MAY/2017(completed)
MAY/2017 - 1
“Hei pawh hi tifai tel leh rawh” tih pah in ka hmaah Bakhawr tam fe a rawn dah leh a,Tlaiah mi pawimawh chawei tur kan neih avangin chawhma lam atangin eirawngbawl in ka buai tawh a, thut hahdamna hun a la awm lo. Ka ning tawhin hnial chak ve mah ila ka hnial ngam hek lo. Diktak chuan englaimahin thinrim hmel pawh ka lantir ngam lo zawk.
Fahrah ka ni a, ka Nu leh Pa hian ka sen laiin min boralsan tawha,ka nu unaupa in min enkawl zui a, fahrah nun hrehawm ka hre ngai meuh lo.Hmangaihna min pek mai bakah ka mamawh apiang ka neih loh hlau in a buai bawk. Tlangval senior tak anih hnuah an thawhpuite puihnain Nupui a nei ve ta tawka, a nupui hi a tir chuan a sual hauh lo. Nuthlawi niin a fanu a rawn hruai lut a, a fanu hi kei aiin kum khat in a Upa a,Unau nei lo tih takah Unau ka nei taah ngaiin ka lawm em em mai.
Tun hnu a an sawi ka hriat leh danin Ka nu te unau hi Nu leh Pa tel lo a seilian anni a. A nu khan ka Putea lehkhazir theih nan theihtawp chhuah in hna a thawk thina.Nu mawlmang ve tak anih laiin Ka putea erawh Sawrkarah hna tha tak thawk in a awm thung.Ka nu a zah em em a, Ka pa hi Thingtlang lam mi niin an Inneih hnuah an khaw lamah an awm ren rawn a, mahse, Putea amah chauha awm a lo ni bawk nen Aizawlah an chhuk leh a, Putea te nen an khawsa ho a,a ruala Motor Accident a an thih lai hian kei chu kum khat ka la tling lo niin an sawi bawk.
Putea aiin Pitei hi a upa zawk nangin nu hmeltha leh Inchei peih tak, tawngkam thiam tak, a duhtawhah chuan zah nei miah lo leh hlawhchham duh miah lo chi a ni a. Putea nen Fa an nei lo a, ama fa bik hmeichhia leh kei kan awma, angkhat rengin Putea'n min enkawl a,kan han nula chho a, hrehawm tihna tur leh harsatna em em nei lo va ka awm laiin nat lawk awm lo in Putea a boral ta thut maia. Khata tang khan ka khawvel a inlet ta thawk. Ka awmdan hi ka ngaihtuah thiam dan ber chuan Lei leh Van a ni tawp mai. Kalna tur dang ka nei lo a, Ka pa chhungte lam chuan min rawn ngaihven ve ngei mah se an khawsak a harsain an ei ve tawk tawk a ni ber a, han fin chi ziazang an ni lo. Pitei te hian kalna tur ka nei lo tih an hriat kar avangin an duhtawk tawkin min an khum a ni ber. Putea nen khan awmpui tel lo in kan khawsa ngai lo va, diktak chuan ka eitur takngial pawh ka siam thiam tha thum lo. Mahse, Putea boral atanga reilote-ah awmpui neih hautak zia sawiin an chawlh tir a, keiman engkim ka ti ta vek.
Kumin hi M.A ka zawh kum a ni a,Zingah hma takah ka tho a, an eitur ka siam vek hnuah Class ka kal a, ka haw veleh angai te bawk in ka che leh char char a, lehkhazirna hun ka nei mang ngai lo.Lehkhathiam a sawi tur ka ni lo chungin ka peih hrim hrim avang a M.A pawh zir thleng thei ka ni a,tunah hi chuan lehhazirna hun ka neih loh mang loh avangin mu tura ka Room ka pan hnu ah tlaivar deuhthawin ka zir leh thin a, achang chuan ka mutthuksan fo bawk. Ka taksa mai a chau lo va,ka rilru a chau tel ngawih ngawih. Chutihrualin ka dinhmun inthlakthleng hi chu ka pawm thiam ve tawh a, min ankhumna leh hmuhsitna lah ngaiah ka nei tawh bawk. Mahse,a chang chuan ka in ngaihtuah lungpuama, inkhawngaih em em chang ka nei ve tho. Hetiang hunah tak hian ka chau zual thin,tah erawh ka tap ngai lo, ka tah ngai loh chhan hi chu chaklohna entirna ni a ka ngaih tlat vang a ni ber.
“Nu,an lo thleng..” Inchung step atanga rawn tlan thlak pah in Grace-i chuan a rawn ti a, Pitei a vir nghal vat. Grace-i hi a nu ang chiah in a hmeltha a, a hleitlin bakah inchei a peihin a thiam em em bawk. Ngeiawm taka min tawngkhum chang nei ve tho mah se a nu ang em a nasa chu a ni lo. A nu leh Putea Inneih hnu khan Pa hmingah Putea a dah nghal a,B.COM a zawh hnu, engmah a tih leh hma siin Putea kha a boral , an Pute lam an be thiam viau nge ni,Putea te dept-ah hna a hmu ta a. A boral hnu lawkah Putea thihna avanga Pawisa an hmuh tur chungchang an sawi ka hre zauh zauh a, engtia tihtur nge tih lam ka ngaihven ngai lo in an Nufa in an buaipui vek a, Pawisa an hmu ta reng em tih lah ka hre ve miah lo bawk.
Tu te nge chaw rawn ei tur ka hre lo a, mi pwimawh tiin an sawi a, a pawimawh hle aniang,an nufa in an phili nasa em mai.
“Lo va welcome rawh..’ phur sarh hian Pitei'n a ti a, min rawn en a.
“Engkim hi a fel vek tur a ni,engmah dik lo ka duh lo ania, chaw te kha i chhum kang palh ange” a ti hluk hluka, mitmeng a lianin a melh a na bawk nen ka melh let ngam lo.
Choka atanga mawng then lawh lawha a chhuak chu ka en a,kum 50 a pel tawh tih awih har tak a ni. Nitin Gym a kal ziaha,a pian mai bakah a vun nalh zia a hria a, midang hmuh atan a show vel nimaiin ka hre thin.
An rawn ri lut nawk nawk a, ka awmna lam atangin Living Room ka hmu thei lo a,bakah tu nge lo kal ka lo ngaihven ve a tul lo,tupawh lo kal se ka tana mi pawimawh anni ngai lo,ka class kalpui te an lo kal anih chuan thuhran, chupawh lo kal zeuh zeuh ang anni mai,ka thiannu ber, ka naupan lai atang ka kawm Kimtei lah M.A phai lamah a zawm avangin a awmbo bawk nen,thian nei teuh mah ila ani bak hi Hmeichhiaah chuan thian tha han tihtur em em ka nei lo.
“Abigail ,Juice kha min lo pe teh” kawngka a rawn dah zawk pah in Grace-in a rawn ti a. Ka hming hi Abigail Malsawmsangi a ni a, Putea damlai kha chuan Pitei leh Grace-i pawn mi zawng zawng min koh dan in ‘Abby’ tiin min ko thin, mahse, tunah chuan ‘Abigail’ tih bak in min ko ta meuh lo.
Living Room ka pen luh rual in kan mipawimawh te chu Mipa ve ve an ni tih ka hmu nghala. Pitei te nufa an tawng bawrh bawrh a, an hlim tih an hmelah a lang hial mai.Grace-i hnaih zawka thu ka hmuh rual in ka ip chawih peka,a chhe lo ve bawk atin ni.
Grace-in ka thil ken a lo la a, a vuan nghet tawh emaw tiin ka thlah a, a lo la vuan nghet lo chu niin, a tla keh chuai,Pitei leh Grace-i an te thawta,hrilhhai tak hian no vek leh theitui baw nuai mai chu ka en ringawt.
“He nu tak hi chu aw,fimkhur ta che" Pitei'n min ti a, ka rin ai takin a zaidam. Min hrawk hrep ka rin vei nen. Grace-i bula thu pa chu a kekawrah tak ka tihbuak a,chhuatah no keh them nen kan ni deuh nuai mai.
“Awi, ka tihpalh lutuk..” inthlahrung em em hian ka ti a, Pitei ka en chuan min lo melh sala tun maia. An haw huna min ankhum nasat dan tur ka ngaihtuah ngam lo zawk.
“A zia lo e, lo kal rawh, ka lo tifai ang, chhuat kha lo tifai rawh” min melh ram ram pah hian a ti a, a kal pahin Grace-in min rawn nek deuh salh a,ka hma a kekawr huh val kulh a thu chu a rawn ding chhuak a,a kekawra thil ka tihbuak avangin thinrim hmel pawh a pu chuang lo va. Ka tihbuak hma nen a landan angai reng maiin ka hria.
“A pawi lo, tihpalh a awm ve alawm,mahse, ka ban chuap si a, tihfai angai anih hmel e’ nui deuh chungin a ti a, ka zak lutuk chu ka biang a sa hut hut thei
“Lo kal rawh, ka room lam Bathroomah kan tifai dawn nia” Grace-in ati zang vah.
“Ka lo tifai ang, ka tihpalh tak tak..” ka ti leh sap,ka kum ngaihtuah chuan hetianga zam em em thin tur hi ka ni tawh lo mawle.
"Chhuat kha lo tifai zawk rawh. Ka lo pui mak angkhan engmah i ti lo ang” Grace-in a ti leh vat, Mipa pakhat lo thu ve chuan engmah a sawi lo,kan chevel chu min thlir a,a thianpa ang lo tak in a hmelah nuiza hmel a lang bawk.
“Grace,ani nen hian kan tifai zawk ange” tih pahin min rawn hnaiha. “Khawilamah nge Bath Room ?” a ti zui zat.
“Helai hi kan tifai lawk ang, helamah hian Bath Room chu a awm a” tiin Bath Room lam ka kawk a,a thle zauha.
“Chhuat kha tifai rawh, hei chu a hmanhmawhthlak loh. Ka lo nghak ang che” ati leh chu ngei tak ka ni ringawt. Puitling a ni a, min nghah kher angai lo. Chu bakah ka inleng a ni lo a, ka tihbuak bik nilo in Grace-i nen a kan tihbuak a ni lehzela, chumai bakah Grace-i pawn tihfai pui a tum reng a, engvanga hnial nge maw anih ni? A awmdan ngeiawm ru lutuk chu ka ngei tawk a tling em em mai.
Chhuat a no keh them ho ka phiat khawm a, theitui bua ka hru nghal sawk sawka, a sawi ang tak tak in mi tenawmpa lah chuan min nghak ta tak tak.
“Ka zo e, min lo zui la” ka ti nghat.
“Towel ka rawn laksak ang che.” tih pahin Bath room kawngkhar ka nem hawng a, a luhna tur in ka tawlhsawn lehnghal a,a bu nghut a.
“A lawmawm ngawt ang, ruak a ka din ngawt chuan nuam i ti dawn lo em mai” nui chung hian a ti a, chhang lo in Towel la turin ka kal a, Grace-i a rawn phei ve chiaha,rum mangkheng in min melh a.
“I thiltih pawi zia kha i hrethiam lo zawk ang,i chak lo ngawt ang” khakna a khat hian a rawn ti a,a Mipa ngaihzawn hual a ni mahna. Mahse,a Bialpa ka hre ve tlat,In ah pawh vawitam a lo kal a, Pitei awm loh lai pawn a rawn riak fo tih ka hai hek lo va, sawi erawh ka sawi chhuak ngai lo.
“A pawi ka ti lutuk” tiin kal pelh mai ka tum chu ka banah a rawn vuan a.
“Khawnge i kal dawn?,tifai turin a tih che kha..” ati leh hlak.
“Towel a mamawh' ka tih chuan mak tak in a nui nghal a.
“Han la vat rawh, keiman ka lo pe ang..” a ti chu a thiltih tawhah chuan a la tha ber hial awm e,kha pa nena awmdun kha kei chuan ka chak ve ther te lo va, a pek duh phawt chuan a tha a nimai.
An chawei laiin ka vil a, min bia anih loh chuan ka tawng lo. Mipa pahnih te pawn tu nge ka nih lam an ngaihven lo a, an awmpuiah min ngai ve hmiah tih a lang reng bawka,pawi ka ti chuang hek lo. Anihna takah chuan anni ngaihdan mai mai ka care hran lo.
An haw hun a thil thleng tur ka ngaihtuah erawh chuan ka rilru a nuam lo viau, engtin tak nge min tawngkhum dawn ka hre lo a, an tawngkamna satliah hi chu ka tuar thiam tawh a,mahse, an duh anga thil a kal loh vaih chuan min mawhpuh nasa dawn tih ka hre lawk reng mai.
An inleng te an thlah liam a, an hlim viau a ni chek ang,an nufa in Tv en chung in an tawng bawrh bawrh a, an nui leh thin bawk a, kei erawh ka lo inring lawk nasa ve laklawh tawh si,engtinmah min ti ta lo chu ka hamhaih ta mah mai.
“Kan Inlengte kha i hria em?” Thleng ka hruk hul mawlh mawlh laiin Grace-i a rawn ti a, Fridge atangin tui Bottle a phawrh paha.
“Aih, hre lo..’ka ti awlsam mai, ka thiltih lai bak ka rilru ah a awm lo, tihzawh vat vat a, Lehkhazir ka duh avangin ka hmanhmawh rilru viau.
“I leih huh zawk kha Jordan-a ania, chuan Pakhat kha chu Rindika”ati a, tui a in zui khawlh a.
“Anih chu mawle” ka ti tha leh maia, tu te nge annih min hrilh paha insawitheih nan hman a tum tih ka hai lo. A hnar ti vang chuntin mawl min tih hmel deuh in min melh raw.
“Jordan-a kha i hre ngai lo a maw?” ati leh a, ka lu ka thing ringawt, hre miau hek lo i..
“Aizawlah hian nangmah chiah in em ni i awm a?” ati leh halh a,min mil lo viau mah se achang chuan kan inkawm a, kan titi dun ve fo tho.
“Ni lo e, nang leh Pitei pawh” nui chunga ka tih chuan za lo zet hian a then ve a.
“Tak takin zaithiam lar a ni lo bawka,a lar dan hi a ni vut lo. Mahse, Nula ho zingah chuan a tla na asin,aaaaa..ka hrilhfiah peih lo che” a ti zui leh a, diktak chuan min hrilhfiah mahse ka hriat ka ring chuang lo.
Exam kan zawh niin kan thianho a Dine Out an rawt a,kal ve chi ka ni lo tih hriaiin ka pha a. Ka kal ve vaih chuan Pitei te Nufa in zanriah eitur an nei lo mai ang. Engmah sawi lawk awm bawk si lo nen, an ngaithiam dawn lo.
“Abby,ka rual in lo kal la..” min titu Zobiaka rawn ding hnai chu ka en a, MZU kan kal tirh atang-in kan inhre tawh a, mipaah chuan ka kawm nel ber pawl a ni a, thiantha over ti a sawi tur erawh a kan ni lo. Vawitamtak min beisei tih a tilang tawh a, amah hi a hmeltha hluak lo a,mahse,palian leh pian nalh tak mai a ni a. Hmeichhe ho zingah chuan a tla na viau tih ka hre bawk. Chhia ka ti lo a, sual pawh ka ti chuang lo. Diktak chuan ngaihzawng ang zawng in ka en thei der lo va, chuvang takin min beiseina a tihlan thin pawh ka haider lui tlat bawk.
“Abby" a rawn ti leh a, " aaa, kal loh ka lo tum a, ka chhungte ka hrilh lawk lo a’ ka tih chuan a nui a.
“A ho em mai, kal ang, kan rei dawn lo. I chhungte chu ka biak sak zawk dawn che mi niang?” ati zung zung.
“Min hrethiam zawk rawh u, nidangah Class ho thiltih a awm leh chuan ka lo kal zawk ang” ka ti a. Kan thian dangte kan bulah an rawn ding khawma. Bus rawn ding ka hmuh veleh sana ka en a, hetah hian ka chuan ngei angai,ka chuan loh chuan haw na tur ka nei dawn lo.Hei bak chu vawiin atan bus kal leh tur a awm tawh tlat lo.
Bus- ah hmanhmawh deuh in midang an lut a,keipawh ka hmanhmawh angai tih ka hria.
“Ka kalsan mai ang che u, min ngaidam ru “ tih leh kal ka rual a,sawi tur haihchham leh Beidawn hmel zet hian min en ha hlawm maia. Rang taka Bus lam pan ka tum laiin ka ke ka chhep sual a, khup sawh dawt in ka bawk thla thawrh mai.
“A na em?” Mipa aw hian a rawn ti a, a hmel en tum in ka hawi chhuak a, ka beisei loh zet in khapa,Grace-i mikhual pawimawh em em kha a lo ni a, tu nge a hming kha aw???JORDAN....nidawn tak…
“Aih,aw..na lo e” ka ti a, ka hmuh hmasak tum khan ka che chhe tawha,tunah lah ka tlu lai kher mi rawn hmu leh bawka, a hit viau lo. Min kaihthawh a tum chuan keimah in ka tho a, ka din rual rualin khup a na zawk a, ka inrin hmain ka thu sawp thla leh nawk bawk.
“A na anih kha..” Zobiaka zawk in a rawn ti a,nia, a na chiang khawp mai ka rilruin ka ti ve a. Ka hma a ding mipa vang hian na lo anga lan ka tum mai mai a ni. Lei char takah ka zuk sawh a, na lo chi a ni lo.
“Ka thlah haw ang che..” tih pahin min kaitho a,Bus kal tan chiah chu beidawng tak hian ka en liama. Anihna takah chuan ani hian vawikhat min thlah haw anih chuan a lehpek a awm ang tih ka hlau a ni ber,mahse, duh lo ngawt thei ka ni tawh lo, haw ka duh chuan a rual a ka haw angai,ka hmeichhe thian pahnih ve lah chu tunhnaiah kan thianho zinga mi te nen an Inkawp thara, an inphur mai zel si.
“Aaaa, a va han buaithlak,in kalna tur ka ti khawtlai vek ang che u” ka ti a, ka khup thip zet chu ka chhungril in a hre vang vang.
“Ka hmu tawh che em?” ti a min rawn be tu lam ka hawi a, ka thle zauh a.
“Ka hre na g,i hre zawk ang chu?” ka tih chuan a ha var rual that lang in a nui a.
“Eee, Abby, hei hi ka Cousin Jordan-a anih hi,chuan, Mam, hei hi a hma in a thlalak ka en tir tawh che kha,Abby ania..” Zobiaka'n a ti a. Zobiaka thilsawi ai chuan a hmela thil ngaihtuah muk hmel lo lang chu ka ngaihven zawk, kan in a chaw an lo ei tum kha hre chhuak lo se ka lo duh ve em em tawp.
“Ok, chu chu anih dawn chu, ka hmuh hnu i ang riau a” tha tak hian a ti a, enge hetah a tih ve ni? Zirlai ni tur chuan a Naupang tawh lo tih a chiang a, a thawk ve zawk pawh animaithei. Mahse, thawk ve se chuan ka hria in ka ring leh lawi, Mipa hmeltha tak ni lo mah se Hmeichhe duh chi a ni miau a, a lar hle ang tih ka chiang.
Kan exam zawh tawh avangin Class kal ka ngai tawh lo a, nitin In ah ka buai a,Pitei leh Grace-i Office an kal a, kei ve thung chu nilenga an tih peih loh zawng zawng tih animai. Mahse, a hma ang in class ka kal tawh lo bawk a,hmanhmawh pheleng a thil tih angai tawh lo. Zan lamah Zobiaka a lo leng ta zauh zauha, min duhthu engmah a sawi lo va,a awmdanah chuan min ta chei ve ngawt a ni ber,a hma khan min duh tih a tilang fo a, ka haider mai mai a,tunah hi chuan tawngka emaw Phone pawn engmah a sawi loh avangin “aw’ emaw ‘aih’ tiin chhan ngaihna a awm lo. In a a lo len hmasak ber tum hua nuam ka ti lo a, ka inthlahrung bawka. Mahse, ka beisei loh takin Pitei te nufa in an lo lawm viau maia,a lo kal ngun ang tial tiala, nuam lo ka tihna a bo ve tual tual bawk.
“Naktuk chu Saturday a ni tho a, Inkhel en ila, Ticket pahnih ka nei a..” a tih chuan phawk deuh mai hian ka en a, a lo kal ngun tawh nen engtin nge chutianga kal tura min sawm theih ka hre lo, Inchhunga ka lal loh zia a hre chiang viau tawh turah ka ngai asin le.
“Ka thei lo ang,bakah eng inkhel nge awm a?” ka ti a.
“Aizawlah hian nangmah chauhin em ni i awm a? Inkhel tur engtin nge i hriat loh theih le?” ati hluai. Inchhungah Hmeichhe hlang kan khawsa a, Tv kan en ve pawn Infiamna lam engmah kan en ngai lo.
“Aaa,hriat zawng a in ang lo a” ka tih chuan a nui hak hak a,Grace-i a rawn luta. Zanriah an Nufa in an ei chhuak ve ve a, khawiah nge an ei ka hre lo va,an ei dun em pawh ka hre chuang lo.
“I lo leng alaw?” tiin zangkhai tak in Zobiaka a rawn be nghal a, hah hmel takin kan ep zawng a thutthleng awmah chuan a thu hnak bawk.
“Um,In lo haw hma chu ka lo awmpui ang chu ka ti a” a ti tha ve mai.Grace-i awmdanah chuan ruih nei a ang viau..
“Naktuk Inkhel en ka duh,i kal dawn em?” a tih chuan mak ti lutuk hian ka en a, vawikhatmah eng inkhel mah a en ka la hre ngai lo, a sawi rik pawh ka hre ngai lo.
“Hei, Abby hi ka lo sawm mek a” tih pahin Zobiaka'n min rawn melh a.
“Nia, hruai ve rawh, kei pawh Jordan-a rual in kal ka tum alawm” ati a, a nui var var mai,chaw an rawn ei bak kha vawikhatmah an lo kal leh lo va,mahse, a ruala kal a tum anih chuan a tum ang ngeiin an lo inzui leh hle tawh pawh a ni mahna le.
“Wow, nangni hi in lo serious viau tak tak em ni a?” Zobiaka'n a ti hluai a, kei erawh ka ngawi ran thung.
“Amah zawt la,bakah an Club te anni ve a,enpui ngei ka duh.Abby,nang pawh kal rawh,kan sawi chu maw, kha hmana Juice i leih pa kha ania, i la hria em?”ngeiawm zet hian a ti a, a nui zuia, tawng loin ka bu nghat ringawt. Ani kha vawihnih chauh ka la hmu a, ka hrereng chu ka ti ngam lo.Mahse, mak tak in vawitam tak ka ngaihtuahna luah Tu a ni.
“Khapa kha tunge anih chu Zobiaka khan a hrechiang alawm”ati leh a, ni e, a hrechiang tih ka hria, a Cousin a ni miau a…
Chapter -2
“Lawk,a hma in Jordan-a kha i hmu tawh tihna a ni em?” Zobiaka'n a ti a,mak ti hmel a pu deuh bawk.
“Chaw an rawn ei tawh a”ka ti tha ve mai.
“Chuvang anih chu ka hmu tawh che em atih,keilah khan i thlalak vang kha maw ka lo ti a” lawm vak lo tih hriat deuh hian a ti hmuk a, ka nui ringawt.
“Eng thlalak maw?” Grace-in a tih chuan,
“Eng thlalak lem mah..” a ti thuai,inkhelh chungchang an sawi dun a, ka ngawi kar mai. Ka rilruah thil dang daih a awm a. Football club, Mizo zawng zawng huapzo,mizo te tan rawn em em neitu hi Jordana te an lo ni reng maia, infiamna ngaina lo eltiang mah ila an club hming te chu ka hre ve em em tho. Mahse, Jordan-a te chhungkaw ta a ni tih ka hre lo.
“Abby....eng nge i ngaihtuah a?” atih chuan phawk deuh hian ka en a,mak tih hmel deuh hian min lo en dun reng.
“Eng nge?” ka ti he haw.
“Naktuk chu ka ring che ania” a ti hul haka,ka ngaihtuahna ka lo kawm nasa lutuk a min bia tih pawh ka lo hre lo,ka lu ka thing a, Grace-i a kal dawn bawk nen, ka kal theih ka ring lo hulhual. Mahse, a ruk tak chuan ka chak ve reng tho.
“Ka thei lo ang...Ka ” ka tih laiin Grace-in min lo tawng hnan a,
“I kal thei ang, Ka nu pawh a kal duh maithei a,kan vaiin kal ila nimai lawm...eee, Zobiak, Ticket kha engzat nge i neih?” atih zawm zat.
“Pahnih animai,Abby ka lak kep a,i nu a kal ve duh chuan Mama bia la..” ati awlsam then
“Um,nia, a lo kal maithei a, a lo kal loh pawn ka be mai ang” ati tha ve mai bawk.
Zobiaka haw hma in Pitei a lo haw a, ani pawn Inkhel tur chungchang bawk a rawn buaipui leh a,eng nge maw an hriat ni?!
Zobiaka haw hnuah mu turin room ka pan a, engtiklai atang khan nge an nufa hian ka chungah an danglam tak ka hre lo, rei tak erawh a la ni lo tih chu ka hria.Zobiaka vanga danglam an niin ka hria a, achhan pawh a lo len tak tak hnuah hian an nufa hian an mizia a danglam tih ka chiang tlat. Tawngkam mawi lo leh hriat nuam lo pawh a hma ang em kha chuan min hman khum ta lo va, inchhungah erawh chhiahhlawh anga min en a la bang lo a, an tih peih loh zawng zawng ka la ti vek a, engmah min tihpui an tum chuang lo. Zobiaka lo kal lai hian an mizia a danglam thei viau thung,ka bialpa a ni lo a, mahse, ka chungah Pitei te nufa mizia a danglam phah miau avangin ka tan tu nge anih lam a pawimawh lo.
Ka tihdan pangngai in hma deuh takah ka tho a, khua a nuam lo viau anih loh chuan zingah hma taka tlankual hi chu ka tih than a ni a, ka thau viau vang lam ni lo in ka hunthawl neih chhun anih avangin bawh pelh ka duh ngai lo. In ka thlen veleh ka inbual leh sawk sawk a, Pitei te lo thawh ve meuh chuan chawei ka peih tep tawh,hetiang hun hi an thawh dan tlangpui a ni bawk. Thingpui ka pek chu tum deh vuaua dawhkan kil chungin a in a, nizan lama a rui in a la nghawng a ni chek ang, a melh ngai a melh ngar maia,min biak hmasak loh chuan ka be ngam lo.
“Vawiin kha Zobiaka rual in nge i kal dawn kan rual in?”a tih chuan ka phu ru deuh zawk a,ka thil sil lai dahin ka hawilet a.
“Kal pawh ka lo tum hleinem..” ka tih chuan a ner nak a.
“I thu thu le, mahse, Zobiaka khan min dil a,ka lo aw vek a” ati hmuk a,ka hmui ka pet nauh nauh a, lawm tur nge lawm loh tur ka hre lo..Diktak chuan Inkhel en hrim hrim lam ai chuan Jordan-a ka hmuh chakna a lian zawk.
“Ee, chuti chu i phal tho chuan kal mahila a pawi chuang lo’ ka ti leh lawi a,a bu nghat a.
“I thu thu animai”tih pahin a tho a, biak huphurhawm taka tum vuauin a chhuak ta nul nul.
Darkhat a rik meuh chuan Inkhel en turin Mualpui a Rajiv Gandhi stadium ah ka awm vang tawh, mi nawlpui boruak ri hulh hulh mai nen inchimbuai lo tawk vel in a laili laiah kan thu a. Zobiaka te chhung hnai tak annih vang nge ka hre lo,kan thutna lai hi mi nazawng thutna tur ni in a lang lo.
“Dar engzatah nge an tan ang?” tih pahin ka hawi kual a, mipui an tlim hmur a, hei aia Stadium changtlung zawk neih ka chak ve tum awmchhun leh hmasa ber a ni hial ang, hmun rem lo leh nuam lo tak tak ah pawh an bawr khat tup tho,an demawm lo. Kan Mizo Club awmchhun ten a vawikhatnan min mizo mipuite min Champion pui dawn niin a lang tlat a,eng anga nasa pawn sapatal kual vel se ka dem hauh lo ang. Mipui thawm a rik- in a ri hulh hulh maia, an zai a, khuang an vua a,an phur em em vek a ni ber. Nizan khan hawi bo leh lutuk leh tunlai thilthleng hriat loh lutuk hi hi mawl na pa khat a ni tih ka ngaihtuah a, ka Google phah ta chiam a, eng nge an khelh mek leh eng dinhmunah nge Mizo Club neihchhun hi an awm tih pawh ka hre ve kar tawh.
“An tan tep,darkar chanve vel ala awm..” ati a, eitur kan ken luh a ei pah mawlh mawlh.Pitei leh Grace-i pawh kan hnung chiahah an thu a, Jordan-a erawh ka la hmu hauh lo,hmu chak mahila ka tilang ngam lo.
Ka tum lawk hauh lohin inkhelh chhung zawng ka tang tluanchhuak ta zak, ka inhumruh a, Zobiaka lah a tang lutuk a, a ding leh uaih thin bawk.Inkhel hun tawp dawnah pawh tumah mah in an la pet Goal ta lo fo, ka lo mangang ru em em ringawt,tihtheih ka nei der si lo,a chang leh ka tawngtai thul,ka tawngtai ka ti nangin a mumal lo viaua,chhan tlak a ni meuh em pawh ka hre ngam lo.
Goal khat chiah pawh thun se kan champion dawn si,englaimah in Mipui thawm a reh lo. Kan tan em em kan players te au in chawl hauh lo in an zai a, an au rual dual dual bawka. Lehlam team tan chuan a zamawm khawp hian ka ring. Vanneihthlak lutuk-in hun pek belh tlem te ah a goal ta hlauh maia,Mipui an sapatal a, lawm avanga tap te,bula mi te tu nge annih pawh hre lo a pawm ta chawt chawt tawk lah bo lo,a hlimawm a, a lawmawmdan ka sawi thiam lo, ka chhungril a fan a, ka mur uai uai in ka hre hial mai.
Zobiaka nen a Bike dahna lam kan pan mek laiin "Zobiak,in haw dawn mi?" Mipa aw hian a rawn ti a, min rawn be tu en tum in kan hawi leta, Jordan-a a lo ni a. Tunah chuan mipui nawlpui an haw zo tawh a.Pitei leh Grace-i pawh ka hmu tawh lo,an haw tawh nge la haw lo pawh ka hre lo va, Jordan-a te nen hian an awm ho turah ka lo ngai ve ngawt zawk.
“Aw, Abby hian tih kawi tur a la nei a” tih pahin min rawn en a, a hmelah chuan an Champion vang a lawm hmel a lang pawhin ka hre lo.
“Ka lawmpui che..” ka tih chuan ka beisei loh zet in a then ve suka.
“Ka lawm e, ka tan chiah a ni lo ania,Mizo mipui zawng zawng tan anih kha a” ati a,a sam chhip lam buk deuh chu a tuai zauh bawk,a khabe kual lian lam lek lek ah chuan tona a dum kual raiha,an team Jersey a hak chuan a pian nalh zet chu a phuar deuh tang bawk,Jeans Kekawr pawltak zet a ha bawk. A landan sawifiah dan awlsam ber chu Mipa tih hian a sawi ila a kim vek.
“Eeee, zanin kha dar engzatah nge tan tur?” Zobiaka’n a ti leh rih a, eng nge an sawi ka hre ve thiam lo, an chhungkaw Programme lam niturah ka ngai ve tawp.Ni a tla dawn suar suar tawh a, ka hmanhmawh rilru zek zeka,kalsawn thuai thuai ka duh.Jordan-an min en run mai bawk nen nuam ka ti chiah lo pawh a ni ang.
“Dar 9 ah ania, Abby pawh hi ka lo beisei ang” ati zangkhai vuh, a ban vai zauh pahin a kalsawn ta a, chhan let hman pawh a ni lo.
Zobiaka ka en a, a nui hmelah chuan thil lawmawm lam anih hmel.
“Engthil nge a?” kal pah in ka ti a.
“Zanin hian an chak emaw chak lo emaw Players te nen Party neih tur ania,an chak ta bawk nen,a nuam viau ang” atih chuan ka ner ru nak mai, nilengin ka chhuak tawh a, zanlam lehzel chu ka chhuah theih ka beisei tawh lo.
“Anih chu, a nuam phian ang” ka tih chuan min rawn melh zawk a.
“I kal ve dawn alawm,i chhungte i hlau em ni?” a ti a, a vawikhatnan kan in a ka lal loh zia a hria tih a tilang ta chiah.
“Hlau tih te chu a...” ka ti nghata, sawi zawm lo in ka ngawi leh daih.
In kan thlen thlengin kan tawng leh ta lo,a hriatsa reng nimahse ka chhungte ka chungah an tha lem lo tih sawi lan kher kha nuam ka ti bik lo.
“Grace-i ka rawn bia ang,amah pawh a kal tho ka ring a..” atih chuan ka bu ringawt. Zobiaka an be chhe ngai lo va,mahse, a rawn sawi avangin hauh ka tuar lo ang tih a sawi theih loh,a tlan tur chu a banah ka va vuan leh rih a.
“Be lo mai rawh, kal ve kher ka duh chuanglo a, nangmahin kal mai rawh" ka ti a, a nur nanga.
“Ka lo ngaihtuah ang,i kal loh chuan kal kher pawh ka duh chuang lo” ati leh ta tlat.
“Chutiang zawngin ka sawi lo,midang pawh i hruai thei tho a,bakah min ngaihtuahsuh”ka ti leh vat.
“Ka kal phawt ang..” ati nghat a,kei aiin kum khat in a upa a,chhungkaw khawsa thei tak a seilian ani a, engmah a nun ah hian harsatna a awm ve lo niber in ka hre thin.
Eirawng ka bawl laiin Pitei leh Grace-i an rawn thleng ve a, nidang ang lo takin choka lam an rawn pan dun a, an hmel a hlim hle bawk.
“A van nuam tak, i thlenna a rei tawh em?” Grace-in a rawn ti a,ka thlenna la rei bik loh thu ka hrilh chuan,
“Zanah i kal ve dawn em?” a ti leh a, Pitei chuan tui in pah in min rawn en a, engtia chhan tur nge ka hre lo, kal ka chak em em lo,mahse, hetiang Party na vel hi ka la kal ngai lo a kal ve chhin pawh tha ka ti tho.
“Ka hre lo le, sawm chu min sawm ve ngei a"ka ti a, vei awmlo tak in ka chhang liam puat a ni ber.
“ i kal ve loh chuan Hmeichhe dang zakthei lo zet zet an tam thei teh ania aw” ati leh chuan mak deuh in Pitei a lo nuia,tunah tak hi chuan awmpui ang nilo in Unau ang in min bia in ka hria.
“Kal ve rawh, Zobiaka bia la,keipawh Jordan-an min rawn hruai hman dawnlo a, in rual in ka kal angai alawm,Nu, a kal ve thei a ni lawmni?” tih pahin a nu a en a, a nu hmelah chuan a phal lo dawn niin ka lo hria, melh pawh ka melh tha ngam lo.
“A tul kher emawni le?” a ti chu ka rin ang chiah chhanna ka hmu..
“Tul e, Nula a ni ve tawh a, awmpui ang pawn ngai mah la ka pa farnu fa a ni tho ania. Khung tawm reng tum suh. Chua,keipawh Zobiaka rual a kal ka ngai ania” ngenngawl deuh hian a ti a, ka awm ve lo ang hmiahin ka chanchin a sawi a, “awmpui” tih tawngkam hi chu ka lakah a hmang ngun lutuk a,ngaiah an nei ang bawkin keipawh har an huat en-ah pawh ka en tawh bik lo.
“Engemaw nang hi i hriat le?” vin deuh tak hian a ti hlak a,tih ber tur hre lo in ka kut ka elh niap niap ringawt,an nufa hian an inkhak fo,mahse, keimah vang a ni ngai lo.
“Engmah, kal ve se ka duh mai zawk”ati hlak a,min rawn en a,
“Kan kal dawn nia,ka han inbual lawk teh ang” tih pahin a nu pawh ngaihsak leh tawh chuang lo in Room lam pan in inchung panna Step ah a tlan chho nghal daih.
“Zobiaka hi tu nge anih i hria em?” a tih chuan Pitei mitmeng hlauhawm leh mi melhna zet chu en loh hram tum in hnuailam ka bih a. "Hria e" Ka ti hul haka. Eng rilru puin nge min zawh ka hre lo. An khawsa thei hle a,a nu leh Jordan-a Pa unau anni tih ka hriaa,abak an chhungkaw chanchin ka hre lem lo.
“I tan Pasal tha tak anih ka ring a, i thiltih-ah chuan ani i kawp hi i tih that theih ber a ni hial ang,chuan, Zobiaka Pa hi kan Dept a kan Director a ni a, engvangin nge alakah that ka chhuah i hrethiam tawh em?” ati leh chu a tawng ring lo, mahse, a chiang...
“Ka lo hre miah lo..” ka ti tawi tak ringawt..
“Zobiaka hi chuan a hriaa, a hranpa tak chuan A-pa hian min hre lo thung,Grace-i hi a hna-ah a la nghet lo a, hei hi nangman buaipui ang che, i hrethiam em?,i tih theih phawt chuan i duh duh ti turin i zalen animai” a ti leh chu mak ti deuh hian ka en a, engtin nge keiin chutiang ka tihtheih tehlul ang?!
“Engtin nge chu chu keiin ka tih ang?,i duh chuan Zobiaka hrilh mai la...” ka ti bah nak.
“Keiin ka hrilh ngawt thei lo,thei ila nang ka mamawh nang che. Zobiaka hian a duh hlum lo chauh che tih ka hria,i thu thu in a awm ang. Han ngaihtuah teh, i thiante engvangin nge chhan awm lo in ka lo lawm tehlul ang? Tha takin ka sawi ang khan ti la,midang tumah hrilh reng reng suh,chutilo chu khawsak ho zel pawh a harsa ang” ati leh hmak hmak a, a thutna chair a nawr sawn a, min en tawh lo in a kal chhuak a,kei erawh chuan ka kut ka hum ruh ngat ngat ringawt.
Dar riat rik hma hretin Zobiaka a rawn thleng a, insiam pawh ka lo la insiam lo, ka rilru a buai a,ka chawei pawh a tui lo va,ka ei meuh lo zawk.
“Abby...insiam tan tawh ang” Grace-in a tih chuan ka phu deuh zawk mai,hetiang hian min koh lohna a rei ta.
“Thawmhnaw hak tur pawh ka hre lo...”ka ti ringawt, thildangah ka chungah tha lem lo mah se thawmhnaw hi chu an nufa a an buaipui ber a ni bawk a keipawn ka nei chhe hran lo,ka duhzawng ka lei erawh a awm meuh lo thung.
“Ka enpui ang che,hmanhmawh ang” ati a, Step ah a tlan chho zai zai a, muangchangin ka zui a, ka phur na a bo vek tawh, tlaiah kha chuan diktak in kal ve chhin ka chak anih kha...Tunah chuan ka tihtur a tuk,tih chakawm loh em em-in min hmuak tlat a, ka engtihmah a tui lo.a Ka thianpa pa an boss anih vang ngawta thil tih tur min pek hi a awm lo leh lutuka, a a deuh emaw tihmai tur a ni.
Party na hmun tur kan thlen hma in Grace-i leh Zobiaka an ti ti mawlh mawlh a, kei erawh ka ngawi ngar mai,a hnungah keimahin ka thu a, Zobiaka ngaihdan a ni lo tih ka hre tho nangin ka haider lui a, mahni a in ngaihtuah mai mai ka duh vang a ni pakhat bawk.
“Abby,ngatinge Jordan-a khan i kal loh a hlauh viau le..?” Zobiaka’n a rawn ti thut a, ka thu mar zawt mai.
“Eng maw?” mawl hmel zet hian ka ti a.
“Jordan-an i kal dawn leh dawn loh min rawn zawt leh a,amak ka ti viau mai..” a ti leh a, keipawn mak ka ti,a hranpa tak in ka hre ngai pawh a ni si lo.
“Ka hrethiam lo e a” tii dik tak in ka chhang a.
“A van mak, engtin nge hriat pawh ala hriat che le?” Grace-in a rawn tih ve phei chuan chhan ngaihna ka hre lo.
“Ka hre bik lo,ih,Grace...hna hi thawk dawn ta se i remti angem?” Zobiaka’n ka chhan hmain min lo tih khalh a.
“Tu, Abby maw?”nelawm vak lo hian a ti hlak a.
“Aw,Jordan-an hmuh a duh chhan ka ngaihtuah a, Abby hi hnathawk turin a duh anih ka ring, chutiang atan bak Jordan-an mi a mamawh ngai lo”ati leh duah a, sawi ve tur pawh ka hre nek lo e.
“Naah, a van mak, Abby lo pawh an tam awm e,ka nu thu thu animai hna a thawh leh thawh loh chu..” ati tha ve mai.
Partyna hmun tur ‘Siby’ kan thlen meuh chuan mi an lo awm nual tawh, tumah hriat ka nei lo,Players ho ka hmu hlawma, kei hi vanneihna tak ka nei a, tupawh hi chiang taka ka hmuh tawh hi ka theihnghilh leh mai mai lo tluk a ni a. Chuvangin players ho pawh vawiina ka hmuh ho ka theihnghilh lo.
Jordan-a a rawn chhuak chiah a,"in lo thleng thei maw? "kan bulah rawn din pahin biak bik pawh neilo in a rawn ti a.
“Um,kawng a lo chhe tawh hle mai” pangngai takin Zobiaka’n a ti a,ka kut a rawn vuan zui nghal bawk.
“Mam,kan kalsan ang che u, Abby hi ka thiante kan hmuhpui lawk ang” ati leh a, ka nuih lui sak bawk.
“Um, keini pawh kan rawn lut har lo ang,kal ila...”tih pahin Grace-i kawngah a kuaha, a taksa lian leh infit zet si chialin a pawt hnai deuh bawk.
Zobiaka Cousin te ho ka hmu nual mai, an vaiin an hmeltha nimaiin ka hria,mi hausa chhungkua anni bawk a, an zau halh maia, an bula awm a nuam hlawm hle bawk.Music a ri dup dup a, an lam suau suau maia, intur lah chu a tam na ngiang bawk. Zobiaka’n Beer min laksak a, mahse, ka hnar thung,ruihtheihthil lam engmah ka ti ngai lo a, tihchhin chakna ka nei hek lo.
“Ka va chhuak thawveng lawk aw..” ka ti a, nidang ang lo tak in ani pawh a in hnem a, a mumal chiah lo ,rui chhia erawh a ni lo.
“Um, ka lo kal ve ang..” ati a a rawn tho tur chu ka vuan a.
“Ngai lo, min ngaihtuahsuh,reilote keimaha awm ka duh mai zawk, ka lo let leh vat ang” ka ti a, a ngawi deuh vang vang a, min hnial dawn emaw ka ti hman,mahse, a bu ta nghauh...
Chhaklam panna kawng awm chho ruih chu ka en a, Thing a ding thelh sung a,thingkungah Light a uai fur bawk nen, a lang nalh takzet. Kawng lang raiah chuan ka chho a, thui vaklo ah kawng a kawi a, a kawi pelh chiahah zawl zau lutuk lo a lo awm a, thingkung rinchhanin thutna Thing tho a siam a lo awm thluah maia,thut a chakawm hliah hliah mai..Nidang ang chu nise ka thu hauh lo ang tih ka chiang, Rul hi ka hlau em em a,Ramhnuai ka ngainat loh phah...
“He lai hi a nuam asin” Mipa aw hian a rawn ti thut a,ka phu zawk bawk,a aw atangin tunge anih ka hai lo.
Thingkung nghengin a ding a, a hmelpa angreng tak mai chu Light in a chhun a,a pian nalh tak lah chu thupbo ngaihna a awm lo. An hausa em em a, amah lah mi awh ngawih ngawih tham khawpin a la nalh tel zui bawk,khawvel hi a fair lo mang tak e. Sum an neih mai bakah pianphung duhthusam emaw tihmai tur an la nei zuia. Mizo zingah theuh theuh an piang vannei chungchuang mang e ka ti ru vang vang.
,Lighter leh Cigarette a phawrh a, a tan kai a, a hip zui vang vang. Chunglam a en a, ngam ila chuan ka phone in thla ka laksak chiang ngawt ang. Ka best friend Kimtei hmuh ve atan ka it hluah hluah a ni ber, mizo zinga hetiang taka mipa chhe lo lo awm ve reng hi hrilh chiam mah ila ka sawithiam lo thei bawk nen a awih leh lo tawp ang tih ka chiang..
Ka lo en reng laiin a rawn hawi thuta, lai em em hian ka hawisawn vat.
"Abby, ka mamawh che ania' Ka rin loh tak hian a la ti zui.
Chapter- 3
" Eng maw? Tinge min mamawh ngawt a? " ka ti ha mai. Min chhang lo hian ka bulah a rawn thu ve a.
“Zobiaka chu ni ila ka Bialnu amah chauhin ka awm tir hauh lo ang mawle, tuemaw mipa in hnaih a chak em em ang tih hre tur ania sin” ka zawhna min chhang lo hian a ti leh daih.
“Grace-i khawnge?” ka ti ve ta ngawta, ka zam ru a ni tih tilang lo turin ka in control nasat angai viau,amah ka star em em lam ai mah chuan a huhang na lutuk hian min tizam niberin ka hre zawk.
“Ka hre miah lo mai” tha tak chuan a ti ve maia.
“Chu nang pawh Zobiaka ang tho i nih chu, tu emaw mipa in hnaih tumin a hel ve maithei asin” tiin a tawngkam ang chiahin ka ti let ve nghat a,za deuh hian a nui a,a nui ri chuan min hip leh viau. La nui reng chung hian min rawn en a,
“Lo hel rawhse, ani nen inzawmna kan nei hleinem” ka rin loh tak hian a ti a.
“Haw a hun dawn tawh sia, ka lo zuk ange” tih leh din ka rual a, mahse, ka pen tur chiah chu ka banrekah a rawn man thuta,ka ding chawt. Angaihna hre lo taka ka en chuan a hmel a lo lang thutak run tawh.
“La kal suh, biak che ka duh” nelawm vak lo hian ati a,ka ban a vawnna thinthlak tumin ka thing nawk a, mahse, a hma aia nghetin a hmer leh salh thung.
“Engtil nge a? sawi dun tur kan nei awm lo mange” ka ti nghat.
“Nei tehreng mai, thu la, i thut loh chuan i ban hi ka hmer na ting animai” ati leh nghut a, a sawi duh a sawi hma chuan min kaltir a tum lo anih hmel.
Hreh angreng tak hian ka thu a, ka ban a vawnna a thlah zui a, ka tuai hauh hauh mai.
“Tihnat ngai khan awmloh mai tur che ania, ka ei dawn che pawh anilo a. Enge min hlauh viau kher ni” a ti leh hmuk.
“I sawitur ka nghak ania” ka ti hulhak thung, ka star ru a,hmuh ka chak vel kha ania. Tunah hian engvanga ngei leh viau si nge ka nih pawh ka inhre tawh bik lo.
“Hmanhmawh suh,nge Zobiaka hnenah phalna ka la zawk dawn?” a ti leh phei chu ka ngei hluah hluah tawh.
“Chutiang angai lo. Mahse, i sawi vat loh chuan haw ka duh ania” ka ti leh a,hnunglam a nghenga,min en lo in hmalam a en reng.
“Ka hnuaiah hna rawn thawk rawh,i thawh tur ka nei”pehhel eih lo hian a tawp mai, Zobiaka sawi lawk ang chiah kha a ni ka ti rilru a, tumah hi a hnathawk tur bakin a mamawh lo a ti a, a sawi dik hmel, Lalpa leh!!...ka lakah eng thil dang nge mamawh se ka tih reng reng ni??!!...Atthlak lutuk.
“Hna ka mamawh lo” ka bul hmak. “i mamawh tih ka hria” ka tawngdan ang chiahin a ti zui ve zat bawk.
“Ka mamawh lo,kan In a ilo kal khan hna ka ngah zia i hria ang chu “ka ti leh hmaka, a ngawi deuh vung vung a, min chhang dawn lo emaw ka ti hman..Min rawn en a,
“Hna i mamawh, in inah sawn i putea nen nuamsa tak in inkhawsa thin tih ka hriaa,chung lai chuan chhiahhlawh i ni lo.”a tih takah chuan ka maimitchhing sawka. Engtin nge ka hun kal tawh a lo hriat ka hre lo.
“Thil hlui ka sawi peih lo, a tulna a awm lo bawk a” ka ti bung nghat, inringtawk taka chhan ka duh tehlul nen,ka awki atang chuan ka hlawhchham chiang viau tih ka hria.
“Thil kal tawh sawi ka tum lo,i nihna pangngaiah khan let tir leh che ka tum mai zawk” a hma aia nelawm deuh zawk hian a ti leh a.
“I hnenah hna ka thawh chuan ka nihna pangngaiah ka let leh dawn tihna maw?” hrethiam lo tak hian ka ti ha, ani nena inzawmna kan nei ngai lo va, ka thian pawh a ni bawk lo va. Thu awmze nei lo mai mai a ni a sawi ni. Ani tel lo pawh hian ka nunah buaina ka ngah tawk lutuk.
“Chutiang deuh chuan ngai phawt mai rawh, nun nuam zawk neih i phu” ati leh a,a rilru put hmang hre lo mah ila min khawngaih thu a sawina angah ka ngaia. Rethei leh hrehawm taka nun hmang pawh ni mahila ka induhtawk ve tho a, chutia min lo khawngaih ngawt mai chu ka lawm phah reng reng lo. ka kut a rawn vuan chiah chu rang zet in ka la sawn nghal thuai a.
“Ka lawm,i bul a thawk duh tamtak an awm ka ringa, mahse, kei chu ka thawk thei lo a, ka duh lo bawk,ka awmdan apiangah hian ka lawm tawk rih e” ka ti a, a hma ai chuan ka aw ki pawh a zia ta deuh.
“Abby...tunah thu tlukna siam nghal suh,ka nghak thei che ania” ka sawi hre lo ang mai hian a ti leh cheu,kalsan a hunin ka hria.
“Ka lawm ka tih tawh kha, mahse, min nghak suh,ka ngaihdan hi engtik hunah pawh a ngai reng ang,ka kalsan ang che,Zobiaka’n min ngaihtuah ang” ka ti a, Zobiaka hi ka bialpa angin a hria a, chuvang taka chhuanlam atan hmang ka ni bawk.
A rawn ding chhuak ve nghal a,ka kal tur chu ka kawngah a rawn man a,hneh zetin min pawt let zuia, a taksa lian leh fit zetah chuan ka bet ta ran mai,kan inhnaih lutuk a,kan insan hleih bawk nen a lungphu ri ka hrethei hialin ka hria.
“Engthil nge maw i tih le? ” mangang ru tak hian ka ti a, Mipa taksa hetiang tak hian ka la hnaih ngai lo.
“Min hnar suh,i nihna ngai nei let turin ka duh che a,chumi tur chian pui che ka tum mai ania, hriatthiam tum rawh” ka hnarna ngaithei lo niawm tak hian a ti nawn leh a, ka nghawng ah a hmui lum ham ham a rawn ti si thut maia, ka mur uai thei. Ka eu vaka, min thlah duh chuang lo. A mitah tak ka en a.
“Ka nihnaah hian ka hlim tawk alawm,puih ka ngai lo. Khawngaih takin buaina dang min siam belh sak suh” ka ti khur dar dara, min kuah avang ringawt pawh hian thihna khawp sual ka ti tih a hre lo emawni?!
“Engmah hlau suh, i buaina tur engmah ka thlen dawn lo,aw ti la a tawk mai” a la ti leh talh, ka bengkawm ah a rawn fawp zui a, ka khur a, ka ke a zawi vek nimai hian ka hriaa, mahse, hetiang a awm tur ka ni lo tih ka Ngaihtuaha,ani hi Grace-i duhlai a ni a, tenawm takin a bialpa bulah lo khawsa tur ka ni lo.Chumai bakah hmeichhe easy tak anga ngaih theih tura awm hi ka duh hek lo.
“Min thlah teh” tih leh tal ka rual a,min thlah ve mai bawk.
“Engtik hun pawh nise i tan chuan hna a awm ania” ati leh a, a va han luhlul tawk tawk tak. A tih tawh lamah chuan beidawn a duh lo nge ka lo hnial kha tlawmah a la ka hre lo. Mahse,amah ang lo takin a aw a khur ve in ka hre tlat a,ka ngaihtuahna mai zawk pawh a ni thei tho bawk.
“Ka duh lo ka tih kha i hre thiam lo em ni? engmah i lak atanga dawn ka duh lo,chuan, min khawih tum tawh reng reng suh, K.S ka ni lo ania” ka ti chang bawng mai, a thaw hawk a, a insehruh nasa lutuk chu min rawn beng dawn emaw ka ti hman a,mahse,engmah a ti ta lo hlauh.
“Kal tawh rawh, khu Zobiaka a lo chhoh khu..” ati ta daiha, min hnungchhawn zui nghal hmak bawk.
Hmanhmawh tak in ka chhuk a, kan pahnih a awmdun lai tuman min hmuh ka duh lo.
Thui a rawn chhoh hmain ka pawh thla thuai a,min hmuh rual ruala a thawveng huai hmel chu ka hmuh hmaih lo,min lo zawng kual nasa viau tawh zawk nge ni??
“Helamah a ni maw i lo awm?” a rawn ti nghal a, a thil in rim chuan ka hnar a verh a, ka ner sawk.
“Um, nia, kan han tei chho mai mai mawle. Haw mai ka van duh tawh” ka ti a, min rawn din hnaih a, nidang ai chuan a awmdan a danglam..
“A la hma alawm ,mahse, i haw duh chuan pawi ka ti lo “ati a,la awm a chak anih hmel viau,haw lo duh tlat kha nuam ka ti ta chiah lo.
“Kei hi haw ka lo tum chiah asin, ka rualin haw la,a pawi em?” Jordan-a aw hian ka hnunglam atangin a rawn ti a, ka va han ngei tak..
“Ehe, ngatinge nang pawh chu pawnlamah i awm a?,Grace-i kha a hawi tum vuau ania” nui hawk hawk chungin Zobiaka zawkin a lo ti thuai a, Mipa rilru tluang tak a ni a,ka bialpa a ni miah lo chungin a rukin ka inthlahrung vawng vawng mai,min rinhlelhna engmah a nei miah lo tih alang reng si.
“Ngaichuang lo,nakinah Zobiaka rual in ka haw thei alawm” tih pahin Zobiaka banah ka vuan a,mak a ti deuh aniang,phawk deuh hru hian min rawn en a.
“Ok, i thu thu le, eee,Grace-i pawh kha i rualin haw leh mai rawhse,a pawi angem?” Zobiaka en chungin a ti a.
Ani lah chuan, “Aih, pawilo e, a awlsam lutuk” a ti tha ve mai bawk.
Hall chhungah kan lut leh a, a kil lama dawhkan kilin kan thu dun a, amah ang lo takin a ngawi deuh tlat bawk, ka bia anih loh chuan tawng pawh a tawng lo.
“Thil dik lo a awm em ni?” ka ti a,a phone a khawih mawlh mawlh a.
“Aih, eng nge dik lo ang?”min en lo in a ti liam puat ringawt, dik lo chu a awm ngei, eng nge anih ka hre lo mai zawk a ni.
“I thinrim hmel em a” ka ti leh talh tho,Grace-i rawn phei mek chu ka en a, ani pawh a mood a fuh hmel vak lo..
“Haw tawh ila..” rawn thut pahin a ti a, ani rim pawh chu awww...
“Nia, kal ang u..” tih pahin Zobiaka a tho vut a,a awmdan inthlak kual vel chu mak ti deuh hian ka en a,kan zui leh zui loh pawh ngaihtuah lo in a kal nghal daih bawk.
“Ngatinge kha mi mawlpa kha?”Grace-in a ti a, a tawngkam hi a mawi lo thin..
“Ka hre bik lo” ka ti tawi tak.
“Toiletah ka kal phawt dawn, ka rawn zui nghal ang che,Motorah min lo nghak mai ru” tih leh thawh a rual a, a pai deuh dat dat chu a tlu dawn emaw ka ti hman a, mahse, a ding ngil a, pangngai takin a kal zui leh mai.
Motor dahna lam ka pan thla a, mahse, Zobiaka a lo awm miah lo,ka hawikual deuh chiama, kei aiin a chhuak hmasa hret chauh kha a ni si a, khawiah chuan a lo kal leh hman chu ni maw??mak ti deuh hian Hall lam ka chho leh a, a hma a ka thutna lam khan ka rilru a luah a, a lo awm reng pawh animahna tiin kal phei leh mai ka tuma, mahse, ka kal hmain Call hmasak a tha ang ka ti leh a, ka phone ka phawrh a, vanduaithlak takin Battery a low lutuk a tumah ka call chhuak thei lo.
Light in a en phak chinah tumah ka hmu lo va, let leh ka tum chiah chu thawm eng ngemawin ka beng a verh zak mai,thawm lo chhuahna lam ka hawi thuai a, a thim deuh avangin engmah ka hmu thei lo,ka kal hnai a, thawm erawh uluk deuh a ngaihthlak loh chuan a hriat leh tawh loh.Ka pan hnai zel a, mihring ruangam ka hmu a, tu nge anih ka hre lo,ka kal hnai leh hrat a, ka hmuh theih takah chuan ka ding chawt mai,ka lehhawi nghal thuai a,ka khup a khur hlawk hlawk bawk.
Hmeichhia zawk nuam ti thawm chu ka bengah a ring viau a, tunge anih phei chu ka hre lo, mahse, mipa zawk erawh ka hria, Zobiaka a ni a...Thim deuh mah se a thawmhnaw hak atangin ka hre tho.
Thawm dim thei ang berin Motor dahna ka pan thla leh a, Grace-i lo hawi vak vak chu ka zuk hmu a, a thinrim hmel phian bawk.
“Khawnge in lo kal leh hman a?” bak deuh hian a ti hlak a,chhaklam ka kawk ringawt, ka la normal hlawl lo.
“Khawnge Zobiaka pawh chu?,a ninawm ee, mi nghak reng ang chu tih laiin, mipa zawk nghah ngai reng mai ” ati leh hlaih hlaih a, a duh ang vek hian midang te hi tihkual a tum thin a, kan Motor pawh a ni lo a, a neitu thu a awm mai tur kan ni tih a hre leh tawh pek lo.
Ka aw ka thian kharh a, “a lo kal mai ang” ka ti chhuak thei hram..ka ten nge khatiang thil ka hmu thut khan min thawng zawk pawh ka hre nek lo e,ka rilru erawh a na eih lo tih chu ka chiang.
Reife Motor bul a kan din hnuah a rawn kal ta hram, a hmel a phelh phung maia, ka luak a ti chhuak nghal ut ut mai. Engmah ti lo hmelpu hian a rawn la nui sang zuia, ka bialpa pawh a ni lo va, lo ten viau ngawt tur pawh chu ka ni lo.Sex hi nupa kara hman tur a ni a, kei chuan Pasal ka neih hma a hman ka tum eih lo, mahse,mi in an lo hmang anih chuan ka dem hran lo va, keimah ang bawkin ngaihdan hran an nei a, an nuna thil thleng lo va sawisel sak turin engmah ka ni hek lo.. Zanina Zobiaka ka ten chhan ni ta bera ka hriat chu, khatianga pawhchawp ang lek leh, rem leh rem lo va sex an hmang ngawt mai kha a tuah thlak ka ti lutuka, ka ten ta ni berin ka hria.
“Min nghak rei em?” a rawn ti a, a hlim hmel phian bawk.
“Rei tawh lutuk, khawnge maw i lo kal leh hman ni?” lungawi vak lo hian Grace-in a ti a,kei erawh ka ngawireng, a thil tih kha a pawimawh em alawm le..
“Nia, mi ka hmu leh lawk a, min lo nghak rei sia, a zia lo,kal ang u” a ti zung zunga, Motor a hawng a, a hnungah ka lut leh tharh, tunah rih chuan sik pawh ka si chak nek lo,ka ten ru deuh tlat mai si a. Sex hmang duh pawh nise khati taka awlsam a hman kha ka ngaihdan a pel deuh tlat, a kal chhuak kha ka zui nghal deuh mai a ni a, mahse, a lo ti hman tho..Oh..keipawh hi a....ka buai lohna turah ka buai anih ber hi, a atthlak em thin mai.
“Abby...eng nge maw i ngaihtuah thin le?” Zobiaka'b a rawn tih deuh chiam chuan ka suangtuahna ram atangin ka harh chhuak zawk a ni ber.
“Maw?,min bia mi? Min bia tih ka hre lo reng reng alawm. Eng nge a” nui hak hak chungin ka ti a, ka Mood lah a fuh hrep zui.
“Bia e,Jordan-a chuan a rawn hmu ta che em?” a ti hlura.
“Aw,aih...hmu e..” ka ti buai nuai, engvanga han zam viau nge maw ka nih hrep ni??!
“Engthilah nge a hmuh duh che a?” Grace-in rawn hawilet chungin a ti a.
“Engthil lem mah,ka zirlai chungchangah ania” tiin dawt ka sawi ta ngawt, hna min pek a duh tih engtin nge ka sawi ngam tehlul ang ni?,Pitei lahin Grace-i tan Zobiaka be tha turin min duh a,Zobiaka hian a Pa bulah a sawi ngam ka ring lo va, ani lo sawi tur pawh a ni hek lo. Dah nghet tu tur chu Zobiaka ni lo in Apa zawk tih a hre reng a, min beisei sang mah mah chu a ni e.
“Teh daih a.....” mak tih hmel deuh hian a ti a,min zawt zui zel ang tih hlau in thawk pawh ka thaw tha ngam lo,mahse, vanneihthlak takin min zawt zui lo in Party chungchang an sawi kai ta hlauh.Nuam an ti hmel viau a, kei erawh chuan Party ka kal hmasak ber a ni a, ka beisei ang Party a ni hauh lo bawk.
Party na a kan kal hnuah kar a liam leh tawha. Mak takin Zobiaka pawh a lo kal ngai patin a lo la kal tho, kha hmeichhia kha tunge anih ang tih ka ngaihtuah chhuak ziah lehnghal..Zawt tur khawpin ka huaisen tawk lo a, ka bialpa a ni hek lo.Jordan-a erawh ka hmu leh ta lo,a taksa lum thur thur leh nghet charh te, a lungphu ri dat dat te kha ngaituah ngawt pawn ka danglam lo thei lo.
“Abigail...”a rawn ti chiah chu khawvel a tawp ta emawni ka ti hial, a au ring mah mah chu ni...
“Um,eng nge nita?” ka tih fo danin dam thlap in ka ti a.
“Zobiaka hi i bialpa nge i thianpa?” a tih chuan ka beisei loh lutuk zawhna ka hriat rualin ka phawk nghal hra.
“Eng nge i sawi awmzia?” ka ti chhuak thei hram.
A rawn kal phei a, Gas dahna bulah a thu kang a, Apple a keih hmak hmak.
“Ka thil hriat hi a dik em?, Party zan khan Zobiaka leh hmeichhe pakhat in Kiss lai an hmu a, nangmah i ni emaw ka ti hman a,mahse, i ni miah lo ania a lo ck ve mai mai nge ka hre lo a..” ati leh zat zata,a hmeltha takah chuan min hmusit tih a lang chiang viau.
“Oh,a ho em mai, Mipa alawm anih” awlsam zetin ka ti liam puat.A beisei ang chhanna a ni lo aniang, a ner nak.
“I va ngai awlsam ve a, keichu ni ila a samah ka kek ang” ati leh a, a thaw ham ham bawk..Nia, ka Mipa duhtak chu nise ka kek mai pawh ni lo in a aia nasa pawh ka ti maithei,ka hre lo le..A langah erawh chuan,
“Jordan-a pawh hi a lo ni ve tho maithei asin”ka ti let salh thung,a tum nghal hmak ka hmuh rualin ka lawm ru veng veng mai.Jordan-a khan a bialnu anih loh thu sawi mah se Grace-i hian a duh tih ka hria.A Bialpa nen pawh an inthen tawh tih ka hre ve tlat.
“Oh, hepa hrep hi...ka neih theihna tur anih phawt chuan engkim ka ti ang,mipa ka hmuhtawhah hei aia duh ka nei lo..” a ti hluaia, chunglam a en vang vang bawk.
Kei hian Jordan-a hi ka hnaih tur a ni hauh lo,ka hnaih emaw min kuah lui leh ta thut se,tuemaw in min lo hmu in ka chhungte hian lo hre leh palh ta se Grace-i chetdan tur ka ngaihtuah ngam lo. He In-ah hian ka cheng duh anih chuan Jordan-a hlat thei ang berah ka awm angai. Mahse, ka hlatsan kher ngai loin inhnaih chhan tur kan nei lo hrim hrim zawk. Grace-i ka en a.
“Lungngai suh, i nei thei em em ang, engvangin nge a hnar ngawt ang che?” ka ti ta ngawt. , ka ngaihdan chiah pawh a ni bawka. Grace-i hi nalh bakah a hmeltha a, a fing tel bawk.Mizo hmeichhia ah chuan ani aia thlan tur chuang an awm bik kher lo vang.
Mu chungin Phone ka khawih a,ka phone hi Phone tha tak a ni lem lo. Ka phone hman hmasak kha Putea damlaia min lei a ni a, a hunlai na na na chuan zahpuiawm lo tak a ni. A chhiat khan Putea a boral tawha, phone thar min leisak loin Grace-i hman lai min pe a, ani in a thar a lei thung.
Muthilh hmain ka inphihfai leh te te a,khum a ka let leh in miss call a lo awm a, ka en chuan number ringawt a lo ni a,call let pawh ka tum chuang lo. Pawimawh a awm anih chuan a lo call leh mai ang ka ti mai. Mu chungin Game ka khel a,a pawimawh bawk aniang, ka rin ang chiah in a lo call leh ta ngei..
“Hello..”ka ti zang vah.
“Abby...keimah ka nia..” Jordan-an a rawn tih chuan ka phu nasa lutuk..Engtin nge ka number a neih ka hre lo va, englaimahin min rawn call ka ring ngai hek lo.
Chapter - 4
“Ka rawn tiharh che em?” a rawn tih leh chuan ka thu a,ka hmel hmu thei a tumah an awm lo ka lawm zia chu pui tak a ni.
“Aih, ka la muhil lo zawk, eng nge nita?” pangngai thei ang ber hian ka ti a.“Engmah ni lo e, i chhanna ka la nghak reng tih ka rawn hrilh nawn leh che..” a rawn tih chuan ka insehruh nghek,a beidawng ve thei lo emawni??
“Ka duh lo ka tih tawh kha” bung fe hian ka ti a, a nui ri ka hre zui nghal zat.
“I tihlai ka hre tawh lo aniang. Engpawhnise i lo thawh ngei ka duh ania”nghet charh hian a rawn ti leh a.“Tun chiah hi ka sawi nawn leh ang,i hna ka thawk duh lo,min rawn tibuai zel anih chuan Police ka man tir ang che” ka ti piap maia, mahse ka thusawi atthlak zia ka ngaihtuahin ka nuih a za ta lek lek.
“Ekhai, chuti chu ka va hlau dawn ve..” ngai ho em em hian a rawn ti a, a aw a nuihzatna ri tel chuan min ti thinur leh ta phata,chutih rualin ka thilsawi kha a ho ve bawk tih ka hre tho.
“Ka thawk duh lo ka tih chu,min awmtir mai mai teh” beidawng ru tak hian ka ti halh a, min rawn chhan lehna pawh ngaihtuah lo in ka Off zui nghal hmak bawk.Engvanga kei kher kher chu hna min pek tum nge maw anih ni?
Ka rin ang chiahin a lo call nawn ta lem lo a,lo ti nawn leh tura ka ngai ve ngawt pawh a zahthlak zawk.Tui pawhin ka muhil ta meuh lo,diktak chuan hna thawh ve te chu ka duh lutuk ringawta, hetiang a awm mai mai tur hian lehkha ka zir hauh lo bawka. Mahse, engtin nge ka tih chuan ang?,kalna tur dang ka hre lo a, ka Putea nena kan in thin kha la ni reng mah se a neitu midang an ni tawha, an hnena ka khawsak chhung chuan ka duhzawng leh chak zawng engmah sawi ve ngam tur ka ni lo. Putea boral hnu pawha lehkha min la zirtir zel thei hi lawmtur ka nih zia min hrilh nawn chamchi zawk. Tha te te a khawsa ho thei reng si, an han danglam chiam mai hi ka man phak lo va, mi rilru hneh vel thiam tihtakah Pitei'n engkim a hmingin Putea kha a lo dahtir dim diam mai bawk nen, ka tan hian khua a var ta meuh lo chu anih hi. Chumai bakah hna min pek tum tu lah Grace-i buaipui em em Mipa a la ni zui a, theihnghilh ila a tha zawk fe,Pathianin rem a tih hunah hna te chu ka la hmu ve em em ang.
Kan result a chhuak a, vanneihthlak takin ka pass ve hlauh bawk. Nidang ang bawkin lawmpuina tawngkam ka chhungte hnen atanga lawmpuina ka dawn chu "A va tihzia ve" Tih zawng a ni a,hei aia tha hi chu ka beisei tawh lo hrim hrim zawk. Ka pass vanga ka lawm rualin ka rilru a hah a, keimah leh keimah ka in ngaihtuah fel angai tawh tih ka hai lo. Kum lamah pawh naupang ka ni tawh lo a, hetiang renga khawsak chu thil tih chi a ni lo tawp,mahse engtia hmalak chi nge ka hre der lo thung.
“Hei i lehkha tur” tih pahin dawhkanah a rawn theh thla, envelope sei et mai chu ka la thuai, khawi atanga lo kal nge anih ngaihdan pawh ka nei thiam lo. A chhunga lehkha awm ka hmuh takah chuan ka mengphawk vak.
“Eng lehkha nge a?” tih pahin min rawn laksak a,mak tih hmel deuh hian min rawn en leh a.
“Hna i lo dil amaw?, chupawh Jordan-a te hnenah kher..” a ti nghal a, a thinrim tih a aw ah a lang chiang viau, ka lu ka thing chungin,
“Aih, dil miah lo” ka ti vat. Mahni tawka harhvang leh huaisen ve tak thin kha hlauh ka ngah ta em em mai hi hrehawm ka ti thin.
“Nu, lo kal teh, Abigail-i hian hna a lo dil a, chupawh Jordan-a te Hotel-ah lehnghal...” tiin a nu Living Room a awm a ko nghala, a au ring zek lehnghal..
“Grace,ka ti tak tak, eng hna mah ka dil lo, thil kalsual palh anih ka ring...” tih pahin beidawng zet hian ka ban ka phar kual chiam. Pitei a rawn lut a, Grace-i lehkha ken a laksak a, ani pawh Grace-i ang bawkin a thinrim tih a lang reng mai.
“Hna i thawk dawn anih chuan nangman awmpui chhawr ang che” min melh kuau chungin a ti a, ka beisei loh lutuk tawngkam ka dawn takah chuan hamhaih zetin ka ding khawng lah mai..
“Pite, eng hna mah ka dil lo tak tak...” ka tih chuan a ban a vai thuak a,“Chuti anih chuan hna i thawk duh lo tihna mi? " a ti a.
“Aih, aw...thawk duh e..mahse...” ka ti nawk nawka,ka duh ang pawh ka sawi chhuak thei thin lo.
“Eng hna pawh thawk rawh, pawi ka ti hleinem. Hei leh chen i zirna atan ka inseng tawha, chawm thlawn reng che hi ka tum lo hrim hrim. Mahse, awmpui chhawr ang che, chuan, nidangah chuan engpawh ti dawn la min hrilh hmasa tawh la tha ang. Nu ber i nih loh hi” ati hmak hmak a, a lehkha ken chu dawhkanah a thehthla a,engmah sawi leh tawh lo in Living Room lam a pan zui ta daih bawk.
“Engthil nge i tih hi?” min rawn din hnaih pahin Grace-in a ti a,a mitmeng lian kel kawl chu thinrimna avangin a ling hlar mai, mahse, tun tum chu Pitei zawkin hna ka thawk thei tih a sawi tawh miau avangin Grace-i thinrim vel chuan ka hlauhna a kaitho zo lo, tih el sak ka chak ve ta tlat.
“Party na a kan kal tum khan Jordan-a khan a hnenah hna ka thawh theih leh theih loh min zawt daih tawh asin..” zawi angreng tak hian ka ti a, ngeiawm thei turin ka nui lui hak bawk,a kut a humruh chungin min melh ngat ngat maia, min melh hlum tum niawm hrimin min melh a ni ber. Keipawh ka hawisawn duh bik lo va,Putea damlai zawnga min ngam ngai lo, kan dinhmun a danglam tak avanga min rabbet mai a ni a. A tak takah chuan min ngam lo tih ka hre ve kar. A nu nen an tandun thin vanga tilet ngam lo mai la ni thina, tun tum chu a nu a inrawlh lo bawka, ka cho ve ar mai.
“I la hria ang...”sehchilh rap rap hian a ti a, ka thle zauh chungin ka Apron hak lai hmalam a ipte awmah chuan ka zen lut a.
“Grace,engmah tihsual ka nei hleinem,hna ka dil lo a, min sawm tu chu tudang ni lo in Jordan-a a ni a, i duh phawt chuan i zawt thei reng ania” ka ti lehzela, nidang ang bawkin ka aw a ring lo, a damthlap mai.A meng tal tawpa,
“Ka zawt em em ang, hnathawktu tur nang lo pawh an tam laiin nang kher hi a sawm lul lo ang che.Hna duha miin an dil laiin a sawm chhan tur che ka hre lo. A lo sawm ta tehreng che anih pawhin hnar tur i ni” a ti leh chuan min khei zak maia, ka hnial nasa hle tih inhre kar chungin,
“Ngatinge ka hnial kher ang?,ka dil buai ngai miah lo va hna min Offer anih chuan lawm tur ka nia lawm” ka ti deuh hmak.
“Abigail...i la hria ang, lo hnaih hlek suh ang che” thinrim em em hian a ti a, min va han ngaisang si tak,hnathawk tu tur atan min la a, engtin nge ka hnaih tehlul ang?,ka Boss a ni dawn a, ka tan chuan tihtur min hrilh tu tur leh ka zah em em tur mihring a ni zawka, chu chu a hrethiam ve reng zawk lo emawni??
Ka mut hnu-ah min rawn call a, ka pick-up lo tep a, mahse, chhan duh loh ngawt chu atthlak ka ti leh hnuhnawh a, ka pick-up ta zawk.
“Lehkha kha i hmu em?” a raw ti deuh tawng a...
“Aw, hmu e” ka ti bung nghat.
“Naktuk atanga rawn zawm turin ka duh che a,harsatna a awm em?” tha tak hian a rawn ti leha.
“Aih, awm lo ang, Address hi kimchang deuh hleka min pek theih chuan ka tan a awlsam dawn a, ka lo kal hmasak ber ni tur a ni dawn sia..” ka ti a, a hmel ka hmu thei lo bawk a, ka duh duh ka sawi ngam.
“Ok,Msg in ka rawn hrilh ang che..”tha tak chuan a ti ve mai bawk.
Ka muhil thei meuh lo chu a ni ber, Jordana hna ka thawhsak tur hi awih har ka tiin ka zam deuh a, ka huphurh em em bawk. Mahse, ka lo ngaihtuah dan ni miah lo a Pitei khawsa kha mak ka la ti a, hna ka thawh a remtih ka rin loh tehlul nen, Awmpui ka lak dawn chuan a phal tihna a ni ta mai si, a khawak dan leh ka chunga a awmdan ngaihtuah chuan khatianga awlsam a hna min thawhtir kha mak tih rual a ni lo,engpawhnise, tunah chuan hna ka thawk ve dawn ta chu ania,keima thawhchhuah ngeiin ka inchawm ang a, hna ruak dang ka ngaihven pah bawk anga, Jordan-a hna kher lo hnadang pawh ka la thawk thei maithei,ka helhhawlh nasa lutuk hian ka mutchhuahna a tibo vek..Ka phur viau rualin Buaina pakhat a la awm ta fo, ka thawk dawn tak tak anih chuan Awmpui ka zawn a ngai…Puitling hlir cheng, mahni inbuaipui thei vek tur nisi hi awmpui tel lo va khawsa thei lo angah an inngai tlat chu ania. Ka hlawh tur ka hre sa a, Awmpui ka chhawr anih chuan ka hlawh chanve a kal nghal tihna a ni a. Hnathawka nitin chhuak ve siin ka hlawh erawh ka chang tlem dawn khawp e..
Sana ka en chuan Dar 10 a la ri lo.Zobiaka hnenah hna ka thawhtur thu ka la hrilh lo a, hrilh tur a ni em pawh ka hre lo. Ani pawh a Pass ve tho a, kan result chhuah hnuah eng nge a tih zawm dawn ala thlang fel lo a,tunah tak phei chuan a Pa a damthat loh avangin check-up turin Delhi ah a hruai a,min rawn be zauh zauh tho nangin vawiin chu min la rawn be lo a, keipawn ka be lem lo. Ka hna tur hi hrilh pawh ni ila a ngaihven vak ka ring chiah lo,a hma ang reng khan min la Care a, mahse, inngaizawng ti a sawi tur erawh kan la ni chuang miah lo.
Kan zirpui,ka kawm ve thin tho, Remruati ka rilru ah a lo lang thut, ani kha Thingtlang lam mi a ni a, tuemaw lehkhazir paha awmpui tur emaw hlawh neia Awmpui tur hrim hrim min hriatsak maithei,an khaw lam ah a awmlai tak a ni lehnghal.
“I tha maw?” Phone a pick -up rual rualin a rawn ti a, kan inkawm nitin a, Best Friend ti a sawi tur erawh a ni lo, Kimtei angin ka kawmngeih lo,ngainat erawh ka ngaina viau tho.
“Um,tha e, nang zawk?” ka ti let ve a, ani pawh hi a Pass a, thildang zirzawm lo in an khua a Private High School an hawn tharah a thawk rih dawn thung.
“Ka tha e, eng nge ni a?, nang leh nanglo angin min rawn call tlai bawk sia” a rawn ti leh lawng lawng a.
“Eng lo ania, Awmpui tur emaw thil zir na tumsaka awm tur ang chu inkhuaah khan min lo zawnsak thei angem?” ka ti a, a nui hak hak a,kan In ah a lo kal ve zauh zauh tawha, an lo kal lai ngei pawn Pitei’n ‘Awmpui’ ti a min koh tum a awm a, min khawngaih viau a, mahse, a rei hnu kha chuan Fiamthu thawh nan tak kan hmang ta kha ania.
“Engngatinge?,i awmna te khan Awmpuiah an duh tawh lo che mi?” nui chung hian a rawn ti a.
“Chutiang pawh a ni lo, hna ka thawk ve dawn a,mahse, hna ka thawk dawn anih chuan Awmpui kan mamawh ta tlat a” tiin diktakin ka chhang a,dawtsawi a han phatkual vel chiam tul ka ti lem lo.
“Awww,anih chu mawle, ka lo ngaihven ang aw,mahse, nangma kut a awmtur anih loh chuan ka duh lo ania”a rawn ti nghal zat,an lo kal chang khan ka Pitei te nufa Mizia an hrethiam ang, anni nufa lah hian tawngkam an duhtui lo thei nasa bawk nen...
“Um, keiman ka enkawl ang, mawhphurhna pawh ka la vek ang, min lo ngaihven sak hram dawnnia” ka ti a, lo ngaihven a,a ranglam a min hrilh a tiam a,thildang kan sawi leh nual hnuah ka’n dah thei ta hram,Hmeichhe tawngduh leh lu zo vah mai a ni a, khawi hmunah mah a ngaihtuahawm ngai lo.
Jordan-a Msg a lo awm vang tawha, Address chiang taka a ziah bakah ka thawh hun chhung tur pawh a rawn sawi tel nghal thlap bawk.
Khawvar dawn hnaiah ka lo chhingsek a, ka harh leh chuan khua a lo eng tan tawh, ka tho thuai a, vawiin atanga tan nghal tur ka ni tih engmah ka la hrilh si lo a, Eitur siam a, inbual leh nen, a tlai mai dawn,chawei laiin ka hrilh mai ang chu. Eirawngbawltu leh inchhung chet khawihtu ber ka chhuah ve tawh dawn si vangin tlem chuan kan buai phah dawn chianga,mahse, a hma zawng pawn class ka kal a, ka haw hma aiin ka haw tlai a tam zawk bawka,khatiang ang tho khan kan khawsa leh dawn tihna animai. Tlai haw hnuah chaw chiah chhum ngai turin zingah chawhmeh ka siam kep leh mai ang..
“Pite, vawiin atanga zawm turin min ti a..” ka ti a, a hranpa a dil emaw ka tum lo.
“Chuti chu Awmpui tur chu i hmu ta em?” chawei mawlh mawlh chungin a ti a, Grace-i erawh chuan a rawn thawh atangin min la be lo hrim hrim.
“La hmu chiah lo, mahse, ka hmu thuai ang” ka ti a, Fian a dah deuh bawlah chuan ka phu zawk mai,ka en thuai a, lawm lo tih hriat ngawih ngawih hian min lo en ran mai,ka ip deuh chawih a, mahse, nidang ang lo takin zam hmel tihlan loh hram ka tum tlat thung. Puitling ka ni ve tawh a, ka inenkawl na tur anih phawt chuan ka paltlang tur thil te hi tlanchhiatsan lo in ka tawn zel angai tawh tlat.
“He In ah hian engtiklai in nge Hotu i lo nih tak a?” atih chuan thinrim vangin a aw a khur dar dar mai.
“Chutiang ka ni lo" ka ti thuai.
“Tun lawk khan min rawn lo in i tum dan hriattirna min pe a..” a ti leh ta chat. Oh....nidawn tak, mahse, ka haider angai..hetiang lekah ka zam chhia anih chuan thil thleng leh tur awmse ka chak zo lo tawp ang.
“Chutiang zawngin ka sawi hleinem,ka zawng mek a, ka hmu maiin ka ring ka tihna ania” damthlapin ka ti a, a hnar a ti vang harh a,a fian chuan min rawn khawng dawn emaw ka ti a, ka kut lehlam dawhkan in a hliah zawk chu ka humruh tlat bawk,mahse, a ti ta em lo, a chair a nawrsawn a, a chhuak tau ta nghawng nghawng..
Jordan-a Address min pek ka thlen in hna tan hun a rawn sawi darzar rik nan minute 20 lai ala awm,ka theih phawt chuan tlai loh ka tum bur mai a ni. Mihring hun vawng dik lo lutuk hi eng ang a thiam leh hausa pawh nise ka ngaisang thei miah lo.
Ka hma a Building lian zet ding luah chu ka en a, a hnuaiber chhiar telin chhawng 5 lai a ni a, mimal In luah nilo in Hotel a ni tih a chiang thawkhat,a bul hnaiah Mimal In ding engmah a awm lo. A awmna lai chu Tlang tenau deuh an rawt hniam tawp anih hmela,Thing lian pui pui a ding nual a, Gate lian tak awm chu a in hawng vek bawk, a sirah Duty te awmna tur hmun Brick sen a sak hi a ding a, Pangpar nalh zet zet hi mumal takin an dah tlar thut a, enkawl ngun tih a hriat hliah hliah. Plant dangdai zet zet hi Pot lian pui puiah an hung fur maia, engtin nge hetiang hmun nuam leh changkang hi ka lo hriat ngai loh zawk ni?? Aizawl mi, mahni in a cheng leh nulat tak tak hnu a hlimhlawp lam engmah ngaihsak lo ka ni a. Aizawlah hian Hotel leh dine-out na tur restaurant changkang eng eng nge awm pawh ka hre mumal lo va,mi an changkang tual tuala, kan ei leh in thlengin thalai duh zawng a danglam nasa tawh em em bawka. Khawvel changkan ruala pen ve hman mang lo ta chu ka hawi mawl deuh mawp a ni ber e.
Thawk ka la vak a, ka pen lut ta chhat chhat, vawiin hian a vawikhatnan ka hna thawhna tur hmun ka rap lut ta chu ania,mumang ang rum rum mai.
Duty Post ka pan a.
“Ka pu, thil ka lo zawt lawk thei che em?” ka tih chuan ka tawngri hriain phawk fe hian a rawn hawi a, a la upat hmel loh viau,a hmel en mai pawn nelawm hmel zet mai a ni bawk.
“Aw,tehreng mai, eng nge nita?” zangkhai tak hian a ti a.
“Jordan...oh,Pu Jordan-a hmu turin ka lo kal a, engtikah nge ka hmuh theih ang?” ka ti bah nak.
“Dar 11 velah a lo kal ang, chumi hma chuan a lo thlen ka ring chiah lo”ati a,Msg a a rawn sawi dan khan hna tan hun kha dar 9 a ni a, tumah hmelhriat ka nei sa si lo, sana ka en chuan dar 9 a ri tep chauh a,lo nghah ngawt ngawt tur nge ka call dawn ka hrethiam chiah lo.
“Ka pi, Sir Jordan-a Manager ka biaksak dawn che em ni?” ka ngawih tak reng vanga mak tih hmel deuh hian a rawn ti leh a, ka lu ka thing ringawt,lawmthu ka hrilh a, ka nuih luisak bawk,ka beisei ang a ni dawn hauh lo mai ka ti ru nauh nauh.
Pawna Thir a siam thutna awm lam ka pan phei a, ala hma deuh bawk nen a reh ruih maia. Lo nghah ngawt ngawt ai chuan Call mai a that ka ring ta zawk, ka phone ka phawrh a, ka call dawn tak tak chuan ka tim leha,ka thian ni loin ka Boss tur a ni a, tlangnel tak a be ngawt tur ka ni lo va, a lo kal hun nghah mai atha in ka hre leh ta zawk.
Hnathawktu niawm tak tak an lo thleng tana, ka thlen tirh ai chuan veivak pawh hmuhtur an tam ta deuh.Jordan-a hmel reng reng ala lang ta chuang lo fo erawh ka ning tan. Ka thutna a che dat a, tunge anih en tumin ka hawi chhuak nghal thuai bawk,Mipa pakhat, palian leh hmel nelawm tak mai hi a lo ni a, ka hmuh tawh hnu a ang viaua,mi ka hriat theih vei nen khawiah nge ka hmuh ka hrechhuak zo tawh der lo thunga, ngaihven zui loin ka phone ka en a.
“Abigail...i ni em?” a tih takah chuan rang fe in ka hawi chhuak lehnghal a,midang a bia emaw tiin ka hawikual a, mahse, tumah kan hnaihah an awm lo. Ka hmingin min ko tih ka hre leh thuta.
“Min bia em?” ka ti deuh he haw, ka Phone ka malchungah ka dah a.
“Abigail-i i ni em tih ka zawt che, bakah nang lo hmeichhia an thu lo a,nangmah ka bia che a ni ang tiraw ? ” a tih chuan a aw ah nuihzatna a lang a, a sawi ang chiahin kei lo midang thu ve ah hmeichhia an awm lo. A thuhrimin ka bul hnaiah tumah an thu lo zawk.
“Oh..ka ni e, mahse, ka va hre ve lo che “ inthiam lo tak hian ka ti a.
"Hman deuh khan In in ah chaw kan rawn ei tawh a” atih pawh chuan ka la hrechhuak zo chuang lo. Diktak chuan Pitei leh Grace-i thiante chawei kan nei fo a, mi ka hrethei hle nangin hriat kim vek sen pawh an ni lo.
“Aw, anih chu mawle,mahse,...” ka tih laia a nuih tak hawk hawkah chuan sawi zawm lo in ka ngawi leh ta zawk, a nuih chhan ka hre bawk si lo a, engtia awm tur nge pawh ka hre lo.
“Nia, min hre lo maithei, mahse, kei chu ka hrechiang che, Jordan-a kekawr Juice a i tih buak tuma i hmel khawngaihthlak lutuk vang khan ka theihnghilh ta lo che anih hi..”atih takah chuan ka mengphawk vak ringawt. Jordan-a thianpa, nui chunga ka che buai lai min lo thlir reng tu kha a ni tak alawm,tu nge a hming kha aw...Rindika...
“Oh..kha thil kha a,a zia lo ngawt mai..” ka ti niah niaha, a nui leh hawk hawk.
“A ho em mai,tupawn tihsual kan nei fo alawm” ati a, engtin nge hetah a lo awm ve ngawt ka hre lo,a thianpa te Hotel a ni a, a leng lut fo pawh a ni mahna le..
Sana ka bih leh zauh a, Dar 11 a lo ri tep tawh a, a lo kal ve dawn tawh ang chu maw tiin ka ngaihtuaha,lut chhuak an awm reng a,tuman min ngaihven hmel an pu hran lo.
“Kan lut dawn mi niang?” a rawn ti leh thut a. “Aaa, aw..mi nghah ka nei a” ka ti bah nak mai.
“Tu nge i nghah ka hria alawm, vawiin chu a lo kal lo ang” a tih leh takah chuan ka thu mar deuh awt mai.
“Chuti maw? amah hmuh ngei ngei ka ngai asin' ka ti halh mai.
“Hna thilah hmanhmawh deuh a zin chhuah angai thuta,pawi ti suh, keiman hna chu ka en pui mai ang che” a ti leh a.
A thian emaw ka tih laiin midang ang bawkin hnathawktu ve tho anih hmel ta riau,tlem chuan ka thawveng ta deuh.
“A that hlauh chu,hna dilna pangngai engmah ka nei si lo a, amah ber a awm loh chuan ka mangang deuh mawle” ka ti a, ka thaw hak bawk,a nui leh huk huk a,min chhan hma in Uniform ha hmeichhe pakhat, Smart zet hi a rawn kal hnai a,keimah min en lo in Rindika a en a.
“Sir, hna hmanhmawhthlak a awm a, i Phone i keng si lo a, Sir Jordan-an a be duh che a..”a rawn tih chuan ka melh reng ringawt, hnathawhna thenkhatah hian an aia senior te chu ‘Sir’ tiin an ko fo tih ka hria, mahse, ka en vang vang hian hnathawktu satliah chu a ang tlat lo.
“Ok, ka kal ang,eee...hei hi Abby ania,staff thar tur a ni a, lo hruailut la, hnathawh tur lo hrilh ta che” ati zung zung, hmeichhia chu a bu nghat a.
“Lut ila...”nelawm vak lo hian a ti nghat a, min lawm lem lo anih hran loh chuan hmeichhe nelawm tak chu a ni lo chiang ve khawp ang...Mi ka hmuh phat hian an nihna tur awm hi rilru ka siamfel vat thin a, ka ngaihdan a dik thei viau zui.
Hotel Lobby chung zau leh nalh takah chuan ka zui lut a, a kalna lamah ka zui ve zel,Reception Counter tliang hlurh mai chu a pan a, eng nge ka tih tur awm ka hrethiam lo va, ngaihdan pawh ka nei thiam lo hrim hrim..Hnathawk ni ve si, mumal taka min lo welcome an awm miah lo te hian a ti lem vel veka, ka te chem chem nimai hian ka inhria.
“Abby...hei hi zui la, a hmasa ber atan Second Floor a Room zawng zawng tihfai dan tur a hrilh ang che,training na a ni a, tha tak a tih tum lo in thiam tumin i en dawn nia” min tih chuan a sawi sual emaw ka ti hial...chet ngaihna pawh ka hre lo, ka ding khawng reng maia,hetiang hna thawk tur hian maw min lo tih a? ka awih thei lo zawk..
Chapter - 5
“Min lo hrethiam lawk, tu emaw ka be lawk duh a..” ka ti ta ngawt, nelawm lo zet hian min en a.
“Hnathawk tura i lo kal hnuah nangma mimal thil engmah tih phal sak i ni lo,i thawh duh loh chuan i haw leh thei” a ti chang faka, a beidawnthlak tih bak ka rilruah a awm lo, hetiang hna thawk hian ka nihna pangngaiah min dah let lul lo ange. In ah chuan ka tihtur a ni a, phunnawi loin ka ti mai, helaiah lehzel hetiang hnathawk tur chuan ka peih lo, chumai bakah Grace-in hre ta se....ngaihtuah pawh ka ngaihtuah zui duh lo.
“Ka tihpalh, ka thawk ange” tlawm ngawih ngawih hian ka ti leh lawia,a chhan pawh ka rilruah hna anih phawt chuan a zahawm vek a, hna ni loin a thawktu zawk hian hna chu kan ti zahawm tih ka ngaihtuah vang a ni. Mi te pawn kei aiin an thawk nasa zawk, ka thawk ve phawt anga, hna dang pawh ka zawng pah thei reng tawh a, a tha tho tho.
Second Floorah zui tura min tih chu ka zui chho a, Room lo awm hmasa ber a hawng a, hnehsawh zetin tihtur awm chu a ti a, min hrilh pah zel bawk,kei aiin a naupang hial maithei.Room pathum lai kan tihfel hnu chuan ka thiam ta viau, thil harsa lutuk a awm lo, mahse, engkim a changkang a, tih ngun ve deuh chu a ngaih hmel..
“Abby....” Jordan-a aw niawm takin a rawn tih ri ka hriat rualin ka ding chat a, ka hawilet a, ka Apron hakah ka thil tihfaina ken ka hnawhlut a, engtia hmachhawn tur nge ka hre lo.
“Tu nge khatiang hnathawk turin ti che?” min rawn hnaih pahin a ti leha.
“Sorry, a hming ka lo zawt lo a...” mumal lo zet hian ka ti a, a ner nawk a,ka bul a ding chu a en a,
“Tu nge?” a ti hmuk.
“Miss Ruati...” zam hmel tak hian a ti a,engvanga rawn thinrim em em nge anih ka man lo.
“Abby,min rawn zui rawh, chuan, Ruati chuan ka Office ah min rawn hmu rawh se” thupe aw hian a ti a, Lift lam a pan a, zui mai nachang pawh ka hre lo,ka zui lo tih hria niawm tak hian a ding chut a, a rawn hawi let a,
“Ka sawi kha i hria em?” nelawmna tel map lo hian min rawn ti leh a, ka zui ta dawr dawr.
Hmeichhe pakhat, Smart thlarh mai hi a lo thu a, mak tih hmel deuh mai hian kan inzui chu min en zak zak maia. Apron nen ka la ni nuaih bakah, mi thar ka nih vang pawh a ni ang.
“Good Evening...” nui sang hian a lo ti a,Jordan-a erawh a bu nghut.
“Sawmte, hei hi Abigail-i anih hi, zir theih awm apiang lo zirtir la, engkim thiam vek turin ka duh ania” ati nghala, Sawmtei a tih chu a bu nghat a,a nui sang chungin min rawn en a.Inhnuailam ami ai ngawt kha chuan nelawm tak a ni.
“Awle, ka theihtawp ka lo chhuah dawn nia” zangkhai vah hian a ti a.
“A thiam hma leh a tha ting animai, chuan, Ruati kha ka ko a, a lo thlen hunah ka Office chhungah lo luh tir ang che” ati leh a, kawngkhar a nem hawng a, a lut zui nghala,vawiin zet chu ka chungah hian thil danglam tak tak a thleng thut thut anih ber mai hi maw...
“I Apron kha ka lo la dawn mi niang?” a tih chuan ka phu zawk a, ka bulah ding an awm tih pawh ka hre leh tawh lo. Ka phelh sawk sawk a, ka pek veleh a hlawm nawk nawk a, a bul a Dustbin-ah chuan a thehlut nghal daih.
“Ih,apron kha inhnuailamah khan ka pek let leh angai ang chu...” ka ti chu za zet hian a nui a,
“Ngai hauh lo mai, tinge an lo haktir ve ngawt zawk che ni? An hai che a ni chek ang. Kan Boss hmelah khan hauh tur duh hmel ka hmu ania” tih pahin a nui hak hak a, vawikhat hmuh naah pawh a ngainatawm takzet.
“Chutiang chu thleng lo hram rawhse” hul hak hian ka ti a, a nui leh var var a,a bul a Chair awm chu a kawh pahin thu turin min ti a,Computer lam ka thiam leh thiam loh min zawt nghal zat.
“Thiam tak chu ka ni lo, mahse, ka khawih thei ang” ka ti a, lawm hmel tak hian a bu nghat nghat mai.
Ruati an tih,kha hmeichhe nelawm lo zet kha a rawn thleng a, mahse, tunah chuan a hmelah nelawm lohna lam aiin hlau hmel a lang tam zawk,kei pawh ni ila ka zam hle ang tih ka chiang.
“U Sawmte, Sir Jordan-a a awm em?” lawi deuh hian a rawn ti a,ka lo khawngaih ve ringawt.
“Lut nghal rawh..” tih bakin a chhang lo va,a kut hum ruh tlat chu ka hmuh hmaih lo..
“Ngatinge khati taka hlau hmel a put a?,Jordan-a hi a nelawm lo viau em ni?” ka ti ta ngawt peka, ani lah chuan min chhang lo in min min melh reng ringawt.
“Tunah khan engmaw i sawi?” min en reng hnuah a ti a, ka sawi sual ka hre chhuak chiah, ‘Sir’ ti lo in Jordan-a ka ti leh pek tawh..
Dawhkana Phone awm a rawn rik takah chuan ka chhan buai angai ta lo hlauh,engtin nge maw thil hi ngaihtuah chiang lo va ka sawi liam ngawt thin ni??,Sawmtei’n a chhang thuai a, a biak danah midang ni lo in Jordan-a a ni tih ka lo hre thei mai,min rawn en a..
“A ko che..” a ti deuh tawp.
“Keimah maw?” ka ti leh ta hu mai chu ka va han mawl hmel thei tak...a bu nghat ringawta,mawl min ti anih pawn engmah a hmelah a lang lo.
Room chhunga ka luh chuan Jordan-a chu Tukverh lianpui nghengin a lo ding a, Ruati erawh Chairah mar at in a thu thung..
“Sir, min ko em ni?” tim deuh dai hian ka ti a..min rawn en a..
“Ruati hian tu nge i nih hre lo in i thawh loh tawp tur a lo thawh tir che a, kan Hotel ai awhin thupha ka chawi e..a mimal taka ngaihdam dil tur che a i duh chuan i sawi thei tho ania” thildang sawi loin a ti a. Rang tak hian,
“Aih, engmah chutiang ka duh lo, tupawn tihsual kan nei thei vek a” ka ti thuai thuai.
“Ok, a tha anih chu,tun chinah chuan fimkhur tawh ang che” tih pahin kei ni lo in Ruati a en a,
“In kal thei tawh ang, eee. Abby..dar 4 ah meeting na tur ka nei a, ka rual a kal turin lo inring ang che” nelawmna tel hauh lo hian a ti leha, ka bu nghat. Room pawn ka thlen hnu ah ka in humruh chiam tihka hrechhuak chiah, engvangin nge khatiang khera Ruati kha a tihzah ka hrethiam lo, a lo hre lo palh ve a ni mai a,chiang taka ka hna tur an hrilh loh chuan a hre tawp nang.
Dar li rik hma zawng chu Sawmtei hnen atangin ka zir theih apiang ka zir a ni ber, a felin a tawng duh em em a, Jordan-a hnenah hian pasal a neih hma atangin a thawk tawh a, Pasal a neih hnuah pawh bansan mai lo in a la thawk ta zel a lo ni a, Jordan-a chanchin a sawi danah pawh a hriat chian hmel viau...
Eng ang Meeting nge anih dawn ka ngaihtuah thiam miah loh avangin Sawmtei ka zawt a, Jordan-a tihtur neih ho a enkual dan dan hnuah mak tih hmel deuh hian min rawn en a.
“Ka va hre mai bik lo ve, he ta a landan hi chuan Meeting chu naktukah ania, Hnadang ni loin Club lam thilah ania..” ati a,Jordana'n a hre sual anih ka ring ta deuh..Diktak chuan ka Nikhat na chauh a la ni a, inzui chhuah ngawt ka chak vak lo..
🤎🖤💜
“A hresual a ni maithei,amah chiah hi a ni bawk sia, tihtur angah thei tawp a, Rindika lah hi a tangkai lo si” tih pahin a nui hak hak a,
“Eee, nidawn tak, Rindika kha hetah a thawk ve mi?” ka tih chuan a thil tih lai a chawl a,
“Rindika i hria maw?” a ti nghal a, mak a tih hmel viau..ka bu nghat ringawt..
“Ka pasal i hria tihna anih chu...” a ti chiah chu ka thaw hak. ka Rindika kha a pasal a lo ni reng maia, ka ngaihtuah chian chuan an inhmeh hle dawnin ka hre leh lawi..
“Ehe,I pasal maw?” ka ti deuh hluai. Buk nghat pah hian,
“Jordan-a nen hian an inkawmngeih khawp a, an Naupanlai atangin an inkawm a, chuan maw....thil ka hrilh ang che,ka ngaihzawng neih hmasak ber leh awmchhun ania..” a ti a, a nui kar kara, ka nui ve lo thei lo, a khawsa zia hi a lawmawm takzet...
“Ka lawmpui che, i vannei takzet..” ka ti chu ka ti tak tak, a Mipa kawp awmchhun a nei thei tlat hi mi nazawng tana thil thleng ngai lo a ni tlat.
Tawngtum a ka ang ziau chu Jordan-a Office kawngkhar rawn inhawng ka hmuh rualin ka tawp leh chawt a, kan thutna lam a rawn hawi a.
“Sawmte, Rindika hi ka be tlang thei miah lo a...khawnge a kal?”a rawn ti a.
“Chawhma lam khan hmahmawh deuhin a chhuak a, a lo kir lo aniang..” ati a, an inkawmngeih tih ka hriat tak vang nge ka hre lo, Boss ang ni lo in Thian angin an in en niin ka hre ta tlat..
“Ok, a pawilo,ka chhuak dawn a, a lo let hunah min lo call rawh se ” ati leh maia,min rawn en a,
“Kal ila..” ati zui nghal zat bawk. Sawmtei ka en vat a...
“Jordan...Meeting kha chu naktuk tlai zawk ania....”a tih chuan,
“Meeting dang zawk, kha kha chu ka hre tho” nui chung hian a ti a.
“Chuti maw? i hriat pawlh emaw ka tia...” Sawmtei'n a ti tha ve mai bawk..min rawn en a,Jordan-a hmuh loh turin lei a chhuah zauh mai.
A car-ah kan chuang dun a, Driver a nei dawn emaw ka tih laiin aman a khalh mai.A hnathawh dan ka hmuh ve takah chuan ka beisei ang a ni lo. Personal secretary nei thlap, a tihtur engkim lo hriat saktu leh office hranpa nei a ni hi ka rin dan a ni lo viau. Sumdawng lian, Contractor lian tak ni tel a ni a, Football club a nei a,Mizorama Hotel lian leh changtlung ber neitu a la ni tel cheu tih pawh vawiin hian ka hre vek tawh. Sawmtei sawi hmangin hmun li laiah kawng siam hna an thawk mek a, an hna thawh pawh mizoram sawrkar kaltlang tho ni mah se central lam hna a ni lehzel bawka. A sum hrawm a na viau a ti a, A hma chuan khawpui chhung laili takah office an nei thina, mahse tunah chuan hotel building a a chung ber-ah office hi an sawn lut ta tih thlengin min hrilhfiah veka. Ka lo rindan mai aiin an lo la nei zawk fe maia, Grace-in a lo duh hiam hiam leh a lo ngaisang uchuak pawh kha a mak lo ve. Chutihrualin an chhungkaw khawsak dan a sang viau em ka hre lo a, mahse, amah hi chu a landan maiah chuan a in ti eng ngemaw chiam lo anih hmel viau.
Kan kalna tur ka hre lova, ka zawt ngam hek lo..Traffic jam nasa lutukah kan tawlh hret hret chauh mai,a ruk in Sana ka en zauh.Dar 5 a hnai kuar tawha, ka haw tlai lutuk chuan kei hian buaina ka tawk ngei dawn.Pitei te Nufa lek khan engmah an eitur pawh an siam leh duh awm der si lo..
“Kan kalna tur ka zawt thei che em?” tim deuh hian ka ti ta nge nge.
“I hre mai ang..” bung zet hian a ti nghut a, engmah ka zawt ngam tawh lo.
“Grace-i ka hrilh tawh kha, i haw tlai ang, chuan, chaw pawh kan ei nghal ang” amah zawk in a ti leh a, ka bag hnuaiah ka kut ka dah a, ka hum thlan dap mai..
"Um,hna anih chuan an hrethiam ang” ka ti ta ngawt, engvanga kan chhungkaw nun nuam lo tak a hriatthiam theih tura sawi kher nge maw ka nih ni?
Pawnlam ka hawi vang vang a, mi tupawh mai chu mahni inlam panin an kal hlawk hlawk vek mai.Ruahsur mai tur niawm tak hian thli a thaw vuk vuk a, a awm tho ve, Fur lai a ni miau atin ni..Mahse, keive hi chuan atthlak zetin nihliap pawh ka keng pek lo.
Motor ding dawtah chuan ka harh zawk mai, ka lo muthlu hman chu niin,a va han hahthlak thei tak. Ruah a sur buan buan a, Motor hmalam Darthlalang chu a rawn nan tlawrh tlawrh a,zi mar paha ka chhuak chu Jordan-an hriatthiam har tak a min lo melh reng chu ka hmu nghala, ka hawisawn vat.
“A van sur nasa ve” ka ti ringawt.
“Nia, a tam viau mai”ati ve a, kan kalna tur kan thleng tawh anih hmel..
“Kan thleng tawh mi?” ka ti leh a, a thle zauh a..
“Kan kalna tur kha ruahsur tam lutuk vang hian an rawn cancel leh a, tunah chuan Kan In bulah kan awm” a ti ta maia, ka mengphar vak ringawt, kan kal leh dawn lo anih chuan haw ka ngai..
“Ehe, chuti anih chuan haw ka ngai alawm. Ka haw thei tawh tho tiraw? In lamah min lo ngaihtuah ang “ ka ti zui a, a hmelah chuan awih lohna alo lang a, diktak chuan keipawn min ngaihtuah ka ring lo..
“Grace-i ka hrilh lawk tawh ka tih kha,chaw ei phawt la, ka thlah mai ang che” ati a, hahdam hmel tak hian hnung lam a ngheng a.
“Ruah a tla reng bawk sia, pawi i tih loh chuan tunah hian min thlah haw zawk thei angem? anih loh chuan Taxi pawh ka la thei tho a..” ka ti leh zung zunga.
“Ok, i thu thu le,mahse, kan In atang hi chuan Taxi i hmuh mai ka ring chiah lo, kan thenawm hnai ber pawh hi ke a kal chuan minute 5 lai kal ah an awm a, mi hian min tlawhpawh lo viau mai...” a ti lehzel maia.Chuti anih chuan haw pawh duh ila ka thei dawn lo tih na a ni a, ruahsur lo se chuan tihdan dan a awm ang chu...
“Engtin nge ka tih ang aw?” amah zawt pawh ni lo hian ka ti a, ka ngaihtuahna ka sawi chhuak a ni mah zawk.
“Ka hre lo le, Kan In a lo kal nge ke a haw?, i thu thu” a ti leh duh lek.
“Duhthlan tur ka nei hleinem,bakah ka Boss i ni a, i sawi ang a awm mai chu a that ka ring..” ka ti nghat a, diktak chuan ka boss anih thu sawi mah ila Boss ang tak takin ka en thei tlat lo va,a atthlang angreng viau.
Kan thut ren rawn hnuah chuan ruahsur pawh tlem chuan a zia ta deuh, kan hmalam a In lian zet ding pawh chu a hmuh theih ta a, Light a eng uar a, kawtah kan ding tih ka hrethiam a, an Insak dan chu ka en a, ka hmuh theih chin a tam lo, mahse, a lan danah ngawt pawh’ IN’ hi a ni hliah hliah mai..
"Chhuk teh ang.” tih pahin Seat hnung a Jacket a dah chu a la a, ka darah a rawn bat a
“Khum rawh, hritlang i kai hlauh ang” ati zuia, engamah hmain pu ka nei polite dawn viau e ka ti rilru a. A chhuk tur chu ngaihtuah chiang mang lo hian a banah ka va vuan thuta,, a rawn hawi let chuan mak ti hmel a pu deuh.
“Tu nge in ah sawn awm?” ka ti ringawt.
“Ka Nu leh Pa,chuan ,ka nau hmeichhia nen..” tha takin a ti a, a ban ka vawnna ka thlah thuaia, Tu pawh chu lo awm se engatan nge maw ka tih ni? Pu te inah laklawh thilah ka kal ve tihna mai a ni a. Ngatinge ka at viau mai ni?
Kawngkhar a nem hawng a, a chhuk a, chhuk ve mai ka tum chu ka hawng thei tlat lo, a rawn tlan kual a, pawnlam atangin a rawn hawng a, a Jacket min bah tir kha khum lo in ka darah ka la dah a, rawn lain a khum a, ka chhuk fel chiah chu min rawn kuah hnaiin a Jacket khum lai chu min rawn khum tel tir ve a, a Taksa ka sik rualin a hma a ka awm ang bawk khan ka awm lehnghal ar ar mai.
Veranda ah thaw hlawp hlawp in kan ding dun a, ruahsur a tlem ta deuh bawk a, kan huh vak hman lo,nui chungin min rawn en a, a hmel nelawm vak lo leh inhmuam up awm lo in mipa Naupang ang mai hian a meng de sar mai..
“Lut ang...” tih pahin ka banrekah a rawn vuan a, eng nge maw a hriat ni?, hetiang hi hnathawk te bul a awmdan tur a ni hauh lo..
Kawngkhar a hawng a,min kaihna phelh tumin a kut ka vuan a,mahse, hre lo niawm takin nghet zet in a hmer tlat thung, ka pen luh rualin Ui lian lutuk a rawn bauh nghal a, hlau em emin Jordan-a ka ngheng nghal rawk bawk. Englaimahin Ui ka ngaina ngai lo,hetiang ui lian lutuk phei hi chu ka hlau satliah pawh a ni lo,a rapin ka rap a ni ber.A rawn kal hnai zui phei chu ka kawchhungah hlauhna a tla ka timai, ka khur ta chiam.Mahse, Jordan-an a hau thawt a, mei khup zulin hreh hmel zetin kan hmaah tak a bawk ta hle hle.
“Hlau suh, seh dawn che se la chuan kan luh rual khan a seh nghal ang che, hei hi chu a lo welcome ve naah che ngai rawh” ka bengbulah a rawn ti a, chutiang chuan ngaithei ila ka ti viau, mahse, ka thei lo, min seh emaw seh lo emaw Ui chu Ui animai..A neituten hlauhawm lo ti mah se a neitu ni lo tan chuan an hlauhawm vek.
“Mam....ka thil chah che kha....” Hmeichhe aw hian a rawn ti a, aw rawn chhuahna lam ka en nghal vat, keimah aia Naupang zawk tur Hmeichhe hmeltha tak nen chuan kan in en ta siah, min zir chian tum niawm tak hian min melh a, ka banrek a Jordan-a vawnnaah chuan a tawp chat bawk.
Min vawnna thlah tumin a kut ka va khawih a, hrethiam niawm tak hian a thlah ve mai bawk ..
“Sorry,ka lo hawn miah lo,Ruahsur nasa lutuk hian min tibuai vek a...” nelawm tak hian a ti a, a duat bawk aniang, a aw ah Duatna ri a hriat theih hial.
“Naaa, a va ho e,mahse, pawi lo mai..mahse, Naktukah chuan Promise aw...” nui seng chung hian a ti a, a nuih phei chuan Jordan-a nen an in ang lehzual..
“Mate, hei hi kan Staff thar, Abby anih hi..chuan ,Abby, hei hi ka nau neichhun Esther-i ..” ati a, hnathawhna a nelawm vak lo kha ni tih rin harsa khawp in a Nau bulah chuan a zia a thlak vek,min rawn pan hnai a..
“Ka hmu che chu ka lawm hle mai, Mama hi a thinchhe sia, i thawk rei thei lo mai ang a” tih pahin a hnar a ti vang a, ngeiawm zet hian a u a melh ralh bawk, Jordan-a thaw deuh huai chuan ka nuih a ti za a, mahse, ka nui chhuak lo..
“Boss tha tak a ni ang tih ka hria e” Pangngai thei ang berin ka ti a, Nu upa lam hi a rawn kal ve leh a, Jordan-a nu a lo ni a,a Pa awm ang ka hmu lo thung..Anu in min rawn chibai ve ngial, an hausak tehlul nen,hmeichhe pahnih te chuan induhna leh chapona nei hmel an pu miah lo..
Jordan-a inthlak hlan in kan chhungkaw chanchin te min lo zawt a,min zawh dan tawk a thiamin nu fing leh thil chikmi a ni tih hai rual a ni lo. Mahse, mak tak in a Fapa in Staff satliah min hruai haw mai hi mak ti awm in a awm miah lo va, tha takin min bia a, min hriatchian tumin min zir vel nimaiin ka hria. An In chhung chu ka thut hmun atangin ka enkual a,engkim mai a nihtur ang thlap a ni tih hian a sawifiah chiang ber,an chhungkaw boruak tur awm ang ka hrethiam nghal ruaka,an inkawmngeih hmelin chhungkaw hlutna a takin an hmang in ka hre bawk. Ka nu leh pa la damse hetiang chhungkua hi kan ni ve maithei tiin ka ngaihtuah a..Nu leh pa la neih ka chak ngawih ngawih tum a tam a, tunah pawh chutiang tum chu ka ang leh ta.
“Mama hian Football khelh nuam a ti thin a, tunah chuan hei a tuina ber lamah club te a nei ta zawk a..” a tih chuan ka beng a verh zak mai..
“Chutiang a lo ni maw?” ka ti ha.
“A tet lai atangin Football bak engmah a buaipui ngai hleinem. Lehkhazir hi a pawimawh hmasa em a, kan eizawn vena te enkawl zui turin amah chiah kan nei bawk nen. Mahse, Football khel zel turin a rilru a siam fel ta zawk a, kum naupang te nimahse a duh zawng chu engmah kan dal thei lo,tun thleng pawn a mize luhlul hi a chhawm ta zel anih hi..” ati leh duaha.
“Nu, khatiang hrilh vek tur chuan ala hma deuh lo maw?” tih pahin Ka thutna bulah a rawn thu ve a, ka thu khawng nghal lah mai.
“Hma lem em ni? mahse, i duh loh chuan ka sawi zui lo mai ang chu ” nui chungin a ti a.
“Duh chiah lo, ka hrilh ve tur zawng zawng i lo hrilh vek chuan sawi dun tur avang awm em mai' A tih chuan ka nui ta nge nge..
Kan beisei ai takin nuam ka ti ta zek, an bula awm a nuamin hnathawk leh a chhawrtu inkar zau tak ang kha engmah a awm lo.An sawi hmangin Jordan-a pa ,Jordan-a Pi leh pu te In lamah a kal a, chaw a ei nghal dawn a, tawngduh tak ka ni lo nen sawi ve tur erawh ka hre mang lo. An chawhmeh siam engkim a tui em em vek a, maktak in eisiamtu niawm tak Pakhat ka hmu a, midang awmpui an nei lo nge mawni tumah ka hmu lo,an khawsak dan en chuan awmpui nei thleh thluah awm tak an ni si.
Haw tura an In ka chhuahsan meuh chuan dar 9 a hnai thuak tawha, ka thaw ru hak mai, hauh ka va han tuar nasa dawn em ka ti rilru a..A pawi lo ve, vawiin ka hun hmandan hi duhthusam chu ni lo mah se nilengin Jordan-a bulah ka awm thei a, nuam ka ti tho..zep rual loh in He pa hian min hip takzet...mahse, lo duh a lo ngaina ve ngawt tur ka ni lo, ka nihna ka hrereng tur a ni a, ani tan pawh hnathawk tu mai ka ni a, a hnuaia thawk ka nih ang in ka chungah that a chhuah mai zawk tih ka hria,chuti anih loh chuan a sex toys ah ka tang mai ang..Ka phone riin ka ngaihtuahna atangin min kai harh a, ka en chu Pitei a lo ni a, chhan loh mai ka duh rum rum.
“Chhang la,tu nge anih a?” Motor khalh chungin a rawn ti a, pawnlam en chungin,
“Pitei anih hi,haw har min ti anih ka ring..” ka ti tha ve mai. Phone ka pick up nghala, ka pick -up rual-in a rawn au nghal a ni ber. Ka dahsawn a, a au ring leh lutuka Jordan-an a hriat ve phak hial ka ring..
“I rawn haw dawn nge i awmhlen dawn?” a rawn ti deuh chiam.
“Ka lo haw mek e..” ka ti thuaia, a thinrim tih a tawng sehchilh nawk nawkah chuan hai theih a ni lo.
“Rawn thlawk haw nghal rawh” a rawn ti leh vaka, ka chhan let hma in a off daih bawka,chhan let pawh tum ila chhan let dan tur a awm lo hrim hrim..Ka Phone ka Bagah ka thun a, Jordan-a ka melh ru zauh a, engmah hre hmel a pu lo...
Kan In bulah Motor a ti ding a, ka mangtha a,ka chhuk tur chu ka banah a rawn man a,ka hawilet vat bawk, vawiin chu duh aiin kan insi tam ta..
“I tha em?” ka rin loh takin a ti a.
“Aw, tha tehreng mai,ngatinge?” ka ti let a, a thaw deuh huai a..
“Ka tih khawtlai che avangin thupha ka chawi e..Khatiang engmah a thleng tawh lo ang, mahse, hna chungchangah erawh chuan a tul phawt chuan hei ai pawn kan tlai tum ala awm ang” nghet churh hian a ti a, ka bu nghat ringawt.
Hreh takin Gate lian vak lo awm chu ka hawng a, engtin tak nge min tawngkhum ang ka hre lo,tawngkam chhe satliah hi chu ka ngaipawimawh lo va,mahse, Awmpui ka hmu vat anih loh chuan Putea nen kan lo khawsak ve na hi ka chan mai ang,an nufa a min thehchhuah tum a tan an lak chuan ka hneh dawn der si lo..
“Eng hna nge ni ngai?, nikhat na lekah i Boss tihlawm tumin ruakin i lam vel em ni?” ka luh rual rualin min lo ti nghal chiam,hahthlak thin mang e,hei hi ka khawvel chu a ni ve miau si..
“Grace, inhmuh a va khat ve..”
Jordan-a aw in ka hnung atang a a rawn tih ri ka hriat chuan ka meng phar awk a, min rawn zui tih ka hre miah lo. Mahse, Grace-i leh Pitei hmel a nuam ti lo hmel lo lang nghal avang ngawt pawh chuan Jordan-a lo lut ve chu ka lawmna tawk a tling tho, a lo luh chhan lam a pawimawh lo...
Chapter - 6
"Awww,nia, i lo kal ve tih ka hre lo a” mangan hmel zet hian a ti a, kei erawh ka nui lo thei lo.
“Lo thu rawh, ka han inthlak lawk” ka ti a, ka Room lam ka pansan a, sawi mai tur hre lo a an nufa hawi hai kha hmuhnawm ka ti ngawih ngawih, engvangin nge Jordan-a kha a lo luh ka hre lo,Motor atang khan a chhuk ve tih pawh ka hre hek lo. Engpawhnise ka tan thil tha tak a ti tih ka hria, aman hre lo mah se min chhan him tlat.
Inhnuai ka chhuk leh chuan ngai an lo awh leh tawh tih ka hre thei mai,ka Inleng angin ka kawm dawn nge Grace-i kawm turin ka kalsan ang ka hrethiam chiah lo.
“Abby, Thingpui rawn lum la,in ang u,Thingpui a siam tui thei ania” Pitei’n phur surh hian a ti a, tuntum chu min tirh avangin ka lawm zawk tlat. Rangtakin choka ka pana, Thingpui ka chhuang nghala, a so hma chu ka phei leh ta lo. Ka rilru ka kawm a,Zobiaka awm ve se ka ti viau, eng nge ka hrilh ang hre lo mah ila ani a awm chuan ka mal lutuk anga ka inhriatna a bo ve thin tlat atin ni,mahse, a lo haw hun tur pawh ka hre der si lo.
Thingpui nen a ka let leh chu Grace-in min lo pui thuai a,ka nuih a za ru takzet. Jordan-a hi lo kal fo se ka tan chuan a hahdamthlak phian ang, engmah min tihpui peih ngai lo a, a eitur takngial pawh ka siam sak thin kha ania, tunah chuan phur em em in min pui thei tlat. Zobiaka mai mai pawh an be tha ania,Jordan-a phei chu Pathian biakin an be lo chauh ang tih a lang reng.
“Ka lo han mutsan mai ang che u..” Pitei’n a ti a, min rawn melh a, a mitmengah chuan keipawh mu turin min ti tih ka hmuh hmaih lo,sual chhuahin ka thu lui tlat zawk dawn mawni ka ti that thata,mahse, tul ka ti leh lo,Grace-i chauh lo Jordan-a tak pawh hian hnawk min lo ti ve tho thei tlat.
“Keipawh tih tur ka nei a, ka chhoh san mai ang che u” tih leh thawh ka rual a, min chhan letna pawh nghak lo in Room ka pan nghal daih bawk.
Khumah ka let tawn sek mai, ka mutna bul tukverh atangin Jordan-a Motor dahna alang thei a, ka duh aiin ka bih zing tawh, dar 11 ari tep tawh si eng nge a tih em em ang?, Mipa ah pawh Pa ve tak mai a ni a, a pian in fit zaih maiah khan a hrisel tha ang tih alang reng bawk...Ka ngaihtuahna tenawm zet dahbo tumin ka maimitchhing vang vang a, hetiang lo ngaihtuah tur ka ni lo, an duh duh ti turin zalenna an nei a,Jordan-a tan lah a hnuaia thawk satliah ve mai ka ni bawk.
A motor thawm ka hriat rualin ka tho vat a, Parda ka pawt kau a, a tlanchhuak tur chiah ka zuk hmu hman hram,ka mu leh sawk sawk a, ka muhil daih tawhah ngai se ka duh a, Grace-i rawn insawithei kual leh vel tur ka ngaithla peih miah lo.
Ka Phone nghawr datah ka harh a, ka lo muhil sek hman anih hmel. Dar 11 leh a chanve a lo pel hret tawh chu niin. Phone ka en thuai a, Msg pangngai alo ni a, ka hawng chu ka beisei loh lutuk in Jordan-a msg a lo ni.
“In in ka lo kal leh hunah min mutsan tawh suh,i muhil chuang lo tih ka hria” tih a lo inziak kalha, thinrim zet hian ka dahthla a, ngeiawm thiam lutuk mai...Rei vaklo-ah a rawn ri leh a, mahse, tun tum chu Call a ni ta thung, eng pawh ka en duh lo,min nuihzat tur bak in min rawn call lek lo ang tiin ka insawh ka insawh a, a tawp hnuah ka en ka en a, Jordan-a ni lo in Zobiaka zawk a lo ni a...Engtin nge Jordan-an min lo call tur a ka ngaih theih ngawt zawk ni??
Ka Call back nghal thuai a,rei pawh a ring hmain a Pick-up nghal mai,
“Hey,Aizawlah hian Dar 12 a ri tep tih i hria em?” mutchhuak hmel fe hian ka ti a..a nui nghal hak hak a, a nui ri hriat ngawt pawh a nuam thin,engtiklai atang khan nge ka thian tak tak anga ka ngaih tan ka hre lo.Hmeichhe pakhat nen an che dun lai ka hmuh khan ka ten em em tih ka hria, mahse, tunah chuan hun a kal leh ta bawk a, ka mitthla a a lo lan chang pawn ka zia ta viau..
“Ka hria e, keini pawh a ni ve tho ,mahse,biak che ka duh tlat..’ inthlahrung lo zet hian a rawn ti a..
“I sawi tur chuan naktuk a nghak thei lo tihna mi?” tiin ka ngeiawm ka chhuah lui tlat..
“Abby..nia, a pawimawh,i thinrim angem ka hre lo..”te a la ti ta deuh deuh.
“Sawi vat mai teh” ka ti hlar a.
“Englo ania, tuemaw a rai a,a Pa ah min puh a...” a ti chiah chu ka thu chhuak hlawl mai...
“Tu maw rai?!!” ka ti chu duh aiin ka au ring...
“Amah chu maw ka bialnu chu a ni chiah lo a, kan inthenna a rei tawh, mahse, Mama te Party na a kan kal zan khan ania” a rawn tih chuan ka hrechhuak uai uai mai...kha nu kha a bialnu hlui a lo ni ngei anih chu..
“Ok, hahdam rawh, i nei anga animai lawm” ka ti a, a thaw deuh huai ri ka hriat hmaih lo..
“Nia, ka nei ang ka ring...mahse,engtin nge i awm?” a rawn ti leh a, engtia awm turin nge min beisei tehlul ni?
“Mak ka ti deuh a, mahse, zia lo khawp in min shockna lo, chuan ka thianpa hian nupui a nei dawn a, ka lawmpui viau bawk che...” nui chungin ka ti a, ka ham zui bai bai bawk..
“Abby...tlem talin min duhna i lo nei ngai miah na nge?” zuai tak hian a rawn ti ta a. A zawhna hi zawhna awm tak a ni. A lo leng regular in kan inzui chhuak nasa a, mahse, ka chhungril hian a hria, ngaihzawng angin ka en ngai lo ang...
“Chutiang inzawhna hun a ni pawn ka hre lo” ka ti a..a ngawi deuh vang vang a..
“Nia, ka hrethiam che, thian ang bakin min en lo, chuan,Mama i duh tih ka hria,engpawhnise thian nih zui zel ka duh ania...” a rawn tih takah chuan ka lungphu a rang nghal zaih zaih mai...Engtin jordan-a ka star tih a lo hriat theih zawk ni??,
“Ni lo e, i hresual....” ka ti hmana,
“Ka hresual lo, Party naah khan in inkuah lai ka hmu che u asin, ka sawi chhuak lo mai mai anih kha, tlem chuan ka na ve...mahse,keipawn i lakah thian nihna bak ka lo ngaihtuah tak tak lo tih ka hrechiang ta zawk” a rawn tih leh chuan ka thaw a chham dawnin ka hria, tuman min hmu lo emaw ka ti kha ania, min hmu tih engmah a sawi si lo..
“Aaaa,i hresual anih kha...eng nge maw palh vang a min kuah ania...” ka ti chhuak thei hram,engvanga insawifiah chiam tum nge maw ka nih hrep ni..
“A chhan lam ka ngaihtuah lo,mahse, thil pakhat ka hrilh duh che ,ani kha kalsan rawh, ka unaupa nimahse i tan a tha lo tih ka hrilh ang che.Hmeichhe pakhat chauh lo chuan a rilru an luah ngai lo,ngaihzawng tam tak a nei a, an vaiin Sex Toys anni mai,khatiang ni ve turin ka phal lo che…” a rawn ti leh hmawk hmawk.
“Zobiak...ka mut a chhuak e,lo haw vat la,hmaichhanah kan la sawi dun zawk dawn nia..” ka tihsana,diktak chuan ka mut a chhuak eih lo,Jordan-a Hmangaihna chang vektu hmeichhia chu tunge ni ang tih bak ka rilruah a awm lo..
“Ok, mahse, ka sawi kha hrereng rawh..’ ala rawn ti hram...nia, ka hrereng ngei ang, theihnghilh pawh tum ila ka thei lo ang.
“Lungngai suh, chutiang engmah ka ngaihtuah lo...”alangah chuan ka ti ta zawk.
Tlai ei tur ka siam kep vek a, inchhung ka tifai vek bawk, hna kal tur a ka chhuah hma in ka chauhna khawp ka hmu ti ila a dik ber ang.
“Jordan-a te In ah i kal tiraw?” tiin Grace-in chawei laiin min zawt a, ka thil ei lai ei mawlh mawlh chungin ngaipawimawh lo hmel fe hian ka aw liam mai,a hnar a tum dat a..
“Nizan khan min hrilh a, enteh, Abby, thisen inzawmna nei miah lo mah ila mawl lutuk a i khawsak hian ka zak ve thin tho ania” a ti leh chu hrethiam lo tak hian ka en a..
“I sawi awmzia ka hre miah lo..” tih pahin ka Plate ka nawr sawn a.
“Engvangin nge i hnathawhna te In ah i nikhat na lekah i len ngawt ni?, chumai pawh ni lo in chaw ila ei zui bawk a...” a ti ram hmaka, hreptak hian...engtin nge hetiang zawngin a ngaih theih?, Jordan-a khan hetiang a ngeiawm leh hmuhsitawm hian ka chungchang a sawi ka beisei lo,a mizia ka la hrechiang miah lo chungin ka hrehawmna atang a min lak chhuah nan hna min pe tlat,Grace-i bulah mawi lo takin min sawi lo ang tih ka chiang...
“I duh duhin ngai rawh, engvang a kal nge ka nih chu kei leh Jordan-an kan hrechiang ber, lo zak buai duh suh” ka ti ve hmak, hetiang a ngeiawm hian an lakah tawngkam ka la nei ngai lo va, ...mak a ti bawk aniang, a ang phuau mai.
Ka chair ka nawrsawn chiah chu Pitei zawk a rawn te ve ta thung,” Zaktheilo nu...engtin nge khatiang khan i tawng ngam zawk?,kan chawm i nih hi..” thinrim engphairin a ti a, min ben mai duh niawm tak hian a tho uaih bawk. Mak takin tun tum chu ani pawh ka hlau tlat lo,an nun lem lutuk hi ngatinge ka lo hlauh thin tiin ka ngaihtuah tlat zawk.
“Ngatinge ka tawng loh ang?, thudik alawm ka sawi, angaihdan a dik hleinem” ka ti leh sak,kut khur ngar ngarin min kawk a, a sam la khuih mam loh nen a landan chu ramhuai pitar a ang ber..
“I va han huai ta em!!,nikhat lek hna i thawk a, hetiang hian maw i tawng a?, chhuak ang che...chhuak ngei ngei rawh,khawsak ho ka duh lo..” a ti ta chiam.
“Ka chhuak dawn khawp, in bul a khawsak hi ka peih tawh bik lo,hna ka neih vang a danglamah min ngai anih chuan i tisual, ka Putea nupui i ni a, chuvang chuan i thu thu a awmin a dik leh dik lo pawh sawithei lo in ka nun ka hmang liam a, engkim hian tawp chin a nei...mahse, ka chhuah hun tur erawh ka thu thu..” ka ti ve piap mai, ka chhungrila thinrimna ka lo khawl khawm te ka sawi chhuah takah chuan thil rit tak min delhtu min laksak ang maiin ka zang hawk mai..
An nufa mak ti lutuk tawng ngaihna hre lo a ding khawng reng chu ka kalsan a, Room ka thlen hnu ah ka khur tih ka hre chiah, mahse, tun tum chu hlauhna vang a ni lo va, engvanga khur nge ka nih ka inhre lo zawk. Ka sawi ang ngei khan ka chhuak ngei ang, mahse, tunah ni lo...hlawh ka lak hunah a ni ang. Inluah tur ka zawng ang a, bungrua engmah awm lo mah se In ber a awm chuan ka chhuak nghal nal nal ang. Putea nena kan lo khawsak dun thinna leh ka seilenna In nimahse chen zel chakna ka nei tawh lo, mahni a khawsak ka duh ber, ka awmhlenna tur hmun ni chuang lo a ei tha tinreng ei a, in nuam tak a chen ai chuan ka nihna diktak, engmah nei lo a bul tan ka thlang tawh zawk.
“Good Morning...” ti a nui var var chungin Sawmtei’n min lo lawm a,he nu bul a awm hi a hahdamthlak takzet. Ka best friend Kimtei min ngaih zual tir lo thei lo. Ani bulah kha chuan ka hrehawmna te avangin ka duh duh in ka rilru hahna ka lantir thei thin a, Kimtei hnuah Zobiaka a lo lang ve leh a, mahse, ani chu Mipa a ni a, kawngeih em em mahila kan chhungkaw buaina te hrilh turin ka hnaih lo..a hria tih hre mahila sawi chhuah ka duh ngai lo..
“Morning...i va thleng hma awm ve” ka ti ve a.
“Nia, hma deuh, Rindika leh Jordan-a kha Team te tawiawm turin an zin a ngai sia, an kal hmain engkim an ken tur peih fel vek angai a..” ati a, tawng mawlh mawlh chungin Computer lam a en ran bawk..
“Engtik nge an zin dawn a?” ka ti nghal a.
‘Naktuk tuk leh ah ania,mahse, vawiin-ah Meeting a awm dawn ka tih kha,tahkhan mamawh an ngah lutuk a” ati leh zung zung.
“Oh, anih chu,ka pui thei che em?” ka ti a, a bu nghat a, File hlai hlap mai hi min pe a.
“Heng ho hi Jordan-a lo va sign tir ta che...” ati a, phawk deuh hra hian ka en a..
“A lo kal tawh maw?” ka ti halh mai. Nimin khan Security khan Dar 11 hma in a lo kal ngai lo ang khan a sawi si a, tunah dar 10 pawh a la ri si lo..
“Um, vawiin chu an buai nileng dawn,keini pawh kan buai nileng ang...kal vat la..” then sak chungin a ti a, ka dil chhut mah mah anih hmel...
Kawngkhar ka kik a, lut turin min rawn tih veleh ka lut a,Paper a lo inchhawp hnawk nuaih mai.
“Sign tur chu i rawn keng em? ” min en chuang lo in a ti a, a thil khawih lai a khawih mawlh mawlh reng tho.
“Aw, anih ka ring, Sawmtei’n min rawn tir a...” ka tih chuan a rawn hawi chhuak a, Tarmit a vuah ka hmuh vawi khatna niin a hmel pa zet chu a ti lang nelawm lo lehzual sauh hian ka hriaa, mahse, zep rual loh in a inhmeh...
“Ok, lo dah rawh,ka lo ti ang, chuan, Khawngaihin Coffee min rawn lak ta che” a ti zuia, hnathawk diktak angin min bia tih ka hria, lawm tur ka nih laiin ka lawm miah lo, amah vangin kan chhungkua kan inhau tih hria se engtin tak ngai ang maw?
“Abby...” a ti leh chu ka phu zawk, hmanhmawh fe hian ka file ken chu a Dawhkanah ka dah a, a tarmit a la thla a, ka awmdan mak tih hmel deuh hian min en bawk.
“I tha em?” ka kal tur min ti a,
“Aw, tha lutuk” rang takin ka Tu a, ka chhang rang mah mah a ni ang,a nui suk.
“Um,Coffee chu le...” a tih chuan ka hmai a sa hat hat mai.
Nilengin buai tak kan ni ringawt mai, inbe mang lo in kan tih tur kan ti char char a, ka ni hnihna chauh a ni nachungin Sawmtei a fel a, ka tihtur min pek ka ti sual lo tluk a ni.
“Thil kan zuk ei dawn mi niang?” Sawmtei'n a ti a, ka sil thum tih reh tumin ka zi mar a, ani pawh a chau hmel viau tho.
“Um, a tha ngawt ang, mahse, ban a hun tep tawh sia...”tih pahin sana ka en a, Dar 5 a hnai tawh..
“Kan ban hun pangngaiah kan bang lo ang, Meeting an tan chiah tih i hriat kha...” a ti a, nia, an tan chiah, an kal chhuak dawn emaw ka tih kha midang an lo kal ta zawk a. Patling deuh hlek pathum leh Tlangval niawm tak, kan rualpui awm vel pakhat an lo kal rual a, a hnuhnung berah Hmeichhe pakhat, nalh leh in zo tih hriat tak,a hawiher engkimah an hausa tawk a ni tih lang thei hial kha a lo kal leh bawk,eng nge an sawi dawn ka hre lo, Hotel hna leh site lam thil a ni lo a, Club lam chungchang a ni tih zawng ka hria..
“Chuti anih chuan kan ei mai angai anih chu..” nui chungin ka ti a, mahse meeting na lamah min mamawh thut chuan lo kal sawn daih a fuh hauh lo..
“Meeting na lamah hian min mamawhna an nei angem?” ka ti leh rih a, a thle bak a,
“Aih, min mamawhna tur chu kan tihfel sak vek tawh kha,bakah Poppy a lo kal tawh kha...” a ti a, a tawngdanah a ei lo tih a lang mai,Hmeichhe nalh zet lo kal ve kha Poppy chu anih hmel, hmeichhe dang tumah an lo kal ka hre tlat lo..
“A tha hlauh, kal ila..” ka ti a,
Ka Bag ka ban a, Nimin pawh khan Pitei pawisa ka dil hauh lo. ka Putea damlai khan Ac ka hawng hman vek a, ka Scho lak te ka dah hlawm a, Putea khan a damlai khan a khat tawkin ka hman turin min dah sak zeuh zeuh bawk, ka zirna lam a ka mamawh apiang kha hreh chung chungin Pitei ka dil lui thin a, ka Ac a pawisa tlemte awm hi hman loh dan ka zawng hram hram a ni ber, ka lo dil luih tang tang vanga pawisa ka lo khawl hi tunah a tangkaina ka hmu ta chiah, ka mamawh leina tur pawisa min pe ngai lo va, hmeichhia ka ni a, mamawh sawi chiam rem si lo a tam,tunah hna ka thawk tan chauh a, Taxi Fare leh nitin thil eina tur in pawisa ka mamawh ta chiah a,ka neihsa hian hlawh ka lak hma chuan min daih thei mai ang..mahse, ka inren viau angai thung ang..
Eitur kan chah a, Staff pangngai tho kan ni a, mahse, kan thil ei man erawh a chanve chiah kan pek a lo ngai thung,thil tha tak a ni ka ti rilru a,kawt zawl lang uar chu ka thlir paha,ka hmuh theih chinah chuan hei aia hmun rem zawk hi Aizawlah hian ka la hmu tam lo. Hotel lian tak tak chu a awm ve fer fur tawh mah se khawpui chhungah kawngpui hnaih tak tak,Motor parkna mumal pawh awm lo ah te a ni hlawm a, a Hotel nuam em em mahse a hmun hma hian a zo lo niin ka lo hre ru thin...he Hotel hi chu a ni ve miah lo, a hmun hma hi sawiselna tur a awm lo,a chhunglam phei chu sawisel tur a awm lo lehzual..
“Poppy kha i hria em?” kan ngawih dun deuh reng hnuah a rawn ti thut a , ka lu ka thing mai, ka hre ngai miau lo atin ni.
“Club ah hian Share a nei ve a” a ti hmak a,ka hmuh tirh atangin hetiang hian ka la hmu lo..a thinrim hmel em em tlat..
“Um, anih chu...a chhe lo ka lo tia” ka ti a, nalh tak a ni, a lian a, a pian inkhaithli thlarh kha hmuhnawm ti zetin ka lo en anih kha...
“Nia, a chhe hran lo, a rilru phei han tha tel se chuan a famkim nimai tur” a ti leh hlak a, eng ngemaw hriat chu a nei chiang..ei lohna chhan tha te a nei anih hmel..
“Mihring hi kan famkim lo theuh a,ani kha chu Perfect ka lo ti asin” nui chunga ka tih chuan a nui ve hauh lo va, a tum hmak zawk.
“Jordan-a hi a mit avangin nasa lutukin a lu a na thin a, a mit a del dawn emaw an ti hman a, reife khua pawh hmu thei lo in a awm a, chutihlai chuan a bialnu, a engkim ni bawk khan Pasal dang a lo neihsan a...chu chu buaina a ni lo, chu hmeichhia chuan tunah,Jordan-a mi pangngai chunglam a nih hnu hian a rawn hnaih leh a...a lo hnar zo lo lehpek....” a ti leh hmak hmaka, a tawng tawp lam phei chu a sehchilh rap rap mai...ka beisei loh em em a ni ka hriat ni..
“Chu hmeichhia chu i hria em?,kha nu zakthei lo lutuk kha..” tih pahin a ban a vai a, midang an awm ve avangin a tawng erawh a ring lo..
“Poppy kha i tihna a ni em?” ka ti a, ka hrawkah hnawhtu a awm tlat...
“Ni chiang e..Ramhuai anih kha...” ati leh hmak a, hei ngei hi anih hi Zobiaka khan min hrilh a lo tum..Poppy ka mithla ah a lo lang a, a lakah kha chuan Fanghmir nen kan danglam kher lo ang..hrep tak hian...a duh duh chu lo ni ang hmiang, ka buaina a ni lo...oh...ka buai chu anih si hi mawle.
Chapter- 7
Sawi ve tur hre lo in ka ngawi rauh rauh mai, Sawmtei lah thil kal tawh ngaihtuah niawm takin a hmalam a en a, a tum deuh bar reng maia, ni hnih leh kan la thu dun chunga Poppy chanchin chhe lam a sawi mai danah a ngei ve tawk hle tihnaah ka ngai.
Kan eitur a lo thlen chuan inbe lo in kan ei nghal mawlh mawlh a, ka ril lo tam zia ka hre chhuak a ni ber.
“Ka lo buaina tur a awm miah lo a, mahse, ngatinge tunah Poppy chu a neih mai loh a?” ka ti chhuak hlawl, ka buaina tur a ni lo ti ngial mah ila ka rilru ah a awm tlat.
“Chu kher chu ka hre bik lo le, an inkawp leh tih tawp chuan ka sawi ngam chuang hleinem,zui chu an inzui leh ngei mai a, an inzui tih khan an inngaizawng ngei em ka hre lo ka tih kha. Bakah, Jordan-a nu hian engtin nge a ngaih ka hre lo, Jordan-a hi mahni thuduh tak nimahse a Nu leh Pa hi a zahthiam angreng a, a Nu in a duhloh tlat chuan a nei in ka ring lo” atih chuan ka Pen hmawr ka seh a, a nu hmel ka mitthla ah a lo lang a, Nu hmeltha leh nelawm tak ni khan ka hmu a, mahse, hetiang taka Fapa hlawhtling leh tumruh nei tur chuan nu chak tak anih ngei angai a, a ni ngeiin ka ring bawk.
“Um, anih chu mawle,mahse, a nei tur ber te an induh chuan inneih tir mai hi kei chu tha ka tih ve dan ania" ka tih chuan a nui sak a,
“Nia, a dik alawm,keini pawh hian kan nupa hian harsatna kan nei lo a ni miah lo, mahse, hei kan Innei a, chhungte pawn an pawm thiam mai. Chutihrual chuan chhungte duh lemloh neih hi thil fuh tak a lo ni lo..” a ti a, za lo tak hian a nui zuia.
“Rindika ka nei ka inchhir ka ti lo ania aw...thuawih a tha ka ti zawk...aaa, nang hi ka la hre rei lo hle che sia eng ngemaw thil hi ka hrilh chiam kher che le?!!” a ngaihna hrelo hmel deuh hian a ti leh lawi.
“Min ngaina aniang” ka lo fiam a, ka nui hak hak bawk, ani pawh a nui ve tho bawk. Ka ngaina tih kei chuan ka hria, a bula ka hahdamthlap ang hian Kimtei bulah chiah ka hahdam thin miau atin ni.
“Ani maithei, i Hmeltha tak kha a ngainatawm alawm..” a ti a, tuman hmeltha min la ti ngai lo va..lawm tur nge lawm loh tur pawh ka hre lo.
“Naaa, i fiamthu pawh nise ka lawm tho, tuman tha min la ti ngai lo a” lai deuh put put hian ka ti a.
“An hrilh lo mai mai che anih chu, diktak chuan kan nupa in hna i rawn thawh ve avang hian beiseina sangtak kan nei..Oooooo, ka inpuang leh ta nge nge..” a ti bai bai mai...a sawi awmze hre lo zet hian ka en a,a Phone a en daih thung..
“I sawi awmzia ka hre lo...”ka ti nghala.
“Diktak chuan...Aa, kan ngaihdan diktak ka sawi anga, thinrim suh aw..Jordan-a hian engvangin nge Training chawp ngai hi Direct lutuk a hna a rawn thawh tir che kan hre thiam lo. Kan pa chuan a zawt ngei a, mahse, chhanna a hmu lo...Kan nupa ngaihdan ni ta ber chu i Mit lian leh zahawm tak khan i melh chiang viau anga, a rilru i tibuai ni ah kan ngai a....” a tih lai mekin Jordan-a Office kawngkhar a rawn inhawng a, a thilsawi lai pawh a sawi zo lo va,chhan let na hun lah a awm hek lo.
An rawn inzui chhuak phak phaka, mahse, Jordan-a leh Poppy erawh an rawn chhuak tel ve lo. Rindika kan thutna lamab a rawn kal hnai a, midang erawh an kal tlang nghal thung.
“Kan rei ta phian a..” ti chungin Sawmtei a en a, a Nupui a en danah a duh thawkhat tih a lang reng,ka lo awt ru ve ringawt bawk.
“Nia, inrei ta phian anih hi, tunah dar 10 a hnai tawh ania” ati let ve a, thil kan ei khan dar 5 vel a ni a, tunah dar 10 a hnai thuak tawh a, anni ho phei hi chuan an ei pawh ka hre lo a, an riltam viau maithei..
“Kal kal dawn mi?” dinmar pah hian a ti a.
“Kan haw dawn nge hetah chaw kan ei nghal law law zawk dawn?” a bag lak pahin ati a, kei pawn ka bag ka la ve nghal vata, ka dingchhuak zui nghal bawk. Taxi ka lak angai ngei dawn a, hei aia hma deuh hian zo ni se tha tur, tunah chuan a tlai tawh a Taxi fare a let in a to belh ngei dawn tih a chiang..
“Hetah ei ila, Abby,nangpawh kal nghal suh, Jordan-a te nen ei ho kan lo tum sa hrim hrim..” atih takah chuan ka lu ka thing a, ka chuang dawn bik tih ka hriatna vang ringawt pawn an bula ei ka duh lo.
“Aih, lawmawm viau mah se ka hnial mai ang che u, nidangah nimai rawhse” ka ti a, Sawmtei nur nang chu ka en a,ka nui lui sak bawk.
“A chi loh em mai, tunah a tlai tawh a, engmah ei lo a haw na chi pawh a ni tawh lo,kan thlah kual nghal mai dawn che a” ati leh a, hnial tum a ka ang ziau tawh chu Jordan-a leh Poppy rawn inzui chhuak ka hmuh rualin ka tawp leh nghal daih.
“In ril a tam tawh em?” a rawn ti nghala, hmelpa zetah chuan a Mood a fuh vak lo a ang..
“Tam tawh lutuk, Jordan, Abby hi han hrilh teh, chaw kan ei zawhah kan Drop mai ang kan tih pawn a duh lo ania..” Sawmtei'n a ti nghal ngawt peka, ka va han ngei reuh tak,mahse, min huat vang a ti a ni lo tih ka hria...
“Um, nia, tunah a tlai tawh a, ei nghal law law rawh, keiman ka drop mai ang che” thupe aw hian a ti a, ka Jacket ipte ka zen a, ka kut ka humruh tlat.
“Jordan, ani hi tu nge? ka va hre lo fuh mai lo ve, Staff thar tihna mi?” Poppy-in a rawn ti a, aw a nalh phian zui,a thawp deuh sat a, ngaihthlak a nuam hrep bawk.
“Aw,Abby anih hi, nimin khan a rawn zawm thar chiah a,mahse, ani hi chu Hotel chauh ni lo in Club lamah pawh a tangkai ang” Sawmtei zawkin a lo tih khalh a,a awki nghet charhah chuan Poppy a mil lem loh zia hai theih a ni lo.
“A tha ngawt ang chu,chuti anih chuan hun kan nghah deuh ang chu..” tih pahin Jordan-a a melh ralh a, Jordan-a erawh chuan ngaihven hmel a pu lo.
“Nia,Abby, hei hi kan Club Vice President Poppy anih hi,chuan, hei hi Abby...” Rindika zawkin a lo ti a, min chibai turin a kut a rawn phar chhuak a, ka vuan zawk a, ka thlah leh vat bawk.
“Kal ang u,ka ril a tam over ania” Sawmtei’n a ti a, kan boruak nuam lo zet tih rehna tur a awm takah chuan lawm takin Sawmtei ka zui nghal thuai a, Rindika leh Jordan-a inbe leh rih chu kan kalsan a, Sawmtei lah in nghah tum hmel a pu lo.
“Ka luak dawnin ka hria..” a ti hlak a,ka nuih a za thung,kan chawei lai vel boruak kha hrehawm ti a sawi tur a ni lo, engkim a pangngai. Poppy erawh chuan Jordan-a lakah duat hlawh a duh vang nge ka hre lo, a no nak nak viau mai kha hmuh nuam ka ti lo,a kut sei thlarh mai kha hnuailamah a dah a, a dahna tur awm ka lo ngaihtuah leh hmanhmawh anih kha,hahthlak hian aaa..
“I la urhsun lutuk anih kha...Rindika’n a ti a, a Nupui hi a chhaih thiam hmel riau tih ka lo ngaihtuah daih.
“Aih, ka la urhsun lo, engvangin nge Jordan-a pawh....” atih lai mekin Rindika a lo tawng thuai a,
“Bawihi...i duhtawk thei em?,Abby tan hian a nuam lo ang tih ka ngaihtuah a...” tlawn aw deuh hian a ti a.
“Oh,sorry, mahse, a pawi leh lo, Abby te chu ka hrilh vek tawh” a ti leh hmak a,mahse, a mal chunga a Pasal kut a awm takah chuan engmah a sawi zawm ta lo,Rindika hian ka hriat ve a duh lemlo tih a lang a, diktak chuan kei pawn lo hriat ve ka chak chuang lo.
Kan In bulah Motor a ti ding a, vawikhat bak a lo kal ka hre lo va. Mahse, kan In awmna ka sawi ngai lo in a hre dik chat maia,a hriatna a that hmel viau. Jordan-a khan min thlah a tum ngei a, mahse, Poppy-in kalna tur hmanhmawhthlak a neih avangin Sawmtei te zawkin min thlah a, pawi ka ti lo, anni pahnih bul a awm kha ka chak lo,atthlak zetin ka lo thik ve ngawt zawk emawni..
“Kan tlai ta deuh sia, i chhungte an lo thinrim viau angem?” Rindika’n a ti a,an thinrim ngei ang, mahse, eng ang pawn min thinrim khum se pawi tihna ka nei lo,reitak helai hmunah hian khawsak ka tum tawh lo hrim hrim. In luah tur ka la hmu lo a, mahse, a awm loh pawn reilote tal chu Hotel man tlawm deuhah pawh ka khawsa mai ang chu...Remruati awmpui tur ka zawntir pawh ka la be nawn leh lo,tunah chuan mamawh pawh ka mamwh leh tawh lo hrim hrim.
‘Hna ania, an hrethiam ang” nui chunga ka tih chuan a nui ve hak mai, a lo kal hmasak kha ka mitthla ah a lo lang a, ani pawn kei ang tho in a ngaihtuah chhuak ve anih hmel.Vawikhat chiah min hmu a, min hre nalh thei a, thil thleng kha a la hrereng tih nimin pawh khan a sawi tak e.
“Ka beisei e..lut la” ati a, Sawmtei pawn min mangtha a, an tlan liam thleng ka thlir zui reng. , Huphurh ru tak hian Gate ka pan a, ka hawng mai dawna, ka hawng thei tlat lo,ka pawh deuh vak pawhin ka la hawng thei chuang lo. Chhunglamah an kalh emawni tiin ka'n en chiang a, Tala in chhunglamah an lo kalh tak tak chu niin..Pawn Light a in On vek avangin Kawngkhar ka hmu thei a, a In kalh lo. Inchhungah an awm reng a, ka la haw lo tih hre reng chungin min kalh hnan lui tih ka hria, ka thinrim a, ka tah a chhuak teuh mai bawk.
Grace-i call tumin ka Phone ka phawrh dawn a, ka dap fuh mai loh avangin uluk zawkin ka bag ka hai a, ka hmu chuang tlat lo.Motorah khan ka ti tla nge Hotelah ka theihnghilh zawk ni ang? Mangan avangin ka thaw a sa phat phat mai,zan a rei tawh avangin Grace-i emaw Pitei pawh koh luah luah chi anni tawh si lo, ko tehreng pawh ni ila min hawn dawn lo tih alang reng, min hawn leh mai mai turin engvang mahin an kalh lo ang.
Beidawng zetin ka thu hnawk mai, ka manganna tizual tur tingin thli a thaw vuk vuk a, ruah sur mai tur angin a la awm zui bawk. Min ti duhdah in min lawmlo em em thin mah se hetiang em hi chuan min tih ka la hre lo,an tan hnawksak ka lo ni tak tak ngai lo a, tunah chuan ka ke a ding turin hna ka thawk ve tana, an tan chuan ka hnawk ta takzet anih hmel.
Ka hmaiah tui a rawn far chuan ka harh zawk maia, ka awmna ka hai thelh bawk. Gate nghengin ka lo muthlu a,ruah surin min rawn far a lo ni a,hmanhmawh takin kan thenawmte In lam ka pan a, anni hi chuan Gate an nei lo a, an veranda ah tal ka awm chuan ka hul deuh ang chu...
Thim lai deuhah ka thu a, kawl a phei zuai zuai a, tek a tla ri thuai a, Current a thim zui nghal hmak bawk. Ka naupanlai atanga ka hlauh ber pakhat chu Ruahsur tam lutuk leh Thli tleh te,tek tla te hi anni a, tun thleng pawn ka hlauhna hi a la reh thei lo, ka chhungril ah min man a, ka khur ka khur maia, a hlau ve tu lo tan chuan hetianga chhungril atanga hlauhna in min man hi chu hriatthiam sak chi kan ni lo.
“Abby...Mate...” tih pahin ka darah tu emaw hian a rawn khawih a, ka rak chiam maia, mahse, tu nge anih ka hriat takah chuan ka thlamuang nghal huai huai thei.
“In ah ka lut thei lo a...” sawi tur sang hre loin ka ti a, ka sawi zawm hmain ka hmui a rawn hup a,min pawt tho in nghet zetin min pawm bet zui nghal hmak. Eng rilru nge a put lam ka ngaihtuah lo, ka hlauhna te,ka manganna zawng zawng te kha amah ka hmuh rual khan a bo duak a.Mahse,ka duh loh em em in mahni inkhawngaihna avangin ka mittui a rawn hnam a, ka tum loh tawpin ka insut zui ta hlawp hlawp.
“Hlau suh,i bulah ka awm ania” tih pahin ka sam huh vekah chuan a rawn fawp a, ani pawh a huh ve tho bawk.
Min kuahna a thlahin ka dar tawn tawnah a vuan a, engtiklai in nge Current a lo awm leh ka hre lo, a hmai tak chu Light hliah zawng a a din avangin a thim mak a, ka hmu chiang thei lo.
“Ka bulah lo kal rawh, i damlo mai ang” atih chuan hnial pawh ka tum buai peih lo, ka thian a ni lo a, ka bialpa a ni hek lo. Ka hnathawhnaah ka Boss a ni a, hetianga awm tur ka ni em ka hre lo va, engtin nge min rawn hmuh lah ka hre hek lo..
“I motor ka ti huh vek dawn anih hi..” inthlahrung takin ka ti a, ka tap ngawt mai kha ka zak thar leh a, nep inti lutukin ka inhau ru mawlh mawlh a,awmzia a awm tawh der si lo..
“A hi lutuk, a ro leh mai ang”awlsam zet hian a ti a,nuam ka tih nan a sawi mai mai pawh animaitheia, mahse, nuam ka tih phah eih lo va,ka inthlahrung zual ting animai..Amah en ngam lo in Motor darthlalang ruahin a nan tlawrh tlawrh chu ka en a,khawiah nge min hruai dawn ka hre lo a, ka zawt ngam hek lo,tunah chuan ka duh ber chu in tih hul a mut hahdam vang vang animai..
Hotel kawt ah kan ding a, Horn a hmet ri a, Duty a rawn dak a, tu nge anih a hriat veleh Gate a hawng nghal a, min hmu lo se ka duha,min hmu pawh nise a pawina a awm kher lo thei tho bawk.
“Hetah lo hian kal na tur a awm lo em ni?” ngam leh ngam lo hian ka ti a, Staff thar ka ni a, Ruati lak a min chhan avang pawh khan sawisep ka kai ka ring tawh a, tunah lah zanlai a ni dawn tawh a, amah nen bawk kan let dun leh a, hnathawktu tamzawk an awm tawh lo tih hre mah ila pakhat lek pawn min hmu se naktukah chuan an hre lehnghal vek ngei anga, mahni tan a tangkai lo sawi a zeldin peih em em hnam kan ni miau si a.
“Tuman min hmu lo ang,hnunglam atangin kan lut dawn nia” a tih chuan tlemin ka thawveng ta deuh. A sawi ang ngeiin Hall luhna pangngaia lut lo in hnunglam kawngkhar tereuhte ah kan lut a,a Office lam kan pan a, vanneihthlak tak in tumah kan hmu lo hlauh bawk. Ka huh vek avangin vawt ka ti a, ka inkuah khawr hlan mai.
“Lo thu la, tu emaw kan be lawk ang” tih pahin tukverh lam a pan a, thu ngam lo in ka ding ran thung, a Motor ka ti huh tawh a, a Sofa lehzel tih huh ka duh tawh lo. Thenawmte veranda kha chung a nei ngei a, mahse, a sur tam lutuk a ka huh vek tho.
Tu nge a biak ka hre lo, Room awl a awm leh awm loh a zawt niin ka hria,a ni lo maithei bawk. A be zo a, a rawn hawi let chuan ka lo la ding reng chu mak tih hmel deuh hian min en a,vawt ka tih vangin ka inkuah khawr hlan bawk nen ka landan nalh loh tur zia ka ngaihtuah ngam lo zawk.
“He lamah hian lo kal rawh..” thildang sawi loin a ti a, Bangkil lam a pan chu ka zui vat,.Curtain chhah tak in zar chu a pawt kau a, ka rin loh deuhin kawngkhar a lo awm reng mai. A hawng a,zui zel tura min tih avangin ka zui zel ringawt. Room chhung ka hmu chiah chu ka thaw huai mai,Khum lian leh nawm hmel zet hi a lo inkhuh dulh a,hahdam taka mut vang vang nan ka it nghal ngawih ngawih mai. A room chhung chu Hotel Room dang ka hmuh te nen tlem in a danglam deuh hret a, mahse, a danglamna a tam lem lo..
“He Room hi eng nge maw chang chuan ka hmang thin a, zanin chu hetah hian i riak mai dawn nia” ati a, hnial turin chapo na ka nei lo a, hnial thei dinhmunah ka ding lo hrim hrim bawk.
“Ka lawm e...” ka ti zuai raih.Min rawn pan hnai a, ka sam huh chuap mai chu a rawn khawih a, ka bengah a zep a,dimtein a kut zungpuiin ka biang a rawn tuai a, chet na chang ka hre lo..a rawn kun hniam chiah chu ka maimitchhing ta ngawt..
“Inti hul vat ang che, ka thawmhnaw a awm a, i ha thei mai ang” tih pahin a kalsawn nghala, eng nge ka beisei chiah ka hre lo, muangchangin ka meng chhuak a, ka hmai sa hat hat chu ka khawih a, ka awmdanah khan engpawh tih huam ka ang khawpin ka ring,eng ngatinge engkim a thlen hnu hian ka inchhir ziah kher ni?, a thlen dawn khan lo inven mai awmtak a ni a,ka thei der si lo..
“Ka lawm e aw..” ka ti leh ringawt chu a nui hak a.
“Lawmthu sawi ka phut lo ania, ka tihtur ka ti mai zawk, eee, hei i Phone aw,chaw kan eina ah khan i theihnghilh a..” ati a, a kekawr ipte atangin ka Phone a rawn phawrh a, engvanga kan in a lo kal nge anih ka hre thiam nghal a. Ka Phone min pek let tumin a lo kal a ni tih a chiang ta kuar. Mahse,tunang tlai tawh takah hian engvangin nge min pek let tum a a lo kal kher erawh ka hre lo?,ka lu ka thing deuh nawk mai,engpawh lo kal chhan se ka tan chuan a lawmawm tawk viau alawm,mi verandaah ka riah loh phah ania, chumai bakah a mimal hmun ka hman sak hial bawk si...
A chhuah hnuah ka thawmhnaw ka phelh sawk sawk a, Bathroom ka pan nghala, Bathtub lian tha hem hawm takah chuan ka lut a, ka inchiah rei chuan ka muthilh mai ka hlau a, ka chhuak leh thuai. Bath Robe ka ha a, hmeichhia a la hruai lut ngai lo nge ka hre lo, Bath Robe pawh ka tan chuan a lian mah mah. Towelin ka lu ka tuam a, hal tur zawngin a thawmhnaw dahna ka hawng a, a thawmhnaw a lo awm nual a,mahse, T-shirt lam engmah hak tur a awm lo, Kamiz leh Smart Pant hlir a awm, a kamiz ka la chhuak a, ruak a mut ngawt ai chuan a zia awmin ka ring...engtin nge ka awm zui ang tih ngaihtuah rih loh ka duh zawka. Tunah chuan muthilh ka mamawh ber, Sana ka en chuan dar 1 a pel va tawh..
Ka harh leh chuan khua a lo eng vek tawha, Lukham hnuaia ka Phone dah ka la chhuak nghala, Battery a low viau chungin thih zawng a thi em lo.Sana ka en a, Zing kar anih ka rin laiin dar sawmpakhat tlemin a lo pel hret tawh chu niin. Ka beisei loh tawpin ka mu tha takzet a lo ni. Tho mai lo in chunglam en in ka mu reng a, engtin nge ka awm tak ang tih ka ngaihtuaha,Inluah tur ka la hmu lo a,kalna tur ka nei hek lo. Ka nu chhungte thenkhat chu hre ve bawk mah ila an vaiin Pitei lam tang anni a, tumah ka pan ngam tur an awm lo.
Ka thamwhnaw nizan khan ka spin ve tak nangin a la ro ka ring lo va, chumai bakah helai hmunah hian ka awm reng thei dawn lo tih lah a chiang. Nizan lam ka ngaihtuah rualin nizan khan Jordan-a khan ‘Mate’ tiin min ko tih ka hre chhuak thut a..khatiang a duat khan vawikhatmah mipa in min la ko ngai lo,a ti der emaw ti der lo emaw ka tan chuan a lawmawm tawk tawh hrim hrima,ani lak atanga khatiang dawn kha a awihawm lo lek lek zawk hial bawka. Hnathawktu ringawt lo deuh hian min en ve anih rinna ka nei thut erawh a ka inti viau.
Kawngkhar inhawng ri ka hriat rualin ka maimitchhing leh vat a, tunah rih chuan tumah ka hmu ngam lo, midang ni lo in Jordan –a bawk anih ngei ka ringa, helaiah hian tifai tur a a luh tir anih loh chuan tumah an luh ka ring lo ve tawp.
Dunlop chhah zet a che dat a, tu emaw a rawn thu tih ka hria,a reh deuh vang vang a, rei vak lo ah hmui lum ham ham hian ka chal a rawn si a, hmu lo mah ila tu nge anih ka hria,
“Mu nileng ang che,khawngaihthlak reuh lutuk” ati sup a, mengchhuak lo turin ka insehruh tang tang a ni ber.
Ka lo muhil leh ta tak tak,ka Phone nghawr dar darin min tih harh chuan ka mit ka nuai chat chat a, tho chuang lo in ka phone ka phawrh a,Zobiaka a lo ni a, ka Phone lah chuan rei a daih dawn lo tih a lang reng.
“Khawnge i awm a?” ka Pick rualin a rawn ti nghal a,
“Hna ka kal mawle..” thil dik lo a awm tih lang lo turin pangngai thei ang berin ka ti a,ka beisei aiin ka tawng chhuak a pangngai..
“Eng a?!, hna i thawk maw?” a rawn ti hu, ka lo la hrilh miah lo tak e..
“Um,ni 3 na chiah ania,i lo haw hunah ka hrilh ang che ka ti a” tlawn pah deuhin ka ti a, a hma khan lo hrilh awm tak ka ni asin le, Kimtei leh Remruati bulah ka sawi a,tu hnuaiah nge ka thawh erawh chu Kimtei chiah ka hrilh thung..
“A tha anih chu, tunah Aizawlah ka awm,i buai viau aniang, call i pick thei lo “ ati leh a,
“Um,nia buai ve tho" ka tih chuan" Zanah in In ah ka lo kal ang” a rawn ti leh a, ka lungphu a rang nghal dawt dawt mai..
“Zanin chu tihtur ka nei a, naktukah inhmu zawk ang..” ka ti vat..a ngawi deuh vang vang a, a lungawi vak lo anih hmel..
“Ok, a pawilo mai,mahse, eng hna ber nge i thawh?” ati leh ta.
“Naktukah engkim ka hrilh ang che, tunah chuan ka buai a, min hrethiam lawk la..” ka ti leh a, a thaw deuh hak ri ka hrethei a,nuam ka ti lo takzet..
“Um, a pawilo mai” a ti ban chata, ka chhan let hma in a off nghal hmak bawk.
Ka tho chhuak a, Jordan-a kamiz ka hak chuan ka mal chanve vel thleng a khuh a, a ban lah thleh loh chuan ka kut thlengin a khuh thla vek bawk,engtikah nge Jordan-a a lo let leh ang ka hre lo, engmah ka la ei loh avangin ka pum a ri raih raih a, ka ril a tam takzet. Nizan a ka chawei bak kha engmah ka la ei lo. Mak takin Pitei emaw Grace-i pawn min rawn be hauh lo.Tun thlenga ka haw loh chuan a mawiah tal pawh ka chanchin rawn ngaihven tur annih vei nen..,ka Phone ka en a, Sawmtei min rawn call na leh Zobiaka min lo call na a lo awm teuh mai.
Bath Room a ka thawmhnaw dah ka va en chuan nisa a hmu lo bawk nen a lo la ro tha lo fo,hak luih dawn chuan a hak theih tho mahna. Room lamah ka let leh a,ka tum loh lutuka Jordan-a lo thu ka hmuh rualin ka ding chawt maia,rang zetin ka kamiz hak tlang ka pawt a, awmzia a awm lem lo. A nui suk ka hmuh takah phei chuan ka thil tih atthlak zia ka ngaihtuah a, naupang ka ni tawh lo a, anih ang ang a hmachhawn mai hi a tha zawk ang tiin ka ngaihtuah ta zawk.
“I mu tha em?” a ti a, hahdam hmel zetin Sofa hnung a ngheng a, a nghenchhan ah a ban a kham duai bawk.
“Mu tha khawp mai,hna ka kal ta lo ringawt a..” ka ti hap, khum lam ka pan leh a, inhmachhawn a kan thut chuan ka kamiz hak lai hian tuna a khuh chin pawh hi a khuh dawn lo tih ka hria.
“Khalam kha chu ngaihtuah suh. Bag ah khan thawmhnaw ka dah a, i inhak fel hunah chaw kan ei dawnnia” ati a,a tho zui nghal a.
“Jordan...oh...Sir...” ka ti bah nak mai.. min rawn en a.
“Jordan min ti rawh” khauh zet hian a ti nghut a, ka bu ringawt.
“Engtin nge ka awm dawn ka hre lo, ih, ka chhungte khan haw leh turin min duh lo ngei tih ka hria,englo ania.Hotel a awm turin Pawisa ka nei lo a, chuan, In luah tur ka hmu lo bawk a..” ka ti bah nuaia, a hmel chang zet chu ka en pah ran mai. Min chhang loin muangchang hian min rawn pan hnai a...ka sawi tur pawh ka la sawi zo lo,mahse, sawi hmasak tur ber pawh ka hre thiam chuang lo..Ka hmaah tak a rawn ding a, a lian bawk nen a hmel chang rut chu a nelawm lo satliah pawh a ni lo, a lang hlauhawm lek lek mai..
“I awm zel dan tur lam chu ngaihtuah suh,ka ngaihtuah mai ang” ati nghut a, ka tho thata, kan in len hleih bawk nen ka melh chho a..
“Ni lo ve, ka tibuai nasa tawh che em mai.Mahse, thil pakhat chiah ka ngen duh che a, helaiah hian zanin chiah ka riak leh thei angem?” ka tih chuan a hmui a pet sawi zauh a.
“Min ring em?” a ti ta daih, ka beisei loh lutuk min zawh avangin chhan mai dan tur ka hre lo. Ani hi ring ngawt tur ka ni em ka hre lo, ka hriat na a la rei lo va, hrechiang tak tak tur chuan hun reitak ka la mamawh ngei ang. Kan in a a lo kal tawhna atangin inchhunga ka dinhmun chhe tak hre chiang tu a ni a, min khawngaih tih ka hriaa, bakah chuan lo rinngam ve ngawt hi ka tih tur a ni lo. Mahse, ni 3 lek a hnen a ka thawk chung pawh hian a rintlak zia ka hmu hnem tawh viau. Hna min pek dawn khan ka nihna pangngai min pek let nana min pek a duh tih a sawi a, engthil chiah nge min pek a tum ka hre lo chungin Grace-i te nufa lakah chuan min chhan him ngei...
“min ring em?? " a ti nawn leh a, " ka hre lo" ka ti bak nak.
“Ok, min ring turin ka ti lui dawn lo che,mahse, ka bulah i awm duh anih phawt chuan ka kalsan lo ang che,engtikahmah..” tih pahin ka khabe ah a rawn dawm a, a ban lehlam in ka kawngah a rawn kuah a, amah si chetin min kuah bet ta thlap, a lungphu ri dat dat ka hriat vawithumna a ni ta.
Chapter- 8
Hetianga min kuah hian ka hahdam in ka nun hi ka sawithiam si lohin famkim tlatin ka hre thin.Mahse, engvangin nge a bulah ka awm anga ani hi ka rin kher ang? Kan innei ang a ti lo va, ka bula i awm chuan a ti ringawt a ni a, a nuna Poppy awm reng chung lehnghal, a hmeichhe khawi pakhat ka ni mai dawn tihna em ni ti a ka inzawt chiah chu ,ka ngaihtuahna chuan min ti harh kawk a, ka chen mekna Jordan-a min kuahna atangin Tal chhuah tumin ka che nghala, a thaw hawk mai.
“Ti hian awm rih ang..’ zawi angreng tak hian a ti a, min kuah nghet sauh pah hian a rawn kun a, ka kamiz hak nghawng rawn nawr kauin ka taksa lawng a hmui chhah tap leh lum ham hamin a rawn si ta chu ka mur ar ar maia, ka ke a zawi nghal huai mai bawk. Tawng loin a kawngah chuan ka kuah let ta nge nge.Ka mal a kut lehlamin a rawn khawih a, ka kamiz tlang a nawr tawm chho nghal bawka, ka awmdan danglam vek chu a hai hauh lo ang, amah rinchhanin ka ding a, tuna ka rilruah hi chuan engpawh ti dawn ila ka inpeih thlap. Ka awmmek dan danglam tak ang hian vawikhatmah ka la awm ngai eih lo, ngaihzawng hi chu sawi tur ting chuan nei ve tawh thin mah ila tumah hi taksa lam thil takin ka hnaih ngai lem lo. Jordan-a lak a ka awm dan ang a danglam phei hi chu ka vawikhat tawnna a ni ..min pawm kang nawlh a, tlak hlauin a nghawngah ka kuah a, a kawngah ka mal pahnihin ka kherh bet chial bawk..
Khumah min nghat a,khumah kan mu duna, min nawrlui si loin thiam takin ka duhna zawnah zel a che a ni ber. Phone ri chiang lo tak hian ka hriaa,kan chen dun mekna khawvel, kan pahnih ta bak chu engmah kan ngaihtuah tha thei lo. Mahse, chiang lo ruaia ka hriat kha ka hre chiang tial tiala, ka awmdan awmze nei lo tak atangin ka harh chiang ta kawk.
“Jordan...duh tawk teh..” tih pahin a lu ah ka nem a, ka sawi hre lo ang maia a awm avangin a chhip sam tlema buk deuh bikah tak ka thama,thaw hawk chungin muangchang hian min rawn en a,a mitmu dum fiah takah chuan chakna chiang takin a lang a, thup a tum lem lo tih alang reng..
“Duhtawk ang..” aw a lawi rat hian ka ti leh a...min chhang lo in ka awmah a hmai a phum leh vang vang a, in control a tum anih ka ring ve ringawt..
“Sorry....” tih pahin a tho a, khum tlangah a thu a, a lu dawmin a kun ta vang vang.
“I Phone kha...” ka ti leh ringawt, kekawr ipte atangin a phawrh deuh chiah tihin a rawn ri leh a.
“Hello...Poppy..” a ti chiah chu ka inlekkhawng nghal lah mai. Poppy rawn tawng a ngaithla leh te te a,enge an sawi ka lo ngaihven tur a awm miah lo tih ka hria. Ka mal lang vek chu ka khuh tha sawk sawka.
“Ok, ka hria lawm, ka rawn lam ang che” ati leh chu ngaihven awmin awm lo mah ila ka ngaihven ru kar tho.
Tukverh lian zet awm chu a panin parda a pawt kau a, hnuailam a en thla a. Tang takin ka tho ve nghal a, Paper Bag Sofa a a dah chu ka la a, Bath Room ka panpui nghal sawk sawk mai. Ka awmdan kha hmeichhe khawlo tak nen danglamna a awm miah lo ang, mahse ngaihtuah ka duh rih lo. Thleng tur a thleng vek tawh. A thawmhnaw rawn ken ka phawrh chhuak chiah chu ka thaw hawk mai.Lace var leh chiffon var tho thuipawlh a lo ni a, a hnute chung zawng lace hlang a ni thung.Ka ha sawk sawk a,kekawr dum a awm tel chu ka ha leh a, tlemin a thawl lek lek a, mahse, nalh lo khawp a ni lo va, thawl deuh chu a nihdan tur anih hmel zawk.Engtin nge ka hak tawk tur a hriat theih ka hre lo,engpawhnise mak tihna hun a awm lo.Bath Room chhung a darthlalang lian zet awmah chuan ka in en a, ka ta sa niawm takin ka inhmeh thlap mai..
Ngaihtuah muk hmel deuh hian a lo thu a, a hma lawk a ka hriat Jordan-a kha chu a bo fel leh hmak tawha, amah tho nisiin midang daih a ni tihna a ni ber.
“i ha thei maw?” nelawm lem lo tak hian min lo ti a, ka chhan kher ngai lo in ka ha thei tih a hmu reng,mahse, ka bu nghat tho.
“Room luhna kawngkhar pangngaiah zawk hian ka chhuak thei angem?,Sawmtei emaw tuman hetah ka riak tih an hriat ka duh lo a” ka tih chuan a mit a ti zim a,a mit en ngam lo in a awmzawn ka en a, ka kut ka elh nauh nauh bawk.
“A tha lawm, keipawn ka duh bik chuang lo va, ngaihdan an duh duh in an siam ngawt zel hlawm si" ati nghut a.
“Nia, a, dik alawm. Chuan, ka lawm tak tak ania. Zanin chu ka riah a ngai leh lo ang, Zobiaka a lo haw a,aman tihdan a hria a..” tih pahin a mitah ka en a, rum angreng taka min lo en reng ka hmuh rualin ka hawisawn leh nghal vat.
“A ngaihtuah thei ang maw...?” a ti hmuk a.
“Aw, thei ang. bakah naktukah hna rawn kal leh ka ngai dawn a,vawiin ka kal lo tawh bawk si..” ka ti leh thuai thuaia.
“Zobiaka bulah i riak dawn amaw?” ka thilsawi min chhang ni chiah si lo hian ati a, a sawi danah lah chuan thil tenawm deuh chanchin sawi a ang phian bawk.
“Riak maithei,ama tih dan dan animai. Mahse, riak han tihah khan ...” ka tih lai mekin a rawn ding chhuak a, sawi pawh ka sawi zo lo.
“Ok, sawifiah vak angai hleinem,i awmdanah khan i mizia tur ka hre thei vek ania” a tih takah chuan na ka tihdan chu vuak chawrh nen a danglamna a awm lo hial ang. Hei bak a inhmuhsitna hi a awm thei in ka ring lo hial bawka, ,Mahse, dem thei ka ni lo, a sawi ang chiah a zuamawmin ka khawsa tlat atin ni.
Kawngkhar a pan pheia, pawnlam atangin an kalh lo aniang cu awlsam tak hian a hawng a, ka chhuahna tur in a tawlhsawn leh a, tawngka in chhuak turin min ti lo mah se kal turin min ti tih a awmdanah a lang a, ka bag kengin rang takin ka chhuaka, , ka chhuah rualin a khar zui lehnghal hmak bawk..
Kalna maitur hre lo in ka ding deuh vang vang a, Hotel bula Taxi lo ding chu a hman theih leh theih loh ka zawt a, a lo theih hlauh mai. Kimtei te In ah kal tawp ila,Phone ka charge phawt hnuah Zobiaka be zawk ila a that ka ring,kan In leh Kimtei te In hi a inhlat lutuk lo a,kal paha ka rilru ka thlak leh anih leh kan In ah pawh ka haw ang chu,min lo thehchhuak nawn leh dawn pawh nise ka thawmhnaw ka lak tho tho angai.
Ka rilru thlak lo in Kimtei te inah ka kal a, nuin min hmu thut mai chu mak atih hmel viau nangin engmah min zawt lo. Kimtei lo haw hun tur vel kan sawi dun a, ani pawh hian kan chhungkaw chanchin a hre nual a, min khawngaih thei em em bawk,mahse, hriat belh tumin engmah min zawt chuang lo.
“Ka va haw phawt ange, In ah tumah an awm lo a,chahbi ka keng chhuak lo va, ka Phone a thi bawk nen, chuvang ania ka lo kal “ ka ti a, nu tha tak ngang a ni a, ka thusawi a ring hmiah anih hmel.
“Nia, va haw rawh,a thuhrimin min rawn tlawh fo ta che,I thiannu a awm loh chuan I lo kal duh thin lo va, i ngaihawm alawm” ati siam siam a, tlawh fo thei dinhmunah ding ila kan inhnaih em avangin ka tlawh fo ngei ang. Mahse, lenna hun ka nei ngai lo tluk a ni a, tunah phei chuan ka awm ve an remti tawh lo zui bawk nen kan inhlat sawt tawh anga, ka tlawh mang mang tawh dawn lo. He lai hnaiah In luah ka duh dawn hauh lo tih lah ka chiang.
Ni a tla tawh a, Office ban hun a pel tawh bawk, ni rei lai anih avangin khua erawh ala thim lo thung,muangchangin ka kal a, Jordan-a bula ka awmdan kha ngaihtuah loh hram hram ka duh a, a tawngkam na leh hmuhsitna a khat erawh kha chu ka theihngilh in ka ring tawh lo.
❤🖤🤎
An la haw lo tih hriat tak hian Gate a lo in kalh bam mai, Grace-i ka biak ngei ngei angai,ka lakah sual em em mah se ani hi chu a nu ai chuan ka hlauh dan a nep zawk.
“Eng nge?” a rawn ti hlar mai..
“In lo haw tep tawh em?” ka ti a, ka thinrimna ka thup hram hram a ni ber. Engang pawn thinrimin au chiam chiam mah ila awmzia a awm tlat lo.
“Kan lo haw dawn lo” a rawn ti deuh tawp.
“Engmaw?,ngatinge in lo haw dawn loh va?” ka ti ha mai.
“Ka nu a zin a, keipawh ka lo haw dawn lo”a ti hmaka, a off zui nghal daih bawk. Lo nghah reng awmzia a awm lo va, call nawn lah awmzia a awm dawn hek lo, a sawi ang tak tak khan a lo haw miah lo ang tih ka hria.Nidangah pawh a Pu te In a riak turin a kal fo, mahse, a chang chuan a bialpa nen an riak dun thin tih ka hriaa,ka hria tih a hre lo mai mai zawk.
Zobiaka ka call a, a ring ral thak, ka ti nawn leh ta tho, a la dawn lo emaw ka tih hnu ah a rawn la ta hram, ka thin a ur ru teuh mai.
“Min lo hruai teh..” thildang a sawi hmain ka ti mawl tawp.
“Khawnge i awm a?, ka hnaah ka buai kha i ti sia” ngeiawm zet hian a rawn ti a,ka dem hauh lo, a lo haw a, min hmuh duh in min rawn be nghal chung chung a, ka lo biak dan khan a zir tlat lo.
“Kan In kawtah ka awm, lo kal phawt la ka hrilh ang che” ka ti a, a ngawi deuh vung vung a, a, dan pangngaiin a ‘aw’ ta tho.
Ka pum a ri rawk rawk a, ka ril a tam vawng vawng bawk, Hotelah khan khatiang teh nuai kha ni lo ila chuan thil kan ei ang. Mahse, kan boruak khan riltamna a hnawt bo vek a,tunah lem ka riltam leh em em lawi si..
Reivakloah Zobiaka a rawn thleng a, engmah sawi lo in Gate ka kawhhmuh ringawt, a rawn chhuk a, Gate sir a Brick bung awm chu a la a, tala chhut thlak a tum tih ka hria, ka dang vat thung.
“Ka lut lo mai ang, eitur ka duh, khawiah emaw thil eiturin kal ang” ka tih chuan min en vang vanga.
“Thil awmzia sawi phawt teh” a ti a, ka lu ka thing a.
“Thil ei pahin ka hrilh ang che, tunah chuan ka ril a tam lutuk” ngen titih hian ka ti a,a hrethiam ani chek ang, min hnial lo in Bike ah a lawn a,rang fe hian a hnungah ka lawn ve nghal zat bawk.
Engmah ei lo in ka thil ei min thlir tawp, ka ei tam a ti nge pawh ka hre lo,ka plate ka nawrsawn a, tunah chuan ka puar ta bawka ka hahdam huai mai.
“I ei ve dawn lo em ni?” ka tih chuan a nui a.
“I ei ka en che khan ka puar,engtik nge chaw i ei tawp ber?” ati ta thlawt,nia, ka thil ei dan kha ramsa koham ka ang ngawt ang.
“Nizan..” ka ti tawi tak mai, tunah zan a ni leh tep tawh a, nilengin chaw ka ngei tihna ania, tui tlem ka in tih loh chu engmah ka ei lo.
“Han sawi teh..” tih pahin hnung lam a ngheng a, sawi tan dan tur mai pawh ka hre lo.Ka ngawih deuh vang vang hnuah,
“Jordan-a hnuaiah ka thawk a.Chuan, zingah Pitei te nufa nen kan inhnial deuha, Jordan-a te Meeting an rei em avangin kan bang tlaia,ka la haw lo tih hre rengin gate an lo kalh a" Ka ti ta charg charh.
“Chuti anih chuan nizanah khawiah nge i riah?” min tih chuan sawi tur nge sawi loh tur ka hre lo,reilote ka in ngaihtuah zawk a, ka riahna tak sawi loh a that zawk ka ringa.Mahse,
“Hotel ah ka riak..chuan,vawiin a ka haw leh pawhin tikha a lo la nia. Grace-i ka call a, Pitei a lo zin a, Grace-i lah chuan lo haw a tum lo bawk a. Diktak chuan inah khan let leh tum hrim hrim pawh ka ni lo, awm leh tum vanga haw pawh ni loin ka thawmhnaw tlem tal lak ka duh a” ka ti a, ka tum aiin ka sawi tam ta,pawi phei chu ka ti lo....
❤🖤🤎
“I la haw lo tih hrerengin an kalh lui a, an bulah awm lo la an duh niin ka hria. Hotel a awm chu sum a hautak awm em a, kan In ah i lo kal mai dawn mi? ,chuan,kan in atangin in luah tur kan zawng anga” awlsam zet hian a ti a, ka nui ringawt. A bialnu hlui in a fa a pai a, a ma tawkah buaina a ngah lutuk tih ka hai lo. Chuvangin kei lehzel chuan buaina lo pek belh chi a ni lo. Mahse, eng nge ka tih chuan ang?Jordan-a khan a bulah ka awm duh anih chuan min kalsan lo ang tih min hrilh a, mahse, ka bula awm a tum chhan kha ka hmu chiang tawk tawhin ka hria a, a bula awm ngawt tumna ka nei lo. A hna ka thawhsak erawg ka ei hmuhna anih dawn avangin ka bansan phal hauh lo. Hna dang ka hmu anih loh chuan ka thawk reng ang,min ban te anih ngawt loh chuan...Zobiaka ka en a.
“Ni lo e, buaina i ngah lutuk, i nupui neih tur chungchang pawh kha buaina tham anih kha,Hotel man tlawm deuh ka duh a, min zawnpui la..” ka tih chuan a ban a phar hluai a,beidawn hmel zet hian a dah thla leh a..
“Hotel ah engchen nge riah ngai ang?,inluah tur kan hmu vat dawn em pawh kan hre lo a” ati a heitak hi Jordan-a nen an in an lohna niin ka hria.Jordan-a chu a puitling tawh a, engkim a ma thu in a kal tlangpui tawp thin a, Zobiaka hi chu a la naupan bakah engmah thawhchhuah a nei lo bawka, in chhungah duat em em mah se thil tak tak ti tur chuan a huaisenna hian a la tlin lo niin ka hre thin.
“Ka hre lo, i thiante lo bia la, In luah tur an lo hre mial maithei asin” ka ti a, a en ngai a en vang vang mai..
Darkar khat a liam leh meuh chuan keimahin Hotelah ka awm ran tawh. Zobiaka'n min tihfel pui vek hnuah min haw sana. Tihtur awm hek lo le, khumah ka mu a. Muhil thei loin ka mu meng kar mai.
Ka mithlaah Jordan-a a lo lang a,engvangin nge he mihring hi ka nunah ka lo inrawlh tir reng reng ni tiin ka ngaihtuah a,lo hre ngai lo tawp ila tha tur..
Tu emaw in kawngkhar a rawn kik a,tumah lo kal tur an awm ka hre lo. Zobiaka lahim min haw san na a la rei si lo.Tu tak nimaw tiin peih lo fe in ka tho a, kawngkhar zimte in ka hawng a, ka beisei loh zetin Zobiaka bawk a lo ni. Ka hawng zau chiah chu a rawn inzep lut a, zu rim a nam hak zui...
A lo let leh chhan ka zawhna hre lo ang maiin Khumah a let tawp mai, thu lo in ka ding a,engvang a rui chiam nge anih ka zawh chuan min la chhang chuang lo.Zu a in thin tih chu ka hriaa, mahse, Party na a kan kal tum bak kha rui chung in ka hmuh ka la hre chuang lo.
“Ngatinge i lo let leh a?” ka tih leh chuan a let thuk a, min chhang lo..Khumah ka thu a,
“Mawh??, ngatinge i lo let leh a?,in nu i hmu dawn emaw ka ti a” ka ti leh chiah chu ka inrin hma in min rawn kuah thut a,zu rim a nam huam huam mai bawk si nen,ka hamhaih a, chet mai nachang pawh ka hre lo..
“Zawhna min zawt teuh suh, zanin chu tah hian ka riak ve dawn” a ti nuah nuaha, min kuahna ka phelhsak a, a rui mah mah anih hmel,a zawi nguai mai..
“Riak ngawt lo ang,i awmdan amak em mai..” ka ti leh a, mahse, a hnar zui nghal der, a chatthla zui nghal anih ka ring ta ber.
Leather Sofa tawite awmah chuan ka mu ta ngawt, khua a vawt lem lo bawk a, a hrehawm hran lo. Ka harh leh chuan khua a lo eng tawh a, tukverh ah ni a lo lut iar maia. Fur lai a ni bawk nen ni a sa uar mai chu a lawmawm rualin a awihawm loh zawk rum rum.
Khum lam ka en thuai a,Zobiaka hmuh ka tum nen a awm hauh lo,ka tho thuaia,Toilet lamah a awm anih ringin ka va en a, a lo awm chuang lo...ka call nghal a, a la pick thei miah lo zui,a harh anga, a zak lutuk a haw ta daih a ni ngei ang.
Jordana Hotel ka thlen in dar 9 leh a chanve a la ri lo deuh a, Sawmtei a lo la thleng lo hlauh bawk.Pawn lam Motor dahnaah khan Jordan- a car ka hmu lo a, a la kal lo a ni ngei ang. Ka hmu chak lo em em maia, nimina a thawmhnaw min leisak kha ka la ha ta zel zuia, atthlak takin ka thwmhnaw lah kha a bath Room ah ka kalsan bawk si,nizante khan min lo biak beiseina ka nei ru tlat a, mahse, min be hauh lo va, min be tur a ka beisei ngawt pawh kha mawl ka inti leh hnuhnawh zawk,engvang tehlul in nge min rawn biak ang ni?sawi dun tur kan nei pawh a ni lo va, zankhat lek min tanpui avang khan lo beisei san vak chi a ni hauh lo.
“Ehe..i dam tawh maw?” Sawmtei’n a lo thlen veleh min rawn ti a, ka hawi bo deuh titih,ka damlo der si lo..
“Eng maw i sawi?” mawl hmel zet hian ka ti a, a nui a,ka bulah a rawn thu a..
“Nimin khan i dam that loh vangin hna i rawn kal thei lo tih Jordan-a khan min hrilh a, ka beisei aiin i lo kal leh hma a..” atih chuan ka nui ringawt..
“Oh...nia, mahse, ka zia leh tawh..”ka ti bah nak.
“Hmanzan kha i chhungte lakah buaina i tawk em?,kan pa khan a ngaihtuah deuh che a..’ atih leh chuan thilawmzia Rindika hnen atangin a hre tawh tih ka hre thei mai bawk.
“Aih, engmah buaina a awm lo,mahse, enteh, thil pakhat, In luah tur ka mamawh tawp a..ih...aaa,ka sawi dawn nge dawn lo ka hre lo..” ringngam leh chiah si lo hian ka ti sep a,ka sawi loh pawhin a pasal hnen atangin eng eng emaw chu a hriat ka ring tho. Ka kut a rawn vuan a..
“I rilru a nawm hunah min hrilh dawnnia, bakah i sawi ngai lo in i chanchin hi ka hre teuh alawm” min lainat hmel taka min en chungin a ti a. Ka dinhmun hrehawm lutuk min hriatpuia min khawngaih tih ka hmuh chuan ka mittui a hnai kuar mai..Mahse, pangngai tak hian,
‘Nia, engtin nge i hriat ka zawt dawn lo che In chu ka mamawk tak tak..” ka ti leh a, a ngawi deuh vang vang a,
“Kan inhnuai hi an siam mek a, i awm duh chuan i awm theih ka ring. Mhse, karkhat vel nghah a la ngai ang,ka nu te ka lo be dawn em ni? ” ati chiah chu ka tah nuih a .A Sawina tur hmun takah ka sawi tih a chiang...
“Awiii, ka lawm viau ang,min lo biaksak hram rawh” ka ti sawk sawk.
“Um, keimahni In lam zawk ania, a hnuai ber ania maw, a zau loh bakah a thim deuh bawk a,a nuam fahran lo maithei ania, mahse, i duh chuan ka dah tir ang..” ati leh a, ka thawveng nghal hawk mai..
Dawhkan chunga interocom a a rawn ri thut a, kan phu dun zawk bawk, kan nui dun leh rih a, nuihza insum tak hian a ban a,
“Hello....” atih chuan a aw ah pawh a nuih zat zia a la thup hleithei lo tih a hriat theih..
“Um, ka lo kal tir ang,a lo thleng tawh e..’ ati a, a dah a, min rawn en a.
“Abby, khalai a File dum kha Jordan-a va pe lawk mai ta che,ee, Office kil lam tukverh ni lo a Curtain awmah khan a Secret Room kalna a awm ang, tah zawk khan i lut tlang dawn nia” ati a, ka hre tawh tih a hre hauh lo...nizan hmasa ka riak a, Jordan-a nen sex kan hmang tep tih hria se chuan a thidang thei hial ang..
Kawngkhar ka kik a, lut turin min rawn ti a,ka luh rual a ka thil hmuh erawh chuan min ti ding chawt ma. Khumah a lo awm a, a kawng thleng puan in a khuh a, chunglam a ruak vek thung.
“File ka lo keng a...” zam angreng tak hian ka ti a.
“Aw, ka lawm e” tha takin a ti a, a awkiah chuan nelawmna engmah a awm lo. Boss in a hnuai a thawk a biakdan tur dik tak in min bia a ni ber.
Ka va pek chuan a lo ban ve mai a. A pawimawh viau ni tur a ni, a keu nghal mawlh mawlh mai.
BathRoom kawngkhar inhawng ri rak a ka hriat rualin rang takin ka hawi phei a, ka beisei loh lutuk in Poppy a rawn chhuaka, keimah ang bawk khan Jordan-a Kamiz a ha ve tho..Nui sang hian min rawn en a,
“Good morning,I va hma ve...” a awki hniam leh nalh takin thawp sat hian a rawn ti a, chhan let na chang pawh ka hre lo..
Chapter – 9
A aw a thian kharh a,
“Good Morning...” ka ti let vat.
“Abby, kal thei tawh ania. Mamawh ka neih belh chuan ka rawn sawi ang” Jordan-an a la rawn ti zuia,chhungrilah ka sawi thiam theih si loh hian ka na deuh chiam a ni ber.
“Aw le.” tiin rang takin kawngkhar ka pan nghal rawk rawk mai.Jordan-a Office-ah ka ding leh rih a, ka theihtawpin boruak ka hip a, ka mitthla a cham kumkhua tur thil kha engtin nge ka tih bo ang ka hre lo?,kei nen khan sex kan hmang lo chauh a, Poppy nen kha chuan an hmang ngeiin ka ring, an hmang lo tura lo ngaih chu a atthlak viau zawk ang. Hmeichhe sulhnu a awm loh em avangin hmeichhia a hruai ngai lo emaw ka lo ti kha mawl ka inti hluah hluah maia. Mahse, Ka thawmhnaw kha ka la hauh lo tih ka ngaihtuah a,a hmu ang nge Jordan-an ka kal hnu khan a paih bo zawk ang ka hre lo le. Ka bialpa pawh a ni lo va, a hnuaia thawk ka nih vangin puih ka ngaihnaah min pui a, ka awmdanin a zir loh em avangin mawi lo takin kan khawsa mai a ni a. Nidangah khatiang thleng tawh lo tura ka inven angai hle tih ka hria.
“A lo la mu pek em ni?” Sawmtei’n a lo ti thuai a, ka bu nghat ringawt. Chair ah ka thu a, ka hma a Computer monitor ka en renga, thinrim tur ka ni lo tih ka inhriatchian vei nen ka tawt up up a, ka chhungril a na vung vung bawk.
“Abby...thil dik lo a awm em?” tih pahin ka hmai bulah a kut a rawn zap a.
“Aih, awm lo e, keihi ka nuam chiah lo chu a ni e” ka ti ta nghawt. Mahse, ka nuam chiah lo tho a, chhuanlam atan hman mai a remchang riau..
“Um, anih kha, i dang vek alawm, hmuh thiang lo hmu ang mai” ati halh a, a table Drawer a pawt hawng a, a hai ri rak rak a, a zawn a hmu tih hriat zet hian a khar leh khap a, ka hma ah Damdawi a rawn dah zui nghal zat bawk.
“Angai lo, ka zia leh mai ang, Vawiin Boss hi eng nge a programme tlangpui?” pangngai thei ang ber hian ka ti a,ka tha a ni tih lan tir ka tum lui tlat.
“Ei phawt teh, hna lam chu kan sawi dawn nia” luhlul zet hian a ti a, ka ei hma chuan min tur lui dawn tho tih a hmel ah alang a, tumruh hmel zet hian a hmui a pet fan mai.
“Engvakmah tihtur a nei lo ang, mahse, tlai lamah chuan an In ah chaw kan ei dawn a, chumi hma chuan Kan pa nen kalna tur an nei maithei bawk, tihtur duan lawk hi chu Meeting tih vel hi a ni tlangpui a, Club lam hi chu sawi ngai lo ni se...” ka ei hnuah a ti a, a sawi zawm leh teuh a, ngaithla awm takin awm mah ila ka hre mumal der lo.
Chhun chawlh laiin Hotel a pawisa che vel leh cash memo chi hrang hrang kan en fel a, a chanve vel lai kan zo hmana. Jordan-a te erawh an lo la chhuak ta lo fo. Lunch ei turin inhnuai lam kan pan a,Sawmtei a dan pangngai in a tawng siam siam a, Lift hi ka ngaina lem lo viaua, hmanhmawh thil anih loh chuan Step ah ka kal mai thin a, keimah ang chiahin Sawmtei pawh a lo ni ve tho maia, a tihzia phian.
“Abby....” tia ka hming a min ko ri ka hriat chuan tu nge min ko ka hriat loh avangin ka hawi kual a, ka beisei loh takin Zobiaka a lo ni a, helaiah hmuh ka inring lo chiang khawp mai.
“Hey,eng nge i lo tih dawn?” ka ti vat, a nur deuh nung a, ka zawhna chuan a ti lawm fahran lo anih hmela,thildang vang a ni ve thei tho bawk.
“Ka rawn hruai dawn che mawle aw…hey....Sawmte, i tha maw?” a ti zui nghal zat a, an lo inhre kual tham zel chu anih hi maw..
“Um,tha lawm,nangni pahnih hi eng nge in awmzia?ka rin hi a dik em?” ati hluaia, mize frank lutuk hi ka lawm thin..
“Aih, dik lo, ka thianpa chhaw tak anih hi..’ nui chungin ka ti a, Zobiaka erawh a tum hmuk thung..a mood a fuh lo ngang anih hmel e.
“Ka ti tak tak, Abby, thil eng nge maw tih tur a awm a,min kalpui turin ka duh che a” tih pahin a rawn thu ve ta nge nge a.
“Ka hna ka la bang hleinem, bakah eng nge tihtur ni reng reng a?” ka ti a.
“Naute kha....”atih chuan a buaina ka hrechhuaka, amahin Naute nu a hmu ngam lo anih hmel,Tlangval puitling pui tawh si, tlaw lutuk mai a..
“Ok, nidawn tak,mahse, zanah kal zawk ila..” ka tih laiin kan eitur chah a lo thleng a,Zobiaka pawn a dang a chah belh ve nghal bawk.
“Zobiak,nang hi nupui i nei tih pawh ka lo hre hleinem” Sawmtei’n a ti deuh tawng.
“Aih, nei lo e..” rang lutuk hian a ti a, a chhang rang lutuk chu ka nui a.
“Ka hrethiam lo,aaa, ka buaina a ni lo..” Sawmtei'n mak ti tak hian a ti leh rih a..
“Nakinah ka hrilhfiah ang che” tih pahin Zobiaka ka melh ralh..
Kan Pathumin ngawirengin kan ei a,Zobiaka hmel hlim lo lutuk chu ka hmuh hmaih hauh lo,eng nge a ngaihtuah ka hre chiah lo mah ila Nupui nei turin a la inpeih lo tih chiang takin ka hria..
“Zobiak..”Poppy aw hian a rawn tih chuan rang fe hian ka hawi chhuak a, ka rin ang chiahin Jordan-a a bulah a lo ding ve a, a hmel nelawm lo lutuk chu ka melh zawk a, ka hawisawn lehnghal vat bawk.
“Ehe, Poppy..i dam em?” Zobiaka’n a ti thuai a, a that thu a sawi lai chuan ka rilru ah a tha mah mah tih ka lo ngaihtuah hmanhmawn.
“Chawei kha i rawn theihnghilh ange” Zobiaka hnenah Jordan-an a ti a, Sawmtei khan chaw an ei dawn tih a sawi bawk a, eng thil tak tikhawm dawn ni maw?
“Aih, theihnghilh nang..Mahse, Mam, tunah hian Abby hi reilote chhuahpui lawk ka duh a, in buai angem?” ati zuizata.
“Buai lo turah ngai ang, a rawn thawh ve hma pawhin Sawmtei'n a ti vek thei thin a, buaina a awm lo ang. Mahse, nidangah chuan kan buai loh pawn office kal hun lai chuan hna ka ngaipawimawh tih i hriat kha” ati deuh duaha, a chhan danah awki ngeiawm engmah hmang lo mah se ka tangkai lutuk lo tih a tilang kha ka hai bik lo va, ka tlawm vang vang maia, midang tan chuan unau titi satliah anni a, chutiang zawngin an ngai ve kher lo vang.
“Aw le, Tlaiah pawh ka rawn hruai ang aw” a ti leh zel chu phawk tak hian ka en a.
“Um, i thu thu,mahse, chhungkua leh thian hnai te tih ania, Staff dang an tel dawn lo a, nuam a ti angem?" a ti leh takah chuan Sawmtei’n ka kut a rawn vuan a, Jordan-a tawngkam na lutuk chu a lawm vak lo tih ka hre thei,chuvang takin min hnem nan ka kut a rawn vuan tih ka hai lo..
“Jordan....Abby chauh lo pawh Staff kan ni ve tho a,kan lo kal dawn tho alawm” nui chung hian Sawmtei'n a ti a, boruak tih daih nan a sawi mai tih ka hai chuang lo..
“A tha lawm, kal ila..” tih pahin duat hmel tak hian Poppy a en a, ka lo na ru vawng vawng maia,engvang mah in na tur ka ka nih loh zia leh ka nihna min hriatchiantir zia ka ngaihtuah hian hei aia dinhmun tha zawka din ka chak vawng vawng maia, tun atang chuan ka hna bakah chuan ka mimal buaina chauh ngaihtuah ka tum tawh ang.
“Pawiti suh, Jordan-a hi chu a tawngkam hi a ngeiawm thut thin a..” Sawmtei’n an kal veleh a ti a.
“Dik chiah,mahse, a chhungril hi a pawnlam nen a in ang lo, min hau fo mah se kan cousin ho ah chuan ka ngaina ber” Zobiaka’n a lo ti ve thuai, nih pawh a ni mahna le...a duhna ah chuan mi fel ber,mahse, mi dang te hmuhsit ti na tak leh mi hausa dangte ang tho a chapo ve mai tho a lo ni.
“A ho em mai, engmah sawi dik loh a nei hleinem,kal tawh zawk ila” ka ti awlsam et.
“Nia, pawi miah lo...kan kal dawn aw” Sawmtei hnenah a ti a, a bu nghat a, a hmelah chuan rilru nuam zat lo hmel a la lang cheu, Zobiaka en lo in min en ran a.
“Abby, i tha tiraw?” a ti ta nge nge,nui chungin ka en a.
“Engmah that lohna tur a hleinem,kan kal phawt ang..” ka tih chuan a bu nghat a, tlem chuan a thawveng hmel ta deuh.
Zobiaka nen Kan inphur chhuak a, kan kalna tur ka zawh lah chuan a sawi duh der lo. Falkland- ah kan peng a,Building lian lutuk lo, Restaurant tih hriat tak kawtah hian a ding ta chat.
“Hetah hian maw?” mak ti deuh hian ka ti a, ka chhuk nghala.
“Lut ang, a chhungah min nghak a, a thiannu nen an nia” a ti ringawta, a zam hmel phian bawk.
“Um, mahse, eng nge ka lo sawi ve ang?” ka ti leh rih a, a helmet a khai a. “Engmah, i lo thu ngawi reng ang, ka bialnu emaw a tih che pawn ka bialnu ang in i awm ang” tih leh nuih a ruala. “Ka ti tak tak,min tanpui ka ngai alawm,i tah der pawh angai maithei ania” ka chhan hmain a ti leh a, ka nui ve hak mai.
A chhung kan luh chuan pawnlam landan aiin a changkang daih maia,hetiang hmun falah Restaurant changkang tak a lo awm tih ka hre miah lo,mi hausa fa te leh thian ho nun hman nan duhthusam a ni ngei ang.
“Sawta mi saw” zawite hian a rawn ti a, bangkil lam deuh a hmeichhe pahnih thu chu a kawk ru zauh bawk,a tu zawk nge ka hre mai lo,an khawsa dun ka hmuh khan a thim lutuk a, a hmel ka hmu thei lo anih kha..
“Min lo nghak rei em?” ka thutna tur pawh chhuah pahin a ti a,min beisei tel lem lo tih an pahnih hmelah a lang thei mai bawk.
“Aih, rei vak lo, nangmahin i lo kal dawn maw ka ti a..” a lian zawk chuan a ti ta chiah, pakhat zawk erawh chuan a no a en ngar mai..
“Nia, nangpawn i rawn kal pui tho a” awlsam fe hian Zobiaka'n a ti a.
“Kei te chu a dang alawm, ka thiannu ber ania” ati leh hlak.
“Kan in ang anih chu, Abby pawh hi ka tan a mi pawimawh ber a ni ve tho” ati ve ta hmak maia..ka lo ip chawih thung.
“Engpawh nise, hei hi Abby ania, chuan ,Abby, hei hi Rini anih hi. Chuan, vawiin a hmu ve la ka tih tak zawk chu hei zawk hi..Sangtei” tih pahin kan thlen tirh atanga la tawng ve miah lo zawk lamah chuan a lu a thle zauh a. Chu nu chu a hmel chhiat loh bakah a vun a nung sar a, make-up a hmang nasa vak lo bawk.Hnuailam a en deuh reng bawk nen a mizia awm ka ngaihtuah thiam mai lo va, khatiang a Party na hmun sir a lo chetsualpui mai theih anih avang khan ka hmu nikhua vak lo ve ngawt. Mahse,eng nge ka nih bik?, Jordan-a khan min tilui se chuan eng ka ang kher lo vang. Ani pawh hian Zobiaka a duh em vangin a tih ang angin a awm pawh animaithei, midang dinhmuna din ve loh chuan ngaihdan lo siam zung zung hi a fuh lo ti zawngin ka rilru ka siam ta daih.
“Engtia chinfel nge i tum?” Rini zawk chuan a ti leh nghat a. An han inbiak vel danah chuan an inmil lo nghal em em hian ka lo hria.
“Kan innei mai ang chu..” Zobiaka'n ati awlsam et..ka lo nui ru var var maia, Mipa a ni a, a bialnu hlui emaw a bialnu ni miah lo pawh nise a fa paitu hmeichhia a ni a, a kalsan tur a ni lo bur,a nuam chin chiah a Mipa nih tum te hi ka ngaihsan loh ber anni ve tlat.
“Sawi chu a awlsam alawm..” ka rin loh takin a ti leh a, hmeichhe mak tak a ni. Mipa zawkin neih mai a tum chuan lawm tak a pawm mai tur a ni in ka lo hre ve ngawt.
“Ka fa anih thu min hrilh a, ka pawm mai, a lo ni chiah lo anih pawn pawi ka ti lo,ka telve a, tlanchhiat ka tum lo ,keimah lamah chuan harsatna a awm lo..” inringtawk tak hian a ti leh a,Mipa tak tak angin a tawng ve ta. Mahse, engvanga min hruai tel kher nge anih ka hre ta lo,ka tawng ve pawh a phal chuang si lo.Ka tel lo pawn a sawifel hneh em em tho si..
“I fa chu ani ngei ,mahse Nupa nih dawn chuan pathum ni lo in Pahnih angai alawm” Rini zawkin a tih leh chuan a sawi awmzia ka man chiah lo va, ka thlek deuh ha maia. Zobiaka bialnu zawk lah a tawng thei lo emaw tihturin a ngawi tlat bawk si
“I sawi tum ka man lo..” Zobiaka'n a ti a, a hrethiam bik lo anih hmel..
“Nupa inkarah hian midang an telve chuan....” a ti leh chiah chu Zobiaka a ding ta hluai,min rawn en a.
“Kal ang , ka thutlukna ka sawi a, in pawm loh chuan in thu thu ,kal ang Abby” tih leh kal a rual ta daih maia..A chet dan tehthut chuan min ti hamhaih lutuk a, zui mai nachang pawh ka hre lo, kan thutna piah a thu te chuan min rawn en zak zak mai.
Ka zui loh tih hria niawm tak hian a dinga, min rawn en a,"Abby" a rawn ti leh chu rang zet in ka tho a, Sangtei ka en a, a kun tlat renga, a tap pawh a ni mahna.
“Sangte, a lo bia ang che tih ka chiang ania. ,Mahse, nangmah ngeiin huaisen takin lo hmachhawn ang che aw” ka ti ta ngawt, engvang a sawi ngawt nge ka nih ka inhre lo, mahse, ka chhungrilah Zobiaka hian a thlahthlam hauh lo ang tih ka chiang tlat si atin ni.
Pawn ka thlen chuan Bike ah a lo thu a, tlan maithei turin a lo start vek tawh.
“Eng ngatinge khati khan i tih a?sawifel pui ta che” lawn lo in ka ti leh rih a, a Full face khum chuan a hmel min hmuhtir thei lo a, eng nge a ngaihtuah pawh ka hre lo..
“Lawn mai mai teh” a ti hlur mai.
“I va mak, Zobiak, let leh rawh” ka ti leh a, ka mitthla ah Sangtei mize zawi dem mai kha a lo lang a, Zobiaka kal chhuak tur mangan hmel zet a a en kha ka hmuh hmaih hauh lo.
“Ka hawsan dawn che mi?, engmah lo sawi ve suh ka tih che kha,enge i sawi talh a? ..” ati leh hlur tho
Hotelah min dah turin ka ti a, mahse, a la hma deuh bawk nen thawmhnaw lei ka mamawh tih ka ngaihtuah a, Bazar a min dah turin ka ti leh ta zawk. Kan In-ah kal in thawmhnaw pawh lak va tum mah ila Grace-i a haw duh leh dawn chuang lo tih ka hria, chu ai chuan ka lak theih hma a ka hak theih mai tur a man tlawm deuh pawh ka mamawh zawk. Staff dang zawng zawng khan uniform an ha vek a, ka hak ve dawn leh dawn loh ka zawh khan Sawmtei in a ngai lo tih min hrilh a, ngai zawk se ka tih tehlul nen.
“Tah khan ding la,kal kual na tur ka nei nual a” ka ti a, a ding ve mai bawk,a helmet a phelh a.
“Chawei tur khan i kal dawn nge dawn lo?” ati a, rang zetin ka lu ka thing a, khatiang teh erh a min tawngkhum hnu kha chuan kal tumna ka nei lo, an In ka kal tum khan tha takin min dawngsawng a, mahse, a, duh ang ka tihpui tak loh hnu kha chuan staff satliah, amah pawh be mai mai lo tur ka nih zia min hriattir nawn sek ta mai anih kha.. "I kal dawn lo maw? Mama bulah ka sawi vek kha" a ti leh talh a,
“Aih, kal lo ang, Hotel ah ka let leh ang, eee, Sawmtei Pa te Inhnuaiah ka awm theih hmel a,ka luah luh hunah min bazarpui ka ngai leh dawn ania” ka ti a ,a nui a..
“A va tha ve,i luah hmain bazar zawk ila a tha ang” ati ve mai bawk,ka rilruah Sangtei bawk a lo lang a.
“Enteh, Sangtei kha....” ka ti hman chauha, helmet a khum leh nghal daiha,ka tawnglai ka tawp chawt bawk.
“Kal tawh rawh, zanah ka lo leng ang” a ti daih. Sangtei chungchang sawi a duh lo tih ka hrethiam.
Thawmhnaw ka lei a,underwear ka lei nghal bawk.Pawisa ka nei lutuk lo bawk nen hetiang lei angai ta hi ka thinur teuh mai,engtin nge hetiang em em hian ka chungah Pitei te Nufa hi an sual theih ka ngaihtuah thiam lo zawk hial. Putea damlaia kan chenho na zawng zawng atang pawh khan chhungkua ang tak tak kan ni hmanah ka ngaia.Kum hnih khat lek a ni hek lo. Mahse, A boral atanga kum pawh tling loah min han enhrang chiam ringawt mai hi a mak thlawt..
Ka Room kawngkhar kik thawm in min ti harh a, ka khap sak sak mai. Ka Bazar haw veleh hnaa let tawh loin ka riahna hotelah ka let a, ka inbual hnuah ka mu zal mai mai kha ka lo muhil tlang daih anih hmel. Light ka On bawk si lo nen a thim khup mai. Kawngkhar an rawn kik nawn leh a, Hotel ahnathawk an nih ka ring chiah lo va, Zobiaka bawk anih leh ring in ka tho a, Light ka on hmasaa, kawngkhar lah chu a kik a kik lo in an rawn chum a ni ber tawh a, eng nge thil hmanhmawhthlak nge awm ta ni?
“Ka rawn hawng dawn e" tih leh hawn ka rual a, mahse, pawn a lo ding ka hmuh rualin ka ding khawng nghal lah mai. Zobiaka emaw ka hmuh dawn ka tih laiin Jordan-a zawk a lo ni teh tlat. Engtin nge hetah ka awm tih a hriat pawh ka hre lo. Sawmtei hnenah ka sawi lo tih ka chianga, Zobiaka lah chuan a hrilh ka ring si lo.
“I beisei loh zawk min hmu a va ang ve” ngeiawm angreng tak hian a ti a.
“Tumah ka beisei hran lo,Mahse,nang kher chu ka beisei lo lehzual che” ka ti ve nghat. A Hotel a ni lo a, tunah chuan ka tan Boss a ni rih lo, hnathawhna hmun ka thlen hunah chiah ka boss a ni.
“I hmelah khan a lang reng” a ti leh hmuk a. “Eng nge i duh?” ka ti let ve thung.
“Min luhtir dawn nge keimah in ka lut dawn?” a ti leh daiha, a ha var rual that langin a la nui zui. Ka inkuangkuaha,
“Mamawh i nei anih loh chuan lut turin sawm che ka tum lo. Hna thil hmanhmawhthlak anih chuan thuhran ni se..” ka ti hmaka, a ngawih tak tlat avangin khar tumin ka pawt a,mahse,hneh zetin a rawn pawt kau a, a rawn lut fel chu a ni der..
“Enge a? helai hi i hotel a ni lo ania. Ka room luah lai ania, I duh duhin i khawsa thei lo” ka khur dar dar mai, ka hlau lo va, mahse, ani nen a helai a hun hman dun hi ka duh lo.
“Ka Hotel a ni tih ka sawi pawh ka lo hre lo ‘ ngai ho tak hian a ti a. Khumah a thu zui hmak.
“Ka Room a ni a, phalna la lo in i lo lut a, ka report dawn che” ka tih laia a lo nui ka hmuh rualin ka tawp leh rih.
“Han tum chhin la...” tih pahin a vang zawngin a mu zui nghal a, a khawsak duhdan mak em em mai chuan min ti hrilhhai thlawt. Ka Boss anih angin zah tur ka ni, hna chungchang ni lo mah se zah tak a lo dawngsawng tur ka ni ngei mai, mahse,tuna a rawn khawsak dan nen hi chuan chutiang a lo en chu har tak a ni.
A rawn inbengkanga,
“Engvangin nge In ah i lo kal loh?” ring vak lo hian a ti a, chhang loin ka din ngaiin ka ding ngar mai..
“Mawh?,engvangin nge Zobiaka rual khan i lo kal loh?” a ti nawn leh a, Poppy awm lai a min tih dan kha a theihnghilh a ni chek ang..
“Staff te nen ni lo in chhungkua leh thian hnai te...khatah khan ka telve lo a” tiin a tawngkam ngai chiah ka sawi chhuak chu a thaw deuh huaia.
“Chuti anih chuan Staff satliah ni lo turin min nei mai la..chhungkua ami i ni tihna animai” ka rin loh tak hian a ti a, rawn tho chhuak zuia, a thil sawi chu mak ka ti thlawt, a fiamthu a ni emaw nilo emaw nei turin min sawm miau a, mak tih loh ngaihna a awm lo.
“Chhuak rawh...” ka ti fiak that mai. Ka in ngaihtuah nasat zawh poh leh min hmusit ka tihna a zual ting a ni mai...min rawn pan a, ka tawh hnung hrat thung,engtin nge ka nun hi infiamnan a hman theih tih chiah ka ngaihtuah, engmah nei lo leh pan tur pawh hre lo khawp a baihvai pawh ni ila hetiang mai mai a min ti kual turin dikna a nei lo...
A rawn kal hnai zel a, ka tawlh ve zel thung, thutthlengin min lo dan takah chuan tawlh leh ngaihna a awm tawh lo, min rawn din hnaih chu hlau lo niawm takin a mit ah tak ka en ran maia..diktak chuan ka chhungril a khur a, ka thawpik hluah hluah bawk..
“Ngaithla rawh, min neih i duh tih i sawi hma chu tah hian ka awm dawna, ka chhuak lo vang” tumruh tih hriat tak hian a ti a, ka biangah a rawn dawm thuta,thleksawn sawk pahin a kut painthlaksak ka tum a. Mahse, a ban lehlamin hneh zetin ka kawngah a rawn kuah a, amah si chetin min pawt bet rawk.
Ka eu vaka,
“Min thlah teh" ka tih chuan zawi te hian a nui a.
“Ka thlah veleh che min thlak lo ang tih ka chiang tlat lo. I mit meng nalh zetah hian min tihnat duhna ka hmu tlat” zawi fiah tak hian a ti a,a sawi dik chiah, ben pawp ka chak. A mitah tak ka en a.
“Min fiam kual hi bansan zawk rawh,neih nei lo leh i hnuaia thawk mai mah ni ila hetiang a tihtur ka ni lo,i rin ang khan pawisa vang vanga duh duha tih theih ka ni lo ania” ka ti ram hmaka,min hmuh dan tenawm zet kha ka ngaihtuah zawng pawn ka thinrim ngawih ngawih. A thle zauha, min kuahna lah chu a thlahdul duh reng reng lo.
“Chutiang chuan ngai che ila chuan tunah hian ka lo kal lo ang, ka mamawh phawt chuan hmeichhe mutpui mai tur an tam ang,mahse, ka mamawh lo,Nupui ka mamawh a,mutpui satliah tur ni lo in” nghet charh hian a ti leh a,a sawi dan a thutak em em zui.
“Ka nei duh lo che” ka ti ve hmiah.
“Chuti anih chuan hetah ka rawn awm ve angai anih chu” a ti a, min thlah thut a, a kalsawn nghala.
“Kal mai rawh, min tibuai tawh suh, hna min pe a, ka lawm lutuk,mahse, i tel lo pawh hian buaina ka ngah tawk ania.Nupui i duh anih chuan Poppy i i nei thei reng alawm,Nupui tha tak a ni ngei anga, in inhmeh em em bawk” ka ti leh duaha,chhuak se ka ti ngawih ngawiha, thil thleng mek, awihawm loh em em hi chiang taka ngaihtuah ka duh.
“Poppy..hreptak hian...ani ni lo in nangmah alawm neih ka duh che,Inneihna hi infiamna a ni hleinem. Min neih chuan Zobiaka pek let nawmna ka pe ang che.Pawisa..engkim..” a ti leh chu
Rapthlak ti em em hian ka en a, mihring ni loin, bungrua duh duha leikual theih hmuhin min hmu niin ka hria a. Zobiaka nena duh duha khawsa dun tura min ngai phei hi chuan mi ti thinrim pha lo zawk.
Chapter – 10
Ka haw hluah hluah,ka theihtawp a rumin ka en a, ani lah tihsual nei lo niawm fahran hian a awm ngaiin a awm a, a landanah pawitihna nei hmel a pu eih lo..
“Ka nei duh lo che,nei ngawt tur chein i bialnu ka ni lo. I hausak vangin hmeochhia zawng zawngin kan duh huam huam che beisei suh" ka ti ta neka, ani lah chuan a mithmul a ti sang awka.
“Inngaizawng zawng zawng an innei kher lo, nupa zawng zawng hi inngaizawng hmasaa innei anni bawk lo va. Chuan, tunah i chhanna ka mamawh lo. Lo inngaihtuah phawt rawh. Mahse, min nei ngei tur in rilru siam ang che,ka mamawh ang chiah che hian min mamawh ve tho tih ka hria” confi tak hian a ti a, a rawn kal hnai leh a, ka petek nghal dawrh thunga, ngeiawm taka nui chungin min rawn hnaih chilh nghal ruak bawk..
“Min si hauh suh ang che..” ka tih laiin min rawn man bet a, ka awmah a kut a rawn nghat a..Ka tal tur min dawm beta,
“Abby,i lungphu ri hi i ngaithla ngai em? I lungphu a phut rual hian kei lungphu hi awmze neiin a phu ve a, chu chu i hriatthiam ve hun chuan min nei tur a ka nawrlui che hi lawmthu min la hrilh ang” mahni inrintawkna a khat hian a ti a, a hmaa nei tura min nawrlui ang khan a ni ta lo chuan awmdan tur min ti hre mai lo. Ka khabeah a rawn dawm a, ka maimitchhin ngawt loh chuan a hmel hmu lo a awm ngaihna a awm lo...
“Khawngaihin kal tawh rawh, ka chau hluah hluah..” ka ti ta thlawt, mahni a awm a in ngaihtuah fim ka mamawh lutuk.
“Ok, ka kal ang, mahse, Zobiaka bulah awm tawh suh, ka nau nimahse ka duh ka neihna a dal anih chuan ka dim dawn hauh lo ania” ati leh a, hnial buai tur in ka chakna neih te an thlawk bo zo tawh.
Muhil thei lo in ka let ka leta, sana ka en chuan khawvar hun a hnai thuak tawh. Ka ngaihtuah nasat poh leh ka buai zual ting mai hian ka hriaa, ,engvangin nge inneih a duh ngawt ka hre lo a, a duh anih phawt chuan a nupui nih chak an tam lutuk ang tih lah ka chiang si. Grace-i ngei pawn Jordan-a a duh luat vang a ka chungah sual chhuah belh a ni a,Grace-i pawh nei ang hmiang. Mahse, midang nen an innei tur a ka ngaihtuah zawng ringawt pawn ka ui tho si, a sawi ang ngei khan nei ta ila ka tan chuan engkim a awlsam ngawt ang, sum mai bakah zahawmna te leh ka mamawh chu ka nei vek ang tih ka chiang, mahse, hmangaihna tel lo a Nupa nih eng nge a tulna awm ang?, Dam reng si in ka thihna tur ka hial pawh a ni thei..
“Abby, i phone kha a ri lo maw?” Sawmtei’n a rawn ti a, ka hnathawh lam ngawt ka ngaihtuah avangin a rik leh rik loh pawh ka lo hre lo, nizan ka muthilh miah loh vang khan ka chau ru viau bawk.
Ka dawhkan sira ka Phone dah chu ka la a, a lo ri ngei mai,ka silent avangin ka hre lo mai mai zawk animaithei,min rawn call tu ka hmuh rualin ka mengphawk vak a.
“Hello..” ka ti nghal zat.
“Abigail..engtikah nge i thawmhnaw i rawn lak dawn?” Grace-in A a rawn ti tawng. thawven hmel lutuk chuan ka mood fuh lo sa a rawn belhchhah a.
“In ah in awm tawh em ni?” ka ti nghat, Sawmtei ka melh zauh a, a Computer Monitor lam ngawt a en a, kan inbiakna lam a ngaihven hmel lo.
“Ka awm lo, i lo kal duh chuan ka awm ang, ka nu naktukah a lo haw dawn a, a lo haw hmain lo la chhuak fel rawh” ati leh hmak hmak a,hman ata tawh annu fa hian an chapo em em mai hi mak ka ti thin, eng hi nge an han chapo pui hi ka hre lo...mi neih aia tha engmah an nei pawh a ni der si lo.In thlengin Putea ta vek a ni a. An hminga an dah tak vang maia in nei chauh an la ni zui.
“Tlaiah hna banah ka lo kal ang”ka ti hmak,tlem chuan ka rilru a buai ve deuh, ka naupanlai atanga ka lo khawsak tawhna niin ka neih ve zawng zawng an awm vek, chuti maia awlsam a lak chhuah chi pawh a ni lo,la chhuak tehreng pawh ni ila khawiah nge ka dah ang ka hre lo.
“A tha, ka lo awm ang,la chhuak zo vek ang che” a rawn ti leh hmarh hmarha, ka chhan let hmain a dah daih bawk. Ka insehruh a, Engtik ni ah emaw hi chuan min la mamawh ve ngei ang.
“Abby...ka hriat ve chi a ni em?” Sawmtei'n tim deuh tak hian a ti a, a ngaihven lo emaw ka tih laiin a lo ngaihven ru reng anih hmel,nge ka hmelah a lang chhuak zawk pawh ka hre lo, ka mimal buaina hi hna ka thawh lai chuan theihnghilh hram hram ka duh thina, reilote hna ka la thawk chung hian ka tumna te a hlawhchham anih ka ring ta, ka buaina hi keimah mai chuan ka chingfel zo lo a ni ber e.
“Engtin nge ka sawi ang ka hre lo..” ka pen hmawr seh chungin ka ti a, sawi tan dan tur ka hre lo takzet, kan chhungkaw chanchin tlangpui chu a hria tih ka hre tho a, mahse midang bula han sawi mai hi harsa ka ti thin..
“A pawilo,i chauh hmel bawk sia, i duh leh lunch ei phawt ila i haw mai dawnnia” a ti leh a, ka bu nghat ringawt, haw chakna pawh ka nei chuang lo..
“Eeee, I pa te kha min lo biaksak ta em?” ka ti a, a hmel a buai deuh nak mai, a theihnghilh anih hmel..
“Sorry, ka theihnghilh chiang lutuk, tunah ka’n be nghal ang” ati a, a Phone a la kang a, a khawih nghal mawlh mawlh.
Toiletah ka kalsan a, reife ka thu deuh vang vang a, ka lu a hai a, chaw ka ei tha bawk si lo, ka mu mumal bawk lo nen ka taksa in a tuar tih ka hai lo,ka buaina mai pawh ka tan a rih tehlul nen Jordan-a lah in buaina dang min thlensak reng bawk si..ka hmai ka hup a...keimah ka inkhawngaih vang a ka mittui rawn luang chu ka biangah a luanga, a lum pap mai.
“Abby...i tha em?”Sawmtei aw hian a rawn ti a,ka chhang mai dawn a ka aw a chhuak thei lo.ka khuh kharh a, a rawn kik a, min rawn au leh bawk..ka mit ka nuai hul sawk sawk a, a ngaih a tha lo dawn tih ka hria.
“Aw, ka tha e” tih pahin kawngkhar ka nem hawng a, mangan hmel taka a lo ding chu ka nuih lui sang bawk,a thaw deuh huai ka hmuh chuan Kimtei bawk ka rilruah a lo lang a, awm ve se chuan tunah hian a bulah ka tap mai tur, Sawmtei hi ka ngaina ngei, mahse, a bul a tap tur em chuan ala rei lo lulai lutuk si...
“I chauh hmel sia, i lo tlu reng emaw ka ti a”a ti a, ka nui ringawt. Wash room darthlalang a ka hmel lang chu ka en a, a sawi dik lo hauh lo, mihring pawh ka angin ka hre lo, thlarau ka ang mah zawk, ka dang lapa, ka mit hnuai a val kual raih bawk.
“Ka pa ka bia a, an la siam peih chiah lo a, mahse, i mamwh viau chuan a luh theih tho a ti a, i lut duh rum rum anih ka ring deuh a” ati a, a hnungah ka zui a, tlem chuan ka thawveng ta deuh, a luahman ka zawh chuan a sawi duh der lo,ka zawt lui peih ta rih lo..
“Chutia a luh mai theih dawn chuan zaninah ka riah luh mai angaih ka ring, diktak chuan ka chhungte hian ka thawmhnaw la chhuak turin min ti a,vawiin tlaiah ka theihtawk ka va la chhuak ang a,I pa te Inah chuan ka indah luh nghal mai angai dawn a,chuan...” ka tih lai mekin kan thutna bul a Jordan-a lo ding ka hmuh avangin ka sawi tawp hmak mai...ka thilsawi a hre hman em ka hre lo va, a hriat loh ka beisei takzet.
“Lunch in ei tawh em?” dam thlup hian a lo ti a,Sawmtei en lo in min en a, nizan thil thleng kha ka ngaihtuah chhuak lo thei lo.
“Aih, ei lo,eee, Jordan,chawhnu lam hi i buai angem?” Sawmtei'n a ti a.
“Maithei,ngatinge?’ a ti a, ka chair ah ka thu a, tul miah lo mah se ka hma a Paper in chhawp ho lam ka khawih san daih..
“Abby nen hian kal na tur kan nei a, kan haw hma theih chuan ...” ati a, min en reng tih ka hriatna chuan nuam takin min awmtir thei lo.
“Um, anih chu mawle, mahse, keipawn Abby hi hruaina tur ka lo nei a..”atih takah chuan ka lo ip chawih thung.
“Abby, eng nge i ngaihdan?” a tih zawm leh a,ka hawi chhuak ta nge nge..
“Hnial che chu ka tihtur pawh a ni chuang lo va. Mahse, vawiin kher chu ka mimal thil buaipui tur ka nei a, i remtih chuan ka zui lo mai ang che” dam thlap hian ka ti a, ka beisei aiin ka aw chhuak a pangngai phian.
“Aw le, a tha lawm,Sawmte, vawiin tlai kha inpa khan a theihnghilh ange, lo hrilh nawn leh la..” ati a, a Office a pan zui a, ka en zui renga, a bawp sei zet a a pen pawk pawk chu hmuhnawm ka ti lo thei lo.
“Jordan-a hi eng nge i hmuh dan?” a rawn tih chuan ka phu zawk..
“Eng maw..ka hre lo, i zawhna awmzia zawk ania ka tih” rang fe hian ka ti a, a nui hawk hawk mai, a nuihchhan ka hre si lo, mawl hmel zet hian ka nui ve ngawt bawk.
“I hmel kha i hmu ve thei lo anih kha, ui eiru an man lai hi ka tehkhin che” tih pahin a nui leh rih a, a sawi dik ang,nalh ti zet a Jordan-a ka thlir lai kha min man chiang lutuk mah mah..
“Naaa, i ho em mai” ka ti nghat a, insum tih hriat tak hian a hmui a ti chip a, mahse, a nuihzat zia ka hmu thei tho.
“Zak duh suh, Jordan-a hi Hmeichhia tawh phawt chuan an duh viau zel ania, keipawh tiam in.” a tih takah chuan ka nui ve ringawt, a sawi dik maithei e. Mahse, hmeichhia zawng zawng tih erawh a uar deuh in ka ring thung, ngainat zawng a in ang lo a, duh zawng pawh a in ang lo, Chutihrualin Jordan-a hi chu ‘Mipa’ tih tawngkam hrilhfiahnan hian a tha ngawih ngawih..amah aia hmeltha leh pian nalh hi an tam ang, mahse, amah ti dangam tu, mi hip theihna riau leh a mi uapna na lutuk hi chu an nei tel kher lo ang.
Sawmtei’n a Pa te tlawh pah a duh bawk nen kan kal dun a, an khawsak a harsa lem lo viau mai, hausa lutuk a sawi tur chu anni lo va,mahse an mamawh chu an nei thei zelin ka ring thung. Lawm takin min lo dawngsawng a, min en pui a, ka duh ang chiahin tumah bang dan pui ka nei dawn lo zui. Gate a awm hran thlap a,mahse,a hnuai ber a ni bawk a Sawmtei sawi lawk tawh angin a thim deuh thung.Room a hranin an ping dang a, sitting room hranpa vak awm loin choka nen a inzawm vek thung, bungrua vak ka nei dawn lo a, ka thawl viau in ka ring. Chhuatah engmah an la phah lo a,ka luh hmain Carpet an lo dah leh ang tih min hrilh a,an la tifai mumal lo chungin pawi ka ti phal lo. Tui dahna ka mamawh dawn lo ringawt pawh lawmawm tak a ni. Tap an dah vek a, tanky lian zet an nei a, Inchung berah floor tin te tan Sintex an hung vek bawka,neih loh hunah in neitu te hrilh in Tanky lian a mi an Pump mai thin tih a sawi tel bawk.
“Ka kalsan mai ang che aw” Sawmtei hnenah ka ti a, a tlawh ngun vak lo a ni ang, a Nu leh Pa in an ngai em mai.
“Um,nia, ka kal khat sia, awm rih deuh ka duh,nangmahin i bungrua i la thei tak tak ang maw?” ati leh rih a, ka bu nghat a, keimaha lak ka tum lo a Zobiaka ka hruai dawn tih sawi lan kher ka duh lo mai zawk.
Taxi ka chang a, dar 4 a hnai tawh si, ka hmanhmawh loh chuan engmah ka nei dawn si lo, Zobiaka hrilh vat vat ka mamawh takzet. Aniin Bike a nei a, tlankual zung zung a awlsam dawn a, ka bungraw ho dah lut tur chuan taxi kan la mai ang chu..
“I hman em?” a pick rualin ka ti nghal tawng, a nui a..
“Hman reng turah hian min ngai lo teh, eng nge a?” a rawn ti a,
“Ka thawmhnaw la chhuak turin min ti a, chuan, In luah tur ka hmu nghal bawk a,Sawmtei te Inhnuai ber,bazarah inhmu ang” ka ti nghal zung zung mai..
“Tunah khawnge i awm a?” a rawn ti leh a,ka awmna ka sawi a, ka beisei angin Taxi ka hmu mai tlat lo, Bus stand pan turin a hla phian bawk si..
“Ka lo thleng a ni mai,i awmna piah lawkah khan ka awm, ka thianpa ka tlawh a” a tih chuan ka thaw huai mai.
A sawi ang ngeiin reiloteah a lo thleng a, Bazar lam kan pan a, In a kal hmain ka mamawh zualpui ka lei angai.
Darkar khat a liam leh meuh chuan ka mamawh zualpui chu kan lei fel a ni ta mai..ka In luah turah Taxi-in ka dah nghal veka, Zobiaka bike in a kal a, min dahpui sawk sawk a, ka thawmhnaw la turin kan In lam kan pan leh nghal a,Sawmtei lah a la awmreng dawn emaw ka tih kha a lo haw leh daih lawi. Chahbi min pe nghal a, ka duh duh hunah lut mai turin min ti a, ka beisei ai mahin a kal tluang ta phian,ka vanduai hle chungin vannei ka inti tel tho bawk.
Grace-i a lo awm vang tawh, mahse, ka beisei loh thil thleng a awm tlat, ka thawmhnaw ho a lo khung fel vek maia, chhuatah Parcel lianpui pui a lo hung fur mai,a kim leh kim loh en ngaihna pawh a awm lo. Room chhung ruak huai mai chu ka en kual a, ka mittui rawn hnai chu duh lo in ka khap hul sawk sawk a, tahna hun pawh a ni lo. Ka in lo ni thin, an nufa sual phakar vanga ka chhuahsan tur hi an mahni an zah loh phawt chuan zak tur ka ni lo ve.
“Min lo khung fel sak a ka lawm hle mai” ka ti ngial, a tum hmak ringawt, min chhan pawh a tum lo. Kan inthiar vel chu min pui lo in thu chungin min thlir liam vel mai mai lawi a, tlem chuan nuam lo a ti ve deuh anih hmel.
Ka bag ka ak a, ka lehkhabu ho a lo khung tel lo va, ka duh zual deuh ho ka pawm khawma,ka mamawh zui loh tur tamtak a awm a, a hnawk mai mai dawna ka hriat avangin lak pawh ka la zo peih lo, an duh duhin lo thehthang mai tehse."Khawnge i awm ang? " a ti deuh thut.
“Ka in ngaihtuah thei,mahse, thil pakhat ka hrilh duh che, hetiang khawp a min huatna in nei tih hi ka lo hre ngai lo va,helaiah hian ka naupanlai atangin ka cheng a, hetianga pasal nei pawh ni si lo a ka chhuak hi thenawm khawvengte hian mak an ti lutuk ang che u,chuvangin ka awmhran chhan hi i duh duh lo phuahchawp mai rawh” ka ti salh, a hmui a pet a, sual em em thin mah se a nu ang em chuan min haw lo.
“Aaaaa, kal tawh rawh, ka nu in a hmu peih lo che” zawite hian a ti leh ringawta.
“Keipawn ka hmu peih bik lo, mahse min mamawh hun a la nei ve maithei,nang chu i nu ang em i ni lo va,min mamawh hun ala awm anih chuan nang chu ka ngaidam mai che in ka ring” ka ti ve leh hmiah, ka dawih lutuk thin kha a bo ta daih chu mak a ti tih a hmelah a lang a, keipawn mak ka inti ve tho,hetiang a tawngkam ngeiawm hi ni 3 vel lekah hian ka hmang ta fo mai chu ania.
“A mamawh lo ang che” inringtawk lo hmel zet hian a ti a, ka nui mai,ka nuihzat vang a nui erawh ka ni lo..
“Maithei,eee..thil pakhat leh chiah, Pasal ka nei dawn a, a hun ka la hre lo...ka hriatchian hunah ka la hrilh ang che” ka ti leh sak saka, ka chhuak tur ka banrekah a rawn man a.
“Tu nge I neih dawn? ” ati chu a aw ah hlauhthawnna alang tel thei..
“Jordan-a lo va zawt ta che, a hrilh chak khawp ang che” ka ti leh hmiah, ka sawi zawh rualin ka inchhir nghala, a zawt anih vaih chuan ka nei duh tih ka sawina ah a ngai ngei ang.
Ka inluah kan thlen leh meuh chuan a tlai tawh viau,ka ril a tam a, ka pum a ri rawk rawk mai. Ka thawmhnaw la tura kan kal pah khan Steel almirah siamnaah kan kal nghal a, kan veng bul chiah a ni a, a remchang viau, lian lo te ka lei fel a, ka inluah tur veranda ah an lo hung fel thlap mai...
“Khum i nei bawk si lo, Mattress hi chhuatah i dah tawp dawn mi?” ati a, a sawi dik, khum ka nei lo, a pawi chuang lo, ka chhuah chhung khan Carpet an lo phah vek hman a, chhuata mut pawi ka ti lo. Ka thawmhnaw ho pawh ka hai chhuak peih tawh rih lo, parcel ah an la awm veka,naktuk ah ka mamawh ka la chhuak anga, a tawk mai. Gas Stove ka lei a,bur erawh Sawmtei nu te ta ka hmang rih dawn a,chu pawh an lo dahfel diam..
“Chhuatah ka mu mai ang chu,a nuam daih zawk ang,ka inbual anga, thil kan ei dawn nia” ka ti a, a nur nang mai,eitur siamna hmanrua ka lei ho ka ngaihtuah a, Cooker lian vak lo pakhat, Dekchi 3 a ni mai... pawilo, ka tan chuan a tawk reng, ka pawisa neih a tlem a, ka hmang zo titiha, Zobiaka ta ka puk nual tawh.
"Angailo, inbual rawh, i inbual chhungin eitur ka lo ngaihtuah ang” atih chuan ka hnial lem lo, buhfai pawh ka nei reng reng hleinem.
Hmanhmawh loin ka inbual a, vawiin tlai a thil thleng te a mal mal in ka ngaihtuah a, engkim a thleng rang lutuk mah mah vek,mahse, tunah chuan keimah chiah ka ni ta a, hlau reng reng a ka nun ka hman angai tawh lo ang, engkim keima ta vek anni tawh bawk anga,kumkhat a vei chuan ka mamawh chu ka nei kim ve em em ang. Mahse, Jordan-a hian engtin nge min chhaih kual leh dawn ka hre lo va, min neih a tum tak tak em ka hre lo, ti tak tak lo pawh nise Grace-i hnenah ka insawi awk vek tawh. A lo va zawt lo ang tiin ka inhnem a, midang tihnat let ka tum luatah ka sawi tam mah mah chu a ni e.
Ka inbual zawh hnu ah pawh Zobiaka a lo la let ta lo fo, Inchhung ka enkual a,Sawmtei nu te bungraw hlui, thuthleng sei 2 hlui tawh lam a awm a, cushion a awm thlap bawk, chaweina tur dawhkan lian vak lo a awm tel bawk a, engmah bungrua ka nei lo chungin an bungraw lo dah chuan min ti lang kawrawng lutuk lo.
Zobiaka a rawn let a, eitur a rawn khai haw nual mai,kan ril a tam dun tawh bawk a, dawhkan kan kil dun a, Plastic Chair pahnih lek kan lei tel a, inhmatawn in kan thu a, inbe lo in kan ei dun nghal mawlh mawlh mai.
“Ka riak ve daih mai dawn mawn le” atih chuan ka melh vak ringawt, Hotelah khan a rawn riak ve ngawt tawh bawk.
“Teuh lo,haw tawh rawh, lawmthu sawi ngaihna pawh ka hre lo..” ka ti a, chhuatah Mattress chungah a mu a..
“Sawi lo mai rawh,tak takin ka va haw ange”ati a, ngaihtuahchhuah ka nei thuta, ka buaina lam ngawt in ka rilru a luah atin ni.
“Sangtei kha i be leh ta em?” ka ti nghala, a thle bak a, a lu a thing mai..
“Be ta che, i ho em mai, ama thu pawh a ni in ka hre lo, a thiannu thu thu khan a awm anih kha, i pa te i hrilh em?’ ka ti leh hmawk hmawka.
“Aih, la hrilh lo, ka nei ang ka tih kha”awlsam zet hian a ti a, ka ngaihdan a pel tlat,inneihna hi fiamthu emaw a ti niin ka hria..
“I ngai awlsam mang e,va bia la, I pa te pawh hrilh la, sawn man thin kher ngai lo in Palai te tir ula” ka ti leh a,
“Nia, ka tum alawm, mahse, inneih a duh loh kha” a ti leh ringawt.
“A duh loh thu a sawi loh kha,a thuhrimin nang hi Bialnu dang i lo nei leh tawh pek em ni?” ka ti a, a neih awm phei chu ka hre lo..
“Um, diktak chuan amah lo kha midang duh ka nei,ani pawh khan a hria” ati ta mai chu phawk zet hian ka en a, mipa tak hi chu a...
“I ti mak em mai...” ka ti ringawt, tu nge anih pawh ka zawt peih lo..
“A ho em mai, ka duh zawk pawh nei thei lo in amah neih ka tum tho alawm,ka haw dawn” a ti a, a Bike chahbi ala a, pawnah ka zui chhuak a, ka tan hi chuan thian pawh a ni mai lo, unaupa ang chiah a ni ringawt.
Keima inluahah ka mu ve ta ran mai,engtikah emaw chuan kan in kha ka chhuahsan hun ala awm dawn tih ka hriaa, mahse tuna ka chhuahsan dan ang hi chu ka la ngaihtuah ngai lo,nu leh pa tel lo in ka seilian a, Putea lah ka mamawh lai takin laksak ka ni leh bawk,ka nu leh ka pa kha an hmel takngial pawh ka hre hman lova, an thlalak hlui tawh tak ka kawl a, chu zawng chu a ni maia,an thlalak lah a colour lo a, han mitthla chiam tur pawn an thlalak hlui ami bak a awm chuang lo.
Ka Phone nghawr dar dar in minti harh a, meng manglo in ka pick a, ka chau deuh bawk nen ka mut a chhuak takzet.
“Khawiah nge i awm?” a rawn ti chiam mai.
“Eng nge i duh?” ka ti ve thunga, ka harh chiang viau tawh..tun ang hunah engvang a min rawn call nge anih ka hre hek lo.
“I awmna sawi rawh” a rawn ti leh chu a aw a hlauhawm takzet.
“I hriat angai lo..” tih pahin ka off zui nghal hmaka, off mai pawh duhtawk lo in Battery ka phawi leh a, naktukah chuan ka awmna a hria pawh a ni mahna, tunah chuan tumah ka mamwh lo va, muthilh vang vang ka duh ber.
Chapter- 11
Hotel ka thlen veleh Sawmtei’n min lo be thuai thuaia, a hmelah dik lo awm a ang viau.
“Nizan i mu tha thei maw?” min tih chungin rang fe fe hian thil a rem pah reng.
“Um,mu tui lutuk, ka lawm tak tak ania aw,tunah chuan hahdam deuh in nun ka hmang thei tawh dawn a, i zar liau liau “ ka tih chuan a nui mai...
“Enteh, Jordan-a mood a tha lo uchuak ania aw,engmah tihsual nei lo hram tum ang, hetiang khawp a Mood dik lo hian ka hmu ngai mang mang lova, engkim dik thlap a tih a tha ber” zawite hian a rawn ti sa sa a, a thianpa niin ngam em em mah se tun tum chu a hlau ve deuh anih hmel. Chuti taka a mood han tichhe thei chu pawisa a hloh nual nge mawni? nizana min rawn biak pawh khan a Mood a dik loh sa tawh aniang chu, a rawn vin em mai, kei lah khan be tha hle hle lo in ngeiawm ka lo la chhuah zuia, ka inchhir ru ta vang vang mai.
“Ngatinge?, Poppy nen buaina an nei ami?” ka ngaihtuahna ti lang lo hian ka ti a.
“Ka hre lo le, nih pawh a ni maithei. Mahse, hetiang mimal thil hi hna ah a tilang ngai mang lo va, hna chungchang anih ka ring zawk” ati leh a, keipawh ka rin dan chiah, mi pangngai chunglam niin Personal leh Professional chu thliar hrang thiam turah ka ngai.
Jordan-a Office kawngkhar a ri thuai a, phawk zet hian kan hawi dun nghal hra mai.
“Sawmte, Abby lo thlen hunah lo lut rawhse ka ti emaw ka tia” a rawn ti nghala,Sawmtei mengphar deuh awkah chuan a theihnghilh anih ka lo ring ringawt.
“Aw,nia..Mahse,i tih awm pawh ka lo hre lo a..” bah deuh nak hian a ti a,ka lo khawngaih ve tawp.
“A tha anih chu,ka ti lo aniang” tih pahin ngeiawm zet hian a hmui a tisawi a, ka ngei tawk a lo tling, engvangin nge kei kher pawh chu min hmuh duh ni?, kei aiin Sawmtei’n hna a thiam zawk fe a, a hrechiang zawk bawk si. Chutia keimah min biak duh ta tlat chu nizan pawh kha hna vang anih ka ring ta.
“Sir, tunah ka lo kal ang" Ti chungin ka ding chhuak nghala.
“Tunah ni loin Dar 11-ah kan chhuak ang, chuan, File kan ken tur ho kha Sawmte lo tifel ang che,in pa kha a tlai leh ngawt ange” nelawmna tel miah lo hian a ti bak hluk hluk maia, khawiah nge kan kal dawn zawh ngam chi a ni lo, ka kal mawp anga, ka hre chawp mai ang chu. A Office chhungah a lut a, na zet hian a rawn khar bur maia.
“Ekhai...a va hlauhawm ve.min seh mai dawn maw ka ti hman a” Sawmtei'n a ti a, hlau tak tak hmel a pu hauh lo va,a nuih a zat hmel zawk.Nichin khan a hlauh hmel vel nei, lemchan thiam leh lutuk mai.
“Amah hmu tur khan min ti tak tak em?” ka lo ti ve thunga, a ngawi deuh vang vang a,a kut a hmet ri khauh a.
“Ti lo, mahse, Boss a ni miau a, ‘ka ti’ a tih chuan a ti animai...engpawh nise in chhuak tur chu a nuam zawk zawk dawn lo anih kha” a ti leh a, a Phone a khawih paha.
“Ka chak lo viau mai,hna a ni miau mai sia, ka kal poh ang chu,eng lam nge i hre hrim hrim em?” ka ti leh a, min chhang lo in a Phone a kawk a, a beng bulah a dah chho zui nghal zat.
“Hello....Kan Jordan-a hian vawiin chu khawngaihna a tlachham teh ania, hun i vawn dik loh chuan a ei mai ang che” zawite hian a ti a, a nui zui kar kar bawk.
“Ok, bye, lo thleng hma la..” ati a, a Off hnuah min rawn en a.
“Hlau suh, kan pa a kal ve dawn a, chuan kan Ramhuaipitar pawh a kal ang,an be mang lo ang che” a ti ta siam siam a,Poppy a lo kal ve dawn tih ka hriat chuan ka hlim ta deuh,ani tal kal ve se,a Mood chhe lutuk kha a siamtha thei hlauh mahna le.
“Min biak tlem poh leh a tha animai. Min hau dawn lo tih na ania,chuan ,eng chungchang nge ni reng reng a?” ka ti leh a.
“Club lam thil pawimawh anih hmel a. Chumi in zawh hnuah Hotel thar tur in en nghal dawn bawk a” ati a, a thaw deuh huai a,ngaihtuah nei tih hriat zet hian hmalam a en vang vang bawk a. Kei erawh chuan a thilsawi la man chiah lo, Aizawlah Hotel lian leh zahpuiawm lo lutuk an nei a,Room awl a awm ngai lo tluk a ni.Khualzin lo kal apiangin an rawn thlang chat chat a ni ber,ka la thawk rei lo hle chungin a sum lakluh tam tur zia ka hrethiam vek tawh,mahse, Aizawlah kher hi chuan a siam leh anih pawn a hlawkna tur ka hre vak lo thung, a neih sa hi a tawk reng, chumai bakah Hotel dang a awm ve fer fur a,hmundangah a siam anih loh chuan a mamawh ka ti lo ve tawp.
Ka Phone a msg rawn lut ka en thuai a, ka beisei loh zetin Jordan-a a lo ni a, Sawmtei hmuh hlau takin ka en hnai nghal thuaia,a thil rawn sawi ka hmuh rualin ka mengphar vak maia, min lo hmu tu chu awmse ka a emaw min tih loh pawhin thil tha lo tak ka hmu ah an ngai ngei ang.
“I thawmhnaw thlak na tur la rawh,Garrage ah Diverin a nghak che” tih zawng hi a ni a, kan kalna tur hi riah chhuah ngai anih hmel ta tlat.
“Enteh, ka haw lawk angai dawn tlat, ka thawmhnaw thlakna tur leh mamawh ka lak loh chuan..”tih pahin Sana ka en a, dar 10 a ri tep tawh.
“Oh, nidawn tak, kal vat rawh,mahse, engtin nge tunah chutiang i namawh dawn tih i hriat thut a?” ati a, mak tih hmel deuh hian min en a.
“Ih, hei ..” tih pahin Computer ka kawka, vanneihthlak lutukin Jordan-a tih tur ho ka en tur tak kha a lo lang a,a rawn en a, a bu nghat mai.
“Kha chiah kha anih kha Jordan-a khan hrilh che a tum, min hrilh mai awm tak..engpawh nise kal vat rawh, i tlai vaih chuan a that mai ang che” tih chungin a nui kar kar mai..
Gate bulah Driver in min lo nghak ran tawh, Jordan-a car a ni tih hre sa lo ila chuan ka inzawng buai hrep maithei.Driver lo awm chu keimah aia Naupan hmel zawk hi a ni a, a zahzum hmel viau bawk.
Engchen nge kan awmdawn ka hre lova, ka thawmhnaw lah ka la phawrh kim lo bawka. Ka hmuh hmasak ka khung tawp tawp mai, kekawr bul leh T-shirt pakhat ve ve bakah Underwear ka khung tel nual bawk.In-cheina tur kekawr pakhat ka keng tel a, ka flat bun lai ka tlawh thlawn tawp a, Running Shoe ka bun a,ka hriat theih china ka chet ran ber tum a ni ngei ang.
Dar 11 rik hma hretin Rindika a lo thleng a, an nupa khawsa zia hi hmuh nuam ka ti thin, an induat hluak lo a, mahse, an in ngaipawimawh tawn em em tih a lang thei thung, thenkhat te ang a an bula awm hrehawm khawp a induat anni leh chuang hauh si lo.
Jordan-a nen a hmaah an chuang a, Driver a hruai dawn emaw ka tih laiin amah bawkin a khalh leh mai. Rindika nen an tawng mawlh mawlh laiin ka lo ngawi kar thung.Min be lo a,an thilsawi lah lo sawi ve tur ka hre lo chu thuhran, sawi ve duh mah ila sawina hun min pe lo hrim hrim. Sawmtei khan Poppy a kal ve dawn ti mah se a lo kal tel ve hauh lo,Team ho awmna lamah a awmsa pawh a ni zawk maithei.
Ka rin ang ngeiin a lo awm tak taka, a sam eng lam lek lek a tawnkang lah a, T-shirt lian pui leh kekawr dum hi mar tangin a ha a,a sang thain a pian a nalh bawk nen Mipa tan chuan hnar harsa tak a ni ngei ang,a hmelthat mai bakah a fing a, a hausa tel bawk.
Team enkawltu te ho nen reife kan thukhawm a, Coach leh Asst coach te nen Rindika’an min hmelhriattir a,min chibai a,ka tih fo danin Coach ka hmuh rualin a Strict tur zia ka lo ngaihtuah leh hmanhmawh bawk.Pawisa chungchang an sawi takah chuan ziak tura min tih apiang ka lo ziak zel a,a chang leh an inhnial leh bap bap thina. Rindika leh Poppy an tawng deuh bera, Jordan-a ber lah chu a nei tu ni si in ka nei lo ang hmak hian inngaihtuah muk hmel zet hian a thu a, hmalam a en ngur ngur ringawt.
Lunch kan ei leh te te hnu a Aizawl kan chhuahsan meuh chuan dar 4 a hnai thuak tawh. Champhai kal tur kan ni a, kan thlen hun tur awm ka ngaihtuah thiam lo, a hla thawkhat tih zawng ka hria. Poppy nen kan thu dun a, a khat tawkin min be leh zauh thin a, mahse an Pathum in an inkawm a ni ber zawk. An titi kalhmangah chuan an inhriatna a rei tawhin an inpawh thawkhat tih a lang thei reng. Min mamawh lem lo bawka tiin hla ngaihthlak tumin Earphone ka phawrh a, ka benga ka hnawh luh hnuah muthilh tumin ka maimitchhing nghal hmak.
Ka Phone riin min ti harh a, Zobiak a ni tih ka hmuh chuan ka chhang ang nge chhang lo ang tih reilote ka ngaihtuah a, Jordan-a khan hnaih lo turin min ti ngei ma hse engvangin nge a thu ka zawm kher ang?, ka bialpa a ni lo a, a thu thu a awm tur ka ni lo, Zobiaka hi chuan engkimah min pui a, ka Nuta ang chiah a ni tlat.
“Hello..”zuai angreng tak hian ka ti a, Darthlalang atanga Jordan-an min rawn melh zawk chu ka hmuh hmaih lo.
“Khawnge i awm?” thawveng tak hian a rawn ti a, Office ban hun vel a ni tawh a, min rawn lam tumin a lo kal emaw ka In luah ah a lo kal zawk pawh animaithei..
“Champhaiah hna thilah kan zin dawn a, kan kal mek a” ka tih chuan,
“Ekhai, ava mak tehthut thin ve, rawn lam che ka tum asin, Hotel kawtah ka awm tawh zuia” lawmlo hmel deuh hian a ti nang nanga, a thinrim anih pawn ka dem hauh lo, ka kal hma khan hrilh tur ka ni a, ka buai em avangin ka hrilh theihnghilh daih. Bakah, min lo lam dawn tih ka hre lawk tlat lo a, ka dik loh a ni vek bik in ka hre lo thung.
“Nia, vawiin khan ka hre chawp thut a, ka kal ta rum rum alawm, kan thlen hunah ka lo bia ang che” ka ti vata, inbiak reng nuam ka ti lo.
“Ok, tluang deuhin le” a ti a, ka Off hmain min off khalh a,min ngaihtuah em em tih hi sawi lang hauh lo mahse ka hai chuang lo.
Motor kawngkhar inkhar ri niawm tak ri dawtah ka harh zawk mai,a thim vek bawk nen ka awmna ka hre mai lo. Ka mit ka nuai chat chata,ka hmai bul teah Jordan-a a rawn kun chiah chu rang fe hian thut ngil ka tum a, a khabe tak ka tauh chawrh maia, ka awi tha ta, ani pawh a rum nghut mai..Ka chal ka dawm chu a rawn khawih ve a.Engtin nge ka bulah a lo thut ngawt theih ni?, Poopy nen kan thu dun kha a ni sia..
“A na em?” dam thluam hian a rawn ti a, na ka ti reng nangin ka lu ka thing a, “Ka tihpalh lutuk, i na zawk em?” ka ti thuaia, a khabe a tuai zauh a.
“Na ka tih chuan nuam i ti dawn si lo a” nuihza aw deuh hian a ti a, za lo zet hian ka nui ve ta ngawt.
“Khawnge midang?” ka ti leh ringawt.
“An inthiar lawk a,hei, an lo let alawm” ati liam puat a, hnunglam nghengin a thu awn nghal daih bawk.
Rindika'n rawn hawi chhoh pahin Light a on nghala.
“Eee, Abby, i lo harh tawh law?Jordan,eng nge i an?” ati zung zung. Jordana ka en thuai a, a lo maimitchhing leh daih tawh chu niin. A lo nuam lo tih reng reng ka hre lo, hahdam deuh tumin a hnungah a rawn thu ve ni ngei tur a ni.
“Ka zia deuh, mahse, tlan dim deuh tawh teh” ati nghut a, Rindika a nui hak hak maia,a tawngkam mi khei deuh tak chu a pawisa lem lo anih hmel.
“Abby, i harh tawh tho chuan a hma ah hian i lo thu hreh em?” Poppy zawkin a rawn ti a, mawl ka inti nghal viau, ka muthilh vangin an thut dunna tur ka dal tih reng ka lo ngaihtuah lo a,ka harh hnuah pawh keima thu a insawn nachang ka la hre lo zui.
“Oh,lutuk,” tih pahin ka bag ka la nghal sawk sawk a, kawngkhar ka nem hawng a, mahse, Jordan-a tawng ri chuan ka chhuk tur min thulh tir leh...
“Muthilh ka duh ania,Abby,tah khan thu mai mai teh,kan thleng tep tawh” a ti nghut a, hnial zui chi a ni lo tih a aw-ah a lang reng.
Reilote chhung chu kan ngawi thap maia,kalna tur zawk ka hre thiam lo. Poppy tih thinrim ka duh lo a, Jordan-a bula thut duh lo mah ila ka kalsawn ngam chhang lo.
“Khar teh, thli a rawn lut” a ti leh nghut a, rang lutukin ka pawt khar nghal thuai a, ka thut na ngaiah ka thu tlum nghal kak bawk.
Khawzawlah chawei turin kan ding a, abak chu kan tlan leh ta char char,ka mut a rawn chhuak leh tana, a hma a ka thut ang bawkin awn deuh hlekin ka thu a, ka beng ka hnawh leh than bawk.Poppy ngawi ta reng chuan ka awm a ti nuam lo ru em em maia, a lawm lo tih tilang chiah lo mah se chhungrilah indonna kan tan nghal derah ka ngai hmak.Rindika erawh chuan engmah vei nei hmel a pu lo, a tawng bawrh bawrh a, a khat tawkin Poppy-in a chhang ve zauh zauha, a rei hnu-ah phei chuan a Car tape play lai atanga zai ri bak thawm dang awm lo in a reh ta thiap..
Tihpalh niawm tak hian ka mal chungah a kut a rawn dah chuan ka thu mar nghal awt maia, ka meng nghal kawk bawk..Ka va en chuan a lo la maimitchhing tlat a,a kut a rawn dah chu hreawm pawn a awm lo. Mahse, a muhil lo tih a thawkdanah ka hai lo.Poppy ka en vat a, vanneihthlak lutukin a lo muhil hlauh.
Dimtein ka dahsawn sak a, ka kut ka la let leh tur chu rang lutukin ka banrekah a rawn chelh a, insiamtha niawm tak hian a thu mar a, a rawn tawlh hnai nghal zat bawk.
Che miah lo in ka thu a, a kut lum thur thur leh sei thlurhin ka kut a chelhna chu ka chhungrilin a hre vang vang maia, inthlahdul thei loin ka tang teuh bawk. Kawng a tha fahran lo bawk nen min rawn nek leh thin a,a rei hnuah phei chuan ka darah a lu a rawn nghat ta nge nge.Hahdam hmel takin a thaw sak sak maia,nam sawn ka duh rualin ka ui a, ka maimitchhing ta ngawt, a thim vek bakah Rindika lah chuan a motor khalh ngawt a ngaihtuah ni a ka hriat avangin tlem chuan ka tlamuang ta deuh.
“Kan thleng e” zawi angreng taka ka beng bulah a rawn tih chuan ka thu ngil vat. Hotel niawm tak kawtah hian kan lo awm reng tawh mai. Sana ka en chuan a hma tawh lo viau. Ka bag ka khai a, Poppy ham bai bai chunga kal chu ka zui a,room khatah kan awm loh hram ka beisei takzet.
“Abby, hei i chahbi aw,naktuk zing dar 10 hma chuan i mu vang vang thei ang” Rindika’n chahbi min rawn pek pahin a ti a, lawmzet hian ka la vat, kalkawngah khan muhil tho mah ila ka taksa sil them thum ti reh tura tuisa ver vawr a inbual a, mut hahdam vang vang ka chak rih ber. Ka zin chhuak ngai mang lo va, ka'n zinchhuak ta hi keimahah eng ngemaw ka sawithiam chiah si loh danglam deuh a awm tlat.
Ka Phone ka charge a, inbual turin ka kalsan a. Hotel changkang pangngai tak niin engkim duhthusam ni chiah lo mah se a tha thaw khat viau vek. Jordan-a Hotel ka mitthla ah a lo lang a, helai nen chuan khaikhin chi a ni lo. Ka sam ka tuam vek mah ila a pheng bet chuap maia, suk loh chi a ni lo.
Ka inbual zawha ka phone ka en chuan Jordana Msg leh Zobiaka min lo call na a lo awm a. Msg ka hawn chuan,
“Good Night” tih zawng a lo ni a..eng chu a hria ni maw?
Zobiak ka call back a, rang fe hian a pick up nghal vat.
“Ka inbual zo chiah a, i va mengrei ve” tih pahin ka sam ka hru hula.
“In thlen leh thlen loh i sawi si lo a, ka ngaihtuah deuh che a, tu nen nge in kal reng reng a?” a rawn tia, kan inbiak khan ka kalpui min zawt lo tak e.
“Ka boss te ho..Jordan-a leh Rindika, chuan Poppy pawh” ka ti a, a ngawi deuh vang vang a.
“I inveng thei ang tiraw?” ka rin loh taka a rawn tih chuan a sawi awmzia ka hre lo,ni lo ,ka hre lo der a ni mah zawk.
“I sawi awmzia ka hre lo e a, mahse, awm ve la chuan ka rilru a nuam deuhin ka ring” tha takin ka ti a, awm ve se ka ti tak tak.Boss te nen a zin chhuah hi thil nuam a lo ni miah lo.
“In awmrei dawn em?” a rawn ti leh daih, ka sawi a haider lui ve tho anih hmel.
“Ka hre chiah lo, ni 2 emaw ni 3 pawh animaithei...Ka dah dawn, ka mut a chhuak lutuk" Ka ti zui a.
“Um, muhil vang vang rawh,kawng a tha vak awm si lo a, Mama Motor khalh a chuan nawm lemloh zia ka hria alawm,i chau khawp ang” a rawn tih chuan, Zobiaka pangngai,vei nei tam lo tak a ni leh tawh.
Zing dar 10 rik hma deuhin Sawmtei’n min rawn call avangin ka harh a, an pa a be duh a lo ni a,
“Lawk aw, , ka la tho lo a, nizan kan thleng har bawk nen ,a Room ah ka va kal ang” ka ti a, mahse, min hnial leh lawi..
“Angai lo, min rawn call back mai ka ring, Poppy chuan a enkawl tha che maw?” ei lo tih hriat zet hian a rawn ti a, a tawng danah ti el na ri alang chiang viau.
“Um ,ka beisei ai takin a fel dawnin ka hria” tih pahin ka nui lui a.
“Fel lutuk ,a duh phawt chuan mi zawng zawng aia fel alawm anih a...aaa, kei hi ka tawng leh teuh tawh,anih phawt” ati leh zung zung a, a mizia hi a va han lawmawm thin tak.
Nilengin kan buai ta, Ramhnuaiah kan kal a, khawchhung a Jordan-a thianpa, Palian leh tawngduh tak mai a lo kal ve bawka. Min fiam leh zuk zuk thin a, min fiam danah engmah huat tur a awm lo bawk nen a ti nuam phian mai.Nimin ang em em kha chuan Jordan-a Mood pawh a chhe ta lo va, nizan khan Poppy nen Room an intawm anga, an inti lungawi pawh a ni mahna, aaaa…thil tul lo a ni ka ngaihtuah ni..
Thim thet thetah Hotelah kan let leh ta chauh, Jordan-a ka hmuhdan a danglam ta dawrh thung. A thluak that zia chu pui tak hi a ni ringawt..Ram a lei duh a, an han indawr vel kha ka tan chuan en nawm mak tak a ni ber ang chu. Dam dap leh hnial harsa tak si in a dawr a, Ram neitu a ngaipawimawh a, a man pawh tlawm lutukin a lei sak dawn lo tih a ti lang vek, a thusawiah a ding ngei ang tih ka lo chiang ve ringawt a, kei ang bawkin Ram neitu pawh khan a ring nghal hmiah anih hmel.
“Zanin chu in lo kal remchang bawk nen ka Birth Day ka sawn ania. Hotelah hian a chung zawlah Party na tur ka buatsaih tir ania aw” Jordan-a thianpa,Zira chuan a ti suam suam a, Rindika Phur fe in a nui huah huah.
“Nang hi chuan nachang i hre tlat zel, Nupui te tel loin duh duhin kan khawsa thei ang chu, mahse, Abby, ka tlawn che ania aw" Nui chunga a tih chuan kei pawh ka nui ve tho. Sawmtei kalsan hian tu hmeichhia mah a kawp lul lo ang tih ka hria.
“Nia, Abby pawh khulam theihnghilhin i che ang chu le..” Zira’n a nui huk huk chungin a ti a, Jordan-a lam ka va hawi chuan chiang zet hian min lo melh reng chu niin,ang lutukin ka mit ka la sawn nghal thuai mai.
Dar 7 rik hma hretin Zira a lo kal leh a, Hotel hi an chhungkaw ta a niin amah hi Jordan-a nen School kal dun reng thin an lo ni a, Rindika nen pawh an innel viau tho.
Thawmhnaw hak tur ka lo keng tlem si, incheina tur kekawr ka ken chhun lah a lum lutuk a, hak chi a ni der lo,kawrfual,nghawng zau lam hret,ban tawite, arh deuh,a hnute hnuai a intan ka ha a, ka khup a khuh vel chiah bawk.In ah ka ha zauh zauh thin a, a chang chuan chhuah nan pawh ka ha tho thin bawka, mi zinga han awmpui mai atan pawh a pawi lem lo.
Hotel chung zawlah Party na tur a siam hrim hrim hmun a lo nei a, Light a eng uara,Boruak a thawveng halh bawk. Thli a thaw heuh heuh a, chhun ah leh tlaiah khan a lum ve tehlul nen tunah chuan a vawt lam a hnaih zawk mah mah.Poppy leh Jordan-a an thu dun a, hmeichhe pakhat leh Rindika hi muk hmel fe in an ti ti dun bawk. Coke min pe a, midang erawh chuan Beer an dawm far thung.
Music muang fan raih,lam rem tak an play a, a kawp te te a inkuah in an lam a, kei erawh a sir kil thim deuh laiah keimahin ka thu a, party tih vel hi ka kal ngailoh vang nge ka hre lo, nuam ka tih zawng a ni lo.Boruak dam leh reh raih a mahni a hahdam tak a awm veng veng hi nuam ka ti ber.
Ka thutna bul velah chuan Pangpar an dah teuh a, ngaihtuah em em pawh nei lo in chunglam a arsi pe tuar chu ka thlir renga, fur lai a ni a, ruah a sur loh erawh chuan khawvel hi a thar sur nimai hian ka hre thin, awihawm loh khawpin khua a thiang a, Arsi an pe tuar maia, lung a leng veng veng mai.
“Ka lo thu ve thei angem?” Mipa aw hian a rawn tih chuan ka en vat a, a hma khan ka hmu tawh tih ka hria.
“Tehreng mai..” tih leh a sir lam a tawlh ka rual a, a rawn thu ve a, Party na a lo kal ve a ni tih ka hria, a hma khan tu nge anih pawh min hrilh a, mahse, a hming ka hre leh tawh lo.
“Abby ti raw i hming kha?” ati a, nelawm tak hian a nui var var bawk, thenkhat chuan hmeltha an ti ngei ang, mahse, a hmel no duaiah chuan mi hipna a awm hlawl lo.
“Um, nang zawk?” ka tih chuan a sawi ve mai bawk,ti ti chiam ka peih lem lo tih hriat tir ka duh avangin ka maimitchhin sana, min be tawh lo in kalsawn mai se ka ti takzet, Room lam han pansan daih chi niin ka hre rih si lo.
Ka mal chungah a kut a rawn nghat chiah chu ka meng kawka, rang lutukin ka thehthla nghal thuai mai. Ka ding tur min rawn pawt a.
"Enge a? " Tih pahin a kut thinthlak ka tum a. "La kal mai bik lo la" Nui sawng hian a ti a. Ka kut a vawnna a phelh duh der lo.
“I va han zak lo ve, min thlah vat la,kalsawn nghal rawh" Thinrim tak hian ka ti leh hrawk.
“I la thutak lutuk anih kha, Party na ah chuan a theng fo thin tih i hria alawm” nui sawng chung hian a la ti ta.. Ka kut a vawnna phelh tumin ka beia, a hmer nghet tlat.
“Thiana, kal sawn zawk la a tha lo maw?” Jordan-a aw hian ka hnung atangin a rawn ti a,ka thlamuang nghal huai mai. Ka sirah a rawn dinga,"thlah rawh" a ti fan ruiha, ka rin loh takin min thlah ve mai bawk.Mahse, kalsawn ta mai lo hian Jordana a en a.
“Thianpa, lo inrawlh lo zawk ta che, a hma atangin enge thleng i hriat loh kha, chuan..” atih lai mekin Jordan-a kut a phe vuai a, Pakhat zawk a thal nghal thuai bawk..
“Engmah a thleng lo. Chuan, kalsawn tur in ka ti che a ni lawm ni, ka bialni leh ka nupui nimai tur hian i tan beiseina za ah pakhat pawh a siam sak lo che tih ka hria” thinrim insum tih hriat ngawih ngawih hian a ti hmuk hmuka,a hnek thluk pa lah chu a na deuh a ni ang, tho mai lo in a mut ngaiin a mu reng a. Kei pawh Jordan-a tawng kam hman khan che thei lo in min siam ve tho bawk.
“Ka bialnu leh ka nupui nimai tur" a tih kha ka bengah a ri nawn tlut tlut a ni ber.
Chapter- 12
“Jordan...eng nge thleng a?” Poppy aw hian a rawn ti a, a awm ve tih ka hre hauh lo.
Muangchang hian Jordan-a a inher a, ka kawngah min rawn kuaha.
“Thiana hi a che mawi teh vak lo anih hi. Ka nupui tur tih hre loin a lo tilui ti ila a dik ber ang chu" a ti dam thlup a. A sawi danah chuan rinhlelh tur reng reng a awm lo.
“Nupui tur maw? Jordan..hetiang ringawt hi enge a awm zia? ” atih lai mekin Rindika a rawn kal hnai a.
“Kan va han inthawng na deuh ve. Beisei lawk ni tho mah se kan nu awmlai a sawi inni lo erawh ka vui pui deuh” a ti zang vah.
Midang an rawn kal khawm a, Jordana'n inneih ni tur kan la tihfel loh vanga la sawi chhuak lo anih thu leh a thinrim vanga a tum ai hmaa sawi anih thu a sawi a. Min lawmpui tak hian min chibai liam liam hlawma, a hnekthluk pa kha khawiah nge a awm pawh ka hre tawh lo. Thil thleng hian min ti hrilhhai em em a ni tawp mai.
“Kan chhuk dawn mi?,i chauh hmel em mai” min en chungin a ti a.
“Nia, chhuk mai ka duh” ka ti ve vat. min mangtha sap sap hlawm a, ka mangtha let ve a,engtin nge ka hmalam hunah ka awm dawn ngaihtuah ngaihna ka hre rih lo,min neih a tum tih min hrilh khan ka pawm thu ka la hrilh miah lo va, fiamthu a ni lo tih hre reng mah ila neih tumna tak tak leh thutak ang pawhin ka laksak hek lo. Tuna a chet dan hian midang ang bawk khan min thawng a, a Nupui tur ka nih tak ngawt siah chuan a chhungte hnenah min neih a duh tih a sawi tawh nge pawh ka la hre hek lo. Kan inhriat tan atangin thla tam pawh ala liam lo va, innei ngawt turin hriat lah kan inhre chiang hek lo.
Chahbi min lak sakin aman a hawng a, min zui lut dawn lo emaw ka tih laiin a rawn lut ve a, kawngkhar a kalh nghal hmak bawk.
“Mut ka duh asin” zawite in ka ti a, inring tawk tak a tawng te chu ka duh nameuh mai, ka thei lo mai zawk.
“Um, keipawh ka duh alawm” tih pahin khum a rawn pan a, Lukham a dah sang a, a thu mu zui nghala.
“Hetah riah i tum chu ani lo ang tiraw?” ka ti leh nghat a. "Tum tho e" a ti duh lek.
“Ka thehchhuak ang che” ka ti chu kei ngei pawh hian ka thusawi ka ring eih lo, kan inlen hleih lutuk, ka tha neih zawng zawng pawh hmang ila keimah chauh chuan ka thehchhuak ngai lo ang tih ka chiang lutuk mah mah..
“Min thehchhuah han tum chhin la, ka chak zawng tak..” ngai ho em em hian a ti leh maia. Ka thaw hak.
“Ngatinge Poppy kha tihnat kher i tum a?, Pasal lo neihsan che mah se tunah chuan i hnenah a lo kir leh tawh a, nei mai ta che, ka duh hauh lo che tih i hre reng a ,min neih i tum tlat hi ka hrethiam lo...” ka ti ta daih.
“Min nei duh lo maw?’ a tih chuan ka bu nghat.
“Ok,min neih duh si loh chuan ngatinge Grace-i hnenah pasal i nei dawn tih i sawi si a?” hnehtu in ti hmel zet hian ati a, a la nui zui.
“Neih te chu ka la nei dawn alawm, mahse, nang i ni ka ti hleinem..” ka tih laiin a rawn tho a, a hmel landan ka hmuh rualin tawlhsawn ka tum a, mahse, ka tlai hret,ka ban rekah a rawn man a, hneh zet hian min pawt dawrh a, a taksa lian leh fit zetah ka bet leh ta ran mai..
“Zobiaka i nei dawn tih sawi tum hlek suh” a ti chang fuka, a awmah ka lu a nem bet a,a awm dan chu na tuar a ang phian bawk.
“Jordan, min ti na ania” ka tih takah chuan min thlah ve maia. Kalsawn pah hian,
“Muhil tawh rawh, i Pitei hnenah Ka pain zanin hian Palai a kal tir ka ring a,hnialna a awm loh ka beisei, i chhuahsan tawh tih hre mah ila i chhungte dang ka hre miau lo a, dan angin engkim kalpui ka duh” a ti chiah chu rapthlak ti lutuk hian ka en a.
“I ti tak tak lo ang tiraw?” ka ti ta ngawt.
“Ti tak tak e, ti nge chutiang te fiamthu nan ka hman duh ang? Inneihna hi fiamthu a ni hleinem.Chuan,ka damchhung hian Nupui nei lo a awm ka tum hauh lo va, ka duhzawng nei tur hian engmah ka nghak ngai lo, ka neih hma chu ka um a, ka neih nan chuan engmah tih ka hreh lo” a ti leh duaha, pawisak nei lo niawm tak hian a nui zuia. Mi pangngai ni si, engtin nge hetianga a chet theih ka hre thiam lo hul hual.
“Chhuak rawh, I zak lo leh lutuk..”ka ti zawi sat.
“Oh,tehreng mai.. Ni lo, ti suh.. " ka rilru hria niawm tak hian a ti zuia. Inhumruh tlat chungin ka ding tau mai. Min rawn hnaih leh a,
“I thinrim tih ka hria. Chuan, Nupui kawlhsen lutuk neih hi nuam ka ti dawn riau in ka hre bawka. Chutihrualin kut min thlak tu nupui neih erawh ka thil duh loh ber a ni thung” a ti leh hmuk.
Ka muhil ta mang lo va, Pitei te nufain min rawn biak ka rin laiin engmah an rawn sawi hauh lo. Min fiam kual mai mai anih ka ring leh that thata, mahse, a sawi danah khan min fiam hauh lo tih alang reng lawi si. Zobiaka nen vawiin nilengin kan la inbe miah lo tih ka hre chhuaka, biak ka tum thut thut a,mahse, a tlai tawh em avangin a muthilh tawh ka ring leha,amah ang lo taka nileng a min rawn be lo erawh mak ka ti deuh.
Ka Room kawngkhar kik ri ah ka harh a, peih lo zet hian ka meng a, khua a eng uar tawh chu niin. Vawiin lama kan tihtur engmah min la hrilh lo.
Kawngkhar ka va hawn chuan Rindika a lo ding reng tawh.
“Kan kal chhuak lawk dawn a, i lo kal ve duh em?” a ti nghala.
“Ka kal ve ngei ngei ngai anih loh chuan ka hnial mai ang che” inthlahrung tak hian ka ti a, ka hmai takngial pawh ka la phih hman lo.
“Aih, ngai kher lo e, Jordan-a nen lenkual lawk kan tum mai mai, a pawi lo, lo insiam la, kan chhuak hma dawn nia” ati leh zung zunga.
“Kan haw thei dawn em vawiin hi?” ka tih chuan a bu nghat a.
“Chumi tur chuan ania lo insiam rawh ka tih che, Sawmtei’n thil min chah nual a, va lei pahin Zira te in ah kan kal lawk ang a, chawei kham veleh kan chhuak dawn nia” a ti leh mawlh mawlh.
Dar 11 velah kan chhuaka, A hnungah Poppy nen kan thu dun a, a hmeltha takah chuan min be chak lo tih ka hrethei reng. Biak luih ka tum bik chuang lo. A landanah chuan nizan a mu tha lo emaw a tap nasa viau pawh animaithei, make-up in thup viau mah se a mit a bui deuh tlat..
Aizawl kan thlen chuan a la tlai lutuk lo va, Zobiaka biak tumin ka try nasa viau chungin a tlang thei miah lo.Rindika kan thlah a, Poppy erawh chu a Driverin a lo nghak thunga, a tawpah chuan Jordana nen kan Pahnih chiah kan ni ta.
Pawnlam ka thlir dauh dauh a,mi veivak an awm vak tawh lo,khaw nawm loh vangin an tawmim zo pawh a ni mah na, tunah pawh sur leh mai tur niawm takin ral hla deuh ah kawl a phe zawr zawr bawk.
"Hotelah i awm tawh lo va, khawiah nge i awm? " A ti a.
“Ka In ah”tih zawngin ka chhang. Ka chhang tawi tek tawk viau.
“I in awmna min hrilh duh loh chuan ka duhna ah ka hruai mai che angai dawn ania”a tih takah chuan hlauthawng ru deuh tak hian ka en a,ka awmna ka hrilh ta nge nge. Ka inluah kan thlenin a rawn chhuk ve a, lo lut ve lo se ka tih tehlul nen a rawn lut ve ta zel.,Thutthlengsei ah a thu ta deuh deuh.
“I la kal dawn lo mi?” ka ti ta nge nge...
“Dawn nang, inbual la, In ah chawei turin ka hruai ang che ka lo ti a..” a ti chiah chu ka lungphu a rang nghal zaih zaih mai.
“Aih, ka duh lo,mut hahdam ka duh” mangang rilru zet hian ka ti a. “I duh leh duh loh ka zawt lo che, i lo kal ang” a ti leh hmula, Order hlir,engmah hi tha tak hian a sawi thiam lo ni hian ka hre hial tawh.
“Ka kal lo ang” luhlul chhuahin ka ti ve thung.
“Ka pawm chhuah che i ngai dawn tihna nih chu..A pawi hran hleinem, Hmeichhe ho hian korean film in ngaisanga, Korean ho ang deuin kan inpaw chhuak hnawp hnawp mai ang chu " amah nena inhmeh lo tak hian a ti deuh ngiala, phawk zet hian ka en a, fiamthu ang deuha sawi ni mah se a hmel landanah chuan a ti duh tak tak dawn tih a chiang..
“Enteh, Jordan...aaa, engtin nge koh tur che ka hre tawh lo..”ka ti deuh nuai.
“Jordan tih ka duh zawk ka tih kha, luhlul chhuah suh, ka nu in min nghak reng ania, i kal har leh a riltam rei dawn animai” a tih lehzel takah chuan beidawng takin ka thaw hawk ringawt.
"Nizan vang khan intibuai vak lo teh, engmah ka ngaithutak ve lo ania" ka ti hap.
“Ngaih thutak lam pawh ni loin, inneih chungchang chu ka pa zawkin sawipui che a duh, a tlai hmain inbual vat teh, nge ka bual zawk dawn che mi?” ka sawi engahmah ngai lo hian a ti awlsam leh mai.
Darkar khat a liam leh meuh chuan Jordan-a nu leh pate nen kan thu ho der tawh, Jordan-a a inbual a, a nau a awm lo thung, tha takin min lo dawngsawng a, an mo turin min duh lo emaw min duh emaw engmah chutiang lam an ti lang lo.
“I chau em?, hmuh talh che ka duh sia...” inthiam vak lo niawm tak hian a nu in a ti a.
“Aih, chau lo e,ka tha lutuk” ka ti ringawt, Jordan-a a rawn lut a, ka bulah a rawn thu ve nghala.
“Nu, chaw kan ei thei tawh em?” Pangngai takin a ti a, a nu in an peih tawh thu a hrilh ve thuai bawk.Apa a chhun takzet mai, a pa hi palian leh zahawm zet mai a lo ni a, a lang upa deuh tih loh ah chuan Jordan-a nen danglamna hmuh tur a awm mang lo, kei ang bawk hian Jordan-a nu hi a Pa vang hian a buai ve angem tih ka lo ngaihtuah leh hmanhmawh pek bawk.
An nula hnenah chawei siam turin a ti a, Jordan-an min rawn en chuan min en dan ka duh lo, min duat hmel mah mah.
“Abby,i Pitei hnenah khan Palai kan tir a, mahse, i awm tawh lo a, bakah an thu anilo tiin min lo chhang fel hmak maia, khatiang teh bawl kha inchhan dan tur ni pawhin ka hre lo. I chhungte dang palai kalna tur chi an awm hnai em?” a pain a tih chuan ka kut ah Jordan-an a rawn vuan a,min hnem a tum tih ka hria, ka chanchin a hrechiang em em tawha, chhungte han tih chiam tur ka nei lo va, ka nu chhungte lah chhungte hla tawh lam anni a, ka pawh em em miah lo. Ka pa chhungte lah hetiang thil a tihbuai chi niin ka hre si lo.
“Pa ,Palai tirh angai tawh lo,Abby hian a pa chhungte tihbuai tur chu nei mah se nhai ka ti lo.Court ah pawh kan innei thei a,keimah ah chuan buaina a awm lo, Abby, nang eng nge i ngaihdan?” tih pahin min rawn en a, an vaiin ka chhanna an nghak tih ka hria, chhan mai dan tur ka hre loin ka awm a, a rukin Jordan-a hi duhin lo star ve em em mah ila ka neih phak tur leh ka hnaih phak turah ka ngai lo. Inneih a sawi pawhin min hmuhsit vangah ka ngai tlat a, engvanga kei neih nei lo hi min duh nge anih lah ka hre hel lo. Kan inthlauh zia hriaiin neih tumna ka nei lo hrim hrim bawka. Mahse, Pitei lo chhan dan teh thlawt chuan min ti tlawmngai lutuka,ka nei ngei tur a ni tiin ka ngaihtuaha, an chunga ka awmna tur anih phawt chuan ka nei ang. Ani hian min neih a duh chhan tak tak ka hre lo,mahse,heti taka min neih a duh chuan ka hnialna tur a awm hauh lo ti zawngin ka rilru ka siam fel nghal chuk chuk a mi ber. Chutihrualin ka mal lutuk erawh hrehawm ka ti lo thei lo.
“I ngaihdan dan tha ka ti vek” ka tih takah chuan ka kut a rawn hmer na salh.
“Aw le, in pahnih duhdan kha a pawimawh ber a, Mama hi chuan a sawi sa vek, i chhungte lo chhan dan tur pawh a rinlawk ang chiah a ni bawka,kan fapa neihchhun anih angin a nupui neih danah hetiang tehngawt hi chu kan lo beisei lo viaua, kan theihtawp chhuah ve pawh tha kan ti a, mahse, lungngai suh, Sawmtei nu leh Pa khan engkim an kut a nghah vek pawi an ti lo niin an sawia. Anni chu kan ti hautak hauh lo anga,mahse, kan chhungkaw mo tur hi zahawm takin lo lawi se kan duh, engmah lo ken pawh ngai kan ti lo. I lo ken ngai kan tih loh vang hian kan hmu nep che tihna a ni lo ania. I mamawh tur i lo ken chuan kan duhtawk mai zawka, a hun erawh in pahnih in sawi dun ula, Sawmtei pa te hnen lamah engkim kan ti fel mai dawnnia” ati a, a sawi laia ka lungphu dut dut chu an hriat ve ka ring hial mai.
Sawmtei pa te lehzel in engkim an lo hria mak ka ti a, mahse Rindika leh Jordan-a inpawh zia ka hrechiang tawk tawha, Sawmtei bulah engkim hi Rindika’n a sawi tih ka hria, Sawmtei’n a pa te a lo ngen a ni ngei ang chu,heng zawng zawng aia ka hriathiam loh zawk chu Jordan-a bawk hi a ni, engvangin nge min neih a duh tlat hi ka man hlawl lo.
Kan chawei chhung zawngin kan pahnih chungchang engmah an sawi zui lo, kan zinna lam chanchin an pafa in an sawi dun a, a khat tawkin Jordan-a nu in a lo sawi belh zauh zauh chauha, ngawirengin ka ei mial mial thung.
Kan eikham hnu lawkah Jordan-an min thlah zui nghal maia,ka tawng chak hlawl lo chungin min neih a duh chhan zawh fiah ka la duh cheu.
“Ngatinge min neih i duh?” pawn lam en vauh vauh chungin ka ti chhuak phawng. A ngawi deuh vung vung a, ka sawi zawi lutuk a a hre thei lo emaw ka ti hman.
“A chhan a awm lo, ka nei duh che,chuzawng chu..” a rawn ti leh lawia.
“Kan inhriat na a la rei si lo, chuan ,in khawsak leh ka khawsak dan inmil loh zia te hi, min hriat ang hian engmah ka nei lova, chhungte ka nei lo a, thil hlu ka nei lo bawk..” ka tih laiin Motor a ti ding a,phawk deuh hian ka en a,ka inrin hmain amah si chetin min pawt hnai a,ka khabe ah a rawn dawm zui chu ka thaw tha ngam lo,a chetdan chuan min ti hamhaih tlat.
“Mi tu emaw duh tur hian an chhungte emaw an thil neih ka mamawh lo,ka nei duh che a, i nihna diktak, nangmah a nangmah hi hmuh ka duh rualin hmuh tir che ka duh bawk.”ati a, rawn kun hniam zui a, dim leh dam takin min fawp a, chhang let lo in ka awm ngaiin ka awm ngar thung, a in la hrang a.
“Anih leh mi in an nuih che i hlau lo em ni?,i hnuai a thawk,engmah nei lo lehnghal i nei dawn a...” ka ti leh talh ,min rawn en a.
“Hlau lo, ka ngaihtuah fel tawh, Nupa ni tur hian mi pahnih an pawimawh,thil pakhat erawh ka ngen che,Zobiaka hi hnaih tawh suh” a ti a, a tawng tawp lam a chang lek lek..engvang a haw em em nge maw anih hrep le??
“Mahse, a ni te chu ka thian ania..”ka tih laiin ka hmui a rawn khawih a..
“A tawk, sawi zawm suh,tunah chuan thinrim ka duh lo, i mit nalh zet khan keimah chiah hi min en se ka duh ber” a tih chuan a aw a ring lo, mahse, a chiang kek kawk viau..
Hna thawhna hmun ka thlen veleh Sawmtei’n min lo lawm chul mai, thil hriat a nei tih ka hria,nia, a hre tur a ni, a Nu leh pa pawh ama lo biak vek anni tih ka hria.
“Eng nge in zin boruak chu?” a ti nghal sawt sawt a,
“A pangngai viau e” ka ti ringawt, a rawn kun hnai a..
“Kan pa in a sawi a, Jordan-an in inneih tur chungchang a sawi lai khan Poppy hmel a hmuhnawm lutuk a ti a, ka hmu ve chak sin le” ati a, a nui zui a.
“Enteh, engkim hi a thleng rang lutuk a,engtia awm tur nge ka la hre lo..i nu leh pa kha i hrilh a ni em?” ka ti a, a pen hmawr in dawhkan tlang a kik kauh kauh a.
“Dik tak chuan, aw ka hrilh anih kha, an lo chhan dan vel kha ka hriat khan ka tha a na tlata, Ka pa ka va bia a, a lo pawm nghal thlap, nangman i duh leh duh loh animai, laizawn ka nei lo a, laizawn ka nei dawn animai” ati leh siam siam a,lawm tur nge tah tur pawh ka hre lo..
“Jordan-a hian a nghak reilo ang tih kan pa hian a hmain sawi tawha, eng lo ania...In in an lo kal hmasak ber atang khan i chanchin a ngaihven ta reng a ti hial asin”ati leh a, makti lutuk hian ka mengphawk a.
“I sawi awmzia ka man lo...” ti chungin ka nui a..
“Ka sawi awmzia chu Jordan-a hian a duh che,a endan che hi ka hai hleinem,diktak chuan in ngaizawng angin zui pawh in inzui lo tih ka hria.Mahse pawi ti suh, engkim a pe ang che, Jordan-a hi amah a inhriat aiin ka hrechiang zawk ania” ati leh a...chhan ngaihna ka hre tawh lo..hetiang hi hringnun ah hian a thleng thei ngaiin ka ring lo va..mahse, a thleng tlat, chupawh keimah ngeiah a thleng, mi chung a thleng ni in thusawi thiam ber pawn sawi se ka awih lo ang..
Jordan-a nen kan inzui chhuak ta fo, a lo kal deuh reng bawk. Sawmtei nu leh pa ka tlawh ta ziaha, an fanu ang maiin min ngai hmiah thei hi fakawm ka ti thlawt. Ka In ah pawh chaw ei lo in an In lamah ka ei tum a tam em em a,Zobiaka erawh ka la be tlang thei ta lo fo, eng nge maw hriat hrep ni??, ka mamawh hun lai tak hian khawiah nge a kal ka hre lo va, a lo kal ngai der bawk si lo.
“Abby....” hmeichhe aw hian a rawn tih chuan ka hawilet vat, ka beisei loh takin Zobiaka leh Sangtei an lo ni a.
“Ekhai...nangpa hi..engvangin nge min lo tlawh ngai miah loh a?” Zobiaka hnenah ka ti nghal chiam peka.
“I pasal neih tur ka lo hria a....” a tih ringawt. A hria ang chu, chhungkhat alawm an nih le.
“Kha chu nakinah kan la sawi dawn nia, Sangte, i tha em?” ka ti zang vah, a bu nghat a, a hmel hlim sar-ah chuan Zobiaka nen an inbe fel ta anih ka ring.
“Ka ril a tam tawp, thil ei lawk ila..;” thawveng zet hian Zobiaka’n a ti a, ka pawm thlap, keipawh ka ril a ram ve tho. Restaurant a kan thu fel chiah tih ah Sangtei toilet ah a kal a, a hmain sawi tur ka ngah nen tunah chuan a bo leh duak lawi.
“Ka Phone a chhia a, bakah Sangtei i hi a insawisel reng a, tunlai chu an In lamah ka tal tam lutuk” ati ban chat.
“Um,atha lawm,i care loh chuan a chungah eng ngemaw thleng se i inthiam thei miah lo ang” ka ti ve a, a bu nghat a.
“Dik chiah,nei duh in nei duhlo mahila ka neih angai tho, ka fa a pai mek tlata, engpawh nise Mama hian neih a tum tak tak che hi mak ka la ti tho” a ti leh a,
“Keipawh..” tiin diktak in ka chhang mai..
“Nupui nei a chhungkaw din a duh tak tak hi mak ka ti zawk..ahh...enteh, saw..” tih paha a kawhna lam ka va en chuan Jordan-a leh Poppy an rawn inzui lut mek a lo ni a, min rawm hmu ve chiah bawk, a hmel a dur deuh khup mai, mahse, min hre ngai lo niawm tak hian a hawilet leh nghal daih bawk.
“A va lawmloh hmel ve, min thik chu a ni em lo ang chu maw?” nui kur kur chungin a ti a, za lo zet hian ka then ve ringawt.
Sangtei a lo let hnu lawkah eitur an rawn daha, ka eitur lam ngaihven loin Jordan-a leh Poppy khawsa vel chu ka en ru leh zauh thin a, ani lah chu ka awmve tih hre lo ang hmak in a awm a ni bera,inneih meuh Tum ta chu min care ve deuh ka lo beisei ngawt hi ka lo in ngaipawimawh lutuk anih ka ring ta hial.
Ka purse phawrh tumin ka bag ka zen a, "Zobiak, I tha maw? " Jordan-an a rawn Ti thut.
“Um, tha e, hei ka u thar tur hi kan hmu fuh a, thil ka lo eipui anih hi..I phalna kan la si lo va, a pawi em? ” zangkhai zet hian a ti a,Poppy a rawn ding hnai ve a, Jordan-a banah a vuan zauha,Jordan-a lah in ngaimawh hmel a pu lo.
“Ka hrelo, pawi maithei...” tih pahin a ner a,a hmel pawisak nei lo hmel lutuk chu bensawk ka chak et et bawk..
“Sangte, hei hi ka Cousin Jordan-a ania,kan unau ho Boss anih hi. Abby pasal tur hi a ni bawka.,chuan ,Mam,Sangtei hi ka nupui tur...” nui chung hian a ti a,.Jordan-a hmel a makti hmel lo lang chu ka en a, chawh hi ka lo ti ngawih ngawih ...
“Eng maw?Nupui maw?”a ti hu a.
“Yes, tun atanga thla kua a liam leh chuan Naute i hmuh beisei ang,ani em?” a tih leh chuan ka lo nui a, ngeiawm chhuah ka chak ve tlat,Zobiaka nen inzawmna kan nei miah lo chungin hmu lo turin min ti a, ani lemin a duh hun hunah Poppy a hmu tho...tenawm lutuk mai..
Chapter- 13
“Zobiak, Nupui i nei dawn maw?” Poppy zawk in a rawn ti a.
“Dawn chiang e,ka upa ve tawh lawm..” nui chung hian a ti a, ka bag keng chungin ka dinga.
“Ka kalsan dawn che u,tih tur ka la ngah em mai” Zobiaka leh Sangtei hnenah ka ti a, diktak chuan engmah tihtur ka nei hauh lo,ka awmdan tehthut mak an tih hmel viau nangin engmah an sawi lo.
“Ok, eee. Ka number i la dawn lo mi?” ati leh rih a. “Ka number i theihnghilh ami?” ka ti ve thung, a lu a thing a.
“Chuti anih chuan min lo call la, ka lo save mai ang, anih phawt u” ti chungin Jordan-a leh Poppy ka nuih lui sanga. Kan innei dawn tih hre tu vek kan ni a,be miah lo leh en duh loh tluan thak kha a lem riaua ka hriat vanga nui lui hram ka ni ber.
Taxi ka hmuh veleh ka phar a, Poppy leh Jordan-a ngaihtuah loh hram ka tum viau nangin ka hlawhchham hlauh thung.Jordan-a nen eng ngemaw kan inkarah a awm tih Hotel a thawk ho chuan an hre deuh vek tawha, Poppy phei hi chu engemaw hretu satliah ni loin kan innei dawn tih hre hmasa ber pawl a ni a, kan hre rual a ni ber zawk,a tir khan na a ti tih ka hmu thei hial a. Mahse, vawiin kha chuan na ti hmel pu loin min hmusit hmel a pu zawk ta tlat.Ka thawnthu chhiar thin a thleng thin langsar tak ang maiin, Jordan-a nen hian an Pahnih a an inkawp thup nan min hman an tum ve aniang ka ti that thata, chu em chu ni suhse tiin ka lu ka thing nawk nawk mai.
khua a lum uap churha, ruahsur tur niawm takin khua a dur em em lawi.Nidang ang nise khawthim a la hun lo va, mahse, tunah chuan a lang tlai ruih tawhin khua a thim tan der tawh bawk. Ngaihtuahna mumal nei lo zetin ka mu a, chaw ei chakna ka neih loh em avangin eitur ka siam lo hrim hrim.Zobiaka min rawn biakna number ka save a,kan inhmuh lohna a la rei loh nen sawitur a vang ta riau mai hi mak ka ti a, a chhan ka hriat si lohin min hlat tlat niin ka hre ber.
Khawpui ri dur dur ah ka harh a, tukverh ka hawn atangin thli a rawn thaw lut a, ka mu zal mai mai kha ka lo muhil daih chu niin, ka khar nghal sawk sawk a, ruahsur hi ka ngaina hlawl lo. Reivaklo ah tam mangkhengin a rawn sur ta chiam.Inhnuai ber a awm ka ni bawk a rin ai tak chuan thawm a na lo thunga,mahse, kan thenawmte In chung ruahin a nan ri ka hre thei a, a tam thawkhat tih a chiang,ka beng hup chungin ka inzial mum kak maia, hetiang hunah tak hian Pasal neih ka chak thin,Pasal angchhungah thlamuang tak a muthilh ka chak ngawih ngawih zel.
Ka Phone a nghawr dar dar a, mahse, ka tihfo danin kawlphet laiin ka pick-up duh lo, khawih pawh ka khawih ngam lo. A tawp a, a rawn ri leh a, ngam leh ngam lo in ka ban a, Blanket hnuaiah ka en chuan ka beisei loh takin Jordan-a a lo ni a,mahse, ka pick-up chuang lo, duh leh ruah sur ban hunah ka call back mai ang chu..
Rei tawkfang a sur hnuah a zia ta deuh, Tukverh ruahin a rawn theh thawt thawt pawh a awm ta lo. Jordana ka call back dawn leh dawn loh ka ngaihtuah a,min biak duh chhan ka hre lo va, hna thil a ni em pawh ka hre hek lo.Chiang taka ka hriat chu inngaizawng anga kan inzui hnu leh hma pawn thil pawimawh tawpkhawkah lo chuan min rawn call ka hre mang lo..Hreh ru tak chungin ka call back a.
“Hello...” nelawm lo zet hian a rawn ti a.
“Miss call ka hmu” sawitur dang hre lo hian ka ti a.
“Anih chu..” tih bak a sawi lo, min chhang a tawi tek tawk lutuk chu ka call back ta kher ka inchhir rum rum mai..Mahse,
“Thil pawimawh a awm em?” ka ti leh ta tho, min be peih vak lo anih ring mah ila ka call tawh laklawha, ka haider lui a ni ber.
“I kawngkhar bulah hian huh vekin ka ding a...” a rawn ti chiah chu ka thu chhuak nghal hlawl mai.
A sawi ang ngeiin kawngka sir bang chhaklam nghengin a lo ding a, ruah kha a tam mai bakah ka veranda hi a lian lo a, Gate neih loh aia nei ang vel niin kawngkhar nen a insi lo chauh bawk. Vanneihthlak takin Gate ka kalh lo hlauh a, a lo lut a, mahse, kawngkhar a bulah a din leh tak tho avangin a huh vek anih hmel.
“Lo lut la..i ding rei tawh em?” ka ti nghal sawk sawka, a Taksa-ah a T-shirt huh a bet thlar a, a pian nalh tak a lang chiang viau bawk.
“Rei thawkhat..” a ti hmuk a, a sam huh a tuai puat a,min rawn zui lut ve nghal a, ka hmuh chian zual takah chuan a kekawr a huh ve vak lo tih ka hria.
“I kawr kha hlip la,mahse ka kawr lah i ha thei dawn bawk si lo..” ka ti nang nanga,Room AH Towel la turin ka luhsan a, Towel nena ka let leh chuan ka rilruah kan In a lo len hmasak ber tum kha a lo lang a ,a chhan in ang lo mah se khang hun lai-ah khan ka let leh lo thei lo.
A kawr a lo hlip tawh a, a pian nalh tak chu vawikhat ka en thuak khan ka hmu kim hman vek,a kawng a fek rat a, a lai hnuaiah hmul a awm thla raih bawk. Infiam mi ang maiin a pian a dik a, a in uluk tih a hriat hliah hliah Thil ngaihtuah chhuah ka nei thuta,ka kawr pakhat, lian tak mai,mut na a ka hak zauh zauh a awm a, ka mal te thleng a khuh thla vek a, ani tan chuan a tawk reng ang.
“Ka kawr pakhat lian deuh a awm asin, ha mai la, i kawr kha ka lo sawr ang,washing machine ka nei bawk si lo va, fu deuhin sawi ila, rei vak lo zar hnuah ka nawt ro mai ang’ ka ti sawk sawka, ruak a a awm chuan keimahah nuam tih lohna min siam tlata,amah lah chuan ngai pawimawh hmel a pu der lo.
“Um, pawi hleinem, khawiah nge i bath Room a awm” atih chuan ka kawk ve maia,bed Room atang leh choka lam atangin a kal theih ve ve.
Ka thawmhnaw dahna ka hai chiam pawhin ka hmu ta mai lo va, ka hnunglama thawm a rawn awm chuan ka thil zawn ka hmu ve chiah a, kawr khai chungin ka hawi leta,ka hnungah Jordan-a Towel veng chung hian a lo dinga, a towel hnuaiah engmah a ha lo anih hmel.. Ka tawng hmain,
“Ka kekawr pawh a huh tel tho sia, ka hlip ta mai,kawr chu ka lo ha dawn mi?” a tih chuan rang fe hian ka pe a, Room ka chhuahsan zui nghal daih bawk.
“Ka thawmhnaw ho chu su duh lo mai rawh, Driver a lo thleng tepa, ka thawmhnaw a rawn keng ang” a ti a, min ep zawngin a rawn thu a, a Phone a khawih pah mawlh mawlh.
“Eng nge i lo tih dawn?” ka ti teh ngawta, ka zawhna chu atthlak ka ti leh hnuhnawh viaua, mahse, zawhna awm lo a ni lem chuang lo..
“Ka nupui tur hmuh ka chaka, chu chu ka lo kal chhan" tha tak hian ti a,“A tha nih chu..” ner deuh chungin ka ti ringawt, ka pum a rawn ri raih raih chu a hriat hlau zet hian ka dawm vat.
“Zobiaka nupui neih tur kha engtikah nge i hriat?” min en chuang lo in a ti leh daiha.
“A tir atangin “ ka ti deuh hmak.
“Min hrilh si lo a” a tih leh chuan min demna ri a hriat theiha,min dem ngawt turin dikna a nei hauh lo.“Min zawt bik chuang hleinem, a thuhrim-in i Cousin ania, hre tur zawk i nia” ka ti leh a, tilui tih hriat tak hian a then suk a.
“Sangtei khan engmah a hre lo em ni?” ati leh chu a sawi awmzia ka man lo..
“Eng chu maw? ’ ka ti a. Rum angreng tak hian min en a.
“Eng vak nge ni ang? Zobiaka leh nangmah hi mawle” a tih takah chuan ka thin a khei zak mai, midang rinna nei lo,mahni tihsual hmu duh hauh si lo hi ka hua..
“Engmah hriat tur awm lo chu a hre nang. Thian kan ni a, chu chu chiang takin a hria.Nang ang ka ni lo..” ka ti ram hmak.
“Kei ang i ni lo,,a dik chiah..” tih pahin a tho a,a din tak vang maia tlan chhiat ngawtna tur a awm lo. Mahse, a hmel landan chuan ka awm a ti nuam lo va, min rawn pan chu ka melh ngar mai. Ka dar tawn tawna a rawn vawn rualin,
“Eng nge tih i tum a?” ka ti chang faka, ka ding tur min nam bet chung hian “Thu hle hle rawh, pawngsual che ka tum hleinem. Ka thusawi hi ngaipawimawh la ka duh tih hrilh nawn leh che ka tum mai anih hi,Zobiaka leh nang hi...” a tih laiin,
“I zak lo lutuk, min thlah rawh..” ka ti chiama, mahse min vawnna a nghet ting mai thung.
“Ngaithla teh, ka nupui i ni vat dawna, i duh duh dan in i awm dawn lo ania. I Bialpa nen hian hun ka pe dawn reng reng lo che u' a tih laiin a hmaiah ka ham nghek. "Nang hi' tih pahin a thle sawna, ham leh ka tum chu a indang zela, min ti let hauh lo thung..
“Poppy nen in duh tawk a inkhawsak lai hian engmah tisual lo hi min puh kual miah suh, nang hi i tenawm lutuk zawk" ka ti hmawk hmawk maia. Ka thinrim lutuk vangin ka sawi tum pawh ka sawi tha hleithei lo.
“Poppy nen maw? ..engthil nge kan tih a?” thinrim aw hian a ti thawt.“Ka sawi lo vang,kei aiin i hria...min thlah rawh”ka tihkhum leh nghek.
“Aih, ka hre miah lo...chuan, hei hi thikna ah ka ngai thei angem?” tih pahin ka beisei loh zetin a nui ta suk. Rum tak hian ka en a.
“I duh duhin ngai rawh,min thlah mai teh” ka ti leh a.Hmun leh hmunah ka au khum deuh chiam chiam a ni ber. Min thlah veleh ka tho phat a, min man tum awm pawn a awm tawh lo...
“Chuan, Poppy chu???” ati leh nghut a, chhan pawh ka chhang buai peih lo.
“Haw tawh rawh” ka ti bul hmaka, a mithmul a ti sang zauh a...a tih fo dan a ni a, inhmeh ka ti zo vek tawh..
“Ka Driver lo thlen hunah le..” awlsam tak hian a ti a, inhauh buai leh ka peih tawh loh avangin ngawih mai ka duha.Mahse, ka ngaihtuahnaah thildang a lo lut a...
“Kan innei dawn anih chuan phut ka nei...” ka ti ta thut. Hnunglam a ngheng a...mutchhuah hmel zet hian min en a.
“Sawi la...” tha tak chuan a ti ve mai bawk. Thawk ka la halha, a mitah tak en ran chung hian,
“Min neih duh chhan hi ka hre tak tak lo va.Poppy nen in inkawp tih midang laka thup nan min hmang ah ka in ngai deuha,engpawh chu nise midang hmuh laiin Poppy chhuahpui tawh suh, ka induhtawkna a ti chhia, chuan ka hna hi ka thawh zawm duh bawk..” ka tih lai mekin a ban a vaia.
“Hna chungchang tel loin a dang kha chu ka pawm" khauh fur hian a ti a.
“Chuti anih chuan kan innei thei lo anih chu...” ka ti ve hmiah.
“Abby...i nihna hriat tir che ka tum ka tih kha, buaina siam suh..” nin hmel tak hian a ti a, a mitmeng tur zet chu ka en ve ran a, ka hawi sawn duh bik lo...
“Engmah nihna ka nei lo, ka nihna chu tuna ka awmdan hi animai...”kha zet hian ka ti a,kan inmil loh dan em em pawh hi ngaihtuah tham tak a ni..
Kawngkhar an rawn kik chuan a Driver anih ka ring nghal maia, ka thaw ru huai bawk...ka in a chep si, nelawmna nei miah lo nen a awmdun reng na atan a hmun thlanawm lo ber a ni hial ang..
Kawngkhar ka va hawn chuan ka rin ang chiahin a Driver, a hma a ka hmuh tawh kha a lo ni a, Paper bag a khai a..
‘Hei hi Pu thawmhnaw ania” tih pahin min pe a, ka lak rualin kal tumin a inher lehnghal a,
“Aw, lo lut la...ani pawh kal nghal a duh alawm”ka ti teh ngawt, Jordana'n ka tawngri a hre phak vek tih ka hriat vanga sawi lui ka ni.
“Motor ah ka lo nghak ang” a driver lah chuan a ti ta tlata, chelh din chi hauh loh hian a kal nghal daih bawk.
“Min ning viau pawh nila ka hnathawk te bulah tihlan kher angai lo ania” ka hnung mai atangin a rawn ti a, min din hnaih viau anih hmel.
Muangchangin ka inher a, ka rin ang chiahin min din hnaih mah maha,min rawn si lo chauh a ni ber..
“Kha i thawmhnaw..” tih pahin ka thil khai ka pe a, mahse, la lo in a thle buk ringawt..
“Ka hmai hi a thip vang vang mai,engtia tih chi nge?” tih pahin a then suk a..ka lo hre leh tawh pek lo.
“Khawi, ka lo en ang” ka ti nghat, kal hnai chuang lo in ka dingdihlip a, kan insan hleih deuh bawk nen ka chhoh en ha mai..
“En chiang la,midangin min zawh hunah engtin nge ka chhan ang tih te pawh ngaihtuah angai” a tih leh chuan min chhaih tih ka hria, a aw ah thinrimna a lang tel tlat lo.
“Zawhte in a ham che animai..” ka ti a, ka nui zui a, ka kawngah a rawn kuah thuta.
“Min nei vat la....” zawi angreng tak hian a ti a, a thutak ngang mai
“Inneih hi ka duh em pawh ka hre lo..” ka ti mawl hap maia, vawi tamtak ka inngaihtuah tawha, neih ka duh nge duh lo pawh hi a chang chuan ka hre thin lo atin ni.
“Naktuk zanah Sawmtei pa te hnenah Palai ka lo kal tir leh dawn asin,a hun pawh lo sawifel tir nghal ang a,hemi sawipui tur che hian ania ka lo kal ..” a ti leh a, ka chhang lo...Min la ku ah bet reng avangin a taksa awmdan ka hre theia,hetiang tak hian Mipa taksa hi ka la belchiang ngai lo. Jordan-a nen kan intawn hnu hi chuan Mipa anihna ka hria a, hmeichhia ka ni tih ka inhre chhuak fo bawk.
Muhil thei loin ka let ka let maia, Poppy nen engtin mah an awm lo tih engtin nge ka hriat ang tiin ka ngaihtuah a, aman engmah a awm lo ti a a sawi vang ngawt khan ka ring thei lo. Kan innei anih chuan pa thei lo a ni lo va,a chetdan tur ka hria, a nupui ka nih dawn miau avangin sawisel tur ka ni lo ang, chumai bakah kei ngei pawn ka mamawh ngei ang, tun atangin min khawih hlek pawn ka awmdan a danglam thin tih ka hai lo,mahse, engtin nge Poppy nen an awmdan diktak ka hriat ang tih bawkah ka buai leh zel.
Ka beisei loh takin khawvar dawn ah ka lo muhil ve mial a, ka Phone ri in min ti harh leh ta chauh. Kimtei a lo ni a, kan inbe khat viau,diktak chuan Jordan-a ka nei dawn tih pawh ka la hrilh lo..
“Hello..” mutchhuak aw hian ka ti a.
“I va mu rei ve, hna i kal dawn lo mi?” zangkhai zet hian a rawn ti ve thung, ka mutna bul a Sana inhung ka en chuan dar 7 a pel tawh.
“Kal dawn e, mahse, nang i va hma si ve” ka tih chuan a nui a.
“Rawn thawn che ka tum alawm, Airport ah ka awm mek, vawiin ah ka lo thleng ang..”a rawn tih chuan hlim fe hian ka khek raih mai..
“Awi, ka van lawm tak, hrilh tur che ka ngah lutuk, mahse, thil pakhat...keipawn surprise na tur che ka nei” ka ti ve a, a hriat hun a mak a tih dan tur ka ngaihtuah a, ka nui var var mai..
“Ka hre tawh maithei asin..” a tih chuan tlemin a aw a zuai ta deuh.
“naaa,nih leh i hriat chuan Sawi la..” ka ti nang nang.
“In in i chhuahsan...” a rawn ti mar at. Engmah ka la hrilh miah lova.Zobiaka khan min buaipui hneh lutuk a a awmna a hla bawk nen,atan tih theih a awm chuang lo tiin ka hrilh ta miah lo va. A Nu in a hrilh a ni ngei ang..Vengkhat a awm, inthenawm mai kan ni a. A nu chuan a hre lo thei lo.
“Um, nia, a dik alawm..” zuai raih hian ka ti ve a.
“I thian ka ni emaw ka lo inti asin...”a ti ta khauh, nia, thinrim tur a ni,engmah ka hrilh lo hi ka ti dik lo.
“Sorry...lo thleng phawt la, Airport ah ka lo hmuak ang che” ka ti ta ngawt,engvang a sawi ngawt nge ka nih ka in hre lo,hna ka kal dawn a, ka chawl thei dawn hauh lo,hna chu hna a ni tlat,mahse tun hun hi Jordan-a ka nawr luih hun tak pawh a ni maithei...Hlim tak hian an rawn tum hun tur a sawi a, thildang kan sawi leh nual bawka, eng ang pawn thinrim thin mah ila kan inhaw tak tak ngai lo..
Hotel ka thlenin Sawmtei a lo la thleng lo ve tlat mai. Tukthuan pawh ka ei ta lo. Sawmtei nu leh pa hnenah Palai an kal dawn tih ka hrilh a, tlang takin a ni tur ruat nghal a tha em tih min lo zawt leta, an fanu ka ni lo a, an mawhphurhna ah min la mai zawk a, kan inhriatna a la rei lo chunga min buaipui danah hian mi tha tak anni tih alang ngawih ngawih.
Tih tur ka en kual zung zung a, Bill chi hrang hrang a awm teuh maia, niminah chawhnu lam ka chawl tawh a, Sawmtei lah thil tih tur a neih avangin a haw hma ve tho bawk nen nikhat lek mah nise khawih fel tur a lo tam hman viau tho. Hotel ringawt hi chu nise a zia, mahse, Club lam enkawlna leh sum chevel enfel hi a hautak a, hmanhmawhthlak ni lo mahse hnathawh tur dahkhawl hi ka duh lem lo.Jordan-a huat zawng tak a ni tih sawmtei khan a sawi zauh tawh bawk. Mahse,a sawm chevel hi mi pakhat tan enkawl zawh mai chi pawh a ni chiah lo.
Dar 11 rik dawnah an pathumin an lo thleng rual veka, tihtur pawimawh dang a awm anih hmel.
“I lo buai em? Doctor kan hmu lawk a” a rawn ti nghal bawrh bawrh a,ka buai loh thu in ka lo chhang thuaia, Jordan-a lam en loh hram ka tum tlat, a chhan ka hriat si loh in ka zam a ni ber...Nizana a haw dawn kha chuan kan inpawh em em a,kan awmdan kha ka sawithiam lo zawk hial.
“Morning...” ka bula rawn din hnaih paha a tih chuan ka en ta nge nge..a hmai ka hamna hnu lang riak mai chuan ka mit a la nghal chata, ka awm a ti nuam lo..
“Morning...”ka ti let ve a, kan innei dawn tih hre mah se tlangnel tak a biak hi harsa ka la ti tlat..kan pahnih a kan awm leh kan inhau zel bawk si.
“Jordan,ngatinge i hmai kha...nichin khan ka hmu miah lo ?” ka hlauh ang ngeiin Sawmtei'n a ti ta chat.
“Zawhtein min ham..” tih pahin an nui hk maia, za lo zetin ka nui ve ta ringawt..
Jordan-a Phone a rik takah chuan ka thaw huai mai,Phone a en a,
“Ka lut dawn ania, chuan, Abby,nakin deuhah officeah lo lut lawk ta che..” ati a, a kal zui chu animai. Sawmtei’n min en a, room lamah a bu zauh.
Rindika kalsawn hnuah Sawmtein an in entir chungchang a sawi siam siam a, kum hnih an innei tawh a, ala rai lo. ,hrehawm a tih zia a sawi lai chuan ka lo khawngaih ru viau,pasal neih a fa neih si loh chu ngheh a har ngawtin ka ring..
Jordan-a room kawngkhar a rawn inhawng a, Rindika nen an rawn inzui chhuak leh a,luh buai angai ta lo hlauh. Mahse, ka beisei lawk hauh loh Poppy a rawn lang zui ve nghal zat maia, ,engtik laiin nge a lo kal ka hre miah lo, ka kal hma in a kal nge ni anga Jordana secret roomah a riak zawk ni?
“Sawmte, tih tur a tam viau em?” Jordan-an a rawn ti nghal a, kei erawh ka thut ngaiin ka thu ngil at thung.
“Aih, tam viau pawh ka hre lo,awm chu a awm ang, mahse, a hmanhmawhthlak loh thung a” a ti vat.
“Ok, a tha nih chu,chhuah lawk na tur ka nei a” ati a...min rawn en reng tih ka hria,ka thluak a vir zawk mai..
‘Jordan...ka thiannu Kimtei a lo haw dawn a, Airport ah ka lo nghak ang che ka ti a, i hman ka lo ring ve ringawt a..”tiin ka nui lui sang maia. Office a awm kan ni a, a hminga ko ngawt tur ka ni lo tih hre reng mah ila Poppy vangin ka ko lui chak tlat.
Min rawn en chuan a hmelpa takah chuan a ngaihtuah mek a hriat theih loh.
“Dar engzat nge an rawn thlen hun tur?”ati a.ka sawi vat, sana a en zauh a,
“A pawi lo, keimah pawn ka kal thei alawm, in tihtur a pawimawh hmel sia” ngaipawimawh lo hmel zet hian ka ti leh lawia, ka hma a Computer Monitor chu eng nge lang tih pawh hmu miah lo hian ka en san leh daih.
“Nia, Abby, hretiam mai rawh, kan kalna tur hi a hma atanga tih lawk vek tawh a ni sia,Jordan..kal ila..” Poppy-in a lo ti ve thuaia.
“Driver in a hruai thei tho che a..” Jordan-an a tih leh chuan ka hawi chhuak a, vawitamtak ka lo hlawhtlinpui tawh,ka thinrim leh rilru nat chang a ka awm fo thin dan ang in tunah hian ka awm leh ta chiah,ka nui a, ka dak vah bawk..
“Aih, angai lo ang, Zobiakan kal ve a tum tho a, a rualin ka kal thei alawm” damthlap in ka ti a, Jordan-a hmel danglam nghal chu ka hmu lo der a, a kut a humruh a, a kekawr ipte a zen ta daih pawh ka hmuh hmaih hek lo,Poppy ka duh lo tih a hria, ani pawn Zobiaka a duh hek lo...Natna leh zahna min siam anih chuan a duh loh zawng ti tur in ke ka pen ve thei reng..ka Care hiam hiam na tur a awm bik lo e..
Chapter- 14
“Poppy, kan kalna tur kha chu Rindika nen pawh in kal thei in ka hria, Abby hian min hrilh lawk a, ka lo theihnghilh a” a tih takah chuan ka beisei loh em em a thleng a ni ber.
Poppy hmela min huatna lang chhuak nghal chu nuam ti zet hian ka en a, Poppy a ni emaw Jordan-a pawh nise min tih ang chiah a ti let turin dikna ka nei in ka hre ve tlat tawh. Zanin ah Palai an lo kal leh anih chuan kan inneih ni tur pawh a chiang tawh dawna, ka duh emaw duh lo emaw ka tal awk laklawh tawh a, Nupui nihna ka nei tawh dawn. Nupui ka ni anih chuan a hming ringawt a nupui nih ka tum hauh tawh lo,min Hmangaih lo pawh nise Nupui ka nihna vang ringawt pawn Poppy chung a mi ka ni tawh sa reng tiin ngaihdan ka siam fel hmak.
“Mahse, Jordan..nangmah nen kal tur kan nih kha...” thinrim insum tih hriat tak hian Poppy-in a ti a,ka lo nui a...Jordan-a en chungin,
“Nia, kal ru, hna hi a pawimawh hmasa ber alawm” ka ti ve ngial. Ka awmdan engkim chuan ka ngaipawimawh lo tih a lan tir ngawih ngawih a ni ber. Ngaihpawimawh loh nih aia na hi a awm in ka ring lo, tlem te ngaihpawimawh lohna ka lantir ve chauh zawk ah ka ngai fan..
“I chiang chiah em?” a ti leh nghut a, kan boruak hahthlak zia chu puitak a ni,hahdam awm taka ka lanna phenah hian ka thaw a chham lo chauh.
“Um, chiang e..pawi ka ti lo tak tak” tiin ka nui lui sang reng. Anihna takah chuan Zobiaka ka be reng reng lo va. An kal veleh hmanhmawh lutukin ka biak angai tihna animai.
“Ok, chuti nih chuan a tha anih chu, kal ang” Poppy hnenah a ti a, chhan pawh a chhan hma in a kal zui daih bawk..
An kal takah chuan ka thaw huai huai mai. Khatiang boruak kha ka la tawng fo dawn a ni tih ka rilruah a lo lang a, engpawh thleng se ka hmachhawn angai tih pawh ka hria,keimah leh keimah ka intih chak loh chuan heng ho hian min ti na reng ang tih ka chiang ve tawk tawh.
“Abby, eng nge in awmzia hi?” Sawmtei’n zawite in a rawn ti a, tumah kan tawng hre phak an awm lo.
“Engmah, a landan ang kha animai” ka ti awlsam et, a ner nak a, a awih chiah lo tih a hmelah a lang a, mahse, ka haider lui tlat thung, hrilhfiah emaw insawithiam tumna ka nei lo, engmah insawi fiah ka mamawh lo hrim hrim.
Zobiaka ka call a, vanneihthlak lutukin engmah tihtur a lo nei lo hlauh, min kalpui turin ka sawm nghala, Kimtei pawh ala hmu lo chungin awlsam te in a lo kal tur thu a rawn sawi a, ka thaw huai mai. Dar hnih a Lengpui a rawn tum tur anni a, muangchang in kal ila kan thleng rual vel viau maithei.
Zobiaka pawh ngaihsak lo in pawn lam ka thlir vauh vauh a, nun hahdamna hi engtin nge ka neih ang ka hre lo, ka nu leh pa kha la dam ta se ti hian ka nun ka hmang angem?, Putea tal pawh kha la dam se hetiang mai mai hian ka nun ka hmang lo ang tih ka hria,mahse,anni chu an awm tawh lo va, keimah chauh ka ni tih hre rengin mahni inkhawngaih hman ka ni lo.
"Thil ka zawt dawn che" a tih chuan,
"Min zawt la.”phur lo zet hian ka ti a, pawn lam ka la thlir tho..
“Mama nen hian engvang a inneih tum nge innih a?” a tih chuan ka phu ru deuh zawk thei, mahse,engtikah emaw min la zawh ka rin tho anih avangin mak ka ti hran lo.
“Nang leh Sangtei hi ngatinge inneih in tum?” ka ti let sap a, a nui a..
“I hria alawm, Naute vang..” awlsam tak hian a ti a.
“Ka ring chiah lo, Mipa i nih angin i mawhphurhna i la a, mahse, i duh loh tlat chuan i nei lo thei,a chhan chu maw i neih chhan tak chu induhtawnna vang zawk anih kha " Inti fing tak hian ka ti a.
“Nia, maithei, nupa nitur khawp hi chuan tlem a induhna tel lo chuan a theih loh tluk a ni, ka duhlo hlawl chu ka ti lo keipawn. Mahse,ka neih chhan bulpui ber chu Naute vang erawh a ni chiang” ati leh charh.
“Um, a tha, keini pawh kan induh tawn tihna animai..” ngaihsam hmel fe hian ka ti a,a hmel ka la en ngam chuang lo, dawt ka sawi tih a hmuh ka duh tlat lo.
“I thian ka ni a, engpawh min hrilh thei ania” ati leh a, thil hriat a tum khawp tih ka hria, inneih kan tum ve ngawt dan hrilh mai ka duh ut ut, mahse, hrilh dawn ila enge ka sawi ber ang? Min neih luih a tum tih emaw, a chhan ka hre bik lo tih emaw hrilh ta ila enge a tul na tur? Ani hian engmah min tihsak thei pawh a ni lo va. Chuvangin hrilh loh law law a thaa, bakah mi zawng zawng hian thuruk kan nei veka. Keipawn hei hi ka thuruk tur a ni ve mai.
“Engmah a awm lo, diktak chuan kan inkawp rei lo tih ka hria,mahse, inneih a hmanhmawh ta em sia, keilah mi in luahin ka lo awm ve lehzel bawk nen,a ka awm vat kha ka himna turah angai a” ka tih takah chuan a thaw hak a..
“Ok, nia, nangin engtin nge i ngaih?” a la ti ta fo, hreh ru tak hian ka en ta nge nge, mahse, min en lo in hmalam a lo en thung.
“A ngaih dan ang chiah hi ka ngaihdan tho, tlem chuan ala hma deuh ka ti thung” ka ti a...dawt pakhat humhim tur hian dawt engzat nge sawi ngai ang ka hrethiam tawh lo.
“Um,a tha reng alawm, mahse, ka rilru a nuam thei lo, Poppy leh Mama hi...” a ti uk a, sawi zawm lo in a ngawi daih,eng nge a sawi tum ka hre chak tehmeuh maia. Mahse, ka hriat tulna aiin tul lohna a tam zawk anga,ka natna belhchhah tu mai a ni dawn tih ka chiang..
“A ho em mai, tupawn nunhlui kan nei vek alawm” ka ti a, a rilru nawmnan ka nui lui hak haka,za lo zet hian a then ve ta nge nge..
Kimtei nen kan inhmu chiah chu kan rak chel chul mai, kan inhmu lo rei tawh em atin ni.Tlemin a lo thau ta deuh tih loh ah chuan danglamna vak a nei lo va, nula te fel rawn, hmeltha leh hlimthei zet mai a ni a, a nunah kei ang in harsatna a tawk ve lo bawk a, ka awt ru ngawih ngawih thin.
“Min lo lam dawn tho sia, ka nu te kha lo kal angai lo ka ti a” Motor a kan thut fel hnuah a ti a.
“Nia, angai kher lo,enteh, hei hi i awm loh chhung zawng a ka thiantha ber anih hi,Zobiaka ania, chuan nang chu a hria che..” ka ti a, innel tak ang maiin an inbe thei nghal mai..
“Eng nge Surprise dang chu?” tih pahin Seat inkarah a rawn dak a..
“Pasal ka nei dawn a..” ka ti deuh tawp maia, ring lutukin a nui ta vak vaka, sawi pawh ka sawi zawm lo..
“Mawli, engtin nge nang hi i lo danglam theih?, dawtsawi pawh i lo thiam ta ..” tih pahin a nui leh a..ka nui ve ringawt,Zobiaka’n min rawn en a.
“Dawt a ni lo,a Pasal tur chu ka Cousin ania” a lo tih ve tak ah chuan a nui tawp nghal hmaka, surprise dik tak a ni.
“Engmaw?!” awih lo tih hriat zet hian a ti ban chat.
“Amah chu Zobiaka cousin hi ania, tlemin kei ai chuan a upa deuh a, tuna ka hnathawhna Hotel neitupa hi ania....Jordan-a..” ka ti leh tawp, a hming ka sawi zawng ringawt pawn ka lai deuh hu mai..
“Aaaa, engmah ka ngaihtuah thei rih lo...ka nu in engmah min hrilh miah lo asin” a ti leh hram,a la awih chuang miah lo anih hmel..
“An la hre lo ang, zanin hian a ni tur vel an ti fel dawn a...engpawh nise min lawmpui dawn na nge?ka best tur ber i ni ania” ka ti leh a,za vak lo hian a then sak a,a rilru a buai hmel viau..
“Lawmpui e...mahse, amah ka hmuh ve phawt angai, a phu reng che em ka hre duh” ati leh nghat a,ka lo ip chawih mai, phu leh phu loh thu ah chuan min neih a duh ngawt pawh hi a mak tawk tawh viau zawk.
“Chutiang sawi suh, a unaupa hi a tan ania” ka ti vata, Zobiaka a rawn fiamthu ve hlut bawk nen kan boruak pawh a pangngai leh ta a..kan nui ho bawk bawka, hmuh ve vat a chak thu a sawi ta deuh chhen.
Hna ah ka let leh ta lo law law. Kimtei te Inah rei vak lo kan awm a, Zobiaka nen Bazarah kan tei kual a, lei tur ber pawh kan hre chuang lo.Nidang nen Zobiaka awmdan a in ang lo em em mai a, min lo en leh reng thin bawk nen, a hma ang bawk khan kan inpawh ta lo riauin ka hre leh tlat tawh. .
“Kan haw mai dawn mi? I chauh hmel ka ti”ka tih chuan a bu nghat a.
“Nia, ka dik chiah lo, vawiin chu kan In ah lo leng ve hrim hrim la...”ati a, an In hi ka la kal miah lo, kal turin min sawm fo mah se chhuanlam ka siam kual zel a, ka la kal ta lo..
“Aaaa.....” ka ti hman chauha,a hmel a lawm vak lo niawm tak lo lang chu ka hmuh rualin ka tawp leh rih a. “Aw, kal ila ni mai lawm...” ka ti ta nge nge.
An hausa bawka, an in a nuam tawk viau. A Pa Officer niin a eiru em tih lam ka lo ngaihtuah tur a ni lo,an awmpui nula pahnihte chiah an lo awm a,mak min tih hmel fe hian min lo en dun ha.
“Ka nu te an zin a, Room ah chho ila” ti chungin inchung panna step, teak a siam hnum hlurh chu a pan a, a hnungah ka zui ve vat. Mipa Room a han inkawm ngawt chu dikin hre chiah lo mah ila amah zawk a kal nul nul bawk nen tihngaihna a awm lo.
A room a lian viau mai a, ka inluah chanve hmawk kha a ni hial ang. Mipa Room tih takah a fel fai tehchiam lo va,mahse, hnawk tawp lutuk erawh a ni lo,a kawr a hlip nghal mawlh mawlha.
“Ka intleuh lawk dawn, kha laiah khan album a awm, i duh duh kha lo en rawh,Mama pawh a awm tel ve nual ang” ati a, a kawhna lam ka pan a, Lehkhabu inrem tlat thap sirah Album lian fe fe pahnih a lo daha, ka la thlaa,ka keu kual thuak thuak hnuah ka daha, pakhat zawk ka la leh a, hei chu tlemin a thar ta deuh.Phone leh Computer tha tak tak thil dahthatnan awm tawh mah se Thlalak hi chu Print a, Album a dah ngei hi a lo hluin ka hre thar leh ta. Ka keu zel a, a tawp lama ka beisei loh lutuk ka hmuh takah chuan ka thaw hak mai.
Ka thlalak a lo awm teh tlat, engtik lai ami nge ka hre thei mai lo va, MZU ka kal lai ami a ni tih ka chiang thung.
Bath Room kawngkhar a ri rak a, ka khup vat a, a dah naah ka dah sawk sawka. Engtin nge ani hian a lo neih ngawt dan ka hre lo.
“Mama chu i hmu maw?” a rawn ti a, kawr ha lo in Boxer chiah a ha bawk nen nuam ka ti lo, ka thianpa pawh nise hetiang a thawmhnaw ha mumal lo a awmpui hi ka duh lo.
“Hmu e, thawmhnaw ha teh, mi an lo kal palh ang” ka ti a, nui mai.
“Lo kal mai mai ang hmiang, a ho em mai” a ti duh lek,mahse, a ha ta tho, kekawr dang a la ha ta chuag lo fo thung.T-Shirt a ha a, a palianin a pian pawh a nalh viau a, Jordana ang erawh chuan min hip lem lo.
“Abby...thil hrilh tur che ka nei, sawi chhuah loh ka duh a, mahse, harsa ka ti ve a, vawikhat tal sawi ila ka thawl hawk ka ring bawk a” ati a, khumah a thu a, kei erawh plastic chair ah ka thu thung.
“Sawi la, engthil nge a?” ka ti a, min en reng chung hian a thaw deuh huaia.
“Eng lo, diktak chuan thian ang ni loin ka duh che a,Nupui ka nei dawn tih pawh ka hre tho, ka thian i nihna bak hian ka en che a,mahse,...”a tih laiin Room kawngkhar a ri deuh pawp a, Step ah tlan thla an awm tih hriat takin a ri zui nghal dat dat bawk.
Phawk zet hian kan hawi phei dun nghal a, mahse, tumah kan hmu lo, a tho a, inhnuailam a zuk en anih ka ring, kei erawh ka che lo,tu nge anih ka hre lova,a awmdanah khan amah hmu lo mah ila an nula te kha annih ka ring hek lo.Zobiaka a rawn lut a,a hmel a phelh phung mai..
“Tu nge?” ka lo ti thuai,, khumah bawk a thu leh a.
“Sangtei anih hmel, ka zuk hmu hman chiah lo a” a tih takah chuan mengphawk vak mai.
“I thilsawi tul lo zet kha a hre ngei ngei ang..” ka ti hlak a, thinrim zetin ka en a, ka haw thar ta riau bawk.
“Oh, a hre sa reng alawm, mahse, Mipa ka ni a, nangin thian angin min en a, ka duhna che hi tihlan ka tum miah lo, thian ang in min en ang chiah hian i thian nih chiah ka duh,sawi chhuah ka duh hrim hrim a ka sawi anih kha...” a ti duh ta lek. Ngei tak hian ka melh raw a.
“Sawi tawh suh, Sangtei kha va um nghe nghe rawh, khatiang thu sawi tur i ni lo lutuk ,ka en dan che i hriat chuan a tawk renga, i sual em mai” ka ti leh hlak hlak a, a nui mai..
“Theih se chuan nupui neih ka duh reng reng lo, a hma pawn midang duh ka nei ka tih kha...”tih pahin za vak lo hian a nui leh a, kei erawh ka nuih a za lo nasa lutuk, ka haw hlur zawk.
“Min huat nan i hman dawn chuan ka sawi lo ah ngai mai la, i thian nih hrim hrim pawh ka duh ania” ka haw hnuah a rawn ti leh a, a msg ringwt pawn min ti thinrim leh tho,hreptak hian...engtin nge hetiang rilru a put theih ka hrethiam hlawl lo.
Mu chungin ka inngaihtuah a, tunah chuan kan inneih hun tur pawh an ruat fel ta, tun atang a thla khat a liam leh meuh chuan Jordan-a nupui ka ni tawh dawn. Inneih hun tur pawh tifel vek tawh si hi zanin hian vawikhatmah min la rawn be lo, eng inneihna nge thleng ang ka hrethiam leh tawh lo va,mahse, ka nei ang tihah ka chiang thung.Kimtei ten riak turin min sawm nasa viau a, Palai lo kal zan anih avangin ka hnial a, min tilui ngam lo, ka lo riak ta hle hle lo erawh ka inchhir thung, ka muhil thei lo va, Zobiaka ka be duh der bawk si lo. Sangtei biak ka duh a, mahse, eng nge ka sawi ang ka hre lo va,a rilru a natdan tur ka ngaihtuah a, pawi ka tiin ka zak hluah hluah. An inah khan lo kal lo tawp ila tha tur ania. Mahse, a rilru ka hre miau si lo. Hei ngei hi anih hi a hma pawh khan a thiannu khan min lo sawi khum ni??, Jordan-a pawh hian a rilru a lo hria a ni maithei, Mipa leh Mipa chu an lo in man rang zawk pawh a ni mahna.
Zanlai pelh fe ah ka muhil ta chauh, ka mutui lai ka phone riin min ti harh a, Kimtei a lo ni a, peih lo fe hian ka pick a,ka mit a kham urh mai..
“Eng nge" Ka ti bul hmak.
“Engtikah nge hna i kal dawn?” a rawn ti a,in khaihthawhnan chuan a ho ka ti rilru a, mahse, ka sawi chhuak lo..
“Dar 9 ah ,eng nge a?” ka ti leh a,
“Ka lo kal ve ang chu ka ti..” nui chunga a rawn tih chuan ka nui ve ringawt.
“Eng nge i rawn tih ang?” ka ti a.
“Eeee, Jordan-a chu ka hmu ve ang chu ka ti” a ti awlsam mai..ka hnial buai peih lo, ka hnial hneh leh dawn chuang lo tih ka hria..
“A tha alawm, Scooty lo keng la, kan kal rual dawn nia” ka ti tha ve mai, Jordan-a a lawm tehchiam lo mai thei,mahse, lawm lo in thinrim pawh nise a ti lang lo ang, a nupui tur ka ni tlat.Karkhat a ral leh phei chuan Hotel a mi zawng zawngin kan inneih ni tur nen lam an hre vek tawh ang.
Dar 9 rik hma hretin Hotel kan thleng a, ka beisei loh tawpin Jordan-a Car a lo awm vang bawk. Nizanah Hotelah a riak anih hmela.Kimtei nen titi pahin stepah kan chho dun a,Sawmtei a lo thleng tawh a. Ka hmelhriattir nghala, an mizia a in ang bawk a an inkawm thei nghal mai..Ka tana hmeichhe hlu ber pahnih anni a, Kimtei hi ka naupanlai atang a ka kawm a ni a, Sawmtei erawh thla khat liam ta a mi lek a ni thung, mahse, ka tan chuan a rei leh rei loh a ni lo, ka rinngam dan a in ang reng tawh.
“Abby, Jordan-a hi nizanah hetah a riak a, a hmu duh che a, a call tlang thei lo che niang” a ti a, min rawn call hauh lo tih ka chiang..
“ Hna thilah maw?” ka ti a, a thle bak a,
“Ka hre nang, in inneih na tur vel kha anih ka ring, Pi ka tih che beisei lo la..” tiin a nui kar kara,rum deuh hian ka en a, mahse, ka thinrim lo tih a hria..
Jordana officeah ka lut a, a lo awm lo va, a secret room lamah a awm anih ringin ka kika, min chhan mai loh avangin ka luta,a lo awm chuang lo. Khum erawh mutna hnu tih hriat tak hian a hnawk thung.
Bath Room kawngkhar a ri rak a, ka hawi phei nghal vat a, mahse, rang lutukin ka hawilet lehnghal a ni ber, thawmhnaw engmah a inbel tlat lo.
“I lo thleng tawh maw?” a ti nghut a, tawngka a chhang lo in ka bu nghat ringawt.
“Nimin thil thleng ka lo hria a, chhungkaw group ah i lar khawp mai..” a tih chuan ka khup a sai nghal dar dar maia. Mahse, tha tak hian,
“Eng chungchang nge a?” ka ti a. "I hre lo tak tak nge i hre lo der? " A ti bung vut. Ka lu ka thinga, kan inneihni tihfel anih tak vang nge ni a chutia ka lar ngawt mai ni???
“Ka nupui nimai tur leh ka Nau duhtak kha Room ah thawmhnaw ha lo in an lo khawsa dun a...”sehchilh chung hian a ti a, ka banah na zetin a rawn phih nghek. Ka rin loh lam a sawi takah chuan mak ti em em hian ka en a.
“Chutiang a ni lo...”ka ti nghal vat, ka darah a rawn tham a, a mitmeng hlauhawm lutuk chu ka en ngam mang lo..
“Chutiang ni lo chu eng nge ni a?,Abigail...mihring ka ni ve asin, min duh lo in neih luih che tum mah ila na ka hre ve a, ka zak ve thei asin”sehchilh rawp rawp hian a ti leh a.
“Jordan..ka dar a na ania..” ka ti sep, ka dar ruh a hmet tliak dawn emaw ka ti hial ,na tak a ni..
“Min chhang teh,engvangin nge hetiangin i awm?,min neih hi hremhmun ang turah i ngai zawk em ni?” ka sawi ngaihsak lo in a ti a, mit a thim khup a, min that duh mai dawn in ka hria..hetiang em em a thinrim hian ka la hmu ngai lo..
“Min ring lo anih chuan engtin nge ka tih ang?” ka tih chuan ka aw a ri chang chang, ka dar a vawnna kut ka vuan a, tlemin a thlah dul hret.
“An sawi ang khan i awm lo anih chuan fiahna ka duh...” a ti bul hmuk.
“Jordan..khawngaihin...” ka ti leh hrama, mahse, ka thusawi hreawm pawn a awm lo, a rawn kun hniam thuta, ka hmui na zetin a rawn fawp a, ka thlesawn tur chu ka tukhumah a vuan bet a, ka hmui a thip zawk nghal zawk mai.
“Min thlah rawh..” thei leh thei lo in ka ti a, mahse, a thinrim khawhmu lo chuan ka sawi engahmah angai tawh lo.
Khumah min delhbeta, min kaltir turin ngen chiam mah ila awmzia a awm dawn chuang lo tih a awmdanah alang vek. Min dimna nei lo hian a che buan buan a,kan inlen hleih lutuk a ka bei let ve teh nangin ka hneh ngang lo, a sam chhip tlem a buk deuh bik chu ka tham fuh a, chu pawh awlsam te in ka kut a rawn la sawn lehnghal mai, ka mal pahnih a khan bet tlat a, ka kut pahnih ka lu chungah a nem bet tlat bawka,chet ngaihna a awm lo..
Ka kamiz hak lai hma ah a pawt a, a in phelh mai thei si lo chu na zet hian a phih a, ka kawrkilh an tla thawt mai.
“Khawngaihin ti suh,i inchhir ang..” zawitein ka ti a, a ngaithla lo. A duh ang ngei a thlen takah chuan a tum loh thil a tawng tih hriat tak hian,
“LALPA...engthil nge ka tih tak? " A ti chhuak nghal hrawiha, a aw pa a manganna ri chu ka hriat hmaih lo....
Chapter- 15
Ka mittui a rawn tla a, tah erawh ka tap ri eih lo. "Min ngaidam rawh" harsa tih hmel zet hian a ti leh hrawk a, engmah ka sawi chuang lo.
Ka ngawih reng vanga awmdan tur hre lo hian a awm a, ani leh ni lo ang takin a mangan zia a thup hleithei bik lo.
“Min pawngsual ...” reife hnuah ka ti a, a thaw kawka.
“Sawi suh Mate..vawikhatmah khatiang kha a thleng leh tawh ngai lo ang, ka tiam che” tih pahin ka biangah a kut zungpuiin a rawn tuai a,ka thinrim a, huat ka duh, mahse, ka chhungril hian a haw tak tak pawn ka hre lo,a chhan chu a thiltih kha engvanga thleng nge ka hriat vang a ni.
“Min rinna tlem tal nei la chuan tha tur ania, Pasal neih hma a sex hman ka duh lo em em a..” ka ti leh a, ka maimitchhing ta daih.
“Ka thiam loh a ni..Diktak chuan nimin vang khan ka thinrim a, eng nge ka tih pawh ka ngaihtuah chiang thei lo atin ni. Mi a ang maiin ka che tih ka hriaa, i rilru damna tur anih chuan engpawh ka ti ang..mahse, ka duh em vang che a khatianga che kha ka ni tih chu hre tel la” ati leh a, a tlawm em em a ni tawp maia. Mahni dikna hmu lian ve thei tak leh induhtawk em em anih avangin a tlawm viau mai chuan mak min tihtir a, min duh thu a la sawi zui.
Min kuahna atangin ka tal chhuak a, khum sirah ka tawlh phei a, ka inkhuh zui than. A rawn inbengkang chu chiang tak hian ka en a.
“Ka duh dan apiang i pawm ang maw?” ka ti a, ka melh ran mai.
“Um, i laka ka chetdan vang khan thuphachawi ka ba alawm,engpawh sawi rawh, ka theih phawt chuan ka ti ang” ati zuai ruih. Ka khap sak sak hnuah chiang fek fawk hian,
“Inneih ka duh lo” ka ti chiah mai chu a mengphar awk maia,
“Chu kher chu a theih loh” rang lutuk hian a ti nghal bawk.
“Ka sawi apiang i ti ang i tih kha” ka ti ve thung si.
“Thildang engpawh sawi zawk rawh. Mate,inneih leh lo kher hi chu a theih loh" luhlul tak hian a ti a.
"Inneihna phuahchawp lutuk hi ka duh leh lo a nimai" ka ti leh hmaka. A thaw deuh huaia, "Abby, eng chu nge phuahchawp a? Inneih na awm chhan tur chu ka duh vang che a ni a. Chu chu engatinge i pawm mai loh le?” nghet chawrh chawrh hian a ti a, min duh tih vawi hnih a sawi taa. Mahse min duh anih chuan hetiang hian a awm tur a ni lo
“Min duh lo, min it,min duh nila chuan min ring ang” ka tih chuan a mu thla chawrha,
“Adik alawm, ka ti sual ka tih kha, mahse, ka dinhmunah han indah ve teh, ka Nupui tur hi ka cousin nen khum khatah an khawsa dun tiin ka cousin nupui tur ngeiin huai takin a rawn sawi a, eng nge ka tih ang?” atih takah chuan ka melh reng ringawt..
“A sawi amaw? Chutiangin kan awm reng reng lo" Thinrim tak hian ka ti a.
“Ka hria lawm” tih pahin a rawn tawlh hnai a. Min rawn kuah thuta, “Min nei rawh, khawngaihin...ka mamawh che,neih tum che a ka nghah rei tawh zia hi hai der lo hram teh” tih leh ka awma a hmai a rawn phum a ruala, eng nge maw a hriat hrep ni??
“Ka hrethiam lo che, ka hrethiam hlawl lo che” ka ti ta thlawt, a mize mak lutuk hi ka hrethiam ngaiin ka ring lo.
“Min hriatthiam hun a la awm mai ang, engkim ka pek theih zawng zawng ka pe ang che,ka ti tak tak,mahse, ka ta i ni tih hrereng rawh” thutak em em hian a ti leh a, eng nge a ta ka nih chu a pawimawhna?, a ta ka ni ang a, a duh duh danin ka awm anga,mahse, ani thung chu ka thu leh duhdan zawm turin ka ta a ni ve dawn chuang lo va...awmzia a awm hlawl lo.
“Ka thinrim vanga a taka ka che kha pawi ka ti, engmah ka ngaihtuah fim thei lo va, mipa zawk lah midang ni loin i bula awm tura ka duh loh ber a ni lehzel bawk si" a ti leh a,engmah ka sawi chuang lo..Ka rilru- ah Kimtei a lo lang thut a, min nghak reng tih ka hrechhuak zuia,ka tawmbo ta vang vang mai hi mak a ti viau ang. Engtin chuan ka awm dawn chu ni maw? Ka kawr lah a pawt thler deuh bakah a kawrkilh a phih thla tel vek bawk si..
“Kimtei’n min nghak asin” thildang sawi loin ka ti chhuak nghala.
“Um...min lo nghak rawh se, ka hmu ve ang chu” tha takin a ti ve mai.
“Mahse, engtin nge niang?, ka kawr kha...” ka tih chuan a rawn hawi chhuak a..
“Kawr dang animai” tih leh thawh a rual a, a phone a la a, a chevel chu ka en reng ringawt, min lo duh reng a,min duh vangin min neih theih nan a nghak tih a sawi lai kha ka bengah a ri nawn tlut tlut ringawt. Mahse,khatkiang a sawi vang khan lawmna tur a ni kher chuang lo, ka laka a chetdan dik lo tak vang khan chhuanlamah a hmang pawh animaithei..
“Ka inti fai duh” ka tih chuan min rawn en a,
“Um, intifai rawh, keipawh ka lo kal ang” a ti a, a nui hmel chu en duh lo in hmundang ka en daih,. Bath Robe min rawn pe a, ka la vat a, mahse, a kalsawn mai tlat lo.
“Kalsawn rawh” ka ti hmaka, a nui leha, ka nuih a za ve hauh lo, engmah ka sawi loh avangin ka chung a a chetdan kha a theihnghilh nghal a ni maithei. Mahse, ka tan chuan reitak chhung hriatreng tur a ni dawn. Kan inmelh ren rawn hnuah a kalsawna, vawi engzat nge hmeichhe bulah thawmhnaw ha lo in a awm ang ka hre lo,ka tan chuan thil thar vek.
Hmanhmawh fe-in Bath Room ah ka lut a, ka kalh nghal hmak bawk,. Ani nen khan inbual dun ka duh lo bur, Shower hnuaiah ka ding a, ka taksa a Jordan-a sulhnu kai zawng zawng silfai tumin ka in nuai chiama, mahse, awmzia a awm lo tih ka hria, ka taksa pawnlang ka tifai anih pawh in ka chhungril a Jordan-a sulhnu kha a fai tawh dawn lo..Thil thleng kha reilote chauh a ni a, Diktak chuan chesual han tih chiam tur pawh a-ni lo hial zawk,mahse, nula thianghlim ka ni ta lo va..ka inchhuan ve na tih chhiat nan chuan reilo mah se a tawk em em tho.
Room a ka luh leh chuan a lo in ha fel vek tawha,dik tak chuan nalh lo tih a har thin..
“I thawmhnaw tur ka lak tir a, en chhin la” tih pahin khum a Paper Bag awm chu a kawk a, duh lo thei pawh ka ni lo,ka pan hnaia, phur lo tak hian ka phawrh a, ka kamiz hai nena rawng leh thui dan in ang thuak hi a lo awm a, mak ti deuh hian ka en a..
“Hei hi khawi a mi nge i hmuh a?” ka ti nghal a, a then suk.
“A harsa hleinem, Aizawlah hian thawmhnaw dawr a tam alawm. Abikin hmeichhe thawmhnaw phei chu kawi tinah a awm ang chu” ati duh lek ,nia, a sawi dik, mi zawng zawng chu kan ni lo maitheia, mahse,thawmhnaw hi kan sum sen tamna ber pawh anih hlawm ka ring.
Ka phawrh chhuak a, ha tur chuan ka bathrobe hlih a ngai,ka bul maiah Jordan-a a ding reng a, nuam ka ti lo..Chubakah thiilthlen hnu khan thinrim em em mah ila ka lai deuh hu reng maia, ka zak zawk nge pawh ka hre lo.
“I Office-ah min lo va nghak mai la...” ka ti a, a hmel a engmah lang chhuak lo hian min en deuh vang vang a,engmah sawi lo in a bu ta nghut, a chhuak zui ve ta mai bawk.
Ka ha nghal sawk sawk a, ka lo ha tawk chiah lehzel bawk, a Hotel a ka riah tum khan thawmhnaw min leisak tawh a, kha pawh kha ka ha tawk tho, engtin nge maw ka hak tawk a hriat thin ni??
A Officeah a lo awm a, ka kawr hak a dang ta leh ka sam huh vek bawk nen Kimtei leh Sawmtei hmuh ka huphurh viau.
“Enteh Jordan...ka lo luh tirh a ka kawr hak ka ha tawh lo a, chuan, ka sam hi...” tih pahin ka sam huh ka khawih a, a hmui a pet sawi zauh a, eng nge a sawi ang tih ka lo ngaihtuah a.
“Min ring la...”tih pahin a rawn kal hnai a, ka tawlh hnung ve thung,ka tawlhhnun takah chuan a ding chut a.
“Ok, Sorry, khawih i duh loh chuan ka khawih lo ang che”nelawmna tel miah lo hian a ti nghut a, awmzia a awm lo, ka phalna lo in min khawih a, ka neih hlu ber a la tawh,a ta tur tho alawm zawitein ka chhungril atangin aw hian a rawn ti in ka hriaa, mahse, lehlam thung chuan a ta tur nimahse a hun hma a lo khawih leh tihluihna a hman vang ringawt pawh khan i haw tur a ni a ti ve thung...
A Office kawngkhar a hawng a,min kal hmasak tir a, kan thawm an hriat veleh Sawmtei leh Kimtei an rawn hawi vat bawk, ka awmrei bawk nen mak an tih hmel viau,ka kawr hak a dang a, ka sam a huh bawk nen mak tih loh ngaihna a awm lo.
‘Jordan..hei hi ka Best friend Kimtei ania, nimin a lo haw ka tih kha,Kimte, hei hi Jordan-a, ka Boss leh ka...ka...” ka ti nawk nawka,ka sawi zawm hleithei lo...Kimtei leh Sawmtei lo nui hmel ka hmu bawk nen ka riat kual ta vel mai mai.
“Ole, sawi duh lo mai ta che, I pasal tur ania, ka hria alawm” nui hak hak chung hian Kimtei’n a ti a, ka nui ve ta ngawt..
An in chibai a, Sawmtei a lo tawng ve bawk nen ka thawpik lutuk pawh a ziawm ta deuh.
“Sawmte,Inneih ni kan ti fel tawh tih i hria tiraw?” Pangngai tak hian a ti a,Sawmtei a bu nghauh ringawt..
“A ni han tih fel chuan a lang hnai tawh deuh bawk nen tih kual tur a tam riau a, vawiin chu Abby hi ka ruksak dawn che ania” dam thlup hian a ti a, a mize vawt raih reng hi engtin nge a neih bik ka hre lo...
“Lutuk, ka hrethiam e,engmah buaina tur a awm lo” awlsam zet hian a lo ti vat a, ka ngei zawk mah, a bul a chhuah ka duh lo bura,mahse, tihngaihna a awm lo..
Kimtei kan kalna ah kan hruai zel a, Jordan-a Best tur Rindika a ni dawn emaw ka tih laiin a lo ni lo, an thian kawmngeih tak dang a lo la awm a,Computer engineer niin ama pualin Sumdawnna a nei a, lian tak erawh a la ni lo, a hmunpui erawh Bangalore lam a ni daih thung,a bul tanna ti pawn a sawi theih ang chu.
“Vawiiah ka Best tur a lo thleng dawn a” motor a kan chuan hnuah a ti a, a hnungah Kimtei a thu a, inngaihtuah muk hmel deuh hian pawn lam a en dauh dauh mai..
“Rindika i best ang chu ka lo ti a” ka ti ve mai, Kimtei bulah kan inpawh lo tih tihlan ka duh lo..
“Nia, mahse, kei ka buai laia ani a lo buai ve zel kha a rem chiah lo,Mark-a hi ka thianpa tak tak tho ania”ati a,a Motor khalh laia rilru zawng zawng pe niawm tak hian nghet zetin Steering wheel a vuan a, a kut zungtang sei thlurh a hnehsawh zet a a herh kual chu ka en a,thenkhat tan chuan hmeichhe vannei leh awhawm ka ni mahna, mahse, a chhungril a ramsa ang mai a nunrawng anihna hi kei lo in tuman an hriat ka ring lo.
“Hey, nangni pahnih hi Hotelah khan in inhau em ni aa?” Kimtei’n a rawn ti thuta“Aih, ti nge?” hahdam thei ang berin ka ti a...A hmel ka en duh hauh lo, a kut a hmet ri a..
“Ka hre lo, in inpawh lo ka ti..aaaa, ka sawi thiam lo” tlang tak mai hian a ti a.
“Kan inpawh viau ania...mahse, Abby hi hmeichhe tawng duh tak a ni lo tih i hria alawm” Jordan-an a lo ti ve a,ka tan chhan ve angai lo hlauh, a sawi ang ngeiin ka tawng duh lem lo tih Kimtei hian a hai lo..ka chungchang a sawi chhuah ah chuan a la lawmawm ber hial ang..
Thildang a rawn sawi leh hmain Jordan-a Phone a ri zui ta hlauh bawk. “Aw, nu...” zang vuh hian a ti a, nakinah chuan ka nu a la ni ve dawna, nu nei ngai reng reng lo khan nu ka nei ve tawh dawn tihna ania, nu nei ve tawh tur anga kan inngaihtuah chuan eng ngemaw takin ka chhungril a khawih riau bawk..
“Amah pawh a awm alawm,bia la..” tih pahin a Phone ka lamah a rawn lek hnai a,ka lak hmain ka mitmeiin ka zawt a,engmah sawi lo in a phone lamah a thle zauh ringawt, tim dai hian ka ban a, a Phone a hming lo lang chu ka en a, engtikah nge ka nu tiin ka la koh ve ang aw? ka ko thei mai pawn ka ring lo..
“Hello...” ka ti sep a.
“Abby, i tha em?” a rawn tih chuan ka that thu ka hrilh nghala, ani hi chu mak takin an In ka kal hmasak ber tum khan ka ngaina nghal der anih kha..
“Vawiinah Mark-a a lo thleng dawn a, a lo thleng tawh zawk maithei, tlaiah chaw rawn ei ula ka duh a, i hman angem?” a rawn ti a, engamah hmain ka inthlahrung vang vang mai..
“Um, ka thei mai in ka ring,mahse, ka thiannu lo hruai a rem angem?” ka tih chuan a nui hawk hawk ri ka hre zuia..
“Lutuk ringawt, lo hruai rawh, mahse, Inneih chungchang kan sawi dawn a, chulam hre ve tur chi anih chuan..?” min vengthawng tih hriat tak hian a rawn ti leh a..
“Ka best tur ania..” ka ti vat
“A tha khawp ang chu,kan lo ring ang che u” ati a, kan inbiak zawh veleh Jordan-a hnenah Phone ka pe a, mahse a ngaihven lo..
“Lo keng lawk mai teh,Motor khalh chung chuan a buaithlak” ati deuh tlat. A phone ka en vang vanga, ka phone hmanlai hi Grace-i phone hlui niin a tha lem lo,Jordana-a Phone ve thung chu i-Phone a ni thung,chu pawh a model thar ber a ni a, a man a to thawkhat ang tih a chiang..
Inneih sawmna Card vel buaipui in kan nileng ta thak mai. Kimtei awm lo phei se chuan hrehawm ka ti hle ang, tlai lamah ruah a sur a, a la sur tam phian zui.Jordan-a te In kan pan tlang nghal a, a lum deuh bawk nen ka ban chuap a, nuam ka ti chiah lo,mahse, Inbual leh na hun a awm tawh der si lo..
Inchhungah chuan Mipa pakhat, Jordan-a aia hniam hret tur, Hmeltha ti a sawi hluak tur ni si lo, nelawm leh Smart zet hian min lo nghak a, Jordan-a nu nen an lo ti ti mawlh mawlh a, kan thawm a hriat veleh a rawn tho chhuak a, Jordan-a nen an ri ve hlut mai..
“Mate, hei hi ka best tur Mark-a anih hi. Bawiha, Abby hi chu i hriat tawh kha. Chuan, Kimtei hi a best tur” nui chungin a ti a, Mark-a nen an in signal zauh chu ka hmu hman hram,kan inchibai a, Kimtei nen an inchibai ve bawka, Kimtei nun hi ka awt thin, a nun a hahdamin a zau halh a, kei ang lo takin khawi hmunah pawh a tlangnel zung zung zel bawk.
Chaw kan ei hma in Jordan-a nu leh pa nen kan thu khawm a,Jordan-a pa mize khauh zet ka hrechiang lehzual,a fapa hian a chhun let tawp animai,engkim mai Order hlir,Mizo thuamchhawm pangngai pawh ken luh ngai a ti lo,ka thawmhnaw ka ken luh mai an duhtawk.Inneih erawh engkim a pangngai thei ang bera kalpui an duh thung,ka lo ip chawih chawih maia,vawiin thil thleng vang khan Biakin hawng a innei ngawt thei kan ni tawh lo..Jordan-a ka en chuan min lo en ve chiah bawk..rang zetin ka mit ka la sawn nghal vat mai..
Kan chawei boruak a pangngai viau,engmah thleng lo ang maiin Jordan-a a khawsa a, Mark-a nen an ti ti a, a changin min be zauh zauh chauh, Jordan-a farnu a lo la haw lo thung.
“Engkim hi a thleng rang mah mah a ni tiraw?” ka hnung lam atangin mipa aw hian a rawn ti a, ka hawi let vat a, Mark-a a lo ni a, inneihna chungchang a sawina niah ka ngaia, mahse..
“Engmaw i tih?” ka ti ta tho, Kimtei Toiletah a lut a, Jordan-a a Roomah a kal bawka, Veranda zau nuam takah kan ding a, Pangpar leh thingkung a ruah chambang chu Light in a chhun a, lunghlu ang maiin an de sep sep mai..
“Jordan-a hian a duh a hmuh chuan a nei ngei ngei thin a, nang nen pawh hian a rang lam mah mah in ka lo hria a”tha takin a ti leh a, ka sirah a rawn ding a, veranda hungna a bawh ar ar bawk..
“Nia, nimaithei...”ka ti ringawt.
“Engpawh nise ka dem chuang lo, keipawh ni ila ka nghak khaw tlai lo ang” nui chungin a ti leh a, min fakna nge min tih el na ka hrethiam lo...
Tunah chuan Jordan-a nen kan inneihna tur karkhat chiahin a dang tawh, Inneih kawr ka duh ka hmu a, ka thlang fel vek tawh bawk, Pitei te nufa hrilh ka duh a, mahse, kal lo in Card ka thawn ta zawk. Sawmtei nu leh pa in min buaipui nasa ngang maia, Sawmtei leh Rindika pawh an bang chuang lo,Inneih hi a hautak zia ka hre chiang ta viau.Pawisa engvakmah ka nei lo a, mahse, ka Ac ah Jordan-an ka hman tur tam tham fe a rawn dah a,ka hnial hauh lo, ka zahawmna humhim tur pawn neih ka nei hlawl si lo,chumai bakah min nei duh anih chuan tiang hi chu a ti turah ka ngai ve hmak, atan engmah tham a ni lo..
“Khawiah nge Honeymoon hman in tum?” Kimtei’n a ti a, ka rilru ka lo kawm nasa lutuk a, ka bulah thu an awm tih pawh ka lo hre tawh lo...
“Ka la hre mai lo, hmun pathum a sawi a, ka duh thlang turin min ti a, mahse, ka ngaihdan chuan tul ka ti lem lo, a hautak mai mai ka ti” ka ti a, a nur nang maia...
“Aaaa, i ho, thlang ngei ngei ang che, keiman ka thlanpui zawk ang che,tunlaiah Mizo ho pawh hi a thei chu an kal ngei ngei a,kei chu tha ka ti” ati zung zunga. , nih pawh chu a ni mahna...mahse, keima mimal hi chuan tul ka ti lo..
“Abby...” tih ri ka hriat veleh ka hawi chhuak vat a, Sangtei leh a thiannu, a hma a ka hmuh tawh kha an lo ni a, Sangtei hmel ka hmuh rualin amah vang a ka chung a thil thleng kha ka rilruah a lo lang nghal uar uar mai..Atir kha chuan ngaihdam dil ka duh a, mahse, Jordan-a chetdan leh an chhungkaw group a ka chanchin an sawi dan avang khan ngaihdam dil ka mamawh in ka hre tawh lo. Jordana hnena a sawi ang em chuan an chhungkaw groupah sawi lo mah se ka zahna tawk ka hmu a, Zobiaka ngei pawh ka be peih lo hmak.
“Eng nge ni ta?” pangngai takin ka ti a, Sangtei hmel dang deuh lap chu ka en a, a thiannu erawh ka en duh lo lui ve ngat,a hma pawh khan min ngaithei vak lo tih a ti lang tawh a, keipawn ka ngaithei bik lo ve.
“Engmah, Zobiaka leh Jordan-a ...tu zawk nge i neih dawn kha?” a thiannu chuan fiamthu anga ngaih theih tur hian a ti leh khera,a fiamthu loh zia hre chiangtu ka ni tlat.
“Jordan-a ka nei dawn e, Zobiaka chu ka thian ve mai ania..I bulah a nupui tur chu a awm reng kha.." Awki mar pat hian ka ti a, ka insum theihna leh chapona in min chelh a ni ber..
“Um, ni dawn tak e, mahse, saw saw Jordan-a chu ania, nang ni lo in Poppy zawk a lo kal pui a” tih pah hian a kawk zauha, a kawhna lam ka en a, a sawi ang chiahin Poppy nen an rawn lut mek, ka hawisawn vat a, min hmu em ka hre lo..ka bul a chair ruakah chuan Rini a rawn thu a,Sangtei erawh a ding ngawi reng thung.
“Khawiah pawh inzui tur kan ni hleinem, thiante chu a kawm ve ang chu..” ka ti liam puata, kan awmdan, inhau ni si lo, inkawmngeih ni bawk si lo,tawngkam tha tak anga lang chunga inkhei fek fek reng sir chu chu Kimtei chuan thil awmzia man lo tih hriat tak hian min en tawn zak zak mai..
“Nia, thian te chu kawm tur alawm..nang leh Zobiaka ang tho kha anni ve a, Poppy hi ka cousin a ni tak asin. Eee, nizan khan engemaw sawi deuh a awm tak a..Khawiah nge U Jordan-a a riah lo zawt ta che...” a ti leh duaha.
Ka sa deuh pup thei, nizanah Bachelor Party an nei a, dar hnih velah In a thleng tih min rawn hrilh a,ka lo muthilh tawh avangin zingah a msg ka hmu ta chauh.
Chapter- 16
Rini hmel, hnehtu inti lutuk leh min hmusit ngawih ngawih tih hriat zet a ner nang chu ka melh a, engvangin nge ani thilsawi mai mai vang hian ka rilru nawmlohna ka tihlan kher ang tih hi ka ngaihdan a ni tlat. Mi chaklo te hian midang an tihnat na turin an theihna zawng zawngin an bei thin a, a neitu tak zawk in an neih loh nan an thiamna zawng zawng hmangin an bei thin a, mahse, kei chu a neitu tur zawk ka ni a, engpawh sawise ka ta tur, ka Pasal tur a ni tlat..
“Khaia, ani riahna lam te chu keia lo zawh tur a ni nang. Enteh, thil ka hrilh ve mai mai ang che. I Cousin bulah a lo riak anih hlauh chuan pawi ka tih rualin ho ka ti ang. Mipa, nupui nei tawh mai tur bulah a nupui tur ni miah lo chunga a riak duh anih chuan a indahhniam hle tih na a nimai. Chuvangin zak tur zawk an zah loh hi chuan kei chu pawi ka ti lo nasa ania” zawi deuh hlekin ka ti sar sara, ka nui lui var var bawk...Ka beisei ang ngeiin a hmel a buai nak a, chutiang zawng a chhanna a beisei lo tih a chiang..Engatinge mi hi an pawnlam landan aia an mizia a hniam leh tlat thin ka hrethiam lo. Kei fahrah, mahni inringtawk lo em em pawhin ka tih duh loh tur hi chhungkaw pangngai atanga seilian te hian an ti leh mai zel hi mak ka ti ngawih ngawih.
“Rin, kal ang” Sangtei'n a ti a, a hmel a nuamlo tihna lo lang chu ka hmuh hmaih lo. Nia, nuam a ti lo ang, thudik tak sawi hek lo le. A hmangaitu tak ka ni tih hrereng chunga min beihdan kha kei aiin a hrechiang zawk tlata, min hmu ngam tur niin ka hre lo.
“Kim,hei hi Sangtei, Zobiaka nupui tur anih hi...ka thianpa nupui tur anih rualin kan inchhung hnai dawn tawp” ka ti lui salha,Sangtei a sen awp awp mai...
“Um, anih chu, eee, nimin khan Zobiaka khan a be thei lo che a, ka hrilh theihnghilh che” tih pahin a mit a siai zauh a...A thil tum ka hrethiam nghal vek, kan boruak kal dan vel hi a man lutuk lo chungin kan inbiak dan leh kan thilsawi vel atangin ani ang rilru chak lutuk hian thil awmdan a hriattir nghal ruak tih ka hrethei mai..
“Tlaiah chaw rawn ei a tuma, ka inbe tawh. Sangte, kan kalsan dawn che u. Tihtur kan la ngah lutuk” ka ti a, ka bag ka la a,ka tho zui nghal a.
“Lawk, Abby…” Sangtei'n a ti a, hmel dang lap mai, Manganna a khat chu ka en a..
‘Aw, mahse ka hmanhmawh tawh tawpa,nidangah inbe zawk mai ila” damthlapin ka ti a, ka la nui lui thei tho...
“Aw, nia..mahse....” ati leh chu" Min hrethiam teh, Jordana'n min nghak reng bawk si" Tiin ka kalsan ta daih. Min biakna hun a awm reng a, ka kal dawn veleha min biak duh kha ka duhdan a ni bik lo. A thuhrimah, ’ i laka ka chetdan vang khan min ngaidam rawh ‘a ti ang nge ‘ka Pasal tur hi khawngaihin lo kawp tawh suh’ tih a tum zawk pawh ka hre nek lo e, an tel lo hian ka buaina khawp ka hmu lutuka, keimah vangin tuarah a lo in ngai anih phei chuan a tisual ang, kei hian ka tuar nasa zawk daih. Chhungkaw zinga ka tel ve hunah pawh fiamthu leh fiamthu lo in a zakthei lo zual chuan Zobiaka min dem bel an awm lo ang tih pawh a hriat loh. Jordan-a an hlauh avangin alanga min fiam ngam an awm lo maithei bawk.
Ka mamawh tur kan lei belh leh nual a. Sawmtei pa leh Jordan-a pa an inbe pawp reng a, engmah a ngailo an ti chungin Sawmtei Pa te erawh chuan ho lam lutuk a min kaltir an tum der lo, ka tan an inseng nasa ta viau mai chu ka inthlahrunga, an fanu in Pasal a nei tur angah an ngai lui tlat si. Ka vanduai em em chunga ka vanneihna leh Pathian min hruai dan hi a mak ka ti thin. Anni hi ka tan chuan Vantirhkoh tih loh rual anni lo,nu leh pa nei lo in ka seilian a, ka neih chhun Putea laksak ka ni leh a, ka vakvai ringawt dawn emaw ka tihlai in mitha em em pek ka ni ta zawk a,tumah hian reilote chauh an la hriat hi an fanu ang tak a en in min buaipui ka ring lo.
A ni telin Jordan-a nen kan inpawh tial tial a, mahse, ka rilru zawng zawngin ka la pawh thei lo a, ka hnaih tak tak thei hek lo. Ka laka a chet dan kha a chhan hre reng mah ila ka ngaidam tak tak thei lo niin ka hriaa. Inneih thulh phah nan erawh hman ka tum ta lo.
“Abby, i Phone i off em ni?,Jordan-an a be duh che a” Toilet kawngkhar pawn atangin Kimtei a rawn ti a,ka Off pawh ka hre lo, mahse, a chhe lutuk a,Off kher ngai lo in amah in a thi leh ringawt zel.
“Off pawh ka hre lo, ka laklawh, ka chhuah hunah ka lo bia ang” ka ti a, eng nge min biak duh chhan tur ka hre lo.
Ka hman veleh Phone ka en a, ka rin ang ngeiin a lo thi leh pek tawh chu niin. Pawisa hman tur Jordan-an min pe teuh tho nangin kan inneih senso tur anih avangin thildangah lo hman a remchang lo..
Reilote chauh a ring hman tih ah a Pick-up nghal a, ka call hun a chang a ang mah zawk.
“Ka Phone hi a lo thi leh ringawt zel a, eng nge ni ta?” tha takin ka ti a, Khumah ka thu a, Kimtei inbual turin Bath Room ah a lut chiah thung.
“Hmeichhe ho in party hun tur kha naktuk zan a ni em kha ?” a rawn ti a, ka lo hre leh pek tawh lo, ka thiante leh Cousin ho anni dawn a,cousin tihah hian hla deuh taka kan chhungte bak sawm tur ka nei lo. Thian han tihah pawh College ka kalpui te leh Hotel a ka thawhpuite bak sawm tur ka hre lem chuang lo. Grace-i erawh Msg in ka hrilh ve tho. Inneih inbuatsaihna a kal tak tak atangin Hotel hi ka kal ta meuh lo va,Jordan-a lah hian ka kal apiangin a sawisel ziah lehnghal a, ka la thawk rei lo hle chugin ka dinhmunin a zir lo lutuk a, hnathawk pawh ka ni tawh lo in ka inhre mah zawk. "Ka sawi I hre thei em? " a rawn tih leh chuan rang tak hian,
“Um,ngatinge?” ka ti thuai.
“Hmeiche hlang ringawt kha nge in duh mipa kan lo tel ve dawn?” a rawn ti dut duta, ka nuih a za thuta, ka nui nghal hak mai ,eng nge ka nuih tiza pawh ka hre der chuang lo.
“Ka hre nang,in lo telve duh chuan in lo tel thei reng a” ka ti a, kan Partyna hmun tur hi Jordan-a nau thlan a ni a, kalpawh ka la kal chhin lo..
“Ka kal i duh nge duh lo?” tih pahin ring vak lo hian a nui a...
“Ka hre lo” tiin diktakin ka chhang mai,lo kal ve se nuam ka ti maithei,ka thianten an hmu chak viau bawk nen..
“I thu thu animai, taktakin Mark-a te ho hian lo telve an duh a, i thu lo chuan ka Yes ngam lo a” a tih leh chuan ka thensak mai...ka thu tlema a ngaipawimawh tih hriat ngawt pawn min tihlim chu ania...tu nge maw hetianga Pasal nei ngai ni??
“In lo kal chuan a nuam zawk ang ka ring, bakah ka thiante pawn an hmu chak che a” ka ti ve ta nge nge.
“I thianten min hmu chak a, Anih leh nangin?” zawi angreng tak hian a rawn ti a, ka biang a sa nghal hat hat mai.
‘I ho em mai” ka ti ringawt, a nui leh a.
“Khawiah nge i awm?” ati leh daiha,Kimtei te In ah ka awm tih ka hrilh ve mai.
“Ka rawn hruai ang che, kalpuina tur che ka nei” a rawn ti a, Sana ka en vat a, dar 8 a ri tep tawh a, lenchhuahna hun pawh niin ka hre tawh chiah lo..
“A tlai tawh em hi” ti mah ila a pawisa lo.
“Ka lo kal nghal,mahse, tuntum chu Kimtei hruai ka duh lo ania” thutak zet hian a rawnti a,chhan pawh ka chhan hma in a off zui daih bawk.
Kimtei inbual zawh veleh Jordan-a nen kan inbiakna ka hrilh a, a hmai a thil hnawih mawlh mawlh pan hian Darthlalang atangin min rawn en kawra,
“Zobiaka nupui tur thiannu sawi kha i zawt ta em?” ati nghat a, ka hmel ah ka ngaihtuahna hriat tum niawm takin min en kar bawk, ka lu ka thing a..
“Ka zawt peih lo e, ho ka ti lutuk a, kan inneih hma chuan a duh duh na ah riak ang hmiang” ngaihsam hmel fe hian ka ti a,mahse, a nui tlat lo,a rawn inher a.
“Thiannu,ka hrilh ang che nge hrilh lo ang che tih ka ngaihtuah a
Nasa tawh lutuk. Mahse, i lakah zep nei nih ka duh lo, nizan khan Mama’n min rawn bia a, Jordan-a leh Poppy tih kha hmanzanah Party naah an che bawn viau a ti asin” ati a, ka phu deuh zawk mai..
“Chuan engtin zel nge? ” ka ti hul haka,adang sawitur ka hre lo a, sawi zawm turin ka tur a ni ber.
“Restaurant a hmeichhia a lo hruai kha Poppy chu anih ka ring a, ka lo ngaihtuah kual vel chiama, an pahnih khan nikumah Delhi ah kan inhmu tawh tih ka hre chhuaka,an mahni kha chuan min hre kher lo ang. Chapcharkut kan hman tum hian ania, an inhmeh lutuk vangin ka hrechiang ka ti mai, a hnuah ka thian pakhat khan nupa ang maiin an khawsa tih a sawi leh a..” ati leh zela, a thusawi chu ka rin dan ni tho mah se engkim chuan min deng na em em tho.
“An inkawp thin ngei tih chu ka pha lo, mahse, an sawi uar hret anih chu” ka ti a, ka chhungril sahal huam huam chu tawrh har tak a ni ringawt..
“Nia, animaithei,mahse, tunah chuan nangmah a nei dawn che a, ka lo haw hnuah ngawt pawh hian a duhzia che ka hmu hnem tawh lutuk,hun kal tawh chu kal liam mai mai tehse” ati ve ta a, a nui pah hak hak bawk. Thildang sawiin kan ti ti zawm a, Sangtei te chungchang engmah min zawt lo erawh mak ka ti ru deuh.
“Amak e, i Phone kha a thi leh tawh mi?,Jordan-an min lo call leh tawh nia” tih pahin a Phone min rawn pe hnai a,ka ban vat a, mihring khawsak inphu lo lutuk pahnih inneih tum hi thil namai a ni tawp lo e,ani in a duh duh thil tha a neih laiin ka tan chuan Phone leina tur takngial pawh a harsa ania..
“Hello...” ka ti thuai,
“Pawnah ka nghak che, lo chhuak la,ka rawn lut ve lo mai ang” a rawn ti a,ka awah keimah ka ni tih a man nghal anih hmel.
Kimtei nen kan inzui thla a,Motor atang pawn a lo chhuk lo, Gate pawnah Motor chhungah min lo nghak a, fur lai mahnise thla a eng a, chhum in a hliah leh zauh thin tih mai loh chu Favang a ang lek lek maia, Boruak a nuam phian bawk..
“Khawiah nge min hruai i tum a?” kan pahnih a kan awm veleh ka ti a, “I hre mai ang” a ti nghut a, zawh pawh ka zawt nawn duh ta bik lo, kan tlan zel a, khawpui chhung kan tlan pel a, a tlai tawh angreng si, min hruai a tumna lam ka hrethiam der lo..
“In Party zan khan khawiah nge i riah a?” ka ti a. “Kan In ah, khawiah nge riak se min tih a?” a ti deuh hu a.
“Ka zawt mai mai che, eee..hmanzan Party na-AH Poppy nen in che bawn viau an tia, engtin chiah nge in lo chet a? ” ka ti leh a, Motor a ti ding thut a, ka lo inring bawk si lo, hmalam ah ka bu lawp a, ka intauh lo chauh bawk..
“Eng nge a?” thinrim zet hian ka ti a,Motor chhung light a on loh avangin a hmel ka hmu chiang thei lo...“Mi sawi zawng zawng hi awih lo thin teh” bung zet hian a ti a.
“Aaaaa, Poppy nen in inzui hi ka hmu ngun ve bawk si che u a, diktak chuan min han hrilh hi chuan awih loh hi a har ve a, mahse ka thinrim hleinem,tlemin thup ve deuh ula ka ti mai zawk a” ngaihsam hmel tak hian ka ti leh a.
“Hman ni a restaurant a min hmuh khan kei pawn ka hmu ve tho che,mahse, ka bulah khan Poppy chiah ni lo in kan Coach pawh a awm tel ve tih i hmu lo erawh a pawi ta anih chu” ati bul hmuka, a sawi dik chiah, midang awm telve ka hmu lo.
Motor a start leh a,kan tlan hnuah pawh kan tawng tawh lo. Kawngpui atangin kan peng a, kan tlanna kawng Metal tho a ni nangin a mam fahran lo, thui vak lo kan tlan hnuah Gate hlui tawh tak hi a lo awm a, a Motor Lightin a chhun chiah bawk.
“Lo thu rawh, Gate saw ka va hawng lawk ang” tih leh chhuk a rual a, a awmdanah chuan a kal fo na hmun a ni tih a chiang mai..Gate a hawn hnuah a rawn let leh a, kan hmalam Motor engin a chhun chinah chuan In a awm a. Motor light-in a chhun chin bak ka hmu thei lo.
“Hei hi tu in nge a?” tiin mak ti deuh hian ka zawt a.
“Ka pu hnen atanga ka rochun anih hi,nuam ka tia,ka kal fona hmun anih hi” ati tha ve mai,min rawn en chungin,
“chhuk ila” a ti a, diktak chuan ka chhuk chak vak lo, mahni a awm a, hmun reh raih a tuma chimbuai loh a khawsak te chu nuam ka tiin ka duhthusam fo nimahse a chang chuan Ramhnuai hi ka hlau a, zan-ah lek phei chuan nuam ka ti lo, bawkvak chi rannung engmah ka ngaina lo va, Rul vang hian ramhnuai ka ngaina lo lehzual.
A hnungah ka zui a, Sava nge eng nge anih ka hre lo, a rawn hram thut mai chu ka phu zawka, Jordan-a banah ka vuan chawt bawk.
“Hlau suh, Chhimbuk anih chu, kan kal hian min lo lawm ve dan alawm” ati a, ka kawngah a rawn kuah a, In lam min panpui a, mahse, ka chhungril a hlauhna a reh mai thei lo va, ka ti dak mai.
Veranda kan thleng a, a Phone in Switch awmna lam a en a, Light a on a. Kan dinna lai chu Veranda lian vak lo,Cement a uluk tak a zut mam a ni a, In pawh a lang thei ta deuh,bang ka hmuh theih chin chu plaster loin Brick rem tawp a ni a, inchung pawh Rangva tha chi a ni bawk, chhun engah engtin nge alan ang ka hre lo,ka hmuh theih chin hi chu a hlui tawh viau.
A kekawr ipte atangin chahbi a phawrh chhuak a,Tala lian leh rinawm zet chu a hawng a, inchhung thim khup mai chu pawnlam eng chuan tlem a chhun a, a ban ka vawnna ka thlah eih lo,
Kawngka bul bang chu a ban a, a hmet ri khap a, a eng leh ta uar,ka beisei loh lutuk ka hmuh takah chuan ka thaw hawk mai.Hetiang In hi ka la hmu ngai lo reng reng, ka tehkhin dan ber chuan Sap ho chenna hmun hlui niawm tak a ni..
"Ehe...a van nalh ve, ka beisei loh dan daih” ka ti hliai a, ka aw ah mak ka tih zia a lang thei hialin ka ring.
“Ka pu in a Pa hnen atanga a rochun ania,an sawi dan chuan Sap ho hunlai ami tawh kha ania, Ka pu pa hian a lei chhawn sak a, chuan ka pu hian a tu hmuh hmasak ber ka nih vang nge ka hre lo, min pe leh chhawng a” ati a, Hnangtah chair hlui tawh tih hriat tak, hnum hlurh lawi si chu a pan a,min kai zel bawk.
“Chuti chu a upa tawh dawn animaw?” ka ti a, a thu a, a malchungah min pawt thu ve nghal bawk.
“Um, upa thawkhat tawh, mahse, a In hi ala nghet tawk viau a, tlem tlem chu ka thawm tha ve reng a”ati a, inchung,thing hmang a awmze nei lutuk a thuah vek chu ka thlir chho a, a engemaw nalh phian.Banglah chu uluk takin a inthuah thlap bawk,Mizo te hian In kan sa ve renga, Sap ho pawhin Mizorama an lo kal khan an sa ve bawka. mahse, an hmanrua zawng zawng kha an ram ami an rawn keng bik lo. He in hi Jordan-a pu pa ta a ni a, tunah pawh tlem tlem chiah ala siamtha chauha, keini In sak ve chu reilote ah a chhe thuai thuai mai bawk si, thilmak tak a ni..
“Hetah hian awm daih ka chak zawk “ ka ti halh a, a darah ka lu ka nghat a. Tihian thlamuang tak a a bul a hun hman ka duh rih zawk.
“Kan Inneih hma pawn i duh phawt chuan i awm daih thei alawm, mahse, nangmah chauh chuan ka remti lo,a fal a, a Compound hi hung chhuah vek nimahse a him tawk lo thei tlat,CCTV ka dah vek a, mahse, engkim a pawi tawh hnu a a ti tu zawn chhuah khan a pawi tur kha a ti pawi lo phah chuang dawn lo a”ati leh duah a,a sawi dik ngei ang, kan penna laiah khan In a awm lo, chumai bakah kan pen tawh hnu ah pawh a awmchuang lo,chhun eng nise a hmun hma vel zawng zawng en chian ka chak takzet..
“Jordan..” ka ti sep a, a Jacket kilhna ka khawih nauh nauh bawk..
“Um...eng nge ?” a Ti ve mai.
"Thil thleng kha...ka ngaihtuah lo thei lo..i rilru tur ka ngaihtuah a, i thinrim kha ka dem lo che, mahse, hrehawm ka ti, in chhungkaw zingah Zobiaka nena inzawmna nei angin min ngai reng dawna” ka ti buh nuaih mai...
“Kha thil kha hriatreng ka duh lo, mahse, a hmasa ber ka nih vang ringawt pawh khan ka lawm tawh, ka chhungte vengthawng suh,keiman ka hrechiang che a, a tawk mai, bakah ka nau phei chuan a ngaipawimawh lo ngang maia.Sangtei kha a hriatzawng anih hmel a, anihna bakin thil a sawi thin” ati a a tih takah chuan ka beisei loh chhanna a ni chiang khawp.
“Theihnghilh ka tum thin a, mahse....i chetdan kha ka theihnghilh thei lo..” ka ti leh hapa, ka khabeah a rawn dawm a...
“Khawngaihin sawi tawh suh, a thleng tawh ngai lo ang, ka nupui i nih hnuah pawh i inpeih thlap hma loh chuan i bulah ka mu lo mai ang,khawih pawh ka khawih lo ang che, ka tihsual hremnah ka ngai ang” thutak em em hian a ti a, a tukkhumah ka vuan a, ka kuai hniam a, ka huaisenna zawng zawng sawmkhawmin ka fawp a, a hamhaih nge ka hre lo, a thu khawng luh a, mahse, rei a ni lo, dim leh dam takin min rawn fawp let a, engmah dang ka ngaihtuah lo,tunah tak hi chuan ani aia mipa tha hi ka hmu lo, a chhungril chu engpawh lo ni tehse,tunah rih hi chuan min duatna bak a hmelah engmah dang ka hmu lo a hriat pawh ka duh hek lo.
A inlahrang hmasa ta a, a aia thui pawh min kalpui dawn se hnialna ka nei hauh lo, mahse, chutiang engmah tumna nei hmel a pu lo..
“In hi enkual i duh em?” ati a, tawngkain ka chhang thei lo, ka bu nghat ringawt..
Bed Room pathumlai a awm a, Jordan-a min hruai luhna hmasa ber chu a lian ber a, a nalh ber bawk,a In hi chhawng lo a sak a ni a, a chhuat lei ring a ni bawk, Choka ah min hruai leh a,tlem an khawih danglam tih min hrilh a, bungrua engkim a awm vek,In lianpui ti a sawi tur a ni hauh lo,mahse, engkim mai a felfai em em tawp thung.
“Hetah hian kan Inneih zan hun hmang daih ila.” Amah en lo in ka ti a, Gas dahna tlang ka chul zai zai bawk.
“I duh phawt chuan hnialna ka nei lo” a ti tha ve maia. “I nu ten an ngai thiam lo angem?” ka ti leh a,a nui huk huka..
“Aih, ka nun ania, chutiang engmah an sawisel lo ang.A thuhrimin tunlaiah chuan inneih zan hi hotelah an riak tlangpui tawha, ngaihthiam loh tur a awm hmeinem. Chumai bakah, ka pu khan an inneih zan kha hetah hian ka pi a lo hmanpui tawha, Ka pa pawn a hmanpui ve a, chuan keipawn ka hmang ve leh dawn tihna ania...” nui chungin a ti a,ka hmai a sa hat hat mai.
In ka thlen meuh chuan a tlai viau tawh,pangngai takin min mangtha a, min kuah tumna a nei der lo, ka duhdan anih ringin min khawih loh a tiam a, nia, ka duhdan ni tur awm tak chu a ni, mahse, min khawih tak miah lohah chuan ka lawm leh chuang hauh si lo.
Chau takin Jordan-a Room Sofa ah ka thu a, Inneih kawr ha tawh lo in lawi kawr leh puanchei ka bih a, pheikhawk erawh ka tlawh phelh daih thung,ka sirah Kimtei a let ve bal bawk,mi ka chibai kual nasa a, ka nuih derna lamah ka biang a kham thum maiin ka hria.
“Inphelh teh, Jordan-a kha a lo let leh tep ang” ati a, chet pawh ka che chuang lo,lo let mai mai teh se,Player’s ho Suit nen a induang thap mai te, Jordan-a chhungte ho lah an nei tawk tih hriat ngawih ngawih hlir an ni a, eng ang chhungkua ah nge ka lawi luh hi kei hian ka lo hrechiang lo nasa tih ka hrechhuak nawn leh a ni ber.
“Ti hian kal mai ka duh em” ka ti a, muangchangin ka thu mar a...ka ham zui bai bai bawk.
“Ho mai mai,inthlak vat la, chuan Jordan-a lo let veleh in kal nghal daih dawn nia” ati leh a, Hotel chung zawlah Party an buatsaih a,reilote kan awm ve a,Jordan-a henah haw ka dil a, min hnial lo in min thlah ve mai bawk,Party na boruak ri hulh hulh kha ka zo hlawl lo, chumai bakah ka beisei hauh loh in Grace-i te nufa Inneihna ah khan an rawn lang ve tlat bawka. Huat loh duh mah ila ka mood an ti off ngawih ngawih.
“Enteh, Grace-i kha a rui em em lutuk a” a ti leh a, chhuat a ka bag awm rum mai chu ka en a, khawi berah nge ka thawmhnaw hak nghak tur ka dah ka hre tawh lo..
“Tunah chuan sawi ka peih rih lo” ka ti nghat mai, a rawn tho ve a,ka Bag min rawn enpui a.
“Sorry, engmah hi rem tha duh rih suh, naktuk lamah kan ti fel mai dawn nia” ati a, ka pawm zawng tak, engmah khawih ka peih rih lo.Kawngkhar an rawn kik a, Jordan-a a lo let tawh a ni ngei ang,Kimte’in lut turin a au a, ka thawmhnaw ka la chhuak a, tu nge lo kal en pawh ka en lo..
“Hey...Abby..” Zobiaka aw hian a rawn ti a, an In a ka kal hnu khan vawikhatmah ka hmu leh ta lo, min rawn biak a tum fo va, ka pick-up ngailo a, a msg pawh ka reply ngai hek lo.
“Eng nge i duh?” bak deuh hlak hian ka ti a, ka lakah khan a felin a tha em em thin a, mahse, a mah vang a ka chunga thil thleng kha ka la theihnghilh thei lo a, a thil tih that zawng zawng te kha hrereng tho mahila a tih that loh pakhat lek khan ka rilru a luah hneh zawk,ka dikloh ni lo in hei hi Mihring te zia a ni tlat, thiltam tak tih that ai chuan thil pakhat tihsual hi kan hmu lian zawk fo zel.
“Biak lawk che ka duh a,khawngaihin” inthlahrun hmel deuh hian a ti a, ka thawmhnaw ka la thlak lo a, ka kawr hak tur ka keng thung..
“Enteh, i hmuh ang hian ka thawmhnaw ka thlak dawn a,kan riahna tur pan nghal ka ngai bawka, i sawi tur chu naktuk lamah kan sawi dawn mi niang?” ka ti mar at.
“Ok,nia, a pawi lo’ati a,a tawi khawmuang deuh a, mahse,ka hmelah ka be chak hlawl lo tih a hmu a ni ngei ang, a chhuak ve mai bawk..
“Ngatinge khati khan i tih kher a?” Kimtei'n min ti a, a mak ti hmel chu ka haider lui tlat a, thil thlen dan kha engmah ka hrilh lo a, ka thian tiin ka hmelhriattir a, mak a ti deuh pawh ka dem hauh lo.
“Aaaaa ,a thui lutuk, bakah a Nupui tur te thiandun-in min tihdan kha ngaihtuah ta che” ka ti nghat a, thil kal tawh ngaihtuah niawm tak hian a bu nghauh bawk.
“Um ka hrethiam che, lo inthlak rawh, inhnuaiah ka zuk chhuk lawk ang” a ti a, ka bu nghauh, a chhuak tur chu ka en zui a, ka tan thian nih a tlin takzet,mahse, kei ve hi chuan thian nihna ang a ka tihtur pawh hi ka ti meuh pawn ka hre lo…
Bag thenkhat chu bang kil lamah ka nawr khawm a, ka thawmhnaw ka thlak hma in Intleuh zuai ka duh a, ka Bath robe ka dahna ber ka hriat loh avangin khum sir a Jordan-a ta awm chu ka pawtthla a,ka tan chuan a lian hle ang tih ka hria, mahse, ka haksak mai loh chuan ka ta ka zawng peih rih lo..
Tuilumah ka inchiah a, muthilh daih mai ka chak et et,tihchi a ni der si lo.
Jordan-a Bath Robe ka ha a, a Slipper ka bun bawk,ka tan chuan a lian vel vek.Room chhung ka lut chiah chu mi pakhat a lo ding ka hmuh rualin ka ding nghal chawt a.
“Engnge ni a?” ka ti chang bawng mai,engmah sawi lo in min rawn pan a,nidang a ka la hmuh ngai hauh loh a hmelah ka hmu tel tlat, pawisak engmah nei hmel a pu lo..
“Inbiak ka duh mai chauh ania,a reilo ang” ati a.
“Min biak duh chuan inhnuaiah min lo nghak rawh, he room hi chu kan nupa Room anih hi” ka ti leh hmak a, mahse, ngaipawimawh hmel a pu lo,min rawn hnaih leh chu ka petek dawrh thung.
“Khati khan mi tha tak angin lan tum vel suh, kei aiin Mama hi a hausa zawk a, chuvang mai a thlang i nih kha, tunah tumah an awm lo,lemchan a ngai lo, i pasal pawh Party naah a la awm daih” nuam ti tak hian a ti leh zung zunga, a thilsawi chu ka hresual emaw ka ti hial,thinrim em em in ka en a.
“Helaiah hian min mamawh em ka hre lo,mahse, ka thil hmuh hi ka duhzawng a ni hauh lo mai” Jordan-a aw hian kawngkhar lam atangin a rawn ti a, a aw hlauhawm zia chu pui tak a ni.
“Jordan..ka mamawh viau che ”ka ti nghal a, huatna nen Zobiaka ka en a, engvangin nge khatiang thu atthlak lutuk kha a sawi ka hrethiam ta vek, Jordan-a a lo haw tih a hria a, a hriat ngei turin dawt a sawi tihna a ni.
“Zobiak, chhuak rawh” Jordana'n a ti a, aw a ring lo,mahse, hnial chi a ni lo tih mi a ber pawn an hrethiam hial ang..
“Aw, ka chhuak ang, mahse...” a ti hman chauha,
“Dam ila duh chuan tunah kal rawh” a ti ram hmuk, Zobiaka a meng khup lup a, ui dawih zawk ang maiin a chhuak ta hnu hnu, mahse engkim mai chu a lemchan tih ka hrethiam tawha, ka ten hluah hluah..
Jordan-a rawn kalphei chu ti dak hian ka en a, diktak chuan engmah tihsual ka nei lo, mahse, khatiang thu a hriat hnu khan thiamthu lo sawi ve ngam a ni lo. ,ka tihsual awm hauh lo chungin ka chhungril a hlauhna rawn thawk chuan min ti khur lo thei lo..
Ka khabeah a rawn dawm a, min beng dawn emaw ka ti a, mahse, na zet hian bang a beng dawt mai,a rawn kun hniam a....ka khup a sai hlawk hlawk a, bang nghengin ka ding hlauh a, chuti ni lo se ka khur nasa lutuk a ka ding thei lo ang tih ka chiang..
“Tunah tak hian ka tih chak ber i hria em?” a ti a, aw ah a thinrim a insum nasatzia ka hre thei hial...ka chil ka lem a, chhan pawh ka chhang thei lo..
“Ka beng hrep chak che, mahse, ka ti lo ang, inneih zana khatianga room a lo awmdun tur inni em ni? , min ti tlawm hle a ni” a ti ta nghut.
Chapter – 17
“Thawmhnaw ha rawh, kal a hun ania” kalsawn pahin a ti leh nghut a, a necktie a pawt phelhun Khumah a thehthla a, a kamiz a phelh leh a, chupawh khumah a thehthla leh a, a kekawr kawng phelh tum a a khawih leh chu ka hawisawn a. Zobiaka thilsawi kha hre vek mah se engmah keiin tihsual ka nei lo va, chuvangin ka hlauh chiam a tulna ka hre lo. A lungawi loh pui anih erawh chuan a demawm bik lo vang. Kan room a a lo kal mai kha ka mitmei a hmuh vang ah pawh angai theia. Induh hleuh hleuh a innei ta kan nih loh na hian thil ho teah pawh rinhlelhna min siamsak zel niin ka hre ta ber.
Khum a ka thawmhnaw hak tur ka dah chhuahsa chu ka la a, Bath Room ah ka ha mai dawn mawni ka ti a, mahse, tul ka ti leh ta lem lo.
Ka Bath Robe hak lai ka phelh a, T- shirt dum thawl hnak mai ka inthawlh a, min en leh en loh lam ka ngaipawimawh lo,ka landan a mawi lo viau em tih pawh ka ngaihtuah chuang lo,ka kawr hak in ka mal te thleng a khuh thla a, Pyjama ka ha leh a,ka slipper awmna ka la hre fuh ta mai lo va, ka hak nghal tur leh mamawh nghal tur a hranin kan dah khawma, mahse slipper ka lo khung tel lo chu niin.
“I Slipper hi ka bun hawh lawk mai dawn mi?” amah pawh en lo in ka ti a..
“Pawi hleinem” bung zet hian a ti nghut,han zawn kual leh vel ka peih tawh rih lo va, bun tawk lo viau mah ila tumah kan hmuh ka ring tawh chuang lo bawk hrim hrim.
“Ka inpeih e” ka ti a, ka awah ka awm a nuam lo tih engmah ka ti lang lo, ka nervous tehmeuh mai ,mahse, tihlan a ka nep zia hmuh tir kher ka duh lo.
“Khawnge i bag?’ ati leh nghut a, engmah ken pawh ka lo tum lo.
“Eng bag?” ka ti ha.
“I mamawh ho kenna tur" A tih chuan, “Ka bag ho hi ka la khawih peih ngang lo a,mahse, reilote min nghah theih chuan ken duh chu ka nei tho mai” ka ti a,a bu ve mai..
“Lo en fel rawh, ka lo chho leh ang, Mark-a ka zuk hmu leh lawk” ati leh a, ka chhanna pawh nghak lo in a kal zui nghal a.
Reitak in nghah tir chi a ni lo tih hriain hmanhmawh fe hian ka en kual a.Ka Bag pakhat, lian vak loah ka thil mamawh zual tur ka khunga, a rawn let leh chuan ka lo inpeih thlap tawh,
“I hman em?”a rawn ti zang vuha,Zobiaka vanga a mood off em em kha a lo zia ta deuh tih ka manthiam nghal mai. A rawn kal hnaih chuan a zuin rimin ka hnar a verh nghal zar,a lo luh hmasak zawk khan zu rim a nam ka hre miah lo va, Inhnuaiah a zuk in a ni ngei ang, engtiklaimahin Zu in mi Pasal a neih hi ka rilruah a lo la awm chhin ngai lo a, kan inneih zan lek phei chuan Pasal zu in nen khum khatah kan mutdun ka lo ring ngai hek lo. Mahse, tunah chuan khang ka duhthusam ve thin te kha mumang ang mai an ni a, ka nuna thil mak pui pui thleng hi ka pawm thiam angai tiin ka inngaihtuaha,. Putea boral hnu atang khan ka nunah hian engmah a pangngaiin a thleng leh tawh lo emaw tihmai tur a ni.
Kan ngawi dun kar maia, tawng zawk nih kan chak lo ve ve anih hmel. Kimtei kha Mark –an a thlah dawn a, an pahnih awm danah hian ka ngaihbel nge ka hre lo, induhtawn an ang viau maia,ka lo buai na tur a ni lo a, zawh pawh ka zawt lo, a tul hunah chuan min hrilh mai ang chu.
“Kan thleng e’ Jordan-a aw in a tih ri ah chuan ka harha,kan kal hmasak tum ang lo takin a lo eng iar maia, a lang nalh takzet bawk. Ka zi mar ar ar a, engtin nge zan hun kan hmanral ang tih ka ngaihtuahna ah a lo lut a, ka tiril a khur a, ka hlauh vang a ni em ka hre lo.
“I mu nghal duh em?” tiin pangngai takin min zawt a,lawm rilru zet hian ka bu nghat mai,Living Room eng dul deuh ruih a thutthlengah a thu a.
“I duh ber room hmang mai rawh” a tih leh chuan ka hresual emaw ka ti hial.
“Engtin maw?!!” ka ti a, ka aw ah pawh mak ka tih zia a lang thei hial bawk.
“Bed Room pathum a awm a, i duh ber i hmang thei ka ti anih chu” ati leh a,ka lo rin lawk dan nen a inpersan ngang mai.
“Engatinge? Kan inneih zan a ni sia...” ka ti chhuak hlawl.
“Um, ka hria alawm, room hrana awm i duh lo tihna mi? " a ti leh a.
“Aaaa, nupa kan nih tawh tho chuan room hran a awm kha mal ka ti deuh a, mahse a pawi lo...” ka ti ta ngawt. A thle zauha,
“Nia, nupa kan nia...hei hian a ti chiang alawm tiraw? ” tih pahin a kutzungtang a zungbun awm chu a rawn ti lang zauh a,a awmdan mak danglam lutuk vangin awmdan tur ka hre meuh lo. Mahse, ka inngaihtuah fim leh thuai.
“Oooo, nia, a dik reng, helam hnaih berah hian kan ange'zangkhai vah hian ka ti a, a veilam ber a awm chu ka kawk zauh a, ani erawh chuan min en lo in a phone a en thung.
Roomah ka lut a, Room lian lutuk lo, felfai thlap mai a ni a, kawngkhar chhunglamah ka kalh nghal thlap. , ka thawmhnaw pawh hlip lo in ka mu a, Light ka Off nghal daih bawk. Tah ka duh reng reng lo va, ka pasal neihni ah lehnghal hian engvangmahin tah ka duh lo, mahse, ka duh loh ngawt theih pawh a ni ta lo,ka thiltawn te avangin ka chau a, tuemaw tal min hnemtu tur ka mamawh a, hetianga Pasal neih hi eng nge anih chiah min hrilhfiah tur ka mamawh em em bawk,mahse..tumah ka bulah an awm si lo,mal intihna leh khawharna,mahni inkhawngaihna avangin hrehawm ka ti em em a. Mi thenkhat tan nun a nawm em em laiin thenkhat tan hi chuan nun nawm chu sawi loh, nung turin kan fight hram hram zawk. Ka nuna ka thil mamawh miah loh te hi ka tan chuan tlansan theih loh khawpin ka nun nen a inzawm nghet tlat si..ka mittui a rawn luang zung zung a, ka tah rik loh nan lukhamah ka hmai ka phum a,ka taksa a khur hlawk hlawk thung.
Kawngkhar kik thawmah ka harh zawka, ka awmna ka hre lo lek lek bawk. Parda kar atangin ni in a rawn chhun eng iar a, pawnlamah Sava thawm a ri nak nak maia, nizan thil thleng ka ngaihtuah nghal a, ka tap muhil a ni ngei ang, ka mit ka nuai chat chat a, room kawngkhar kik ri a rawn ri leh a,tu nge anih zawh buai ka ngai lo chiang viau, Jordan-a nen bak helaiah hian kan kal tlat lo.
Kawngkhar ka hawng a, ka rin ang chiahin Jordan-a a lo ni a, nizana a thawmhnaw hak kha ha tawh lo in kekawr bul, khup thleng lo deuh leh T- Shirt a ha a, Slipper a bun bawk, a chawn sei thlurh chu hmul in a khuh dap bawk. Pasal hmingpu ve ngawt,engmah inzawmna ka neihpui si loh Mipa ka hmaa ding mek chu ka en a.
“Good Morning” dam thlup hian ati a. “Morning...kal a hun tawh em ni?” ka ti teh ngawta.
“La hun lo deuh, huan vel ka enkualpui ang che ka ti a..” tha takin a ti a, Roomah a rawn lut a, nizanah khan ka bag takngial pawh ka phawrh lo,khum a en vung vunga.
“Engtikah nge kan let ang?” ka tih chuan min rawn en a. “Chawei turin kan haw ang a, mahse, zanah hetah riak turin kan let leh ang” ati leh nghut a, eng nge hetah hian kan riah kher a tulna ka hre lo e...
“Mahse, Jordan....engatinge hetah kan riah kher ang?” tih pahin Bag atangin ka sam tawnna leh Face Wash vel ka phawrh a.
“Honeymoon hmang tura kal i duh lo a, hetah hian kan riak rih ang chu” ati leh nghut a,ka lo ip chawih mai.
“Anih leh In ah room hran kan hmang thei angem?” ka ti a.
“Aih, hmang lo ang,heta kan riah chhung chiah hi room hranah chuan kan awm ang" nelawmna tel miah lo,khauh fur hian a ti a, hetiang hian a nelawm lo reng thin ni ber hian ka hre tawh, engtikah tak a mizia hi ngaiah la nei ang i maw??
“Kan inphihfai lawk ange,ka rei lo ang” ka ti a, Khumah a thu a, Room sir a Bath room lian vaklo awmah chuan ka luhsan a, ka hmai ka phih sawk sawk a, darthlalang awmah chuan ka in en a, ka mit a bui deuh lak maia,zan lamah ka tap tih a hrethiam maithei.
Room atanga a kal chhuak zui pahin ka sam ka vial tawm nawk nawk a,,sam han chul mamna hun pawh ka nei lo,ka landan a nalh fahran lo khawp ang, a pawi tawp lo ve, eng ang pawn lang nalh ila atan chuan engmah a nih hmel chuang loh em mai,a engahmah ka thawk lo ti zawnga ka ngaihtuah ringawt pawn ka na zawk thei.
In hnunglam kawng awm riakah chuan a kal zel a, a hnungah ka zui dat dat bawk, khaw engah chiang taka ka hmuh takah chuan ka lo beisei ai fe in a hmun hma a lo nalha, kawtzawl vel chu phul in a bawh khat vek a,a laiah kawng a kal tlang a, lung hi awmze nei tak hian an phah vek bawk.Sap pangpar leh derhken an par vul chuka, fur chhe zual a reh tawhin favang rim a nam lek lek tawh a, zingkar Boruak a nuam kher bawk. . Thing lian pui pui awmna lamah a kal zel a, Step hi Brick rem, plaster loh bawk a ni a, a hmun awmdan leh an cheibawl dan vel zawng zawng nen chuan ram dang daiha cheng ang mai ka ni.
“Eng nge ang i tih?” ti chungin a rawn hawi let a, Boruak thianghlim lutuk leh hnim rim chuan ka hnar a verh a, ka harh sawng sawng mai..
“A nuam thlawt ka ti, .mumang ramah ka la cheng niin ka hria” ka ti hapa, ka aw ah pawh ka phur zia alang thei hialin ka hria.
“Um, i hmelah khan a lang alawm, engemaw rilru ipik na ka neih chuan hetah hian ka kal thin a..” tha takin a ti a, a nunah ka telve tih lan nan ama chungchang hahdam takin min hrilh vawikhatna a ni.
“I rilru a hah ve thin em ni?” nui chung hian ka ti a, amah huatna engmah ka nei lo,a sam thliin a chhem thur deuh a, chu chuan a ti ang naupang phian mai. A nui a,
“Mihring ka ni ve tho a,achang chuan ka rilru pawh a hah ve thin alawm..” a ti zuia, ka sawidan kha a ngai haw lem lo tih alang..
“Mihring i ni tihte chu ka hre thi a.thil ka zawt dawn che ania aw” ka ti leha, a sir a thingkung a thutna an siamah chuan a thu a, a thutna bul awl chu a kawk zauh a, thu ve turin zaizirin min sawm tih ka hria,mahse, ka haider lui a, ka dinna stepah ka thusawp ta zawk..
“Han sawi la, chhan har lutuk ni lo se..” tih pahin a nui leha, he nui hmel hi a ni vawitam ka lo mitthla thin kha, tih elna tel lo,nuihzat tak tak vanga a nui hian mi a hip hluah hluah...
“Ngatinge Poppy i neih loh?” ka tih rualin a hmel a danglam zawk a, mahse, ngai a awh leh thuai.
“Ka nei che lawm" a ti deuh tawp a, kan inchhang tawk tik tek viau mai..
“Oh..ka hria lawm, min neih vang tak hian ania ka zawh che” ka ti leh a, a sam a tuai a,min rawn en a...
“Lo kal teh” ati ta daih, reilote ka in ngaihtuah hnuah ka pan hnai a,Amah si lo turin a kil lehlamah ka thu a, mahse, min rawn hnaih tho, ka kut a rawn la thuta, ka tang deuh na in a thlah duh lo, a kawr a hlim a, eng nge tih a tum ka hre si lo va, a che vel chu hnial ngaihna pawh hre lo in ka en reng ringawt.
“Hei hi khawih teh..” tih pahin a hnute hnuaia ser awm chu min khawih tir a, a hma khan ka lo hmu miah lo..
“Ngatinge hei hi?” ka ti lawi rat mai.
“Football hi ka ngaina em em a,ka naupanlai atangin ka khel nasa thin khawp mai, ka eizawnna atan pawh ka hmang ang ka ti hial thin , mahse, ka duhdan angin ka nun ka hmang ta lo, ka chawlhsan a, tunah erawh chuan Football Club, ka ngaihhlut em em mai neitu ka ni ta zawk” a ti a, a nu hnen atangin ka hre tawha, eng nge sawi a tum ka hrethiam chuang lo..
A kawr a pawtthla leh a, a rawn kun hniam a, a chal chung, a sam to na hnuai chiah chu a kawk a, chiang takin ser awm chu ka hmu a, ka thaw hawk mai,hei pawh hi a hma khan ka hmu lo.
“Eng ngatinge hei pawh hi?”ka ti leh vat.
“Ka mit hi a del tep tih tuemaw talin an hrilh tawh che em?” zuai ruih hian a ti a.
“Aw, Sawmtei’n min hrilh tawh,mahse, vawikhat chiah..”ka ti leh thuai
“Ka inkhelh lai a thleng ania, ka lu a rawn na vak maia, engmah hre lo in ka awm a,ka harh leh chuan engmah buaina ka nei lo, mahse, he ser hi chu a awm ta reng, reh a tan pawh ka phal lo,ka nuna thil hlu tak, ka ta tur ni si lo,ka kalsan phal ngai si loh kha ka thlah hmasak ngai lo in a nihna zawng zawng nen a kal a, chumi hriat rengna chu anih hi..” ati ri hulha, thaw ham ham mai..sawi ve tur reng reng ka hre lo..
“Ka nat lai khan ka mit a del dawn emaw tiin ka nu phei hi chu a lo tap nasa viau aniang, mahse, a del ta lo hlauh” ati leh sup a, za vak lo hian a nui zuia.
“I mit vangin em ni inkhelh i chawlhsan?” ka ti ve thung, a lu a thing a, kan hmalam ram hring dup chu hmuh nei niawm tak hian a en vung vung a.
“Ka mit vang a ka buai hi chuan ka naupang tawh lo, ka Thin an zaina vang zak hian ka inkhel thei ta lo a, mahse, ka hunawlah chuan ka khel zauh zauh reng tho, tun thleng pawn..” ati a, a naupanlai hunah suangtuahnain a let leh anih hmel viau..
“Um, ka hrethiam che ti dawn ila ka hrethiam chiah lo che, mahse, kei ni ila hrehawm ka ti ngawt ang” tiin ka rilru dik tak ka sawia,han hnem viau dan tur pawh ka hre lo..
“I mize tlang em em hi ka duh thin...ni e, i hrethiam ngai lo ang, mahse, ka hmaah hian ka nupui, kei aia tuarchhel zawk i awm tih ka ngaihtuah ziah tawh dawn a, ka tan chuan khang thil te kha thil hlui anni tawh a,ka kalsan fel tawh in ka hria” ati leh duah a, ka biang a sa hat hat thei hial mai, min fakna tawngkam hi engtikah mah a sawi ka lo ring ngai lo..chu pawh ka hmaichhanah lehnghal.
“Fakna ah ka ngai dawn em ni...” lai deuh tut chungin ka ti a, ka nui bawka,tun tum chu tihluihna tel lo, nuih zat tak tak vang a ni ve ta,a rawn hawi a, ka sam chhawleng thliin a chhem len chu a rawn khawih a, ka bengah a rawn zep a, ka thut ngaiin ka thu a, a rawn kun hniam rualin ka maimitchhing ta ngawt, a hmui lum ham ham in ka hmui a rawn si a, a dim in a dam hle bawk,chhan let na chang pawh ka hre lo a, ka chalah a chalin a rawn ti si a...
“Ka Nupui neih zanah ka nupui nen kan mu hrang ang tih hi ka mumangah pawh ka la hmu chhin lo” nui chungin a ti a, kei erawh ka nuih a za ve hauh lo,kei pawn ka Pasal neih zanah ka Pasal nen kan mu hrang dawn tih hi ka mumangah pawh ka la hmu chhin bik eih lo...
“Keipawh..” zawitein ka ti sep a, ka biangah a kut zungpuiin a rawn tuai a.
“I lakah hian ka nunrawng thin, midang laka ka nih miah loh danin ka thinrim hma em em bawka, a chang hi chuan kutthlak chak chang che pawh ka nei, nizan ang te kha....” a ti chu a tawng tawp lam a sehchilh nak mai..
“Nizan kha ka sawifiah thei a....i ngaihthlak duh chuan...?” tim deuh hian ka ti a.
“Tehreng mai,mahse, kan kal a hun tawh a, zanah sawi dunna hun kan ngah ang” ati a, min vawnna a thlah a, a ding chhuak zui nghala,a awmdan inthlak thut thut thin hian min ti hamhaih fo a,hei pawh hi engtikah nge ngaiah ka neih ang ka ti ru vang vang mai.
In kan thlen chuan an lo awm nak nak a, ka hriat ngai loh an tam zawk, a thenin pawn hnawk an lo thian fai a, a then in inchhunglam an tifai bawk.Jordan-a nu in min lo lawm thuai a,’ka nu’ tiin ka la ko lo,vawikhatmah ka nu tih tawngkam hi midang koh nan ka la sawi chhuak ngai lo a, ka thiam pawn ka ring lo hial mai..
“I tha em?” nui chung hian a ti a, ka bu nghat ringawt, engmah thleng lo mah se ka zak tawk viau, tu te pawn Nupa nuna thil thleng te chu kan hre vek miau si,kan ti emaw ti lo emaw midang ngaihdanah chuan Nupa nun hmang tura beisei kan ni tlat.
“In ril a tam tawh em?” a ti leh hluaia, diktak chuan a tam, nimin tlai a kan ei bak kha engmah ka la ei leh lo..
“Nu...Roomah kan chho lawk anga, nakin deuhah Kimtei leh Mark-a an lo kal dawn a, chaw kan ei rual mai ang aw, a pawi em?” Jordana'n a ti a, a Nu a zah dan em em hi mak ka ti ru fo mai..
“Aih, tihtur a tam sia, ka lo tihpui ang,ka thawmhnaw ho kha chu Kimtei lo thlen hun law law ah kan dahfel mai ang” rang zet hian ka ti a, Jordan-a nu ngaihdan tur ka hre lo, mahse, In kan thleng chauh a, Room a tawmbo leh ngawt kha thil dik niin ka hre thei lo..
“Ok, i thu thu le...Nu,i chak dawn a ang riau mai” a nu en chungin ati a, a hmel dam thlup mai chu ka en ve thung, tiang hian min en ve ngai lo...mahse, a sawi awmzia erawh ka hre hauh lo thung..
“Het...chutiang sawi suh, ka mo ka ti ve dawn lo, ka fanu thar hian ka rilru a hria ang ka tih kha...” a nuin a tih chuan a intithei hmel phian bawk...
“Aw le, engpawh nise, Mate..ka kal “ tih pahin ka kut a rawn vuan zauh a, tur zet hian ka melh thung, han induat der vel a tul ka tih loh tum ber a ni hial ang..
“Bawihi, helamah hian thil ka entir ang che” a nuin a ti a, an thil tifai ka pui dawn emaw ka intih laiin engtak min tih tir tum ni maw??
Inhnuai luh thlakna Step ah kan chhuk zela, Corridor tawite a lo awm a, kan kal leh hret a, Kawngkhar a lo awm a, Tala lian zet hian a inkalh a. A kekawr ipte a zen a, thirkual,chahbi tamtak inkhaina hi a phawrh chhuak a, eng nge min entir a tum ka man pha lo, mahse, ka zawt buai peih lo, ka hmuh hunah ka hre mai ang chu..
😍🥰🥰🥰
“Lut ang le...”atih veleh ka zui lut a, ka beisei loh lutuk ka hmuh takah chuan ka ding leh chawt bawk.Thlalak chi hrang hrangin a khat vek, Room lian pangngai tak a ni a, bangah chuan fel takin thlalak nalh leh hlui tak tak a intar chhuak vek, thutna tur pakhatmah awmlo in chhuat erawh a ruak vek thung...
“Eng nge i ngaihdan le?” ati a, a kal kual a, engmah sawina chang pawh ka la hre lo..
“Ih...englo, ka lo beisei lo..” ka ti bah nawk nawk mai, Jordan-a naupanlai thlalak niawm tak tak, lian deuh leh tedeuh te, a awmkim vel vek anih hmel..
“Hei hi ka mimal Room liau liau anih hi, kan chhungkaw hun pawimawh te, Jordan-a te unau an pian atang a an puitlin thleng thlalak ka neih zawng zawng te,kan nupa a kan zinkualna te, kan chhungkaw darthlalang chu he Room hi anih hi...” chhuang takin a ti a.
“A ropui..nang ang nu ropui a neih vang che hi anih ngei hi Jordan-a hian a lo zah em em che..” ka ti ta thlawt, mi an hmaichhana fak chiam hi ka tih dan a ni ngai lo va, mahse tun tum chu sawi loh har ka ti tlat., Ka dinna bula Jordan-a naupanlai thlalak, a ha hmai bal seu na intar chu ka khawih a,a duhawm takzet, hetiang ang hi Fapa ka nei dawn anih chua neih ve ka duh...
“Jordana nu chauh ka ni lo va, i nu pawh ka ni tawh alawm” tih pahin ka bulah a rawn ding a, alam ka hawi a, ka kut pahnih a rawn vuan chat, ka mitah chiang takin min en a..ka khur ru dar dar chu a hria ang tih ka chiang..
“Ka ko mai lo che anih pawn ka lakah thinrim suh aw, Nu ka nei ngai lo a, engtia koh mai tur nge pawh ka hre lo..” ka ti ta tawp,ka tumloh tawpin ka mittui a rawn tla a,mahni inkhawngaih vang bawk a ni.
“A pawi lo,a pawi lo lutuk, ka hau dawn lo che, i inpeih hun hun ka nghak thei,lungngai miah suh,mahse, thil pakhat ka ngen ang che. Jordan-a hian a duh em em che a, a atchilh thawthang che tih ka hria, Poppy-in a kalsan khan a a dawn emaw ka ti a, hmeichhia reng reng a buaipui ta lo, a buaipui lo ti ila tumah ala thutak lo zawk, mahse, a hmu che a, In ah a rawn hruai hmasak ber tum che khan a nei duh che tih min hrilh tawh,khawngaihin ka ngen ang che, kalsan ngai suh,Nupui a nei tur khawp a rilru a pek hmeichhe awmchhun i ni a, i kalsan chuan a tuar zo lo ang,a mizia hi a nelawm lo a, achang chuan a hlauhawm hial maithei, mi chak leh luhlul a ni a, mahse a midang te ngaihsak em em tu a nu. A mizia vang hian hlau suh, a ti na ngai lo ang che tih ka chiang, ka fapa a ni tlat..” a ti dap dapa, awih tur nge awih loh tur pawh ka hrethiam lo, mahse, Jordan-a nu hmel thutak lutukah chuan fiamthu leh thu ho mai mai sawi anih loh zia alang reng..
“Ka tiam thei lo che, mahse, kalsan erawh ka kalsan lo ang,amah zawkin min then anih loh chuan..” ka ti sep a, a samah a rawn chul a.
“A mimal nun hi ka zahsak a, kei emaw a pa pawn kan sawisel ngai lo,diktak chuan in inkawp reilo tih pawh kan hria, mahse, engmah kan sawi lo,a nei duh che anih chuan a thiltihah a chiang tih hi kan pawm dan a ni,chuan,a bulah i awm tam anga,i hriat tur te chu a hrilh belh zel ang che, i hriat tam ang zelin a nunah i lut thuk tihna a ni tih hrereng ang che,chuan ,he hmeichhia, Poppy hi...ngaipawimawh suh,a tih ang chiah che in ti let ve zel ang che”nui chungin a ti a, a fapa ang chiahin tun a a nui hmel kha chu nui satliah a ni lo, a hlauhawm...
“Ka lo hrereng dawn nia” ka ti sep a, min rawn kuah a, kuah let ve ka duh, mahse, ka thei lo,ka ding mawl tawp..Kan inbiakdan zawng zawng te hi mizo chhungkaw dang, mo leh pasal nu Inkara la thleng ngai lo anih ka ring hial mai.
An Thil tihfai vel puih ka tum a, puih tur ber pawh ka hre chuang lo, an che suau suau a, han tih tan ve na tur pawh ka hre thiam lo,min chibai tawk an awm reng bawk. Ka ril a tam a, ka pum a ri raih raih mai..Ka kekawr ipte ka dap a, ka Phone a lo awm lo, Jordan-an a keng tih ka hrechhuak a, Kimtei lo thleng har ka ti lutuka, , ka thinrim ru teuh bawk, ka mikhual anga, ka inthlahrung ang tih te pawh ngaihtuah ve awm tak hi ania.
Room lam ka pan a, Jordan-a pawh ka la hmu leh lo hrim hrim, eng nge a tih en ka duh a, a In atanga kan let leh khan kan boruak kha a nuam in a dam raih a,khatiang boruak kha engtiklai pawn kan pahnihin nei thei ila thildang ka mamawh miah lo ang, kan inpawh em em tlat.
Kawngkhar ka nem hawng tur chu hmeichhe tawngri ka hria a, Jordan-a nau emaw ka ti a,ka nem kau a, kan Room a ni tawh a, kik tulin ka hre lo,mahse , ka beisei loh takin Tukverh bulah Jordan-a leh Hmeichhe pakhat an lo ding dun a, min hnungchhawn avangin min hmu ve lo,tu nge anih ka hre mai lo.
“Engvangin nge ani hi i neih kher angaih a? I hmanhmawh em em mai bawk si, mi pawhin an sawi sep sep che ania” a tih takah chuan Poppy a ni tih ka hre nghala, ..engtin nge kan Roomah tunah a awm theih ni??
Jordan-a chhanna tur ngaithla duh loin thawm dim zetin ka tawlhchhuak leh zal zal a, ka kal tih an hre kher lo ang.
Chapter- 18
Inhnuai panna step vawnban ka vuan a, ka theihtawpin boruak ka hip vak bawk, ka ngaihtuahna a bing mum mum a, engmah mumal in ka ngaihtuah thei lo. Kan nupa Room a lo kal ngam chhan pakhat chiah a awm, Jordan-a mitmei a hmu tihna animai,he In ah hian a lo kal anih pawhin kan Roomah kher chuan kal tur a ni miah lo. Tun hmain a duh duhin a lo tal vel thin anih pawhin tunah chuan kan nupa room a ni tawha,Jordan-a nu khan kalsan lo turin min ngen mah se inneih tuk maiah pawh hetiang anih chuan ka tuar chhuak zo angem ka hre lo lo le.
“Jordan-a i hmu em?” Rindika’n min hmuh veleh a lo ti thuai a,
“Aw, Roomah a awm, a lo chhuk tep ang” ka ti vat, ka beisei ai takin ka aw a pangngai viaua. Atthlak em em in Poppy nen an awmdun lai a hmuh ka hlau tlat bawk.
“Ok, Poppy a lo thleng tawh em?” atih takah chuan ka mengphar deuh awk a. Mahse, ka incontrol leh thuai,
“Aw, thleng tawh e, ani pawh Roomah a chho a, I han chho ve mai zawk dawn nge? thil pawimawh sawi tur nei in ang em mai” ka ti a, ka nui lui sak bawk.
“Um, nei chiang e, a hmahmawhthlak tel bawk a,ka han chho ang e” tih pahin Stepah a tlan chho nghala, ka ner nak mai..a hmanhmawhthlak ani ta ve ang, engvanga min nei nge tih lam anih kha anni kha chuan an lo buaipui zawk hrep ni..
Choka lam an tihfai naah ka awm ve a, ka riltam lutuk ka luak a chhuak hlui thei. Dinning table lian leh hnum hlurhah chuan Balhla leh Apple a awm nual a, ka insum zo thlawt lova, ka ban ta nge nge.
“I ril a tam tawh em?” tih pahin Jordan-a nau ka bulah a rawn thu a,keimah ang tho in Apple a ei pah bawk..
“Zep lo chuan a tam tan..” ka nui a, a nui ve a.
“Eeee, enteh, Poppy kha a lo kal in ka hria,i hmu em?” ati leh daiha, a Apple kenlai a keihthla a, a hmelah min zawh chhan awm ka hrethiam lo, hei pawh hi a u ang tho a in control thei a ni ngei ang..
“Aw, hmu e,Roomah Rindika te nen an awm, hna chungchang hmanhmawhthlak a awm an ti a” ka tih chuan a thle bak a..
“Lo kal fo lo se ka ti, hna pawh hi thawk ho lo se ka duh zawk daih” ati leh hlak a,ka nui ringawt..
“Ka ti tak tak alawm, ka nu hian a ngaithei bau lo bawka,kei hi chuan ka be mai thei thin a, bakah Mama hian a ngaipawimawh tawh lo tih ka hria a, ka haw em em hran lo,mahse, an pahnih in chanchin an lo nei dun tawh a, lo kal tawh lo se a finthlak animai” ati leh hlak a, kan bul hnaia ding hmeichhe pakhat chu a rawn thu hnai a, a hma khan ani hi ka hmu tawha,mahse, tu ber nge anih ka hre leh tawh chuang lo..
“In va sawi ril hmel ve” tih pahin Dinning Table Balhla awm a ban ve nghal a.
“Nia, muk rap,eee,U Abby, hei hi kan cousin anih hi,Zoi, khawlaiah pawh hmu la i biak hma in a be zel ang che” nui chung hian a ti a, ka nui ve ringawt,Cousin ai mah chuan thian inkawmngeih lutuk ang ang mah zawk...
Kimtei leh Mark-a an rawn thleng rual a, an rawn thlen hnu lawkah Jordan-a te pawh an lo chhuk thla a, min zawng niawm fahran hian a hawi kual a,kan thutna lam a rawn hawi a, min hmuh veleh min rawn pan a, zingkar a kan boruak nuam tak kha ani chuan ala ngaihtuah a ni maithei, kei erawh chuan a teuh lo mai, a hnung a Poppy rawn kal ka hmuh rualin ka thinrim tha leh zawk.
“Thil pawimawh a awm thut a, chaw in ei tawh em?” Pangngai tak hian a rawn ti a, ka thutna Stool sang zet chu a rawn kal hual a, keilah ka khup tawmin ka thu a, thut pangngai pawn thu ila chhuat ka rap pha lo hrim hrim,ka hnungah a rawn ding a,ngaipawimawh lo ang a awm hram hram ka tum lui tlat.
“Aih, ei lo, hei, Kimtei leh Mark-a hi an lo thleng deuh chiah a” ka ti a, ka thutna atangin chhuk tumin ka khup ka ti mar a, mahse, ka chhuk hmain ka kawngah a rawn chelh a,amah si chetin min pawt a,ka thu khawng lah mai..
“Um, anih chu, kei chu ka ril a tam tawh, ei nghal in duh em?” zawh bik pawh nei lo hian a ti a, a thusawi lamin min tibuai lo, ka kawnga a vawnna chuan min tibuai zawk.
Jordan-a nu a rawn lut a, Poppy lo thu ve chu hmu awm pawn a awm lo,chawei an siam a, Kimtei nen tihpui ve ka tum chuan an nui mai mai.
“Ti duh suh, i tih ngai lo in titur an tam em mai” nui chung hian Mark-an a ti a, Jordan-a bul atanga kalsawn na remchang melh ran ka nih avangin ka kalsawn ta ngei, mahse, an sawi ang ngeiin tihpui ka tum ta lo zawk, ka puih loh pawn ti tur an tam hmel tak tak, an In ka kal hmasak tum kha chuan nula pakhat chiah ka hmu a, Jordan-a nu leh Estheri khan an tihpui vek a, mahse, tunah chuan Jordan-a nu pawn tih tur a hrilh a, Estheri pawn a pui lem lo..
Nilengin ka’n buai ta char char, ka thawmhnaw kan remfel a, a khat tawkin an chhungte lo kal an awm deuh reng. Jordan-a Ni, Putea, Patea...tumah hriat zui pawh ka nei rih chuang lo,hun a la kal leh deuh anga ka la hrechiang mai turah ka dah tawp tawh, an hmel erawh ka hmuh tawh hnu anni tih ka hre thei mai hlawma,an hming zawk ka hre rei thei lo..
Tlai lamah chuan kan indahfel thawkhat tawh a, ka thawmhnaw dahna tur in Jordan-a thawmhnaw dahna bulah an lo siam belh a, engmah kenluh an phal loh vangin ka kenglut ta lo. mahse, buaina tur a awmlo,ka thawmhnaw kenluh zawng zawng ka remfel thlap thei veka,chhuatah ka Make-up vel ka bunchhuak a ,ka remfel a, ka thup sawp a,Kimtei erawh Tv a en thung,ka thlan a tla nasa tawhin ka thawmhnaw nise thlan rim a nam em em tawha,inbual ka chak tawh viau.
"Mate, ka chhuak lawk dawn ania" Room a rawn luh pahin Jordan-a'n a rawn ti a.
“Khawiah?”ka thil tih lai chawl chuang loin ka ti a.
“Hotelah pawimawh a awm thut anih hmel, ka rei lo ang..” a ti tha ve mai.
“I inbual hmasa dawn lo mi?” ka ti leh a, a buai ve viau tih ka hria, an thil ti vel kha Mark-a nen an pui a,an vir buai ve zak zak tho..
“Dawn e, eee, Thlalak kha chu naktukah kan ti ta mai,a pawi em?” a ti a, a T-shirt hak lai a phelh paha, Kimtei awm ve chuan kan boruak rit lutuk tur pawh a ti ziawm tih ka hai lo,Jordan-a lam ni lo in keimah zawk hi ka dik thei tlat lo, nileng deuthaw in ka rilruah Poppy thusawi kha a cham a, Jordan-a chhanna kha lo ngaithla law law zawk ila te ka ti leh hnuhnawh a, awmzia a awm tawh der si lo.
“Aih, pawi nang, in tih hun hun kha nimai tiraw...Kimte?” ka ti a, Kimtei ngawireng a Tv en chuan kan sawi pawh hre mumal lo hian a rawn ‘aw ‘ ve ngawt bawk.
“I la intifai hman lo ami?” min ti leh a, Kimtei awm lai anih vang a min duat ta riau chu ho ka ti ru viau.
“Aih, hman lo deuh, nakinah muangchangin ka intifai ang” tha tak chuan ka ti ve leh mai tho.
“I vannei em mai” Jordan-a chhuah veleh a ti hap a,thatchhe zetin bang nghengin ka thu sawp a, ka chau hluah hluah tawh,nileng a ka chetna aiin tun minute reilote a Jordan-a min rawn fawhna khan min ti chau zawk. Kimtei awm ve ngaipawimawh duh miah loin ka bekah a rawn fawpa, Kimtei hmel a maktihna lang kha ka hmuh hmaih hauh lo va, Jordana hi chuan a tum a thelh ve ngai lo anih hi ka ti ru vang vang.
“Engvang chuan maw ka vanneih a?” ka ti a. “Jordan-a i nei hi mawle aw, a duh zia che hi a en che hian ka lo hmu thei hial zel,bakah tu hmeichhia pawn ani hi kan nei duh vek ang chu” ati leh a,ka then sak mai,nia, a chhungril a ramsa kawlh awm hi an hmu lo anih chuan an duh ang chu, Hmeichhia zawng zawng tih erawh ka pawm zawng a ni lem lo..
“I uar mah mah,nangpawn Mark-a ai chuan i thlang dawn lo tawp ang” ka tih takah chuan a ang phiau a, a in control lehnghal thuai.
“Tu nge hrilh che?..oh..engmah chutiang a awm lo”ati leh hnuhnawh a.
“Pasal nei tawh ka nih hi, chutiang te em em chu ka man thiam ve alawm”nui chunga ka tih chuan a nui ve ta ngawt. Mahse, a hmel a thutak leh thuta,
“Chutiang engmah ala chiang lo ania aw.. Mahse,min duh ve dawn ngat se chuan in pa ka thlang fe maithei” fiamthu hian a ti a, a nui zui ar ar bawk, a bul a awm a hahdamthlak thin takzet.Sawmtei ka ngaihtuah a, Jordan-a thil ka hrilh theihnghilh tih ka hrechhuak zat bawk. Sawmtei pa khan an In a chawei turin min duh a, Jordan-a be tur khan ka ti a, mahse, an call tlang thei loh avangin hrilh mai turin min rawn ti a,tunah lah a kalchhuak leh daih tawh bawk si..
Hmanhmawh lo takin ka inbual a, Kimtei a inbual tawh thung, tuilum ah ka inchiah vang vang a, ka mut a chhuak viau. Zanin chu Jordan-a In-ah khan let tawh loh mai ka duh rum rum, ka chau a, hetah riah mai ka duh zawk, engpawh thleng dawn se thleng mai se pawi tihna ka nei tawh lo..ka inpeih hma chuan min khawih a tum lo tih a sawi lawka, a sawi ang ngeiin min khawih lo, zinga min fawhna kha Sex lam kaih hnawih ah ka chhiar dawn anih chuan kha zawng kha Pasal ka neih hnu a ka thil tawn a ni mai..
“I muhil ami?” Jordan-an a rawn ti a, “Aih, ka zo tep” ka ti let vat. Kimtei Roomah a awm lo a ni ngei ang.Jordan-a nu leh a Nau pawh kha a ti ti pui bawrh bawrh thei tlat a, atan chuan ka tel lo pawn a hrehawm dawn lo. kei aiin rualkawm a thiam zawk fe bawka, khawiahmah angaihtuahawm lo.
"Hmanhmawh suh,mahse, muhil lo la...”nui chung hian a rawn ti leh a, .min hmu thei lo tih hre reng chungin lei ka chhuah nghek tho...
Atthlak zetin thawmhnaw thlakna tur ka keng lut lo pek,a lo la let ka rinloh vang a ni pakhata, ka underwear takngial pawh ka keng lut lo,Roomah a awm tawh loh nan ka tawngtai lo chauh mai.
Room kawngkhar ka hawng a, vanneithlak lutukin tumah an awm lo hlauh, ka chhuak thuaia, Room kawngkhar ka va kalh nghal sawk sawk bawk, ka thawmhnaw hak tur khuma ka dahchhuahsa chu ka ha nghal a, thawmhnaw kher hi chu ka nei tam over lo nangin ka nei chhe hran lo, Grace-i te nufa khan an buaipui ber a ni bawk a, min leisak Mai bakah min pe nasa bawk,vawikhat a ha a, a duh leh lo thul,khangte kha ka min pe zel a, ka nei ve nual mai..
Chaw ei kham hnu lawkah Mark-a leh Kimtei an haw a, engmah tihfel angai lo bawk nen Roomah ka chho a, ka hnungah Jordan-an min zui bawk.
“Kan kal ve nghal dawn em?” ka ti a, zawi zetin Sofa ah ka thu thla hnak mai, ka chau hluah hluah.Ka bula a rawn thut chuan ka insangmar nghal vak maia. Tum reng vang pawh ni lo hian ka lo tang leh vak mai thin.
“Ka hre lo, i chauh hmel lutuk kha ka ngaihtuah che, i chawei kha i muthlu dawn maw ka ti a” a ti fan ruiha.
“Um, ka chau, diktak chuan heta riah mai ka duh...” ka ti leh niah niah,min rawn en reng tih ka hriaa, ka biang a sa hat hat thei.
“Chuti chu kan kal lo mai dawn mi?” a ti nghuta,rang angreng tak hian,“Ka hre chuang nang...” ka ti sap, ka rin loh deuh hian ka banah a rawn pawt a, ka ngheng phei deuh rawk..tal chhuah lehnghal ka tum chu min vuan bet a..
“Min rinchhan mai mai rawh, tumah an awm loh hi, i Pasal ka nia, ka bulah chuan i duh dan danin i awm thei..”zawi sup hian a ti a,keipawh ka tal buai peih ta lo..A sawi ang ngeiin ka Pasal ania lawm...
A darah ka lu ka nghat ta nge nge, ka kawngah a kuah thung.
“Kan kal lo tak tak mai dawn mi?” a ti leh a.
“Um..” ka ti ringawt, ka bula mu turin ka sawmna ah angai anih pawhin pawi ka ti zo tawh lo..
“Anih chuan Khumah mu la aw” ati leh a, a aw a min duatna ri lang tel chu ka hriat hmaih hauh lo bawk..
Ka tho a,Khum ka pan nghals, ka thawmhnaw pawh hlip lo in ka inthawlh ta kak.Puan sin tuma ka pawt chu amah zawkin min rawn sin tir a, khum bul a Switch awm chu a ban a, a Off then nghala, a awmdanah mut ve tumna a nei lo tih a chiang reng. A kalsawn tur chu a kutah ka man bet a,
“Khawiah nge i kal dawn?” zawi tein ka ti a.
“Thutthlengah ka riak mai ang,mahse, mut hma in Motor ah Charger ka theihnghilh a ka zuk la ang chu ka ti" khawng luh hian a ti a, kei angin a zam ve lem lo anih hmel..
“Mahse...”ka ti ban chat, sawi zawm mai ngam lo in ka ngawi leh rih a..min rawn en a.
“An hre lo ang, lungngai suh, tumah ka roomah an lo lut ngai lo,an lo lut dawn anih pawn kawngka an kik hmasa vek” pangngai tak hian a ti leh a...ka thu chhuak ta nge nge..
“Vawiin khan Poppy nen in awmlaiin Roomah ka lo chho a, Poppy khan min neih chhan a zawh che kha ka rawn hria,mahse, i chhanna ka hre lo thung...engpawhnise ka bulah riak rawh, min neih chhan lam ka care rih lo, Nupui tak tak nih ka duh” ka ti chhuak ta hlawl, ka zam em avangin ka hmai a sa hut hut a, Jordan-a hmelpa zet chu ka en lui rana, ka zam tih a hriat loh hram ka beisei takzet..
A thaw deuh huaia,
“Engvangin nge ka chhanna i ngaihthlak loh?” bung fe hian a ti hluk a, a hma lawka min duatna kha chu a thlawk bo leh tawh tih a chiang..
“Ih..diktak chuan ngaithla turin ka huai tawk lo anih ka ring..” ka ti leh tawpa, dawt sawi vak a tulna ka hre lo..
“Ngaithla la a chhan diktak i hre tur” ati leh nghut a, a kut ka vawnna dimtein min phelh sak a, a rawn thu thla a, ka biang tawn tawnah a rawn vuan a..
“I bulah ka mu anih chuan thli thleng tur i hria alawm, a harsa ka ti dawn lutuk, I inchhir leh ai chuan mut dun loh ka duh” a ti nghet churha, na tuar a ang phian bawk..
"Pawi ka ti lo...”ka ti sap.
“Ok,anih chuan ka riak ngei ang, ka nupui i nia lawm” ati sup a, ka mitah a rawn fawp a, ka khur ru dar dar mai..
A rawn let leh lai ka hre mumal tawh lo,min rawn kuah a, a taksa lawngin min rawn si a, a lum ham ham mai. A dar hlai hlap mai khamin ka mu a, ka thlamuang tih ka hria.
“Ka muhil dawn ania aw” ka ti sep. “Um, muhil la, mahse...nupui ka nei ve a, zan hnihnaah pawh tha takin ka nupui bulah ka mu tlawn vel mai maia...” a tih chuan ka nui ve hak.
Ka mutui lai ka harh zawk maia,min tiharh tu thawm lo chhuahna lam ka ngaithla a, ka bul mai atangin a ni tih ka hriat chuan ka thu chhuak nghal a, Light ka On nghal bawk. Jordan-a lam ka hawi chuan amah ngei hi min tiharhtu tih ka hre nghala, a tal vak vak maia, a harh bawk si lo, puan pawh a sin lo va, thlan in a bual nasa mai bawk. ..a lu a ka sawi pahin,
“Jordan...hey...harh teh” ka ti a, ka sawi nawk nawka, a rawn meng chu a meng a ruai mai..
“I tha em?” ka lo ti nghala.
‘Khawnge ka awm?” ti chungin min rawn en a..
“Kan Roomah, i tha em?” ka ti leh a, a maimitchhing a, “Min kuah thei angem?” zawi te hian a ti a,a awmdan ka hrethiam lo takzet nangin ka kuah ta tho, ka awmah a hmai a rawn phum a,a khur lehnghal a, mak ka ti ngang mai.
“Hetiang hian ka awm thin, mangchhia ania...min kalsan thei lo..”harsa tih hmel zet hian a ti chhuak hrawih mai..
“Aw le, hahdam rawh, i bulah ka awm ziah tawh dawn alawm” ka ti a,“Tak tak, i awm ang tiraw?” naupang ang mai hian a ti leh a,
“Aw, ka awm ang..” ka ti nghet charh.
“Zobiaka hnenah i kal lo ang tih min tiam rawh, min kalsan chuan ka that daih mai ang che” a tih leh chuan ka ip chawih maia, mahse amah a chiang lo ruai mai bawk si nen, mak han tih vel na hun pawh a ni lo.
“Ka kal lo ang" a sam a chulsak pahin ka ti a. Reife chu engmah sawi loin kan ngawi dun ta reng, a thawk danah a muhil ta anih hmel.
“Hey, tho tawh teh” tih pahin ka chalah a rawn fawp a, peih lo zet hian ka meng a, khua a lo eng tan tawh a..
“A la hma e...ngatinge?”ti chungin ka maimitchhing leh a, nizan thil thleng kha ka mumang a ni em tih ka ngaihtuah paha, ka mumang ni lo in atak ngei tih ka hria..mahse, tuna a hmel landan leh nizana a landan kha chu lei leh van ang maiin a danglam..
Ka nghawng a rawn fawp pahin ka kawr chhungah a rawn zen a, "I tho dawn em? " a ti zuia.
“Hey, a fair lo ania..” ka ti that mai..mahse, a kut la chhuak loin ka bra chhungah a rawn zen a.
“Jordan...” ka ti ro halh.
“Ok, ka tilui lo ang che...Tih palh” tih leh inlakhran tuma chet a rual nghala, mahse, tun hun hi ka paltlang hun a ni tih ka ngaihtuah a,pasal nei ka ni tawha, nupa nun hman hi nupa nihna kawnga thil pawimawh ber pakhat a ni bawka, ka duh loh tlat hian ka pasal tan a fair lo tih ka hre bawka. Chuvangin tunah hian ka paltlang angai. Tawng loin ka kuai kun a, ka fawp a, ka chetdanah ka duh dan ka hriattir a, ani pawhin a hai lo.
Kan thlan dun dap maia,a chungah ka bawk a,ka sam karah a kut zungtang a rawlh a.
“Enge i ngaihtuah?” min tih chuan a awmah min duatna a lang thei a. "Poppy..” tiin dik takin ka chhang a, ka tawng zawm leh tur ka hmuiah a rawn khwih a..
“Ka neih chhan min zawhna kha ka chhanna i hre duh em? “ a ti dam thlup.
“Aw..” ka ti sap. Min kuai daka,
“Ka duh em che vangin ka nei tih ka hrilh..nangpawh ka hrilh tawh che kha,ka duh mai che ni loin ka mamawh che a, ka bula awm reng turin ka duh che..” inringtawk tak hian a ti a.
Chapter – 19
Makti leh hlim bawk si hian ka en reng, a hmelpa takah chuan fiamthu leh thu ho mai mai sawi a ni lo tih alang a, ka insut ta hraih chu ka tum lawk pawh a ni chuang lo..
“A va mak !!” ka ti sep ringawt.Min lehthal a, min rawn bawh bet zui nghal zat bawk.
“Mak pawh ka ti lo, ka inhrechiang alawm..mahse, Nizan hmasa khan ka muhil miah lo..” tih pahin ka chalah a chalin a rawn nawr a...
“Ngatinge?” ka ti ha.
“Ka nupui neih zan ania, mahse, ka nupui nen Room hran kan nei a, khawih pawh ka khawih thei lo...hrehawm tih hian a sawifiah zo hleinem” ati ro hulh mai,nia, keipawh kha ka tap muhil anih kha..
“Keichu ka muhil a...mahse...” ka tih lai mekin,"i tap bawk a..”a lo tih chuan phawk deuh hra hian ka en a, a inbengkang a, a nui suk bawka.
“Zing a ka rawn kaihthawh che khan i mit bui lak kha ka hmuh hmaih hleinem,mahse, i duhthlanna a ni tlat a” ati leh a, ka duhthlanna anih ka hre hauh lo.
“Ka duhthlanna anih pawh ka va hre lo” angaihna hrelo zet hian ka ti halh a.
“Sawi tawh lo teh ang, tun atang hi chuan engtikah mah ka mu hrang tawh dawn lo ania,ka zin chhuak anih ngawt loh chuan” ati nghuta, rawn kun hniamin a hmui lum ham ham leh chhah tap in ka tawng tur chu a rawn khar leh nghal hmak bawk.....
Tunah chuan karkhat lai kan innei ve ta reng, Nupa in kan tihtur ni a ka lo rin lawk kha a takin a thleng dik vel vek, zantin mut hran lam kan sawi ngai tawh lo,mahse, a chang chuan a lo haw tlai thin a,In ah tihtur a awm si lo,ka khua a har thei viau mai,thil engmah tih ve ka tum pawn tih an phal hek lo,lang a kal Nu upa lam pakhat leh nula keimah aia naupang hret tur pakhat an awm a, awmchilh hnamdang pakhat an la nei tel cheu bawk.Hotel leh an Football Club te, Jordana construction mai bakah Dawr lian tak, Jordan-a Pu in Jordan-a pa a indanna an lo la nei tel cheu maia,nitin deuhthaw Jordan-a nu leh Pa an kal thin a, Zingah an kal tum a awm zauh zauh a, Estheri lah a awmna lam a pan leh tawh bawk si...tumah kawm tur an awm lo. Karkhat lai ka awm ve tawh chungin Jordan-a nu leh pa ka la ko ta lo,ka tum thin,mahse, ka ti hleithei lo achha chu a ni ber rih.
“Mut duh lutuk mai” tih pahin kut vawt thlar hian ka hmai a rawn si a, ka thu kang nghal awk bawk.Jordan-a te Meeting an nei a, ka nghahna lamah Tv en chungin ka lo muthlu chu niin.. Meeting naah chaw an ei nghala, keipawn ka ei tawh bawk. Kan khawsak dan phung in an loh em avangin ka buai ve viaua, mahse hmeichhia hi chu insiamrem thang tih takah ka insiamrem ve thei ta viau.
“I lo haw na a rei tawh em?” zi mar ar ar chungin ka ti a, Towel a veng a, kawr a ha lo, a inbual zo vek tawh tih alang renga, a sam a hnawng chap bawk..
“Rei vak nang, ka ti harh duh lo che nih kha”a thawmhnaw dahna lam a pan chungin a ti a, a pian nalh zet chu ka en a, a dar a hlai hlap a, a kawng a fek leh thung,a taksa a uluk em em a, a chang hi chuan ani pawh hian a pian hi a chhuang ve niin ka hre ru fo mai..
“min tih harh reng hi..” ka ti hlak.
“Nghal viau lo maiteh, i Phone kha a ri sek a, chuvang zawk ania ka tihharh che” a ti ve thunga, ka Phone ka ban a, diktak chuan ka la khawih thiam meuh lo, ka Phone kha a chhia a ti ve ngang a ni ang, kan inneih atanga ni thum lek a liam hnuah phone thar min rawn hawn a, ka duh aiin a changkanga, ka la khawih thiam chiah lo.
Ka en chuan ka College kalpui thin, Elty a lo ni a, kan inneih khan ka sawm ngei a, mahse, a dawr thar tur a buaipui na lamah a vawrtawp a thlen lai a ni a, a lo kal hman ta ngang lo tih min hrilh a, ka chhungkaw thar lamah ka rilru ka lo seng na deuh a, eng nge a dawr chungchang a hmasawnna a neih pawh zawh na chang ka lo hre leh tawh pek lo...ka call back a, a pick-up dawn lo emaw ka tih hnuah a pick-up leh lawia,hei hi chu a tihdan fo niin ,Phone hian a nun a tibuai lo leh lutuk a, a awmna apiangah a kalsan mai mai zel a,ka hau fo mai..
“Hey...biak i har lutuk..” Hello tih that pawh awm lo hian a rawn ti a., ka nui ringawt..
“Biak ka har loh hi..eng nge ni ta?” nui chungin ka ti a, ani hi chuan min hau hrep mah se ka haw ngai lem lo.
“Enteh, ka dawr hi karlehah kan hawng tawh dawn a, kan hawn hnuah nge i lo kal ang kan hawn hma hian i rawn en dawn?” arawn ti lawng lawng a,eng hun pawh nise ka kal peih vel vek, hawn hma pawn a pawi lo a, dawr theih annih hnuah pawh ka kal nawn leh dawn tho tih ka chiang.
“Tunlai chu Jordan-a a buai lutuk a, ka lo kal hun tur ka sawi thei lo,ka lo zawt phawt ang” ka ti a,Jordan-a rawn kal hnai chu ka en a, a ngaihna hre lo hmel zet hian a mitin min rawn zawt a, ka thle bak ringawt.
“Oooo, Pasal nei ho tak hi chu a,in ninawm” ati leh that a, a sawi ka rin dan chiah, mahse, ka rin aiin a au ring lo hret..
“Tak takin Naktukah lo kal ka lo tum ang aw,hun ka neih ka ring deuh” ka ti a, lawm tak hian a kuk raih a, kei mai mai a dawr en tur a min duh chu ka lawm ru angreng viau. College kan kal ho a, mahse, College kan chhuahsan hnuah Mumbai lamah a awmbo ta vang vang, a rawn let leh meuh chuan a ma pual liau liauin eizawnna tur a rawn hawng nghal rap mai, ka tluk lo em em rualin ka lawmpui bawka,a kal kawng nawm lem loh zia ka hriatpui ve tlat.
“Tu nge a?” ka bulah a rawn thut pahin Jordana'n a ti a.
“Elty...i hria em?” ka ti a, la hmu lo mah se ka sawi fo avangin a hre maithei..a ngawi deuh vung vung a,
“Hre maithei, ka la hmu lo em?” a ti liam maia, Remote a ban a.
“Aw. La hmu lo, englo ania, karthar hian a Dawrthar a hawng dawn a, a hawn hmain hmuhpui turin min sawm a” ka ti a, min rawn en a, ka mal chungah a kut a rawn daha,ka taksa a khawih hi ngaiah ka la nei thei lo..
“Chuan.. Engtin?” ati leh mai.
“Sawtah, Falkland ah ania,a nawm hmel tawp” ka ti leh hluai a
“Kal pawh i la kal si lo a, nawm hmel i tia maw?” nui chungin a ti a...a sawi dik chiah, ka lo uar hret anih hmel..
“Um, la kal chuang lo, mahse, a nuam dawn tih ka chiang alawm, naktukah hun i neih chuan min kalpui la” ka ti a, a ngawi deuh vung vung a,tunlai a buai zual lai anih avangin a kal hman ka beisei chiah lo.
“Naktukah kan sawi tha leh mai dawn mi?, naktuk hi tihtur duanlawk ka nei nual a...” pawi tih hmel deuh hian a ti a,
“Aih, a pawi lo, keimah in ka kal thei tho a, mahse, ka nu te ka hrilh angai ang” ka ti a, a vawikhatnan “ka nu” ka ti ta tlat, phawk deuh hian min rawn en a. Keipawn mak ka inti ve tho.
“Sawi leh teh’ a tih chuan,
“Eng maw?” tiin ka hre lo der a, ka sawi leh hreh lutuk tawh, inringlawk lo khan ka sawi awlsam zawk."I hria" a ti ringawt.
“Ka...ka nu ka tih kha maw?” ban chat hian ka ti a.
“Um,ni chiang e, i ko thei tawh ngei ngei ang” a tih paha a hmel a phur na lo lang chu ka en renga, Mipa naupang ang chiah..
“Ka hre lo le,ka tum nasa thin alawm, mahse,ka nu ka hriat mumal hman loh vang leh ka koh hman loh tlat avangin ka tan chuan a harsa em a ni” ka ti ta thlawt,ka khabeah a rawn dawm a, a hmel chang zet thin kha a dam thluam bawk...
“Ka nawrlui miah lo che ania,i tan a harsat tur zia anni pawn an hria asin”a ti a, duatna mitmeng chu ka en ran mai..min duh tih ka hria, min Hmangaih lo tih pawh ka hria, engpawh nise a chang hi chuan Mipa zawng zawng a tha ber emaw ka ti fo thin.
Zinga ka harh chuan Jordan-a a lo awm tawh lo va,a lukham khuar dak mai chu ka khawih dan dan a,zingah hma takah a tho a, Gym a kal thin a, a chang chuan a lo haw hian min kaitho chauh thin, kei pawh hi a hma chuan zingah ka tlan fo thin a, ka thau vang lam ai chuan ka hriselna vang zawkin ka tlan thin a, Pasal ka neih hma, ka awmhran hnu kha chuan ka ti ta ngai lo.
Ka rilru ka kawm a, ka beisei ang aiin kan inneihna hi a kal tluang ta tlat tiin ka ngaihtuaha, Jordan- lah sawiselna tur eih a awm lo,a chhungte lakah pawh vuina tur ka la nei chuang lo,a la rei loh vang mai a min be tha anni lo tih lah ka chiang, an fanu angah min pawm thlap zawk. A chang chuan chhungte neih ve ka la chak tho, tu emaw tal ka chhungte min rawn tlawh tur awm se ka ti fo bawk. Ka nu chhungte lah chuan Pitei vangin min hmu dik lo laklawha, kan inkar a tha sir lo, ,ka pa chhungte lah kar a hla em em bawk si Grace-i te nufa kha kan inneihni khan ka hmu ngei a, mahse, Biakna hun pawh a awm lo va, ka be chak hek lo. Sawmtei nu leh pa an fel a, a khat tawkin min rawn be leh zauh thin a, anni hi ka chhungte neihchhun chu anni ta mai.
Jordan-a lo let hmain ka tho a, a lo let chuan chokaah Pi Hmuni eisiamna bulah ka lo awm a, ka awm a ring lo a ni ngei ang, Roomah a chho tlang a, mahse, a rawn chhuk thla leh nghal.
“Nu, khawnge Abby?”tia ka nu Dawr kal tur a zawt thawm ka hria, Pi hmuni a nui kar kar mai.
Chokaah a rawn dak a, a T-shirt hak a taksaah a bet thlar mai, Octorber thla a ni tawh a, a vawt lo a, a nuam tawk viau,mahse, an Compound chhung hi thing a awm nual a, a dai raih a, a lum hran lo..
“Khatah khan eng nge i tih a?” rawn kal hnaih pahin a rawn ti a.
“Eisiam ka lo zir a” ka tih chuan a nuia.
“Pi Hmun, siam tir miah suh, a thiam lo nasa ania’ a tih chuan rum deuh hian ka melh a, a dar a ti chhing uk duh chauh.
“Ka la siamtir maithei,a zir nasa tawh alawm” nui chung hian Pi hmuni’n a lo ti ve a.
“Ka awih chiah lo mange, eee, lo kal lawk teh, thil entir tur che ka nei” ati a, a inher a, a chhuak zuia.
“Midang awm laia i thiltih sawisel ka duh lo,eisiam emaw thildang tih ve hi tum tawh lo teh” ti chungin a kawr a hlip a, a bulah ka ding a, a kawr dahthlak tur chu ka laksak a.
“Engmah tihtur a awm si lo, nileng a engmah tih loh hi ka tan chuan a hrehawm hlauh hluah” uar takin ka ti ve thung.
“Eng nge i tih duh?” ati hmuk a.
“Ka hre mai nang, anih leh ka duh duh ka ti thei tihna a ni em?” phur fe hian ka ti a.
“Ka lo ngaihtuah ang,vawiin chu ka kalpui hman dawn lo che a, mahse, Tluanga nen kal ula, ka nu ka hrilh tawh kha” ati leh a,a thusawi in persan thei lutuk hi aawwww..mahse, ka lawm tawk tho mai.
“Aaa, hruai ka ngai lo, keimah in ka kal mai ang” ka tih chuan a rawn hawi let a..
‘Min hnial thin lo teh” ati nghut ringawt, a Mood lah hi a danglam thut zel.
“Eng nge min entir tur chu?” ka ti a, min chhang lo in Khum a kawk ringawt,ka en vat a, Box pakhat hi a lo awm a, a hma khan ka hmu miah lo.
“Engthil nge?” mak ti deuh hian ka ti a, a kawr ka ken lai chu Balbawmah ka dah a.
“Hawng la..” ati ringawt,ka pan hnai a, ka la kan chuan pan thler maia,eng nge anih ang ka hrethiam lo, a tuamna ka phelh a, eng nge anih ka hmuh rualin ka thaw nghal hawk mai.
“Hei hi engtin nge i neih theih a?” mak tihna leh lawmna inpawlh hian ka ti a, a then suk a.
“Ka nei ve tawp, lawmthusawina lam ka hre dawn em?” a tih zui chuan min chhaih tih ka hria, putea nen kan lak dun, a bo ta emaw ka tih kha a lo ni a, ka naupanlai thlalak zinga ka ngaih hlut ber a ni bawk.
“Ka lawm e aw,ka ti bo emaw ka ti asin” ka ti sapa,Putea hmai zawn chu ka chul a, min lo thlir ve reng ngei ang, ka nun awmdan hi a lungawi angem ka ti fo thin a, tha thei ang ber khan min enkawl a,mahse, atan engmah ka tihsak ve hmain a kal ta mai si,ka inrin hmain ka mittui a rawn tla a, rang zet hian ka hru vat bawk..Jordan-an min rawn kuah a, a taksa thlan hnawng chap si chetin min kuah bet a,ka samah a rawn fawp a,mahse, engmah a sawi lo.Ni e, engmah sawi angai lo, min hnem nan chuan tuna a awmdan hi a tawk reng.
Jordan-a chhuah hnu feah Elty dawrlam panin ka chhuak ve a, ka chhuak khat deuh bawk nen tih kawi tur ka nei nual mai,kan inhmu chu kan ri chel chul maia,a dawr lah duhthusam a ni ringawt, ka kal fo dawn tih ka chiang nghal vek,a hming lah chuan min hip nghal zar bawk.
Tluanga MC ah ka indah tir a, min nghak lo a min hawsan mai turin ka ti bawk.Kimtei te dawr lam ka pan a, Kimtei tak pawh a buai ve bawk nen Phone a kan inbia anih loh chuan tunhnaiah kan in hmu ngai meuh lo.
“Abby...” Mipa aw hian a rawn ti chuan ka hawilet vat a, mahse, min ko tu ka hmuh rualin ka hawilet lehnghal hmak thung.
“Min lo nghak teh” atih leh phei chuan ka kal chak sauh thung, hmuh na chhan tur ka nei miah lova, a hma khan thil tamtak min tihsak a, khang te kha hriatreng ka duh zawk, tun hnaia ka chunga a thil tih te hi chu ka tan lawmna tur engmah a awm hlawl lo.
“I va kal chak ve” a rawn ti a, chak taka kal bak chu mi an awm teuh a, tlan em a rem si lo.
“Eng nge i duh a?” ti chungin ka kal dan ngai rengin ka kal tho.
“Enteh, thil thleng vang khan i lawm lo tih ka hria, ka tum reng vang pawh a ni lo” a tih chuan ka luak a ti chhuak zawk, a tum reng vang a thleng a ni chiang si.
“Anih tak chu, engpawh nise tunah chuan ka be duh lo che” ka ti leh hmak a, mahse, angaipawimawh duh miah lo,Kimtei te dawr lah a la hla deuh si,Jordan-a a awm hnai lo tih ka hriaa..,mahse, tueawm talin min lo hmu palh anih chuan a hre leh ngei anga, a duh duh in ngaihdan a siam leh mai dawn si...
“Khawngaihin ding teh” tih pahin ka banah a rawn vuan a, rang mangkhengin ka thingthla vat thung. Chiang kek kawk hian a mitah ka en a,a hmel a la tha reng, mahse, a hma a ka lo hmuh hmaih thin ,a mize chhungril tenawm lutuk hian a hmel landan pawh min hmuh danglam tir zo vek tawh.
“Khawngaihin mualpho i duh loh chuan min si tawh suh” zawi fiah zet hian ka ti hmak a, a hmel a nui hmel lang chu ben sawk ka chak kher bawk.
“Sorry, ka khawih tawh lo ang che, mahse, enteh, thian kan nih kha..englo ania, kan inneih ni kha in lo kal lo ang tih ka hlau a” ati leh a,an inneih ni tur pawh ka hre lo, an chanchin kan sawi ngai lo hrim hrim zawk.
“Jordan-an kal a duh chuan ka lo kal ang, a thu thu” ka ti leh nghat a, ka inher a, chak zetin ka kalsan leh nghal a, vanneihthlak takin min rawn zui ta lo hlauh.
Kimtei te dawr ka thlen veleh thutna awlah ka thu nghal hnawk mai,mak tih hmel deuh hian min en ha maia
“I va han hah hmel, eng nge a?” ati nghala.
“Um,hah lutuk” ka ti tawi tak ringawt,a rawn kun hnai a..
“A zei viau awm sia, i inkhung char char bawk si, i chau hma anih kha..” ati sawr sawra, tawlh hla lehnghal a, a nui zui ar ar bawk,ka va han ngei tak. Tur deuh a nuihza insum hmel chu ka en reng a, a tawpah chuan ka nui leh ta nge nge,a bulah hi chuan ka thinrim rei tak tak ngai lo.
In ka thlen chuan a tlai lam tawha, ka inbual a, Room ka lut chiah tihin ka Phone ri a tawp ve chiah bawk. Min rawn call tu ka en nghal a, Jordan-a a lo ni a, nidangah pawh min rawn be fo thina, mahse, vawiin chu an buai zual aniang, hna kal tura a chhuah hnuah min la rawn be miah lo,ka call back nghal a, a hmet busy ta daiha, ka ti nawn ta lo..Rei vak loah Msg a rawn thawna,ka chhiar nghal thuai a,
“Buaina kan nei lawka, zanin chu ka lo haw lo maithei” tih te hi a lo ni a, ka call dawn thut thut a,,ka thulh leh ta zawk, a buai laia biak a duh lo tih ka hre ve kar si.
A lo haw lo ta tak tak, kan inneih zan bak kha kan la muhrang leh ta lo, ka muhil thei lo ka let tawn sek ringawt,min rawn be leh ta miah lo va,eng ngemaw dik lo awm tlat a hriatna ka nei zui bawk nen,ka awm a nuam lo teuh maia. Khawvar dawn lamah ka lo muhil sek a ni ang Kawngkhar inkhar thawmah ka harh a.
“Good morning” Jordan-an a tih ri ka hriat rualin ka thu chhuak vat a.Room kawngkhar inkhar thawm ka hriat kha amah a ni ngei ang, nimina a thawmhnaw hak ngai kha a la ha a, a chauh hmel hle bawk.
“I lo haw chiah mi? ” ka ti a, a kamiz a phelh a, a awmna ah a kalsan tawpa, a kekawr a phelh leh a, chu pawh a kalsan leh tawp.
“Um, ka intleuh zuai anga, ka rawn mu ang” a ti sup a, Bath room a pan nghal a, a hmelah khan dik lo awm ka hmu lo,mahse, mak takin ka thawveng chuang miah lo.
Ka tho a, a thawmhnaw kalsan ho balbawmah dah luh tumin a Ipte ka check a, a kekawr ipte ah eng nge maw ah a neia, ka la chhuak a, makti lutuk hian ka en reng ringawt. Chhia a awm emawni tiin ka en kuala, engmah a chhe si lo. Motor accident vel an buaipui chiam anga, a chhiat hlauin a phelh ti dawn ila a thawmhnaw a bal miah si lo. Engvanga bun lo nge maw anih ni?
Nupa dang tana serious hi kan nupa tan thil ho tak a ni theia, chutiang bawk chuan kei hian inneih zungbun, mipa nih vanga bun loh mai mai hi ka ngaithiam miah lo va, Jordana hnenah pawh ka sawi fo. Nupa thenkhat chuan ho an ti hle mai thei. Kei erawh chuan ka ngaithiam lo…
Chapter-20
A inbual zawh chuan Khum mawng a thutna awmah ngil at in ka lo la thu a, tlem chuan a hmel hmuh a hahdam ta deuh.
Chawei a duh leh duh loh tha taka ka zawh chuan “Aih, duh lo mai, mut ka mamawh rih ber” ti chungin min en lo in khum a a thawmhnaw hak tur ka dah chhuah chu a la a, a ha nghal mawlh mawlh, a hmelah dik lo awm hmuh tumin en ngar ngar mah ila ngaihbel tur eih pawh ka hmu lo.
“I chauh hmel khawp mai,eee, kha ta kha Zungbun ka dah ania” ka ti a, ka kawhna lam enin a bu nghut ringawt, engmah sawi tawh lo in Khumah a lawn a,bawkkhupin a maimitchhing zui nghal daih.
Beidawng thinrim ru teuh hian ka en a, eng nge sawifiah tur a ka phut ber ka hre lo, mahse, engvanga phelh nge anih tal hriat ka duh a,Direct a zawh pawp aiah tiin ka dahna ka hrilh a,a phelh chhan sawi chu khawilamah, a en a, a duhtawk der, bun nghal pawh a tum chuang lo..
Tukverh lian leh sang tha tak chu nawr hawngin Parda ka zar thung,Puan ka va sin thattir chuan a mutna la rei loh nen a lo muhil fel der tawh,engthil tak chu ti ang maw?, hetiang em em a chau tur chuan zankhua in hna a thawk a ni hial ang.
Inhnuai ka thlen thlak chuan ka nu leh Ka pa an lo kal chhuak hman tawha, Pi Hmuni a lo thleng tawh bawk. Sanu-in pangpar tui a lo pe mek a,tihtur dang hre lo ta chu Pi hmuni bulah bawk ka tawlh leh ta nge nge.Stool sang zetah thuin ka khup ka tawm a, ka khupa ka khabe ka nghat chungin Pi hmuni che vel ka thlir dauh dauh mai.
“Bawihi,vawiin tih tur i nei em?” min ti a,ka mo tirh atang khan ka hmingin min la ko miah lo, a fa rual zet ka ni bawk nen pawi ka ti lo.
“Neih pawh ka hre mai lo,ngatinge?” ka ti vat Carrot thian mawlh mawlh chung hian,
“Ka tunu Damdawi tur thawn a ngai a’ atih chuan
“Khawiah nge thawn tur?”ka ti leh thuai.
“Saitualah, ka fa te dang han tirh mai tur an awm si lo a” ati zuia, an Fapa naupang ber leh an fapa neih chhun nibawk hi Jordan-a chawmin Delhi ah a zirlai a zawm a. . Hmeichhe pakhat, duh hun hun a fawr bo chi a awm bawkin tirh kual atan pawh a hmantlak meuh loh anih hmel.
“Anih chu,Tluanga kan be dawn mi?” ka ti a, Tluanga hi tuktin ka nu te thlah turin a kal thin a, abakah chuan nilengin kan mamawh hun huna koh mai turin inah a awm reng thin, tlai dar 5 velah a haw tlangpuia,riah chang a nei zauh zauh bawk.
“A lo let leh hunah i kal tir theih chuan ka lawm ngawt ang,hmanhmawhthlak lutuk phei chu a ni lo a” lawm taka tiin an sumo counter leh an chhuah hun a sawi a, a fa te chanchin a sawi zui duah.
“Pi, engtik atangin nge hetah i thawh tawh?” ka ti hlawl, a inngaihtuah deuh vang vang hnuaha, “A kum tak ka sawi thei ta mai lo. Estheri sen deuh lai hian ania, kan pa hi a damlai chuan hetah hian Driverin a awm thin alawm” ati a,Jordan-a te tan chuan chhungkaw zing a mi nen danglamna a awm ka ring tawh lo, an cheng ho chiah lo nangin nitin hetah a kal anih chuan an inhmu nitin a,Estheri sen lai a lut anih chuan tunah Estheri a nula tawha, a fapa an chawmsak pawh thilmak ah ka ngai ta lem lo.
“A va rei tawh ve aw” zuai deuh tak hian ka ti halh.
“Nia, rei ve thawkhat tawh,an fel bawk nuam ka ti teh ania, engkim hi ka ta ang maiin ka ngaithei tlat te hi an fel zia tilang Tu anih hi” ati leh mawlh mawlh,an veng kan veng bul chiah ni a, Jordan-a pa hian In a lo sak sak vek lehzel maia,an ngainat zawng leh duhsak zawng, an mirin tawh-ah chuan engmah ui an nei lo anih hmel.
“Jordan-a i rawn nei hi ka lo lawm ve tawp a" ati leh chuan mak ti deuh mai hian ka en a.
“Engati maw?”ka ti thuai.
“Kha hmeichhia Poppy kha nei se chuan ka awm ka ring tawh lo” a ti bul hmak, a sawi zawng ringawt pawn a ei lo tih a lang theia,engvanga haw em em nge annih hi ka hrethiam lo,Sawmtei'n a haw em em a, Estheri pawn a ngaithei bau lo.Ka lo ngaihtuah dan chuan Jordan-a aia duh zawk neiin a kalsan a ni ve mai a, inngaihzawn naah chuan thil thleng ngai lo pawh a ni lo va, chutia han huat rawn em em na tur awmin ka hre lo. A Pasal nen an inthen hnuah Jordan-a hnenah bawk letleh pawh nise huat tur awmin ka la hre lo zel, Jordan-a berin a pawm theih chuan Poppy dik loh a ni lo.
“A chhe lo ka ti, a smart bawk si" fimkhur deuh hian ka ti ringawt.
“Nia, a nalh a, a fing bawka,mahse, Jordan-a hian a chhiatpui nasa em mai,Jordan-a nen an inkawp reng laiin Pasal a nei daih ringawta, a tuar nat em em laiin a lu vangin a mit del mai theiin a awm leh a, thihna kotlanga a din lai meuh pawhin vawikhat pawh a lo kal lo thei ania, a mizia hi mak tak a ni" ati leh hlak hlak a, hemi chungchang hi chu kim vak loin Sawmtei ka atangin Ka hre tawha, mahse, Sawmtei kha chuan a damlohna vang a kalsan angin a sawi ve thung.Engpawhchunise Poppy dik lohna ka la hmu chuang lo.
“An pahnih inkar a fuh lo viau pawh a ni maithei a" ka ti leh ringawt.
“Maithei,Jordan-a hi chu a naupanlai atangin a hrisel lo a, a cher ria thal zel,Damdawiin tha an sawi hi chu an kalpui kim vekin ka ring hial,Estheri nen hian an chhang pawh a khat em hi, a natna ber hre si lo in a thanglian zel a, dimdawi angaih em avang hian an duat hlum lo chauh animai. Kum 10 a pelh hnuah a thin tha lo an hre chhuaka, enkawlna a dawng fuh bawk a ni ang tun thlengin a insawisel tawh lo. Chutah,hmeichhe tha tak a la tawng zui bawk che a” a ti leh duaha, a hnute hnuaia ser kha a thin tha lo an enkawlna lama a neih a ni ngei ang.
“Chutiang a lo ni maw? Ka lo hre miah lo a”ka tih chuan a hmel a inthiamlohna lo lang chu ka en a, ka hre sa emaw tiin Jordan-a natna chungchang a sawi chhuak anih hmela, a beisei loh tawpin engmah keiin ka lo hre der si lo.
“I hria emaw ka ti asin” nuam ti lo hmel em em hian a ti niah niah, a rilru a nawm loh lutuk hlauin ka nui lui a.
“Pawi ti suh, min hrilh a ka lawm zawk, Jordan-a te ang mipa hi chu mahni chanchin sawi chi a ni lo a, sawi lo la chuan engtikah mah ka hriat pawh ka ring lo “ ka ti a, min hrilh ka ring lo tak tak.
Pawn a ka chhuah chuan Sanu-in Pangpar ho a lo ti fai mek a, a then cut-in lei a dahbelh bawk.Pangpar thenkhat an par vul chuk a, a then erawh par lo in an hring duah tha viau thung.Thir a thutna inthen thei an siamah chuan ka thu a, thenawm hnai an nei lo bawka an thenawm hnai ber pawh ka hmu phak lo.In leng kan nei zen zen bawk si lo nen a reh raih zela, an awmna hmun hi mimal ram ani tih a hriat hliah hliah,kei chuan he hmun hi ka hmuh ve tawhah nuam ka la ti ber maithei,hetiang hmun reh raih, thing leh Pangpar in a hual vel na hmun hi ka lo suangtuah thin ang chiah ni lo mah se a in ang thuak ang.Duhthusam chu ka ti lo, mahse,hei aia hmun nuam hi chu Mizoramah hian a tam ka ring bik lo.
Ni a rawn sat tak viau hnuah Inchhung ka lut leha, nidang ang lo takin Tluanga a lo la let lo cheu. Pi Hmuni hnenah khan thil thawn tur ka biaksak ang kha ka ti si, a awmdan tur zawh chiah ka ngai.Ka Phone ka ak emaw ka tih laiin ka lo ka ak der lo. Kan room kawngkhar Jordan-a tih harh hlau in dimtein ka hawng a, mahse, a lo mu tawh lo.Bath Roomah thawm a awm avangin a inphihfai anih ka ringa,ka Phone ka zawng nghal vat, Lukham bulah ka hmuh veleh ka la a, ,miss call a lo awm nual, ka en thuak thuak chuan pawimawh engmah a awm hran lo. Zobiaka msg lo awm ka en a.
“Nimin a ka thilsawi kha aw” tih ringawt a lo ni. Jordan-an a hmuh loh hram ka beisei takzet,rang takin ka delete nghal thuai a,a number hi Block mai angaiin ka hria.
“I Phone kha a ri ngun khawp mai” ka bul mai atangin Jordan-an a rawn ti thut a, a lo chhuah lai ka hre si lo, ka phu nasa kher bawk.
“a ti harh che mi?” nuam ti vak lo hian ka ti a.
“Aw, mahse, a pawi lo,kal na tur ka nei a, thawh ka ngai tho’ bung angreng tak hian a ti hluk a, biak zui a huphurhawm takzet.Mahse,
“Eitur ka lo zuk dahchhuah tir dawn em?” ka ti leh ta tho.
“Ngai lo, ka ei peih lo” a tih chuan ka biakna chiah bak engmah sawi belh tumna a nei lo anih hmel,thil hriatchhuah ka neih rualin a zungbun ka dahna ka en nghala,a lo awm tawh lo.
“Pi Hmuni thil thawn tur hi Tluanga ka thawn tir mai dawn mawni ka tia, Pi hmuni tan thil thawn tura chhuah a buaithlak sia “ka tih leh chuan ka rin ang ngeiin min chhang lo.
“Vawiin i buai leh dawn em?” ka ti lehzel. “Ka tawng peih lo ania” tih pahin na zet hian a thawmhnaw dahna a khar thuai bawk.Engtin nge khatiang khan min vin vak theih ka hre lo, eng nge tih dik loh ka neih ka hre hek lo,ka tawt up up a, tul lo zet hian ka mittui lah a rawn hnai ve hman ziah lehnghal, thinrim takin ka hru tawk a, inhnuaiah ka chhuk a, ,pawnah ka chhuak tlang nghal daih. Tluanga ka call a, rang zet hian min rawn chhanga, a lo haw dawn leh dawn loh ka zawh chuan tihtur ka pa nen an lo nei a, a lo haw dawn lo tih min rawn hrilh chuan Pi Hmuni hnenah khan ka lo sawi lawk tawh si vangin keimah ka kal mai angai.
Jordan-a chhuak tur nen Room kawngka bulah kan intawk a, min melh lo in min kalpel a, ka ding dat,hnaah a buai viau anih pawhin ngatinge ka chungah a thinrim tel kher ka hrethiam thei lo,kan inneih hma reilote Hotelah ka thawh ve hman vang khan Jordan-a mizia ka hre nelnual tawha, engpawh buaina nei se a chinfel hma chu a chawl ngai lo, chumai bakah a duh tawhna lamah chuan a kawng daltu tumah a dim ngai lo va, mi sawina mai mai a care lo tih te pawh ka hria. Kan inneih dawn tak thut avang khan Hotelah pawh ka kal ngai ta lo a, banna mumal pawh awm lo in ka bang zui chu a ni leh mai. Sawmtei biak ka ngai in ka hriaa,buaina lian tham deuh an lo nei anih chuan min hrilh hreh hauh lo ang.
“Yes, Pi Abby...” nui ar ar hian a rawn ti a, nidang ang chu nise ka nui ve ngei ang,mahse, vawiin chu ka nuih a za miah lo.
“Ngeiawm viau lo teh,tunlai inbuai em?” ka ti nghat.
“Kan buai leh buai loh i en duh chuan lo kal mai la..a tha em?” ati leh awt awt, a va han chimawm tak..
“Ka hman lo alawm, mahse vawiin chu ka chhuak dawna, ka lo kal maithei bawk” ka ti leh hnuhnawh..
Engmah ei lo in ka chhuak a,vanneihthlak deuhin kan in peng ka thlen thlak veleh Taxi ka hmu nghal hlauh bawk.Jordan-a awmdan engkim mai khan ka awm a ti nuam lo a, Hotel a va kal ngawt pawh thil tha ani em tih ka ngaihtuah leh neuh neuha, ka rilru a insual leh rih viau...min hmu se a thinrim viau angem ka ti thul, aaaa, engpawh nise ka kal a tha,tunah chuan a nupui ka ni tawh a, ka pasal ta anih chuan ka ta ani ve tho a,nitin In ah engmah tihtur nei lo in ka awm a, ka hne ve tawha, ka chhuah pahin ka tlawh kawi ve tih na animai.
Pi Hmuni thil thawn tur ka thawnsak hnuah ka Taxi hman ngai bawk hmangin Hotel ka pan a, eng nge ka tih dawn min lo zawt anih leh Sawmtei hmu tur a kal ka nih thu ka sawi mai ang.
Gate a tlan lut lo in pawnah ka chhuk a.Duty in min lo hmuh veleh a lo nui var var mai,a hma kha chuan ka hna kal pawh min melh liam mai mai zel kha ania, tunah chuan nui chunga welcome ka ngai ve ta tlat,mihring hi kan insiamrem nasa thei mang tak e..
Motor dahna lam ka en chuan Jordan-a car ka hmu lo,hnunglamah a dah pawh animaitheia, a chhuak zawk pawh a ni thei tho bawk. Sawmtei awmna lam ka pan ding nghal nalh, Hotel chhungah chuan thil danglam thleng awm pawhin a awm lo,an vaiin nidang ang bawkin an tihtur theuh an ti veka, Jordan-a te buaina lam chu an hriatpui phak lo tawp tih ka hria.
“Hey....i va lang tha ve” min lo ti nghal chula, nidang ang bawkin a thar sar a, a hmel a hlim in hmuh a nuam takzet.
“Min fakna ah ka ngai ania,in buai nge buai lo?” tih pahin nidang a ka thutna thin ah ka thu a.
“Fakna pawh a ni lo, ka ti tak tak.i lang tha.” uar tak hian a ti leh a, a landanah chuan hnaah buaina nei hmel an pu eih lo.
“Um, a lawmawm ka ti mai ang,inbuai vak lo nge inbuai? " Thutak zawkin ka ti a.
“Buai han ti ila buaina chhete chu awm ve e, mahse, nizan khan an chingfel in ka hria” ati awlsam mai.
“Aniih chu..” ka ti ringawt,ngatinge Jordan-a kha zankhuaa a buai bik kher le?
“Abby, eng nge i buaina?,i awmdanah hian diklo a awm tih ka hria ania” min en ran chungin a ti ta chat, kan nupa kar thilthleng kha ka sawi ang nge sawi lo ang tih ka ngaihtuah a...buaina liantham pawh a ni lo va, sawi loh mai ka duh.
“Aih, engmah buaina ka nei lo, ka zawt satliah mai mai che” ka ti ta zawk,kan nupa inkar midang hnena sawi hian ka buaina a reh dawn lo va, min pui thei dawn hek lo,thil dik lo a awm anih chuan keimah ka zawn mai angai.
"Thil ei dun ang,i lo kal khat si” atih leh chuan ka hnial lem lo, ka ei chak hran lo nangin tukthuan ka ei tawh lo bawk nen pawi ka ti lem lo.
Kan inzui thla a, khawiah nge Jordan-a a awm ka zawt lo, ani bula han zawh hi mualphothlak ka ti deuh tlat,eng nge a tihtur pawh hre lo a awm hi thil zahthlakah ka ngai a ni ber.,eitur a chah a, nidang ang lo takin Staff ho in min zah ta riau chu ka nuih a za deuh tlat bawk.
“Tunah chuan Boss nupui i ni ta bawk a, an phe dawr dawr hlawm mai”tiin ani pawh a nui kar kara, a thil sawi hre phak an awm hlauin ka hawikual vat thung.
“Eee, Jordan-a te pawh an lo let chiah alawm” ati leh nghal hluaia, Kawngkharpui hnungchhawn zawnga thu ka ni a, a lo let tih ka hriatna chuan ka hnung a ti za ar ar mai,khawi atangin nge a lo let tih lah ka hre der si lo..
“Um, lo let rawh se, keini chuan kan ei tur tui ti takin ei ang” ngaipawimawh lo niawm tak hian ka ti a, kan thutna lam a rawn hawi anih loh chuan min hmu kher lo ang,a Office pan turin kan thutna lam hi rawn kal kher angai lo tlat.
“Nia, a hmu lo che anih ka ring, a office lam a pan nghal” rawn kun hniam pahin a ti sa sa a, a awmdan hi ka nuih a ti za thin..
Eitur lo thlen veleh kan ei dun nghal mawlh mawlh mai, ka ei chak loh ang aiin ka ei tha ta phian,ka Plate ka nawrsawn paja ka hawikual vel chuan ka tum loh deuhin Poppy leh Jordan-a rawn inzui thla ka va hmu peka, ,rang takin ka hawi let leh nghal a, ka kun hniam nghal vat bawk.In a a hmel rum ul kha hmuh tur a awm lo, mahse,nelawm tak in a nui tihna pawg a ni chuang lo. ka bulah a buai thu sawiin min vin hrela, Poppy bulah chuan a mood a fuh viau niawm tak a ni.
“Ka kal tawh mai dawn mawni?” Sawmtei hnenah ka tih chuan a hmui hru fai mawlh mawlh chungin min rawn en a,
“Engin nge i lo kal?,Driver i lo hruai nge Taxi?” ati ve vat.
“Taxi...Gate pawnah sawn hman mai theih an awm turah ka ngai a” ka ti nghal thuai.
“Mahse, Abby, Jordan-a ...” a ti uk a, a sAwi zawi hmain,
“Hey..Abby...i dam em?”Poppy aw hian a rawn ti zui ve nghal a,ka ip deuh chawih nangin nui sang hian ka hawi let a,Jordan-a ka melh zawk hnuah Poppy lam ka ensan leh nghal mai.
“Ka tha e,nang zawk?” dam thlap hian ka ti a. "ka tha,eng nge i rawn tih dawn?” min tih takah chuan ka sa zak mai,ka duh duh ka ti ang chu, ka Pasal Hotel anih hi tiin ka inseh ruha, , mahse, ka thinrimna tihlan hun anilo tih ka hria. “Ka lo kal zuai anih hi,hei, Sawmtei nen hian thil tih lawk tur ka nei a” ka ti a, Jordan-a hmelah chuan ka kal hi a lawm miah lo tih ka hai lo, mahse, ka haider lui ve tlat thung, duh leh In ah min hau rawhse, helai hmunah hian atthlak takin min hau dawn miah lo tih ka hre ve kar. Chutihrualin ka na a...ka tlawm bawk, a nupui bula ding lo in a bialnu hlui, mi zawng zawngin nunhlui a neihpui tih an hriat vek bulah a ding a,mikhual zawk ang hrimin ka tihtur min la zawt zui bawka, ka pasal ve lah chuan min biak tumna nei hmel a pu si lo.
“Jordan,haw ka lo tum chiah a, i haw ve hman dawn tawh em?” zangkhai vah hian ka ti lui saka.
“Poppy nen hian kalna tur kan la nei a, Driver a awm tho a,a lo zuk dah mai ang che” tha tak hian a ti ve mai bawk. Mahse,
“Angai lo, Taxi a tam alawm, in buai bawk si,ka kalsan ang che u, lo haw hma tum la” ka ti lui leh zel, mi dang awm lo se chuan min thing nasa hle mai thei.
Taxi awmna thleng Sawmtei’n min thlah a, Jordan-a erawh chuan "anih aw" Tha taka a tib bak min thlah tumna nei hmel a pu lo,hawilet miah lo in ka kal a,kan tlanchhuah hnuah ka khurh nasat zia ka hre chauh,khatiang khan vawi tamtak min ngaipawimawh lo tu te ka lo hneh tawh thin a, mahse, ka chhungril a tlawm ka intihna erawh a bo ngai chuang lo,Mihring ka ni ve a, induhtawkna nei a siam ka ni ve tho,Putea thih hnuah Grace-i te nufa in an theihtawpin min diriam a, khatiang hunah pawh khan chhang vak lo in damthlapin ka ngaipawimawh lo tih ka tilang mai zel,tumah hian ngaihpawimawh loh hi kan lo lawm miah lo tih ka hrechiang tawh viau bawk,tunah Poppy a ni leh a, a tum ang ngawt hi chuan min palzam miah lo ang, mahse, ka tana harsa ber zawk chu nikhat thil thu lek a Jordan-a mize inthlak ta vek leh ka bula ding lo a ka mi huat ber lo ni ta Poppy bul a a ding tlat kha a ni a.. Mi dang ni loin ka pasal a ni tlata, ka tuarchhuak zo lo mai ang tih ka hlau takzet.
In ka thlen veleh ka inbual nghal a, ka rilru sahal tih reh nan tuivawtah ka inchiah ringawt, mahse, awmzia a awm lo, chhungril sahal te chu engmah hian a ti reh thei lo, hahdam duhin ka maimitchhinga, Thlakhat pawh inneih tlin hmain ka Pasal nen mihrang ang mai kan ni berin ka hria, mi te pawh an inhau thin ang, Putea te nupa pawh kha an inkhak fo. Sawmtei pawn an nupa a buaina an tawh te min hrilh thin bawk,mahse, buaina tawk tur chuan kan la innei rei lo lulai em mai. Ni lo, engpawh keini Nupa ah hi chuan a thleng thei vek, inngaihzawn hliau hliau pawh awm lo va nupaa insiam kan ni a, nupa dang innei an induat vanglai tak tura lo inhmuh thiam loh pawh hi a mak lo.
Ka nu te an lo haw in khua a thim tawha, Jordan-a a lo la haw lo fo,nidangah pawh a lo haw hma reng chuang lo chungin a tlai dawn chuan min hrilh ziah thina,tunah erawh chuan engmah a rawn sawi lo, In ah ka thleng tluang em tih pawh min rawn zawt hek lo. Chuvang takin keipawn ka be duh bik lo. A hranpain kan inhau miah lo va, zing a min vin vak bak kha engmah dang a thleng chuang lo.
Roomah Tv en chungin a lo haw hun ka nghak a, Dar 10 a pel tawh hle chungin a lo la haw ta chuang lo. Chuti chen chen engmah hre lo va awm chu dikin ka hre ta chiah lo va, ka call ta a, vawikhat naah min chhang lo va, ka tihnawn naah erawh reife a ring hnuah a pick-up ve mial mai.
“Hello..”hmeichhe aw hian a rawn tih chuan Tu nge anih ka hria. Chiai duh miah lo hian,
“Poppy, Jordan-a ka lo bia” ka ti nghala, ka rinaiin ka aw a pangngai..
“Lawk,a inbual laklawh lutuka,a zawh ve leh ka lo hrilh mai dawn mi? Nge tunah hian ka pe dawn? ” a rawn ti ham hama, a aw-ah chuan a mood a fuh thawkhat tih hairual a ni lo..Jordan-a khan min duh vang a min nei tih kha a hrilh ka ring ta lo bur, hrilh nise Poppy hian Jordan-an min duh zia a hriat chuan min biak pawh nuam ti tur a ni lo.
“Aw, lo hrilh mai ta che. Anih phawt ” ka ti a, min chhan hma in ka Off a, ka khur chhe viau.
Ka mu meng kar renga,ka tah a chhuak der lo va,ka thinrim pawhin ka hre chuang lo, ka awmdan a chawmawlh ni berin ka hria. Jordan-a Motor thawm ka hriat veleh ka maimitchhing nghala,engtia lo hmachhawn tur nge ka hrethiam rih tlat lo.
Kawngkhar a rawn hawn chuan ka muhil tawhah ngai se ka duh avangin ka mut ngaiin ka mu a, ear Phone ka vuah bawk,mahse, engmah ka ngaithla lo,thawm dim takin a vei kual vela, ka che ngam si lo chu ka taksa a kham ut ut tawh,Bathroomah a lut thawm ka hriat hnuah pawh a rei dawn em ka hriat tlat loh avangin ka la che ngam chuang lo.
Ka mutna bul a che dat a, a hniam sat bawk,che lo turin ka insehruh ngat ngat a ni ber, a hma a ka tah chhuak miah si lo kha tah ka chak ta em em bawk,ka chalah dimtein a rawn fawp a,a tho lehnghal tih ka hria, a kalsawn thawm ka ngaithla kar a, a reh zui ta vang vang..
Reife hnuah ka inleta, thutthlengah a lo mu a, a chet eih loh danah a muhil amih ka ring....A zin anih loh chuan mut hran a tum lo tih chiang takin min hrilh a, tunah lem a sawi atangin ni tam pawh a liam hmain a mu hrang leh ta lawi si. Poppy nen an che na lutuk a ka beisei ve hlauin a mu hrang pawh a ni mahna???. An mudun tur anga ka ngaihtuah zawng ringawt pawn ka luak a chhuak nghal hlui mai....
Chapter- 21
Pasal then hi ka lo ngaihtuah ngai miah lo,nilo, ka nei anih chuan ka then leh ka ring lo a ni zawk,mahse, eng vangin nge Nupa hi an inthen thin ka hrethiam ve tan ta riau ruai,hetiang ngawta nupa an khawsak chuan hremhmun nen danglamna a awm ka ring lo hial, mahse, kei hi midang ang ka ni ve lo,kalna tur ka nei lo a, Nu leh Pa in nghahna tur ka nei hek lo.Sawmtei nu leh pa khan an fanu ang taka min ngaiin min thlah thlap mah se,khavang ngawt khan tlan tauh nan ka hmang thei tihna a ni chuang lo...Chapo tur pawh hian dinhmun hian a zir ve angai a lo ni,nu leh pa kar ami ni ila hetiang hian ka tuar theih ka ring lo,mahse, thil tamtak ka lo paltlang tawh a,keimahin ka tuar chhuak a, puitu ka nei lo,tunah pawh hian chhuak ta ngawt ila ka tuar thei chhuak thei leh mai ang. mahse...tunah chuan a hma a ka hrehawm tawrhna nen khan tehkhin chi a ni tawh lo.
Ka tlaivar ta thak, khawvar hnu lawkah ka tho a,rei tak ka tih tawh loh tih ka duh tlat, zing boruak dai raih maiah tlankual ila ka ipik lutuk pawh a ziawm mai in ka ring. Mut kham lo taka insawizawi hi a tha ber lo nangin ka pawisa duh lo. Zankhat mut that loh vanga chau chhe nghal tur ka niin ka inhre bik lo.
Jordan-a muhil hmel chu ka en vang vang a, kei ka tlaivar thak laiin ani erawh a hahdam hmel phian. Inhnuaia ka chhuk chuan tumah an lo la tho lo. Pawn Boruak vawt var mai chu ka hip vang vang a, zingkarah chuan thlasik rim a nam tan tawh bawk nen, lung a leng vang vang mai. Gate sira Mihring kalna lian vak lo awm chu ka hawng a, Gate pawn atangin ka hma a in lian pui chu ka thlir a, ka ta niin ka la hrethei ta chuang lo. Jordan-a ka lakah thinrimna ka neih hma kha chuan nuam ka ti ve tan a, mahse, tunah chuan mikhual niin ka inhre leh tawh..
Hah hnepin ka tlan a, ka thlan a far zawih zawih thei, zan lama ka muthilh tak miah loh vang kha a ni ang, ka lu a hai lek lek thina, hrehawm khawp a ni lo thung.Ka thawpikna pawh a kiang ta deuh duaka, a bo vek erawh ka ti chuang lo. Thawk ngaihna pawh awm lo khawp a ka thawpik kha chu a zia ta deuh tihmai chauh a ni . , In lam panin ka let leh a, kan in peng bula ei chawp dawr awm a lo in hawn tawh avangin thil lei tumin ka lut kawi a, a nghaktu, nu thau zet chuan min lo be sawt sawt mai.
“Enteh, Jordan-a Nupui kha i ni tiraw?” a tih chuan ka bu nghat ringawt.
“In in a fal si, a hrehawm em?” a ti leh a,nui chungin
“Hrehawm loh ve, kei chuan nuam ka ti zawk a” ka ti tha ve mai.
“Nia, tak takin a hmunah khian a nuam em mai, i hmeltha mang e aw” min ti leh daih.
“Aaaa, ka va lawm ve, tuman hmeltha min ti ngai hleinem” ka ti thuaia,dik tak chuan ka lawm ru veng veng, fak lawm lo tumah awm hek lo le.
“An hrilh ngam lo mai mai che anih chu,kei chu thil hi ka sawi pawp mai zel a, hmanni deuh khan in nupa a inchhuak tur kha ka dawr a thu ho hian an hmu che a, an sawi zui nasa khawp mai che, mahse, an lo sawi uar miah lo anih hi" ati leh bawrh bawrh a, ka nui ringawta, chuti taka hmaichhana min han fak zui takah chuan zah vangin ka hmai a sa hat hat thei.
Ka nu te kal tur nen Gate ah kan intawk a,
“Vawiin chu i peih chuan Dawrah lo kal ve ta che, dar 10 velah Tluanga i rawn in dah tir mai dawn nia” a tih chuan ka peih chiang viau, In ah engmah tihtur a awm si lo,ka hne hluah hluah.
“Ka lo kal ang, engmah tihtur ka nei hleinem” Phur sarh hian ka ti a ,Jordan-a vanga ka ipik lutuk te hi Dawrah chuan ka theihghilh thei deuh mahna.
Inchung panna Stepah Jordan-a nen kan intawk a,be lo a kal tlang ka tum zet a, mahse, tul ka ti leh lo, kan bul maiah Sanu-i a awm lehnghala, mak a tih ka duh lo.
“Good Morning” zangkhai fe hian ka ti a,bu nghut chung hian,
“I va tho hma ve” ati tha ve mai, ani pawn kan boruak tha lo midang hmuhtir a duh bik lo tih ka hria.
“Nia, ka ti harh duh lo che nih kha,ka'n inbual lawk ange" zangkhai fe hian ka ti leh a, tawng lo in a bu nghut a,inhnuai lam a pan zui leh mai..
A mutna hnu engmah lang lo in a lo ti fel vek, tu pawh lo lut se kan mu hrang tih an hre kher lo ang,ka inbual sawk sawk a, thik a ei ruala ei ka duh tlat. Hun awm veleh nizan chungchang kha ka sawi angem em tih ka ngaihtuah a, sawi loh a that ka ring, engpawh sawi ila awmzia vak a awm dawnin ka hre lo. Zan dar 10 hnu lamah a inbual laiin a bulah Poppy a awm anih chuan thildang engmah tihtur an nei lo, an tihtur a chiang sa renga, ngaihbel loh pawh tum ila a theih loh bur.
Amahin Dawhkan a lo kil a, inngaihtuah muk hmel zet hian a Phone a en ngur bawk,ka thawm hriain a rawn hawi chhuak vut a, min rawn en a..
“I ei tawh em?” ka ti nghal a,
“Aih, ka lo nghak che” atih chuan ka nuih a za zawk, kei chiah hi lemchang ka lo ni bik lo tawp, ani pawh hian tihluihna takmeuhin min be ve tho tih a chiang sir
“Oh...min nghak tih ka hre lo a, ka lo hmanhmawh lo vel asin, ei ila...”ti chungin a bul a chair ka pawt chhuak a. Eitur an rawn dah nghal zung zung. Zingah hian chaw pangngai aiin chhang leh thei kan ei nasa a,hmeichhia hi kan fel ngawtin ka hre ta, kan tih thin dan nimiah lo kan pasalte inchhunga an lo tih dan zawm turin kan insiamrem nasa a, aharsat tur zia hi Mipa te hian min hriatpui hek lo,diktak chuan insiamrem thei lo phei chu Mo sual ti a sawi anni ziah lehnghal, Mipa te hi han mo ve ta se an tlin lo nasa ngawt ang.
“Abby...eng nge i ngaihtuah thin le?” min tih chuan a aw a lungawi lohna lang chhuak chu ka hriat hmaih lo,diktak chuan min bia tih ka hre lo hrim hrim..
“awi, min bia tih ka hre lo a” mawl hmel zet hian ka ti a, a ner nawk thung.
“Nia, i hre lo, i thil ei tur kha i ei dawn nge dawn lo?” atih takah chuan ka thil eitur ka en vat a, a ka chawk kual vel mai mai chu niin.
“ka ril a tam lo lutuk a, eee, ka nu khan Dawrah lo kal la min ti a” ka ti zui zart.Thingfanghma zai sa pakhat ka ei hrama,thei zawng zawng a ka ngainat loh ber a la ni zui cheu.
“Engtikah maw?” thil ei zawm pahin a ti a. “Zingah khan,an kal tur kha Gateah kan intawk a” ka ti tha ve mai..
“Ka rualin kal la, ka thlah nghal ang che” min hnial buai loin a ti a,
“Aih, Tluanga a lo let leh dawn a, a rualin ka kal mai ang”rang fe hian ka ti ve vat. , min chhang loin a thil ei lai a ei zui mawlh mawlh maia,pawi a ti lem lo anih hmel.
Ka chair ka nawrsawn ta nge nge, ka ei lui thei thlawt lo.
“Ka thawhsan dawn che,ka lo han insiam ang aw, Tluanga lo thlen veleh kal nghal mai ka duh sia” ka ti a, a hmui a hru fai mawlh mawlh chungin a rawn dingchhuak ve nghal a..
“Kei pawh kal hma ka ngai,chho ila” ati a,ka duh emaw duh lo emaw kan Pahnihin Roomah kan awm angai..
Ka thawmhnaw hak tur ka enkual dan dan laiin khumah a vang zawngin a mu a, a Phone ah Games a khel pah bawk,kal hma ngai inti ve si a hmanhmawh leh hmel loh viau lawi.."Nimin khan khawiah nge i kal a? " tha tak hian a ti a.
“Pi hmuni thil ka thawnsak, chuan,Sawmtei hnenah khan thil lak tur ka nei a” ka ti tha ve mai..
“Nidangah chuan i lo kal dawnah min hrilh lawk tawh la” a tih takah chuan ka thin a rim phat mai,niminah khan hrilh lawk ka tum reng, min biak peih miau loh avangin ka hrilh ta lo mai zawk.
“Nangpawn engmah min hrilh hleinem” ka ti ram hmak, a hma kha chuan ka insum thei viau a, mahse, a tawngdan kher khan min ti thinrim thar leh a ni ber.
“Eng maw ka hrilh loh che? " a ti nghut a, ka hawi let chuan a Phone khawih tawh lo in min rawn en reng tih ka hmu nghala, , a mit meng fiah takah chuan ka en ve ran mai.
“Enteh, kan bul tanna hi Hmangaihna a ni lo tih kan hre ve ve, mahse, i nupui ka ni a, diktak chuan zan dar 10 pelh tawh hnu a i Phone i bialnu hluiin a lo pick-up kha chu hawisan phah larhna tur a ni lo" Ka ti ta salh.
“Chuti maw.?” ati duh lek,a awmdan chuan min ti thinrim zual sauh. “Mihring ka ni ve, kan inneihna hi thla pawh a la tling lo tih i hria ang, hetiang hi chuan khawngaihin awm suh,thla hnih emaw a aia reilo deuh pawh nise mi hmuh a mawi te zawng ve tal teh,tunah chuan khawngaihin Poppy nen midang hmuh laiin inzui lo teh u” ka ti fak faka, ka kut ka kuangkuah than mai chu intih mitak ka tum vang aiin zahzel animah zawk,chutih rualin ka sawi chhuak tak vekah chuan ka thawveng nghal hawk thung.
“Poppy tehhrep pawh chu..” ati hluk, tho chhuakin min rawn pan a, thinrim hmel a pu lo..
“Nimin a ka vin che vang khan ngaihdam ka dil duh che”harsa tih hmel tak hian a ti hrawk a, a ngaihna hre lo zet hian ka en thung,he mihring lak atang hian eng thuphachawina mah ka beisei nek lo ve.
“A ho em mai” ka ti nghat a, ka ka thawmhnaw dahna bawk ka ensan leh daih,ka hnung maiah a ding tih ka hriatna chuan nuam takin min awmtir thei der lo thung.
Ka rin loh takin ka kawngah rawn kuahin ka darah a hmaiin a rawn nawr a, "keiman ho ka ti lo, nilengin ka awm a nuam lo" a ti leh phei chu ka ding khawng lah mai. Nizanah Poppy bulah hun a hmang a, ka bulah pawh a mu hek lo, tunah ngaihdam min dil vang maii ka ngaidam ngawt ang maw?, a teuh lo mai…
Vaneihthlak zetin a Phone a ri ta hlauh, a kalsawn ngei angai, min thlah rualin ka thaw nghal huai mai,diktak chuan a huhang hi ka la zo meuh lo, thlakhat dawn nupa kan ni ve tawh chungin a uap hi na ka la ti ta fo..
Tu nge a biak hriat ngaihna awm loin Tukverh a hawng a, Balcony ah a chhuak zui nghal daih,a inthiarfihlim chu ka lawm zawk, ka nep em mai a, ka rilru a no bawk nen min hnaih lo se ka duh rih zawk,ka thawmhnaw ka la chhuak sawk sawk a, a lo let leh hmain ka ha a, ka en ru zauh zauh reng tho, a la bei rei hrep zui.
“Min lo nghak rawh, ka thlah ang che” tiin Room ka chhuahsan tur min rawn au a.
“Angai lo, Tluanga a lo let tawh ang” ka ti liam puat.
“Abby...”a tih leh chuan ka ban ka vai zauh a. “Min thlah kual kha a buaithlak mai mai, Tluanga nen kan kal mai ang,lungngai suh, engmah ka ti lang lo ang" Tih pahin ka nuih lui kher.
Vanneihthlak lutukin Tluanga a lo let tawha, a thil ei rei lote ka nghah hnuah kan kala, kan kal chhuah thlengin Jordan-a a lo chhuk ta lo va,pawi ka ti lemlo, tha tak a min biak chuan tha takin ka chhang ang a, min biak lem loh pawn ka be bik lo mai ang, a lo haw har pawn a lo haw har anih hi ti a ngaipawimawh lo lui turin ka infuih sauh sauh. Pasal nihna dinhmun hi mipat hmeichhiat naah a inghat ngawt lo va, nupa nun tikimtu pakhat mai chauh a ni , a pawimawh lo ka ti lo, mahse, a ber erawh a ni chuang lo, a ber ni se la chuan nileng a rui kawi mai mai te, Natna avang a nupa nun hmang thei lo kawppui nei te tan hian nun ngaihna a awm lo ang,mahse, Pathian hian chi thlah nan leh nupa nun tikimtu atana a siam mai a ni zawk,nawmsip bawlna hmanrua tur a ni lo.
Ka nu te bulah ka awm ve ta reng, a tawng duh em em a, ka pa erawh a tawng meuh lo thung, dawr bungrua tam em em mai chu engtin nge an hriat kim sen pawh ka hre lo,mipa 3 leh hmeichhe tleirawl lam deuh pakhat a awm a, an thu hman mang lo.
Nu lian lutuk lo, hmeltha zet mai a rawn lut hlawl maia, ka hmuh hnu niin hre mah ila ka hmuhna ka hre chhuak zo tawh lo.
“Lo leng rawh,kan inhmu khat mang e” ka nu in a lo ti thuai, ka bula Chair awlah chuan a rawn thu a, a naupang zawk zawk tawh lo ang tih a chiang, mahse, Make up a hmang nasa viau thung.
“Nia, tunlai chu kan buai em a ni, in dam tlang em?” ati ve a, a perfume rim chuan kan inhnaih bawka ka hnar a verh na viau.
“Dam e, Abby, hei hi i ni anih hi, i pa te unau zinga naupang ber”ati nghal a, a lo luh tirh atangin a vawikhatnan min en ve ta nge nge. Ka hmuh danah chuan Jordan-a pa nen in anna pakhatmah an nei lo,an in anna ber chu a hmel nelawm lo lutuk chu animai awm e. Hmeichhia ve si hetiang em em a nelawm lo hi ka hre ngai lo,ka pa hian farnu engzat nge a neih ka hre lova, Zoi nu kha ka hmu tawh a,ani kha chu ka pa nen an in ang viau, a nu lianin a zahawm em em rualin a bul a awm a nuam takzet thung, tuna ka bul a thu nen hi chuan lei leh van ang vela danglam anni in ka hria.
Chibai tuma ka kut ka phar chhuak min en dan chuan min ngaihnep zia a tilang vel vek, a hmui sen zet a tisawi zauh a,
“Mi thenkhat hi chu vannei tur a siam hi an awm ve a ni tiraw?” nui sawng chungin a ti a, a thusawi awmzia ka man mai lo,mahse, ka nu in zawite a a rawn khak takah chuan Jordan-a ka neih vanga vannei min ti a ni tih ka man leh thuai,ka ngaina ngai dawn lo tih ka pawm nghal hmak.
“Abby kan chhungkua a a rawn tel ve hnu hian kan nun dan a rawn thlak hlawk maia,i u lah hian a lam deuh reng mai asin” Ka nu in a ti ve sak a, min chhan thiam ka ti lutuk.
“Nia, anih ka ring,tuman midang chhungril kan inhriatsak hleinem,bakah sualna hun pawh a la awm lo a”a la ti ta fo.
“Zobiaka te kha engtik nge an inneih hun kha?” Ka nu in a ti leh a, Ka pa a rawn lut chiah bawk,a rawn thu ve nghal a, a farnu a hmuh avanga lawm hmel emaw welcome tumna pawh nei hmel a pu lem lo.
“Karleh zirtawp hi,eee, taka in mo thar hian kan Zobiaka te chu a hrechiang alawm”a tih leh takah chuan zah vangin ka hmai a sa hut hut maia, inhmu thei ila chuan ka hmai a sen vek ang tih ka chiang.
“Abby, in inkawm thin tak tiraw?” ka nu in a rawn tih chuan ka bu nghat ringawt.
“In lo kal vek ang chu,bakah Mama nen pawh sawi dun tur in ngah ang”ati leh kher a, ngam ila chuan ka beng pawp duh hial ang, za vak lo hian ka nui a,an Monu tur te khawsak san zia leh an neih zia te, an chhungkua nen a inmil tawk vel mo an nei tur a lawmzia a sawi zui ta nek maia, a mize mak tak mai chu Jordan-a te chhungkaw zinga tel ve niawm lo tak a ni. Min hmusit tih tawngka in sawi dawt lo mah se a chiang reng,an mo pawh ka ni lo a, engvangin nge min han hmuhsit viau kher anih ka hre lo, an pawi ka sawi ka hre der si lo.
“Abby,kan dawr bul chiahah hian Momo an siam tui lutuk asin, Sawmi nen hian va lei ula” Ka pa in a rawn ti boh a,ka tan a farnu tawngkam nat dan tur a hrethiam tih ka hria,lawm zet hian ka ding chhuak vat a,ka nu in Pawisa min pe a, Sawmi a tih dawr a thawk nula nen kan inzui chhuak ta vat.
“U Abby...aaaa, ka u ngawt che a, ka inrual angem?” nui chungin a ti a, kan inrual loh pawn kei aiin a naupang chhe lo ang..
“I duh duh danin min ko rawh, a pawi lo vek,mahse, min u lo la ka duh zawk” ka ti ve vat, kan inzui phei zel a, khawilam nge anih ka hriat loh avangin Sawmi kalna ah ka zui zel.
“Kha nu kha kei chu ka ngaithei lo thei tawp,a lo kal apiang hian tawngkam na deuh deuh hian thil a sawi ziah”a ti hlak a, inthiam leh chiah lo niawm tak hian a nui leh a..
“A ho lutuk, mihring hi kan in ang lo a, an chapo viau hi chuan chapo chhan tur an nei animai” ka ti a, ka ngaihdan dik tak a ni bawk. Mahse, chapo na hian engmah rah tha a chhuah lo tih ka chiang.Kan chapo chhan lah mitkhapkar leka ral mai thei a ni bawk.
‘Nia, a dik tho,mahse maw, in chhungte dang hi an fel nen kha nu kher kha chu ka ngaithei lo,a bulah inveng rengin ka awm ka ti mai..mahse sawichhuak suh aw” ati leh hram, a rilru tur ka hre thiam tawp.
Kan let leh pawhin a lo la thu ta cheu, mahse, Jordan-a a lo awm tel tawh chu niin, ka hmu thut bawk nen ka phu deuh zawk mai,a lo kal ka ring lo lutuk.
“Abby he lamah a lo kal bawk a, nidang a kan hmuh ngai loh u Jordan-a kan hmu hlawl mai”Tluanga’n nui chungin min lo fiam hlut a, ka nui ve ringawt, Jordan-a ka melh zawk a, hriatthiam har deuh hian min lo en chu niin, ka hawisawn lehnghal daih.
Ka pa bula Momo ka dah hnuah Jordan-a bul a thutna awl ka pan a, thutna tur dang awm lo ta chu hreh ru takin a bulah ka thu ta nge nge.
“A nuam i ti em?” atih chuan ka bu ringawt, a Ni lo kal hma kha chuan nuam ka ti, mahse, a Ni lo kal hnuah chuan hremhmun pa te a ni ringawt.
"Chuti chu kal ziah la a tha ang” a ti leh a, In ah engmah tihtur a awm lo bawk nen kal ziah mah ila pawi ka ti lo.
Ka awm chhungin vawikhatmah Zobiaka nu a be lo,an chhungkua an inmil lo ve hrim hrim emaw ka ti hial, Ka pa pawn a be mumal chuang bawk si lo.
“Nu, eng nge a rawn tih a?” bung zet hian a ti nghut, thu tawh lo in a a kekawr ipte zen chungin bungraw in rem tlar tuar mai chu a en a.
“A lo leng lut satliah mai mai mawle, Zobiaka te inneih tur vel kha min rawn hrilh pah bawk a” awlsam zet hian ka nuin a ti a, a Pasal farnu a ni bawka ani tan lo mil loh ve ngawt a rem loh vang nge a mize ngeiawm lutuk kha a ngaipawimawh lem lo tih ka hre thiam lo.
Zobiaka te inneih hun tur a zawh leh chuan ka nu in a hrilh a, a hmelpa zet chu ka en renga, a ngaihtuahna ah eng nge awm ang ka hrethiam lo.
“Nu, Abby hi ka hruai chhuak lawk dawn asin” a tih takah chuan phawk deuh hian ka en a, khawiah nge min hruai a tum ka hre lo.
“Khawiah maw?” ka nuin a ti a,
“Ka pu kan va tlawh ang chu ka tia” tha tak hian a ti a, tu a pu zawk nge kan tlawh dawn ka hre lo, a nu pa leh a pa pa an la dam ve ve,kan inneih ni khan an lo kal ve ve bawk.
“Khawilam zawk?” ka rilru hria niawm takin ka nu in a ti ta hlauh.
“Mission veng lamah,Abby a hmu chak deuh aniang” tha takin a ti a, mission venglam anih chuan Ka pa te in lam a ni tih ka hrethiam, Mission vengah an inpui awmin Jordan-a Patea ten inpui an nghak a, a Pi a boral tawh thung.
Ngawirengin motorah kan chuang dun a, min be lo bawk nen ka be bik lo. Pawn lam nisa vawl vawl hnuaia mi che tla chu ka thlir dauh dauh, a then rethei tih hriat ngawih ngawih te, thenkhat vei nei miah lo niawm tak tak an ni thung,kan tlan sawt lem lo viau, Motor tam lutuk hian mihring nunphung hi a ti khaihlak nasa ngawt ta ve ang, kan ram hruaitu thenkhat te lah hi Office kal lam an hmanhmawh chu ka hrethiam, kal lam pawh ni lo, haw tawh tur, Traffic jam a in line ve mai lo va midang min han nawr kiang a, tlan tlang duh tawk lah bo lo,hetiang Ramhruaitu te hi kan hmuhsan phah ka hre lem lo,motor dang ang bawk hian line ve mai se a letin kan zahna a pung zawk hian ka ring thin, mahse, hei hi Khawvel a ni a, a thei apiang leh a phakar apiang din chhuahna, midang te ngaihtuah chunga nung leh mi chhiatna thlen duh lo tu apiangte nek chepna khawvel a ni miau alawm le,an theihtawpin tlan mahse Khawvel hian lungawina a pe ngai dawn si lo,tlan zel mai rawh se.
“Ka ni khan eng nge a sawi?” a tih chuan ka phu deuh zawk bawk.
“A sawi teuh mai, ka nu nen an titi nasa” ka ti ringawt. “A tawngkam hi hriat a nuam lo thin ania,i hmelah khan na tuar i ang em a, engtin nge a tih che ka hre duh mai mai ”tha tak hian a ti leh a. Amah anga in control thei ka ni ve lo bawka ka hmelah hian ka ngaihtuahna a lang zung zung thin, dawt ka sawi ngai lo ka ti lo, mahse, Dawt ka sawi ve tum pawn awlsam taka man chhuah ka ni fo mai.
"Engtinmah min ti lo, ka chungchang a sawi lo ” ka ti leh mai, a tawngkam ngeiawm tak tak te kha sawi chhawn dan tur ka hre lo.
“A that chu. Mahse, i hmel atang kha chuan lak nat nei i ang tlat, Zobiaka nupui nei tur chu i la na deuh tihna em ni? ” a tih leh takah chuan lo thinrim sa nen ben sawk ka chak zek zek, ka kut ka humruh tlata, ka chet chhuah thut loh nan ka maimitchhinsan ta zawk.
Chapter – 22
“I ngaihdan dan le” ka ti thei hram,min ring chhe thin, kei pawn ka ring tha bik chuang lo,ani leh Poppy...kei leh Zobiaka, tehkhin chi pawh a ni lo, mahse, insawifiah tumna ka nei tawh lo,a duh duh in ngai mai tehse.
“Nia, ka hmuh dan che chuan na i ti viau,mahse, ka nupui i ni tlat” ati leh hluk chu muangchang hian ka en a.
“Nangpawh ka pasal i ni ve tho,ti hian kan tha tawn ve ve a ni lawmni?” ka ti ro halh,min rawn melh zawk a, hmalam a en lehghal daih, nghet hmel zet hian Steering wheel a vuan a, ka chhan dan avangin a lawm nge lawm lo ka hre lo.
“I ngaihdan dan le,kan tha ah i ngai anih chuan kan tha animai”a ti bung vut, nia, kan tha..
“I duh duhin awm la, kei ka duh duh in,mahse, nupa kan nih angin nang leh i hmei hi midang hmuhah chuan in lan tam lo ta ula chu tha ka ti” ka ti leh zel. Chuti maia awlsama ngawihsan ka thei lo.
“I tawng fimkhur deuh thei em?” a ti ram hmuk. “I nupui a ni miau si lo a, Hmei ka ti ta mai” ka ti leh sak sak, ka nui zui hak nangin ka nuihna phenah erawh luak chhuakin min tur ut ut thung.
A pu te In kan thlen hma chu engmah kan sawi tawh lo. A pu in min lo lawm hlut mai,Jordan-a te hian tu nge an chhun ngaihtuah vak a ngai hran lo, a pu hi tlemin a zang a kul deuh tawh mah se, Jordan-a nen an insan hleihna a tam lo,a vanglai chuan Nula ho a chhaihbuai fe ang tih a chiang mai. Mi hlun chhungkua an ni bawk a, an in pawh a pui viau,ka ngainat zawng takin engmah ni buai a awm lo, engkim mai a inhmeh vel vek,rawng thlan an thiam ka ti ngang mai.
“Abby, thil ka hrilh ang che,i Pu kha ka thianpa ania, I hre tawh ngai em? ”a tih chuan mak ti lutuk hian ka en a,Jordan-a erawh chu phone a hman avangin a awm ve lo.
“Tu ka pu nge?” ka ti ringawt, ka pa lama ka pu chu anih ka ring lo sa, ka nu lama ka pu chanchin pawh engmah hriat ka nei lo, a hmel takngial pawh ka mitthla thiam lo.
“I nu pa mawle, kan inzui nasa thin khawp asin,mahse, kan pahnih a hma kan lak tan laiin a boral ta mai sia”ati koh koha,ngaihtuah ngaihna pawh ka hriat loh,tuma hnen atanga ka la hriat ngai loh ka pu chanchin ka hre ta tlat, chu pawh ka beisei loh na ber Jordan-a pu hnen atang lehnghal..
“Ih...ka hrethiam lo,Pu ka nei ngei ang tih chu ka hria, mahse, vawikhatmah a chanchin sawi ka la hre lo a..ka bo lutuk” ka ti bah nuai.
“Nia, i nu kha a boral hma em mai a,i Putea kha chuan engmah a sawi lo tawp ang, Mipa hi chu kan heti mai mai zel a,mahse,hei i pu nena kan thu thlun hi a sual lo tawp tih ka hre ta” ati leh phei chu eng thu thlun nge hre lo chhah tak ka ni.
“Eng chungchang nge ni ang?,ka hriat ve chi ani em?”ti chungin ka melh kar mai, thil kal tawh ngaihtuah tih hriat zet hian a en ngai a en vung vung hnuah min rawn en a.
“Kan mizia kha kan inhrechiang tawn khawpa, kan thlah kalzel te hi chhungkua a insiam kan rawt hial alawm, i pu kha a mal em mai a, unau a nei lo a,farnu phei chu nei se chuan a farnu ka neiin ka ring.Tak takin kan inhriat tirh khan Nupui nei kan ni ve ve tawha,kan fa te innei se kan ti thung a, mahse,tum ang ngawt hian a lo theih loh,bakah Jordan-a nu hi nu fel tak a lo ni lehzel a, a pawi ka ti lo,kan tu hmasa ber te tiin thu kan thlung leh a,hei tunah chuan a puitlinna ka hmu ta anih hi,i pu erawh a nun a tawi em a, a hmu ve hman ta lo,i nu te unau lah chuti bawk....” a ti charh charh chu ka hresual emaw ka ti hial,ka nui ringawt maia, mahse, ka nuih chhan ka hre lo…
“A thawng viau che elaw?,Mama hi chuan a hria asin, nang chu hrilhtu tur che i nei lo tlat a,Mama lah hian a hrilh duh dawn chai si lo che a, a pawi hleinem tiraw,tunah te chuan Nupa in ni tawh a, Mama lah hian a duh hliah hliah khawp che hi maw,kei lah chu i pu nen kan thuthlun a hlawhtling tiin ka hahdam tawh em em bawk si” ti chungin a nui zui huk huk a, nuih ve na tur reng reng ka hmu lo..
Jordan-a lo let let lai in thildang a lo sawi tawha, ka bula a rawn thut chuan awmdan tur ka hre lo,ka khawngaih a ni ber tawh, an chhungkaw milpui nula tam tak mai bakah a duh em em Poppy pawh nei thei lo in kei min neih angai reng zawk a lo ni si, min neih duh chhan ka zawh apiang khan min duh vang a ti thin kha ania, a ruk chuan keiin neih ka hrehna ai khan min neih a lo hreh fe dawn a lo ni.
Kan haw kawngtluanin vawikhatmah kan inbe lo, chawei turin min sawm nasa viau mah se Jordan-an a hnial fithla thak,in kan thlen hnu lawkah ka nu te an rawn thleng ve a, thup ka tum teh nangin ka chhungril a nuam lo tihna leh inthlahrunna chuan ka awm a ti nuam loin ka chau hluah hluah thei hial. Tuemaw tal hrilh thei ila chuan ka ziawm maithei, mahse tu nge ka hrilh tak ang?,Kimtei hi...ka thian tha ber ni mah se ka hrilh chuan min khawngaih ngei anga, mahse,khawngaihna kha tunah chuan ka mamawh ber a ni si lo,Sawmtei zawng ni lullo e, Poppy a haw em em a, min ngaina thung, mahse,kan inneih chhan tak tak hi a hria anih vaih chuan a rilru a danglam maithei,ka nu leh pa hian engkim an lo hre sa vek bawk tihte ka ngaihtuah kai zel phei chuan hawi ngaihna ka hre tawh lo..
“I dam tha em?” tih pahin khumah a rawn lawn ve a,inveng ka tawlhsawn dawrh thung..
"Ngatinge? Enge dik lo? I chiang em? ' A ti leh duah.
“Aw, tha e,ngatinge?” pangngai thei ang ber hian ka ti thei hram,kei aia nasa fe in min nei tur a rilru a siam lai khan a tuar nasa zawk ngei ang tih ringawtin min luh ngut ngut a ni ber.
“Tlai atang khan i hmel a dik lo zual riaua, ka nu biakna che lah i chhang mumal bawk si lo, ka nu khan a ngaihtuah deuh che anih ka ring, zawt tur che in min ti a” ati duah, Lukham nghengin a thu mu a, khum mawng bang a Tv lian pui bet thlur chu a en vung vung bawk.
“Ka tha lutuk, tlemin ka pum a nuam lo a, mahse, a zia leh tawh” ka tih chuan min rawn en a, khum sir lamah ka thu fel at mai..
“I that tawh chuan a lawmawm chu” awlsam zet hian a ti nghut a,eng ang pawn khawsa se kei hian sawisel tur ka lo ni reng reng lo, a thuawihna vang chauha kei nen a nupa ni a phuar beh a ni tih ka ngaihtuah hian inthiam lohna vang bawkin ka rilru a bing mum mum mai.
Zan hmasa ka muhil ta miah lo kha a ni a, chhunah ka muhil hek lo, mut chhuakin min zem chiai chiai a, khum kil lamah Jordan-a si lo in ka mu tawm kak mai.Jordan-a erawh a Phone ah Online in Games a khel a, a changin a phun leh hluk thin bawk,a sumdawnna leh thil tihna kawng engkimah tih mawh leh luhlul tak nimahse a chang chuan naupang chhia ang maiin a khawsa ve thin tho tih ka hre tawh.
‘Jordan..” zawite hian ka ti sep a, inthen rawt mai ka duh..
“Aw.” ati nghut,a thil khelh lai a tisual a ni ngei ang, a phun hluk ri ka hre zui zat bawk.
“Eng lo ania...inthen hi i ngaihtuah ngai em?”ka ti deuh tawp.
“Aih, muhil rawh, i tawngvai zawk nge ni? " ati duh lek.
“Tawngvai lo..” fiah takin ka ti ve thung.
“Chuti anih chuan muhil rawh, Inthen tih vel hi ka ngaithla peih lo ania, sawi pawh ka peih lo bawk”ati hmuka, a tho zui nghal daih bawk.
Ka mittui a rawn tlak chuan ka tap tih a hriat ka duh lo, Mittui hi chakloh entirna ka lo ti thin, a lo ni ngei tak tak a ni ang, ka chak lo,ka nun khawchhuah nan ka bei thin, tunah chuan ka beihna te kha ka haw tawh zawk, lo thi daih ila tha zawk tur...
Ka tap muhil a ni ngei ang, ka harh leh chuan khua a lo eng tan tawha,Dimtein ka inbengkang a, Jordan-a mutna a lo ruak hiau tawh.Gym a kal leh tawh a ni ngei ang. Ka mu leh ren rawn a,Tv chunga kan inneih thlalak lian zet intar chu ka en reng, engkim mai hi takna nei lo,lemchan thil mai a lo ni..
Bath Room kawngkhar a rik rak chuan ka hawi phei vat a, Jordan-a a rawn lut a,Boxer chiah a hak avangin Gym kal a tum nge tum lo ka hrethiam lo,min rawn pan a.
“Good Morning,i mu tha em?” a ti zang vuh.
“Um, mu tha lutuk, Gym i kal dawn mi?” ka ti ve a, puan in ka inkhuh tha a..
“Tum e, i harh tawh tho chuan lo kal ve la” tih pahin min en chhuk run mai.
“Aaa, ka lo kal lo mai ang,mut ka la duh rih” ka ti ban chat.
“Aih, a theih loh” tih leh rawn kun hniam a ruala, ka inrin hma in ka puansin a rawn pawt sawn chu ka te that mai, a nui hawk hawk thung,khum mawng lamah a thehthla daih.
“A va fair lo ve...”ka ti that mai, a rawn kun hniam leh a.
“ I kal dawn nge dawn lo? " Nui chunga a tih chuan ka nihna ka hrechhuak lo thei lo,kei ai hian a va han fakawm tak...tihluihna in min nei a, a tihtur tha takin a hlen vel vek si..
“Kalsawn la, ka thawh ve phawt loh chuan ka kal thei nang “ tih pahin ka nui lui a, a then suk ringawt, a rawn kun hnai leh thuta, ka khur ru dar dar mai..mahse, a tho leh ta daih lawi..ka hrilhhai letling phian..
“Insiam rawh le...ka lo nghak ang che” ti chungin a thawmhnaw dahna lam a pan nghal daih bawk.
Ka tho nghal vat mai,Bath Roomah ka lut a, ka inphihfai sawk sawk, Tooth Brush dahna a Jordan-a Tooth Brush awm chu ka ha nawh pahin ka en a, kan inneih khan engkim awmsa vek in he Bath Room hi ka hmu a, Darthlalang chhungah inbualna atana mamawh chi chu a awm kim vel vek...kan nupa room anih ang ngeiin Tooth Brush dahna No niawm tak, lian nalh zetah chuan Toothpaste nen kan dah kawp a, tukin hian hmuhnawm ka ti thar ta tlat, a chhan ka hre lo....atthlak zet in kei hian Jordan-a hi ka lo duh hman tawha, ka Hmangaih loh nana inven tang tang hi ka tih theih awmchhun animai..
Ka chhuah leh chuan a lo insiam zo vek tawha, ka thawmhnaw hak tur Khumah a lo dah chhuak diam, ka lai hu maia, nimin kha chuan biak pawh kan inbe mumal lo kha ania, tunah lem Pasal tha ber ang maiin a awm leh lawi si, engkim ka hriat hma kha ni se chuan min duh ve tak tak emaw tiin ka lawm hle awm sia..tunah chuan a duty a ti nimai a ngaihna ka nei a, lawmna ka neih aiin zahna min thlen tam ta zawk.
“I Passport pakhat tal i keng em?” kan tlanchhuah hnuah a ti thut a,ka keng lo chiang khawp.
“Keng nang..eng nga tan?” ka ti ha.
“In register ve nghal la ka ti mawle”ati sup a, pawnlam ka hawi chuan Ruam lam deuh chu tiauchhumin a khuh a, ka lung a ti leng vawng vawng mai...eng nge ka ngaih pawh ka hrechuang lo..
“Angai lo, i kal loh changin kalpui tur ka nei chuang lo a..”ka ti tha ve mai..
“Ka kal reng dawn alawm,bakah tlaiah pawh a kal theih tho a, zingah i kal loh pawn tlaiah Tluanga i indah tir thei a”ati leh a,nitin ka nu rualin Dawra kal ve ka duh, chutiang a kalna turin hunawl ka nei lo ang tih ka chiang..
“Aih, nitin Dawrah kal ve ka duh a, chutiang hun ka nei lo”ka ti tlang nghal pawp.
“Ok, i thu le..” ati nghut a, a tawngkam nelawm lo em em reng mai hi ka hrethiam lo..mahse, a pa leh a pu pawh kha amah ang tho a tawngkam bungraw nei tlem leh tawng bung anni ve tho..
Mi an lo awm nuala,an bungrua lah a changkang em em vek, Gym ka vawikhat luh ve na niin ka riruah Grace-i leh Pitei an lo lang nghal zat bawk, ka hawikual vel chiama, , an kal thin na kha a ni em ka hre lo, Gym a tam ve tawh tih ka hriaa, hetah chuan an kal kherin ka ring lo, bakah an lo kal anih pawn tlaiah emaw zanah a ni zawk thin a,tun ang la hma lutukah hi chuan an kal lo tawp ang.
Jordana'n min tihpui laiin,
“Ehe...Abigail...”hmeichhe aw hian a rawn ti a, tu nge anih ka hria, ka lo beisei lawk miah loh Pitei nen kan inmelh ta ran mai..
Ka thlan vanga ka sam ka taksaa a bet ka hui kiang a,ka bulah Jordan-a a ding bawk, kan inneih chhan anni hian an hre lo tih ka chiang,chuvangin hlauhna tur ka nei lo..
“I dam maw?” ka ti nghat, analh ngaiin a la nalh reng..a nui sawng a..ka thawmhnaw a melh kual dan dan a, an hnena ka awmlai a Grace-i lei,a hak duh leh tak loh min pek kha a ni a, ala hrereng tih ka hrethei...
“Dam alawm,Kawngpui vel a walk ai chuan Gym na na na hi chu a tha ania” tih pahin a nui leh hak a, ka te chem chem mai, mahse, ka hawi sawn lo, ka melh ngaiin ka melh ngar tho.
“Nia, Hei,Jordan-a thiante ta a ni hlauh a, ka kal ve tan dawn mawni ka tia” tiin ka nui lui ve sak bawk,Jordan-a a rawn kal hnai lehzuala, Pitei a en a,
“I tha maw?”ati nghal zat, inti ta tu zet hian ka darah a rawn kuah a,ama si chetin ka dinga.
“Tha lawm, enteh, Abby nen in inhmuh hmasak ber tum a i kekawr a thil a tihbuak kha i la hria em?” a ti deuh kher.
“Dawn lawmni,khata tang khan i en dan leh nangmah ka hriatchian phah bawk che a’ ka beisei loh tak hian Jordana'n a ti a, a awkiah hmuhsitna a lang chiang viau, Pitei hmel danglam nghal chu ka melh kar a,Jordana tih atana inhmeh lo tak ni mah se min chhanna chuan ka chhungril a ti lawm veng veng..
“Chuti maw?” tih pahin nuam ti lo hmel zet hian a che sek mai..
Ka rin loh dan bawkin a che leh ta, Tlemin a kun hnai deuh a,zawi sup hian “Um,tehreng mai,engtik ni ah emaw chaw rawn ei ula,Abby tan hi chuan Pi i la ni ve reng ania” ati a, a ding mar lehnghal mai...min rawn en a,
“Kan haw tawh dawn mi?” a ti zui zat bawk....
“Ka lawm e aw’ In lam pan a kan tlan chhuah hnuah ka ti sep a a rawn hawi zawk a, hmalam a en leh a..
“Ka tihtur alawm’ ati hmuk ringawt, a tihtur anihna ka hre lem lo..
“A chang hi chuan tih let ve angai thin, Pitei zia hi a hahthlak ve deuh a” ka ti leh niah niah a..
‘Ka hria lawm,ka nupui i ni tawh a, tuman hmusit tak a an tawngkhum che ka duh lo” khauh zet hian a ti nghut a, kei lah ka ip chawih thung..
Jordan-a a inbual hmasa a, nidang ang bawkin ka nu leh ka pa an lo chhuak leh tawh, Pi hmuni bulah reilo te ka thu a, Jordan-a a inbual zawh tawh ringin Roomah ka chho a, Balcony ah a lo ding a, Phone ah tu emaw a be bawk..hnung min chhawn avangin min hmu ve lo thung..
Inthlakna tur ka la chhuak a, ka thawmhnaw hak lai leh Jordan-a thawmhnaw kalsan ho balbawmah ka dah luh laiin a rawn lut a.
“Zanin kha Zobiaka ten Party an nei dawn a, kan nupa in kal turin min rawn sawm a..”ati nghut, Tawnzau dum a ha a, Jogger Pant Grey Colour a ha bawk, engkim mai hi a inhmeh vel vek..
“A theih chuan kal loh ka duh zawk”ka ti nghat thung, ka kal duh lo tak tak..a chal ti chuar zauh pahin Khumah a vang zawngin a mu thla zuia.
“Kal turin ti lui ta che ila?” a ti leh a.
“Min tihluih chuan ka kal angai animai alawm” ka ti bung vat.
“Um, lo inring ang che, kan kal ang” ti chungin a rawn tho a, khum bula Cabinet lian vak lo awm chu a hawngin Bag dum kutphah aia sei hret tur hi a rawn la chhuak a, a kilhna a hawng a, Card dahna anih hmel,pakhat a phawrh a,
“Hei hi ka card ania, vawiinah Bazar ang che” tih pahin ka kutah a rawn hmehbel a, thawmhnaw Party na a hak tur ka nei lo niin a hria a ni ngei ang,a ring dik, ka nei lem lo a, hak tur chi pawh ka hre hek lo..
Hnial ka tum zet nangin ka thulh leh,hnial mah ila awmzia a awm kher lo ang, Kimtei ka sawm anga, ka lei nghek mai ang chu,midang zingah a nupui hi zahpuiawm a ka awm a duh lo tihna animai..
Jordan-an Dawrah min thlah a, ka nu hnenah Bazar ka ngai tih a hrilh nghal bawk, ka ngei ru kher thung, ka tihtur ka nu hnena sawi kher ngai ka ti lo,keiman ka dil ve mai ang chu.Dar khat velah Kimtei a lo thleng a, Thawmhnaw lei turin kan inzui chhuak nghala, a tawng barh barh reng mai, engvakmah ka sawi ve lo thung,Mark-a hming a lam sek erawh ka hrechiang.
“Abby...i dam em?” min rawn ti Tu lam ka hawi chuan Rini leh Poppy an lo ni a.
“Um, dam e,nangni zawk?” tichungin Rini ka en a, Poppy nen in Cousin anni bawk a, an mizia pawh a in ang reng ang tih ka chiang..
“Ka tha lawm,zanin kha in lo kal ang tiraw?” a tih chuan Party na ah a ti anih ka ring mai..
“Kal ang,kan inhmu ang chu” ka ti tha ve mai.Kan thil enna dawr hi Kimtei thiante dawr anih avangin dawr neitunu nen an inbe mawlh mawlha, Rini pawn an thilzawrh a enkual ve bawk..
Poppy-in min rawn hnaih hrat a..Thil pawimawh sawi tur ang maia thutak hian a hmel a siam danglama, zawi sap hian…
“Hmanzana call ka lo pick kha ka ngaihtuah let hian tul lo ka ti leh sia, lo ring ral mai mai se nitur ania..mahse,, i Pasal in i zei lemlo tih min hrilh bakah i bula awm a nin thu a sawi vang ania keiman ka lo pick-up ni. I ngaithiam ang chu maw" a ti a, a nui sang maia, Rini leh Kimtei chuan a sawi an hre kher lo ang, mahse, kei chuan tek ri tlukin ka hrechiang hial ang, a duh duh sawi thei turin a zalen tih pawh ka hre kar tho...mahse,he infiamna tualzawlah hian awlsam taka tlawm mai ka tum tihna erawh a ni lo..
“Chuti maw? Ka bulah pawh tiang chiah chuan a sawi che asin. Hna vanga i bula awm angaih tlat thin vanga a nin zia leh i beisei reng a ning tihte pawh a, sawi asin” ka ti ve salh maia, a hmel a dur khap khap mai, kan inneihna hi a tak a ni emaw ni lo emaw duh duh min sawikhum anih chuan kei pawn tawngna tur ka ka nei ve tho..
Jordan-a lo haw in ka lo inbual zo chiaha, Bath Robe bak a hnuaiah engmah ka ha hman lo..
“Vawiinah Poppy nen in inhmu tih ka lo hria a” ati chu a hmel chang zet ang chiahin a tawngkam pawh a chang viau..ka beisei lawk sa a ni bawka mak ka ti hran lo.
“A hrilh che ka ring reng a” ka ti nghat ringawt..
“Nidangah chuan awmdan mawi zir tawh la a tha ang” a ti leh hmuka. Ka thinrim teh nangin ka insum hman,
“Zir belh ka mamawh lo ve” ka ti mar at, zinglama kan boruak nen chuan danglam leh tawh tak a ni..
“Mawl lutuk hi sualna chi khat ania sin,Abigail..min ti zak suh,nang chu engpawh i ni thei, i awmdan hi zahna chang i hre lo anih pawhin kei hi chu ka zak thei ania” a tih takah chuan a tawngkam tinreng chuan min deng dawt dawt a ni ber..
Chapter- 23
“I sawi dik, ka mawl ang,nu leh pa thu tha min hrilh tu ka nei lo,tha ka tih ang angin ka nun ka hmang mai zel,chuan, Poppy chungchang bikah i lungawilo anih chuan sawi tur ka nei lo,hei hi ka nihdan anih hi..”ka ti ve ta ngat.
“I pasal ka nih hi”tichunga min rawn pan hnaih chuan tawlhsawn duh lo in ka din ngaiin ka ding reng.
“Nia, Pasal, inremsiam ang, zanin atangin kan duh duhin awm ila insawisel lo tawn ang, chuan kan hlim mai ang, i duh leh Poppy pawh mutpui la,ka sawi loh pawn i mutpui reng tho, kei pawn ka duh duh ka hmu anga, ka duh duhin ka nun ka hmang bawk ang, mi hmuh ah nupa ni ila a tawk mai. A tha em? ” cho takin ka ti leh, sak sak, a kut humruh tlat a kekawr ipte ah thun zun daih mah se ka hmuh hmaih hauh lo thung.
Ka thawmhnaw hak tur ka lei thar ka hak laiin Jordan-a Bath Roomah a awm thung, pawisak engmah nei lo a nun ka hman hian ka hlim in ka ring tawh zawk, keimah ang tho in Jordan-a pawh hi phuar beh a ni ve tho, ti hian a duh duh ti thei turin zalen rawh se,mahse, hei erawh ka chiang, tu mipa mah hi ka hnaih leh tawh lo ang,keimah hian ka tlei em em tawp mai tur a ni.
Party na tur kan thlen ve chuan an lo an lo awm teuh tawh,Zobiaka leh Sangtei ka hmuh chuan nupa niawm tak pawh niin ka hria, an inhmeh viau mai. a dul a puar lian ve tawh viau bawk. Fa an nei thuai tawh dawn a, keini ve hi chu ngaihtuah loh law law a tha zawk ang.Kimtei leh Mark-a an rawn thleng ve chuan Jordan-a leh Mark-a an inkawm nghal chat, keini pahnih kan inkawm ve bawk. Poppy ka hmu mai lo erawh mak ka ti viau,a lo kal ve ngei ka ring si, chhunah khan min sawm ngei tak kha..
“Abby...i lo kal pawh ka lo beisei ngam lo a” tih pahin Zobiaka a rawn thu ve ringawt, ka be tui hlawl lo,ka mitsir a Jordan-a hmel rum tak ka hmuh chuan ka ngaihtuahna a vir zawk. Zobiak lam nuisanga hawi pahin,
“Lo kal loh chi nang, nang berin Party i siam te chuan..” ka ti zang vah, Zobiaka mak ti meng phar awk chu ka hmuh chuan ka nuih za mah se ka nui duh lo. Kan inhmuh hnuhnun ber kha chuan biak pawh ka be mumal lo mai ni loin ka hua tih ka ti lang chiang bawk nen, ka be tha ta thut hi mak tih loh ngaihna a awm lo.
"Engkim hi nangmah vang a thleng ania,ka lawm” a tih chuan keimah vanga thleng anihna ka hre hauh lo, nei tur kha chuan ti ve chiam mah ila chu bak engmah ka ti lo.
“Abby hian eng maw a lo tih a?” Jordan-a aw hian a rawn ti thut, ka thutna chair banah rawn thuin inti ta tu tak hian ka darah min rawn kuah zui zat bawk, thin thlak nawk ka chak hle nangin ka ti ta em lo, midang hmuh laia nupa kan nih tur thu kha keimah ngeiin ka sawi tlat.
“I nupui hian Hmeichhe dang duh zawk ka nei tih hre chungin Naute vangin nei turin min ti lui chiam alawm, a tir chuan ka lawm lo,mahse, tunah chuan engkim hi a lo tha ta vek..i hrethiam ang chu” a ti zawt zawt, a tawngkam tin mai chu nidang ang chu nise ka hua ang tih ka chiang, tunah pawh ka haw tho,mahse, Jordan-a tihnat let theihna tur ka duh rih ber. Mahse, kei hian engtin nge ka tihnat theih ang?, min duhna pakhatmah a nei pawh a ni lo va,a induhtawkna tal ka tichhiat sak thei hlauh anih chuan a tha...a nupui in amah aia mipa dang a ngaihven hi a duh dawn lo...
“Chu hmeichhe khawngaihthlak chu..” a hmui tisawi zauh pah hian a ti hluk, thil tenawm tak chanchin sawi a ang phian bawk.
“Nia, chu hmeichhe khawngaihthlak chu ka la duh ta reng mai” a ti lehzel chu a ti ta mah mah, ka darah na zetin Jordan-an a rawn hmer nghek, ka tum ang ngeiin a induhtawkna a chhe chiang tih ka hriat chuan ka then sak...midang tihnat hi eng nge anih chiah a la hre ve dawn alawm.
“Hey, duhtawk teh, kha hmeichhe khawngaihthlak kha i sawi zawng zawng hi ka lo hrilh dawn nia” ka ti lui leh salh.
Vanneihthlak takin Kimtei'n Wash Room a kalpui turin min sawm ta hlauh, kan pathum khan midang hriatpui si loh in kan Boruak a tang takzet,
“Jordan-a kha ngatinge a?” a hmui hnawih that mawlh mawlh pah hian a ti a, ka sam kilhna ka siam that hnuah lipstick ka inhnawih tha a,make-up uar tak ni lo mah ila zanin chu tlemin nidang aiin ka hmang uar hret..
“Eng chu?” ka ti liam puat.
“Oooo, a Mood a tha lo anih kha, kan lo thlen tirh atang khan a melh ru deuh reng che tih i hre lo mi? i ngaihsak lo ka ti” a ti nang nang, min en lo in Darthlalang a a thla lo lang a en ran mai.
“Aaaa, i ngaihdan mai mai anih chu,min en chhan te chu a nupui ka nih vangin hmuhnawm min ti aniang” tiin fiamthu a lak luih ka tum tlat..
“Aih, chutiang a ni lo, dik lo a awm alawm, bakah Zobiaka kha khawih mai a chak hmel tawp” ati leh talh,min rawn en tih hre mah ila ka en duh lo lui tlat thung, ka hmelah hian ka ngaihtuah na alang chhuak mai thin a, ani hian min hrechiang nasa si, Dawt ka sawi tih a hre mai ang,engmah hriat ka duh lo.
“An pahnih hian an inmil vak lo,unau inmil lo satliah ang hi...abak chu min zawt tawh lo teh” ka ti ta nge nge..
“Chuti maw? Unau han inngeih loh tlat chu avan mak, Zobiaka lah i thian ania” ati leh talh.
“Unau buaina mai bakah Pasal te chuan nupui ten Mipa thian an neihin an lawm vak lo aniang, chuvangin nang pawh Mark-a lawm loh deuh tur Mipa thian nei miah suh”ka ti zat zat, za vak lo hian a then ve sak maia, min zawh zel a la duh tih ka hria, mahse, sawi zawm ka tum tawh eih lo..
Hall kan let leh chuan Jordan-a ka hmu mai lo va, Mark-a erawh mipa dang ho nen thuin an vaiin no an dawm vek. Zu hi ka haw hran pawh a ni lo, mahse, in en ah ka en lo hrim hrim thung. Mark-a te bul a thutna awl awmah chuan kan thu ve a, Mipa pakhat hian Polite chhuahin Beer min rawn lak sak vat chuan ka lo hnar nghal thuai, mahse, Kimtei’n a ban ve tlat,kan tleirawl lai atangin a in ngai awm ka hre miah si lo,min rawn nghawk zauh chung hian,
“In ve chhin rawh, a tui reuh lutuk” a ti sa sa, mak ti deuh hian ka en he haw a, ka rilru thlakin ka ban ve ta nge nge..
Mark-a te ho nen kan ti ti tui ta phian.Music ri ring lutuk chu ka ngaithei lo,ka kawchhung a fan ni berin ka hria. Kan thut rei tawh nen Jordan-a ka la hmu ta lo fo, Poppy lah ka beisei angin ka hmu ta hek lo, ,khawi maw laiah an pahnihin an awmdun a ni mek angem tih ka ngaihtuah zauha,ka lu ka thing nawk ringawt. Beer Can khat ka in zo ve ta thak maia, tui lo ka tih pawh ka hre lo va, tui pawh ka ti chuang lo. Ka in ngai loh vang nge ni ka lu a ti hai in ka hre tlat bawk..
Sana ka en chuan Dar 11 a lo pel tawha,khawiah nge Jordan-a a awm ang ka hrethiam lo,Jordan-a Cousin te nen kan inhmu hlawma, an fel viau vek. A tlangpuia a lak in an lian hlawm a, an ngo bawk nen an lang zahawm khup mai, an hmeichhia te ho hi hmeltha hluak a sawi tur ni si lo in an hmel a changkang viau hlawm.
“Abby...khawnge Mama?” Zoi'n rawn thut pahin a rawn ti a,“A awm kha”ka ti liam mai...
“Biak duhna ka nei asin le, mahse, haw kan duh tawh bawk sia, pawi lo, ka lo call mai ang,ka be duh tih lo hrilh tho la” ati leh chuan ka bu nghat, kei pawn haw ka duh tawh,a tlai tawh...
Ka hmuh loh rei tawh avangin call tawh a, a pick thei tlat lo,Kimtein haw a duh thu a sawi chuan Mark-a pawn a pawi ti lo tih a hmelah a lang reng, an pahnih hian an serious ta viau a ni ngei ang, Mark-a a rawn thlawk chho ngun em mai..
Inchung panna Step a chhoh ka tum lai takin Jordan-a leh Poppy an rawn inzui thla ka hmuh chuan ka ding khawng nghal lah mai, an awmdun lai hmuh ka duh loh vangin a hma pawh khan han chho lo ka ni reng bawk. An mudun tih hi a thu in hre mahila ka mit ngei a ka hmuh chuan ka tuar zawh ka ring lo..
“Jordan-a hi i rawn zawng dawn mi?” Poppy-in a lo ti nghal awt awt maia, ngeiawm zet hian a nui sawng zui. Nidang ang bawkin a lang nalh lehpek viau, mahse, a sam pawr deuh phang mai chuan eng nge an tih a ti chiang in ka hria, tenawm lutuk, reilote pawh an nghak thei lo chu ania..ka luak an ti chhuak hlui thei.
"Zawng tho mai, ka haw duh tawh a” tha takin ka ti dam thlap thei..Jordan-an sana a en zauha, a hmel thutak run vang chuan a mood a fuh lo tluang zel anih ka ring.Zanin hian hneh ka ni a, ka tlawm vawng vawng tih ka hre chiang hle.
“Ok, kan haw dawn nia” Jordana'n a tih lai a Poppy hmel dur deuh khap chu ka hmu kar.
“A la hma e...lam pawh kan la lam mumal lo” pangchang aw zet hian a ti vei nghar nghara,ka va han beng chak ber..
“Nia,hnu chu a la hma tho mai, Mark-a te rualin ka haw thei tho ania” ka ti thuai,chhan pawh min chhan hma in ka kalsan hmiah.
Ka rin ang ngeiin ani lahin min umzui lo hrim hrim bawk.
Mark-an Kimtei nen min thlaha,ani pawh let leh a la tum tho anih hmel. Min bia anih loh chuan ka ngawi ran maia,sawi tur ka hriat loh bakah ka mitthlaah Poppy sam pawr deuh niaih kha a lang reng maia,pangchang leh intineitu takin a banah a vuan zui vei nen..Jordan-a lah khan pawi ti hmel a pu der si lo.
Ka inphih fai sawk sawk hnuah ka mu nghal hmak. Jordan-a hi huat ka duh tehlul nen ka haw tak tak thei der lo. Ka hriatreng naah hian a duh zawng ni miah lo nei tur a ruat lawk a nihna te, an chhungkaw milpui ni lo, atan a zahna tamtak thlentu hmeichhia neih angaih vanga min nei anihna te hi a bo thei lo. …Kan inneih hma khan a chhan hi lo hria ila chuan kan innei lo chiang viau ang, a nu leh pa lah hian hei vang hian a ni ngei ang engmi pawh ni ila min lo pawm hmak theih ni??
Jordan-a lo haw lai pawh ka hre ta lo, ka harh leh chuan Sofa ah a thawmhnaw hak lai nen a lo muhil a, a pheikhawk takngial pawh a phelh lo, a rui viau pawh a ni mahna. A mutna bulah Vodka bur a lo la inchhawp lehzel a, a chanve aia hnuai hret la awmin a lo haw hnuah a inbelh leh a ni ngei ang. A mutna bula ding chungin ka en deuh vang vang a, a hmel leh pian hi chu sawiselna tur a vang teh e...mahse, ani hi ka ta a ni si lo, engtikahmah a ni ngai dawn lo tih ka ngaihtuah zawng pawn ka na nawn leh vawng vawng a ni ber.
Kan inneih atanga karhnih chhung kha vanram ni ta se tuna kan awmdan hi chu hremhmun a ni ngei ang, a mawiah tak meuh kan inbia a ni ta ber, midang awm lai chauhin nupa kan ni a, Roomah emaw kan pahniha kan awm chuan mihrang kan ni leh mai. Mut pawh kan mu dun ta lo. Jordan-a a lo haw lo ta zeuh zeuh a, Zobiaka te inneih niah pawn ka nu te rualin ka kala, Jordan-a tlai lamah a lo kal ve bawk. An chhungte ho hi an fel viau vek maia, Zobiaka nu erawh chuan a hma ang tho khan, rem leh rem loin min lawm lohna mitmeng leh min ngaisang lo tih a lo ti lang leh talh tho. Keini kha Honeymoon hmang turin kan kal loh laiin Zobiaka te erawh an kal thung, ka duh loh vanga kal lo kan ni bawka sawisel tur ka ni lo...
Ka nu leh Ka pa Estheri tlawh turin an kal atangin ni hnih a liam tawha, ka pa in check-up pah tur a kal annih bawk avangin thla khat vel lai an awm an rin thu ka nuin a rawn sawi a, kan nupa leh Sanu-i chauh kan awm si, in chhung a reh thuap reng maia, a chang chuan ka hlau lek lek zel,ka nu te zin chhuah ni atangin kan Room dawt chiah-ah Jordan-a a riak chhuak nghal hmak, ka sawisel eih lo. Nitin Dawrah ka kal ve a, ka kal chhuah hmain room ka tifel vek zela, Jordan-a awmna Room lam ka lut ngai lo thung..
Sanu-i mut hnuah Living Roomah keimahin ka awm a, Jordan-a a lo la haw lo thung, Pi hmuni leh kan nula pakhat an haw tawh bawk nen a reh thuap mai. Enge lang mek ngaihtuah miah lo hian Tv ka en renga, naktuk hi Jordana footbal club rising day niin Players awm ang ang Leh Coach leh a naute,midang sawmbik tlem nen Hotelah zanriah kan ei ho dawn a,season tawp lai anih avangin Players thenkhat an khaw lamah an haw lai a ni a,a kimtaka hun hman duh mah se an kim thei lo ang,chhungkaw lam atang pawhin ka nu leh ka pa pawh an awm hek lo..
Kan inneih atangin thla hnih a liam ve leh tawha, Zobiaka te Party na a kan kal hnu atang khan vawikhatmah Jordan-a hian min khawih leh awm ka hre lo, ,min khawih tumna nei hmel pawh a ngai pu lo hrim hrim,kan nupa kar a buai a ni tih hi kan chenpuite hian an hria em ka hre lo,kan inhau ngai lo va, kan nupa hian kan inhmu zeuh zeuh ti ila a dik ber ang, kei pawn kan awmdan hi ngaiah ka nei tan ta hial. Kimtei nen kan inbe zauh zauh a, nitin Dawrah ka kal ve takah chuan hunawl ka nei tlemin hil ngaihtuah vak vak na hun a awm lo bawk a, a ziawm viau mai..
Ka Phone nghawr dar darin ka ngaihtuahna a la peng a, Sawmtei a lo ni a, anni pawh hi an zin an lo haw har ta viau.Rindika dam lohna avangin Phai lam an pan a, chanchin ka zawt zauh zauh renga, mahse, tun hnai ni hnih vel chu ka be tawh lo..
“Thiannu, naktukah kan lo haw dawn, hmanni a thil min chah kha ka hre leh tawh lo” a rawn tih chuan enge ka chah ka ngaihtuah a, engthil nge ka chah pawh ka hrechhuak zo mai pek lo..
“Angai leh lo mai, ka mamawh leh lo si” ka ti ve ngawt, anihna takah chuan eng nge anih ka hre lo hrim hrim zawk..
“I inthlahrung tihna mi?,a ho lutuk,sawi teh..lei harsa tak pawh a ni lo thei ania, kan bazar mek” a rawn ti zung zung, nthlahrung tur pawn eng nge ka chah ka hrechhuak zo lo hrim hrim chu a ni si.
“Ngai lo,nangmahni kha tha deuhin lo haw zawk ru, in pa a tha em?” ka ti leh hnuhnawha, a that thu a rawn sawi ve vat, an pa dam that vak loh lai pawh khan rilru hahna nei hmel hian a awm ngai lo reng reng maia, engtiklai pawn a hlim reng a ni ber.
“Abby....”sawi duh nei niawm tak hian a ti deuh hluai, mahse, a ngawi zui leh daih lawi.
“Enge? ..” ka tih lai mekin Jordan-a Motor thawm niawm tak ka hria...
“Khawiah nge Jordan-a?” a rawn ti ve chiah.
“A lo haw chiah in ka hria, ti ila a rawn tlan lut chiah, i be duh em ni?” tih pahin ka tho chhuak a, amah anih leh nih loh en tumin parda chhah tak in zar chu ka pawt kau a..
“Aih, be duh lo....ka zawt mai mai che, ka dah dawn, anih phawt” a ti zung zunga, chhan pawh ka chhan hma in a dah zui nghal daih bawk,eng chu a hria nimaw??
Kawngkhara a rawn luh rualin Zu a in tih ka hrethei nghal pang,mahse, sawisel tumna ka nei lo, tun hnaiah a in nasa tih ka hre ru reng chungin vawikhatmah ka sawisel ngai lo,ka pum a rawn ri raih raih mai..
“I va mengrei ve” a ti bul hmukzChahbi khaina ah a Motor chahbi a khai a, Driver hi pali lai awm mah se a zin dawn anih loh chuan Driver khalh tir lo in amah in a khalh kual mai zel.
“Nia, i inbual hmasa dawn em?”pangngai tak hian ka ti ve a, hna atanga a lo haw veleh a inbual ziah ti ila ka sawi sual lo ang, December thla chanve kan hmang tawh bawka a vawt viau tawh,kan in ngat phei chu Tlangchhip a awm anih bakah thing a awm nual bawk nen a vawt tha var var tawh viau..
“Tihtur a awm tihna mi” a ti nghut, “Aih, awm lo e, chaw i la ei lo ang chu ka ti, engmah i sawi lawk si lo a” ka tih chuan, “Ka ei tawh” a lo ti hmuk, inchung panna Stepah a chho zui nghal daih bawk,engvangin nge chawei tur a ka lo nghah kher kher mi?, ka pum a ruak a, ka ril a tam tehlul nen..
Engmah ka ei lo ta law law, tam eng ang mah se ka nghak a ni tih a hriat ka duh lo,tlai khawhnuah ka tlawmngai tha leh a ni ber,zankhat lek chaw ei loh vangin ka thi hauh lo ang tih ka chiang..
Room kawngkhar ka kalh a, AC ka on avangin a vawt lutuk lo,hetiang hian eng chen nge kan la awm ang tiin ka ngaihtuah vang vang, ka khua a har ve lek lek maia. Jordana nen bang dan mai ah awm mah ila mel tamtak ang maiin kan inhlat thung.Christmas a hnai tawh viau mah se ka rilruah engmah thil thar neih lam a lang lo, Ka nu leh Ka pa lah an lo haw dawn bawk si lo nen Christmas lo thleng tur nghahhlelhna pawh ka nei lo.
Instagram a ka luh kual mai mai chuan ka tum loh zet thil ka hmuh avangin ka thu chhuak hlawl mai. Poppy-in nichin deuh lawk a a dah a ni a, an thawmhnaw vel atang chuan nizan a mi a ni tih ka hrethei mai bawk.Jordan-a nen a an lak dun niin nui sang hian Jordan-a a melh chho ha mai, duat hmel tak hian Jordan-an a en ve kher lehnghal..a caption tehhrep pawh chuan min ti khur dar dar mai.
Lu hai deuh burin ka harh a, Dawr kal loh mai ka duh rum rum,ka mu tha lo bawk nen ka nuam chiah lo,ka kal loh pawn ngaihtuahawm a ni dawn lo tih ka hria, kum 10 chuang an chhawr tawh pakhat awmin nidangah pawh a kutah engkim an kalsan mai thin.
Inhnuai lam ka pan thla chhat chhat a, khua a vawt bawk nen ka inkuangkuah than mai.Jordan-an a mah in thil a lo ei meka, min rawn en zawk bak chu thil ei lai a ei zawm lehnghal mai..
“Good morning” Sanu-i ka hmuh rualin ka ti sep, Sanu-i rawn kal hnai kher lo se chuan ka ti hauh lo ang..
“Morning...i va nawm loh hmel ve” ngaipawimawh tak tak lo tih hriat zet hian a ti liam puat..
“Ka tha, ka hritlang dawn animaithei...”ka ti tha ve maia,Eitur ka duh leh duh loh Pi Hmuni’n min zawh chuan ka ei chak miah lo, mahse, nizanah pawh ka ei tawh si lo va, engngemaw tal ka ei angai..
“Bawnghnute min lo pe mai ta che,khawngaihin..” ka ti a, nidangah Bawnghnute ka ngainat loh em avangin ka in ngai meuh lo..min rawn pe vat a, tlem ka in hnuah ka dah leh mai, tui tihna ka nei lo..
Jordan-an ka chal a rawn tawk a, a kut a la sawn leh nghal a,
“I khua a sik deuh anih hi,damdawiin a kal i duh em?” ati zuia, ka hnungah a ding run bawk..
“Aih, damdawi ka ei anga, a reh leh mai dawn alawm" ka tih chuan a bu nghut.
“Zanin kha dar 8 tur ania, ka rawn lam ang che, dawr kal lo mai rawh” khauh fur hian a ti a, kal tur pawn min ti se ka kal lo chiang khawp ang..
Ka mu nileng ta thak, diktak chuan hotel a kal pawh ka duh lo, Poppy a kal ngei ngei dawna, an pahnih a an induat vel ka hmu peih hlawl lo.An zak der bawk si lo. Dar 6 rik hma deuhin ka tho harha, ka inbual hnuah ka thawmhnaw ka en kual a, a nalh ai chuan min ti lang zahawm thei ka duh, khua a vawt bawk nen lum deuh hlek ka duh bawk,ka pheikhawk bawm ka en vang vang hnuah Boot Dum,khup thleng lo hret ka lachhuaka,tlemin min ti lang lian ve deuh ang chu.Over Coat cream rawng duk lam leh Cotton kekawr pawl tak zet nen...kawr erawh a ban kiau thleng, a nghawng zau lam hret,a dum ka ha thung.
Darthlalang a ka thla lo lang chu ka en vang vang mai, ka lang cher ta deuh hlek, ka sam ka chhipah ka zial khawm tawp a, ka mit tlem ka chei ve chuan min ti lang danglam deuh ka tih rualin ka landan ka duhthusam a a that tum a ni in ka hre hial..
Jordan-a Dar 7 velah a rawn let a, ka lo insiam zo vel chiah,a Room lama lut lo in kan nupa Roomah a rawn lut a, a mu hrangin room hranah awm ruh mah se a thawmhnaw leh thil dang erawh kan nupa Roomah a la awm vek thung. Dressing table hma a ka thu chu min rawn en a...mak ti hmel a pu zawk nangin a reh lehnghal mai.
A inbual hnuah chhun lama a thawmhnaw hak lai ha loin thawmhnaw dang a ha a, ka that leh that loh min zawt lo.Ka nuam lo tih a hre leh tawh lo a ni ngei ang..
Sanu-i hnenah kan kal na tur hrilh pahin min mutsan mai turin ka ti a. Kimtei tal ka lo sawm lo a ka inchhir rum rum,tunah chuan sawm chi a ni tawh si lo, Sawmtei te lah vawiinah an lo thleng chauh a, a kal peih ka ring bawk si lo..
An lo awm nak nak tawh hlawma, min chibai liam liam bawk. Ka beisei loh lutukin Sawmtei leh Rindika an lo awm ve chu niin, ka hmuh rualin ka thawl deuh hawk mai. Poppy pawh a ta ber niawm tak hian a tawng leh siam siam tawha,Sawmtei nen kan thu dun a,ka veilam ah Jordan-a a thu bawk..
“Abby hi in hre vek tawh tiraw?” Rindika’n ring leng lawngin a rawn ti thut a, an reh nghal diakazmin rawn en nghal thap bawk.
“Abby, khawngaihin lo ding chhuak lawk ta che” atih leh chuan a ngaihna hrelo tak hian ka hawi kual a, an vaiin ka chungah an mit a fu vek,Jordan-a ka en chuan min lo buk khum nghut ringawt...
Muangchang hian ka ding chhuak taih taih, ka Coat a hma in ka lo phelh tawh a, a vawt ka tih vang ni lo in ka khur dar dar mai.
“Abby, i Pasal hian i tan thil a buatsaih sak che a,chu chu zanin a kan hun hman naah hian hriattir che kan duh. Kan ngaihhlut em em he footbal club hi i Pasal ta a ni ringawt tawh dawn lo va,zanin hian kan club neitu thar i ni tih midang ho hriatah leh nangmah ka hrilh ve nghal che anih hi,neitu nihna hi i pasal hming ni lo in nangma hming a ni tawh e, Club-in engpawh ti dawn ila i hriatpuina a ngai zel tawh ang,chuan,he thu hi midang tumah kan la hrilh lo va, I pasal hian surprise che a duh avangin zanin hian kan vai a awm laiin ka hrilh che anih hi, a theih loh tih a thiang lo...” hlim taka nui chung hian a ti a. Poppy hmai dang lap mai chu ka en a, midang ka enkual leh a, nuisang chungin min lo en vek,Jordan-a ka en chuan a hmelpa takah chuan nui hmel langin a nui hmel hmuh ka duh fo thin ang chiah kha a ni bawk.
Glass no tung nalh tak lakang pahin a rawn ding chhuak ve a...
“Ka nupui i nih angin ka thil neih zawng zawng hi i ta a ni ve veka, a hmasa ber atan he club hi i hming in ka dah a, i pawm ngei ka beisei ania...” zawi fiah tak si hian a ti a, ka thaw hak,sawi ve tur reng reng ka hre lo.
Chapter -24
“Jordan...” ka ti lawi rat ringawt.
A lawmnan no an chawi kang zui sap sap. Jordan-a hnen atang in duatna ka dawng zawm mawlh mawlh a ni ber.Poppy hmel tak ran mai, harsa ti taka a nui lui hram hram chu ka melh ru zauh renga, engmah a hre lawk bik reng reng lo tih a awmdanah a hriat vek,kei ang bawkin a thawng ve tih a lang reng mai.
Ka ngaihtuah nasat viau pawn engvanga ti nge anih ka la hrethiam phak lo,nupa ang pawn kan khawsa loh zia te, a mawiah min be hram hram chauh zel anihna te nen amak ngawih ngawih. A thil neih zingah pawh a ngaihhlut em em a Football club,a rilru zawng zawng a pekna ni hiala ka lo hriat kha ka hminga dah a ni ta daih si, lemchan nan chuan thil ni thei a ni lo.
Kan pahnihnih chauha room a kan awm hnuah,thawmhnaw thlak pahin a tih chhan ka zawt ta hlawl.
“Eng chu maw ka tih?” ngai thutak lo deuh mai hian a ti ringawt,thutthleng nghenchhan nghengin chung lam a melh vung vung bawk.
“Ka hmingin i dah kha....kan inthen hnuah engtin nge i tih dawn? " ka ti hul hak.
“Engatinge maw inthen hi i sawi fo mai le? sawi tawh suh, ka ning ania” thinrim taka a tih takah chuan nuam ka ti chiah bik lo..
"Ka hrethiam thei lo anih hi,min hrilhfiah i tum bawk si lo va, engmah hi thil tak tak angin kal tir lo zawk la,a tawpna a chhe mai mai ang”ka tih leh chuan min rawn en a, thu mar pahin a hmai a tuai pawk bawk..
“Engkim hi ka ti tak tak vek, ka tan chuan Nupui i ni a, abak a awm lo. Fa neih pawh ka duh,hemi kawngah pawh hian min lo dan tum suh ang che” ati leh nghut nghut, a thilsawiah chuan engmah in rawn derna a awm lo, avaiin thupek vek..Nupui bula thilsawi ni loin a hnathawk zing ami thu a pe a ang zawk.
“Aih, Jordan..hetiang ringawt chuan thil i ti thei lo ang..” mangang ru zet hian ka ti ringawt, ka manganna tihlan ka hlau hle nangin ka aw khur dar dar chuan ka hlau a ni tih a ti lang tho.
"Tinge ka theih loh anga? Thilsual titur pawh kan ni lo va, nge min dan i tum zawk dawn?...” a ti nghut nghut. Thawhchhuah pah hian a nui suk maia,min rawn pan hnaih takah chuan ka tawlh hnung hrat a, a hmel a pawisak nei lo hmel lo lang chu a Hotel a min khawih tuma a hmel awmdan nen danglamna a awm eih lo..
“Ni lo, i inchhir ang,hetiang chu a tha ngai lo..” ka tih chuan ngaipawimawh lo tak hian a thle zauh ringawt, min rawn pan hnai leh zual chiah chu Khumah ka tlan lawn thuai a, rang taka a sir lehlama zuan thlak nghal ka tum laiin min rawn nangching hman ta tho, hneh zet hian ka kawngah a rawn manin min pawt let nawk.
“Ka ti na dawn hleinem che, ngatinge i tlanchhiat ngawt a? awm hle hle rawh”thinrim tak hian a ti khur khur maia, a mit meng thim khup maiah chuan engpawh a ti duh dawna ka hriat tak ah chuan thuawih mai a finthlak ber tih ka manthiam thuai mai.
Blanket min rawn sintir chuan min dah ang ang in ka awm tawp mai,a thawmhnaw a hlih hnuah Light a Off a, ka bulah rawn mut a tum tih a chiang, ka ngai em avangin zantin amah ngaihtuah chungin ka muhil ziah a ni ber. Mahse, tunah hi abula mut chakna pakhatmah ka nei lo, phurna ai chuan hlauhna in min fan hneh zawk..
A rawn mut chuan Boxer bak engmah a ha lo tih ka hre nghal a, a mal sei leh khauh tung chuan min rawn khan pahin ka kawngah a rawn kuah zui nghal zat bawk...engmah kan sawi lo,ka kawr hak a rawn zen chuan ka mur nghal ar ar mai, mahse nuam ka tih lam ai chuan ka hlau niin ka hre zawk mah, a hmasaberna bawk kha ka mitthla a a rawn lan rualin ka khur ta hial.
“A vawt iti em ni” tih sup pahin a hmui lum thar thar chuan ka beng a fawp pah zauh.
“Aih” ka ti tawi tak.
“Anih chuan muhil tawh rawh” tih leh ka kawr chhung atanga a kut lakchhuah a ruala, ka tai zawna kut dahin a che zui ta lo...a chet zui tak lohah chuan ka thawl hawk dawn emaw ka tih laiin ka thawl hawk chuang miah lo,ka ngai thin,a tello chuan muthilh har ka ti thin,zaninah ka bulah a mu ta ngeia ,mahse, ka muhil leh thei chuang der si lo..
Mangang taka au thawmin min tih harh rualin ka thuchhuak nghal hlawl mai, mak takin a reh leh ta hmiah lawia, mu leh mai lo in ka ngaithla a, reivakloah a rawn ri leh hrawk a, Jordan-a ka ti sap....hetiang chiah hian a hma pawh khan a awm tawh. Ka mutna bul a Lamp awm ka hmet eng vat a, a thaw ri ka hriat na lam en tumin a sir lamah ka bawk pheia, khum bul chhuatah chuan mangan hmel em em hian a lo mu a, chunglam melhin a lo meng a phuang mai.
Ka hamhaih lutuk vangin ka thu khawng at maia.mahse, rei ka chiai lo, ka zuk kuah bet nghal thuaia, harsa ti em em hian a thaw kawk kawk maia, a awmdan chuan minti mangang em em lutuk.
“Jordan...i tha em?” ka tih chuan min chhang lo, ka kuah bet tlata,ani pawn nghet takin min kuah let ve bawk. Thlasik lai niin a vawh tehlul nen a thlanin a bual huh hlap tho.
Darkar engzat nge kan thut ka hre lo, a taksa lianpui, khur hlawk hlawk pawh a ziaawm ta,khum nghengin ka thu a, ka mal khamin a mu ve bawka, a thawk danah chuan muhil a ang tawh zawk mah,kaithawh mai ka tum ut ut hmana, mahse, ka kaitho leh ta lo, a muhil thei anih chuan a tha zawka ka rin vang a ni a, hetianga a awm hmasak zawk khan sawipui ka tum viau nangin amah khan sawi a duh lo niin ka hria a, engmah ka sawi ta lo kha ania.
🫨🩷🩵🩶
Khumah ka dah chho zo dawnlo tih ka inhriat avangin lukham leh puan sin tur ka pawtthlaa, ka mal chung atangin tihharh hlau lutukin chhuata ka lukham dah ka kham tir a, chhuatah hian Woolen carpet a inphah hlauh avangin a vawt lutuk tur a ziawm viau.A dar kham chungin a kawngah ka kuaha,muhil lo se chuan ka ti ngam kher lo ang...
Ka harh leh chuan Khumah ka lo mu leh daih tawh chu niin, Jordan-a lah a awm tawh hek lo,ka mut ngaia muin nizana thil thleng kha ka rilruah a rawn lang leh uar uar, Jordan-a awmdan kha tihpalh thil a thleng niin ka hre thei lo..Kawngkhar a rawn inhawng chiah tihin ka muhil der nghal hmak,reivakloah Khum a hniam sat a. Enge a an hriat ka duh avangin hreh ru tak hian ka meng a,a lan danah dik lohna nei hmel a pu lo.
“Good Morning..” mood fuh hmel tak hian a la ti zui. Keipawn,
“Morning..i tha em?” ka ti ve bawk. “Tha e....nizanah ka tibuai leh che animaw..”nui chungin ti mah se a nuih a zat hmel chuang lo viau.
“Aih, tibuai lo e..”tih pahin ka puansin ka tlawh hlim a,
“Vawiin chu khua a dur riau mai, ruah a tla seng seng lehghal”ati thawh pah hian a ti a, thil eng ngemaw ngaihtuah niawm tak hian a kekawr ipte zen chungin a vei kual a.
Inphihfai tumin Bathroomah ka luhsan a, a hmelah khan engmah dik lo a awm miah lo kha mak ka ti, nizan kha ka mumang a ni hauh si lo, eng ngemaw natna ruk, sawi chhuah duh loh a vei anih rinna ka nei ta thut.
Room a ka let leh chuan a lo awm tawh lo,Darthlalang a ka hmai dang lap mai lo lang chu ka en vang vang, tunhnai ka mu tha lo bawk nen ka mit hnuai a val kual raih mai.Ka sam bu chhah zet mai ka chhipah ka tawn khawm tawp a, kawrlum phiar zangkhai tak leh Pyjama ka hak hnuah muangchangin inhnuai lam ka pan a, a reh thap mai. Choka lamah tu emaw a ri rak rak a, ka pan hnaih chuan ka rPi hmuni’n eitur an lo siam mek a,Jordan-an amaha Dawhkan a lo kilin Nula pakhat zawkin eitur an lo chhawp chhuahsak mek bawk.
“Ka lo nghak che ania,ei ve nghal mai rawh” a lo ti a, dar 11 a hnai thuak tawh si, kal a tum lo nge ni? Zanah khan amah ka buaipui ata langin ka mu tha lo deuh nen khawvar dawnah ka muhil chauh maia, chuti ni lo se hetiang chen chen ka mu ngai bik lo.
“a pawi hleinem”tih leh thut dawhkan kil ka rual ve nghal zat.
“Dawrah kal lo mai ta che, khua a nuam lo em mai” min en lo in a tih leh chuan ka lo ngaihtuah lai mek a ni ve tho.Nimin ka kal tawh si lo nen vawiin chu tlai deuh tawh maj se kal hram ka duh. Haw pahin Putea thlan tlawh ka duh bawk.
“Aaaa,niminah ka chawl tawh bawk si,ka kal hram ang chu, kal kual na tur ka nei a” tih plate ka nawrsawn a, ani pawn a hmui a hrufai ve mek.
“i thu thu le, Tluanga i hruai mai dawn nia,Pi Hmun, Driver thar kha a lo thleng tawh em?” ati zui zat , ka kalna tur min zawt lem lo.
“Angai lo, Dawrah ka kal phawt anga, ka hman tak leh ka kal chhuak chauh ang ka ti leh vat. Pi Hmuni’n Driver thar lo kal tawh thu a sawi ve a, pali lai an nei sa tho si, engatan nge maw a la tih cheu ka hrethiam lo,Inchhung thil hi ka hre tlem em em mai maia, engmah min hrilh ngai lo bawk nen zawh enah pawh ka en bik lo.
Pawnah ka chhuah chuan Thli thaw lo mah se chhum a lo zing chuk maia, ,ruah sin te te in a tla seng seng bawk nen thlasik lai ni loin fur lai a ang mah zawk. Chhuah a peihawm lo nghal ngawih ngawih. Putea thlanah pawh ka kal peih ka ring leh ta chiah lo va,engpawh nise nileng a In a awm ka peih chuang lo..
“Ka kal dawn ania” ka bul mai atangin a rawn ti a, Driver la naupan hmel tak hian Motorah a lo nghak ran tawh bawk.
“Keipawh ka kal har lo ang,i lo haw har angem?” ka ti nghal zat,engvanga zawt kher nge ka nih ka hre lo.
“Lo haw hma tura min duh chuan...?” nui chung hian a ti a, a awm danah chuan min chhaih vel tih ka hria, ka rin loh deuh hian ka samah a rawn fawp zauh.
“Ka lo haw hma ang, in ha lum ang che “ ati zui a. Motor lam pan a a kal chu ka en reng, jogger Pant dum,Running Shoe leh Jumper a ha a, changin smart viau thin mah se hetiang a inchei chang pawh a nei ve tho. Sawrkar hna emaw invawng taka inchei ngai hna thawk a ni lo bawk a, smart khep khawp hi chuan a inchei tam lo zawk. Engpawh inbel se a inhmeh em em vek zel,a hmeltha a ni lo, Mahse a vanneihna em em chu khawiah pawh langsar tur khawpa pian nalh a nei.
In ka chhuahsan meuh chuan dar 12 a pel tawh, Tluanga nen dawr lam kan pan ding nghal a, ruah a tla tawh lo mah se khua a hnawm chuap a, chhuahvah a ti nuam lo viau mai. Dawr kan thleng chu an lo buai phian avangin ka pui nghal lawp lawp a, engmah ti lo mah ila an phun nawi hauh lo ang, mahse, an buai laia lo thut bik reng nuam ka ti ngai lo..Ka Phone a nghawr dar dar ka en chuan ka beisei loh takin Elty a lo ni a, min hauhna tur a neih leh neih loh ka ngaihtuah nghal zung zung peka,thil ka tihsual vang ni lo in ani hi chuan ka thatna tur a duh avangin ka tih dik loh lai min hrilh fo thin atin ni.
“I va lo thleng har ve” ka pick veleh ring tak hian a rawn ti chiam, a au ring fahran lutuk a ka phone lasawnin ka melh nghek ringawt,khawiah nge kal tura min tih ka hre der si lo..
“Khawiah maw?” nui chung hian ka ti a, eng ang a nasa pawn min vin se ka hlauh phah ngai chuang lo.
“Ehe.....vawiin hi eng ni nge i hre lo amaw?” a tih leh phei chuan a hma aiin a au ring tawh zawk.
‘Sorry, tunlai chu ka buai deuh a engmah ka hre thei lo”ka ti ta nge nge, a dawr hawn ni khan ka telpui hman ta lo a, tunah chuan dawr lun leh kal manhla zet a ni tih ka hria a, ka lawmpui em em,mahse,mi dang te hlawhtlinna lawmpui thei miah lo an lo awm zel tho,chu pawh midang daih ni lo in min hmangaihtu te emaw kan tih te an lo ni chawk zel lehnghal.
“vawiin hi kan dawra kan class re-union kan neih hun tur kha ania,an lo thleng deuh vek tawh a”a rawn ti chat chat, LALPA leh..ka theihnghilh chiang lutuk,Group ah pawh khan an sawi reng sia, a va han hahthlak thin..
“Oiii...ka theihnghilh chiang lutuk,thiannu, Jordan-a pawh engmah ka lo la hrilh si lo” ka ti ta ruai.
“Ninawm, Pasal nei ho hi ka ning che u,lo thlawk phei rang rawh” nui awr awr chung hian a rawn ti a, min fiam dan fo a ni hrim hrim,Pasal nei min awh lem loh thu a sawi fo lehnghal.
Jordan-a biak ka ngai, a buai leh buai loh ka hre si lo, chumai bakah kawppui te hruai loh tur an ti lehnghal,Kimtei ka call chuan ani pawh a lo thleng daih tawh chu niin.
“I buai em?” Jordan-an a pick veleh ka ti nghal thuai,
“Aih, buai lo e,eng nge ni ta?” dam thlup hian a rawn ti a, tun ang hunah hian ka call khat viau..
“Ka lo theihnghilh daiha, vawiin hi kan College a kan class ho re-union neih an sawi ni ania, kal ve ka duh a, i ngaihdan ka hre lo a” ka ti nghal mawlh mawlh, kal a phal loh ka ring hran lo..
“Khawi hmunah?” ka rin ang ngeiin a rawn ti tha ve mai.
“Elty dawrah,sawtah Falklandah khan..”ka ti vat, kan la kal dun lo nangin ka sawi ngun em mai a, a hre turah ka ngai..
“Chutah chuan emni kal kawina tur ka nei i tih kha? " a rawn ti leha, anih loh thu ka, sawi vat. "Tluanga kha hruai rawh”bung nghut hian a rawn tih chuan kan inbiak tirh lama a aw dam thlup kha chu a ni leh tawh lo.
“Um,ka in thlah tir ang" ka ti hman chauha,
“Thlah ni lo in a hruai ang che, chuti anih loh chuan a theih loh”khauh zet hian a rawn ti bur mai, eng chu a hria nimaw? Tluanga tan kan zinga tel ve a nuam dawn lo lutuk, kei pawn nuam ka ti dawn hek lo,Motor a min lo nghah char char lah ninawm a ni mai dawna,thil tih chi a ni hlawl lo.
“Mahse...kan rei dawn leh dawn loh ka hre si lo a..” ka ti leh talh,
“Tluanga ka lo bia ang”tih zawng a sawi.
A tawpah chuan Jordan-a thu ka zawm leh ta nge nge,han hnial ve thin bawk mahila awmzia a awm ngai lo chu a ni ber e.In ah let tawh lo in dawr atangin ka kal tlang nghal a, an lo awm kim deuh thap tawh,ka beisei lutuk lem lohte pawh an awm nual mai,kan inchibai sap sap hlawma, a then chu Nupui fanau nei tawh niin a then chu kawppui nei tawh, mahse, Fa la nei lo kan ni bawk, kawppui nei lo nula leh tlangval pahnih khat an la awm bawk, a then Sawrkarah hna sang tak chelh an awm laiin a then erawh Private company a thawk te anni nawk, mahni ke a ding an awm bawk,an vai mai chuan ka Pasal neih chung chang an sawi kaia, kei ai hian Jordan-a te chhungkua an lo hrechiang mah mah zawk,kei hi ka hawi harh lo lutuk a an chanchin ka lo hre lo mai mai anih hmel.
Kan ri chel chul a, tawng an inchuh nuai nuai a ni ber. Kimtei nen kan thu dun a, Elty erawh Dawr neitu tih takah a thu hman meuh lo, a naute chevel enpuiin a tho deuh reng a, Dawr a vil hneh vet vet khawp mai. Hun a awm veleh Jordan-a kalpui ah ka la sawm chiang khawp ang.
“Enteh,Mark-a khan min hrilh a, in Club neitu nihna kha Jordan-an a pe che a tia,a dik em? ” midang hriat loh tur hian a rawn ti sa sa .
“Um,nizanah keipawh ka hre ve chiah alawm..mahse,ka ta ni pawn ka la hre tak tak lo”nui chung hian ka ti sep,ka kut a rawn vuan a.
“I hun kal tawh ka ngaihtuah hian ka lawmpui lo thei lo che,mahse, i hmel hi a hlim lo ka ti..a chhan min hrilh teh”ati leh sap, ani hi chuan min chik thin,ka thian tha ber a ni bawk a ka awmdanah hian a man zung zung zel.
“Engmah chutiang a awm lo, nizan ka mu tha vak lo a chuvang aniang” ka ti thuai, ka hlim lem lo tih sawi lan kher ka duh lo.
“Um,anih chu..Nia, Jordan-a te ang mipa tha neitu nih chuan hlim loh a har ngawt ang” tih pahin a hnar a ti vang harh a, ka nui hak mai.
Ka Phone a msg rawn lut ka en chuan ka beisei loh lutukin Zobiaka a lo ni a, kan inbe ngai tawh lo, an inneih hnuah hmuh pawh ka hmu leh lo..
“Biak che ka duh” tih ringawt ...engvanga min be duh nge anih a sawi lo bawk nen ka reply lo.
“Abby, i Phone kha a ri char char ania” Toilet atanga ka let leh veleh Kimte-in a lo ti thuai,a tlai tawh deuh bawk nen Jordan-a anih ka beisei ru deuha, mahse, Zobiaka bawk a lo ni..eng thil nge maw chuti taka pawimawh ta chu ni? , vawikhat mai pawh a ni lo, vawi nga lai a lo call tawh lehnghala,Call back loh ka tum thut thut nangin ni theiin ka hre lo..
“Ka va be lawk ang, a pawimawh hmel riau” Kimtei hnenah ka ti a
A pick dawn lo emaw ka tih hnuah a pick ta hram,a pawimawh hmel tehlul nen a pick leh lawk si lo.
“Eng nge nita?” ka ti mar pat, min chhang lawk si lo va, a hre thei lo emaw ka ti hman.
“Abby...” a rawn tih bak engmah a sawi lo, a thawri deuh hrawk chuan ngaihthat lohna in min neih tur a, eng nge a chungah thleng ni?
“I tha em?” ka ti ta ngawt.
“Tha chiah lo, khawngaihin lo kal teh” zawi fiah angreng tak hian a rawn ti a..
“Khawiah maw?, eng nge thleng a?” ka ti leh hmak, hmu tura kal ka duh nge duh lo ka hre lo, thil thlen dan a zir aniang chu..
“Falkland ah ka awm a, Elty dawr thlang deuhah khan..” a tih takah chuan mak ka ti viau, hetah ka awm tih a hriat ka ring lo.
“Eng nge thleng min han hrilh phawt la” ka ti leh nghat.
“Lo kal phawt rawh” tih bak sawi loin a Off zui daih, eng nge thleng ka hre si lo,ka rilru a buai nuaih mai.
“Kimte, Zobiaka khulai deuhah khuan a awm a ni awm a, eng nge thleng ka hre chiah lo, mahse, a aw a dik lo riau maia, kan zuk kal lawk mai dawn mi?” a bul a thut pahin ka ti nghala..a nur deuh nang a, hetianga a awm hi chuan min hnial ziah...
“Aaaa, in Driver kha a awm tho tiraw?,ka pum a nuam lo lutuk a” ka rinlawk ang chiah hian a ti a.
“Um, pawi lo mai” tih pahin ka Bag ka la a, midang pawh hrilh lem lo in ka chhuak ta zawk,Tluanga ka hmu mai lo, inchhungah a lo luh lai ka hre bawk si lo,Motor pawh ka hmu lo,a dinna a lo sawn takin tih thuah ka hawi kual chiama, Motor awm ho ka en dan dan hnuah pawh kan Motor awm reng reng ka hmu lo,Ka Phone ka phawrhim ka call a, a pick-up thei der lo lehnghal,ka dinna piahah Taxi an ding tlar thap a, helai hmun hi a lun tan tawh avang leh zan lama inhawng annih avangin hman maitheih turin Stand thar an siam chawp anih hmel e. A hnai ber a lo ding chu a hman theih leh theih loh ka zawh chuan phur zet hian a theih thu min lo hrilh thuai.
Elty dawr thlang a tih avangin helai atang hian a hla lo turah ka ngai ve tawp, a tawng danah khan thil tha lo tak thleng a ang viau bawk,ka call paha, a ring char char a, a pick-up lo, eng ngemaw a hriat tehreng ni? A lo accident reng aniang tih ka ngaihtuah chuan Jordana biak mai ka duh a, mahse a lo nih si loh chuan min rawn biak vangin a duh duh a hmehbel leh anga, chutak chu ka duh si lo, Tluanga pawh khawiah nge a kal hman ni??
Lei awmna kan thleng thla a, Lei pelh ah Motor ding an lo awm deuh thap, Zobiaka hmel awm ka hmu lo.
“Ding lawk teh” Zobiaka Car niawm tak kan tlanpelh avangin ka ti a, ka ring sual lo, Motor chhung a light on vek changin muhil niawm tak hian hnunglam nghengin a lo thu a, midang tumah an awm ve lo.
“Hey...ngatinge hetah i awm a?” tih pahin ka dak lut a, ka aw a hriat veleh rang fe hian a rawn hawi chhuak a, rui hmel a pu eih lo..
“I lo kal ka ring reng a ni, mahse, i lo thleng hma hle mai” a ti ro hulh. ,
“Elty dawrah ka awm alawm,i motor a tha lo em ni?"ka ti nghal zat.
“Aih, chutiang a ni lo,Taxi i rawn hmang maw?” ati leh hu a,a him pial mai bawk si, eng chu nge maw dik lo ni?
“Aw,Tluanga nen kan nia, a kal bo lawk hlan anih vangin taxi ka rawn hmang anih hi,kan chho dawn mi?” ka ti leha.
“Taxi saw kal tir phawt teh,ka thlah chho mai ang che” ati zuai raih, a hmel ngui zetah chuan thil thup nei a ang a,hnial ka tum zet nangin ka mangan ber lai khan ka tan thian angin a awm thina,tlanchhiatsan ngawt tur ka ni bik lo vang, ka chungah rilru dik lo a pu tih ka hriat hnu erawh kha chuan ka be ngai ta lo, nasa takin ngaihdam min dil a, Nupui a nei tawh bawk nen ,hlauh tur awmin ka hre lo, ka harsatna neih lai khan min pui a, tun hi ka rulh let hun tur niin ka hria..
Motor ah ka lut ve ta nge nge,’han sawi teh le” ka tih chuan ,hnunglam a ngheng leh chawrh a,rilru hah hmel fe hian a thaw hak bawk.
“Nun hi a hahthlak ka ti, mahse, i lo kal a, ka lawm tho..” a ti ringawt.
“Dawrah chho phawt ila, Tluanga a lo let leh chuan min zawng dawn ania” ka ti deuh hmak, mak takin a hma a ka huatna kha a bo duak tawh,tunah chuan thian kan nihna chiah ka rilru ah a awm.
“Nia, kan chho ang chu,enteh, tu nge ka nih ka inhre lo” a ti leh ringawt, a hmai a hup zui vang vang mai.
“I sawifiah loh chuan engmah ka hrethiam lo ania. Sawi vat la” dawhthei lo tak hian ka ti a, , ka ruih nei hmel a pu si lo,a hmel a ngui em em tho bawk si.
“Sawifiah dan tur ka hre mai lo anih hi….vawiin khan ka hrechhuak chiah a,ka nu hi ka nu a ni lo, ka pa pawh ka pa a ni chuang lo..” hreh em em a a tih takah chuan mak ti lutuk hian ka en a...a fiamthu emaw ka ti hial.
“Eng maw I sawi?” tih pahin ka nui hak mai.
“Vawiin khan inleng kan nei a, zu heh leh hmel tawp tak niin ka pa a hmu duh a, biak pawh ka lo be tha vak lo,chupa sawi dan chuan a fapa ka lo nia...” a ti leh a, sawi zawm lo in a ngawi ta vang vang.
“A sawi vang ringawt chuan i pa ani tihna ani hleinem..” ban chat hian ka ti thei hram.
“I sawi ang chu nise ka ti,mahse, a ni lo,ka ni emaw ka tih thin kha a lo ni ta miah lo..chhungkaw hung tak zing ami emaw ka lo inti a, ka pu te ka chhungte zawng zawng, ka cousin te..an vaiin tumah ka chhungte an lo ni lo a..” ti changin a hmai a hup leh a, ka la awih thei lo hial, a nu in a buaipui zia ka mit ngeiin ka hmu a, an neihchhun anih avangin an atchilh nasa em em tih ka hre ve bawk.
“Haw phawt teh ang” thlem pah hian ka ti a, diktak chuan ka ngaihtuahna a mumal thei lo,hnem ka duh em em a, mahse,kut thawh kher ka duh lo thung.
“Haw ka duh lo, kan In saw ka in a ni ve tawh lo,khawiah emaw ka kal ang” beidawng aw zet hian a ti a, a dinhmun ka hrethiam chiah lo,mahse, keipawn mak ka ti a, ani a tuartu tan chuan mak tih piah lam a ni ngei ang..a Phone a rawn ri a, mahse, a ngaihsak der lo.
“Chhang la, i chhungte an ni maithei ania, bakah innu pawn a ngaihtuah che ka ring..” ka tih chuan Sangtein he thil hi a hria em ka la hre lo.
“Um, ka nu aniang, ka hria tih tuman an la hre lo,Sangtei pawh ka hrilh lo, ka hrilh ngam ngang lo” a ti leh nawk nawk.
“Ka hrethiam che, mahse, haw phawt rawh, hetiang tur a ni lo” ka ti leh chu min rawn en a,na tuar a ni tih a hmelah alang chiang ngang mai.
“Nang ni la engtin nge i tih ang?”a ti ta khauh.
“Ka hre bik lo le, mahse, hetiang a i awm hian awmzia a awm lo,i nu a mangang a, Sangtei pawh a mangang ang..kal phawt ang” ka ti nghet charh,hmalam a en a,
“Um, nia, nang chiah hi rin ngam ka nei, tuman an hriat ka duh lo,haw tur a min tih vang chauh in ka haw ang” ti ta nge nge, ka thaw huai huai mai..
Elty dawr kawtah ka din tir a, Tluanga a lo let tawh ka beisei ru takzet.
“Khawnge i kal daih a?” ka hmuh rualin ka ti a,inthiam lo hmel deuh hian min en a.
“Ka nu in min rawn bia a, ka rawn zawng che a, i lo awm mai si lo a, i thiannu kha ka chah ta ringawt a” ati a, thil ho mai maiah a kalbo ka ring lo reng a ni.
“Um a pawi tawh lo,keipawh ka chhuak zuai a, kan haw tawh mai dawnnia, ka thiante kan be lawk ang” ka ti a, Restaurant chhung lam ka pan zuia, thil hriatchhuah neiin ka hawi let leh a,Zobiaka motor a lo awm tawh lo...a tlan sawn thawm awm ka hre miah lo.
Elty hnenah kan haw dawn tih ka va hrilh a, an lo nawi hlawm tawh bawk nen awmreina chi pawh a ni tawh lo.Kimtei kan thlah kual nghal a,ka duh aiin a tlai tawh hrim hrim mai. Jordan-an min la rawn be miah lo bawk nen nuam ka ti tawh lo,Tluanga Motor hawn turin ka ti a, a tlai tawh bawk nen riak tur a ka tih lah a hnial tlat bawk si a, a hawn fo tho a, Jordan-a thu hmu lem lo in ka hawn tir ve hmak mai, a sawisel em lo ang chu.
Kan inlian leh reh ruih chu ka en vang vang, Sanu-i a mu tawh maithei. Jordan-a a haw tawh tih ka hria, a Car a awm tawh tlat,Motor dang pawh a awmkim vek bawk.
Kawngkhar ka kalh fel a, ka rin ang ngeiin Sanu-i a mu tawh bawk,Room ka pan chho chhat chhat, Jordan-a khawi room ah zawk nge a awm ka hre lo,nizan kha chuan ka bulah a riak ngei a, tunah a riak leh dawn em ka hre lo,ka haw tlai bawk nen engmah tisual lo mahila nuam ka ti lo.
Khuma thu mu chungin a malchungah Laptop a lo dah a, hna a thawk a anih hmel,ka thawm hria in a rawn hawi chhuak a,
“Ka tlai viau em?” ka ti nghal ngawt.
“Ka rin aiin i rei,mahse,a pawi lo,inhmuhkhawm chuan haw mai a har alawm...” tha taka tiin a thil tih lai a tihzawm leh mai..Ka thawmhnaw ka hlip sawk sawk a, Pyjama leh kawr lum zangkhai deuh hlek ka ha nghal a. Ka hmai tifai turin Bath Roomah ka luh san a. Zobiaka nen kan inhmuh vang khan nge pawh ka hre lo, keimah ah nuam lo tihna a awm tlat.
“I phone hi ka lo chhang dawn em?” Bathroom kawngkhar bul atangin a rawn ti a, tun ang tlai tawhah tu nge ni ta ang?
Zobiaka ni lo lul rawh se.
Chapter – 25
“Sangtei ania.” a rawn tih leh chuan ka thaw huai mai..mahse eng nge min biak duh chhan tur ni?
“Ka zo tep” tih pahin ka hmai ka hru hul nawk nawk a, ka chhuak nghal vat bawk, Zobiaka a la haw lo anih rinna ka nei lian viau.
“Hello..” tih pahin tukverh bulah ka ding a, Jordan-a pawh khumah a lawn lehnghal..
“Abby...Zobiaka’n a rawn bia che em?” a rawn tih chuan a haw lo anih ka ring nghet nghal thlap.
“Aih, be miah lo,ngatinge?” zang vah hian ka ti a.
“A lo la haw lo a, tlai atang khan a awmdan adik lo bawk nen, ka rilru a nuam vak lo” rilru hah hmel zet hian a rawn ti a.
“A va zialo ve aw, I call em? ”ka ti ringawt, Jordan-a ka en zauh, awmlo se chuan thil thleng kha hrilh mai ka duh ang. Mahse, Jordan-a hriattir chi niin ka hre rih si lo.
“A pick -up thei lo va, a rawn biak tak chein ka rawn ti mawle. Biak kan tum leh ange, mangtha phawt” a rawn tih chuan ka mangtha let sap a, ka rilru a ti nuam chiah lo.
“Engthil nge a?” ka biak zawh veleh a lo ti a,
“Zobiaka’n min rawn biak leh biak loh min rawn zawt anih kha ,a la haw lo niawm tak a ni” ka ti tha ve mai.“In kalnaah khan a lo kal ve mi a?” ati nghut’Laptop a khupin a dahsawn nghal a.
“Aih, kal ve nang, college kan kalpui a ni hleinem a”ka ti hlak, thilsual ti lo mah ila diktak chuan nuam ka ti chiah lo,ka ham bai bai min hmuh chuan,“I mut a chhuak anih kha, lo mu rawh,inhnuaiah ka zuk chhuk leh lawk ” thawh pahin a ti a. Room hrana riah a tum lo tih ka hrethei a, pawi ka ti lo chiang viau.
Reivakloah a rawn let a, Light a off hnuah khumah a rawn lawn a, min rawn kuah zui nghal vang vang. A lam hawi tura min kawih her takah chuan a dar hlai hlapah ka khama, a lungphu nghawr dat dat hre thei turin a awm chungah ka kut ka daha.
“I muhil em?.” ka ti sep.Tawng loin a che hrut.
“Nizan kha i awmdan i la hre thei em?” ka ti leh sap.
“Eng ber kha maw?” mutchhuak aw hian a ti a..A mut a chhuak tak tak nge a sawi duh loh vangin mutchhuak angin a awm lui ka hre lo. Mutchhuah hmel viau mah se ka sawi laklawh tawh a, sawi tlang tho tho ka tum ve tlat.
“Ka harh khan khum bul chhuatah ilo mu renga,hlauh nei ang mai khan i mangan hmel bawk a...” ka ti leh a,a meng a vek tih kha chu sawi tel loh tha ka ti rih zawk..
“Ka mumang a tha vak lo tih chu ka hriaa, ka harh khan kan pahnihin chhuatah kan lo mu renga..chu zawng chu ka hria”zuai angreng tak hian a ti a, eng ang pawn zawt ila a sawi dawn lo tih ka chiang ta viau. Chutihrual chuan a sawi duh lo hrim hrim pawh ni loin a hre lo tak tak pawh a ni ve thei tho bawk.
“Ka ngaihtuah riau che a, in entir la a tha lo maw?” ka ti leh a,envangin nge maw ka ngaihtuah tih ka sawi kher ni?,atan engvak a nih dawn loh vei nen.
“Min ngaihtuah tih ka hria alawm, i pasal ka nih hi” ka rin loh takin a ti a,ka kawr chhunga a rawn zen chuan ka thaw nghal hak mai,ka khabeah khawihin min kuai dak a, a tihtur ka hria.
Kan inmamawhna sang lutuk titawp turin theihtawp kan chhuah zui a, nupa kan nih angin engmah rilru nawm lohna tur a awm lo. Lo inhauin lo inhlat deuh thin mah ila nupa chu nupa kan ni tlat.
“I kuttin tan la a tha in a hria” nuihza aw a a tih chuan ka hmai a sa nghal hat hat mai...a sawi awmzia ka hria, Ka tham nasa lutuk..
“I sual em mai..”ka ti hlak, a nui ve thung.
“Muhil rawh le,i chau viau maithei ania” a tih leh chuan,
“Nang pawh muhil la”ka ti ve a...mut chhuakin in min rawn zem chiai chiaia, rilru thlamuang takin ka maimitchhinga, tun ang hian kan nupa hi inpawh reng thei ila ka ti ngawih ngawih. Ka tum vang pawh ni loin ka ti lungawi lo fo thin niin ka hriaa, keimah lam hian ka zir lo ni a hriat chang lah ka ngah. Kan inneih dan fuh tawk lo nen kan inkar hi nupa dang nen a inang thei lo va, heitak hian min titim thin.
“Good morning..” ka harh veleh a lo ti a, ka harh hun a lo nghak reng emaw tihmai tur a ni,ka chalah min rawn fawp zauha.
“Morning...i va tho hma ve’ ka ti ve sap,ka puansin rawn hlimin a rawn mu ve nghala.
“Vawiin chu khua a nuam ta deuh e,Ni a lang at maia...kan bazar dawn mi?” tih pahin min rawn kuah a.
“Eng nge kan lei ang?” ka ti ve thuai.Ka zi mar ar ar..
“I duh duh kan lei dawn nia....Christmas dawn hi chuan bazat tawt taka kan bazar vel hi nuam ka ti thin.”ti chungin ka hmui a rawn tuai a...ngaihtuah chhuah ka nei thut.
“Thil ka dil dawn che..i phal angem?” ka ti nghal a,
“Han sawi la..ka theih phawt chuan ka pe dawn che tih i hria lawm” ati sup ...min duatna aw ri chuan min ti lawm veng veng thei.
“Keima ta tur chu engmah ka duh lo,Orphanage home ah kal zawk ila....an mamawh kan pek theih chuan a nuam dawn em asin” ka ti ta hlawl. Fahrah ka ni tih hi ka naupan lai atangin inhre tawh mah ila fahrah nih awmzia leh a ken tel nun hrehawm erawh chu Putea thih hnuah ka hre chauh thung,a hma chuan lehkha ka zir theih chen chen ka zir hnuah mahni inchawm nan hna tha tak ka la thawk ve anga, Pasal tha tak ka nei ang tih bak ka ngaihtuah ngai lo. Mahse, Fahrah dinhmun ka hriatchian tak hnu kha chuan ka theihtawp a fahrah te tana thawh ka tum ta zawk a, ka dinhmunin a zir ngang loh avangin tun thlengin engmah ka la ti ta lo.
“Chuti lam daih maw? ok,ngaihdan tha tak anih chu,mahse, kumtin Orphanage Home hi chu kan theih ang a tam kan tlawh ve ziaha,, buaipui duh lo mai la,,midangin an lo buaipui mai ang,tunah chuan i tan liau liau bazar zawk teh ang...” ati leh a, ka beisei miah loh chhanna ani chiang khawp mai,an mahni tana mi tha leh tangkai te leh an chhungte chauhin emaw an hausak zarzo ka lo ti a, mahse a lo ni miah si lo.
“An kal rualin ka kal ve thei angem?” ka ti vat.
“Thei tehreng mai,mahse, midang te thilpek kan pe thin tih hi tuman an hriat kan duh lem lo ania” ati leh ta tlat, ka hmuhdan a danglam lehzual ta,,mitamtak te hi chuan midang tan thil ho te kan tihsak pawn mi in an hriat loh kan hlau thin a,mi in min fak hun pawh kan nghak hman meuh thin lo. Mahse, anni chhungkua hi chuan kumtin Home hran hran an tanpui ziah laiin tuman an hre lo...an chhungkaw ho ka hriat te hi chapo an awm miah lo...nilo...a-Ni kha chu a chapo chiang khawp.
“Enge i ngaihtuah veng veng a?” a ti leh a.
“Thil mai mai..Kal ve a rem chuan ka kal ve tak tak ang aw...Fahrah ka nih angin ka anpui te tan a thil tihsak ve ka chak em em thina, ka tihsak vek anih loh pawhin an hlimlai hmu tura kal tal ka duh, ka tan chuan chu aia christmas thilpek hlu zawk a awm lo vang” ka ti ta duah.
“A buaipuitu ho ka lo bia anga, kan kal ve dawnnia,.tunah chuan tho phawt la,inbual ang..” a ti ta daih.
“Avawt em mai, ka peih lo...”ti mah ila nizana kan chet velna avang ringawt pawh khan inbual ngei ngei ka ngai,amah nen a inbual rual ka duh lo mai mai zawk.
“Ni lo e....Inbual i ngai...”tih pahin a mit a siai zauh a, kan inbual rual chuan enge thleng tur ka hriaa,a thleng ta reng bawk..
Dar 10 velah bazar turin kan chhuaka, thil tur kan lei hnem ngang mai. Thil tamtak kan lei vang ai chuan kan pahniha inpawh taka kan awm chuan min ti hlim zawk.Ke in kan kal kual a, Mipui tam em em zingah khan hmelhriat hmu lo mah ila pawi ka ti lo va,ka mamawh chuang hek lo.Jordan-an ka kutah nghet takin min chelh a, a palianin a langsar em em mai si,min duatna a ti lang reng bawk nen hei aia hlim leh dan ka hre tawh lo hial ang.
“Ka pi, khawngaihin thla ka lo laksak lawk thei che u angem?” Mipa pakhat hi kan hmaah tak rawn ding chungin a rawn ti thut maia, amah lah chu ka hriat ngai mi a ni lo. Camera man to tih hriat ngawih ngawih hi a awrh a, nelawm tak hian a nui sang.
“Oh...eng turin maw?” nui chungin ka ti a, Jordan-a ka en chuan ani pawh a lo nui ve tho bawk,thli thaw in a sam chhip buk deuh bik chu a chhem pawr deuh phang mai....
“Ahh,engtur ni lo e, englo ania, in inhmeh lutuk a, sawta tang khan ka zui tawh che u a,zah loh chhuahin inthla lak ka dil tawp mai che u anih hi..” a ti thuai thuai,Jordan-a ka en chuan a remti tih lan nan a a bu nghut ringawt..
“Ole, tehreng mai, keini thla min laksak duh te chuan kan lawm ngawt ang chu” ka ti a, kei chuan Jordan-a chiah ka en thin ,khawi hmunah pawh a langsar vuah zel bawk nen vawiin phei chu ka lo chhuang ru zual ngawih ngawih,mahse, he Cameraman hi chuan Jordan-a chiah ni lo in kan pahnihin thla min laksak a duh tlat...JOrdana hi a mimal nun thup thiam tak leh vantlang hmaa inpholang tam lo chi a ni a, mahse phal tak leh inhawng taka a lo aw ve mai chu mak ka ti em em maia,kan inneih hnuah hetiang nun zalen leh amah pawh a inhawn zau zawk tum hi ka la tawng ngai lo.
Ka kut a vawnna phelh pah hian,“Ti hian a tha zawk ang ka ring..” tiin ka kawngah a rawn kuah ta zawk,makti tak hian ka melh chho a, a de zawk..Camera lam ka hawi leh a, a de leh zawk bawk..inrinna hun pawh a awm lo..
“Wow...a va han fuh tehlul ve..” phur lutuk hian a ti hluai a, rawn kal hnaiin kan hmuh theih turin a rawn keng lang a, a sawi dik chiah,a fuh lutuk mah mah...Jordan-a ka en a,anin min rawn en ve bawk, Pakhat zawkah erawh Hmalam ka en laiin Jordan-an hmuhnawm tih hmel takin keimah min en thung...
‘Kan lawm e..’Jordan-an a ti a. Vawiin chu ka hriat thin Jordan-a kha a ni ta lo emaw ka ti hial,a awmdan engkim a danglam vek,mi pangngai chunglam niin a eizawnna vang nge ka hre lo, a mizia hi a nelawm lo em em maia,, a tawng duh loh bakah a nui khat em em bawk.Mahse, vawiin chu khatiang mizia kha a bo hmak...a nui tam a, min fiamin min chhaih kual deuh reng bawk..
Putea thlan kan tlawh leh a, Ka nu leh ka pa thlan erawh Putea khan lung a phun hman vek, ka nu leh pa te ka ngaihlu lo a ni lo, mahse, an mahni ka hmu hman loh vang hi animaithei, Putea ka ngaih hlut ang em hi chuan ka ngaihlu lo deuh in ka hria a.Ka hmangaih lo tihna erawh a ni lo.
‘Hey...muhil ngawt suh aw’ tih pahin ka thutna bulah a rawn thu ve a.Nilengin kan vak kual nasa lutuk a ka chau takzet, mahse, nuam ka ti a, ka hlim bawk.
‘Ka mut a chhuak em alawm’ nghen hnaih nghal pahin ka ti a.
‘I meng mang reng reng lo ania,mahse, hei hi min tihpui hmasa phawt la i muhil dawn nia’ tih pahin MacBook a rawn lek hnai a.
‘Engthil nge? “ tih pahin ka en a.
‘Naktukah kan naute ho khan Home ho tan thil an lei dawn a, kal duhna bik i nei em’ a ti tha ve mai.Home hming ho a dahna chu ka hmuh theih turin a rawn keng lang a.
‘Aih, duh bik ka nei lo,i theih chuan a vaiin animai’ nui chung hian ka ti a, ka ham zui bai bai bawk.
‘Ok, atha lawm, i duhdan anih phawt chuan le’ ati awlsam mai.An vai khan sawm an chuang daih a, an vaiin ti mah ila an vai chuan pek a tum tak tak pawh ka ring hek lo.
‘Kei pawh ka chau ve deuhin ka hria,eee, ka nu te khan min rawn bia a,Ka pa kha rin ai takin enkawl a lo ngai dawn a,January lam pawh hi an awm tlang angaih hmel a tia,an awm dawn chuan kan zuk kal ve lawk dawn nia’ ati leh mawlh mawlh. In check-up satliah mai anni sia, ka hrethiam chiah lo. A awmdan ka zwh pahin a,MacBook a kan Nupa thlalak awm chu ka en vang vang,kan inneihni khan ka hlim hauh lo,mahse, Thalakah hi chuan ka hlim hmel tho, kei ang bawkin Jordan-a pawh..
‘A Sugar kha a lo nasa deuh a, bakah a kal lam pawh enfel angai anaing,, ngaihtuah suh,a zia leh mai ang, Mu phawt teh’ a ti a, ka mutchhuah dan a namai lo lutuka,ka meng lui hram hram a ni ber.
Pi hmuni nen verandaah kan thu dun a, Ni thum chauhin christmas a dang tawh,kan kawt a Pangpar awm ho chu thlir chungin thil tamtak ka ngaihtuaha, hetianga nun hman hi ka mumangah pawh ka lo la hmu chhin lo. Jordana nen kan inpawh na a tha em em maia, Zobiaka nen pawh kan inbe zeuh zeuh a, tumah engmah ala hrilh ta lo fo, Sangtei tal hrilh turin ti thin mah ila a duh lo bur,Zu a in nasa viau bawk.
Pi hmuni’n Jordana te chhungkaw thil pek peih zia a sawi siam siam a, a tawngdan atangin a chhuang tih a hriat theih hial,Gateah Motor a rawn ding a.Ka beisei loh zetin Sawmtei te Nupa an lo ni teh tlat.,Rindika nen hi chuan nimin mai pawh khan Meeting naah kan inhmu a.Player’s te gift tur chungchang vel leh tul dang kan sawikhawm a, ka hming a awm ka ta nimahse Rindika tel lo chuan engmah ka ni lo,ka hriat loh tamtak awmin ka hrethiam lo vel vek rih zawk,Jorda-a lah chuan ka kutah a dah fel hmaka,’ Rindika a awm tho a min mamawh lo ang’ ati awlsam mai bawk nen.Nimin lama inhmuhkhawm naah Poppy a lo kal lo thung. Zanriah kan ei ho zan bak kha chu ka hmu leh ta rih lo,Jordan-a lah hi a lo haw tlai ngai lo tluk a ni bawk nen an inhmu ngai bik lo a ni ngei ang.
‘Eng nge in lo tih dawn tehthut a?’ phur tak hian ka lo ti sawk sawk,ka bula Hnangtah chair lianpuiah chuan a thu hnak a.Rindika erawh chu rawn kal hnai nghal lo in Kawt sir a Ui kan dahna In lam a pan a.
‘Nupui hlau lutuk ah i pasal hi i siam a, ka ning tan khawm mai che’ ati hlur maia,angaihna hre lo hian,” enge sawi i tum a?” ka ti ha.
‘Ngatinge Home zawng zawng Present pek ilo tih a,ka hah lutuk,kumdang a kan lei let kan lei a, ka kalpui vek an ngai lehnghal..’ a ti hmawk hmawk mai chu mak ti lutukin ka en reng..Hmanzan a ka sawi lai khan a tih tak tak ka ring hauh si lo,mahse, ka va hlim si em.
‘Aaaa, a tih tak tak pawh ka ring lo a’ nui chung hian ka ti a.‘I over em maia, i sawi apiang a ti ziah tih i hre reng, ,Kanpa nen hian min duat viau angai ang’ a ti leh hlaih hlaiha,Rindika rawn thu ve chu nui chungin a en a.Ani lah chu kan sawi hre lo in a nui ve ngawt bawk.
‘Khawnge Jordan-a pawh chu le?’ ati ,, a lo haw la hun lo mah se an rawn zawn danah an inbe tawh anih ka ring.Pi hmunin kalsawn pahin eitur kan duh leh duh loh min zawt a, Rindika pawh hi Jordan-a ang tho in a ngaihven tih ka hria.
‘Eng nge rawn tih intum reng reng a?’ ka tih chuan,‘In pa lo thleng phawt rawh se’ati awlsam mai,ka zawt nawn ta lo.
Reivakloah Jordan-a a rawn thleng a, Ka pasal mah nise hmuhnawm ka ti ngawih ngawih,a hnar sang vah hian Mizo a ti ang lo lek lekin ka hre thin,a hmui hnuailam a chhah deuh tap a, a khabe ruh kual lian lam lah a inhmeh zawk bawk, a pian nalh leh inkhaithli tha zet te,engkim mai hi hmuhnawm ka ti a, a inhmeh vel vek bawk.
‘Min thlen khalh alaw?’ a rawn ti nghal a.Ka thutna Chair banah a rawn thu zui nghal a.
‘Kan thlenna a la rei lo, In nu hi ka lo hau hrep ania, mahse, nangmah zawk hi hauh i ngai, ka hah lutuk’ Sawmte’in a ti bai bai a, ka nui ringawt.
‘Kan nu thiamloh a ni lo aw,kumin chu kan vannei a, kan Profit lam a zia deuh avangin huang kan zauh hret anih kha’ insawithiam tum tak hian a ti a, Sawmtei ner nang nang chu ka en a, ka nuih a za ngang mai.
‘Hmm,engpawhnise Nupui hlau hi ka ei lo’ a ti hlak hlak,,min fiam tih hre mahila zah vangin ka hmai a sa hat hat tho.
‘Ur lawk zan chu..’ Sawmtei zawkin a ti leh a.’‘Dar 2 velah kan thlen kim chuan a tha nimai, zingah Ruati leh Tluanga ka lo bazar tir ang,a tha em?’ tih pahin ka darah a kut a rawn dah a.Eng nge an sawi tum ka la hrethiam chuang lo.
‘Khawiah emaw kalna tur in nei em ni?” ka ti he haw.
‘Ehe, i pasal hian ala hrilh na che nge?’ atih chuan ka lu ka thing a.
‘Christmas urlawk zan hi Jordan-a Inah kan hmang thin alawm, nikum khan kan hmang lo a. Kumin chu kan kim bawk a kal ila kan ti mawle, mahse kumdang ang lo deuhin naktuk zanah riak lut ila, urlawk ni pawh sawtah hmang ila,zanah kan par ang chu kan tia..lo hrilh ve ta che’tiin Jordan-a a hau leh rih a.
‘Tuna i hrilh hi a tha zawk,ka sawi chuan a kal duh lo ang’ nui huk huk chung hian a ti a, tun hnaia kan boruak nuam lutuk hi kumkhua in nei thei ila ka ti takzet.
‘A va nuam dawn ve,mahse, In ah tumah an awm dawn si lo a’ ka ti a. Sanu-i chiah dah ka hreha, ka nu te ngaihdan a ni lo ang tih ka hlau tel bawk.
“Ngaihtuah suh,Naktukah Sanu-i u a lo thleng dawn alawm’ Jordana”n a ti awlsam et.
An sawi zui leh teuha, Sawmtei te nupa,kan nupa bakah Mark-a leh Kimtei an sawi tel bawk,a pasal a la ni si lo, Room lah kha pathum chiah a awm bawk si, a kal duh angem ka hre lo le.
Mut dawnah Kimtei ka bia a, ka rin loh tawpin a lo phur phian maia,eng chen nge an kal tawh ka hre lo,ka buaina tur a ni hek lo.Jordan-a nen kan inneih hnu hian thil ka hriat chian tak pakhat a awm,mi zawng zawng hi anni kher lo theia, mahse, High Class inti ho hian Sex hi an ngai pawimawh lem lo viau mai a lo ni,Hmeichhe virgin an duh lo a ni lo, mahse, an duh zawng anih phawt chuan virgin leh virgin lo an care lo.Tha ka ti lo ru ve em em maia,,mahse, an mize pakhat tha em em a awm veleh lawi, midang nunah an buai ngai lo,mi chanchin sawi sep sep an ching lo va, midang nunah an inrawlh miah lo bawk.Mi changkang bula khawsak hi a nuam a, inti changkang bula khawsak erawh hremhmun nen danglamna a awm lo.Ka sawithiam dan ber chuan mi hun kal tawhah an buai lo a ni ber e.
‘Kan pahnih chauha kal ka duh a, mahse, Kimtei te khan min rawn be ta sia”’ a ti a, Lukham a inkam kangin a thu mu a, a dar khamin ka mu ve bawk.
‘A pawi hleinem,a nuam phian ang ka ring’tiin ka ngaihdan diktak ka sawi mai.
‘Ei tur lei ngai ho kha List siam la, naktukah Tluanga leh Ruati bazar mai se a tha em?’ a ti leh a,engkim hi ka thu veka kal niawm tak hian min dah lal thiam a, kei lah hian nuam ka lo ti ve tumhrang bawk.
‘Ka duhzawng ringawt ka leitir chuan a tha nang’ ka ti nang nang.
‘Tha e,a neitunu i nia lawm’ a ti leh mai.
Dar 11 vel-ah Sanu-i u a lo thleng a, ka thawveng deuh huai mai.Amah maia kalsan ka duh lo hulhual,he In lian leh reh ruih ah hian mahni chuan nuam a ti lo ang,chubakah a la fal tel zui bawk,CCTV a awm thluah in Gate rinawm tawk awm bawk mah se mahni a awm nan chuan ka huphurh tho.
Dar hnih rik hma hretin Jordan-a nen kan chhuak a,kal pahin thildang ka lei belh leh nual bawk, kan inneih hnu khan karkhat tling lo deuh kan riak a,abak chu kan kal leh ta miah lo.Kan thlen hnu lawkah Kimtei leh Mark-a an lo thleng a, Sawmtei te an lo thleng zui veleh bawk.
‘Lo ngawi teh u..’tia Mark-a rawn tawng chhuak chu kan en nghal thap mai.
‘Kan ngawi e’ Sawmtei’n a ti zauh,a nghal thei lutuk hi ka lawm thin.
‘Thil sawi duh kan nei..keini hian Fa kan neih khalh dawn che u a ang ta riau mai’ a ti chiah mai chu ka mengphawk vak, Kimtei kut a vawnsak laia Kimtei hmai sen tawn tawn chu ka en a,an inhriatna la rei loh bakah a rai tih sawichhuah chu a zak anih ka ring, mahse, innei tur hian inhriat rei kher a lo ngai lo tawp.Ka lawmpui em ka hre rih lova.Mak ka la ti rih a ni ber.
‘Wow...a va ropui ve’ Rindika’n a ti hluai a, kut a beng nghal thak bawk..Reilote kan hamhaih tlang a, mahse, reilote tak tak..Lawmpuina thu kan sawi ta nak nak zawk.
‘Mate, engmah siam duh su aw, vawiin tlai chu Hotel atangin an rawn dah ang’ ka kawnga rawn kuah pahin a rawn ti a, ka ngheng nghal ar ar.
‘Kimtei te kha ka lawmpui e’ a thilsawi lam chhang loin ka ti halh a,ka dulah a kut a rawn dah a.
‘Ka lawmpui tho, mahse, a rang deuh ka ti..’ ati sup.
‘Thil ka hrilh ang che aw’ ka tih laiin ka darah a hmaiin a rawn nawr a.
‘Tunthla hi ka hunbi ka pelh daih tawh asin...mahse, ka la in test lo thung a’ ka ti ta hap.
‘Ehe...naktukah test ang,ngei ngei’ naupangchhia ang mai a phur hian a ti a,Fa neih a chak zia ka hriatchian phah lehzual.
‘Hunah kan zuk kal lawk ang, Thingro kan la anga, zanah kawtah sawn kan hal dawnnia’ ati leh chuan , zui ve ka tum a, mahse, a phal lo,Mipa ho zawng an kal a, hmeichhe ho erawh verandaah kan thu thung,Boruak a dai raih a, thli a thaw heuh heuh a, rinai takin a vawt lem lo,Ni tla turin kawtzawl a rawn chhun a, a lang nalh takzet.
‘Tu phone nge ri chu?’ ka ti ha.Ringtone inang an hman thup avangin a ri atang ngawt chuan tu phone nge hriat a harsa.
‘Ka va en ang’ tih pahin Kimtei a tho a, a rawn chhuak lehnghal a.
‘Abby, Jordan-a phone anih hmel,mahse, a tawp hman a..’ tih pahin ka kutah rawn dah a, Jordan-a Phone a lo ni ngei.. Reipawh ka keng hman lo tihah a rawn ri lehnghala,ka beisei loh tak Poppy a la ni zui...ka la dawn nge dawn lo tih ka ngaihtuah chhungin a tawp leh daiha.keimahah nuam lo tihna ka sawi thiam si loh a awm nghal ringawt bawk.Msg tone a rik leh kauh chuan ka en chak zek zek,ka Pasal phone mah nise lo enruk sak a mawi lo tih ka hai lo,mahse,insum thei loin ka en ta nge nge.
‘Lo call back rawh, ka mamawh che’ tih a lo ni a, a sei duah lo, mahse, ka natpui tur atan chuan a sei tawk tho, ka Pasal a ni a,a bialnu hluiin a mamawh thu tlang taka a sawi ngam ringawt pawh hi ka na tawk reng.
Chapter -26
Tu nge a?” Sawmtei’n a rawn tih chuan,
“Poppy...hna pawimawh a awm aniang” ka ti ringawt, a ner nak maia,a awih lem lo tih a hmelah a lang thei reng.
“Eng hna tak ni ang maw?,club hi chu i kutah a awm anilawmni?” a ti zuia, Kimtei erawh chuan engmah a sawi ve lo.
“Um,awm e,niminpiah khan Meeting pawh kan nei a”ka ti tha ve mai.
Kan ngawi ta thap,a hming ngawt pawn kan boruak a thlak vek a ni ber.Jordan-a te pathumin thingro an rawn pu luk luka,kawt sir lam deuha meichhemna hlui awmah chuan an dah khawm a,ka awm a nuam loin, ka tang ru teuh maia, inthlahdul duh mah ila ka thei lo.
‘Ka inbual lawk ang’ atih chuan ka bu liam ve mai..Poppy-in a rawn bia tih ka hrilh ang nge hrilh lo ang tih ringawt ka ngaihtuah a, a Msg kha hawng lo va, mahse, a hide loh avangin a Phone Lock hawng kher lo pawn a en theih vek tho.
A Phone dahna lai tak ka hriat loh avangin living room a charger lo invuah sa ah chuan ka vuah ve ngawt.Engvanga mamawh nge anih ka hriat loh avangin lo thinrim viau tur ka ni em pawh ka hre chuang lo.Kimtei leh Mark-a Roomah an inzui lut a, Rindika erawh chuan meichhemna tur lai a ti fai leh a, Jordan-a leh Mark-a ai chuan Rindika hi chu a patling zawk deuh.
‘Ka Phone i hmu em?’ a sam hru mawlh mawlh chung hian a rawn ti a,ka lu ka thing ringawt.A hawi kual vel takah chuan,
‘Ka charge daih anih hi,ka charge lai ka hre miah lo" Tih pahin a pan hnai a, a la kang zui nghal chu thaw dep dep hian ka en ran rana,Sawmtei leh Rindika thil tihna lam ka pan ta daih, ni a tla lek lek tawha, khua pawh a vawt ta viau.
“Mate...chhuah lawk ka ngai a,ka rei lo ang” a rawn tih chuan ka na vawng vawng a ni ber,khawiah nge a kal dawn ka hria.Poppy hnenah a kal dawn,a mamawh tih a rawn hrilh tlat atin ni.
‘ Khawiah maw?’ bak hlak hian Sawmtei’n a lo ti a, ka tawng ngai lo a a rawn tawng avangin ka thawveng huai mai.
‘Thil pawimawh a awm thut a,ka rei lo ang,Ka kal..” a ti zuia, A langin ka tap hauh lo, mahse, ka chhungril nat dan hi mittui a tihlan theih aia thuk zawk daih niin ka hria.
Hotel atangin eitur an rawn dah a, Dar 8 thleng chawei turin kan nghak a, mahse, a lo la haw lo cheu.
“ A va han rei deuh ve,Abby, a rawn bia che em?’ Rindika’n ati a, kan vaiin meilum bulah kan thu thapa,Mipa pahnihin Beer an in laiin Sawmtei leh Kimtei’n Breezer an in thung, engmah in chakna ka nei ve lo.Kimtei’n min rawn melh zauh zauh thin tih ka hre ru reng.
‘Ka'n bia ange’ ka hrehzia tih lan loh hram tum hian ka ti a,ka kal sawn zui a, a Phone Poppy-in lo pick-up ta se engtin nge ka awm dawn ka hre si lo a,midang hma a mualpho ka duh lo.
A ring ral thak mai, engthil pawimawh nge awm a biak pawh biak theih loh a a awm ka hrethiam lo,Poppy nen hian Clubah chiah an thawk dun a, chu pawh keima hming anih tak avangin ani nen inzawmna an nei tawh der si lo,eng vangin nge a rawn koh kher ni? Zawhna hlir, a chhangtu tur ber a awm miau si loh chuan natna leh beidawnna bak engmah neih ka nei lo.
‘ Ei san ang u,an la buai deuh a’ ka ti a, Sawmtei'n ka awmdan atanga thil a man thiam hlauin en pawh ka en rei ngam lo.
“Nia, kei chu ka ril a tam ania’ tih pahin a rawn tho tharha, In ah kan inzui lut a.
“Abby.." a ti ringawt.
“Um, eng nge?” pangngai thlap hian ka ti a.
“Aih, a ngai leh lo mai” Kimtei lo lut mek en chungin a ti a, Kimtei a vengthawng anih hmel.
“Ei phawt ru, ka lo nghak ang” ka ti a, In neitunu ber nimahila Jordan-a a lo la haw miau si lo a, lo ei ve ngawt ka duh lo, eng ang pawn thinrim in na mahila ka Pasal anihna abo chuang lo a, nidang ang bawkin a rual a ei ka duh.
“Ok, kan hrethiam che lawm,chuan kan nu hi hrilh ve teh, min ei san ziah ania” nui kur kur chung hian Rindika’n a ti a, ka nui ve bawk.
Chawei kham hnuah min nghah pui renrawn nangin an mut a chhuak tawh tih ka hriat avangin mu turin ka ti sek a, min mutsan ta hlawm. Che miah loin ka thu a, thil awmze nei lo ka ngaihtuah kual vak vak a ni ber.
Kut vawt thlar hian ka biang a rawn sik chuan ka thu mar nghal zawt.
“Sorry..”Jordan-an a ti a, ka mit nuai chat chat chung hian,
“Dar eng zat nge?” ka ti a.
“A hma tawh lo, Dar 1 a hnai thuak tawh, ka tun angin ka awm leh thei si lo va, tihpalh tak tak aw” tih pahin ka thutna bul chhuatah a rawn thu hniam a.
“A ho lutuk,chaw i ei tawh em?” ka ti zang vah. Ka zangkhai ta riau mai chu ka inhrethiam chiah lo.
“Um, ei tawh e..min lo nghak em ni?” atih takah chuan mahni inkhawngaih vangin ka mittui a rawn tla thelh mai, ka khap kir sawk sawk a.
“Ei tawh e, mu ila” ka ti ta zawk, ka nghak a ni tih hrilh kher a tul lo tawp.
Ka thawmhnaw hak lai pawh phelh lo in Khumah ka lawn a, a rawn mut ve hmain thil tamtak ka ngaihtuah hman,zu rim a nam nangin a hmelah erawh rui chhia a ni lo,hna thawk se zu a in hauh lo ang tih ka chiang,.muthilh ka mamawh tiin ka inhrilha, ,Ka hlim rei thei miah lo hi mak ka ti a, hlim tura siam ka ni ve lo zawk emaw ka ti hial tawh.
Ka kawnga a rawn kuah chuan a duh ka hria, mahse, phurna pakhatmah ka nei lo,a lam hawiin min kuai her a, a dar hlai hlapah chuan ka lu ka nghat a,hahdam hmel takin awm mah ila ka tang ru teuh thung,hetiang chiah hian Poppy bulah a awm angem?Poppy a fawhna hmui pawh a hul hmain min fawh a tum anih hmel a...ka ngaihtuah zawng ringawt pawn luak chhuakin min rawn hnawh up up mai.
Ka harh leh chuan tukverhah ni a lo lut iar tawh, Jordan-a a lo tho leh daih tawh bawk. Tho mai lo in ka mu meng kar a.Nizan khan Jordan-a khan a kalna chungchang engmah min hrilh ta lo va,ka zawt hek lo,hetianga rilru hrehawm teuh a awm ai chuan zawt mai ila a tha maithei, mahse, thudik hmachhawn turin ka huai tawk rih lo a, ka la inpeih lo bawk.
Living roomah electric heater aiin an lo thu thap mai, Coffee rim nam ram ram chuan ka hnar a verh zak mai,kawtzawla phul niin a chhun en at chu a nalh tih piahlam a ni.
Coffee aw...” Kimtei’n a loh chuan ka bu nghat a, Hlum no nalh leh lian tha takah hian min rawn pe a, a rim a tui kher bawk..
“A va tui hmel ve,i siam in ka chak reng a ni” ka tih chuan,
“Nia, Coffee siam ah hi chuan min tluk lo ve tlat, in teuh rawh, nizan khan chaw i ei pawh ka hre lo” ati zui zata,Jordan-a mengphar awk chu ka hmu ru reng,hriatthiam har zet hian min rawn en nghal tih ka mitsirin hmu reng mah ila alam ka hawi duh lo lui tlat thung.Thu ve lo in pawnlam ka pan a, Jordan-an min rawn zui nghal chu ka mitsirin hmu lehnghal mah ila ka hmu lo der hmak.
Ka vei kual na apiangah ka hnungah Jordan-an min zui kual zel maia, “Eng nge min zui reng a? " ka ti ta hmak,min rawn din hnaih pah hian, “Nizan ah chaw i ei nge ei lo..?” a ti hul huk.
“Ei e,ngatinge?” ngaihsam hmel zet hian ka ti liam puat.
“Dawtsawi tum suh, i inhmeh lo ania” ati hluk,pawisak neilo hmel zet hian ka nui luia, engvanga tih thinrim chak em em nge ka nih ka inhre bik lo."Aaa, dawtsawi te chu ka thiam ve lutuk " ka ti lui leh hap,Inchhunglam ka pan San chuan min rawn zui ta lo, a dinna ngaia dingin in lam en lo in ral lehlam a en reng.
Zan lam Party na tur buaipuiin Mipa ho an inbuatsaih nileng a ni ber, kei erawh chu ka awm a nawm loh nghulh bakah nizan lam ka mood dik lo bawk nen ka tawng mang lo.
Pawn nisaa ka thutchhuah chuan Jordana ka bulah a rawn thu ve nghal a,Ni sa iar chuan ka taksa a rawn em lum nghal ar ar mai.
“
“Nizan vang khan ka tihpalh tak tak...engmah ka hrilh lo che a. I lo ei tawh turah ka ngai a” zawi angreng tak hian a ti a, Kawt zawl a Mark-a leh Rindika thil ti vel chu a en pah vung vung.
“A ho lutuk,a kal liam vek tawh,zanin ah midang an lo kal belh dawn em?” ka ti ta daih, ka lungawilo anga ngaiin thupha a chawi niin ka hria, Ka tilang chiam chuang lo nangin Nupa inpawh tak kan ni ve tawh bawka, , ka lungawilo tih a man thiam tho aniang. A la hrethiam tak tak lo emaw a mawia thupha chawi mai mai anih chuan Nupa inpawh emaw kan nih ka tih kha ka hresual animai.
“Lo kal belh anga, mahse, an tam lo ang” ati tha ve mai,tu te nge lo kal dawn zawh ka tum lo, tu nge lo kal dawn ka hria.
Lo kal tura ka rin kha ka ringsual hauh lo.Poppy a rawn thleng hmasa ber tlat, a hnuah Player’s 3 an lo thleng veleh a, Mizo lo vek nimah se Christmas hmang tur hrim hrimin Aizawlah an awm a.An chawlh lai ni mah se haw lo in kan hunpui hman dan hmuh ve an chak tlat.Mizo Player’s te erawh a then an khaw lamah an haw a, Aizawl a awm ho an lo kal dawn em ka hre lo.
“He nu hi tu nge sawm a?” Sawmtei’n ka beng bulah a rawn ti hlak. “Tu pawn sawm se a pawi hleinem, I pasal leh Ka pasal thian tha tak a nia, a lo kal ve hi a dik lohna a awm lo” pangngai tak hian ka ti a,Eitur ka inchhawp ho ka ei pah mawlh mawlh a, ka chhan dan chuan a ti hrilhhai deuh aniang min melh reng.
“Abby, lo kal lawk” Jordan-a a rawn ti a.
“A hmanhmawhthlak loh chuan ka thil ei lai hi ka eizo lawk ang aw” ka tih chuan a bu ve mai.
Min nghak tih hre mah ila ka ei hmanhmawh duh chuang miah lo, Living Room lam a Poppy nui ri ar ar chuan min ti thinrim et et bawk. ,Thil ka ei zawh meuh chuan ka puar lutuka, ka hah vek thei. he thil hi ka chin tha lo zing a pakhat a ni a, thinrimna sawi chhuah theih siloh ka neih hian Thil ei ah ka tuan thin a, ka duh aia tam ka ei thin a ni deuh ber.
“Abby...i tha maw?” Poppy-in min lo ti thuai. “Um, ka tha lawm, i va lo thleng hma ve” ka ti let ve a, Midangin min lo be ve liam liam bawk. Inchhunga lo lut thar ber, Mipa pakhat, tlem a upa hmel lam deuh chu ka vawikhat hmuhna a ni a, tu nge anih ka hre lo.
“James, lo kal rawh, i dam em?” Rindika’n a lo tih chuan kan awmna lamah a rawn kal hnai a, Rindika nen an inbe nghal bawrh bawrh.
“Nanghi Abby i ni ang maw?” min tih chuan ka bu nghat ringawt.Jordan-a ai chuan a upa ngeiin ka ring, kum 10 lai pawhin a upa zawk hial maithei. Min chibai tura a kut a rawn phatchhuah chan ka lo vuan vat. , Rindika ka va mitmei chuan min rawn din hnaih thuai.
“Abby, James-a hi in pa nen kan thian tha tak ania, Shillong lam atangin Nimin piah khan Aizawl a lo thleng chiah a, zanin hian kan party na a min telpui turin ala cham khawtlai anih hi,Lungleiah an chhungte bul a Christmas hmang tur ani nangin kan chelh lui a” tiin min rawn hmelhriattir ta hlauh.Mark-a a rawn luh chuan innel takin an han inchibai leh rih a, thian hlui inhmukhawm anni bawk a, an ri ve chul mai.
Ka en vang vang hian an thian ni tur chuan a upa fal nalh tih ka hmu thei a, chumai bakah Poppy pawh an naupanlai thian ni ve tho siin James-a lo thlen tirh atangin a mitsir pawn a melh lo.
Room a ka lut tur leh Jordan-a lo chhuak tur kan intawk a,
“I va rei ve” a ti nghal hluk,chhan pawh chhang lo hian ka kal pel mai. Min rawn zui a,
“Nizan chungchang kha ka sawifiah thei...” a tih lai mekin ka ban ka phar a.
“Keiin sawifiah ngai ka ti lo thung, Poppy a lo thleng tawh a, a zawng che in ka hria” ka ti deuh hmak.
“Poppy hi i ngaithei lo tih ka hria..mahse, zanin hi kan lo tih thin dan anih avangin kal lo turin ka ti ngawt thei lo..” a ti a.
“I thei lo a, i duhlo bawk anih ber chu, a ho em mai, min ngaipawimawh vak suh.Ka lawm lo hran tawh lo ania,kan thawk ho tawh bawk si” ka ti dam thlap leh mai. Jumper Dum leh Cotton kekawr dum a ha a,a thawmhnaw rawng ang maiin a hmel pawh a tak ngur mai.
“Mate,I thinrim tih ka hria,tha takin kan sawi dun thei a..” ati leh a,eng nge tunah tha taka sawi ngai ka hre lo,nizan khan tha takin min hrilh mai se ka lawm zawk ang, tunah chuan tul ka ti tawh lo.
“Rim tawh nang, thil nihna ka theihnghilh vang mai mai ania.Nupui leh hmei te chu a hrang daih alawm” ka tih chuan a ner nawk mai, min biak awmzia a awm lo tih hriattir ka tum ber,hrethiam se min be tawh lo se ka duh takzet bawk. A thaw deuh huaia,
“Nia, nang chu ka nupui i ni a, tuman i ai an awh zo ngai lovang,chu chu lo hrereng tawh ang che..chuan ,kha..” tih pahin bawm tung it et te hi min rawn pe a,eng nge anih ka hre mai lo,ka enchian chuan eng thil nge anih ka hre nghala,.Vawiin hian ka in test ang ka ti kha ania, mahse ka rilru ah a awm leh tawh lo hrim hrim.
“Nakinah ka test mai ang” tih pahin Khumah ka thehthla a.Kawngkhar ka pan San hmak, mahse, ka kawngah a rawn kuaha, “min thlah teh?” ka ti vin hlar. .Ka darah a hmaiin a rawn nawra,
“Ka ngai che alawm, i thinrim tih ka hriat phei chuan nuam ka ti lo.Nizan khan Poppy-in min rawn bia a, achhan pawh a Pasal hlui nen hian thil eng ngemawah buaina an nei a, a nu leh pa an awm bawk si lo nen keimah min rawn be tawp a" Zawh pawh ngai lo hian a ti a.
“Min hrilh kher angai lo.Chhuak ang, awm bo reng chu midangin mak an ti ang” ka ti hmak a, diktak chuan min hrilh avangin ka lawm ru tho.
“Nangin ngai ti lo mah la keiman ngai ka ti alawm. An inah a pasal hlui te nen kan awm ho ta renga,ka kal dawn khan hrilh che ka tum zet nangin Poppy hming ka sawi chuan i thinrim leh anga, kan inhau leh ang tih ka hlau a, inhauh buaia,min hlatsan leh ka duh tawh lo. Vawiin khan ka ngaihtuah a, chaw i ei loh vang ngawtin tiang khan i awm dawn lo tih ka hria,chuan tunah khan Poppy lo thlen thu i sawi a, i awmdanah khan Poppy vangin i lungawilo tih ka man thiam nghak vek..Engmah ka hrilh loh che avang khan ka tihpalh tak tak aw, keimah vang a chaw i nghei pawh kha ka tihpalh” a ti leh zel, a aw a tih takna lang chu ka hriat hmaih thei lo..
“Ka rawn call che a, i pick lo anih kha" Titau aw hian ka ti a.
“Kha pawh ka tihpalh leh bawk, i lo call lai ka lo hre miah lo a..Poppy pasal hlui nen hian kan in nel tho bawk nen zu kan in a...tam ka in lo ania aw...aaaa, min ngaidam tawh la..ooooo, nuam ka ti lo ania” ngengawl tak hian a ti leh a, hetiang hian min ngen ka lo beisei ngai lo...A awmdan chuan min fan a, ka thinrimna a bo nghal duak a ni ber.Nupa inkar hi sawifiah thiam chi nipawn ka hre tawh lo,amak a a ril vel vek..ni e, hei hi ka hria, Jordan-a hi ka duh satliah a ni lo,ka Hmangaih tel tawh zawk,ka hmangaihna hian a tihsual te ngaidam turin min nawr a,min hneh thin bawk.Phat rual loh in ani pawh hian min duh a, min mamawh bawk, mahse, min Hmangaih erawh thil theih loh hulhual ani thung ang..tu nge anih ka hria,mi rilru nghet lutuk, a tih tawh lamah chuan tuma tluk rual loh a bei thin mipa a ni tlat..Mi danglam bik Jordan Zochampuia …
“Ka ngaidam che, Mahse, engpawh ti dawn la, tu pawh hmu dawn la min hrilh tawh la ka duh ania,abikin Poppy phei chu i hmuh chhan tur ka hre duh, .i lo hmangaih tawh thin tih ka hria, ka thik tih ka pawm thlap bawk, min nawr lui miah suh..chuan..” ka tih kaiin ka kawng a kuahna a thlah in alam hawiin min kuai her a,Light hliah zawng a a din avangin a hmel ka hmu chiang thei lo…Ka tawng tum ang ziau chu a hmui lum thar tharin a rawn khar ta hmak, dingdihlipin a nghawngah ka kuah a,ka chhanglet lo thei lo.
Ka Chalah a chalin a rawn nawra,“Ka hrilh ang che, tu pawn nunhlui kan nei veka,nangpawn ka duh loh zawng i hriaa,min nawr lui suh..chuan ,ka khawvel i ni tih hi theihnghilh ngai suh,engtiklai in nge ka engkim i lo nih tan ka hre bik lo ania..” thutak lutuk hian a ti a, nghet takin ka kuaha, a engkim ka nih tan hun hriat ka mamawh lo, a khawvel ka ni tih leh a engkim ka ni tih min hrilh a ka duh tawk.
Ka thinrimna a reh nghal vek chu ka ti lo, mahse,ka hlimna hian a hliahkhuh hneh lutuk. Poppy vang hian ka thinrim fo a, ka lungngai thin,mahse, Jordan-a Nupui zawk ka ni tlat a, eng ang pawn khawsa se a mangang talvelah ka ngaih thiam a tha ber ang.
Party naah pawh ka bulah Jordan-a a awm deuh reng, min ngaihven em em a, min duatna a ti lang nasa viau bawk.Thil hriatchhuah ka neih avangin Room lam ka pansan a..Ka thil duh khumah ka vawm thlak ang angin a lo la awm ngat mai..
Ka rai leh ta lo.Ka hunbi a insawn satliah mai dawn a ang. Thla pawh a la tawp lo ve hrim hrim bawk nen Jordan-a ka lo hrilh hma mah mah niin ka hre ta, Fa a awt em em bawk si..ka rai der bawk si lo.
“Enteh, ...ka rai lo..’Rooma a lo ding ka hmuh veleh ka ti nghal ringawt, ka inthlahrung thar riau bawk.Nui chungin min rawn pan a..
“Lungngai suh, a la hun lo animai..fa kan neih har leh kan Honeymoon a rei animai a” tih pahin min rawn kuah a, a awmah ka hmai ka phum kak.
“I thinrim lo tak tak maw?” ka ti a, “I a em mai,kan duh a kan neih a kan neih loh theih a ni lo...a la hun lo aniang ka tih kha.Lo kal rawh, nangmah hmu duh che an awm ania” a ti a, ka sama fawh hi a chin em avangin ngaiah ka nei tawha, min kuah paha a fawh loh chuan mak ka ti tawh zawk.
Inkai chungin kan inzui chhuak a, lo thleng thar an awm leh awm loh ka en chuan tumah an awm ka hre lo, kawtzawl eng ut ah chuan mei an chhem bawka,a then kawt a thutna awmah an thut laiin a then inchhungah an lam bawk.Zu chi hrang hrang a tam ngang mai,a luanin a luang a ni ber.Mahse, Mi pangngai tak tak vek anni a, buaipui ngai tumah an awm lo.
“Hei, an lo kal alawm” Mark-an a lo ti hluai a,“Helam hian aw..” tih pahin Rindika leh Sawmtei’n ka hnungah min rawn nawr a..an nui hawk hawk bawk, eng chu an hria nimaw??
“Abby...tah hian ding rawh, Jordan..nang chu hetah aw..” ti zat zat chungin Meichhemna bulah min nawr phei zel a, engmah ka hrethiam lo,min tih ang angin ka awm ringawt.
“Le...Kimte kan tan thei e” a tih chuan Kimtei a rawn ding chhuak a, inchhunglama awm te an rawn chhuak vek tawh bawk.Angaihna hrelo zet hian ka ding a, ka nuih chhan hre map lo in ka nui bawk.
“Abby...i Pasal hian thil pek duh che anei a..zanin Party hi i pual liau liau a buatsaih a ni bawk a..”inti thupui fun em em hian a ti a, nui tawh loin Jordan-a ka en a, a bu nghut ringawt.
“Engthil nge?” ka ti hman chauh a, min rawn tawng khalh leh a.
“Jordan,nangmah kha lo kal hnai deuh la.Nangmah ngeiin rawn pe ta che” Sawmtei’n a ti leh a. An ti urhsun mai bawk si nen minti hamhaih em em mai.
a hmaah tak a rawn ding a. Ka kut pahnih la kangin a fawp zauh bawk, a awmdan engkim mai chuan ka chhungril a fan vek thei.Sawmtei lam a hawi a, tawng loin a bu nghut. Sawmtei’n rang fe hian Lehkha var a tuam hi a rawn pe a..Jordana mitah tak ka en chho a.
“Hei hi i Putea nen in chen dun na In LSC kha a ni a, I Pitei ten dik lo taka an tih vanga an hminga awm kha niin tunah chuan i hminga awm a ni tawh e" a tih chuan mak ka ti lutuka,Ka thaw hleithei lo. Envelope lian pangngai tak min pek chu lain,
“Jordan...” ka ti thei hram..Hei hi ka beisei ngai lo,ka mumangah pawh ka la hmu chhin lo.
"Hei erawh hi chu ka nupui i nih avang a lawmthu sawina leh ka bula Christmas i hman hmasak ber puala Christmas present ni bawk anih hi..”tih pahin Chahbi bawr a rawn khai chhuak a..Lakna chang hre loin ka en reng.
“I duh loh chuan keiman ka la dawn ania” Rindika’n ring fe hian a rawn ti loh loh a...an nui ham ham mai,ka nui nge ka tap ka hre lo..Ka mittui hi lawmna nge lungngaihna ka hrethiam hek lo.
“Eng chahbi nge? " Zawi te a ka tih chuan a rawn kun a..
“In kan thlen hunah Motor tharin a lo hmuak ang che,i duh zawng ka zawt lo che a chu erawh min ngaidam aniang chu..” a tih chuan ka ngaidam chiang lutuk mah mah...Ka kuah thlawp maia..midang awm ve zawng zawng te ka zah zo lo...An vaiin kut an beng dar dar mai,..tunah hian eng nge ka nunah thleng tawh ka ngaihtuah lo a,Jordan-a hmel bak engmah ka hmu thei rih lo.
“Ka lawm e aw..chuan, ka Hmangaih che..”zawitein ka ti a, ka tum loh tawpin ka sawi chhuak ta nge nge...Nghet zet hian min rawn kuah a..
“Lawmthu sawi tur chu keimah zawk hi alawm, thla tlemte chhung hian min thlak danglam vek hman asin, mihring nih awmzia min zirtir a..tu nge ka nih min hriattir bawk” a ti ve sup a...ka mittui a rawn tla leh ta..hei erawh lawmna mittui a ni chiang khawp e.
“Ka lawmpui che..”min titu Poppy hmel dul raih mai chu ka en a.Tlem chuan ka khawngaih ve ta..Jordan-a hian eng rilru nge a put tak tak ka hrethiam chuang lo a, engvanga heng zawng zawng hi min tihsak nge anih ka hre hek lo. Engpawh nise a der mai zawng a ni tawh lo chianga,a der ni tur chuan a kal thui lutuk tawh.
“Keipawh ka lawm e” ka ti let ve a,hetiang khawpa chhe lo leh nalh hi engvangin nge a pasal nen an inthen ang tih ka ngaihtuah a,Jordan-a vang a then ang khan an sawi ngei,mahse,Jordan-a nen an innei chuang si lo…Ka ngaihtuah duh loh tawp ka rilruah a lo lang a, a Pu in min nei turin a nawr lui tak alawm.
“Inneihna hlawhtling tak te pawh a ang alawm le” ka rilru hria niawm tak hian a ti leh sap a, a aw a dam hle nangin hriat a nuam chuang hauh lo.
“Engmaw i sawi?” ka tih chuan a sawi ka hre lo a ni lo, a sawi tum dan ka man lo mai zawk.
“Nizan khan Jordan-a nen kan awmdun tih i hria ang chu maw?,bakah engkim hi ka hriatpui vek tih i hre lo nge i hre lo der?” tih pahin ngeiawm zet hian a nui hak.
“In awmdun a, i pasal hlui pawh a awm bawk a..” ka ti let ve hmak mai, ka lo khawngaih hman kha ania, a tlawm emaw ka lo ti kha ka a let der.
“Khawngaihthlak lutuk...engtin nge a sawi apiang i awih theih le?, Ka pasal hlui te chu reilote a awm ngei,chuan maw...kan duh aiin kan rui a, tih kan tum loh tawp thil a thleng leh a....” a tih takah chuan ben chawrh nen ka danglam lo...
Chapter-27
Engtin nge ka chhan let ang tih ngaihtuah chungin thawk ka la paha,Jordan-a hian Poppy sawi ang thil hi a tih ka ring hauh lo.A lo ti ta anih pawhin Poppy hmaa thinrimna tihlan hi a tulna a awm lo. A mitah tak en chungin,
“Chutiang chu a thlen ka ring hauh lo, lo thleng ta tehreng pawh ni se i sawi chhuah khan tu nge mualpho i hria ang chu maw?” ka ti ram ta hmak a.A beisei loh danin ka chhang tih a hmel buai deuh nak chuan s tichiang viau .Mahse, chiai duh loin nui leh ta sak.
“Ka mualpho leh mualpho lohah ka buai hleinem,a thu hrimin nang te chu Jordan-a Pu vang chauh a a neih che a ni tih ka hre ve bawk ania” ati leh a,he nu hian ka duh aiin thil a hre tam tlat.
“Ka neih chhan chu ka duh vang tih ka hrilh tawh che in ka hria” mipa aw hian rawn tiin Hlimthla a rawn lang a, a hlimthla neitu a rawn lang zui nghal bawk.Engchen nge kan thusawi a hriat ka hre lo.Poppy hmel danglam nghal vek chu ka en renga, nuam ka ti ru nghal veng veng mai.
“Jordan...eng lo ania" Awmze nei lo hian a ti buh nuai.
“Haw tawh la a tha in ka hria, bakah ka remtihna tel lo chuan helaiah emaw kan In ah pawh lo kal tawh lo la ka duh ang. I hrethiam aniang chu” khauh zet hian a ti hmuk a, a aw a ring hran lo mah se hlauhawm rukna riau a nei thung.
“Jordan,chutiang in i ti ngawt thei lo..” mangan hmel zet hian a ti leh a, ka bul a a hawi chapo ang kha chu a ni tawh hauh lo.
“Ka ti thei tih i hria.Chuan, Abby bul a i sawi zawng zawng ka hre duh” tih pahin a pan hnai a.A lian bawk nen a lang hlauhawm takzet.
“Eng ber maw? Ka sawi teuh alawm..” bak nak hian a ti leh a.
“Nizanah eng maw ka tih? James, han sawifiah teh” atih chuan James-a a rawn kal hnai a,mak ti leh angaihna hre lo em em hian ka en tawn sek mai.Midang kan tawng hre pha an awm leh awm loh ka enkual thuak thuak a, tumah an awm hnai lo niin ka hria. Jordan-an ka bula rawn din pahin ka kawngah min rawn kuaha.
“Poppy, Abby hi tibuai tawh suh,kalsan zawk rawh” James-a chuan aw dam thlap hian a ti a.Poppy hian James-a lo thlen tirh atang khan a biak awm ka la hre lo reng reng,hetianga zilh a a awmdan sawisel ngam tu chu tu tak nimaw?
“Enmgah lo sawi ve miah suh” Poppy-in khauh tak hian a ti a,
“Ka sawi ngai lo in i sawi vek tawh zawk, i awmdan kha ka enreng che, Abby hi thudik chanve hmangin i bei dawn tih ka hria,keimah min tih ang khan..” a ti leh phei chu ka bo tulh tulh..
“Engmah pawh ka hrethiam ve lo,kal kalsan rih mai ang che u” ka ti a, an pathum chauh a an hriattur an sawi nimaiin ka hria.
“Aih, Mate...awm rawh, Poppy hian hrilh tur che a la nei alawm”ti chungin min kuahna a ti nghet sauh bawk.
Poppy ka en chuan engmah sawi tum hmel a pu lo..min en lo in James-a renga.In melh hian thih theih se chuan James-a hi a damrei lo tawp ang.
“I sawi ang nge ka sawi ang?” James-an a ti leh pawh chuan a la chhang chuang lo.Min rawn en a,a hmel damthlap mai ah chuan mi pawi a sawi ngai ka ring lo hial.
“Nizan khan Poopy hmu tur hian ka kal a, oh.ani hi ka Nupui hlui ania, i la hre lo maithei e. Kan nupa inthennaah thil tih fel theih loh kan neih avangin a changin inhmuh kan la ngai thin a,nizana an in ka thlen hnu lawkah Jordan-a hi a rawn thleng ve bawk a.Poppy hian a ko em ka hre lo, keiman kal tur a ka ngen vang a lo kal a ni zawka.Kan buaina ngai bawkah kan buai leh a, Poppy nen kan inhau buai a ni ber. Jordan-a hian a ngaituah che avangin min hruai haw lui ta zawk hlauha, chuti chu ni lo se kan thil in khan min hneh bawk nen kan tlaivar thei hial ang chu,Jordan-a hi Poppy hmu turin a let leh miah lo ang tih ka chiang.” James-an a ti dap dapa,hmel tak ranah chuan dawt a sawi lo tawp ang tih ka lo chiang ve ngawt.
James- a hi Poppy pasal hlui a lo ni reng,a mak kual vel vek,hei vang hi a ni ngei ang Poppy khan a ngaihpawimawh miah loh,Jordan-a lahin engmah min hrilh si lo.Sawmtei pawn min hrilh chuang hek lo.
Khumah ka inthawlh kak a, thil thlen dan kha a rang in a mak lutuk a ka rilru a la fim hleithei lo,Jordan-a lah ka lo ring chhe lehnghal ngawt pek bawk si.Light a Off hnuah a rawn mu ve nghal a,zawh duh ka ngah lutuk,ngaihdam dil ka duh bawk,khang zawng zawng min tihsak hnu pawh khan ka lo la ring zo lo cheu chu ania..ka zak zawk hial, mahse, ka thil hlawh chhuah ka ngaihtuah chuan thil tha tak a ni tho mai.Poppy dawt sawi zawng zawng a hailang ta vek mai a, chumai pawh ni lo in Nupui ka nih zia a tilang chiang hle bawk.
“Jordan...” ka tih chuan “um..” mutchhuak aw hian a ti sup a.Ka inlet a,Light a off vek avangin a hmel ka hmu thei lo.
“Thil zawng zawng hi ngatinge a tirah min hrilh mai loh a?,hetiang hian inpawh takin kan awm mai tur ania, i la duh rengah ka ngai a...” ka ti sep a, zawite in a nui hak mai..a nuih chhan ka hre lo.
“Hei vanga thinrim i ni tih ka hre lo alawm, bakah Poppy hian min kalsan khan ka tan chuan a thi tawh, engpawh ti se ka tan chuan awmzia a awm tawh lo”ati awlsam et.
“Ka thik ka tih kha..” ka ti nghat.
“Khaia, thik tawh lo mai teh..i hah thlawn mai mai alawm” tih pahin a nui leh huk a,ka nui ve ta ngawt.
“Nih leh Poppy te inthen chhan kha..James-a khan a sawi chiang si lo a” ka ti leh a..
“Engemaw hriatsual a awm,Ni lo,Poppy hian a hriatsual luih tir”ati deuh nghut,Sawi nuam lo a tih hmel viau.
“Engthil?” ka ti leh talh,ka hre duh tlat.
“Kan mudun angin a rin tir..” a ti chiah chu ka kutzungtangin a hmui ka khawih sak a..Sawizawm ngai ka ti tawh lo,A hma pawh khan tiang chiah hian ka bulah a sawi tawh, a hlawhtling thelh anih kha..
Thil engkim hi beisei ang lo a a thlen hian a hrehawm thin,mahse, tun a thil thleng mek hi beiseiloh a thleng nimahse hrehawmtihna ka nei lo.Kan lo inti hrehawm tawn vel mai mai a lo ni. ,ka hmangaih tih ka hrilh kha a ngaipawimawh em ka hre hauh lo,ani phei chuan min la hrilh lo hrim hrim,engtikniah emaw chuan ka la hre ve maithei e.
“Bawihi..engtikah nge Mama a rawn chhuah?” Ka nu in a rawn ti a. Ka pa te hruai turin kal a ngai a, Estheri a lo haw tel thei lo.Min hruai ve a duh viau nangin In lam enkawltu an awm loh avangin min hruai ta lo.
“Dar 11 vel khan a lo chhuak tawh a,i be thei lo em ni?”ka ti let a,
“Aw, a pawi lo, an rawn thlawk tawh aniang” ati awlsam leh mai.Fa te ngaihtuah em em mai anni tih hi ka hrechiang tial tial,kei ngei pawh an mo ang ni lo in an fanu ang maiin min en a,an zin chhung pawh hian vawi tam min rawn be tawh,Nu leh pa nei ngai lo ka nih avangin ka tan koh mai an harsa a, mahse, engtiklai atang khan nge ka koh tan ka hre lo.’Ka nu ,Ka pa’ ti a ka koh hnu khan kan inzawmna hi ka sawithiam si loh in a thuk a, a nghet sawt bawk.
Hunpui a zo a, January thla kan hmang zo leh tawh bawk, February erawh a vawt na ta thak thak viau mai,Jordan-a farm house atanga kan kir leh khan a sawi ang ngeiin ka pual liau liau a Motor min leisak a lo awm vang maia, ka mumang a ni lo tih vawitam ka inhrilh nawn chung pawn ka harhchhuak ang a ka mumang mai a lo ni ang tih hlauhna hian min la kiansan thei tak tak lo,Jordan-an min zirtir a inhuam viau na chungin keimah zawk ka la inpeih meuh lo.Jordan-an a chang chuan a khalh chhuak zauh zauh a, zingah ka tifai a, ka la duhtawk rih viau.
“Engtik nge hrukfai atang hian kan kaisan ang?” nui chungin a ti fo thin a, ka nui ve tawp zel,kan nupa nun hlimawm ta lutuk hi ka la ringhlel fo bawk.
“Dawrah i rawn kal dawn em?” tiin kan Dawr a kan rinrawl berin min rawn bia a.
“Aw, ka tum a,eng nge nita?’ ka ti let thuai.
“I lo kal dawn tho chuan i lo kal hunah nimai tehse” ati leh lawi.Ka kal ngun ve tak viau hnu hi chuan tu te pawh hi ka kawm tam a, an lo fel em em mai.
Dar 2 rik dawnah Dawrah ka thleng phei a, kal loh aia kal ang chauh ka ni hrim hrim,ka awm a nuam lo nghulh bawk nen mut nilen ka chak zek zek.Ka thlen veleh Pa Dika thil min lo hrilh chuan min ti chau lehzual.Zobiaka nu in bungraw tam fe a lo la leh pek a, a hma a an lakna zawng zawng pawh engmah pek a la ni bawk si lo,pawisa nei lo anni lo.Mahse, pek mai a tum tlat thin lo a, a tawpah Pa dika te bawkin an tuar leh thin si, Ka nu te be hmasa tur a an tih lahin a thinrimin a liak erh zel bawk nen hahthlak tak a ni.Engtin nge an chhungkaw zingah hetiang an lo awm theih hi ka hrethiam hlawl lo.
“A pawi lo, bill siam la, dah tawp phawt rawh,a hma a mizawng zawng pawh kha siam fel vek la ka pa lo haw hunah tifel mai rawh se” ka ti ta ngawt.Kei chuan ka ti fel thei dawn lo nasa lutuk tih ka hria, buaina ka thlen tam ting animai.
“A hma ami i tih chu an ba zawng zawng ani em?” a tih chuan
“Aw, a vaiin” ka ti a.
“Chuti chu kum 4 vel liamta ami pawh ka dah vek ang, a vai chuan a tam ve khawp ang” ati nang nang a, a lungawi thei ngang lo anih hmel.A ti fel zung zung a, ka hmaah a total a rawn dah chiah chu ka mengphar nghek mai..
“Pa Dik, an ba zat hi ka pa ten an hria em?” ka ti nghala,
“Aw, hria e, chuvang ania i Pa hian pek tawh rih loh tur atih ni,mahse, a buaithlak, a mizia chu i hriat tawh kha” ati awlsam maia,a sawi dik.A mize chhe zet, chapo leh induh larh mai kha ka mitthla ah ka la hmu reng mai, hnuaichhiah ngawih ngawihin min en a,a khat tawkin a insawi thei chhen bawk.Insawithei ngam tur pawh niin ka hre lo,hetiang zat ba nei tun chung chuan kei ni ila khawlai pawh ka chhuak ngam ngut lo ang.
“Ka pa te an lo haw tep alawm, chinfel dan a awm ang” ka ti ta ngawt,Mo ka ni a, ka tihtur niin ka hre lo,a lo kal laiin lo awm ila chuan hnial pawh ka lo hnial ngam mahna le.
Dawrah ka awm ta reng, an buai ta zek bawk nen hawsan leh mai chi pawh anni lo.Jordan-an min rawn biak pawhin rei kan inbe hman lo, haw turin dar 5 rik dawnah ka insiam thei ta chauha,ka Phone lo ri ve sek bawk nen ka thil hawn tur pawh ka siam fel hleithei lo.
“Hello.. “ ngaihtuah lo zet hian ka ti liam puat a.
“Abby,keimah Zobiaka” a rawn tih chuan ka thil tih lai ka chawl dat mai,kan inhmuh loh chin pawh ka hre tawh lo,an chhungkaw buaina kha engmah sawi a awm leh ta lo bawk nen a hresual mai mai anih ka ring tawh zawk a, ngaihven emaw biak tumna ka nei lo.
“Mama hi a zin em ni?” a rawn ti teh daih a..
“Aw, eng nge nita?” tha tak chuan ka ti ve mai.
“Eng ni lo e, In ah i awm chuan ka lo kal ang chu ka ti a” a tih chuan ka ding mar a..
“Dawrah ka awm a, engthil nge?” ka tum aia awki chang hian ka ti hmak.
“Aaaa,a hma ami bawk kha..” tih paha a thaw hak ri ka hre zui zat bawk.
“Eng kha maw?” hre lo der chungin ka ti a.
“Phone a sawi theih pawh a ni lo,ka thawpik a ni tawp mai.”a rawn ti leh a,chhan mai dan tur ka hre lo, min hmuh khan a thawveng sawt dawn tihna a ni phawt anga, eng nge tihsak theih ka neih chuang?
“Tihtur ka la nei a, naktukah Dawrah ilo kal mai dawn em ni?” tiin Dawt ka sawi ta ngawt, a hranpa taka hmuh ka duh hauh lo, Pasal nei ka ni a, chumai bakah Zobiaka hi Jordan-an a lawm lo tih ka hre reng bawk a, kan nupa kar hi thil hriatsual vang a tihchhiat leh ka duh tawh lo.
“Ok..nia, a pawi lo” hreh hmel deuh hian a ti a..Diktak chuan ka inthiam vak bik lo,kha leh chen kha min lo pui tawh a,atan ka tihtheih chhun pawh lo ngaihthlaksak mai chauh a ni chungin ka hnar ta tho si.
Sanu-i leh a u an awm a, Driver thar ber kha In a awmchilh tur a Jordan-a lak a ni bawk a, ani pawh a awm ve bawk, ka awm a nuam lo deuh reng bawk nen chaw pawh tih tham ka ei lo...Jordan-a ka ngai vawng vawng, kan nupa inkar a that tak hnu khan vawikhatmah amah si lo leh kuah lo in ka muhil leh ta lo, ka thlahlel a, ani pawn min ngai tih a zep ngai lo.Zanin erawh amah tel lo in ka mut angai ta,mahse,midang hmuha Pasal te tello a awmthei lo nih hi ka duh miah lo,tum pawh ka tum lo..zahthlakah ka la ve tlat bawk.
“I mut a chhuak tawh em?” Jordan-an a rawn ti a..Mu chungin Tv ka en a,ka khawsik deuh ser ser reng chuan min ti lum hleithei lo..
“Aih, chhuak lo e, Tv ka la en a..” ka tih chuan a ngawi deuh vung vung a..
“Naktuk tuklehah kan lo haw dawn chauh sia, i tel lo in zan hnih ka mut a ngai dawn a,ka muhil thei angem ka hre lo” a tih takah chuan ka mittui a hnai kuar mai.
“Kei pawh, ka ngai ngawt mai che..”ka ti ve ta thlawt,.
“I dam tha em?” a rawn ti leh thut a.
“Um, ngatinge?” ka ti ha, a zin tur a chhuah dawn lai pawn ka nuam lo tawh, mahse, engmah ka hrilh lo mai zawk.
“Ka rilru a nuam chiah lo,a chhan pawh ka hre lo a,eng nge ka lo hawn ang che” a rawn ti leh daih.
“Nangmah..” ka tih chuan kan nui dun a..Kan bul tanna chu engpawh nise tuna kan nun dan hi chu a aia thlan tur chuang a awm lo.
Zobiaka chungchang hrilh ka tum zet nangin ka thulh leh, a lo haw hunah hrilhna hun a tam dawn tho a, Phone a sawi chi pawh niin ka hre leh tawh lo.
Ka beisei loh takin ka mutui ta phian,ka harh chuan khua a lo eng ut tawh, tho mai lo in ka mu ren rawna, Khum mawng lam banga kan inneih thlalak intar chu ka en vang vang. Jordan-a bawk ka rilruah a lo lang a, tukdang ang chu nise tunah hian ka bulah a awm ngei ang..rei pawh la ni lo mah se ka dam that loh vang hi a ni ang ka ngai ngawih ngawih.
Peih lo em em in ka tho chhuaka, , ka lu a rit luk a, ka luak a chhuak bur bawk,muangchangin ka inphihfai a, mut leh mai ka duh, ka zawijn engtihmah ka chak lo..Chokaah Pi hmuni a lo awm a, engngemaw rimna zet mai hian ka hnar a rawn verh a, ka uak pawp mai..
”Engtizia nge?, i nuam lo em ni?” Pi hmuni’n a rawn ti chul a, ka hnungah a rawn chul pah bawk.
“Ka hre lo, eng ngemaw chawhmeh rimna deuh i siam em?” tih pahin ka mittui ka uakna vang a rawn tla chu ka nuai a.
“Ka va hre mai lo ve,eee, Masala rim chu a ni em?” ati leh nghal thuai thuai, a ni tak ang..
“Ka hre bik lo” ka ti ringawt.
“Mahse, hei chu nidangah pawh kan telh ziah sia...aaa. Nang hi..i ruak lo a ni lo maw?” a tih chuan ka phu deuh zawk mai,ka in test hmasak khan ka rai lo a, khami hnu atang khan thlahnih a liam tep tawha, January thla khan ka hunbi ka zawh lo..tunah February thla chanve kan hmang tep tawh..Phawk deuh hian ka en a...”Ka hre lo..animaithei..” ka ti lawi rat mai..
“Test na tur i nei sa em?” ati leh sawk sawka, ka bu nghat ringawt,Roomah khan ka dah ve ngei,a hma pawh khan ka Period loh vangin ka test a ,ka lo rai leh si lo a, khavang khan test leh pawh ka lo ngaihven tawh lo.
Roomah ka chho lehnghala, ka thil dahna ka hai chuan pakhat a lo awm ran mai..hreh si, chak deuh bawk si hian Toilet ka luhpuia.. Ka test zawh chuan En pawh ka en mai ngam lo, ka mit lehlam siai chungin ngam leh ngam lo hian ka zuk melh a..pahnih a lo sen kalh mai...ka mittui a rawn baw nghal zawih bawk...tunah chuan Nu ka ni ve dawn tak tak ta..Jordan...kei ai in a lawm zawk hial ang.
Beisei nei tih hriat fe hian Pi hmuni’n min lo en a, engmah sawi lo in ka nui ringawt, min rawn pan hnai a..’Ka hria e, sawi duh suh, i hmelah khan a lang vek alawm”tih pahin min rawn kuah a...a hma khan ka hlimna kha a tawpkhawk emaw ka lo ti thin a, a lo ni lo tawp, tun a ka hlimna hi ala nasa zawk ta cheu mai.
“Ka nu ten an lo biak che pawn engmah lo hrilh suh aw, vawiinah Doctor ka pan anga, ka ti chiang phawt ang” ka ti a, a bu nghat mai..an lo thlen veleh Surprise nan ka duh,hei aia an lo haw lo lawmdan tha a awm lo tawp ang.
Doctor pan mai tur ka hre lo va,Sawmtei ka zawh chuan min ringhlel nghal dawn, Jordan-a hnen a thleng nghal ang tih ka chiang,Kimtei...pawh a chi chuang lo,Mark-a bulah engmah a zep hauh lo ang,tu nge ni ta ang?..Elty..nia, ani hi Fa nei tawh a ni a, helam kawngah hi chuan min pui turin a tha ber ang.
Ka beisei ang ngeiin Hmeichhe doctor thian a lo nei a, chu pawh Mizo zingah chuan a tha ber pawl a la ni zui,ka hahdam huai mai.
“Min kalpui la..” ka ti a, Dawrah a buai zia ka hre lo a ni lo.
“Ok...ka lo bia ang a, kan hmuh theih hun tur ka rawn hrilh leh ang che” ati awlsam et..
Tlai dar 3 vel bawrah kan hmu thei dawn tih min rawn hrilh a, ka nuam lo bawk nen ka chhuak ta lo law law,Damdawi ka ei ngam der bawk si lo,ka luak chhuak erawh a zia leh viau lawi..Ka Phone riin ka muhil min ti harh a,earphone ka vuah avangin min rawn call Tu en kher loin ka pick-up a, Zobiaka rawn tawng ri ka hriat rualin nimin khan Dawrah lo kal tur a ka tih ka hrechhuak chiah.Zing atangin boruak dangin min tibuai hneh lutuk a ka hre tawh lo reng reng.
“Dawrah ka lo kal a, i lo awm si lo va” a rawn ti a.Nimin lam ai chuan a aw pawh a zia ta deuh.
“Awi, tihtur hmanhmawhthlak ka nei a, Dawrah ka kal hman lo ang..a van pawi tak, naktuk zanah lo leng ula, ka Pa te an lo haw dawn a, chaw rawn ei nghal ula” ka tih zawm zat.
“Nia, a tihchi phian ang chu,mahse, nangmah a falin ka be thei dawn che em ka hre lo a”a rawn tih chuan,
“Eng nge a fal a min biak i duhna ka hre thiam lo” ka ti bung nghat.
“Midang hriattir ka la duh lo a, nangmah chiah hretu i ni a...’ a tih laiin ka pawt chat a.
“Ka hre lo ah ngai mai rawh, diktak chuan a fal a inbiak pui nan chuan hriat loh ka thlang zawk” nelawm lo zet hian ka ti ta nge nge.
“Aaaa,chutiang pawh a ni lo.ka thawpik em a..” a rawn ti leh a, Mipa ve si, achang hi chuan nep ka ti thin.
“Engpawh nise naktuk tlaiah chuan kan inhmu dawn nia,anih phawt” ka ti a, min chhanna pawh nghak lo in ka dah zui daih bawk..
Kan Doctor hmuh tur Clinic ka thlen chuan Elty a lo thu vang tawh,a hranpa in engmah inziah tir pawh a awm lo, ka thlen lai in pakhat a lo en mek a, a rawn chhuah veleh kan lut thei tih pawn a hming ziaktu chuan min hrilh nghal mai…
Ka rai ngei a. .thla a tling tawh bawk,ka luak chhuak hi chu a la nasa dawn chauh tih min hrilh a, ka awm nawm loh zual changa eitur Damdawi min pe a, rilru hahdam turin min duh thu a sawi uar ngang mai ..
In ka thlen hmain Jordan-an min rawn bia a, zing atangin kan la inbe miah lo, Ka pa buaipui in zing atangin an buai dawn tih a sawi lawk a, min biak loh vangin thinrim en ah pawh ka en lem lo,bakah keima buai buai in ka buai a, ka phili nasa lutuk bawk nen Jordana lam pawh ka ngaihven hleithei lo.
“Enge i tih a? Dawrah bawk em ni?” a rawn ti dut dut.
“Ni lo e, vawin chu thildang ka tia.Jordan..nakin deuhah ka lo bia ang che, ka buai lawk a” ka ti zung zung. Ka, rai thu hrilh ka chak rualin Driver a awm ve reng vangin ka hrilh duh rih lo.
“Ok, reilo la.Ka thianpa in ka pualin Party a siam a, ka kal dawn ania aw..” a rawn tih chuan a chhan hre si lo in ka thinrim nghal tun ringawt.
“Kal rawh, a pawi lo, engmah pawimawh a awm lo” ka ti nghat nghata,a hma khan Driver ka vengthawng a, mahse, ka insum hman lo.
“Hmm,i thinrim ringawt tihna mi?” nuihza aw zet hian a rawn ti leh a, chhan pawh ka chhang peih lo. Ka off nghal hmak..Eng nge ka thinrim chhan pawh ka hre nek lo e.
In ka thlen hnuah pawh ka be ta chuang miah lo, chaw ka chak lo teh nangin Doctor khan chaw nghei miah lo turin min tih vangin tlem ka ei a, ka ei lui thei hlawl lo.Damdawi min pek kha ka ei chuan ka nuam lo lutuk chu a zia ta thuai, ka mut a chhuak bawk nen Jordan-a min rawn call na pawh zingah ka hmu ta chauh.
Min rawn kuah an awm chuan ka mumang emaw ka ti zawk, mahse,ka chal a rawn fawh takah chuan ka mumang a ni lo tih ka hre thei mai. Ka menchhuah rualin Jordan-a hmel pa zet ka hmu nghal a.A kiu a inbengkang chungin a nui suk.
“Ehe.. in lo thleng tawh alaw?” nuam ti lo zet hian ka ti a,an lo thlen laia ka lo awm lo ka inthlahrung nghala, mo nih hi chu thilnuam a ni lo ngawt mai. Pasal chhungten min hauh leh a hrehawm a, min hau lo va an tum reng pawn a nuam chuang lo vang.
“Tho duh suh, i nuam lo tih Pi hmuni’n min lo hrilha,nimin khan engmah i sawi loh a? ” tih pahin min rawn kuah leh a.
“Ka tha alawm, ka mu rei tawh lutuk,tho ang” tih pahin min kuahna ka phelh sak a,zangthalin a mu a, ka thawhsan ta tho.
“Ngatinge engmah i sawi loh a?” a la ti ta fo.
“Ka tha ka tih kha, nizanah ka hrilh dawn che a, i Party kual vel a...” ka tih laia a lo nui ka hmuh rualin ka tawp chawt.Engmah nuihzat tur ka hmu ve lo.
“Eng nge nuihzat tur awm a?” ka ti bak hlar mai. Rawn tawlhhnai paha a nui leh chuan min ti thin rim hluah hluah..
“Ka ngaih tehreng che nen nanglah chu i lo thinrim em em bawk sia” tih pahin ka tawlhsawn tur min rawn man bet a..
“Ka ngai ve lo che..” ka ti hmak.
“Dawtsawi ve thin suh ka tih kha, i thiam lo..” tih leh ka sama rawn fawh a ruala.
“Chhuk phawt ang ,ka nu te ngaihdan a ni lo ang”tih pahin a awmah ka nem a, a nui huk huk ringawt.
Ka beisei aiin ka pa ka hmu ziaawm phian, Ka nu lah nu tawngduh tih takah a ri chel chul maia, kan In reh thiap thin kha hlim nui thawmin a khat leh ta vek. Hei hi ka thil nghahhelh a ni reng bawk. Ka beisei miah loh laiin ka nu in ka thil tur a rawn hawn teuh maia..’Abby, i Nitei te kha chaw an lo ei dawn a, an hrilh lawk che em?” a tih chuan,
“Aih,hrilh miah lo, mahse, Zobiaka kha chuan a sawi thawi a..” ka ti ringawt. Jordan-a lam ka va en chuan hriatthiam har tak hian min lo en run maia..Zobiaka nen kan inhmuah a ngai a ni ngei ang chu.
“Aw,anih chu, Tluanga leh Hmuni kha lo va bazar lawk mai rawh se”ati leh zung zung, a awm hi chuan a hahdamthlak thin, Nu ber a ni miau a.Engkim a rel fel zung zung zel mai.
Jordan-an chhuah lawk na tur a neih thu a sawi chuan khawiah nge a kal dawn ka zawt lem lo.Ka nu in ka pa an enkawl dan vel min hrilh siam siam a, reivaklo ah Nitei te an lo thleng ta bawk nen kan ri le lu mai.
Sangtei hmel tla dak mai ka hmuh chuan a chhan ka hriat si lohin ka khawngaih ringawt, Zobiaka lah ka hmuh hnuhnun ber ai khan a lang pawr zawk bawk.Zu a in nasa tih a lang thei hial mai.Nitei tawng zat zat chu ka en leh reng thin, kan dawr a pawisa a bat tamzia ka ngaihtuah a, a zak miah lo chu mak ka ti ru bawk.
“Jordan...” ka tih chuan min chhang lo, kan chawei chhung zawng khan a mood a fuh lo tluan zak,a va kalna ah khan engthil tha lo nge a va tawh ka hre lo..Ngawirengin Tv a en a..biak a chakawm loh hluah hluah.
“Jordan..” ka ti leh a..
“Eng nge?” a ti hmuk, min la rawn en chuang lo..Ka kal hnai a..a hmaah tak ka thil ken ka dah chuan ka thil dah en loin keimah zawk min rawn en ta nge nge..
“Eng nge a?” a ti bul hmuk.
“En la...i hre mai ang chu..” ka ti ve tlat, a en a, min rawn en lehnghala.
“Ehe??, tak tak em?” tih pahin a rawn thu mar nghal hluai.
“Um, ka rai..thlakhat a ni tawh..” ka ti zang vah.
Chapter- 28
A rawn tho thut a, ka inrin hmain min rawn pawm kang a...a hmel a hlimna lo lang chu ka hmuh hmaih lo.Hetiang taka a hlim hmel kha ka la hmu ngai hek lo.
“Ka lawm e aw..’ Khuma min nghah pahin a ti a..Ka awmah a hmai a rawn phum a,a thaw lum ham ham ka hre thei bawk.
“Ngatinge lawmthu min hrilh bik a? Keimah chiahin ka rai thei lo tih i hriat kha..” tiin ka chhaih a...min chhang lo in a ngawi reng, ka kawr hma a rawn huh a, ka rin loh leh beisei miah loh in a mittui a tla tih ka hria.
“Mate,ka Hmangaih che...Ka khawvel i nih ang bawkin ka nunna pawh i ni bawk a..i tel lo a awm hi ngaihtuah pawh ka ngaihtuah peih tawh lo” a ti chhuak hrawih. Mak ti em em hian ka awm ngaiin ka awm a, ani hian Min Hmangaih...min duh ringawt lo in min Hmangaih...
‘Jordan...” tih pahin ka tah nuih a...min rawn en chuan a mit a sen rum ka hmu nghal chat.
“Sawi duh suh, ka hria alawm...keimah ang bawk i ni tih ka hria..Ka pu khan min lo inneihtir sual lo tih ka hre chhuak daih tawh asin” a ti leh zel...Ka thaw hak mai..a tawp a tawpah chuan a sawi chhuak ta nge nge.
“Kha thil kha ka lo hre ve miah lo a, an In kan kal tum khan ka pu in min hrilh a. Min thawng tih piahlam a ni” a sam khawihsak niap niap pahin ka ti a.
“Hrilh che tul ka ti lo,mahse, ka Pu chuan tul ati anih chu...”ati hluk ..a tawngkam chhuak bung hmuk reng mai hi chu ngaiah ka nei tawh.
“Hrehawm i tih dan tur ka ngaihtuah a, i milpui ni miah lo kha min neih a ngai a, chubakah Poppy a awm tel bawk si...i zak thin in ka ring a..mahni inthiamlohna in ka khat vek, Poppy ti let tur pawh khan chakna ka neih te kha sawmkhawm ve thin mahila nangmah vang zawkin ka insum hram hram thin a...” ka tih chuan ka hmui a rawn khawih a..
“Poppy hian min kalsan khan ka tan a thi tawh ka tih kha,Hmeichhe tamtak ka kawp tih ka pha lo..mahse, ka nei ngei dawn che tih hi chu In in ka rawn kal hmasak ber tum khan ka chiang daih tawh..” a ti leh a..Mak ti takin ka en a.
“I lo hre lawk vek amaw?” ka ti hap.
“Hre lawk vek chiah lo, khami hma lawk khan min hrilh a..Grace-i leh a nu khan leng turin min lo sawm ve tho bawk nen nangmah hmuh na remchang a ni pah nghal bawk a tiin kan lo kala..”ati leh a...Ka kawr a rawn zen a..ka hnute a rawn khawih zui nghal zat bawk.
“A va mak em em...Rindika hian a hre lawk i tihna a ni em?”phawk hra hian ka ti leha.
“Yes..hre lawk chiang e..ka nei ngei dawn che tih ka hriatchian tluk zet khan a lo hrechiang ve tawp..”ati leh a, ka kawr hak chhunga a kut che kual manbeh sak pahin,
“Jordan...” ka ti sap.
“Aih..ti ti dun na hun chu ala tam dawn, mahse, hei hi chu ka nghak rei tawh..” a ti ve hmuk.
“Mahse..” ti chungin a rawn hawi chhuak leha...a mitmeng thim raih mai en chungin,
“Eng nge...?” bah nak hian ka ti a..min khawihna avang khan a tawp thlen duhna bak engmah ka ngaihtuah thei lo..
“Naute ...” a ti hul huk,ni dawn tak...Nupa nun kan hmang thei em ka hre tlat lo..Doctor kha zawhna chang lah ka hre der sir lo,aaa. Nachang pawh hria ila ka zawt ngam kher lo ang.
“Kan thei lo ang..”ka ti hap,ka aw ah chuan ka duh loh vang a ni lo tih alang reng.
“Ok..a pawi lo e. Mahse, tunah hian tuivawtin ka inbual angai in ka ring..” a ti nghuta, ka nui hak mai...
“Keipawh hian tuivawta inbual ka mamawh maithei..” ka ti ve hmiah, ka pasal anih tlat avangin zahna tur ka hre lo..Min rawn en a..
“Tuivawt a i inbual chuan i damlo mai ang..Lawk...tihdan ka hre maithei...” a ti leh lawia, Blanket in min rawn khuh a...ka kawng lamah a tawlh hniam nghal zat bawk...
Thawh ka hai chiang viau,ka harhin Dar 10 a pel va tawh, Ka nu te lo haw hma kha chu nise a zia, mahse, tunah chuan an lo haw tawh a.Mo ve si dar 10 thleng rawk han mut ngawt mai chu nuam ka ti lo..Nimin piah lam ang bawkin ka khua a sik leh tih ka hre mai..
Ka luakchhuak in min rawn hnawh chuan Toilet ka thleng hman hram, luak chhuah tur ka neih loh thlengin ka luak a, ka luak chhuak a tawp phah der lo..chau takin bang nghengin ka thu a..ka maimitchhing vang vang.
“Mate.eng tin nge i awm a?” tih pahin Jordan-an min rawn pawm a..ka lo nuih lui hram hram a ni ber.mi te pawh an rai a, hetiang em em hi an nih ngai ka hre si lo.Kimtei ngei pawh a rai a, kan awm ho chhung khan hetianga a awm ka hre lo.
“Ka tha..luak chhuak satliah mai mai alawm..” ka ti ban chat.
“Ka ring lo.i hmel a dik lo vek.Ka nu ka zuk ko lawk ang..” Confi lo zet hian a ti a,ka chal a rawn dek paha..
“Aih, koh angai lo..Ka mu lawk anga, ka lo chhuk ang, “ ka ti thuai.
“Ka awmpui ang che” tih pahin a insiamrem a, a rawn mu ve nghal a. Darkar chanve vel ka mut hnuah ka ziawm ta viau,vawiin ah Kimtei ka biak ngei ngei angai ang, Elty pawh naupai lai a awmdan ka zawh angai bawk ang.Ka mutkawr ka hlip tur chu Jordan-an min lo pui a, hetiang reng reng chuan min Duat khaw lo vek ang tih ka hlaua, ,mahse, nuam ka ti ru em em thung.
Ka pa In amahin Tv a lo en meka,Pawnlamah Ka nu in Sanu a be lawng lawng thung.Kan thawm hriain ka pa a rawn hawi chhuak vut a.Kan upat hun chuan hetiang chiah hian Jordan-a nen hun ka la hmang ang a, Mo emaw tu te nen chhungkuain kan cheng ho bawk ang tiin ka ngaihtuaha,.ka ngaihtuah zawng ringawt pawn ka hlim veng veng.
“I zia deuh em?” min lo ti thuai a, ka zawh tur zawk niawm tak a ni..Jordan-a pawn lam panin a chhuak zui nghal a, hna kal thei pawn ka siam lo, ka nuam lo vel khan ka ti khawtlai vek tawh.
“Um, ka tha..i tha em?” Ka tih let ve chuan a bu nghut, Pa tawngduh lo tak a ni bawk a, Tv lam a en lehnghal mai.
Pi Hmuni'n eitur ka duh leh duh loh min rawn zawh chuan ka lu ka thing mai.Engmah ei chakna ka nei lo.Ka nu rawn lutin min hmuh veleh min rawn be nghal chul a,nuam ka ti chiah lo, a che tur zawk ka mu reng a, ani nu ber a che reng thung si a,ka inthlahrung lo thei lo.
Jordan-a ka bulah a rawn thu a, Nu leh pa awmlaia han thut dun vel chu nuam ka ti chiah lo.
“Nu..lo kal lawk teh” tiin ka nu a ko a,
“Aw..eng a?” a kut apron a hru mawlh mawlh chung hian a rawn ti a, Ka pa Cigarette zu a hau nghal hlak hlak, Ka pa erawh a nui a,ngaipawimawh lo hmel deuh hian a zuk ngaiin a zu zui tho.
“Pa, i theih chuan insum la..Doctor khan i mamawh miah lo ati ania” Jordan-an a ti deuh hmuka, nem deuh zawkin bia se ka lo ti thin..
“Damchhung a rei lo em mai, bakah ka zu tlem em mai” ati duh lek..
“Eng nge a?” tih pahin Jordan-a a en a..a sawi tum ka hriat avangin ka lungphu a rang nghal zaih zaih mai.
“Abby hi a rai a..mahse, ala chiang chiah lo em ka hre lo a..”a ti tlang nghal pawp maia. Ka nuin phawk hra hian min rawn en a..Ka pa erawhin kut a beng thuk thung..An awmdan chuan min ti lai a..hnuailam ka bih ta ngawt..
“Chuti law? a va ropui ve...Pi ka ni ve dawn ta nih chu..” ka nuin a ti nghal hlut,phur hmelpu tak hian min rawn kuah zui nghal nawk nawk mai,hetiang em em hian a lawm ka lo ring phak lo.’A va lawmawm ve” tha taka tiin a duhtawk mai ka ring a, jordana’n ka awm laia a hrilh kher phei hi chu ka haw ru lek lek zawk. Mahse, engkim mai ka beisei dan ni lo hlirin a thleng ta si,.Pitei te hnen atang a ka dawn ai zawng zawng Hmangaihna leh ngaihsakna he chhungkua hian min pe vek ni ber hian ka hria.
“Amak chung chung thin, i ti hlauthawng tur ania,.Naute khan phut zawk zawk a mamawh miah lo ang” Ka pa in a rawn tih bul bul chuan ka nui hak mai..a lawm zia a tihlan ve thiam dan ber a ni tih ka hria.
Ka inentir na turah pawh Ka nu lo kal ve tur dan theih a ni lo.A phur zia ka hmuh khan dan chi ah pawh ka ngai hek lo, hetiang taka min hlimpuitu Pasal nu ka nei hi lawm tur ka ni ringawt..Test tur tul zawng zawng kan test nghal veka,engmah hmaih neih an duh lo bur,Doctor hnenah ka indim dan tur thlengin an zawt a,ka tawng ve pawh angai meuh lo. Ka nu hnenah doctorin” i fanu em ni?” a tih hial khawpin min ngaihsaka, chhungkaw tam zawkah hi chuan mo leh fanu te dinhmun a inthlau em a, a zawhna pawh a awm ka ti hliah hliah. Nu tamtak,mahni fanute hrehawmna hmu thei em em ,an mote erawh khawl emaw ti tlat an tam.
Zanah Esther-in min rawn bia a, a rawn te chelchul mai,ani pawh hian mo ang ni lo in laizawn ang maiin min en bawk.
Keimah ber hi ka buaithlak ta tlat, rai haw em em chi ka lo ni peka,engmah ka ei thei lo a.Ka ei chhun chhun pawh ka luak chhuak leh zel mai. Drip kan khai awl lo va.Jordan-a pawhin engmah a ti hleithei lo.Vanneihthlak takin ka pa buaipui angai zui lo hlauh zawka, kan chhungkua ka chawk buai vek a ni ber..Ka inthlahrung em em chungin inthlahrung hleithei pawhin ka khawsa chuang lo.Thla thum tal tawp ka buai hnuah ka zia ta deuhin thil ka ei tui tan a, ka ril a tam leh reng ta thung..Club pawh keima hming ni tawh mah se Rindika kutah a awm vek.Poppy a inhnuk dawk tih min rawn hrilh ni erawh chuan nuam ka ti lo.Jordan-a nen bul an tan dun hman chiah lo nangin kum khat chiah Jordan-an a buaipui hnuah a zawm ve a.A ta ang maia a ngaih tawh kha a bansan angai ta hi keimah vangah ka ngai lo thei lo.
“Jordan...Poppy hi khawnge a awm ang?” ka ti chhuak hlawl.“Ka hre hauh lo mai, ngatinge?” Laptop a hna a thawk mawlh mawlh pah hian a ti a, Poppy hming ka sawi chuan amahah danglamna a thlen eih lo tih a chiang.Nidang ang lo takin eng ngemaw thinrimna nei a ang in ka hria a, hna thilah a buai ni turah ka ngai mai.
“Club atang khan a inhnuk dawk ta daih sia,engtin nge a khawsak ang tih ka ngaihtuah a” ka tih leh chuan miin rawn en a.
“Thil tul lo lo hi ngaihtuah thin suh,amah a in enkawl thei ” ati bung nghut a, a mood a uih ngar ngar viau.“Ni ve tho,mahse, ka rilru a luah tlat..’ ka ti leh chiah chu nin hmel lutuk a min en chungin,“Paih bo la a tha anih chu,i ngaihtuah peih mai mai ”ati leh hmuk a, a laptop a khup zui thawk.
“I thin a rim tihna mi??” inthlahrung tak hian ka ti a, ka tawng hnem deuh anih ka ring, mahse, engmah thinrimpui tur ka sawi ka hre lem si lo.
“Thirim lo,mahse, ka lakah thil zep i nei thin hi ka duh lo” a tih tak hlurah chuan phawk deuh hian ka en a..engmah zep ka neih ka hre si lo..Zobiaka chungchang tih chauh lo chu zep ka nei lo.
“U...ka lo lut ania” tih leh Estheri’n kawngkhar rawn hawn a ruala,inpawmbawr tun chung hian khumah a rawn thu ve a. “Eng nge i pawm tun a?” ka tih laia Jordan-a ngawireng a Room atanga a chhuak chu ka mitsirin ka hmu ru reng,mahse, Estheri tawng mawlh mawlh chu ka ngaihven ta zawk.
Es-i hi vawiinah a lo haw a, nau ka pai tirh khan Jordana leh ka nuin naute puala party neih an rawta, mahse Estheri hian a lo haw huna titurin min tih angin kan lo nghaka, keilahin rai ka lo haw bawk nen a remchang ta zawk phian.“Enteh, heng ho hi Naute thil tur ka lei an nia, chhunah kha chuan tlemte chiah ka phawrh a..”ati siam siam a, a Pack na a phelh chuan Naute thawmhnaw cute leh nalh tak tak hlir mai a lo ni a, Lawm tur ka ni tih ka hriaa, lawm pawh ka lawm reng bawk, mahse, Jordan-a awmdan khan ka rilru a tinuam thei hlawl lo.
“A van nalh hlawm em em..” ka ti hap a... a leithiam em em zui,.Mahse, Hmeichhia a duh zawk tih a thil leiah a hriat theih mai.“Naktukah bazar ang aw, Naute Room tur pawh hi siam angai tawh asin le” ti chungin a hawi kual a.
“Aaa, a hmanhmawhthlak loh em mai..”ka tih chuan a tlak karh
“Ka awm lai hian siam zo vek ula ka duh alawm, enteh,hei hi nalh ka ti rap,en ve chhin la” tih oah hian a phone a rawn lek hnai a,naute khum chung chang a sawi zawm mial mial nangin rilru ka pe tak tak thei lo. Ka rilruah Jordan-a bak kha a awm thei lo.
Estheri chhuah thleng pawha a rawn let leh loh avangin peih lo chungin inhnuaiah ka chhuk a. Jordan-a tlan chhuak tur ka va hmu hman chiah a,eng nge tun ang zan dar 10 hnu lamah a tih dawn ni?
“Sanu,Jordan-a kha khawnge a kal dawn?” tiin Sanu-i lo lut chiah chu ka lo zawt a, Ka nu leh ka Pa an mu tawha,Estheri Roomah a awm daih bawk.
“Miin an lo callin ka hria,a hmanhmawh sii a pawimawh a aniang, ka chhuak lawk dawn a, i u lo hrilh mai rawh ati a” ati awlsam mai,’U’ tiin min ko mai thin.
“Anih chu mawle, engthil chu ni maw? Kawngkhar en fel rawh aw” ka tih zawm zat.
A rei tak deuh avangin ka call a, a pick tak lohah phei chuan ka awm a nuam lo ta viau. Vawi 4 ka call na ah a pick ta hlauh,
“Eng nge?” a rawn ti teh tawp, tun ang hun tlai tawhah ka pasal a chhuak anih chuan a chinchang hre tur in ka call lo anih chuan a mak zawk ang chu..
“I chhuak tlai em a..thil hmanhmawhthlak a awm em ni?” ka thinrimna ka thup hram hramin ka ti a..Ka rilru a no em em a,min duat bawk nen tawngkam ngeiawm deuh a hmang chuan min ti na tlat.
“Aw, nakinah ka rawn bia ang che, min ngaihtuah suh” arawn ti deuh hlura,chhan pawh ka chhan hmain a Off zui ta daih.
Reife ka nghak a, achang leh ka muthlu thul.. Zanlai a ni tep tawh chungin a Call leh chuan a thinrim ka hlau bawk si,mahse, ka rilru a nuam thei ngang chuang si lo va ka call leh ta nge nge.
“Ka lo haw mek,ka lo thleng animai” Hello pawh ti lo hian a rawn ti a. A aw ah danglam a awm lo..mahse, ka Pasal anih tlat avangin danglam a awm tih ka chhungril hian a hre thei tlat tho.
Reivakloah a rawn thleng ta mai reng a, mahse, hetiang em em a rui hian a lo let leh ka lo beisei lo.Khumah a rawn let lut tawp a ni ber.Ka hamhaih lutuk a chet ngaihna pawh hre lo hian ka en reng a.
“Ngatinge a?” ka ti ringawt.
“Enga? Eng chu maw i sawi?” buh nuaih hian a ti a..
“Ngatinge i ruih chiam a?” ka ti chhuak thei hram.
“Engmah hre lo a mut ka duh..engmah..nangpawh, kei pawh..” mumal nei lo zet hian a ti leh nuah nuah a, chet pawh a che zui ta lo.
Tim dai hian a thawmhnaw phelh sak tum hian ka bana, Ka kut a rawn vai sawn pawp mai chu ka phu dawrh thei.
“Min khawih suh, Zobiaka emaw min ti mi a?” a ti leh phei chu ka chiai vek,Zobiaka ber kher chu a!!
Sofa ah ka mu a, ka muhil miah lo, Jordan-a hnar bur bur chung a mu chu ka en leh zauh thina,a inlet a inleta, hnar bur bur e ti loin a mutui vak lo a ang.
Zobiaka chungchang engmah ka hrilh lo hi ka tidik lo pawh a ni thei. Mahse, ka hmu ngai loin biak lah ka be ngai hek lo,Jordan-an a lawm lo tih ka hriat avangin a buaina chungchang pawh ka haider sak vek zawk kha a ni si, hlimna zawng zawng ka neih lai hian eng boruak tha lo nge ka tawh leh tak ni??!!! Hlim hi ka phu ve miah lo zawk nge ni?
Khawvar veleh Inhnuaiah ka chhuk thla a, Sanu-in min lo hmuh chuan mak ti hmel pu chungin,
“Ehe.. i va tho hma ve...Thingpui i in duh em?min lo ti thuai thuai a. Mak a ti viau mai chu ka dem lem lo. Ka tho hma lo tlangpui zawk tlat atin ni.Ka duh thu ka hrilh chuan a siam sawk sawk a, ka hmaah a rawn chhawp a, ka in chak hlawl lo.
Pi hmuni rawn thlen hnuah Midang an rawn tho ve a, Veranda ah ka thu chhuak a, Sanu-i u in hnahthlel kawt zawl a tla a phiatkhawm chu ka thlir dauh dauh. Boruak thianghlim var mai chu ka hip vang vang a,ka muhil ta miah lo bawk nen ka rit luk mai.
“Good Morning” No chawi chung hian Jordan-an a rawn ti a, nizan a rui em em a lo haw kha a ang tawh miah lo.
“Morning..” ka ti sap, ka sirah a rawn thu thla ve nghal a, a inbual tih hriat zet hian a sam a hnawng chap mai.
“i va tho hma ve” atih leh nghut chuan za lo zet hian ka then sak.
“Zanin hi Party satliah deuh nge Dinner Party?” ka ti ta daih.
“I duh zawk zawk..” rang vut hian a ti a. “Duh zawk ka nei lo. mahse, Dinner Party pangngai deuh anih chuan Sawmtei nu te sawm ve ka duh a..”ka ti hul hak.
“Anni chu nidangah le,zanin chu tlem a Hot deuh an duh ang” a ti leh lawka, ka duhzawng kha min zawh lek loh tur.
“Um, nia a tha lawm” ka ti ta tho.
“Ok, Hotel ka va tlawh lawk dawn a, chuan Zobiaka te kha chu i kutah ka dah ania,In in be reng tho bawk a” a ti hmuka, a thilsawi dan chu mei nei ngauh ngauh tak a ni. Ngei teh mah ila chhan en ah pawh ka en lo.Eng thudik lo nge a hriat hi ka hre duh ber.
Nilengin Estheri nen kan bazar a, Ka nu in a remti lo teh nangin Estheri pawh hi a u ang chiah a luhlul anih ve tho avangin a duh tawh naah chuan dan theih a ni lo. .Naute thil tur buai in a buai a ni ber.Chawhnu lamah ka nu in min rawn zawm ve leh a..kan bazar ta sa sa ka duh zawng engmah ka sawi hreh ta lo. Anni lahin lei duh an ngah ve tho bawk nen Tlai dar 4 velah kan haw thei ta chauh, ka beisei loh takin Jordan-a a lo haw tawh a,Ka pa nen verandaah an lo thu dunin nidang ang lo takin an ti ti muk hmel phian bawk.
Estheri tawng chul chuan an ti ti lai a pawt chat anih hmel,kan thil lei ho chu Jordan-a a hrilh nghal bawrh bawrha, Jordan-a hmel dam thluamah chuan nau a hmangaih tih a hmuh theih hial,an In ka kal hmasak ber tum pawh khan tiang chiah hian a en ka hmu tawha,thik en ah ka en lo.Unau chu unau an ni a, kei ka awm ve hma atangin unau an ni tawh.
Room ka pan chho a, khaw vawh dan a zia tak deuh bakah kan vak kual nasa bawk nen ka thlan a tla thei lek lek,ka kawrlum khumah ka theh thla a.Nizan lam a Jordan-a awm dan kha ka mitthlaah a lo lang nawn leh takah chuan ka maimitchhing ta ngawt.
“I chau em?” a, rawn ti thut mai chu ka phu nasa lutuk a ka thlawk lo chauh.
“Min ti phu alawm mawle” ka ti hlak ringawt.
“Sorry..i hahdam deuh hunah biak che ka duh ania”ati leh nghut a.
“Ka hahdam reng, sawi rawh" a awki ang maia nelawm lo hian ka ti ve hmak.
“Ka nupui i ni a, Ka hmangaih bawk che” thildang sawi lo in a ti fan ruih.“chuan..??” ka lo ti hmanhmawh..
“Ka fa i pai mek bawk a..ka fa, ni e..ka fa’ inring tawk lo niawm tak hian a ti leh hluk a.A sawi dan avang chuan ka lo thinrim leh hman tawh thung.
“I fa anih i ring leh ta na nge?" ka ti chang fak, inhauh hi ka duh tawh lo va,mahse, min tih danin a zir hlawl lo.
“Hun in a la hril ang chu..” a ti ve hmuk.
“I sawi awmzia ka hre duh..' Thinrim aw khur dar dar hian ka ti a. “In class re-union in neih zan khan khawiah nge Zobiaka nen khan darkar khat chuang in tawm bo??” a ti mar ut. a aw a ring lo, mahse,’ hlauhawm’ tih hian a aw chhuak chu a sawifiah thei ber ang.
Chapter-31 (last chapter)
Awmdan tur hre lo hian ka ding ren rawn a, a thilsawi lah ka hre sual lo tih ka chiang bawk si..
“I pu te chu i ko ta em?” Ka nu in a rawn tig chuan ka Phu deuh zawk.
“Aw, ko dawn chiah..” tih leh Room kawngkhar nem hawn ka ruala, a chhunga lo awm hoin min rawn en nghal thap mai.
“Pu, ka nu in lo chhuk tawh ula ati a, in laklawh loh chuan..” nui lui chungin ka ti a,tihluihna takmeuha nui ka ni bawka a za lo ngang mai. .Jordan-a en loin. Duata zawk ka en a, mangang hmel a pu tih ka hmu nghal chat,a hmel landan chuan thil thui tak min Ngaihtuah tir a, Jordana'n dik lohna a nei tih a chiang zual ka ti mai.
“Laklawh lo e,i chhuk ang u hmiang” ati chuar chuara, a tho tur chu rang tak hian Duata’n a pui a, Jordan-a erawh chuan chet pawh tum lo hian min en reng.
“Mate,lo la ding lawk teh.Pu, lo zuk chhuk ru..” dam thlup hian a ti a...Ka pu leh Duata an chhuak fel tihin "lo kal teh" a ti nghala, hreh hian ka en a. A hmel landan a la ngai reng, na nei hmel a pawh a pu hek lo.Mahse, Nitin ka tan a fight a, na nei reng siin ka mangang tur hmu duh lo in a rukin a lo tuar reng tih ka hre tawha, eng lai ber nge na hre lo mah ila ka hah hluah hluah.
A thutna sira ka thut veleh rawn thoin Ka thutna Chair banah a rawn thu ve a, Perfume rim pa leh amah nen a inhmeh ngawih ngawih chuan ka hnar a verh zar bawk.
Thildang sawi lo hian “Ka ngai che..” tih pahin min rawn kuah a.Kuah let ve lo hian ka thu khawng lah ringawt.
“Thil dik lo a awm em?” amah bawkin a ti leh a, an thilsawi kha zawhfiah nghal rum rum duh mah ila ka hriat a duh loh danah Khan ka zawtchhuak zo dawnin ka hre lo. Ka hre lo der zel rih mai ang,ka hriat hlau ngawih ngawih in a theih tawpin a lo thup ve a,a natna ka hriat rualin ka kehchhiat a ringa, a ring dik. Chhungrilah ka kehchhe meka, ka mangang em em bawk. Ka Ngaihtuahna a thilawm nen inmil na nei lo em em hian ka nui a,
“Aih,awm lo e, mahse ka bai siam laiin ka ding rei deuh a ka chau ve deuh..’ ka ti ta zawk,ka darah a rawn fawp zauh a.
“I che ve vak zel a,I bai siam an eichak anih pawhin midang puihnain hahdam deuhin siam tur che ania. Kan naute lah hian lo chhuah a chak tawh bawk si” a ti a, ring vak lo hian a nui zuia,.ka nui ve hleithei meuh lo.
“Chhuk ang, chawei an duh tawh sia, hun hmang turin min nghak palh ang”ka tih chuan bu nghut chung hian, “Nia, ee.naktuk hi i in check-up hun niin ka va hre ve” ati leh rih a, min hriatpui a tum bawk a, ka kal hun tur a theihnghilh ngai lo,thil pangngai ang maia ka lo ngaih tawh ni mah se ka thil hriat vang khan ka mittui a ko chhuak dawn ta tlat.
“Aw, hun tawh e,min kalpui hman angem?”ti chungin ka mittui rawn tla tur chu dan tumin ka khap lui sak sak a.
“Tehreng e a, i tan hun ka nei lo anih chuan tu tan nge ka neih chuan ang? Ka khawvel i ni ka tih kha..” a ti a, ka darah a hmaiin a rawn nawr zuia,ka mittui dan ka lo tum tang tang kha awmzia a awm ta lo,a rawn baw zawih a, ka insut zuia.
“Ehe..ngatinge?” makti taka ti chungin ka thutna hma chhuatah a rawn thu hniam zui nghal zat.
“Engmah a ni lo,ka pasal i ni hi ka lawm alawm..” ka ti ringawt, ka lungchhe bawk nen ka aw a lawi vek thei.
“Min en teh..” tih pahin ka khabe a rawn khawih a..A lang dam thluam maia,a mitah chuan min duatna chiang takin ka hmu thei bawk.
“Ka Nupui I ni hi keipawh ka lawm ania, ka duh mai che ni loin ka Hmangaih che a, a intan hun chu ka hre lo thung. Ka duh che tih leh ka hmangaih che tih hi sawi ngai loin I hre turah ka lo ngai mai thina. Mahse, sawi fo hi nupa nunah a lo pawimawh em em tihte nangmah hian min zirtira, engkim vang hian ka lawm..chuan maw, i natna tur in engmah ka ti ngai lo ang, i nat rual hian ka na ve thin a, ka peng pawimawh ber I ni ang bawk hian I peng pawimawh ber ka ni ve bawk si” a ti dap dap mai chuan min tahchhuah tir ta nge nge...Min rawn kuah a, a kawrhma ka mittui in a far huh nghal dap bawk.
“Khawiahmah ka tel lo in i kal lo ang tih min tiam rawh...” zawi te hian ka ti a...ka insut zui leh nghal a ni mai..
"I tello hian nun hman ka tum reng reng lo,i rualin ka kal zel ang..tap tawh lo la..i tah hian ka na ve vek ka tih kha..chuan, naute hian a nu a tap tih a hriat chuan a lungngai ve maithei bawk ania" Min chhaih pah deuh hian a ti a, ka mittui ka bianga luang thla a rawn fawp zui leh din duna,awm ngaihna hlawl ka hre lo.
Chaw pawh mumalin ka ei ta lo,Jordan-a ka lo en leh veng veng thin a, a tel lo a nun hmang tura ka ingaihtuah ringawt pawn thih ve mai ka duh zawk hial, engmah mumal in ka ngaihtuah thei lo a ni ber mai..Kan chhungte ho an haw fel hnuah mu turin Room lam ka pan ta chauha,engmah ka ti ve lo nangin kan inkawm khawm a,Jordan-a erawh chuan hna hmanhmawhthlak khawih lawk tur a neih thu sawiin Room lam a pan daih tawh thung.
Laptop nen a lo muhil chu niin, kaitho mai loin mittui nen bawk ka thlir leh ta nge nge, engatinge hetiang tehhrep a harsa a ka nun hi ka hman angaih bik ka hrethiam thei hlawl lo,ka nu leh pa leh Putea te min laksak hnuah ka Hmangaih leh min Hmangaihtu ka Pasal leh zel hi chu min laksak thei lo ang.Engtin nge keimah maiin kan fa lo piang tur hi ka enkawl theih ang ni?...
Khawvar dawnah ka muhil ta chauh, ka tahna avangin ka lu a na bur bawk.Jordan-a thawm dim taka a tho chuan min ti harh a, mahse, ka muhilah ngai se ka duh avangin ka meng duh lo, Bath Room ah a lut tih a thawm ah ka hrethei a,ka mittui a tla tawh lo,mittui tla tur pawh ka nei tawh lo zawk animahna..A rawn let leh a, Khum a che dat a,Ka biangah a rawn fawp a.’Ka Hmangaih che” zawite hian a ti sup a, a tho zui lehnghal mai bawk..
Room a chhuahsan hnuah ka thu chhuak a,a lukham delhna khuar deuh chu ka chul ka chul maia,ani hi Ka pasal ni lo in hriat pawh lo hre lo law law ila tha zawk turte ka ti ta rum rum..
“Ngatinge i mit a va bui ve?” ka nu in a lo ti sawk sawk a, nizan lam ka tah nasat luatah ka meng bui lak bawk reng a,min zawt pawh thil awm lo a ni lo.
“Nia, nizan chu ka mu tha lo lutuk a” pangngai thei ang ber hian ka ti a, Ka nu leh Ka pa hian Jordana natna chung chang e engmah an hre lo anih ka ring, Hria se hetianga hahdam tak hian ka nu hian a nun a hman ka ring lo tawp.
“Nau neih dawn hnaih hi chuan kan heti chawk ania, Huphurh reng reng suh”ati leh bawrh bawrha, Verandaah Thingpui in pahin kan thu duna, Jordan-a leh kan Driverin Motor an check chu ka en reng,nuihna chhan tur hi ka hmu hlawl lo.
“Nu, kan kal chhuak lawk dawn ania, Mate.Dar hnih velah ka rawn let hman ang, Lunch pawh in ah ka rawn ei ang” a ti zung zunga, engtin nge na nei lo ang hmakin nun a hman ka hrethiam lo,Duata khan a damdawiin a chhawk hun a tawi tual tual a ti bawk si,damdawi chungchang ka Ngaihtuah chhuah leh takah chuan Roomah Damdawi a thukru em tih ka en angai.
“Um, ka lo nghak ang che, Doctor kha dar 3 ania kan hmuh hun aw”tha taka ka tih chuan a bu nghut a, Motorah a lut zuia, an tlanchhuak chu an lan theih chhung ka thlir a...engmah ka ngaihtuah chuang pawhin ka hre tawh lo.Ka rilru a ruak vek a ni ber.
Room a thil dah that theihna tur lai ni a ka hriat ka hai chhuak veka, mahse Damdawi engmah ka hmu lo,rinhlelh tur eih pawh ka hmu lo. Damdawi a ei reng anih si chuan khawiah nge a dah ang ang? Inah a kawl lo ringawt thei si lo. Duata zawt tawp ila min hrilh duh angem ka hre lo,mahse, ka va hmuh angai, min hrilh duh loh tlat chuan vau pawh ka vau mai ang chu.
Dar hnih rik hma hretin a rawn haw a, keipawh tlem chuan ka zia ta deuh, hetianga mangang leh chiai taka ka awm hian engmah rah tha a chhuah lo tih ka hria,chu ai chuan engtia hmalak chi nge Duata ka sawipui angai tih ka hre thiam tawh.
Ka Doctor hmu turin kan kal a, Pathian zarah engmah that lohna ka nei hran lo,ka taksa sawizawi tam tur leh Mu tha turin min chah ngun em em maia, ka kal leh hun tur min hrilh a, " Zai i ngai dawn em tihte kan en anga, Damdawiin a i lo luh hun tur pawh kan tichiang dawn nia" Tiin min hrilh thlap. ..Mut tam leh hahdam ka mamawh ber lai nimahse, ka mut that theih ka ring lova, ka hahdam ka ring hek lo.
“A la hma tho sia, I nu te va tlawh ila” ati a, Sawmtei nu leh pa hi ka nu leh pa angin kan sawi mai zel tawh.
“Nia, pawi miah lo,nimin khan ka leng khat a ti niang, ka nu kha a rawn vui deuh a” ka ti ve mai,ka tlawh khat bawk tak a,a vui nang nang pawh kha awm ka ti viau.
Min lo hmuh chuan min lo lawm chul maia, chawei turin min ti lui tlat bawk, hetianga mi tha ka tawng hi ka vannei em em maia, tun hma lama an tana tangkaina pakhatmah nei ni si lo, thisen zawm pawh ni si lo min hmangaih em em hi mak ka ti thin. Min hmangaihtu tur zawk Pitei ve kha chuan a pasal farnu fa ka ni chung khan min Hmangaih chu sawi loh hnawksakah min ngai tlat zawk anih kha.
Sawmtei leh Rindika an sawm chawp leh chuk chuk a, an ni nupa lah vawiinah an zin an lo thleng chauh a, hnial lo in an lo kal ve mai bawk,kan han inhmuhkhawm takah chuan kan hlim ta phian maia, kei pawh a der loin ka nui ve ta hial.Sawmtei bulah hi chuan rilru hah hi a kiang thin a, mahse,engmah ka hrilh ngam rih chuang lo.
“Khawnge Jordan-a te kha?” Sawmtei pa in a rawn ti a, Pathian tih em em mai anni a,Chawei dawn a chhung inkhawm hman loh mai mai pawh an nei ngai lo tih ka hria.
“Inchungah thil an sawi dun lawk aniang,ka han ko ang” tih leh kal a rual a, an nupa hi awhawm ka ti thin, an inneihna a rei tawh tehreng nen an in hau ngai pawn ka ring lo hial,fa nei lo mah se an inngai em em a, Rindika hian a chhaih peih em em bawk.
Kan haw kawng tluanin vawikhatmah ka tawng lo, engvangin nge zu a in ka hrethiam thei lo va, zu in mi pasal neih ka duh loh zia lah a hre chiang si, thinrim takin ka insehruha, ani ai pawhin ka rui zawk a ni ta ber.
Saisir a ka mu ka dulah a rawn kuah a,"tihpalh,ka in tawh miah lo vang" a ti nghala, ka chhang duh lo. “Mawh...ka ti tak tak..” a ti leh a, aw a ngenna lang chu ka hriat hmaih lo..Party leh nuam tawl hi an nunah a bet tawh a, kan Inneih hnu pawh hian kal lah kan kal tam, keini chhungkua pawn kan buatsaih ngun viau bawk. Party naah zu a tam thina, ani pawh hian ka duh lo tih hre reng mah se lo in zeuh a nei tho thina, rui nawi leh buai a ni ngai lo va, a in tih pawh a hriat mang loh hial thin zawka. Mahse, ka lungawi lo ngei ngei tho.
“Mawh" a ti leh chiah chu thinrim tak hian, " In rawh, in char char rawh..” ka ti hlur maia, a nui nghal huk mai..Ka thinrim laia min biaka ka chhan loh hian a mangang thina, thinrim chung pawha ka chhang let anih chuan ka thinrim dan a nep tih a hrethiam tawh tlat.
“Yesss..i tih chuan ka in zel ang...” a ti a, ka dulah a rawn chula.
“A tha, keipawn ka in ve tawh ang.”ka ti leh hlar maia, hei pawh hi a zu in hnuhnung ber a ka tih dan tho..
“Aih, kan pahnih chuan in lo e.ka In tawh lo tak tak ang..” a ti thuaia, hei pawh hi a hma a min chhan dan ve tho a ni. Tawng tawh loin ka nui ta nge nge, tu nge Pasal te chungah reitak thinrim thei ang ni? Pasal neih ve hma kha chuan inthen te kha kan ngam sarh maia, "keichu chutianga min tih chuan ka then hmak ang" Te kha ka'n lo ti ve tak vak vaka, pasal han neih chiah hian khatiang ngawt kha a lo nih loh zia ka hrechiang tawh viau. Pasal te ngaihdam theihna hi a sang a, a thuk bawk, engdang vang a ni lo,Min ti na tu te pawh rei tak haw let ve lo tur leh ngaidam zawk fo thei khawpa hmangaihna nei a siam HMEICHHIA kan ni miau alawm le.
Jordan-a chhuah hnu lawkah tihtur ka neih thu sawiin ka Nu hnenah chhuah ka dil a, a chhan min zawt lo in a phal ve mai bawk.Nau ka neih hun a hnaih tawh avang hian ka nu hi IN ah a awm deuh chawt a, Jordan-a pawn zin tulna a neih chang pawhin a aiah midang a tir mai zel,nileng pawn hnathawk in a chhuak ta meuh lo. In ah hnathawh tur a rawn hawn zauh zauh a, a chang leh Rindika emaw midangin In ah an rawn kalchilh mai zel bawk.
Duata thawhna Damdawiin kawtah ka chhuk a, Driver hnenah min lo nghak turin ka ti bawk. Ka be lawk hauh lova, thawn thut a fuh zawk ka rin zawk vang a ni a, ka kal dawn tih ka hrilh lawk chuan ani hmuhchhan tur dang ka neih si loh avangin a u a lo hrilh ang tih ka hlau ber. .A nu hnenah a duty hun ka zawh sa vek avangin a awm ngei ang tih ka chiang.
“Doctor Duata ka hmu duh a” Duty hnenah ka tih chuan chik zet hian min en a, luh theih hun lai anilo bawk nen min hnial dawn a ang viau.
“Appointment i nei em?” min ti ta chat.
“Aih..” ka tih veleh,“Chuti chu luh theih hun nghak mai rawh” a ti ta mai renga. Mahse,
“Ni lo e,khawngaihin min han hrilh sak zawk la, ka call tlang thei lo a, Abby a lo kal ti la..”ka ti leh a, ka ngenna hrethiam se ka duh avangin a mitah ka en kar bawk,min hnial leh dawn emaw ka ti hman a, mahse a bu ta nghat.
Phone in tuemaw a biak laiin ka lo nghak ran mai..a biak zawh veleh min rawn en a,
“I chho thei e” nui var var chungin a ti a.Duty te hian an tih tur chu dan khauh tak a lekkawh anih avangin a hun lo a paltlang talh kan tum hian buaina kan siamsak fo,eng anga hmelhriat tha kan nei anih pawh hian a lo duty te zah tak a dawr mai hi a finthlak takzet.
“Abby, teh hlawl che chuan..” a lo ti chul mai,a Roomah min hruai lut a,ka kal thut vangin a hmelah mak tihna emaw hlauhthawnna hmuh tumin ka en uluk viau, mahse, Doctor a ni miau maia, zam chhe mai mai chi a ni lo. Chubakah Jordan-a te nen thlahtu pakhat anni a, an mizia a in ang tlang viau vek.
“Nia, ka lo kal zuai..” ka ti tha ve maia, engtin nge ka sawi tan ang tih ka ngaihtuah a, bul tan dan tur mai ka hre lo.Thingpui a lak tir dawn chuan ka duh loh thu sawi mah ila a ti lui tho.
“Engmaw i lo kal chhan?” a ti a.
“Thil tha deuh animai' ka ti te te, tawng lo hian a mithmul a tisang zauha. Ka sawi zawm leh hun a nghak tih ka hria.
"Tak takin i u chung chang ania, ham sawi mai dan tur ka hre lo angrenga..Jordan-a ania ka tih ” ka ti bah nawk nawk mai.
“Eng ber nge i hriat duh?” dam thlap hian a ti a, a lo inbuatsaih lawk niin ka hre ta.
“Engchen nge hun a neih?” ka ti tawl maia, a khuh kharh thung.Muangchanga Thingpui a in leh phawt hnuah min en chung hian, “Hei hi chu amah nen sawi dun ula ka va ti ve" a ti ban ta chat.
“Aih,nangmah ka zawt che alawm, engchen nge hun a neih ang? I rindanin" ka ti leh zung zung. A thaw deuh haka,
“Ka hre lo le, kum khat...kum hnih..a aia rei emaw rei lo pawh” a ti ta nge nge, a hma khan ka lo hriat tawh vang a ni ang, min thawn dan a zia viau,mahse, na tak a la ni tho.
“A hma khan engmah i sawi si lo a..” ka ti leh ringawt.
“Abby, hmanhmawh taka kan zai nghal chuk chuk khan a nun hi a chhan a, diktak chuan khami tuk a kan test resultah khan ka beidawng nghal tawh. A tluk thut tuma a rawn harhchhuah Khan test engpawh nei ila amah vek hrilh turin min ti a, chuvangin amah vek ka hrilh. Engmah sawi chhuah a phal lova,ka u anih vang ni loin Doctor ka nihna zawkah sawi lo tura min duh chu ka sawi thiang lo,nangmah hian engtin nge i lo hriatchhuah ka hre hek lo” Ati leh dap dap maia...Beidawng em em hian ka en a,
“Hre tur ka ni zawk asin, mahse, amah ber in ka hriat a duh loh chuan ka hre lo mai ang chu”ka ti fan raih.
“Nia, ka nu te pawh kan hrilh lo. Ka Pu in a hre ve a, chuzawng chu animai..Beidawnthlak viau angin lang mah se kan nunna hi Pathian thu ania,Doctor te pawh kan beidawn tawh naah hian Nunna pe tu hi a che fo asin..Tawngtai la,kei pawh ka theihtawpin ka tawngtai reng ania” a ti leh charh charh.
Duata ka hmuh hnu atangin ka tap leh ta lo ka ti lo, Mahse, ka zang hawk a, ka harsatna hmachhawn dan tur min hrilh ka ti lo thei lo. A hna hi Zu nen a pawlh chi a ni lo ang ngeiin nun zahawm tak leh Pathian tihna nen a thawk tih ka chiang em em tawha, a bul a awm a hahdam thlakin ka phurrit phurh a zang ta hawk nimaiin ka hria.
Mahse, ka hahdam famkim thei tak tak rih lo va, achang chuan tuar thiam loh chang ka la nei fo. Jordan-a tan hmuh hrehawm in ka awm ka hlau a, amah in min ngaihtuah ang chiahin ka ngaihtuah a, a natna thlen belhsaktu nih ka duh lo. Mahse, a muhil hmel ka thlir a, mittui tla lo a nikhat lek pawh hun hman ka nei mang lo. Pathian ka au ka au a, engmah chhanna ka dawng si lo.
Hmuhnawm ti zet hian Tv a en a, "Jordan" ka tih pawhin a hre lo.
“Jordan..” tih leh Lukham a thlawk phei tel nghala, ka pum a na lutuk..
Rang lutuk hian a rawn hawi phei a, thlan fim nen a ka lo vial ngawl ngawlh min hmuh rualin min rawn pan hnai nghal ruak ruak mai..
“Ngatinge?” min rawn kuah pahin a ti a, ka nau neih hun a la ni si lo..karleh lam zawk niin Doctor kha chuan a sawi a,mahse,tuna a nat ang hian a la na ngai lo.
“Ka pum a na lutuk, ka nu ko vat teh..”ka ti thei hram.
Ka nu aiin Estheri a rawn tlan lut hmasa hret, nau ka neih dawn hnaih tawh avangin a rawn haw a,a phur em em bawk.Ka nu in ka awmdan min rawn hmuh rualin nau ka vei tih a rawn hre chat mai,Jordan-a lah tihtur ber hre lo in a phi ve sek bawk.
“Mama, Phi sek lo khan Motor lo zuk lakchhuah tir teh, chuan Mampui, Bag ho kha Hmuni nen lo zuk dahthla ula..’ ati zung zung a, Jordan-a Slipper pawh bun lo a atlan chhuak chu ka en a, ka nuih a za a, ka nui hleithei bawk si lo.
Darkar 7 tawp ka vei hnuah min zai ta nge nge, Sawmtei leh a nu an lo thleng thuaia, ka nu a awm reng bawk. Jordan-a erawh lo luh an phal lo bur thung. Naute tap ri ngak ngak ka hriat rual chuan ka nun hi hlimna in a khat vek nimai hian ka hria..
“Mipa kan nei e...” ka nuin tah aw deuha a ti chu ka mang hriat ruai ruai..
Tuemaw hian ka chal a rawn fawh chuan Jordan-a a ni tih ka hria..Ka hmai alum pap maia,a mittui a tla tih ka hria. Fa a neih vanga a mittui tla hi ka dem lo,a fapa a hmu hman hi atan a hlu lutuk.
Damdawiinah karkhat kan awm a,kan chhuahni chuan kan In chhung hlimna in a khat vek, ka fapa,sam dum hlap mai, a pa ang em em mai chu ka pa in a pawm a...
“Tunah chu Pu ka ni ve ta, i In i rawn luhna hmasa ber ah hian i Pu hming daih loh nan JONATHAN ZOMUANSANGA tih hming thar nen ka lo lawm lut ang che..” a ti charh charh.
“Zanin chu thil engngemaw ka ngaihtuah a?” ka hnute rawn khawih paha a tih chuan a Ngaihtuah ka hria.
“Kan thei dawn mi?” ka tih chuan a nui a. "Enge sawi i tum? " Lai deuh put put chung hian a ti leh lawi. "Ka hria alawm.. I hmelah Khan ka hre vek" Inti fing takin ka ti a. "Ok..i fing thei si, engmah i tih ve angai lo ang, ka ti vek ang..” a tih takah chuan ka nui hak hak mai...
Tunah chuan kan naute pawh thla ruk lai a ni ve ta, ka hlauhthawn angin Jordan-a lakah engmah a thleng ta lo.Kan naute lah Ka pawm hman meuh lo a ni ber, ka nu leh ka pa in an la reng maia, Nau min khawihpui tur Jordan-an la mah se a kutah ka dah ngam lo,a fel lo ka ti lo, ka fa ani a, ka kutah ngei seilian se ka duha, nitin hnathawka chhuak ka ni lo bawk nen keiman enkawl ka duh ber. A tahbelh lo em em mai bawk nen naupawmah chuan ka nuamsa ber hial ang, thil thiam thar a neih apiangin kan chhungin kan lawm thei em em a, Estheri hnen a thleng nghal vat zel bawk.Kei aiin a pa a ngaina emaw tihtur a ni thung,
“Khawnge Jonathan-a ?” kan nula hnenah ka ti a, Club chungchangah meeting kan nei a, ka kalkhat deuh bawk nen tihtur a lo tam viau maia, ka rei ta phian, ka chawlhsan mai ang ka tih lahin Jordan-an a phal der si lo.
“Inchungah U Jordan-a nen an awm” a ti a, Naupuan leh naute thawmhnaw a thlep tha mawlh mawlh bawk, Diaper hi ka hman tir mang lo, kan khum bulah a khum kan hunga, Estheri duh ang thlap a siam a ni bawk a, Sawiselna tur ka hrelo.
Room kawngkhar bulah ka ding a. a reh thiap mai..Dimtein ka nem hawng a..Jordan-a lukham nghengin a lo thu mu a, a chungah Jonathan-a bawkkhup zawngin a muhil ve bam bawk.Ka Phone ka phawrhin thla ka la nghal mial mial mai..Engchen nge Jordan-a hian a fapa hi a pawm ang ka hre lo..Nimin khan a lu na a sawi leh tawha, khavang khan nizan pawh ka tlaivar deuh thak,mahse, vanneihthlak takin engmah a thleng zui ta em lo hlauh.
Zanriah ei dawnah ka kaitho ta chauh, Jonathan-a ka laksawn lai pawh a hre lo..
“Ka lu a nuam lo leh deuh tlat, ka ei lo mai ang” alo tih chuan ngaihthat lohna bawkin min tuam a, ka lungphu a rang nghal dawt dawt mai.
“Damdawi ei la..” ka ti vat.
“Ka ei tawh lawm, zuk ei rawh, Bawiha ka lo en ang” ati leh maia, a chal ka khawihsak chuan a lo diai diak maia, khawsik a awm lo..a sam chhip buk deuh bik chu ka fawh sak zauh hnuah ka kalsana.
Chaw Tlem te ka ei a, ka nu hnehah Jordan-a nawm vak loh thu ka sawi chuan a meng phawk nghal hra mai..
“Damdawi a ei em?” ati nghal zat, ka bu nghat ringawt, ka pa erawh chuan ngawi rengin a ei ngaiin a ei zawm mawlh mawlh thung.
Room a ka let leh chuan a lo muhil leh hman tawha, Puan ka sin tir hnu a Jonathan-a khum ka pan leh tur chu rang lutuk in ka hawilet leh nghal vat,Jordan-a thaw ri hrawih leh a awm in sep dawrh ka hmuh rualin ka tlan chhuak a, ka nu ka ko nghal tuar tuar bawk.
Vawiin hi damdawiin a nithum kan awmna a ni ta, kan luh zan atang khan vawikhatmah a harh leh tawh lo,Duata pawn zep lo in engkim a sawi ta law law a, ka nu nen kan tap nileng deuhthaw a ni ber, ka lo hriat tawh sa avangin ka tan chuan tuar dan tlemin a ziaa..mahse, ka nu tawrh na chuan min ti na tha leh a,beiseina engmah ka nei hek lo.
Estheri a rawn haw nghal a, Jonathan-a pawh a kutah a awm rih chawt, ICU ah a awm avangin tih vak tur awm lo mah se ka kalsan duh lo va, a chang chuan hmuh min phalsak leh zauh thin bawk.
Chak lo tak chungin Ka pu damdawiinah a lo kal ve a, min hnem nan ka kut a chelh deuh chawt.A tu hmuh hmasak ber leh a duat bik a ni a, na a ti tih ka hria..’Theih se chuan a tuar ai hi ka tuar mai tur, ka tan chuan nun hi a tawk tawh asin le” a tih chuan a hmangaih zia a tilang chiang lehzual.Ka nu pa erawh a taksa a chak loh em avangin lo kal ve thei a ni lo, mahse, Jordan-a vang hian a ni pawh a chau zual tih an sawi tel zauh bawk.
"Abby,lo lut la" Duata'n a rawn tu a, Ka zui lut vat, beiseina nen a khum ka pan chuan beidawnthlak takin a mut ngai bawkin a lo la mu ta cheu..
“Eng chen nge ti hian a mut ang?” ka ti sep.
“Ka hre lo le..Diktak chuan khawl hi kan phawi hun hun a kal hun animai..i thu thu a ni a, kan chungkua chuan i duhthlanna hi kan ngaipawimawh ber..ka nu leh ka pa pawhin i ngaihdan hi an ngaipawimawh ber” zawi fiah tak hian a ti a,, bang ka ngheng deuh rawk mai.
“In sawi ho tawh em ni? " ka ti a. "Um, sawi ho ti ila ka nu leh ka pa ka be tawha..Nangmah pawh sawipui che chu an tuma, ka thuin ka lo hrilh che anih hi" dam thlap hian a ti a.
"A va beidawnthlak tak..tunah chuan engmah ngaihtuah ka duh lo..” beidawng tawpkhawkin ka ti zuai raih.
“Ka hre thiam lutuk che, mahse hetianga chelh reng hi awmzia vak a awm lo va, kan tuar rei tir mai maia..Khai aw…Engtizia nge? Nurse..” a ti zui nghal zat..
Jordan-a mutna bula khawl awm chu a phe zawk zawk a, mumal lo zet hian a rawn de zawk zawk a,Jordan-a a kang deuh dawrh bawk.A ri leh vak a..Monitor lam ka en chuan Line pakhat hi ngil takin a kal phei nghala,.ka tap thei lo va, ka chiai hek lo..
“A nu....hei hi ka thiam lo a...”titu hian ka hmai nisain a chhun chu a rawn hliah a...ka meng nghal thuai ,ka Fapa,Hmeltha leh a pa ang em em mai chu nuiseng hian lehkhabu kengin a lo ding a.,a ha hmai a bal vek bawk.
“Khawi maw?” tih pahin ka ban a, ka mal chungah a rawn lawn kai nghal zat bawk.Kum ruk lai a ni ve ta. Ka hlimna ber a ni a, ka hmangaih hluah hluah bawk.
“Vawiin school lam eng nge a an?” ka ti a,
“A nuam lutuk,mahse, a Ni in nakumah chuan a Pa school kalna thin ah ka kal ve tawh ang a ti a..” a ti a, nur nang hian min rawn en a, ka kawr hma a thil lem a khawih pah nauh nauh bawk,a nur deuh nang chuan Jordan-a hmel a ang lehzual.
“Um, a sawi dik alawm, kan chhungkua a mipa tawh phawt chu in kal zel angai alawm” ka tih takah chuan a hmui a ti pawrh a, thli thaw chuan a sam a chhem thur hiang bawk.
“Mahse, ka kal duh lo alawm,i bulah ka awm duh a..” ati leh nang nang.
“A la rei em mai, kan la ngaihtuah tha leh dawn nia..A-ni hnenah va kal la,thil thar a nei in ka hria..” a rilru lak pen nan ka ti a, a pa ang chiahin a tihmawh em em a, a rilru a lianin tun atang hian a tih tawh lamah chuan a beidawng duh der lo.Ka nu leh ka pa lah hian hauh pawh an hau phal si lo, ka hrem chuan ka nu ka hrem tel a ni zel maia, hauh lah kan inhauh phah tam ta.
“Yess.. ka va dil teh ang..” phur zet hian a ti a.Ka mal chung atangin a zuangthla nghal tharh bawk.In chhunglam panin a tlan a, mahse, Gate a Motor rawn tlan lut a hmuh rualin a ding leh chawt..
Gate lama tlan pahin,
“Anu,..Apa a lo haw ania” tiin phur lutuk hian a au a… Jordana kar hnih zet chamin a zin a, naktuk a lo haw tum emaw ka tih kha tunah a lo haw leh thut lawi si.
Jordan-an min rawn pan mek chu ka en reng a, ka rilruin Pathian hnenah lawmthu ka sawi nghal mawlh mawlh bawk..
Khami ni khan a thaw a tawp a. Mitthi a puan a ni hman hial, Mahse nunna pe tu kan Pathian hian a kal mai a lo la phal lo va, ka mangang au rawl kha a lo hre renga,ka tawngtai chhanna ka hmu lo emaw ka tih kha ka hmu chiang em em mai. Kum 6 zet a liam hnu pawh hian engmah insawiselna a nei leh ta lo...A chunga thil thleng kha a hria apiang ten thil mak tiin an sawi thin.
“Min lo ngai em?” tih pahin a chungah min pawt kai a...a khabe ka khawih nghal nauh nauh.
“Ngai tehreng mai..” ka ti ve sap.
“Enteh,Jonathan-a hian nau nei tawh se a tha lo maw? " a ti leh daiha.
“That te chu tha e, mahse kan thu a ni hleinem,Pathian thu thu alawm” ka ti ve thung.
“Um, a thu ber chu kan dil ang chu...kan mamawh zawng zawng neitu leh i rual a kal tur a nun min pe tu hian kan dil te a hria alawm” a ti dam thlup.
Khawvelah hian engmah mamawh lo in kan nun kan hmang emaw kan ti fo thin, mahse,engkim bul leh a tawp chu Pathian a ni a, mihring nunah hi chuan Happy ending a awm ngai lo,hei hi kei chauh ni lo in Jordan-a pawh hian a pawm thiam ve tawha..Tunah hian ka bulah nunna neiin a awm leh ta ngei maia, mahse, hei hi nun hlenna a ni lo tih kan hria, engtik niah emaw tu emaw zawk zawk hi kan kal hmasa aang,kan hlimna tawp loh hun,Nun tak tak kan neih hun chu VANRAM ah chauh a awm tih kan hria a, chu hmun a awm dun tum chuan kan damlai ni te tha thei ang ber a hman tumin kan nupa in kan bei mek zel a ni..
A tawp ta..
Comments
Post a Comment