EVERGLOW-17

Chapter- 17

Sawi ve tur engmah ka hre lo, kan cheng ho lo ti in thiamthu sawi pawh tum ila Ka nu a nihna a bo chuang hek lo.Amah pawh en ngam lo in Dawhkana thilawm zawk ka melh a,hrehawm tih chang tam tak ka nei tawh thin a, a hrehawm ber tiin sawi bik tur ka hre hauh lo, khang ka hrehawm tih tawh te ai khan tuna ka hun tawn mek hrehawm dan hi a nep chuang hauh lo.

Hlui Coffee kengin a rawn lut a, a chhuak leh tur chu zui ve mai ka chak zek zek.”I dik lo a, i thiam loh ka ti hauh lo ania, he thil kher hi chu ka fa te hian an hriat ka duh miah lo,chuvangin Mama pawn ka rawn hmu che tih a hriat ka duh lo ania,i buai thui lutuk loh nan i nu lo bia la a that ka rin vang mai zawk a hrilh che ka nia” amah bawkin a ti leh a, a lo thlen tirh atang khan vawikhatmah thinrim aw rawl leh vin deuh hlek pawn engmah a la sawi lo, hahdam hmel takin a thu a, Sumdawnna lam thil a indawr ang maia awlsamin a sawi mai bawk.

“Ka lo be dawn nia..” ka hrawkah engemawin a rawn hnawha, ka khuh khauh mai.

“In khawsa ho lo a, i tan biak mai a harsa maithei, mahse, Mama bawk hi ngaihtuah la, ani nen in inkar boruak a dik loh phah ai chuan be mai la a tha zawk ngei ang” a ti leh a, ka rin ai in kan chhungkaw chanchin a hre hnem anih hmel,chumai bakah Zorina nen kan inkawp dan pawh a hai miah lo tih a tawng danah a hriat theih vek bawk.

“Nanun,i tha em?” min ep zawnga Chair awm, min rawn dawrtu te thutna ah chuan Hlui a rawn thu a.

“Um,tha e..ngatinge?”

“I dang vek a,enge a rawn sawia?” a ti leh a,helai ka thawh ve hnuah Nitin kan inhmu a, thian em chu ka la ti ngam lo, mahse, nitin kan inhmuh miau avangin ka ngaina ve tial tial tih erawh ka hria,thil zawng zawng ka hrilh hauh lo nangin Zorina nen kan inkar pawh a hre tho.

“Thil tih tur min rawn pe anih kha..hna lamah hian ka buai bawk nen ka tihsak thei angem tih ka lo ngaihtuah a” ka ti a, thudik ni chiah lo mahse dawt muhlum erawh a ni lo, Ka nu be turin min ti miau a.

“Awi, i buai nen..bakah mak tih deuh ka lo nei a..”

“Eng? “ a lo hre ru emaw tiin ka lungphu a rang nghal dawt dawt bawk.

“I lo awm hma khan u Rinkimi kha tih tur an hrilh vak ngai pawh ka hre si lo a, i lo awm hnu hian an vai mai hian an lo kal seka..” ka thaw huai mai.

“An hmalak a zau ta deuh aniang chu..Rinkimi kha ka awt ngawt mai,hna a thiam an ti em em bawk si” ka ti a, ka awm tirh khan chawlh a lo la a, a lo let leh hnuah khan CAKEWALKERS lama Main Officeah an dah phei a,nel pawh ka nel hman ve ta lem lo.

“Nia, hna chu thiam tak a ni..mahse, nangpawh i thiam em hi..chuvang lawm hna an rawn sawi belh reng ni” a nui kar kara, min fak na a ni tih hre mah ila ka lawm tawk a tling tho.Tumah fak lawm lo awm hek lo le.

Haw tura ka insiam laiin Zorina a lo thlenga,Bank lam dawr turin a chhuak tih ka hria.

“I hman tawh mi?” a rawn ti a, ka bu ringawt.Hlui min rawn melh zak zak chu ka hre lo der tlat bawk.Helai hmun hi Office a ni a, han induat viauna hmun tur a ni hek lo.

“Min lo nghak lawk” tih pahin a Office a pan a, rei vak loah a lo chhuak leh mai.

“Enge dik lo awm?” ka kut rawn vawn pahin a ti a, ka melh zawka, min en lo in hmalam a en a, a kutzungtang sei thlurh chuan hneh sawh zet hian a Motor steering a control a.

“Engmah chutiang a awm lo”

“Tak tak?” ka kut a vawnna a thlah a.

“Um, tak tak,ka lu a nuam chiah lo a,chu zawng chu nimai”

“Damdawi i ei em?’

“La ei lo, In ka thlen hunah ka ei mai ang”

“Aaah, zanin chu hruaina tur che ka nei asin” a ti a.

“Khawiah?” ka ti ringawt, ka lu a na miah lo,chhuanlamah ka hmang mai zawk.

“Kan inpuiah,ka pa te inah mawle, ka hmelhriat tir ang che ka lo ti a..” ka lungphu a rang nghal dawt dawt mai.Thih hrehin ka hreh.

“A van pawi, ka nuam meuh si lo a, hun dangah ti zawk ila a pawi em?” tim deuh dai hian ka ti a.

“Aih, pawi lo.I nawm loh chuan a tul miah lo,mahse, ka pi a phun dawn anih hi” zawi te hian a nui hawk bawk.

“Maw?” ka ti vat a, Pi a nei tih pawh ka hre lo.

“Ka pi mawle, ka kal ang tih ka tiam a, hmuh ve che a duh bawka, ka tiam tawh tih hlawhchham hi ka pi huat zawng ber ania” a ti leh a.Nuam lo ka ti ru nghal vang vang mai, mahse,ka kal thei lo.Anu kha ka hmu ngam lo ang.

“Oh..engtin nge niang?”

“A pawi lo, ka pi te chuan min hau fo alawm, ngaipawimawh suh,atan chuan ka tha ber reng tho a” a ti awlsam leh mai.Api kher chu kei pawn ka hmu chak ve ta tho, Pi a la nei tih tuman an sawi ngai lo a, hna lamah lah a pi engmah sawilan a ni ngai bawk lo.Anu leh pa leh a nau nen mai a khawsa emaw ka lo ti ve ngar ngar.

“Mahse, keimah vangin hauh i tuar dawna,nangma Inah zawk ka hmu thei angem?”

“Keima Inah kher maw? Ngatinge?” min rawn melh zawka, ka lo ip chawih mai.

“Ka hre lo, I in chu ka kal ngun a, nuam ka ti alawm, I pa te In chu ka hreh ve deuh,ahma khan ka record a chhe ve em a” ka ti ta ngawt, mahse, chhuanlam tha tak a ni tho mai.

“Ka hrethiam e, mahse, thil pakhat, ka pa emaw ka chhungte dang hi i pasal tur anni lo a, i pasal tur chu keimah..Mahse, chuvang chuan ka chhungte ngainep rawh ka tihna a ni lo ania” nghet churh hian a ti a, a sawi dik.

“Pasal...a la hma deuh lo maw?” kan boruak inthlak deuh thut tih zangkhai tumin ka ti sapa, ka nui lui hak bawk.

“Hma pawh ka ti lo, ka nghak rei tawh viauin ka hre zawk,I nau chu i be ta em?” a ti leh a, a hma khan Mama be turin min ti a, kan unau boruak a pangngai leh hle tawh nangin Pasal nei turin ka la inpeih hlawl lo a, sawi pawh ka la sawi chhin ta lo.

“Aih..”

“Ngati?” a ti hmuk a, nidang ang bawkin a mood a thlak leh vek tawh.

“Ka hre lo..englo, ih..thil engemaw min dal tu hi a awm tlata, chutiang chuan i awm ve lo ami?”

“Ka awm lo anih ka ring, ka ngaihtuah miah lo bawk” a ti leh hluk a.Engpawh sawi ila a mood a off leh tlat tawha, tih thinrim belh lo tur chuan ngawi mai zawk ila a fuh ber ang.Ka thutna hnunglam ka nghenga, pawn lam ka thlir ta daih, Motor tawt lutuk avangin kan tlan sawt lo ngang mai bawk.

“Sorry...ka nawr nasa lutuk che in ka hria” ka kut a rawn vuana, ka kut zungtang karah a kut a rawn rawlh a.Ka thle baka,a hmel pa leh hriam hraih maiah chuan engmah a ngaihtuahna awm ka hre thiam lo.Thil mak a ni hek lo, mipa luhlul ve tak leh induhtawk tak mai a ni a, a hmelah engmah a lan tir lo hi a mak lo,amah ang hi Mipa tamtak nih dan phung ve reng a ni zawk.

“A pawi lo, keipawh ka dik lo maithei asin” ka nui lui sak bawk.

“He Traffic jam nasa lutuk hi i vanneih pui leh ta tlat” ka hmui a rawn tuai zauha, ka thaw hak mai,a sawi tum ka hai hauh lo,tlan thei loin Motor dang tam tak nen in line lo ila chuan thleng tura ka duh miah loh mahse ka dan hleihtheih lawi si loh a thleng dawn tih ka hria.

Inah lo chho ve loin a tlan let lehnghala, Mama a lo haw tawh mial,tunlai chu kei aiin a tlai deuh ziah.Faifuk rat rat pahin salad tur a lo chan mek a, ka thawm hriain a rawn hawi chhuak vat bawk.

“I khumah  khan i percel tur ka dah ania” a rawn ti a, eng percel tak ni ang maw? Online a thil chah hi nuam ka ti viau a, ka chah leh mai thin bawk, mahse, Pawisa ren ka ngaih em avangin Bazarna chi Apps ka neih zawng zawng ka uninstalled ta vek a, chuvang takin eng percel nge lo thleng tur ka hrethiam lo.

“Chaw i chhum tawh mi?” ka ti a, Dinning tableah ka bag ka daha, Fridge ka pan a.

“Chhum tawh,hei hi ka zawh chuan kan ei thei nimai,eee...Joe-a khan hmuh che a rawn tum seka, call i pick thei lo a ti bawk tak asin” a ti leh a, engtak ni leh ang maw?

Mama nen kan intihbuai zan atang khan kar khat lo liam a la kal lo ,mahse, a tira a thinrim tehreng nen khan engmah a ti lang zui leh miah lo,Zorina lo kal pawh tha takin a lo be leh thei tawh lawi.A tir kha chuan a that duh mai dawn emaw ka ti hmana, kei lah min be tha duh hauh lo bawk kha ania, tunah chuan engmah thleng lo ang maiin a khawsa leh tawh.

Khuma Percel phek thlir thler lo awm chuan ka mit a la chat ,ka pan hnaia, a kawmah ka address chiang takin a inziak a, ka hming pawh hmingpum thlapin a inziak bawk.Ka la kanga, a rit nalh mai,ka thinga, engmah ri a awm lo, khuma thu chungin a charna ka pawt thla a, a chhungah a lo intuam leh a, an uluk em em lutuk chuan min ti hlau lek lek mai.

A chhung zawk tuamna ka phelh leh a, ka pawt tet a, Paper inthlep hi a lo awma, ka pawt pharh a,enge anih ka hmuh takah chuan ka thaw hak mai, kan ram,Mama damloh laia ka hralh ngei kha ka hmingin a lo let leh ta tlat,ka mit ka nuai a, engmah a dang lam lo.Tu tih nge ni ang? Zorina..a ni thei lo, ani chuan a hre miah lo zawk ang.Mama khan loan lak nan min dil kha ania, ka hralh tawh miau avangin ka bei a dawng hman a, tunah lem ka kutah a lo let leh ta lawi.

“Engthil nge a?” Room a rawn luh pahin a rawn ti a, ka thlep leh a, thuhruk ka tum zeta, tul ka ti leh lo.Tunah chuan a puitling ve tawha, thil engkim hi hre ve se a tha zawk ang.

“En la..” tih pahin a lamah ka lek hnaia, a rawn la a. A pharha,a hmel a danglam nghal titih.

“Hei hi Ka pa khan keima hminga thlak tur ati emaw ka ti a?” lawm vak lo ri ka hre thei.A boral hnu khan Mama hmingin kan thlak vek.

“Nia, eng lo..I damloh lai khan i hriat lohin Ka ni te hnenah ka hralh tawha, mahse, tunah keima hmingin a lo let leh a, loan lak nan min dil pawh khan sawi mai dan tur ka hre lo anih kha..” a lu a thing nawk mai.

“Ka ni chu zawh angai anih chu..” tih leh Phone phawrh a ruala, dan ka tum zet nangin ka dang duh ta lo.Hrechiang law law ila a tha zawk.

“Living room tang lo va be teh, ka inthlak lawk dawn” ka ti a, a chhuak ve mai.Ka thawmhnaw ka hlip a, vawiin khan ruah a tla nangin khawlum a daih phah miah lo, kan Officeah AC a chhia a,thlan vangin ka ban deuh chuap a,Chawei hmain intleuh ka mamawh tlat.

Ka inbual zawhin Kitchen ka pan nghala, Mama chawei lo siam mek ka tihpui a, engmah a sawi lo chuan ka awm a ti nuam lo leh deuh titih,” engtin nge a tih a?” ka ti ta nge nge.

“I hralh hnu lawk khan mi pakhatin hnenah an hralh tih a sawia” thut pahin a ti a, a thlenga eitur awm a chawk kuala.

“Tu nge ni ang le? A hming a sawi em?”

“Aw, mahse, thingtlang lam mi a ti a..” ta deuh deuh chuan a.

“Ka lehkha dawn kha chhui zui angai dawn anih hmel, mahse, lehkha ber kha Court atang vek a ni bawk si..tu nge niang le?” ka ti a, angaihna ka hre lo, Ram ka hralh tih kha kei leh ka ni te bakin an hre kher lo ang.Ka nutei hi thil hriat tum hrim hrima buai a ni a ,a lo hre mai thei bawk.

“Ka hrethiam tawh bik lo e a, a leitu zawk chu zawng chhuak phawt ila a hriat mai ang..eng lo..Ka nu animai angem?”  ka thil ei ka hak a,ka khuh zui bawrh bawrh mai.

“Ngatinge a?” tui min rawn pek pahin a ti a, ka hnungah a chum dat dat bawk.

“Engmah...i sawi thut a..” ka khuh leh rih..A thutna ah a thu leh a.

“Thil ka hriat ve loh a awm em?” a ti leh khauh a, hrilh tur nge hrilh loh tur ka hrethiam hlawl lo.Hrilh ila engtin nge a tih chuan ang? Ka hrilh loh hian enge hlawkna a neih chuang?

“Mawh?” amah bawkin a ti leh a, a thil ei lai chawl meuhin min melh ran bawk.

“Ih..engtin nge ka sawi ang ka hre lo alawm,dik tak chuan kan nu a ni ngeia, mahse, ngatinge kan nunah hian Buaina chiah min thlen ka hrethiam lo” ka khuh leh khauh a.Tui ka bana, ka in leh rih, Mama hmel buai deuh nakah chuan ka sawi a man miah lo anih hmel.

“Thil kal tawh chu a kal tawh a, i huatna kha i paih loh chuan i hrehawm mai mai ang” a ti ta nge nge, a sawi dik,ani leh Nautei hi chuan ka nu hi kei ang em chuan an haw ve lo.

“Nia, kal tawh chu kal tawh ania lawm,mahse, tunah hian eng nge a tih i hria em?”ka ti leh a,sawi chhuah mai dan tur ka hre lo.

“Hre nang, chaw a ei ve mek te pawh a nimaithei a” a nui a, ka nuih a za ve der lo.

“Vawiin khan Zorina nu a lo kal a, min rawn hmu turin..eng lo, ih..Zorina Pa leh Ka nu an lo inkawp niawm tak ania,chu chu Zorina hriat hmain chingfel turin min duh a” a hmel a awih lohna leh mak tihna lang kawp chu ka en a, mak zetin a nui chhuak hak bawk.

“Enge nuih tur awm a?” ka ti hmaka, a nui tawp riai riai chu ka en a.

“Engmah, a awihawm loh em alawm..”

“Keipawh hian awih loh ka duh lutuk, mahse, khatiang hmeichhia, mahni Fa nu te bialpa pawh lo chetsualpui duh khawp kha chuan engpawh a ti thei ang..” ka tho a, ka tum aia nain ka chair ka nawr sawn pawp bawk.

“Maw? Sawi nawn leh lawk teh” nuihzatna lam engmah a lang ta lo.

“Kha thil vang khan asin ka nu hi nangni aia ka huat bik a ka ngaihdam theih loh..Hriata nen khan..khumah ..” a rawn tho a, min rawn kuaha,kei aiin a lian zawk fe a, a cher deuh tih lohah chuan Zorina a chen lohna a tam vak lo.

“A tawk e. Sawi tlak pawh a ni lo..” ka mittui a rawn tla a, ka nau te hnenah he thil hi ka la sawi chhuak ngai lo, sawi chhuah pawh ka duh ngai lo.Mahse, tunah chuan ka sawi ta,anih tur a ni zo vek tawh.Ka mittui a rawn tla a, ka nu vang in ka tap nge keimahni ka inkhawngaih zawk vang ka hre thiam lo.Mi unau te pawh hi an inpawh em em ang tih ka hria, mahse, kan unau kan inpawh ang hi chuan an inpawh ve ka ring lo,unau chauha awm kan ni a, chutah pawh harsatna kan paltlang nasa a, tuarchhel kan mamawh ngawih ngawih avang hian intichak tawn turin kan infuih a, hei hian kan inpawhna hi a ti nghet zual em em bawk.

“Zorina hian min neih a duh a, mahse nang leh Nautei kalsan hi ka thei lo..Engtin nge ka tel lo in in awm ang? “ tah aw deuh hian ka ti a, ka insut zui hraih bawk.

Min kuahna a thlah a,a thutna ngaiah a thu leh a,min rawn en a.

“I tel lo a awm hi ka lo la ngaihtuah ngai miah lo, hman zan a u Zorina’n min rawn hmuh pawh khan i thu thu a ni tih bak ka sawi ta lo” a ti a, phawk hra hian ka en a, engtik laiin nge Zorina nen an inhmuh ka hre lo.

“In inhmuh lai pawh ka lo hre lo,engmah i sawi lo a, a sawi bawk si lo a” ka ti a, ka kut sil turin tap ka pan a.

“Insawifel sa vek anih ka ringa, ka sawi ta lo mai anih kha, mahse, thil pakhat ka lo ngaihtuah a, a duh tak tak chein ka hria” a ti leh a, Midang hnen atangin hria ila chu zahna tur a awm kher lo ang, mahse, mahni nau te ka ngei atanga hriat chu tlem chuan a dan a dang deuh.

“Ka hrethiam lo, nei dawn pawh ni ila ka nu bawk chu..” ka ti leh sep a,min chhan tuma a ang ziau tawh chu Joe-a lo lut a hmuh rualin a tawp leh ta daih.

“In ei tawh maw?” kan boruak man lo zet hian a rawn ti nghal a, ka bu ringawt, kan thil eina ka sengfel nghal a, ka sil zawh leh hnuah Living roomah ka va zawm ve ta chauh.Mama leng turin a chhuaka, Joe-a erawh a la awm thung.

“Vawiin kha ngatinge Phone i pick theih miah loh a?” a ti a.

“Ka lo silent alawm, tunah sawi mai la..”

“Aaah, a ho leh tawh e,Zomuani nen kan inhmu a, Lunch ei turin lo kal ve rawh tih che kan tum a” a ti a, ka haw hma atangin min hmuh tumin a lo kal tih Mama khan a sawia, chutiang mai mai a ho anih ka ring tlat lo.

“Ho thei, mahse, Mama khan tlaiah pawh min hmu turin i lo kal tih a sawi sia, a pawimawh mawni ka ti?” ka ti leh a, a ner saka.

“Pawimawh nang,thil dang daih zawh che ka tum vang mawle,Zorina a lo kal dawn em?” a ti leh a.

“Ka hre lo”

“Zana lo kal a, lo len tih vel hi chu a peih chiah lo in ka hria” a ti ve mai,a sawi dik ang, a lo kal tam lem lo.

Reife Joe-a a lo leng a, a haw veleh mu turin khum ka pana, ka phone ka en a, miss call a lo awm dal mai, ka en a, Zorina lo call na a awm,number hriat loh ti a ka save hnen atang bawk khan vawi khat a awm tel bawk.

Zorina ka call back nghala, a lo thinrim leh tung tawh zawk maithei ani..Mahse, a pick miah lo,ka tinawn leh dawn chiaha, amah zawkin a rawn call a, ka nui sak mai.

“Hello..” phur fe hian ka ti a.

“Nanun,Zoa hi a buai lawka, nakinah lo ka lo call tir mai dawn che mi?” Hmeichhe aw hian a rawn ti a, tu nge anih ka hria..Noel-i..

“Ok..nia, miss call ka hmuh vang ania” tul lo zet hian ka ti a, engvangin nge Noel-i anih vanga ka nawi nak kher zel ni?!

Ka mu meng kar mai, Mama a lo haw tawh a, Sana ka en a, dar 12 a ri tep tawh, tun thlengin Zorina lo call hun ka nghaka, a lo la call ta lo cheu.Ka chhungrilah hlauhthawnna a lo lang a, Noel-i nen an riak dun mai angem?Good night msg ka thawn ta ngawt, mahse, a rawn reply chuang lo.

Ka beisei loh deuhin ka mu tha ta phian, ka alarm ri bawkin min ti harha, ka phone ka en vata, nizan khan min reply loh vanga thuphachawina ka beisei a ni zawk mah.Ka beisei ang ngeiin Zorina msg a lo awm vang mai.

“Zingah Inah lo kal la, thil pawimawh a awm” tih zawng..Ka ner nak mai, engmah tih dik loh a nei hauh lo,a call ka pick lo a, ani pawn min reply lo a, min lo call bik lo animai, hna lamah chauh Noel-i nen an inzawm a ti a, nizan pawh kha hna lam anih ka rin mai angai ang.

Joe-a ka call a, a Scooty hman ka dil a,a lo phal ve mai bawk.Hna tlang nghal angaih palh takin tih thuah ka insiam lawk deuh a.Chubakah  Taxi a ka kal chuan ka rei lutuk palh thei,  tihtur tul viau a lo awm anih pawhin Scooty hi chu Zorina Driver ka dah tir thei tho bawk.

Gate a lo la inkalha, Gate pawnah Scooty ka daha, Mihring luhna tur a sira awmah chuan ka lut a, he lai hi chu zing karah Zoi emaw Driver zawkin a hawng thin tih ka hria.Tumah an la tho lo niawm takin a reh deuh raih bawk.Veranda ah ka chho a,ka kal hma over pawh a ni lo a, an la reh thiap mai chu mak ka ti deuh,Door Bell ka hmet a,rei vak lo chu a reh thiap tho, ka hmet nawn leh tur chiah chu Kawngkhar kalhna ri rak ka hria a,ka tawlh hnung a,thawh an hai a ni ngei ang.

A rawn inhawnga, ka tum loh lutukin Noel-i nen kan inhmachhawn ta ran mai..Mu tho hlim tih hriat zet hian a sam a hnawk niaih bawk.