng ti vek tu anih vangin zaidam viau mah se ka pa aiin a phunchiar zawk thung.Mak takin hetiang nu leh pa nei si hi kan unau zinga upa ber dawt nen hian kan zaidam lo ngang mai thunga. Keimah bik phei hi chu naupanlai atanga ri thak chi, duh loh zawngah chuan hlauh nei mang lo chi ka ni a. Unaupa hlir nei ka lo ni bawk nen, ka nu hian min enkawl hle lo se chuan ka tlangval viau tak tak in ka ring thin.

“KUm 30 tlin tawh-ah pawh bialpa nghet nei si a then la tum ut ut a nia, makpa hi kan nei lo hlen maithei ania” ka u-in a lo tih leh chuan ka melh ram ram. Dawt a nih tlat loh avangin hnial phei chu ka tum lo.

Office ka thlenin ka thawhpuite an lo thleng vek tawha. Che muang viau thin e ti lo chuan hna hi ka kal tlai mai mai khat ve tlat. “Vawiin chu eng eng emaw buaipui tur a tam riaua. Kan thawveng hman meuh lovang” kan pu berin a tih chuan ka thiannu nen kan inmelh ralh. Kan pu hi advocate tha leh lar tak a nih avangin hna kan ngah tlangpui a, a dinsak tawhte chakpui loh a nei lovang tihtur a ni bawk. Hla deuh taka kan chhungte a nih vanga a bulah hian thawk thei ka ni a, hna duh uluk leh thil ti mai mai lo tak mai a nuh avangin a nau te zawng zawng kan fimkhur tlang vek. Ani bulah hian awm lo ta ila tuna ka thiamna ang hi ka neih phak ka ring lo. Pa tha pui mai a nih rualin pa thinchhe tak, mood fuh loh pe na thei tak leh an chhe zet mai a ni tel bawka. A tihfuh loh ni chuan tawng ring ngam pawh kan awm ngai lo.

“Tête, Zorina hi engtik nge lo phei a tum?” ka dawhkan hmaa rawn din pahin a ti leha. “ ka va hre mai lo. Tinge?” ka ti thuai. “Eng ni lo e, ka zawt mai mai che, Lunglei lama han awm tak vang vang chu lung a leng duh awm em a ka ti mawle” a ti ta lek. “ thawk lakna hun kan ngah tihna mai a nia,a zia phian” ka tih chuan midang an lo nui a. “Chuti maw? I rin loh deuhin midang hi an lo tlazep ange aw” kan puin a tih leh chuan “ midang ka zawn veleh angai dawn tihna animai lawm” ngaihsam tak ang mai hian ka tih liam san leh mai. Diktak chuan midang lo tlazep an awm palh a ka hre chhuak a nih chuan a hnar ka hnek thi sak duh zawk hial maithei..Kawp nih ka duh loh ang bawka a kawptu zawk nih pawh duh  lo ka ni a, duhzawk dang neih chuan fair taka inthen mai hi ka duhdan a ni bawk. 

Zorina hi kei aiin kum 4 in a upa zawka, high school kan kal laia kan senior thin niin, high school kan kal lai chuan ka ngei zawng tak a ni thin. Badminton leh basketball a thiam vangin hmeichhe ho star rawn a ni a,kei khan engvanga ngei tlat nge ka nih ka inhrechhuak zo tawh lo. Ka pawi a sawi ti dawn ila biak pawh kan inbe ngai lo hial zawk si.. A luck riau kha chapo tiin ka ngei ve ngawt anih ka ring ta ber. Sport a theih mai bakah lehkhathiam pangngai tak a ni a,Doctor emaw Engineer zawk pawh a nih ka rin laia LLB a lo zir daih tih ka zirlai zir zo a advocate tak tak ni tura tih ngai ngai zawng zawng ka tih ve hnu lawkah ka hriaa, high school an chhuahsan hnu a ka hmuh leh hmasak berna a ni bawk. 

High school kal laia ngei viau thin e ti loin eizawnna inang kan han neih takah chuan awlsam tein kan inngaizawng ta daih mai. Ka lo ngei viau lai khan ani hi chuan min lo hre vak lo thunga. Kan upa ber dawt erawh a classmate a nih vangin a lo hre chiang viau. Kum khat vel kan inzui hnu-ah Judicial service-ah tlingin tunah hian Lunglei-ah a post meka, amah hi hmeltha han tihchiam tur ni lo mah se hna thiam tak leh midang ngaipawimawh thiam chi a nih avangin kan eizawnna anga eizawng ve tute zingah chuan langsar chi a ni a, kan hna kaihhnawh lama ka hmelhriat tamzawk te chuan kan inngaizawng tih an hre vek ang tihtur a ni.

“Naktuk zing chu ka rawn inkhel ve dawn mawni? Kal in tam thin em?” tiin zanah ka cousin ka biaa,”Khua a vawh tehreng nen rinai takin kan thahnem ve viau zel. Khelh nawn hman kan duh chuan dar 6ah tal thlen angai ang” a rawn ti a. “Ka lo kal dawn chuan zanah ka lo hrilh chiang ang che “ tiin ka hrilh hnuah phone ka daha. Tlaia ka haw paha pangpar ka lei haw khawiin ka buai zuia. Nu lo viau e ti lo hian pangpar ka lawm ve tlat. Ka mut meuh chuan dar 10 a hnai thuak tawh. Mu chungin Zorina nen kan inbia a,a buai theih zia ka hrechiang ve tawk bawka,chhuna kan inbiak miah loh pawhin ngaih loh lamah ka ngai lem lo. Zan mut dawnah erawh ngei ngeiin kan inbiaa,kan mimal pawimawh atanga hna lam thlengin kan sawi dun theia,kan inngaizawng rei ve ta deuh bawk nen thian kawmin kan inkawm tel a. Thil ka share nasa viau. Ani erawh mipa a ni a,mipa hi chuan thil an sawi tam lo tlangpui veka,ani pawh hian an chhungkaw chungchang phei chu min hrilh zen zen lo. Kan tum ruk dan chuan kumin November vela inneih tum kan ni a,chutihrualin ka u sawi ang khan eng emaw hlekah then mai duh chang ka la nei fo tho.

Ka ngaihtuah vang vang hnuah inkhelh ai chuan kawngpui dunga ka theih ang anga tlan ka thlang leh ta zawk. Ka kal leh dawn lo tih msg in ka cousin ka hrilh hnuah rei phone khawih tawh loin ka muhil ta thuai. 

Ka alarm riin min tiharh a,la hma in vawt eng ang mah se ka thawh ngei ngei a tul miau maia. Vawt ti a khur hlak hlak chungin ka tho a. Ka inpeih hnua ka chhuahthlak chuan nimin lam ang bawk khan kan veng leh veng thenawm inrinna laiah Drugs addict ho an lo awm leh far tawh..A vawh tehlul nen hian a turtu a na ngang chu aniang a, vawt tih hmel tak tak si an tho hma peih em mai. 

An awm khawmna ka pelhthlak hnu lawkah nimin lama ka hmuh tawh Tlangval la upat hmel vak lo tak,cher sang lam,fai veng vawng leh hmel pawh chhe lo tak ka hmu leha.Nimina kan intawhna hmun ngaiah tak kan intawk leh chu mak ka ti viau. A landanah exer la a ni lo tih a chianga, hnathawk tur pawh a ang chuang lo. Adidas chapal rawlhthawt bunin mawza var thianghlim fe mai a bun bawka, Jogger pant dum leh kawrlum dum hain lukhum phiar a khum bawk. Han en mai chuan drugs addict hmel pawh a pu chuang lo bawka,engtitura zingkar khawvawt hnuaia teichhuak nge a nih ang tih ka ngaihtuah zui zauh mai.

Thlakhat  zenzawn tuktin ka kal ve tauh tauh hnuah kan veng bul chiah, kan in atanga ke a minute 10 kal lekah Gym thar an hawng tih ka hriaa, ka thiannu cousin ta a ni nghe nghe. Innel lem lo mah ila hmel erawh kan inhre ve a. Ka thiannu nen thlathar tir-ah kan inziak lut ve a. Hawn thar hlim chauh mah nise kal kan thahnem ngang mai. 

“MOrning…tukin chu i tlai nge kan tlai aw?” ka tih chuan “ i tlai aniang” nui chungin min ti a. Abak inbe zawm lem loin kan inkalpel zui mai. “ tu nge a?” ka thiannu-in hawi let zak zak pahin a ti a. “ ka hre lo” ka tih chuan “ eng a? I hre lo maw? Ti nge i biak ringawt si a?” tiin min zawt nghal duah.

“Zawhna i va ngah tak’ ka tihsan leh mai. “I be bawk sia, ani lah khan a hriat hmel bawk che si” ala ti ta..

“Exer laa ka kaltirh atang khan zingtin angaiah deuh chat chat kan intawka, thla khat lai han inhmuh tuktin takah chuan kan inbe ve tawp anih kha,a hming pawh ka hre lo” ka ti a. .” Dangdai thei thin, nang tak hi chu aw” a ti nang nang, “Dangdaina pawh a awm chuang hleinem, tikhan i hmu ve tuktin anga, nangpawn i hmuh loh chuan mak iti zawk mah ang” ka tihsan leh mai.

Ka sawi ang tak tak hian thla khat tehmeuh chu tuktin kan inhmu tawha, kan inhmuh tirh lam kha chuan kan inkalpelh dawn reng rengin hnuailam a en tlat zela. A rei hnu erawh chuan min en lo mah se hnuai lam a bih ta lem bik lo. Ngawirengin kan inkalpel mai thina, kawngfal lai leh damdawi rui ho awm khawmna bul lawka tawk thin ka nih avangin eng emaw tawhsual palh theih lakah min veng niin ka ngai deuh nge ni? ka thla a ti muang ru riau tawh.

Ni a liama, thla thar kan chuangkai leh ta der. March thla a nih takah chuan khawvawt pawh a zia ta a, chhunah pawh kawrlum ha peih kan awm lo chho leh tawh. Zan lam boruak erawh a nuam tawk viau. Thla thar atanga ka gym kalpuinu-in min thulhsan leh tak avangin keimah-in dar 5 leh a chanve velah ka chhuk thlaa, nidang ang lo takin tuktina ka tawh thin ka tawk ta hauh lo. Mak deuh maiin ka rilruah a awm deuh tlat pek. Darkar hnih dawn gym-a ka awm hnuah ka haw a,kan veng luh dawn hnaih Drug addict ho awmna ka thlen chhoh chuan ka tum loh deuh maiin ka mi tawh thin pa kha an zingah a lo awm ve tih ka hmu ta nawlh. Zingkar hma taka chhuak ziah a ni a, Eng nge atih thin ang tiin ka hmuhtirh phat atang khan ka lo ngaihtuah tawha, drug addict ka hmuh thinte nen an inzui lai emaw an inbe lai takngial pawh ka la hmuh loh avangin an zinga tel ve a nih ka lo ring eih lo. Mak pawh ka ti viau.

Nilenga hnaah kan buai hnuah chau hnepin in ka thlenga, thalai inkhawm zan anih avangin chawei kham veleh chaweina pawh sengfel mumal hman loin inkhawm turin ka insiama, ka pa hian inkhawm kal tlai a phal loh thin avangin inkhawm zanah chuan zanriah kan ei hma tlangpuia. Zanin erawh ka nu-in chaw a lo chhum theihnghilh avangin kan tlai buai ta deuh.

Zorina lo phei lai anih avangin zan inkhawm banah a rawn lenga, ka chhungte nen pawha inpawh tawh tak annih avangin ka chhungte nen an titi luama. Thingpui chawia ka va phei lai takin ka u -in kan veng leh veng thenawm te inkara Drugs addict ho awmkhawm thin te chunga YMA lamin hmalak an tum thu a lo sawi meka. Ka rilruah zing kara ka hmuh thin pa kha a lo lang zawk.

“Tuktin i kal thla bawk sia, Addict ho i hlau lo em ni?” ka thut ve hnuah Zorina’n min lo tifiama.

“Hlau hran nang, an rui tih mai loh chu misual anni tihna pawh a ni chuang hleinem” ka ti tha ve mai. “A dik alawm, mahse damdawi ruih ching ho hi buaithlakna tak an neia, Zu ngawlvei hi chuan rukruk hi an ching lo viaua. Drugs addict ho hi chuan an ching tlangpui vek mai. Hei tak hi amak ngawt mai” a ti leh duaha. Kan hna thilah hian damdawi rui ho leh a zuartu thlengin mikhual anni lo. Buaipui pawh kan buaipui nasa a, thil ho te te thlengin an ru duh vek emaw tihmai tur anni.

“Pu Sanga fapa pawh nizan khan an rawn la leh a, an kawmthlang te zawngtah a lo hawlhthla zo vek ni tur a ni” ka u-in a ti a. “ awi, a va ho tak..chungte mai mai chu aman inpe se la a nimai alawm mawle” ka nu-in a lo ti vat. 

“Pu Sanga te zawkin tang se an duh anih hmel. Zawngtah neitute lam chuan an ngaithiam viau a,mahse a chhungte khan Jail-ah awm se kan hahdam ber an ti tlat mai sia” ka u -in a ti leh a. 

“Engtin nge khulaia awmkhawm thin ho chu tih intum a?” ka ti zauh. “Veng thenawmte nen kan inbe rawn leh phawt anga, kan umdarh mai ang chu. Kan veng area chauh a ni bik si lo va, anni lam kan nghah phawt angaia. Khulai kawnglun lai takah kher khuan an awm luih luih zel maia, in awm lohna lai pawh nise kawngpui kam mai a nia, a zah pawh hi an zak lo ania” ka u in a ti leh duah.

“Zah ngaihna pawh an hre lo aniang chu. Mamawhna a nasat chuan zah alang vak lo ang..’ ka ti nghat. Zorina’n min lo pawmpui ve thuaia. Anni pawh hi a Patea fapa addict pakhat an nei a, colony a awm annih avangin an colony pumpui hian an buaipui a ni deuh bera. Keini aiin Drug addict kawl buaithlak zia a hre chiang zawk tih ka hria.

“Eng lo, kumthar hlima exer ka lak tirh atang khan tlangval pakhat hi an awmkhawmna thlang kawiah tak khuan ka tawk tuktin maia, a awmdan velah hnathawk leh exer la a ang bawk si lo a. A kal hma thei bawk si, kan inhmu ziah nangin Biak chu kan inbe ngai chuang lo a, tukin khan ka tum loh deuhin addict ho zingah a lo awm ve reng tih ka hmu a” ka ti leha.

“A la ti tir aniang, nakin lawkah chuan khawlum vanglai takah pawh mawza bun reng leh meng mang lova a kal i hmuh thuai dawn chu” ka u in nui chungin a ti a. A sawi dik hmel viau. Kawngpui bul maia awm tihtakah meng mang lova kawng an kal lai hi kan hmu awl lova, meng mang lo e ti loin an inpal thlu bik chuang lo va, Motor pawn an su ngai chuang lo.

Hun a kal bek beka,tunah chuan thal khawro ngawih ngawih hun liam-in thli tleh a hun chho a,rinai takin ka exer lak ka tuipui chho ta. Zing lamah ruah a sur vanga ka ka thei lo a nih pawhin tlai office ban hnuah tal ka kal ziaha. Tlai lama ka kal chuan ke a kal loin schooty ka keng mai zel thung. Kan veng YMA leh veng thenawm YMA tangkawpin damdawi zuar leh rui thinte an um darh titih tawha. An awm na thinnaah khan an lo awm a nih pawhin a tam berah pahnih thum bak an awm tawh ngai lo. 

“Ka phone ka hmu miah lo. Gym-ah ka theihnghilh nge pawh ka hre lo. Khawi i phone” ka nu hnenah ka ti a.

“Ka charge kha,i va mak thin e aw. Naupang te si hi i haihawt em em mai a” a ti bal bal.

Ka number thai chhuakin ka call nghala,ka room lamah ka lo dah takin tiin a rik leh rik loh ngaihven rengin roomah ka luta. A inring reng nain inchhungah phone ri a awm lo.

“Tu emaw tal gym lamah biak tur i hre lo mi? Hriati’n a cousin a be thei ang chu” ka u in a lo ti a. Hriati ka call a,a pick-up veleh ka phone ka theihnghilh leh theihnghilh loh kan gym neitu hnena min lo zawhsak turin ka ti a. Reilote-ah min rawn call leta, locker zawng zawng nen an en vek hnuah pawh an hmu lo tih a rawn sawi a. Ka mang a ang tan ta.

“Kawngah i thlauh te a ni lo maw?” Ka u in a tih chuan “ka jacket ipte a thuk lutuk, thlauh ka ring lo” ka ti deuh tlat si.

“Kawngah i thlauh aniang.Zuk zawng ula, inkhawm zan a ni chuang lo bawka,chawei a hmanhmawhthlak hleinem. Valpui, zuk kalpui rawh. Khua a thim tawh bawk si,amaha kal chi a ni nang” ka pain a lo ti ve a. 

“I va han che fel lo thei tak e aw. Han call leh teh, a la ring thei em? Khunglai kawngdung te chu addict ho vei tamna hmun ania,lo chhar pawh nise an sawi duh dawn mi?” ka u in a ti bul bul.

Ka nu phone bawkin ka phone leha, vawi hnih a ring hman tihin an pick-up ta hlauh mai. 

“Hello.. phone hi ka chhara” mipa aw hian a rawn ti nghala. “Ooo,khawiah nge i awm?” tia zawh pahin ka phone a nih thu ka sawi nghal zung zung. A awmna lai a rawn sawi chu kan in thlang lawk a lo ni lehzel. 

“Khawngaihin lo awm la, kan in bul mai ania. Hei ka lo chhuk nghal ang” ka ti leh zung zung. Ka chhungte zawhna nei hmelpu a min en thaptu ho bulah chuan an chhar thu leh a chhartu pawh kan inthlang maiah a awm mek tih hrilhin phur takin ka tlanchhuak ta thuai.

Kan inthlang lawka Motor ke siamna dawr bul ka thlen thlak chuan mipa pakhat ka awm lohna lam hawia  lo ding ka zuk hmu a. Ka number a ka call leh chuan a phone kenlai a en tih ka hmu thei.  A pick-up hmain ka off a, kawng kan chhoin a bulah ka han dinga.

“Thianpa,keimah ka nia” ka tih chuan a rawn inher thuaia. Ka rin loh tak hian exer laa ka kal tirh lama ka hmuh tuktin,tlangval cher sang lam kha a lo ni reng mai. A mitmengah chuan  Ruih a nei tih hai rual a ni lo. Ka hmuh lohna a rei tawh viaua,tunah chuan ka u in a hmaa a lo sawi lawk tawh ang ngei khan en mai pawhin addict a ni tih hairual a ni tawh lo. 

“Ehe… nang maw?” Ka ti nghal hluaia. Ani pawh a mengphawk ve tho mai. 

“Hei aw” engmah thildang sawi lo hian phone min pek pahin a ti a. Ka lak rual rualin kalsawn a tum nghal chu a ni der. 

“Lawk,thianpa.. engmah lawmthusawina pawh ka la pe hleinem che” ka ti thuai. “Engmah a ngai lo” hnuai lam bih chungin a ti leh ta tlat. “Aaa,chutiang tur a ni hleinem.. “tih pahin ka kekawr ipte atangin ka pawisa ah lai cheng 500 ka lachhuaka. Diktak chuan he pawisa hi ka nu in archaw leina tura min thawn a ni a. An lo inkhar tawh vanga la-ak mai mai ka ni a. Ka phone an chhar tih ka hriat khan ka lawm em em ringawta, mit var man pek tur tih lam ka ngaihtuah thleng lo. Ka nu pawisa ka lo la ak hlauh hi ka vannei. 

“Engmah angai lo. I hmu leta,a lawmawm animai” bah deuh nak hian a ti a. “Ni lo.. kha.. “ ka tihlai mekin kan bulah Bike ri bengchheng tak mai a rawn dinga. 

“Jona.. kal ang, kan tlai dawn a nia” pawr angreng fe hian bike khalhtu pa in a rawn ti nghal a. Ka phone min chharsaktu pa kal nghal chu ka um ve thuai. 

“Têtei ka nia, nang pawn i hming tal min hrilh rawh” ka ti leh hram.

“Jonathan” ban chet chawt hian a ti a. Bike-ah a lawna.

“Ka lawm lutuk takzet aw. Khi khi kan in a nia, min mamawh hun i la nei ve mial a nih chuan khitah khian i lo kal tawp mai dawn nia..” ka ti leh sawk sawk. Tawng loin a bu liam leh ringawt. 

Inchhung ka luh veleh ka nu hnenah pawisa pek ka tum thu leh a duh loh tih ka hrilha. 

“I vannei hle mai,addict ho zinga miin lo chhar se chuan i hmu let miah lovang” ka u-in a rawn ti a. 

“Ringawt a che. Addict a nia lawm, ka hmu let chu anih hi” ka ti nghal hlar mai. “Engtin nge Addict a ni tih i hriat?” a ti hu hu a. 

“Ka hmu fo alawm mawle. Tunah pawh khan a rui” kalsawn pahin ka ti a. “ Ngah nge maw in inhnial phah kher le? A pe let che a, a lawmawm a ni mai alawm.Chhung inkhawm nei ang u. Kan tlai lutuk dawn. Chawei khamah inbual mai rawh” ka nu in a lo ti sawk sawk.

Zorina nen ka inbual zawh hnuah kan inbiaa, ka phone ka tihbo zuai thu leh a lo chhartu nen kan inbiak dan vel ka hrilha. “I vannei hle maia,a lo sawr hman ang tih a hlauhawm a nih chu” nui chungin a rawn ti a. 

“Um,nia hlauhawm khawp mai. Mahse amah kha thil han ru duh chi niin ka hre lo. Eee,amah chu maw, hman deuha zingkar exer lak paha ka tawk tuktin ka tih kha alawm” ka ti leh hluai.

“Chuti law? Lehzel a” a ti liam leh mai. Rui viau chung si phone min pe let mak ka tihzia leh pawisa an mamawhna asan thin tehreng nen a hnar fithla thak thei mak ka tih thu ka sawi zuia. 

“Bawihi, kha kha a mize diktak tehna atan a tlak lo tih hre thiamtu zingah i tel kha. Anni ho mize tam zawk hriatpuitu kan ni tih kha hrereng la” nui chunga a rawn tih chuan sawi dik ka ti leh viau lawi. 

Furpui tak tak kan thleng chho tana,hnaah buai viau thin mah ila a remchan dan danin ka la gym chhunzawm zela. Ka bp control tuma exer la lek chauh ni mah ila nitin han insawizawi takah chuan pian a insiam chho ve ta hret hreta. Ka hmelhriat,min hmu khat deuh tu ten “i va infit ve,i lang nalh hle mai” min ti ve ta fo. 

“Miss,tukin chu hei  rawk kan tawk tlat mai. Hawn hlima rawk tawk tih inhriat chu mood a uih duh khawp mai”gym ka thlen veleh kan trainer in a lo ti a. 

“Ehe,a va han zia lo ve. Thilbo a tam em?” phawk deuh tak hian ka ti a. 

“Ka la hrechiang maithei lo a. Dumb bell thenkhat hi chu a bo ngei a”tih pahin Dumb bell dahna a kawka. “A va pawi tak. Engtin nge maw luhna chang te an hriat ni?”ka ti nang nang. 

“Engmah tichhe loin an lut a,tala pawh an lo khai fel leh thana. An che profe khawp mai” a ti leh nung nung. 

“Rukruk hrat tak aniang a” ka ti ve ngawt. “Nia,Tunlai chu addict an pung vak emaw tihmai tur hian kawngdungah hian an tei kual reng maia. Chung ho chu an nih ka ring. Locker lamah dah i nei em?” min tih chuan ka neih loh thu ka sawia. Kan titi dun lai mek in nitin ka hmuh ziah pa sek pui mai hian “ka locker chhunga ka bungraw ho an bo anih hi. A ho hle maia” a rawn ti lung lung.

Thenkhat hi chuan an pheikhawk leh exer laknaa an hman thin,mahni puala an neih te nitin ken bawr ngai loin an mahni locker-ah dah mai thin a. Chahbi pawh an hawn thei vek.Kei hi chu tui bottle leh phone tihvel bak keng ngai lo ka ni a,locker pawh ka hmang ve ngai lem lo. 

“Cctv kan en anga,a rutu a  lo lang mial maithei ania. Ka la en hman lo va” trainer in a ti thuai thuai. Midang dang an lo kal belh zela,an locker an han check sap sapa,bo a lo awm nual mai. 

Tukdang ang lo takin kan boruakin a zir lo bawka exer la tha peih pawh kan awm lo. Thil bo sawi khawmin kan titi khawm luai luai maia, mimal bungrua chang lo,gym bungraw bo a awm nual bawk si nen kan phawklek a ni ber awm e. 

“Chahbi dahna hretu zing ami annih i ring em? Hre tu hi kan tam vak lo nain mize thing deuh an lo awm ve thei ania” Rozama’n ka bula lo thut ve pahin a rawn ti su su.

“Ka hre thiam lo. Tumah hi chutiang han ru duh an awm ka ring chiah lo,cctv a awm tih kan hre vek hlawm bawk si” ka ti let a. “A ni ve leh tho bawk si,mahse chahbi dahna hre tu chu anni chiang tihna ania. Kawngkhar engmah karchhe lo lehnghal”a tih leh chuan pawmpui takin ka bu nghat nghat.

In ka thlen hnu lawkah ruah a rawn sur ta chiam. Hna kal tura insiam pawh phurawm loh tak a ni. Thulh ngawt theih lah a ni der bawk si lo. 

Nilengin hnaah ka buaia,phone khawihna hun pawh ka nei lo. Haw tura ka thiannu nen parking lam kan pan laiin phone call a lo luta. Min rawn call tu ka en chuan mak ka ti deuh hlek. Rang takin ka pick-up nghal thuai.

“I buai lai a la ni em?” a rawn ti nghala. Ka haw dawn mek tih ka sawi a. 

“Msg i en thei si lo va,i buai aniang ka tia. Ka inthlahrung viau nangin ka rawn call ta tho che”a ti leh te te. Number te insave tawn sakin nitin gym-ah inhmu mah ila inhmelhriat tha satliah bak kan ni lo va,phone call phei chuan kan inbiak vawikhatna a ni hial ang.

“Nia,vawiin chu kan buai ve deuh hlek a,eng nge ni ta?” Ka ti leh a. 

“Tukin lama min rawktu ka tih kha thlalak ka rawn thawn che a. Hriati khan i hmelhriat a nih maitheih thu a sawia, i lo en hman hunah min lo ensak la” inthlahrung aw deuh hian a rawn ti a. 

“Ooo,chuti law? Lawk aw.. ka’n en nghal ange” tih pahin a thlalak lo thawn ka en a. A fiah lutuk lo naa tu nge anih ka hre thei tho. 

“Ka hmu e,mahse amah hi hmelhriat han tih lemah hre tak tak lo ang kha ka nia. Khawi lam mi nge pawh ka hre chuang lo. Ani hian a ru tihna mi?” ka ti nghal duah. Zawhna ka ngah viau mai.

“Aih,video ka lo thawn che kha hun i neih hunah lo en la. Video-ah khan a lut zawk tak chu a awm a. Mahse,thlalak a ka lo thawn che nen khan inzui chawt anni tih an sawia. Tu emaw zawk zawk pawh kan hmuh chuan a tihzia dawn em a. Hriati’n i hmelhriat a nih thu a sawi takah khan ka rawn hrilh ve tawp mai che” ani pawn a rawn ti ve duah mai.

“Anih tak chu,ka hmuh lohna a rei tawh angrenga. Ka lo hmu hlauh anih leh ka hrilh dawn che nia” ka ti a. “Aw le,Inveng tawpa addict ho awmkhawmna velah khan ka han en a. Ka hmu mai lo va, naktuk lama i lo kal pahin min rawn enkual pah sak la tiraw” a rawn ti leh mawlh mawlh.

In ka thlen hnuah video min rawn thawn ka u ka entira,ani hi YMA tlur leh ruihhlo dona kawngah pawh thawhhlawk tak a ni a. Khawtlanga mi awm tha lo ho pawh hriat loh a nei mang lovang tihtur a ni.

“Lalthana a ang khawp mai. Home lamah a la awm emaw ka tia, an veng te kan zawt ange” a ti ta chat. Reiloteah eng eng emaw chu a hre thei ta mai. “Home atangin a tlanchhuak chu an tia. An in lamah phei chuan a haw lo aniang. Han ringhlel chhin phawt se la. FIR te an thehluh chuan ani kha zawng se la a fuh maithei” a tih chuan kan gym neitupa phone nghal ka tum zet nain ka phone leh ta lo. Ka u hnenah khan JOnathana kha ka entir tel hauh lo va. Diktak chuan thil ru tur chuan rin lohna ka nei tlat a ni ber. Achhan pawh a rui em em chung khan ka phone a chhar kha a hralh ral mai mai  lo va, min pe let leh tlat. Khavang tak khan thil han ru tur atan chuan ka dah chiah lo va, tul lo tawpah thil tisual lo tu kan mantir ang tih ka hlau ta tlat.

Zingah ruah a sur loh avangin ke -in exer la tur ka kal thlaa, addict ho awmkhawma lai ka thlen chuan kal pel ta mai loin ka pan hnaia, inthurual ang maiin min rawn en ta thap mai. Nidanga kalpel mai mai thin khan ka pan hnaih tak thutah chuan mak an ti tih ka hai lo.

“Min lo hrethiam lawk, Jona hi tukinah a lo kal em?” tiin ka va zawt teh ngawt. “Tu Jona zawk nge? A te zawk nge a lian zawk?” an zinga pate ber leh upat hmel ber lawi si chuan a lo ti thuai. 

“Ka hre lo..ka hriat Jona chu cher sang lam,ngo fai deuh hlek ania” ka tih veleh an hmelah chuan an hria tih ka hmu thiam nghal mai.

“Jona lian zawk anih chu. A lo kal lo, a lo kal vak ngai tawh lo” min chhangtu ngai bawk khan a lo ti leh thuai. “Aw le. Ka lawm e” ti a kalsan mai ka tum laiin ka rilruah zawhna dang zawh tur a lo lang leh ta tlat. 

“Anih leh Lalthana an tih nen khan an la inkawm ngai em?” ka ti leh ta..”Kan hre miah lo” an ti ta tlat. Hre lo inti mah se an hria tih an mitmengah ka hai lo, mahse an hre lo an tih chuan zawh luih talh ka tum bik lo.

Gym ka thlen hnuah an titi vel atangin mi thenkhat ten Lalthana kha an lo hre ve tho tih ka hre ta a. “Pakhat kha Jonathan-a ania. Lalthana cousin kha niin ka hria” mipa pakhat-in a ti lar lar. A bula thu-in “ engtin nge i hriat a? In veng te em ni?” a lo ti a. Helai hmunah hian nitin inhmu hlawm mah ila khawi veng nge annih tih lam ka lo ngaihven hlawm vak lo va. Hriat pawh ka hre lo viau reng hlawm. Anihna takah chuan an la naupang sap sap hlawma, ka rualpui tur awm te chu awm ve bawk mah se an tam lo. Tute pawh be thei vek mah ila thian han tihtur chu ka nei chuang lo.

“Aw, ni e..Lalthana ni fapa an ti tlatin ka hria,kum 2 atanga kum 3vel bawr chu an awm tawh maithei. A pa pension hnuah kan vengah an rawn insawna, an sawi dan chuan Jonathana vanga rawn insawn kha anni nghe nghe awm e. A damdawi ti nasa lutuk leh insual hrat lutuk vangin an vengah nuam an ti lo tih vel te an sawiin ka hria.Nih te pawh a ni tak tak ang, An in pawh veng mawngah daih ania a awm. A pa leh a u mipa te hi chu inkhawm thulh mang mang lo annih avangin kan hre viau hlawm a ni mai. Veng mawngah fal tawkin compound zau deuh neiin an awm a. An harsa vak lo bawk nen nawm chu a nuam phian ang” a ti leh zat zat.

Zan inkhawm ban,hla zir tura kan luh hma siin Hriati nen kan ding dun a, “thil rutu te kha an man tawha, pakhat zawk kha hmana zinga i biak kha tiraw?” a tih chuan ka bu ban viau. 

“Mak ka ti lutuk, ka phone a lo chhar khan tha takin min pe let maia. Thil ru chi ni turah pawh ka lo dah lo va” ka ti a. Hei kher hi chu ka sawi lo thei thin lo.

“Oooo,amah kha a smart reuh em kha. Phone te chu lo hralh pawh ni se awlsam takin a chhui chhuah leh mai theih dawna. Amah an man mai dawn asin.Chubakah nanglah Advocate te i lo ni ve a. I phone a pe let che kha chu amak hleinem. A rinawm vang ni loin a at loh vang mai mai anih kha” a ti ta tlat. 

“Eng hna nge ka thawh a hre awm lo em mai” ka ti ve thung.

“Hre awm e. Kan veng addict ho nen pawh an inkawm vek dawn tihna ania. I phone a chhar pawhin in inthlang lawkah a nih kha a lo nghah che. I chanchin a lo hre ru kiau tihna animai. Heng ho te chu an duh naah an fing phakar lutuk ringawt. A thuhrimin nangmah lo hre lo tehreng che pawh nise ka sawi ang khan phone bo te chu chhui a har tawh lo tih a hre ve animai. Eng nge maw khavang mai mai khan i ngaih fel nghal ngawt ni?”  ngaihdan ni vak lo awm tak hian a ti ta duah. 

“Aaaa,ka hre thiam tawh bik lo. Amah kha ka rin zawng aniang. Tunah pawh khan a chhungah a lut ve lo bawk nen a rukpui tihna a ni lo a” ka ti ve leh tlat. 

“Awii,ka sawi peih tawh lo. Pawnlamah mi lo kal leh kal loh en in a lo duty te pawh aniang chu. A fing phakarah ngai rawh. Lut ang, k’u Biaka’n min lo melh rum ang” a ti zui zat. 

“Zaii,tihtur ka hrilh che kha i la zo lo em ni?” kan pu berin a rawn tih chuan Zaii’n a tih zawh tep thu in a lo chhang thuai. Kan boss mood fuh loh ni niin tawng ring ngam pawh kan awm lehpek tawh lo. 

Dar 2 rik dawnah thil ei turin Zaii nen kan inzuichhuak thei ta hram. Chaw ka ei tam loh thin avangin thei eng eng emaw tlem tal ka pai thina. Vawiin erawh chu ka siamsa vek nangin ka ken theihnghilh peka. Nidang ang chu nise office thlen hnuah pawh lei turin ka chhuak leh mai anga. Vawiin erawh kan pu mood a fuh leh tlat tawh si lo va, chhuah ngaihna awm hek lo. Ka tamchhawl lek lek a ni ber tawh. 

“Mipa ve si,mood swing nei nasa leh lutuk hi ka hne ve thlawt” Zai’n a ti bal bal.

“Tawng ring suh,thli thawin i tawng kha a len palh anga,a lo hria ange” nui chunga ka tih chuan min ner khum chungin “ in chhungte mah ni se ka rel lo thei lo. A mize pahnih hi an over ve ve. Fel leh fel uchuak, mood fuh loh leh fuh lo over” a ti leh tan tan.

“Kan inchhung hla tawh e, rel phar vek mahla a pawi hleinem. Tak takin a  period dawn a ni maithei asin” fiamthu bawk hian ka tihsak leh a. “I ninawm” nuihza si la thinrim si hian a ti hlak hlak. Tu emaw zawk zawk pu laka kan thinrim chuan hetiang hi kan inbiak fo dan a ni a,han thinrim chiam thin mah ila hna a thiam ngang si a. A mood fuh loh ni aiin a fuh ni a tam zawk bawk si nen rel rel thin mah ila  midang bula thawh ai chuan ama bula thawh hi kan la thlang zel tho.

Office atanga ka haw pahin Vaivakawn Police station-ah ka thiannu tlawh lawk turin ka penga. SI niin Vaivakawnah hian nikum kumtawp lam atangin a rawn awma. School kal lai atanga inkawm chawt, inngai tak mai kan ni a. Aizawl lama a awm loh chhung pawhin phone a inbe reng, thuruk thlenga inhrilh thin kan ni a. 

Aizawla a rawn awm leh takah phei chuan kan inhmu zing leh viau tawh.

Kan titi dun mawlh mawlh laia a nauten an miman an rawn luhpui chuan “ ka kal dawn, in buai chho dawnin ka hria” ka ti nghala. 

“La kal lovang, heng buai te chu buai tak tak a ni hleinem” nui chungin ti mah se kal ka tum tho. An miman an rawn luhpui te chu kal pahin ka va thlek kher peka, ka tum loh taka an zinga Jonathan-a lo ding reng ka va hmu ta thut mai chu ka phu deuh zawk a ni ber.