KA NEIHCHHUN(short story)

 

Ka neihchhun…

Short story

Ziaktu ; Maengi Ralte

Ka hmaah tak ka pasal,ka thawnthu ngaihthlak meka a changtupa pianzia leh hmela inanna reng reng nei lo a rawn din thut chuan phawk zet hian ka en a. Kut zaizir hian ka beng a kawka, a hmelah chuan ninna a lang chiang viau. Rang tak hian ka thil ngaihthlakna ka benga ka vuah ka la thla nghal thuai.

“Eng nge a?” ka hmunphiah lai tawpsan hian ka ti nghal a. Min chhan hmain “towel huh kha khumah kalsan tawh suh” bak angreng tak hian ka ti leh hlaka. A ner nawk. “I beng hnawh tawh suh ka ti nilawm ni? biak hrethei reng reng lo zel mai. Ka nin zawng tak a ni” bak tuk hian a ti ve thung. Nia, a sawi zing lutuk, a sawi zat ka hre seng tawh lo zawk. 

“I kal daih tawh emaw ka tia lawm mawle” hawisawn pah hian ka ti a. Ka hmunphiah lai ka phiah chhunzawm lehnghala. 

“Ka charger khawiah nge?” a tih chuan “ka hre nang, i dahnaah a awm ang chu” ka tihsan mai. “Awm se ka zawng nang mawle aw. I dahtha leh tawh mi? “ a ti leh a. Chhan pawh chhang lo hian hmunphiah kengin room lam ka pana. Room ka va luh rualin khum bul lawka thil eng eng emaw dahna atana kan hun cabinet lian vak lo chungah a charger ka va hmu nghala. Thinrim tak hian ka la a, kan pa room chhunga rawn lut mek chu en in,”hei hi i hmu lo amaw? I mitin i zawng lo tihna mi?” ka lo ti nghal hlar mai. Khumah charger ka vawmthlaa. 

“Ee, i va hmu awlsam si ve. Khawiah nge i hmuh a?” nui deuh chung hian a ti a. “Ka sawi peih lo. Engmah zawng hmu thei reng reng lo mai. In pa fa hian engpawh zawng ula ka tel ve zel ngai ringawt mai. B-a,Khumah towel huh dah suh ka tih zawh chiah che kha…” ka ti nghal deuh vaka. “E, ni tak” tih pah hian rang vut hian khuma towel huh a vawmthlak zawh chiah a la lehnghala, veranda thlang,kan room tukverh atanga karchhuah mai theihah chuan a chhuk thlak puia, a thil zawn a hmu lo ho lutuk la phun pui bawrh bawrh chung hian room atangin ka chhuak a. A tihfo danin min chhang zui tawh lo. 

Hna kal tura a chhuah veleh tv-ah YouTube ka connect te te a, kawngkhar chhunglamah ka kalha. Thawnthu ngaithla pahin inchhung ka tifaia, washing machine-ah thawmhnaw ka su pah bawka. Inchhung ka tihfelfai zawh veleh ka insuk ka tleuh leha, ka zar zawh chuan sana ka en a. Dar 12 a lo hnai thuak tawh. Hmanhmawh takin ka thawmhnaw hak pawh thlak lem loin ka sam ka tuai mam thuak thuaka, kan fapa naupang ber hruai turin hmanhmawh takin ka chhuak nghala. An school ka thlen chuan nau hruai ve tur dang pawh an lo thleng ve tawha. Nitin inhmu kan ni hlawm bawka, innel takin kan inbe thei vek tawh. Kan veng atanga kal ve pawh an awm bawk.Reipawh kan thut hmain an rawn banga, ka fapa a rawn chhuah chuan mipa naupang awm mai mai ngai lo tih takah a rawn tlan nal nala, min rawn bawh pawp maia. A kum phu loha lian leh â buang mai a ni a, Hetianga tih hi a chin avangin lo inrin deuh ran ran zel a ngai. 

In kan thlen veleh “a nu, ka ril a tam” a tinghala. A tiffin pai a ei zo vek ziah chungin in kan thlen hi chuan a ril a tam em em zel tho. Thau angreng tak a ni nain a la over weight lem lo bawka,chuti takin ei tur kan la control lo. 

Veranda thlang lama ka zuk chhuak chu kan pain a towel hman huh a pho ve ngei emaw ka tih kha a lo bang tawm tawp tih ka zuk hmu a. “A va han mak, han pho ve mai awm alawm mawle” ti hlak hlak chungin ka zar pharha. Roomah lutin a uniform awm darh nuai mai suk turin balbawmah ka daha, a pheikhawk pheikhawk bawma dah luh ka tum chuan kan pa slipper pheikhawk bawm bul chiaha lo awm ka hmu nghala. Pheikhawk bawm ni loin pheikhawk bawm bul chiah hi pheikhawk dahna tur emaw a ti niber hian ka hre tawh. Thinrim taka hauh chang pawh ka ngah a, tihian a dah zel tho.

Ka fapa eitur ka siam zawhah ka eitir nghala. 

“Phone a lo khawih leh ta, ei vat vat rawh. Home work tihtur i ngah lutuk” a lehkhabu keu mawlh mawlh pah hian ka ti a. Ka sawi hre awm pawh hian a awm lo. A thil ei leh a phone enah bak a rilru a pe eih lo. Vin angreng taka ka biak takah chuan rang deuh mai hian a ei zo a. A ei zawh veleh a plate ruak thleng silnaah a va dah ve ngeia. A ri deuh thuaiah chuan rang tak hian ka va en a. No a lo thlauh keh chu niin, fate vin loh tur tihte hi chu rilruah a awm hman tawh lo hrim hrim. 

“A tikeh leh ta, engvangin nge phone en chung khan i chet vel a? Ka vaw dawn che mawni le?” Ti hmawk hmawk pah hian ka pan pheia, chhuata no keh darh nuai mai chu a rah hlauin ka pawm sawn nawlha, sitting room thutthlenga nghah chawrh pah hian “tikhan che miah loin lo thu ang che. Fimkhur nachang reng reng hre lo mai” ka ti a. A phone ken ka laksak zui nghal bawk. “Phone hi min dil loin lo khawih tawh ngai reng reng suh, ka hlap pawp tawp ang che” ka ti leh khar khar. 

A thil tih keh ka thenfai zawh veleh a zirtur ka chhawpsaka, naupang tihtakah tun lawka ka hrawk vak vakna kha hre leh tawh lo hian home work ti peih loin a titau kual a, a tawp a tawpah chuan tawngkam thain a daih leh tawh lo. Kan invin a, kan invaw lek lek chu a ni leh ta mai. 

Home work a tihzawh veleh tv a on nghala. Insuk sengin ka thlep fel a, mipa naupang a zawnga harh ber pawl tihtakah tv en that hle hle a awm lo. Ball a pet paha. Inchhung a zau vak bawk si lo, a chang leh min rawn pet per thul. “Pet tawh suh, tv kha en tha hle hle rawh” ka tih chuan reilote chu a thu ve maia. Mahse awm hle hle hi a talent dawn a ni hlawl lo. 

A u te pahnih school an rawn banga. Anni hi chu scool bus a rawn haw thin an nih avangin hruai an ngai lem lo.

“Nu, ka ril a tam lutuk” a upa berin a tih chuan a nau pawhin “keipawh a tam. Kan tiffin pai kha a tui lo lutuk. Alu chop chu min pai tir tawh suh” a lo ti a.  Buai reng renga siamsak nak alaia chutia a ti chu ka lawm lo nasa mai.

“Eng nge a tui lohna? Nidangah pawh i pai ziah alawm.engmah siam thei der si lo, sawisel zet zet zel mai” tih pahin a tiffin a rawn ken phei chu ka lo laksaka. Kan hawn chuan engtham mah a lo ei lo tak tak..A u zawk tiffin ka hawng leha, ani chuan a chanve vel a lo ei a. Nidangah lem an duh thei viau si. Ka siam fuh vak lo a nih ringin ka temchhin a, a lo al em em mai chu niin.  Ka hau deuh ngawt kha ka inthiam lo nghal chu a ni leh mai.

“A al lutuka ka ei thei lo” u berin a rawn ti a. “Chi ka al nawn a nih dawn hi” ka ti a. Kan pa khan office lamah a pai ve lehnghala. Chi ei tlem tak a ni a. A ei lo chiang khawp ang le. 

An eitur ka siamsak nghal thuai thuaia, an eizawh veleh homework ka tihtir zui leha. Eirawng ka bawl pah bawk. A u ber hi chu hmeichhia tihtakah kum 8 chauh a la ni nain a fel angrenga, lehkhazir tura tih vak ngai loin mahniin thahnemngaihna chang a hriaa. A nau te pahnih erawh chu vil deuh chawt an la ngaia, mipa ve ve leh harh em em mai an ni a. A khattawkin an inti tapa, thil ho mai mai an inchuh a, thil tihchhiat an nei reng mai bawk. Inchhung chet leh thuchhe rem reng reng hian nitin hun ka hmanga, zingkar atangin buai reng rengin ka awm a, an vaia an chhuah veleh inchhung an tihhnawk thianfai leh insuin ka buaia, an lo haw atanga reiloteah an tihnawk lehnghal vek a, eirawngbawl a lo hun chho leh nghal mai zel bawk si nen, thawk lakna hun hi a awm meuh lo thina, zaidam sen pawh hi a ni thin lo.

Kan inneih atanga kum 1 naah inhrang changin kan chhuaka, pasal ka neih hma atangin private school-ah ka inhlawh ve thina, mahse kan inneih hnu lawkah ka rai tak mai avangin kan pain chawl turin min ti a. Ka naupai ka hrisel lo chho nen chawlh duh loh tlat theih pawh a ni lo. Kan fate hi a upa ber kum 8 niin a te ber kum 4 a ni a. Chhangchhe ve tak kan ni. Inluah man leh ei leh in bakah an school fee zawng zawng nen kan pa hlawh atang veka pek angaih avangin sum kan ren em em a. Ani lah hna sang tak thawk a nih bik loh chu thuhran,a nghet lo a la nih avangin a hlawh a tam hran lo a. Kan khawsakna tur pawh kan indaih mang loh laiin a khattawkin kan pa chhungte lamin duh an rawn nei awl lo a. Kan pa hi nu leh pa zah chi a ni a,unau zinga upa ber leh a hminga sawrkar hnathawk awm chhun a nih avangin inhrang kan chan hnuah pawh an thil mamawh an rawn sawi chu tihsak tum em em tawp a nih avangin kan chhungkaw tana a buaithlak chang a tam thin. Eng emaw chang chuan lawm loh tum ka nei  lo thei bik lo a. Ka mo chhung khan langsar si loin ka nu leh kan pa  farnu pakhat nen neuh neuh kan nei a. Tun hnuah erawh pasal chhungte mil lo nih ka duh loh em avangin lawm lo chung pawhin ngawih ka chuh ve thin a, chhungkua kan harsat zual lai taka pawisa puk min rawn dil chang erawh chuan ngawih harsa ka ti fo.. An pawisa puk lah min pek leh aiin pek tak loh a tam zawk zel bawk. Keiin Hna han zawng leh turin naupang an la te a, ka tan tihngaihna a la awm rih si lo. Pawn lama hnathawk lo pawhin fa naupang te te pathum enkawl leh inchhung chet nen ka buai ve tawk a. Kan pa hian in a awm chang chuan min pui ve thin tho nain mipa na na na chu hmeichhia angin inchhungah thil a ngaihtuah kim lem lo a. Kan fate sulhnuchhui ngai mai piah lamah amah pawh hi pa chefel thil thlep lo chi a ni a, keilah engkim mai a hmun taka dah thlap thlap duh chi ka ni si, a chapal thutthleng hnuaia a lo nawr luh ngawt vangte leh a inkhawm bag sitting room thutthlenga a dah vanga ka an hmuar hmuar chang tam tak a ni. 

Kan inluahna te hi kan pa chhungte an ni a, ram an nei zaua, kawmthlang huan pawh zau angreng tak an nei a. Thlai puiting sa an dah bak chu engmah ran han vulh vel an ti ngai lem lo. Kan fate ber kum a tlin hma deuh atang khan vawkvulh nan ka dil a, an lo phal hlauh maia, tunah hian vawk 4 kan vulha.  Pakhat hi kan inchungte vawk kan vulh hlawh niin a bak pathum erawh chu kan ta a ni thung. Atirah kan pain “naute enkawl bakah a u te enkawl nen, a tul lo em mai” tiin rem a tih loh deuh avangin vawkte pawh keima chhungte lamin min leisaka, “naupang school admission tur tal pawh a lo tum ve theih takin” tiin ka tilui ve tlata, vawkte ber ka nu ten min leisak theih avangin a phal lo bur hreh a niang, min ngawihsan veleh ta mai bawka. Vanneihthlak takin kan fate an hrisel a, hritlang khawsik an kai ve zeuh zeuh tihbak chu damdawiin luh ngai pawhin kan awm lo va. Ka ran vulhah lah Rinai taka ka tluan avangin tunah chuan min sawisel ngai ta lo. Mahse ka awm lo a nih ngawt loh chuan chaw a pe ngai lo hrim hrim. Vawk in kilh that ngai a awm changa a lo kal ve zawk tih bak chu a ngaihven lo khawp mai. Ka buai lutuk changa ka thin a rim te hian “vawk vulh tawh lo mai rawh, inah pawh tihtur a tam nen, buaina i insiam a nih hi,i phun phah reng ringawt mai ”a ti ve ziaha. Vawk kan hralhna atanga inchhung mamawh ka lo lei ve lam kha a rilruah a awm eih lo. Kei lahin ka ti laklawh tawha, bansan mai ka duh teuh si lo. Diktak chuan kan indan dawn khan “nangni chu hlawh nei zawk in nia, in mamawh in leichawp thei” an tih avangin inchhung bungrua phei chu thutthleng sei pakhat bak kan indanchhuahpui lo a. Tuna kan bungraw neih that ve te hi chu vawk ka hralhna atanga ka lei te leh keima chhungte lamin min tihsak a ni hlawm a. Kan pa hlawh atanga inchhung bungraw lei tur chuan a ngaihna a awm lo.

Vawkchaw ka pe zo in a ka chho chu an lo inti tap lehpeka, hah nen ka vin nghal hlur mai. “Engatinge?” ka ti dek deka, an thiamthu ve ve an sawia, tu nge thiam zawk hriattheih pawh a ni lo.

“Ball pet tawh lo ula a ni mai. Tv kha en tha hle hle rawh u. In ball petin eng eng emaw inti chhiaa, engkim hi lei ngai a nih hi, awm hle hle ula thil a chhe lo a ni mai“ ka kut sil pah hian ka ti a. 

“Ka en peih bawk lo. Ama duh hlir en a tuma, ka peih bik lo” kan milaiin a lo ti a. 

“In in enchhawk dawn alawm, a thuhrimin i nau i titap reng ringwt mai” ka tih chuan a upa berin “a nu, tv hi pahnih nei mai ila. I thawnthu ngaihthlakah pawh pahnih an neih kha” a lo ti a. Ka nuih a za viau nain ka nui duh lo.

“A teuh lo lutuk, unau ve si in intibuai reng maia, insual hlawm em mai, ka la tlanbosan daih ang che u” ka tihsana. 

“I tlanbo chuan pasal dang i nei dawn tihna maw?” a ti leh a. Chutiang ngaihtuah nachang a hria chu mak ka ti angreng a. A pa chuan hria se ka thawnthu ngaihthlak vangah puhin min khak ngeiin ka ring. Nupa inthenna lam hrim hrim hi chu fiamthu pawhin sawi a duh ngai lo.

“Aw, neihsan maithei. Tlangval hausa deuh ka um san maithei che u a nia” ka ti leh maia. 

“Thawnthu ami ang kha maw? A nih chuan a nu, min hruai ve daih la. An hausa thei si. Schoolah pawh motor mawi deuh deuhin min thlah anga” a la ti ta. Kan thenawmnu a rawn luh avangin han chhan lehna hun a awm ta lo.

Tleirawl  lai atanga lehkhabu chhiar nasa tak mai ka ni a, tunah erawh chuan ka mit hian a tlin tawh loh bakah inchhungah ka buai em avangin chhiarna hun ka nei tawh mang lo a. Youtube lamah ngaihthlak theih turin an lo dahchhuak ve leh ta bawk nen ka ngaithla nasa ta. A tir lamah chuan mahni chhiar loh chu feel a har ka ti thina, an thluk dik lo nasa thin bawk nen. Mahse tunah chuan ka ngaithla nasa ta lutuk mah mah a. Kan pa phei chuan ning tak a ni. Sawisel chang pawh a nei a, ka sim phah chuang lo nain a awm lai chuan ka ngaithla ta vak lo.. A ziaktu ten a changtupa chhe lo leh hausa tak mai an duhthusam an han ziaka, ka pasal nih lohna vek leh kan chhungkaw khawsak nena inmil lo khawpa hausa hlir an ni thin. Fiamthuin kan thiannu pakhatin “pasalte kan sit rum rum mai dawn alawm. An hausak dan em em hi a lem lek lek” a ti thina. A nih duh hmel viauin ka hria.”keichu thawnthuah lehzel chuan rethei deuh ka ngaithla peih lo,hausa deuh deuh hlir ka duh” ka ti mai zel.

Kan pa office bang rawn haw thlen hnu lawkah ka inbuala, a awm loh hi chuan muangchang pawhin a inbual theih thin lo. Min ko tawk an awm renga, a khat tawkin an inti tap bawk a. Hmanhmawh taka inbual angai ziah. 

Ka inbual zo ka va chhuak chu kan pa kawr ha loin kekawrbul chauh ha hian a lo awm a. 

“Eng nge khatia i awm a? Kawr ha ta che” ka ti nghal a.

“A lum lutuk “a ti liam mai. 

“Oo, lum pawh nise ha rawh. Mi te pawh an lo lut ang. Pa ber kawr ha lo a awm ringawt te chu a awm ang lo em mai. Pian nalh ber ang maia.” ka ti hlak hlak. 

“Ka pian a nalh alawm” min tihsan leh maia. 

“Dulkiar hi piannalh annih ngai ka hre lo ve. Ha mai mai rawh” ka tih chuan “i va ninawm e aw. Min sawisel reng lo teh. Ka inbual dawn” ka towel hman huh khum bul lawka plastic chair te a ka dah chu lak pah hian a ti a. 

“Sawisel i huat viau te chuan ka thil sawi awih ve mai thin la, kawr ha lova awm pawh i ching dawklak tawha, a mawi lo tih tih pawhin i awm ziah mai. Towel dang hmang rawh, kha chu a huh hnuang kha” ti mah ila engahmah a ngai lo. 

Chawei laiin kan pain “vawiin chu ka alu chop pai a al lutuka, engtham mah ka ei lo” a ti a. Naupang pahnihin an lo sawi ve vat. “I nu hi chu kel ang mai a ni, chi a ngam leh lutuk” kan pain a tifiama, kan hlimpui zui ta phian. 

Thleng ka sil laiin kan pa phone a ri a, a biak danah ka nu(a ma nu zawk) a ni tih ka hre theia. Room lama a luh phei tak avangin an inbe zui em ka hre lo. Vengkhata awm mah ni ila kan inhnaih vak loh avangin kan inlenpawh tam lutuk lo. Ka mo tirh khan eng emaw fuh lo deuh awm mah se in khata cheng ho kan ni tawh lo bawka, mamawh an rawn ngah lutuk changa ka lungawi lo tih mai loh chu buaina dang engmah kan nei hran tawh lo.

Thleng ka sil zawh atangin Darkar khat vel a liam leh tawh ang tihah kan pa chhang chiah,Ruatpuia a rawn kal a. Naupang hoin an lo lawm nghal laih laih. “Khawiah nge i kal a? Min rawn tlawh hrim hrim nge?” ka tih chuan “Mama rawn hmuh lawk ka tuma” a ti maia. “Roomah a awm in ka hria. Bawihte, i pa va ko rawh. A patea a lo kal ti la” ka tih chuan kan fate zinga a te ber a kal nghal nalh. 

“Roomah lo kal mai rawh a ti” a rawn ti lauh lauha. “Va lut mai rawh, karthar thawhtan zan a sermon hun a nia, a inbuatsaih a niang” ka tih chuan Ruatpuia a lut phei zui ta nghala. Unau a thil sawi dun tur an nei nimai turah ka ngaih avangin a lo kal chhan lam ka ngaihven hurh hran lo. Naupang ho exam a hnaih tawh avangin lehkha ka zirtir a, an mahni ai hian keimah hi ka tang zawk ta thina, naupang lah thahnemngaihna chang la hre lutuk lo an ni bawk si nen kan invin deuh thak thak reng mai a ni. 

Kan pa leh Ruatpuia an rawn inzui chhuak a, thu tawh loin Ruatpuia a haw zui nghala. Current a rawn awm loh hnu lawkah Ruah tam zet mai a rawn sur zui leh ta bawk nen a hma vak tawh lo bawka naupang ho ka muttir ta dial. 

“Eng nge Ruatpuia khan a rawn tiha?” Naupang ho muthilh hnuah ka ti a. 

“Bike lak a tuma, pawisa a indaih lo deuha” a tih lai mekin, “a rawn dil che tihna mi?” ka lo ti hmanhmawh.

“Um, a nih kha” tha tak hian a ti a.

“Scooty a nei reng sia, eng nge bike lei kher a tum a?” ka ti leh chu “Thantei’n class kal nan a mamawh ve a niang. Ruatpuia lahin nitin a kenchhuah a ngai ve bawk a. An hnathawhna a hlat bakah an bang har thin deuh bawka. Thantei class kalpui thin kha an insawna, an inbul hnaiah kal rualpui tur a nei tawh lo niawm tak a ni. Helamah bus a rawn tlan tawh bawk si lo nen a buaithlak ve deuh a niang” a ti leh mai. Thantei a tih hi kan pa te unau zinga naupang ber niin MA a zir mek a. Kan pa nen an kum a inthlau angreng viau. 

A pawisa mamawh zat ka zawh chuan “sing 3 tal ni thei se a tia. Aman a lo inkhawl ve sa nen chuan down payment tur sing 5 vel a nei thei dawn a nih hmel. Ka sawipui phawt ang che ka lo tia” a tih chuan a inthlahrung tih ka hai lo. 

“Chung zat zat pek tur kan nei reng reng emawni?” ka ti nghat. Diktak chuan tunah hian kan account-ah sing 3 leh tlem bak kan nei lo. Chu pawh vawk hralhna atanga tlem ka dah leh a hlawh atanga thla tin cheng 500 lek lek a kan khawl ve atanga tlingkhawm a ni a. Emergency atan tak tak kan tih ve, dam lohna thil a nih loh chuan khawih enah pawh kan en loh a ni a. Hman theih tura pawisa kan ngaih chinah pawh a tel ngai lo. Khawihthiang lo ang deuh a ni ber awm e. 

“A mamawh na a sang angreng a, hlawh lak hun lah a la hla deuh bawk si nen, kan khawl sa hi sing 2 kan hman tir lawk mai dawn em ni? A hlawh lak hunah a theih ang angin a rawn rul leh anga. Chumi hma chuan Pathian zarah damlohna te kan tawh loh han beisei ila..” ka lo rindan ang ngeiin a ti ta chat. 

“A neihsa zawng chu down payment-ah hmang mai se la, a theih loh mi a?” ka ti a. “A tlem deuh a. Scooty bawk chu ni se 5000 vel lek belhsak pawhin a tih theih mai anga. Bike chu a man a tam deuh tlata.. Kan khawl ve hian kan tihsak hram mai dawn mi?”a ti leh a. 

“Aa, hei leh chen kan khawih lo ve tang tang tawha, kan khawl ve chhun hi chu khawih lo ang. Hei hi chu nei lo angah kan inngaih thin kha” theihtawpa insum chungin ka ti a. 

“I sawi tum ka hrethiam alawm.. mahse, a mamawh ve em a. Keini bak han ban tur ka nu ten an nei chuang si lo a, nei reng chunga nei lo han intih kha nuam ka ti lo deuh mai a nia. Min rul veleh mai dawn tho bawk nen” a ti leh chu ka insum thei tawh lo.

“Chutia tihah chuan a scooty lei dawn tuma min hmansak pawh kha min pe leh chuang hleinem. Tunah pawh min pe kher lo thei a. Loan a rulh zui angai dawn lehnghala. Keini lam min rul tel tur chuan a theih pawh ka ring lo” ka ti chhuak ta hlawl. Tun hi kan pa chhungten kan pawisa an puk min rulh loh thu ka sawichhuah vawikhatna a ni nghe nghe. A thaw deuh huaia.. min chhang lawk lo hian a ngawi vang vang.

“I sawi dik alawm. Rem i tih loh te chuan tihluih pawh ka tum chuang hleinem. Mahse, a mamawh ang chu kan nei ve tho si a, a mamawhna a sang bawk si nen han tihsak thei hram ila ka ti mai a nia. Naktukah kan theih loh thu ka hrilh mai ang” awki ngai reng hian a ti a. A inlet a, a che zui tawh lo. 

“Rem ka ti lo hrim hrim a nih bik loh chu, kan lo khawl ve tang tang leh emergency thil tak meuha kan dahthat ve a nih avangin khawih lo thei ila ka ti mai a nih kha” ka tih leh chuan “ka hrethiam alawm..sawi a ngai tawh lo. Naktukah ka hrilh ang ka tih kha” a mutdan ngaia mu chungin a ti a. A vin hauh lo nain hei leh chen lo innei ve tawh kan ni bawka. Sawi nawn tawh loh a fuh tih ka hrethiam. 

A hnar tlak tlak hnuah pawh ka la meng ta reng. A chhungten mamawh an neih apianga pek zel duh a nih avangin tuna pek loh ka han duh ta hi hrehawm a ti dawn tih chu ka hre reng. Mahse kan pe tam ve tawktawh ka ti ve a, ka inthiam ve tlat. A naute pahnihin tunah chuan hna an thawk ve tawha, sawrkar hna ni lo mah se thla hlawh nei anni a. Zorami pawh a sumdawng ve reng a. Amah a inenkawl thei. Thantei leh ka nu leh pa bak chawmhlawm an awm lo. In luahman an chawi bawk lo va. Chutichungin damdawi man te, buhfai bag leina tur te bakah Thantei admission tur pawh kan la tumsak angai fo. Dawra an ba rulhsak chang pawh kan nei. A nu leh pa leh a unaute an ni a, kan tihsak theih a awm chuan kan tihtur pawh a ni ve reng. Mahse, mamawh an neih reng rengin ka bulah an sawi ngai lova. Kan pa bulah an sawi a, ani in min hrilh leh ka hriaa. Min hrilh loh pawh a neih tho avangin a hnu daiha ka hriat chang pawh a awm. Kan in lamah mo kan nei ve tho a, ka u nupui chhungte khan an in lama chawei tura an rawn sawm chang pawhin ka u hnenah zawk an rawn sawi thin. Mipa pa 4an pian hnua hmeichhe piang awmchhun leh naupang ber ka nih avangin min duat em em a, kan upa ber leh nupui nei hmasa ber phei hi chuan min duat zuala. Keipawh a lakah ka pangchang bik em em bawk. 

Kan pa nen kan indan hnuah eng eng emaw min rawn tihsak chang an nei a. Ka u te ho zinga officer awmchhun a nih avangin ka nu leh pa ai pawhin mamawh ka neih chuan ka dil tama. Laklawh thilah pawisa puk te ka dil ve zeuh zeuh bawk. Mahse, ka u ni loin a nupui zawk ka dil thin. A chhanchu ka u chuan a farnu ka nih avangin min tihsak ngei ngei dawn tih a chianga, a nupui pawhin a hnial kher lo ang. A thawkchhuaktu zawk mah ni se ka dil tur zawk chu ka u ni loin a nupui a ni tih ka hria. “I u dil la, keiin pawisa ka nei ve hleinem” a lo ti thina. “Aih. Nangman min lo hrilhsak mai rawh” ka ti mai zela. Ka pawisa puk lah pek leh loh ka nei ngai hek lo. 

Hetianga ka u nupui zawk thil ka dil thin ang hian kan pa chhungte hian keimah zawk min dil ka lo beisei ve thina. A ni ve ta si lo hi eng emaw chang chuan ka ngaithiam lo thin. Mahse, thawkchhuaktu ka ni lova, an u nupui mah ni ila kei min dil ngaiah an dah lo tihna a ni mai, ka tihdan a tha ber tihna a ni chuang lo tiin ka inhnema, thinrim rei thei lo tihtakah ka lung a awi veleh mai zel bawk. 

Zanin pawh khan ka nuin a rawn biak chhan kha pawisa chungchang hi a nih ka ringa. Ruatpuia lo kal hmain a rawn sawi lawksak a nih ka ring bawk. Tum dang ang bawkin kan pa bulah engkim an thlen leh ta tihna a ni a. Nidangah chuan lawm lo deuh chung pawhin ka hnial lui ngai lova, tun tum erawh chu kan neih ve chhun chhun hi pek ka tum tawh lo bur. Kha zat kan tihsak tawh chungin englaimahin min fak duh ngai chuang lo a. Keimah lamin rem ka tum tang tang reng chungin kan pa cousin nupui fel zia bak sawitur an hre chuang lo, chuvangin kan pa in pek luih a tum pawhin engpawh huamin ka hnial ang tiin ka insehruh ve ta tlat. 

Zingkarah thlan laih tur a awm avangin thlan lai turin kan pa a kala. A rawn haw veleh a inbual sawk sawka. Chaw a ei hnuah hna kal turin a chhuak nghala. Kan inbe mang lo. Pa tawngduh tak a ni lo ve hrim hrim. A nau nen an inbe tawh em ka hre lova. Zawh pawh ka tum chuang lo. A awmdanah pawisa puktir ka phal loh avanga lawm lohna nei angin a awm lo nain tukdang chu a ang chiah lo deuh niin ka hriaa. Ka ngaihbel mai mai pawh a ni ve thei tho bawk. 

Tlaia kan pa office ban hnuah ka nu leh ka pa an rawn lang hlawl a. 

“Pi Siami kan tlawh a. Kan rawn peng kawi zawk a nih hi” ka nuin a ti a. “Thingpui in duh em?” Ka tih chuan “a tlai tawh deuh nain in tho mah ila a pawi lo. Zanin inkhawm zan a ni lo bawka, a hmanhmawhthlak hran lo e” ka pain a ti a. 

Thingpui ka chhuanga, kan pa te nen eng eng emaw sawiin an titi luama, “chawei ve nghal ula” thingpui pek pah hian ka ti a. “Min chhum kep tawh awm si lova, nidangah zawk a ni mai. Eee,Mama, i nau kha i lo ngaihtuahsak thei dawn ta em? Nangmah bak chu han beisei tur a nei chuang mang si lo a” ka nuin a tichhuak ta chat. 

“Hlawh lak a la hla deuh a, bakah a duh tam angreng deuh bawk nen, tun tum chu kan tihsak theih hmel loh. Indil thutah chuan keini ang tan a tam ve deuha. Amah pawh tukinah ka hrilh tawh kha” kan pain a tih chuan ka lo thaw ru deuh huaia. A nu leh pa leh a unaute thil dil a pek loh vawikhatna a ni a, a remti lo tu keimah zawk ka lo ni bawk si nen nuam ka ti bik miah lo. 

“Awhaww, chuti chu a va beidawng dawn ve aw.. Thantei lah engkim tithei anga la ngai tlat che a nia. I lo ngaihtuahsak leh ngei ngei turah ngaiin Scooty nei turah a lo indah leh hmiah tawha. A hlim nasa tawp khawp lehnghal a” ka nuin a ti ta dap dap. 

“Han nghak deuh sela, tun tut tutah chuan tihdan ka hre mai bik lo” kan pain a ti leh a.

“Nia, a nghah leh deuh angai a nih chu. Hlawh te han la phawt la, i ngaihtuahsak thei turah ngai ila…” ka nu bawkin a ti leh a. Ka lo insehruh nasa viau. Ka awm ve reng lai pawha engmah min sawipui ve tumna an nei lo chu ka lo run em em mai. 

“Hlawh pawh la ila inluahman te, naupang fee te angai renga pek ngai kan nia, tunhnaiah chuan ka thei pawhin ka ring rih lo” kan pain a ti veleh a. Rem ka tih loh avang khan tihluih a tum lo tih ka hre thiam. 

“A nih chuan han intuak leh phawt se a tha mai a nih chu. Nang berin i theih miau si loh chuan a buaithlak dawn em mai. Thantei ka lainat reuh mange” ka nuin a tih chuan ka pa zawkin “nei thei lo puiin neih kher tum tur a ni hleinem. Mama te tan pawh chhungkaw mamawh tamtak a awm a. A naute mamawh zawng zawng Ngaihtuahsak vek sen a ni nang. Matei pawh veng thenawm atangin bus in a kal zel thei alawm” a lo ti a. Ka mo tirh phat atang khan kan pa te inchhungah ka nu a lal hle tih ka hre daih tawha. Ka pa hi chu ka nu tih ang anga awm mai, pa tha mawl ve tawp leh mi pawisawi lo tak a ni a. Ka nu a fin em avanga pasal ngam anga vantlangin an hriat loh mai mai a ni tih ka hre kar. Tun tumah pawh hian ka pa zawk hian ka mitmei a veng tih ka hai lo.

Engmah danglamna nei lo angin kan lang naa kan nupa inkar a zau ta du mai hian ka hria. Pawisa chungchang kan sawi leh ta lo a. Kan pa awmdanah pawh lungawi lohna engmah a lang lo. A sermon tur inbuatsaihin in a a awm chang chuan roomah a inkhung deuh renga, tum dangah pawh a sermon dawn chuan hetiang hian a ti thin tho nain tun tum chu min hel anga ngaihna ka nei a, ka  lo phal lo ta kher kher kha inchhirna te ka nei ta that that. 

Suturday tlaiah ka u in kan fate chawei turin an in lamah a hruai pheia. Room a ka va luh chuan kan pain dawhkan te kilin a sermon tur bawk a lo en a. Chhuak leh ta mai loin khumah ka thu a..ka awm tih hre awm pawhin a awm lo. 

“Pa a, pawisa kha ka lo ngaihtuaha” ka thut ngawih ren rawn hnuah ka tichhuak deuh hlawl.

“Eng pawisa maw?” Min rawn en zawk pah hian a ti a. A hawisawn lehnghal mai. A awmdan chuan ka rilru nawm lohna kha thinrimnaah bawk a thlak leh chiang khawp mai.

“Ruatpuia pawisa puk tur bak eng pawisa nge ni anga?” Bak hlak hian ka ti a. Ka tho zui nghala.

“Eee, kha kha maw? Kan tihsak thei lo a. Ka hrilh chian viau tawh kha, sawi nawn tur a awm em ni? Nangmah a rawn dil leh talh zawk che nge?” ani leh ni lo ang taka rang deuh vat hian a ti a. 

“Dil lo. Englaimahin ka bulah an duh an sawi ngai hleinem. Ka awm ve reng pawhin ka remtihna lak ngai an ti ngai hleinem” ka ti ta hmak hmaka. 

“Sawi loh chhan an nei te pawh a niang chu” a ti chiah chu ka sa chhuak vek thei. 

“Eng nge a chhan chu ni a?” Aw khur lek lek hian ka ti a.

“Ka hre nang, an sawi ngai loh chuan chhan a nei aniang ka ti mai a nih kha. Ka rin dan a nih chu” ngai ho hmel zet hian a ti leh a. Dawhkana bible a dah a en zui lehnghal a. Ka thinrim lutuk chuan chum chawrh mai ka chak et et a. Eng ber nge ka sawi hmasak ang tiin ka ngaihtuaha.

“Nu-i, tha takin ka nu te pawh ka sawipui tih i hriat kha, anni pawn an hrethiam reng..Bakah, mamawh an dil ngai lo che tih pawh kha i ngai kawi laklawh mai mai a nih kha, keiman ka hrilh zel tho che tih an hria a, i phalna loin engmah kan ti lo tihte pawh an hria ania,. Tunah hi chuan inhauhna tur lo zawng lo phawt teh. Inbuatsaih ka mamawh viau a nia” amah bawkin awki dam angreng tak hian a rawn ti leh a. Tawng tawh loin room atangin ka chhuak a.. ka tawt lutuk chu ka puakkeh thei mai dawnin ka inhria. 

Naupang ho an lo haw hma chuan ka be ta lo reng renga.Min biakna pawh a rul tawk bakin ka chhang lo. Nidanga ka thinrim changa a awmdan thin ang bawkin ka thinrim tih hre lo ang maiin a awm leh maia. Min tlawn huam lova, min biak dan ngai rengin min be bawk. Inkhawm tura a chhuah hnuah ka thiannu, kan inneih a ka best in min rawn call a. Ri lawng lawng chi tihtakah a rawn ri lehnghal chel chul mai. 

“Naupang school chawlh hunah zin ila. Kan pa nen kan lo sawi vel mai maia, kolkatta lam te zuk thleng thla ila..” a rawn ti ham ham. 

“Nangni anga hausa kan nih loh hi, i timak thei em mai” ka tih chuan “i over thei em maia, i inren leh lutuka, rethei emaw i inti tlat tawh a nih kha”min rawn ti a.

“Rethei lo emaw pawh inti ila kan rethei tho alawm.. Kan ei ve tawk tawk chu a nih hi” ka tih leh chuan “Rza kha lo nei zawk la chuan i duh hun hunah foreign i kal mai tur a nia, inpa aiin a chhe lo zawk fe bawk si, i chanchin lah hi min la zawt peih em em zuia, a pawi ngawt mai” a rawn ti peka. “I sawi ho em maia” nui chungin ka ti a. 

“Ka ti tak tak alawm, nulat laia nula luck ve tak si, a chhe ber leh harsa ber i thlanga. Kei te chuan nawmsakna ka thlan chat mai hi” fiamthu titak deuh hian a rawn ti leh bawrh bawrh. 

“Mahse, thiannu i fel ka ti tawp che. I nulat laia an duat no ve zia che leh tuna i insiamrem theih zia hi fak tlak i ni..damchuan karthar lamah ka rawn leng ang” a rawn ti leh a. 

Kan inbiakna kan tihtawp hnuah ngawi rengin ka thut ngaiin ka thu a. Ka thiannu nen kan dinhmun inthlauh tawh zia te ka ngaihtuaha, a sawi ang tak tak khan pasal ka neih hma chuan ka thawhchhuah pawh keima pual a ni a, ka chhungten an mamawh hran lo. Duh zawng chu nei ve thei, unaute duat rawn ka ni a. Tunah erawh chuan pawisa ren reng rengin ka khawsaa, thawmhnaw duhzawng chu sawi loh, ei chak zawng pawh ka ei tha ngam mang lo chu a nia. Chutah inhrang chan hnuah pawh pasal chhungte tihlawm ngai reng ka la ni zui bawk. Ka nun hi a nuam thlawt lo tia ka ngaihtuah laiin Thawklehkhatah mahni inkhawngaihna ka nei thuta, ka mittui a rawn tla tehngawt a. Chhuak deuh mai hian ka insut zui ta hlawp hlawp. 

Naupang ho an lo haw a, a hnu lawkah kan pa inkhawmbang a rawn haw veleha. A thiante pathumin inkhel en tumin an rawn zui haw bawk. 

Muhil thei loin ka mu meng kara. A rei hnuah phei chuan mu loin lukham nghengin khumah ka thu a. Ka rilruah thildang awm thei loin kan In lama haw mai chakna in ka khat tut tut a ni ber. Inthen hi ka lo la ngaihtuah ngai miah lo va, zanin hi ka ngaihtuah hmasak berna a ni a, kan pa nen inhauh buaina em em nei lo mah ila hetiang renga khawsak hi ka tlin tawh lo niin ka inhria. Kan in lamah ka chhungten min ngai em em a, kum hei leh chen pasal neiin awm ve tawh mah ila fanu neihchhun ka nih tlat avangin ka chhungte lakah ka hlutna a la ngai reng tihte ka ngaihtuaha. Inthen ila, ka fate hi chang vek bawk ila, ka nu ten ka eizawnna tur chu min ngaihtuah sak thei tho anga, tun ai hian kan harsa lo zawk ang tih thlengin ka ngaihtuah kai ta zel. 

Zung turin ka tho a, room a ka let leh chuan khuma ka pasal fanaute mu tlar dal chu ka en vang vanga. Engthil nge a nih pawh ka hriat loh hian na deuh maiin ka pumah tak hian a rawn su chawrh ang mai hian ka nghing deuh lawiha. Khuma mu mek ka pasal leh kan fate pawt then tura ka ngaihtuahna kha ngaihtuahna tha lo leh sual hnathawh a ni tih hi chiang em em mai hian ka ngaihtuahnaah a lo awm a.. ka zawi hnawk mai hian ka hria..

Chhung inkhawm kan neih lai chuan kan pa, bible chhiar mek chu ka en renga.. Mi pasal te anga palian leh hmeltha, hausa leh nupui fanaute duh duh pe thei a ni lo nain ani aia chhungkaw tana pa nih tlin hi an awm thei bik lo tih chiang takin ka hriaa. A unaute leh chhungte chungchangah pawh ka lamah a tan hneh zia te, a unaute leh a nu leh pa a hmangaih em em chunga ka rem tih loh avanga engmah a pe ta lo te hi ka ngaihtuah hian lawm tur ka nih vei nen, engtin nge a ni lo zawng zawnga ka ngaihtuah theih ni?? Keimah hi ka lo sual ber zawk niin ka hriaa, kan pain ngaihdamna chungchang leh chhungkaw pawimawhna naupang ho hriatthiam tur zawnga a sawi lai te chuan ka hnuk a ulh tun maia. Kan fate pathum, a changa minti hlima, min ti lungngai thintute chu ka en thina. Keimah ka inkhawngaih vang ngawta nu leh pa kar lova seilen tir tumna ka nei te kha ka inthiam lo ngawih ngawih. Pathian-in kan enkawl tura min kawltir kan fate hlimna leh thlamuanna ber kan chhungkua thendarh duh tur khawp ngaihtuahna ka nei te kha ka indem a, ka inhaw takzet tawh. 

“A nu, ka kut i vuan lo a nia” kan fate berin ka kut vuan chunga a rawn tih chuan ka phu ru zawka. Rang tak hian a kut ka vuana, ka sir lehlama ding kan pa chu ka en a. Zawhna mitmeng hian min lo en a, ka nuih ringawt. A kut a rawn dah hnaih chu rang takin ka vuana. A ngaihna hre lo hmel tak hian a thle zauh.. a tawngtai zui ta nghala…

Monday zingah Ruatpuia phur takin kan inah a rawn luta. A u be loin keimah zawk min rawn be nghala..

“I va hma ve a” kan pain a tih chuan “hma loh chi nang, in nupa zarah bike ka lachhuak ve thei dawn a. Mut rei chi a ni hleinem” hlim tak hian a ti a. Kan pa hawi buai lutuk chu ka lo nuih var var.

Nizanah Ruatpuia ka biaa, a u nen cheng sing 2 kan puktir theih tur thu ka hrilh a, emergency thil takmeuha kan dah ve a nih thu leh a theih ang anga min rulh ve a tul thu thlengin ka sawipuia..Kan pa ka rawn hauh lo nain a thin a rim ka ring lo va, ka rin ang ngeiin tunah hian hlim takin a nui ta mek chu a nih hi..

Inhauh chang awmin eng emaw chang chuan pawisa vangin kan rilru te a hah a, mihring kan nih tlat avangin ka pasal chhungte lakah lawm loh chang pawh ka nei thin. Mahse, ka pasal leh ka fate hi ka neihchhun te an ni a, anni aia hlu hi khawvelah engmah ka nei lo. Buaina chu a lo la thleng leh thin ang, chutih hunah chuan nupa hi kan invawn tlata, kan tanrual chuan kan hneh theih loh tur khawpa buaina lian hi a awm thei ngai lovang.. chhungkaw dang hausa zawk te awh vanga mahni inkhawngaihna neihte hi sual hnathawh a ni a, ka tana pawimawh ber chu ka pasal nena kan din kan chhungkua hi a ni a, midang chhungkua awt a buai mai mai tur ka ni lo. Rethei intih vanga inkhawngaih leh ka thinrim laia ka ngaihtuah ang khan kan in lamah pawh haw tehreng ila rei nuam ka ti tak tak lovang. Ka hahdamna leh ka nihna ang anga min pawm bertu, ka thlamuanna hmun ber chu ka pasal leh ka fate bula awm hi a ni tlata. Thihna vang te a nih ngawt loh chuan ka neihchhun te nen kan inkar hi a chhiat ka phal ngai lovang.