Malsawmsangi - 6

 Chapter -6

Ka phone sana ka en a. Khawvar hun tur a hla tawh lo hi a lo ni a. Malsawmi nena kan inkawmna kha mumang mai mai a ni tih ka hriat rualin atak ang tlata ngaihna ka nei a. A thilsawi engkim mai kha helaia a lo riah zana a sawi nen inzawmna nei fel thlap a ni bawka. Chuvangin mumang lamah a thlarau hahchawl thei si loin min rawn tlawh a, ka hriat tura a duh a rawn sawi niin ka ringa. Hlauh enah pawh ka en lem lo.

Khawvar hnu lawkah ka tho chhuak nghala. Eirawng ka bawla. Parawl eirawngbawl te chu har hek lo. Ka bawl zo thuaia, chawei nan a la hma deuh bawk si nen ka inbuala, inbual zawhah inhnuaiah ka chhukthlaa. U Mawii a lo vin leh tuar tuar tawha, dan ngai te tein Lalrini leh Hmingsanga an lo invel tap a. An inhauh benchhen tehreng nen ngawirengin ka u in Vanglaini a chhiarsan hmiah hmiaha. A nupui fanau te te teng tung mai chu engahmah a ngai lo.

"Tea, naupang kha han thlah mai teh. Pu Vana nen kan chhuak lawk dawn tak alawm le. Ka va theihnghilh chiang ve le" ka u in a ti hluaia.

"A va mak tak e aw. Kal dawn a ruaiah. Hman pawh i hman em ni? " U Mawii'n a ti nang nang.

"Hman awm em mai. Eng nge tunah a tih ang a? " ka u in ka chhan hmanin min chhan khalh a.

"Nia, ka hman alawm" ka ti ve a. Lalhmingsanga rawn tlanphei chu a rawn inpal a, a tlu bawkkhup thlawrh mai.

"Lalhmingsanga tak hi chu aw.. Tho vat rawh. I khawilai nge i sawh a? Fimkhur ta che" a ti nghal hmuar hmuar.

Tap deuh pur chungin a tho a, ka bulah a rawn thu a, a mittui a hru paha. A kekawr khup bal chu ka tuaifai saka. Mipa naupang tihtakah hian a harh ve a, mahse a thau avangin a infit lo va. A tlu tup tup reng mai.

"Romal, zawhte dum lianpui kha tukinah i kawtah a lo bawk leh vung a. A mit a de rual mai bawk si, ka tih riau a. A lo kal leh i hmuh chuan a lo kal ngam tawh loh nan lo vaw hrep rawh" Dawhkan hrukfai mawlh mawlh pahin a ti leh a. Vawikhatbak kha ka hmu nawn tawh lo va. Mak deuhin ka rilruah Malsawmi thlarau a ni mai angem tih a lo lang thut. Ka ngaihtuahna avangin ka nuih a za a. Hmeichhia ang maia thil ho mai mai ka ngaihtuah chu ho ka ti viau bawk.

Naupang ka han thlaha, ka hawin u Mawii'n chawei ve nghal turin min ti a, mahse ka ei ta lo..

Office ka thlen hnu lawkah ka nuin min rawn biaa. Ka thlen tirh atanga ka buai avangin ka pick lo. Min dawrtu awm laia phone han hmansan daih hi zia lo ka ti thin a. Tul tawpkhawkah lo chuan min dawrtu awm laiin phone ka hmang ngai meuh lo.

Chhun chawlh a hun veleh ka nu ka call back a, a pick lo. Thil ka ei tan hman tihin a rawn call leh a.

"I buai em? Nge thil i ei mek zawk? " a rawn ti a.

"Ka ei tan chiah. Min lo call lai khan ka buai deuha, eng nge chhun chhunah min lo call?" ka ti nghala.

"Eng ni lo e. Ka rawn be mai mai che mawle. Tukinah i pa Rozara fapa Mesaka kha a lo kala. I la awm emaw a tia, biak duh lawkna ka nei a rawn ti che a" a ti a.Mesaka hi kei aiin a nau deuh zawka, pi leh pu enkawl, an duat sual ve tak leh kan khuaa No 4 addict langsar ber pakhat a ni a, kan Inkawm ngai lem lo va, ani berkherin min be duh chu mak ka ti viau.

"Eng thilah nge min biak a duh a? "Pangngai takin ka ti a.

" Ka hre lo. Ka be duh lawk a ti ringawt che a. I number te min dil a. A Rawn phone dawn che aniang. Malsawmi chungchang an sawi sep sep hi i Thianten an rawn hrilh che em? " a rawn tihzawm leh daih.

"Eng chungchang maw? Thil danglam engmah min rawn hrilh lo" ka ti a.

"Anih tak chu.. An inriak tlangval thenkhat hian a thla hmuin an insawi a. A nu leh pa hi chuan an hria em ka hre lo va" a rawn ti ta mai. Ka hnenah chauh emaw a rawn inlan ka tih laiin midang hmuh tur pawhin a lo inlan tho mai.

"A va mak awm ve. Tu te nge hmu a? " ka nu hnenah erawh ka ti a.

A hmutu te hming a rawn sawia. An hmuh dan a rawn sawi tela, hlauhawm leh mi tihthaih zawnga hmu an ni lo va. "A damlai hmel ang a pangngai takin an hmu a, mahse a thi tawh tih hriat reng hmu annih avangin hlauh chu an hlau viau tho a ni awm e" A rawn ti a.

"An bia em? A boral danah kha  felhlel deuh a lo awm pawh a ni anga. Chu chu hrilh a tum a ni lo maw? " Pehhel deuh takin ka ti a.

"Felhlel a awm te chuan an postmortem renga, Police te pawhin an chhui zui ve ang. Chutiang engmah tih a awm hleinem. Chutiangin tuman an ti lo tawp ang. A damlai nun a hmang duhdah ve em a, a thlarau a hahdam lo a ni ang ka ring" a rawn ti ta daih.

"Nih pawh a ni mahna. Nu, hei hna ka tan leh tawh dawna" ka ti ta daih.

"Aw le, keipawh kawmthlangah dawl zuk lak ka ngai. Ka zuk kal ange, I haw lamah te chak deuh deuhin tlan thin lo la" a rawn ti ve a.

Zanah u Ruati te inah kan leng a. Dar 11 velah kan haw a, ka in pan chhohna step leh kawtzawlah zawhte dum ka hmuh takin tiin ka enkual vela. Ka hmu lem lo. Ka mutui ngang maia, tunhnaia ka muthilh that ber tum a ni hial ang. Ka mumangah lamah Malsawmi hmuh leh ka inring a, nizana kan inbiakna kha mumang mai mah nise a tak vek angah ka ngai tlata. A sawi laklawh bawk si nen khan sawi zo law law tura mumangah tal a rawn inlar leh ka ringa. Mahse, mumang bo vek khawpin ka mutui ta thung.

Chaw ka ei laiin number ka save loh hian min rawn calla, ka pick chuan Mesaka a lo ni a. Ka nu hnena ka number a dil thu a rawn sawi a, ka buai lai a nih leh nih loh min zawt luam bawk.

" Malsawmi boral hma khan phaia hna a thawh dawn thu vel min hrilh a, chuan in a chhuahsan an tih ni hma chiah chawlhni zan khan kan leng ho a. Zu kan in a, mahse amah kha chuan a in ve lo a. Kan haw dawn khan Pu Sangpuia nen an inhmu dawn tih kha a sawi zauha. Zawh pawh ka zawt zui lem lo a. A boral takah khan sawi neuh neuh a tama. Ruih vanga an chharna kawrah khan tla hlum angin mi hian an sawi veka. Mahse, mak ka tia. Sunday zan khan a haw miah lo tih a nu sawi hi ka thianten an lo hriaa. Pu Sangpuia hian khami zan khan eng emaw a chungah a ti emawni ka ti deuha. Hma han lak dan vak ka hre bawk si lo va. Hma han la in fiahna chiang tak ka pe thei si lo anih chuan eng mi nge ka nih i hriaa.zep thu a awm lo va. Tuman ka thusawi an uksak dawn lo a. Pu Sangpuia lah kan khuaah hian a eng emaw lansarh ve lurh mai bawk si" a rawn ti duah mai.

"Chutiang a lo ni maw?  A hmain Malsawmi leh Pu Sangpuia inkarah neuh neuh awm a awm tawh ngai em? " ka ti hul hak.

"Awm ve thin e. Malsawmi khan damdawi han hmawm zauh chang chu a nei a. Mahse, inchiu a hlau tlat a. A inchiu zawng khan a khawsa ve lem lo va. An inhauhbuai thu hi a boral hma deuh thla hnih vel kalta atang khan vawi 3 lai min hrilh a. Min la that tak tak ang te a ti thin alawm" a rawn ti leh a. Ka awmdan a nuam lo va, ka nghilh deuh dup mai hian ka hriaa. Ka chawei lai pawh ei zawm chakna ka nei tawh lo. 

"A pain a boral dan kha chhuizui ngai tise FIR te thehlut se chuan keini kha a hma zana a kawmte kan nia. Zawhna min zawh chuan Pu Sangpuia a hmuh tur thu kha ka sawi ang ka tia. Mahse, thuchhiaah engmah an la ta si lo va"  Amah bawkin a rawn ti leh a.

"Nia,a chhungte ber khan engmah an sawi loh chuan midang tan tihtheih a vang em a ni" Ka ti dam thlap.

"A dik alawm. Mahse, engtin emaw thil chhuichian duhna i nei ta anih chuan min lo hrilh ve hram dawn nia. Ka thian leh min duhsak em em tu ania, ka tihtheih ang ang tihsak ve ka duha. Ka sawi kha engmah dawt a awm lo a, nang chuan min ring la ka duh khawp mai" a rawn ti leh a.

Kan inbiak lai kha ka chawei laklawh lai a ni a. Kan thusawi  avang khan ka ei zawm lo va. Kan inbiak zawh hnu chuan ei zawm leh mai ka tuma,mahse ka luak a pawt ta tlat, thleng ka chawichhuaka, ka ei bang la awm zawng u Mawii vawkchaw khawlna bawmah ka va chhung ta vek.

 

Hna ka thawh mawlh mawlh lai pawhin ka rilruah Mesaka thil min rawn hrilh kha alang leh thina, engvanga Malsawmi pa hian a fanu thihna kha chhui chian ngaia  hre lo nge anih ang tihte ka ngaihtuah kai zela. Malsawmi sawi ang khan nau a lo pai anih tak tak phei chuan a ruang kha enfiah leh hial a tha maithei. Mahse, Mesaka pawh khawtlang rin hlawh lo thang a ni a, a thil min rawn hrilh kha chawtak khuka khukpui ruai chi a ni lo maithei ve tho.

Inrinni tlaiah tum lawk em em pawh awm loin kan khuaa Chawlhni hmang turin ka haw chho a. Eng emaw tak han hmuhchhuah ka neih ka inbeisei vang a ni a. Engtia hmalak tur nge phei chu ka hre lem lo.

Dar 7 velah ka thlenga. Ka thlen lai takin u Jenny-i kan dawrah a lo awm a. Min lo be nghal chul.

"I lo haw a ni maw? I va rawn chhuak tlai awm ve" a ti a.

"Nia, ka hmanhmawh vak lo va. In tha maw? " ka ti satliaha. Malsawmi khan inchhung hlim lohna a thlen nasat em avangin a boral ta chu a thawveng huaiin ka ring.

"Tha alawm. Mut hi kan la harsat deuh a" a ti vei ngiala. Ka awih lem chuang lo.

"I awm chhung chu lo leng chho la, I awm rei leh awm si lo " a ti leh a.

"Um, lo leng ang" ka ti tha ve mai bawk.

Kan In hi chhawng thum niin kan dawr awmna floor zawng hi dawr atan vek an hmanga. Kaw khat keinin kan luaha. Kaw hnih dang erawh hardware dawr atan midangin an luaha. Kan chhungkaw chenna atan hian kawngpui an chungchiah kan luah thung.

Ka chaweina bulah ka nu a thu ve a. Malsawmi thla an hmuh dan bawk a sawi leh a. Mi hrang hrang hmu an awm nual a lo ni a. Mahse, a hmutu te zawng zawngin hlauhawm zawnga hmu an awm lo veka. Midang tihthaih zawng pawhin a awm lo a, mahse a thih tawh miau avangin an hlau em em tho a lo ni a. Khawthlang titi ber niin a chhungte beng pawh a thleng tawha. Mahse, a chhungte tak chuan an lo la hmu ve lem lo thung.

Chawei kham hnuah ka inbual zuaia, Rindiki te in a leng turin ka chhuaka, Ruattea a lo awm ve a, ka haw tih ka sawi lawk lem lo bawka min han hmu chu an phul nghal hlut mai.

Rindiki nu-in "Romal, helamah hian Malsawmi thla an hmuh thu an sawi nasa sia, nangpawh hi a rawn tlawh lo che maw? " Fiamthu titak deuh hian min ti a.

"Tlawh e le " ka ti chu a mengphawk nasa ta mai.

"I ti tak tak em? Engtin nge i hmuh a? " a ti nghal sawt sawt a. Mahse, " Ka fiam che anih kha. Engtin nge min rawn tlawh ang? Helamah a inlar kual angai bawk si, a indaih rih lo ang" ka ti chu Ruattea nuih a za ngang maia. Rindiki nu erawh chu ka sawidan hrethiam chiah lo in a hawi bo deuha, mahse a hawi bo rei lo..

"Mai mai che hian a. Thutakin emaw i sawi ka tia lawm. I a roh em mai" Nui chungin a ti ve a. Kan nui dar dar mai.

" Ka va haw phei ange. Vawiin chu ka rawn inkhalh fuh lo nge ni, ka kawng a kham riau a" Din chhuah pahin ka ti a.

"Keipawh ka haw ve nghal mai dawn. Rindik, naktuk lam chu hei Romala a awm bawka. Malsawmi te inah chuan a huho law lawin leng ila. Eee, keini hi ralna lam reng reng kan ngaihven lo maia. Engtin nge kan tih ang? " a tihzawm duah.

"Ni dawn tak.. Ka lo ngaihtuah miah lo" ka ti ve nghal a. A ruang an chhar hma leh an vui hlimchhawn thlenga amah nena inhmu a inkawm kan nih avangin ka rilru a kal khat mawh riaua, ralna lamin ka rilru a luah pha eih lo.

"Groupah khan lo sawi la, bungrua kher lo pawisa pawh a pek theih ang chu" Rindiki'n a ti ve vat.

"Nangmah khan sawi la, tunah khan sawi nghal nghe nghe teh. Naktukah a hu hoin kal ila, ral nghal law law ang u" a ti nghal a.

Ruattea nen kan inzui chhuaka, kal pahin kan titi a. Kan in a ka peng tur chu "La peng lo lawk teh, thil sawi dun lawk ang" a ti teh tlat.

"Nichina Rindiki nu sawi kha fiamthu khan kan rikpui hlut nangin keichu ka rilru a nuam lo viau ania. Amah Malsawmi kha thi tawh na na na chu hmuh ka chak lem lo nangin hetianga an hmu an hmu mai hi dik lo a awm vang niin ka ngai tlat maia. Hmuh ve ka duh ru ta a. Ka hmu anih chuan zawhna ka zawt ngei ngei ang ka tia. Mahse, ka hmu ve thei der lo mai" a ti ta charh charha.

"Nia, chutiang chuan keipawh hian ka ngai deuh a. A chungah khan thil pangngai lo a thleng a ni em em ang" ka ti ve a. A boral thu ka hriat hmaa zan hnih a rawn riak leh a boral hnu a kan inkawm lehna te kha hrilh mai a tha angem tih ka ngaihtuah paha. A ngaihdan sawia a tawng mawlh mawlh chu ka ngaithla renga, kan rilru a inang niin ka hriaa. Ka hriat ang ang hrilha, hmalak pui dan a awm ka ring ta tlat.

"Thil mak leh awihawm loh deuh ka hrilh ang che. Mahse, thil tak tak vek ania" thutak zetin ka ti hmasa te te.

"Nang hi a thla i lo hmu ve reng a ni chiang mai" a ti nghal ngawt. Chhang loin ka nuia..

"Sawi vat teh, ka hre chak ania. Mi kut tuar anih vaih chuan ka sa zak ang' a ti leh chhar chhar.

Ka in luaha Malsawmi lo kal hmasak ber atanga ka mumanga kan inbiakna zawng zawng ka sawi a, Mesaka thil rawn sawi pawh ka hrilh a. Ka sawi zawh veleh chuan a thawchhuak nghal huk mai.

"I hlau em? " a ti teh daih.

"A boral tih ka hriat hmaa ka hmuh lai hian ka tih deuha, a boral hnuah hian hlauhna pakhatmah ka nei tawh lo" ka ti awlsam then.

"Han ngaihtuah mah teh, a thih dan tak a hrilh chuang lo nang chein dik lo a awm tih hairual a ni lo. Kei chu ni ila kar khat khat ka zep lo tawp ang" a ti leha. Ka thil hrilh kha pakhatmah a ringhlel lo tih ka hre thiam mai.

"FIR va thehlut ang. Tunah kan va kal nghal mai dawn mi? A la tlai lutuk hleinem" a ti chhuak leh a. A awmdanah chuan a rilru a fim lo niin ka hria a, bengdaih hmasak a tul tih pawh ka hai lo.

"Chuti rum rum chu a chi nang. Naktukah Malsawmi pa bia ila, ani tihdan dan animai ang chu. Chhungte a nei a, keini hma lo lakna tur chi a ni lo" ka ti a.

"Ai ai ai, Atir phat atanga keini mihrang zawk pawhin rinhlelhna kan neih laia a hringtu pain a chhui zui tir miah loh danah hian eng ruai a ang lo ang" a ti chiam mai. Keipawh chu chu ka rindan chiah a ni a. Mahse, hringtu pa anih anga hrilhhriat hmasak erawh ka la duh fan tho.

"Kan hrilh phawt anga, engahmah a lo ngai lo anih leh kan duh angin chet kan la anga. Mahse, ka thil hrilh che kha engmah sawi chhuak lo la ka duh ania. Ka inah a lo kal ngei tih pawh fiahna engmah ka nei lo a. Kan rilru nawm loh vang tiin sawi rih ang" ka ti a. Min hnial lem lo.

Mu chungin ka inngaihtuaha, Malsawmi hmuh leh ka duh em em a, mahse ka hmu nawn thei ta miah lo te chu ka ngaihtuah a, a sawi tur ang ang kha rawn sawi zo tal se ka ti takzeta. Mahse, a reh ta vung vung mai si te chuan ka bei a ti dawng deuh a, ka khua pawh a ti har lek lek mai bawk.

Chawhnu inkhawm banah kan thianhoin kan lenga. Ralna tur atan chawpchilh angreng takin Azotea'n thuziak a lo buatsaiha, kan senso zawng bak pawisa la bang zawng a pawisain kan pe thung. Malsawmi pain lawmthu a sawia, a thusawi lai chu uluk takin ka en a. A fanu kha a hnawksak hle nangin a sun ve viau tho tih a hmelah alang thei a. A sam a tuak ve nasa tawha, a lang tar ve bum tawh mai.

Midang an haw hnuah Ruattea nen kan awm khawmuanga. Malsawmi pa te nen kan titi mai maia. U Jenny-i leh an chhungte nula pakhatin ei rawng an bawl a. Chawei ve nghal turin min ti a, kan hnial thung.

Ruattea'n mitmeiin sawi chhuak tawh turin min rawn ti a. Nizan leh vawiin thlengin ka sawi dan tur ka ngaihtuah lawk vek nangin han sawi dawn meuh chuan sawi mai dan tur avang leh ta riau. Mahse, ka sawi ngei angai tih ka hre tho.

"Pa Hming, eng emaw sawi kan duh deuha. Tihian ka sawi tlang pawp mai anga. Malsawmi boral danah hian keini a thiante ho hian felhlel a awm niin kan hre tlat maia. FIR thehluh mai te hi a tihchi angem aw kan lo tia. Eng nge i ngaihdan le? " ka ti ta tawp. A hmel landan han inthlak deuh zawk chu a rei lutuk lo nangin ka lo hmu hman tho a. A tum loh lam ka sawi niin ka hria.

"A felhlel tihah khan mi kut tuar a boral a ang kan ti a" ka lo ti leh hmanhmawha. Min chhang loin a tho a, a kuhva ei lai tui khawihna lamah a va chhak a. Kam a thuah leh te te a, a rawn thu phei leh ta chauh.

"Kuhva hi ka ei ve leh mai thina, tunlai chu ka rui ziah maia. Ni e, i thilsawi chu thil sawi awm tak leh ngaihtuah awm tak ania lawm.. Keipawh khan atirah khan helam zawnf hian rilru ka pu a. Mahse, amah kha in hriaa, mi pangngai a pha lo em em maia. Chuvangin FIR te han thehluh a, han buaipui zui chiam chi niin ka hre lo va.Kan mualpho zau mai mai dawn khan ka hriaa. Amah a boral tawha,anih nih niin a liam zo tawha. Mi kut a lo tuarin a titu man chhuak thei dawn ta hlauh pawh ni ila amah kha a lo tho leh thei dawn chuang lo va. Chuvangin tihian tuar thiam tum mai ila tih hi ka ngaihdan ania" a ti ta daih mai.... 

Note ; A tawp thlengin YouTube lamah Chuan a awm tawh e🤭