BLACK HORSE-34(LAST CHAPTER)

BLACK HORSE-34

“Amama,nangmah i lo kal ve dawn em?” min ti tu ka fapa chu ka en a”Nu’ ti hian min ko duh der lo,”Amama a tih  loh leh Maama” a ti tlat zel,vawiin hian  pre-schoolah a kal tan ve tawh dawn a,a uniform kamiz tial leh a kekawr pawl nen a inthuam ve ap a,a sam dum tha zet chu ka khuih mam sak a,ka tan chuan ka khawvel a ni a,ka engkim a ni bawk.

“Ka lo kal i duh nge duh lo?” nui chungin ka ti a,a hnar ka piai sak zauh a,a samkhuih dah that tumin ka kalsawn a.

“Aw,duh ang ka ring,anih leh Api ?” a ti leh a,ka hawi let a,khumah a thu a,a ban tereuhte chuan a inbengkhalh ve tang bawk,zawhna angah lutuk hi a chang chuan ka nuih a za thin a,mahse chhan nuam ka ti a ka ning ngai lo.

“I zuk sawm dawn mi niang?”

“Yess….” tih pahin a khek raih a,khum atangin a zuangthla nghal tharh bawk.

Kum 4 lai a lo vei ta reng,ka nunah thil tamtak a thleng a,a lian ber leh ka theihnghilh ngai tawh loh tur erawh chu Ka pa boral kha a ni ngei ang..

Simon-a vanga ka rilru natna te kha ka puakkeh pui ta nge nge,mahse,midang awm lai ni lo in amah nen chauha kan awmlaiin ka sawi chhuak a,kan nupa kar tawp dan te,na ka tihzia te leh kan chhungkaw tawrhna mai bakah Simon-a te chhungkaw tawrhna te,midang nunna chan ta te ka ngaituah khan ka pai reng thei ta lo,ka puak keh ta vek.

“Mampui,min ngaidam rawh,kum tamtak keimaha ka lo tawrh tawh hrehawmna hi nang lehzel chuan min huatnan hmang suh…” zuai raihin a ti anih kha..

“Engatinge khatiang i tih?midang nunna la thei tur hian chunglam khian eng phalna nge a pek che? Ka natna zawng zawng hi Simon-a min thlen a ni lo,nangmah zawk in min siamsak anih hi..” huatna a khatin ka ti leh a,a vawikhatnan ka pa anih avangin ka inchhir hial bawk.

“Ka thiam loh a ni,mahse,kha hmunah khan keiman that lo ila chuan ka ruang hian i nu hnen a thleng ang,nang leh i nau pawh hi inpiang lo ang” mahni inring tawk lo zet in a ti a.

“Engpawh chu lo ni se that kher lo khan i chingfel tur alawm..”ka la ti talh, Simon-a khan a pa in thah a tum ve tho tih a sawi hauh lo.

“Ni e,ka tum a,mahse ka tum tawk lo anih ka ring” dam thluam hian a ti leh a,ka pa,pa luhlul leh ngeng tak,kan naupan lai atanga dimna tel lo a min hrual thin tu kha a ang ta lo.

“Midang nun i tihchhiat sak man chu enteh,kei ka nuthlawi a, Simon-a tum ang ngeiin hna lah ka nei tawh hek lo,bul tan leh ngaihna awm lo khawpin ka chau tawh bawk,chumai bakah Tetea lah khan nun nuam ti lo in amah in tihhlum a tum bawk a…” ka ti leh a,Ka pa hi ka zah a,ka dikna ah pawh ka chhang ngai mang lo kha ania,mahse tunah chuan ka natna leh Simon-a ka channa bak engmah ka hmu lo a,ka hlau hek lo.

“Ka thiam lo a ni e,i duh duh sawi rawh,mahse i nu erawh chu hrilh lo hram teh” a awhah ngenna a lang thei hial.Ka pa ngeiin min ngen a,mahse a tan ni lo in ka nu natna thlen a duh loh vang a ni zawk.

“Ka sawi lo ang,ani tal hi chuan hlim a phu a,a hriatreng na a Simon-a kha nireng se ka duh zawk” ka ti sep a,min chhan leh hmain ka chhuahsan a,a hnu rei vakloah ka nu mangang te ri ka hria a,ka nu te room ka thlen thlak meuh chuan chet ngaihna hre lo in ka ding khawng lah mai..

“Eng nge i lo ngaihtuah leh tak?” zawi sup hian a rawn ti a,ka hnung lam atangin ka kawngah a rawn kuah a,tu nge anih ka hria,ka pasal ngei a ni e.Amah si chetin min pawt hnai a,Ka bengah a fawp zauh a,ka darah  a khabein a rawn nawr a..

“Eng ni lo e..Kan kal tawh dawn ami?” ka mittui hruk zauh pahin ka ti a,ka aw a lawi rat bawk.

“Min enteh” amah en thei turin min kuai her a,ka khabeah a kut zungtang sei thlurh chuan a rawn dawm a,a kutzungpuiin ka hmui a rawn tawk a.

A hmelpa leh hriam hraih chu ka en a,a sam dum hlap mai chu a hnawk deuh a,a khabe hmul a to siar siar bawk.Mala nen hian an in ang takzet,an mizia leh an khawsak dan engkim mai hi a in ang vel vek,tun atangin a tihmawh em em a,a pa ang bawk hian a puitlin hun chuan a la tihmawh anga,a la hlawhtlin ngei beiseina nen ka thlir mek chu a ni ta ber.

“I lo tap tihna animaw?’ a then suka,a rawn kun hniam a,ka mittui rawn tla chu a rawn fawp a,ka pa ka ngaihtuah chhuah leh vanga natna tilangtu ka mittui tla hmasa a piang chu a lo fawp hul zel aniber.

“Ka pa leh I pa kha vanah an inhmuh i ring em?” tah chhuak insum zet hian ka ti tiau mai.

“Shhh….an inhmu ang tih ka chiang,chuan ka pa in i pa hnenah  a ngaidam tih a lo hrilh anga,an fate inhmangaih em em  hi hmuhnawm ti lutukin min thlir ang...mahse,tap hmel hian a ti hrehawm ang” a nui leh suk a,a rawn kun hniam leh a,ka chalah a rawn fawp a,ka mit ka chhinga,Ni e,kei hi ka tap leh tawh tur a ni lo.

“Simon..” ka ti leh sep a.

“Um…” thatchhe zet hian a ti a,min kuah a,ka hnungah a chul hauh hauh bawk.

“Ka HMANGAIH che”

“Nang aia nasa zawkin ka hmangaih che,nun awmzia min zirtirtu,ka nupui,ka engkim...i hlutzia hi i hre lo zawk ang” ati a,zawitein ka nui hak thung.

“Min nuih tihna mi?”

“Aw,thusawi kual dan i thiam em a” ka ti a,a nui ve hawk tho.

“Maama..kal tawh ang” Mala a rawn tlan lut a,min rawn en a,Apa nen kan lo inkuah chu min rawn en a,a vawikhat hmuhna a ni lo a,mak ti hmel  a pu lem lo.

“Ok..ka lo kal ang,Apa hi a kal ve dawn em?” ka ti a, Simon-a min kuahna atangin ka in lahrang a.

“Ka hre lo,Api pawh a kal dawn a..” a ti leh a, Simon-an a pan hnai a.

“Ka lo kal lo mai ang,Meeting ka nei dawn a,mahse,Motor thleng ka thlah ang che”a pawm kang nawlh a,Mala a rak that thung,a chang hian pawm a duh lo leh tlat thin.

“Hon...khawnge a bag?” min rawn en a,Mala lah chuan thuawih hmel fahran hian a pa dar atangin min rawn melh ve kar bawk.

“ Ka lo keng ang,kal ru,kan tlai dawn” ka ti a,Sofa a Mala bag tereuhte ka dah chu ka la a,Mala leh Simon-a in chhaih rak chunga kal chu a hnungah ka zui a,an hmuhnawm takzet.

Tlana kan hnenah a la awm ta reng,thla thar maiah nupui a nei dawn a,engkim Simon-an a tihsak vek, Simon-an Inhmun a lei sak a,zahpuiawm lo tawka pangngai in In a saksak vek a,an chhungkuain helamah an awm ta vek.An taima bawka,khawsak harsa an ni lo.Sangtei erawh Pasal a nei tawh a,Simon-a farnu te pahnih pawn an nei tawh bawk.A te ber mipa erawh a la tlangval a,Ka nu kan hnenah a rawn awm nghet ta bawk.

Sawmtluangi chanchin ka hriat leh hmasak ber kha chuan min barakhaih viau, Simon-a thah tuma a beih avangin Jailah a la awm ta reng, Ruatdika erawh a dawrah Damdawi hman phal loh an mansak teuh a,Hriati thah thubuai an thar thawh leh a,ani pawh a dam hun chhung chu jailah a hun a hmang tawh ang.Ka ngaihtuah hian ka la awih hleithei meuh lo.Kha ti khawp khan min hnaih a,min buaipui bawk,mahse ka tana tha tur a lo ni der si lo.Min thah pawh hreh lo in Hriati kha tur min pek tir ania,mahse a hnuah pawh khan min thah tum tak tak se chuan chance a hmu teuh ang,mahse min that ta chuang si lo, Simon-a khan a lo sawi dik mahna..Min lo Hmangaih pawh a ni maithei e.

“Thiannu….khawnge i awm?” phone ka pick veleh Sangpuii'n a rawn ti a,a aw zangkhai vah hi hriat a nuam thin.

“Mala School ah ka hruai a,kan haw mek” ka ti a,ka mal chunga ka fapa muhil bam mai chu hmuhnawm ti zet hian ka thlir a.

“Eheu,kan va in changkan hleih ve...taktakin naktuk kha i theihghilh ange aw” a rawn ti leh a,diktak chuan ka theihnghilh chiang viau.

“Theihnghilh lo e,dar engzat nge hunserh kha?”ka ti a,an fanu kum khatna a ni a,an beidawn ram ram hnuah nau an pai ve ta hlauh.Ka thinlung takin ka lawmpui bawk.

“Dar khat ania,mahse,hma deuh hlekah lo kal ula,in pa hi a hman angem?” a rawn ti leh a.

“Ka la hre mai lo,hman turah ngai phawt ang” ka ti a,eng eng emaw kan sawi leh a,kan chhungkua ve veah kan buai ve tawk a,ani phei chu hna a la nei zui bawk nen inhmuhna hun pawh kan nei meuh lo.

An school chungchang Mala’n ka nu a hrilh siam siam a,Motorah khan a muhil a,In kan thlen hnuah a harh leh lawi.

Ni tla tur a sen phut a,kan room a rawn chhun a,nalh tak a ni, Balconyah ka chhuak a,kan compound leh a chhehvel a chhun sen phut mai chu ka thlir kual a,lunglenna hian min rawn tuam a,Ka mitthlaah ka pa bawk a lo lang leh a,khami ni khan engmah sawi hman lo in Boral ta se chuan mahni inthiam lo reng rengin ka nun ka hmang kumkhua tawh ang.

Ka mit ka chhing a,hun kal tawhah ka let leh ta vang vang mai.Ka pa lo tlu reng kha Damdawiin kan luhpui nghal chuk chuk a,ni hnih zet engmah hre lo a a mut hnuah chiang mang lo in a rawn harh a,ka beisei loh tawpin Simon-a a rawn lang hlawl bawk.

A tluk atanga karkhat na chiahah a kal ta nge nge,ka inthiam lohna khan min delh bet tlat a,keimah vanga Stroke kha nei niin ka hre tlat bawk.

“Eng nge i lo tih dawn?” ka pa kan vui atangin ni li lai a liam leh tawh,Roomah Mala thawmhnaw vel ka thleh fel laiin a lo lut a, diktak chuan hmuh leh ka duh tawh lo,a room ka chhuahsan atang khan kan inbe nawn leh ta miah lo,engkim a tawp vek tawh miau avangin hmuh tawh loh law law ka duh ber bawk.

“I pa khan min mamawh a” min en lo in a ti sup a.

“Anih chu..” ka ti ringawt,a sawi zawng zawng te kha a dik tih ka hre vek tawh a,a In a ka va kal hnu lawkah khan ka ta tur in envelope a lo thleng a,a chhungah thil chi hrang hrang a lo awm teuh,ka chhiar a,ka en a.. Simon-a insawifiahna zawng zawng kha a dik tih lanna vek a ni a,rinhlelhna ka nei ta miah lo,mahse,ka hriatchian lehzual tak avang khan ka lawm chuang hauh si lo.

“I pa khan kan inneih a duh a..” a ti leh sup a.

“A na tuar kha hmuh nuam i ti em? i tih theih loh kha chunglamin a ti ta zawk sia” ka mittui a rawn tla a,mahse ka chhungril hian ka pa a ngaidam chiang tawh ngang thung.Eng ang pawn thil lo tisual tawh mahse ka tan chuan a ni lo Pa an awm chuang lo,ka natna chauh ka lo hmu a,ka pa natna tawrh leh hrehawm a tihna zawng zawng te kha ka lo hmu ngai hek lo.

“Lawm tur chu ka nia lawm,mahse ka lawm lem lo..” min rawn hnaih a..Ka inrin hmain min rawn kuah a,ka tal laih laih nangin min thlah a tum lo.Ka pa ka sunna avanga ka tap khur dar dar kha min hnem nan min kuah bet ta zawk.

“Ka rualin lo haw rawh..” phawk zet hian ka melh a.

“Engmaw i sawi?”

“Lo haw tawh rawh,ka mamawh che a,kan fapa hi nu leh pa karah ngei seilian se ka duh..” a ti nghut a,min kuahna atangin ka in la hrang a.

“Kan paltlang vek tawh alawm..tihian awm law law tawh zawk ang” ka ti halh a.

“Aih,min nei rawh,ka hmasialna vanga thil thleng hi tihtawp ka duh..nang pawh i na a,kei pawh ka na bawk,engkim hi tawp se a tharin bul tan ang..”

“Kan inkarah thil thleng a tam lutuk tawh,ka nu pawn min pawm ngai tawh dawn lo a,kan in ti na tan mai mai zawk,a hma ang kha a ni thei tawh dawn chuang lo..” ka ti ve thung…

Mahse,hmana Simon-a kha a la ngai reng,a beidawng eih lo.Ka biak miah loh pawn kan Inah a lo kal a,ka nu tan makpa tha ber anih zia a tilang leh ta bawk.Thil thleng leh thuruk engkim hretu ka unaupa te nen a hma aia let tam takin an inzawmna a tha ta zawk.

Mala a rawn tlan lut a,min rawn ko chul bawk,ka mittui tla chu a hmuh hlau zet hian ka hru sawk sawk a.Slipper pawh bun lo in Balconyah a rawn tlan chhuak a,a bal liam bawk.

“Api nen pangpar kan tifai a,ka bal vek..a pawi em?” hauh inthlahrunawm khawp hian a hmel a tim dai mai.

Intihbalh te,a toys ho dah hnawk lutuk te ka phal loh zia a hria,naupang te ni mahse mitmei a man thiam reuh phian a,Simon-an nau awmtu la mahse a kutah ka dah ngai lo,ka fapa a ni a,ka kut aia a himna hmun tur ka hre miau lo.

Ka bual fai a,an school chanchin a sawi siam siam a,a nikhatna chauh a la ni nangin nuam a ti nghal pang mai.

Kut vawt zet hian ka biangah a rawn khawih a,ka mengchhuak zawk bawk.Simon-a hmel ka hmuh ruain ka thaw huai mai.

“I lo haw chiah mi?” zik mar ar ar pahin ka ti a,a hna lamah a buai a,Dinner a ei nghal dawn tih min rawn hrilh a,nidangah chuan a lo tlai anih pawn ka nghak ngei ngei thung.

“Um,ruah a sur nasa khawp mai..” a ti a,a thawmhnaw hak lai a phelh a, Balcony awm lohna lam tukverh chu ruahin a rawn theh thawt thawt a,thli a thaw vuk vuk bawk.

“Khumah lo mu la..ka intifai zuai ang..” a ti a,Bathroomah a lut zui nghal a,ka tho a,Mala khum ka pan hnai a,a puan sin a tlawh hlim vek..ka nui sak mai,kan khum bulah a khum kan dah a,a mang a chhe thei reuh phian bawk.Puan ka sin that tir a,a khum chunga lamp awm chu ka off a,zing thlegin a harh hauh lo ang tih ka hria.

“Min ngai em?” khumah a rawn inthawlh a,a mal sei thlurh chuan min rawn khan a.  Ka kawngah a rawn kuah a.

“Ngai vak lo..”

“Eheu..a va fair lo ve..” tih pahin ka kawr a rawn zen a,ka hnute a rawn tuai a,ka mur ar ar mai..

“Thil dang in ka rilru a luah alawm” ka ti sep a,a dar hlai hlapah chuan ka lu ka nghat a.

“Sawi la…”a ti sup a,ka hnute hmur a hmet hrual a,ka thwh hak mai.

“Ka pa kha i ngaidam tak tak em?”

“Um…”

“Um ringawt maw?” ka ti nghat a,min chhang tawi lutuk a ka lungawi vak lo.

“Ka ngaidam alawm..Ka pa vanga phuba lak tuma ka awm lai khan keimah chiah ka lo in ngaihtuah a,kei ang bawk khan i pa khan hrehawm a lo tuar ve tih ka lo hre ngai lo...Bakah ka nuna mi pawimawh leh hlu ber tan Pa a ni a,ka ngaihdam mai khan ka hlim zawk..”  a ti ta duah.

“I tan a harsa dawn em asin…” ka ti leh sep a,a awmah ka hmai ka phum kak mai.

“Um,harsa,mahse,midang te hian kan chungah engpawh lo titawh mahse ngaidam thei tu nih hi a hlut zia leh lawmna ka tawn zawk zia ka hre tawh.Nang chan leh ai chuan ka neih zawng zawng chan hi ka duh tawh zawk,i tel lo a kum khat ka hman kha kum sangkhat aia rei niin ka hria asin,ka men laiin i hmel ka mitthlaah a awm reng a,muthilh tuma ka mit ka chhin veleh nangmah bawk,mumang ram thlengin nangmah hlir…” a sawi zawh hmain ka fawp ta vawng vawng.

“Ka hmangaih che “ ka thaw hlawp hlawp mai.

“Thil pakhat, i pa thil tih te ngaidam thei tur khan ka Hmangaihna che hi a chak tawk a,ngaidam tu ka nih chiah khan ka phurrit a bo a,ka hahdam bawk.A pawimawh ber zawk chu Phuba lakna hian eng hlimna mah min thlen ngai lo,huatna hi pai tlat lo in min haw tu te hi ngaidam ta mai zawk ila a hahdam a,chunglam duh dan a ni ngei bawk ang”

A TAWP TA TAK TAK E.