PURPLE HEART - 5

Chapter- 5

Tui hal huam huamin ka harha, ka mengchhuaka,mahse ka lu na lutuk vangin ka mit ka chhing lehnghal vat. Che loin ka mut ngaiin ka mu a, ka tui hal zia lah chu a namai lo, rapthlak lamah a kal mah zawk.

Meng loin ka inlet a, ka tihfo danin ka mutna bula Soso-i mu kuah ka tuma, mahse ka dap fuh thei lo.Hmmp,huanah a riak daih alawm mawle. Soso-i huanah a riak tih ka ngaihtuah chhuah rualin thildang pawh ka ngaihtuah chhuak nghal zut zut.

LALPA.. Ka thuchhuak nghal a, rit luk leh bek na tluk tluk chungin ka hawi kuala, ka awmna hi kan In a ni lo.Anih chuan khawiah nge ka awm tak? A landanah hian mimal Hotel a ni chiang lutuk.Tinge hetah ka awm ngawt? Ka tui hal lutuk chuan ngaihtuahna fim min put tir thei lo.Tui intur zawnga thawh mai ka tuma.Mahse,Khum sira Cabinet hniam leh te fel at maiah chuan tui bottle a lo awm a. Ka bana, hmanhmawh lutukin ka herh hawng nghal a, hmui phawi leh tawh loin ka infai vek. Ka dam nghal huai huai thei. Hei ngei hi Pentawng an tih chu a lo nih dawn hi a.

Ka lu na tluk tluk chuan ka bekah a kher ngut nguta, tuboh lian takin ka bek tawn tawnah chhu se chutiang nen chuan ka lu nat dan hi a in ang deuh ber ang.Thildang ngaihtuah peih loin khumah bawk ka lawn leha,Lukhama inkamkang chungin ka thu mu a, meng loin ka ngaihtuahna ka kawma. Nizan khan ka in hnem lutuk tlat.Awi,Zorema kha ka luakkhum tak alawm. Ka ngaihtuah chhuah leh zawng ringawt pawhin ka hmai a sa huai huai theia. Khatiang khawpa zahpuiawm khan engtin nge maw ka khawsak theih zawk ni? Vei nei lo leh zahawm tak anga lan ka tum luatah hmeichhe tawp hnawk em em angin ka lang ta chu ania.

Ka luak zawh hnu khan ka chatthla zui nghal tih ka la hre rei ruaia, min pawm kan lai leh min kalpui pawh chiang mang loin ka hre leh a…Mahse hetah hian engtin nge ka thlen? Zorema bawkin em ni hetah hian min dah ang? B-i zawk nge? Ni lo,B-i chuan Hotelah ni loin kan inah min dah ang.

Ka phone…Ka tho chhuaka, ka lu na vangin ka then leh sawk mai. Nizana ka thawmhnaw hak ngai  ka la haa, zu thing rim ka nam vung vung bawk.Keimah leh keimah ka inten ber tum a ni hial ang.

Dawhkan lian lo tak chungah ka bag a lo awma, ka hawnga. Ka rin ang ngeiin ka phone a lo awm a. Ka la kanga, a lock ka hawng nghala,mahse ka tum loh lutuk ka zuk hmuh takah chuan ka mengphar awk mai.

‘Engmah hlauhthawn tur a awm lo.I harh hunah i haw duh anih chuan min lo bia ang che. Ka number chu i contact list a awm hi ala ngai reng’

Khur ru dar dar chungin dawhkan tlang ka vuana. Tu nge anih hairual a ni lo. Ni e, a sawi dik.Vawitamtak a number ka delete a, mahse ka thluak zawk hian a delete thei lo.Chuvangin ka save leh a. Diktak chuan Phoneah save lo pawh ni ila kum 4 zet hnuah pawh hian ka hriatrengna ala chhuahsan ngai miah a. Hriatreng tuma a hranpa taka beih chiam lah a tul miah lo zui bawk. Mahse, nizana ka chahthlak lai khan ka phone lock a lo hawnga, a number save a tumna lamah ka lo save sa kha a hmu tih achiang..B-i call lam pawh alang tawh lo.Haw vang vanga,inbuala,inngaihtuah ka duh.

‘Enge mamawh i neih ang?’Reception counter a lo thu, hmel fel vang mai chuan min lo ti nghal var.

‘Bill tihfel ka duha’ ka ti a. Ka awmna room number leh zankhat ka riak tih ka hrilha.A bu nghata, Computer Monitor a en a.

‘Engkim a fel sa vek alawm’ min rawn en a. Phawk zetin ka melh let haw ringawt.’ Eng lo..’ ka ti a,mahse ka ngawi lehnghal daih.Tu nge tifel tih ka hriaa, zawh kual chiam tul ka ti leh lo. Ka bu nghata, lawmthu ka hrilh ta zawk.

Pawnah ka chhuaka, Taxi ka hmuh hmasak ber ka phara, ka lut nghal vat. Driver hnenah ka kal duhna ka hrilha, ka rim na lutuk chu a hriat ka hlau takzet. Mahse, a hnung seatah daih ka thu a, a hre kher lo ve maithei.

In ka thlen veleh ka inbual nghal sawk sawka, ka rim thing lutuk pawh a zia ta deuh.Mahse, ka hnarah a cham laklawh vek tho.Soup ka siama,riltam zetin ka in zo nghal duak duak mai. Ka nu leh Bawihtei mai bakah kan nula,an khaw lama a haw lai a ni hlauha,zan ka haw lo pawh zawhna min zawt tur leh mak ti tur an awm lo a.Thawven khat chuan ka thawveng.

‘Khawiah nge i awm?” Phone ka pick veleh B-in min rawn ti nghal tawng.

‘Inah…Vawiin chu ka lo kal dawn lo ania,Ka lu a na lutuk’ ka ti nghat.

‘Ka rindan tawk vel tho alawm.Mahse, tinge min hawsan kher a?ka call char char che a, I pick lo va. I rawn whatsapp kuala,msg pawh type peih tho si khan ka call kha pick mai tur che alawm” a rawn ti leh a. Ka thu mar awk mai. Msg ka thawn maw?

‘Ka kai ve lutuka..Ka in nawn leh tawh lo viau ang’ mak ka tihna tilang loin ka ti a.

‘Nah,Martin-a khan a star rapthlak che aw.I number lah ka lo pe hmiah’

‘Hmeli,a tul lo em mai’ ka ti hlar mai.

‘Tul iti ngai reng reng hleinem.Mahse, hmasawn i mamawh,khatiang ringawt khan i awm thei lo a. Bakah, nei rawh ka ti lo che a. Thian atan pawh a thaa’ thiamchan tum takin a rawn ti leh zat zat.

‘Thian ka mamawh chuan i awm a’

‘I ninawm,hmasawn tum rawh.Ka dah dawn ania;chuan,tha deuhin lo bia ang che’ a rawn ti leh zat zata, ka chhan let hmain a off zui nghal daih bawk. Whatsappah ka lut vata, B-i nen kan inbiakna ka en a. Nizanah msg engmah ka thawn lo.

Ka phone ka thehthlaa, Tukverh lam ka pana, pawn lam ka en a. Ruah a lo hmi leh seng seng tawh.Muangchangin thawk ka laa, thil thlen dan ngaihtuah chhuah ka tuma. Ka thei lo.B-i sawi hmang khan ka hawsana, ka hawsan tih pawh msgin ka hrilh zui bawka. Huizz, Zorema khan ka phone lock kha awlsam takin ka kut zungtang hmangin a hawng thei a, anih chuan B-i pawh amah bawkin msg a lo thawn tihna a ni ngei ang.A delete zui leh bawk anga.Whatsappah a lut anih chuan midang nen kan inbiakna a check angem? Ka lu ka thing nak.Ngaihtuah nasat poh leh ka zahna tur ka ngaihtuah chhuak tam ting a nimai.

Chawhma chhung zawng chu awm nuam lo leh rit lukin ka awm tluan ta parh. Damdawi ka ei lah chuan min chhawk hleithei lo. Ka ngaihtuahna lah chu duh lo teh mah ila nizan lam thil thleng bakin a luah thei miah lo zui.

Ka Phone nghawr dar darin min ti harha, harh chiang mang loin ka bana. Mahse, min rawn call tu ka hmuh rualin ka meng nghal kawk mai. Pick mai loin ka en deuh vang vanga, ka hmai lah a sa nghal hat hat bawk.

‘Hello’ vawihnih a rawn call naah ka ti ta nge nge.

‘I lo chhuak tawh a’ a rawn ti nghut.

‘Nia..’ ka ti mawl ve tawp.

‘Enge i an?” a rawn ti leha.

‘Maw?’

‘Nizan kha,Oh..Nia, engmah i hre tawh lo ang’ zawitein a nui hawka.Ka hmai a sa nasa zual sauh.

‘Pawi ka ti lutuk.A zia lo e..E,Hotel bill kha min lo thawn la,I ac number nen; ka rawn transfer ang’ ka tih zawm leh duah.

‘Ba i nei lo’ min chhang dawn lo emaw ka tih hnuah a rawn ti mar ut. Ka thaw nghal hak mai.

‘Ka ba lo maithei.Mahse, tu thil mah a thlawnin laksak ka duh ngai lo a.Chuan,ka lawm nawn leh’ ka ti leh nghat.

‘In hmuh lehna hlimawm tak a ni’ a tawngriah chuan tih elna lam engmah alang lo. Diktak chuan ngeiawm taka tawngkhum loin lawmthu hrilh mawlh mawlh tur zawk ka ni a. Mahse, harsa ka tit lat pek.

‘Nia..Chutianga i ngai thei anih chuan a lawmawm’ ka ti ve ta nge nge.

‘Ka ngai thei mai ang ka ring’ a ti dam leh thlup.

‘I ac number leh bill zat chu aw’ ka ti leh a.

‘Thil dang duh ta zawk ila..’ a aw ki ril zet chuan min fan rawih rawih thei hial. Muangchangin thawk ka la a.

‘Sawi la…’ ka ti fan raih mai.

‘Vawikhat Dinner min ei pui la’

‘Aih’

‘OK..I duh loh chuan tihluih che ka tum lo.Ka tilui thei lo bawk che a’ a ti vawt ruih. Inthiam lohna in min rawn fan nghal a.Ka awm a nuam lo zo vek.

‘Pawisa zawk chu..’

‘Theihnghilh rawh. Ka lo awm hnai kha a vanneihthlak a nimai’ a ti leh nghut. Ka hmui ka peta,ka hnial dan tehbawl kha a polite loh thlak tih ka hria. Mahse, ani nena hun hman dun ka duh lo bur.

Kan inbiak zawh hnuah ka thut ngaiin ka thu ren rawna, nizan atanga tun thleng hian mumang ni se, harhchhuah san vang vang ila ka ti takzet. Vawiin a min raw biak dan leh nizan thil thleng zawng zawng ka ngaihtuaha. Min tanpui nasa a, a duh phawt chuan min kalsan vang vang thei. Mahse, a ti lo va. Vawiin thlengin ka that leh that loh min la rawn zawta, Keiin lawmthu sawia call tur zawk ka nih laiin ka ti lo. A vai khan lawm ngawih ngawih tur ka ni.Mahse, a thil duh kha chu ka tihsak thei lo.Amah ka hlau ni loin keimah leh keimah ka inhlauhpuia, hahdam takin ka hmachhawn thei angem ka hre tlat si lo.

Ka nu leh Bawihtei,ka u in a rawn thlaha,nidang ang bawkin kartawp chawlh hmang turin a awm tlang ve nghal dawna. Min ngai takin Soso-in min kuah nghal chang chang mai. Sawitur angah em em a, a piantirh atanga ramhnuaia a kal vawikhatna a ni a. A sawi tawp hleithei lo. Ka u lahin Sazupui a lo vulh kher bawk nen,chungte hlei hlei chu sawi nuam a ti a. A riat nawk nawk a ni ber mai.

‘Mommy, Apu bulah engtikah nge ka kal leh ang?” a ti a. Khumah a mu a, a ham bai bai bawk.

‘Ka hre lo le,School chawlh hunah te ti ila..A tha angem?” ka ti a.’ Nia,tha ngawt ang. Apu sazupui khan min ngai a, a mittui a tla vel a’ a ti leh a. Ka nui nghal hak mai.

‘Anih chiah chu. I kal leh vat dawn nia..Tunah chuan muthilh a hun tawha’ ka ti a. Ka mu thla ve a, min rawn kuaha,a sam rimtui leh nem thep mai chu ka fawp nghal vang vanga. Ka ngaihtuah naah Sebastiana-a a lo langa. Ka awm a nuam lo lehnghal ringawt. Arti nen inbe pawp ta se, Arti-in pasal a lo la nei lo anih chuan an inkawp leh lo ang tih a sawi theih loh.Chutiang hun chu lo thleng ta se ka chan mai angem? Dan ang thlapin fa nihna nei mah ila ka chan thei tho ang. A hringtu nu leh pa anni tlat a.

Nghet zetin Soso-i ka kuaha, chan mai tura ka inngaihtuah zawng ringawt pawn ka mittui a parawl nghal teuh thei. ‘Mommy,a na…’ a ti tham chhel a. Ka harhchhuak nghal zawk. Ka kuahna ka thlah dula, ka mittui khap kir tumin ka khap nghal sawk sawk mai.

Sunday kan hmang zo a. Bawihtei hlim au ri chel chul leh a tlan kual chang chang reng te chuan Zorema laka ka rilru kal ding lutuk tur min veng ta hlauh. Ka u kal leh tur chu Soso-in a sazupui te hnena sawi tur a chah hnem ngang mai. Ka u lahin uluk em em in a ngaithla ve dauh dauh a. Ka nu nen kan nui kan nui thung. Reitak la cheng ho lo mah se ka nu hian a tunu tak tak angin a ngai thlapa,ka u lahin chutiang bawk chu a ni a. Chan dawn se chuan kei ang bawk hian na an ti ang tih ka chiang ngam vek tawh. Sebastian-a bawk ka ngaituah naah a lo langa. Ka awm a nuam lo lehnghal vek . Ka nu hrilh ka tum that thata, mahse tul loah a rilru ka tihah mai mai ang tih ka hlaua, engmah ka hrilh ta lo.

‘Ka haw hma angaih ka ringa’ thil kan ei laiin B-in a ti a. Ka bu liam satliah ringawt.

‘E,Martin-a chu..A lo bia che em?” zawitein a ti leh a.

‘Be lo..’ ka ti deuh hmak.

‘Deuh teh hmak che hian a’ a ti a. Za zetin a nui zui kar kar mai. Ngei zetin ka en a, nghal lutukin a meng rang kuala. Insum thei loin ka nui ve leh ta nge nge.

Zanah ka rin loh zetin Martin-an min rawn biaa. A la rawn inthlahrung phian zui bawk.Mahse, inhresa kan ni bawka, kan titi a rual ta thuaia.Karkhat a liam leh meuh chuan kan inkawmngeih ta phiana.Tawngduh leh mi ti tlangnel thei tak mai a ni a. Dawrah te min rawn tlawha, amah a lo fel bawk nen kan nau te ho pawhin an ngaina thuai mai. Rural Bankah a thawka, a awmna Branchah a thu pawl a ni a. A smart mai bakah a mize dam thlap mai hian Customer a hip dawn tih achiang reng. Min duhthu a sawi ngai lova, thian kawmin kan inkawma; a single tih vawikhat a sawi zauh tawha. Min bem a ni lem lo bawka han sawi zawm chiam ka tum lem lo.

‘U Terin, naktuk  zanah Party tenau deuh kan siam dawna.I lo kal hman ang tiraw?” Evelyn-in a ti a.

‘Ka lawm viau nangin ka theih ka van ring lo tak’ nui chungin ka ti a.

‘Naaa, thei hram la. Diktak chuan ka Birthday ania’ a ti leh a. A hmeltha zetah chuan min sawm mai mai loin min sawm tak tak tih ka hmu thei.

‘A chakawm tawp.Mahse, enteh…Nula niloin nuthlawi ka nia,chu pawh fanu nei lehnghal’ ka nui a. Za lo zetin a then ve sak.

‘Ka hrethiam tho a. Mahse, zankhat chauh ania.Chu pawh tam deuh kan ni dawn lo va..U B-i nen in lo kal anga’ a ti leh a. A ngengawl lutuk chu mak ka ti zawk.

‘B-i a lo kal chuan a tawk mai lo mi?” nuam ti chiah loin ka ti leh talh.

‘Aih,ilo kal ve loh chuan ka vui viau ang’ a ti leh tlat.Ka phat kual ngial pawhin min sawm ngat ngata, ka OK hma chu ngen tak tein min ngen a. Diktak chuan Soso-i vang anih rualin Zorema a lo kal ve ngei ka ringa. Chu chu ka duh lo a ni zawk.

‘Anih leh ka lo kal dawn chuan thian mipa ka lo hruai thei angem?” ka tita nge nge. A chal a tichuar tapa, min hnial tum emaw ka ti hman.Mahse, ‘A tha alawm.I lo kal hrim hrim chuan a tawk mai.Mahse, amah chu ka biak angai dawn em?’ phur sarhin a tita zawk.

‘Aih, ka lo bia ang.Sawmna hmu lo a intih chuan ka lo hrilh leh mai ang che’ 

Evelyn-i kal hnuah B-in min rawn thut hnaiha,’ I kal hreh em? Kei chu Martin-a a tel ve dawn chuan pawi ka ti miah lo ania. Kan runluih ve salh anga’ a ti a. Ka thle bak ringawt. Martin-a nen kan kal avanga rilru na turah kan dah hi ka nuih te lam lam a za. Engvang tehlulin nge maw a lo nat ang ni?Diktak chuan kha thil zahthlak zet thlen hnu a min lo biak bak kha vawikhatmah min be nawn leh lo a, ka hmu nawn leh hek lo.

Martin-a ka biaa, Party naa kal turin hun a nei em tih ka zawta. ‘Min mamawh chuan eng hun pawh nise ka hman reng’ nui hak hak chungin a rawn ti awlsam then.

Ka nu hnenah Evelyn-i min sawm dan vel ka hrilha, ka dil chiah lo nangin ka sawi danah a phalna ka la tih a hriattheih tho. ‘Kal rawh,kal rawh.Thian kawm hi a tha ania,I inkhung nasa leh lutuka.Dawr leh In bak i teihawi lo lutuk; Chhuak harh ve rawh’ a ti awlsam then. Nun chawhnu ve lam tawh a ni a, Candy crush a atchilh tih mai loh chu khawvel thil hian a nun a tibuai lem lo viaua. Model leh Designer tih vel phei chu a ngaihven loh lam zawng tak a ni chhap nen,ka customer zinga Mizo Model leh Designer lar ve tak tak te pawh tumah a hre sa lo. Evelyn-i erawh a regular mai bakah Bawihtei’n a ngainaa. A sawi fo avangin a hre ve tawh viau.Zaithiam erawh a lar zual chu a hre ve leh khiah zel thung.

Ka insiam zo vek tawh tihin B-in min rawn call a, ‘Ka hman tawh.I hman tawh mi?” Hello pawh ti loin ka ti nghal a.

‘Aih,ka kal thei dawn lo’ a ti hul hak mai.

‘Eh! Ti nge a?” ka mit ka hnawih lai ka chawl a.

‘Awi, a thui lutuk..Min lo hrethiam phawt mai rawh.Chuan,Eve-i hnenah khan min lo phatsak mai la’ a rawn ti leh a. A aw nguai raih mai chu thil pangngai a ni tlat lo.

‘Ka kal lo ve mai zawk ang. Eve-i te chu call a harsa lo a’ ka ti nghal vat.

‘Ngai lo,a vui lutuk ang. Naktukah ka lo bia ang che.Kal ngei ngei rawh’ a rawn ti leh a.

‘Eng…’ ka ti hman chauh tihin a off nghal daih!!

Angaihna hre loin ka din ngaiin ka ding ren rawna. Ka Phoneah msg a rawn lut a, ka en nghal vat.’Family problem ania, Naktukah ka hrilh ang che,Phone a sawi chi a ni lo’ B-i a lo ni a. Unau pathum niin a naupang ber a ni a. A u mipa ten nupui an nei ve ve tawha, pakhat an inhnuaiah an awma. Pakhat erawh inpuiah an awma. Fa pahnih an nei tawh bawk.A pa hi pa fel tak niin YMA hruaitu hlun a ni a,a nu pawh nu fel tak bawk. An chhungkua an fel veka, an hlim tlang thin bawka. Eng Problem nge an neih thut ang ka ngaihtuah thiam der lo.

B-i a kal dawn tak si loah chuan thulh ve mai ka duh ta rum rum.Mahse,min sawm nasa si,Martin-a lah ka lo hrilh fel vek tawha.A lo thlen a hun dawn tawh zawka..

‘Khawnge B-i chu?” Martin-an a ti nghal a.

‘Problem a nei leh thut a..Kan pahnih kan ni dawn ta nih hi’ zangkhai thei ang berin ka ti a. Carah ka thu lut zui nghal a.

‘Thil pakhat ka sawi dawn aw’ Motor Start mai loin a ti leh rih.

‘Sawi la..’ka ti liam puat.

‘I nalh’ a ti dam thlap.

‘Naaa..’ tihngaihna hre loin ka ti hap ringawt.

‘Ka ti tak tak,college kal lai khan i tawk viau thin emaw ka tia, tunah hian i tawk daih zawk’ thutak zetin a ti leh a.

‘Mizo Model lar tak Party siamah kan kal dawna, Mizo zinga Model kan neih that ho an kim thup dawn sia. Ka tang alawm’ ka ti a. Ka nui zui hak hak bawk.

‘Ok,nia..A tha alawm.Mahse, I nalh ber tho ang’a ti leh talh.Tawngkaa chhang loin lei ka chhuahkhum ta ngawt.

‘In lo thleng thei maw? khawnge u B-i?” Evelyn-in min hmuh veleh a lo ti a. A incheina a inhmeh ngang mai.

‘Problem a nei thuta, min lo phatsak mai teh a rawn ti a. A lo kal chak tehreng nen i ngaidam mai aniang chu’ ka ti a.

‘Anih chu mawle..Nia, Problem te chu a awm thei alawm.Nangni tal in lo kala, a lawmawm’ zangkhai vahin a ti leh zung zung.

‘Hei hi ka thianpa em em,Martin-a ania. Chuan,Martin,ani hi Birthday Girl Evelyn-i ania..’ tih pahin ka inhmelhriattir a. An inchibaia, Polite takin an that leh that loh an inzawt nghal luam.

‘In duh dan danin lo awm ru aw. Midang ka va ngaihven ang.Oh,u..Hei u Terini te an lo thlenga, ilo buaipui hman angem?” ka hnung lam en chungin a tihzawm zat.

Ka inhera, ka hnung chiaha Zorema lo ding chu ka hmachhawn ta siah. Kamiz,a taksa phuar deuh lek lek a haa, a kekawr kawngah a bilh luta. A sam melh nalh zet leh a hmelpa lutuk chu a inhmeh vel vek.

‘Zach…’ zai thiamna aia chhungkaw hlun atanga seilian anih avanga lar,hmelthat leh pian nalh vanga Zaithiam lo chunga zaithiam lar nisi,vawi tamtak min rawn Dawr tawhtu Hriat’in a rawn ti a. Zorema’n a chhan hmain inti neitu takin a banah a rawn kuaha,a ngheng hnai nghal talh talh bawk.

PS : KA KHAWVEL CHU 🤮🤮 TIANG HLIR HI .RAI NO HI NUAM PAWH KA TI LO E A😝NAKTUK ZAN KA LO TI KHANGLANG SIA, KA THULH LEH CHUAN ZAWLNEI THENKHAT TEN COMMENT LAMAH 'KA RINDAN CHIAH' INTIH LEH KA HLAU SIA🤭 KA ZIAK MAWP MAWPA,KA CHHAWP HNAWK MAI CHE U,TYPING MISTAKE A AWM NUAL AWM E A...CHUAN,PIC KA DAH KHI KA STAR A NI LO,KA TEN LUTUK.NUTEI'N A DUH LUTUKA,KA LO DAHSAK....SORAIII