BLACK HORSE- 10

Chapter- 10

Chaw pawh ka ei leh ta  lo,ka mu meng kar a, pawnlama thli thaw vuk vuk leh kawlphe zawr zawr te,Tek tla ri thuai thuai te chuan hlauhna min siamsak zo lo,nidangah chuan hei aia hlauh hi ka nei ngai lo.Simon-a pawn chiang takin a hria a, min kuah bet tlat thin a, mahse, zanin hi chuan Room lam a rawn pan lo a, kei pawn tum dang angin hlauhna ka nei hek lo..Ka hlau ta lo a ni hauh lo a, a aia  rilru tibuaitu ka neih tlat avangin ka hlauh tur angin ka hlau ta lo mai zawk.

Kha zan khan engtin nge ka chungah khatiang thil kha a thlen ka ngaihtuah a, ka ngaihtuah nasat poh leh ka bo nasa ting mai.Ruatdika khan ka chungah eng nge a tih ang? Kha kut kha tu kut nge? Engmah hre lo pawh ni ila nuam ti hmel lutuk kha engtin nge ka put theih? Ka nun pumah hian Simon-a nen lo chuan tu mipa mah sex ka la hmanpui ngai lo a, ka bialpa hmasa nen khan reitak kan inzui ngei, mahse, ani nen pawh khan hetiang lam reng rengah sawi tur in ka awm lo.Simon-a nen pawh kan inneih hnuah chauh sex kan hmang a, mipa dang nena sex hman hi mumangah pawh ka lo la hmu chhin ngai lo.

Ka tho leh ta nge nge, Bathroom ka pan a, tun ang hun, Favang hnaih tawh hunah hian eng thli nge tleh a, hetiang em em a tam ruah a sur tak ka hrethiam lo, ka lungngaih na nasa lutuk hi min hriatpui ve anga, a hun lo ah nasa takin min tuarpuinan a rawn thawk zawk pawh a ni mahna..

Shower ka herh hawng a, a hnuaiah ka ding a, ka huh vek,ka thawmhnaw atangin tui a far tluah tluah a, pawi ka ti lo,he taksa bawlhhlawh lutuk hian mipa dang a inkhawihtir a,a tenawm tawh.Nimin kha chuan Simon-a kha ka hua a,ka dik lohna ka hriat loh avangin ka ti let ngam lo a,ka hriatchhuah veleh ka ti ang tiin ka insehruh a, mahse, engmah ka duh ang hriatchhuah tur a lo awm lo.Ka hriatchhuah tak zawng chu thil pawi tak leh hrehawm tihna avanga ka natna tur zawk,a rapthlak lutuk,Simon-a ka huatna ai chuan tenawm ka intihna leh dam tlak lo ni a ka inhmuhna hi a nasa tawh zawk.

Tah pawh ka tap thei lo.Tah chhan tur ka hre lo ti ila a dik zawk ang, ka thawpik hluah hluah a, siamthat theih tawh si loh kha zan kha ngaihtuah loh ka tum nasat poh leh ka hrechhuak tam ting mai.An thil min intir kha ka rui tih ka pha lo,min inluihtir ti dawn ila min manbetin min tulh lui hauh si lo.Ruatdika khan In ah min thlah tur in a insawi a, Motorah pawh min dahlut thlap, mahse, ka hriat leh hmasak ber chu kha Hotel kha a nimai bawk si...Ruatdika emaw Hriati pawh ka hmuh ngei ngei angai, mahse, engtin nge ka hmuh ang? In atang hian Simon-a thu lo chuan ka chhuak thei lo a, hna lah ka nei lo chu a nimai tawh bawk si..Mi tang ka ni.Tuma khung luih ni lo,ka tihsual rah seng vang liau liau a mitang ka ni ta..Tu nge he thil ah hian dem tur ka neih? Chhanna pakhat chiah a awm..tumah dem tur an awm lo. Keimah chiah..Simon-a awmdanah khan dik lo ka hmu anih chuan a hmain ka sawi thei a, ka pasal anih ang ngeiin ka lawmlohna te pawh a ruk a vawng lo in ka sawi tur zawk anih laiin ka rilruah ka khawl khawm a, min biak loh pawn be hmasa duh lo in ka ti tau kual a..ka hlawh chhuah ka hmuh meuh chuan inchhir a sawt tawh der si lo.

“Ka nupui i ni tawh lo, mahse ka then lo che,nitin hrehawm i tuar ang” ati anih kha..

Ka tlaivar ta thuak, a chang leh ka mu a, a chang leh ka tho a,a tawp a tawpah chuan awmngaihna thlawt hre lo in Tukverh ka hawng a, zantir lama ruahsur nasa em em si kha Thla a eng ut a, khua a vawt vur a, thli a thaw heuh heuh bawk. Balcony lian lo te, vawi tamtak Simon-a nen hun kan hman dun thinna a ni a, keimah chauhin chhuatah ka thu sawp a, Tukverh darthlalang vawt thlur mai chu ka ngheng a,ka hma lama khawpui pe tuar mai, de neuh neuh chu ka thlir ta zawk...

Motor horn ri ah ka harh a, ni a lo chhuak daih tawh, Balcony ah ka lo muhil zui ta daih anih hmel,ka mut a chhuak pawh a ka hriat loh kha ka lo chau ve deuh ani mahna.Peih lo fe hian ka zi mar ar ar a, Motor thawm kha kan Compound chhung niin ka hre leh lawi a, a chhan chu ka thutna lam hi In hnung lam a ni a, thenawmte awm lohna lam anih avangin tumah min hmu tur an awm lo, kan In thlang feah  vengdang nena kan in kalpawhna kawng a awm raih a, Motor tlan tawk awm reng mahse thawm a hriat phak loh thung.

Inhnuai lam panin ka chhuk thla chhat chhat a, thawm awm lo in a reh thap mai..Simon-a a chhuak tawh em ka hre lo a, Min kal chhuah tir a tum hauh lo anih chuan min veng turin Inah a awm angai ang chu.Kawngkhar a rawn inhawng a, kan Driver a rawn lut a, min hmuh veleh a rawn nui var var bawk.Ka thaw huai mai.Tunah chuan midang cheng ve an awm leh ta a, Simon-a tan pawh min khuahkhirh tlat a harsa talh ang.

“I lo thleng chiah ami?” ka ti a, a bu nghauh a, Apa rawn hruai thlak tum ni khan a insawi a, hmuh tel ve ka lo inbeisei deuh nangin tumah a rawn hruai lo.

“Ka pa a lo ziawm phian a, ka tum aiin ka lo haw hma leh thei a,bakah Pu khan min mamawh anih ka ring a..” ati a, a chawhmeh rawn hawn a niawm tak hi a khai a, chhan pawh ka chhan hmain Kitchen lam a panpui a,a hnungah muangchangin ka zui lut a,ka rilruah thildang daih a awm thung.

Kan nula awmna min zawt leh a, karthar lamah a lo haw dawn thuin ka chhang liam mai,a lo haw dawn tak tak em pawh ka hre lo,eirawng ka bawl a, tunah chuan Nupui ka ni ta bawk si lo a, ka nihna ber chu ‘Awmpui’ animai,abak sawimawina dang a awm lo.Midang tan chuan Nupui ka la ni ngei ang, mahse, Simon-a tan chuan ka ni tawh lo,chumai bakah Emily pawn a hre thuai ang, Kha hmeichhe hnenah kha chuan a hna mai bakah a mimal nun leh ka nun nen lam a share vek zel tlat alawm le.

Gate lamah Motor thawm bawk a rawn ri leh a, Tlana a chhuak vat a, tu nge lo kal hriat tum hian kitchen tukverh a Curtain chhah lam inzar chu ka pawt hlim a, Taxi a rawn tlan lut a, tun ang hunah tu nge lo kal ang ka hrethiam lo.Taxi leh lek phei chuan..

“Ka cousin a lo thleng anih hmel hle mai..” ka hnung lam atang hian Simon-a aw hian a ti hluk a, a lo luh lai ka hre bawk si lo, ka phu nasa kher bawk.Tunlai chu ka phu dawrh dawrh reng mai anih hi maw..

“Ka hriatsa a ni em?” pangngai takin ka ti let a, nizan thil thleng zawng zawng kha ka mumang a ni hauh lo tih a hmel nelawm lo leh a mit sen rumah chuan a lang chiang hle bawk.

“Ka Cousin te tu nge i hriat?” ati leh nghut a, ka ngaihtuah a, tlem chu ka hria, mahse, chung ho pawh chu Lunglei lamah an awm hlawm avangin ka hmu ngai meuh lo.Chhungkaw inpawh tak an ni lemlo bawk nen Aizawla awm te pawn min rawn tlawh ngai vak bawk si lo.Ka nu a lo kal changa an lo leng anih loh chuan ka hmu ngai lo.

“Ka hre nual alawm..” ka ti leh mai..Tomato ka la chhuak a, Salad siam tur dang nen ka tifai zui leh mai..

“Tuna mi hi chu i la hre lo ang, mi thar hlak ani e..” ka thil tih lai ka chawl dat a, chhan ka tum zet nangin ka chhang ta lo.

Simon-a chhuak thawm ka ngaithla kar a, en loh hram hram ka tum thung,Tlana rawn tawng lut lawng lawng thawm ka hre zui zat bawk, Simon-a nupui ni tawh lo mahila midang hmuh dan chuan nupa kan la ni reng a, a Cousin kan hnena awm turin a lo kal a, ka lo welcome miah lo anih chuan thil mawi lo tak a ni ang tih ka chiang, mahse, awm dan mai tur ka hre der lo thung.

“Awi, Mam...i tha em?” hmeichhe aw tham nalh zet hian a tih ri ka hria a, a aw chuan ka beng a verh zar mai.Khawiah emaw ka hre tawh a hriatna ka nei a, mahse, khawiah nge ka hre lo.

“Um, tha e..in tluang em?” Simon-an zangkhai vuh a a tih ri ka hre leh a, muangchangin ka ding chhuak ta nge nge.Ka Apron hak laiah ka kut ka hru hul a,kan nula, langa lo kal thin kha a lo kal ni a ni a, vawiin chu nidang aiin a lo kal tlai hret,karkhatah vawi nga a lo kal a, Sunday leh Saturday a chawl thin a, nimin kha chuan a nawmsam loh vangin a lo kal lo thung.

“Tluang e, enteh..hmana Delhi kan awmlai a i thil duh deuh kha ka lo..” min hmuh takah chuan a tawp chawt mai..a sam dum hlap,nung sar mai chu a dar chen lekin a tan rual hmak a, a chalsam a kilh bet a, T-shirt dum a ha a, kekawr tlawn, mar tangin a ha bawk..a lian lutuk lo a, mahse, a sawifiah dan awlsam berah chuan a ‘Hmeltha’ ti ila a kim ber ang.Ka la hmu ngai miah lo tih ka hre nghal bawk.

“Ka nupui, Hmingthani..i la hmu lo tiraw?” ka lamah a thle buk a, ka landan nalh loh tur zia ka lo ngaihtuah ve thung.

“Um ,la hmu lo..mahse, ka ni sawi aiin a hmeltha fe zawk anih hi..” a nui har har a, a mit lian kel kawl chuan min rawn en a, ka lai lek lek mai..

“I tilawmawm hle mai, nangpawh i hmeltha alawm..engtin nge ka koh ang che?” ka ti a, ka kut ka phar chhuah chu a rawn vuan a, a kut tin sei sel sawlah chuan Nail polish rawng lar fe a hnawih that bawk.

“Ha...Mama hian a la hrilh lo che mi?, Sawmtluangi ka nia, Delhi kan awmlai chuan mi in kan hming a inhnaih avang hian min fiam nasa thei lutuk” atih zawm leh siam siam a, keini aiin a nau daih zawk awmsia engtin nge Simon-a te nen Delhi ah an awm ho theih ka hrethiam lo.kei aiin Simon-a a upa zawk a, a nau lah chu kei ai pawn a naupang fe ang tih hai rual a ni lo.

“Um ,anih chu mawle..i chau awmsia, Room lamah indah fel i duh em?” ka ti a,

“Alawmawm ngawt ang, tlem chuan ka chau ve deuh..”ati awlsam leh mai..a chet zawng chuan a sam dum hlap mai chu a che siau siau bawk.

“Ruth-i room a awl a, a lo kal chang chauhin a hmang thin a, tah chuan i awm ve duh mai em? “ka ti a, Room dang awl awm nual mahse Ka nu room hman bikah chuan tumah kan dah ngai lo,amah awm lo mahse keini pawh kan lut mai mai ngai lo.Ruth-i te hi chu kumkhatah vawikhat te an lo kal chauh a,lo hmantir kha thilpawi niin ka hre lem lo.

“Inchung lamah khian kan room leh room awl dang pahnih a awm a, i duh chuan i awm thei a..”Simon-an a lo tih ve takah chuan ka mengphar vak ringawt,kan room lam hnaiah hian a farnu te pawh lo kal mahse a awm tir ngai lo.

“Aaaah, Ruht-i room chu inhnuaiah hian anih chuan ka lo hmang zawk ang, i hria em? Ka ke ruh avang hian Step kal ka harsat tih kha..” Simon-a hnenah a ti leh a,Simon-a lo bu nghut ka hmuh rualin an inpawh em em ang tih ka chhungril hian a lo hre ve tawp, mahse, engtin nge hetiang em em a a pawh leh kan hnenah meuh kan awmpui tur ni si hi tuman a hmain an sawi ngai miah loh? Ka nu leh Simon-a nau te pawn an sawi ngai miah si lo.

Tlana’n a thawmhnaw a khai luh sak a, ka va lut ve zawk nangin ka eitur siam lam ka ngaihven san leh ta zawk, kei hi ka dik miah lo..Simon-a sawi kha a dik anih ka ring ta rum rum, ka rilru lam a chiang lo a, thil engkim ka ringhlel zel mai niin ka hre tawh,Sawmtluangi leh Simona-a ah hian thildang awm niin ka hre leh tlat tawh.Ka vawikhat hmuhna mai chauh ani lehnghal a, hetiang lam engtin nge ka rilruah a lo luh ngawt theih ka hre hlawl lo.

Chawei hmain kan nula a lo thleng ta hlauh,ka thaw huai mai..”Vawiin chu chhuah lawk ka duh a, Tlana nen hian kan kal thei angem?” chawei laiin ka ti a, chhuah phal lo mahse midang awmlai chuan min hnial miah lo ang tih ka chiang ve tlat.

“Eng ti turin maw?” a thil ei lai ei zawm mawlh mawlh chungin a ti a.

“Phone lei ka duh a, ka phone kha siamtir ai chuan a thar lei mai athat ka ring a..” ka ti leh a, a vawm keh chhe hneh lutuk, siam pawh tum ila a thar man lawih kan seng tho tho ang.

“Ka rawn lei mai ang, eng ang nge i duh sawi la” ati leh a, kan nula in mak tih hmel deuh a min en tawn zak zak chu ka mitsirin ka hmu ru reng, mahse, ka pawisa duh lo.

“Aaa, keiman ka lei zawk mai ang, i buai thei si..hna ka bansan tak rau rauah chuan ka nu te in lamah lenkual zuai ka duh bawk a..” ka ti leh a, na zet hian a Fork a dah chawrh a, ka lo rinlawk loh dan ani bawk nen ka ip chawih mai..

“Engmah buaithlak a awm lo, ka lo lei mai ang..” ati leh nghut a, a chair a nawrsawn a, a tho zui nghal daih bawk..Nuam ti vak lo hian midang an in melh kual ralh ralh mai.Sawmtluangi a lo thleng chauh a, kan inhnial niawm tak a hre nghal mai bawk nen, thil nuam tak erawh a ni lo.Mahse, midang awm laia ka dil anih si loh chuan khawiahmah ka chhuah a phal dawn lo a, dil pawh ka dil ngam kher lo ang.

“Hon...i hman hunah lo kal lawk teh aw..” Living Room kawngkhar atangin a rawn ti a, ka ip leh chawih pek, hetiang hi min koh dan ziah nimahse tunah chuan lemchan na vangin min ko a ni tih ka hai lo..chutak chuan min ti zam ta tlat.

“Ka hman alawm, ka lo kal ang..” ka ti let a, kan nula a lo thleng tawh tho bawk a, inchhung chet leh chawei na tihfel tih vel hi chu tih ka tum lem lo.

“Sawmi, engmah tih angai lo ania aw..kalsan tawp ang che..” ka ti leh rih a..Engmah a tih ka ring chuang lo nangin a mawiah tal ka sawi a ni ber.

A Office ka pan zet a, a lo awm lo..Inchunglamah zawk anih hmel. Mahni pasal te bula kal tur ni si in ka khur lo chauh mai..Hahthlak hian a..A room lam ka pan a, mahse, a lo awm chuang lo..Kan Roomah a awm ani ngei ang,mihrang kan chenpui leh takah chuan Room dang hman a rem ta chiah lo bawk atin ni.

Ka rin ang chiahin ka Roomah a lo awm a, chhuah tum tih hriat zet hian khumah a thawmhnaw hak tur a lo dah a, engmah thawmhnaw inbel lo in amah a awm thung.Boxer a ha mawlh mawlh a, a hnunglam chauh ka hmu thei a, bakah kha leh chen ka pasal a lo ni tawh a, engmah ka la theihnghilh lo.

“Eng nge a?” ka ti a, ka chhungril a mahni inthiam lohna lo thawk leh chuan ka awm a ti nuam thei lo.Mahse, inthlahrung dek anga lan erawh ka tum bau lo.

“Min tih thinrim hi tum lo teh aw..” ati hmuk a, ka rinlawk anih avangin mak ka ti lem lo.Tawngkam tha taka thil min sawipui turin ka beisei hek lo.

“Tih thinrim che ka tum lo,Mahse, Phone ka mamawh..”

“I mamawh apiang nei thei tur ni in i in ngai em?” a rawn hawi let a, a mitmeng hlauhawm lutuk chu en loh hram tumin ka hawisawn a..ka hlau a ni tih hriattir kher ka duh lo.

“Chulam ka ngaihtuah lo,mahse, ka mamawh..” ka ti let hmak a, ka beisei ai daihin ka aw pawh a chhuak mar tha.

“Okhey...hetiang mihring hi alawm hmuh ka duh chu,tlawm dek,min tih let tum miah lo ai chuan mahni nihna pawh hre lo khawp a huaisar hi alawm ka hmachhawn duh..” tehduah chuan a....

“Chuti anih chuan ka lei thei anih chu..ka chhuak anga ka lei ang..” ka ti hmak a, ka inher a, kawngkhar lam ka pan a, mahse, min rawn thlen khalh hman tlat, a thlawk thei emawni ka ti rum rum tawh.

“Engmaw i sawi kha?” khauh zet hian a ti a, hetianga a tawng tawh chuan hlauhawma hnai tih hre tur khawpin amah ka hrechiang tawk tawh.

“Ka chhuak anga, ka lei ang..a chiang em?” a mitah tak ka en a,ka hlauhna te chu nakinah ka la ngaihtuah ang chu..tunah chuan khawilai kilah emaw hlauhna tih vel hi chu ka hnawh bo rih angai.

“I nghawng nalh zet kha ka thuaichhum chak zek zek tih hi hre teh...” Kawngkhar a ngheng a, a inkuangkuah zui nghal daih bawk.

“Ti ta che, hetiang renga dam ai chuan ka thlang zawk daih” a mithmul a ti sang awk a, ka beisei loh zet hian a nui chhuak hawk mai..A awmdan chuan min ti hamhaih lutuk a, sawi leh mai tur hre lo in ka ding ngawi ngar mai.

“Ni lo e, tueawm angin Midang thah hmang nih ka duh lo,ka duh loh zawnga awm te chu hrehawm takin ka siam a, an tuar theih loh tawpah an mahni an intihlum mai zel zawk...” a nui leh a, a hma khan ka hlau miah lo..Mahse, a nui ri chuan ka chhungrilah min man a, ka khup a khur ta dar dar mai.

Simon-a leh Sawmtluangi an chhuak a, chau inti hle si kha Simon-a dawr vel enkual ve a chak a, a kal chhuak ta tho,Tlana an hruai daih bawk.Chhuah tum buai lo law law ila a hahdam mai zawk ta ve ang.

“U Hmingthan, Pi in a be duh che a..” Pangpar vel ka lo khawih mawlh mawlh laiin Chhungi’n a rawn ti a, Landline kan kawl lo a, ka phone a chhe bawk nen tihngaihna a awm lo.

“Hello...” ka kut hnunglam in ka chala  thlan awm chu ka hru a..

“I Phoneah ka be thei lo che a, Mama ka bia a, i phone a lo chhe daih animaw?’ a rawn ti nghal mawlh mawlh a, a fapa in a vawm keh vek tih hria se engtin tak ngai ang maw?

“Nia, mahse, vawiinah Simon-an a rawn leiin ka ring” ka ti a,kan dam that leh that loh min rawn zawt leh hnuhnawh a.

“Um, kan tha e..nangni lam engtikah nge min rawn tlawh ang?” ka ti leh a.

‘Ruth-i hian lo kal chu a duh a, mahse, i pu boral ta thut bawk nen zin ka chak lem lo a.In dam that tho bawk chuan lo kal pawh ka tum hnai lo ‘ a rawn ti leh a.Ka pu chanchin a sawi chhuah takah chuan Simona bawk ka mitthlaah a lo lang a, ka pu kha a that tak tak angem?

“Bawihi..ka sawi i hre thei em?” ka nu in a rawn tih leh vau vau chuan nuam ti lo zet hian ka nui lui a.

“Aw, hrethei e..Pangpar ho ka sawisa kual a..’ a sawi ka hriat miau si loh avangin ka duh duh ka sawi ta zawk.

“Hna i kal lo ami ka tih chu mawle,ka sawi i hre miah lo anih kha..” ati leh a,lungawi lo aw ka hre tel bawk.

“Aw, ka bansan ta mai..ih..Nu, ka tisualin i hria em?” ka ti leh rih a.

“Engber chu?”

“Hna ka bansan ta ngawt hi..Simon-a nen kan duhthlanna nimahse ka ngaihtuah a...” sawi zawm loin ka ngawi leh rih a.

“In inneih hmain i lo thawk tawh a, mahse, kei chuan diktak chuan hna nei lo a Inah i awm kha tha ka ti zawk, Nupui chuan inchhung enkawl mai se tih hi ka duhdan ani reng reng a...i ngaihdan ka hre lo” ati a.

“Ka hre lo, mahse, Simon-a zawkin ban hi tha ati a” ka ti leh a..

“I remtih tho chuan tha ka ti zawk,Pathian zarah kan mamawh lo a, Mama i enkawl kha tha ka ti zawk” ati leh a,nufa anni a,an ngaihdan pawh a in ang chiah,hetiang tak tak hi ka ban chhan nise chuan a zia ang chu, mahse, tunah chuan hremna avangin hna ka nei ta lo...

“Nia, nitin ka chhuak thanga ka la awm thiam lo mai mai pawh aniang, engpawh nise tukin ah Sawmtluangi a lo thleng a...”

“Tu maw?”

Ka sawi nawn leh a,”ehe....engchen nge a awm dawn?” a aw danglam ta daih chu ka hriat hmaih lo.

“Hetah a awm ve rih dawn anih ka ring..”

“Ole, Mama ka lo bia ang, anih phawt le..” ati a, chhan pawh ka chhan hmain a dah daih bawk.

Dar nga velah an lo haw a, ka phone tur pawh a rawn hawn nghal thlap,roomah ka zui chho a, midang awmlai chuan nupa kan nih angai ve tlat.

“Room hran i hmang dawn em?”

“Aih,midang hriatah kan boruak tha lo hi tih lan kher ka duh lo..”

“A tha lawm..”

“Khumah i mu anga, kei chu Couch ah ...diktak chuan mut dun ka chak lem lo e..” ati leh a, chhan en ah pawh ka en lo.

Chawei kham hnuah khumah mu chungin Tv ka en a, Simon-a erawh chu Officeah a awm thung, Sawmtluangi a room lamah a kal nghal nalh bawk, an kalna chanchin ka zawt a, nuam a tih thu a sawi nangin a chauh vang animaithei., a mood a dik vak lo niin ka hre thung.

Vawiin khan Simon-a Officeah lehkhabu ka chhiar a, ka chhiar zo hman ta lo,ka keng chho ang ka ti zet a, ka theihnghilh leh daih,ka tho sawk sawk a, chhiar zawm ka duh tlat..Tlana a awm emaw ka tih kha a lo awm lo, Living room a lo ruak hiau mai..Kawngkhar ka va en a, chhunglamah a inkalh thlap, a lengchhuak lo tihna animai..Simon-a office ka pan leh a, kawngkhar ka kik tur chiah chu Hmeichhe aw ka hriat takah chuan ka ding dat mai..Tu nge ni ang? Sawmtluangi...ni dawn tak..Kik tumin ka kut ka lek kang leh hman chiah..

“Emily kha engvangin nge i bulah a awm?’ tah aw tiau hian a ti a, mak ti zet hian ka ang pham mai..Emily pawh a lo hre vek tihna anih chu..

“Hush..tawng ring lo teh, chuan, va mu tawh rawh..a tlai tawh ania..”

“Aih, i nupui hi chu ka thik lo..mahse, Emily kher hi chu ka ngaithei lo..in awmdun dan ka hmuh te kha avaiin ka la hre vek...” ati leh a...ka taksa a khawng nghal lah mai..ka insangmar nghal teuh bawk..