MINE - 28

 Chapter -28

"Damdawiinah kal ang" a ti leh a. A phili lutuk chu keimah zawkin ka control angaiin ka hriaa,Mahse keimah zawk pawh eng ruai ka ang chuang lo.

Hmanhmawh lutukin Damdawiin lam panin kan tlanchhuak a, Bawihtei lah a ṭap bang thei lo. 

"A dar leh a mal hi a sawh na ve deuh anih dawn hi. X-ray tih kher in duh em?" Doctor-in a ti a.

"Duh e, angai zawng zawng chu pakhatmah hmaih loin min tihtir vek rawh" Remsanga'n a ti a. 

"Tehreng e a. A ṭul bak pawh kan ti dawn nia. Mahse,lo hahdam phawt teh u. Thil serious lutuk a ni lo ang" nui chungin a ti a. Ka nui ve tak nangin ka nuih a za hlawl lo.

X-ray kan ti a,a dar ruh a lo sawh pelh hlek a,an siam rem nghala. A khup ruh a lo sawh vung deuh bawka, a lo insawh na reuh em maia,a lo ṭap tawp thei lo pawh kha a awm ka ti hliah hliah mai. "Naupang chu an awm hle hle thei lo em maia. A dar hi tuam khawng vek ila a tha ber" an tih avangin che che thei lo turin an tuam khawng veka. A dar ruh pelh an siamrem lai leh tuam khawng sak lai pawhin ka dawm thei lo, ka tirilah min mana,ka khur ka khur maia. Remsanga hi a fanuah chuan a patling lo ka ti fo ṭhina,Mahse vawiin zet chu nghenchhan tlak a nih zia alang chiang em em leh tlat. Engkim a buaipui a, a lang damthlap thei reng a. Chuvangin ka mualpho lo a ni ber mai. Tihtur ṭul zawng zawng an tih hnuah  damdawiin awm angai ta em lo hlauha. A na zualpui reh hma nan nachhawknain an jection a. Reiloteah a chhawka,a ṭap chau ngang aniang a muhil ta bem.

Ka malchunga a muhil chu ka en a, ka hlauhthawn zia leh mangan zia ka ngaihtuah leta .Naupang harh em em a ni chunga kan vanneihzia ka ngaihtuah tel lo thei lo bawk. Tun bak hi han intihnat viau ala nei ngai lo a. Eng emaw changa walker aṭanga han tlak te,a khum aṭanga lawn liam a tum vanga tlak chang te a neia. Mahse,na tak a ni ngai lo. Pilh leh pem hi chu a nei awl lo a, naupang harh,ṭap duh lo tak, a duh tawh chu duh ngar ngar mai a ni a. Vawiin a a lo na ve viau hi kan vanneihna tilang tu ka ti lo thei lo.

"Nau awmtu thlak angai ang. Thlungi awm loh chhung hlek lo enkawl pawh a thei lo a" Remsanga'n a ti vawt ruih a. Ka melh zawka, a hmel a nelawm lo ngang mai.

"Ban lo e. Bawihtei harh zia i hriaa, tun hi a intih nat vawikhatna chauh ania" a rilru hmin tumin dam thlapin ka ti a.

"A Vawikhatna kha a tawpna a ni dawn tihna a ni hleinem. Amah chauh buaipui mai tur ania. Chutiang tura hlawh pawh pe alawm ka nih" a ti leh hmuk. 

"Ka hre thiam alawm..Mahse,pawiah pawh a pawi dan a zia hlauha. Tumah hauh angai hleinem.Naute harh em em a ni tih hre reng la..Nidangah chuan keimah ka awm a,ka enkawl thei alawm" ka ti leh a.

"Nutei leh Mambawihi pawh an awm a. Puitling saw zat an awma, naute pakhat pawh veng thei lo.." a ti leh nghuta. Eng mah ka sawi lo. Nutei chu eng pawh ania, Rempuii chuan hmu reng mah se, a tlak loh nana ven a tum lo ang. Harh a tih zia bak sawi tur a hre ngai lo a. A harh man anih kha a ti duh hial ta ve ang.

In kan thlenga, Nutei'n chanchin min lo zawt vata, a awmdan ka hrilha, pawi ti em em in a chek tlak tlak mai. Min mil lo em em mah se achang hi chuan nu ber dinhmun hi a luah ṭha em em fo a. A tihtur a hriat chian em avang hian ka laka a rilru put hmang diktak pawh hi Remsanga hian a hmu thiam thei lo niin ka hre fo mai.

"Khawnge Biakzuali?" Remsanga'n a ti a.

"Ka hre miah lo, puan pho a seng a ni lo maw?" Nutei'n a ti a. Pari thingpui chawi lo phei mek chu a zawt nghala. "Nichin khan a awm renga,Khawnge a kal ka hre miah lo" a ti a. Min rawn en zak zaka, a tim em em tih ka hre thiam a. Ka khawngaih letling zawk.

"Chawl rawhse. Inringlawk lo a chawlhtir thut anih avangin kumin hlawh chu a hmu vek anga. Tunah a ac ah ka thawn nghal ang" Remsanga'n a ti mar ut.Min rawn en a, "Roomah mu se la.." a ti leh daiha. Biakzuali chungchang a sawi laia a ṭawng dan leh min biak laia a ṭawng dan a dang daih.

"Chawl se la a?! Tinge a?' Rempui-in rawn kal phei pahin a rawn ti a.

"Chawl turin ka ti. A chhan lam chu lo buaipui suh" a ti hmuk. 

Inchung lam ka pan chho a, Nutei leh Rempuii ngawi renga an awm chuan ka awm a tinuam lo a. Ka hnungzang thla a mur vek nimaiin ka hria.

Khumah Bawihtei ka mut a, a dar tihnat hlau bawk,a mal tih nat hlau bawk. Ka dimdawi lutuka  mut tur pawhin ka bei rei ngang mai.

"Hnute hi ka lo siam dawn em ni?" Remsanga'n a ti a.

"Aih, a harh hunah nimai. E, Damdawi kha ilo la tiraw?" ka ti a. Ṭawng loin khum bula cabinet a kawk zauha.

"Biakzuali kha ban kher angai lo asin..A thiamloh bik pawh a ni lo a. Bakah,a inthlahrung ve em em dawna" ka ti sap.

"A tawk... Sawi nawn ka duh lo ania" a ti vawt ruih. A mood a chhe em em tih ka hriaa, tihchhiat belhsak ai chuan ngawih mai a finthlak zawk.

"Naktuk hi engtin nge niang? Mi kan sawm vek tawh si" Bawihtei en reng chungin ka ti a.

"Pathian zarah nunna em a chan lo a,Damdawiinah pawh kan lut lo bawka. Kan ti lang law law dawn nia" a ti zuai ruih.

"Nia, eng em a thlen belh lo chek anga" ka ti ve sap. A bula ṭhu turin min huia,ka pan pheia,a malchungah min pawt ṭhu a, ka awmah a hmai a rawn phum zui vang vang mai.

Beisei aiin kan mi sawmte an lo kal ṭha a. Bawihtei pawh vanneihthlak takin a tlei zui viau tlat. Mahse,naupang harh em em tih takah a duh ang anga a che vel thei lo chuan a ti ṭe tam a. Naupang dang infiam luai luai chu hmuh nawm ti em em in a thlira,a khek leh raih raih thin a. Ka huphurhna aiin engkim a kal tluang a. Pathian ṭhat zia ka hre chiang lehzual.

Hun a kal ve bek beka,Bawihtei pawh a dam chak ve viaua, a harh ngaiin a harh leh thei titih tawh.  Christmas thlen nan kar hnih chauhin min dang tawha, Rempuii ala haw ta chuang lo a. Ruata pawh a rawn riak deuh reng bawk. Bungraw lak awm si lo, mahni in lama awm chawt bawk si, Ruata lah rawn lut deuh titih bawk. An awmdan hi ka hre thiam lo. Mahse,ka sawi ve tur a awm lo tih ka hre kara,Nutei leh a unaute mahin eng mah an sawi loh phawt chuan keia lo sawi ve tur a awm lo. Chiang taka ka hriat tak chu a mizia hi a u te pahnih nen inanna an nei lo tluk a ni. Ka ni fate ho nen an mizia a inang zawk fe.

Nula nichunga chen ho leh Pasal a neih hnu a han awm ho leh chu a mizia a danglam nasa a. A hma pawh khan mei nei tak taka ṭawng hi a ching tho nangin tunah phei chuan a ti ta mah mah tihchang ka ngah mai.Ka insum hram hram ṭhin nangin inkhak chang kan nei zauh zauh tho. A ṭawngkam mei nei leh mi khei zet hi ngawirenga dawh mai mai harsa ka ti ṭhin a. Ka sawi ve apiang lah hi a la na emaw tih mai turin a ter at zel a. Chuvangin Chhungkaw thil phei chu ka sawi ve mang mang lo. Mahse,Bawihtei chungchang leh keimah min ṭawngkhum na erawh chhan let loh tamtak nei mah ila ngawih theih loh ṭum ka ngah ve tial tial a.  Midang tana langsar ni lem si loin kan inbat fuh lo fek fek fo a. Remsanga hian kan awmdan hi a hria em ka hre lo a. Inah a awm tam lo a,a awm chhunah kan inbat fuh lo ngai vak lo bawk nen a hre kher lo thei tho.Kan inbah fuh loh ṭum pawh hian inhau bur bur kan ni lem lo bawka eng mah Remsanga hnenah ka thlen ngai lo.

Kitchen lam tlema siksawi Nutei'n a duha. Christmas hmaa zawh hman a duh bawk nen Remsanga bulah a sawia. Sum a awm hi chuan thil a harsa lo bawka, an thawk chak pur pur viau. Siam an duhdan eng mah ka hre ve lo a. Nutei leh Rempuii vekin an buaipui a. Ka lo mi chuang awm ve mai mai.

Thil a tlak rik bur rualin Bawihtei a ṭap nghal a. Rang zetin ka tlan phei vat. Pari'n a lo pawm a, "Ti nge?" Tih pahin ka laksaka.

"Hei hi a khawiha,a lo nghet si lo a" a ti a. Pangpar khawina tla keh nuai chu a kawka.

"Va han harh tak, Nutei pot duh ber ala tikeh zui a" Rempui'n a rawn ti a. Nutei a au zui lang lang a. Eng mah sawi lo turin ka insum nasa viau mai.

"Eee, Pari,in hung hmawr em ni? Naupang ban phak loah hian dah thin rawh u ka tih kha. A ban phak apiang a hmaih ngai lo tih pawh in hre renga" a rawn ti bawrh bawrha.

"Pari thiam loh pawh a ni lo bawk e a. Engkim hi thlun beh vek angai anih  zawk hi. Pari puh reng reng suh, anih loh chuan Mama'n a ban leh mai ang. Hman ang kha kan ni tawh lo, a sawitu hian a zir khawpa an awm rei hmain a kick pawp pawp mai ania"  Rempui'n a ti leh a. Ka sa ve zak mai..Kick pawp pawp tih turin ka awm hnuah Biakzuali bak a ban lo,chu pawh ka sawi vanga ban a ni hek lo.Mahse,eng ang pawn sawifiah tum ila a rilru a thlak dawn lo tih ka hriaa. Insawifiah ka tum hek lo.

"Pangpar khawina chu ka lei leh mai ang" ka ti hmak.

"Nia,lei rawh. Ka nu pot ṭhin ania,Nutei tan hian a hlu ania" a ti leh kher.Chhan pawh tum tawhloin ka inher a, Bawihtei tihtlei tumin ka be paha.

"Kan unau tumah harh uchuak kan awm an sawi ngai pawh ka hre lo. Bawihtei hi chuan nu a nei harh ngang aniang. A chhun khawp anih hi" a ti leh a. Ka ding chawt mai.

"Min la chhun zo lo zawk anih hi. Min chhun fuh viau chu ni se pot chang lo,ui thleng hian an hmul a kawlh vek tawh ang" ka ti a. Za miah loin ka nui lui hak hak bawk.

Bawihtei chungchang a kan inhnial hnu aṭanga tlai thlengin Rempui'n min be tawh lo. Ka be lui peih bik eih lo bawk.

Remsanga lo haw laiin Roomah Bawihtei'n nen kan lo awm a. Bawihtei'n a pa a hmuh rualin a lo lawm nghal a,Mahse  nidang ang lo takin a ngaihven miah lo.

"Eng nge vawiinah Mambawihi hnenah i sawi a?" Awki nelawm lo angreng takin min rawn ti a. A sawi awmzia ka hre lo.

"Eng mah ka sawi pawh ka hre hleinem" ka ti liam puat.

"Heta a awm hi i ngaithei lo niin ka hriaa. Kan In anih ang bawk hian ani tan pawh hian a In ve tho ania. Ho te teah khak fo lo la ka duh khawp mai" a ti leh a. Hamhaih angreng takin ka ding a, engvanga a farnu chu rawn thinrimpui ngawt nge maw anih hrep ni???

PS : Vawiin leh zanin chu kan unau Drug Addict thenkhat te ang maiin ka Bawng(cow) nileng riau a. Ka lu pawh Bawng lu emaw ka ti leh thina. A sei falua lo khawp mai.Chawlh ngawt aiah ka rawn dah deuh ngar ngar a ni mai e..Sorry deuh tawp u aw🤭Chuan, comments hi ka reply lo che u anih pawhin uluk takin ka chhiar chhuak vek zel ania aw...Hmeltha ho