MINE -19

 Chapter -19

Room Kawngkhar inkhar thawmah ka phu dawrha, Kawngkhar lam ka hawi pheia. Remsanga a rawn kal pheia. Eng chen nge ka din ngaia ka din ka hre lo. 

"Eng nge? Ti nge a?" Hlauthawng hmel lutukin a ti a,min rawn pan hnai nghal ruak bawk.

Ka darah a rawn vuana, hnai teah min rawn bih a.."Anu, I ṭha em?" a ti nawn leh a. Boruak tlachham, thawkchhuak lawk thei lo boruak hip tur hmuh ruala thaw chhuak hawk ang mai hian ka thaw chhuak nghal kawk mai.

"Ti nge? Na i nei em? Ṭhu teh" a ti leh mawlh mawlh. Min kai a, hnial loin ka zui ve tawp. Khumah min ṭhuttir a, ka ṭhut mutna turin lukham a dah rem nghal zung zung.

"Ngheng rawh le,a zia deuh ang" a ti leh a.Khumah ka lawn a, lukham nghengin ka ṭhu mu a, ka sirah a rawn ṭhu a. A darah ka lu ka nghata, ka mit ka chhinga. Mahse,ka chhin rualin Lalpuii thil rawn sawi kha ka bengah angai ang chiahin a rawn ri nawn lehnghala. Ka meng chhuak nghal vat. 

"I zia deuh tawh em?' reife hnuah Remsanga'n a ti supa. Ka kut a chul hauh hauh bawk. Ka awmdan ka siamrem a, Remsanga min ngaihtuah hmel lutuka min en tu chu ka en a. Ka hrilh ang nge hrilh lo ang? Fiahna chiang tak a awm si lo a,keiin ka unau nu ka ṭan ang bawk hian ani pawh a farnu a ṭan ve dawn tho a. He inah hian ani chauh hi ka lam ṭang awmchhun a ni a,ani nen kan intithiam lo anih leh phei chuan awm ngaihna a awm dawn lo.Mahse,zep ral ringawt tur chuan thil thleng mek hi a lian lutuk.

Ka ṭhuchhuak dawna,min rawn pui leh vat. Thawk ka la vang vanga. Ka mitthlaah Lalpuii hmel dawldang em em mai a lo lang leh a. Ka rilru ka siamfel nghal hmiah.

"Lalpui-in nau a chhiat a" ka ti chhuak sap. A hmelah danglamna a nei em ka hre duh a, Mahse danglam a awm lo.

"Chutia law? Ava Zia lo ve aw. Amah a ṭha em?" pangngai takin a ti a. 

"Ka hre lo. Min rawn hrilh a, biak zui theih lohin a ṭap a" ka ti leh a. 

"Anih chu mawle. Khawngaihthlak hle mai. Engtia chhiat nge?" a ti leh a. 

"A sawi dan chuan vawiinah a chhuaka,a hawin a thi a put vak an ti a" ka ti leh a.

"Chutia law? Thil ei dik lo a nei nge mawni dawn le? A vanduai hle mai" a ti a.  Min rawn en a,ka dul a rawn khawiha. "Nang chu Lalpuii angin awm suh aw" a ti leh sup. Ka darah a hmai a rawn phum a,a awmdan ka en chuan a farnu leh Lalpuii an inhmu tih sawi hun niin ka hre lo. Bakah, an pahniha thil an ei dun vang han tihngawt kha ṭanchhan tlak niin ka hre lawi lo. Mahse, puh tur a awm ngang lo..

"Vawiinah Rempuii nen an inhmu a" ka ti ta tho.

"Maw?!"

"Lalpuii min rawn hrilh dan chuan Rempui-in a biak duh avangin an inhmu a ti a" ka ti nawn leh a. Khum atangin a chhuk a, Kawngkhar lam a pan nghal a. 

"Khawnge i kal dawn?" Mangang ru deuhin ka ti a. A ding chuta,a rawn hawi a. 

"Engvangin nge biak a duh ka zawt dawn" a ti hmuk. A hmelah engmah lang lo mah se a lawm lo tih ka hre thiam a. Tu chungah ber nge a lawm loh erawh ka hre lo.

"Zawh kher angai hleinem" ka ti ve nghauh. 

"Ngai tehreng mai" a ti khuh leh fur.

"Mahse..." ka ti hman chauha,min tawngkhalh leh hmak.

"Lo hahdam rawh. A chhan ka zawt ringawt dawn" nghet churhin a ti leh a. Ka ṭawng leh tur pawh nghak chuang loin a kal zui a,a chhuah hnuah che loin ka ṭhut ngaiin ka thu a. Buaina, kan nupa buaina ni si lo,kan buai tel ve zel ngai si hi ka ning ngawih ngawih lutuk. Mo nih phei chuan hetiang buaina hi ka mamawh lo lehzuala, pasal chhungte nena rilru inpawh miah lo put te hi a rapthlak lutuk.

Minute 10 pawh tling loah a rawn let leh a. Khumah bawk ka lo la awm a. Khum bulah a rawn dinga.

"Lalpuii chuan engtin chiah nge a rawn hrilh che" a ti a. A aw a dam thlup nangin dik lo a awm tih ka chhungrilin a hre nghal chat tho.

"Inhmu turin min rawn sawm a ti a. A bak ka hre miah lo. Rempui'n  engtin nge a lo tih a?" ka ti sap.

"Ani khan a sawm zawk" a ti hmuk.

"Maw? Enge a awmzia?"

"A awmzia chu amah khan a sawm zawka. A puh let tihna animai" a ti leh a. Ka sa ve zak mai.

"I nauin a sawi chu i ringnghal tihna maw? Anih chuan keipawn ka unaunu chu ka ring ve tho alawm" ka ti ve hmiah. 

"Ka ring satliah ni loin an msg ka hmu. A ṭha em? He thil hi duhtawk ang. Ka ning tawh lutuk" a ti leh hmuk. 

"Naute nunna chungchang asin" insum hman loin ka ti that.

A kawr a hlih fel chiah a ken mek chu balbawmah a vawm lut a.Min rawn en a,a mitmeng thim leh fiah zet lawi siah chuan a thinrim tih ka hai lo. Mahse,pawi ka ti tawh lo. Engvangin nge Lalpui-in a naute a paih ngawt ang?

"Ka hria..Mahse,kha nu khan a pai peih tawh lo animai. A tawk em?" kha zetin a ti bul hmuk. A ṭawngkam chuan min deng na lutuk.Mahse,ka nui tlat lawi.

"I lo danglam lo" tih zawng ka sawia. A bak ka sawi thei lo. Sawi tur pawh ka hre hek lo.

"Tu lakah maw?" a ti vawt ruih.

"I farnu ang tho ilo ni" ten lutukin ka ti leh hmiah.

"Ka danglam bik nang. Unau alawm kan nih" a ti a,ngeiawm lutukin a nui zui a. 

"Ni e,inchhungkua hian keipawh hi min la that duh ang. In lo chapo em a ni" ka ti leh tawk. 

"Chu erawh thil thleng ngai lo tur a ni" a ti tuara. A au thut chuan min ti phu vak.

"Ka hua che in ka hria" ka ti tawl.

"Engvangin? Eng nge tihsual ka neih a? Lalpuii chunga thleng mek hi ka tih a ni em ni?" a ti leh a. A aw a ring ta lo.

"I tih chu a ni lo mahna. Mahse, I ṭawng danah kha chuan i ti duh dawn tih ka hria" ka ti leh a. 

"I ngaihdan dan le..Kei chuan anni vanga lo buai hi ka duh lo mai zawk" 

"Min be tawh rih suh. Huat belhna tur che sawi ka duh tawh lo" ka ti dam thlap. 

Eng emaw sawi tum niawm takin a ang zuaua,Mahse sawi loin a ban a phar hluaia. Engmah sawi chuang loin a dah thla leh a. Bathroom lam a pan ta daih. A lut a,na lutukin a rawn nam khar ṭhuaia,ka phu leh zawk.

A rawn chhuah leh hmain ka chhuaka, inhnuai lam ka zuk en thlaa. Living Room a Nutei leh Rempuii ṭhu ka zuk hmu a,an bula awm ka peih hlawl lo.An ṭawng ka hre thei vek nangin midang awm loh hunah Rempui-in a chet lak dan Nutei a hrilh ngei anga,Lalpuii an hmusit zui ngei bawk ang. Ka sahal up up a, ka puakkeh mak dawnin ka hriaa. Ni a tla tawh nangin inchungah mahni chauha awm tumin ka chho ta zawka. Chawei tura Thlungi'n min rawn koh hma chu ka awm ta renga,nidang angin Remsanga pawn min zawng hek lo.

Ngawirengin chaw ka ei a, ka awmdan a danglam tih hria se pawi ka ti lo. Anni pawhin min ngaipawimawh chuang lo. Remsanga nen kan inbe zawm ta miah lo a. Chu pawh pawi tihna ka nei chuang lo. Ka lamah a tang ṭhin a,lawm pawh ka lawm a. Midang aia Danglam bik niin ka lo hre ṭhina,Mahse vawiin khan a lo danglam bik loh zia ka hre tawha.Lalpuii chungchang a sawi dan kha ka damchhung-in na ka ti tawh dawn tih ka hriaa. Ka lungawi leh dawn anih chuan ngaihdam min dil ve viau angai ngei ang.Chu erawh Mihring induhtawk lutuk leh mi chunga leng hian a ti dawn lo tih pawh ka hria.

Kar bul kan ṭan a, ka nundan ala ngai renga. Remsanga pawhin a ṭul tawpah lo chuan min be ngai lo. Min biakna erawh ṭha takin ka chhang vek zela. Zanah ka muhil tlem em em a, a hmaa ka neih ngai miah loh hlauthawnna ka nei ta tlata. Ka muhil te hi harh leh tawh lo a muhil tlang tur angin ka inhre ṭhina, achang leh nau ka neih naah thi turin ka inngaia, mumang ṭha lo pui pui ka nei chamchi a. Thlan tla phunga ka harh lah a tam. Chumai niloin ka dul puar lian tawh lutuk vangin mut a harsa hrim hrim a. Ka mut dan ngaia mu thei loin ka inlet renga, Keimaha inleh a harsa ṭhin a, Remsanga nen kan inkar la fel chuang miah lo mah se zanah hi chuan ka harh hian a lo harh nghal kar zel a. Ka inlet tur pawh min pui thei zel.Mahse,chu chuan kan inkar a siam ṭhat phah chuang lo.

"Mama,zaninah Palai an lo kal leh dawn kha aw. I lo haw tlai hlauh ange" chaw kan ei laiin Nutei'n a ti a. Ka chaw ṭhial lai ka tawp nghal hmaka. Ka ei zel chakna a bo vek bawk.

"Haw hma lo maithei. Ka awm loh pawhin i awm a, Tea pawh a awm ang chu" Remsanga'n a ti bung vut.

"Khaia, nang i awm leh awm loh a inang hleinem. Lo haw hma hram tum la" Nutei'n a ti leh a. 

"Ka lo tum dawn nia" Remsanga'n a ti leh nghut.

"Lani, I va nawm loh hmel ve. Vawiin em ni i inentir dawn?" Nutei bawkin a ti leh a. 

"Nuam e.. " ka ti ringawt. 

"Thil i ei mumal lo em a, chuvang mawle. Nau neih dawn hnaiah hi chuan mut te a har duh a, ngaihtuahna ṭha lo pui pui neih-te hi a awl ania" a ti leh mawlh mawlha,ka bu satliah ringawt. Ka nihdan vek ni mah se an hriat ka duh lo bur.

Thildang dang an sawi zui a. Kei erawh engmah ka sawi ve lo.Ka thlenga eitur la awm sa tlem harsa ti ru zetin ka ei zo a. Ka thawhsan zui nghal daih. Diktak chuan midang zingah engtin awm lo mah ila mi a nileng lo tan chuan kan nupa kar a fuh lem lo tih hai rual a awm tawh lo. An haider mai mai ni turah ka ngai zawk.

Roomah ka chho a, ka chhoh hnu lawkah Remsanga a rawn chho ve nghala. Thawmhnaw suk tur ka la chhuak chu kawng dawn meuhin min rawn en tih ka mitsirin ka hmu ru kara. Mahse,ka hre lo der ve hmiah.

"Midang tihtir mai ṭhin teh" a ti hmuk.

"A har lo" ka ti ve hmak. Taksaah harsatna a awm pawh ni hlei lo, insuk mai mai a har lo em mai.

"I ti thei lo ka ti hleinem, I rit tawha, che tam lo mah la a pawi lo zawk" a ti leh a. Chhan enah pawh ka en lo. 

Ngawirengin machineah ka khunga, ka nuai tir zui nghala. Room ka luh lehin a lo insiam fel vek tawha. A landanah min lo nghak a ang.

"Mi hmuh tur ka neia. Dar 3 hmain ka rawn let ang. Ka hman lo anih chuan Davida ka rawn lam tir ang che" a ti a. Inentir naah min kalpui a tum tih ka hre thiam.

"Keimahin ka kal mai ang. A harsa lo"

"A harsa lo..." A ti nawn ve sup.

"Nia, harsa lo" ka ti ve leh hmak.

"I lungawi lohna kha keima chungah ania. Naute chungah chuan a ni lo ania" a ti mar ut.

"Ka hria. Hlauthawng Suh, nau a lian tawha. Tihtlak chi a ni tawh lo ania" ka ti leh hmiah. 

"Amak ṭhin,chutiang lawm hawiin ka sawi em ni?" Bung zetin a ti ve hmuk.

"I sawi lo zawk em ni? Eng lam hawi nge?" Ngeiawm lutukin ka ti leh a. A zat vang ni miah loin ka nui lui hak bawk.

Min chhang tawh loin ngawirengin kawngkhar a pana.A chhuah hnuah khumah ka ṭhu thla hnawk. Mal intihna leh mahni inkhawngaihnain ka khat a, ka mittui a rawn tlaa. Hruk pawh hru buai peih loin ka ṭap zui ta hlawp hlawp.

Duhtawka ka ṭah hnuah ka thawl deuh huaiin ka hriaa. Ṭah hi zahthlakah ka la ṭhina,ka pa boral lai tih loh phei chu ṭah tak taka ka ṭah leh pawh ka hre tawh lo. Mahse,achang chuan ṭhatna lai pawh a lo nei ve tih ka hriatchian phah sawt mai.

Ka insuk ka zar zo deuh chiah tihin Duatpuii'n min rawn call hlawl. Tunlai an hnaah an buai avangin kan inbe tlem viau.

"I ṭha em?" a rawn ti lawr lawra. Englaipawha a nun thawveng halh reng mai hi ka awt ṭhin.

"Ṭha alawm.. I va inla free si ve" ka mood nena inmil lo khawpa zangkhaiin ka ti let ve nghal zat.

"Ka free deuh chiah chiah. Vawiin hi buai tawp ni a ni hrim hrim a" 

"Chuti law? Ni 2 vel chauh emaw inla buai ka tia" ka ti leh a. 

"Nooo, ni 5 na chiah. Kan pi Becky hi inti nalh hle ringawt lo hian hna te lo thiam deuh phei se chu niminah kan zo ang. Audit kan han nei chiah chu i ngaihawm bang lo aw" a rawn ti leh zat zat.

"Audit lai chauha inngaih te chu a" ka ti ve hlak thung.

'Naaa, ka sawi awmzia i hre reng. Tak takin maw Becky hi ka mil miah lo. Hna a thiam lo uchuak chu ka ti lo a. Mahse, a careless reuh ka ti tawpa. In pa ṭhiannu nimahse ka ei lo. In pa lah hi a lo lawr sek lehnghala" a rawn ti leh bawrh bawrh. Tunlai a buai hle tih ka hriaa. Ka thawh ṭhin leh an hna hi inzawm anga lang siin kalphung inang lo a ni a. Chuvangin an tan audit neih ve hranpa pawh angai lo.Engvanga va lawr sek nge anih ka hre lo.

"Hey, ka ṭawng i hre thei em?" a rawn ti leh a. 

"Aih, hre thei lo. Tunah ka hre thei chiah" ka ti ta ngawt.

"Ok...Naktuk hi kan free over dawna,ka rawn leng dawn mawni ka tia.In pa nen vawiinah kan inbiaa,I mu ṭha thei lo tih vel a sawi luama" a rawn ti leh a. Ka thaw nghal hak mai. 

"Anih chu mawle..." Ka ti sap ringawt.

"I nawm vak loh chuan sawi te pawh sawi ve la. Ṭhian nih ka tlin loh hmel thei em mai. In pa zawkin min rawn hrilh lo phei se ka mualpho der ang" a ti leh nang nanga. Engvanga lo va hrilh nge maw a nih nek le a???

"Nuam lo tih em em tur a ni hleinem. Ka muhil ṭha lo a,inleh vel a harsa ve ṭan tih a ni leh mai" ka ngaihtuahna nena inmil lo zetin ka ti a. Eng eng emaw a rawn sawi zui leh duaha,Becky a ei loh zia a sawi tam ber. 

Chhuah hma deuh ka duh avangin dar 1 velah Remsanga msg ka thawna,tihtur ka nei a,chhuah hma ka duh thu leh keimaha ka kal dawn thu ka hrilha. A seen a, Mahse a rawn reply lo.

"I kal tawh dawn em ni? Mama'n a rawn lam dawn na che nge?" Nutei'n a lo ti a. Remsanga hnena ka sawi ang bawk ka sawi leha. "Mambawiha a awm alawm. Kalpui che rawhse. Nangmaha kal chu ka ngaihtuah che" a ti zui leh a. A chang hi chuan min ngaihtuah tak tak hi a ang ṭhin.

"Hna a kal na nge?" ṭha takin ka ti a. 

"Vawiin chu a chawl anih kha. Mambawih, i u Lani va hruai la" tiin a au zui a. Hnial ka tum zet nangin Taxi hran hran hman kual ai chuan a awlsam zawk dawn tlata,ka hnial leh duh ta lo.

"Ka nu te Inah kal hmasak lawk ka duha. Bawihtei a dam ṭha lo a,va tlawh zuai ang aw" ka ti a. A bu nghauh.

"Ti nge hna i kal loh a?" ka ti leh a.

"Zingah khan ka lu a nuam lo lutuka. Tunlai chu ka party mah mah a ni" nui kur kur chungin a ti a. Ka nui ve hak mai. 

"Insum deuh la,anih loh chuan i u Mama thin a thawk mai tur ania" nui chungin ka ti a.

"Ni chiah mai. Tukinah pawh ka ngaihtuaha nasa alawm. Mahse maw,kei chu Mama te anga mi hlawhtling, kulmuk bawk si nih hi ka peih zawng a ni lo. I Ning ve ṭhin hian ka ring" a ti leh bawrh bawrha. Hei tak hi Zothana ka ngainatna leh a u te nen an mize Inan lohna a ni a. Engmah hi zep ṭit ṭet a nei vak lo a. A mizia hi a zau halh maia. Inah pawh kan nula te 3 hian an ngainat ber a ni a. Midang anga ṭawngmawh a ni lo a,a nui reng peih te hi a nu fapa ni awm lo tak a ni.

Dar 3 rik dawn thleng ka nu te Inah kan awma, U Seni leh Bawihtei an lo in awm a. Ani pawh hian Zothana hi chu a ngaina ve bawka. Kan 3 in kan nui ho bawk bawka. A lem ni miah lo a ka nuih lohna hi kar a tling thuak tawha, vei nei miah lo a han nuih bawk bawk mai chu nuam bik tak a ni.

"I rei angem?' parking kan luh hmain Zothana'n a ti a. 

"Ka hre lo le. Ti nge?" 

"Ka lo kal ve kher angaih loh chuan ka ṭhianpa ka lo va hmu lawk ang ka ti mawle" a ti leh a.

"Um, kal la. Ka lo call mai dawn che alawm" ka ti a. Lawm zetin a nui var var mai.

Vanneihthlak deuhin mi an lo tam lo a. Ka hmaa inziak ho an awm lo zeuh zeuh bawl nen ka lut ta thuaia. Check tehchiam ngai ka ni lo bawka. Ka zo leh hma viaua. Parkingah a awm tawh em ka hre lo a, kal pahin Zothana ka call a,a pick thei miah lo zui.

"Lan..." Mipa awin a rawn ti a. Min rawn ko tu ka en a,Ruattluanga a ni a. Tunhnaiah a lo len ngai loh avangin ka hmu khat viau. Bakah,ka hmu chak lo ve hranpa.

"Khaw nge i kal a?" Ka bula rawn din pahin a rawn ti leh a.

"Ka inentir a" ka ti hulhak. Ka hmuh rual ruala ka ngaihtuah naah Lalpuii ringawt a lo lan avangin ka haw hlur ringawt.

"Min be chak lo hmel hle mai" ka rilru hria niawm takin a ti zuai deuh ruih. 

"I hre dik maithei" za miah lo a nui chhungin ka ti a. A then deuh nawk mai.

"Ka hre thiam che alawm. I haw tawh dawn mi?" Zangkhai deuhin a tihzawm leh daih. Ṭawngkaa Chhang loin ka bu ringawt.

"Thlah i ngai em?" a ti leh a. Ka chhan dawn lai takin ka phone a rawn ri a, Zothana a lo ni a. Ka pick vat.

"I hman tawh mi? Ka rawn tlan phei meka,ka rawn thleng ṭep" a rawn ti nghal mawlh mawlh.

Phone ka dah hnuah ka bula Ruattluanga ding chu ka en a. Tim map lo a ankhum ka chak lutuk.Mahse, ankhumna hmun a ni lo va,ka an khum avangin Lalpuii naute nunna a lo let leh tawh dawn lo.

"Anih phawt" ka ti a. Ka sawi zo hman awrh tihin Zothana a rawn thlenga,Motorah ka luhsan zui nghal daih.

In kan thlen veleh ka inbuala, kal hmain ka inbual tawh tho nangin ka thlan ban deuh chuapa,ka awm a nuam thei lo.

Ka inbual zo room a ka luh rualin ṭhutthleng a bawp khawkherha Remsanga lo ṭhu ka va hmu nghal chat.Ka thawm hriain a rawn hawi vut a,a hmel tur ngun maiah chuan zing lama kan inhnialna kha ala lungawi bik lo niturah ka ngai nghal mai.

Be loin ka kalpel a. Mahse,ka pel thui hman lo. A lam ka hawia,

"Eng maw i sawi?" ka ti hmak.

"Ruattluanga nen khan eng nge intih?" a ti nawn leh tuara. Ka phu nasa lutuka ka zuang zawk lo chauh....

PS: Intihfel hi  a va hahthlak tak..Phone tereuhte hi Ning em emin ka en angaia, ka mit a Phe vek phah😔