BLACK HORSE- 11

Chapter- 11

A nunah hian kei chiah hmeichhia ka awm lo ang tih ka hria, ka pasal anih hma khan keipawn ka nunah Mipa dang ka lo la lut ve tawh tho,mahse, tumah hi pasal ka neih hnuah ka la lut leh lo a, a hmasa ami nen khan inzawmna neih leh lah ka duh hek lo.Mahse, Simon-a hi chuan Emily pawh tun thlengin a bulah hnathawk hmingpu siin inzawmna a la neih pui a, tunah pawh Sawmtluangi kan hnenah cheng turin a hruai lut leh ta,a em em ka ti ve ta tlat.

“Theihnghilh hmak rawh, thil kal tawh hriatreng hi a tulna a awm lo ania” Simon-a aw hian a ti leh a, ka ngaithla zui peih tawh lo.Engpawh sawi rawh se, ka rilru hi ka tih khauh angai, nitin min tihnat a duh avangin engthil pawh a ti thei..mahse, ka bei let ang..Ka na anih pawhin a hmuh laiin na angin ka awm tur a ni lo.

Ka mut hnu fe ah a rawn lut a, ka muhilah ngai se ka duh avangin chet pawh ka che duh lo,thawm dim deuh hian a vei kual a, ka mutna bulah a tawp chat mai..Thawk pawh ka thaw tha ngam lo,a reh vang vang hnuah a kalsawn thawm ka hre ta hram..

Zan hmasa lam ka mut that loh luat vang kha ani ngei ang, ka mu tha ta phian, ka harh leh chuan khua a lo eng uar tawh, pawn lamah Sava thawm a ri nawk nawk a, muangchang hian ka inlet a, Simon-a mutna lam ka va hawi a, a lo awm tawh lo.Mutna hnu pawh engmah a awm lo..engtiklai mahin ka thawh khalh ngai mang lo ve hrim hrim.

Ka inphihfai a, Kitchen lam ka pan thla a, kan nula a lo thleng der tawh.Thingpui ka duh leh duh loh min lo zawt thuai a, ka lu ka thing mai.Pawnlam ka pan a, nimin a ka pangpar phun thar ho kha nizanah ruah a sur ta miah si lo a tui pek an ngai ngei ang.

“I va han tlan chak tak..” nui ri hian a zui nghal a, Gate lam ka hawi vat a, Simon-a a rawn tlan lut a,a hnungah Sawmtluangi a rawn tlan ve bawk.Kei nen a kan tih ngai miah loh thil an lo ti dun leh ta, an insawizawi ringawt ang nge thildang an va ti ang..?? Ka lu ka thing nawk mai,an duh duh lo ti ang hmiang..Ka ngaihpawimawh nasat poh leh ka na tam ting animai.

“Goodmorning..” ka bula rawn din pahin Simon-an a rawn ti sup a, nui chungin ka chhang let ve mai,Sawmtluangi ka en a, a hah bawk aniang,a biang a tai hlar mai..a kekawr hak a mar lu hrat, a hmeichhe nihna angai ngaiin a lang thei thaw thang..

“In va tho hma ve.. “ nui chung hian ka ti a, a thle bak a, a sam chhawl leng tla chu a hui kiang a..

“Mama nen chuan hei hi kan tih than dan ania, nuam ka ti thin..heta lo awm ka chak phah..” a nui var var bawk, tih than an ngah dun awm mange tih ka lo ngaihtuah daih.

Nizan kha chuan Emily vangin a mood kha a chhe hle a, tunah chuan a mood a fuh lutuk mah mah anih hmel, nizan khan Damdawi tha chi a lo ei te pawh ni hmiang, ka ngaihtuah zawng pawn ka luak a chhuak hlui mai.

Ka chhan let hmain vanneihthlak zetin ka phone a ri ta hlauh,ka en thuai a,Hriati a lo ni a, tun ang hunah engatan nge min rawn biak ang ka hrethiam lo.Ruatdika a lo let tawh em ka hre lo bawk.

“Hello..”

“Khawnge i awm?”

“Tun ang hunah khawnge ka awm ang? Inah animai lawm.” Ka ti a,a nui hak mai.

“Sangpuii nu a tha lo tih an rawn hrilh tawh che em?”

“Aih, engtikah nge?”

“Nizan atang khan a zual deuh a, a zia leh a, mahse zinglamah a zual leh a, i lo lang miah si lo a mak ka lo ti a, i theih chuan lo kal la..” a rawn ti a, a zual thu min rawn hrilh tum khan ka kal ngei a, mahse, thil thleng kha a mak ta nuaih anih kha..

“Ok, ka  lo kal nghal ang.. ‘ka ti a, Simon-an min melh reng tih ka hria.Mahse, tun tum chu min that nghal dawn pawh nise ka kal ang..Engmah in min dang hauh  lo ang.

“Tu nge a?” bung vut hian a rawn ti a.

“Hriati, Sangpuii nu nizan atangin a zual leh a, kal nghal ka duh..i lo kal ve dawn em?’ pawisak nei lo zet hian ka tih zawm nghal zat,a mit a tizim a, eng nge a ngaihtuah ang tih ka lo ngaihtuah ve thung.Min hnial a duh ang, mahse, natna thil a ni a, chumai bakah Sawmtluangi awm lai chuan min hnial hreh in ka ring bawk.

“Sangpuii pawn engmah a rawn sawi lo a..chuan,” ati hman chauh a, a phone a rawn ri ve ta thung..a kekawr ipte atangin a phawrh a.

“Hello..?’ ati a,a ngawi leh vung vung a, Sawmtluangi angaihna hrelo zet a ding chu ka nuih lui sak a,min thik lo ang khan a insawi a, engvangin nge thik pawh min thik reng ang? Ka ta a ni tlat lo..

“Nia, hei kan lo sawi mek a, kan lo kal nghal dawn nia..” ati leh a.a off zui a, a kekawr ipteah a thun leh mai.

“I u ania, ka intleuh zuai anga, kan kal nghal mai dawnnia, a chatthla chiah a rawn ti a..” ka tawlh hnung deuh dawrh a, nimin leh nizanah pawh an kiangah awm tur ka ni asin..ka thiannu tana mi pawimawh em em natna khuma mu a, mangang taka an awm laiin kei erawh ka mimal buaina ngawt in ka lo buai a, min rawn tlawh tura ka tih kha a lo lang ta miah lo pawh thil mak a ni lo.Keimah hi kal tur zawk ka nih vei nen..

“Um...Sangpuii biak kan tum lawk ang..” ka aw a lawi vek, kan naupan lai ka mitthlaah a lo lang, Sangpuii nu pangpar khawina kan tihkeh tum te, kan pahnih tana kawr in ang leh pheikhawk in ang chiah min leisak tum te kha,thisena inzawmna kan nei miah lo chungin ka ngaina a, ka chhungte tak tak angin ka lo en thin a, min thawng na kher mai..

“Ok..ngaihtuah hah lo la,ka inbual rei lo ang, bakah vawiinah an vui nghal dawn lo hlauh a..Hmanhmawh lutuk pawh angai lo..” ati leh a, ka mittui rawn hnai lutuk chu duh lo in ka khap lui sak sak a, Sangpuii nu tan anih rualin khatianga keimah min ngaihtuah na tawngkam khan ka chhungril a fan lo thei lo.

“Sawmi,nilengin kan awm ka ring a, kal duhna i neih chuan Tlana lo hruai mai ang che..’ ati leh sup a, a inher a, inchhung lam a pan zui nghal a, kei erawh chu Pangpar bula thutna awm lam chu ka pan ve thung.Sangpuii ka bia ang ka ti zet a, mahni inthiamlohna avangin ka be leh ngam ta ngang lo.

Insiam turin Room lam ka pan a, Simon-a a lo inbual zo ve chiah bawk,kawr ha lo in Boxer nen a lo awm a, ka lut thawm a hriat veleh min rawn en vut bawk.

“I be thei em?” ati sup a, ka lu ka thing mai.Ka thawmhnaw dahna lam ka pan a, ka thawmhnaw hak tur ka la chhuak a, ka chhungril ngui lutuk chuan min ti chau hluah hluah.

“Sorry...” ka hnung mai atang hian a rawn ti sup a, min rawn hnaih lai ka hre lo, engvangin nge ngaihdam min dil ngawt nachhan phei chu ka hre lo lehzual.

“Eng nge a?” hawi let chuang lo hian ka ti sep a.

“Nizan khan Sangpuii chuan min rawn bia a, mahse, Room ka rawn chhoh khan i lo muhil tawh a, zingah lah khan i mutui bawk nen ka kaitho duh ta lo che a..” ati ta duah..nizan khan reife ka mutna bulah a ding a, hei vang chiah hi a lo ni dawn anih hi..

“A pawi lo..” ka ti leh a, ka tum aiin ka aw a chang, bakah pawi a tih tak tak ka ring hran lo,min tih hrehawm tumin a buai a.Midang nen kan inzawmna pawh tihchah a la duh maithei,tun hi a bul tanna ah ka ngai mai ang chu.

“Min en teh..” a ti leh sup a, ka che chuang lo,ka darah a rawn vuan a, amah en turin min kuai her a,ka tang deuh nangin ka en ta tho.

“Kan buaina nen hian a inzawm lo,i awih em ka hre lo, mahse, pawi ka ti tak tak..i thiannu in a mamawh lai chein ka hrilh lo che a, ka dik lo tih ka pawm thlap..”  ka insum hman lo, ka mittui a rawn baw hawk a, ka tum loh tawpin ka insut ta hlawp hlawp,eng ber nge ka tahpui ka hre lo..

Min rawn kuah a, a awmah ka hmaiin ka nawr a, ka mittuiin a awm a ti huh hlap bawk, dimtein ka  hnungah a chul hauh hauh a, ka samah a fawp vang vang bawk, a awmdan engkim chuan ka tah a ti chhuak zual zel thung,hetiang hian ka thinrim te, rilru hahna ka neih chang apiangin min hnem nan leh a tihreh nan a hmang thin a, thla khat aia tam kan nupa karah khi a awm ta, tunhnai ngat phei chuan kan inzawmna zawng zawng a chhu chat fel hmak a, a nupui ka nih tawh loh thu leh min tih hrehawm a tum thu a sawi zui bawk a...Mahse, tunah chuan hmana ka hriat thin ka Pasal, Simon-a ngei kha a ni leh ta tlat..Tihderna tel lo in min duat a, min hnem bawk...

Engchen nge ka tah ka hre lo,ka Phone a rawn rik takah chuan min kuahna atangin ka inlahrang a, ani pawn min dang lo,min enzui reng tih erawh ka hria,Ka phone ka en a, Sangpuii a lo ni a.

“Hello..thiannu..”

“Kan chanchin i lo hria em?” dam thlap hian a rawn ti a, nuam lo ka tihna a belhchhah sauh, ka lan har vangin min khak in rawn thinrim se chuan ka ziawm zawk mah ang.

“Aw, lo kal kan tum mek a..” ka ti a.

“Rawn hmanhmawh duh suh,nizan khan ka rawn call dawn che a, a tlang thei lo a.Simon-a ka rawn hrilh a, i nuam vak lo tih a lo sawi a..vawiin pawh i nawm vak loh chuan lo kal duh suh,naktuk lamah erawh ka phut che a..” a rawn ti leh a, Simon-a lam ka hawi a, a ngaihna hriat loh hmel zet hian min lo en thung..Kal chhuah a phal loh avangin ka damlo niin a sawi mai zawk nge ni ang ka hun hmandan te avangin ka damlo tak tak niin a hre zawk ka hrethiam lo.

“Ka tha alawm, kan lo kal tep e” ka ti leh a,a aw dam thlap mai chuan a hna avang anih rualin amah a inbuatsaih lawk nasat tur zia min ngaihtuah tir a, ka nu hi boral ve ta se...ngaihtuah pawh ka ngaihtuah ngam lo e.

“Sangpuii ami?” zawi sup hian a rawn ti a, ka bu rigawt, kan boruak tang at thin kha a dam ta riau..he nun hahdam thlak tak hi kan nun diktak kha a nih thin vei nen,tunah chuan mumang ang maiin a liam tawh a, keimah hi ka tang ta teuh reng mai.

Sangpuii te In kan thlen chuan mi an lo awm nual nangin lumen tur anih vang nge ka hre lo a, an tam lutuk lo.Chhungkhat laina leh nu leh pa rual anni deuh mai.Sangpuii mit bui lak mai chu ka en a, a tap nasa thawkhat in ka ring.A nu leh pa angaihtuah avangin pasal pawh a nei lawk lo a, mahse, a nu khan a boral hma ngeia nei turin a tur a, a nawr nasat lutuk vangin a nei ta kha ania, tunah chuan a pa chauh a ni ta, mahse, Mizo pa ve ngeng ngawng tak mai a ni bawk a, ruang bulah pawh thu lo in midang zingah a thu a, an titi pawh pangngai takin a zawm ve thei mai..

“In lo phei dawn em?’ ka nu in ka bula thut pahin a rawn ti a.Simon-a kha Sangpuii pasal nen thil pawimawh an tih avangin an chhuak a,an kalna tur kha min hrilh tak nangin ka hre leh tawh lo.

“Nakin deuhah ka lo phei ang, Simon-a te an la buai em mai” ka ti a, min en vang vang a, ka hmelah ka rilru hahna ka tihlan loh hram ka beisei takzet.

“Simon-a te chu ka hmu alawm, lo va hruai phei rawh a ti a..” ati leh a, engemaw a hriata min care leh tak viau ni??

“Chuti anih chuan a tha nimai lawm,Sangpuii ka be lawk anga, kan kal dawn nia” ka ti a, ka thutna piah deuha Sangpuii thu chu ka va hrilh a, pawi a lo ti lem lo.

“Va phei rawh, bakah i nawm loh hmel em mai” ati ve mai,engmah na ka nei si lo,engtin nge ka nawm loh ngawt ang?

Kan naute in min lo hmuh veleh phur zet hian a au a, min rawn kuah a, ka kal khat bawk nen min lo ngai ve ngang mai.Haw tawh lo in hetah hian awm hlen mai ka chak zek zek, ka In ni a ka lo hriat thin kha ka tan chuan Jail lianpui a ni tawh zawk a, Simon-a nena nunhlui lo nei tawh nen kan cheng ho dawn ta bawk nen ka thawpik hluah hluah.Ka nu leh ka pain kan hna ka bansan chungchang min zawt a, ka sawi ngai miah lo in Simon-an ka bansan tih a lo hrilh vek tawh,Ka nu in pawi a ti a, ka pa erawh chu pawi ti awmin a awm lo.

“Min hel deuh char char maiin ka hria..” ka hnung lam atang hian mipa aw hian a rawn ti a, ka hawi let a, Ruatdika nen kan inmelh ta ran mai.Sangpuii nu kan vui liam atangin ni thum lai a liam leh tawh, nitin ka kal a, Simon-a pawn min dan a tum lo.A vuini  leh thlan siamni khan Simon-a pawh a awm nileng ve tho a, Ruatdika leh Hriati pawn an tihtur an hlen tha tho.

“Hel hran nang.” Ka ti a, diktak chuan ka hel ,Simon-a ka hlauh vang ni lo in Ruatdika hian ka chungah thil tha lo tiin ka hre tlat tawh a, hlauhna aiin thinrimna leh hmuh peih lohna hian min tibuai ta zawk.

“Ni thum zet chu ka awm lohna lamah hlir i awm in ka lo hre ve thung a..” ati leh a, ka sir a thutna awmah chuan a rawn thu ve a.

“I ngaihdan anih chu..” ka ti leh mai.

Simon-a nen an inhau leh miah lo a,ka chungah pawh thinrimna nei awmin a awm ta rih lo.Min ngaihven em em a,Sangpuii te inah kan kal emaw kan haw hnuah pawh inhauhna tur chi engmah kan sawi ngai lo.Vawiin pawh hian min thlah thlap a, ani erawh Dawr a tlawh loh rei deuh tawh avangin a kal thung.

“Nia, animaithei, chuan,Hna i bansan tih ka lo hria a” ati leh a

“Um, In lamah awm tam ka duh a..” ka ti tha ve mai.Kha zan kha engtin nge ka zawh tan ang tih ka ngaihtuah a, ka hriatsa aia min thawng tu hriat belh hlauhna in ka khat lawi bawk.

“In mamawh hran hleinem tiraw..bakah in pa hi i ven deuh loh chuan Emily hian a chhuhsak mai ang che,taktakin englo ania, hmanni khan min hmu duh hle khan ka hre sia, tunah lem min hel leh char char lawi a, mak ka lo ti deuh a,Hriati pawn a lo ti ve tho a” ati leh a,ka nui ringawt.Ka nuih erawh a za miah lo..

“Hmu duh a, tunah chuan ka hmuh duh chhan che kha ka hre tawh a, angai tawh lo..” ka ti a, ka hre miah lo..Ngaihtuahna thar ka neih tak vang ani zawk.

“Anih chu mawle, mahse, khami zana thil thleng kha engmah i hre lo tak tak ami?”ati leh a, ka beng a verh zak mai.

“Hre tawh e, engmah thleng a awm hleinem, Inah ka ruih vangin ka haw duh lo a, Hotelah khan ka riak animai a” ka nui lui hak bawk, a hmel buai nak mai chu ka en a, he mihring hian ka lakah thil tha lo tak a ti niin ka hre ta tlat bawk.

“Aaahh. I hrechhuak anih chuan a lawmawm, i rui lutuk khan i hriat pawh ka lo ring lo a..” za lo zet hian a nui a..

“Tlem chuan ka buai ta deuh,Simon-an a hre thawi a..’ ka ti leh a, a rukin a hmel inthlak danglam chu ka en ru kar a.

“Um, ava zia lo tak ve mawle,eee, taka Emily leh Simon-a kha vawiinah ka hmu tak asin” ati leh a.

“Um, hna a kal lo rei tawh a, tihtur an ngah khawp ang” ka ti tha ve mai.

“Nia,an ngah ang,Phunchawng huanah in kal ngai em?” ati leh a, ka lu ka thing mai, kan naupan laiin huan kan siam thin a, kan kal nasa thin.Ruatdika pawh hi a lo kal ve fo thin a,a hmun a rem bawk nen nileng lengin Dil lian vak lo awmah khan kan cheng thin anih kha.Mahse, tunah chuan ka ram ani tawh thung, ka pa in a ram neih ang ang te kan unau tan a dah vek a, Pasal nei tawh mahila hmeichhe awmchhun ka ni a, min pe tel ve tho.

“In pa khan Showroom sawn nan a hmang dawn an tih thawm ka lo hria a, a remchang ngawt ang chu” ati leh a, ka ang pham mai.Simon-a hian ka pa in ka ta turin a dah tih a hre miah lo ang, ka la hrilh hauh lo.

“Hmang dawn tih pawh ala awm chiah lo,hmanni khan kan sawi dun a, mahse, nakinah chuan hman pawh kan la hmang ang chu..bakah khawpui chhung lo hi chu a rem chiah lo a..” ka ti a,engmah ka hrelo tih sawi lan kher ka tum lo,bakah, Showroom atan chuan Bawngkawnah In lian leh remsa thlap,a hmanlai a awm reng a, Phunchawngah engvang mahin a sawn hauh lo ang..Dawr bungraw hrang hrang te stock na hmun tur atan hman a tum anih erawh chuan thuhran..

“Um, ka hresual animaithei..Showroom nilo in Service centre tur pawh ani zawk maithei..in pa te zawng a nei pep pep em mai” ati leh a, ka chhang lo.Ka pu ro thihsan te kha a ta ani tawh a, tunah phei chuan a duh duh ti thei turin tuman an dal thei tawh hauh lo ang.

Simon-an min rawn lam hman ka rin loh avangin Ruatdika ka inthlah tir ta zawk, Ruatdika hi a hma ang khan ka pawh ta miah lo, mahse, Simon-a nihna diktak ka hriatchhuah nan chuan Ruatdika hi ka kawm luih angai, ani hian engkim min hrilh thei anga, min zawn chhuahsak tura ka tih pawn a zawng thei ber bawk ang.

Sawmtluangi a lo awm a, Ruatdika pawh in ah a lo lut ve a, ka inhmelhriattir a, Thingpuite a in veleh rih bawk.A haw veleh Simon-a Officeah ka lut nghal a, ka hai kual theih ang ang ka haikual chung pawn ka duh ka hmu chuang lo.Ka pa ka call ta ngawt.

“Eng nge nita Mampui?” dam duam hian a rawn ti a.

“Pa, Phunchawnga ka ram tur min pek kha LSC engtik nge min pek ang?”

“Aw, kha te chu Simon-a kutah ka dah vek kha, a kawl ang..pek che tul a la ti lo anih loh chuan a theihnghilh aniang” a rawn ti awlsam mai.Ka kut ka humruh a, engvangin nge ka kutah min pe miah lo in ama tan lo hman a tum ngawt??,a la hre lo emaw ka ti a, a lo hre vek bawk.Ruatdika sawi kha a dik ngei ang..

“Aaaa, ka rawn zawt mai mai che mawle, ka lo zawt ang” pangngai thei ang ber hian ka ti a.

“Um, lo zawt la, bakah nimin khan a sawi zauh a, Workshop leh Showroom a inhnaih mah mah a, khulaiah khuan sawn ka duh maithei a tih kha” ati leh a,’aw’ tiin ka chhang tak nangin ka chhungril erawh chuan ‘ teuh lo’ a ti nghek thung.Ka hna, ka thu awm miah lo in tihluihna in min chawlhsan tir tawh a, ka hminga ka neih ve chhun liau liau hi chu min neih sak tawh hauh lo ang.

Dar 8 rik hma hretin a lo haw a, nidang ang lo takin zu a rawn in tih ka hre nghal mai bawk.Zu hi a in tam lo, in lo chu a ni lo a, mahse, in nasa a sawi tur a ni lo.Party leh an thian ho thil tih nikhua ah lo chuan a in zen zen lo.Beer erawh a in nasa, tui in ang vel hian a in nimaiin ka hre thin.Roomah ka zui chho a, Kawngkhar a nem hawng a, khumah a thawmhnaw hak lai nen a let thla a, rui chhia a ni lo.

“I thawmhnaw kha phelh hmasa la..” ka ti a, phelhsak ka tum lem lo.Tun hnaiah kan inhau lo pawh animaithei, mahse, chhungrilah hian kan in pawh chuang hauh lo.

“Tu nge vawiinah In ah thlah che?” a rawn tho a, min melh run bawk.

“Ruatdika..Sangpuii te Inah kan inhmu a..’ ka ti a,

“In inhmu a, chuan, keipawh min ko thei reng a, min ko lo in Ruatdika bawk i inthlah tir a..” min zawt lo in a hriatsa a sawi zawk nimaiin ka hria.

“Thil dik lo tih ka nei ami?” ka ti let ve thung.Ruatdika hi a mil miah lo tih ka hre ve tawh a, a hma kha chuan a haw ve hrim hrimah ka ngai a, tunah chuan haw satliah a ni lo tih ka hria.

“Aih, nei nang, mahse, i chungah zahngaihna ka lo lantir nasa leh mah mah tawh niin ka hria” a ti leh nghut a.

“Oh, i ngaihdan dan le..engpawh nise khawiah nge ka pa in ka ram LSC  a pek che i dah?” ka ti  nghat a.

“I ta maw? Ka lei tawh, ka hmingin a awm” rapthlak ti zet hian ka en a.

“TU nge leitir che? Ka ta ani a, ka thu lo chuan tuman an hralh thei lo..” ka duh aiin ka au ring hret.Min rawn en a, a ner nawk a.Thil tenawm hmu niawm tak hian min melh bawk.

“Keima thu in ka lei, i Ac i check dawn nia, i duh khawp loh leh ka pek belh ang che”

“Mihring i ni em?”

“Aih, ni nang..bakah, engatan mah i hmang dawn chuang lo a, keiin ka hmang tangkai duh tlat thung..” ati leh a, a kawr hak lai a phelh a,a awmna hmunah a kalsan tawp. Room a chhuahsan thleng pawn ka la che sawn ta chuang lo..

Sawmtluangi’n chawei tura min rawn koh pawn ka thutna ngaiah ka lo la thu ta tho,phur lo zet hian ka zui thla a,engmah ei chakna ka nei lo.

Mu chungin Tv ka en a, Simona-a hmanhmawh zetin a rawn lut a, ka Tv en lai hliah takin a rawn ding a, min melh run bawk.

“Ka Officeah tueawm a lut a, ka Computer a khawih a..” ati tuar a, ka phu zawk bawk.

“Engmah chutiang ka khawih lo?” ka ti a, ka khawih lo reng bawk.

“Nangin i khawih loh chuan tuemaw a lut tihna animai,Sawmtluangi a ni dawn lo a,khawih kher che ka duh lo ania” ati leh a, a aw a ring ta lo.

“Engmah ka khawih lo..CCTV en mai la..” ka ti leh a,a thle buk a..

“Vanduaithlak takin a in off hlauh mai..he Inah hian rukru kan kawl tih ka lo hre miah lo a..” min melh chhuk run mai..

“Rukru ka ni lo..”

“Kei lo chu duh duh a lut tlang thei pakhat chiah a awm, chu chu nangmah..Sawmtluangi chuan chahbi a nei ve hauh lo ang” a nui hawk a, nuihzat vanga nui a ni lo tih ka chiang nang mai.

“Mahse, engmah ka khawih si lo..” ka ti leh talh..A sawi dik chiah, amah leh keimah chiahin chahbi kan nei.

“I thil lak kha ka tan a pawimawh zia i hria em? Ka chhuhsak luih kher che ngai lo in min pe rawh” min rawn hnaih a, eng nge a tihbo ka hre lo hulhual...

“I computer khawih theih loh turin i dah a, engtin nge ka khawih ang? “ ka ti ve thung.

“Computerah chuan lak an tum ringawt a, ka lock miau avangin a la thei lo.Computer bulah khan pendrive ka dah a, kha zawk kha alawm ka zawh che” ka lut ngei,mahse chutiang engmah ka hmu lo..ka chil ka lem khawlh mai..

“Ka khawih lo..” ka sawi zo hman tawk..ka hrawkah a kut zungtang sei thlurh chuan a rawn rek a...a kut ka vuan a, phelhsak ka tum a, mahse, awmzia a awm lo..a hmer na tial tial a,ka thaw a chham a, a hmel ka hmu phe vek bawk.